Showing posts with label Unity. Show all posts
Showing posts with label Unity. Show all posts

Thursday, November 01, 2018

ਸੀਪੀਆਈ -ਸੀਪੀਆਈ(ਐਮ) ਵੱਲੋਂ ਏਕਤਾ ਜਤਨ ਹੋਏ ਹੋਰ ਤੇਜ਼

17 ਦਸੰਬਰ ਨੂੰ ਲੁਧਿਆਣਾ ਵਿੱਚ ਵਿਸ਼ਾਲ ਸਾਂਝੀ ਰੈਲੀ ਦਾ ਐਲਾਨ 
ਲੁਧਿਆਣਾ: 01 ਨਵੰਬਰ 2018: (ਐਮ ਐਸ ਭਾਟੀਆ//ਪੰਜਾਬ ਸਕਰੀਨ)::
ਜਿਹੜੇ ਲੋਕ ਕਾਂਗਰਸ,ਅਕਾਲੀ ਦਲ ਅਤੇ ਭਾਰਤੀ ਜਨਤਾ ਪਾਰਟੀ ਵਾਲੀਆਂ ਸਰਕਾਰਾਂ ਦੀ ਕਾਰਗੁਜ਼ਾਰੀ ਤੋਂ ਨਿਰਾਸ਼ ਹੋ ਗਏ ਸਨ। ਜਿਹਨਾਂ ਨੂੰ ਲੱਗਦਾ ਸੀ ਕਿ ਬਹੁਤ ਕੋਸ਼ਿਸ਼ਾਂ ਦੇ ਬਾਵਜੂਦ ਹੁਣ ਮੋਦੀ ਦਾ ਕੋਈ ਬਦਲ ਤਿਆਰ ਨਹੀਂ ਹੋ ਸਕਿਆ; ਉਹਨਾਂ ਲਈ ਖੁਸ਼ਖਬਰੀ ਹੈ। ਦੋ ਪਰਮੁੱਖ ਖੱਬੀਆਂ ਪਾਰਟੀਆਂ ਸੀਪੀਆਈ ਅਤੇ ਸੀਪੀਐਮ ਹੁਣ ਏਕਤਾ ਦੇ ਮਾਮਲੇ ਵਿੱਚ ਹੋਰ ਨੇੜੇ ਆ ਗਈਆਂ ਹਨ। ਅੱਜ ਲੁਧਿਆਣਾ ਵਿੱਚ ਦੋਹਾਂ ਪਾਰਟੀਆਂ ਦੀ ਸਾਂਝੀ ਪਰੈਸ ਕਾਨਫਰੰਸ ਇਹੀ ਇਸ਼ਾਰਾ ਦੇ ਰਹੀ ਸੀ। ਲੁਧਿਆਣਾ ਵਿੱਚ 17 ਦਸੰਬਰ 2018 ਨੂੰ ਹੋਣ ਵਾਲੀ ਵਿਸ਼ਾਲ ਰੈਲੀ ਇਸ ਖੱਬੇ ਬਦਲ ਦੇ ਤਿਆਰ ਹੋਣ ਦਾ ਸਪਸ਼ਟ ਐਲਾਨ ਹੋਵੇਗੀ। ਇਸਦੇ ਨਾਲ ਹੀ ਸਾਂਝੇ ਜੱਥਾ ਮਾਰਚ ਖੱਬੀਆਂ ਧਿਰਾਂ ਦੇ ਇਸ ਮਜ਼ਬੂਤ ਏਕੇ ਦਾ ਸੁਨੇਹਾ ਘਰ ਘਰ ਲੈ ਕੇ ਜਾਣਗੇ। ਅੱਜ ਦੀ ਇਹ ਸਾਂਝੀ ਪ੍ਰੈਸ ਕਾਨਫਰੰਸ ਅਸਲ ਵਿੱਚ ਮੋਦੀ ਸਰਕਾਰ ਦੇ ਖਿਲਾਫ ਜਮਹੂਰੀ ਜੰਗ ਦਾ ਬਿਗਲ ਸੀ। 
ਦੇਸ ਵਿਚ ਫਿਰਕੂ ਫਾਸ਼ੀ ਖਤਰੇ ਵਿਰੁੱਧ ਅਤੇ ਪੰਜਾਬ ਵਿਚ ਲੋਕਾਂ ਦੇ ਭਖਦੇ ਮਸਲਿਆਂ ਨੂੰ ਉਭਾਰਨ ਅਤੇ ਕੇਂਦਰੀ ਤੇ ਸੂਬਾਈ ਸਰਕਾਰਾਂ ਵਲੋਂ ਲੋਕਾਂ ਨਾਲ ਕੀਤੇ ਵਾਅਦੇ ਪੂਰੇ ਕਰਾਉਣ ਲਈ ਅਤੇ ਦੇਸ ਵਿਚ ਜਮਹੂਰੀਅਤ, ਪ੍ਰਗਟਾਵੇ ਦੀ ਆਜ਼ਾਦੀ ਲਈ, ਫਿਰਕੂ ਸਦਭਾਵਨਾ ਤੇ ਸਾਂਝ ਬਰਕਰਾਰ ਰੱਖਣ ਲਈ ਅਤੇ ਰਾਫੇਲ ਸੌਦੇ ਦੀ ਸੰਸਦੀ ਜਾਂਚ ਲਈ, ਪੰਜਾਬ ਦੇ ਲੋਕਾਂ ਨੂੰ ਲਾਮਬੰਦ ਕਰਨ ਵਾਸਤੇ ਸੀਪੀਆਈ ਅਤੇ ਸੀਪੀਆਈ(ਐਮ) ਵਲੋਂ 17 ਦਸੰਬਰ ਨੂੰ ਲੁਧਿਆਣਾ ਅਨਾਜ ਮੰਡੀ ਵਿਚ ਇਕ ਵਿਸ਼ਾਲ ਜਨਤਕ ਰੈਲੀ ਕੀਤੀ ਜਾ ਰਹੀ ਹੈ ਜਿਸ ਨੂੰ ਸੀਪੀਆਈ (ਐਮ) ਦੇ ਜਨਰਲ ਸਕੱਤਰ ਸਾਥੀ ਸੀਤਾ ਰਾਮ ਯੇਚਰੀ, ਸੀਪੀਆਈ ਦੇ ਜਨਰਲ ਸਕੱਤਰ ਸਾਥੀ ਐਸ. ਸੁਧਾਕਰ ਰੈਡੀ ਅਤੇ ਹੋਰ ਕੌਮੀ ਅਤੇ ਸੂਬਾਈ ਆਗੂ ਸੰਬੋਧਨ ਕਰਨਗੇ।
ਇਹ ਐਲਾਨ ਅੱਜ ਇਥੇ ਸੀਪੀਆਈ ਦੇ ਸੂਬਾ ਸਕੱਤਰ ਸਾਥੀ ਬੰਤ ਸਿੰਘ ਬਰਾੜ ਅਤੇ ਸੀਪੀਆਈ (ਐਮ) ਦੇ ਸੂਬਾ ਸਕੱਤਰ ਸਾਥੀ ਸੁਖਵਿੰਦਰ ਸਿੰਘ ਸੇਖੋਂ ਨੇ ਸਾਂਝੀ ਪਰੈਸ ਕਾਨਫਰੰਸ ਵਿਚ ਕੀਤਾ। ਉਹਨਾਂ ਦੇ ਨਾਲ ਸੀਪੀਆਈ(ਐਮ) ਦੇ ਸੂਬਾ ਆਗੂ ਸਾਥੀ ਲਹਿੰਬਰ ਸਿੰਘ ਤੱਗੜ ਅਤੇ ਦੋਹਾਂ ਪਾਰਟੀਆਂ ਦੇ ਜ਼ਿਲਾ ਸਕੱਤਰ ਸਾਥੀ ਡੀਮੌੜ  ਅਤੇ ਸਾਥੀ ਰੂਪ ਬਸੰਤ ਸਿੰਘ ਵੜੈਚ ਵੀ ਸ਼ਾਮਲ ਸਨ। 
ਕਮਿਊਨਿਸਟ ਆਗੂਆਂ ਨੇ ਕਿਹਾ ਕਿ ਮੋਦੀ ਰਾਜ ਦੇ ਸਾਢੇ ਚਾਰ ਸਾਲ ਪੂਰੇ ਤਬਾਹਕੁਨ ਸਾਲ ਰਹੇ ਹਨ - ਆਰਥਿਕਤਾ ਦੇ ਪਖੋਂ, ਮੰਤਰੀਆਂ ਦੇ ਭਿ੍ਰਸ਼ਟਾਚਾਰ ਅਤੇ ਰਾਫੇਲ ਸੌਦੇ ਦੇ ਪਖੋਂ, ਅਮਨ ਕਾਨੂੰਨ ਦੇ ਪਖੋਂ, ਮਹਿੰਗਾਈ ਦੇ ਪਖੋਂ, ਜਮਹੂਰੀਅਤ ਅਤੇ ਮੂਲ ਅਧਿਕਾਰਾਂ ਉਤੇ ਹਮਲਿਆਂ ਦੇ ਪਖੋਂ, ਵੱਡੇ ਪੂੰਜੀਪਤੀ ਘਰਾਣਿਆਂ ਨੂੰ ਰਿਆਇਤਾਂ ਅਤੇ ਲੋਕਾਂ ਉਤੇ ਹਰ ਪਾਸਿਓਂ ਬੋਝ ਦੇ ਪਖੋਂ, ਨੋਟਬੰਦੀ ਅਤੇ ਜੀਐਸਟੀ ਦੇ ਪਖੋਂ, ਘਟਗਿਣਤੀਆਂ, ਆਦਿਵਾਸੀਆਂ, ਦਲਿਤਾਂ, ਔਰਤਾਂ ਉਤੇ ਹਮਲਿਆਂ ਦੇ ਪਖੋਂ। ਗੱਲ ਕੀ, ਰਸਸ ਦਾ ਫਿਰਕੂ ਕਤਾਰਬੰਦੀ ਦਾ ਏਜੰਡਾ ਤੇਜ਼ੀ ਨਾਲ ਲਾਗੂ ਕੀਤਾ ਜਾ ਰਿਹਾ ਹੈ।  
ਇਸੇ ਤਰ੍ਹਾਂ ਸੂਬੇ ਵਿਚ ਵੀ ਕੈਪਟਨ ਸਰਕਾਰ ਹਰ ਮੋਰਚੇ ਤੇ ਫੇਲ੍ਹ ਹੋ ਰਹੀ ਹੈ। ਕਰਜ਼ ਮਾਫੀ ਨਹੀਂ ਹੋਈ, ਨਸ਼ਾਖੋਰੀ ਬੰਦ ਨਹੀਂ ਹੋਈ, ਜ਼ਮੀਨ ਮਾਫੀਆ ਵੀ ਬੇਲਗਾਮ ਹੈ। ਹੱਕਾਂ ਲਈ ਲੜਦੇ ਤਬਕਿਆਂ ਉਤੇ ਜਬਰ ਹੁੰਦਾ ਹੈ। ਸਾਂਝਾ ਅਧਿਆਪਕ ਮੋਰਚਾ ਕਈ ਹਫਤਿਆਂ ਤੋਂ ਭੁੱਖ ਹੜਤਾਲ ਤੇ ਚਲ ਰਿਹਾ ਹੈ। ਬਰਗਾੜੀ ਬੇਅਦਬੀ ਕਾਂਡ ਦੇ ਦੋਸ਼ੀਆਂ ਨੂੰ ਸਜ਼ਾ ਨਾ ਦੇਣ ਕਾਰਨ ਪੰਜਾਬ ਦਾ ਵਾਤਾਵਰਣ ਤੇ ਅਮਨ ਖਤਰੇ ਵਿਚ ਹੈ।  ਮੁਖ ਤਾਕਤਾਂ ਲੋਕਾਂ ਦੇ ਮੁਦਿਆਂ ਤੋਂ ਲਾਂਭੇ ਜਾ ਕੇ ਧਾਰਮਿਕ ਮੂਲਵਾਦ ਨੂੰ ਉਭਾਰ ਰਹੀਆਂ ਹਨ। ਅਸੀਂ ਬਰਗਾੜੀ ਦੇ ਦੋਸ਼ੀਆਂ ਨੂੰ ਰਣਜੀਤ ਸਿੰਘ ਕਮਿਸ਼ਨ ਮੁਤਾਬਕ ਜਲਦ ਸਜ਼ਾ ਦੇਣ ਦੇ ਹੱਕ ਵਿਚ ਹਾਂ। ਪਰ ਨਾਲ ਹੀ ਲੋਕਾਂ ਦੇ ਮਸਲਿਆਂ ਨੂੰ  ਕੇਂਦਰ ਵਿਚ ਲਿਆਉਣਾ ਚਾਹੁੰਦੇ ਹਾਂ।   
ਇਸ ਲਈ ਅਸੀਂ 30 ਜੁਲਾਈ ਨੂੰ ਜਲੰਧਰ ਕਨਵੈਨਸ਼ਨ ਵਿਚ ਫੈਸਲਾ ਕੀਤਾ ਸੀ ਜਿਸ ਅਨੁਸਾਰ 17 ਦਸੰਬਰ ਨੂੰ ਲੁਧਿਆਣਾ ਸਾਂਝੀ ਰੈਲੀ ਕੀਤੀ ਜਾਵੇਗੀ। ਇਸ ਤੋਂ ਪਹਲਿਾਂ 15 ਤੋਂ 21 ਨਵੰਬਰ ਤਕ ਪੰਜਾਬ ਵਿਚ ਸਾਂਝੇ ਜਥਾ ਮਾਰਚ ਕੀਤੇ ਜਾਣਗੇ ਇਕ ਜਥਾ ਹੁਸੈਨੀਵਾਲਾ ਤੋਂ ਚਲ ਕੇ ਫਿਰੋਜ਼ਪੁਰ, ਫਰੀਦਕੋਟ, ਮੋਗਾ, ਮੁਕਤਸਰ, ਬਠਿੰਡਾ, ਮਾਨਸਾ, ਸੰਗਰੂਰ, ਪਟਿਆਲਾ, ਮੁਹਾਲੀ, ਰੋਪੜ ਹੁੰਦਾ ਹੋਇਆ 21 ਨੂੰ ਲੁਧਿਆਣੇ ਸਮਾਪਤ ਹੋਵੇਗਾ। ਦੂਜਾ 15 ਨੂੰ ਜਲ੍ਹਿਆਂਵਾਲਾ ਬਾਗ ਤੋਂ ਚਲ ਕੇ ਅੰਮਿ੍ਰਤਸਰ, ਤਰਨਤਾਰਨ, ਗੁਰਦਾਸਪੁਰ, ਪਠਾਨਕੋਟ, ਹੁਸ਼ਿਆਰਪੁਰ, ਨਵਾਂ ਸ਼ਹਿਰ, ਕਪੂਰਥਲਾ ਰਾਹੀਂ ਹੁੰਦਾ ਹੋਇਆ 21 ਨੂੰ ਜਲੰਧਰ ਵਿਚ ਨੇਪਰੇ ਚੜ੍ਹੇਗਾ। ਇਸਦੀ ਤਿਆਰੀ ਲਈ ਸਾਂਝੀਆਂ ਜ਼ਿਲਾ ਜਨਰਲ ਬਾਡੀ ਮੀਟਿੰਗਾਂ ਕੀਤੀਆਂ ਜਾਣਗੀਆਂ।
ਇਸ ਦੌਰਾਨ ਇਹਨਾਂ ਮੰਗਾਂ ਲਈ ਆਵਾਜ਼ ਚੁਕੀ ਜਾਵੇਗੀ:
*ਫਾਸ਼ੀ ਹਮਲਿਆਂ ਵਿਰੁਧ ਜਮਹੂਰੀਅਤ ਦੀ ਰਾਖੀ ਯਕੀਨੀ ਬਣਾਈ ਜਾਵੇ। 
*ਨਸ਼ਿਆਂ ਦੀ ਅਲਾਮਤ ਦਾ ਖਾਤਮਾ ਕੀਤਾ ਜਾਵੇ। 
*ਰੁਜ਼ਗਾਰ ਦਾ ਪਰਬੰਧ ਸਾਰਿਆਂ ਲਈ ਕੀਤਾ ਜਾਵੇ।  
*ਮਜ਼ਦੂਰਾਂ ਦੀ ਉਜਰਤ ਵਿੱਚ ਤੁਰੰਤ ਵਾਧਾ ਕੀਤਾ ਜਾਵੇ।  
*ਪੇਅ ਕਮਿਸ਼ਨ ਦੀਆਂ ਸਿਫਾਰਸ਼ਾਂ ਲਾਗੂ ਕੀਤੀਆਂ ਜਾਣ। 
*ਸਾਰੇ ਕਰਜ਼ੇ ਮਾਫ ਕੀਤੇ ਜਾਣ।  
*ਖੇਤ ਮਜ਼ਦੂਰਾਂ ਲਈ ਪਲਾਟ ਤੇ ਪੈਨਸ਼ਨ ਹਰ ਹਾਲਤ ਵਿੱਚ ਹੋਵੇ। 
*ਲੋਕਾਂ ਦਾ ਖੂਨ ਪੇ ਰਹੀ ਮਹਿੰਗਾਈ ਨੂੰ ਨੱਥ ਪਾਈ ਜਾਵੇ। 
*ਸਿਖਿਆ ਤੇ ਸਿਹਤ ਸਹੂਲਤਾਂ ਹਰ ਇੱਕ ਲਈ ਯਕੀਨੀ ਬਣਾਈਆਂ ਜਾਣ।  
*ਔਰਤਾਂ ਅਤੇ ਬਾਲੜੀਆਂ ਉਤੇ ਹੁੰਦੇ ਜਿਣਸੀ ਹਮਲਿਆਂ ਵਿਰੁਧ ਸਖਤ ਵਿਵਸਥਾ ਕੀਤੀ ਜਾਵੇ। 
* ਪੰਜਾਬੀ ਭਾਸ਼ਾ ਨੂੰ ਹੱਕੀ ਸਥਾਨ ਦਿੱਤਾ ਜਾਵੇ। 
* ਪੰਜਾਬ ਨੂੰ ਆਰਥਿਕ ਸੰਕਟ ਚੋਂ ਕੱਢਣ ਲਈ ਇਕ ਲੱਖ ਕਰੋੜ ਰੁਪੈ ਦਾ ਵਿਸ਼ੇਸ਼ ਪੈਕੇਜ ਦਿੱਤਾ ਜਾਵੇ। 
*ਪੰਜਾਬ ਦੇ ਪਾਣੀ ਦੀ ਰਾਖੀ ਅਤੇ ਸੰਭਾਲ ਪਹਿਲ ਦੇ ਅਧਾਰ 'ਤੇ ਹੋਵੇ। 
*ਭਿ੍ਰਸ਼ਟਾਚਾਰ ਦਾ ਖਾਤਮਾ ਹਰ ਹੀਲੇ ਹਰ ਖੇਤਰ ਵਿੱਚ ਕੀਤਾ ਜਾਵੇ
* ਪਰਾਪਰਟੀ ਟੈਕਸ ਤੇ ਟੋਲ ਟੈਕਸ  ਦਾ ਖਤਮਾ ਕੀਤਾ ਜਾਵੇ। 
* ਫਿਰਕੂ ਸਾਂਝ ਤੇ ਅਮਨ ਸਦਭਾਵਨਾ ਦੀ ਰਾਖੀ ਪਹਿਲ ਦੇ ਅਧਾਰ 'ਤੇ ਹੋਵੇ। 
* ਧਾਰਮਿਕ ਗਰੰਥਾਂ ਦੀ ਬੇਅਦਬੀ ਰੋਕੀ ਜਾਵੇ।
ਇਸ ਮੌਕੇ ਕਾਮਰੇਡ ਐਮ ਐਸ ਭਾਟੀਆ, ਕਾਮਰੇਡ ਗੁਰਨਾਮ ਸਿੰਘ ਸਿੱਧੂ, ਕਾਮਰੇਡ ਸੁਖਵਿੰਦਰ ਸਿੰਘ ਲੋਟੇ, ਕਾਮਰੇਡ ਚਮਕੌਰ ਸਿੰਘ, ਕਾਮਰੇਡ ਰਮੇਸ਼ ਕੌਸ਼ਲ, ਕਾਮਰੇਡ ਗੁਰਮੇਲ ਮੈਲਡੇ ਅਤੇ ਕਾਮਰੇਡ ਬਲਦੇਵ ਸਿੰਘ ਲਤਾਲਾ ਵੀ ਮੌਜੂਦ ਰਹੇ।    

Wednesday, October 31, 2018

ਰਾਸ਼ਟਰੀ ਏਕਤਾ ਦਿਵਸ ਮੌਕੇ 'ਰਨ ਫਾਰ ਯੂਨਿਟੀ' ਦਾ ਆਯੋਜਨ


ਸੈਂਕੜੇ ਸ਼ਹਿਰਵਾਸੀਆਂ ਨੇ ਲਿਆ ਦੌੜ ਵਿੱਚ ਹਿੱਸਾ
ਸਾਨੂੰ ਆਪਸੀ ਏਕਤਾ ਅਤੇ ਆਖੰਡਤਾ ਨੂੰ ਬਰਕਰਾਰ ਰੱਖਣ ਲਈ ਯਤਨ ਕਰਨਾ ਚਾਹੀਦਾ-ADCP ਸੁਰਿੰਦਰ ਲਾਂਬਾ

ਲੁਧਿਆਣਾ: 31 ਅਕਤੂਬਰ 2018: (ਐਮ ਐਸ ਭਾਟੀਆ//ਪੰਜਾਬ ਸਕਰੀਨ)::
ਦੇਸ਼ ਦੀ ਅਜ਼ਾਦੀ, ਏਕਤਾ ਅਤੇ ਆਖੰਡਤਾ ਲਈ ਆਪਣਾ ਵਡਮੁੱਲਾ ਯੋਗਦਾਨ ਪਾਉਣ ਵਾਲੇ ਅਤੇ ਦੇਸ਼ ਦੇ ਪਹਿਲੇ ਉੱਪ ਪ੍ਰਧਾਨ ਮੰਤਰੀ ਸਰਦਾਰ ਵੱਲਭ ਭਾਈ ਪਟੇਲ ਦੇ ਜਨਮ ਦਿਵਸ ਅੱਜ ਸਾਰੇ ਦੇਸ਼ ਵਿੱਚ 'ਰਾਸ਼ਟਰੀ ਏਕਤਾ ਦਿਵਸ' ਵਜੋਂ ਮਨਾਇਆ ਗਿਆ। ਇਸ ਸੰਬੰਧੀ ਸ਼ਹਿਰ ਵਿੱਚ ਇੱਕ ਦੌੜ 'ਰਨ ਫਾਰ ਯੂਨਿਟੀ' ਦਾ ਵੀ ਆਯੋਜਨ ਕੀਤਾ ਗਿਆ। ਜਿਸ ਨੂੰ ਵਧੀਕ ਡਿਪਟੀ ਕਮਿਸ਼ਨਰ ਪੁਲਿਸ ਸ੍ਰੀ ਸੁਰਿੰਦਰ ਲਾਂਬਾ ਨੇ ਹਰੀ ਝੰਡੀ ਦਿਖਾ ਕੇ ਰਵਾਨਾ ਕੀਤਾ।ਸਥਾਨਕ ਗੁਰੂ ਨਾਨਕ ਸਟੇਡੀਅਮ ਵਿਖੇ ਰੱਖੇ ਗਏ ਪ੍ਰਭਾਵਸ਼ਾਲੀ ਇਕੱਠ ਨੂੰ ਸੰਬੋਧਨ ਕਰਦਿਆਂ ਸ੍ਰੀ ਲਾਂਬਾ ਨੇ ਕਿਹਾ ਕਿ ਸਾਨੂੰ ਰਾਸ਼ਟਰ ਦੀ ਏਕਤਾ, ਆਖੰਡਤਾ ਅਤੇ ਸੁਰੱਖਿਆ ਨੂੰ ਬਰਕਰਾਰ ਰੱਖਣ ਲਈ ਆਪਣੇ ਆਪ ਨੂੰ ਸਮਰਪਿਤ ਕਰਨਾ ਚਾਹੀਦਾ ਹੈ ਅਤੇ ਆਪਣੇ ਦੇਸ਼ਵਾਸੀਆਂ ਵਿੱਚ ਇਹ ਸੰਦੇਸ਼ ਫੈਲਾਉਣ ਦਾ ਵੀ ਹਰ ਸੰਭਵ ਯਤਨ ਕਰਨਾ ਚਾਹੀਦਾ ਹੈ। ਇਸ ਮੌਕੇ ਉਹਨਾਂ ਸਰਦਾਰ ਵੱਲਭ ਭਾਈ ਪਟੇਲ ਦੀ ਸਖ਼ਸ਼ੀਅਤ ਅਤੇ ਕਾਰਜਾਂ ਬਾਰੇ ਵੀ ਜਾਣਕਾਰੀ ਦਿੱਤੀ।ਉਹਨਾਂ ਕਿਹਾ ਕਿ ਸਾਨੂੰ ਦੇਸ਼ ਦੀ ਅੰਦਰੂਨੀ ਸੁਰੱਖਿਆ ਯਕੀਨੀ ਬਣਾਉਣ ਲਈ ਆਪਣਾ ਯੋਗਦਾਨ ਪਾਉਣਾ ਚਾਹੀਦਾ ਹੈ। ਦੇਸ਼ ਦੀ ਏਕਤਾ, ਇਕਸਾਰਤਾ ਅਤੇ ਸੁਰੱਖਿਆ ਨੂੰ ਖ਼ਤਰੇ ਵਿੱਚ ਪਾਉਣ ਵਾਲੀਆਂ ਤਾਕਤਾਂ ਨੂੰ ਠੱਲ ਪਾਉਣ ਲਈ ਯਤਨ ਕਰਨਾ ਚਾਹੀਦਾ ਹੈ।
ਸਟੇਡੀਅਮ ਤੋਂ ਸ਼ੁਰੂ ਹੋਈ 'ਰਨ ਫਾਰ ਯੂਨਿਟੀ' ਦੌੜ ਕਲੱਬ ਰੋਡ, ਫੁਹਾਰਾ ਚੌਕ, ਮਾਲ ਰੋਡ, ਭਾਰਤ ਨਗਰ ਚੌਕ, ਦੁਰਗਾ ਮਾਤਾ ਮੰਦਿਰ ਹੁੰਦੀ ਹੋਈ ਸਟੇਡੀਅਮ ਵਿਖੇ ਸਮਾਪਤ ਹੋਈ। ਜਿਸ ਵਿੱਚ 500 ਤੋਂ ਵਧੇਰੇ ਖ਼ਿਡਾਰੀਆਂ, ਬੱਚਿਆਂ ਅਤੇ ਸ਼ਹਿਰ ਵਾਸੀਆਂ ਨੇ ਭਾਗ ਲਿਆ। ਇਸ ਮੌਕੇ ਹੋਰਨਾਂ ਤੋਂ ਇਲਾਵਾ ਸਹਾਇਕ ਕਮਿਸ਼ਨਰ (ਜ) ਸ੍ਰ. ਅਮਰਿੰਦਰ ਸਿੰਘ ਮੱਲ, ਵਧੀਕ ਡਿਪਟੀ ਕਮਿਸ਼ਨਰ ਪੁਲਿਸ ਸ੍ਰ. ਰਤਨ ਸਿੰਘ ਬਰਾੜ, ਜ਼ਿਲਾ ਖੇਡ ਅਫ਼ਸਰ ਸ੍ਰ. ਰਵਿੰਦਰ
ਸਿੰਘ, ਜ਼ਿਲਾ ਲੋਕ ਸੰਪਰਕ ਅਫਸਰ ਸ੍ਰੀ ਪ੍ਰਭਦੀਪ ਸਿੰਘ ਨੱਥੋਵਾਲ, ਸਾਈ ਕੇਂਦਰ ਤੋਂ ਸ੍ਰ. ਹਰਬੰਸ ਸਿੰਘ ਅਤੇ ਹੋਰ ਅਧਿਕਾਰੀ ਤੇ ਆਮ ਲੋਕ ਹਾਜ਼ਰ ਸਨ।

Monday, January 01, 2018

ਦੇਸ਼ ਦੇ ਭਵਿੱਖ ਲਈ ਖੱਬੀਆਂ ਤੇ ਜਮਹੂਰੀ ਸ਼ਕਤੀਆਂ ਇੱਕ ਮੁੱਠ ਹੋਣ–MCPI(U)

Mon, Jan 1, 2018 at 3:14 PM
ਫਾਸ਼ੀਵਾਦ ਅਤੇ ਫਿਰਕੂ ਤਾਕਤਾਂ ਦੇ ਟਾਕਰੇ ਲਈ ਏਕਤਾ ਬੇਹੱਦ ਜ਼ਰੂਰੀ 
ਦੋਰਾਹਾ: 1 ਜਨਵਰੀ 2017: (ਪੰਜਾਬ ਸਕਰੀਨ ਬਿਊਰੋ)::

ਮਾਰਕਸਿਸਟ ਕਮਿਊਨਿਸਟ ਪਾਰਟੀ ਆਫ ਇੰਡਿਆ (ਯੂਨਾਈਟਡ), ਪੰਜਾਬ ਦੀ ਸੁਰਿੰਦਰ ਸ਼ਹਿਜ਼ਾਦ ਦੀ ਪ੍ਰਧਾਨਗੀ ਹੇਠ ਹੋਈ ਸੂਬਾ ਕਮੇਟੀ ਦੀ ਮੀਟਿੰਗ ਵਿੱਚ ਐਮ ਸੀ ਪੀ ਆਈ (ਯੂਨਾਈਟਡ) ਦੀ ਕੇਂਦਰੀ ਕਮੇਟੀ ਦੀ ਪੰਜਾਬ ਦੇ ਜਿਲ੍ਹਾ ਸੰਗਰੂਰ ਵਿੱਚ ਹੋ ਰਹੀ ਅਹਿਮ ਮੀਟਿੰਗ ਦੇ ਏਜੰਡੇ ਵਿਸ਼ੇਸ਼ ਕਰਕੇ ਅੱਜ ਦੇਸ਼ ਅੰਦਰ ਬੀ ਜੇ ਪੀ ਅਤੇ ਹਿੰਦੂਤਵਾਵਾਦੀ ਸੰਗਠਨਾਂ ਵੱਲੋਂ ਫੈਲਾਈ ਜਾ ਰਹੀ ਫਿਰਕਾਪ੍ਰਸਤੀ ਤੇ ਫਾਸ਼ੀਵਾਦੀ ਨੀਤੀਆਂ ਅਤੇ ਕਾਂਗਰਸ ਸਰਕਾਰ ਵੱਲੋਂ ਲਾਗੂ ਕੀਤੀਆਂ ਲੋਕ ਵਿਰੋਧੀ ਸਾਮਰਾਜੀ ਵਿਸ਼ਵੀਕਰਨ, ਨਿੱਜੀਕਰਨ ਅਤੇ ਉਦਾਰੀਕਰਨ ਦੀਆਂ ਨੀਤੀਆਂ ਜਿਹਨਾਂ ਨੂੰ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਅਗਵਾਈ ਹੇਠ ਬੀ ਜੇ ਪੀ ਦੀ ਸਰਕਾਰ ਬੜੀ ਤੇਜ਼ੀ ਨਾਲ ਲਾਗੂ ਕਰ ਰਹੀ ਹੈ, ਵਿਰੁੱਧ ਸੰਘਰਸ਼ ਵਿੱਢਣ ਲਈ ਦੇਸ਼ ਦੀਆਂ ਖੱਬੀਆਂ ਤੇ ਜਮਹੂਰੀ ਸ਼ਕਤੀਆਂ ਨੂੰ ਇੱਕ ਸਾਂਝੇ ਪਲੈਟ ਫਾਰਮ ਉੱਪਰ ਕਿਸ ਤਰਾਂ ਇਕੱਠਾ ਕੀਤਾ ਜਾ ਸਕੇ ਉੱਪਰ ਗੰਭੀਰ ਵਿਚਾਰ ਚਰਚਾ ਕੀਤੀ ਗਈ।
ਮੀਟਿੰਗ ਦੀ ਕਾਰਵਾਈ ਪਤੱਰਕਾਰਾਂ ਨਾਲ ਸਾਂਝੀ ਕਰਦਿਆਂ ਐਮ ਸੀ ਪੀ ਆਈ (ਯੂਨਾਈਟਡ) ਸੂਬਾ ਸਕੱਤਰ ਪਵਨ ਕੁਮਾਰ ਕੌਸ਼ਲ ਨੇ ਦਸਿਆ ਕਿ ਗਵਾਂਢੀ ਦੇਸ਼ ਨੇਪਾਲ ਅੰਦਰ ਹੁਣੇ ਹੋਈਆਂ ਚੋਣਾ ਵਿੱਚ ਕਮਿਊਨਿਸਟ ਪਾਰਟੀਆਂ ਵਲੋਂ ਇਕੱਠੇ ਹੋਕੇ ਲੜੀਆਂ ਚੋਣਾ ਵਿੱਚ ਪ੍ਰਾਪਤ ਕੀਤੀ ਅਹਿਮ ਜਿੱਤ ਤੋਂ ਸਬਕ ਲੈਦਿਆਂ ਦੇਸ਼ ਦੀ ਖੱਬੀ ਧਿਰ ਨੂੰ ਦੇਸ਼ ਦੇ ਅਤੇ ਮਿਹਨਤਕਸ਼ ਵਰਗ ਦੇ ਹਿਤਾਂ ਨੂੰ ਮੁੱਖ ਰਖਦਿਆਂ ਇੱਕ ਮੁੱਠ ਹੋਣ ਦੀ ਲੋੜ ਤੇ ਜੋਰ ਦਿੱਤਾ ਗਿਆ।
ਪੋਲਿਟ ਬਿਊਰੋ ਮੈਂਬਰ ਕਾਮਰੇਡ ਕੁਲਦੀਪ ਸਿੰਘ ਨੇ ਰਾਸ਼ਟਰੀ ਤੇ ਅੰਤਰ-ਰਾਸ਼ਟਰੀ ਰਿਪੋਰਟ ਪੇਸ਼ ਕਰਦਿਆਂ ਦਸਿਆ ਕਿ ਵਿਸ਼ਵ ਦੇ ਪੂੰਜੀਵਾਦੀ ਦੇਸ਼ ਅੱਜ ਵੀ ੨੦੦੮ ਦੇ ਆਰਥਕ ਸੰਕਟ ਵਿੱਚੋਂ ਨਹੀ ਨਿਕਲ ਸਕੇ ਸਗੌਂ ਹਾਲਤ ਹੋਰ ਭੀ ਗੰਭੀਰ ਹੁੰਦੇ ਜਾ ਰਹੇ ਹਨ।ਅਮਰੀਕਾ ਜੇਰੁਸਲਮ ਨੂੰ ਜ਼ਿਰਾਈਲ ਦੀ ਰਾਜਧਾਨੀ ਐਲਾਨਣ ਦੇ ਮੁੱਦੇ ਉੱਪਰ ਅਲੱਗ-ਥਲੱਗ ਹੋ ਕੇ ਰਹਿ ਗਿਆ ਹੈ।ਉਤਰੀ ਕੋਰੀਆ ਦੇ ਅੰਦਰੂਨੀ ਮਾਮਲਿਆਂ ਵਿੱਚ ਬੇਲੋੜੀ ਦਖਲ ਅੰਦਾਜੀ ਕਾਰਨ ਵੀ ਅਮਰੀਕਾ ਨੂੰ ਮੂੰਹ ਦੀ ਖਾਣੀ ਪਵੇਗੀ।ਅਮਰੀਕਾ ਦੇ ਰਾਸ਼ਟਰਪਤੀ ਟਰੰਪ ਦੀਆਂ ਨੀਤੀ ਦਾ ਉਸਦੇ ਆਪਣੇ ਦੇਸ਼ ਅੰਦਰ ਭਾਰੀ ਵਿਰੋਧ ਹੌ ਰਿਹਾ ਹੈ।
ਪ੍ਰੇਮ ਸਿੰਘ ਭੰਗੂ ਪੋਲਿਟ ਬਿਊਰੋ ਮੈਂਬਰ ਨੇ ਦੇਸ਼ ਦੀ ਅੰਦਰੂਰੀ ਹਾਲਤ ਉੱਪਰ ਚਰਚਾ ਕਰਦਿਆਂ ਦਸਿਆ ਕਿ ਪ੍ਰਧਾਨ ਮੰਤਰੀ ਮੋਦੀ ਦੀ ਅਗਵਾਈ ਹੇਠ ਬੀ ਜੇ ਪੀ ਸਰਕਾਰ ਦਾ ਕੇਵਲ ਇੱਕੋ ਮੁੱਦਾ ਹੈ ਫਿਰਕੂ ਅਦਾਰ ਤੇ ਦੇਸ਼ ਹਿੰਦੂ-ਰਾਸ਼ਟਰ ਬਨਾਉਣਾ ਅਤੇ ਘੱਟ ਗਿਣਤੀ ਫਿਰਕਿਆਂ ਨੂੰ ਜਬਰ ਤੇ ਜੁਲਮ ਨਾਲ ਦਬਾਉਣਾ।ਦੇਸ਼ ਦੀ ਘੱਟ ਗਿਣਤੀ ਵਸੋਂ ਅਸੁਰਖਿਅਤ ਅਤੇ ਡਰ ਦੇ ਮਹੌਲ ਵਿੱਚੋਂ ਦੀ ਗੁਜਰ ਰਹੀ ਹੈ।ਦੇਸ਼ ਦੇ ਵਿਕਾਸ ਦੀ ਦਰ ਘੱਟ ਰਹੀ ਹੈ, ਬੇਰੁਜਗਾਰੀ, ਭੁੱਖ ਮਰੀ ਬਦ- ਅਮਨੀ ਵਧਦੀ ਜਾ ਰਹੀ ਹੈ ਅਤੇ ਅਰਾਜਕਤਾ ਦਾ ਮਹੌਲ ਪੈਦਾ ਹੁੰਦਾ ਜਾ ਰਿਹਾ ਹੈ।
ਸੂਬਾ ਸਕੱਤਰ ਪਵਨ ਕੁਮਾਰ ਕੌਸ਼ਲ ਨੇ ਪੰਜਾਬ ਦੀ ਕਾਂਗਰਸ ਸਰਕਾਰ ਦੀ ਹੁਣ ਤੱਕ ਦੀ ਕਾਰਗੁਜਾਰੀ ਦਾ ਜਿਕਰ ਕਰਦਿਆਂ ਕਿਹਾ ਕਿ ਇਹ ਪੰਜਾਬ ਦੇ ਲੋਕਾਂ ਦੇ ਮੂਹਾਂ ਤੋਂ ਲਹਿੰਦੀ ਜਾ ਰਹੀ ਹੈ।ਹੁਣ ਤੱਕ ਮੰਤਰੀ ਮੰਡਲ ਦਾ ਪੂਰਾ ਗਠਨ ਨਾਂ ਹੋ ਸਕਣਾ ਇਹ ਸੰਕੇਤ ਧਿਦਾ ਹੈ ਕਿ "ਸੱਭ ਕੁੱਝ ਅੱਛਾ ਨਹੀ ਹੈ"। ਚੋਣਾ ਦੋਰਾਨ ਲੋਕਾਂ ਨਾਲ ਕੀਤੇ ਵਾਦਿਆਂ ਵਿਚੋਂ ਕਿਸੇ ਇੱਕ ਨੂੰ ਵੀ ਅਮਲੀ ਜਾਮਾਂ ਨਹੀ ਦੇ ਸਕੀ, ਪੰਜਾਬ ਦਾ ਹਰ ਵਰਗ ਸਰਕਾਰ ਤੋਂ ਦੁੱਖੀ ਹੈ, ਕਿਸਾਨੀ ਦਾ ਕਰਜ ਮੁਆਫੀ ਦਾ ਮੁੱਦਾ ਵਿੱਚੇ ਹੀ ਲਟੱਕਦਾ ਹੈ, ਮਜਦੂਰਾਂ ਦੀਆਂ ਉਜਰਤਾਂ, ਮੁਲਾਜ਼ਮਾਂ ਤੇ ਪੈਨਸ਼ਨਰਾਂ ਦੀਆਂ ਮੰਗਾਂ ਪੁਰੀਆਂ ਕਰਨਾ ਉਥੇ ਦੀਆਂ ਉਥੇ ਹੀ ਲਟੱਕਦੀਆਂ ਹਨ।ਅਮਨ ਕਾਨੂੰ ਦੀ ਸਤਿਥੀ ਬਿਗੜਦੀ ਜਾ ਰਹੀ ਹੈ, ਗੈਂਗਸਟਰ ਸ਼ਰੇਆਮ ਘੁੰਮ  ਰਹੇ ਹਨ।
ਆਪਣੀਆਂ ਨਾਕਾਮੀਆਂ ਉੱਪਰ ਪਰਦਾ ਪਾਉਣ ਅਤੇ ਲੋਕਾਂ ਦੀਆ ਮੁਸ਼ਕਲਾਂ ਹੱਲ ਕਰਨ ਦੀ ਬਜਾਏ ਸਰਕਾਰ ਲੋਕਾਂ ਦੇ ਸੰਘਰਸ਼ਾਂ ਕੁਚਲਣ ਲਈ ਨਵੇਂ ਤੋਂ ਨਵੇਂ ਕਾਲੇ ਕਾਨੂੰਨ ਬਣਾ ਰਹੀ ਹੈ।ਪਿਛਲੀ ਅਕਾਲੀ- ਭਾਜਪਾ ਸਕਾਰ ਨੇ " ਪੰਜਾਬ ਜਨਤਕ ਤੇ ਨਿੱਜੀ ਜਾਇਦਾਦ ਨੁਕਸਾਨ ਰੋਕੂ ਕਾਨੂੰਨ" ਜਿਸਨੂੰ ਲੋਕਾਂ ਦੇ ਸਖਤ ਵਿਰੋਧ ਕਾਰਨ ਸਰਕਾਰ ਲਾਗੂ ਨਹੀ ਕਰ ਸਕੀ ਸੀ ਅਤੇ ਹੁਣ ਉਨ੍ਹਾਂ ਪਦ ਚਿਨ੍ਹਾਂ ਤੇ ਚਲਦਿਆਂ ਕਾਂਗਰਸ ਸਰਕਾਰ ਲੋਕ ਮਾਰੂ "ਪੰਜਾਬ ਕੰਟਰੋਲ ਆਫ ਆਰਗੇਨਾਈਜ਼ਡ ਕਰਾਈਮ ਐਕਟ" (ਪਕੋਕਾ) ਨਾਂ ਦਾ ਕਾਲਾ ਕਾਨੂੰਨ ਲਿਆ ਰਹੀ ਹੈ, ਜਿਸਦਾ ਹਰ ਪਾਸਿਆਂ ਤੋਂ ਵਿਰੋਧ ਹੋ ਰਿਹਾ ਹੈ ਅਤੇ ਇਹ ਕਾਨੂੰਨ ਹਰ ਹਾਲਤ ਵਿੱਚ ਰੱਦ ਕੀਤਾ ਜਾਵੇ।
ਮੀਟਿੰਗ ਵਿੱਚ ਬਠਿੰਡਾ ਥਰਮਲ ਪਲਾਂਟ ਨੂੰ ਬੰਦ ਕਰਨ ਦੀ ਵਿਰੋਧਤਾ ਕੀਤੀ ਗਈ ਅਤੇ ਇਸਨੂੰ ਨਿੱਜੀ ਕੰਪਨੀਆਂ ਨੂੰ ਗਫੇ ਦੇਣ ਹਿੱਤ ਇੱਕ ਡੂੰਘੀ ਸ਼ਾਜਸ਼ ਦਸਿਆ।ਸਰਕਾਰ ਤੋਂ ਸਮਾਜਿਕ ਸੁਰਖਿਆ ਅਧੀਨ ਸਬਸਿਡੀ ਉੱਪਰ ਲੋਕਾਂ ਨੂੰ ਦਿੱਤੇ ਜਾਂਦੇ ਅਨਾਜ ਦੀ ਸਪਲਾਈ ਯਕੀਨੀ ਬਨਾਉਣ, ਖੇਤੀ ਨੂੰ ਪਰਫੁਲਤ ਕਰਨ ਲਈ ਵਿਸ਼ਵ ਵਪਾਰ ਸੰਸਥਾਤ ੋਂ ਬਾਹਰ ਆਉਣ ਦੀ ਮੰਗ ਕੀਤੀ ਅਤੇ ਅਵਾਰਾ ਪਸ਼ੂਆਂ ਤੋਂ ਹੰਦੇ ਖੇਤੀ ਨੁਕਸਾਨ ਤੋਂ ਬਚਾਉਣ ਲਈ ਅਵਾਰਾ ਪਸ਼ੂਆਂ ਦੀ ਸਮਸਿਆ ਹੱਲ ਕਰਨ ਦੀ ਵੀ ਮੰਗ ਕੀਤਗਿਈ।

Sunday, October 15, 2017

ਪ੍ਰੈਸ ਲਾਇਨਜ਼ ਕਲੱਬ ਘਟੀਆ ਸਿਆਸਤ ਕਾਰਨ ਹੋਈ ਫੇਰ ਦੁਫਾੜ

ਸਰਗਰਮ ਪੱਤਰਕਾਰਾਂ ਖਿਲਾਫ ਐਕਸ਼ਨ ਦੀ ਸ਼ੁਰੂਆਤ ਕਿਸ ਦੇ ਇਸ਼ਾਰੇ ਉੱਤੇ? 
ਲੁਧਿਆਣਾ: 18 ਸਤੰਬਰ 2017: (ਪੰਜਾਬ ਸਕਰੀਨ ਬਿਊਰੋ):: 
ਪ੍ਰੈਸ ਲਾਇਨਜ਼ ਕਲੱਬ ਫਿਰ ਚਰਚਾ ਵਿੱਚ ਹੈ।  ਵਟਸਐਪ ਗਰੁੱਪ ਵਿੱਚ ਇਹ ਚਰਚਾ ਅੱਜ ਵੀ ਭਖੀ  ਹੋਈ ਸੀ। ਸੋਚਿਆ ਕਿਓਂ ਨਾ ਕਰੀਬ ਇੱਕ ਮਹੀਨਾ ਪਿਛੇ ਚੱਲੀਏ ਜਦੋਂ ਇਸ ਚਰਚਾ ਦਾ ਮੁੱਢ ਬੱਝਾ ਸੀ। ਇੱਕ ਜਰਨਲਿਸਟ ਸਾਥੀ ਦਾ ਐਕਸੀਡੈਂਟ ਹੋ ਗਿਆ। ਲੋਕ ਦੂਰੋਂ ਦੂਰੋਂ ਹਾਲ ਪੁੱਛਣ ਲਈ ਆਏ ਪਰ ਆਪਣੇ ਸਾਥੀਆਂ ਵਿੱਚੋਂ ਹੀ ਕਿਸੇ ਨੇ ਉਸਨੂੰ ਅਹੁਦੇ ਤੋਂ "ਫਾਰਗ" ਕਰ ਦਿੱਤਾ ਅਤੇ ਬਾਕੀਆਂ ਨੇ "ਸਹਿਮਤੀ" ਦੇ ਦਿੱਤੀ। ਜਦੋਂ ਇਹ ਕੁਝ ਕਰਨ ਵਾਲੇ ਅਜਿਹੇ ਲੋਕ ਏਕਤਾ ਦੇ ਦਾਅਵੇ ਕਰਦੇ ਹਨ ਤਾਂ ਹਾਸਾ ਆਉਂਦਾ ਹੈ। ਕਿਸੇ ਵੇਲੇ "ਪ੍ਰੈਸ ਲਾਇਨਜ਼ ਕਲੱਬ" ਪੱਤਰਕਾਰਾਂ ਦੇ ਹਿੱਤਾਂ ਲਈ ਕੰਮ ਕਰਨ ਵਾਲੀ ਇੱਕ ਸਿਰਮੌਰ ਜੱਥੇਬੰਦੀ ਸੀ। ਇਸਨੇ ਪੱਤਰਕਾਰਾਂ ਨੂੰ ਇੱਕ ਮੰਚ ਥੱਲੇ ਲਾਮਬੰਦ ਕੀਤਾ ਸੀ। "ਪੰਜਾਬ ਯੂਨੀਅਨ ਆਫ ਜਰਨਲਿਸਟਸ" ਤੋਂ ਬਾਅਦ ਐਹ ਇੱਕ ਸਫਲ ਤਜਰਬਾ ਸੀ। ਇਸ ਹਕੀਕਤ ਦੇ  ਬਾਵਜੂਦ ਇਸ  ਦਾ ਪੱਤਨ ਕਾਫੀ ਪਹਿਲਾਂ ਸ਼ੁਰੂ ਹੋ ਗਿਆ ਸੀ। ਦਰਅਸਲ ਇਹ ਸਿਲਸਿਲਾ ਉਸੇ ਦਿਨ ਸ਼ੁਰੂ ਹੋ ਗਿਆ ਸੀ। ਜਿਸ ਦਿਨ ਇਸਦੇ ਮੌਜੂਦਾ ਪ੍ਰਧਾਨ ਨੇ ਘਟੀਆ ਸਿਆਸਤ ਖੇਡ ਕੇ ਪ੍ਰਧਾਨਗੀ ਦੀ ਕੁਰਸੀ ਪ੍ਰਾਪਤ ਕਰਨ ਲਈ ਪੂਰਵਨਿਯੋਜਿਤ ਸਾਜ਼ਿਸ਼ੀ ਚਾਲ ਚੱਲੀ ਸੀ। ਜੱਥੇਬੰਦੀ ਦੇ ਕਈ ਦੂਸਰੇ ਸੂਝਵਾਨ ਸੀਨੀਅਰ ਆਗੂਆਂ ਨੇ ਜੱਥੇਬੰਦੀ ਅਤੇ ਆਪਣੀ ਇੱਜ਼ਤ ਦਾ ਖਿਆਲ ਕਰਦਿਆਂ ਚੁੱਪ ਰਹਿਣ ਵਿੱਚ ਹੀ ਬੇਹਤਰੀ ਸਮਝੀ ਸੀ।ਇਸ ਗੱਲ ਨੂੰ ਉਹਨਾਂ ਸਾਥੀਆਂ ਦੀ ਗੰਭੀਰਤਾ ਅਤੇ ਤਿਆਗ ਦੀ ਭਾਵਨਾ ਹੀ ਸਮਝਿਆ ਜਾ ਸਕਦਾ ਹੈ।  ਕਈਆਂ ਨੇ ਏਸੇ ਦਿਨ ਇਸ ਜੱਥੇਬੰਦੀ ਤੋਂ ਤੋੜਵਿਛੋੜਾ ਕਰਦਿਆਂ ਇਸ ਦੀਆਂ ਮੀਟਿੰਗਾਂ ਵਿੱਚ ਆਉਣਾ ਹੀ ਛੱਡ ਦਿੱਤਾ ਸੀ। ਆਖਿਰ ਹਾਲਾਤ ਅਜਿਹੇ ਬਣ ਗਏ ਕਿ ਜਿਸ ਲਾਇਨਜ਼ ਕਲੱਬ ਦੇ ਇੱਕ ਸੱਦੇ ਤੇ 100-150 ਪੱਤਰਕਾਰ ਤੁਰੰਤ ਪਹੁੰਚ ਜਾਂਦੇ ਸਨ ਉਸ ਦੀ ਮੀਟਿੰਗ ਵਿੱਚ ਹੁਣ 10 ਪੱਤਰਕਾਰਾਂ ਤੋਂ ਜਿਆਦਾ ਦਾ ਕੋਰਮ ਨਹੀ ਹੁੰਦਾ।  ਜਿਹਨਾਂ ਵਿੱਚੋਂ ਕਈਆਂ ਦਾ ਤਾਂ ਪ੍ਰੈਸ ਕਲੱਬ ਨਾਲ ਕੋਈ ਦੂਰ ਤੱਕ ਦਾ ਵਾਸਤਾ ਵੀ ਨਹੀਂ ਹੁੰਦਾ। ਨਵੀਂ ਪ੍ਰਧਾਨਗੀ ਵੇਲੇ ਹੀ ਕਈ ਫਾੜ ਹੋਈ ਇਹ ਜੱਥੇਬੰਦੀ ਆਖਰਕਾਰ ਅੱਜ ਆਪਣਾ ਆਖਰੀ ਸ਼ਾਹ ਵੀ ਉਦੋਂ ਛੱਡ ਗਈ ਜਦੋਂ ਬੜੀ ਹੀ ਘਟੀਆ ਤੇ ਹੋਛੀ ਸਿਆਸਤ ਕਰਦਿਆਂ ਪੱਤਰਕਾਰਾਂ ਦੀ ਭਲਾਈ ਅਤੇ ਏਕਤਾ ਲਈ ਹਮੇਸ਼ਾਂ ਸਰਗਰਮ ਰਹਿੰਦੇ ਪ੍ਰੈਸ ਲਾਇਨਜ਼ ਕਲੱਬ ਦੇ ਜਨਰਲ ਸਕੱਤਰ ਗੁਰਪ੍ਰੀਤ ਸਿੰਘ ਮਹਿਦੂਦਾਂ ਨੂੰ ਅਹੁਦੇ ਤੋਂ ਫਾਰਗ ਕਰਨ ਦੀ ਅੜੀ ਤਕਰੀਬਨ ਇੱਕ ਮਹੀਨਾ ਬਾਅਦ ਵੀ ਜਾਰੀ ਰੱਖੀ ਗਈ। ਜ਼ਿਕਰਯੋਗ ਹੈ ਕਿ ਸੜਕ ਹਾਦਸਾ ਹੋ ਜਾਣ ਕਾਰਨ ਸਾਥੀ ਮਹਿਦੂਦਾਂ ਕਾਫੀ ਦੇਰ ਤੋਂ ਜ਼ੇਰੇ ਇਲਾਜ ਹੈ।  ਉਸਦੀ ਇਸ ਮਜਬੂਰੀ ਮੌਕੇ ਇਸ ਪ੍ਰੈਸ ਕਲੱਬ ਨੇ ਮਹਿਦੂਦਾਂ ਨਾਲ ਆਪਣੀ ਇਹ "ਇੱਕਜੁੱਟਤਾ" ਦਿਖਾਈ ਹੈ।  ਜੁਝਾਰੂ ਪੱਤਰਕਾਰ ਮਹਿਦੂਦਾਂ ਨਾਲ ਇਸ ਧੱਕੇਸ਼ਾਹੀ ਦਾ ਜੋ ਕਾਰਨ ਸਾਹਮਣੇ ਆਇਆ ਹੈ ਉਹ ਵੀ ਹੈਰਾਨ ਕਰਨ ਵਾਲਾ ਹੈ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਮਹਿਦੂਦਾਂ ਜ਼ਿਲੇ ਦੀ ਕਲੱਬ ਬਣਾਉਣ ਲਈ ਕਰਵਾਈਆਂ ਜਾ ਰਹੀਆਂ ਚੋਣਾਂ ਦਾ ਹਮੇਸ਼ਾਂ ਹਾਮੀ ਸੀ। ਕਲੱਬ ਦਾ ਮੌਜੂਦਾ ਪ੍ਰਧਾਨ ਪੱਤਰਕਾਰਾਂ ਵਿੱਚ ਸਾਥੀ ਮਹਿਦੂਦਾਂ ਦੀ ਚੜ੍ਹਤ ਤੋਂ ਇਸ ਕਦਰ ਖਾਰ ਖਾਂਦਾ ਸੀ ਕਿ ਪ੍ਰਧਾਨ ਬਣਦੇ ਸਾਰ ਉਸਨੇ ਬਿਨਾ ਵਜਾਹ ਹੀ ਉਸਨੂੰ ਕਲੱਬ ਦੇ ਵਟਸਅਪ ਗਰੁੱਪ ਵਿੱਚੋਂ ਰਿਮੂਵ ਕਰ ਦਿੱਤਾ। ਇਸ ਤੋਂ ਬਾਅਦ ਸੱਚ ਨੂੰ ਸੱਚ ਆਖਣ ਵਾਲੇ ਬਾਕੀ ਪੱਤਰਕਾਰ ਵੀ ਹੋਲੀ ਹੋਲੀ ਰਿਮੂਵ ਕੀਤੇ ਗਏ। ਸ: ਮਹਿਦੂਦਾਂ ਨੇ ਜਨਰਲ ਸਕੱਤਰ ਹੋਣ ਦੇ ਨਾਤੇ ਏਸੇ ਨਾਮ ਦਾ ਆਪਣਾ ਵੱਖਰਾ ਗਰੁੱਪ ਬਣਾ ਲਿਆ। ਇਸਤੋਂ ਇਲਾਵਾ ਟੋਲ ਪਲਾਜ਼ਾ ਦੀ ਮੁਆਫੀ ਦੇ ਸਬੰਧ ਵਿੱਚ ਪੰਜਾਬ ਜਰਨਲਿਸਟ ਅਸੋਸੀਏਸ਼ਨ ਵੱਲੋਂ ਡਿਪਟੀ ਕਮਿਸ਼ਨਰ ਅਤੇ ਪੁਲਿਸ ਕਮਿਸ਼ਨਰ ਨੂੰ ਦਿੱਤੇ ਮੰਗ ਪੱਤਰ ਸਮੇਂ ਮੋਹਰੀ ਵੀ ਰਿਹਾ ਸੀ। ਟੋਲ ਪਲਾਜਾ ਤੇ ਧਰਨੇ ਦੌਰਾਨ ਪੱਤਰਕਾਰਾਂ ਉੱਤੇ ਹੋਏ ਝੂਠੇ ਪਰਚਿਆਂ ਦੇ ਹੱਕ ਵਿੱਚ ਅਤੇ ਕੰਨੜ ਪੱਤਰਕਾਰ ਗੌਰੀ ਲੰਕੇਸ਼ ਦੇ ਹੋਏ ਕਤਲ ਦੇ ਵਿਰੋਧ ਵਿੱਚ ਸ: ਮਹਿਦੂਦਾਂ ਨੇ ਜਨਰਲ ਸਕੱਤਰ ਹੋਣ ਦੇ ਨਾਤੇ ਕਲੱਬ ਵੱਲੋਂ ਸਾਰੇ ਅਖਬਾਰਾਂ ਨੂੰ ਪ੍ਰੈਸ ਨੋਟ ਵੀ ਜਾਰੀ ਕੀਤੇ ਸਨ। ਵੱਖਰਾ ਵਟਸਅਪ ਗਰੁੱਪ ਅਤੇ ਪੱਤਰਕਾਰਾਂ ਦੇ ਹੱਕ ਵਿੱਚ ਅਵਾਜ ਬੁਲੰਦ ਕਰਨ ਨੂੰ ਮੁੱਦਾ ਬਣਾ ਕੇ ਮੌਜੂਦਾ ਪ੍ਰਧਾਨ ਵੱਲੋਂ ਇਸਨੂੰ ਜਵਾਬ ਦੇਣ ਲਈ ਨੋਟਿਸ ਜਾਰੀ ਕੀਤਾ ਗਿਆ। ਪਤਾ ਲੱਗਾ ਕਿ ਸ: ਮਹਿਦੂਦਾਂ ਵੱਲੋਂ ਉਸ ਦਾ ਜਵਾਬ ਦਿੱਤਾ ਗਿਆ ਕਿ ਜਨਰਲ ਹਾਊਸ ਦੀ ਮੀਟਿੰਗ ਬੁਲਾਈ ਜਾਵੇ ਉਸ ਵਿੱਚ ਲਿਖਤੀ ਜਵਾਬ ਦਿੱਤਾ ਜਾਵੇਗਾ। ਚੱਲ ਸਕਣ ਤੋਂ ਅਸਮਰੱਥ ਹੋਣ ਕਾਰਨ ਉਹਨਾਂ ਇਸਦੇ ਲਈ ਥੋੜਾ ਸਮਾਂ ਵੀ ਮੰਗਿਆ। ਇਸਦੇ ਬਾਵਜੂਦ ਉਸਨੂੰ ਗਿਣਤੀ ਦੇ ਚਾਰ ਅਹੁਦੇਦਾਰਾਂ ਨੇ ਉਸਨੂੰ ਅਹੁਦਾ ਮੁਕਤ ਕਰਨ ਦਾ ਨਾਦਰਸ਼ਾਹੀ ਫੈਸਲਾ ਵੀ ਸੁਣਾ ਦਿੱਤਾ। ਏਥੇ ਇਹ ਵੀ ਜਾਣਕਾਰੀ ਮਿਲੀ ਹੈ ਕਿ ਉਸਨੂੰ ਨੋਟਿਸ ਕਲੱਬ ਦੇ ਕਿਸੇ ਜਨਰਲ ਸਕੱਤਰ ਵੱਲੋਂ ਜਾਰੀ ਕੀਤਾ ਗਿਆ ਸੀ ਜਿਸ ਤੇ ਸਵਾਲ  ਕਰਦਿਆਂ ਸ: ਮਹਿਦੂਦਾਂ ਨੇ ਕਿਹਾ ਸੀ ਕਿ ਸੰਵਿਧਾਨ ਮੁਤਾਬਿਕ ਕਲੱਬ ਦਾ ਜਨਰਲ ਸਕੱਤਰ ਇੱਕ ਹੈ ਅਤੇ ਉਹ ਮੈਂ ਖੁਦ ਹਾਂ ਇਸ ਲਈ ਮੈਨੂੰ ਨੋਟਿਸ ਪ੍ਰਧਾਨ ਜਾਰੀ ਕਰੇ। ਇਸ ਤੋਂ ਬਾਅਦ ਕਲੱਬ ਦੀ ਮੇਲ ਤੋਂ ਨੋਟਿਸ ਆਉਣ ਤੇ ਹੀ ਉਸਨੇ ਉਪਰੋਕਤ ਜਵਾਬ ਭੇਜਿਆ ਸੀ। ਏਥੇ ਵੀ ਪਤਾ ਲੱਗਾ ਹੈ ਕਿ ਅੱਜ ਦੀ ਕਾਰਵਾਈ ਦਾ ਜਵਾਬ ਵੀ ਸ: ਮਹਿਦੂਦਾਂ ਵੱਲੋਂ ਤੁਰੰਤ ਮੈਂਬਰਾਂ ਨੂੰ ਹੋਛੀ ਕਾਰਵਾਈ ਦੀ ਲਾਹਣਤ ਪਾਉਂਦਿਆਂ ਦਿੱਤਾ ਗਿਆ। ਹੁਣ ਮਾਮਲਾ ਕੀ ਹੈ ਏਹ ਤਾਂ ਮਹਿਦੂਦਾਂ ਹੀ ਦੱਸ ਸਕਦਾ ਹੈ ਪਰ ਏਹ ਗੱਲ ਤਾਂ ਸਾਫ ਹੋ ਗਈ ਹੈ ਕਿ ਪ੍ਰੈਸ ਲਾਇਨਜ਼ ਕਲੱਬ ਹੁਣ ਕਈ ਫਾੜ ਹੋ ਗਈ ਹੈ ਜੇ ਇੰਜ ਕਹਿ ਲਿਆ ਜਾਵੇ ਕਿ ਏਹ ਮੋਹਾਲੀ ਤੋਂ ਛੱਪਦੇ ਇੱਕ ਅਖਬਾਰ ਦੀ ਜੱਥੇਬੰਦੀ ਬਣ ਕੇ ਰਹਿ ਗਈ ਹੈ ਤਾਂ ਇਸ ਵਿੱਚ ਵੀ ਕੋਈ ਅੱਤਕਥਨੀ ਨਹੀ ਹੋਵੇਗੀ ਕਿਉਂਕਿ ਪ੍ਰਧਾਨ ਸੀਨੀਅਰ ਮੀਤ ਪ੍ਰਧਾਨ ਅਤੇ ਕੈਸ਼ੀਅਰ ਏਸੇ ਅਖਬਾਰ ਦੇ ਪੱਤਰਕਾਰ ਹਨ। ਉਂਝ ਖਦਸ਼ਾ ਹੈ ਕਿ ਇਸਦੀ ਮੌਜੂਦਾ ਟੀਮ ਨੂੰ ਕੋਈ ਅਜਿਹਾ ਵਿਅਕਤੀ ਰੀਮੋਟ ਕੰਟਰੋਲ ਰਾਹੀਂ ਚਲਾ ਰਿਹਾ ਹੈ ਜਿਹੜਾ ਨਹੀਂ ਚਾਹੁੰਦਾ ਕਿ ਲੁਧਿਆਣਾ ਦੇ ਪੱਤਰਕਾਰਾਂ ਦਰਮਿਆਨ ਵੀ ਬਾਕੀ ਸ਼ਹਿਰਾਂ ਦੇ ਪੱਤਰਕਾਰਾਂ ਵਾਂਗ ਮਜ਼ਬੂਤ ਇਕ ਹੋਵੇ। 
ਜ਼ਿਕਰਯੋਗ ਗੱਲ ਇਹ ਵੀ ਹੈ ਕਿ ਜਦੋਂ ਕਿਸੇ ਨਿਜੀ ਮਜਬੂਰੀ ਕਾਰਨ ਇਸਦੇ ਸੰਸਥਾਪਕ ਪ੍ਰਧਾਨ ਬੱਲੀ ਬਰਾੜ ਨੇ ਇਹ ਅਹੁਦਾ ਛੱਡਣ ਦੀ ਇੱਛਾ ਪ੍ਰਗਟ ਕੀਤੀ ਸੀ ਤਾਂ ਉਸ ਵੇਲੇ ਬੜੀ ਮੁਸ਼ਕਿਲ ਪ੍ਰਿਤਪਾਲ ਸਿੰਘ ਪਾਲੀ ਹੁਰਾਂ ਨੂੰ ਕਾਰਜਾਕਾਰੀ ਪ੍ਰਧਾਨ ਬਣਾਇਆ ਗਿਆ ਸੀ। ਕਈ ਮੈਂਬਰਾਂ ਦਾ ਕਹਿਣਾ ਹੈ ਕਿ ਉਸ ਲਿਹਾਜ਼ ਨਾਲ ਅਸਲੀ ਪ੍ਰਧਾਨ ਤਾਂ ਅਜੇ ਵੀ ਬੱਲੀ ਬਰਾੜ ਹੀ ਹੈ। ਜਨਾਬ ਬੱਲੀ ਬਰਾੜ ਆਪਣੇ ਹੀ ਲਾਏ ਪੌਦੇ ਨੂੰ ਦਰਖਤ ਬਣ ਜਾਣ ਮਗਰੋਂ ਹੁਣ ਕੱਟਿਆ ਜਾਂਦਾ ਕਿਓਂ ਦੇਖ ਰਹੇ ਹਨ ਇਹ ਉਹੀ ਜਾਨਣ। ਬਰਾੜ  ਸਾਹਿਬ ਨੂੰ ਅੱਗੇ ਆ ਕੇ ਇਸ ਟੀਮ ਦਾ ਪੁਨਰਗਠਨ ਕਰਨਾ ਚਾਹੀਦਾ ਹੈ। ਵਰਨਾ ਗੁਰਪ੍ਰੀਤ ਮਹਿਦੂਦਾਂ ਵਾਂਗ ਹਰ ਅਗਾਂਹਵਧੂ ਪੱਤਰਕਾਰ ਨੂੰ ਇਸ ਕਲੱਬ ਤੋਂ ਅਲੱਗ ਕਰ ਦਿੱਤਾ ਜਾਏਗਾ ਤਾਂਕਿ ਇਸ ਵਿੱਚ ਹੱਕ ਦੀ ਆਵਾਜ਼ ਉਠਾਉਣ ਵਾਲਾ ਕੋਈ ਨਾ ਰਹੇ। 
ਜਦੋਂ ਪਿੱਛੇ ਜਿਹੇ ਸਰਕਾਰੀ ਮਦਦ ਵਾਲਾ ਪ੍ਰੈਸ ਕਲੱਬ ਬਣਾਉਣ ਦਾ ਜ਼ਿੱਦੀ ਤੂਫ਼ਾਨ ਖੜਾ ਕੀਤਾ ਗਿਆ ਅਤੇ ਇਸ ਮਕਸਦ ਲਈ ਸਰਕਟ ਹਾਊਸ ਵਿੱਚ ਡੇਰਾ ਹੀ ਲਾ ਲਿਆ ਗਿਆ  ਸੀ ਉਸ ਵੇਲੇ ਜਿਹਨਾਂ ਨੇ ਖੁੱਲ ਕੇ ਸਟੈਂਡ ਲਿਆ ਉਹਨਾਂ ਵਿੱਚ ਲਾਇਨਜ਼ ਪ੍ਰੈਸ ਕਲੱਬ ਦੇ ਅਗਾਂਹਵਧੂ ਅਹੁਦੇਦਾਰ ਅਤੇ ਮੈਂਬਰ ਵੀ ਸ਼ਾਮਲ ਸਨ। ਜੇ ਅਜਿਹਾ ਨਾ ਕੀਤਾ ਗਿਆ ਹੁੰਦਾ ਤਾਂ ਭਗਵਾ ਬ੍ਰਿਗੇਡ ਦੇ ਪ੍ਰਭਾਵ ਵਾਲਾ ਪ੍ਰੈਸ ਕਲੱਬ ਬਣ ਚੁੱਕਿਆ ਹੋਣਾ ਸੀ। ਹੁਣ ਵੀ ਇਸਦੀਆਂ ਸਾਜ਼ਿਸ਼ਾਂ ਅੰਦਰਖਾਤੇ ਜਾਰੀ ਹਨ। ਲਾਇਨਜ਼ ਪ੍ਰੈਸ ਕਲੱਬ ਨੂੰ ਕਮਜ਼ੋਰ ਕਰਨਾ ਅਤੇ ਫਿਰ ਟੁਕੜੇ ਟੁਕੜੇ ਕਰ ਕੇ ਖਤਮ ਕਰਨ ਦੇ ਅੰਜਾਮ ਵੱਲ ਲਿਜਾਣਾ ਇਸ ਸਾਜ਼ਿਸ਼ ਦਾ ਹੀ ਹਿੱਸਾ ਹਨ।ਪੀਪਲਜ਼ ਮੀਡੀਆ ਕਲੱਬ ਅਤੇ ਅਤੇ ਹੋਰ ਲੋਕ ਪੱਖੀ ਅਗਾਂਹਵਧੂ ਹਲਕਿਆਂ ਦੀ ਇਸ ਸਾਰੇ ਘਟਨਾਕ੍ਰਮ ਉੱਪਰ ਪੂਰੀ ਨਜ਼ਰ ਹੈ। ਛੇਤੀ ਹੀ ਇਸ ਬਾਰੇ ਇੱਕ ਉਚੇਚੀ ਮੀਟਿੰਗ ਵੀ ਬੁਲਾਈ ਜਾਏਗੀ ਜਿਸ ਵਿੱਚ ਇਸ ਬਾਰੇ ਵਿਸਥਾਰਤ ਚਰਚਾ ਹੋਵੇਗੀ।  ਕੁਲ ਮਿਲਾ ਕੇ ਉਹਨਾਂ ਅਨਸਰਾਂ ਨੂੰ ਬੇਨਕਾਬ ਕਰਨਾ ਜ਼ਰੂਰੀ ਹੈ ਜਿਹੜੇ ਆਪਣੇ ਸਵਾਰਥਾਂ ਅਤੇ ਹੋਰ ਮੰਤਵਾਂ ਕਾਰਨ ਲੁਧਿਆਣਾ ਦੇ ਪੱਤਰਕਾਰਾਂ ਵਿੱਚ ਏਕਤਾ ਨਹੀਂ ਹੋਣ ਦੇਣਾ ਚਾਹੁੰਦੇ। 

ਸਬੰਧਤ ਲਿੰਕ ਵੀ ਦੇਖੋ:





Wednesday, October 04, 2017

Protest 5 ਅਕਤੂਬਰ ਨੂੰ: ਗੌਰੀ ਲੰਕੇਸ਼ ਦੇ ਲਹੂ ਦੀ ਲੋਅ ਸਾਡਾ ਰਾਹ ਰੁਸ਼ਨਾਏਗੀ

ਪੀਪਲਜ਼ ਮੀਡੀਆ ਲਿੰਕ ਵੀ ਸ਼ਾਮਲ ਹੋਵੇਗਾ CPI ਦੇ  ਰੋਸ ਮਾਰਚ ਵਿੱਚ 
ਲੁਧਿਆਣਾ: 4 ਅਕਤੂਬਰ 2017: (ਪੰਜਾਬ ਸਕਰੀਨ ਬਿਊਰੋ):: 
ਇੱਕ ਮਹੀਨਾ ਹੋ ਗਿਆ ਹੈ ਲੋਕਾਂ ਦੀ ਹਰਮਨ ਪਿਆਰੀ ਕੰਨੜ ਪੱਤਰਕਾਰ ਗੌਰੀ ਲੰਕੇਸ਼ ਦੇ ਕਤਲ ਨੂੰ।  ਉਸ ਤੋਂ ਬਾਅਦ ਮੋਹਾਲੀ ਵਿੱਚ ਪੱਤਰਕਾਰ ਕੇ ਜੇ ਸਿੰਘ ਅਤੇ ਤ੍ਰਿਪੁਰਾ ਵਿੱਚ ਪੱਤਰਕਾਰ ਸ਼ਾਂਤਨੂੰ ਭੌਮਿਕ ਨੂੰ ਵੀ ਕਤਲ ਕਰ ਦਿੱਤਾ ਗਿਆ। ਇਸ ਸਭ ਦੇ ਬਾਵਜੂਦ ਇਸ ਨਾਜ਼ੁਕ ਹਾਲਾਤ ਨੇ ਸਾਡੇ ਦਿਲ ਨੂੰ ਕੋਈ ਹਲੂਣਾ ਨਹੀਂ ਦਿੱਤਾ।  ਸਾਡੀ ਅੰਤਰ ਆਤਮਾ ਨਹੀਂ ਜਾਗੀ। ਸਾਨੂੰ ਕਦੇ ਮਹਿਸੂਸ ਨਹੀਂ ਹੋਇਆ ਕਿ ਅਚਾਨਕ ਕਿਸੇ ਦਿਨ ਸਾਡੀ ਵਾਰੀ ਵੀ ਆ ਸਕਦੀ ਹੈ ਜਾਂ ਸਾਡੇ ਵਿੱਚੋਂ ਹੀ ਕਿਸੇ ਹੋਰ ਦੀ ਵੀ। ਅਸੀਂ ਕਦੇ ਨਹੀਂ ਸੋਚਿਆ ਕਿ ਆਖਿਰ ਅਜੇ ਤੱਕ ਕਿਓਂ ਨਹੀਂ ਫੜੇ ਗਏ ਗੌਰੀ ਲੰਕੇਸ਼ ਦੇ ਕਾਤਲ। ਅਸੀਂ ਚੱਜ ਨਾਲ ਆਪਣੇ ਇਹਨਾਂ ਜਾਂਬਾਜ਼ ਪੱਤਰਕਾਰਾਂ ਦੇ ਕਤਲ ਦਾ ਸੋਗ ਵੀ ਨਹੀਂ ਮਨਾਇਆ। ਸ਼ਾਇਦ ਅਸੀਂ, ਖਾਸ ਕਰਕੇ ਲੁਧਿਆਣਾ ਦੇ ਜਮਹੂਰੀ ਲੋਕ ਅਤੇ ਕਲਮਕਾਰ, ਬੁਰੀ ਤਰ੍ਹਾਂ ਡਰ ਗਏ ਹਾਂ। ਇਸ ਵਿੱਚ ਕੋਈ ਹੈਰਾਨੀ ਵਾਲੀ ਗੱਲ ਵੀ ਨਹੀਂ। ਜ਼ੁਬਾਨਬੰਦੀ ਦੇ ਦੌਰ ਵਿੱਚ ਅਜਿਹਾ ਅਕਸਰ ਹੁੰਦਾ ਹੈ। ਸ਼ਾਇਦ ਅਸੀਂ ਵੀ ਇਸ ਦੌਰ ਦੀ ਦਹਿਸ਼ਤ ਦਾ ਸ਼ਿਕਾਰ ਹਾਂ। ਸ਼ਾਇਦ ਅਸੀਂ ਵੀ ਆਪਣੇ ਕਤਲ ਹੋਣ ਦੀ ਉਡੀਕ ਕਰ ਰਹੇ ਹਾਂ।   ਦੇਖ ਲੈਣਾ--ਸਾਡੇ ਕਤਲ ਤੇ ਵੀ ਜਾਂ ਤਾਂ ਬੋਲਣ ਵਾਲਾ ਕੋਈ ਬਚਿਆ ਨਹੀਂ ਹੋਵੇਗਾ ਜਾਂ ਫੇਰ ਕੋਈ ਬੋਲੇਗਾ ਹੀ ਨਹੀਂ। ਕਿਤੇ ਅਜਿਹਾ ਤਾਂ ਨਹੀਂ ਕਿ ਸਾਡੇ ਆਲੇ ਦੁਆਲੇ, ਸਾਡੀ ਸੋਚ, ਸਾਡੀ ਕਲਮ, ਸਾਡੀ ਆਜ਼ਾਦੀ 'ਤੇ ਗੌਰੀ ਦੇ ਕਾਤਲਾਂ ਨੇ ਕਬਜ਼ਾ ਤਾਂ ਨਹੀਂ ਕਰ ਲਿਆ? ਗੌਰੀ ਲੰਕੇਸ਼ ਦੇ ਕਤਲ 'ਤੇ ਖੁਸ਼ੀਆਂ ਮਨਾਉਣ ਵਾਲੇ  ਕਿਤੇ ਸਾਨੂੰ ਅੱਖਾਂ ਤਾਂ ਨਹੀਂ ਦਿਖਾਉਣ ਲੱਗ ਪਏ? 
ਜਿਹਨਾਂ ਨੇ ਅਜੇ ਤੱਕ ਗੌਰੀ ਲੰਕੇਸ਼ ਦੇ ਕਤਲ ਬਾਰੇ ਆਪਣੀ ਖਾਮੋਸ਼ੀ ਨਹੀਂ ਤੋੜੀ ਸ਼ਾਇਦ ਸਮਾਂ ਉਹਨਾਂ ਨੂੰ ਕਦੇ ਵੀ ਮਾਫ ਨਾ ਕਰੇ। ਸ਼ਾਇਦ ਉਹ ਵਿਚਾਰੇ ਨਹੀਂ ਜਾਣਦੇ ਕਿ ਗੌਰੀ ਦੀ ਕੁਰਬਾਨੀ ਕਿੰਨੀ ਅਰਥਪੂਰਨ ਹੈ, ਕਿੰਨੀ ਮਹੱਤਵਪੂਰਨ ਹੈ। ਸ਼ਾਇਦ ਸਾਡੇ ਵਿੱਚੋਂ ਬਹੁਤ ਸਾਰੇ ਨਹੀਂ ਜਾਣਦੇ ਕਿ ਅੱਜ ਦੇ ਕਾਰਪੋਰੇਟ ਮੀਡੀਆ ਵਾਲੇ ਕਾਰੋਬਾਰੀ ਦੌਰ ਵਿੱਚ ਗੌਰੀ ਸਾਨੂੰ ਕਿੰਨੇ ਹੀ ਰਸਤੇ ਦਿਖਾ ਗਈ ਹੈ, ਕਿੰਨੇ ਹੀ ਅਨਮੋਲ ਸਬਕ ਦੇ ਗਈ ਹੈ, ਜਿਹਨਾਂ 'ਤੇ ਚੱਲ ਕੇ ਹੀ ਅਸੀਂ ਆਪਣੀ ਕਲਮੀ ਆਜ਼ਾਦੀ ਨੂੰ ਵੀ ਬਚਾ ਸਕਦੇ ਹਾਂ ਅਤੇ ਕਿਰਤ ਕਮਾਈ ਵਾਲੀ ਜ਼ਿੰਦਗੀ ਵੀ ਸਿਰ ਚੁੱਕ ਕੇ ਗੁਜ਼ਾਰ ਸਕਦੇ ਹਾਂ। 
ਗੌਰੀ ਕੋਲ ਨੌਕਰੀਆਂ ਦੀ ਕੋਈ ਕਮੀ ਨਹੀਂ ਸੀ ਪਰ ਉਸਨੇ ਆਪਣਾ ਪਰਚਾ ਕੱਢਣ ਦਾ ਰਾਹ ਚੁਣਿਆ। ਉਸਨੂੰ ਪਤਾ ਸੀ ਇਸ਼ਤਿਹਾਰਾਂ ਬਿਨਾ ਇਹ ਪਰਚੇ ਨਹੀਂ ਚੱਲਦੇ ਪਰ ਉਸਨੇ ਬਿਨਾ ਇਸ਼ਤਿਹਾਰਾਂ ਦੇ ਇਹ ਪਰਚਾ ਘਰ ਘਰ ਪਹੁੰਚਾ ਕੇ ਦਿਖਾਇਆ। ਉਸਨੂੰ ਇਹ ਵੀ ਪਤਾ ਸੀ ਕਿ ਆਜ਼ਾਦੀ ਦੇ ਰਸਤੇ 'ਤੇ ਚੱਲਦਿਆਂ ਬਹੁਤ ਸਾਰੀਆਂ ਚੁਣੌਤੀਆਂ ਆਉਣਗੀਆਂ। ਗੌਰੀ ਨੇ ਹਮਖਿਆਲ ਲੋਕਾਂ ਦੀ ਇੱਕ ਟੀਮ ਬਣਾਈ। ਇਸ ਟੀਮ ਦੇ ਮੈਂਬਰਾਂ ਦੀ ਗਿਣਤੀ ਸਿਰਫ 50 ਸੀ। ਪਰ ਇਸ ਟੀਮ ਨੇ ਆਪਣੇ ਰਸਤੇ ਵਿੱਚ ਆਈ ਕਿਸੇ ਵੀ ਰੁਕਾਵਟ ਨੂੰ ਟਿਕਣ ਨਾ ਦਿੱਤਾ। ਆਖਿਰ ਗੌਰੀ ਨੇ ਜਿਹਨਾਂ ਵਿਚਾਰਾਂ ਦਾ ਪ੍ਰਗਟਾਵਾ ਕੀਤਾ। ਉਹਨਾਂ ਤੋਂ ਦੁਸ਼ਮਣ ਹੋਰ ਬੁਖਲਾ ਗਏ।  ਗੌਰੀ ਦਾ ਪਰਚਾ ਬੰਦ ਕਰਾਉਣ ਲਈ ਨਾ ਤਾਂ ਇਸ਼ਤਿਹਾਰ ਬੰਦ ਕਰਨ ਦਾ ਰੋਅਬ ਦਿਤਾ  ਜਾ ਸਕਦਾ ਸੀ ਅਤੇ ਨਾ ਹੀ ਕੋਈ ਹੋਰ ਧਮਕੀ। ਗੌਰੀ ਦੀ ਆਵਾਜ਼ ਲਗਾਤਾਰ ਹਰਮਨ ਪਿਆਰ ਹੋ ਰਹੀ ਸੀ। ਇਸ ਆਵਾਜ਼ 'ਤੇ ਸੈਂਸਰ ਲਾਉਣ ਲਈ ਆਖੀਰ ਗੋਲੀ ਦਾ ਸਹਾਰਾ ਲਿਆ ਗਿਆ। ਦੇਵੀ ਦੇ 9 ਰੂਪਾਂ ਦੀ ਪੂਜਾ ਕਰਨ ਵਾਲੇ ਦੇਸ਼ ਵਿੱਚ ਇੱਕ ਨਿਹੱਥੀ ਪੱਤਰਕਾਰ ਨੂੰ ਉਸਦੇ ਘਰ ਜਾ ਕੇ ਗੋਲੀਆਂ ਨਾਲ  ਭੁੰਨ ਦਿੱਤਾ ਗਿਆ। ਫਿਰ ਇਸ ਦੀਆਂ ਖੁਸ਼ੀਆਂ ਮਨਾਈਆਂ ਗਈਆਂ।  ਸੋਸ਼ਲ ਮੀਡੀਆ ਉੱਤੇ ਇਸ ਕਤਲ ਦੀ ਖੁਸ਼ੀ ਵਾਲੀ ਇੱਕ ਮੁਹਿੰਮ ਚਲਾਈ ਗਈ ਪਰ ਸਰਕਾਰ ਨੂੰ ਐਸ ਆਈ ਟੀ ਬਣਾ ਕੇ ਵੀ ਅਜੇ ਤੱਕ ਕਾਤਲ ਨਹੀਂ ਲੱਭੇ। 
ਅਸੀਂ ਸਾਰੇ ਇਸ ਸਭ ਕੁਝ ਨੂੰ ਦੇਖ ਰਹੇ ਹਾਂ। ਨੋਟ ਵੀ ਕਰ ਰਹੇ ਹਾਂ।  ਅਸੀਂ ਸਾਰੇ ਪੂਰੀ ਗੰਭੀਰਤਾ ਨਾਲ ਕਹਿਣਾ ਚਾਹੁੰਦੇ ਹਾਂ ਕਿ ਇਸ ਮਚਲੇਪਨ ਦੇ ਨਤੀਜੇ ਚੰਗੇ ਨਹੀਂ ਨਿਕਲਣਗੇ। ਹੁਣ ਘਰ ਘਰ ਗੌਰੀ ਲੰਕੇਸ਼ ਦਾ ਜਨਮ ਹੋਣ ਵਾਲਾ ਹੈ। ਜ਼ੁਬਾਨਬੰਦੀ ਦਾ ਇਹ ਖਤਰਨਾਕ ਦੌਰ ਸਾਨੂੰ ਹੋਰ ਤਕੜਿਆਂ ਕਰ ਰਿਹਾ ਹੈ। ਅਸੀਂ ਸਭਨਾਂ ਨੂੰ ਸੱਦਾ ਦੇਂਦੇ ਹਾਂ---
ਬੋਲ, ਕਿ ਲਬ ਆਜ਼ਾਦ ਹੈਂ ਤੇਰੇ
ਬੋਲ, ਜ਼ਬਾਂ ਅਬ ਤਕ ਤੇਰੀ ਹੈ
ਤੇਰਾ ਸੁਤਵਾਂ ਜਿਸਮ ਹੈ ਤੇਰਾ
ਬੋਲ, ਕਿ ਜਾਂ ਅਬ ਤਕ ਤੇਰੀ ਹੈ
ਗੌਰੀ ਲੰਕੇਸ਼ ਦੇ ਲਹੂ ਨੂੰ ਸਲਾਮੀ ਦੇਣ ਲਈ ਅਸੀਂ ਸਾਰੇ 5 ਅਕਤੂਬਰ 2017 ਨੂੰ ਰੇਲਵੇ ਸਟੇਸ਼ਨ 'ਤੇ ਸੀਪੀਆਈ ਵੱਲੋਂ ਕੀਤੇ ਜਾ ਰਹੇ ਰੋਸ ਵਿਖਾਵੇ ਅਤੇ ਰੋਸ ਮਾਰਚ ਵਿੱਚ ਸ਼ਾਮਲ ਹੋਵਾਂਗੇ। ਅਸੀਂ ਸਭਨਾਂ ਨੂੰ ਸੱਦਾ ਦੇਂਦੇ ਹਾਂ ਕਿ ਉਹ ਇਸ ਇਕੱਤਰਤਾ ਅਤੇ ਮਾਰਚ ਵਿੱਚ ਸ਼ਾਮਲ ਹੋਣ। ਗੌਰੀ  ਦੇ ਲਹੂ ਦੀ ਲੋਅ ਸਾਡਾ ਰਾਹ ਰੁਸ਼ਨਾਏਗੀ। ਜ਼ੁਬਾਨਬੰਦੀ ਦੇ ਇਸ ਦੌਰ ਵਿੱਚ ਗੌਰੀ ਦੀ ਕੁਰਬਾਨੀ ਸਾਨੂੰ ਨਵੀਂ ਹਿੰਮਤ ਦੇਵੇਗੀ। 

ਦ ਪੀਪਲਜ਼ ਮੀਡੀਆ ਲਿੰਕ, ਲੋਕ ਮੀਡੀਆ ਮੰਚ, ਜਨ ਮੀਡੀਆ ਮੰਚ, ਪੰਜਾਬ ਸਕਰੀਨ, 
ਸਤੀਸ਼ ਸਚਦੇਵਾ, ਪ੍ਰਦੀਪ ਸ਼ਰਮਾ, ਗੁਰਮੇਲ ਮੈਡਲੇ, ਰੈਕਟਰ ਕਥੂਰੀਆ, ਪਰਮਜੀਤ ਔਜਲਾ, ਪਰਮਿੰਦਰ ਕੌਰ, ਦਿਲਜੋਤ ਕੌਰ 

Wednesday, June 21, 2017

ਕਈ ਜੱਥੇਬੰਦੀਆਂ ਨੇ ਕੀਤਾ 25 ਜੂਨ ਵਾਲੀ ਪ੍ਰੈਸ ਕਲੱਬ ਦੀ ਚੋਣ ਦਾ ਬਾਈਕਾਟ

Wed, Jun 21, 2017 at 9:40 PM
ਹੁਣ 24 ਜੂਨ ਨੂੰ ਹੋਵੇਗੀ ਪ੍ਰੈਸ ਲਾਇਨਜ਼ ਕਲੱਬ ਦੀ ਚੋਣ 
ਲੁਧਿਆਣਾ: 21 ਜੂਨ 2017:(ਪੰਜਾਬ ਸਕਰੀਨ ਬਿਊਰੋ):: 
25 ਜੂਨ ਨੂੰ ਪ੍ਰੈਸ ਕਲੱਬ ਦੀ ਹੋਣ ਜਾ ਰਹੀ ਚੋਣ ਸੰਬਧੀ ਕਈ ਦਿਨਾਂ ਤੋਂ ਚੱਲ ਰਹੀ ਕਸ਼ਮਕਸ਼ ਨੂੰ ਆਖਰਕਾਰ ਉਦੋਂ ਪੱਕੀ ਬ੍ਰੇਕ ਲੱਗ ਗਈ ਜਦੋਂ ਪੱਤਰਕਾਰਾਂ ਦੀਆਂ ਵੱਖ ਵੱਖ ਜੱਥੇਬੰਦੀਆਂ ਦੇ ਵਫਦ ਨੂੰ ਅੱਜ ਮੁੜ ਡਿਪਟੀ ਕਮਿਸ਼ਨਰ ਸ੍ਰੀ ਪ੍ਰਦੀਪ ਅੱਗਰਵਾਲ ਨੇ ਏਹ ਆਖ ਦਿੱਤਾ ਕਿ ਕੋਈ ਵੀ ਚੋਣ ਪ੍ਰਸ਼ਾਸਨ ਵੱਲੋਂ ਨਹੀ ਕਰਵਾਈ ਜਾ ਰਹੀ ਅਤੇ ਨਾ ਹੀ ਇਸ ਤਰ੍ਹਾਂ ਦਾ ਕੋਈ ਆਦੇਸ਼ ਸਾਨੂੰ ਪ੍ਰਾਪਤ ਹੋਇਆ ਹੈ। ਉਹਨਾਂ ਕਿਹਾ ਕਿ ਕੁਝ ਦਿਨ ਪਹਿਲਾਂ ਕੁਝ ਪੱਤਰਕਾਰਾਂ ਨੇ ਪ੍ਰੈੱਸ ਕਲੱਬ ਬਣਾਉਣ ਲਈ ਚੋਣਾਂ ਕਰਵਾਉਣ ਦੀ ਗੱਲ ਕੀਤੀ ਸੀ ਪਰ ਪੱਤਰਕਾਰਾਂ ਦੀ ਆਪਸੀ ਸਹਿਮਤੀ ਨਾ ਹੋਣ ਕਾਰਨ ਪ੍ਰਸ਼ਾਸਨ ਵੱਲੋਂ ਇਸ ਚੋਣ ਵਿੱਚ ਕੋਈ ਵੀ ਰੋਲ ਅਦਾ ਨਹੀ ਕੀਤਾ ਜਾ ਰਿਹਾ। ਅੱਜ ਇਸ ਜੰਗ ਦੇ ਮੈਦਾਨ ਵਿੱਚ ਖੁੱਲ੍ਹ ਕੇ ਸਾਹਮਣੇ ਆਏ ਪਿਛਲੇ ਤਿੰਨਾਂ ਦਹਾਕਿਆਂ ਤੋਂ ਸਰਗਰਮ ਪੱਤਰਕਾਰ ਬਲਵੀਰ ਸਿੱਧੂ, ਸੁਨੀਲ ਜੈਨ, ਆਰ ਵੀ ਸਮਰਾਟ, ਸੰਜੀਵ ਸ਼ਰਮਾ, ਡਾਕਟਰ ਭਾਰਤ, ਵਿਸ਼ਨੂੰ ਅਤੇ ਕਿ ਹੋਰ ਸਰਗਰਮ ਸਾਥੀ। 
ਹੁਣ ਜੋ ਵੀ ਕਲੱਬ ਦੀ ਚੋਣ ਹੋਣ ਜਾ ਰਹੀ ਹੈ ਉਹ ਪੱਤਰਕਾਰਾਂ ਦੀ ਨਿੱਜੀ ਹੋ ਸਕਦੀ ਹੈ ਨਾ ਕਿ ਸਰਕਾਰ ਵੱਲੋਂ ਮਾਨਤਾ ਪ੍ਰਾਪਤ। ਉਹਨਾਂ ਵਫਦ ਨੂੰ ਸਾਫ ਆਖ ਦਿੱਤਾ ਕਿ ਜੇਕਰ ਕੱਲ ਨੂੰ ਮੈਂ ਪ੍ਰਦੀਪ ਕਲੱਬ ਬਣਾ ਲਵਾਂਗਾ ਤਾਂ ਉਹ ਕੇਵਲ ਨਿੱਜੀ ਹੋ ਸਕਦੀ ਹੈ। ਡੀ ਸੀ ਤੋਂ ਪਹਿਲਾਂ ਜ਼ਿਲਾ ਲੋਕ ਸੰਪਰਕ ਅਧਿਕਾਰੀ ਪ੍ਰਭਜੋਤ ਸਿੰਘ ਨੱਥੋਵਾਲ ਵੱਲੋਂ ਵੀ ਸਪਸ਼ਟ ਕੀਤਾ ਜਾ ਚੁੱਕਿਆ ਹੈ ਕਿ ਇਸ ਪ੍ਰਕਾਰ ਦੀ ਵਿਵਾਦਿਤ ਕਲੱਬ ਨੂੰ ਬਣਾਉਣ 'ਚ ਲੋਕ ਸੰਪਰਕ ਵਿਭਾਗ ਦਾ ਕੋਈ ਵੀ ਸਹਿਯੋਗ ਜਾਂ ਰੋਲ ਹੋਣ ਤੋਂ ਸਾਫ ਇਨਕਾਰ ਕਰ ਚੁੱਕੇ ਹਨ। ਜ਼ਿਲੇ ਦੇ ਦੋਵਾਂ ਅਧਿਕਾਰੀਆਂ ਦੇ ਅਜਿਹੇ ਜਵਾਬ ਤੋਂ ਸਤੁੰਸਟ ਹੋਏ ਪ੍ਰੈਸ ਲਾਇਨਜ ਕਲੱਬ ਨਾਲ ਗਈਆਂ ਚਾਰ ਹੋਰਨਾਂ ਜੱਥੇਬੰਦੀਆਂ ਦੇ ਪੱਤਰਕਾਰਾਂ ਨੇ ਵੀ 25 ਜੂਨ ਨੂੰ ਹੋਣ ਜਾ ਰਹੀ ਚੋਣ ਦਾ ਬਾਈਕਾਟ ਕਰਨ ਦਾ ਐਲਾਨ ਕਰ ਦਿੱਤਾ ਹੈ। ਇਸ ਸਬੰਧੀ ਗੱਲ ਕਰਦਿਆਂ ਕਾਰਜਕਾਰੀ ਪ੍ਰਧਾਨ ਆਰ ਵੀ ਸਮਰਾਟ ਨੇ ਕਿਹਾ ਕਿ 25 ਜੂਨ ਨੂੰ ਪ੍ਰੈਸ ਕਲੱਬ ਦੀ ਚੋਣ ਕਰਵਾਉਣ ਵਾਲੀ ਕਮੇਟੀ ਤੋਂ ਵਾਰ ਵਾਰ ਸੰਵਿਧਾਨ ਮੰਗਣ ਤੇ ਉਨਾਂ ਸੰਵਿਧਾਨ ਦੀ ਕਾਪੀ, ਰਜਿਟਰੇਸ਼ਨ ਦੀ ਕਾਪੀ ਅਤੇ ਇਸ ਕਲੱਬ ਵੱਲੋਂ ਪਾਸ ਕੀਤੇ ਮਤਿਆਂ ਦੀ ਕਾਪੀ ਨਹੀ ਦਿੱਤੀ। ਇਸ ਕਲੱਬ ਦੇ ਕਾਰਵਾਈ ਰਜਿਸਟਰ ਦੀ ਕੋਈ ਰਿਪੋਰਟ ਨਹੀ ਹੈ ਅਤੇ ਨਾ ਹੀ ਇਹ ਪਤਾ ਲੱਗ ਰਿਹਾ ਹੈ ਕਿ ਚੋਣਾਂ ਕਰਵਾਉਣ ਤੋਂ ਪਹਿਲਾਂ ਇਸ ਕਲੱਬ ਦੇ ਅਹੁਦੇਦਾਰਾਂ ਨੇ ਅਪਣੇ ਅਸਤੀਫੇ ਦਿੱਤੇ ਹਨ ਕਿ ਨਹੀ। ਸਾਰਾ ਮਾਮਲਾ ਗੋਲਮੋਲ ਅਤੇ ਜਾਲਸਾਜੀ ਵਾਲਾ ਹੋਣ ਕਾਰਨ ਅਤੇ ਪ੍ਰਸ਼ਾਸਨ ਵੱਲੋਂ ਇਸ ਤੋਂ ਪੱਲਾ ਝਾੜਨ ਕਾਰਨ ਅਸੀਂ ਵੀ 25 ਜੂਨ ਨੂੰ ਹੋਣ ਜਾ ਰਹੀਆਂ ਚੋਣਾਂ ਦਾ ਬਾਈਕਾਟ ਕਰ ਦਿੱਤਾ ਹੈ। ਉਹਨਾਂ ਕਿਹਾ ਕਿ ਅਸੀ ਲੁਧਿਆਣਾ ਵਿੱਚ ਸਰਕਾਰ ਵੱਲੋਂ ਮਾਨਤਾ ਪ੍ਰਾਪਤ ਪ੍ਰੈਸ ਕਲੱਬ ਬਣਾਉਣ ਲਈ ਯਤਨਸੀਲ ਹਾਂ ਅਤੇ ਏਸੇ ਕਾਰਨ ਇਸ ਕਲੱਬ ਨੂੰ ਹਰ ਪ੍ਰਕਾਰ ਦਾ ਸਹਿਯੋਗ ਦੇ ਰਹੇ ਸੀ। ਉਹਨਾਂ ਕਿਹਾ ਕਿ ਪ੍ਰੈਸ ਲਾਇਨਜ ਕਲੱਬ ਤਾਂ ਪਹਿਲਾਂ ਹੀ ਇਸ ਤੋਂ ਬੇਹਤਰ ਹੈ ਜੋ ਤਿੰਨ ਸਾਲ ਤੋਂ ਰਜਿਸਟਰ ਹੈ, ਮਤੇ ਪਾਉਂਦੀ ਹੈ, ਜਿਸ ਕੋਲ ਕਾਰਵਾਈ ਰਜਿਸਟਰ ਵੀ ਹੈ ਤੇ ਅਹੁਦੇਦਾਰ ਵੀ ਹਨ। ਮੌਜੂਦਾ ਸਮੇਂ ਪੱਤਰਕਾਰਾਂ ਨੂੰ ਮਿਲ ਰਹੀਆਂ ਸਹੂਲਤਾਵਾਂ ਅਕਾਲੀ ਭਾਜਪਾ ਸਰਕਾਰ ਤੋਂ ਲੈ ਚੁੱਕੀ ਹੈ, ਪ੍ਰੈਸ ਕਲੱਬ ਲਈ ਜਿਥੇ 1284 ਗਜ ਜਗਾ ਲੱਗਭਗ ਅਲਾਟ ਕਰਵਾ ਚੁੱਕੀ ਹੈ ਉਥੇ ਹੀ ਪ੍ਰਾਪਤ ਹੋਈ ਜਾਣਕਾਰੀ ਮੁਤਾਬਿਕ ਮੌਜੂਦਾ ਕਾਂਗਰਸ ਸਰਕਾਰ ਨੇ 1 ਕਰੋੜ ਦਾ ਬਜਟ ਵੀ ਲੁਧਿਆਣਾ ਦੀ ਪ੍ਰੈਸ ਕਲੱਬ ਲਈ ਰਾਖਵਾਂ ਰੱਖਿਆ ਹੈ। ਪਿਛਲੀ ਮੀਟਿੰਗ ਦੇ ਪਾਸ ਕੀਤੇ 7 ਮੁੱਦਿਆਂ 'ਚੋਂ ਇੱਕ ਅਹਿਮ ਮੁੱਦਾ ਵੀ ਇਸ ਸਰਕਾਰ ਨੇ ਜਲਦ ਮੰਨਣ ਦੀ ਹਾਮੀਂ ਭਰ ਦਿੱਤੀ ਹੈ। ਉਹਨਾਂ ਕਿਹਾ ਕਿ ਪ੍ਰੈਸ ਕਲੱਬ ਦੇ ਪ੍ਰਧਾਨ ਸਮੇਤ ਸਾਰੀ ਬਾਡੀ ਭੰਗ ਕਰਕੇ ਪ੍ਰੈਸ ਲਾਇਨਜ਼ ਕਲੱਬ ਨੂੰ ਮੌਜੂਦਾ ਸਮੇਂ ਅਜਾਦ ਛੱਡ ਦਿੱਤਾ ਗਿਆ ਹੈ। ਪੱਤਰਕਾਰਾਂ ਦੀ ਬੇਹਤਰੀ ਲਈ 24 ਜੂਨ ਨੂੰ ਇਸ ਦੀ ਬਾਡੀ ਦੀ ਚੋਣ ਪੰਜਾਬੀ ਭਵਨ ਵਿਖੇ ਸਵੇਰੇ 11 ਵਜੇ ਰੱਖੀ ਗਈ ਹੈ। ਉਹਨਾਂ ਪੱਤਰਕਾਰਤਾ ਦੇ ਖੇਤਰ ਵਿੱਚ ਘੱਟੋ ਘੱਟ ਤਿੰਨ ਸਾਲ ਦਾ ਤਜੁਰਬਾ ਰੱਖਣ ਵਾਲੇ ਪੱਤਰਕਾਰਾਂ ਨੂੰ ਇਸ ਚੋਣ ਦਾ ਹਿੱਸਾ ਬਣਨ ਦੀ ਅਪੀਲ ਕਰਦਿਆਂ ਗੁੰਮਰਾਹਕੁੰਨ ਪ੍ਰਚਾਰ ਤੋਂ ਬਚਣ ਲਈ ਕਿਹਾ। ਉਹਨਾਂ ਕਿਹਾ 24 ਜੂਨ ਨੂੰ ਅਬਜ਼ਰਵਰ ਕਮੇਟੀ ਪਾਰਦਰਸ਼ੀ ਢੰਗ ਨਾਲ ਚੋਣ ਕਰਵਾ ਕੇ ਨਵੀਂ ਬਾਡੀ ਦਾ ਐਲਾਨ ਕਰੇਗੀ। ਇਸ ਮੌਕੇ ਵੱਡੀ ਗਿਣਤੀ ਵਿੱਚ ਪੱਤਰਕਾਰ ਭਾਈਚਾਰਾ ਮੌਜੂਦ ਸੀ।   

Friday, April 07, 2017

ਰਾਮਨੌਮੀ: ਅਯੁੱਧਿਆ ਵਿੱਚ ਨਾਮਧਾਰੀ ਸੰਗਤ ਵੱਲੋਂ ਬੋਲੇ ਸੋ ਨਿਹਾਲ ਦੇ ਨਾਅਰੇ

ਨਾਮਧਾਰੀ ਸਿੱਖਾਂ ਨੇ ਅਯੋਧਿਆ ਵਿਖੇ ਮਨਾਇਆ ਰਾਮਨੌਮੀ ਦਾ ਤਿਓਹਾਰ 
9 ਅਪ੍ਰੈਲ ਨੂੰ ਦਿੱਲੀ ਵਿਖੇ ਵੀ ਰਾਮ ਨੌਮੀ ਸਮਾਗਮਾਂ ਦੀਆਂ ਤਿਆਰੀਆਂ 
ਅਯੁੱਧਿਆ//ਲੁਧਿਆਣਾ: 6 ਅਪ੍ਰੈਲ 2017: (ਪੰਜਾਬ ਸਕਰੀਨ ਬਿਊਰੋ):: 
ਪੰਜਾਬ ਵਿੱਚ ਹਿੰਦੂਆਂ ਅਤੇ ਸਿੱਖਾਂ ਦੇ ਧਾਰਮਿਕ ਗ੍ਰੰਥਾਂ ਦੀਆਂ ਬੇਅਦਬੀਆਂ ਦੇ ਜ਼ਖਮ ਭਾਵੇਂ ਅਜੇ ਵੀ ਤਾਜ਼ਾ ਹਨ ਪਰ ਨਾਮਧਾਰੀ ਪੰਥ ਨੇ ਕਿਸੇ ਵੀ ਸੰਭਾਵਤ ਫੁੱਟ ਅਤੇ ਟਕਰਾਓ ਨੂੰ ਟਾਲਣ ਲਈ ਹਿੰਦੂ ਸਿੱਖ ਏਕਤਾ ਦੀਆਂ ਕੋਸ਼ਿਸ਼ਾਂ ਤੇਜ਼ ਕਰ ਦਿੱਤੀਆਂ ਗਈਆਂ ਹਨ। ਅਯੁੱਧਿਆ ਵਿੱਚ ਨਾਮਧਾਰੀ ਸੰਗਤ ਅਤੇ ਹਿੰਦੂ ਸੰਗਤ ਵੱਲੋਂ ਬੋਲੇ ਸੋ ਨਿਹਾਲ ਦੇ ਨਾਅਰਿਆਂ ਨੇ ਇਸ ਏਕਤਾ ਨੂੰ ਮਜ਼ਬੂਤ ਕਰਨ ਦੇ ਮਾਮਲੇ ਵਿੱਚ ਇੱਕ ਨਵਾਂ ਇਤਿਹਾਸ ਰਚਿਆ ਹੈ। 
ਨਾਮਧਾਰੀ ਸਿੱਖਾਂ ਵੱਲੋਂ ਹਿੰਦੂ ਸਿੱਖ ਏਕਤਾ ਨੂੰ ਮਜ਼ਬੂਤ ਕਰਨ ਦੇ ਉਪਰਾਲੇ ਲਗਾਤਾਰ ਜਾਰੀ ਹਨ। ਇਸ ਮਕਸਦ ਨਾਲ ਹੀ ਅਯੋਧਿਆ ਵਿਖੇ ਰਾਮ ਨੌਮੀ ਦਾ ਤਿਓਹਾਰ ਨਾਮਧਾਰੀ ਸਿੰਘਾਂ ਵੱਲੋਂ ਬੜੀ ਸ਼ਰਧਾ ਅਤੇ ਉਤਸ਼ਾਹ ਨਾਲ ਮਨਾਇਆ ਗਿਆ। ਇਹੀ ਤਿਓਹਾਰ ਹੁਣ 9 ਅਪ੍ਰੈਲ ਨੂੰ ਦਿੱਲੀ ਵਿਖੇ ਵੀ ਧੂਮਧਾਮ ਨਾਲ ਮਨਾਇਆ ਜਾਣਾ ਹੈ। ਨਾਮਧਾਰੀ ਸੰਗਤਾਂ ਨੇ ਇਸ ਸਬੰਧੀ ਹੋਏ ਸਮਾਗਮਾਂ ਵਿੱਚ ਅਯੁੱਧਿਆ ਵਿਖੇ ਵੀ ਵੱਧ ਚੜ੍ਹ ਕੇ ਭਾਗ ਲਿਆ ਅਤੇ ਦਿੱਲੀ ਵਿੱਚ ਵੀ ਨਾਮਧਾਰੀ ਸੰਗਤ ਵਹੀਰਾਂ ਘੱਟ ਕੇ ਪੁੱਜੇਗੀ। ਨਾਮਧਾਰੀ ਪੰਥਕ ਏਕਤਾ ਸੰਗਤ ਵੱਲੋਂ ਇਹ ਜਾਣਕਾਰੀ ਦੇਂਦਿਆਂ ਸੰਤ ਤੇਜਿੰਦਰ ਸਿੰਘ ਨੇ ਕਿਹਾ ਕਿ ਇਹ ਸਭ ਕੁਝ ਨਾਮਧਾਰੀ ਪੰਥ ਦੇ ਵਰਤਮਾਨ ਮੁਖੀ ਸ੍ਰੀ ਸਤਿਗੁਰੂ ਦਲੀਪ ਸਿੰਘ ਜੀ ਦੇ ਹੁਕਮ ਅਨੁਸਾਰ ਕੀਤਾ ਜਾ ਰਿਹਾ ਹੈ। 
ਸੰਤ ਤੇਜਿੰਦਰ ਸਿੰਘ ਨਾਮਧਾਰੀ ਨੇ ਦੱਸਿਆ ਕਿ ਹਿੰਦੂ-ਸਿੱਖ ਏਕਤਾ ਦੇ ਮੰਤਵ ਨੂੰ ਮੁੱਖ ਰੱਖਦਿਆਂ ਹੋਇਆ ਭਗਵਾਨ ਸ੍ਰੀ ਰਾਮ ਚੰਦਰ ਜੀ ਦੀ ਜਨਮ ਭੂਮੀ ਅਯੋਧਿਆ ਵਿੱਖੇ ਰਾਮ ਨੋਮੀ ਦਾ ਪੁਰਬ ਹਿੰਦੂ ਭਰਾਵਾਂ ਨਾਲ ਮਿਲ ਕੇ ਮਨਾਇਆ ਗਿਆ ਹੈ। ਹਿਂਦੂ ਸਿੱਖ ਏਕਤਾ ਨੂੰ ਹੋਰ ਮਜਬੂਤ ਕਰਨ ਵਾਸਤੇ ਇਹ ਇਕ ਹੋਰ ਪਹਿਲ ਕਦਮੀ ਹੈ ਜਿਸ ਦਾ ਹਿੰਦੂ ਸੰਗਠਨਾਂ ਨੇ ਵੀ ਨਿੱਘਾ ਸਵਾਗਤ ਕੀਤਾ ਹੈ। ਵਿਸ਼ਵ ਹਿੰਦੂ ਪ੍ਰੀਸ਼ਦ ਦੇ ਜਨਰਲ ਸਕੱਤਰ ਚਂਪਤ ਰਾਏ ਵੱਲੋਂ ਇਸਨੂੰ ਅੱਜ ਦੇ ਹਾਲਾਤ ਵਿੱਚ ਇੱਕ ਇਤਿਹਾਸਿਕ ਕਦਮ ਦੱਸਿਆ ਗਿਆ ਹੈ।  
ਇਹਨਾਂ ਸਮਾਗਮਾਂ ਦਾ ਵੇਰਵਾ ਮੀਡੀਆ ਨੂੰ ਦੇਂਦਿਆਂ ਸੰਤ ਤਜਿੰਦਰ ਸਿੰਘ ਨਾਮਧਾਰੀ ਨੇ ਕਿਹਾ ਕਿ ਸੁਬਾ ਭਗਤ ਸਿੰਘ ਜੀ ਦੀ ਅਗਵਾਈ ਹੇਠ ਉੱਤਰ ਪ੍ਰਦੇਸ਼ ਦੀ  ਨਾਮਧਾਰੀ ਸੰਗਤਾਂ ਦਾ ਬਹੁਤ ਵੱਡਾ ਜੱਥਾ ਸ੍ਰੀ ਸਤਿਗੁਰੂ ਦਲੀਪ ਸਿੰਘ ਜੀ ਦੇ ਹਿੰਦੂ-ਸਿੱਖ ਏਕਤਾ ਦੇ ਨਾਅਰੇ ਨੂੰ ਅਮਲੀ ਜਾਮਾ ਪਹਿਨਾਉਣ ਲਈ ਅਯੋਧਿਆ ਵਿਖੇ ਰਾਮਨੌਮੀ ਪੁਰਬ ਮਨਾਉਣ ਲਈ ਪਹੁੰਚਿਆ। ਜਿੱਥੇ ਇਸ ਜੱਥੇ ਵੱਲੋ ਅੰਮ੍ਰਿਤ ਵੇਲੇ ਜਾਨਕੀ ਘਾਟ ਵਿਖੇ ਆਸਾ ਦੀ ਵਾਰ ਦਾ ਕੀਰਤਨ  ਕੀਤਾ ਗਿਆ ਉਥੇ ਹੀ ਭਗਵਾਨ ਸ੍ਰੀ ਰਾਮ ਚੰਦਰ ਜੀ ਦੀ ਆਰਤੀ ਨਾਮਧਾਰੀ ਸਿੱਖਾਂ ਵੱਲੋਂ ਅਤੇ ਹਿੰਦੂ ਵੀਰਾਂ ਵੱਲੋ ਰਲ ਮਿਲ ਕੇ ਕੀਤੀ ਗਈ। ਹਿੰਦੂ ਵੀਰਾਂ ਵੱਲੋ ਅਯੋਧਿਆ ਰਾਮ ਮੰਦਰ ਵਿੱਚ ਬੋਲੇ ਸੋ ਨਿਹਾਲ ਦੇ ਜੈਕਾਰੇ ਵੀ ਲਗਾਏ ਗਏ। ਹਿੰਦੂ ਅੱਤੇ ਨਾਮਧਾਰੀ ਸਿੱਖਾਂ ਨੂੰ ਇਕੱਠਿਆਂ ਰਾਮਨੌਮੀ ਪੁਰਬ ਮਨਾਉਂਦੇ ਦੇਖ ਕੇ ਪਹੁੰਚੀ ਹੋਈ ਸਾਰੀ ਸੰਗਤ ਦਾ ਉਤਸ਼ਾਹ ਠਾਠਾਂ ਮਾਰ ਰਿਹਾ ਸੀ। ਸੰਤ ਹਰਵਿੰਦਰ ਸਿੰਘ ਯੂ ਪੀ ਨੇ ਕਿਹਾ ਕਿ ਅਸੀ ਦੇਸ਼ ਅੰਦਰ ਸ਼ਾਂਤੀ ਚਾਹੁੰਦੇ ਹਾਂ। ਇਹ ਤਾਂ ਹੀ ਸੰਭਵ ਹੋ ਸਕਦਾ ਹੈ ਅਗਰ ਅਸੀ ਭਾਰਤੀ ਆਪਸ ਵਿੱਚ ਮਿਲ ਕੇ ਰਹਾਂਗੇ। ਇਸ ਮੌਕੇ ਉਪਰ ਕਥਾ ਕਰਦੇ ਹੋਏ ਸ੍ਰੀ ਅਤੁਲ ਭਾਰਦਵਾਜ ਜੀ ਨੇ ਉਚੇਚੇ ਤੌਰ ਤੇ ਸ੍ਰੀ ਸਤਿਗੁਰੂ ਤੇਗ ਬਹਾਦਰ ਸਾਹਿਬ ਜੀ, ਸ੍ਰੀ ਸਤਿਗੁਰੂ ਗੋਬਿੰਦ ਸਿੰਘ ਜੀ ਅਤੇ ਚਾਰੇ ਸਾਹਿਬਜ਼ਾਦਿਆਂ ਦੀ ਦੇਸ਼ ਲਈ ਕੀਤੀ ਕੁਰਬਾਨੀ ਦੀ ਬਹੁਤ ਹੀ ਸ਼ਲਾਘਾ ਕੀਤੀ ।
ਇਸ ਮੌਕੇ ਉਪਰ ਨਾਮਧਾਰੀ ਸਿੱਖਾਂ ਵੱਲੋ ਮੰਦਰ ਵਿਚ ਸ੍ਰੀ ਸਤਿਗੁਰੂ ਨਾਨਕ ਦੇਵ ਜੀ ਦੀਆਂ ਤਸਵੀਰਾਂ ਵੀ ਵੰਡੀਆਂ ਗਈਆਂ। ਜਿਸ ਨੂੰ ਹਿੰਦੂ ਵੀਰਾਂ ਨੇ ਖੁਸ਼ੀ ਨਾਲ ਪ੍ਰਾਪਤ ਕਰਕੇ ਨਮਸ਼ਕਾਰ ਕੀਤੀ।
ਨਾਮਧਾਰੀ ਸੰਗਤ ਵੱਲੋਂ ਸ੍ਰੀ ਸਤਿਗੁਰੂ ਦਲੀਪ ਸਿੰਘ ਜੀ ਦੀ ਪਵਿੱਤਰ ਹਜੂਰੀ ਵਿੱਚ ਹਿੰਦੂ-ਸਿੱਖ ਏਕਤਾ ਕਰਵਾਉਣ ਵਾਸਤੇ ਰਾਮਨੌਮੀ ਪੁਰਬ ਮਿਤੀ  9 ਅਪ੍ਰੈਲ 2017  ਨੂੰ ਸ਼ਾਮ 5 ਵਜੇ ਤੋ 9 ਵਜੇ ਤੱਕ ਨਵੀ ਦਿੱਲੀ ਵਿਖੇ ਬਹੁਤ ਹੀ ਵੱਡੇ ਪੱਧਰ ਤੇ ਮਨਾਇਆ ਜਾ ਰਿਹਾ ਹੈ।

Wednesday, December 14, 2016

ਸਮੂਹ ਮਨੁੱਖਤਾ ਦੇ ਏਕੇ ਲਈ ਸਰਗਰਮ ਠਾਕੁਰ ਦਲੀਪ ਸਿੰਘ

ਲੁਧਿਆਣਾ ਫੇਰੀ ਦੌਰਾਨ ਫਿਰ ਦਿੱਤਾ ਏਕੇ ਦਾ ਸੁਨੇਹਾ
ਕਿਹਾ-ਹਰ ਮਨੁੱਖ ਇੱਕ ਦੂਜੇ ਦੇ ਦੁੱਖ ਸੁੱਖ ਨੂੰ ਮਹਿਸੂਸ ਕਰੇ
ਲੁਧਿਆਣਾ: 13 ਦਸੰਬਰ 2016: (ਪੰਜਾਬ ਸਕਰੀਨ ਬਿਓਰੋ): ਹੋਰ ਤਸਵੀਰਾਂ ਦੇਖਣ ਲਈ ਇਥੇ ਕਲਿੱਕ ਕਰੋ 
ਨਾਮਧਾਰੀਆਂ ਦੀ ਬਹੁਗਿਣਤੀ ਹੋਣ ਦਾ ਦਾਅਵਾ ਕਰਨ ਵਾਲੀ ਧਿਰ ਨਾਲ ਸਬੰਧਤ ਸਤਿਗੁਰੂ ਠਾਕੁਰ ਦਲੀਪ ਸਿੰਘ ਅੱਜ ਫਿਰ ਲੁਧਿਆਣਾ ਵਿੱਚ ਸਨ। ਨਾਮਧਾਰੀਆਂ ਦੇ ਨਾਲ ਨਾਲ ਸਿੱਖਾਂ ਦੇ ਸਭਨਾਂ ਧੜਿਆਂ ਅਤੇ ਹਿੰਦੂਆਂ ਨੂੰ ਇੱਕਜੁੱਟ ਕਰਨ ਵਿੱਚ ਸਰਗਰਮ ਠਾਕੁਰ ਦਲੀਪ ਸਿੰਘ ਨੇ ਅੱਜ ਫਿਰ ਏਕਤਾ ਦਾ ਸੁਨੇਹਾ ਦੇਂਦਿਆਂ ਕਿਹਾ ਕਿ ਏਕਤਾ ਵਿੱਚ ਬੜਾ ਪ੍ਰਤਾਪ ਹੁੰਦਾ ਹੈ। 
ਨਾਮਧਾਰੀ ਸੰਪਰਦਾ ਦੇ ਨਾਲ ਨਾਲ ਸਮੂਹ ਲੋਕਾਈ ਨੂੰ ਇੱਕ ਕਰਨ ਦੇ ਜਤਨਾਂ ਵਿੱਚ ਸਰਗਰਮ ਨਾਮਧਾਰੀ ਸਤਿਗੁਰੂ ਠਾਕੁਰ ਦਲੀਪ ਸਿੰਘ ਜੀ ਨੇ ਅੱਜ ਅਚਾਨਕ ਲੁਧਿਆਣਾ ਦੀਆਂ ਸੰਗਤਾਂ ਨੂੰ ਦਰਸ਼ਨ ਦੇ ਕੇ ਨਿਹਾਲ ਕੀਤਾ। ਅੱਜ ਫੋਲਕ ਪੁਆਇੰਟ ਵਿੱਚ ਆਪਣੇ ਇੱਕ ਪੈਰੋਕਾਰ ਦੇ ਨਿਵਾਸ ਅਸਥਾਨ ਵਿਖੇ ਉਹਨਾਂ ਸੰਗਤਾਂ ਦੇ ਦਰਸ਼ਨਾਂ ਦੀ ਪਿਆਸ ਬੁਝਾਈ। ਇਸ ਮੌਕੇ ਉਹਨਾਂ ਨੇ ਸੰਗਤਾਂ ਨੂੰ ਏਕਤਾ ਦੇ ਪ੍ਰਤਾਪ ਦੀ ਸ਼ਕਤੀ ਬਾਰੇ ਸਮਝਾਇਆ ਅਤੇ ਕਿਹਾ ਕਿ ਅੱਜ ਜਿਸ ਤਰਾਂ ਦਾ ਨਾਜ਼ੁਕ ਮਾਹੌਲ ਬਣ ਗਿਆ ਹੈ ਉਸ ਮਾਹੌਲ ਵਿੱਚ ਆਪਣੇ ਆਂਢ ਗੁਆਂਢ ਦੇ ਉਹਨਾਂ ਲੋਕਾਂ ਦਾ ਜ਼ਰੂਰ ਧਿਆਨ ਰੱਖੋ ਜਿਹੜੇ ਬਿਲਕੁਲ ਹੀ ਗਰੀਬ ਹਨ। ਉਹਨਾਂ ਕਿਹਾ ਕਿ ਹਰ ਨਾਮਧਾਰੀ ਘਟੋਘੱਟ ਇੱਕ ਗਰੀਬ ਵਿਅਕਤੀ ਨੂੰ ਹਰ ਰੋਜ਼ ਖਾਣਾ ਜ਼ਰੂਰ ਖੁਆਏ। ਜੇ ਖਾਣਾ ਨਹੀਂ ਖੁਆ ਸਕਦਾ ਤਾਂ ਚਾਹਟੇ ਦਾ ਗਿਲਾਸ ਜ਼ਰੂਰ ਪਿਆਵੇ। ਜੇ ਇਹ ਵੀ ਨਹੀਂ ਹੋ ਸਕਦਾ ਤਾਂ ਘਟੋਘੱਟ ਸਾਦੇ ਪਾਣੀ ਦਾ ਗਿਲਾਸ ਜ਼ਰੂਰ ਪਿਆਵੇ। ਠਾਕੁਰ ਜੀ ਦਾ ਮਕਸਦ ਅਮੀਰੀ ਗਰੀਬੀ ਦੇ ਫਰਕ ਨੂੰ ਦੂਰ ਕਰਨ ਅਤੇ ਸਮੂਹ ਮਨੁੱਖਾਂ ਵਿੱਚ ਆਪਸੀ ਭਾਈਚਾਰਾ ਵਧਾਉਣ ਵਾਲੀ ਭਾਵਨਾ ਪੈਦਾ ਕਰਨਾ ਸੀ।    ਹੋਰ ਤਸਵੀਰਾਂ ਦੇਖਣ ਲਈ ਇਥੇ ਕਲਿੱਕ ਕਰੋ 
ਇਸ ਮੌਕੇ ਉਹਨਾਂ ਸੰਗਤਾਂ ਦੇ ਦੁੱਖ ਸੁੱਖ ਵੀ ਸੁਣੇ ਅਤੇ ਸੰਗਤ ਨੂੰ ਮਾਰਗਦਰਸ਼ਨ ਵੀ ਦਿੱਤਾ। ਉਹਨਾਂ ਕਿਹਾ ਕਿ ਔਖੇ ਵੇਲੇ ਸਭਨਾਂ ਨੂੰ ਇੱਕ ਹੋ ਕੇ ਔਖਾ ਵੇਲਾ ਲੰਘਾਉਣਾ ਚਾਹੀਦਾ ਹੈ ਅਤੇ ਖੁਸ਼ੀਆਂ ਵੇਲੇ ਵੀ ਖੁਸ਼ੀ ਸਭਨਾਂ ਨਾਲ ਸਾਂਝੀ ਕਰਨੀ ਚਾਹੀਦੀ ਹੈ। ਉਹਨਾਂ ਕਿਹਾ ਕਿ ਏਕਤਾ ਰੱਖੋ ਪਰਮਾਤਮਾ ਭਲੀ ਕਰੇਗਾ।   ਹੋਰ ਤਸਵੀਰਾਂ ਦੇਖਣ ਲਈ ਇਥੇ ਕਲਿੱਕ ਕਰੋ 

Monday, August 08, 2016

ਰਾਏਕੋਟ ਦੇ ਸ਼ਹੀਦਾ ਦੀ ਯਾਦ ਵਾਲਾ ਸਮਾਗਮ ਇੱਕ ਨਵੈਂ ਮੋੜ ਦਾ ਆਰੰਭ

Mon, Aug 8, 2016 at 5:16 PM
ਨਾਮਧਾਰੀ ਪੰਥ ਦੇ ਠਾਕੁਰ ਦਲੀਪ ਸਿੰਘ ਧੜੇ ਦੀ ਆਮ ਲੋਕਾਂ ਨਾਲ ਨੇੜਤਾ ਹੋਰ ਵਧੀ 
ਲੁਧਿਆਣਾ: 7 ਅਗਸਤ 2016: (ਪੰਜਾਬ ਸਕਰੀਨ ਬਿਊਰੋ)::
ਆਖਦੇ ਨੇ ਜੇ ਮੁਕਾਬਲਾ ਦੁਸ਼ਮਣ ਨਾਲ ਹੋਵੇ ਤਾਂ ਦੁਸ਼ਮਣ ਦਾ ਸਿਰ ਹੀ ਵੱਢ ਦਿਓ ਤਾਂਕਿ ਦੁਸ਼ਮਣ ਖਤਮ.... ਪਰ ਸਿਆਣੇ ਆਖਦੇ ਨੇ ਦੁਸ਼ਮਣ ਦੇ ਦਿਮਾਗ ਵਿੱਚੋਂ ਦੁਸ਼ਮਣੀ ਹੀ ਕੱਢ ਦਿਓ। ਨਫਰਤਾਂ ਅਤੇ ਸਾੜੇ ਦੀ ਅੱਗ ਨੂੰ ਪ੍ਰੇਮ ਦੀ ਗੰਗਾ ਨਾਲ ਸ਼ਾਂਤ ਕਰ ਦਿਓ।ਕਿਸੇ ਦੀ ਲਕੀਰ ਨੂੰ ਕੱਟ ਕੇ ਛੋਟਾ ਕਰਨ ਨਾਲੋਂ ਆਪਣੀ ਲਕੀਰ ਵੱਡੀ ਕਰ ਲਵੋ। ਆਪਸੀ ਝਗੜਿਆਂ ਅਤੇ ਮਾਤਾ ਚੰਦ ਕੌਰ ਦੇ ਕਤਲ ਕਾਰਨ ਬੜੇ ਹੀ ਸੰਵੇਦਨਸ਼ੀਲ ਦੌਰ ਵਿੱਚੋਂ ਲੰਘ ਰਹੇ ਨਾਮਧਾਰੀ ਪੰਥ ਨੂੰ ਬੜੇ ਹੀ ਕ੍ਰਾਂਤੀਕਾਰੀ ਰਾਹ ਤੇ ਦੋਬਾਰਾ ਤੋਰਦਿਆਂ ਸ਼੍ਰੀ ਠਾਕੁਰ ਦਲੀਪ ਸਿੰਘ ਨੇ ਨਫਰਤ ਅਤੇ ਦੁਸ਼ਮਣੀ ਦੀ ਬਜਾਏ ਪ੍ਰੇਮ ਪਿਆਰ ਅਤੇ ਆਪਸੀ ਭਾਈਚਾਰੇ ਵਾਲਾ ਰਸਤਾ ਚੁਣ ਲਿਆ ਹੈ। ਇਸ ਰਸਤੇ ਤੇ ਉਹਨਾਂ ਨੂੰ ਹੁੰਗਾਰਾ ਵੀ ਬੜਾ ਭਰਵਾਂ ਮਿਲ ਰਿਹਾ ਹੈ। ਲੋਕ ਲਗਾਤਾਰ ਉਹਨਾਂ ਵੱਲ ਖਿੱਚੇ ਚਲੇ ਆ ਰਹੇ ਹਨ। ਇਹਨਾਂ ਵਿਛ ਆਮ ਲੋਕ ਵੀ ਸ਼ਾਮਲ ਹਨ ਅਤੇ ਬੁਧੀਜੀਵੀ ਵੀ। ਕਲਾਕਾਰ ਵੀ ਅਤੇ ਕਾਰੋਬਾਰੀ ਵੀ। ਰਾਏਕੋਟ ਵਿਖੇ ਹੋਇਆ ਸ਼ਹੀਦੀ ਸਮਾਗਮ ਇਸ ਗੱਲ ਦੀ ਇੱਕ ਨਵੀਂ ਮਿਸਾਲ ਬਣਿਆ। 
ਇਸ ਇਤਿਹਾਸਿਕ ਸਮਾਗਮ ਦੌਰਾਨ ਸ਼੍ਰੀ ਠਾਕੁਰ ਦਲੀਪ ਸਿੰਘ ਨੇ ਆਪਣੇ ਪਵਿੱਤਰ ਉਪਦੇਸ਼ ਵਿੱਚ ਕਿਹਾ ਸ਼੍ਰੀ ਸਤਿਗੁਰੂ ਨਾਨਕ ਦੇਵ ਜੀ ਮਾਹਾਰਾਜ ਦੀ ਸਿੱਖੀ ਦੀ  ਫੁੱਲਵਾੜੀ ਨੂੰ ਵਧਾਉਣਾ ਅੱਤੇ ਰਾਜਨੀਤਕ ਤੋਰ ਤੇ ਪਰਪੱਕ ਹੋਣਾ ਅਜ ਦੇ ਸਮੇ ਦੀ ਮੁੱਖ ਲੋੜ ਹੈ। ਅਸੀ ਹੁਣ ਇਸ ਲਈ ਨਾ ਤਾ ਸਿਰ ਕਟਵਾਉਣੇ ਹਨ ਅੱਤੇ ਨਾ ਹੀ ਸਿਰ ਕੱਟਣੇ ਹਨ।ਇਸ ਲਈ ਸਾਨੂੂੰ ਆਪਣਾ ਪੰਥ ਵਧਾਉਣ ਲਈ ਸਿਰਫ ਹਰ ਇਨਸਾਨ ਦਾ ਦਿਲ ਜਿੱਤਣ ਦੀ ਲੋੜ ਹੈ ਜਿਸ ਨਾਲ ਅਸੀ ਆਪਣਾ ਪੰਥ ਵਧਾ  ਸਕਦੇ ਹਾ। ਇਸਦੇ ਨਾਲ ਹੀ ਉਹਨਾਂ ਗਊ ਗਰੀਬ ਦੀ ਰਾਖੀ ਵਾਲਾ ਸਿਧਾਂਤ ਦੋਬਾਰਾ ਸ਼ੁਰੂ ਕਰਦਿਆਂ ਉਹਨਾਂ ਗਰੀਬ ਪਰਿਵਾਰਾਂ ਦੇ ਬੱਚਿਆਂ ਨੂੰ ਗੋਦ ਵਿੱਚ ਬਿਠਾਇਆ ਜਿਹਨਾਂ ਨੂੰ ਸਮਾਜ ਹਿਕਾਰਤ ਨਾਲ ਦੇਖਦਾ ਹੈ। ਕੁੰਭ ਦੇ ਮੇਲੇ ਮਗਰੋਂ ਲੁਧਿਆਣਾ ਦੇ ਗੋਵਿੰਦ ਗੋਧਾਮ ਵਿੱਚ ਜੋੜਿਆਂ ਤੱਕ ਦੀ ਸੇਵਾ ਆਪ ਕਰਕੇ ਠਾਕੁਰ ਦਲੀਪ ਸਿੰਘ ਨੇ ਹੰਕਾਰ ਨੂੰ ਪਰ੍ਹਾਂ ਵਗਾਹ ਮਾਰਨ ਦਾ ਸਬੂਤ ਵੀ ਦਿੱਤਾ ਹੈ। ਆਮ ਜਨਤਾ ਵਿੱਚ ਬਿਨਾ ਕਿਸੇ ਸੁਰੱਖਿਆ ਦੇ ਵਿਚਰ ਕੇ ਉਹਨਾਂ ਜਿੱਥੇ ਆਪਣੀ ਹਰਮਨ ਪਿਆਰਤਾ ਸਾਬਿਤ ਕੀਤੀ ਹੈ ਉੱਥੇ ਅਕਾਲ ਪੁਰਖ ਉੱਪਰ ਅਥਾਹ ਨਿਸਚੇ ਨੂੰ ਵੀ ਦਰਸਾਇਆ ਹੈ। ਨਾਮਧਾਰੀ ਸਮਾਜ ਜਿਸ ਨਾਜ਼ੂਕ ਦੌਰ ਵਿੱਚੋਂ ਲੰਘ ਰਿਹਾ ਹੈ ਉਸ ਵਿੱਚ ਖਤਰਾ ਕਦਮ ਕਦਮ ਤੇ ਮੌਜੂਦ ਹੈ। ਇਸਦੇ ਬਾਵਜੂਦ ਸਕਿਓਰਿਟੀ ਤੋਂ ਬਿਨਾ ਆਮ ਘੁੰਮ ਫਿਰ ਲੈਣਾ ਕਿਸੇ ਕ੍ਰਿਸ਼ਮੇ ਤੋਂ ਘੱਟ ਨਹੀਂ। 
ਭਾਰਤ ਨੂੰ ਗੁਲਾਮੀ ਦੀਆ ਜੰਜੀਰਾ ਤੋ ਮੁਕਤ ਕਰਵਾਉਣ ਲਈ ਰਾਏਕੋਟ ਦੀ ਧਰਤੀ ਤੇ ਸ਼ਹੀਦ ਹੋਏ  ਨਾਮਧਾਰੀ ਪੰਥ ਦੇ ਤਿੰਨ  ਮਹਾਨ ਯੋਧੇ  ਸੰਤ ਮਸਤਾਨ  ਸਿੰਘ , ਸੰਤ ਮੰਗਲ ਸਿੰਘ ਅੱਤੇ ਸੰਤ ਗੁਰਮੁੱਖ  ਸਿੰਘ  ਜੀ ਦੀ ਯਾਦ ਵਿੱਚ ਸ਼੍ਰੀ ਸਤਿਗੁਰੂ ਦਲੀਪ ਸਿੰਘ ਜੀ ਦੀ ਹਜੁਰੀ ਵਿੱਚ ਇੱਕ ਵਿਸ਼ਾਲ ਸਮਾਗਮ ਕਰਵਾਇਆ ਗਿਆ।ਜਿਸ ਵਿੱਚ ਦੇਸ਼ ਭਰ ਤੋ ਆਈਆ ਸੰਗਤਾ ਨੇ ਇਹਨਾ ਸ਼ਹੀਦਾ ਨੂੰ ਨਾਮਸਤਕ ਹੋ ਕੇ ਆਪਣੀ ਸ਼ਰਧਾ ਦੇ ਫੁੱਲ  ਭੇਟ ਕੀਤੇ।ਸਮਾਗਮ ਦੀ ਸੁਰੂਆਤ ਗੁਰੂਦੁਆਰਾ ਸਾਹਿਬ ਜੀ ਦੇ ਹਜੂਰੀ ਰਾਗੀ ਸਾਹਿਬਾਨ ਨੇ ਗੁਰੂਬਾਣੀ  ਕੀਰਤਨ ਕਰਕੇ ਕੀਤੀ। ਇਸ ਤੋ ਬਾਅਦ  ਨਾਮਧਾਰੀ ਪੰਥ ਦੇ ਪ੍ਰਸਿੱਧ ਕਵੀ ਰਘਬੀਰ ਸਿੰਘ ਬਾਜਵਾ ਅੱਤੇ ਪੰਜਾਬ ਸਿੰਘ ਨੇ ਇਹਨਾ ਸ਼ਹੀਦਾ ਦੀ ਸ਼ਹਾਦਤ ਦੇ ਪ੍ਰੰਸਗ ਸੁਣਾ ਕੇ ਇਤਿਹਾਸ ਤੋ ਜਾਣੂ  ਕਰਵਾਇਆ  ਕਿ ਕਿਵੇ ਇਹਨਾ ਨੇ ਆਪਣੇ ਗਲਾ ਵਿੱਚ ਰੇਸ਼ਮ ਦੇ ਰੱਸੇ ਪਾ ਕੇ  ਹੱਸਦਿਆ ਹੱਸਦਿਆ ਆਣੀਆ  ਜਾਨਾ ਦੇਸ਼ ਲਈ ਕੁਰਬਾਨ ਕਰ ਦਿੱਤੀਆ 
ਅੱਜ ਦੀ ਕਾਰੋਬਾਰੀ ਅਤੇ ਆਰਥਿਕ ਯੁਗ ਵਿੱਚ ਨਾਮਧਾਰੀ ਸਮਾਜ ਨੂੰ ਚੰਗੀ ਕੁਆਲਿਟੀ ਵਾਲੇ ਉਤਪਾਦਨ ਅਤੇ ਭਰੋਸੇ ਵਾਲੇ ਕਾਰੋਬਾਰ ਦਾ ਸੁਨੇਹਾ ਦੇਂਦਿਆਂ ਉਹਨਾ ਨੇ ਕਿਹਾ ਕਿ ਦੇਸ਼ ਦੀ ਉੱਨਤੀ ਲਈ ਸਾਨੂੰ ਆਪਣੀ ਸੋਚ ਵਪਾਰਕ ਬਣਾਉਣੀ ਪਵੇਗੀ ਤਾ ਹੀ ਸਾਡੇ ਦੇਸ਼ ਦੀ ਅਰਥਵਿਵਸਥਾ ਦਾ ਵਿਸਥਾਰ ਹੋ ਸਕਦਾ ਹੈ। ਵਪਾਰ ਚਾਹੇ ਛੋਟਾ ਹੋਵੇ ਜਾ ਵੱਡਾ। ਵਪਾਰ ਅਤੇ ਪੈਸੇ ਦੀ ਅਹਿਮੀਅਤ ਦੇ ਨਾਲ ਨਾਮ ਉਹਨਾਂ ਸਿੱਖਿਆ 'ਤੇ ਵੀ ਜ਼ੋਰ ਦਿੱਤਾ। ਉਹਨਾਂ ਕਿਹਾ ਕਿ ਵਪਾਰ ਦੇ ਨਾਲ ਨਾਲ ਆਪਣੇ ਬੱਚਿਆ ਨੂੰ ਉੱਚ ਸਿੱਖਿਆ ਪ੍ਰਦਾਨ ਕਰਵਾਈਏ  ਤਾ ਜੋ ਉਹ ਉੱਚ ਪਦਵੀਆ  ਹਾਸਲ ਕਰ ਕੇ ਆਪਣੇ ਦੇਸ਼ ਅੱਤੇ ਪੰਥ ਦਾ ਵਿਸਥਾਰ ਕਰ ਸਕਣ। 
ਹਿੰਦੂਆਂ-ਸਿੱਖਾਂ ਅਤੇ ਹੋਰ ਤਬਕਿਆਂ ਨੂੰ ਆਪਣੇ ਨਾਲ ਜੋੜਦਿਆਂ ਠਾਕੁਰ ਦਲੀਪ ਸਿੰਘ ਨੇ ਸਾਂਝੀਵਾਲਤਾ ਦਾ ਇੱਕ ਅਜਿਹਾ ਮੰਤਰ ਸਮਾਜ ਦੇ ਕੰਨਾਂ ਵਿੱਚ ਪਾਇਆ ਹੈ ਜਿਸ ਦੇ ਨਤੀਜੇ ਬਹੁਤ ਛੇਤੀ ਸਾਹਮਣੇ ਆਉਣ ਵਾਲੇ ਹਨ। ਇਹ ਉਪਰਾਲਾ ਜਿੱਥੇ ਨਾਮਧਾਰੀ ਪ੍ਰੰਪਰਾਵਾਂ  ਨੂੰ ਸੁਰਜੀਤ ਕਰਦਾ ਮਹਿਸੂਸ ਹੁੰਦਾ ਹੈ ਉੱਥੇ ਗੈਰ ਨਾਮਧਾਰੀਆਂ ਨੂੰ ਵੀ ਆਪਣੇ ਵੱਲ ਕਰ ਰਿਹਾ ਹੈ। ਉਹਨਾਂ ਕਿਸੇ ਵੀ ਮਜ਼੍ਹਬ ਦਾ ਨਾਮ ਲਏ ਬਿਨਾ ਪਹਿਲਾਂ ਵੀ ਕਈ ਵਾਰ ਕਿਹਾ ਹੈ ਕਿ ਸਾਨੂੰ ਸੋਚਣਾ ਚਾਹੀਦਾ ਹੈ ਕਿ ਅਸੀਂ ਸਭ ਤੋਂ ਵੱਧ ਬਹਾਦਰ, ਸਭ ਤੋਂ ਵੱਧ ਮੇਹਨਤੀ, ਸਭ ਤੋਂ ਵੱਧ ਕੁਰਬਾਨੀਆਂ ਵਾਲੇ ਹੋ ਕੇ ਵੀ ਘਟਦੇ ਕਿਓਂ ਜਾ ਰਹੇ ਹਾਂ? ਉਹਨਾਂ ਜ਼ੋਰ ਦਿੱਤਾ ਕਿ ਏਕਤਾ ਅਤੇ ਆਪਸੀ ਭਾਈਚਾਰਾ ਹੀ ਅੱਜ ਦੀ ਮੁਖ ਲੋੜ ਹੈ। ਜਿਹਨਾਂ ਗਰੀਬ ਵਰਗਾਂ ਦੇ ਬੱਚਿਆਂ ਨੂੰ ਠਾਕੁਰ ਦਲੀਪ ਸਿੰਘ ਨੇ ਆਪਣੀ ਗੋਦੀ ਵਿੱਚ ਬਿਠਾਇਆ ਉਹਨਾਂ ਵਰਗਾਂ ਦੇ ਕਾਇਆਕਲਪ ਦੀ ਇੱਕ ਪੂਰੀ ਯੋਜਨਾ ਠਾਕੁਰ ਜੀ ਦੇ ਦਿਮਾਗ ਵਿੱਚ ਹੈ।  ਦੁਨੀਆ ਭਰ ਦੇ ਇਨਸਾਨਾਂ ਨੂੰ ਇੱਕ ਕਰਨ ਦੇ ਮਿਸ਼ਨ ਨੂੰ ਠਾਕੁਰ ਜੀ ਗੰਭੀਰਤਾ ਨਾਲ ਅੱਗੇ ਵਧ ਰਹੇ ਹਨ। 
ਇਸ ਸਮਾਗਮ ਵਿੱਚ ਜਥੇਦਾਰ ਗੁਰਦੀਪ ਸਿੰਘ, ਜੋਗਿੰਦਰ ਸਿੰਘ, ਬਾਬਾ ਛਿੰਦਾ ਜੀ (ਮੁਹਾਵੇ ਵਾਲੇ) ਅੱਤੇ ਸੰਤ ਪਲੀਹੇ ਵਾਲਿਆ ਅੱਤੇ ਜਥੇਦਾਰ ਇਕਬਾਲ ਸਿੰਘ ਜੀ ਨੇ ਸ਼ਹੀਦਾ ਦੇ ਪ੍ਰੰਸਗ ਸੁਣਾ ਕੇ ਆਏ ਹੋਈ ਸੰਗਤ ਨੂੰ ਨਿਹਾਲ ਕੀਤਾ। 
ਇਸ ਮੋਕੇ ਉਪਰ ਸ੍ਰ: ਜਗਦੀਪ ਸਿੰਘ ਬਿੱਟੂ (ਮੈਬਰ ਜਿਲ੍ਹਾ ਪ੍ਰੀਸ਼ਦ) ਲਖਵੀਰ ਸਿੰਘ ਲੱਖਾ,ਐਚ ਐਸ ਫੂਲਕਾ, ਬਾਬਾ ਅਜੀਤ ਸਿੰਘ, ਬਲਜਿੰਦਰ ਸਿੰਘ ਪਨੇਸਰ, ਹਰਦੀਪ ਸਿੰਘ ਪਲਾਹਾ (ਯੂਥ ਅਕਾਲੀ ਦਲ) ਸਰਪੰਚ ਕਮਲਜੀਤ ਸਿੰਘ, ਹਾਕਮ ਸਿੰਘ, ਸੂਬਾ ਦਰਸ਼ਨ ਸਿੰਘ ,ਅਮਰੀਕ ਸਿੰਘ, ਹਰਭਜਨ ਸਿੰਘ, ਗੁਰਮੇਲ ਸਿੰਘ ਬਰਾੜ, ਹਰਵਿੰਦਰ ਸਿੰਘ ਨਾਮਧਾਰੀ, ਸਰਪੰਚ ਬਲਵਿੰਦਰ ਸਿੰਘ, ਬੇਅੰਤ ਸਿੰਘ, ਬਲਰਾਜ ਸਿੰਘ ਬਾਜੀ, ਜਸਵੀਰ ਸਿੰਘ ਪਾਇਲ ਅੱਤੇ ਅਰਵਿੰਦਰ ਲਾਡੀ ਹਾਜਰ ਸਨ। ਹੁਣ ਦੇਖਣਾ ਇਹ ਹੈ ਕਿ ਠਾਕੁਰ ਦਲੀਪ ਸਿੰਘ ਹੁਰਾਂ ਨੇ ਇੱਕ ਸਿਹਤਮੰਦ ਅਤੇ ਖੁਸ਼ਹਾਲ ਸਮਾਜ ਦੀ ਸਿਰਜਣਾ ਦਾ ਜੋ ਉੱਦਮ ਉਪਰਾਲਾ ਸ਼ੁਰੂ ਕੀਤਾ ਹੈ ਉਸ ਨੂੰ ਪੂਰਿਆਂ ਕਰਨ ਲਈ ਉਹਨਾਂ ਦੇ ਪੈਰੋਕਾਰ ਕਿੰਨੀ ਕੁ ਇਮਾਨਦਾਰੀ ਅਤੇ ਤਨਦੇਹੀ ਨਾਲ ਅਮਲੀ ਅਤੇ ਠੋਸ ਕਦਮ ਚੁੱਕਦੇ ਹਨ!

Sunday, September 20, 2015

ਇੱਕ ਵਾਰ ਫੇਰ ਲਾਲ ਝੰਡੇ ਵਾਲਿਆਂ ਦੇ ਏਕੇ ਵਿੱਚ ਲੱਗੀ ਸੰਨ

Thursday, September 3, 2015
ਖੁਲ੍ਹ ਕੇ ਆਹਮੋ ਸਾਹਮਣੇ ਆਏ "ਸੁਰਖ ਰੇਖਾ" ਦੇ ਦੋ ਗੁੱਟ 
ਜੇ ਲੋਕਾਂ ਨੂੰ ਕਿਸੇ ਤੇ ਰੱਬ ਤੋਂ ਵਧ ਵਿਸ਼ਵਾਸ ਸੀ ਤਾਂ ਓਹ ਸਨ ਲਾਲ ਝੰਡੇ ਵਾਲੇ। ਲਾਲ ਝੰਡੇ ਦੀ ਸ਼ਕਤੀ ਨੂੰ ਕਮਜ਼ੋਰ ਕਰਨ ਲਈ ਪਹਿਲਾਂ ਫੁੱਟ ਪਾਉਣ ਦੀਆਂ ਚਾਲਾਂ ਚੱਲੀਆਂ ਗਈਆਂ। ਸਿੱਟਾ ਇਹ ਹੋਇਆ ਕਿ ਲਾਲ ਝੰਡੇ ਵਾਲੇ ਕਈ ਨਾਵਾਂ ਹੇਠ ਵੰਡੇ ਗਏ। ਇਸ ਭਾਣੇ ਦੇ ਬਾਵਜੂਦ ਲੋਕ ਫਿਰ ਵੀ ਲਾਲ ਝੰਡੇ ਨਾਲ ਜੁੜੇ ਰਹੇ ਤਾਂ  ਲਾਲ ਝੰਡੇ ਦੇ ਦੁਸ਼ਮਨ ਚਿੰਤਿਤ ਹੋ ਗਏ।  ਇਹ ਅੱਡ ਅੱਡ ਹੋ ਕੇ ਵੀ ਵਿਚਾਰਾਂ ਨੂੰ ਅਧਾਰ ਬਣਾ ਕੇ ਫਿਰ ਇੱਕ ਜੁੱਟ ਹੋ ਜਾਂਦੇ ਸਨ। ਫਿਰ ਸੂਖਮ ਵਾਰ ਕੀਤੇ ਗਏ।  ਲਾਲ ਝੰਡੇ ਵਾਲੇ ਇੱਕ ਦੂਜੇ ਤੇ ਹੀ ਸ਼ੱਕ ਕਰਨ ਲੱਗੇ ਅਤੇ ਉਹ ਵੀ ਵਿਚਾਰਾਂ ਨੂੰ ਲੈ ਕੇ। ਹੋਲੀ ਹੋਲੀ ਅਥਾਹ ਕੁਰਬਾਨੀਆਂ ਵਾਲੀ ਇਹ ਲਹਿਰ ਵੰਡੀ ਗਈ। ਪੂੰਜੀਵਾਦ ਦਾ ਵਿਰੋਧ ਕਰਦੇ ਕਰਦੇ ਇਹ ਕਦੋਂ ਪੂੰਜੀਵਾਦ ਦੇ ਮਾਇਆਜਾਲ ਵਿੱਚ ਜਾ ਫਸੇ ਕਿਸੇ ਨੂੰ ਪਤਾ ਲੱਗਿਆ। ਇਸ ਭਾਰੀ ਨੁਕਸਾਨ ਦੇ ਬਾਵਜੂਦ ਇਸ ਲਹਿਰ ਦੇ ਕਈ ਅਹਿਮ ਹਿੱਸੇ ਬਚੇ ਰਹੇ। ਪੰਜਾਬ ਵਿੱਚ ਚੱਲੀ ਹਥਿਆਰਬੰਦ ਮੁਹਿੰਮ ਵੇਲੇ ਜੇ ਕਾਮਰੇਡਾਂ ਦਾ ਪੈਗਾਮ ਗਰੁੱਪ ਉਸਦਾ  ਸੀ ਤਾਂ ਸੁਰਖ ਰੇਖਾ ਜਬਰ ਅਤੇ ਫਿਰਕਾਪ੍ਰਸਤੀ ਦੋਹਾਂ ਦੇ ਖਿਲਾਫ਼ ਖੜਾ ਸੀ। ਹੋਰਨਾਂ ਲਈ ਪੰਜਾਬ ਮਸਲਾ ਗਏ ਗੁਜ਼ਰੇ ਜਮਾਨੇ ਦੀ ਗੱਲ ਹੋ ਸਕਦਾ ਹੈ ਪਰ ਲਾਲ ਝੰਡੇ ਵਾਲੇ ਸੇਵੇਵਾਲਾ ਨੂੰ ਵੀ ਨਹੀਂ ਭੁੱਲ ਸਕਦੇ ਅਤੇ  ਨੂੰ ਵੀ ਜਿਹੜੇ ਸਿਧਾਂਤ ਦੀ ਰਾਖੀ ਕਰਦਿਆਂ ਕੁਰਬਾਨੀ ਦੇ ਗਏ। ਅੱਜ ਸੁਰਖ ਰੇਖਾ ਵਿੱਚ ਆਈ ਤਰੇੜ ਉਹਨਾਂ ਸਾਰਿਆਂ ਲਈ ਚਿੰਤਾਜਨਕ ਹੈ ਜਿਹਨਾਂ ਨੇ ਸੁਰਖ ਰੇਖਾ ਨਾਲ ਜਜ਼ਬਾਤੀ ਸਾਂਝ ਰੱਖੀ ਹੈ। ਵਿਚਾਰਵਾਨ ਲੋਕਾਂ ਦਰਮਿਆਨ ਵਿਚਾਰਧਾਰਕ ਮਤਭੇਦ ਆਉਣਾ ਕੋਈ ਨਵੀਂ ਗੱਲ ਨਹੀਂ। ਉਮੀਦ  ਚਾਹੀਦੀ ਹੈ ਕਿ ਵਿਚਾਰਾਂ ਦੀ ਰੌਸ਼ਨੀ ਸਭ ਨੂੰ ਸੇਧ ਦੇ ਕੇ ਨੇੜੇ ਨੇੜੇ ਲਿਆਵੇਗੀ। ਨਾਜਰ  ਬੋਪਾਰਾਏ ਨੇ ਆਪਣੀ ਸਾਰੀ ਉਮਰ ਵਿਚਾਰਾਂ ਨੂੰ ਸਮਰਪਿਤ ਰਹਿੰਦਿਆਂ ਲੰਘੀ ਹੈ।  ਲੋਕਾਂ ਦੇ ਦੁੱਖ ਸੁੱਖ ਵਿੱਚ ਪਰਿਵਾਰ ਵਾਂਗ ਸ਼ਿਰਕਤ ਕੀਤੀ ਹੈ। ਜਸਪਾਲ ਜੱਸੀ ਅਤੇ ਅਮੋਲਕ ਸਿੰਘ ਵੀ ਉਸ ਵਿਚਾਰ ਦਾ ਖੰਡਣ ਬਣ ਕੇ ਵਿਚਰਦੇ ਰਹੇ ਹਨ ਜਿਸ ਵਿੱਚ ਕਿਹਾ ਗਿਆ ਸੀ ਕੌਣ ਜਾਣੇ ਪੀੜ੍ਹ ਪਰਾਈ। ਇਹਨਾਂ ਨੇ ਲੋਕਾਂ ਦੇ ਦਰਦਾਂ ਨੂੰ ਹਾਧਿਨ ਹੰਡਾਇਆ ਹੈ। ਸੁਰਖ ਰੇਖਾ ਦਾ ਜੋ ਮੌਜੂਦਾ ਸਚ ਸਾਹਮਣੇ ਆਇਆ ਹੈ ਉਹ ਅਸੀਂ  ਇਥੇ ਵੀ ਪਾਠਕਾਂ ਦੀ ਜਾਣਕਾਰੀ ਲਈ ਦੇ ਰਹੇ ਹਾਂ।    --ਰੈਕਟਰ ਕਥੂਰੀਆ 
ਸੁਰਖ਼ ਰੇਖਾ ਅਦਾਰੇ ਨਾਲ ਬੋਪਾਰਾਏ ਦਾ ਕੋਈ ਸਬੰਧ ਨਹੀਂ ਹੈ
ਜ਼ਰੂਰੀ ਸੂਚਨਾ   
ਸੁਰਖ਼ ਰੇਖਾ ਦੇ ਵਿਚਾਰਾਂ ਅਤੇ ਅਦਾਰੇ ਨਾਲ ਹੁਣ ਨਾਜ਼ਰ ਸਿੰਘ ਬੋਪਾਰਾਏ ਦਾ ਕੋਈ ਸਬੰਧ ਨਹੀਂ ਹੈ
ਸੁਰਖ਼ ਰੇਖਾ ਪਾਠਕ ਪਰਿਵਾਰ ਅਤੇ ਸਹਿਯੋਗੀਆਂ ਲਈ ਜ਼ਰੂਰੀ ਸੂਚਨਾ ਹੈ ਕਿ ਸ਼੍ਰੀ ਨਾਜ਼ਰ ਸਿੰਘ ਬੋਪਾਰਾਏ ਨੇ ਆਪਣੇ ਆਪ ਨੂੰ ਅਦਾਰਾ ਸੁਰਖ਼ ਰੇਖਾ ਦੇ ਵਿਚਾਰਾਂ ਨਾਲੋਂ ਵੱਖ ਕਰ ਲਿਆ ਹੈ। ਸੁਰਖ਼ ਰੇਖਾ ਪਰਿਵਾਰ ਨਾਲ ਹੁਣ ਉਨ•ਾਂ ਦਾ ਸਬੰਧ ਨਹੀਂ ਰਿਹਾ ਹੈ।
1994 'ਚ ਵਿਚਾਰਧਾਰਕ ਸਿਆਸੀ ਨੀਤੀਆਂ ਦੀ ਅਸੂਲੀ ਸਾਂਝ ਦੇ ਆਧਾਰ 'ਤੇ ਸੁਰਖ਼ ਰੇਖਾ ਅਤੇ ਇਨਕਲਾਬੀ ਜਨਤਕ ਲੀਹ ਦੇ ਅਦਾਰਿਆਂ ਨੇ ਆਪਸੀ ਏਕਤਾ ਦਾ ਕਦਮ ਲਿਆ ਸੀ। ਦੋ ਦਹਾਕਿਆਂ ਤੋਂ ਵੱਧ ਸਮੇਂ ਦੇ ਅਰਸੇ 'ਚ ਇਹ ਅਸੂਲੀ ਏਕਤਾ ਹੋਰ ਪ੍ਰਫੁੱਲਤ ਅਤੇ ਮਜ਼ਬੂਤ ਹੋਈ ਹੈ। ਸੁਰਖ਼ ਰੇਖਾ ਇਸ ਅਸੂਲੀ ਏਕਤਾ ਅਤੇ ਇਸ ਦੀ ਮਜ਼ਬੂਤੀ ਦੀ ਤਰਜਮਾਨੀ ਕਰਦਾ ਆਇਆ ਹੈ। ਸਮੁੱਚਾ ਸੁਰਖ਼ ਰੇਖਾ ਪਰਿਵਾਰ ਇਸ ਸਥਾਪਤ ਸਮਝ ਦੁਆਲੇ ਇਕਮੁੱਠ ਹੈ। ਪਰ ਨਾਜ਼ਰ ਸਿੰਘ ਬੋਪਾਰਾਏ ਨੇ ਇਸ ਸਮਝ 'ਤੇ ਆਪਣਾ ਵਿਸ਼ਵਾਸ਼ ਗੁਆ ਕੇ ਵੱਖਰਾ ਵਿਅਕਤੀਗਤ ਰਸਤਾ ਚੁਣ ਲਿਆ ਹੈ।
1994 'ਚ ਇਕਜੁੱਟ ਹੋਏ ਸੁਰਖ਼ ਰੇਖਾ ਅਦਾਰੇ ਨੇ ਪਰਚੇ ਦੀ ਮਾਲਕੀ ਲਈ ਨਾਜ਼ਰ ਸਿੰਘ ਬੋਪਾਰਾਏ ਦੇ ਨਾਮ ਦੀ ਵਰਤੋਂ ਜਾਰੀ ਰੱਖਣ ਦਾ ਫ਼ੈਸਲਾ ਕੀਤਾ ਸੀ। ਅਜਿਹਾ ਉਹਨਾਂ ਦੀ ਸਹਿਮਤੀ ਨਾਲ ਕੀਤਾ ਗਿਆ ਸੀ, ਕਿਉਂਕਿ ਉਹ ਅਦਾਰਾ ਸੁਰਖ਼ ਰੇਖਾ ਦੇ ਵਿਚਾਰਾਂ ਦਾ ਅਨੁਸ਼ਾਸਨ ਕਬੂਲ ਕਰਦੇ ਸਨ ਜਿਹੜੇ ਅਮੋਲਕ ਸਿੰਘ ਅਤੇ ਜਸਪਾਲ ਜੱਸੀ ਦੀ ਅਗਵਾਈ 'ਚ ਦੋਹਾਂ ਅਦਾਰਿਆਂ ਦੇ ਵਰਿ•ਆਂ ਲੰਮੇ ਵਿਚਾਰ ਵਟਾਂਦਰੇ ਰਾਹੀਂ ਨਿਤਾਰੇ ਅਤੇ ਅਪਣਾਏ ਗਏ ਸਨ। ਸੁਰਖ਼ ਰੇਖਾ ਘੇਰੇ ਨੇ ਨਾ ਸਿਰਫ਼ ਉਸ ਮੌਕੇ ਇਸ ਅਸੂਲੀ ਏਕਤਾ ਦਾ ਪੁਰਜੋਸ਼ ਸਵਾਗਤ ਕੀਤਾ ਸੀ, ਸਗੋਂ ਅੱਜ ਵੀ ਸੁਰਖ਼ ਰੇਖਾ ਪਰਿਵਾਰ ਵੱਲੋਂ ਇਹਨਾਂ ਵਿਚਾਰਾਂ ਅਤੇ ਨੀਤੀਆਂ ਦੀ ਡਟਵੀਂ ਇਕਮੁੱਠ ਪਹਿਰੇਦਾਰੀ 'ਤੇ ਗਹਿਰੀ ਤਸੱਲੀ ਮਹਿਸੂਸ ਕੀਤੀ ਜਾ ਰਹੀ ਹੈ।
ਸੁਰਖ਼ ਰੇਖਾ ਦੇ ਵਿਚਾਰਾਂ ਅਤੇ ਅਦਾਰੇ ਤੋਂ ਬਾਹਰ ਹੋ ਜਾਣ ਤੋਂ ਬਾਅਦ ਸ਼੍ਰੀ ਬੋਪਾਰਾਏ ਸੁਰਖ਼ ਰੇਖਾ ਦੇ ਪ੍ਰਕਾਸ਼ਨ 'ਚ ਤਕਨੀਕੀ ਮੁਸ਼ਕਲਾਂ ਖੜ•ੀਆਂ ਕਰਨ ਦੇ ਅਫ਼ਸੋਸਨਾਕ ਰਾਹ ਪੈ ਗਏ ਹਨ। ਉਹਨਾਂ ਨੇ ਇੱਕ ਵੱਖਰਾ ਪਰਚਾ ਸੁਰਖ਼ ਰੇਖਾ ਦੇ ਨਾਮ 'ਤੇ ਜਾਰੀ ਕਰ ਦਿੱਤਾ ਹੈ। ਇਸਨੂੰ ਚਲੇ ਆ ਰਹੇ ਸੁਰਖ਼ ਰੇਖਾ ਦੇ ਅਗਲੇ ਅੰਕ ਵਜੋਂ ਪੇਸ਼ ਕੀਤਾ ਗਿਆ ਹੈ। ਇਹ ਉਸ ਸੁਰਖ਼ ਰੇਖਾ ਅਦਾਰੇ ਵੱਲੋਂ ਜਾਰੀ ਹੋਇਆ ਪਰਚਾ ਨਹੀਂ ਹੈ ਜਿਸ ਵੱਲੋਂ 1994 ਤੋਂ ਸੁਰਖ਼ ਰੇਖਾ ਪ੍ਰਕਾਸ਼ਨ ਚਲਾਇਆ ਜਾ ਰਿਹਾ ਹੈ। ਸ਼੍ਰੀ ਬੋਪਾਰਾਏ ਨੇ ਆਪਣੇ ਆਪ ਨੂੰ ਸੁਰਖ਼ ਰੇਖਾ ਦਾ ''ਐਕਟਿੰਗ ਸੰਪਾਦਕ'' ਐਲਾਨ ਦਿੱਤਾ ਹੈ। ਉਹਨਾਂ ਵੱਲੋਂ ਫਿਲਹਾਲ ਦੇਸ਼ ਵਿਦੇਸ਼ ਦੇ ਪਾਠਕਾਂ ਨੂੰ ਇਸ ਗੱਲ ਬਾਰੇ ਸੋਚ-ਸਮਝ ਕੇ ਘਚੋਲੇ 'ਚ ਰੱਖਿਆ ਜਾ ਰਿਹਾ ਹੈ ਕਿ ਹੁਣ ਉਹ 1994 ਤੋਂ ਚਲੀ ਆ ਰਹੀ ਸੁਰਖ਼ ਰੇਖਾ ਦੀ ਸਮਝ ਅਤੇ ਅਦਾਰੇ ਦੇ ਅਧੀਨ ਨਹੀਂ ਰਹੇ।
ਸੁਰਖ਼ ਰੇਖਾ ਪਰਿਵਾਰ 'ਚੋਂ ਮੁਕੰਮਲ ਨਿਖੇੜੇ ਦੇ ਬਾਵਜੂਦ, ਨਾਜਰ ਸਿੰਘ ਨੇ ਅਜਿਹਾ ਕਦਮ ਲੈਣ ਦਾ ਹੌਂਸਲਾ ਨਿਰੋਲ ਇਸ ਗੱਲ ਦੇ ਸਿਰ 'ਤੇ ਕੀਤਾ ਹੈ ਕਿ ਤਕਨੀਕੀ ਤੌਰ 'ਤੇ ਪਰਚੇ ਦੀ ਮਾਲਕੀ ਉਹਨਾਂ ਦੇ ਨਾਮ ਹੈ ਅਤੇ ਇਸਦਾ ਲਾਹਾ ਲੈ ਕੇ ਉਹ ਪਰਚੇ ਦੇ ਨਾਮ ਅਤੇ ਮਕਬੂਲੀਅਤ ਨੂੰ ਆਪਣੇ ਵੱਖਰੇ ਮਨੋਰਥ ਲਈ ਵਰਤ ਸਕਦੇ ਹਨ। ਉਹ ਆਸਵੰਦ ਹਨ ਕਿ ਇਸ ਮਾਮਲੇ 'ਚ ਭਾਰਤੀ ''ਨਿਆਂਪਾਲਿਕਾ'' ਵੀ ਉਹਨਾਂ ਦੀ ਮਦਦਗਾਰ ਹੋ ਸਕਦੀ ਹੈ।
ਚੰਗੀ ਗੱਲ ਹੁੰਦੀ ਜੇ ਉਹ ਇਹ ਸੋਚ ਸਕਦੇ ਕਿ ਪਰਚੇ ਦੀ ਤਕਨੀਕੀ ਮਾਲਕੀ ਸੁਰਖ਼ ਰੇਖਾ ਪਰਿਵਾਰ ਵੱਲੋਂ ਸਮੂਹਕ ਤੌਰ 'ਤੇ ਉਹਨਾਂ ਨੂੰ ਸੌਂਪੀ ਗਈ ਅਮਾਨਤ ਹੈ। ਇਸ ਅਮਾਨਤ ਨੂੰ ਆਪਣਾ ਵਿਅਕਤੀਗਤ ਅਧਿਕਾਰ ਸਮਝਣ ਦਾ ਉਹਨਾਂ ਦਾ ਪ੍ਰਤੱਖ ਰੁਖ਼ ਵੇਖ ਕੇ ਅਸੀਂ ਪਹਿਲਾਂ ਹੀ ਸਪੱਸ਼ਟ ਕਰ ਦਿੱਤਾ ਸੀ ਕਿ ਸੁਰਖ਼ ਰੇਖਾ ਦੇ ਸਥਾਪਤ ਵਿਚਾਰਾਂ ਦੇ ਸੰਚਾਰ ਲਈ ਕਿਸੇ ਵੱਖਰੇ ਨਾਮ ਦੀ ਚੋਣ ਕਰਨ 'ਚ ਸਾਨੂੰ ਕੋਈ ਸਮੱਸਿਆ ਨਹੀਂ ਹੈ। ਤਾਂ ਵੀ ਸਾਨੂੰ ਇਹ ਉਮੀਦ ਸੀ ਕਿ ਸ਼੍ਰੀ ਬੋਪਾਰਾਏ ਸੁਰਖ਼ ਰੇਖਾ ਦੇ ਨਾਮ ਦੀ ਵਰਤੋਂ ਕਰਨ ਤੋਂ ਪਹਿਲਾਂ ਇਹ ਜ਼ਰੂਰ ਸਪੱਸ਼ਟ ਕਰਨਗੇ ਕਿ ਸੁਰਖ਼ ਰੇਖਾ ਅਤੇ ਜਨਤਕ ਲੀਹ ਦੇ ਮੁੱਖ ਸੰਪਾਦਕਾਂ ਦੀ ਅਗਵਾਈ 'ਚ ਲੰਮੇ ਵਿਚਾਰ ਵਟਾਂਦਰੇ ਰਾਹੀਂ ਤਹਿ ਹੋਈਆਂ ਅਤੇ ਦੋ ਦਹਾਕਿਆਂ ਦੀਆਂ ਲਗਾਤਾਰ ਪ੍ਰਕਾਸ਼ਨਾਵਾਂ ਰਾਹੀਂ ਸਥਾਪਤ ਹੋਈਆਂ ਨੀਤੀਆਂ ਉਹਨਾਂ ਵੱਲੋਂ ਜਾਰੀ ਕੀਤੇ ਜਾ ਰਹੇ ਵੱਖਰੇ ਪਰਚੇ ਦੀਆਂ ਨੀਤੀਆਂ ਨਹੀਂ ਹੋਣਗੀਆਂ।
ਇਸੇ ਵਜ•ਾ ਕਰਕੇ ਅਸੀਂ ਉਹਨਾਂ ਵੱਲੋਂ ਪਰਚਾ ਜਾਰੀ ਕਰਨ ਤੋਂ ਪਹਿਲਾਂ ਪਾਠਕਾਂ ਨੂੰ ਕੁਝ ਕਹਿਣ ਦੀ ਲੋੜ ਨਹੀਂ ਸਮਝੀ। ਅਸੀਂ ਇਹ ਪੇਸ਼ਕਸ਼ ਅਤੇ ਉਮੀਦ ਵੀ ਕੀਤੀ ਸੀ ਕਿ ਵਿਚਾਰਾਂ 'ਚ ਬੁਨਿਆਦੀ ਵਖਰੇਵਾਂ ਆ ਜਾਣ ਦੀ ਹਕੀਕਤ ਸਚਿਆਰੇ ਢੰਗ ਨਾਲ ਸੁਰਖ਼ ਰੇਖਾ ਦੇ ਪੰਨਿਆਂ ਰਾਹੀਂ ਹੀ ਪਾਠਕਾਂ ਤੱਕ ਸਾਂਝੇ ਤੌਰ 'ਤੇ ਪਹੁੰਚਦੀ ਕਰ ਦਿੱਤੀ ਜਾਵੇਗੀ ਅਤੇ ਇਸ ਤੋਂ ਬਾਅਦ ਸ਼੍ਰੀ ਬੋਪਾਰਾਏ ਵਿਅਕਤੀਗਤ ਤੌਰ 'ਤੇ ਜਾਂ ਜੀਹਦੇ ਨਾਲ ਮਰਜ਼ੀ ਰਲ ਕੇ ਆਪਣੀਆਂ ਪ੍ਰਕਾਸ਼ਨਾਵਾਂ ਲਈ ਸੁਰਖ਼ ਰੇਖਾ ਦਾ ਨਾਮ ਵਰਤਣ ਦੀ ਆਪਣੀ ਬੇਕਾਬੂ ਇੱਛਾ ਪੂਰੀ ਕਰ ਸਕਣਗੇ।
ਖੈਰ! ਜੋ ਨਾਜਰ ਸਿੰਘ ਦੇ ਚਿੱਤ ਨੂੰ ਚੜ੍ਹਿਆ  ਉਹਨਾਂ ਕਰ ਦਿੱਤਾ ਹੈ। ਹਾਸਲ ਹਾਲਤ 'ਚ ਸਾਡਾ ਸਰੋਕਾਰ ਪਾਠਕਾਂ ਨੂੰ ਇਹ ਸਪੱਸ਼ਟ ਕਰਨਾ ਹੈ ਕਿ ਮਈ-ਜੂਨ, 2015 (ਅੰਕ-3) ਤੋਂ ਬਾਅਦ ਸੁਰਖ਼ ਰੇਖਾ ਦੇ ਨਾਮ ਹੇਠ ਜਾਰੀ ਹੋਈ ਕਿਸੇ ਵੀ ਪ੍ਰਕਾਸ਼ਨਾ ਨੂੰ ਸਾਡਿਆਂ ਵਿਚਾਰਾਂ ਦੀ ਅਧਿਕਾਰਤ ਤਰਜਮਾਨ ਸਮਝਣ ਦੀ ਗਲਤੀ ਨਾ ਕੀਤੀ ਜਾਵੇ। ਬੋਪਾਰਾਏ ਵੱਲੋਂ ਖੜ•ੀ ਕੀਤੀ ਤਕਨੀਕੀ ਮੁਸ਼ਕਲ ਨੂੰ ਲਾਂਭੇ ਕਰਕੇ, ਜਲਦੀ ਹੀ ਸੁਰਖ਼ ਰੇਖਾ ਦੀ ਵਿਚਾਰਧਾਰਾ, ਸਿਆਸਤ ਅਤੇ ਲੀਹ ਬਦਲਵੇਂ ਨਾਮ ਹੇਠ ਪਾਠਕਾਂ ਦੇ ਰੂਬਰੂ ਹੋਵੇਗੀ। ਸੁਰਖ਼ ਰੇਖਾ ਦਾ ਅਗਲਾ ਅੰਕ ਏਸੇ ਮਹੀਨੇ ਬਦਲਵੇਂ ਨਾਮ ਹੇਠ ਪਾਠਕਾਂ ਤੱਕ ਪੁੱਜ ਰਿਹਾ ਹੈ। ਬਿਹਤਰ ਮਿਆਰ ਅਤੇ ਸਮੱਗਰੀ ਨਾਲ ਅਸੀਂ ਜਲਦੀ ਹੀ ਪਾਠਕਾਂ ਦੇ ਵਡੇਰੇ ਘੇਰੇ ਨੂੰ ਮੁਖ਼ਾਤਬ ਹੋਵਾਂਗੇ।
ਉਦੋਂ ਤੱਕ ਸਭਨਾਂ ਮਕਸਦਾਂ ਲਈ ਸੁਰਖ਼ ਰੇਖਾ ਦੇ ਮਈ-ਜੂਨ ਅੰਕ 'ਚ ਪ੍ਰਕਾਸ਼ਤ ਫੋਨ ਨੰਬਰਾਂ ਅਤੇ ਪਤੇ ਦੀ ਵਰਤੋਂ ਕੀਤੀ ਜਾਵੇ। ਸਭਨਾਂ ਸਾਥੀਆਂ ਨੂੰ ਆਪੋ-ਆਪਣੇ ਸੂਚਨਾ ਵਸੀਲਿਆਂ (ਫੇਸਬੁੱਕ, ਵਟਸਐਪ, ਈਮੇਲ, ਬਲਾਗ, ਐਸ. ਐਮ. ਐਸ. ਆਦਿ) ਰਾਹੀਂ ਇਹ ਜਾਣਕਾਰੀ ਇਨਕਲਾਬੀ ਲਹਿਰ ਦੇ ਪਾਠਕ ਘੇਰੇ ਤੱਕ ਪੁੱਜਦੀ ਕਰਨ 'ਚ ਸਹਿਯੋਗ ਦੇਣ ਦੀ ਅਪੀਲ ਕੀਤੀ ਜਾਂਦੀ ਹੈ।
ਇਨਕਲਾਬੀ ਸ਼ੁਭ ਇੱਛਾਵਾਂ ਨਾਲ!
   ਜਸਪਾਲ ਜੱਸੀ – ਸੰਪਾਦਕ
ਅਮੋਲਕ ਸਿੰਘ – ਸਾਬਕਾ ਸੰਪਾਦਕ