Showing posts with label Jagraon. Show all posts
Showing posts with label Jagraon. Show all posts

Monday, July 23, 2018

ਲੁਧਿਆਣਾ (ਦਿਹਾਤੀ) ਪੁਲਿਸ ਵੱਲੋਂ ਇੱਕ ਕਿਲੋ ਹੈਰੋਇਨ ਸਮੇਤ ਔਰਤ ਗ੍ਰਿਫ਼ਤਾਰ

ਪੁੱਛਗਿੱਛ ਕੀਤੀ ਦੌਰਾਨ ਹੋਰ ਵੀ ਵੱਡੇ ਖੁਲਾਸੇ ਹੋਣ ਦੀ ਸੰਭਾਵਨਾ
ਜਗਰਾਉ: (ਲੁਧਿਆਣਾ): 23 ਜੁਲਾਈ 2018:(ਪੰਜਾਬ ਸਕਰੀਨ ਬਿਊਰੋ)::
ਲੁਧਿਆਣਾ (ਦਿਹਾਤੀ) ਪੁਲਿਸ ਨੇ ਨਸ਼ਿਆਂ ਖ਼ਿਲਾਫ਼ ਸ਼ੁਰੂ ਕੀਤੀ ਵਿਸ਼ੇਸ਼ ਮੁਹਿੰਮ ਤਹਿਤ ਇੱਕ ਔਰਤ ਨੂੰ ਇੱਕ ਕਿਲੋ ਹੈਰੋਇਨ ਸਮੇਤ ਗ੍ਰਿਫ਼ਤਾਰ ਕਰਨ ਵਿੱਚ ਸਫ਼ਲਤਾ ਪ੍ਰਾਪਤ ਕੀਤੀ ਹੈ। 
ਇਸ ਸੰਬੰਧੀ ਸੱਦੀ ਪ੍ਰੈੱਸ ਕਾਨਫਰੰਸ ਨੂੰ ਸੰਬੋਧਨ ਕਰਦਿਆਂ ਸ੍ਰ. ਵਰਿੰਦਰ ਸਿੰਘ ਬਰਾੜ, ਪੀ.ਪੀ.ਐਸ, ਐਸ.ਐਸ.ਪੀ, ਲੁਧਿਆਣਾ (ਦਿਹਾਤੀ) ਨੇ ਦੱਸਿਆ ਕਿ ਏ.ਐਸ.ਆਈ ਕਰਮਜੀਤ ਸਿੰਘ, ਐਟੀਨਾਰਕੋਟਿਕ ਸੈਲ ਸਮੇਤ ਪਲਿਸ ਪਾਰਟੀ ਦੇ ਤਹਿਸੀਲ ਚੌਕ ਮੌਜੂਦ ਸੀ ਤਾਂ ਪੂਰਨ ਕੌਰ ਉਰਫ ਪੂਰੋ ਬਾਈ ਪਤਨੀ ਲੇਟ ਚਰਨ ਸਿੰਘ ਵਾਸੀ ਪਿੰਡ ਬੂਟਾ ਥਾਣਾ ਕੋਤਵਾਲੀ ਕਪੂਰਥਲਾ ਹਾਲ ਵਾਸੀ ਪਿੰਡ ਦੌਲੇਵਾਲ, ਥਾਣਾ ਕੋਟ ਈਸੇ ਖਾਂ ਦੀ ਤਲਾਸ਼ੀ ਲਈ ਤਾਂ ਉਸ ਕੋਲੋਂ ਇੱਕ ਕਿੱਲੋ ਹੈਰੋਇਨ ਬਰਾਮਦ ਹੋਈ।ਪੂਰਨ ਕੌਰ ਉਰਫ ਪੂਰੋ ਖ਼ਿਲਾਫ਼ ਮੁਕੱਦਮਾ ਨੰਬਰ 206 ਮਿਤੀ 23 ਜੁਲਾਈ, 2018 ਅ/ਧ 21/61/85 ਐਨ.ਡੀ.ਪੀ.ਐਸ ਐਕਟ ਥਾਣਾ ਸਿਟੀ ਜਗਰਾਉ ਦਰਜ ਕੀਤਾ ਗਿਆ।
ਗ੍ਰਿਫ਼ਤਾਰ ਦੋਸ਼ਣ ਨੂੰ ਪੇਸ਼ ਅਦਾਲਤ ਕਰਕੇ ਉਸ ਦਾ ਰਿਮਾਂਡ ਹਾਸਲ ਕਰਕੇ ਹੋਰ ਪੁੱਛਗਿੱਛ ਕੀਤੀ ਜਾਵੇਗੀ।ਜਿਸ ਦੌਰਾਨ ਹੋਰ ਵੀ ਵੱਡੇ ਖੁਲਾਸੇ ਹੋਣ ਦੀ ਸੰਭਾਵਨਾ ਹੈ।ਇਸ ਮੌਕੇ ਸ੍ਰੀ ਰੁਪਿੰਦਰ ਕੁਮਾਰ ਭਾਰਦਵਾਜ, ਪੀ.ਪੀ.ਐਸ, ਐਸ.ਪੀ (ਇੰਨਵੈਸਟੇਗੇਸ਼ਨ), ਲੁਧਿਆਣਾ(ਦਿਹਾਤੀ) ਅਤੇ ਸ੍ਰੀ ਅਮਨਦੀਪ ਸਿੰਘ ਬਰਾੜ, ਪੀ.ਪੀ.ਐਸ, ਉਪ ਕਪਤਾਨ ਪੁਲਿਸ (ਇੰਨ:), ਲੁਧਿ: (ਦਿਹਾਤੀ) ਅਤੇ ਇੰਸਪੈਕਟਰ ਲਖਬੀਰ ਸਿੰਘ, ਇੰਚਾਰਜ ਸੀ.ਆਈ.ਏ ਸਟਾਫ ਅਤੇ ਹੋਰ ਵੀ ਹਾਜ਼ਰ ਸਨ।

Friday, April 20, 2018

ਸੀਪੀਆਈ ਆਗੂ ਗੁਰਨਾਮ ਸਿੱਧੂ ਖਿਲਾਫ ਝੂਠੀ ਸ਼ਿਕਾਇਤ ਵਿਰੁੱਧ ਤਿੱਖਾ ਰੋਸ

Fri, Apr 20, 2018 at 10:18 AM
ਕਈ ਸੰਗਠਨਾਂ ਨੇ ਕੀਤੀ ਲੁਧਿਆਣਾ ਦੇਹਾਤ ਦੇ ਐਸ ਐਸ ਪੀ ਨਾਲ ਮੁਲਾਕਾਤ 
ਲੁਧਿਆਣਾ: 20 ਅਪਰੈਲ 2018: (ਪੰਜਾਬ ਸਕਰੀਨ ਟੀਮ)::
ਭਾਰਤੀ ਕਮਿਊਨਿਸਟ ਪਾਰਟੀ ਦੇ ਸ਼ਹਿਰੀ ਸਹਾਇਕ ਸਕੱਤਰ ਕਾਮਰੇਡ ਗੁਰਨਾਮ ਸਿੰਘ ਸਿੱਧੂ ਨਾਲ ਨਾਲ ਕੀਤੀ ਗਈ ਗੁੰਡਾਗਰਦੀ ਅਤੇ ਫਿਰ ਉਹਨਾਂ ਦੇ ਹੀ ਖਿਲਾਫ ਲਿਖਵਾਈ ਗਈ ਝੂਠੀ ਸ਼ਿਕਾਇਤ ਦੇ ਖਿਲਾਫ ਕਈ ਜੱਥੇਬੰਦੀਆਂ ਦਾ ਇੱਕ ਸਾਂਝਾ ਵਫਦ ਜਗਰਾਓਂ ਜਾ ਕੇ ਲੁਧਿਆਣਾ (ਦੇਹਾਤ) ਦੇ ਐਸ ਐਸ ਪੀ ਸੁਰਜੀਤ ਸਿੰਘ ਨੂੰ ਮਿਲਿਆ। ਇਸ ਵਫਦ ਵਿੱਚ ਕਾਮਾਗਾਟਾ ਮਾਰੂ ਯਾਦਗਾਰੀ ਕਮੇਟੀ ਦੇ ਆਗੂ, ਰੋਡਵੇਜ਼ ਵਰਕਰਾਂ ਦੇ ਆਗੂ, ਬਿਜਲੀ ਬੋਰਡ ਮੁਲਾਜ਼ਮਾਂ ਦੇ ਆਗੂ, ਦਲਿਤ ਜੱਥੇਬੰਦੀਆਂ ਦੇ ਆਗੂ ਅਤੇ ਕਈ ਹੋਰ ਸਰਗਰਮ ਕਾਰਕੁੰਨ ਵੀ ਸ਼ਾਮਲ ਸਨ। 
ਕਾਮਰੇਡ ਸਿੱਧੂ ਨਾਲ ਇਹ ਗੁੰਡਾਗਰਦੀ ਕੁਝ ਦਿਨ ਪਹਿਲਾਂ ਲੁਧਿਆਣਾ ਦੇ ਹੀ ਪਿੰਡ ਵਲੀਪੁਰ ਵਿੱਚ ਵਾਪਰੀ ਜਦੋਂ ਕਾਮਰੇਡ ਸਿੱਧੂ ਕੁਝ ਮਜ਼ਦੂਰਾਂ ਦੀ ਬਣਦੀ ਕਿਰਤ ਕਮਾਈ ਦੁਆਉਣ ਲਈ ਇੱਕ ਵਿਸ਼ੇਸ਼ ਮਿਸ਼ਨ ‘ਤੇ ਇਸ ਪਿੰਡ ਵਿੱਚ ਗਏ ਸਨ। ਪੀੜਿਤ ਮਜ਼ਦੂਰਾਂ ਨੇ ਦੱਸਿਆ ਕਿ ਇਥੇ ਇੱਕ ਹਵੇਲੀਨੁਮਾ ਕੋਠੀ ਵਿੱਚ ਬਹੁਤ ਕੁਝ ਗੈਰ ਸਮਾਜਿਕ ਵੀ ਹੁੰਦਾ ਹੈ ਜਿਹੜਾ ਪੁਲਿਸ ਦੇ ਕੁਝ ਥਾਣਾ ਪੱਧਰ ਦੇ ਅਧਿਕਾਰੀਆਂ ਦੀ ਸ਼ਹਿ ਨਾਲ ਚੱਲਦਾ ਹੈ। ਜਦੋਂ ਕਾਮਰੇਡ ਸਿੱਧੂ ਨੇ ਇਸ ਸਬੰਧੀ ਮਜ਼ਦੂਰਾਂ ਦੇ ਬਿਆਨ ਅਤੇ ਸਬੰਧਿਤ ਕੋਠੀ ਦੀ ਫੋਟੋ ਖਿੱਚਣ ਦੀ ਕੋਸ਼ਿਸ਼ ਕੀਤੀ ਤਾਂ ਸਬੰਧਿਤ ਕੋਠੀ ਅੰਦਰੋਂ ਗੈਰ ਸਮਾਜਿਕ ਕੰਮ ਕਰਨ ਵਾਲੇ ਅਨਸਰਾਂ ਨੇ ਤੁਰੰਤ ਆਪਣੇ ਗੁੰਡੇ ਭੇਜ ਕੇ ਕਾਮਰੇਡ ਸਿੱਧੂ ‘ਤੇ ਹਮਲਾ ਕਰਵਾਇਆ। ਕੈਮਰਾ ਵੀ ਖੋਹ ਲਿਆ ਅਤੇ ਕੁੱਟਮਾਰ ਵੀ ਕੀਤੀ। ਬਾਅਦ ਵਿਚ ਕੁਝ ਲੋਕਾਂ ਦੇ ਵਿੱਚ ਪੈਣ ਤੇ ਇਹਨਾਂ ਗੁੰਡਾ ਅਨਸਰਾਂ ਨੇ ਕੈਮਰਾ ਵੀ ਵਾਪਿਸ ਕਰ ਦਿੱਤਾ ਅਤੇ ਮੋਬਾਈਲ ਫੋਨ ਵੀ।  ਇਸਦੇ ਨਾਲ ਹੀ ਕਾਮਰੇਡ ਸਿੱਧੂ ਕੋਲੋਂ ਮਾਫੀ ਵੀ ਮੰਗ ਲਈ।  ਇਹ ਸਭ ਕੁਝ 27 ਮਾਰਚ 2018 ਨੂੰ ਵਾਪਰਿਆ। ਇਸ ਤੋਂ ਬਾਅਦ ਕਾਮਰੇਡ ਸਿੱਧੂ ਨੇ ਇਸ ਗੱਲ ਨੂੰ ਇਥੇ ਹੀ ਛੱਡ ਦਿੱਤਾ ਅਤੇ ਆਪਣੇ ਮਜ਼ਦੂਰ ਭਲਾਈ ਮਿਸ਼ਨ ਵਿੱਚ ਰੁਝ ਗਏ। 
ਘਟਨਾ ਤੋਂ ਕਈ ਦਿਨ ਬਾਅਦ 11 ਅਪਰੈਲ ਨੂੰ ਇਹਨਾਂ ਗੁੰਡਾ ਅਨਸਰਾਂ ਨੇ ਹੀ ਪੁਲਿਸ ਕੋਲ ਕਾਮਰੇਡ ਸਿੱਧੂ ਦੇ ਖਿਲਾਫ ਝੂਠੀ ਸ਼ਿਕਾਇਤ ਦੇ ਦਿੱਤੀ। ਇਸ ਗੱਲ ਦਾ ਪਤਾ ਲੱਗਣ ‘ਤੇ ਸਮੂਹ ਲੋਕ ਪੱਖੀ ਜੱਥੇਬੰਦੀਆਂ ਵਿੱਚ ਰੋਸ ਦੀ ਤਿੱਖੀ ਲਹਿਰ ਦੌੜ ਗਈ। ਕਰੀਬ ਦਸ-ਬਾਰਾਂ ਜੱਥੇਬੰਦੀਆਂ ਦੇ ਨੁਮਾਇੰਦੇ ਇਸ ਸਬੰਧੀ ਜਗਰਾਓਂ ਜਾ ਕੇ ਲੁਧਿਆਣਾ ਦੇਹਾਤ ਦੇ ਐਸ ਐਸ ਪੀ ਸੁਰਜੀਤ ਸਿੰਘ ਨੂੰ  ਮਿਲੇ ਜਿਹਨਾਂ ਨੇ ਪੂਰੀ ਗੱਲ ਬੜੇ ਧਿਆਨ ਨਾਲ ਸੁਣੀ। 
ਜ਼ਿਕਰਯੋਗ ਹੈ ਕਿ ਕਾਮਰੇਡ ਸਿੱਧੂ ਅਤੇ ਉਹਨਾਂ ਦੇ ਕੁਝ ਸਾਥੀ  ਦਿੱਲੀ ਦੇ ਇੱਕ ਮੀਡੀਆ ਅਦਾਰੇ ਲਈ ਵੀ ਕੰਮ ਕਰਦੇ ਹਨ। ਇਸ ਤਰਾਂ ਉਹ ਆਪਣੀਆਂ ਖਬਰਾਂ ਅਤੇ ਰਿਪੋਰਟਾਂ ਨਾਲ ਲੋਕ ਵਿਰੋਧੀ ਸਰਗਰਮੀਆਂ ਨਾਲ ਸਬੰਧਤ ਲੋਕਾਂ ਨੂੰ ਮੀਡੀਆ ਰਾਹੀਂ ਵੀ ਬੇਨਕਾਬ ਕਰਦੇ ਹਨ। 
ਇਸ ਮੌਕੇ ਐਡਵੋਕੇਟ ਕੁਲਦੀਪ ਸਿੰਘ, ਪਰਸਿੱਧ ਲੇਖਕ ਮਾਸਟਰ ਜਸਦੇਵ ਸਿੰਘ ਲਲਤੋਂ, ਫਿਰਕਾਪਰਸਤੀ ਖਿਲਾਫ ਡਟ ਕੇ ਲੋਹਾ ਲੈਣ ਵਾਲੇ ਉਜਾਗਰ ਸਿੰਘ ਬੱਦੋਵਾਲ, ਮਲਕੀਅਤ ਸਿੰਘ, ਸੁਖਦੇਵ ਸਿੰਘ, ਸੀਪੀਆਈ ਦੇ ਸਹਾਇਕ ਜ਼ਿਲਾ ਸਕੱਤਰ ਕਾਮਰੇਡ ਚਮਕੌਰ ਸਿੰਘ, ਜੋਗਿੰਦਰ ਸਿੰਘ, ਕੇਹਰ ਸਿੰਘ, ਸਮਾਲ ਸਕੇਲ ਇੰਡਸਟਰੀ ਦੇ ਨੁਮਾਇੰਦੇ ਕਾਮਰੇਡ ਗੁਰਵੰਤ ਸਿੰਘ, ਪੱਤਰਕਾਰ ਸੁਰਿੰਦਰ ਕੁਮਾਰ, ਰਾਜੇਸ਼, ਨੈਸ਼ਨਲਿਸਟ  ਕਾਂਗਰਸ ਪਾਰਟੀ (ਐਨ ਸੀ ਪੀ) ਵੱਲੋਂ ਰਵੀ ਸੋਈ, ਪੀਪਲਜ਼ ਮੀਡੀਆ ਲਿੰਕ ਵੱਲੋਂ ਰੈਕਟਰ ਕਥੂਰੀਆ ਅਤੇ ਕਈ ਹੋਰ ਸਰਗਰਮ ਕਾਰਕੁੰਨ ਮੌਜੂਦ ਸਨ। 
ਐਸ ਐਸ ਪੀ ਨੇ ਵਫਦ ਦੀ ਗੱਲ ਬੜੇ ਧਿਆਨ ਨਾਲ ਸੁਣੀ। ਉਹਨਾਂ ਇਸ ਸਬੰਧੀ ਇੱਕ ਉੱਚ ਅਧਿਕਾਰੀ ਦੀ ਡਿਊਟੀ ਵੀ ਲਗਾਈ। ਇਸਦੇ ਨਾਲ ਹੀ ਉਹਨਾਂ ਯਕੀਨ ਦੁਆਇਆ ਕਿ ਦੋਸ਼ੀਆਂ ਖਿਲਾਫ ਐਕਸ਼ਨ ਲਿਆ ਜਾਏਗਾ। ਹੁਣ ਦੇਖਣਾ ਹੈ ਕਿ ਇਸ ਘਟਨਾ ਦੇ ਦੋਸ਼ੀਆਂ ਖਿਲਾਫ ਕੀ ਐਕਸ਼ਨ ਲਿਆ ਜਾਂਦਾ ਹੈ। 

Friday, January 26, 2018

26 ਜਨਵਰੀ ਦੀ ਪਰੇਡ ਮੌਕੇ ਪੁਲਿਸ ਮੁਲਾਜ਼ਮ ਵੱਲੋਂ ਖ਼ੁਦਕੁਸ਼ੀ

ਜਗਰਾਓਂ ਵਿੱਚ ਵਾਪਰੀ ਘਟਨਾ-ਚਰਚਾ ਹੈ ਕਿ ਉਹ ਪ੍ਰੇਸ਼ਾਨ ਸੀ  
ਲੁਧਿਆਣਾ: 26 ਜਨਵਰੀ 2018: (ਪੰਜਾਬ ਸਕਰੀਨ ਬਿਊਰੋ)::
ਅੱਜ 26 ਜਨਵਰੀ ਦਾ ਦਿਨ। ਤਕਰੀਬਨ ਹਰ ਪਾਸੇ ਗਣਤੰਤਰ ਦਿਵਸ ਦੀਆਂ ਖੁਸ਼ੀਆਂ ਵਾਲੀ ਚਹਿਲ ਪਹਿਲ। ਥਾਂ ਥਾਂ ਲੱਡੂ ਵੰਡਣ ਦੀਆਂ ਰਸਮਾਂ। ਥਾਂ ਝੰਡੇ ਦੀਆਂ ਰਸਮਾਂ। ਪਰੇਡ ਅਤੇ ਝਾਕੀਆਂ ਨੂੰ ਦੇਖਦੇ ਲੋਕ, ਟੀਵੀ ਚੈਨਲਾਂ ਤੋਂ ਪਰੇਡ ਦੇਖਦੇ ਲੋਕ। ਅਚਾਨਕ ਹੀ ਇੱਕ ਪੁਲਿਸ ਮੁਲਾਜ਼ਮ ਰਿਪਬਲਿਕ ਦੇ ਦੀ ਪਰੇਡ ਵਿੱਚ ਖੁਦ ਨੂੰ ਗੋਲੀ ਮਾਰ ਲੈਂਦਾ ਹੈ। ਇਹ ਸਭ ਕੁਝ ਵਾਪਰਿਆ ਹੈ ਜਗਰਾਉਂ ਵਿੱਚ। ਜਗਰਾਓਂ ਵਿੱਚ ਸਿਪਾਹੀ ਮਨਜੀਤ ਰਾਮ ਨੇ ਖ਼ੁਦਕੁਸ਼ੀ ਕਰ ਲਈ। ਦੱਸਿਆ ਜਾ ਰਿਹਾ ਹੈ ਉਹ ਨਕੋਦਰ ਦਾ ਰਹਿਣ ਵਾਲਾ ਸੀ। ਅੱਜ ਸਵੇਰੇ ਜਦੋਂ ਜਗਰਾਉਂ ਦੇ ਸੀਨੀਅਰ ਸੈਕੇਂਡਰੀ ਸਕੂਲ ਵਿਖੇ ਗਣਤੰਤਰ ਦਿਵਸ ਦੇ ਸਮਾਗਮ ਚੱਲ ਰਹੇ ਸਨ ਉਦੋਂ ਉਸਨੇ ਆਪਣੀ ਜੀਵਨ ਲੀਲਾ ਸਮਾਪਤ ਕਰ ਲਈ। ਸਬ ਡਵੀਜ਼ਨ ਜਗਰਾਉਂ ਦੇ ਗਣਤੰਤਰ ਦਿਵਸ ਸਮਾਗਮ ਮੌਕੇ ਪੰਜਾਬ ਪੁਲਿਸ ਦੇ ਸਿਪਾਹੀ ਮਨਜੀਤ ਸਿੰਘ ਵੱਲੋਂ ਖੁਦ ਨੂੰ ਗੋਲੀ ਮਾਰ ਕੇ ਖੁਦਕੁਸ਼ੀ ਕਰਨ ਦੀ ਘਟਨਾ ਪਲਾਂ ਵਿੱਚ ਹੀ ਚੁਫੇਰੇ ਫੇਲ ਗਈ। ਮ੍ਰਿਤਕ ਸਿਪਾਹੀ ਸਿਟੀ ਜਗਰਾਉਂ ਪੁਲਿਸ ਥਾਣੇ ਦੇ ਮੁਖੀ ਦਾ ਗੰਨਮੈਨ ਸੀ। ਮਨਜੀਤ ਰਾਮ ਨਾਮ ਦੇ ਇਸ ਪੁਲਿਸ ਮੁਲਾਜ਼ਮ ਨੇ  ਗਣਤੰਤਰ ਦਿਵਸ ਦੀ ਹੋ ਰਹੀ ਪਰੇਡ ਮੌਕੇ ਸਮਾਗਮ ਨੇੜੇ ਖੜੀ ਪੁਲਿਸ ਦੀ ਗੱਡੀ 'ਚ ਜਾ ਕੇ ਖੁਦਕੁਸ਼ੀ ਕਰ ਲਈ। ਕਿਹਾ ਜਾ ਰਿਹਾ ਹੈ ਉਸਨੇ ਏ ਕੇ 47 ਨਾਲ ਖੁਦ ਨੂੰ ਗੋਲੀ ਮਾਰੀ। ਖੁਦਕੁਸ਼ੀ ਦੇ ਕਾਰਨਾਂ ਦਾ ਤੁਰੰਤ ਪਤਾ ਨਹੀਂ ਲੱਗ ਸਕਿਆ। ਕਿਹਾ ਜਾ ਰਿਹਾ ਹੈ ਕਿ ਉਹ ਕਈ ਦਿਨਾਂ ਤੋਂ ਪ੍ਰੇਸ਼ਾਨ ਸੀ। ਪ੍ਰੇਸ਼ਾਨੀ ਕਿਸ ਗੱਲ ਦੀ ਸੀ ਇਸਦਾ ਪਤਾ ਲਗਾਇਆ ਜਾ ਰਿਹਾ ਹੈ।

Saturday, April 29, 2017

ਨਸ਼ਾ ਤਸਕਰੀ ਦੇ ਮਾਮਲੇ ਵਿੱਚ ਫਸੇ ਤਾਂ ਨੰਬਰਦਾਰ ਨਹੀਂ ਦੇਣਗੇ ਜ਼ਮਾਨਤ

ਜ਼ਿਲ੍ਹਾ ਪੁਲਿਸ ਮੁਖੀ ਨੂੰ ਮੈਮੋਰੰਡਮ ਦੇ ਕੇ ਦਿੱਤਾ ਹਰ ਸਹਿਯੋਗ ਦਾ ਭਰੋਸਾ

ਜਗਰਾਉਂ: 28 ਅਪ੍ਰੈਲ 2017:(ਪੰਜਾਬ ਸਕਰੀਨ ਬਿਊਰੋ)::
ਜ਼ਿਲ੍ਹਾ ਪੁਲਿਸ ਲੁਧਿਆਣਾ (ਦਿਹਾਤੀ) ਵੱਲੋਂ ਨਸ਼ਿਆਂ ਖ਼ਿਲਾਫ਼ ਸ਼ੁਰੂ ਕੀਤੀ ਗਈ ਮੁਹਿੰਮ ਨੂੰ ਉਸ ਵੇਲੇ੍ਹ ਹੋਰ ਸਫ਼ਲਤਾ ਮਿਲੀ ਜਦੋਂ ਇਲਾਕੇ ਨਾਲ ਸੰਬੰਧਤ ਸਮੂਹ ਨੰਬਰਦਾਰ ਯੂਨੀਅਨ ਜਗਰਾਉਂ ਵੱਲੋਂ ਇਸ ਮੁਹਿੰਮ ਦਾ ਹਿੱਸਾ ਬਣਨ ਦਾ ਐਲਾਨ ਕਰਦਿਆਂ ਕਿਹਾ ਕਿ ਉਹ ਅਜਿਹੇ ਕਿਸੇ ਵੀ ਵਿਅਕਤੀ ਦੀ ਜ਼ਮਾਨਤ ਨਹੀਂ ਦੇਣਗੇ, ਜੋ ਨਸ਼ਿਆਂ ਦੇ ਮਾਮਲੇ ਵਿੱਚ ਕਾਨੂੰਨ ਦੀ ਗਿ੍ਰਫ਼ਤ ਵਿੱਚ ਆਵੇਗਾ। ਇਸ ਸੰਬੰਧੀ ਸਮੂਹ ਨੰਬਰਦਾਰ ਯੂਨੀਅਨ ਜਗਰਾਉ ਵੱਲੋਂ ਸ੍ਰੀ ਸੁਰਜੀਤ ਸਿੰਘ, ਐਸ.ਐਸ.ਪੀ, ਲੁਧਿਆਣਾ (ਦਿਹਾਤੀ) ਨੂੰ ਨਸ਼ਿਆਂ ਖ਼ਿਲਾਫ਼ ਵਿੱਢੀ ਮੁਹਿੰਮ ਸਬੰਧੀ ਪੁਲਿਸ ਵਿਭਾਗ ਨੂੰ ਸਾਥ ਦੇਣ ਲਈ ਯਕੀਨ ਦਿਵਾਉਦੇ ਹੋਏ ਇੱਕ ਮੈਮੋਰੰਡਮ ਪੇਸ਼ ਕੀਤਾ।
ਸ੍ਰ. ਪਰਮਿੰਦਰਜੀਤ ਸਿੰਘ ਚਾਹਲ, ਸ੍ਰ. ਬਲਵੰਤ ਸਿੰਘ ਅਤੇ ਯੂਨੀਅਨ ਦੇ ਹੋਰ ਮੈਂਬਰਾਂ ਨੇ ਕਿਹਾ ਕਿ ਨਸ਼ਾ ਸਮਾਜ ਲਈ ਇੱਕ ਚੈਲਿੰਜ ਅਤੇ ਗੰਭੀਰ ਸਮੱਸਿਆ ਦਾ ਵਿਸ਼ਾ ਬਣ ਚੁੱਕਾ ਹੈ।ਇਸ ਕਰਕੇ ਨੌਜਵਾਨਾਂ ਨੂੰ ਇਸ ਨਸ਼ੇ ਦੀ ਦਲਦਲ ਤੋਂ ਬਚਾਉਣ ਸਬੰਧੀ ਸਖ਼ਤ ਕਦਮ ਚੁੱਕਣ ਲਈ ਸਮੇਂ ਦੀ ਲੋੜ ਹੈ।ਯੂਨੀਅਨ ਪਹਿਲਾਂ ਹੀ ਨਸ਼ਿਆਂ ਦੇ ਮਾੜੇ ਪ੍ਰਭਾਵਾਂ ਬਾਰੇ ਜਾਗਰੂਕ ਕਰਨ ਲਈ ਸਮੇਂ-ਸਮੇਂ ’ਤੇ ਸੈਮੀਨਾਰਾਂ ਰਾਂਹੀ ਸੁਚੇਤ ਕਰਨ ਦਾ ਕੰਮ ਕਰ ਰਹੀ ਹੈ।ਯੂਨੀਅਨ ਨੇ ਇਹ ਵੀ ਯਕੀਨ ਦਿਵਾਇਆ ਕਿ ਉਹ ਨਸ਼ਾ ਤਸਕਰੀ ਵਿੱਚ ਸ਼ਾਮਿਲ ਕਿਸੇ ਵੀ ਵਿਆਕਤੀ ਦੀ ਮਦਦ ਨਹੀਂ ਕਰਨਗੇ।ਆਖਰ ਵਿੱਚ ਯੂਨੀਅਨ ਨੇ ਐਸ.ਐਸ.ਪੀ ਲੁਧਿਆਣਾ (ਦਿਹਾਤੀ) ਵੱਲੋਂ ਨਸ਼ਾ ਤਸਕਰਾਂ ਖ਼ਿਲਾਫ਼ ਵਿੱਢੀ ਮੁਹਿੰਮ ਅਤੇ ਨਸ਼ਾ ਤਸਕਰਾਂ ਨੰੂ ਗਿ੍ਰਫ਼ਤਾਰ ਕਰਕੇ ਜੇਲ੍ਹ ਵਿੱਚ ਬੰਦ ਕਰਨ ਦੀ ਸ਼ਲਾਘਾ ਕੀਤੀ।
ਇਸ ਤੋਂ ਇਲਾਵਾ ਨਸ਼ਾ ਤਸਕਰਾਂ ਖ਼ਿਲਾਫ਼ ਚਲਾਈ ਗਈ ਵਿਸ਼ੇਸ਼ ਮੁਹਿੰਮ ਦੇ ਉਸ ਸਮੇਂ ਸਾਰਥਿਕ ਨਤੀਜੇ ਸਾਹਮਣੇ ਆਏ, ਜਦੋਂ ਪੁਲਿਸ ਵੱਲੋਂ ਕੀਤੀ ਗਈ ਸਖ਼ਤੀ ਤੋਂ ਪ੍ਰਭਾਵਿਤ ਹੁੰਦੇ ਹੋਏ ਥਾਣਾ ਸਦਰ ਜਗਰਾਂਉ ਦੇ ਪਿੰਡ ਮਲਸੀਹਾਂ ਬਾਜਨ, ਕਮਾਲਪੁਰਾ ਅਤੇ ਥਾਣਾ ਸਿੱਧਵਾਂ ਬੇਟ ਦੇ ਪਿੰਡ ਕੁੱਲ ਗਹਿਣਾ ਦੇ ਨਸ਼ਾ ਵੇਚਣ ਦਾ ਧੰਦਾ ਕਰਨ ਵਾਲੇ ਵਿਅਕਤੀਆਂ ਨੇ ਪਿੰਡ ਦੀ ਪੰਚਾਇਤ ਦੀ ਹਾਜ਼ਰੀ ਵਿੱਚ ਤੌਬਾ ਕਰਦੇ ਹੋਏ ਹਲਫੀਆ ਬਿਆਨ ਪੇਸ਼ ਕੀਤੇ ਕਿ ਉਹ ਅੱਗੇ ਤੋਂ ਕਿਸੇ ਵੀ ਤਰ੍ਹਾਂ ਦਾ ਨਸ਼ਾ ਵੇਚਣ ਦਾ ਧੰਦਾ ਨਹੀਂ ਕਰਨਗੇ।
ਇਸ ਮੌਕੇ ਸ੍ਰ. ਸੁਰਜੀਤ ਸਿੰਘ ਨੇ ਸਮੂਹ ਸੰਸਥਾਵਾਂ, ਜਥੇਬੰਦੀਆਂ ਅਤੇ ਆਮ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਨਸ਼ਿਆਂ ਖ਼ਿਲਾਫ਼ ਸ਼ੁਰੂ ਕੀਤੀ ਮੁਹਿੰਮ ਦਾ ਹਿੱਸਾ ਬਣਨ ਅਤੇ ਲੁਧਿਆਣਾ (ਦਿਹਾਤੀ) ਪੁਲਿਸ ਦੀ ਸਹਾਇਤਾ ਕਰਨ।
  

Wednesday, September 21, 2016

ਮੈਨੂੰ ਲੱਗਦਾ-ਪੀਏਯੂ ਮੈਨੂੰ ਵਾਜਾਂ ਮਾਰਦੀ ਹੈ-ਅਨੀਤਾ ਗੋਇਲ

ਜਦੋਂ ਉਹ ਪੀਏਯੂ ਪੁੱਜੀ ਉਸ ਦਿਨ ਸ਼ੁਰੂ ਹੋਇਆ ਸਫਲਤਾ ਦਾ ਨਵਾਂ ਸਿਲਸਿਲਾ 
ਲੁਧਿਆਣਾ: 20 ਸਤੰਬਰ 2016: (ਰੈਕਟਰ ਕਥੂਰੀਆ//ਪੰਜਾਬ ਸਕਰੀਨ):
ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਨੇ ਜਿਹਨਾਂ ਲੋਕਾਂ ਨੂੰ ਕਾਰੋਬਾਰੀ ਨਿਪੁੰਨਤਾ ਦੇ ਕੇ ਸਫਲਤਾ ਦੀ ਰਾਹ ਦਿਖਾਈ ਉਹਨਾਂ ਵਿੱਚ ਔਰਤਾਂ ਦੀ ਗਿਣਤੀ ਸ਼ਾਇਦ ਕਾਫੀ ਜ਼ਿਆਦਾ ਹੈ। ਚੁੱਪਚਾਪ ਮਗਨ ਰਹਿ ਕੇ ਔਰਤਾਂ ਦੇ ਸਸ਼ਕਤੀਕਰਨ ਲਈ ਕੰਮ ਕਰ ਰਹੀ ਪੀਏਯੂ ਨੇ ਨਾਂ ਤਾਂ ਖੁਦ ਕੋਈ ਪ੍ਰਚਾਰ ਮੁਹਿੰਮ ਚਲਾਈ  ਅਤੇ ਨਾ ਹੀ ਮੇਨ ਸਟਰੀਮ ਮੀਡੀਆ ਨੇ ਇਸ ਹਾਂ ਪੱਖੀ ਵਰਤਾਰੇ ਨੂੰ ਲੋਕਾਂ ਸਾਹਮਣੇ ਲਿਆਉਣ ਵਿੱਚ ਕੋਈ ਠੋਸ ਕਦਮ ਪੁੱਟਿਆ। ਇਹਨਾਂ ਨਿੱਕੇ ਨਿੱਕੇ ਉੱਦਮੀਆਂ ਕੋਲ ਏਨਾ ਵੱਡਾ ਬੱਜਟ ਨਹੀਂ ਹੁੰਦਾ ਕਿ ਵੱਡੇ ਪੂੰਜੀਪਤੀਆਂ ਜਾਂ ਸਨਅਤੀ ਘਰਾਣਿਆਂ ਵਾਂਗ ਲੰਮੇ ਚੋੜੇ ਇਸ਼ਤਿਹਾਰਾਂ ਦਾ ਖਰਚਾ ਉਠਾ ਸਕਣ। ਇਸ ਕਮਜ਼ੋਰੀ ਕਾਰਨ ਇਹ  ਲੋਕ ਅਕਸਰ ਮੀਡੀਆ ਦੀ ਮੇਹਰ ਵਾਲੀ ਨਜ਼ਰ ਤੋਂ ਲਾਂਭੇ ਕਰ ਦਿੱਤੇ ਜਾਂਦੇ।  ਇਹਨਾਂ ਦੀ ਸਫਲਤਾ ਇੱਕ ਸੀਮਿਤ ਜਹੇ ਦਾਇਰੇ ਤੱਕ ਲੁਕੀ ਰਹੀ ਜਾਂਦੀ। 
ਅਜਿਹੇ ਲੋਕਾਂ ਵਿੱਚੋਂ ਹੀ ਇੱਕ ਹੈ ਜਗਰਾਓਂ ਦੀ ਅਨੀਤਾ ਗੋਇਲ।  ਅਨੀਤਾ ਗੋਇਲ ਅਤੇ ਉਹਨਾਂ ਦੇ ਪਰਿਵਾਰ ਨਾਲ ਪਹਿਲੀ ਵਾਰ ਮੇਰੀ ਮੁਲਾਕਾਤ ਲੁਧਿਆਣਾ ਦੇ ਟਰੇਡ ਸੈਂਟਰ ਵਿੱਚ ਸਾਲ ਕੁ  ਪਹਿਲਾਂ ਹੋਈ। ਉੱਥੇ ਬਹੁਤ ਹੀ ਚੁਣੇ ਗਏ ਲੋਕ ਬੁਲਾਏ ਗਏ ਸਨ। ਸ਼ਾਇਦ ਇਹ ਉਪਰਾਲਾ ਖੇਤੀ ਵਿਰਾਸਤ ਮਿਸ਼ਨ ਵਾਲੇ ਕਾਮਰੇਡ ਗੁਰਵੰਤ ਸਿੰਘ ਅਤੇ ਉਹਨਾਂ ਦੀ ਟੀਮ ਨੇ ਕੀਤਾ ਸੀ। ਭੀੜ ਕਾਫੀ ਸੀ। ਉੱਥੇ ਅਨੀਤਾ ਗੋਇਲ ਨੇ ਸਭਨਾਂ ਨੂੰ ਆਪਣੀ ਸਪੈਸ਼ਲ ਆਈਟਮ ਛੋਲਿਆਂ ਦੀ ਸਬਜ਼ੀ ਅਤੇ  ਕੁਲਚੇ ਖੁਆਏ। ਇਹਨਾਂ ਵਿੱਚ ਨਾ ਤਾਂ ਘਿਓ ਪਾਇਆ ਗਿਆ ਸੀ ਅਤੇ ਨਾ ਹੀ ਕੋਈ ਤੇਲ ਜਾਂ ਰਿਫਾਈਂਡ।  ਪਿਆਜ਼ ਜਾਂ ਲੱਸਣ ਵੀ ਇਹਨਾਂ ਵਿੱਚ ਬਿਲਕੁਲ ਨਹੀਂ ਸਨ।ਸੁਆਦ ਬਹੁਤ ਜ਼ਿਆਦਾ ਕਿ ਛੇਤੀ ਹੀ  ਹਲਵਾਈਆਂ ਵਾਲਾ  ਵੱਡਾ ਸਾਰਾ ਪਤੀਲਾ ਖਾਲੀ ਹੋ ਗਿਆ। ਦੋ ਪਲੇਟਾਂ ਭਰ ਕੇ ਵੀ ਖਾ ਲਓ ਤਾਂ ਵੀ ਕੋਈ ਬੋਝ ਮਹਿਸੂਸ ਨਹੀਂ ਹੁੰਦਾ। ਇਹ ਹਲਕਾਪਨ ਇਹਨਾਂ ਵਿੱਚ ਪਾਏ ਮਸਲਿਆਂ ਕਾਰਨ ਸੰਭਵ ਹੁੰਦਾ ਹੈ। ਉਹ ਮਸਾਲੇ ਵੀ ਅਨੀਤਾ ਗੋਇਲ ਖੁਦ ਬਣਾਉਂਦੀ ਹੈ। ਅਨੀਤਾ ਗੋਇਲ ਦੇ ਪਤੀ ਵਕੀਲ ਹਨ ਅਤੇ ਸਾਰਾ ਪਰਿਵਾਰ ਪੂਰੀ ਤਰਾਂ ਸੈਟ ਹੈ ਪਰ ਮਹਿਲਾ ਵਰਗ ਨੂੰ ਅਤੇ ਮਹਿਲਾਵਾਂ ਵਿੱਚ ਲੁਕੀ ਪ੍ਰਤਿਭਾ ਨੂੰ  ਸਾਹਮਣੇ ਲਿਆਉਣ ਲਈ ਅਨੀਤਾ ਖੁਦ ਇਸ ਖੇਤਰ ਵਿੱਚ ਸਾਹਮਣੇ ਆਈ। 
ਛੇਤੀ ਹੀ ਇੱਕ ਹੋਰ ਪ੍ਰੋਗਰਾਮ ਆਇਆ ਜਿਸ ਵਿੱਚ ਖੇਤੀ ਦੇ ਖੇਤਰ ਵਿੱਚ ਜਾਗ੍ਰਤੀ ਲਿਆ ਰਹੇ ਉਮੇਂਦਰ ਦੱਤ, ਡਾਕਟਰ ਨੀਲਮ ਸੋਢੀ ਅਤੇ ਬੇਲਣ ਬ੍ਰਿਗੇਡ ਵਾਲੀ ਅਨੀਤਾ ਸ਼ਰਮਾ ਸਮੇਤ ਕਈ ਪ੍ਰਮੁੱਖ ਸ਼ਖਸੀਅਤਾਂ ਮੌਜੂਦ ਸਨ। ਤੜਕਸਾਰ ਮੂੰਹ ਹਨੇਰੇ ਸ਼ੁਰੂ ਹੋਈ ਆਰਗੈਨਿਕ ਖੇਤੀ ਦੀ ਟਰੇਨਿੰਗ ਨੇ ਸਾਰਿਆਂ ਨੂੰ ਬੁਰੀ ਤਰਾਂ ਥਕਾ ਦਿੱਤਾ ਸੀ। ਦਿਨਚੜ੍ਹ ਆਇਆ ਤੇ ਸੂਰਜ ਦੇਵਤਾ ਨੇ ਦਰਸ਼ਨ ਵੀ ਦੇ ਦਿੱਤੇ।  ਸਾਰੇ ਘਰੋ ਘਰੀਂ ਤੁਰਨ ਲੱਗੇ ਤਾਂ ਉੱਥੇ ਮੌਜੂਦ ਅਨੀਤਾ ਗੋਇਲ ਨੇ ਫਿਰ ਸਾਰੀਆਂ ਨੂੰ ਰੋਕ ਲਿਆ। ਉੱਥੇ ਵੀ ਕੁਲਚੇ ਅਤੇ ਛੋਲੇ ਮੌਜੂਦ ਸਨ। ਫਰਕ ਸਿਰਫ ਏਨਾ ਸੀ ਕਿ ਇਹ ਅੱਧੀ ਰਾਤ ਨੂੰ ਬਣਾਏ ਹੋਣ ਕਾਰਨ ਹੁਣ ਤੱਕ ਪੂਰੀ ਤਰਾਂ ਠੰਡੇ ਹੋ ਗਏ ਸਨ। ਇਸਦੇ ਬਾਵਜੂਦ ਇਹਨਾਂ ਦੇ ਸੁਆਦ ਵਿੱਚ ਇੱਕ ਨਵਾਂ ਜ਼ਾਇਕਾ ਸੀ। 
ਅਨੀਤਾ ਗੋਇਲ ਵੱਲੋਂ ਬਣਾਈ ਪਿੰਨੀ ਅਤੇ ਹੋਰ ਬਹੁਤ ਸਾਰੀਆਂ ਆਈਟਮਾਂ ਵੀ ਹੁਣ ਹਰਮਨ ਪਿਆਰੀਆਂ ਹੋ ਰਹੀਆਂ ਹਨ। ਇੱਕ ਦਿਨ ਇੱਕ ਕਿਸਾਨ ਮੇਲੇ ਤੇ ਮੁਲਾਕਾਤ ਹੋਈ ਤਾਂ ਇਸ ਕਾਰੋਬਾਰ ਬਾਰੇ ਗੱਲਾਂ ਚੱਲੀਆਂ।  ਅਨੀਤਾ ਨੇ ਦੱਸਿਆ ਇਹ ਸਭ ਪੀਏਯੂ ਦੀ ਬਦੌਲਤ ਹੋਇਆ। ਉਹ ਜਦੋਂ ਲੁਧਿਆਣਾ ਦੀ ਫਿਰੋਜ਼ਪੁਰ ਰੋਡ ਤੋਂ ਲੰਘਦੀ ਤਾਂ ਉਸਨੂੰ ਮਹਿਸੂਸ ਹੁੰਦਾ ਕਿ ਪੀਏਯੂ ਉਸ ਨੂੰ ਬੁਲਾ ਰਹੀ ਹੈ। ਇਹ ਅਵਾਜ਼ਾਂ ਬਾਈ ਬਾਰ ਆਉਣ ਲੱਗੀਆਂ ਤਾਂ ਇੱਕ ਦਿਨ ਉਹ ਪੀਏਯੂ ਜਾ ਪੁੱਜੀ ਜਿੱਥੇ ਡਾਕਟਰ ਕਿਰਨਜੋਤ ਕੌਰ ਨਾਲ ਮੁਲਾਕਾਤ ਹੋਈ।  ਇਥੋਂ ਹੀ ਸ਼ੁਰੂ ਹੋਇਆ ਅਨੀਤਾ ਗੋਇਲ ਦੀ ਸਫਲ ਕਾਰੋਬਾਰੀ ਜ਼ਿੰਦਗੀ ਦਾ ਸਿਲਸਿਲਾ।
ਜੇ ਤੁਸੀਂ ਮਿਲਣਾ ਚਾਹੋਂ ਤਾਂ ਬਸ ਉਡੀਕ ਰੱਖੋ ਤੁਹਾਡੀ ਮੁਲਾਕਾਤ ਕਿਸੇ ਵੀ ਕਿਸਾਨ ਮੇਲੇ ਜਾਂ ਕਿਸੇ ਹੋਰ ਅਜਿਹੀ ਹੀ ਇਕੱਤਰਤਾ ਮੌਕੇ ਹੋ ਸਕਦੀ ਹੈ। 

Friday, August 12, 2016

ਸਿਰਦਾਰ ਕਪੂਰ ਸਿੰਘ ਹੁਰਾਂ ਦੀ ਬਰਸੀ ਮੌਕੇ ਸੈਮੀਨਾਰ 13 ਅਗਸਤ ਨੂੰ

Fri, Aug 12, 2016 at 4:52 PM
ਵਿਚਾਰ ਗੋਸ਼ਟੀ ਗੁਰਦਵਾਰਾ ਸ੍ਰੀ ਗੁਰੂ ਸਿੰਘ ਸਭਾ ਸਰਾਭਾ ਨਗਰ ਲੁਧਿਆਣਾ 'ਚ 
ਲੁਧਿਆਣਾ: 12 ਅਗਸਤ 2016: (ਪੰਜਾਬ ਸਕਰੀਨ ਬਿਊਰੋ):
ਸਿਆਸੀ ਅਤੇ ਮਜ਼ਹਬੀ ਵਿਰੋਧਾਂ ਦੇ ਬਾਵਜੂਦ ਸਿਰਦਾਰ ਕਪੂਰ ਸਿੰਘ ਦੀ ਸ਼ਖ਼ਸੀਅਤ ਦਾ ਕੱਦ ਹਮੇਸ਼ਾਂ ਉੱਚਾ ਰਿਹਾ। ਉਹਨਾਂ ਦੀਆਂ ਦਲੀਲਾਂ ਅਤੇ ਸਰਗਰਮੀਆਂ ਅਕਸਰ ਚਰਚਾ ਵਿੱਚ ਰਹੀਆਂ। ਉਹਨਾਂ ਦੀਆਂ ਲਿਖਤਾਂ ਨੇ ਜਲੇਬੀ ਵਰਗੇ ਸਿਆਸੀ ਆਗੂਆਂ ਨੂੰ ਵੀ ਲਾਜਵਾਬ ਕਰਕੇ ਚੱਕਰ ਵਿਚ ਪਾਈ ਰੱਖਿਆ। 
ਸਿਰਦਾਰ ਕਪੂਰ ਸਿੰਘ ਆਈ. ਸੀ. ਐਸ 2 ਮਾਰਚ 1909 ਨੂੰ ਇਸ ਦੁਨੀਆ ਵਿਚ ਆਏ ਅਤੇ 13 ਅਗਸਤ, 1986 ਨੂੰ ਰੁਖਸਤ ਹੋ ਗਏ। ਸਿੱਖ ਜਗਤ ਵਿੱਚ ਉਹ ਇੱਕ ਪ੍ਰਸਿੱਧ ਵਿਦਵਾਨ, ਯੋਗ ਪ੍ਰਸ਼ਾਸਕ ਤੇ ਸਰਗਰਮ ਸੰਸਦ ਮੈਂਬਰ ਸਨ। ਇਸ ਮਹਾਨ ਬੁੱਧੀਜੀਵੀ ਦਾ ਜਨਮ ਜਗਰਾਉਂ ਜਿਲ੍ਹਾ ਲੁਧਿਆਣਾ ਦੇ ਇੱਕ ਨੇੜਲੇ ਪਿੰਡ ਸਿਰਦਾਰ ਦੀਦਾਰ ਸਿੰਘ ਧਾਲੀਵਾਲ ਦੇ ਘਰ ਮਾਤਾ ਹਰਨਾਮ ਕੌਰ ਦੀ ਕੁੱਖ ਤੋਂ ਹੋਇਆ। ਥੋੜ੍ਹੇ ਸਮੇਂ ਤੋਂ ਪਿੱਛੋਂ ਇਹ ਪਰਿਵਾਰ ਪੱਛਮੀ ਪੰਜਾਬ ਦੇ ਜ਼ਿਲ੍ਹਾ ਲਾਇਲਪੁਰ ਦੇ ਚੱਕ ਨੰ: 531 ਵਿੱਚ ਜਾ ਵਸਿਆ।
ਸਿਰਦਾਰ ਕਪੂਰ ਸਿੰਘ ਨੇ ਦਸਵੀਂ ਤੱਕ ਦੀ ਵਿੱਦਿਆ ਲਾਇਲਪੁਰ ਦੇ ਖਾਲਸਾ ਹਾਈ ਸਕੂਲ ਤੋਂ ਪ੍ਰਾਪਤ ਕੀਤੀ। ਉਚੇਰੀ ਵਿੱਦਿਆ ਲਈ ਆਪ ਲਾਹੌਰ ਗਏ। ਆਪ ਨੇ ਆਈ. ਸੀ. ਐਸ ਦੀ ਪ੍ਰੀਖਿਆ ਪਾਸ ਕੀਤੇ ਅਤੇ ਪ੍ਰਸ਼ਾਸਨਿਕ ਅਧਿਕਾਰੀ ਨਿਯੁਕਤ ਹੋਏ।
ਦੇਸ਼ ਦੀ ਆਜ਼ਾਦੀ ਪਿੱਛੋਂ ਹਿੰਦੁਸਤਾਨ ਦੀ ਸਰਕਾਰ ਵੱਲੋਂ ਸਿੱਖਾਂ ਪ੍ਰਤੀ ਪੱਖਪਾਤੀ ਰਵੱਈਏ ਤੋਂ ਆਪ ਹਮੇਸ਼ਾ ਚਿੰਤਤ ਰਹਿੰਦੇ ਸਨ। ਪੰਜਾਬ ਦੇ ਗਵਰਨਰ ਨੇ 10 ਅਕਤੂਬਰ 1947 ਨੂੰ ਇੱਕ ਗਸ਼ਤੀ ਚਿੱਠੀ ਸਾਰੇ ਡਿਪਟੀ ਕਮਿਸ਼ਨਰਾਂ ਨੂੰ ਜਾਰੀ ਕੀਤੀ ਗਈ, ਜਿਸ ਵਿੱਚ ਸਿੱਖਾਂ ਨੂੰ ਮੁਜਰਮਾਨਾ ਬਿਰਤੀ ਦੇ ਆਖ ਕੇ ਇਨ੍ਹਾਂ ਦੀਆਂ ਸਰਗਰਮੀਆਂ ਦਾ ਧਿਆਨ ਰੱਖਣ ਲਈ ਕਿਹਾ ਗਿਆ। ਇਸ ਪੱਤਰ ਨੇ ਸਿਰਦਾਰ ਕਪੂਰ ਸਿੰਘ ਜੋ ਉਸ ਸਮੇ ਡਿਪਟੀ ਕਮਿਸ਼ਨਰ ਨਿਯੁਕਤ ਸਨ ਦੇ ਹਿਰਦੇ 'ਤੇ ਡੂੰਘੀ ਸੱਟ ਮਾਰੀ। ਆਪ ਨੇ ਇਸ ਪੱਤਰ ਦੇ ਉੱਤਰ ਵਜੋਂ ਭਾਰਤ ਸਰਕਾਰ ਪ੍ਰਤੀ ਸਖਤ ਰੋਸ ਦਾ ਪ੍ਰਗਟਾਵਾ ਕੀਤਾ ਗਿਆ। ਇਸ ਦੇ ਸਿੱਟੇ ਵਜੋਂ ਸਿਰਦਾਰ ਕਪੂਰ ਸਿੰਘ ਉੱਪਰ ਮੁਕੱਦਮਾ ਚਲਾਇਆ ਗਿਆ। ਇਸ ਤੋਂ ਪਿੱਛੋਂ ਨੌਕਰੀ ਤੋਂ ਬਰਖਾਸਤ ਕਰ ਦਿੱਤਾ ਗਿਆ।
ਸਿਰਦਾਰ ਕਪੂਰ ਸਿੰਘ ਨੇ ਲੇਖਕ ਵਜੋਂ 1952 ਈ: ਵਿੱਚ ਬਹੁ ਵਿਸਥਾਰ ਅਤੇ ਪੁੰਦਰੀਕ ਨਾਂਅ ਦੇ ਲੇਖ ਸੰਗ੍ਰਹਿ ਪ੍ਰਕਾਸ਼ਿਤ ਕੀਤੇ। 'ਸਪਤ ਸ੍ਰਿੰਗ' ਪੁਸਤਕ ਵਿੱਚ ਉਨ੍ਹਾਂ ਵੱਲੋਂ ਸੱਤ ਉੱਚ-ਹਸਤੀਆਂ ਦੀਆਂ ਜੀਵਨੀਆਂ ਬਾਰੇ ਕਿਤਾਬ ਪਾਠਕਾਂ ਦੇ ਸਨਮੁਖ ਪੇਸ਼ ਕੀਤੀਆਂ ਗਈਆਂ। ਅੰਗਰੇਜ਼ੀ ਪੁਸਤਕ [ਪਰਾਸਰ ਪ੍ਰਸ਼ਨਾ-ਵੈਸਾਖੀ ਆਫ ਗੁਰੂ ਗੋਬਿੰਦ ਸਿੰਘ]] ਸਿੱਖ ਫਿਲਾਸਫੀ ਦੀ ਇੱਕ ਸ਼ਾਹਕਾਰ ਰਚਨਾ ਹੈ। ਅੰਗਰੇਜ਼ੀ ਦੀਆਂ ਤਿੰਨ ਪੁਸਤਕਾਂ ਉਨ੍ਹਾਂ ਦੇ ਅਕਾਲ ਚਲਾਣੇ ਤੋਂ ਪਿੱਛੋਂ ਛਪੀਆਂ। ਇਹ ਮਹਾਨ ਸ਼ਖ਼ਸੀਅਤ 13 ਅਗਸਤ, 1986 ਈ: ਨੂੰ ਜਗਰਾਉਂ (ਲੁਧਿਆਣਾ) ਵਿਖੇ ਸਦੀਵੀ ਵਿਛੋੜਾ ਦੇ ਗਏ।
ਉਹਨਾਂ ਦੇ ਤੁਰ ਜਾਣ ਮਗਰੋਂ ਵੀ ਉਹਨਾਂ ਦੀ ਚਰਚਾ ਜਾਰੀ ਹੈ। ਡੇਲੀ ਸਿੱਖ ਨਿਊਜ਼ ਵਰਲਡ ਸਿੱਖ ਫੈਡਰੇਸ਼ਨ ਵਿੱਚ ਉੱਘੇ ਪੱਤਰਕਾਰ ਜਸਪਾਲ ਸਿੰਘ ਹੇਰਾਂ ਨੇ ਲਿਖਿਆ:-
ਬੱਕਰੇ ਬਥੇਰੀਆਂ ਕੁਰਬਾਨੀਆਂ ਦਿੰਦੇ ਹਨ, ਕਦੇ ਬਕਰਿਸਤਾਨ ਵੀ ਬਣਿਆ ਸੁਣਿਆ ਹੈ?”

ਅਕਾਲੀਆਂ ਵੱਲੋਂ ਸਿੱਖਾਂ ਨੂੰ ਫੋਕੇ ਨਾਅਰਿਆਂ ਵਿੱਚ ਉਲਝਾ ਕੇ ਅਤੇ ਲੱਖਾਂ ਦੀ ਤਾਦਾਦ ਵਿੱਚ ਮੁੜ-ਮੁੜ ਕੈਦ ਕਰਵਾਈ ਅਤੇ ਮਰਵਾਈ ਜਾਣ ਨੂੰ ਸਰਦਾਰ ਸਾਹਿਬ ਅਕਲਮੰਦ ਸਿਆਸਤ ਨਹੀਂ ਮੰਨਦੇ ਸਨ। ਉਨ੍ਹਾਂ ਦਾ ਕਹਿਣਾ ਸੀ ਕਿ ”ਸਪਸ਼ੱਟ ਮਨੋਰਥਾਂ ਨੂੰ ਸਾਹਮਣੇ ਰੱਖ ਕੇ ਹੀ ਕੋਈ ਲੜਾਈ ਲੜੀ ਜਾਣੀ ਯੋਗ ਹੁੰਦੀ ਹੈ। ਉਹ ਵਿਅੰਗ ਨਾਵ ਕਹਿ ਛੱਡਦੇ ਹੁੰਦੇ ਸਨ ਕਿ ਬੱਕਰੇ ਬਥੇਰੀਆਂ ਕੁਰਬਾਨੀਆਂ ਦਿੰਦੇ ਹਨ, ਕਦੇ ਬਕਰਿਸਤਾਨ ਵੀ ਬਣਿਆ ਸੁਣਿਆ ਹੈ?”

ਜਿਤਨਾ ਨੁਕਸਾਨ ਇੰਨਾਂ ਅਕਾਲੀ ਲੀਡਰਾਂ ਨੇ ਸਿੱਖੀ ਦਾ ਕੀਤਾ ਕਿਸੇ ਨੇ ਨਹੀਂ ਕੀਤਾ 
ਮੈਂ ਇਨ੍ਹਾਂ ਅਕਾਲੀ ਲੀਡਰਾਂ ਵਿੱਚ ਜ਼ਿੰਦਗੀ ਦੇ ਚਾਲੀ ਸਾਲ ਗੁਜਾਰੇ ਹਨ। ਇਹ ਥੋੜ੍ਹਾ ਸਮਾਂ ਨਹੀਂ, ਮੇਰਾ ਇਹ ਨਿਚੋੜ ਹੈ ਕਿ ਉਤਨਾ ਨੁਕਸਾਨ ਸਿੱਖੀ ਦਾ ਦੁਸ਼ਮਣ ਨਹੀਂ ਕਰਾ ਸਕੇ ਜਿਤਨਾ ਨੁਕਸਾਨ ਇੰਨਾਂ ਅਕਾਲੀ ਲੀਡਰਾਂ ਨੇ ਸਿੱਖੀ ਦਾ ਕੀਤਾ ਹੈ
ਸੰਤ ਭਿੰਡਰਾਂਵਾਲਿਆਂ ਦੀ ਹੋਣੀ ਬਾਰੇ ਭਵਿੱਖਬਾਣੀ 
ਸੰਤ ਜਰਨੈਲ ਸਿੰਘ ਖਾਲਸਾ ਭਿੰਡਰਾਂਵਾਲਿਆਂ ਦੀ ਚੜਾਈ ਦੇ ਦਿਨਾਂ ਵਿੱਚ ਸਰਦਾਰ ਸਾਹਿਬ ਸਾਨੂੰ ਇਹੋ ਹੀ ਕਹਿੰਦੇ ਕਿ ”ਮੁੰਡਿਓ ਤੁਸੀਂ ਐਵੇਂ ਉਮੀਦਾਂ ਲਾਈ ਫਿਰਦੇ ਹੋ ਇਨ੍ਹਾਂ ਲੀਡਰਾਂ ਨੇ ਉਸ (ਭਿੰਡਰਾਂਵਾਲੇ) ਨੂੰ ਸਰਕਾਰ ਨਾਲ ਮਿਲ ਕੇ ਮਰਵਾ ਦੇਣਾ ਹੈ, ਉਹ ਤਾਂ ਇਕੱਲਾ ਹੀ ਹੈ।” ਭਵਿੱਖ ਬਾਣੀ ਉਨ੍ਹਾਂ ਦੀ ਬਿਲਕੁਲ ਠੀਕ ਸਾਬਤ ਹੋਈ।
ਤੁਸੀਂ ਸਾਰੇ ਫਾਹਾ ਲੈ ਲਉ
ਜਦੋਂ ਸਾਕਾ ਨੀਲਾ ਤਾਰਾ ਤੋਂ ਬਾਅਦ ਕੁਝ ਅਕਾਲੀ ਲੀਡਰ ਸਰਦਾਰ ਸਾਹਿਬ ਨੂੰ ਮਿਲਣ ਇਨ੍ਹਾਂ ਦੇ ਪਿੰਡ ਜਗਰਾਉ ਗਏ ਅਤੇ ਪੁੱਛਣ ਲੱਗੇ ਕਿ ਹੁਣ ਕੀ ਕਰੀਏ ਤਾਂ ਉਨ੍ਹਾਂ ਨੇ ਜੇਬ ਵਿੱਚੋਂ 100 ਰੁਪਏ ਦਾ ਨੋਟ ਕੱਢ ਕੇ ਕਿਹਾ ਕਿ ਆਹ ਪੈਸੇ ਲੈ ਜਾਓ ਅਤੇ ਬਜ਼ਾਰ ਵਿੱਚੋਂ ਰੱਸਾ ਲੈ ਆਓ ਅਤੇ ਇਸ ਦਰੱਖਤ ਨਾਲ ਲਟਕ ਕੇ ਤੁਸੀਂ ਸਾਰੇ ਫਾਹਾ ਲੈ ਲਉ, ਬਾਅਦ ਵਿੱਚ ਪੰਥ ਦਾ ਆਪੇ ਕੁਝ ਬਣ ਜਾਵੇਗਾ।
ਅਕਾਲੀ ਲੀਡਰਾਂ ਦੇ ਕਿਰਦਾਰ ਬਾਰੇ ਟਿੱਪਣੀ
ਅਕਾਲੀ ਲੀਡਰਾਂ ਦੇ ਕਿਰਦਾਰ ਤੇ ਟਿੱਪਣੀ ਕਰਦੇ ਹੋਏ ਅਕਸਰ ਸਰਦਾਰ ਸਾਹਿਬ ਕਹਿੰਦੇ ਸਨ ”ਇਨ੍ਹਾਂ ਹਰਾਮਜਾਏ ਗਧੇ ਲੀਡਰਾਂ ਨੇ ਤਾਂ ਪੰਥ ਨੂੰ ਖੂਹ ਵਿੱਚ ਸੁੱਟ ਕੇ ਮਾਰਨੋਂ ਕੋਈ ਕਸਰ ਨਹੀਂ ਛੱਡੀ ਪਰ ਗੁਰੂ ਕਲਗੀਆਂ ਵਾਲਾ ਆਪ, ਬਹੁੜੀ ਕਰਕੇ ਪੰਥ ਨੂੰ ਬਚਾਏਗਾ।”
ਲਾਲਾ ਜਗਤ ਨਰਾਇਣ ਬਾਰੇ ਟਿੱਪਣੀ
ਲਾਲਾ ਜਗਤ ਨਰਾਇਣ ਦੀ ਮੌਤ ਤੇ ਟਿੱਪਣੀ ਕਰਦੇ ਹੋਏ ਸਿਰਦਾਰ ਸਾਹਿਬ ਨੇ ਕਿਹਾ ਸੀ ”ਬੜਾ ਲੋਹੜਾ ਹੋਇਆ ਹੈ, ਇੰਜ ਨਹੀਂ ਸੀ ਹੋਣਾ ਚਾਹੀਦਾ। ਸਿੱਖ ਤਾਂ ਇਸ ਬੰਦੇ ਦੇ ਦੇਣਦਾਰ ਹਨ, ਜਿਸ ਨੇ ਸਿੱਖਾਂ ਨੂੰ ਜਗਾਇਆ ਹੈ।” ਇਕ-ਦੋ ਵਾਰ ਉਨ੍ਹਾਂ ਨੇ ਬਹੁਤ ਮਾੜਾ ਹੋਇਆ, ਬੇਹੱਦ ਮਾੜਾ ਹੋਇਆ ਲਫਜ਼ ਦੁਹਰਾਏ।
ਸੇਖੋਂ ਨੇ ਸਿੱਖ ਵਿਦਿਆਰਥੀਆਂ ਨੂੰ ਇਨਕਲਾਬ ਦੀ ਇੱਲਤ ਲਾ ਕੇ ਮੁਜਰਮਾਨਾ ਕਹਿਰ ਕਮਾਇਆ
ਸਰਦਾਰ ਸਾਹਿਬ ਦਾ ਕਹਿਣਾ ਸੀ, ”ਸੇਖੋਂ ਇਕ ਜ਼ਹੀਮ ਆਦਮੀ ਹੈ ਅਤੇ ਸਿੱਖਾਂ ਦਾ ਸਭ ਤੋਂ ਵੱਧ ਨੁਕਸਾਨ ਇਸ ਕੱਲੇ ਬੰਦੇ ਨੇ ਕੀਤਾ ਹੈ। ਉਨ੍ਹਾਂ ਦਾ ਖਿਆਲ ਸੀ ਕਿ ਜਿਨ੍ਹਾਂ ਸਾਲਾਂ ਵਿੱਚ ਸਿੱਖਾਂ ਨੂੰ ਆਪਣੀ ਹੋਣੀ ਘੜਨ ਲਈ ਵਿਆਪਕ ਨੌਜਵਾਨ ਆਧਾਰ ਦੀ ਲੋੜ ਸੀ। ਸੇਖੋਂ ਨੇ ਸਿੱਖ ਵਿਦਿਆਰਥੀਆਂ ਅਤੇ ਅਧਿਆਪਕਾਂ ਨੂੰ ਇਨਕਲਾਬ ਦੀ ਇੱਲਤ ਲਾ ਕੇ ਸਿੱਖੀ ਤੋਂ ਬੇਮੁੱਖ ਕਰਨ ਦਾ ਮੁਜਰਮਾਨਾ ਕਹਿਰ ਕਮਾਇਆ ਹੈ।
ਸਿੱਖ ਨੌਜਵਾਨਾਂ ਨੂੰ ਸਲਾਹ 
ਸਿੱਖ ਨੌਜਵਾਨਾਂ ਨੇ ਅਕਸਰ ਇਹ ਪੁੱਛਣਾ ”ਸਰਦਾਰ ਸਾਹਿਬ, ਦੱਸੋ ਅਸੀਂ ਕੀ ਕਰੀਏ।” ਉਨ੍ਹਾਂ ਕਹਿਣਾ ਤਿੰਨ ਬੱਬਿਆਂ (ਬਾਦਲ, ਬਰਨਾਲਾ, ਬਲਵੰਤ) ਅਤੇ ਤਿੰਨ ਟੈਂਕਿਆਂ (ਟੌਹੜਾ, ਤਲਵੰਡੀ, ਤੂੜ) ਤੋਂ ਪੰਥ ਦਾ ਖਹਿੜਾ ਛੁਡਵਾ ਦਿਓ, ਬੱਸ ਤੁਹਾਡੇ ਜਿੰਮੇ ਇਹੀ ਕੰਮ ਹੈ।”
ਅਜਿਹਾ ਕੋਈ ਸਰਕੂਲਰ ਜਾਰੀ ਹੀ ਨਹੀਂ ਹੋਇਆ-ਸੂਹੀ ਸਵੇਰ 
ਸਿੱਖ ਇੱਕ ਜਰਾਇਮ ਪੇਸ਼ਾ ਕੌਮ ਦੇ ਜ਼ਿਕਰ ਵਾਲੇ ਜਿਸ ਬਹੁਚਰਚਿੱਤ ਸਰਕੂਲਰ ਦਾ ਅਕਸਰ ਜ਼ਿਕਰ ਕੀਤਾ ਜਾਂਦਾ ਹੈ ਉਸ ਬਾਰੇ ਸੂਹੀ ਸਵੇਰ ਦਾ ਕਹਿਣਾ ਹੈ ਕਿ ਅਸਲ ਵਿੱਚ ਅਜਿਹਾ ਕੋਈ ਸਰਕੂਲਰ ਜਾਰੀ ਹੀ ਨਹੀਂ ਹੋਇਆ।
ਸੂਹੀ ਸਵੇਰ ਨੇ ਲਿਖਿਆ ਹੈ-ਜਿਸ ਸਰਕੂਲਰ ਬਾਰੇ ਮੰਤਰੀ ਮੰਡਲ ਅਣਜਾਣ ਹੋਏ, ਜਿਸਦੀ ਕਾਪੀ ਸਰਕਾਰੀ ਜਾਂ ਗੈਰ ਸਰਕਾਰੀ ਰਿਕਾਰਡ ਵਿੱਚੋਂ ਲੱਭਦੀ ਨਾਂ ਹੋਏ, ਜਿਸਦੀ ਨਕਲ ਸਿਰਦਾਰ ਕਪੂਰ ਸਿੰਘ ਖੁਦ ਵੀ ਸਾਂਭ ਕੇ ਨਾਂ ਰੱਖ ਸਕਿਆ ਹੋਏ, ਉਸਦੀ ਵੁੱਕਤ ਹੀ ਕੀ ਰਹਿ ਜਾਂਦੀ ਹੈ।
ਮੁੱਕਦੀ ਗੱਲ, ਸਿੱਖਾਂ ਨੂੰ ਜ਼ਰਾਇਮ ਪੇਸ਼ਾ ਕਰਾਰ ਦਿੱਤੇ ਜਾਣ ਦਾ ਕਥਨ ਵਜ਼ਨਦਾਰ ਨਹੀ ਹੈ। ਸਿਰਦਾਰ ਕਪੂਰ ਸਿੰਘ ਜੀ ਨੇ ਖੁਦ ਵੀ ਇਹ ਲਫਜ਼ ਕਿਸੇ ਲਿਖਤ ਵਿੱਚ ਨਹੀ ਵਰਤਿਆ। ਸਿੱਖ ਆਗੂਆਂ ਅਤੇ ਬੁੱਧੀਜੀਵੀਆਂ ਨੇ ਆਪੋ ਆਪਣਾ ਉੱਲੂ ਸਿੱਧਾ ਕਰਨ ਲਈ ਤੱਥਾਂ ਨੂੰ ਤਰੋੜ ਮਰੋੜ ਕੇ ਸਿੱਖਾਂ ਨੂੰ ਜ਼ਰਾਇਮ ਪੇਸ਼ਾ ਕਰਾਰ ਦਿੱਤੇ ਜਾਣ ਵਾਲੀ ਧਾਰਨਾ ਪ੍ਰਚਲਿਤ ਕਰ ਰੱਖੀ ਹੈ। ਆਮ ਸਿੱਖਾਂ ਨੇ ਵੀ ਬਿਨਾਂ ਕਿਸੇ ਘੋਖ ਪੜਤਾਲ ਦੇ ਇਸ ਨੂੰ ਸੱਚ ਮੰਨਿਆ ਹੋਇਆ ਹੈ। ਜਿਸਦੇ ਬੜੇ ਭਿਆਨਕ ਨਤੀਜੇ ਨਿਕਲੇ ਹਨ। ਭਵਿੱਖ ਵਿੱਚ ਐਸੀਆਂ ਗਲਤ ਕਥਨੀਆਂ ਤੋਂ ਬਚਣ ਲਈ ਸਾਨੂੰ ਉਡਦੀਆਂ ਦੇ ਮਗਰ ਲੱਗਣ ਦੀ ਬਜਾਇ ਤੱਥਾਂ ਦੀ ਪੜਤਾਲ ਕਰਕੇ ਹੀ ਕੋਈ ਨਤੀਜਾ ਕੱਢਣ ਦੀ ਪਿਰਤ ਪਾਉਣੀ ਚਾਹੀਦੀ ਹੈ।
ਸਿਰਦਾਰ ਕਪੂਰ ਸਿੰਘ ਹੁਰਾਂ ਦੀ ਯਾਦ ਵਿੱਚ ਸੈਮੀਨਾਰ 
ਗੁਰਦਵਾਰਾ ਸ੍ਰੀ ਗੁਰੂ ਸਿੰਘ ਸਭਾ ਸਰਾਭਾ ਨਗਰ, ਲੁਧਿਆਣਾ ਵੱਲੋਂ ਸਿਰਦਾਰ ਕਪੂਰ ਸਿੰਘ ਹੁਰਾਂ ਦੀ ਬਰਸੀ ਮੌਕੇ ਇੱਕ ਵਿਸ਼ੇਸ਼ ਆਯੋਜਨ ਕੀਤਾ ਜਾ ਰਿਹਾ ਹੈ ਜਿਹੜਾ ਕਿ ਸੈਮੀਨਾਰ ਦੇ ਰੂਪ ਵਿੱਚ ਹੋਵੇਗਾ।  ਇਹ ਸੈਮੀਨਾਰ ਸਵੇਰੇ 10;30 ਵਜੇ ਸ਼ੁਰੂ ਹੋ ਕੇ ਬਾਅਦ ਦੁਪਹਿਰ ਇੱਕ ਵਜੇ ਤੱਕ ਚੱਲੇਗਾ। ਗੁਰਦਵਾਰਾ ਸਾਹਿਬ ਵੱਲੋਂ ਇਹ ਜਾਣਕਾਰੀ ਦੇਂਦਿਆਂ ਜੇ ਐਸ ਸੰਧੂ ਹੁਰਾਂ ਨੇ ਸਾਰੀਆਂ ਨੂੰ ਇਸ ਵਿੱਚ ਸ਼ਾਮਲ ਹੋਣ ਦਾ ਖੁੱਲ੍ਹਾ ਸੱਦਾ ਦਿੱਤਾ ਹੈ।  ਇਸ ਮੌਕੇ ਤੇ ਮੁੱਖ ਬੁਲਾਰੇ ਹੋਣਗੇ ਡਾਕਟਰ ਗੁਰਮੀਤ ਸਿੰਘ, ਡਾਕਟਰ ਸੁਖਦਿਆਲ ਸਿੰਘ, ਜਸਟਿਸ ਸਤਪਾਲ ਬਾਂਗੜ ਅਤੇ ਸਰਦਾਰ ਬੀਰ ਦਵਿੰਦਰ ਸਿੰਘ। 

Monday, March 23, 2015

ਦੇਸ਼ ਅਤੇ ਦੁਨੀਆ ਵਿੱਚ ਥਾਂ ਥਾਂ ਦਿੱਤੀ ਗਈ ਸ਼ਹੀਦਾਂ ਨੂੰ ਸ਼ਰਧਾਂਜਲੀ

ਹੁਸੈਨੀਵਾਲਾ, ਖਟਕੜਕਲਾਂ ਅਤੇ ਹੋਰਨਾਂ ਥਾਵਾਂ ਤੇ ਵੀ ਹੋਏ ਵਿਸ਼ੇਸ਼ ਆਯੋਜਨ
ਲੁਧਿਆਣਾ: 23 ਮਾਰਚ 2015: (ਪੰਜਾਬ ਸਕਰੀਨ ਬਿਊਰੋ): ਸ਼ਹੀਦ ਭਗਤ ਸਿੰਘ ਦੇ ਪ੍ਰਸੰਸਕਾਂ ਅਤੇ ਉਹਨਾਂ ਦੇ ਵਿਚਾਰਾਂ ਦਾ  ਸਮਰਥਨ ਕਰਨ ਵਾਲਿਆਂ ਨੇ ਅੱਜ ਦੇਸ਼ ਅਤੇ ਦੁਨੀਆ  ਦੇ ਵੱਖ ਵੱਖ ਹਿੱਸਿਆਂ ਵਿੱਚ ਸ਼ਹੀਦ-ਏ-ਆਜ਼ਮ ਭਗਤ ਸਿੰਘ, ਰਾਜਗੁਰੂ ਅਤੇ ਸੁਖਦੇਵ ਨੂੰ ਆਪਣੀ ਸ਼ਰਧਾ ਦੇ ਫੁੱਲ ਅਰਪਿਤ ਕੀਤੇ। ਇਸ ਦੇ ਨਾਲ ਹੀ ਸ਼ਹੀਦਾਂ ਦੇ ਸੁਪਨਿਆਂ ਨੂੰ ਸਾਕਾਰ ਕਰਨ ਦੇ ਅਹਿਦ ਵੀ ਕੀਤੇ ਗਏ। ਸੰਨ 1947 ਤੋਂ ਲੈ ਕੇ ਹੁਣ ਤੱਕ ਦਾ ਲੇਖਾ ਜੋਖਾ ਕਰਦਿਆਂ ਵੱਖ ਵੱਖ ਰਾਜਸੀ ਬੁਲਾਰਿਆਂ ਨੇ ਦੇਸ਼ ਦੀਆਂ ਕਾਂਗਰਸ ਅਤੇ ਭਾਜਪਾ ਸਰਕਾਰਾਂ ਨੂੰ ਇਸ ਮੁੱਦੇ ਤੇ ਆਪਣਾ ਨਿਸ਼ਾਨਾ ਵੀ ਬਣਾਇਆ।
ਸ਼ਹੀਦ-ਏ-ਆਜ਼ਮ ਸਰਦਾਰ ਭਗਤ ਸਿੰਘ ਦਾ ਸ਼ਹੀਦੀ ਦਿਨ ਅੱਜ ਲੁਧਿਆਣਾ ਵਿੱਚ ਵੀ ਬੜੀ ਸ਼ਰਧਾ ਅਤੇ ਸਨਮਾਨ ਨਾਲ ਮਨਾਇਆ ਗਿਆ। ਜਗਰਾਓਂ ਪੁਲ 'ਤੇ ਸਥਿਤ ਸ਼ਹੀਦਾਂ ਦੀ ਯਾਦਗਾਰ 'ਤੇ ਲੋਕ ਤੜਕਸਾਰ ਤੋਂ ਹੀ ਪੁੱਜਣੇ ਸ਼ੁਰੂ ਹੋ ਗਏ। ਹਾਰਾਂ  ਅਤੇ ਫੁੱਲਾਂ ਨਾਲ ਭਰੀ ਹੋਈ ਇਹ ਯਾਦਗਾਰ ਅੱਜ ਸਾਰੇ ਦਲਾਂ ਅਤੇ ਸੰਗਠਨਾਂ ਲਈ  ਖਾਸ ਖਿਚਦਾ ਕੇਂਦਰ ਬਣੀ ਹੋਇਆ ਸੀ।

ਸੀਪੀਆਈ ਅਤੇ ਸੀਪੀਐਮ ਨੇ ਵੀ ਦਿੱਤੀ ਸ਼ਹੀਦਾਂ ਨੂੰ ਸ਼ਰਧਾਂਜਲੀ
ਲੁਧਿਆਣਾ: ਸ਼ਹੀਦ ਭਗਤ ਸਿੰਘ, ਰਾਜਗੁਰੂ, ਸੁਖਦੇਵ ਨੂੰ ਸਰਧਾਂਜਲੀ ਭੇੱਟ ਕਰਨ ਦੇ ਲਈ ਉਹਨਾਂ ਦੇ ਸਹੀਦੀ ਦਿਨ ਤੇ ਉਹਨਾਂ ਦੇ ਬੁੱਤਾਂ ਤੇ ਇੱਕਤਰ ਹੋਏ ਭਾਰਤੀ ਕਮਿਉਨਿਸਟ ਪਾਰਟੀ (ਭਾਕਪਾ) ਅਤੇ ਭਾਰਤੀ ਕਮਿਉਨਿਸਟ ਪਾਰਟੀ ਮਾਰਕਸਵਾਦੀ (ਮਾਕਪਾ) ਲੁਧਿਆਣਾ ਦੇ ਸੈੱਕੜੇ ਕਾਰਕੁਨਾਂ ਨੇ ਧਰਮ ਨਿਰਪੱਖਤਾ ਅਤੇ ਲੋਕਤੰਤਰ ਦੀ ਰਾਖੀ ਅਤੇ  ਕੇਂਦਰ ਅਤੇ ਸੂਬਾਈ ਸਰਕਾਰਾਂ ਦੀਆਂ ਲੋਕ ਮਾਰੂ ਨੀਤੀਆਂ ਦੇ ਵਿਰੁੱਧ ਅਤੇ ਜਨਤਾ ਦੀਆਂ ਮੰਗਾਂ ਨੂੰ ਲੈ ਕੇ ਆਉਣ ਵਾਲੇ ਸਮੇੱ ਵਿੱਚ ਸੰਘਰਸ ਕਰਨ ਦਾ ਐਲਾਨ ਕੀਤਾ ਤਾਂ ਜੋ ਅਰਮ ਸਹੀਦਾਂ ਦੇ ਸੁਪਨਿਆਂ ਨੂੰ ਪੂਰਾ ਕੀਤਾ ਜਾ ਸਕੇ। ਇਸ ਮੌਕੇ ਤੇ ਬੋਲਦਿਆਂ ਪਾਰਟੀਆਂ  ਦੇ ਆਗੂਆਂ  ਨੇ ਕਿਹਾ ਕਿ ਘਰ ਵਾਪਸੀ ਦੇ ਨਾਮ ਥੱਲੇ ਜਬਰਨ ਧਰਮ ਪਰਿਵਰਤਨ ਦੀ ਨਿਖੇਧੀ ਕੀਤੀ ਤੇ ਕਿਹਾ ਕਿ ਇਸਦੇ ਨਾਲ ਸਾਡੇ ਧਰਮ ਨਿਰਪੱਖ ਢਾਂਚੇ ਨੂੰ ਸੱਟ ਵੱਜੀ ਹੈ ਅਤੇ ਸੰਵਿਧਾਨ ਦੀਆਂ ਧਾਰਾਵਾਂ ਦੀ ਆਰ ਐਸ ਐਸ ਵਲੋੱ ਸਰਕਾਰ ਦੀ ਸੈ ਤੇ ਉਲੰਘਣਾ ਕੀਤੀ ਜਾ ਰਹੀ ਹੈ। ਇਤਿਹਾਸੰ ਨੂੰ  ਹਿੰਦੂਤਵ ਦੇ ਹਿਸਾਬ ਦੇ ਨਾਲ ਤੋੜਨ ਮਰੋੜਨ ਦੇ ਨਾਲ ਸਮਾਜ ਵਿੱਚ ਵੰਡੀਆਂ ਪੈਣ ਦਾ ਖਤਰਾ ਵੱਧ ਜਾਏਗਾ। ਸੁੱਰਖਿਆ ਵਰਗੇ ਸੰਵੇਦਨ-ੀਲ ਖੇਤਰ ਵਿੱਚ ਵਿਦੇਸੀ ਕੰਪਨੀਆਂ ਨੂੰ ਖੁਲ੍ਹੀ ਛੁੱਟੀ ਦੇਣਾ ਘਾਤਕ ਕਦਮ ਹੈ। ਸਿਹਤ ਸੇਵਾਵਾਂ ਦੇ ਬਜਟ ਵਿੱਚ 20 ਪ੍ਰਤੀਸਤ ਕਟੌਤੀ ਕਰਨਾ ਦੇਸ ਦੀ ਗਰੀਬ ਜਨਤਾ ਨਾਲ ਕੋਝਾ ਮਜਾਕ ਹੈ। ਪਰ ਲੋਕਾਂ ਨੇ ਇਹਨਾਂ ਕੁਚਾਲਾਂ ਨੂੰ ਸਮਝ ਲਿਆ ਹੈ, ਉਹਨਾਂ ਨੇ ਕਿਹਾ। ਦਿੱਲੀ ਵਿੱਚ ਇਸੇ ਕਰ ਕੇ ਲੋਕਾਂ ਨੇ ਭਾਜਪਾ ਨੂੰ  ਪੂਰੀ ਤਰਾਂ ਛੰਡ ਕੇ ਰੱਖ ਦਿੱਤਾ ਹੈ। ਉਹਨਾਂ ਨੇ ਅੱਗੇ ਕਿਹਾ ਕਿ ਉਹਨਾਂ ਕਿਹਾ ਕਿ ਚੋਣ ਪ੍ਰਚਾਰ ਦੌਰਾਨ ਭਾਜਪਾ ਨੇ ਸਵਾਮੀਨਾਥਨ ਕਮੇਟੀ ਦੀਆਂ ਸਿਫਾਰਿਸਾਂ ਨੂੰ ਲਾਗੂ ਕਰਨ ਦਾ ਵਾਅਦਾ ਕੀਤਾ ਸੀ ਪਰ ਇਸਦੇ ਉਲਟ ਹੁਣ ਕਿਸਾਨਾਂ ਤੋੱ ਜਮੀਨ ਲੈਣ ਦੇ ਕਾਨੂੰਨ ਨੂੰ ਹੀ ਬਦਲ ਦਿੱਤਾ ਹੈ। ਇਸਦੇ ਨਾਲ ਕਿਸਾਨਾਂ ਨੂੰ ਬਹੁਤ ਨੁਕਸਾਨ ਹੋਵੇਗਾ। ਬੁਲਾਰਿਆਂ ਨੇ  ਸੂਬਾਈ ਸਰਕਾਰ ਵਲੋੱ ਨਸਿਆਂ, ਰੇਤਾ ਤੇ ਭੂ ਮਾਫੀਆ ਨੂੰ  ਖੁਲ੍ਹ ਦੇਣ ਦੀ ਨਿੰਦਾ ਕੀਤੀ ਗਈ।
ਇਸ ਮੌਕੇ ਤੇ ਜਿਹਨਾਂ ਹੋਰਾਂ ਨੇ ਸੰਬੋਧਨ ਕੀਤਾ ਉਹ ਹਨ ਕਾਮਰੇਡ ਓ ਪੀ ਮਹਿਤਾ, ਡਾ ਅਰੁਣ ਮਿੱਤਰਾ, ਕਾਮਰੇਡ ਅਮਰਜੀਤ ਮੱਟੂ, ਕਾਮਰੇਡ ਸੁਖਮਿੰਦਰ ਲੋਟੇ, ਕਾਮਰੇਡ ਰਮੇਸ਼ ਰਤਨ, ਜਗਦੀਸ ਰਾਮ, ਦੇਵ ਰਾਜ,   ਗੁਲਜਾਰ ਪੰਧੇਰ, ਗੁਰਨਾਮ ਸਿੱਧੂ, ਵਿਜੈ ਕੁਮਾਰ, ਰਾਮਾਧਾਰ ਸਿੰਘ, ਮਨਜੀਤ ਸਿੰਘ ਬੂਟਾ, ਗੁਰਨਾਮ ਗਿੱਲ, ਆਨੋਦ ਕੁਮਾਰ, ਰਾਮਾਧਾਰ ਸਿੰਘ, ਫਿਰੋਜ ਮਾਸਟਰ, ਕਾਮੇਸਵਰ, ਕਾਮਰੇਡ ਸੁਰਿੰਦਰ ਕੁਮਾਰ, ਸੁਬੇਗ ਸਿੰਘ, ਅਮਰਨਾਥ ਕੂਮ ਕਲਾਂ, ਮਿਸ ਜਯੋਤਸਨਾ, ਕੁਲਵੰਤ ਕੌਰ, ਰਾਮਾਧਾਰ ਸਿੰਘ, ਜਗਦੀਸ ਰਾਮ ਆਦਿ। ਕੁਮਾਰੀ ਜਿਓਤਸਨਾ ਨੇ ਭਰੂਣ ਹੱਤਿਆ ਦੇ ਨਾਲ ਲਗਾਤਾਰ ਵਧ ਰਹੇ ਪ੍ਰਦੂਸ਼ਣ ਅਤੇ ਨਸ਼ਿਆਂ ਦੇ ਖਿਲਾਫ਼ ਵੀ ਆਵਾਜ਼ ਬੁਲੰਦ ਕੀਤੀ। ਇਸ ਜੋਸ਼ੀਲੀ ਮੁਟਿਆਰ ਨੇ ਕਿਹਾ ਕਿ ਸਮਾਜ ਨੂੰ ਅਜਿਹੀਆਂ ਸ਼ਰਮਨਾਕ ਬੁਰਾਈਆਂ ਤੋਂ ਮੁਕਤ ਕਰਕੇ ਹੀ ਅਸੀਂ ਸ਼ਹੀਦਾਂ ਨੂੰ ਸੱਚੀ ਸ਼ਰਧਾਂਜਲੀ ਦੇ ਸਕਾਂਗੇ।

Wednesday, January 01, 2014

ਸ਼ਰੋਮਣੀ ਅਕਾਲੀ ਦੱਲ ਭਾਜਪਾ ਦੀ ਫਤਿਹ ਰੈਲੀ 23 ਫਰਵਰੀ ਨੂੰ ਜਗਰਾਓ ਵਿੱਖੇ

Wed, Jan 1, 2014 at 8:14 PM
ਅਸੀਂ 2014 ਦੀਆਂ ਲੋਕ ਸਭਾ ਚੋਣਾਂ ਵੀ ਵੱਡੇ ਫਰਕ ਨਾਲ ਜਿਤਾਂਗੇ--ਗਰੇਵਾਲ 
ਲੁਧਿਆਣਾ 1 ਜਨਵਰੀ   (ਸਤਪਾਲ ਸੋਨੀ//ਪੰਜਾਬ ਸਕਰੀਨ):
ਸੁੱਖਮਿੰਦਰ ਪਾਲ ਸਿੰਘ ਗਰੇਵਾਲ
ਭਾਜਪਾ ਕਿਸਾਨ ਮੋਰਚਾ ਦੇ ਕੌਮੀ ਸੱਕਤਰ ਅਤੇ ਹਿਮਾਚਲ ਪ੍ਰਦੇਸ਼ ਦੇ ਪ੍ਰਭਾਰੀ ਸੁੱਖਮਿੰਦਰ ਪਾਲ ਸਿੰਘ ਗਰੇਵਾਲ ਨੇ ਪ੍ਰੈਸ ਮਿਲਣੀ ਦੌਰਾਨ ਦਸਿਆ ਕਿ ਸ਼ਰੋਮਣੀ ਅਕਾਲੀ ਦੱਲ ਭਾਜਪਾ ਦੀ ਫਤਿਹ ਰੈਲੀ 23 ਫਰਵਰੀ ਨੂੰ ਜਗਰਾਓ ਵਿੱਖੇ ਹੋਵੇਗੀ । ਸੁੱਖਮਿੰਦਰ ਪਾਲ ਸਿੰਘ ਗਰੇਵਾਲ ਨੇ ਕਿਹਾ ਕਿ ਇਹ ਫਤਿਹ ਰੈਲੀ ਪੰਜਾਬ ਵਿੱਚ ਅੱਜ ਤਕ ਦੀ ਸਭ ਤੋਂ ਵੱਡੀ ਰੈਲੀ ਹੋਵੇਗੀ । ਇਸ ਮੌਕੇ ਪੰਜਾਬ ਦੇ ਮੁੱਖ-ਮੰਤਰੀ ਸ੍ਰ: ਪ੍ਰਕਾਸ਼ ਸਿੰਘ ਬਾਦਲ, ਪ੍ਰਧਾਨ ਮੰਤਰੀ ਪੱਦ ਦੇ ਉਮੀਦਵਾਰ ਨਰਿੰਦਰ ਮੋਦੀ ,ਉਪ ਮੁੱਖ-ਮੰਤਰੀ ਸੁਖਬੀਰ ਸਿੰਘ ਬਾਦਲ, ਪੰਜਾਬ ਭਾਜਪਾ ਪ੍ਰਧਾਨ ਕਮਲ ਸ਼ਰਮਾ ਅਤੇ ਕਈ ਭਾਜਪਾ ਦੇ ਕਈ ਸੀਨੀਅਰ ਕੇਂਦਰੀ ਨੇਤਾ ਅਤੇ ਲੱਖਾਂ ਦੀ ਗਿਣਤੀ ਵਿੱਚ ਸ਼ਰੋਮਣੀ ਅਕਾਲੀ ਦੱਲ ਭਾਜਪਾ ਦੇ ਵਰਕਰ ਪੁਜਣਗੇ ।
ਸੁੱਖਮਿੰਦਰ ਪਾਲ ਸਿੰਘ ਗਰੇਵਾਲ ਨੇ ਕਿਹਾ ਕਿ ਅਸੀਂ ਚਾਰ ਰਾਜਾਂ ਵਿੱਚ ਸੈਮੀ ਫਾਇਨਲ ਜਿੱਤ ਲਿਆ ਹੈ ਅਤੇ ਨਰਿੰਦਰ ਮੋਦੀ ਜੀ ਦੀ ਚੱਲ ਰਹੀ ਲਹਿਰ ਕਾਰਨ ਅਸੀਂ 2014 ਦੀਆਂ ਲੋਕ ਸਭਾ ਚੋਣਾਂ ਵੀ ਵੱਡੇ ਫਰਕ ਨਾਲ ਜਿਤਾਂਗੇ । ਸੁੱਖਮਿੰਦਰ ਪਾਲ ਸਿੰਘ ਗਰੇਵਾਲ ਨੇ ਕਿਹਾ ਕਿ ਜਗਰਾਓ ਰੈਲੀ ਦਾ ਨਾਮ ਫਤਿਹ ਰੈਲੀ ਇਸ ਲਈ ਰਖਿਆ ਗਿਆ ਹੈ ਕਿਉਂਕਿ ਪੰਜਾਬ ਦੀ ਧਰਤੀ  ਜੋ ਸੂਰਮਿਆਂ ਦੀ ਧਰਤੀ ਹੈ ਨਰਿੰਦਰ ਮੋਦੀ ਜੀ ਇਥੋਂ ਜਿੱਤ ਦਾ ਆਸ਼ੀਰਵਾਦ ਲੈਣ ਆ ਰਹੇ ਹਨ ਇਸ ਲਈ ਸਾਡਾ ਸਾਰਿਆਂ ਦਾ ਫਰਜ਼ ਬਣਦਾ ਹੈ ਕਿ ਅਸੀਂ ਵੱਡੀ ਗਿਣਤੀ ਵਿੱਚ ਪੁੱਜਕੇ ਆਪਣੇ ਹਰਮਨ ਪਿਆਰੇ ਨੇਤਾ ਨੂੰ ਜਿੱਤ ਦਾ ਵਿਸ਼ਵਾਸ ਦਿਵਾਈਏ । 

Thursday, September 12, 2013

ਰੋਜ਼ੀ ਰੋਟੀ ਲਈ ਪਰਦੇਸ ਗਏ ਇੱਕ ਹੋਰ ਪੰਜਾਬੀ ਨੌਜਵਾਨ ਦਾ ਕਤਲ

ਪਿੰਡ ਡੱਲਾ ਦੇ ਪਰਮਜੀਤ ਸਿੰਘ ਨੂੰ ਮਨੀਲਾ 'ਚ ਮਾਰੀਆਂ ਗੋਲੀਆਂ 
ਮੌਤ ਦੀ ਖ਼ਬਰ ਕਾਰਨ ਪੂਰੇ ਇਲਾਕੇ ਵਿੱਚ ਛਾਇਆ ਮਾਤਮ 
ਜਗਰਾਉਂ:(ਲੁਧਿਆਣਾ):11 ਸਤੰਬਰ 2013: (ਪੰਜਾਬ ਸਕਰੀਨ):ਰੋਜ਼ੀ ਰੋਟੀ ਅਤੇ ਸਿਰ ਤੇ ਚੜ੍ਹੇ ਕਰਜ਼ੇ ਨੌਜਵਾਨਾਂ ਨੂੰ ਬਾਰ ਬਾਰ ਵਿਦੇਸ਼ੀ ਧਰਤੀ ਤੇ ਜਾਨ ਲਈ ਮਜਬੂਰ ਕਰ ਦੇਂਦੇ ਹਨ। ਇਹਨਾਂ ਚੋਂ ਕਈ ਅਜਿਹੇ ਹਨ ਜਿਹਨਾਂ ਨੂੰ  ਵਿਦੇਸ਼ੀ ਧਰਤੀ ਤੇ ਜਾ ਕੇ ਆਪਣੀ ਜਾਨ ਤੋਂ ਹੀ ਹਥ੍ਥ ਧੋਣਾ ਪਿਆ।ਹੁਣ ਪੰਜਾਬ ਦੇ ਇੱਕ ਹੋਰ ਪੁੱਤਰ ਦੀ ਜਾਨ ਲਈ ਗਈ ਹੈ ਮਨੀਲਾ ਵਿੱਚ। ਜਗਰਾਓਂ ਦੇ ਇਲਾਕੇ 'ਚ ਪੈਂਦੇ ਪ੍ਰਸਿਧ ਪਿੰਡ ਡੱਲਾ ਦੇ ਇਕ ਨੌਜਵਾਨ ਪਰਮਜੀਤ ਸਿੰਘ ਉਰਫ ਪੰਮਾਨੂੰ ਗੋਲੀਆਂ ਮਾਰ ਕੇ ਕਤਲ ਕਰ ਦਿੱਤਾ ਗਿਆ ਹੈ। ਪੰਮਾ ਨੂੰ ਕਤਲ ਕੀਤੇ ਜਾਣ ਦੀ ਸੂਚਨਾ ਦੇਰ ਸ਼ਾਮ ਨੂੰ ਉਸਦੇ ਮਨੀਲਾ ਰਹਿੰਦੇ ਇੱਕ ਭਰਾ ਨੇ ਹੀ ਦਿੱਤੀ। ਕਾਬਿਲ-ਏ-ਜ਼ਿਕਰ ਹੈ ਕਿ ਪਰਮਜੀਤ ਸਿੰਘ ਉਰਫ ਪੰਮਾ ਤਕਰੀਬਨ ਸਾਢੇ ਕੁ ਤਿੰਨ ਸਾਲ ਪਹਿਲਾਂ ਮਨੀਲਾ ਗਿਆ ਸੀ, ਜਿਸ ਦਾ ਅੱਜ ਸਵੇਰੇ ਅਣਪਛਾਤੇ ਵਿਅਕਤੀਆਂ ਨੇ ਗੋਲੀਆਂ ਮਾਰ ਕੇ ਕਤਲ ਕਰ ਦਿੱਤਾ। ਪਿੰਡ ਡੱਲਾ ਵਿੱਚ ਇਸ ਹਿਰਦੇਵੇਧਕ ਘਟਨਾ ਦੀ ਖ਼ਬਰ ਪੁੱਜਦਿਆਂ ਹੀ ਪੂਰੇ ਇਲਾਕੇ ਵਿੱਚ ਮਾਤਮ ਛਾ ਗਿਆ ਅਤੇ ਲੋਕਾਂ ਨੇ ਵੱਡੀ ਗਿਣਤੀ 'ਚ ਪਰਮਜੀਤ ਸਿੰਘ ਦੇ ਘਰ ਪੁੱਜ ਕੇ ਪਰਿਵਾਰ ਦਾ ਦੁੱਖ ਸਾਂਝਾ ਕੀਤਾ। ਜਿਕਰਯੋਗ ਹੈ ਕਿ ਪਰਮਜੀਤ ਸਿੰਘ ਆਪਣੇ ਛੋਟੇ ਭਰਾ ਸਰਬਜੀਤ ਸਿੰਘ ਕੋਲ ਮਨੀਲਾ ਗਿਆ ਹੋਇਆ ਸੀ। ਉਸਦਾ ਛੋਟਾ ਭਰਾ ਸਰਬਜੀਤ ਪਹਿਲਾਂ ਹੀ ਉਥੇ ਰਹਿ ਰਿਹਾ ਸੀ। ਪਰਮਜੀਤ ਸਿੰਘ ਇਸ ਤੋਂ ਪਹਿਲਾਂ ਇਥੇ ਆਪਣੇ ਦੋ ਹੋਰ ਭਰਾਵਾਂ ਨਾਲ ਖੇਤੀਬਾੜੀ  ਦਾ ਧੰਦਾ ਕਰਦਾ ਸੀ ਅਤੇ ਤਿੰਨ ਸਾਲ ਪਹਿਲਾਂ ਖੇਤੀਬਾੜੀ ਦਾ ਧੰਦਾ, ਇਸ ਧੰਦੇ ਦੇ ਨਾਲ ਹੀ ਆਪਣੀ ਜਾਨ ਤੋਂ ਵਧਕੇ ਪਿਆਰੀ ਪਤਨੀ ਤੇ ਦੋ ਬੱਚਿਆਂ ਦੇ ਮੋਹ ਨੂੰ ਛੱਡ ਕੇ ਮਨੀਲਾ ਚਲਾ ਗਿਆ ਸੀ ਤਾਂਕਿ ਚਾਰ ਪੈਸਿਆਂ ਦਾ ਜੁਗਾੜ ਬਣ ਸਕੇ। ਉਸਨੂੰ ਕੁਝ ਹੱਦ ਤੱਕ ਸਫਲਤਾ ਵੀ ਮਿਲੀ ਤੇ ਪਰਮਜੀਤ ਸਿੰਘ ਪੰਮਾ ਹੁਣ ਵਿਦੇਸ਼ 'ਚ ਸਥਾਪਤ ਹੋਣ ਤੋਂ ਬਾਅਦ ਇੱਕ ਵਾਰ ਆਪਣੇ ਪਿਆਰੇ ਵਤਨ ਇੰਡੀਆ ਆਉਣ ਦੀ ਤਿਆਰੀ ਵੀ ਕਰ ਰਿਹਾ ਸੀ। ਬਸ ਗੱਲ ਉਹੀ ਹੋਈ-
ਪਾਸ ਮੰਜ਼ਿਲ ਕੇ ਮੌਤ ਆ ਗਈ;  
ਜਬ ਸਿਰਫ ਦੋ ਕਦਮ ਰਹਿ ਗਏ! 
ਇਧਰ ਪਰਮਜੀਤ ਪੰਮਾ ਭਾਰਤ ਆਉਣ ਦੀ ਤਿਆਰੀ ਵਿੱਚ ਸੀ ਓਧਰੋਂ ਕਿਸੇ ਗੈਂਗ ਨੇ ਉਸਨੂੰ ਕਤਲ ਕਰ ਕੇ ਉਸ ਦਾ ਦੇਸ਼ ਪਰਤਨ ਦਾ ਸੁਪਨਾ ਵੀ ਪੂਰਾ ਨਹੀਂ ਹੋਣ ਦਿੱਤਾ। ਪਰਮਜੀਤ ਸਿੰਘ ਦੀ ਮੌਤ ਦੀ ਖ਼ਬਰ ਉਸ ਦੇ ਭਰਾ ਸਰਬਜੀਤ ਸਿੰਘ ਨੇ ਬੜੇ ਹੀ ਭਰੇ ਮਨ ਨਾਲ ਦਿੱਤੀ। ਪਰਮਜੀਤ ਸਿੰਘ ਆਪਣੇ ਪਿਛੇ ਵਿਆਹੁਤਾ ਪਤਨੀ ਮਨਜਿੰਦਰ ਕੌਰ, ਪੁੱਤਰ ਕਿਰਨਦੀਪ ਸਿੰਘ ਤੇ ਪੁੱਤਰੀ ਲਵਪ੍ਰੀਤ ਕੌਰ ਛੱਡ ਗਿਆ। ਮ੍ਰਿਤਕ ਪਰਮਜੀਤ ਸਿੰਘ ਦੀ ਮਾਤਾ ਮਹਿੰਦਰ ਕੌਰ ਪਿਛਲੇ 10 ਸਾਲਾਂ ਤੋਂ ਪਿੰਡ ਦੀ ਪੰਚ ਚੁਣੀ ਆਉਂਦੀ ਹੈ ਅਤੇ ਇਹ ਪਰਿਵਾਰ ਸਮਾਜ ਸੇਵਾ ਨਾਲ ਜੁੜਿਆ ਹੋਇਆ ਹੈ। ਇਲਾਕੇ ਵਿੱਚ ਹਰਮਨ ਪਿਆਰੇ ਇਸ ਪਰਿਵਾਰ ਨਾਲ ਵਾਪਰੇ ਇਸ ਕਹਿਰ ਨੇ ਇਹ ਸੁਆਲ ਇੱਕ ਵਾਰ ਖੜਾ ਕਰ ਦਿੱਤਾ ਹੈ ਕਿ ਆਖਿਰ ਸਾਡੇ ਨੌਜਵਾਨਾਂ ਨੂੰ ਕਦੋਂ ਤੱਕ ਰੋਜ਼ੀ ਰੋਟੀ ਅਤੇ ਆਰਥਿਕ ਤੰਗੀਆਂ ਕਾਰਨ ਆਪਣਾ ਦੇਸ਼ ਛ੍ਦ੍ੜਨ ਤੇ ਮਜਬੂਰ ਹੋਣਾ ਪਵੇਗਾ?