Showing posts with label Arvind Kejriwal. Show all posts
Showing posts with label Arvind Kejriwal. Show all posts

Tuesday, October 12, 2021

ਦੋ ਦਿਨਾਂ ਲਈ ਪੰਜਾਬ ਆਏ ਆਮ ਆਦਮੀ ਪਾਰਟੀ ਸੁਪਰੀਮੋਂ ਅਰਵਿੰਦ ਕੇਜਰੀਵਾਲ

12th October 2021 at 6:56 PM

ਮਰਹੂਮ ਜਥੇਦਾਰ ਸੇਵਾ ਸਿੰਘ ਸੇਖਵਾਂ ਦੇ ਪਰਿਵਾਰ ਨਾਲ ਦੁੱਖ ਵੰਡਾਇਆ

ਅੰਮ੍ਰਿਤਸਰ ਏਅਰ ਪੋਰਟ ਤੋਂ ਸਿੱਧਾ ਪਿੰਡ ਸੇਖਵਾਂ ਪੁੱਜੇ 

ਫਿਰ ਮਾਤਾ ਰਾਣੀ ਦਾ ਅਸ਼ੀਰਵਾਦ ਲੈਣ ਜਲੰਧਰ ਰਵਾਨਾ ਹੋਏ 


ਅੰਮ੍ਰਿਤਸਰ/ਬਟਾਲਾ: 12 ਅਕਤੂਬਰ 2021: (ਗੁਰਦੇਵ ਸਿੰਘ ਬਾਠ//ਪੰਜਾਬ ਸਕਰੀਨ)::

ਆਮ ਆਦਮੀ ਪਾਰਟੀ (ਆਪ) ਦੇ ਕੌਮੀ ਕਨਵੀਨਰ ਅਤੇ ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਮੰਗਲਵਾਰ ਨੂੰ ਦੋ ਦਿਨਾਂ ਪੰਜਾਬ ਦੌਰੇ ’ਤੇ ਪੁੱਜੇ। ਕੇਜਰੀਵਾਲ ਦਿੱਲੀ ਤੋਂ ਆਮ ਘਰੇਲੂ ਉਡਾਣ ਰਾਹੀਂ ਬਾਅਦ ਦੁਪਿਹਰ ਅੰਮ੍ਰਿਤਸਰ ਦੇ ਹਵਾਈ ਅੱਡੇ ’ਤੇ ਪਹੁੰਚੇ ਸਨ। ਹਵਾਈ ਅੱਡੇ ’ਤੇ ਪਾਰਟੀ ਦੇ ਸੂਬਾ ਪ੍ਰਧਾਨ ਅਤੇ ਸੰਸਦ ਮੈਂਬਰ ਭਗਵੰਤ ਮਾਨ, ਪੰਜਾਬ ਮਾਮਲਿਆਂ ਦੇ ਇੰਚਾਰਜ ਜਰਨੈਲ ਸਿੰਘ ਅਤੇ ਸਹਿ ਇੰਚਾਰਜ ਰਾਘਵ ਚੱਢਾ (ਦੋਵੇਂ ਦਿੱਲੀ ਤੋਂ ਵਿਧਾਇਕ), ਵਿਰੋਧੀ ਧਿਰ ਦੇ ਆਗੂ ਹਰਪਾਲ ਸਿੰਘ ਚੀਮਾ, ਵਿਧਾਇਕਾ ਪ੍ਰੋ. ਬਲਜਿੰਦਰ ਕੌਰ ਅਤੇ ਹੋਰ ਸਥਾਨਕ ਪਾਰਟੀ ਆਗੂ ਅਰਵਿੰਦ ਕੇਜਰੀਵਾਲ ਦਾ ਸਵਾਗਤ ਕਰਨ ਉਚੇਚੇ ਤੌਰ ’ਤੇ ਪਹੁੰਚੇ। ਇੱਥੋਂ ਹੀ ਕੇਜਰੀਵਾਲ ਅਤੇ ਬਾਕੀ ਆਗੂਆਂ ਦੀਆਂ ਗੱਡੀਆਂ ਦਾ ਕਾਫ਼ਲਾ ਮਰਹੂਮ ਸਾਬਕਾ ਮੰਤਰੀ ਜਥੇਦਾਰ ਸੇਵਾ ਸਿੰਘ ਸੇਖਵਾਂ ਦੇ ਪਿੰਡ ਸੇਖਵਾਂ (ਬਟਾਲਾ) ਲਈ ਰਵਾਨਾ ਹੋ ਗਿਆ ਹੈ।

ਸੇਖਵਾਂ ਪਿੰਡ ਪਹੁੰਚ ਕੇ ਅਰਵਿੰਦ ਕੇਜਰੀਵਾਲ ਅਤੇ ਭਗਵੰਤ ਮਾਨ ਸਮੇਤ ਬਾਕੀ ਆਗੂਆਂ ਨੇ ਮਰਹੂਮ ਜਥੇਦਾਰ ਸੇਖਵਾਂ ਦੇ ਪਰਿਵਾਰ ਨਾਲ ਦੁੱਖ ਸਾਂਝਾ ਕੀਤਾ। ਜਥੇਦਾਰ ਸੇਖਵਾਂ ਦੀ ਧਰਮ ਪਤਨੀ ਸਰਦਾਰਨੀ ਅਮਰਜੀਤ ਕੌਰ, ਬੇਟੇ ਅਤੇ ਪਾਰਟੀ ਦੇ ਕਾਦੀਆਂ ਵਿਧਾਨ ਸਭਾ ਹਲਕਾ ੇ ਇੰਚਾਰਜ ਜਗਰੂਪ ਸਿੰਘ ਸੇਖਵਾਂ ਅਤੇ ਛੋਟੇ ਬੇਟੇ ਮਹਿਰਾਜ ਸਿੰਘ ਨੂੰ ਦਿਲਾਸਾ ਦਿੱਤਾ ਅਤੇ ਪ੍ਰਮਾਤਮਾ ਦਾ ਭਾਣਾ ਮੰਨਣ ਲਈ ਹੌਸਲਾ ਦਿੱਤਾ।

ਸੇਖਵਾਂ ਵਿਖੇ ਮੀਡੀਆ ਨਾਲ ਸੰਖੇਪ ਗੱਲਬਾਤ ਦੌਰਾਨ ਅਰਵਿੰਦ ਕੇਜਰੀਵਾਲ ਨੇ ਕਿਹਾ ਕਿ ਜਿਸ ਗ੍ਰਹਿ ਸਥਾਨ ’ਤੇ ਜਥੇਦਾਰ ਸੇਵਾ ਸਿੰਘ ਸੇਖਵਾਂ ਅਤੇ ਸਮੁੱਚਾ ਪਰਿਵਾਰ ਆਮ ਆਦਮੀ ਪਾਰਟੀ ’ਚ ਸ਼ਾਮਲ ਹੋਇਆ ਸੀ, ਅੱਜ ਉਸੇ ਘਰ ਅਫ਼ਸੋਸ ਪ੍ਰਗਟ ਕਰਨ ਆਉਣਾ ਦੁਖਦਾਇਕ ਹੈ। ਕੇਜਰੀਵਾਲ ਨੇ ਕਿਹਾ, ‘‘ਜਥੇਦਾਰ ਸੇਖਵਾਂ ਪੇਟ ਦੀ ਬਿਮਾਰੀ ਤੋਂ ਪੀੜ੍ਹਤ ਸਨ। ਜਿਸ ਦੇ ਇਲਾਜ ਲਈ ਦਿੱਲੀ ਦੇ ਹਸਪਤਾਲ ’ਚ ਵੀ ਕੋਸ਼ਿਸ਼ ਕੀਤੀ ਗਈ, ਪ੍ਰੰਤੂ ਉਸ ਸਖ਼ਸ਼ੀਅਤ ਨੂੰ ਬਚਾਇਆ ਨਾ ਜਾ ਸਕਿਆ, ਜਿਸ ਨੇ ਪੰਜਾਬ, ਪੰਥ ਅਤੇ ਸਮਾਜ ਦੀ ਸੇਵਾ ’ਚ ਭਾਰੀ ਯੋਗਦਾਨ ਪਾਇਆ।’’ ਇਸ ਮੌਕੇ ਸਥਾਨਕ ਆਗੂਆਂ ਵਿੱਚ ਜ਼ਿਲ੍ਹਾ ਪ੍ਰਧਾਨ ਕਸ਼ਮੀਰ ਸਿੰਘ ਬਾਹਲਾ, ਬਟਾਲਾ ਤੋਂ ਹਲਕਾ ਇੰਚਾਰਜ ਸੈਰੀ ਕਲਸੀ, ਫਤਿਹਗੜ੍ਹ ਚੂੜੀਆਂ ਤੋਂ ਹਲਕਾ ਇੰਚਾਰਜ ਬਲਬੀਰ ਸਿੰਘ ਪੰਨੂੰ ਅਤੇ ਹੋਰ ਆਗੂ ਹਾਜਰ ਸਨ। 

ਜ਼ਿਕਰਯੋਗ ਹੈ ਕਿ ਜਥੇਦਾਰ ਸੇਵਾ ਸਿੰੰਘ ਸੇਖਵਾਂ 6 ਅਕਤੂਬਰ ਨੂੰ ਲੰਮੀ ਬਿਮਾਰੀ ਨਾਲ ਜੂਝਦਿਆਂ ਅਕਾਲ ਚਲਾਣਾ ਕਰ ਗਏ ਸਨ। ਇਸ ਤੋਂ ਪਹਿਲਾਂ ਲੰਘੀ 26 ਅਗਸਤ ਨੂੰ ਅਰਵਿੰਦ ਕੇਜਰੀਵਾਲ ਬਿਮਾਰ ਪਏ ਜਥੇਦਾਰ ਸੇਖਵਾਂ ਦਾ ਦਿੱਲੀ ਤੋਂ ਉਚੇਚੇ ਤੌਰ ’ਤੇ ਹਾਲ ਚਾਲ ਜਾਨਣ ਲਈ ਪੁੱਜੇ ਸਨ। ਉਸੇ ਵਕਤ ਜਥੇਦਾਰ ਸੇਖਵਾਂ ਅਤੇ ਉਨ੍ਹਾਂ ਦੇ ਪੁੱਤਰ ਜਗਰੂਪ ਸਿੰਘ ਸੇਖਵਾਂ ਨੇ ਆਮ ਆਦਮੀ ਪਾਰਟੀ ਰਸਮੀ ਤੌਰ ’ਤੇ ਸ਼ਾਮਲ ਹੋ ਗਏ ਸਨ। 

ਇਸ ਉਪਰੰਤ ਕੇਜਰੀਵਾਲ ਜਲੰਧਰ ਲਈ ਰਵਾਨਾ ਹੋ ਗਏ, ਜਿਥੇ ਉਹ ਵਿਸ਼ਵ ਪ੍ਰਸਿੱਧ ਦੇਵੀ ਤਲਾਬ ਮੰਦਰ ’ਚ ਨਵਰਾਤਰਿਆਂ ਦੇ ਪਵਿੱਤਰ ਮੌਕੇ ’ਤੇ ਮਾਤਾ ਰਾਣੀ ਅੱਗੇ ਸੀਸ ਝੁਕਾਉਂਦੇ ਹੋਏ ਪੰਜਾਬ ਦੀ ਖੁਸ਼ਹਾਲੀ ਲਈ ਕਾਮਨਾ ਕਰਨਗੇ।


Wednesday, July 14, 2021

ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀਆਂ ਚੋਣਾਂ ਜਲਦ ਕਰਵਾਉ-ਢੀਂਡਸਾ

Wednesday: 14th July 2021 at 5:58 PM

 ਸ੍ਰ:ਢੀਂਡਸਾ ਨੇ ਕੇਜਰੀਵਾਲ ਨੂੰ ਲਿਖਿਆ ਇਸ ਮਕਸਦ ਲਈ ਵਿਸ਼ੇਸ਼ ਪੱਤਰ 

ਨਵੀਂ ਦਿੱਲੀ: 14 ਜੁਲਾਈ 2021 (ਮਨਪ੍ਰੀਤ ਸਿੰਘ ਖਾਲਸਾ//ਪੰਜਾਬ ਸਕਰੀਨ)::

ਧਾਰਮਿਕ ਪ੍ਰਬੰਧਾਂ ਨੂੰ ਆਪਣੇ ਹੱਥਾਂ ਵਿੱਚ ਲੈਣ ਲਈ ਧਾਰਮਿਕ ਵਿਅਕਤੀਆਂ  ਸਿਆਸੀ ਲੋਕ ਹਮੇਸ਼ਾਂ ਹੀ ਜ਼ਿਆਦਾ ਉਤਸੁਕ ਵੀ ਰਹਿੰਦੇ ਹਨ ਅਤੇ ਕਾਹਲੇ ਵੀ। ਗੱਲ ਭਾਵੇਂ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀ ਹੋਵੇ ਤੇ ਭਾਵੇਂ ਦਿੱਲੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀ ਇਸ ਮਾਮਲੇ ਵਿਹੁੱਚ ਸਿਆਸਤ ਹਮੇਸ਼ਾਂ ਹੀ ਗਰਮ ਰਹੀ ਹੈ। ਹੁਣ ਇਸ ਮੁੱਦੇ ਨੂੰ ਚੁੱਕਿਆ ਹੈ ਸੀਨੀਅਰ ਅਕਾਲੀ ਲੀਡਰ ਸੁਖਦੇਵ ਸਿੰਘ ਢੀਂਡਸਾ ਨੇ ਜਿਹਨਾਂ ਨੇ ਅਕਾਲੀ ਸਿਆਸਤ ਵਿੱਚ ਪਿਛਲੇ ਕੁਝ ਅਰਸੇ ਤੋਂ ਖੜਕੇ ਦੜਕੇ ਵਾਲੀ ਸੁਰ ਬੁਲੰਦ ਕੀਤੀ ਹੋਈ ਹੈ। ਉਹਨਾਂ ਨੇ ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੂੰ ਇੱਕ ਖਾਸ ਪੱਤਰ ਲਿਖਿਆ ਹੈ ਜਿਸ ਵਿੱਚ ਕਿਹਾ ਗਿਆ ਹੈ ਕਿ ਉਹ ਦਿੱਲੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀਆ ਚੋਣਾਂ ਜਲਦੀ ਕਰਵਾਉਣ। ਸਰਦਾਰ ਢੀਂਡਸਾ ਦੇ ਪੱਤਰ ਦਾ ਅਸਰ ਕੀ ਕੀ  ਇਸ ਬਾਰੇ ਕੁਝ ਦੱਸਣ ਦੀ ਕੋਈ ਲੋੜ ਨਹੀਂ। ਸਮਝਦਾਤਾਂ ਨੂੰ ਇਸ਼ਾਰਾ ਕਾਫੀ ਹੁੰਦਾ ਹੈ। 

ਕੋਰੋਨਾ ਮਾਹਾਂਮਾਰੀ ਦੀ ਵਜ੍ਹਾ ਨਾਲ ਦੋ ਵਾਰ ਮੁਲਤਵੀ ਹੋ ਚੁਕੀਆਂ ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ (ਡੀਐੱਸਜੀਐੱਮਸੀ) ਦੀਆਂ ਚੋਣਾਂ ਜਲਦ ਕਰਵਾਉਣ ਦੀ ਮੰਗ ਕਰਦੇ ਹੋਏ ਸ਼੍ਰੋਮਣੀ ਅਕਾਲੀ ਦਲ (ਸੰਯੁਕਤ) ਦੇ ਪ੍ਰਧਾਨ ਅਤੇ ਰਾਜ ਸਭਾ ਮੈਂਬਰ ਸ: ਸੁਖਦੇਵ ਸਿੰਘ ਢੀਂਡਸਾ ਨੇ ਦਿੱਲੀ ਦੇ ਮੁੱਖ ਮੰਤਰੀ ਸ਼੍ਰੀ ਅਰਵਿੰਦਰ ਕੇਜਰੀਵਾਲ ਨੂੰ ਪੱਤਰ ਲਿਖਿਆ ਹੈ।

ਸ: ਢੀਂਡਸਾ ਨੇ ਪੱਤਰ ਵਿੱਚ ਕਿਹਾ ਹੈ ਕਿ ਡੀਐੱਸਜੀਐੱਮਸੀ ਦੀਆਂ ਚੋਣਾਂ 25 ਅਪ੍ਰੈਲ ਨੂੰ ਹੋਣੀਆਂ ਸਨ ਪਰ ਕੋਰੋਨਾ ਮਹਾਂਮਾਰੀ ਦੇ ਚੱਲਦੇ ਇਨ੍ਹਾਂ ਚੋਣਾਂ ਨੂੰ ਮੁਲਤਵੀ ਕਰਕੇ ਅਗਲੀ ਚੋਣਾਂ ਲਈ 18 ਜੁਲਾਈ 2021 ਦਾ ਦਿਨ ਤੈਅ ਕੀਤਾ ਗਿਆ ਸੀ। ਇਸ ਉਪਰੰਤ ਸਰਕਾਰ ਵੱਲੋਂ ਜਾਰੀ ਲਾਕਡਾਉਨ ਦੇ ਆਦੇਸ਼ਾਂ ਅਤੇ ਕੋਰੋਨਾ ਦੇ ਮਾਮਲਿਆਂ ਦੀ ਵੱਧਦੀ ਗਿਣਤੀ ਨੂੰ ਵੇਖਦੇ ਹੋਏ ਇਹ ਚੋਣਾਂ ਮੁੜ ਮੁਲਤਵੀ ਕਰ ਦਿੱਤੀਆਂ ਗਈਆਂ ਸਨ।

ਸ: ਸੁਖਦੇਵ ਸਿੰਘ ਢੀਂਡਸਾ ਨੇ ਕਿਹਾ ਕਿ ਹੁਣ ਜਦੋਂ ਦਿੱਲੀ ਸਣੇ ਸਮੁੱਚੇ ਦੇਸ਼ ਵਿੱਚ ਕੋਰੋਨਾ ਦੇ ਮਾਮਲੇ ਘੱਟ ਰਹੇ ਹਨ ਅਤੇ ਹਾਲਾਤ ਕਾਫ਼ੀ ਹੱਦ ਤੱਕ ਸੁਧਰ ਚੁੱਕੇ ਹਨ ਅਜਿਹੇ ਵਿੱਚ ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀਆਂ ਚੋਣਾਂ ਕਰਵਾਉਣ ਦਾ ਇਹ ਢੁਕਵਾਂ ਸਮਾਂ ਹੈ। ਸ: ਢੀਂਡਸਾ ਨੇ ਕਿਹਾ ਕਿ ਉਨ੍ਹਾਂ ਦੀ ਬਾਦਲ ਧਿਰ ਨੂੰ ਛੱਡ ਕੇ ਇਸ ਸਬੰਧ ਵਿੱਚ ਹਰੇਕ ਨਾਲ ਗੱਲਬਾਤ ਹੋ ਚੁੱਕੀ ਹੈ ਅਤੇ ਸਾਰੀਆਂ ਧਿਰਾਂ ਚੋਣਾਂ ਕਰਵਾਉਣ ਦੇ ਹੱਕ ਵਿੱਚ ਹਨ। ਸ: ਢੀਂਡਸਾ ਨੇ ਕਿਹਾ ਕਿ ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵੱਲੋਂ ਗੁਰੂ ਦੀ ਗੁਲਕ ਦੀ ਦੁਰਵਰਤੋਂ ਕੀਤੀ ਜਾ ਰਹੀ ਹੈ। ਇਸ ਕਰਕੇ ਮੁੱਖ ਮੰਤਰੀ ਸ਼੍ਰੀ ਅਰਵਿੰਦ ਕੇਜਰੀਵਾਲ ਪਹਿਲ ਦੇ ਅਧਾਰ `ਤੇ ਇਸ ਸਬੰਧੀ ਜਰੂਰੀ ਪ੍ਰਕਿਰੀਆ ਪੂਰੀ ਕਰਕੇ ਚੋਣਾਂ ਛੇਤੀ ਕਰਵਾਉਣ ਲਈ ਸਬੰਧਤ ਅਥਾਰਟੀ ਨੂੰ ਨਿਰਦੇਸ਼ ਜਾਰੀ ਕਰਨ।
ਹੁਣ ਦੇਖਣਾ ਹੈ ਕਿ ਮੁਖ ਮੰਤਰੀ ਅਰਵਿੰਦ ਕੇਜਰੀਵਾਲ ਇਸ ਸਬੰਧੀ ਕਦੋਂ ਕੋਈ ਫੈਸਲਾ ਲੈਂਦੇ ਹਨ ਅਤੇ ਕਦੋਂ ਕੋਈ ਠੋਸ ਕਦਮ ਚੁੱਕਦੇ ਹਨ। ਨਿਸਚੇ ਹੀ ਇਸਦਾ ਅਸਰ ਪੰਜਾਬ ਦੀ ਸਿਆਸਤ ਤੇ ਵੀ ਪੈਣ ਦੀ ਸੰਭਾਵਨਾ ਹੈ। 

Tuesday, June 29, 2021

ਕੇਜਰੀਵਾਲ ਦੀ ਪਹਿਲੀ ਗਰੰਟੀ//300 ਯੂਨਿਟ ਮੁਫ਼ਤ ਬਿਜਲੀ ਹਰ ਮਹੀਨੇ

 Tuesday: 29th June 2021 at  6:11 pm

ਕੇਜਰੀਵਾਲ ਦੀ ਗਰੰਟੀ ਹੈ, ਕੈਪਟਨ ਦੇ ਝੂਠੇ ਵਾਅਦੇ ਨਹੀਂ:ਅਰਵਿੰਦ

ਚੰਡੀਗੜ੍ਹ: 29 ਜੂਨ 2021: (ਪੰਜਾਬ ਸਕਰੀਨ ਬਿਊਰੋ)::

ਮਹਿੰਗਾਈ ਦੇ ਝੰਬੇ ਹੋਏ ਲੋਕਾਂ ਦਾ ਜੰਗਲ ਵਿੱਚ ਜਾ ਕੇ ਵੀ ਨਹੀਂ ਸਰਦਾ। ਸਨਿਆਸ ਵਰਗੇ ਕੱਪੜੇ ਪਾ ਕੇ ਕੋਈ ਡੇਰਾ ਵੀ ਨਹੀਂ ਬਣਾ ਹੁੰਦਾ। ਵੋਟਾਂ ਵਾਲਾ ਮਾਮਲਾ ਹਰ ਵਾਰ ਮਿਰਗ ਤ੍ਰਿਸ਼ਨਾ ਹੀ ਸਾਬਿਤ ਹੁੰਦਾ ਹੈ। ਇਸ ਦੇ ਬਾਵਜੂਦ ਜਦੋਂ ਚੋਣਾਂ ਆਉਂਦੀਆਂ ਹਨ ਤਾਂ ਲੋਕਾਂ ਵਿੱਚ ਇੱਛਾਵਾਂ, ਲੋੜਾਂ ਅਤੇ ਮੰਗਾਂ ਜਾਗ ਪੈਂਦੀਆਂ ਹਨ। ਉਹਨਾਂ ਨੂੰ ਲੱਗਦਾ ਹੈ ਸ਼ਾਇਦ ਇਸ ਵਾਰ ਜ਼ਰੂਰੁ ਕੁਝ ਸੰਵਰ ਜਾਏਗਾ। ਇਥੋਂ ਦੀਆਂ ਵੱਡਿਆਂ ਲੋੜਾਂ ਵਿੱਚੋਂ ਬਿਜਲੀ ਵੀ ਇੱਕ ਹੈ ਜਿਸ ਬਿਨਾ ਸਰਦਾ ਹੀ ਨਹੀਂ। ਇਸ ਸਾਰੀ ਸਥਿਊਟੀ ਨੂੰ ਭਾਂਪਦਿਆਂ ਕੇਜਰੀਵਾਲ ਨੇ ਪੰਜਾਬ ਦੇ ਸਾਰੇ ਵਰਗਾਂ ਲਈ 300 ਯੂਨਿਟ ਪ੍ਰਤੀ ਮਹੀਨੇ ਮੁਫਤ ਬਿਜਲੀ ਦਾ ਦੇਣ ਐਲਾਨ ਕੀਤਾ ਹੈ। ਖੁਦਕੁਸ਼ੀਆਂ ਦੀ ਹਨੇਰੀ ਝੱਲਣ ਵਾਲੇ ਪੰਜਾਬ ਲਈ ਇਹ ਐਲਾਨ ਕਾਫੀ ਅਹਿਮ ਹੋ ਸਕਦਾ ਹੈ। 

ਇਸਦੇ ਨਾਲ ਹੀ ਕੁਝ ਹੋਰ ਨਿੱਕੇ ਮੋਟੇ ਐਲਾਨ ਵੀ ਕੀਤੇ ਗਏ ਹਨ। ਸਾਰੇ ਪੁਰਾਣੇ ਬਿਲ ਅਤੇ ਪਹਿਲਾਂ ਦੀਆਂ ਦੇਣਦਾਰੀਆਂ ਆਪ ਦੀ ਸਰਕਾਰ ਆਉਣ ਤੇ ਮਾਫ ਕੀਤੀਆਂ ਜਾਣਗੀਆਂ। ਵਾਅਦਾ ਇਹ ਵੀ ਕਿ ਪੰਜਾਬ ਦੇ ਵਸਨੀਕਾਂ ਲਈ 24 ਘੰਟੇ ਨਿਰਵਿਘਨ ਬਿਜਲੀ ਸਪਲਾਈ ਦਿੱਤੀ ਜਾਏਗੀ। 

ਨਾਲ ਹੀ ਇਹ ਵੀ ਕਿਹਾ ਹੈ ਕਿ ਪੰਜਾਬ ਵਿੱਚ ਚੱਲ ਰਹੀਆਂ ਮੌਜੂਦਾ ਬਿਜਲੀ ਸਕੀਮਾਂ ਉਸੇ ਤਰ੍ਹਾਂ ਜਾਰੀ ਰਹਿਣਗੀਆਂ। 

ਸਪਸ਼ਟ ਕਰਦਿਆਂ ਕਿਹਾ ਗਿਆ ਹੈ ਕਿ 200 ਯੂਨਿਟ ਪ੍ਰਤੀ ਮਹੀਨਾ ਮੁਫ਼ਤ ਬਿਜਲੀ ਪ੍ਰਾਪਤ ਕਰ ਰਹੇ ਪਰਿਵਾਰ ਹੁਣ 300 ਯੂਨਿਟ ਪ੍ਰਤੀ ਮਹੀਨਾ ਕਰਨਗੇ ਪ੍ਰਾਪਤ, ਸਿਰਫ ਉਸ ਤੋਂ ਵੱਧ ਯੂਨਿਟਾਂ ਦਾ ਹੀ ਬਿਲ ਲਿਆ ਜਾਇਆ ਕਰੇਗਾ। 

ਜ਼ਿਕਰਯੋਗ ਹੈ ਕਿ ਮਹਿੰਗੀ ਬਿਜਲੀ ਦੇ ਮਾਮਲੇ ਵਿੱਚ ਰਾਹਤ ਦੇਣ ਦਾ ਵਾਅਦਾ ਕਾਂਗਰਸ ਸਰਕਾਰ ਦੇ ਸੂਬਾਈ ਮੁਖੀ ਕੈਪਟਨ ਅਮਰਿੰਦਰ ਸਿੰਘ ਹੁਰਾਂ ਨੇ ਵੀ ਚੋਣਾਂ ਦੌਰਾਨ ਕੀਤਾ ਸੀ। 
ਆਮ ਆਦਮੀ ਪਾਰਟੀ (ਆਪ) ਦੇ ਕੌਮੀ ਕਨਵੀਨਰ ਅਤੇ ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦਰ ਕੇਜਰੀਵਾਲ ਨੇ ਪੰਜਾਬੀਆਂ  ਦੀ ਆਰਥਿਕ ਖੁਸ਼ਹਾਲੀ ਦਾ ਮੰਤਰ ਦਿੰਦਿਆਂ ਆਪ ਵੱਲੋਂ ਪਹਿਲੀ  'ਗਾਰੰਟੀ' ਦਾ ਐਲਾਨ ਕੀਤਾ ਕਿ ਆਮ ਆਦਮੀ ਪਾਰਟੀ ਦੀ ਸਰਕਾਰ ਬਣਨ 'ਤੇ ਸੂਬੇ ਦੇ ਹਰੇਕ ਪਰਿਵਾਰ ਨੂੰ 24 ਘੰਟੇ ਪ੍ਰਤੀ ਮਹੀਨਾ 300 ਯੂਨਿਟ ਬਿਜਲੀ ਮੁਫਤ ਦਿੱਤੀ ਜਾਵੇਗੀ ਅਤੇ ਪੁਰਾਣੇ ਬਿਜਲੀ ਦੇ ਰਹਿੰਦੇ ਬਿੱਲ ਵੀ ਮੁਆਫ ਕੀਤੇ ਜਾਣਗੇ। 
ਉਨ੍ਹਾਂ ਕਿਹਾ ਕਿ ਮੌਜੂਦਾ ਸਮੇਂ ਵਿੱਚ ਦੋ ਸੌ ਯੂਨਿਟ ਮੁਫਤ ਬਿਜਲੀ ਪ੍ਰਾਪਤ ਕਰ ਰਹੇ ਐੱਸ ਸੀ, ਬੀ ਸੀ, ਆਜ਼ਾਦੀ ਘੁਲਾਟੀਏ ਆਦਿ ਵਰਗ ਹੁਣ 300 ਯੂਨਿਟ ਪ੍ਰਤੀ ਮਹੀਨਾ ਮੁਫ਼ਤ ਬਿਜਲੀ ਪ੍ਰਾਪਤ ਕਰ ਸਕਣਗੇ। ਇਸ ਦੇ ਨਾਲ ਹੀ ਬਿਜਲੀ ਬਿੱਲ ਨਾ ਭਰਨ ਕਰਕੇ ਕੱਟੇ ਗਏ ਬਿਜਲੀ ਕੁਨੈਕਸਨਾਂ ਨੂੰ ਮੁੜ ਜੋੜ ਦਿੱਤਾ ਜਾਵੇਗਾ। ਉਨ੍ਹਾਂ ਅੱਗੇ ਕਿਹਾ ਕਿ ਕੇਜਰੀਵਾਲ ਪੰਜਾਬ ਦੇ ਲੋਕਾਂ ਨੂੰ ਵਿਸਵਾਸ ਦਿਵਾਉਂਦਾ ਹੈ ਕਿ ਪੰਜਾਬ ਵਿੱਚ ਆਮ ਆਦਮੀ ਪਾਰਟੀ ਦੀ ਸਰਕਾਰ ਬਣਨ 'ਤੇ ਪਹਿਲੀ ਹੀ ਕਲਮ ਦੇ ਨਾਲ ਪਹਿਲੀ ਗਰੰਟੀ ਦੇ ਐਲਾਨਾਂ ਨੂੰ ਲਾਗੂ ਕੀਤਾ ਜਾਵੇਗਾ। ਇਸ ਸਮੇਂ ਪੰਜਾਬ ਦੇ ਪ੍ਰਧਾਨ ਅਤੇ ਸੰਸਦ ਮੈਂਬਰ ਭਗਵੰਤ ਮਾਨ, ਪੰਜਾਬ ਮਾਮਲਿਆਂ ਦੇ ਇੰਚਾਰਜ ਅਤੇ ਦਿੱਲੀ ਦੇ ਵਿਧਾਇਕ ਜਰਨੈਲ ਸਿੰਘ, ਪੰਜਾਬ ਵਿਧਾਨ ਸਭਾ ਵਿੱਚ ਵਿਰੋਧੀ ਧਿਰ ਦੇ ਆਗੂ ਹਰਪਾਲ ਸਿੰਘ ਚੀਮਾ, ਪੰਜਾਬ ਮਾਮਲਿਆਂ ਦੇ ਸਹਿ ਇੰਚਾਰਜ ਤੇ ਵਿਧਾਇਕ ਰਾਘਵ ਚੱਢਾ, ਸਾਬਕਾ ਆਈ.ਜੀ ਪੰਜਾਬ ਕੁੰਵਰ ਵਿਜੈ ਪ੍ਰਤਾਪ ਹਾਜਰ ਸਨ।
ਇਸ ਤੋਂ ਪਹਿਲਾਂ ਆਮ ਆਦਮੀ ਪਾਰਟੀ ਦੇ ਪੰਜਾਬ ਪ੍ਰਧਾਨ ਅਤੇ ਸੰਸਦ ਮੈਂਬਰ ਭਗਵੰਤ ਮਾਨ ਨੇ ਅਰਵਿੰਦ ਕੇਜਰੀਵਾਲ ਦਾ ਪੰਜਾਬ ਆਉਣ 'ਤੇ ਸਵਾਗਤ ਕਰਦਿਆਂ ਕਿਹਾ ਕਿ ਪਾਰਟੀ ਦੇ ਕੌਮੀ ਕਨਵੀਨਰ ਅਰਵਿੰਦਰ ਕੇਜਰੀਵਾਲ ਪੰਜਾਬ ਦੇ ਲੋਕਾਂ ਨੂੰ ਗਾਰੰਟੀ ਦੇਣ ਲਈ ਆਏ ਹਨ, ਕਿ 2022 ਵਿੱਚ ਆਮ ਆਦਮੀ ਪਾਰਟੀ ਸਰਕਾਰ ਬਣਨ 'ਤੇ ਪੰਜਾਬ 'ਚ ਇਹ ਕੰਮ ਜ਼ਰੂਰ ਕੀਤੇ ਜਾਣਗੇ। ਉਨ੍ਹਾਂ ਵਿਸ਼ਵਾਸ ਦਿਵਾਇਆ ਕਿ ਅਰਵਿੰਦ ਕੇਜਰੀਵਾਲ ਵੱਲੋਂ ਪੰਜਾਬ ਦੇ ਲੋਕਾਂ ਨੂੰ ਦਿੱਤੀ ਗਈ ਗਰੰਟੀ ਲਈ ਆਮ ਆਦਮੀ ਪਾਰਟੀ ਦੇ ਸਾਰੇ ਆਗੂ ਅਤੇ ਵਰਕਰ ਸਿਰਜੋੜ ਕੇ ਕੰਮ ਕਰਨਗੇ।
ਮੰਗਲਵਾਰ ਨੂੰ ਚੰਡੀਗੜ੍ਹ ਪ੍ਰੈਸ ਕਲੱਬ ਵਿਖੇ ਆਮ ਆਦਮੀ ਪਾਰਟੀ ਦੇ ਰਾਸ਼ਟਰੀ ਕਨਵੀਨਰ ਅਰਵਿੰਦ ਕੇਜਰੀਵਾਲ ਨੇ ਪੱਤਰਕਾਰਾਂ ਰਾਹੀਂ ਪੰਜਾਬ ਦੇ ਲੋਕਾਂ ਅੱਗੇ ਆਪਣੀ ਪਹਿਲੀ ਗਰੰਟੀ ਦਾ ਐਲਾਨ ਕਰਦਿਆਂ ਕਿਹਾ ਕਿ 2022 ਵਿੱਚ ਆਮ ਆਦਮੀ ਪਾਰਟੀ ਦੀ ਸਰਕਾਰ ਬਣਨ 'ਤੇ ਸੂਬੇ ਦੇ ਹਰੇਕ ਪਰਿਵਾਰ ਨੂੰ ਬਿਜਲੀ ਦੀਆਂ ਪਹਿਲੀਆਂ 300 ਯੂਨਿਟਾਂ ਮੁਫਤ ਦਿੱਤੀਆਂ ਜਾਣਗੀਆਂ, ਪਰ ਕਿਸੇ ਯੋਜਨਾ ਦਾ ਲਾਭਪਾਤਰੀ ਨਾ ਹੋਣ 'ਤੇ 300 ਤੋਂ ਵੱਧ ਯੂਨਿਟਾਂ ਦੀ ਖਪਤ 'ਤੇ ਪੂਰਾ ਬਿੱਲ ਵਸੂਲ ਕੀਤਾ ਜਾਵੇਗਾ। ਉੁਨ੍ਹਾਂ ਸਪਸਟ ਕੀਤਾ ਕਿ ਪੰਜਾਬ ਵਿੱਚ 200 ਯੂਨਿਟਾਂ ਦੀ ਮੁਆਫੀ ਦਾ ਲਾਭ ਲੈਣ ਵਾਲੇ ਪਰਿਵਾਰਾਂ ਨੂੰ 300 ਯੂਨਿਟਾਂ ਮੁਫਤ ਦਿੱਤੀਆਂ ਜਾਣਗੀਆਂ, ਜੇਕਰ 300 ਯੂਨਿਟਾਂ ਤੋਂ ਵੱਧ ਦੀ ਖਪਤ ਹੋ ਜਾਂਦੀ ਹੈ ਤਾਂ ਕੇਵਲ ਵਾਧੂ ਯੂਨਿਟਾਂ ਦਾ ਹੀ ਬਿੱਲ ਵਸੂਲ ਕੀਤਾ ਜਾਵੇਗਾ। ਉਨ੍ਹਾਂ ਕਿਹਾ ਕਿ ਇਹ ਕੇਜਰੀਵਾਲ ਦੀ ਗਰੰਟੀ ਹੈ, ਕੈਪਟਨ ਅਮਰਿੰਦਰ ਸਿੰਘ ਦੇ ਝੂਠੇ ਵਾਅਦੇ ਨਹੀ, ਜੋ ਪੂਰੇ ਹੀ ਨਾ ਹੋਣ। ਕੇਜਰੀਵਾਲ ਨੇ ਇਹ ਵੀ ਕਿਹਾ ਕਿ ਪੰਜਾਬ ਭਰ 24 ਘੰਟੇ ਬਿਜਲੀ ਦੇਣ ਲਈ ਸਪਲਾਈ ਵਿਵਸਥਾ ਠੀਕ ਕੀਤੀ ਜਾਵੇਗੀ, ਜਿਸ ਦੇ ਲਈ 3 ਸਾਲ ਤੱਕ ਦਾ ਸਮਾਂ ਲੱਗ ਸਕਦਾ ਹੈ।

ਅਰਵਿੰਦ ਕੇਜਰੀਵਾਲ ਨੇ ਕਿਹਾ ਕਿ ਆਮ ਆਦਮੀ ਪਾਰਟੀ ਦੀ ਪਹਿਲੀ ਗਰੰਟੀ ਲਾਗੂ ਹੋ ਜਾਣ ਨਾਲ ਪੰਜਾਬ ਦੇ 80 ਫੀਸਦੀ ਲੋਕਾਂ ਨੂੰ ਬਿਜਲੀ ਦੇ ਭਾਰੀ ਬਿੱਲਾਂ ਤੋਂ ਛੁਟਕਾਰਾ ਮਿਲੇਗਾ । ਉਨ੍ਹਾਂ ਦੁੱਖ ਪ੍ਰਗਟਾਉਂਦਿਆਂ ਕਿਹਾ ਕਿ ਪੰਜਾਬ ਬਿਜਲੀ ਉਤਪਾਦਨ ਕਰਨ ਵਾਲਾ ਸੂਬਾ ਹੈ, ਪਰ ਇੱਥੇ ਹੋਰਨਾਂ ਰਾਜਾਂ ਨਾਲੋਂ ਮਹਿੰਗੀ ਬਿਜਲੀ ਦਿੱਤੀ ਜਾ ਰਹੀ ਹੈ। ਇੱਕ ਪੱਖੇ ਅਤੇ ਦੋ ਬੱਲਬਾਂ ਵਾਲੇ ਪਰਿਵਾਰ ਨੂੰ 50 ਹਜਾਰ 9 ਸੌ ਰੁਪਿਆਂ ਦਾ ਬਿਜਲੀ ਬਿੱਲ ਭਰਨਾ ਪੈਂਦਾ ਹੈ, ਜਦੋਂ ਕਿ ਆਮ ਆਦਮੀ ਦੀ ਦਿੱਲੀ ਸਰਕਾਰ ਬਿਜਲੀ ਖਰੀਦ ਕੇ ਵੀ ਸਭ ਤੋਂ ਸਸਤੀ ਅਤੇ ਮੁਫਤ ਬਿਜਲੀ ਦੇ ਰਹੀ ਹੈ।
ਕੇਜਰੀਵਾਲ ਨੇ ਪੰਜਾਬ ਦੇ ਸੱਤਾਧਾਰੀਆਂ ਅਤੇ ਬਿਜਲੀ ਕੰਪਨੀਆਂ ਵਿਚਕਾਰ ਮਿਲੀਭੁਗਤ ਹੋਣ ਦਾ ਦੋਸ ਲਾਉਂਦਿਆਂ ਕਿਹਾ ਕਿ ਬਿਜਲੀ ਪੈਦਾ ਕਰਨ ਵਾਲਾ ਸੂਬਾ ਹੋਣ ਦੇ ਬਾਵਜੂਦ ਪੰਜਾਬ ਵਾਸੀਆਂ ਨੂੰ ਮਹਿੰਗੀ ਬਿਜਲੀ ਖਰੀਦਣੀ ਪੈ ਰਹੀ ਹੈ। ਇਹੋ ਹਾਲ ਪਹਿਲਾਂ ਦਿੱਲੀ ਰਾਜ ਵਿੱਚ ਸੀ। ਜਦੋਂ ਆਮ ਆਦਮੀ ਪਾਰਟੀ ਦੀ ਦਿੱਲੀ ਵਿੱਚ ਸਰਕਾਰ ਬਣੀ ਤਾਂ ਉਥੇ ਬਿਜਲੀ ਕੰਪਨੀਆਂ ਦੇ ਕੰਮਾਂ ਅਤੇ ਖਾਤਿਆਂ ਦੀ ਜਾਂਚ ਕੀਤੀ ਗਈ। ਇਸ ਦੇ ਨਾਲ ਹੀ ਬਿਜਲੀ ਕੰਪਨੀਆਂ ਦੀ ਸੱਤਾਧਾਰੀਆਂ ਨਾਲ ਮਿਲੀਭੁਗਤ ਨੂੰ ਬੰਦ ਕਰ ਦਿੱਤਾ ਗਿਆ ਅਤੇ ਦਿੱਲੀ ਵਾਸੀਆਂ ਨੂੰ ਮੁਫਤ ਬਿਜਲੀ ਦੇਣ ਦਾ ਪ੍ਰਬੰਧ ਕੀਤਾ ਗਿਆ। ਉਨ੍ਹਾਂ ਕਿਹਾ ਕਿ ਪੰਜਾਬ ਵਿੱਚ ਪੈਸੇ ਦੀ ਕੋਈ ਘਾਟ ਨਹੀਂ ਹੈ, ਪਰ ਇੱਥੇ ਮਾਫੀਆ ਰਾਜ ਹੋਣ ਕਾਰਨ ਆਮ ਲੋਕ ਗਰੀਬ ਹੁੰਦੇ ਜਾ ਰਹੇ ਹਨ। ਇਸ ਮੌਕੇ ਆਮ ਆਦਮੀ ਪਾਰਟੀ ਦੇ ਸਾਰੇ ਵਿਧਾਇਕ, ਸੀਨੀਅਰ ਆਗੂ ਅਤੇ ਜਿਲਾ ਪ੍ਰਧਾਨ ਵੀ ਮੌਜੂਦ ਸਨ।

ਕੇਜਰੀਵਾਲ ਦੀ ਮੁਫ਼ਤ ਬਿਜਲੀ ਬਾਰੇ ਮਾਲਵਿੰਦਰ ਮਾਲੀ ਦਾ ਤਿੱਖਾ ਪ੍ਰਤੀਕਰਮ

ਪੰਜਾਬੀਓ ਅਕਲ ਨੂੰ ਹੱਥ ਮਾਰੋ--ਵੋਟ ਦੇ ਵਪਾਰੀਆਂ ਨੂੰ ਪਛਾੜੋ 

ਬਲਿਊ ਸਟਾਰ ਓਪਰੇਸ਼ਨ, ਖਾੜਕੂਵਾਦ ਅਤੇ ਪੰਜਾਬ ਵਿੱਚ ਹੋਏ ਤਜਰਬਿਆਂ ਨੂੰ ਨੇੜਿਓਂ ਹੋ ਕੇ ਦੇਖਣ ਵਾਲੇ ਪੱਤਰਕਾਰ ਮਾਲਵਿੰਦਰ ਸਿੰਘ ਮਾਲੀ ਪੰਜਾਬ ਦੇ ਨਾਜ਼ੁਕ ਦੌਰ ਸਮੇਂ ਪੈਗਾਮ ਗਰੁੱਪ ਦੇ ਸਰਗਰਮ ਚਿਹਰੇ ਵੱਜੋਂ ਪਛਾਣੇ ਜਾਂਦੇ ਰਹੇ। ਕੇਂਦਰ ਸਰਕਾਰ, ਸੂਬਾ ਸਰਕਾਰ, ਪੁਲਿਸ ਅਤੇ ਖਾਲਿਸਤਾਨੀ ਸੰਗਠਨਾਂ ਨੂੰ ਬੇਬਾਕ ਹੋ ਕੇ ਲੰਮੇ ਹੱਥੀਂ ਲੈਣ ਵਾਲੇ ਮਾਲਵਿੰਦਰ ਸਿੰਘ ਮਾਲੀ  ਹੁਣ ਫਿਰ ਲਗਾਤਾਰ ਸਰਗਰਮ ਹਨ। ਉਹਨਾਂ ਦੇ ਵਿਚਾਰ ਤਕਰੀਬਨ ਹਰ ਰੋਜ਼ ਸਾਹਮਣੇ ਆਉਂਦੇ ਹਨ। ਹੁਣ ਉਹਨਾਂ ਆਮ ਆਦਮੀ ਪਾਰਟੀ ਦੇ ਸੁਪਰੀਮੋ ਅਰਵਿੰਦ ਕੇਜਰੀਵਾਲ ਦੀ ਪੰਜਾਬ ਤੇ ਨਜ਼ਰ ਦਾ ਗੰਭੀਰ ਨੋਟਿਸ ਲਿਆ ਹੈ। ਆਮ ਆਦਮੀ ਪਾਰਟੀ ਦੀ ਪੰਜਾਬ ਵੱਲ ਚੜ੍ਹਾਈ ਬਾਰੇ ਉਹਨਾਂ ਦਾ ਕਹਿਣਾ ਹੈ," 2017 ਵਿੱਚ ਕੇਜਰੀਵਾਲ ਪੰਜਾਬ ਦੀ ਸਿਆਸਤ ਉੱਪਰ ਕਬਜ਼ਾ ਕਰਨ ਲਈ ਧਾੜਵੀ ਗੈਂਗ ਬਣਕੇ ਆਇਆ ਸੀ ਪਰ ਹੁਣ ਉਹ ਛਲ਼ੇਡਾ ਗੈਂਗ ਬਣਕੇ ਆ ਰਿਹਾ ਹੈ।" ਲਓ ਪੜ੍ਹੋ ਸਾਰਾ ਵਿਸਥਾਰ ਤੁਹਾਡੇ ਵਿਚਾਰਾਂ ਦੀ ਉਡੀਕ ਰਹੇਗੀ ਹੀ।-ਸੰਪਾਦਕ 

ਮਾਲਵਿੰਦਰ ਸਿੰਘ ਮਾਲੀ 
*ਮਛਲੀ ਜਾਲ ਨਾ ਜਾਣਿਆਂ ਕਿਉ ਕੀਤਾ ਵੇਸਾਹ ... ਪੰਜਾਬੀਓ ਅਕਲ ਨੂੰ ਹੱਥ ਮਾਰੋ, ਵੋਟਾਂ ਦੇ ਵਪਾਰੀਆਂ ਦੀ ਸਾਂਝੀ ਖ਼ਸਲਤ ਨੂੰ ਪਹਿਚਾਣੋ ਤੇ ਪਛਾੜੋ !! **

*ਕੇਜਰੀਵਾਲ ਛਲ਼ੇਡੇ ਤੇ ਇਸਦੇ ਭਗਤਾਂ ਕੋਲ ਇਹਨਾਂ ਸਵਾਲਾਂ ਦਾ ਕੋਈ ਜਬਾਬ ਹੈ??
1.ਬਾਦਲਕੇ ਪੰਜਾਬ ਅੰਦਰ ਲੋੜ ਤੋਂ ਵੱਧ ਬਿਜਲੀ ਪੈਦਾ ਕਰਨ ਦਾ ਵਾਅਦਾ ਕਰਕੇ ਵੋਟਾਂ ਲੁੱਟਕੇ ਦੂਜੀ ਵਾਰ ਸਰਕਾਰ ਬਣਾ ਗਏ ਤੇ ਪੰਜਾਬੀਆਂ ਗਲ ਪ੍ਰਾਈਵੇਟ ਥਰਮਲਾਂ ਨਾਲ ਕੀਤੇ ਲੋਟੂ ਸਮਝੌਤਿਆਂ ਦਾ ਜੂਲਾ ਪਾ ਗਏ
2.ਕੈਪਟਨਕੇ ਪ੍ਰਾਈਵੇਟ ਥਰਮਲਾਂ ਨਾਲ ਕੀਤੇ ਲੋਟੂ ਸਮਝੌਤੇ ਰੱਦ ਕਰਨਤੇ ਬਿਜਲੀ ਸਸਤੀ ਕਰਨ ਦਾ ਵਾਅਦਾ ਕਰਕੇ ਵੋਟਾਂ ਲੁੱਟਕੇ ਸਰਕਾਰ ਬਣਾ ਗਏ ਪਰ ਬਿਜਲੀ ਸਸਤੀ ਨਹੀਂ ਕੀਤੀ, ਨਾ ਸਮਝੌਤੇ ਰੱਦ ਕੀਤੇ ਤੇ ਨਾ ਇਹਨਾਂ ਸੰਬੰਧੀ ਵਾਈਟ ਪੇਪਰ ਪੇਸ਼ ਕੀਤਾ
3.ਹੁਣ ਆਹ ਦਿੱਲੀ ਵਾਲਾ ਛਲ਼ੇਡਾ ਬਾਦਲਕਿਆਂ ਵੱਲੋਂ ਬਿਜਲੀ ਸੰਬੰਧੀ ਬੀਜੇ ਕੰਡੇ ਚੁਗਣ ਦੀ ਥਾਂ ਪ੍ਰਾਈਵੇਟ ਥਰਮਲਾਂ ਨਾਲ ਕੀਤੇ ਲੋਟੂ ਸਮਝੌਤੇ ਰੱਦ ਕਰਕੇ ਸਮੂਹਕ ਰੂਪ ਵਿੱਚ ਬਿਜਲੀ ਸਸਤੀ ਕਰਨ ਦੀ ਥਾਂ “ਮੁਫ਼ਤ ਬਿਜਲੀ“ ਦਾ ਛੁਣਛਣਾਂ ਖੜਕਾ ਕੇ ਵੋਟਾਂ ਮੁੱਛਣ ਆ ਗਿਆ ਹੈ???
ਅਸਲ ਸਮੱਸਿਆ ਆਹ ਵੀ ਹੈ ਜਿਸਨੂੰ ਹੱਲ ਕਰਨ ਵੱਲ ਕੋਈ ਵੀ ਸਿਆਸੀ ਪਾਰਟੀ ਮੂੰਹ ਕਰਨ ਨੂੰ ਹੀ ਤਿਆਰ ਨਹੀਂ ਹੈ। ਬਾਦਲਕੇ ਤੇ ਕੈਪਟਨਕੇ ਇਸ ਬਾਰੇ ਥੁੱਕੀ ਵੜੇ ਤਾਂ ਪਕਾਉਂਦੇ ਰਹੇ। ਪੰਜਾਬ ਵਿਧਾਨ ਸਭਾ ਅੰਦਰ ਪੰਜਾਬ ਦਾ ਪਾਣੀ ਮੁਫ਼ਤ ਵਿੱਚ ਲੁੱਟ ਰਹੇ ਹਰਿਆਣਾ, ਰਾਜਸਥਾਨ ਤੇ ਦਿੱਲੀ ਤੋਂ ਇਸਦੀ ਕੀਮਤ ਵਸੂਲੀ ਲਈ ਮਤੇ ਵੀ ਪਾਸ ਕਰਦੇ ਰਹੇ ਪਰ ਅਮਲੀ ਰੂਪ ਵਿੱਚ ਕੋਈ ਕਾਰਵਾਈ ਹੀ ਨਹੀਂ ਕੀਤੀ। ਕੈਪਟਨ ਦੀ ਪਹਿਲੀ ਸਰਕਾਰ ਵੱਲੋਂ ਪੰਜਾਬ ਦੇ ਦਰਿਆਈ ਪਾਣੀਆਂ ਦੀ ਵੰਡ ਸੰਬੰਧੀ ਕੀਤੇ ਬੇਇਨਸਾਫ਼ੀ ਤੇ ਗ਼ੈਰ ਸੰਵਿਧਾਨਕ ਸਮਝੌਤੇ ਰੱਦ ਕਰਨ ਦੀ ਕਾਰਵਾਈ ਵੀ ਪਾਈ ਗਈ ਪਰ ਪਰਨਾਲਾ ਉੱਥੇ ਦਾ ਉੱਥੇ ਹੀ ਖੜਾ ਹੈ?? ਪਰ ਕੇਜਰੀਵਾਲ ਤਾਂ ਪੰਜਾਬ ਦੇ ਕੁਦਰਤੀ ਸਰੋਤਾਂ , ਪਾਣੀ ਤੇ ਪਣ-ਬਿਜਲੀ ਉੱਪਰ ਕੇੰਦਰ ਸਰਕਾਰਾਂ ਵੱਲੋ ਮਾਰੇ ਡਾਕੇ ਦਾ ਸਭ ਤੋਂ ਵੱਡਾ ਹਿਮਾਇਤੀ ਹੈ ਤੇ ਇਸ ਸੰਬੰਧੀ ਇਸਦੀ ਦਿੱਲੀ ਦੀ ਸਰਕਾਰ ਨੇ ਸੁਪਰੀਮ ਕੋਰਟ ਅੰਦਰ ਪੰਜਾਬ ਦੇ ਹੱਕ ਦੇ ਖਿਲਾਫ ਹਲਫ਼ਨਾਮਾ ਵੀ ਦਿੱਤਾ ਹੋਇਆ ਹੈ।
** ਪੰਜਾਬ ਅੰਦਰ ਖੇਤੀ ਖੇਤਰ ਅੰਦਰ ਪੈਦਾ ਹੋਏ ਆਰਥਕ ਸੰਕਟ ਅੰਦਰ ਪੰਜਾਬ ਦੇ ਪਾਣੀਆਂ ਤੇ ਪਣ-ਬਿਜਲੀ ਉੱਪਰ ਮਾਰੇ ਇਸ ਡਾਕੇ ਦਾ ਵੀ ਅਹਿਮ ਰੋਲ ਹੈ ਪਰ ਬਹੁਤ ਹੀ ਅਫ਼ਸੋਸ ਨਾਲ ਕਹਿਣਾ ਪੈ ਰਿਹਾ ਹੈ ਕਿ ਬਹੁਤੀਆਂ ਕਿਸਾਨ ਜਥੇਬੰਦੀਆਂ ਇਸ ਅਹਿਮ ਕੌਮੀ ਮੁੱਦੇ ਨੂੰ ਕਦੇ ਸੰਬੋਧਿਤ ਹੀ ਨਹੀ ਹੋਈਆਂ ਜਿਸ ਬਾਰੇ ਉਹਨਾ ਨੂੰ ਗੰਭੀਰਤਾ ਨਾਲ ਮੁੜ ਸੋਚਣ ਦੀ ਫ਼ੌਰੀ ਲੋੜ ਹੈ **
** ਪੰਜਾਬ ਅੰਦਰ ਜਿੰਨੀ ਪਣ-ਬਿਜਲੀ ਪੈਦਾ ਹੁੰਦੀ ਹੈ ਪੰਜਾਬ ਉਸਦਾ ਮਾਲਕ ਨਹੀਂ ਹੈ ਸਗੋਂ ਕੇਂਦਰ ਸਰਕਾਰ ਦੇ ਕੰਟਰੋਲ ਵਿੱਚ ਹੈ ਤੇ ਉਸਨੇ ਰਾਜਸਥਾਨ, ਹਰਿਆਣਾ ਤੇ ਦਿੱਲੀ ਨੂੰ ਵੀ ਮਾਲਕੀ ਦੇ ਹੱਕ ਦੇਕੇ ਇਸਦੀ ਵੰਡ ਕੀਤੀ ਹੋਈ ਹੈ **
** ਇਹੀ ਹਾਲ ਦਰਿਆਈ ਪਾਣੀਆਂ ਦੀ ਮਾਲਕੀ ਤੇ ਵੰਡ ਬਾਰੇ ਹੈ। ਪੰਜਾਬ ਦਾ ਨਹਿਰੀ ਪਾਣੀ ਨਾਲ ਸਿੰਜਾਈ ਦਾ ਪ੍ਰਬੰਧ ਤਹਿਤ ਨਹਿਸ਼ ਹੋ ਗਿਆ ਹੈ। ਨਹਿਰੀ ਪਾਣੀ ਖੇਤੀ ਲਈ ਵਧੇਰੇ ਲਾਹੇਵੰਦ ਹੈ। ਪਰ ਅਸੀਂ ਧਰਤੀ ਬਿਜਲਈ ਮੋਟਰਾਂ ਨਾਲ ਪੁਣ ਦਿੱਤੀ ਹੈ, ਧਰਤੀ ਹੇਠਲਾ ਪਾਣੀ ਪਤਾਲ ਤੱਕ ਪਹੁੰਚਾ ਦਿੱਤਾ ਹੈ ਤੇ ਪੰਜਾਬੀਆਂ ਨੂੰ ਮੱਛੀ ਮੋਟਰਾਂ ,ਡੂੰਘੇ ਤੇ ਮਹਿੰਗੇ ਬੋਰਾਂ ਉੱਪਰ ਅਰਬਾਂ ਰੁਪਏ ਖ਼ਰਚਣ ਦੇ ਜਾਲ ਵਿੱਚ ਫਸਾ ਦਿੱਤਾ ਹੈ। ਇਸ ਲਈ ਸਰਕਾਰੀ ਖ਼ਜ਼ਾਨੇ ਵਿੱਚੋਂ ਵੀ ਹਰ ਸਾਲ ਗਿਆਰਾਂ ਹਜ਼ਾਰ ਕਰੋੜ ਰੁਪਏ ਦੀ ਬਿਜਲੀ ਸਬਸਿਡੀ ਦੇਣੀ ਪੈਂਦੀ ਹੈ *
** ਪ੍ਰਾਈਵੇਟ ਥਰਮਲਾਂ ਨਾਲ ਸਮਝੌਤੇ ਅਜਿਹੇ ਕੀਤੇ ਹਨ ਜਿਹਨਾ ਤੋਂ ਤਹਿ ਕੀਤੀ ਮਾਤਰਾ ਤੇ ਮਹਿੰਗੀ ਬਿਜਲੀ ਖਰੀਦੀ ਜਾਂਦੀ ਹੈ। ਇਸ ਲਈ ਸਰਕਾਰੀ ਥਰਮਲ ਪਲਾਂਟ ਬੰਦ ਰੱਖੇ ਜਾਂਦੇ ਹਨ ਜੋ ਸਸਤੀ ਬਿਜਲੀ ਪੈਦਾ ਕਰਦੇ ਹਨ। ਜੇ ਤਹਿ ਕੀਤੀ ਮਾਤਰਾ ਵਿੱਚ ਬਿਜਲੀ ਨਾ ਵੀ ਖਰੀਦੀ ਜਾਵੇ ਤਾਂ ਵੀ ਪ੍ਰਾਈਵੇਟ ਥਰਮਲਾਂ ਨੂੰ ਹਰ ਸਾਲ ਹਜ਼ਾਰਾਂ ਕਰੋੜ ਅਦਾ ਕੀਤੇ ਜਾ ਰਹੇ ਹਨ **

Sunday, May 23, 2021

ਦਿੱਲੀ ਅੰਦਰ ਕੋਰੋਨਾ ਦੇ ਮੱਦੇਨਜ਼ਰ ਇਕ ਹਫਤੇ ਲਈ ਤਾਲਾਬੰਦੀ ਵੱਧੀ

 23rd May 2021 at  6:20 PM

ਜੇ ਕੋਰੋਨਾ ਦਾ ਖਤਰਾ ਘਟਦਾ ਰਿਹਾ ਤਾਂ 31 ਮਈ ਤੋਂ ਕੁਝ ਛੋਟਾਂ ਸੰਭਵ 

ਨਵੀਂ ਦਿੱਲੀ: 23 ਮਈ 2021: (ਮਨਪ੍ਰੀਤ ਸਿੰਘ ਖਾਲਸਾ//ਪੰਜਾਬ ਸਕਰੀਨ)::

ਦਿੱਲੀ ਸਰਕਾਰ ਨੇ ਦਿੱਲੀ ਵਿਚ ਤਾਲਾਬੰਦੀ ਦੀ ਮਿਆਦ ਇਕ ਹਫ਼ਤੇ ਵਧਾਉਣ ਦਾ ਫੈਸਲਾ ਕੀਤਾ ਹੈ।  ਹੁਣ 31 ਮਈ ਤਕ ਦਿੱਲੀ ਵਿਚ ਸਵੇਰੇ 5 ਵਜੇ ਤੱਕ ਸਖਤ ਤਾਲਾਬੰਦੀ ਜਾਰੀ ਰਹੇਗੀ। ਇਸ ਸਮੇਂ ਦੌਰਾਨ, ਜਨਤਕ ਸਮਾਗਮਾਂ ਜਿਵੇਂ ਵਿਆਹ, ਪਾਰਟੀਆਂ ਆਦਿ 'ਤੇ ਪੂਰੀ ਤਰ੍ਹਾਂ ਪਾਬੰਦੀ ਰਹੇਗੀ। ਇਸ ਸਮੇਂ ਦੇ ਦੌਰਾਨ, ਵਿਆਹ ਅਦਾਲਤ ਵਿੱਚ ਜਾਂ ਘਰ ਵਿੱਚ ਹੋ ਸਕਦੇ ਹਨ। ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੇ ਕਿਹਾ, “ਪਿਛਲੇ 24 ਘੰਟਿਆਂ ਵਿੱਚ ਮੈਂ ਬਹੁਤ ਸਾਰੇ ਲੋਕਾਂ ਨਾਲ ਤਾਲਾਬੰਦੀ ਬਾਰੇ ਗੱਲ ਕੀਤੀ।  ਇਸ ਸਮੇਂ ਦੌਰਾਨ ਇੱਕ ਆਮ ਰਾਏ ਮਿਲੀ ਕਿ ਤਾਲਾਬੰਦੀ ਨੂੰ ਇੱਕ ਹਫ਼ਤੇ ਲਈ ਦਿੱਲੀ ਵਿੱਚ ਵਧਾਇਆ ਜਾਣਾ ਚਾਹੀਦਾ ਹੈ। ਉਨ੍ਹਾਂ ਕਿਹਾ ਜੇ ਅਸੀਂ ਹੁਣੇ ਜਿੰਦਰਾ ਖੋਲ੍ਹ ਦਿੱਤਾ ਤਾਂ ਕੋਰੋਨਾ, ਜਿਸ ਨੂੰ ਅਸੀਂ ਪਿਛਲੇ 1 ਮਹੀਨੇ ਦੀ ਸਖਤ ਮਿਹਨਤ ਨਾਲ ਕਾਬੂ ਕੀਤਾ ਹੈ, ਸਾਡੀ ਮਿਹਨਤ ਬੇਕਾਰ ਹੋ ਸਕਦੀ ਹੈ।   ਇਸ ਲਈ, ਦਿੱਲੀ ਸਰਕਾਰ ਨੇ ਫੈਸਲਾ ਲਿਆ ਹੈ ਕਿ ਤਾਲਾਬੰਦੀ ਨੂੰ ਇਕ ਹਫ਼ਤੇ ਲਈ ਦਿੱਲੀ ਵਿਚ ਵਧਾਇਆ ਜਾ ਰਿਹਾ ਹੈ।”

ਮੁੱਖ ਮੰਤਰੀ ਨੇ ਕਿਹਾ,“ਜੇਕਰ ਕੋਰੋਨਾ ਕੇਸਾਂ ਦੀ ਕਟੌਤੀ ਇਸੇ ਤਰ੍ਹਾਂ ਜਾਰੀ ਰਹੀ ਤਾਂ ਅਗਲੇ ਹਫ਼ਤੇ ਤੋਂ ਦਿੱਲੀ ਵਿਚ ਤਾਲਾਬੰਦੀ ਖੋਲ੍ਹਣ ਦੀ ਪ੍ਰਕਿਰਿਆ ਸ਼ੁਰੂ ਕਰ ਦਿੱਤੀ ਜਾਵੇਗੀ।  ਲਾਕਡਾਉਨ ਨੂੰ ਤੁਰੰਤ ਹਟਾਇਆ ਨਹੀਂ ਜਾਵੇਗਾ।  ਹੌਲੀ ਹੌਲੀ, ਅਸੀਂ 31 ਮਈ ਤੋਂ ਕੁਝ ਗਤੀਵਿਧੀਆਂ ਸ਼ੁਰੂ ਕਰਾਂਗੇ ।  ਫਿਲਹਾਲ ਤਾਲਾਬੰਦੀ ਦਿੱਲੀ ਵਿਚ ਵਧਾਈ ਜਾ ਰਹੀ ਹੈ।”

ਕੇਜਰੀਵਾਲ ਨੇ ਕਿਹਾ,“ਸਾਡੀ ਸਭ ਤੋਂ ਵੱਡੀ ਤਰਜੀਹ ਦਿੱਲੀ ਵਿਚ 2 ਕਰੋੜ ਲੋਕਾਂ ਨੂੰ ਟੀਕਾਕਰਣ ਦੀ ਹੈ।  ਅਸੀਂ ਦਿੱਲੀ ਵਿਚ ਇਕ ਪ੍ਰਣਾਲੀ ਬਣਾਈ ਹੈ, ਜਿਸ ਦੇ ਤਹਿਤ ਪੂਰੀ ਦਿੱਲੀ ਦੇ ਲੋਕਾਂ ਨੂੰ 3 ਮਹੀਨਿਆਂ ਦੇ ਅੰਦਰ ਟੀਕਾ ਲਗਾਇਆ ਜਾ ਸਕਦਾ ਹੈ। ਹਾਲਾਂਕਿ, ਟੀਕੇ ਦੀ ਘਾਟ ਹੈ ਜਿਸ ਕਾਰਨ ਟੀਕਾ ਉਪਲਬਧ ਨਹੀਂ ਹੈ।  ਅਸੀਂ ਕੋਰੋਨਾ ਦੀ ਤੀਜੀ ਲਹਿਰ ਦੇ ਮੱਦੇਨਜ਼ਰ ਤਿਆਰੀ ਕਰ ਰਹੇ ਹਾਂ।   ਜੇ ਹਰੇਕ ਨੂੰ ਟੀਕਾ ਲਗਾਇਆ ਜਾਂਦਾ ਹੈ, ਤਾਂ ਕੋਰੋਨਾ ਦੀ ਤੀਜੀ ਲਹਿਰ ਨਹੀਂ ਹੋ ਸਕਦੀ  ਅਤੇ  ਅਸੀਂ ਕੋਰੋਨਾ ਦੀ ਤੀਜੀ ਲਹਿਰ ਤੋਂ ਬਚ ਸਕਦੇ ਹਾਂ।"

Friday, August 26, 2016

ਪੰਜਾਬੀ ਆਗੂਆਂ 'ਤੇ ਆਮ ਆਦਮੀ ਪਾਰਟੀ ਵਿਸ਼ਵਾਸ਼ ਨਹੀਂ ਕਰਦੀ-ਛੋਟੇਪੁਰ

ਜੁਆਬੀ ਖਰ੍ਹੀਆਂ ਖਰ੍ਹੀਆਂ ਕਰ ਸਕਦੀਆਂ ਨੇ "ਆਪ" ਦਾ ਵੱਡਾ ਨੁਕਸਾਨ 
ਚੰਡੀਗੜ੍ਹ: 26 ਅਗਸਤ 2016: (ਪੰਜਾਬ ਸਕਰੀਨ ਬਿਊਰੋ):
ਆਪ ਪਾਰਟੀ ਦੇ ਪੰਜਾਬ ਕਨਵੀਨਰ ਸੁੱਚਾ ਸਿੰਘ ਨੇ ਬੜੇ ਹੀ ਸੰਤੁਲਿਤ ਸ਼ਬਦਾਂ ਵਿੱਚ ਸਟਿੰਗ ਅਪ੍ਰੇਸ਼ਨ ਵਿਵਾਦ 'ਤੇ ਪ੍ਰੈਸ ਕਾਨਫਰੰਸ ਕਰਕੇ ਸਫਾਈ ਦਿੱਤੀ ਹੈ। ਇਸਦੇ ਨਾਲ ਹੀ ਉਹਨਾਂ ਕਿ ਵੱਡੇ ਖੁਲਾਸੇ ਇਸ਼ਾਰਿਆਂ ਇਸ਼ਾਰਿਆਂ ਨਾਲ ਹੀ ਕੀਤੇ। ਉਹਨਾਂ ਦੱਸਿਆ ਕਿ ਪੰਜਾਬ ਵਿੱਚੋਂ 80 ਲੱਖ ਰੁਪਏ ਪਾਰਟੀ ਨੂੰ ਦਿੱਲੀ ਭੇਜੇ ਗਏ ਜਿਹਨਾਂ ਵਿੱਚੋਂ 20 ਲੱਖ ਉਹ ਖੁਦ ਦੇ ਕੇ ਆਏ। ਉਨ੍ਹਾਂ ਨੇ ਆਪਣੇ 'ਤੇ ਲਗਾਏ ਜਾ ਰਹੇ ਇਲਜ਼ਾਮਾਂ ਨੂੰ ਬੇਬੁਨਿਆਦ ਦੱਸਿਆ ਅਤੇ ਕਿਹਾ ਕਿ ਸਾਰੀ ਸਾਜ਼ਿਸ਼ ਉਹਨਾਂ ਦੇ ਮਿੱਤਰਾਂ ਨੇ  ਰਚੀ ਹੈ। ਉਹਨਾਂ ਇਸ ਸਟਿੰਗ ਅਪ੍ਰੇਸ਼ਨ ਵਾਲੀ ਵੀਡੀਓ ਨੂੰ ਜਨਤਕ ਕਰਨ ਦੀ ਮੰਗ ਕਰਦਿਆਂ ਇਸ ਸਾਰੇ ਮਾਮਲੇ ਦੀ ਸੀਬੀਆਈ ਜਾਂਚ ਦੀ ਵੀ ਮੰਗ ਕੀਤੀ। ਕਾਬਿਲੇ ਜ਼ਿਕਰ ਹੈ ਕਿ ਸਰਦਾਰ ਛੋਟੇ ਪੁਰ ਬਹੁਤ ਹੀ ਸਾਫ ਸੁਥਰੀ ਸਾਖ ਵਾਲੇ ਆਗੂ ਹਨ। ਉਹਨਾਂ ਨਾਜ਼ੁਕ ਮਾਮਲਿਆਂ ਵੇਲੇ ਵੀ ਕਦੇ ਲੀਡਰਾਂ ਵਰਗੀ ਤਿਕੜਮ ਬਾਜ਼ੀ ਜਾਂ ਚਲਾਕੀ ਨਹੀਂ ਦਿਖਾਈ। ਉਹਨਾਂ ਨੇ ਆਮ ਆਦਮੀ ਪਾਰਟੀ ਨੂੰ ਪੰਜਾਬ ਵਿੱਚ ਸਥਾਪਿਤ ਕਰਨ ਲਈ ਦਿਨ ਰਾਤ ਇੱਕ ਕੀਤੀ ਰੱਖਿਆ।
  ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਛੋਟੇਪੁਰ ਨੇ ਆਪਣੇ ਵਿਰੁੱਧ ਦੋਸ਼ਾਂ ਨੂੰ ਬੇਬੁਨਿਆਦ ਅਤੇ ਗਲਤ ਦਸਦਿਆਂ ਖੁਦ ਨੂੰ ਬੇਕਸੂਰ ਦੱਸਿਆ। ਉਨ੍ਹਾ ਕਿਹਾ ਕਿ ਉਨ੍ਹਾ ਨੂੰ ਫਸਾਉਣ ਲਈ ਇਹ ਸਾਰੀ ਸਾਜ਼ਿਸ਼ ਰਚੀ ਗਈ ਹੈ। ਉਨ੍ਹਾ ਕਿਹਾ ਕਿ ਉਹ ਇਸ ਮਾਮਲੇ 'ਚ ਕਿਸੇ ਵੀ ਤਰ੍ਹਾਂ ਦੀ ਜਾਂਚ ਦਾ ਸਾਹਮਣਾ ਕਰਨ ਲਈ ਤਿਆਰ ਹਨ।
ਛੋਟੇਪੁਰ ਨੇ ਕਿਹਾ ਕਿ ਉਹ 40 ਸਾਲਾਂ ਤੋਂ ਜਨਤਕ ਜੀਵਨ 'ਚ ਹਨ ਅਤੇ ਇਸ ਸਮੇਂ ਦੌਰਾਨ ਮੇਰਾ ਪੂਰਾ ਕੈਰੀਅਰ ਬੇਦਾਗ ਰਿਹਾ ਹੈ ਅਤੇ ਕਦੇ ਕਿਸੇ ਨੇ ਮੇਰੇ ਵਿਰੁੱਧ ਅਜਿਹਾ ਕੋਈ ਦੋਸ਼ ਨਹੀਂ ਲਾਇਆ। ਉਨ੍ਹਾ ਕਿਹਾ ਕਿ 40 ਸਾਲਾਂ ਦੇ ਜਨਤਕ ਜੀਵਨ 'ਚ ਮੇਰੇ 'ਤੇ ਕਦੇ ਇੱਕ ਪੈਸੇ ਦੀ ਹੇਰਾਫੇਰੀ ਦਾ ਦੋਸ਼ ਵੀ ਨਹੀਂ ਲੱਗਾ। ਜ਼ਿਕਰਯੋਗ ਹੈ ਕਿ ਇੱਕ ਸਟਿੰਗ ਉਪਰੇਸ਼ਨ 'ਚ ਸੁੱਚਾ ਸਿੰਘ ਛੋਟੇਪੁਰ ਨੂੰ ਰਿਸ਼ਵਤ ਲੈਂਦਿਆਂ ਦੇਖਿਆ ਗਿਆ ਸੀ।
ਸਟਿੰਗ ਦੇ ਸਾਹਮਣੇ ਆਉਣ ਮਗਰੋਂ ਪਾਰਟੀ ਤੋਂ ਉਨ੍ਹਾ ਦੀ ਛੁੱਟੀ ਦੀ ਮੰਗ ਕੀਤੀ ਜਾ ਰਹੀ ਸੀ ਅਤੇ ਕੱਲ੍ਹ ਪਾਰਟੀ ਦੇ ਕਈ ਸੀਨੀਅਰ ਆਗੂਆਂ ਨੇ ਪਾਰਟੀ ਮੁਖੀ ਕੇਜਰੀਵਾਲ ਨੂੰ ਪੱਤਰ ਲਿਖ ਕੇ ਛੋਟੇਪੁਰ ਨੂੰ ਪਾਰਟੀ 'ਚੋਂ ਕੱਢਣ ਦੀ ਮੰਗ ਕੀਤੀ ਸੀ।
ਖੁਦ ਨੂੰ ਪਾਰਟੀ ਲਈ ਸਮਰਪਿਤ ਦਸਦਿਆਂ ਉਨ੍ਹਾ ਕਿਹਾ ਕਿ ਮੈਂ ਪੰਜਾਬ 'ਚ ਆਮ ਆਦਮੀ ਪਾਰਟੀ ਨੂੰ ਖੜਾ ਕਰਨ ਲਈ ਦਿਨ-ਰਾਤ ਸਖ਼ਤ ਮਿਹਨਤ ਕੀਤੀ ਹੈ ਅਤੇ ਆਪਣਾ ਖ਼ੂਨ ਪਸੀਨਾ ਦੇ ਕੇ ਆਮ ਆਦਮੀ ਪਾਰਟੀ ਨੂੰ ਪੰਜਾਬ 'ਚ ਇਸ ਮੁਕਾਮ 'ਤੇ ਪਹੁੰਚਾਇਆ ਹੈ। ਸਾਜ਼ਿਸ਼ ਦੀ ਗੱਲ ਕਰਦਿਆਂ ਛੋਟੇਪੁਰ ਨੇ ਕਿਹਾ ਕਿ ਉਨ੍ਹਾ ਨੂੰ ਫਸਾਉਣ ਲਈ ਇਹ ਸਾਰੀ ਸਾਜ਼ਿਸ਼ ਤਿਆਰ ਕੀਤੀ ਗਈ ਹੈ। ਉਨ੍ਹਾ ਕਿਹਾ ਕਿ ਮੈਨੂੰ ਹੈਰਾਨੀ ਹੈ ਕਿ ਮੇਰੇ ਆਪਣੇ ਮੈਨੂੰ ਫਸਾ ਰਹੇ ਹਨ, ਜਦਕਿ ਵਿਰੋਧੀ ਮੇਰਾ ਸਾਥ ਦੇ ਰਹੇ ਹਨ।
ਛੋਟੇਪੁਰ ਨੇ ਕਿਹਾ ਕਿ ਮੇਰੇ ਖ਼ਿਲਾਫ਼ ਆਪਣਿਆਂ ਨੇ ਹੀ ਸਾਜ਼ਿਸ਼ ਕੀਤੀ ਹੈ ਅਤੇ ਮੈਂ ਇਸ ਮਾਮਲੇ 'ਚ ਕਿਸੇ ਵੀ ਤਰ੍ਹਾਂ ਦੀ ਜਾਂਚ ਦਾ ਸਾਹਮਣਾ ਕਰਨ ਲਈ ਤਿਆਰ ਹਾਂ, ਕਿਉਂਕਿ ਮੈਂ ਜਾਣਦਾ ਹਾਂ ਕਿ ਸੱਚ ਮੇਰੇ ਨਾਲ ਹੈ ਅਤੇ ਜਿਹੜੇ ਲੋਕਾਂ ਨੇ ਮੈਨੂੰ ਬਦਨਾਮ ਕਰਨ ਦੀ ਸਾਜ਼ਿਸ਼ ਰਚੀ ਹੈ, ਉਹ ਕਦੇ ਸਫ਼ਲ ਨਹੀਂ ਹੋ ਸਕਣਗੇ।
ਦਿੱਲੀ ਦੇ ਡਿਪਟੀ ਮੁੱਖ ਮੰਤਰੀ ਮਨੀਸ਼ ਸਿਸੋਦੀਆ 'ਤੇ ਹਮਲਾ ਕਰਦਿਆਂ ਛੋਟੇਪੁਰ ਨੇ ਕਿਹਾ ਕਿ ਉਹ ਡਿਪਟੀ ਮੁੱਖ ਮੰਤਰੀ ਨਹੀਂ ਸਗੋਂ ਜਾਸੂਸ ਹੈ। ਉਨ੍ਹਾ ਕਿਹਾ ਕਿ ਪੰਜਾਬ ਦੇ ਲੋਕਾਂ ਅਤੇ ਵਾਲੰਟੀਅਰਾਂ ਨੂੰ ਤੈਅ ਕਰਨਾ ਚਾਹੀਦਾ ਹੈ ਕਿ ਮੈਂ ਚੋਰ ਹਾਂ ਜਾਂ ਨਹੀਂ।
ਛੋਟੇਪੁਰ ਨੇ ਕਿਹਾ ਕਿ ਕੇਜਰੀਵਾਲ ਮੈਨੂੰ ਮਿਲਣ ਲਈ ਤਿਆਰ ਨਹੀਂ ਅਤੇ ਮਨੀਸ਼ ਸਿਸੋਦੀਆ ਡਿਪਟੀ ਮੁੱਖ ਮੰਤਰੀ ਨਹੀਂ ਸਗੋਂ ਜਾਸੂਸ ਹੈ। ਜੇ ਭਰਾ ਆਪਣੇ ਭਰਾ ਦੀ ਵੀਡੀਓ ਬਣਾਉਂਦਾ ਹੈ ਤਾਂ ਇਹ ਜਾਸੂਸੀ ਹੈ। ਉਨ੍ਹਾ ਕਿਹਾ ਕਿ ਪਾਰਟੀ ਟਿਕਟਾਂ ਦੋ ਦੋ ਕਰੋੜ ਰੁਪਏ ਵਿੱਚ ਵਿਕੀਆਂ ਹਨ ਅਤੇ ਪਾਰਟੀ ਵੱੱਲੋਂ ਐਲਾਨੇ 32 'ਚੋਂ 25 ਉਮੀਦਵਾਰ ਭ੍ਰਿਸ਼ਟ ਹਨ ਅਤੇ ਉਨ੍ਹਾਂ ਨੇ ਸਰਕਾਰ ਨਾਲ ਹੱਥ ਲਿਆ ਲਿਆ ਹੈ।
ਉਨ੍ਹਾ ਕਿਹਾ ਕਿ 24 ਘੰਟੇ 'ਚੋਂ 18-19 ਘੰਟੇ ਪਾਰਟੀ ਲਈ ਕੰਮ ਕੀਤਾ ਅਤੇ ਵਿਦੇਸ਼ਾਂ ਤੋਂ ਵੀ ਪਾਰਟੀ ਲਈ ਚੰਦਾ ਇਕੱਠਾ ਕੀਤਾ ਅਤੇ ਹੁਣ ਮੈਨੂੰ ਬਦਨਾਮ ਕਰਨ ਲਈ ਗਲਤ ਦੋਸ਼ ਲਾਏ ਜਾ ਰਹੇ ਹਨ। ਉਨ੍ਹਾ ਕਿਹਾ ਕਿ ਮੈਂ ਦਿੱਲੀ ਚੋਣਾਂ ਵਿਚ 20 ਲੱਖ ਤੋਂ ਵੀ ਜ਼ਿਆਦਾ ਰੁਪਏ ਖਰਚ ਕੀਤੇ। ਉਨ੍ਹਾ ਮੰਗ ਕੀਤੀ ਕਿ ਸਟਿੰਗ ਨੂੰ ਜਨਤਕ ਕੀਤਾ ਜਾਵੇ ਅਤੇ ਸੀ ਬੀ ਆਈ ਜਾਂਚ ਕਰਵਾਈ ਜਾਵੇ ਅਤੇ ਜੇ ਮੇਰਾ ਇਕ ਵੀ ਪੈਸਾ ਨਿਕਲਦਾ ਹੈ ਤਾਂ ਸੂਲੀ ਚੜ੍ਹਨ ਲਈ ਤਿਆਰ ਹਾਂ। ਉਨ੍ਹਾ ਕਿਹਾ ਕਿ ਸਿਆਸਤ ਮੇਰਾ ਪੇਸ਼ਾ ਨਹੀਂ ਸਗੋਂ ਮੈਂ ਸਿਰਫ ਸੇਵਾ ਲਈ ਇਸ ਪਾਰਟੀ ਵਿਚ ਆਇਆ ਸੀ।
ਛੋਟੇਪੁਰ ਨੇ ਕਿਹਾ ਕਿ ਪਾਰਟੀ ਨੇ ਤੈਅ ਕੀਤਾ ਸੀ ਕਿ ਭ੍ਰਿ੍ਰਸ਼ਟ ਲੋਕਾਂ ਨੂੰ ਟਿਕਟ ਨਹੀਂ ਮਿਲੇਗਾ, ਪਰ ਟਿਕਟਾਂ ਦੀ ਵੰਡ ਵੇਲੇ ਵਲੰਟੀਅਰਾਂ ਨੂੰ ਨਜ਼ਰ-ਅੰਦਾਜ਼ ਕੀਤਾ ਗਿਆ ਅਤੇ ਪਾਰਟੀ ਲਈ ਕੰਮ ਕਰਨ ਵਾਲਿਆਂ ਨੂੰ ਨਕਾਰ ਦਿੱਤਾ ਗਿਆ ਅਤੇ ਉਨ੍ਹਾਂ ਲੋਕਾਂ ਨੂੰ ਅੱਗੇ ਲਿਆਂਦਾ ਜਾ ਰਿਹਾ ਹੈ, ਜਿਹੜੇ ਉਨ੍ਹਾਂ ਦੀ ਹਾਂ ਵਿੱਚ ਹਾਂ ਮਿਲਾ ਰਹੇ ਹਨ।
ਉਨ੍ਹਾ ਕਿਹਾ ਕਿ ਮੈਂ ਖੁਦ ਨੂੰ ਕਦੇ ਪੰਜਾਬ ਦੇ ਮੁੱਖ ਮੰਤਰੀ ਅਹੁਦੇ ਦਾ ਦਾਅਵੇਦਾਰ ਨਹੀਂ ਦੱਸਿਆ, ਪਰ ਪੰਜਾਬ ਵਿੱਚ ਪਾਰਟੀ ਦੀਆਂ ਜੜ੍ਹਾਂ ਲਾਉਣ ਵਾਲਿਆਂ ਦੀ ਅਣਦੇਖੀ ਕੀਤੀ ਜਾ ਰਹੀ ਹੈ ਅਤੇ ਪੈਸੇ ਵਾਲੇ ਅੱਗੇ ਆ ਰਹੇ ਹਨ।
ਛੋਟੇਪੁਰ 'ਤੇ ਰਿਸ਼ਵਤ ਲੈਣ ਸਬੰਧੀ ਇਕ ਵੀਡੀਓ ਸਾਹਮਣੇ ਆਈ ਸੀ। ਉਨ੍ਹਾਂ ਨੇ ਕਿਹਾ ਕਿ ਉਨ੍ਹਾਂ ਨੇ ਪਿਛਲੇ ਢਾਈ ਸਾਲਾਂ ਤੋਂ ਆਮ ਆਦਮੀ ਪਾਰਟੀ ਦੀ ਸੇਵਾ ਕੀਤੀ ਹੈ। ਉਨ੍ਹਾਂ ਨੇ ਇਹ ਵੀ ਕਿਹਾ ਕਿ ਬੀਤੇ ਢਾਈ ਸਾਲਾਂ ਤੋਂ ਪਾਰਟੀ ਤੋਂ ਉਨ੍ਹਾਂ ਨੇ ਕਦੀ ਕੋਈ ਫੰਡ ਨਹੀਂ ਲਿਆ। ਸੁੱਚਾ ਸਿੰਘ ਛੋਟੇਪੁਰ ਨੇ ਕਿਹਾ ਕਿ ਪਾਰਟੀ ਦੇ ਅੰਦਰ ਉਨ੍ਹਾਂ ਦੇ ਆਪਣਿਆਂ ਨੇ ਉਨ੍ਹਾਂ ਖਿਲਾਫ ਵੱਡੀ ਸਾਜ਼ਸ਼ ਰਚੀ ਹੈ। ਛੋਟੇਪੁਰ ਨੇ ਇਹ ਵੀ ਕਿਹਾ ਕਿ ਉਨ੍ਹਾਂ ਖਿਲਾਫ ਸੀ.ਬੀ.ਆਈ. ਤੋਂ ਜਾਂਚ ਕਰਵਾਈ ਜਾਵੇ। ਇਸ ਪ੍ਰੈਸ ਕਾਨਫਰੰਸ 'ਚ ਉਨ੍ਹਾਂ ਨੇ ਪਾਰਟੀ ਦੇ ਕਈ ਵਿਵਾਦਾਂ 'ਤੇ ਗੱਲ ਕੀਤੀ। ਉਨ੍ਹਾਂ ਨੇ ਕੇਜਰੀਵਾਲ ਤੇ ਦੁਰਗੇਸ਼ ਪਾਠਕ ਸਬੰਧੀ ਵੀ ਕਈ ਇੰਕਸ਼ਾਫ ਕੀਤੇ। ਉਨ੍ਹਾਂ ਨੇ ਇਹ ਵਿਸ਼ੇਸ਼ ਤੌਰ 'ਤੇ ਕਿਹਾ ਕਿ ਪੰਜਾਬੀ ਆਗੂਆਂ 'ਤੇ ਆਮ ਆਦਮੀ ਪਾਰਟੀ ਵਿਸ਼ਵਾਸ਼ ਨਹੀਂ ਕਰਦੀ। ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਪਾਰਟੀ ਛੱਡਣ ਤੋਂ ਇਨਕਾਰ ਕੀਤਾ। ਉਨ੍ਹਾਂ ਨੇ ਕਿਹਾ ਕਿ ਉਹ ਕੇਜਰੀਵਾਲ ਦੇ ਫੈਸਲੇ ਦਾ ਇੰਤਜਾਰ ਕਰਨਗੇ। ਸਾਜ਼ਿਸ਼ ਮਿੱਤਰਾਂ ਨੇ ਹੀ ਰਚੀ-ਛੋਟੇਪੁਰ  ਦੇ ਇਸ਼ਾਰਤਨ ਖੁਲਾਸੇ ਵੀ ਪਾ ਸਕਦੇ ਹਨ ਵਿਰੋਧੀਆਂ ਲਈ ਵੱਡੇ ਪੰਗੇ 

ਸੁੱਚਾ ਸਿੰਘ ਛੋਟੇਪੁਰ ਦੀ ਬਰਖਾਸਤਗੀ 'ਤੇ ਤਿੱਖੇ ਸਿਆਸੀ ਪ੍ਰਤੀਕਰਮ


SMWP: 15;31
ਇਹ ਬਰਖਾਸਤਗੀ 'ਆਪ' ਦੀ ਪੰਜਾਬ ਵਿੱਚੋ ਸਫ ਵਲੇਟ ਦੇਵੇਗੀ- ਸਰਨਾ       
ਅੰਮ੍ਰਿਤਸਰ//ਲੁਧਿਆਣਾ: 26 ਅਗਸਤ 2016: (ਜਸਬੀਰ ਸਿੰਘ ਪੱਟੀ//ਪੰਜਾਬ ਸਕਰੀਨ):
ਸ੍ਰ ਹਰਵਿੰਦਰ ਸਿੰਘ ਸਰਨਾ ਸਕੱਤਰ ਜਨਰਲ ਸ਼੍ਰੋਮਣੀ ਅਕਾਲੀ ਦਲ ਦਿੱਲੀ ਨੇ ਆਮ ਆਦਮੀ ਪਾਰਟੀ ਦੀ ਕਾਰਗੁਜ਼ਾਰੀ ਤੇ ਟਿੱਪਣੀ ਕਰਦਿਆ ਕਿਹਾ ਕਿ ਅਰਵਿੰਦ ਕੇਜਰੀਵਾਲ ਵੱਲੋ ਪੰਜਾਬ ਦੇ ਕਨਵੀਨਰ ਸੁੱਚਾ ਸਿੰਘ ਛੋਟੇਪੁਰ ਨੂੰ ਪਾਰਟੀ ਵਿੱਚੋ ਬਰਖਾਸਤਰਗੀ 'ਆਪ' ਦੀ ਪੰਜਾਬ ਵਿੱਚੋ ਸਫ ਵਲੇਟ ਦੇਵੇਗੀ।


       ਜਾਰੀ ਇੱਕ ਬਿਆਨ ਰਾਹੀ ਸ੍ਰ ਸਰਨਾ ਨੇ ਕਿਹਾ ਕਿ ਸ੍ਰ ਸੁੱਚਾ ਸਿੰਘ ਛੋਟੇਪੁਰ ਨੂੰ ਉਹ ਕਰੀਬ ਪਿਛਲੇ 35 ਸਾਲਾ ਤੋ ਜਾਣਦੇ ਹਨ ਤੇ ਉਸ ਵਰਗਾ ਕੋਈ ਇਮਾਨਦਾਰ ਵਿਅਕਤੀ ਨਹੀ ਹੈ। ਉਹਨਾਂ ਕਿਹਾ ਕਿ ਇੱਕ ਸਾਜਿਸ਼ ਤਹਿਤ ਛੋਟੇਪੁਰ ਨੂੰ ਫਸਾਇਆ ਗਿਆ ਹੈ ਜਿਹੜੇ ਵਿਅਕਤੀ ਅੱਜ ਕੇਜਰੀਵਾਲ ਨੂੰ ਪੱਤਰ ਲਿੱਖ ਕੇ ਛੋਟੇਪੁਰ ਨੂੰ ਪਾਰਟੀ ਵਿੱਚੋ ਕੱਢਣ ਲਈ ਚਿੱਠੀਆ ਲਿਖ ਰਹੇ ਹਨ ਉਹ ਵੀ ਕਲ੍ਵ ਨੂੰ ਤਿਆਰ ਰਹਿਣ। ਉਹਨਾਂ ਕਿਹਾ ਕਿ ਕੇਜਰੀਵਾਲ ਇੱਕ ਮੌਕਾਪ੍ਰਸਤ ਵਿਅਕਤੀ ਹੈ ਅਤੇ ਉਸ ਨੇ ਪਹਿਲਾਂ ਅੰਨਾ ਹਜ਼ਾਰੇ ਨੂੰ ਧੋਖਾ ਦਿੱਤਾ ਤੇ ਫਿਰ ਆਮ ਆਦਮੀ ਪਾਰਟੀ ਨੂੰ ਖੜਾ ਕਰਨ ਵਿੱਚ ਉੱਘਾ ਯੋਗਦਾਨ ਪਾਉਣ ਵਾਲੇ ਯੋਗੇਦਰ ਯਾਦਵ ਤੇ ਪ੍ਰਸ਼ਾਤ ਭੂਸ਼ਨ ਨੂੰ ਪਾਰਟੀ ਵਿੱਚੋ ਕੱਢਿਆ। ਇਥੇ ਹੀ ਬੱਸ ਨਹੀ ਪੰਜਾਬ ਵਿੱਚ ਉਸ ਦੀ ਪਾਰਟੀ ਦੀ ਜੜ• ਲਗਾਉਣ ਵਾਲੇ ਹਰਿੰਦਰ ਸਿੰਘ ਖਾਲਸਾ ਤੇ ਧਰਮਵੀਰ ਗਾਂਧੀ ਨੂੰ ਇਸ ਕਰਕੇ ਪਾਰਟੀ ਵਿੱਚੋ ਮੁਅੱਤਲ ਕੀਤਾ ਗਿਆ ਕਿਉਕਿ ਉਹ ਕੇਜਰੀਵਾਲ ਦੀ ਤਾਨਾਸ਼ਾਹੀ ਦੇ ਖਿਲਾਫ ਅਵਾਜ ਬੁਲੰਦ ਕਰਦੇ ਸਨ। ਉਹਨਾਂ ਕਿਹਾ ਕਿ ਪੰਜਾਬ ਵਿੱਚ ਸੁੱਚਾ ਸਿੰਘ ਛੋਟੇਪੁਰ ਇੱਕ ਵੱਡ ਅਕਾਰੀ ਵਿਅਕਤੀ ਤੇ ਪੰਥਕ ਸਫਾਂ ਵਿੱਚ ਉਸ ਦੀ ਵੱਡੀ ਪਛਾਣ ਹੈ। ਉਹਨਾਂ ਕਿਹਾ ਕਿ ਸਾਕਾ ਨੀਲਾ ਤਾਰਾ ਦਾ ਵਿਰੋਧ ਕਰਨ ਵਾਲਿਆ ਵੀ ਛੋਟੇਪੁਰ ਪਹਿਲੇ ਕਤਾਰ ਵਿੱਚ ਖੜਾ ਸੀ ਤੇ ਬਰਨਾਲਾ ਸਰਕਾਰ ਵੇਲੋ ਜਦੋ ਸ੍ਰੀ ਦਰਬਾਰ ਸਾਹਿਬ ਵਿਖੇ ਸਰਕਾਰ ਨੇ ਪੁਲੀਸ ਭੇਜੀ ਸੀ ਤਾਂ ਉਸ ਵੇਲੇ ਵੀ ਸੁੱਚਾ ਸਿੰਘ ਰੋਸ ਵਜੋ ਅਸਤੀਫਾ ਦੇ ਕੇ ਸਰਕਾਰ ਤੋ ਬਾਹਰ ਆ ਗਿਆ ਸੀ। 
           ਉਹਨਾਂ ਕਿਹਾ ਕਿ ਛੋਟੇਪੁਰ ਤੇ ਦੋਸ਼ ਲਗਾਇਆ ਜਾ ਰਿਹਾ ਹੈ ਕਿ ਉਸ ਨੇ ਕਿਸੇ ਵਿਅਕਤੀ ਨੂੰ ਟਿਕਟ ਦਿਵਾਉਣ ਬਦਲੇ ਦੋ ਲੱਖ ਦੀ ਰਿਸ਼ਵਤ ਲਈ ਸੀ ਤੇ ਸਟਿੰਗ ਆਪਰੇਸ਼ਨ ਵਿੱਚ ਇਹ ਗੱਲ ਸਾਹਮਣੇ ਆਈ ਹੈ। ਉਹਨਾਂ ਕਿਹਾ ਕਿ ਪਾਰਟੀ ਦੇ ਆਗੂ ਪਵਿੱਤਰ ਸਿੰਘ ਨੇ ਵੀ ਕੇਜਰੀਵਾਲ ਦੇ ਲੈਫਟੈਣ ਸੰਜੇ ਸਿੰਘ ਤੇ ਟਿਕਟ ਵੰਡ ਕਰਨ ਸਮੇਂ ਰਿਸ਼ਵਤ ਲੈਣ ਦੇ ਦੋਸ਼ ਲਗਾਏ ਹਨ। ਜੱਸੀ ਜਸਰਾਜ ਵੀ ਕਈ ਵਾਰੀ ਕਹਿ ਚੁੱਕਾ ਹੈ ਕਿ ਕੇਜਰੀਵਾਲ ਸਿਰਫ ਪੈਸੇ ਦਾ ਪੀਰ ਹੈ। ਇਸੇ ਤਰ•ਾ ਕੁਲਦੀਪ ਸਿੰਘ ਕਿੰਗਰਾ ਨੇ ਵੀ ਦੋਸ਼ ਲਾਇਆ ਹੈ ਕਿ ਪਾਰਟੀ ਵਿੱਚ ਭ੍ਰਿਸ਼ਟਾਟਾਰ ਵੱਧ ਰਿਹਾ ਹੈ। ਉਹਨਾਂ ਕਿਹਾ ਕਿ ਕੇਜਰੀਵਾਲ ਸਪੱਸ਼ਟ ਕਰੇ ਉਸ ਦੀ ਪਾਰਟੀ ਫੰਡ ਤੋ ਬਗੈਰ ਕਿਵੇਂ ਚੱਲਦੀ ਹੈ ਜਦ ਕਿ ਪਿਛਲੀ ਦਿਨੀ ਉਹ ਵਿਦੇਸ਼ ਯਾਤਰਾ ਤੇ ਜਾ ਕੇ ਆਏ ਹਨ ਤੇ ਉਥੋ ਕਿੰਨੀ ਰਕਮ ਉਗਰਾਹੀ ਕੀਤੀ ਹੈ ਉਸਦੀ ਕੋਈ ਜਾਣਕਾਰੀ ਨਹੀ ਹੈ। ਉਹਨਾਂ ਕਿਹਾ ਕਿ ਕੇਜਰੀਵਾਲ ਨੇ ਪੰਜਾਬ ਦੀ ਮੁੱਖ ਮੰਤਰੀ ਬਣਨਾ ਹੈ ਤਾਂ ਜਰੂਰ ਬਣੇ ਪਰ ਇਮਾਨਦਾਰ ਤੇ ਇਖਲਾਕ ਵਾਲੇ ਆਗੂਆਂ ਖਿਲਾਫ ਸਾਜਿਸ਼ਾਂ ਰਚ ਕੇ ਕਾਰਵਾਈਆ ਕਰਨਾ ਉਸ ਨੂੰ ਪੰਜਾਬ ਵਿੱਚ ਮਹਿੰਗਾ ਪਵੇਗਾ। ਉਹਨਾਂ ਕਿਹਾ ਕਿ ਸੁੱਚਾ ਸਿੰਘ ਛੋਟੇਪੁਰ ਦੋ ਵਾਰੀ ਵਿਧਾਇਕ ਰਿਹਾ ਹੈ ਜਿਸ ਨਾਲ ਪੰਜਾਬ ਵਿੱਚ ਲੱਖਾਂ ਦੀ ਗਿਣਤੀ ਵਿੱਚ ਲੋਕ ਜਾਤੀ ਤੇ ਜਮਾਤੀ ਤੌਰ ਤੇ ਜੁੜੇ ਹੋਏ ਹਨ ਅਤੇ ਆਮ ਆਦਮੀ ਪਾਰਟੀ ਲਈ ਸੁੱਚਾ ਸਿੰਘ ਛੋਟੇਪੁਰ ਦੀ ਬਰਖਾਸਤਗੀ ਪੰਜਾਬ ਵਿੱਚੋ ਬੋਰੀਆ ਬਿਸਤਰਾ ਗੋਲ ਕਰਨ ਦਾ ਸਾਧਨ ਬਣੇਗੀ।

Friday, July 29, 2016

ਅੰਮ੍ਰਿਤਸਰ ਵਿੱਚ ਹੋ ਸਕਦਾ ਹੈ "ਆਪ" ਅਤੇ "ਅਕਾਲੀ ਵਰਕਰਾਂ" ਵਿੱਚ ਟਕਰਾਓ

ਕੇਜਰੀਵਾਲ ਕੱਲ੍ਹ ਅੰਮ੍ਰਿਤਸਰ ਜ਼ਿਲ੍ਹਾ ਅਦਾਲਤ 'ਚ ਪੇਸ਼ ਹੋਣਗੇ
ਅੰਮ੍ਰਿਤਸਰ: 28ਜੁਲਾਈ 2016: (ਜਸਬੀਰ ਸਿੰਘ ਪੱਟੀ): ਕੱਲ੍ਹ ਸ਼ੁੱਕਰਵਾਰ ਨੂੰ ਅੰਮ੍ਰਿਤਸਰ ਵਿੱਚ ਆਮ ਆਦਮੀ ਪਾਰਟੀ ਅਤੇ ਅਕਾਲੀ ਵਰਕਰਾਂ ਦਾ ਆਪਸੀ ਟਕਰਾਓ ਹੋ ਸਕਦਾ ਹੈ। ਦੋਵੈਂ ਧਿਰਾਂ ਆਪੋ ਆਪਣੇ ਸ਼ਕਤੀ ਪ੍ਰਦਰਸ਼ਨ ਕਾਰਨ ਲਈ ਬਜ਼ਿੱਦ ਜਾਪਦੀਆਂ ਹਨ। 
ਦਿੱਲੀ ਦੇ ਮੁੱਖ ਮੰਤਰੀ ਤੇ ਆਮ ਆਦਮੀ ਪਾਰਟੀ ਦੇ ਕਨਵੀਨਰ ਅਰਵਿੰਦ ਕੇਜਰੀਵਾਲ ਅੱਜ ਸ਼ਾਮ ਅੰਮ੍ਰਿਤਸਰ ਪਹੁੰਚ ਗਏ ਹਨ। ਕੇਜਰੀਵਾਲ ਕੱਲ੍ਹ ਅੰਮ੍ਰਿਤਸਰ ਜ਼ਿਲ੍ਹਾ ਅਦਾਲਤ 'ਚ ਪੇਸ਼ ਹੋਣਗੇ। ਅਦਾਲਤ ਨੇ ਪੰਜਾਬ ਦੇ ਕੈਬਨਿਟ ਮੰਤਰੀ ਵੱਲੋਂ ਦਾਇਰ ਕਰਵਾਏ ਮਾਣਹਾਨੀ ਦੇ ਕੇਸ 'ਚ 29 ਜੁਲਾਈ ਲਈ ਸੰਮਨ ਕੀਤੇ ਹਨ। 'ਆਪ' ਦੇ ਪੰਜਾਬ ਮਾਮਲਿਆਂ ਦੇ ਇੰਚਾਰਜ ਸੰਜੇ ਸਿੰਘ ਤੇ ਦਿੱਲੀ ਡਾਇਲਾਗ ਦੇ ਚੇਅਰਮੈਨ ਆਸ਼ੀਸ਼ ਖੇਤਾਨ ਵੀ ਉਨ੍ਹਾਂ ਦੇ ਨਾਲ ਪਹੁੰਚੇ ਹਨ।
ਸੂਤਰਾਂ ਮੁਤਾਬਕ ਅੰਮ੍ਰਿਤਸਰ ਤੋਂ ਕੇਜਰੀਵਾਲ ਤੇ ਦੋ ਹੋਰ ਨੇਤਾਵਾਂ ਦੇ ਸੰਮਨ ਲੈ ਕੇ ਦਿੱਲੀ ਗਈ ਪੁਲਸ ਟੀਮ ਵੱਲੋਂ ਉਨ੍ਹਾਂ ਨੂੰ ਸੀ.ਐਮ. ਹਾਊਸ ਵਿੱਚ ਸੰਮਨ ਰਿਸੀਵ ਕਰਵਾਏ ਸਨ। ਜਦੋਂ ਪੁਲਸ ਵੱਲੋਂ ਸੰਮਨ ਰਿਸੀਵ ਕਰਵਾਏ ਗਏ, ਉਸ ਵੇਲੇ ਸੰਜੇ ਸਿੰਘ ਤੇ ਆਸ਼ੀਸ਼ ਖੇਤਾਨ ਵੀ ਉੱਥੇ ਹੀ ਮੌਜੂਦ ਸਨ। ਸੰਮਨ ਰਿਸੀਵ ਕਰਨ ਤੋਂ ਬਾਅਦ ਕੇਜਰੀਵਾਲ ਨੇ ਕਿਹਾ ਸੀ ਕਿ ਉਹ ਅਦਾਲਤ ਵਿੱਚ ਜ਼ਰੂਰ ਪੇਸ਼ ਹੋਣਗੇ।
ਜਾਣਕਾਰੀ ਮੁਤਾਬਕ ਕੇਜਰੀਵਾਲ ਵੀਰਵਾਰ ਸ਼ਾਮ ਅੰਮ੍ਰਿਤਸਰ ਪਹੁੰਚ ਗਏ ਹਨ ਤੇ ਰਾਤ ਅੰਮ੍ਰਿਤਸਰ ਦੇ ਸਰਕਟ ਹਾਊਸ 'ਚ ਰੁਕਣਗੇ। 29 ਜੁਲਾਈ ਨੂੰ ਸਵੇਰੇ ਉਹ ਅਦਾਲਤ ਵਿੱਚ ਪੇਸ਼ ਹੋਣਗੇ। ਅਦਾਲਤ ਵਿੱਚ ਪੇਸ਼ ਹੋਣ ਤੋਂ ਬਾਅਦ ਉਹ ਕਿੱਥੇ ਜਾਣਗੇ ਤੇ ਉਨ੍ਹਾਂ ਦਾ ਹੋਰ ਕੀ ਪ੍ਰੋਗਰਾਮ ਹੈ, ਇਸ ਬਾਰੇ ਨਾ ਕਿਸੇ ਪਾਰਟੀ ਨੇਤਾ ਨੂੰ ਤੇ ਨਾ ਹੀ ਜ਼ਿਲ੍ਹਾ ਪ੍ਰਸ਼ਾਸਨ ਨੂੰ ਜਾਣਕਾਰੀ ਦਿੱਤੀ ਗਈ ਹੈ। ਪੁਲਸ ਵੱਲੋਂ ਕੇਜਰੀਵਾਲ ਦੀ ਇਸ ਅੰਮ੍ਰਿਤਸਰ ਫੇਰੀ ਨੂੰ ਦੇਖਦਿਆਂ ਸੁਰੱਖਿਆ ਦੇ ਵੀ ਪੁਖਤਾ ਪ੍ਰਬੰਧ ਕੀਤੇ ਗਏ ਹਨ।
ਅਕਾਲੀ ਦਲ ਦੇ ਆਗੂ ਮਜੀਠੀਆ ਭਾਵੇਂ ਕੇਜਰੀਵਾਲ ਨੂੰ ਅਦਾਲਤ ਵਿੱਚ ਖੜਾ ਕਰਨ ਨੂੰ ਲੈ ਕੇ ਕਾਫੀ ਸੰਤੁਸ਼ਟ ਹੋਣਗੇ, ਪਰ ਹੁਣ ਲੱਗ ਰਿਹਾ ਹੈ ਕਿ ਅਕਾਲੀ ਦਲ ਨੂੰ ਕੇਜਰੀਵਾਲ ਦੀ ਪੇਸ਼ੀ ਪੁੱਠੀ ਵੀ ਪੈ ਸਕਦੀ ਹੈ ਤੇ ਪੰਜਾਬ ਦੇ ਲੋਕਾਂ ਦਾ ਕੇਜਰੀਵਾਲ ਦੇ ਹੱਕ ਵਿੱਚ ਵੱਡੀ ਗਿਣਤੀ ਵਿੱਚ ਭੁਗਤਣਾ ਅਕਾਲੀਆਂ ਦੀ ਨੀਂਦ ਹੋਰ ਵੀ ਹਰਾਮ ਕਰ ਸਕਦਾ ਹੈ। ਪੰਜਾਬ ਵਿੱਚ ਜਿੱਥੇ ਥਾਂ-ਥਾਂ 'ਤੇ ਬਿਕਰਮ ਸਿੰਘ ਮਜੀਠੀਆ ਦੇ ਨਸ਼ਾ ਤਸਕਰਾਂ ਨਾਲ ਸੰਬੰਧ ਹੋਣ ਦੇ ਬੋਰਡ ਲਗਾਏ ਗਏ ਹਨ, ਉਥੇ ਮੁੱਖ ਮੰਤਰੀ ਕੇਜਰੀਵਾਲ ਦੀ ਫੇਰੀ ਤੋਂ ਪਹਿਲਾਂ ਸ਼ਹਿਰਾਂ ਵਿੱਚ ਬਿਕਰਮ ਮਜੀਠੀਆ ਦੇ ਨਸ਼ਾ ਤਸਕਰੀ ਵਿੱਚ ਸ਼ਾਮਲ ਹੋਣ ਦੇ ਪੋਸਟਰ ਤੇ ਹੋਰਡਿੰਗ ਲਗਾ ਕੇ ਅਕਾਲੀ ਦਲ ਦਾ ਮਜ਼ਾਕ ਉਡਾਇਆ ਜਾ ਰਿਹਾ ਹੈ। ਆਮ ਆਦਮੀ ਪਾਰਟੀ ਵੱਲੋਂ ਵੀ ਸੋਸ਼ਲ ਮੀਡੀਆ ਰਾਹੀਂ ਲੋਕਾਂ ਨੂੰ ਸੁਨੇਹੇ ਭੇਜ ਕੇ ਸ਼ੁੱਕਰਵਾਰ ਨੌ ਵਜੇ ਸਰਕਟ ਹਾਊਸ ਵਿੱਚ ਇਕੱਠੇ ਹੋਣ ਦਾ ਸੱਦਾ ਦਿੱਤਾ ਗਿਆ ਹੈ।
ਆਦਮੀ ਪਾਰਟੀ ਵੱਲੋਂ ਸੋਸ਼ਲ ਮੀਡੀਆ 'ਤੇ ਦਿੱਤੇ ਜਾ ਰਹੇ ਸੁਨੇਹੇ ਵਿੱਚ ਲਿਖਿਆ ਗਿਆ ਹੈ ਕਿ ਅਸੀਂ ਸਾਰੇ ਹਜ਼ਾਰ ਵਾਰ ਕਹਾਂਗੇ ਕਿ ਬਿਕਰਮ ਮਜੀਠੀਆ ਨਸ਼ਿਆਂ ਦਾ ਤਸਕਰ ਹੈ- ਅਰਵਿੰਦ ਕੇਜਰੀਵਾਲ ਦਾ ਸਾਥ ਦੇਣ ਲਈ ਸਵੇਰੇ ਹੁੰਮ-ਹੁਮਾ ਕੇ ਪਹੁੰਚੋ।ਇਸ ਸੁਨੇਹੇ ਤੋਂ ਇਹ ਲੱਗ ਰਿਹਾ ਹੈ ਕਿ ਭਲਕੇ ਸਵੇਰੇ ਜਦੋਂ ਕੇਜਰੀਵਾਲ ਸਰਕਟ ਹਾਊਸ ਤੋਂ ਅਦਾਲਤ ਲਈ ਜਾਣਗੇ ਤਾਂ ਉਨ੍ਹਾਂ ਦੇ ਨਾਲ ਉਨ੍ਹਾਂ ਦੇ ਹਜ਼ਾਰਾਂ ਸਮੱਰਥਕ ਵੀ ਜਲੂਸ ਦੀ ਸ਼ਕਲ ਉਨ੍ਹਾਂ ਦੇ ਨਾਲ ਬਿਕਰਮ ਮੀਜੀਠੀਆ ਤੇ ਸਰਕਾਰ ਵਿਰੁੱਧ ਨਾਅਰੇ ਮਾਰਦੇ ਜਾਣਗੇ, ਜਿਹੜੀ ਇੱਕ ਤਰ੍ਹਾਂ ਨਾਲ ਹਾਕਮ ਧਿਰ ਨੂੰ ਖੁੱਲ੍ਹੀ ਚੁਨੌਤੀ ਹੋਵੇਗੀ ਕਿ ਆਮ ਆਦਮੀ ਪਾਰਟੀ ਦਾ ਕੋਈ ਵੀ ਵਰਕਰ ਮਜੀਠੀਆ ਦੇ ਕੇਸਾਂ ਦੀ ਪ੍ਰਵਾਹ ਨਹੀਂ ਕਰਦਾ ਤੇ ਮਜੀਠੀਆ ਲਈ ਕੇਜਰੀਵਾਲ ਨੂੰ ਦਿੱਤੀ ਚੁਨੌਤੀ ਅਕਾਲੀ ਦਲ ਦੇ ਗਲੇ ਦੀ ਹੱਡੀ ਬਣ ਸਕਦੀ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਮਜੀਠੀਆ ਨੇ ਵੀ ਆਪਣਾ ਲਾਮ-ਲਸ਼ਕਰ ਕੇਜਰੀਵਾਲ ਦੇ ਜਲੌਅ ਦੇ ਟਾਕਰੇ ਲਈ ਸੱਦ ਲਿਆ ਹੈ, ਜਿਸ ਕਾਰਨ ਹਾਲਾਤ ਕਾਫੀ ਤਣਾਅ ਭਰਪੂਰ ਬਣਦੇ ਨਜ਼ਰ ਆ ਰਹੇ ਹਨ।
ਜ਼ਿਕਰਯੋਗ ਹੈ ਕਿ ਕੇਜਰੀਵਾਲ ਆਪਣੀ ਪਿਛਲੀ ਪੰਜਾਬ ਫੇਰੀ ਦੌਰਾਨ ਸਟੇਜਾਂ ਤੋਂ ਇਹ ਕਹਿੰਦੇ ਸੁਣਾਈ ਦਿੱਤੇ ਸਨ ਕਿ ਉਨ੍ਹਾਂ ਨੂੰ ਮਜੀਠੀਆ ਤਾਂ ਕੀ ਉਸ ਦੇ ਕਿਸੇ ਵੀ ਹੋਰ ਆਗੂ ਵੱਲੋਂ ਕੀਤੇ ਗਏ ਕੇਸ ਦੀ ਕੋਈ ਪ੍ਰਵਾਹ ਨਹੀਂ। ਉਹ ਹਮੇਸ਼ਾ ਮਜੀਠੀਆ ਨੂੰ ਨਸ਼ਾ ਤਸਕਰਾਂ ਵਿੱਚ ਸ਼ਾਮਲ ਹੋਣ ਦੀ ਗੱਲ ਕਹਿੰਦੇ ਰਹਿਣਗੇ ਅਤੇ ਪੰਜਾਬ ਵਿੱਚ ਆਮ ਆਦਮੀ ਪਾਰਟੀ ਦੀ ਸਰਕਾਰ ਬਨਣ 'ਤੇ ਮਜੀਠੀਆ ਸਮੇਤ ਉਹਨਾਂ ਸਾਰੇ ਸਮੱਗਲਰਾਂ ਨੂੰ ਜੇਲ੍ਹਾਂ ਵਿੱਚ ਬੰਦ ਕੀਤਾ ਜਾਵੇਗਾ, ਜਿਹੜੇ ਨਸ਼ਾ ਤਸਕਰੀ ਵਿੱਚ ਸ਼ਾਮਲ ਹਨ ਤਾਂ ਕਿ ਉਹ ਬਾਕੀ ਦੀ ਉਮਰ ਆਰਾਮ ਨਾਲ ਜੇਲ੍ਹ ਦੀਆਂ ਕਾਲ ਕੋਠੜੀਆਂ ਵਿੱਚ ਬਿਤਾ ਸਕਣ। ਕੇਜਰੀਵਾਲ ਅੱਜ ਸ਼ਾਮੀਂ ਦਿੱਲੀ ਤੋਂ ਹਵਾਈ ਜਹਾਜ਼ ਰਾਹੀਂ ਜਦੋਂ ਸਥਾਨਕ ਹਵਾਈ ਅੱਡੇ 'ਤੇ ਪੁੱਜੇ ਤਾਂ ਉਹਨਾਂ ਦਾ ਸੁਆਗਤ ਪਾਰਟੀ ਦੇ ਆਗੂਆਂ ਨੇ ਗਰਮਜੋਸ਼ੀ ਨਾਲ ਕੀਤਾ, ਪਰ ਮੀਡੀਏ ਨਾਲ ਕੇਜਰੀਵਾਲ ਨੇ ਕੋਈ ਗੱਲ ਨਹੀਂ ਕੀਤੀ ਤੇ ਉਹ ਸਿੱਧੇ ਸਰਕਟ ਹਾਊਸ ਵਿਖੇ ਪੁੱਜ ਗਏ। ਪੰਜਾਬ ਦੇ ਵੱਖ-ਵੱਖ ਹਿੱਸਿਆਂ ਤੋਂ ਆਉਣ ਵਾਲੇ ਆਮ ਆਦਮੀ ਪਾਰਟੀ ਦੇ ਵਰਕਰਾਂ ਨੂੰ ਪੁਲਸ ਰਸਤਿਆ ਵਿੱਚ ਪਰੇਸ਼ਾਨ ਵੀ ਕਰ ਸਕਦੀ ਹੈ ਤਾਂ ਕਿ ਉਹ ਅੰਮ੍ਰਿਤਸਰ ਨਾ ਪੁੱਜ ਸਕਣ, ਜਦ ਕਿ ਸੂਚਨਾ ਮੁਤਾਬਕ ਬਹੁਤ ਸਾਰੇ ਵਰਕਰ ਅੰਮ੍ਰਿਤਸਰ ਪੁੱਜ ਚੁੱਕੇ ਹਨ। ਦੂਸਰੇ ਪਾਸੇ ਮਜੀਠੀਆ ਵੱਲੋਂ ਕੇਜਰੀਵਾਲ ਨੂੰ ਜੇਲ੍ਹ ਭੇਜਣ ਦਾ ਦਾਅਵਾ ਕੀਤਾ ਜਾ ਰਿਹਾ ਹੈ। ਅਦਾਲਤ ਦਾ ਊਠ ਕਿਸ ਕਰਵਟ ਬੈਠਦਾ ਹੈ, ਉਹ ਤਾਂ ਸਮਾਂ ਹੀ ਦੱਸੇਗਾ।
ਇਸੇ ਦੌਰਾਨ ਇਹ ਵੀ ਖਬਰ ਹੈ ਕਿ ਮਜੀਠੀਏ ਨੇ ਆਪਣੇ ਲੱਠਮਾਰ   ਵੀ ਬੁਲਾਏ ਹਨ। 
    ਕੇਜਰੀਵਾਲ  ਦੀ ਪੇਸ਼ੀ ਨੂੰ ਲੈ ਕੇ ਜਿਥੇ ਆਮ ਆਦਮੀ ਪਾਰਟੀ ਨੇ ਸਾਰੇ ਪੰਜਾਬ ਵਿੱਚੋ ਵਰਕਰ, ਸਮੱਰਥਕ ਤੇ ਆਗੂ ਬੁਲਾਏ ਹਨ ਉਥੇ ਅਕਾਲੀ ਦਲ ਦੇ ਆਗੂ ਤੇ ਮਾਲ ਮੰਤਰੀ ਸ੍ਰੀ ਬਿਕਰਮ ਸਿੰਘ ਮਜੀਠੀਆ ਨੇ ਵੀ ਅਕਾਲੀ ਦੇ ਕਰੀਬ ਤਿੰਨ ਹਜ਼ਾਰ ਲੱਠਮਾਰ ਵਰਕਰਾਂ ਨੂੰ ਥਾਣਾ ਸਿਵਲ ਲਾਈਨ ਦੇ ਚੌਕ ਵਿੱਚ ਸਵੇਰੇ 9 ਵਜੇ ਪਹੁੰਚਣ ਦੇ ਆਦੇਸ਼ ਜਾਰੀ ਕਰ ਦਿੱਤੇ ਹਨ ਅਤੇ ਕਿਸੇ ਵੀ ਪ੍ਰਕਾਰ ਦੀ ਖੂਨੀ ਝੜਪ ਹੋਣ ਤੋ ਇਨਕਾਰ ਨਹੀ ਕੀਤਾ ਜਾ ਸਕਦਾ। ਦੋਹਾਂ ਪਾਸਿਆ ਤੋ ਜੰਮ ਕੇ ਨਾਅਰੇਬਾਜੀ ਤਾਂ ਹੋਵੇਗੀ ਹੀ ਪਰ ਹਾਕਮ ਧਿਰ ਦੇ ਲੱਠਮਾਰ ਸਰਕਾਰ ਨੂੰ ਕਿਸੇ ਨਵੀ ਬਿਪਤਾ ਵਿੱਚ ਪਾ ਸਕਦੇ ਹਨ। ਪ੍ਰਸ਼ਾਸ਼ਨ ਵੱਲ ਪੁਖਤਾ ਪ੍ਰਬੰਧ ਕੀਤੇ ਗਏ ਹਨ ਜਾਂ ਨਹੀ ਇਸ ਦੀ ਜਾਣਕਾਰੀ ਹਾਸਲ ਕਰਨ ਲਈ ਜਦੋ ਕਮਿਸ਼ਨਰ ਪੁਲੀਸ ਨੂੰ ਫੋਨ ਕੀਤਾ ਤਾਂ ਉਹਨਾਂ ਨੇ ਫੋਨ ਨਹੀ ਚੁੱਕਿਆ। ਜੇਕਰ ਕਿਸੇ ਕਿਸਮ ਦੀ ਕੋਈ ਗੜਬੜ ਹੁੰਦੀ ਹੈ ਤਾਂ ਉਸ ਲਈ ਸਰਕਾਰ ਤੇ ਪ੍ਰਸ਼ਾਸ਼ਨ ਜਿੰਮੇਵਾਰ ਹੋਵੇਗਾ। ਦੋਹਾਂ ਧਿਰਾਂ ਦੇ ਵਰਕਰਾਂ ਦੇ ਜਾਬਤੇ ਵਿੱਚ ਰਹਿਣ ਦੀ ਕੋਈ ਸੰਭਾਵਨਾ ਨਹੀ ਹੈ।

Saturday, October 24, 2015

ਬਾਣੀ ਦਾ ਅਪਮਾਨ: ਕੇਜਰੀਵਾਲ ਨੇ ਵੀ ਦਿੱਤਾ ਅਸਲ ਦੋਸ਼ੀ ਫੜਣ ਤੇ ਜ਼ੋਰ

ਸ੍ਰੀ ਹਰਿਮੰਦਿਰ ਸਾਹਿਬ ਫੇਰੀ ਦੌਰਾਨ ਕੀਤੀ ਪੰਜਾਬ ਵਿੱਚ ਸ਼ਾਂਤੀ ਦੀ ਅਰਦਾਸ 
ਅੰਮ੍ਰਿਤਸਰ: 24 ਅਕਤੂਬਰ 2015: (ਪੰਜਾਬ ਸਕਰੀਨ ਬਿਊਰੋ):
ਬਹੁਤ ਹੀ ਨਾਜ਼ੁਕ ਦੌਰ ਵਿੱਚੋਂ ਲੰਘ ਰਹੇ ਸਿੱਖ ਪੰਥ ਦੇ ਕੇਂਦਰੀ ਅਸਥਾਨ ਸ੍ਰੀ ਹਰਿਮੰਦਰ ਸਾਹਿਬ ਵਿਖੇ ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੇ ਅੱਜ ਇੱਕ ਅਹਿਮ ਦੌਰਾ ਕੀਤਾ। ਅਸ਼ਾਂਤ ਪੰਜਾਬ ਲਈ ਸ਼ਾਂਤੀ ਦੀ ਅਰਦਾਸ ਕਰਦਿਆਂ ਉਹਨਾਂ ਕਿਹਾ ਕਿ ਅਜਿਹਾ ਲੱਗਦਾ ਹੈ ਕਿ ਇਹ ਮਾਹੌਲ ਉਹਨਾਂ ਲੋਕਾਂ ਵਲੋਂ ਜਾਣਬੁਝ ਕੇ ਬਣਾਇਆ ਗਿਆ ਜਿਹੜੇ ਪੰਜਾਬ ਦੀ ਸ਼ਾਂਤੀ ਭੰਗ ਕਰਨਾ ਚਾਹੁੰਦੇ ਹਨ।  ਉਹਨਾਂ ਇਸ ਗੱਲ ਦੀ ਸਖਤ ਨਿਖੇਧੀ ਕੀਤੀ ਕਿ ਪਵਿੱਤਰ ਗ੍ਰੰਥ ਦੇ ਅਪਮਾਨ ਦਾ ਵਿਰੋਧ ਕਰ ਰਹੇ ਸ਼ਾਂਤੀਪੂਰਨ ਲੋਕਾਂ ਉੱਪਰ ਤਾਕਤ ਦੀ ਵਰਤੋਂ ਕੀਤੀ ਗਈ। ਸ਼੍ਰੀ ਕੇਜਰੀਵਾਲ ਨੇ ਉਹਨਾਂ ਦੋ ਨੌਜਵਾਨਾਂ ਦੇ ਪਰਿਵਾਰਾਂ ਨਾਲ ਮੁਲਾਕਾਤ ਕਰਨ ਦੀ ਵੀ ਗੱਲ ਕਹੀ ਜਿਹੜੇ ਪੁਲਿਸ ਫਾਇਰਿੰਗ ਦੌਰਾਨ ਮਾਰੇ ਗਏ ਸਨ। ਉਹਨਾਂ ਕਿਹਾ ਕਿ ਉਹ ਪੁਲਿਸ ਗੋਲੀ ਨਾਲ ਮਾਰੇ ਗਏ ਨੌਜਵਾਨਾਂ ਦੇ ਪਰਿਵਾਰਾਂ ਨੂੰ ਵੀ ਜਾ ਕੇ ਮਿਲਣਗੇ। ਉਹਨਾਂ ਇਸ ਗੱਲ ਦਾ ਵੀ ਗੰਭੀਰ ਨੋਟਿਸ ਲਿਆ ਕਿ ਪਵਿੱਤਰ ਗ੍ਰੰਥ ਦੇ ਅਪਮਾਨ ਲਈ ਜ਼ਿੰਮੇਦਾਰ ਅਸਲ ਦੋਸ਼ੀਆਂ ਨੂੰ ਕਾਬੂ ਕਰਨ ਦੀ ਬਜਾਏ ਨਿਰਦੋਸ਼ ਲੋਕਾਂ ਨੂੰ ਫਸਾਇਆ ਜਾ ਰਿਹਾ ਹੈ। ਉਹਨਾਂ ਕਿਹਾ ਕਿ ਅਸਲੀ ਦੋਸ਼ੀਆਂ ਨੂੰ ਫੜਨਾ ਪੰਜਾਬ ਸਰਕਾਰ ਦੀ ਜਿੰਮੇਵਾਰੀ ਹੈ। ਉਹ ਅੱਜ ਸੱਚਖੰਡ ਸ੍ਰੀ ਹਰਿਮੰਦਰ ਸਾਹਿਬ ਨਤਮਸਤਕ ਹੋਏ ਅਤੇ ਪੰਜਾਬ 'ਚ ਅਮਨ ਸ਼ਾਂਤੀ ਲਈ ਅਰਦਾਸ ਕੀਤੀ। ਇਸ ਮੌਕੇ ਉਨ੍ਹਾਂ ਨਾਲ ਭਗਵੰਤ ਮਾਨ , ਸੰਜੇ ਸਿੰਘ , ਸੁੱਚਾ ਸਿੰਘ ਛੋਟੇਪੁਰ ਤੇ ਹੋਰ ਨੇਤਾ ਵੀ ਮੌਜੂਦ ਸਨ। ਪੱਤਰਕਾਰਾਂ ਨਾਲ ਗੱਲ ਕਰਦਿਆਂ ਉਨ੍ਹਾਂ ਕਿਹਾ ਕਿ ਪੰਜਾਬ 'ਚ ਜੋ ਬੀਤੇ ਦਿਨੀਂ ਹੋਇਆ ਉਹ ਦੁਖਦਾਇਕ ਹੈ। ਅਰਵਿੰਦ ਕੇਜਰੀਵਾਲ ਨੇ ਲੋਕਾਂ ਨੂੰ ਸ਼ਾਂਤੀ ਦੀ ਅਪੀਲ ਕੀਤੀ ਹੈ। ਅੱਜ ਅਰਵਿੰਦ ਕੇਜਰੀਵਾਲ ਕੋਟਕਪੂਰਾ 'ਚ ਧਾਰਮਿਕ ਸਮਾਗਮ 'ਚ ਸ਼ਾਮਿਲ ਹੋਣ ਆਏ ਸਨ। ਦਿੱਲੀ ਦਾ ਮੁੱਖ ਮੰਤਰੀ ਬਣਨ ਤੋਂ ਬਾਅਦ ਸ਼੍ਰੀ ਕੇਜਰੀਵਾਲ ਦੀ ਸ੍ਰੀ ਹਰਿਮੰਦਿਰ ਧਾਰਮਿਕ ਸ਼ਕਤੀ ਦੇ  ਹਰਿਮੰਦਿਰ ਸਾਹਿਬ ਵਿਖੇ ਮੱਥਾ ਟੇਕਣ ਮਗਰੋਂ ਉਹਨਾਂ ਰਾਜਸੀ ਸ਼ਕਤੀ ਦੇ ਪ੍ਰਤੀਕ ਜਾਣੇ ਜਾਂਦੇ ਸ੍ਰੀ ਅਕਾਲ ਤਖਤ ਸਾਹਿਬ ਤੇ ਵੀ ਮੱਥਾ ਟੇਕਿਆ ਅਤੇ ਪੂਰੀ ਪ੍ਰਕਰਮਾ ਕੀਤੀ। ਮੱਥਾ ਟੇਕਣ ਉਪਰੰਤ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਸ੍ਰੀ ਕੇਜਰੀਵਾਲ ਨੇ ਕਿਹਾ ਕਿ ਉਹ ਅੱਜ ਪੰਜਾਬ ਵਿੱਚ ਰਾਜਨੀਤੀ ਕਰਨ ਨਹੀਂ, ਸਗੋਂ ਪੰਜਾਬ ਦੇ ਲੋਕਾਂ ਨਾਲ ਦੁੱਖ ਵੰਡਾਉਣ ਆਏ ਹਨ। ਉਹਨਾ ਕਿਹਾ ਕਿ ਉਹਨਾਂ ਹਮੇਸ਼ਾਂ ਦਰਬਾਰ ਸਾਹਿਬ ਤੋਂ ਜੋ ਮੰਗਿਆ ਹੈ, ਮਿਲਿਆ ਹੈ ਅਤੇ ਇਸੇ ਕਰਕੇ ਅੱਜ ਪੰਜਾਬ ਵਿੱਚ ਅਮਲ-ਸ਼ਾਂਤੀ ਲਈ ਮੰਨਤ ਮੰਗਣ ਆਏ ਹਨ। ਉਹਨਾਂ ਦੇ ਸ਼ਬਦ ਬੜੇ ਚੋਣਵੇਂ ਅਤੇ ਦਿਲ ਨੂੰ ਟੁੰਬਣ  ਵਾਲੇ ਸਨ।
ਪੰਜਾਬ ਦੇ ਮੌਜੂਦਾ ਹਾਲਾਤ ਬਾਰੇ ਉਹਨਾ ਕਿਹਾ ਕਿ ਸਰਕਾਰ ਦੀਆਂ ਨਲਾਇਕੀਆਂ ਕਾਰਨ ਅੱਜ ਪੰਜਾਬ ਪੀੜਾ ਦੇ ਦੌਰ 'ਚੋਂ ਲੰਘ ਰਿਹਾ ਹੈ। ਜਿਹੜੀਆਂ ਘਟਨਾਵਾਂ ਵਾਪਰ ਰਹੀਆਂ ਹਨ, ਬਹੁਤ ਦੁੱਖਦਾਈ ਹਨ ਅਤੇ ਸਾਨੂੰ ਸਾਰਿਆਂ ਨੂੰ ਮਿਲ ਕੇ ਇਸ ਦੇ ਹੱਲ ਲਈ ਅੱਗੇ ਆਉਣਾ ਚਾਹੀਦਾ ਹੈ। ਉਹਨਾ ਕਿਹਾ ਕਿ ਉਹਨਾ ਵਾਹਿਗੁਰੂ ਅੱਗੇ ਅਰਦਾਸ ਕੀਤੀ ਹੈ ਕਿ ਜਿਹੜੇ ਸ਼ਰਾਰਤੀ ਅਨਸਰਾਂ ਵੱਲੋਂ ਹਾਲਾਤ ਖਰਾਬ ਕਰਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ, ਪ੍ਰਮਾਤਮਾ ਉਹਨਾਂ ਨੂੰ ਸੁਮੱਤ ਬਖਸ਼ੇ। ਇਸ ਤਰਾਂ ਬਿਨਾ ਕਿਸੇ ਦਾ ਨਾਮ ਲਿਆਂ ਉਹਨਾਂ  ਇਸ਼ਾਰਿਆਂ ਵਿੱਚ ਬਹੁਤ ਕੁਝ ਆਖ ਦਿੱਤਾ।
ਵਿਗੜੇ ਹਾਲਾਤਾਂ ਬਾਰੇ ਪੰਜਾਬ ਸਰਕਾਰ 'ਤੇ ਚੋਟ ਕਰਦਿਆਂ ਉਹਨਾ ਕਿਹਾ ਕਿ ਇਹ ਸਾਰਾ ਕੁਝ ਸਰਕਾਰ ਦੀ ਨਾਕਾਮੀ ਕਾਰਨ ਵਾਪਰ ਰਿਹਾ ਹੈ ਅਤੇ ਪੰਜਾਬ ਵਿੱਚ ਵਿਗੜੇ ਹਾਲਾਤਾਂ ਲਈ ਅਕਾਲੀ ਸਰਕਾਰ ਜ਼ਿੰਮੇਵਾਰ ਹੈ। ਉਹਨਾ ਕਿਹਾ ਕਿ ਸਰਕਾਰ ਦਾ ਪ੍ਰਸ਼ਾਸਨ ਉਪਰ ਕੋਈ ਕੰਟਰੋਲ ਨਹੀਂ, ਇਸੇ ਕਾਰਨ ਕੋਟਕਪੂਰਾ ਵਰਗੀਆਂ ਘਟਨਾਵਾਂ ਵਾਪਰੀਆਂ ਹਨ। ਜੇਕਰ ਸਰਕਾਰ ਦਾ ਪ੍ਰਸ਼ਾਸਨ 'ਤੇ ਕੰਟੋਰਲੋ ਹੁੰਦਾ ਤਾਂ ਇਹ ਘਟਨਾ ਨਹੀਂ ਸੀ ਵਾਪਰਨੀ। ਉਹਨਾ ਕਿਹਾ ਕਿ ਜਿਹੜੇ ਲੋਕ ਇਸ ਮਾਮਲੇ 'ਤੇ ਸਿਆਸਤ ਕਰ ਰਹੇ ਹਨ, ਉਹਨਾਂ ਨੂੰ ਹੀ ਇਹ ਸਿਆਸਤ ਸੁੱਖ ਹੰਢਾਉਣੀ ਹੋਵੇ। ਉਹਨਾ ਕਿਹਾ ਕਿ ਹਮੇਸ਼ਾ ਤਕੜਾ ਆਦਮੀ ਮਾੜੇ ਨੂੰ ਉਠਣ ਨਹੀਂ ਦਿੰਦਾ, ਪਰ ਜੇਕਰ ਮਾੜਾ ਵਿਅਕਤੀ ਹਿੰਮਤ ਕਰ ਲਵੇ ਤਾਂ ਕੋਈ ਵੀ ਤਾਕਤ ਉਸ ਨੂੰ ਅੱਗੇ ਵਧਣ ਤੋਂ ਰੋਕ ਨਹੀਂ ਸਕਦੀ। ਫਰਕ ਸਿਰਫ ਇਹ ਹੈ ਕਿ ਮਾੜੇ ਆਦਮੀ ਵਿੱਚ ਹਿੰਮਤ ਹੋਣੀ ਚਾਹੀਦੀ ਹੈ। ਉਹਨਾਂ ਦਾ ਇਹ ਕਹਿਣਾ ਇੱਕ ਇਸ਼ਾਰਾ ਜਾਪੁ ਰਿਹਾ ਸੀ ਕਿਹਉਣ ਇਹ ਹਿੰਮਤ ਉਹਨਾਂ ਦੀ ਪਾਰਟੀ ਕਰੇਗੀ। ਕੋਟਕਪੂਰਾ ਵਿੱਚ ਮਾਰੇ ਗਏ ਨੌਜਵਾਨਾਂ ਦੇ ਪਰਿਵਾਰਾਂ ਨੂੰ ਮਿਲਣ ਮਗਰੋਂ ਉਹ ਕੁਝ ਦੇਰ ਲਈ ਲੁਧਿਆਣਾ ਵੀ ਆਏ। 
ਚੇਤੇ ਰਹੇ ਕਿ ਬਾਣੀ ਦੇ ਅਪਮਾਨ ਅਤੇ ਇਸ ਨਾਲ ਸਬੰਧਿਤ ਹਿੰਸਕ ਘਟਨਾਵਾਂ ਮਗਰੋਂ ਜਿਹੜੇ ਪੋਸਟਰ ਲੱਗੇ ਉਹਨਾਂ ਵਿੱਚ ਕੁਝ ਲੋਕਾਂ ਨੇ ਅਕਾਲੀ ਦਲ, ਬੀਜੀਪੀ, ਕਾਂਗਰਸ ਅਤੇ ਆਮ ਆਦਮੀ ਪਾਰਟੀ ਨੂੰ ਇੱਕੋ ਰੱਸੇ ਬੰਨਦਿਆਂ ਸਾਫ਼ ਕਿਹਾ ਸੀ ਕਿ ਇਹਨਾਂ ਚੋਣ ਕਿਸੇ ਨੇ ਵੀ ਇਸ ਮਾਮਲੇ ਤੇ ਸਿੱਖਾਂ ਦੀ ਸਾਰ ਨਹੀਂ ਲਈ। ਸ਼੍ਰੀ ਕੇਜਰੀਵਾਲ ਦੀ ਇਹ ਫੇਰੀ ਜਿੱਥੇ ਪਾਰਟੀ ਦੇ ਆਧਾਰ ਵਿੱਚ ਲੱਗੇ ਖੋਰੇ ਦੇ ਇਸ ਨੁਕਸਾਨ ਨੂੰ ਪੂਰਾ ਕਰਨ ਦੀ ਕੋਸ਼ਿਸ਼ ਲੱਗਦੀ ਹੈ ਉੱਥੇ 2017 ਦੀਆਂ ਚੋਣਾਂ ਦੇ ਮੈਦਾਨ-ਏ-ਜੰਗ ਵਿੱਚ ਵਜਾਇਆ ਗਿਆ ਨਵਾਂ ਬਿਗਲ ਵੀ ਹੈ। ਹੁਣ ਦੇਖਣਾ ਹੈ ਕਿ ਚੋਧਰਾਂ ਦੀ ਜੰਗ ਅਤੇ ਗੁੱਟਬੰਦੀਆਂ ਦੇ ਤੰਗ ਖਿੱਚੂ ਸੰਘਰਸ਼ ਵਿੱਚ ਫਸੀ ਆਮ ਆਦਮੀ ਪਾਰਟੀ ਆਪਣੇ ਪੁਰਾਣੇ ਆਧਾਰ ਨੂੰ ਬਚਾਉਣ ਅਤੇ ਨਵਾਂ ਕੇਡਰ ਆਕਰਸ਼ਿਤ ਕਰਨ ਵਿੱਚ ਕਿੰਨਾ ਕੁ ਕਾਮਯਾਬ ਰਹਿੰਦੀ ਹੈ!

Tuesday, February 10, 2015

"ਆਪ" ਦੀ ਇਤਿਹਾਸਕ ਜਿੱਤ ਦਾ ਪੰਜਾਬ ਵਿੱਚ ਵੀ ਭਾਰੀ ਜਸ਼ਨ

ਦਿੱਲੀ ਦੀ ਜਿੱਤ ਪੰਜਾਬ ਦੀ ਸਿਆਸਤ ਨੂੰ ਨਵਾਂ ਮੋੜ ਦੇਵੇਗੀ – ਗਰੇਵਾਲ 
ਲੁਧਿਆਣਾ: 10 ਫਰਵਰੀ 2015: (ਰੈਕਟਰ ਕਥੂਰੀਆ//ਪੰਜਾਬ ਸਕਰੀਨ):  
ਜਿੱਤ ਦੇ ਨਗਾਰੇ ਵੱਜਦਿਆਂ ਹੀ ਆਮ ਪਾਰਟੀ ਦੇ ਵਰਕਰਾਂ ਵਿੱਚ ਭਾਰੀ ਉਤਸ਼ਾਹ ਦੇਖਿਆ ਗਿਆ। ਜਿੱਤ ਦੇ ਜਸ਼ਨ ਸ਼ੁਰੂ ਹੋਏ। ਢੋਲ ਢਮੱਕਾ ਵੀ ਸੀ ਅਤੇ ਲੱਡੂ ਵੀ ਵੰਡੇ ਗਏ ਪਰ ਇਹਨਾਂ  ਜਸ਼ਨਾਂ ਵਿੱਚ ਕਿਤੇ ਵੀ ਕੋਈ ਗੁੰਡਾਗਰਦੀ ਜਾਂ ਕੋਈ ਹੋਰ ਫੁਕਰਾਗਿਰੀ ਨਹੀਂ ਦੇਖੀ ਗਈ। ਸਭ ਕੁਝ ਬੜੇ  ਠਰੰਮੇ ਨਾਲ ਚੱਲ ਰਿਹਾ ਸੀ। ਪਾਰਟੀ ਦੇ ਜ਼ਿਲਾ ਹੈਡਕੁਆਟਰ ਵਿਖੇ ਵੀ ਬੜਾ ਅਨੁਸ਼ਾਸਨ ਸੀ। ਚੌੜਾ ਬਾਜ਼ਾਰ, ਫਿਰੋਜਪੁਰ ਰੋਡ, ਜਗਰਾਓਂ ਪੁਲ, ਸਰਾਭਾ ਨਗਰ, ਹੈਬੋਵਾਲ, ਘੰਟਾ ਘਰ ਅਤੇ ਕਈ ਹੋਰ ਇਲਾਕਿਆਂ ਵਿੱਚ ਭੰਗੜੇ ਪਾਏ ਗਏ। ਪਾਰਟੀ ਦੇ ਜ਼ਿਲਾ ਮੁਖੀ ਅਹਿਬਾਬ ਸਿੰਘ ਗਰੇਵਾਲ ਨੇ ਵੋਟਰਾਂ ਦਾ ਧੰਨਵਾਦ ਕੀਤਾ ਅਤੇ ਵਾਅਦਾ ਦੁਹਰਾਇਆ ਕੀ ਅਸੀਂ ਪੰਜਾਬ ਵਿੱਚ ਵੀ ਇਤਿਹਾਸ ਰਚਾਂਗੇ। 
ਇਸੇ ਦੌਰਾਨ "ਆਪ" ਵੱਲੋਂ ਜਾਰੀ ਇੱਕ ਪ੍ਰੈਸ ਨੋਟ ਵਿੱਚ ਕਿਹਾ ਗਿਆ ਕਿ ਭਾਰਤ ਦੀ ਰਾਜਨੀਤੀ ਵਿੱਚ ਆਮ ਆਦਮੀ ਪਾਰਟੀ ਨੇ ਇੱਕ ਇਤਿਹਾਸਿਕ ਮੀਲ ਪੱਥਰ ਸਥਾਪਿਤ ਕਰਦਿਆ ਜਿੱਥੇ ਦਿੱਲੀ ਵਿਧਾਨ ਸਭਾ ਚੋਣਾਂ ਵਿੱਚ ਇੱਕ ਵੱਡੀ ਜਿੱਤ ਹਾਸਿਲ ਕੀਤੀ ਹੈ, ਉੱਥੇ ਪਾਰਟ ਨੇ ਇਹ ਵੀ ਦਰਸਾ ਦਿੱਤਾ ਹੈ ਕਿ ਅਜੇ ਵੀ ਦੇਸ਼ ਪ੍ਰਤੀ ਸਮਰਪਿਤ ਇਮਾਨਦਾਰ ਆਗੂਆਂ ਦੀ ਲੋਕਾਂ ਦੇ ਦਿਲਾਂ ਵਿੱਚ ਕਦਰ ਹੈ, ਪਾਰਟੀ ਦੇ ਰਹਿਨੁਮਾਂ ਅਰਵਿੰਦ ਕੇਜਰੀਵਾਲ ਦੀ ਅਗਵਾਈ ਹੇਠ ਨਾ ਸਿਰਫ ਮੁਲਕ ਦੀ ਸਿਆਸਤ ਵਿੱਚ ਇੱਕ ਉਸਾਰੂ ਤਬਦੀਲੀ ਦਾ ਬਿਗਲ ਵੱਜਿਆ ਹੈ ਤੇ ਸਗੋਂ ਇਹ ਜਿੱਤ ਭ੍ਰਿਸ਼ਟਾਵਾਦ ਸਿਆਸਤ ਲਈ ਇੱਕ ਵੱਡੀ ਚੁਨੌਤੀ ਵਜੋਂ ਸਾਬਿਤ ਹੋਵੇਗਾ। ਅੱਜ ਦਿੱਲੀ ਵਿਧਾਨ ਸਭਾ ਚੋਣਾਂ ਦੀ ਜਿੱਤ ਤੇ ਖੁਸ਼ੀ ਦਾ ਪ੍ਰਗਟਾਵਾ ਕਰਦਿਆਂ ਆਪ ਦੇ ਜ਼ਿਲ੍ਹਾ ਕਨਵੀਨਰ ਅਹਿਬਾਬ ਸਿੰਘ ਗਰੇਵਾਲ ਅਤੇ ਆਪ ਪਾਰਟੀ ਦੇ ਇਕੱਠੇ ਹੋਏ ਵਰਕਰਾਂ ਨੇ ਖੁਸ਼ੀ ਦਾ ਪ੍ਰਗਟਾਵਾ ਕਰਦਿਆਂ ਕਿਹਾ ਕਿ ਆਮ ਆਦਮੀ ਪਾਰਟੀ ਦੀ ਦਿੱਲੀ ਵਿੱਚ ਹੋਈ ਜਿੱਤ ਨਾ ਸਿਰਫ ਇੱਕ ਇਤਿਹਾਸਕ ਸਗੋਂ ਪੰਜਾਬ ਦੀ ਸਿਆਸਤ ਲਈ ਵੀ ਇੱਕ ਨਵਾਂ ਮੋੜ੍ਹ ਸਾਬਿਤ ਹੋਵੇਗੀ ਅਤੇ ਨਤੀਜੇ ਆਸ ਤੋਂ ਕਿਤੇ ਵੱਧ ਹਨ। ਦਿੱਲੀ ਦੀ ਜਨਤਾ ਨੇ ਸਾਫ ਸੁਥਰੀ ਰਾਜਨੀਤੀ ਦੇ ਪੱਖ ਵਿੱਚ ਵੋਟਾਂ ਪਾ ਕੇ ਆਮ ਆਦਮੀ ਪਾਰਟੀ ਦੇ ਹੱਕ ਵਿੱਚ ਨਿਰਣਾਇਕ ਫੈਸਲਾ ਦਿੱਤਾ ਹੈ। ਇਸ ਮੌਕੇ ਉਨ੍ਹਾਂ ਨੇ ਸ. ਹਰਵਿੰਦਰ ਸਿੰਘ ਫੂਲਕਾ ਦੀ ਅਗਵਾਈ ਹੇਠ ਦਿੱਲੀ ਗਏ ਸਾਰੇ ਵਰਕਰਾ ਦਾ ਧੰਨਵਾਦ ਵੀ ਕੀਤਾ ਤੇ ਜਿੰਨ੍ਹਾਂ ਨੇ ਤਨ, ਮਨ ਧਨ ਨਾਲ ਆਪ ਪਾਰਟੀ ਦੀ ਜਿੱਤ ਵਿੱਚ ਅਹਿਮ ਭੂਮਿਕਾ ਨਿਭਾਈ ਹੈ।
ਗਰੇਵਾਲ ਨੇ ਕਿਹਾ ਕਿ ਆਪ ਦੀ ਦਿੱਲੀ ਵਿੱਚ ਵੱਡੇ ਫਰਕ ਨਾਲ ਜਿੱਤ ਤੋਂ ਇਹ ਸਪੱਸ਼ਟ ਹੈ ਕਿ ਲੋਕਾਂ ਨੇ ਨਿਰਾਸ਼ਾਵਾਦੀ ਅਤੇ ਫਿਰਕਾਪ੍ਰਸਤ ਰਾਜਨੀਤੀ ਨੂੰ ਠੁਕਰਾਇਆ ਹੈ। ਆਪ ਦੀ ਦਿੱਲੀ ਵਿੱਚ ਜਿੱਤ ਪੰਜਾਬ ਵਿੱਚ ਪਾਰਟੀ ਲਈ ਬਹੁਤ ਹੀ ਜ਼ਿਆਦਾ ਮਹੱਤਵਪੂਰਣ ਹੈ ਅਤੇ ਇਸ ਤੋਂ ਇਹ ਵੀ ਸਾਬਿਤ ਹੁੰਦਾ ਹੈ ਕਿ ਲੋਕ ਇਮਾਨਦਾਰੀ ਚਾਹੁੰਦੇ ਹਨ, ਪਰ ਦੇਸ਼ ਨੂੰ ਭ੍ਰਿਸ਼ਟ ਦੇਸ਼ ਬਣਾਉਣ ਵਿੱਚ ਲੀਡਰਾਂ ਦਾ ਹੀ ਹੱਥ ਹੈ। ਰਾਜਨੀਤੀ ਨੂੰ ਪੂਰੀ ਤਰਾਂ ਪਲਟਾ ਦਿੱਤੇ ਤੋਂ ਬਿਨਾ ਗੁਜ਼ਾਰਾ ਨਹੀਂ ਹੋਣਾ, ਇਹ ਗਲਿਆ ਸੜਿਆ ਰਾਜਨੀਤਿਕ ਢਾਂਚਾ ਗਲੋਂ ਲਾਹੁਣਾ ਹੀ ਪਵੇਗਾ। ਪੰਜਾਬ ਦਾ ਬੇੜਾ ਗਰਕ ਕਰਨ ਅਤੇ ਇਸ ਨੂੰ ਬਦਨਾਮ ਕਰਨ ਵਿੱਚ ਸ਼੍ਰੋਮਣੀ ਅਕਾਲੀ ਦਲ/ਭਾਜਪਾ ਅਤੇ ਕਾਂਗਰਸ ਬਰਾਬਰ ਦੇ ਜਿੰਮੇਵਾਰ ਹਨ। ਲੋਕਾਂ ਦੀ ਹੁਣ ਤੱਕ ਇਹ ਮਜਬੂਰੀ ਸੀ ਕਿ ਉਹਨਾਂ ਨੂੰ ਕੋਈ ਬਦਲ ਨਹੀਂ ਸੀ ਲੱਭ ਰਿਹਾ ਅਤੇ ਆਮ ਆਦਮੀ ਪਾਰਟੀ ਪੰਜਾਬ ਵਿੱਚ ਇਹ ਬਦਲ ਦੇ ਕੇ ਵਿਖਾਵੇਗੀ। 
ਗਰੇਵਾਲ ਨੇ ਪਾਰਟੀ ਦੇ ਜ਼ਿਲ੍ਹੇ ਵਿੱਚੋਂ ਸਾਰੇ ਵਾਲੰਟੀਅਰਜ਼ ਦਾ ਤਹਿ ਦਿਲੋਂ ਧੰਨਵਾਦ ਕੀਤਾ, ਜਿਹਨਾਂ ਨੇ ਇਮਾਨਦਾਰੀ ਨਾਲ ਦਿਨ ਰਾਤ ਇੱਕ ਕਰ ਕੇ ਕੰਮ ਕੀਤਾ ਅਤੇ ਪਾਰਟੀ ਨੂੰ ਕਾਮਯਾਬ ਬਣਾਉਣ ਵਿੱਚ ਭਰਪੂਰ ਯੋਗਦਾਨ ਪਾਇਆ। ਸਾਡੇ ਵਲੰਟੀਅਰਜ਼ ਹੀ ਸਾਡੀ ਸ਼ਕਤੀ ਹਨ ਅਤੇ ਇਹ ਦਿਖਾਈ ਦੇ ਰਿਹਾ ਹੈ ਕਿ ਸਾਡੀ ਇਹ ਸ਼ਕਤੀ ਕਈ ਗੁਣਾ ਵਧ ਹੋ ਜਾਏਗੀ ਅਤੇ ਆਮ ਲੋਕਾਂ ਦੀ ਹਰੇਕ ਸਮੱਸਿਆ ਦਾ ਹੱਲ ਕੀਤਾ ਜਾਵੇਗਾ। ਆਮ ਆਦਮੀ ਪਾਰਟੀ ਦੇ ਸਥਾਨਕ ਦਫਤਰ ਸਵੇਰ ਤੋਂ ਹੀ ਸਾਰੇ ਵਲੰਟੀਅਰਜ਼ ਨੇ ਇਕੱਠੇ ਹੋ ਕੇ ਜਿੱਥੇ ਜਿੱਤ ਦਾ ਜਸ਼ਨ ਮਨਾਇਆ ਉੱਥੇ ਇਸ ਬੇਮਿਸ਼ਾਲ ਜਿੱਤ ਤੇ ਵਰਕਰਾਂ ਨੇ ਲੱਡੂ ਵੰਡੇ ਅਤੇ ਪਾਰਟੀ ਦੇ ਹੱਕ ਵਿੱਚ ਵੱਡੀ ਗਿਣਤੀ ਨੇ ਨਾਅਰੇ ਲਗਾਏ ਅਤੇ ਇਸ ਮੌਕੇ ਪਾਰਟੀ ਨੇ ਜਿੱਤ ਦਾ ਜਸ਼ਨ ਸਰਾਭਾ ਨਗਰ ਦੇ ਪ੍ਰਾਇਮਰੀ ਸਕੂਲ ਵਿੱਚ ਬੱਚਿਆਂ ਨੂੰ ਲੱਡੂ ਵੰਡੇ ਅਤੇ ਬੱਸ ਸਟੈਂਡ ਵਿੱਚ ਆਮ ਆਦਮੀਆਂ ਨੂੰ ਲੱਡੂ ਵੰਡੇ। ਇਸ ਮੌਕੇ ਆਪ ਦੇ ਐਕਟਿਵ ਵਲੰਟੀਅਰਜ਼ ਡਾ. ਐੱਚ.ਐੱਸ. ਚੀਮਾਂ, ਕਰਨਲ ਲਖਨਪਾਲ, ਰਾਜਫਤਿਹ ਸਿੰਘ, ਗੁਰਦੀਪ ਸਿੰਘ, ਨਿਸ਼ਾਂਤ ਕੋਹਲੀ, ਦੁਪਿੰਦਰ ਕੌਰ, ਰਾਜਵੰਤ ਕੌਰ, ਨੀਰੂ, ਰਵੀ, ਪੂਜਾ, ਪਵਨ ਕੁਮਾਰ, ਸੁਖਦੇਵ ਸਿੰਘ, ਮਿਹਰਬਾਨ, ਉਦੇਵਾਨ ਅਤੇ ਕਈ ਹੋਰ ਸਰਗਰਮ ਆਗੂ ਅਤੇ ਵਰਕਰ ਵੀ ਮੌਜੂਦ ਸਨ। 

Tuesday, April 08, 2014

ਕੇਜਰੀਵਾਲ 'ਤੇ ਫਿਰ ਹਮਲਾ

ਰੋਡ ਸ਼ੋ ਦੌਰਾਨ ਆਟੋ ਡਰਾਈਵਰ ਨੇ ਮਾਰਿਆ ਥੱਪੜ 
ਕਿਸੇ ਵੇਲੇ ਜਨਾਬ ਕ਼ਤੀਲ ਸ਼ਿਫਾਈ ਸਾਹਿਬ ਨੇ ਆਖਿਆ ਸੀ:
ਮੈਨੇ ਆਵਾਜ਼ ਉਠਾਈ ਥੀ ਰਿਵਾਜੋਂ ਕੇ ਖਿਲਾਫ਼ 
ਬਰਛੀਆਂ ਲੈ ਕੇ ਘਰੋਂ ਸੇ ਨਿਕਲ ਆਏ ਕੁਛ ਲੋਗ।  
ਕੁਝੀ ਇਹੀ ਹਾਲ ਅੱਜਕਲ੍ਹ ਹੋ ਰਿਹਾ ਹੈ ਜਨਾਬ ਅਰਵਿੰਦ ਕੇਜਰੀਵਾਲ ਹੁਰਾਂ ਨਾਲ। ਕਦੇ ਕਿਸੇ ਥਾਂ ਕੋਈ ਹਮਲਾ ਕਦੇ ਕਿਸੇ ਥਾਂ ਅਜਿਹੀ ਕੋਸ਼ਿਸ਼। ਹੁਣ ਨਵਾਂ ਮਾਮਲਾ ਸਾਹਮਣੇ ਆਇਆ ਹੈ।  ਇਹ ਹਮਲਾ ਪਛਮੀ-ਉੱਤਰੀ ਦਿੱਲੀ ਦੇ ਸੁਲਤਾਨਪੁਰੀ ਇਲਾਕੇ ਵਿੱਚ ਹੋਇਆ ਹੈ। ਸਿਆਸਤ ਅਤੇ ਸੱਤਾ ਦੇ ਸਥਾਪਤ ਤੌਰ ਤਰੀਕਿਆਂ ਦੇ ਉਲਟ ਆਪਣੇ ਨਵੇਂ ਢੰਗ ਤਰੀਕਿਆਂ ਨਾਲ ਵਿਚਾਰ ਰਹੇ ਅਰਵਿੰਦ ਕੇਜਰੀਵਾਲ 'ਤੇ ਅੱਜ ਕਿਸੇ ਆਟੋ ਡ੍ਰਾਈਵਰ ਨੇ ਹਮਲਾ ਕੀਤਾ ਹੈ। ਸ਼੍ਰੀ ਕੇਜਰੀਵਾਲ ਉਥੇ ਚੋਣ ਪ੍ਰਚਾਰ ਲਈ ਗਏ ਹੋਏ ਸਨ। ਅਚਾਨਕ ਹੀ ਭੀੜ ਵਿੱਚ ਮੌਜੂਦ ਇਸ ਹਮਲਾਵਰ ਨੇ ਸ਼੍ਰੀ ਕੇਜਰੀਵਾਲ ਨੂੰ ਥੱਪੜ ਕਢ ਮਾਰਿਆ। ਇਸ ਤੋਂ ਪਹਿਲਾਂ ਦਿੱਲੀ ਦੇ ਦੱਖਣੀ  ਵਿੱਚ ਵੀ ਕਿਸੇ ਨੇ ਮੁੱਕਾ ਮਾਰਨ ਦੀ ਕੋਸ਼ਿਸ਼ ਕੀਤੀ ਸੀ। ਹਰਿਆਣਾ ਦੇ ਚਰਖੀ ਦਾਦਰੀ ਅਤੇ ਭਵਾਨੀ ਵਿੱਚ ਵੀ ਅਜਿਹੇ ਹਮਲੇ ਹੋ ਚੁੱਕੇ ਹਨ। ਇਹ ਹਮਲਾਵਰ ਆਮ ਜਨਤਾ ਦੇ ਹਨ ਜਾਂ ਕਿਸੇ ਦੇ ਭੇਜੇ ਹੋਏ ਹਨ ਇਸਦਾ ਪਤਾ ਜਾਂਚ ਦੌਰਾਨ ਹੀ ਲੱਗ ਸਕਦਾ ਹੈ।   ਕਿਤੇ ਅਜਿਹੇ ਹਮਲੇ ਅਰਵਿੰਦ ਕੇਜਰੀਵਾਲ ਤੱਕ ਕਿਸੇ  ਛੁਰੇਬਾਜ਼ ਨੂੰ ਪਹੁੰਚਾਉਣ ਦੀ ਕੋਈ ਸਾਜ਼ਿਸ਼ੀ ਰਿਹਰਸਲ ਤਾਂ ਨਹੀਂ?

Saturday, March 29, 2014

ਖੁਦ ਨੂੰ ਅੰਨਾ ਹਮਾਇਤੀ ਆਖਣ ਵਾਲੇ ਨੇ ਕੀਤਾ ਕੇਜਰੀਵਾਲ 'ਤੇ ਹਮਲਾ

ਹਮਲਾ ਕੀਤਾ ਗਿਆ ਹਰਿਆਣਾ ਵਿੱਚ ਰੋਡ ਸ਼ੋਅ ਦੌਰਾਨ
ਚੰਡੀਗੜ੍ਹ: 28 ਮਾਰਚ 2014: (ਪੰਜਾਬ ਸਕਰੀਨ ਬਿਊਰੋ):
ਵੋਟ ਪਰਚੀ ਨੂੰ ਸੱਤਾ ਤਬਦੀਲੀ ਲਈ ਅਕਸਰ ਸ਼ਾਂਤਮਈ ਤਰੀਕਾ ਆਖ ਕੇ ਪ੍ਰਚਾਰਿਆ ਜਾਂਦਾ ਹੈ ਪਰ ਇਸਦੇ ਬਾਵਜੂਦ ਚੋਣਾਂ ਵਿੱਚ ਹਿੰਸਾ ਇੱਕ ਆਮ ਜਿਹੀ ਗੱਲ ਬਣ ਕੇ ਰਹਿ ਗਈ ਹੈ। ਵਿਚਾਰਧਾਰਕ ਵਿਰੋਧੀਆਂ ਉੱਪਰ ਹਮਲੇ ਏਸ ਚੋਣ ਸਿਸਟਮ ਵਿੱਚ ਕੋਈ ਨਵੀਂ ਗੱਲ ਨਹੀਂ ਪਰ ਇਸ ਵਾਰ ਆਪਣੇ ਆਪ ਨੂੰ ਅੰਨਾ ਹਜ਼ਾਰੇ  ਹਮਾਇਤੀ ਆਖਣ ਵਾਲੇ ਨੇ ਇੱਕ ਰੋਡ ਸ਼ੋ ਦੌਰਾਨ ਅਰਵਿੰਦ ਕੇਜਰੀਵਾਲ ਉੱਪਰ ਹਮਲਾ ਕੀਤਾ ਹੈ। ਜੇ ਦੂਜਾ ਗਾਂਧੀ ਅਖਵਾਉਣ ਵਾਲੇ ਅੰਨਾ ਹਜਾਰੇ ਦੇ ਹਮਾਇਤੀ ਅਜਿਹਾ ਕਰ ਸਕਦੇ ਹਨ ਤਾਂ ਬਾਕੀਆਂ ਬਾਰੇ ਅੰਦਾਜ਼ਾ ਲਾਉਣਾ ਕੋਈ। ਹਰਿਆਣਾ ਦੇ ਚਰਖੀ ਦਾਦਰੀ ਇਲਾਕੇ 'ਚ ਚੋਣ ਪ੍ਰਚਾਰ ਦੌਰਾਨ ਆਮ ਆਦਮੀ ਪਾਰਟੀ ਦੇ ਆਗੂ ਅਰਵਿੰਦ ਕੇਜਰੀਵਾਲ 'ਤੇ ਇਕ ਅਣਪਛਾਤੇ ਵਿਅਕਤੀ ਨੇ ਸ਼ੁੱਕਰਵਾਰ ਨੂੰ ਹਮਲਾ ਕਰ ਦਿੱਤਾ।   ਇਹ ਹਮਲਾ ਹੁੰਦਿਆਂ ਸਾਰ ਹੀ ਆਮ ਆਦਮੀ ਪਾਰਟੀ ਦੇ ਵਰਕਰ ਵੀ ਗੁੱਸੇ ਵਿੱਚ ਆ ਕੇ ਭੜਕ ਪਏ ਅਤੇ ਹਮਲਾ ਕਰਨ ਵਾਲੇ ਨੂੰ  ਚੰਗਾ ਕੁਟਾਪਾ ਚਾੜ੍ਹਿਆ।
ਇਸ ਹਮਲੇ ਬਾਰ ਮਿਲੀਆਂ ਮੁਢਲੀਆਂ ਖਬਰਾਂ ਵਿੱਚ ਹਰਿਆਣਾ 'ਚ ਚੋਣ ਪ੍ਰਚਾਰ ਕਰ ਰਹੇ ਆਪ ਦੇ ਕਨਵੀਨਰ ਅਤੇ ਦਿੱਲੀ ਦੇ ਸਾਬਕਾ ਮੁੱਖ ਮੰਤਰੀ ਨੇ ਕਿਹਾ ਕਿ ਉਨ੍ਹਾਂ ਦੀ ਗਰਦਨ 'ਤੇ ਹਮਲਾ ਕੀਤਾ ਗਿਆ ਹੈ ਅਤੇ ਇਸ ਤਰ੍ਹਾਂ ਦੇ ਹਿੰਸਕ ਹਮਲੇ ਦੀ ਉਨ੍ਹਾਂ ਨੂੰ ਕੋਈ ਉਮੀਦ ਨਹੀਂ ਸੀ। ਆਪ ਦੇ ਵਰਕਰਾਂ ਨੇ ਇਸ ਤੋਂ ਬਾਅਦ ਹਮਲਾਵਰ ਦਾ ਪੂਰੇ ਜੋਰ ਨਾਲ ਕੁਟਾਪਾ ਚਾੜ੍ਹਿਆ। 
ਇਸ ਹਮਲੇ ਤੋਂ ਬਾਅਦ ਕੇਜਰੀਵਾਲ ਨੇ ਟਵੀਟ ਕੀਤਾ ਕਿ ਸਾਡੇ ਹਮਾਇਤੀਆਂ ਨੇ ਜੁਆਬੀ ਪ੍ਰਤੀਕਿਰਿਆ 'ਚ ਉਸ ਨਾਲ ਕੁੱਟਮਾਰ ਕੀਤੀ। ਇਸਤੇ ਡੂੰਘੇ ਦੁੱਖ ਦਾ ਪ੍ਰਗਟਾਵਾ ਕਰਦਿਆਂ ਉਹਨਾਂ ਕਿਹਾ ਕਿ ਇਹ ਕਾਫੀ ਗਲਤ ਹੈ। ਸਾਡੇ ਵਲੋਂ ਅਜਿਹੀ ਉਮੀਦ ਨਹੀਂ ਕੀਤੀ ਜਾ ਰਹੀ ਸੀ। ਉਨ੍ਹਾਂ ਨੇ ਕਿਹਾ ਕਿ 'ਆਪ' ਹਮਾਇਤੀਆਂ ਦੀ ਪ੍ਰਤੀਕਿਰਿਆ ਤੋਂ ਮੈਂ ਕਾਫੀ ਦੁਖੀ ਹਾਂ। ਜੇ ਅਸੀਂ ਵੀ ਹਿੰਸਕ ਜਵਾਬ ਦੇਣ ਲੱਗੇ ਤਾਂ ਫਿਰ ਸਾਡੇ 'ਚ ਅਤੇ ਉਨ੍ਹਾਂ 'ਚ ਕੀ ਫਰਕ ਰਹਿ ਜਾਵੇਗਾ।
ਵੇਰਵੇ ਮੁਤਾਬਕ ਰੋਡ ਸ਼ੋਅ ਦੌਰਾਨ ਲੇਗਾਨ ਪਿੰਡ ਦੇ ਜਤਿੰਦਰ ਨਾਮੀ ਵਿਅਕਤੀ ਨੇ ਹਮਲਾ ਕਰ ਦਿੱਤਾ ਜਿਸ ਤੋਂ ਬਾਅਦ ਪਾਰਟੀ ਸਮਰਥਕਾਂ ਨੇ ਉਸ ਦੀ ਵਾਹਵਾ ਕੁੱਟਮਾਰ ਕੀਤੀ ਤੇ ਉਸਨੂੰ ਸਥਾਨਕ ਪੁਲੀਸ ਦੇ ਹਵਾਲੇ ਕਰ ਦਿੱਤਾ। ਜਤਿੰਦਰ ਨੇ ਕੇਜਰੀਵਾਲ ਦੀ ਧੋਣ ’ਤੇ ਜ਼ੋਰਦਾਰ ਮੁੱਕਾ ਮਾਰਿਆ ਸੀ। ਪੁਲੀਸ ਨੇ ਉਸ ਨੂੰ ਜਦੋਂ ਇਸ ਦਾ ਕਾਰਨ ਪੁੱਛਿਆ ਤਾਂ ਉਸ ਨੇ ਦੱਸਿਆ  ਕਿ ਉਹ ਅੰਨਾ ਹਜ਼ਾਰੇ ਦਾ ਅੰਦੋਲਨ ਅਗਵਾ ਕਰਨ ਕਰ ਕੇ ਕੇਜਰੀਵਾਲ ਉਪਰ ਖਫ਼ਾ ਸੀ। ਇਸ ਘਟਨਾ ਤੋਂ ਬਾਅਦ ਕੇਜਰੀਵਾਲ ਨੇ ਕਈ ਟਵੀਟ ਕਰ ਕੇ ਸਮਰਥਕਾਂ ਵਲੋਂ ਹਮਲਾਵਰ ਦੀ ਕੁੱਟਮਾਰ ਕਰਨ ਨੂੰ ਗਲਤ ਕਰਾਰ ਦਿੰਦਿਆਂ ਘਟਨਾ ’ਤੇ ਦੁੱਖ ਪ੍ਰਗਟਾਇਆ। ਅਰਵਿੰਦ ਕੇਜਰੀਵਾਲ ਨੇ ਨਰਿੰਦਰ ਮੋਦੀ ਅਤੇ ਹਰਿਆਣਾ ਦੇ ਮੁੱਖ ਮੰਤਰੀ ਭੁਪਿੰਦਰ ਸਿੰਘ ਹੁੱਡਾ ’ਤੇ ਦੋਸ਼ ਲਾਇਆ ਕਿ ਇਹ ਦੋਵੇਂ ਆਗੂ ਕਿਸਾਨਾਂ ਤੋਂ ਜ਼ਮੀਨਾਂ ਖੋਹ ਕੇ ਕਾਰੋਬਾਰੀਆਂਦੇ ਹਵਾਲੇ ਕਰ ਰਹੇ ਹਨ। ਉਨ੍ਹਾਂ ਸ੍ਰੀ ਮੋਦੀ ਨੂੰ ਚੁਣੌਤੀ ਦਿੱਤੀ ਕਿ ਜੇ ਹਿੰਮਤ ਹੈ ਤਾਂ ਉਹ ਦੋ ਥਾਵਾਂ ਦੀ ਬਜਾਏ ਸਿਰਫ ਵਾਰਾਨਸੀ ਤੋਂ ਹੀ ਚੋਣ ਲੜ ਕੇ ਦਿਖਾਉਣ ਉਹਨਾਂ ਨੂੰ ਹਕੀਕਤ ਪਤਾ ਲੱਗ ਜਾਏਗੀ। 
ਹਰਿਆਣਾ ਦੇ ਢਾਂਸਾ ਬਾਰਡਰ ਤੋਂ ਰੋਡ ਸ਼ੋਅ ਦਾ ਆਗਾਜ਼ ਕਰਦਿਆਂ ਸ੍ਰੀ ਕੇਜਰੀਵਾਲ ਨੇ ਕਿਹਾ ਕਿ ਹਰਿਆਣਾ ਦੇ ਮੁੱਖ ਮੰਤਰੀ ਹੁੱਡਾ ਕਿਸਾਨਾਂ ਦੀ ਜ਼ਮੀਨ ਜਬਰੀ ਖੋਹ ਕੇ ਰਾਬਰਟ ਵਾਡਰਾ ਤੇ ਮੁਕੇਸ਼ ਅੰਬਾਨੀ ਨੂੰ ਦੇ ਰਹੇ ਹਨ। ਉਨ੍ਹਾਂ ਕਿਹਾ-ਇਨ੍ਹਾਂ ਖਿਲਾਫ ਕੋਈ ਵੀ ਆਵਾਜ਼ ਬੁਲੰਦ ਕਰਨ ਤੋਂ ਡਰਦਾ ਹੈ ਪਰ ਮੈਂ ਇਹ ਜੋਖਮ ਲੈ ਕੇ ਦੋਹਾਂ ਨੂੰ ਬੇਨਕਾਬ ਕੀਤਾ ਹੈ। ਦੂਜੇ ਪਾਸੇ ਹਰਿਆਣਾ ਸਰਕਾਰ ਅਤੇ ਮੁੱਖ ਮੰਤਰੀ ਨੇ ਇਨ੍ਹਾਂ ਦੋਸ਼ਾਂ ਨੂੰ ਸਿਰੇ ਤੋਂ ਖਾਰਜ ਕਰਦਿਆਂ ਤਰਾਂ ਨਿਰਾਧਾਰ ਦੱਸਿਆ ਹੈ। 
ਇਸੇ ਤਰਾਂ ਬਾਦਲੀ ਪਿੰਡ ’ਚ ਦਾਖਲ ਹੋਣ ’ਤੇ ਕੇਜਰੀਵਾਲ ਨੇ ਲੋਕਾਂ ਦੇ ਇਕੱਠ ਨੂੰ ਸੰਬੋਧਨ ਕਰਦਿਆਂ ਭਾਜਪਾ ਦੇ ਪ੍ਰਧਾਨ ਮੰਤਰੀ ਅਹੁਦੇ ਦੇ ਉਮੀਦਵਾਰ ਨਰਿੰਦਰ ਮੋਦੀ ’ਤੇ ਤਿੱਖੇ ਹਮਲੇ ਕੀਤੇ ਅਤੇ ਕਿਹਾ ਕਿ ਅਸਲ ਵਿੱਚ ਮੋਦੀ ਵਾਰਾਨਸੀ ’ਚ ਉਨ੍ਹਾਂ ਤੋਂ ਡਰ ਗਏ ਹਨ ਇਸੇ ਕਰਕੇ ਉਹ ਦੋ ਸੀਟਾਂ ਤੋਂ ਚੋਣ ਲੜ ਰਹੇ ਹਨ। ਕੇਜਰੀਵਾਲ ਨੇ ਚੁਨੌਤੀ ਦਿੱਤੀ ਕਿ ਜੇਕਰ ਮੋਦੀ ’ਚ ਦਮ ਹੈ ਤਾਂ ਉਹ ਸਿਰਫ ਵਾਰਾਨਸੀ ਤੋਂ ਚੋਣ ਲੜ ਕੇ ਦਿਖਾਉਣ, ਜਿੱਥੋਂ ਮੈਂ ਉਨ੍ਹਾਂ ਖਿਲਾਫ ਡਟਿਆ ਹਾਂ। ਇਸਦੇ ਨਾਲ ਹੀ ਕੇਜਰੀਵਾਲ ਨੇ ਲੋਕਾਂ ਨੂੰ ਸਿਸਟਮ ’ਚ ਬਦਲਾਅ ਦਾ ਹੋਕਾ ਦਿੰਦਿਆਂ ਕਿਹਾ ਕਿ ਭਾਜਪਾ ਅਤੇ ਕਾਂਗਰਸ ਆਗੂ ਇਕਮਿਕ ਨੇ ਅਤੇ ‘ਆਪ’ ਹੀ ਸਿਰਫ ਦੇਸ਼ ਦੇ ਹਾਲਾਤ ਸੁਧਾਰ ਸਕਦੀ ਹੈ। ਉਨ੍ਹਾਂ ਕਿਹਾ ਕਿ ਗੁਜਰਾਤ ’ਚ ਮੋਦੀ ਨੇ ਕਿਸਾਨਾਂ ਦੀ ਜ਼ਮੀਨ ਕੌਡੀਆਂ ਦੇ ਭਾਅ ਖਰੀਦ ਕੇ ਅੰਬਾਨੀ ਅਤੇ ਅਦਾਨੀ ਨੂੰ ਦੇ ਦਿੱਤੀ ਹੈ। ਹੁਣ ਦੇਖਣਾ ਹੈ ਕਿ ਚੋਣਾਂ ਦੌਰਾਨ ਟੀਮ ਕੇਜਰੀਵਾਲ ਕੀ ਕਾਰਗੁਜ਼ਾਰੀ ਦਿਖਾਉਂਦੀ ਹੈ।

Friday, March 07, 2014

ਮਾਮਲਾ 1984 ਦੇ ਦੰਗਿਆਂ ਦੀ ਵਿਸ਼ੇਸ਼ ਅਦਾਲਤ ਵਜੋਂ ਸੁਣਵਾਈ ਦਾ

 Fri, Mar 7, 2014 at 6:45 PM
ਸ਼੍ਰੋਮਣੀ ਅਕਾਲੀ ਦਲ ਵੱਲੋਂ ਸੁਣਵਾਈ ਦੀ ਮੰਗ ਗੈਰਕਾਨੂੰਨੀ

 
ਲੁਧਿਆਣਾ: 7 ਮਾਰਚ 2014: (ਪੰਜਾਬ ਸਕਰੀਨ ਬਿਊਰੋ): 
ਪੰਜਾਬ ਦੇ ਮੁਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਵੱਲੋਂ 1984 ਦੇ ਸਿਖ ਵਿਰੋਧੀ ਦੰਗਿਆਂ ਦੀ ਸੁਪ੍ਰੀਮ ਕੋਰਟ ਦੇ ਜਜ ਦੀ ਅਗਵਾਈ ਹੇਠ ਵਿਸੇਸ਼ ਅਦਾਲਤ ਵਲੋਂ ਸੁਣਵਾਈ ਕਰਵਾਏ ਜਾਣ ਦੀ ਮੰਗ ਹੈਰਾਨ ਕਰਨ ਵਾਲੀ ਹੈ। ਦੁਖ ਦੀ ਗਲ ਇਹ ਹੈ ਕੀ ਇਹ ਮੰਗ ਬਿਨਾ ਕਿਸੇ ਸੋਚ ਵਿਚਾਰ ਦੇ ਇਕ ਮੁਖ ਮੰਤਰੀ ਵੱਲੋਂ ਕੀਤੀ ਗਈ ਹੈ। ਗੌਰ  ਕਰਨ ਯੋਗ ਗਲ ਹੈ ਕਿ ਵਿਸ਼ੇਸ ਅਦਾਲਤ ਕਾਫੀ ਸਾਰੇ ਕੇਸਾਂ ਦੀ ਸੁਣਵਾਈ ਕਰਨ ਲਈ ਬਣਾਈ ਜਾਂਦੀ ਹੈ ਤੇ ਉਹ ਵੀ ਕੇਵਲ ਸੰਸਦ ਜਾਂ  ਵਿਧਾਨਸਭਾ ਦੀ ਮੰਜੂਰੀ ਨਾਲ ਤੇ ਇਸ ਵੇਲੇ ਸੰਸਦ ਤੇ ਦਿੱਲੀ ਵਿਧਾਨ ਸਭਾ ਦੋਵੇਂ  ਹੀ ਸਥਗਿਤ  ਹਨ।  ਇਸ ਲਈ ਸਾਫ਼ ਜ਼ਾਹਿਰ ਹੈ ਕਿ ਆਉਣ ਵਾਲੇ ਕੁਛ ਸਮੇ ਤਕ ਇਸ ਤਰਾਂ ਦਾ ਕੋਈ ਕਾਨੂੰਨ ਪਾਸ ਹੀ ਨਹੀ ਹੋ ਸਕਦਾ।
ਮੌਜੂਦਾ ਸਮੇ ਵਿਚ ਅਜਿਹੇ 3 ਕੇਸਾਂ ਦੀ ਸੁਣਵਾਈ ਹੀ ਬਾਕੀ ਹੈ , ਤੇ 3 ਕੇਸਾਂ ਲਈ ਇਕ ਵਿਸੇਸ਼ ਅਦਾਲਤ ਬਨਾਏ ਜਾਨ ਦੀ ਮੰਗ ਦਾ ਕੋਈ ਮਤਲਬ ਹੀ ਨਹੀ ਬਣਦਾ। ਬਿਨਾ ਦੋਬਾਰਾ ਜਾਂਚ ਕੀਤੇ ਇਹ ਕੇਸ ਦੋਬਾਰਾ ਨਹੀ ਖੁਲ ਸਕਦੇ। ਇਸ ਸੰਬੰਧ ਵਿੱਚ 237 ਪਰਚੇ ਪੁਲਿਸ  ਵਲੋਂ ਪਹਿਲਾਂ ਹੀ ਬੰਦ ਕਰ ਦਿੱਤੇ ਗਏ  ਹਨ।  ਇਨ੍ਹਾਂ ਕੇਸਾਂ ਨੂੰ ਹੀ ਦੋਬਾਰਾ ਖੋਲਣ ਲਈ  ਕੇਜਰੀਵਾਲ ਸਰਕਾਰ ਨੇ ਵਿਸ਼ੇਸ ਜਾਂਚ ਟੀਮ ਬਣਾਉਣ ਦੀ ਗਲ ਕੀਤੀ ਸੀ ਤੇ ਹੈਰਾਨ ਕਰਨ ਵਾਲੀ ਗਲ ਹੈ ਕਿ ਉਸ ਵੇਲੇ ਅਕਾਲੀ ਦਲ ਨੇ ਇਸ ਮੰਗ ਦਾ ਵਿਰੋਧ ਕੀਤਾ ਸੀ। ਸਭ ਤੋਂ ਵਧ ਜਰੂਰੀ ਗਲ ਹੈ ਕਿ  ਜਿਹਰੇ 237 ਕੇਸ ਗਲਤ ਤਰੀਕੇ ਨਾਲ ਬੰਦ ਕੀਤੇ ਗਏ ਹਨ ਉਨ੍ਹਾਂ ਦੀ ਦੋਬਾਰਾ ਜਾਂਚ ਕੀਤੀ ਜਾਵੇ ਤਾਂ ਹੀ ਇਹ ਦੋਬਾਰਾ ਸੁਣਵਾਈ ਲਈ  ਭੇਜੇ ਜਾ ਸਕਦੇ ਹਨ। 
ਇਕ ਪਾਸੇ ਤਾਂ ਅਕਾਲੀ ਦਲ ਆਮ ਆਦਮੀ ਪਾਰਟੀ ਵੱਲੋਂ ਕੀਤੀ ਜਾ ਰਹੀ ਇਕ ਸੱਚੀ ਮੰਗ ਦਾ ਵਿਰੋਧ ਕਰਦਾ ਹੈ ਤੇ ਦੂਜੇ ਪਾਸੇ  ਬੇਬੁਨਿਆਦ  ਵਿਸੇਸ਼ ਅਦਾਲਤ ਬਨਾਏ ਜਾਣ ਦੀ ਮੰਗ ਵੀ ਕਰਦਾ ਹੈ।

Tuesday, February 18, 2014

ਫੂਲਕਾ ਵੱਲੋਂ ਸੁਖਬੀਰ ਬਾਦਲ ਨੂੰ ਇੱਕ ਹਫਤੇ ਦਾ ਅਲਟੀਮੇਟਮ

ਚਾਰ ਪ੍ਰਮੁੱਖ ਪੱਤਰਕਾਰਾਂ ਨੂੰ ਦਿੱਤਾ ਸਚ ਦੀ ਭਾਲ ਦਾ ਸੱਦਾ 
ਫਾਈਲ ਫੋਟੋ: ਜਦੋਂ ਵੀ ਸ੍ਰ. ਫੂਲਕਾ ਕਿਸੇ ਜਨਤਕ ਸਥਾਨ ਤੇ ਜਾਂਦੇ ਹਨ ਤਾਂ ਨਵੰਬਰ-84 'ਚ ਖਤਰਾ ਮੁੱਲ ਲੈ ਕੇ ਲੜੇ ਗਏ ਕੇਸਾਂ ਕਾਰਨ ਉਹਨਾਂ ਦੀ ਇੱਕ ਝਲਕ ਦੇਖਣ ਲਈ ਲੋਕਾਂ ਦੀ ਭੀੜ ਲੱਗ ਜਾਂਦੀ ਹੈ।  ਵਿਰੋਧੀ ਜੋ ਮਰਜੀ ਆਖਣ ਪਰ  ਨਵੰਬਰ-84 ਦੇ ਭੁਗਤ ਭੋਗੀਆਂ ਲਈ ਉਹ ਨਾਇਕ ਬਣ ਕੇ ਉਭਰੇ ਹਨ।  ਇਹ ਤਸਵੀਰ ਰਾਸ਼ਟਰੀ ਵਿਕਾਸ ਮੰਚ ਵੱਲੋਂ ਆਯੋਜਿਤ ਇੱਕ ਸਾਦਾ ਜਹੇ ਪ੍ਰੋਗ੍ਰਾਮ ਦੀ ਹੈ।  
ਲੁਧਿਆਣਾ: 18 ਫਰਵਰੀ 2014: (ਰੈਕਟਰ ਕਥੂਰੀਆ//ਪੰਜਾਬ ਸਕਰੀਨ):
ਆਉਂਦੀਆਂ ਲੋਕਸਭਾ ਚੋਣਾਂ ਲਈ ਆਮ ਆਦਮੀ ਪਾਰਟੀ ਦੇ ਲੁਧਿਆਣੇ ਤੋਂ ਉਮੀਦਵਾਰ ਐੱਚ.ਐੱਸ ਫੂਲਕਾ ਨੇ ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਨੂੰ ਇੱਕ ਹਫਤੇ ਦਾ ਸਮਾਂ ਦੇਂਦਿਆਂ ਕਿਹਾ ਹੈ ਕਿ ਜਾਂ ਤਾਂ ਸੁਖਬੀਰ ਬਾਦਲ ਆਪਣੇ ਲੈ ਦੋਸ਼ਾਂ ਨੂੰ ਸਿਧ ਕਰਨ ਤੇ ਜਾਂ ਫਿਰ ਆਪਣੀ ਮੰਤਰੀ ਪਦ ਵਾਲੀ ਕੁਰਸੀ ਅਤੇ ਅਕਾਲੀ ਦਲ ਦੋਹਾਂ ਨੂੰ ਛੱਡ ਕੇ ਲਾਂਭੇ ਹੋ ਜਾਣ। ਨਵੰਬਰ-84 ਦੇ ਕੇਸਾਂ ਨੂੰ ਲੜਨ ਲਈ ਮੋਟੀਆਂ ਫੀਸਾਂ ਲੈਣ ਦੇ ਦੋਸ਼ਾਂ ਨੂੰ ਸਿਰੇ ਤੋਂ ਖਾਰਜ ਕਰਦਿਆਂ ਉਹਨਾਂ ਦਾਅਵਾ ਕੀਤਾ ਹੈ ਕਿ ਉਹਨਾਂ ਨੇ ਨਵੰਬਰ 1984 ਦੇ ਪੀੜਤਾਂ ਨਾਲ ਸੰਬੰਧਤ ਸਾਰੇ ਕੇਸ ਪੂਰੀ ਤਰ੍ਹਾਂ ਮੁਫ਼ਤ ਲੜੇ ਹਨ ਅਤੇ ਕਿਸੇ ਕੋਲੋਂ ਕੋਈ ਪੈਸਾ ਨਹੀਂ ਲਿਆ। ਇਸਦੇ ਨਾਲ ਹੀ ਉਹਨਾਂ ਇਹ ਵੀ ਆਖਿਆ ਕੀ ਫੀਸ ਲੈਣਾ ਵਕੀਲ ਦਾ ਹਕ ਬਣਦਾ ਹੈ ਪਰ ਉਹਨਾਂ ਨੇ ਆਪਣਾ ਇਹ ਬਣਦਾ ਹੱਕ ਵੀ ਨਹੀਂ ਵਰਤਿਆ। ਮੰਗਲਵਾਰ ਨੂੰ ਐੱਚ.ਐੱਸ ਫੂਲਕਾ ਨੇ ਲੁਧਿਆਣਾ ਵਿੱਚ ਆਪਣੇ ਇੱਕ ਨਵੇਂ ਦਫ਼ਤਰ ਦੇ ਉਦਘਾਟਨ ਮੌਕੇ ਭਰੇ ਗਲੇ ਨਾਲ ਬਹੁਤ ਹੀ ਜਜ਼ਬਾਤੀ ਹੋ ਕੇ ਇਹ ਗੱਲ ਕਹੀ। ਸਾਰੇ ਦੇਖ ਸਕਦੇ ਸਨ ਕਿ ਉਹਨਾਂ ਅੰਦਰ ਹੰਝੂਆਂ ਦਾ ਹੜ੍ਹ ਰੋਕਿਆ ਹੋਇਆ ਹੈ। ਉਹਨਾਂ ਸਾਫ਼ ਕਿਹਾ ਕਿ ਉਹ ਇਸ ਮਾਮਲੇ ਨੂੰ ਅਦਾਲਤ ਵਿੱਚ ਨਹੀਂ ਲਿਜਾਣਗੇ ਕਿਓਂਕਿ ਅਦਾਲਤ ਵਿੱਚ ਕੇਸ ਕਈ ਕਈ ਸਾਲ ਲਟਕਦੇ ਹਨ--ਬੜਾ ਲੰਮਾ ਸਮਾਂ ਲਗਦਾ ਹੈ। ਉਹਨਾਂ ਕਿਹਾ ਕਿ ਉਹ ਇਸ ਮੁੱਦੇ ਤੇ ਦੇਸ਼ ਦੇ ਚਾਰ ਪ੍ਰਮੁੱਖ ਪੱਤਰਕਾਰਾਂ ਨੂੰ ਚਿੱਠੀ ਲਿਖ ਰਹੇ ਹਨ ਕਿ ਓਹ ਪੱਤਰਕਾਰ ਖੁਦ ਇਸ ਮਾਮਲੇ ਵਿੱਚ ਆਉਣ ਜੇ ਖੁਦ ਨਹੀਂ ਆ ਸਕਦੇ ਤਾਂ ਆਪਣੇ ਪ੍ਰਤੀਨਿਧੀ ਰਾਹੀਂ ਸੁਖਬੀਰ ਬਾਦਲ ਕੋਲੋਂ ਇਸਦੇ ਸਬੂਤ ਮੰਗਣ। 

ਸ੍ਰ. ਫੂਲਕਾ ਨੇ ਕਿਹਾ ਕਿ ਜੇ ਉਹ ਇਸ ਮਾਮਲੇ ਵਿੱਚ ਦੋਸ਼ੀ ਸਾਬਿਤ ਹੋਏ ਤਾਂ ਸਿਆਸਤ ਦੇ ਨਾਲ ਨਾਲ ਕਾਨੂੰਨ ਦਾ ਪਵਿੱਤਰ ਪੇਸ਼ਾ ਵੀ ਛੱਡ ਦੇਣਗੇ ਅਤੇ ਜੇ ਸੁਖਬੀਰ ਬਾਦਲ ਦੋਸ਼ੀ ਸਾਬਿਤ ਹੋਏ ਤਾਂ ਉਹ ਵੀ ਆਪਣੀ ਕੁਰਸੀ ਅਤੇ ਅਕਾਲੀ ਦਲ ਦੋਵੇਂ ਛੱਡ ਦੇਣ। ਆਮ ਤੌਰ ਤੇ ਬੇਹੱਦ ਨਾਜ਼ੁਕ ਮੌਕਿਆਂ ਤੇ ਵੀ ਸ਼ਾਂਤ ਅਤੇ ਸੰਤੁਲਿਤ ਰਹਿਣ ਵਾਲੇ ਫੂਲਕਾ ਅੱਜ ਮੀਡੀਆ ਨਾਲ ਗੱਲ ਕਰਦਿਆਂ ਇੱਕ ਵਾਰ ਨਹੀਂ ਕਈ ਵਾਰ ਭਾਵੁਕ ਹੋਏ। ਉਹਨਾਂ ਦੇ ਦਿਲ ਤੇ ਲੱਗੀ ਚੋਟ ਉਹਨਾਂ ਦਾ ਚੇਹਰਾ ਵੀ ਬਿਆਨ ਕਰ ਰਿਹਾ ਸੀ ਅਤੇ ਉਹਨਾਂ ਦੀ ਭਰੇ ਗਲੇ ਚੋਂ ਨਿਕਲਦੀ ਆਵਾਜ਼ ਵੀ। ਨਵੰਬਰ-84 ਦੀ ਦਰਿੰਦਗੀ ਵਰਗੇ ਮਾਮਲੇ ਵਿੱਚ ਵੀ ਅਡੋਲ ਰਹਿਣ ਵਾਲਾ ਇਹ ਲੋਹ ਪੁਰਸ਼ ਵੀ ਅੱਜ ਰੋਣ ਹਾਕਾ ਹੋਇਆ ਹੋਇਆ ਪਿਆ ਸੀ। ਸ਼ਾਇਦ ਸਿਆਸਤ ਹੁੰਦੀ ਹੀ ਪੱਥਰ ਦਿਲ ਲੋਕਾਂ ਲਈ ਹੈ। 
ਫਾਈਲ ਫੋਟੋ: ਰਾਸ਼ਟਰੀ ਵਿਕਾਸ ਮੰਚ ਵੱਲੋਂ ਆਯੋਜਿਤ ਸਵਾਗਤੀ ਸਮਾਰੋਹ ਵਿੱਚ ਸ੍ਰ. ਫੂਲਕਾ , ਡਾਕਟਰ ਭੱਲਾ  ਅਤੇ ਗੁਰਿੰਦਰ ਸੂਦ  
ਕਾਬਿਲੇ ਜ਼ਿਕਰ ਹੈ ਕਿ ਇਸ ਤੋਂ ਪਹਿਲਾਂ ਸੋਮਵਾਰ ਨੂੰ ਸੁਖਬੀਰ ਸਿੰਘ ਬਾਦਲ ਨੇ ਸਮਾਣਾ ਵਿਖੇ ਕਿਹਾ ਸੀ ਕਿ ਫੂਲਕਾ ਨੇ 1984 ਦੇ ਦੰਗਾਂ ਪੀੜਤਾਂ ਨਾਲ ਸੰਬੰਧਤ ਸਾਰੇ ਕੇਸ ਮੋਟੀਆਂ ਮੋਟੀਆਂ ਫੀਸਾਂ ਲੈ ਕੇ ਲੜੇ ਹਨ। ਇਸ ਮਾਮਲੇ ਨੂੰ ਲੈ ਕੇ ਸੁਖਬੀਰ ਬਾਦਲ ਅਤੇ ਐੱਚ.ਐੱਸ ਫੂਲਕਾ ਵਿਚਾਲੇ ਵਾਕ-ਯੁਧ ਛਿੜ ਪਿਆ ਹੈ ਜਿਸ ਨਾਲ ਹੁਣ ਬਹੁਤ ਕੁਝ ਹੋਰ ਵੀ ਸਾਹਮਣੇ ਆਵੇਗਾ। ਕੈਪਟਨ ਅਮਰਿੰਦਰ ਸਿੰਘ ਵੱਲੋਂ ਕੀਤੇ ਗਏ ਅਹਿਮ ਪ੍ਰਗਟਾਵਿਆਂ ਤੋਂ ਬਾਅਦ ਸ੍ਰ. ਫੂਲਕਾ ਵੱਲੋਂ ਦਿੱਤਾ ਗਿਆ ਅਲਟੀਮੇਟਮ ਹੁਣ ਅਕਾਲੀ ਲੀਡਰਸ਼ਿਪ ਲਈ ਇੱਕ ਨਵੀਂ ਚੁਨੌਤੀ ਬਣ ਕੇ ਸਾਹਮਣੇ ਆਇਆ ਹੈ। 

ਜਿਕਰਯੋਗ ਹੈ ਕਿ ਐੱਚ.ਐੱਸ ਫੂਲਕਾ ਨੂੰ ਆਮ ਆਦਮੀ ਪਾਰਟੀ ਵੱਲੋਂ ਲੁਧਿਆਣਾ ਤੋਂ ਉਮੀਦਵਾਰ ਐਲਾਨਿਆ ਗਿਆ ਹੈ। ਐੱਚ.ਐੱਸ ਫੂਲਕਾ ਪੇਸ਼ੇ ਤੋਂ ਇਕ ਵਕੀਲ ਹਨ, ਜਿਹੜੇ ਲੰਬੇ ਸਮੇਂ ਤੋਂ 1984 ਦੇ ਪੀੜਿਤ ਪਰਿਵਾਰਾਂ ਦੇ ਕੇਸਾਂ ਨੂੰ ਦੇਖ ਰਹੇ ਹਨ। ਸਿਆਸੀ ਹਲਕਿਆਂ ਵਿੱਚ ਪਹਿਲਾਂ ਹੀ ਇਹ ਚਰਚਾ  ਸੀ ਕੀ ਅਕਾਲੀ ਦਲ ਕੋਲ ਕੇਂਦਰੀ ਮੰਤਰੀ ਮਨੀਸ ਤਿਵਾੜੀ ਦੇ ਮੁਕਾਬਲੇ ਕੋਈ ਕਾਬਿਲ ਉਮੀਦਵਾਰ ਨਹੀਂ ਹੈ ਪਰ ਐਡਵੋਕੇਟ ਫੂਲਕਾ ਦੇ ਮੈਦਾਨ ਵਿੱਚ ਆ ਜਾਣ ਤੋਂ ਬਾਅਦ ਅਕਾਲੀ ਉਮੀਦਵਾਰ ਦੀ ਭਾਲ ਹੁਣ ਹੋਰ ਔਖੀ ਹੋ ਗਈ ਹੈ। ਸ੍ਰ. ਫੂਲਕਾ ਦੇ ਮੈਦਾਨ ਵਿੱਚ ਆ ਜਾਣ ਤੋਂ ਬਾਅਦ ਹੁਣ ਕਾਂਗਰਸ ਅਤੇ ਅਕਾਲੀ ਦਲ ਦੋਹਾਂ ਲਈ ਹੀ ਇਹ ਮੁਸ਼ਕਿਲ ਖੜੀ ਹੋ ਗਈ ਹੈ ਕਿ ਨਵੰਬਰ-84 ਦੇ ਨਾਇਕ ਵੱਜੋ ਉਭਰੇ ਸ੍ਰ. ਫੂਲਕਾ ਦੇ ਮੁਕਾਬਲੇ ਕਿਸ ਨੂੰ ਖੜਾ ਕੀਤਾ ਜਾਵੇ। 

Friday, January 03, 2014

ਵਿਸ਼ਵਾਸ ਮੱਤ ਵੇਲੇ SAD ਨੇ BJP ਨਾਲ ਰਲਕੇ ਇਨ੍ਹਾਂ ਮੁੱਦਿਆਂ ਦੇ ਖਿਲਾਫ ਵੋਟ ਪਾਈ!

ਮਿੱਤਰ Kehar Sharif ਹੁਰਾਂ ਨੇ ਇਹ ਪੋਸਟ ਫੇਸਬੁਕ 'ਤੇ ਦੋ ਜਨਵਰੀ 2014 ਦੀ ਰਾਤ ਨੂੰ 11:48 ਵਜੇ ਪਾਈ ਸੀ। ਉਹ ਲਿਖਦੇ ਹਨ :
ਕੇਜਰੀਵਾਲ ਦੀ 'ਆਮ ਆਦਮੀ ਪਾਰਟੀ' ਨੇ ਆਪਣੇ ਮੈਨੀਫੈਸਟੋ ਵਿਚ ਸਿੱਖਾਂ ਅਤੇ ਪੰਜਾਬੀਆਂ ਨਾਲ ਦੋ ਵਾਅਦੇ ਕੀਤੇ ਹਨ।
ਪਹਿਲਾ: ਦਿੱਲੀ ਵਿਚ ਸਿੱਖਾਂ ਦੇ ਕਤਲੇਆਮ ਤੋਂ ਪ੍ਰਭਾਵਿਤ ਲੋਕਾਂ ਨੂੰ ਇਨਸਾਫ ਦੁਆਉਣ ਲਈ ਕੋਸ਼ਸ਼ ਕੀਤੀ ਜਾਵੇਗੀ। ਜਿਨ੍ਹਾਂ ਕੇਸਾਂ ਨੂੰ ਗਲਤ ਤਰੀਕੇ ਨਾਲ ਬੰਦ ਕਰ ਦਿੱਤਾ ਗਿਆ ਉਨ੍ਹਾਂ ਦੀ ਮੁੜ ਸਮੀਖਿਆ ਕਰਵਾਈ ਜਾਵੇਗੀ। ਜਿਨ੍ਹਾਂ ਗਵਾਹਾਂ ਦੇ ਬਿਆਨ ਨਹੀਂ ਹੋਏ ਇਨ੍ਹਾਂ ਬਾਰੇ ਇਨਸਾਫ ਦੁਆਉਣ ਦਾ ਵਾਅਦਾ। 
1984 ਕਤਲੇਆਮ ਤੋਂ ਪ੍ਰਭਾਵਿਤ ਪਰਿਵਾਰ ਅੱਜ ਵੀ ਤਿਲਕ ਵਿਹਾਰ ਵਰਗੀਆਂ ਕੁੱਝ ਬਸਤੀਆਂ ਵਿਚ ਰਹਿੰਦੇ ਹਨ। ਜਿੱਥੇ ਇਨ੍ਹਾਂ ਦੀ ਹਾਲਤ ਬਹੁਤ ਖਰਾਬ ਹੈ। ਇਨ੍ਹਾਂ ਦੇ ਮਕਾਨ ਮਾੜੀ ਹਾਲਤ ਵਿਚ ਹਨ, ਛੱਤਾਂ ਡਿਗ ਰਹੀਆਂ ਹਨ। ਬੱਚਿਆਂ ਵਾਸਤੇ ਕੋਈ ਸਕੂਲ ਨਹੀਂ, ਕੋਈ ਹਸਪਤਾਲ ਨਹੀਂ, ਕੋਈ ਰੋਜ਼ਗਾਰ ਨਹੀਂ। ਇਨ੍ਹਾਂ ਪਰਿਵਾਰਾਂ ਦੇ ਮੁੜ ਵਸੇਬੇ ਲਈ ਆਮ ਆਦਮੀ ਪਾਰਟੀ ਪੂਰਾ ਜਤਨ ਕਰੇਗੀ।
ਪੰਜਾਬੀ ਭਾਸ਼ਾ ਨੂੰ ਦਿੱਲੀ ਵਿਚ ਕਾਨੂੰਨੀ ਪੱਖੋਂ ਦੂਜੀ ਭਾਸ਼ਾ ਤਾਂ ਦਰਜਾ ਦਿੱਤਾ ਹੋਇਆ ਹੈ, ਪਰ ਹੁਣ ਇਸਨੂੰ ਅਸਲ ਵਿਚ ਲਾਗੂ ਕਰਵਾਇਆ ਜਾਵੇਗਾ।
ਧਿਆਨ ਦਿਉ : ਵਿਸ਼ਵਾਸ ਮੱਤ ਵੇਲੇ ਸ਼੍ਰੋਮਣੀ ਅਕਾਲੀ ਦਲ ਦੇ ਮੈਂਬਰਾਂ ਨੇ ਬੀ ਜੇ ਪੀ ਨਾਲ ਰਲਕੇ ਇਨ੍ਹਾਂ ਮੁੱਦਿਆਂ ਦੇ ਖਿਲਾਫ ਵੋਟ ਪਾਈ।
ਇਸਤੇ ਟਿੱਪਣੀ ਕਰਦਿਆਂ Radio Talk Show Host Gurbachan Mann ਕਹਿੰਦੇ ਨੇ: Kehar ji SAD's agenda is pro RSS to expect any panthik item is foolish. About Punjabi language they feel helpless because of BJP so what can you expect from these hypocrites they are useless their only agenda is to be wealthy that is all.

Thursday, January 02, 2014

ਕੇਜਰੀਵਾਲ ਦੇ ਖਿਲਾਫ਼ ਰੋਸ ਵਖਾਵੇ ਸ਼ੁਰੂ

ਕੌਸ਼ਾਂਭੀ 'ਚ ਦਿੱਲੀ ਮੈਟ੍ਰੋ ਰੇਲ ਨਿਗਮ ਦੇ ਕਰਮਚਾਰੀਆਂ ਨੇ ਕੀਤਾ ਰੋਸ ਵਖਾਵਾ 
ਗਾਜ਼ੀਆਬਾਦ, 2 ਜਨਵਰੀ 2013: ਇੱਕ ਪਾਸੇ ਅਰਵਿੰਦ ਕੇਜਰੀਵਾਲ ਸਾਲਾਂ ਤੋਂ ਲਮਕ ਰਹੇ ਕੰਮਾਂ ਨੂੰ ਘੰਟਿਆਂ ਵਿੱਚ ਨਿਪਟਾ ਰਹੇ ਹਨ ਦੂਜੇ ਪਾਸੇ ਉਹਨਾਂ ਦੇ ਵਿਰੋਧੀ ਉਹਨਾਂ ਲਈ ਪਰੇਸ਼ਾਨੀਆਂ ਖੜੀਆਂ ਕਰਨ ਦਾ ਕੋਈ ਮੌਕਾ ਹਥੋਂ ਨਹੀਂ ਗਵਾਉਣਾ ਚਾਹੁੰਦੇ। ਉਹਨਾਂ ਕੋਲ ਖਿਲਾਫ਼ ਜ਼ੋਰਦਾਰ ਮੁਜ਼ਾਹਰਿਆਂ ਦੀ ਪੂਰੀ ਪੂਰੀ ਤਿਆਰੀ ਹੋ ਚੁੱਕੀ ਲੱਗਦੀ ਹੈ। ਇੱਕ ਪਾਸੇ ਭਰੋਸੇ ਦਾ ਮਤਾ ਲਿਆ ਜਾ ਰਿਹਾ ਸੀ ਦੂਜੇ ਪਾਸੇ ਮੁੱਖ ਮੰਤਰੀ ਕੇਜਰੀਵਾਲ ਦੇ ਖਿਲਾਫ਼ ਰੋਸ ਵ੍ਖਾਵਿਆਂ ਦੀ ਸ਼ੁਰੂਆਤ ਹੋ ਚੁੱਕੀ ਸੀ। ਦਿੱਲੀ ਮੈਟਰੋ ਰੇਲ ਨਿਗਮ (ਡੀ. ਐਮ. ਆਰ. ਸੀ.) ਦੇ ਠੇਕੇ 'ਤੇ ਰੱਖੇ ਕਰਮਚਾਰੀਆਂ ਨੇ ਖੁਦ ਨੂੰ ਪੱਕੇ ਕੀਤੇ ਜਾਣ ਦੀ ਮੰਗ ਬੁਲੰਦ ਕਰਦਿਆਂ ਅੱਜ ਦਿੱਲੀ ਦੇ ਨਵੇਂ ਬਣੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਦੇ ਕੌਸ਼ਾਬੀ ਸਥਿਤ ਘਰ ਦੇ ਬਾਹਰ ਪ੍ਰਦਰਸ਼ਨ ਕੀਤਾ। ਇਸ ਰੋਸ ਵਖਾਵੇ ਵਿੱਚ ਜ਼ੋਰਦਾਰ ਨਾਅਰੇਬਾਜ਼ੀ ਕੀਤੀ ਗਈ। ਡੀ. ਐਮ. ਆਰ. ਸੀ. ਦੇ ਤਕਰੀਬਨ 100 ਕਰਮਚਾਰੀਆਂ ਨੇ ਪ੍ਰਦਰਸ਼ਨ ਕਰਦੇ ਹੋਏ 'ਠੇਕੇਦਾਰੀ ਪ੍ਰਥਾ ਬੰਦ ਕਰੋ' ਵਰਗੇ ਹੱਕੀ ਨਾਅਰੇ ਲਾਏ। ਦਿੱਲੀ ਮੈਟਰੋ ਰੇਲ ਕਰਮਚਾਰੀ ਸੰਘ ਦੇ ਮੈਂਬਰ ਨਵੀਨ ਨੇ ਕਿਹਾ ਕਿ ਡੀ. ਐਮ. ਆਰ. ਸੀ. ਦੇ ਹਾਲੇ ਤਕਰੀਬਨ 10 ਹਜ਼ਾਰ ਕਰਮਚਾਰੀ ਠੇਕੇ 'ਤੇ ਕੰਮ ਕਰ ਰਹੇ ਹਨ ਜਿਨ੍ਹਾਂ ਨੂੰ ਲੰਬੇ ਸਮੇਂ ਤੋਂ ਪੱਕਿਆਂ ਨਹੀਂ ਕੀਤਾ ਜਾ ਰਿਹਾ। ਉਨ੍ਹਾਂ ਦੋਸ਼ ਲਾਇਆ ਕਿ ਡੀ. ਐਮ. ਆਰ. ਸੀ. ਲਈ ਠੇਕੇ 'ਤੇ ਰੱਖੇ ਕਰਮਚਾਰੀਆਂ ਦੀ ਨਿਯੁਕਤੀ ਕਰਨ ਵਾਲੀ ਨਿੱਜੀ ਕੰਪਨੀ ਮਜ਼ਦੂਰੀ ਕਾਨੂੰਨਾਂ ਦੀ ਉਲੰਘਣਾ ਕਰ ਰਹੀ ਹੈ। ਸ੍ਰੀ ਨਵੀਨ ਨੇ ਕਿਹਾ ਕਿ ਕੇਜਰੀਵਾਲ ਨੇ ਦਿੱਲੀ ਵਿਚ ਠੇਕੇਦਾਰੀ ਪ੍ਰਥਾ ਬੰਦ ਕਰਨ ਦਾ ਵਾਅਦਾ ਕੀਤਾ ਸੀ ਇਸ ਲਈ ਉਹ ਦਿੱਲੀ ਦੇ ਮੁੱਖ ਮੰਤਰੀ ਸਾਹਮਣੇ ਆਪਣੀਆਂ ਮੰਗਾਂ ਰੱਖਣ ਇਥੇ ਆਏ ਹਨ। ਉਧਰ, ਕੇਜਰੀਵਾਲ ਦਾ ਇਲਾਜ ਕਰ ਰਹੇ ਡਾਕਟਰ ਵਿਪਿਨ ਮਿੱਤਲ ਨੇ ਦੱਸਿਆ ਕਿ ਮੁੱਖ ਮੰਤਰੀ ਹੁਣ ਬਿਹਤਰ ਮਹਿਸੂਸ ਕਰ ਰਹੇ ਹਨ ਪਰ ਕੱਲ ਰਾਤ ਲਗਾਤਾਰ ਖੰਘ ਆਉਣ ਕਾਰਨ ਉਹ ਸੌਂ ਨਹੀਂ ਸਕੇ। ਹੁਣ ਦੇਖਣਾ ਹੈ ਕਿ ਰੋਸ ਵਖਾਵਿਆਂ ਦੀ ਸਿਆਸਤ ਨਾਲ ਕੇਜਰੀਵਾਲ ਟੀਮ ਕਿਵੇਂ ਨਿਬੜਦੀ ਹੈ?  ਕਿਸੇ ਸ਼ਾਇਰ ਨੇ ਬਹੁਤ ਪਹਿਲਾਂ ਆਖਿਆ ਸੀ-
ਮਾਨਾ ਕਿ ਤਬਾਹੀ ਮੇਂ ਕੁਛ ਹਾਥ ਹੈ ਦੁਸ਼ਮਨ ਕਾ;
ਕੁਛ ਚਾਲ ਕਿਆਮਤ ਕੀ ਅਪਨੇ ਭੀ ਤੋ ਚਲਤੇ ਹੈਂ। 

Sunday, December 22, 2013

ਅਰਵਿੰਦ ਕੇਜਰੀਵਾਲ ਨੂੰ ਚੁਣੌਤੀ

ਕੀ ਉਹ ਭਾਰਤ ਦੇ ਵੱਡੇ ਸਰਮਾਏਦਾਰਾ ਦੇ ਪੈਸੇ ਅਤੇ ਜਮੀਨ ਨੂੰ ਵੰਡਾ ਸਕੇਗਾ?
ਇਟਲੀ ਵਿੱਚ ਰਹਿ ਰਹੇ ਪਰਮਜੀਤ ਦੋਸਾਂਝ Paramjit Dosanjh ਹੁਰਾਂ ਨੇ ਦਿੱਲੀ ਵਿੱਚ ਵਾਪਰੇ ਕੇਜਰੀਵਾਲ ਵਰਤਾਰੇ 'ਤੇ ਟਿੱਪਣੀ ਕਰਦਿਆਂ ਜਿੱਥੇ ਪਰਦੇ 'ਚ ਲੁਕੇ ਮਨਸੂਬਿਆਂ ਵੱਲ ਇਸ਼ਾਰਾ ਕੀਤਾ ਹੈ ਉੱਥੇ ਅਰਵਿੰਦ ਕੇਜਰੀਵਾਲ ਅੱਗੇ ਚੁਣੌਤੀ ਵਰਗਾ ਸਵਾਲ ਵੀ ਕੀਤਾ ਹੈ
-ਕੀ ਅਰਵਿੰਦ ਕੇਜਰੀਵਾਲਾ ਭਾਰਤ ਦੇ ਵੱਡੇ ਸਰਮਾਏਦਾਰਾ ਦਾ ਪੈਸੇ ਅਤੇ ਜਮੀਨ ਨੂੰ ਵੰਡਾ ਸਕੇਗਾ?
ਕੇਜਰੀਵਾਲਾ ਭਾਰਤ ਦੇ ਵੱਡੇ ਰਾਜਨੀਤਿਕ ਲੋਕਾ ਦੇ ਥੈਕਿਸ਼ ਟੈਂਕ ਵਲੋਂ ਕੱਢੀ ਗਈ ਇਕ ਕਾਢ ਦਾ ਨਮੂਨਾ ਹੈ ਹੋਰ ਕੁਝ ਨਹੀ ਹੈ ..........ਇਹ ਵੱਡੇ ਵੱਡੇ ਭਾਰਤ ਦੇ ਕਾਰਪੋਰੇਟਾਂ ਜਗਤ ਦੁਆਰਾ ਦਿੱਲੀ ਦੀਆਂ ਚੋਣਾਂ ਵਿਚ ਦਿਖਾਇਆ ਗਿਆ ਇਕ ਕਿ੍ਸ਼ਮਾ ਹੈ ...........ਹੋਰ ਕੁਝ ਨਹੀ ਹੈ ......ਗੱਲਾਂ ਵਿਚੋਂ ਗੱਲ ਦਾ ਧੁਰਾ ਤਾਂ ਸਾਰਾ ਪੈਸਾ ਤੇ ਜ਼ਮੀਨ ਹੈ ............ਕੀ ਅਰਵਿੰਦ ਕੇਜਰੀਵਾਲਾ ਭਾਰਤ ਦੇ ਵੱਡੇ ਸਰਮਾਏਦਾਰਾ ਦਾ ਪੈਸੇ ਅਤੇ ਜਮੀਨ ਨੂੰ ਵੰਡਾ ਸਕੇਗਾ ..........ਸ਼ਾਇਦ ਨਹੀ ........ਨਾ ਉਸ ਕੋਲ ਕੋਈ ਪ੍ਰੋਗਰਾਮ ਹੈ .........ਨਾ ਕੋਈ ਏਜੰਡਾ ਹੈ ਉਸ ਕੋਲ .........ਬਿਨਾ ਸਿਧਾਤ ਤੋਂ ਉਸ ਦੀ ਫੂਕ ਜਲਦੀ ਹੀ ਨਿਕਲ ਜਾਣੀ ਹੈ ..........ਇਹ ਭਾਰਤ ਦੇ ਉਸ ਨਕਸਲੀ ਮੂਵਮੈਂਟ ਨੂੰ ਤਾਰਪੀਡੋ ਕਰਨ ਦੀ ਇਕ ਭਾਰਤੀ ਸ਼ਾਜਿਸ਼ ਹੈ........ ਜਿਸ ਤਹਿਤ ਲੋਕਾਂ ਦੇ ਦਿਮਾਗ ਵਿਚ ਇਹ ਗੱਲ ਪਾਉਣਾ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ........ ਕਿ ਭਾਈ ਤੁਸੀ ਆਪਣੀ ਮੁਕਤੀ ਦਾ ਰਾਂਹ ਵੋਟ ਰਾਜਨੀਤਿ ਵਿਚੋ ਲੱਭੋ ........ਇਹ ਤਜਰਬਾ ਵੱਡੇ ਭਾਰਤ ਦੇ ਸਰਮਾਏਦਾਰਾ ਨੇ ਸਿਰਫ਼ ਦਿੱਲੀ ਵਿਚ ਹੀ ਕਰਵਾਇਆ ਹੈ .......ਮੀਡੀਏ ਦੀ ਸੱਭ ਤੋਂ ਵੱਡੀ ਇਸ ਭੂਮਿਕਾ ਹੈ .......ਮੀਡੀਏ ਤੋਂ ਇਹ ਕੇਜਰੀਵਾਲਾ ਵਾਲਾ ਬੰਬ ਚਲਾਇਆ ਗਿਆ ਹੈ .......ਬੱਸ ਇਹ ਗੱਲ ਇੱਥੇ ਹੀ ਖ਼ਤਮ ਹੋ ਜਾਣੀ ੍ਹੈ ...........ਇਸ ਤੋਂ ਅੱਗੇ ਨਹੀ ਤੁਰੇਗੀ ...............ਕੀ ਕੇਜਰੀਵਾਲਾ ਦਾਂਤੇਵਾੜਾ ਦੇ ਲੋਕਾਂ ਦੀਆਂ ਜ਼ਮੀਨਾ ਬਚਾ ਸਕਦਾ ਹੈ ........ਮੈਂ ਕਾਫੀ ਸਮੇਂ ਤੋਂ ਫੇਸਬੁਕ ਤੇ ਦੇਖ ਰਿਹਾ ਕਿ ਲੋਕੀ ਕੇਜਰੀਵਾਲਾ ਦੇ ਹੱਕ ਵਿਚ ਭੁਗਤ ਰਹੇ ਹਨ .........ਪਰ ਸਮਝ ਨਹੀ ਆਉਦੀ ਕਿ ਲੋਕ ਕਿਊ ਨਹੀ ਉਸ ਚਾਲ ਨੂੰ ਸਮਝ ਰਹੇ....... ਜਿਸ ਤਹਿਤ ਇਹ ਭਾਰਤ ਦੇ ਉੱਤਰ-ਪੱਛਮ ਵਿਚ ਫੈਲ ਰਹੀ ਨਕਸਲਬਾੜੀ ਲਹਿਰ ਨੂੰ ਦਬਾ ਕੇ ਲੋਕਾਂ ਦੀ ਸੋਚ ਬਦਲ ਰਹੇ ਹਨ ......ਉਹਨਾਂ ਦੇ ਦਿਮਾਗਾਂ ਵਿਚ ਬੰਦੂਕ ਨੂੰ ਛੱਡ ਕੇ ਵੋਟਾਂ ਦੇ ਰਾਂਹੇ ਤੋਰਨ ਦੀ ਚਾਲ ਹੈ .......ਕਿਊਂਕਿ ਇਹ ਬੰਦੂਕ ਹੁਣ ਭਾਰਤ ਦੇ ਸਰਮਾਏਦਾਰਾਂ ਅਤੇ ਵੱਡੇ ਰਾਜਨੀਤਿਕ ਲੋਕਾਂ ਵੱਲ ਸੇਧਤ ਹੁੰਦੀ ਜਾ ਰਹੀ ਹੈ ...ਇਹ ਲੋਕਾਂ ਦੀ ਸੋਚ ਨੂੰ ਮੋੜਾ ਦੇਣ ਵਾਲੀ ਗੱਲ ਹੈ ਕੇਜਰੀਵਾਲਾ ਦੇ ਬਹਾਨੇ ..............ਜਦ ਕਿ ਭੁੱਖਾਂਮਾਰੇ ਦਿਹਾਤੀ ਲੋਕਾਂ ਦੇ ਵਿਸਫੋਟਕ ਰੋਹ ਫੱਟਣ ਦੇ ਕੱਢੇ ਖੜਾ ਹੈ ......ਜੋ ਮੌਜੂਦਾ ਸਰਮਾਏਦਾਰੀ ਢਾਂਚੇ ਨੂੰ ਢੇਰ ਕਰਨ ਵੱਲ ਵੱਧ ਰਿਹਾ ਹੈ .....ਤੇ ਸੱਤਾਧਾਰੀ ਤਾਕਤਾਂ ਨੂੰ ਵੀ ਹੁਣ ਆਪਣੇ ਘਾਤਕ ਅੰਦਾਜ਼ੇ ਦੇ ਕੁਲਹਿਣੇ ਖ਼ਤਰੇ ਦਾ ਅਹਿਸਾਸ ਹੋ ਰਿਹਾ ਜਾਪਦਾ ਹੈ ........ਜਿਸ ਕਰਕੇ ਦਿੱਲੀ ਦਾ ਡਰਾਮਾ ਰੱਚਿਆ ਗਿਆ ਹੈ .............ਜਿਸ ਦਾ ਲੋਕਾਂ ਦੀ ਮਾਨਸਕਿਤਾ ਤੇ ਪ੍ਰਭਾਵ ਵੀ ਸ਼ਪੱਸ਼ਟ ਦੇਖਿਆ ਤੇ ਸਮਝਿਆਂ ਜਾ ਸਕਦਾ ਹੈ .......ਸੋ, ਲੋਡ਼੍ਹ ਹੈ ਇਸ ਕੇਜਰੀਵਾਲਾ ਦੇ ਸਾਰੇ ਘਟਨਾ ਚੱਕਰ ਨੂੰ ਸਮਝਣ ਦੀ ਜੋ ਕਿ ਇਕ ਗਿਣੀਮਿੱਥੀ ਇਕ ਸ਼ਾਜਿਸ਼ ਹੈ ਲੋਕਾਂ ਦੀ ਘੌਲ ਰਹੀ ਮਾਨਸਿਕਤਾ ਨੂੰ ਬਦਲਣ ਦੀ .... ਪਰ ਸੱਭ ਤੋਂ ਹੈਰਾਨੀ ਵਾਲੀ ਗੱਲ ਹੈ ਕਿ ਭਾਰਤ ਵਿਚ ਅਮੀਰਾਂ ਅਤੇ ਗਰੀਬਾਂ ਵਿਚ ਐਨਾ ਪਾੜਾ ਪੈ ਗਿਆ ਹੈ ਕਿ ਅੰਬਾਨੀ ਨੂੰ ਤਾਂ ਆਪਣੇ ਘਰੇਲੂ ਖਰਚੇ ਲਈ ਸਲਾਨਾ ਪੰਤਾਲੀ ਕਰੋੜ ਰੁਪਏ ਚਾਹੀਦੇ ਹਨ ...........ਤੇ ਦੂਸਰੇ ਪਾਸੇ ਇਸ ਦੇਸ਼ ਦੀ ਪਝੰਤਰ ਕਰੋੜ ਜਨਤਾ ਗਰੀਬੀ ਰੇਖਾ ਤੋਂ ਹੇਠਾਂ ਦਿਨ ਕਟੀ ਕਰਨ ਨੂੰ ਮਜਬੂਰ ਹੈ । .......ਦੂਜੇ ਪਾਸੇ ਵਿਕਾਓ ਭਾਰਤੀ ਮੀਡੀਆਂ ਇਹ ਦੱਸਣ ਵਿਚ ਫ਼ਖ਼ਰ ਮਹਿਸੂਸ ਕਰ ਰਿਹਾ ਹੈ ਕਿ ਭਾਰਤ ਵਿਚ ਖਰਬਪਤੀਆਂ ਦੀ ਗਿਣਤੀ ਚੀਨ ਦੇ ਖਰਬ ਪਤੀਆਂ ਨਾਲੋ ਕਿਤੇ ਜਿਆਦਾ ਹੈ ..............ਦੁਰ ਫਿੱਟੇ ਮੂਹ ਤੁਹਾਡੇ .............
14 hours ago · Rome, Italy