ਢਿੱਲਮੱਠ ਦਾ ਹੀ ਨਤੀਜਾ ਹੈ ਅੰਮ੍ਰਿਤਸਰ ਵਿੱਚ ਗ੍ਰਨੇਡ ਹਮਲਾ-ਵਰੁਣ ਮਹਿਤਾ

Nov 18, 2018, 2:33 PM

ਸ਼੍ਰੀ ਹਿੰਦੂ ਤਖਤ ਨੇ ਕੀਤੀ ਸਖਤ ਕਦਮ ਚੁੱਕਣ ਦੀ ਮੰਗ 

ਲੁਧਿਆਣਾ:: 18 ਨਵੰਬਰ 2018 (ਪੰਜਾਬ ਸਕਰੀਨ ਬਿਊਰੋ)::  

ਅੰਮ੍ਰਿਤਸਰ ਰਾਜਾਸਾਂਸੀ ਵਿੱਚ ਨਿਰੰਕਾਰੀ ਭਵਨ ਵਿੱਚ ਗ੍ਰਨੇਡ ਹਮਲਾ ਕਰਕੇ ਵੱਖਵਾਦੀ ਤਾਕਤਾਂ ਨੇ ਪੰਜਾਬ ਵਿੱਚ ਕਾਲੇ ਦੌਰ ਦੀ ਸ਼ੁਰੂਆਤ ਦੇ ਇਤਿਹਾਸ ਨੂੰ ਦੁਹਰਾਇਆ ਹੈ। ਇਹ ਗੱਲ ਸ਼੍ਰੀ ਹਿੰਦੂ ਤਖਤ ਦੇ ਪ੍ਰਮੁੱਖ ਪ੍ਰਦੇਸ਼ ਪ੍ਰਚਾਰਕ ਵਰੁਣ ਮਹਿਤਾ ਨੇ ਅੱਜ ਸ਼ਿਵਰਾਜ ਸੈਨਾ ਦੇ ਪ੍ਰਧਾਨ ਰਮੇਸ਼ ਭਗਤ ਦੀ ਪ੍ਰਧਾਨਗੀ ਹੇਠ ਉਪਕਾਰ ਨਗਰ ਵਿੱਚ ਹੋਈ ਇੱਕ ਬੈਠਕ ਨੂੰ ਸੰਬੋਧਨ ਕਰਦਿਆਂ ਕਹੀ।  

ਵਰੁਣ ਮਹਿਤਾ ਨੇ ਕਿਹਾ ਕਿ ਪਿਛਲੇ ਕੁਝ ਸਾਲਾਂ ਤੋਂ ਵੱਖਵਾਦੀ ਖਾਲਿਸਤਾਨ ਕੱਟੜਪੰਥੀ ਤਾਕਤਾਂ ਫਿਰ ਸਰਗਰਮ ਹੋ ਚੁੱਕੀਆਂ ਹਨ ਅਤੇ ਉਹਨਾਂ ਵੱਲੋਂ ਕੰਟਰੈਕਟ ਕਿਲਿੰਗ ਦੇ ਰਾਹੀਂ 8 ਧਾਰਮਿਕ ਲੀਡਰਾਂ ਨੂੰ ਕਤਲ ਕੀਤਾ ਗਿਆ। ਦੂਜੇ ਪਾਸੇ ਦਹਿਸ਼ਤਗਰਦਾਂ ਦੀ ਸਜ਼ਾ ਮਾਫੀ ਲਈ ਸ਼ਰੇਆਮ ਪ੍ਰੋਗਰਾਮ ਵੀ ਕੀਤੇ ਗਏ। ਪਿਛਲੇ ਦਿਨੀ ਜਲੰਧਰ ਵਿੱਚ ਹੋਇਆ ਬੰਬ ਧਮਾਕਾ ਵੀ ਇਸੇ ਸਿਲਸਿਲੇ ਦੀ ਹੀ ਕੜੀ ਸੀ। ਇਸ ਮਾਮਲੇ ਵਿੱਚ ਗਰਿਫਤਾਰੀਆਂ ਹੋਣ ਦੇ ਬਾਵਜੂਦ ਸੁਰੱਖਿਆ ਤੰਤਰ ਨੇ ਢਿੱਲ ਮੱਠ ਵਾਲਾ ਰਵਈਆ ਅਪਣਾਇਆ। ਉਸ ਢਿੱਲਮੱਠ ਦਾ ਹੀ ਨਤੀਜਾ ਹੈ ਕਿ ਹੁਣ ਅੰਮ੍ਰਿਤਸਰ ਵਿੱਚ ਗ੍ਰਨੇਡ ਹਮਲਾ ਹੋਇਆ ਹੈ। 

ਸ਼੍ਰੀ ਮਹਿਤਾ ਨੇ ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੂੰ ਇਹਨਾਂ ਸਾਰੀਆਂ ਘਟਨਾਵਾਂ ਨੂੰ ਗੰਭੀਰਤਾ ਨਾਲ ਲੈਣ ਲਈ ਕਿਹਾ। ਉਹਨਾਂ ਮੰਗ ਕੀਤੀ ਕਿ ਪੰਜਾਬ ਦੇ ਸ਼ਾਂਤ ਮਾਹੌਲ ਨੂੰ ਖਰਾਬ ਕਰਨ ਵਾਲੇ ਖਾਲਿਸਤਾਨੀ ਸੰਗਠਨਾਂ ਅਤੇ ਗੈਂਗਸਟਰਾਂ ਦੇ ਆਪਸੀ ਰਿਸ਼ਤਿਆਂ ਦੇ ਕਮਰ ਤੋੜਨਾ ਬਹੁਤ ਜ਼ਰੂਰੀ ਹੈ। ਇਸ ਮਕਸਦ ਲਈ ਸਖਤ ਕਦਮ ਚੁੱਕੇ ਜਾਣੇ ਚਾਹੀਦੇ ਹਨ। 

ਸ਼੍ਰੀ ਹਿੰਦੂ ਤਖਤ ਦੇ ਪ੍ਰਚਾਰਕ ਵਰੁਣ ਮਹਿਤਾ ਨੇ ਕਿਹਾ ਕਿ ਤਿੰਨ ਦਹਾਕੇ ਪਹਿਲਾਂ ਵੀ ਪੰਜਾਬ ਦੇ ਧਰਤੀ ਨੂੰ ਲਹੂ ਲੁਹਾਣ ਕਰਨ ਦੀ ਸ਼ੁਰੂਆਤ ਨਿਰੰਕਾਰੀ ਸਮਾਗਮ 'ਤੇ ਹਮਲਾ ਕਰਕੇ ਹੀ ਕੀਤੀ ਗਈ ਸੀ। ਅੱਜ ਫਿਰ ਉਹ ਜ਼ਖਮ ਹਰੇ ਹੋ ਗਏ ਹਨ। ਪੰਜਾਬ ਸਰਕਾਰ ਸੂਬੇ ਦੇ ਹਿੱਤ ਵਿੱਚ ਖਾਲਿਸਤਾਨੀ ਸਮਰਥਕਾਂ ਅਤੇ ਰਿਫਰੈਂਡਮ-2020 ਦੇ ਨਾਂਅ ਥੱਲੇ ਸੋਸ਼ਲ ਮੀਡੀਆ 'ਤੇ ਸਰਗਰਮ ਵਿਅਕਤੀਆਂ ਦੇ ਖਿਲਾਫ ਸਖਤ ਐਕਸ਼ਨ ਲਵੇ। ਪਿਛਲੇ ਕੁਝ ਸਮੇਂ ਤੋਂ ਦਹਿਸ਼ਤਗਰਦ ਜਗਤਾਰ ਸਿੰਘ ਹਵਾਰਾ ਅਤੇ ਬਲਵੰਤ ਸਿੰਘ ਰਾਜੋਆਣਾ ਨੂੰ ਲੈ ਕੇ ਫ਼ਿਲਮਾਂ ਅਤੇ ਗਾਣੇ ਬਣਾਉਣ ਵਾਲਿਆਂ ਦੀ ਵਿਦੇਸ਼ਾਂ ਤੋਂ ਹੋਣ ਵਾਲੀ ਫੰਡਿੰਗ ਦੀ ਵੀ ਉੱਚ ਪੱਧਰੀ ਜਾਂਚ ਕਰਾਈ ਜਾਏ ਕਿਓਂਕਿ ਹਵਾਲਾ ਦੇ ਜ਼ਰੀਏ ਆਉਣ ਵਾਲਾ ਇਹ ਪੈਸਾ ਸੂਬੇ ਦੇ ਮਾਹੌਲ ਨੂੰ ਖਰਾਬ ਕਰਨ ਲਈ ਹੀ ਵਰਤਿਆ ਜਾ ਰਿਹਾ ਹੈ। ਇਸਦੇ ਸਬੂਤ ਕੰਟਰੈਕਟ ਕਿਲਿੰਗ ਦੌਰਾਨ ਵੀ ਮਿਲ ਚੁੱਕੇ ਹਨ। 

ਮਹਿਤਾ ਅਤੇ ਰਮੇਸ਼ ਭਗਤ ਨੇ ਕਿਹਾ ਕਿ ਸ਼੍ਰੀ ਹਿੰਦੂ ਤਖਤ ਇਸ ਹਮਲੇ ਵਿੱਚ ਸ਼ਹੀਦ ਹੋਣ ਵਾਲੇ ਸ਼ਰਧਾਲੂਆਂ ਪ੍ਰਤੀ ਡੂੰਘੀ ਸੰਵੇਦਨਾ ਅਤੇ ਹਮਦਰਦੀ ਦਾ ਪ੍ਰਗਟਾਵਾ ਕਰਦਾ ਹੈ। ਉਹਨਾਂ ਸੂਬੇ ਦੇ ਅਮਨ ਚੈਨ ਨੂੰ ਧਿਆਨ ਵਿੱਚ ਰੱਖਦਿਆਂ ਕੱਟੜਪੰਥੀ ਤਾਕਤਾਂ ਤੋਂ ਸੁਚੇਤ ਰਹਿਣ ਦੀ ਵੀ ਅਪੀਲ ਕੀਤੀ। ਇਸ ਮੌਕੇ 'ਤੇ ਸਰਵਸ਼੍ਰੀ ਪਵਨ ਕੰਗ, ਸੰਗਰਾਮ ਰਾਣਾ, ਅਸ਼ਵਨੀ ਸੱਗੀ, ਰਵੀ ਭਗਤ ਅਸ਼ਵਨੀ ਕਾਕਾ, ਵਿਜੇ ਕੁਮਾਰ, ਰਾਕੇਸ਼, ਸ਼ਿਵਮ, ਵਿਸ਼ਾਲ ਅਤੇ ਕਈ ਹੋਰਾਂ ਨੇ ਵੀ ਆਪਣੀ ਮੌਜੂਦਗੀ ਦਰਜ ਕਾਰਵਾਈ। 

ਸਤਿਗੁਰੂ ਨਾਨਕ ਦੇਵ ਜੀ ਦੇ 550ਵੇ ਪ੍ਰਕਾਸ਼ ਪੁਰਬ ਦਾ "ਸ਼ੁਭ ਆਰੰਭ" ਮੰਦਰਾਂ 'ਚ ਵੀ

Oct 31, 2018, 5:20 PM

ਕੋਈ ਹਿੰਦੂ ਵੀ ਨਿਗੁਰਾ ਨਹੀਂ ਰਹਿਣਾ ਚਾਹੀਦਾ: ਸਕੱਤਰ ਘੀਟਨ ਸਿੰਘ 

ਦਸੂਹਾ: 31 ਅਕਤੂਬਰ 2018: (ਰਾਜਪਾਲ ਕੌਰ//ਪੰਜਾਬ ਸਕਰੀਨ):: 

ਆਖਿਰਕਾਰ ਮੰਦਰਾਂ ਵਿੱਚ ਵੀ ਗੁਰਪੁਰਬ ਮਨਾਉਣ ਦਾ ਸਿਲਸਿਲਾ ਸ਼ੁਰੂ ਹੋ ਗਿਆ ਹੈ। "ਹਿੰਦੂ-ਸਿੱਖ ਏਕਤ" ਦੇ ਇਸ "ਤਜਰਬੇ" ਅਧੀਨ ਇਸ ਮਕਸਦ ਦੀਆਂ ਕੋਸ਼ਿਸ਼ਾਂ ਲੰਮੇ ਸਮੇਂ ਤੋਂ ਚਲੀਆਂ ਆ ਰਹੀਆਂ ਸਨ ਪਰ ਵਿਵਾਦਾਂ ਕਾਰਨ ਅਕਸਰ ਕੋਈ ਨ ਕੋਈ "ਰੁਕਾਵਟ" ਪੈ ਜਾਂਦੀ ਸੀ। ਨਾਮਧਾਰੀ ਸੰਪਰਦਾ ਦੇ ਮੁਖੀ ਠਾਕੁਰ ਦਲੀਪ ਸਿੰਘ ਨੇ ਆਪਣੇ ਆਪ ਨੂੰ ਖਤਰਿਆਂ ਵਿੱਚ ਪਾ ਕੇ ਇਸ ਪਾਸੇ ਆਪਣੀ ਮੁਹਿੰਮ ਤੇਜ਼ ਕੀਤੀ। ਕਈ ਹਿੰਦੂ ਸੰਗਠਨਾਂ ਨੇ ਵੀ ਇਹਨਾਂ ਕੋਸ਼ਿਸ਼ਾਂ ਨੂੰ ਗਰਮਜੋਸ਼ੀ ਵਾਲਾ ਹੁੰਗਾਰਾ ਭਰਿਆ। ਹੋਲੀ ਹੋਲੀ ਰਾਮਨੌਮੀ, ਜਨਮ ਅਸ਼ਟਮੀ ਅਤੇ ਗੁਰਪੁਰਬ ਸਾਂਝੇ ਤੌਰ 'ਤੇ ਮਨਾਉਣ ਦਾ ਇਹ ਸਿਲਸਿਲਾ ਤੇਜ਼ ਹੁੰਦਾ ਚਲਾ ਗਿਆ। ਇਸ ਵਾਰ ਇਸਦੀ ਸਰਗਰਮ ਸ਼ੁਰੁਆਤ ਹੋਈ ਹੈ-ਦਸੂਹਾ ਦੇ ਇੱਕ ਮੰਦਰ ਵਿੱਚੋਂ। 

ਜਿਵੇਂ ਕਿ ਸਰਬ-ਸਾਂਝੀਵਾਲਤਾ ਅਤੇ ਏਕਤਾ ਦੇ ਬਾਨੀ ,ਕਲਿਜੁਗ ਦੇ ਅਵਤਾਰ ਸਤਿਗੁਰੂ ਨਾਨਕ ਦੇਵ ਜੀ ਦਾ 550ਵਾਂ ਅਵਤਾਰ ਦਿਹਾੜਾ ਸਾਰੇ ਸੰਸਾਰ ਵਿੱਚ ਬੜੇ ਧੂਮ-ਧਾਮ ਨਾਲ ਮਨਾਇਆ ਜਾਣਾ ਹੈ ਅਤੇ ਸਭ ਪਾਸੇ ਖੁਸ਼ੀਆਂ-ਖੇੜਿਆਂ ਦਾ ਮਾਹੌਲ ਹੈ।  ਨਾਮਧਾਰੀ ਸੰਗਤ ਨੇ ਸਤਿਗੁਰੂ ਦਲੀਪ ਸਿੰਘ ਜੀ ਦੀ ਪ੍ਰੇਰਣਾ ਨਾਲ ਇਸ ਸ਼ੁਭ ਮੌਕੇ ਦੀ ਅਰੰਭਤਾ ਬੁੱਧੋ-ਬਰਕਤ (ਦਸੂਹਾ) ਦੇ ਇਕ ਪ੍ਰਸਿੱਧ ਮੰਦਿਰ (ਸ੍ਰੀ ਰਾਧਾ-ਕ੍ਰਿਸ਼ਨ ਮੰਦਿਰ) ਵਿਚ ਗੁਰੂ ਨਾਨਕ ਦੇਵ ਜੀ ਦਾ ਪ੍ਰਕਾਸ਼-ਪੁਰਬ ਮਨਾ ਕੇ ਕੀਤੀ।  ਇਸ ਸਮਾਗਮ ਦਾ ਆਗਾਜ਼ ਮੰਦਿਰ ਦੇ ਸੱਕਤਰ ਘੀਟਨ ਸਿੰਘ ਜੀ ਨੇ ਕੀਤਾ ਅਤੇ ਸਭ ਨੂੰ ਇਸ ਸ਼ੁਭ ਮੌਕੇ ਦੀ ਵਧਾਈ ਦਿੰਦਿਆਂ ਸਤਿਗੁਰੂ ਦਲੀਪ ਸਿੰਘ ਜੀ ਦੇ ਇਸ ਆਪਸੀ ਮੇਲ-ਜੋਲ ਵਧਾਉਣ ਦੇ ਉਪਰਾਲੇ ਦੀ ਸਲਾਘਾ ਕਰ ਦੱਸਿਆ ਕਿ ਇਹ ਸਾਡੇ ਲਈ ਬੜੀ ਮਾਣ ਅਤੇ ਖੁਸ਼ੀ ਦੀ ਗੱਲ ਹੈ। ਉਹਨਾਂ ਨੇ ਨਾਮਧਾਰੀ ਪੰਥ ਦੀ ਵਿਲੱਖਣਤਾ ਬਾਰੇ ਵੀ ਸਾਰਿਆਂ ਨੂੰ ਜਾਣਕਾਰੀ ਦਿੱਤੀ ਅਤੇ ਦੱਸਿਆ ਕਿ ਕਿਵੇਂ ਨਾਮਧਾਰੀ ਪੰਥ ਦੇ ਪ੍ਰਭਾਵ ਨਾਲ ਉਹਨਾਂ ਦੇ ਜੀਵਨ ਵਿੱਚ ਪਰਿਵਰਤਨ ਆਇਆ। ਆਪ ਜੀ ਨੇ ਇਹ ਵੀ ਕਿਹਾ ਕਿ ਸਾਨੂੰ ਗੁਰੂ ਦੇ ਲੜ ਲੱਗ ਕੇ ਨਾਮ ਦੀ ਪ੍ਰਾਪਤੀ ਕਰਨੀ ਚਾਹੀਦੀ ਹੈ। ਸਾਡੇ ਹਿੰਦੂ ਪਰਿਵਾਰਾਂ ਵਿਚ ਵੀ ਕੋਈ ਨਿਗੁਰਾ ਨਹੀਂ ਰਹਿਣਾ ਚਾਹੀਦਾ। ਉਪਰੰਤ ਮੰਦਿਰ ਦੇ ਪ੍ਰਧਾਨ ਅਜੈ ਕੁਮਾਰ ਖੁੱਲਰ ਜੀ ਨੇ ਭਗਤੀ ਰੱਸ ਵਿੱਚ ਭਿੱਜ ਕੇ ਸਤਿਗੁਰੂ ਨਾਨਕ ਦੇਵ ਜੀ ਦਾ ਜਸ ਗਾਇਨ ਕੀਤਾ ਅਤੇ ਨਾਮਧਾਰੀ ਪੰਥ ਦੇ ਵਿਦਵਾਨ ਜਥੇਦਾਰ ਗੁਰਦੀਪ ਸਿੰਘ ਜੀ ਨੇ ਵੀ ਮਨੋਹਰ ਕੀਰਤਨ ਕੀਤਾ ਅਤੇ ਸਭ ਨੂੰ ਸਿੱਖ-ਇਤਿਹਾਸ ਬਾਰੇ ਜਾਣਕਾਰੀ ਦਿੱਤੀ ਕਿ ਕਿਵੇਂ ਸਤਿਗੁਰੂ ਨਾਨਕ ਦੇਵ ਜੀ ਨੇ ਸਾਰੇ ਸੰਸਾਰ ਦੀ ਯਾਤਰਾ ਕਰ ਸਭ ਨੂੰ ਸਿੱਧੇ ਰਸਤੇ ਪਾਇਆ ਅਤੇ ਪਾਪਾਂ ਦਾ ਖਾਤਮਾ ਕਰਨ ਲਈ ਸਾਰੀ ਲੁਕਾਈ ਨੂੰ ਪ੍ਰੇਮ-ਪਿਆਰ ਨਾਲ ਆਪਣੇ ਚਰਨਾਂ ਨਾਲ ਜੋੜ ਕੇ, ਸਿੱਖ ਪੰਥ ਦੀ ਨੀਂਹ ਰੱਖੀ। ਅਖੀਰ ਵਿੱਚ ਸਾਰੀ ਸੰਗਤ ਨੇ ਰੱਲ ਕੇ ਧੰਨ ਗੁਰੂ ਨਾਨਕ ਕਹਿੰਦੇ ਹੋਏ ਸ਼ਬਦ ਗਾਇਨ ਕੀਤਾ। ਇਸ ਪ੍ਰਕਾਰ  ਬਹੁਤ ਅਨੰਦਮਈ ਵਾਤਾਵਰਨ ਰਿਹਾ। ਵਿਸ਼ਵ ਨੌਜਵਾਨ ਨਾਮਧਾਰੀ ਵਿੱਦਿਅਕ ਜਥੇ ਦੇ ਪ੍ਰਧਾਨ ਪਲਵਿੰਦਰ ਸਿੰਘ ਜੀ ਨੇ ਦੱਸਿਆ ਕਿ ਸਤਿਗੁਰੂ ਜੀ ਦੀ ਆਗਿਆ ਨਾਲ ਅਜਿਹੇ ਪ੍ਰੋਗਰਾਮ ਲਗਾਤਾਰ ਵੱਖ-ਵੱਖ ਥਾਵਾਂ ਤੇ ਲੜੀਵਾਰ ਚਲਣ ਦੀ ਯੋਜਨਾ ਹੈ ਅਤੇ ਸਾਰਿਆਂ ਨੂੰ ਸਤਿਗੁਰੂ ਨਾਨਕ ਦੇਵ ਜੀ ਦੇ ਚਰਨਾਂ ਅਤੇ ਗੁਰਬਾਣੀ ਨਾਲ ਜੋੜਨਾ ਹੈ ਕਿਉਂਕਿ ਸਤਿਗੁਰੂ ਨਾਨਕ ਦੇਵ ਜੀ ਨੇ ਸਭ ਨੂੰ ਸਾਂਝੀਵਾਲਤਾ ਦਾ ਉਪਦੇਸ਼ ਦਿੱਤਾ। ਇਸ ਮੌਕੇ ਮੰਦਿਰ ਦੇ ਪ੍ਰਧਾਨ ਅਜੈ ਕੁਮਾਰ ਖੁੱਲਰ, ਪੰਡਿਤ ਸ਼ਮਸ਼ੇਰ ਸਿੰਘ ਜੀ, ਪਲਵਿੰਦਰ ਸਿੰਘ, ਜਾਗੀਰ ਸਿੰਘ, ਪ੍ਰਧਾਨ ਬਲਵਿੰਦਰ ਸਿੰਘ ਡੁਗਰੀ, ਸਰਪੰਚ ਜੋਗਿੰਦਰ ਸਿੰਘ, ਰਘਬੀਰ ਸਿੰਘ ਪਟਵਾਰੀ, ਹਰਪਾਲ ਸਿੰਘ, ਰਸ਼ਪਾਲ ਸਿੰਘ, ਸੁਖਵਿੰਦਰ ਸਿੰਘ ਅਤੇ ਹੋਰ ਸੰਗਤਾਂ ਵੀ ਹਾਜਰ ਸਨ। 

ਇਸ ਦੇ ਸਮਰਥਕਾਂ ਵੱਲੋਂ ਇਸਨੂੰ ਬੜੀ ਵੱਡੀ ਪ੍ਰਾਪਤੀ ਅਤੇ ਸਫਲਤਾ ਵੱਜੋਂ ਦੇਖਿਆ ਜਾ ਰਿਹਾ ਹੈ। ਹੁਣ ਦੇਖਣਾ ਹੈ ਕਿ "ਗੁਰਦੁਆਰਿਆਂ ਵਿੱਚ ਹਿੰਦੂ ਮੰਤਰਾਂ ਦਾ ਜਾਪ" ਅਤੇ "ਮੂਰਤੀ ਸਥਾਪਨਾ" ਕਦੋਂ ਹੁੰਦੀ ਹੈ। 

ਲੁਧਿਆਣਾ ਵਿੱਚ ਅਮਨ ਅਮਾਨ ਨਾਲ ਗੁਜ਼ਰਿਆ ਘੱਲੂਘਾਰਾ ਦਿਵਸ

ਸ਼ਿਵਸੈਨਾ ਰਾਸ਼ਟਰਵਾਦੀ ਨੇ ਲਗਾਏ ਭਾਰਤ ਮਾਤਾ ਕਿ ਜੈ ਦੇ ਨਾਅਰੇ 

ਲੁਧਿਆਣਾ: 6 ਜੂਨ 2018: (ਪੰਜਾਬ ਸਕਰੀਨ ਬਿਊਰੋ)::

34 ਸਾਲ ਪਹਿਲਾਂ ਸਰੀ ਹਰਿਮੰਦਿਰ ਸਾਹਿਬ ਅੰਮ੍ਰਿਤਸਰ ਵਿਖੇ ਹੋਏ ਓਪਰੇਸ਼ਨ ਬਲਿਊ ਸਟਾਰ ਵਾਲੀ ਦੁਖਦਾਈ ਘਟਨਾ ਦਾ ਦਰਦ ਅੱਜ ਵੀ ਤਾਜ਼ਾ ਹੈ। ਤਕਰੀਬਨ ਹਰ ਗੁਰਦੁਆਰੇ ਵਿੱਚ ਇਸ ਹਫਤੇ ਸਮਾਗਮ ਹੁੰਦੇ ਹਨ। ਹਰ ਸਾਲ ਇਸ ਕਾਰਵਾਈ ਦਾ ਤਿੱਖਾ ਵਿਰੋਧ ਕੀਤਾ ਜਾਂਦਾ ਹੈ ਜਿਸ ਨਾਲ ਇਹ ਜ਼ਖਮੀ ਹਰ ਸਾਲ ਫਿਰ ਹਰੇ ਹੋ ਜਾਂਦੇ ਹਨ।  ਢਹਿ ਢੇਰੀ ਹੋਏ ਅਕਾਲ ਤਖਤ ਸਾਹਿਬ ਦੀਆਂ ਤਸਵੀਰਾਂ ਅਤੇ ਫੌਜੀ ਐਕਸ਼ਨ ਦੇ 34 ਸਾਲ ਪੁਰਾਣੇ ਚਰਚੇ ਉਸ ਪੀੜ੍ਹੀ ਨੂੰ ਵੀ ਪਤਾ ਹਨ ਜਿਹੜੀ ਸੰਨ 1984 ਤੋਂ ਬਾਅਦ ਪੈਦਾ ਹੋਈ। 

ਦੂਜੇ ਪਾਸੇ ਇਸ ਐਕਸ਼ਨ ਦਾ ਸਮਰਥਨ ਕਰਨ ਵਾਲੇ ਹਰ ਸਾਲ ਇਆਸਦਾ ਸਮਰਥਨ ਕਰਦੇ ਹਨ ਜਿਸ ਨਾਲ ਮਾਮਲਾ ਹਰ ਵਾਰ ਨਾਜ਼ੁਕ ਸਥਿਤੀ ਵਾਲਾ ਬਣ ਜਾਂਦਾ ਹੈ। ਲੁਧਿਆਣਾ ਦੇ ਚੌੜਾ ਬਾਜ਼ਾਰ ਵਿੱਚ ਵੀ ਇਸ ਵਾਰ ਸਥਿਤ ਕੁਝ ਕੁ ਸਮੇਂ ਲਈ ਤਣਾਅ ਪੂਰਨ ਬਣ ਗਈ। ਚੌੜਾ ਬਾਜ਼ਾਰ ਵਿੱਚ ਖੁਸ਼ੀ ਰਾਮ ਹਲਵਾਈ ਦੇ ਬਿਲਕੁਲ ਸਾਹਮਣੇ ਵਾਲੀ ਗਲੀ ਵਿੱਚ ਹਿੰਦੂ ਸੰਗਠਨਾਂ ਨੇ ਵੀ ਆਪਣਾ ਆਯੋਜਨ ਕੀਤਾ ਕਿਸੇ ਅਣਸੁਖਾਵੀਂ ਘਟਨਾ ਨੂੰ ਰੋਕਣ ਲਈ ਪੁਲਿਸ ਨੇ ਵੀ ਆਪਣੇ ਪੂਰੇ ਬੰਦੋਬਸਤ ਕੀਤੇ। 

ਹਰ ਸਾਲ ਦੀ ਤਰਾਂ ਇਸ ਵਾਰ ਵੀ ਸੁਰੱਖਿਆ ਦੇ ਸਖਤ ਪਰਬੰਧ ਕੀਤੇ ਗਏ ਸਨ। ਹਰ ਸ਼ਹਿਰ ਵਿੱਚ ਸੁਰੱਖਿਆ ਫੋਰਸਾਂ ਨੇ ਫਲੈਗ ਮਾਰਚ ਕੀਤੇ ਤਾਂ ਕਿ ਅਫਵਾਹਾਂ ਕਾਰਨ ਫੈਲਣ ਵਾਲੀ ਦਹਿਸ਼ਤ ਦੇ ਮਾਹੌਲ ਨੂੰ ਕਾਬੂ ਕੀਤਾ ਜਾ ਸਕੇ। ਧਾਰਮਿਕ ਥਾਵਾਂ ਦੇ ਨਾਲ ਨਾਲ ਮੁਖ ਵਪਾਰਕ ਕੇਂਦਰਾਂ ਅਤੇ ਬਾਜ਼ਾਰਾਂ ਵਿੱਚ ਵੀ ਸੁਰੱਖਿਆ ਫੋਰਸਾਂ ਦੀ ਸਰਗਰਮ ਗਸ਼ਤ ਜਾਰੀ ਰਹੀ। 

ਲੁਧਿਆਣਾ ਦੇ ਮੁਖ ਅਤੇ ਪੁਰਾਣੇ ਵਪਾਰਕ ਕੇਂਦਰ ਚੋੜਾ ਬਾਜ਼ਾਰ ਵਿੱਚ ਸਥਿਤ ਇਲਾਇਚਿਗਿਰੀ ਮੰਦਰ ਵਾਲੀ ਗਲੀ ਵਿੱਚ ਕਾਫ਼ੀ ਦੇਰ ਤਣਾਅ ਵਾਲਾ ਮਹੌਲ ਬਣਿਆ ਰਿਹਾ। ਇਥੇ ਨੇੜੇ ਹੀ ਮੰਦਿਰ ਲਾਲੂ ਮਲ ਸੋਸਾਇਟੀ ਵਿੱਚ ਸ਼ਿਵ ਸੈਨਾ ਰਾਸ਼ਟਰਵਾਦੀ ਨੇ ਆਪਣੇ ਹਮ ਖਿਆਲ ਸੰਗਠਨਾਂ ਨਾਲ ਮਿਲ ਕੇ ਆਤੰਕਵਾਦ ਦੇ ਖਿਲਾਫ਼ ਹਵਨ ਦਾ ਆਯੋਜਨ ਕੀਤਾ ਅਤੇ ਭਾਰਤ ਮਾਤਾ ਕਿ ਜੈ ਦੇ ਨਾਅਰੇ ਲਗਾਏ। ਇਸ ਮੌਕੇ ਸ਼ਿਵ ਸੈਨਾ ਆਗੂ ਰਾਜੀਵ ਟੰਡਨ ਅਤੇ ਕਈ ਹੋਰ ਲੀਡਰ ਵੀ ਮੌਜੂਦ ਰਹੇ। ਸ਼ਹੀਦ ਸੁਖਦੇਵ ਦੇ ਪਰਿਵਾਰਿਕ ਮੈਂਬਰ ਨੇ ਵੀ ਇਸ ਵਿੱਚ ਸ਼ਮੂਲੀਅਤ ਕੀਤੀ। ਇਹ ਲੋਕ ਦਹਿਸ਼ਤਗਰਦੀ ਦੇ ਖਿਲਾਫ਼ ਮਾਰਚ ਵੀ ਕਢਣਾ ਚਾਹੁੰਦੇ ਸਨ ਪਰ ਪੁਲਿਸ ਨੇ ਲੰਮੀ ਬਹਿਸ ਮਗਰੋਂ ਇਹਨਾਂ ਨੂੰ ਇਸ ਗੱਲ ਲਈ ਮਨਾ ਲਿਆ ਕਿ ਮਾਰਚ ਦਾ ਖਿਆਲ ਤਿਆਗ ਦਿੱਤਾ ਜਾਵੇ। ਇਹਨਾਂ ਦੀ ਮੁੱਖ ਮੰਗ ਸੀ ਕਿ ਬਾਜ਼ਾਰਾਂ ਵਿੱਚ ਵਿਕਦੀ ਉਸ ਸਾਰੀ ਸਮਗਰੀ 'ਤੇ ਰੋਕ ਲਗਾਈ ਜਾਵੇ ਜਿਹੜੀ ਅੱਤਵਾਦ ਜਾਂ ਦਹਿਸ਼ਤਗਰਦੀ ਨੂੰ ਉਕਸਾਉਂਦੀ ਹੈ ਜਾਂ ਫਿਰ ਇਸਦਾ ਪਰਚਾਰ ਕਰਦੀ ਹੈ।  

ਇਸ ਮੌਕੇ ਏ ਡੀ ਸੀ ਪੀ ਗੁਰਪਰੀਤ ਸਿੰਘ ਸਿਕੰਦ ਨੇ ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਦੱਸਿਆ ਕਿ ਸਭ ਕੁਝ ਬੜੇ ਹੀ ਸ਼ਾਂਤੀਪੂਰਨ ਮਾਹੌਲ ਨਾਲ ਨਿੱਬੜ ਗਿਆ। ਉਹਨਾਂ ਲੁਧਿਆਣਾ ਦੇ ਲੋਕਾਂ ਦੀ ਤਾਰੀਫ ਕਰਦਿਆਂ ਕਿਹਾ ਕਿ ਇਥੋਂ ਦੇ ਲੋਕ ਬੜੇ ਹੀ ਸ਼ਾਂਤੀ ਪਸੰਦ ਲੋਕ ਹਨ ਇਸ ਲਈ ਅੱਜ ਦੇ ਨਾਜ਼ੁਕ ਹਾਲਾਤ ਮੌਕੇ ਵੀ ਇਥੇ ਕੋਈ ਗੜਬੜ ਨਹੀਂ ਹੋਈ। ਇਸ ਮੌਕੇ ਤੇ ਏਡੀਸੀਪੀ-ਵਨ, ਏਸੀਪੀ-ਸੁਰਿੰਦਰ ਮੋਹਨ, ਐਸ ਐਚ ਓ ਸੁਰਿੰਦਰ ਚੋਪੜਾ ਭਾਰੀ ਪੁਲਿਸ ਫੋਰਸ ਸਮੇਤ ਮੌਜੂਦ ਸਨ। ਪੁਲਿਸ ਦੇ ਇਹਨਾਂ ਅਧਿਕਾਰੀਆਂ ਨੇ ਮਾਮਲਾ ਨਿੱਬੜ ਜਾਂ ਤੋਂ ਬਾਅਦ ਵੀ ਇਸ ਇਲਾਕੇ ਦੇ ਬਾਜ਼ਾਰਾਂ ਦਾ ਗੇੜਾ ਲਾਇਆ। 

ਸ਼ਿਵ ਸੈਨਾ ਪੰਜਾਬ ਦੇ ਪ੍ਰਧਾਨ ਰਾਜੀਵ ਟੰਡਨ ਨੇ ਇਸ ਗੱਲ 'ਤੇ ਦੁੱਖ ਅਤੇ ਚਿੰਤਾ ਦਾ ਪਰਗਟਾਵਾ ਕੀਤਾ ਕਿ ਵਿਦੇਸ਼ਾਂ ਵਿੱਚ ਬੈਠੇ ਕੱਟੜਪੰਥੀ ਅਜੇ ਵੀ ਪੰਜਾਬ ਵਿੱਚ ਦਹਿਸ਼ਤਗਰਦੀ ਵਾਲਾ ਉਹ ਪੁਰਾਣਾ ਦੌਰ ਲਿਆਉਣ ਚਾਹੁਦੇ ਹਨ। ਉਹਨਾਂ ਇਸ ਗੱਲ ਦੀ ਨਿਖੇਧੀ ਕੀਤੀ ਕਿ ਬਾਜ਼ਾਰਾਂ ਵਿੱਚ ਦਹਿਸ਼ਤਗਰਦਾਂ ਨੂੰ ਹੀਰੋ ਬਣਾਉਣ ਵਾਲੀ ਬਹੁਤ ਸਾਰੀ ਸਮਗਰੀ ਲਗਾਤਾਰ ਵਿਕ ਰਹੀ ਹੈ। ਇਸ ਮੌਕੇ 'ਤੇ ਦਲੀਪ ਗਰੋਵਰ, ਅਸ਼ਵਨੀ ਚੋਪੜਾ, ਰਾਕੇਸ਼ ਅਰੋੜਾ, ਸੌਰਭ ਅਰੋੜਾ, ਰਿਸ਼ਭ ਕਨੌਜੀਆ, ਅਮਨ ਟੱਕਰ, ਦੀਪਕ ਸ਼ਰਮਾ, ਵਿਨੋਦ ਸ਼ਰਮਾ, ਅਮਿਤ ਕੋੰਡਲ ਸਮੇਤ ਕਈ ਹੋਰ ਹਿੰਦੂ ਲੀਡਰ ਵੀ ਮੌਜੂਦ ਸਨ। ਇਹਨਾਂ ਨੇ ਆਪਣੇ ਦੋ ਦੋ ਮੈਂਬਰਾਂ ਨੂੰ ਚੁੱਪ ਚੁਪੀਤੇ ਬਾਹਰ ਕਢ ਕੇ ਮਾਰਚ ਵਾਲੀ ਯੋਜਨਾ  ਸਫਲ ਬਣਾਉਣ ਦੀ ਕੋਸਿਸ਼ ਵੀ ਕੀਤੀ ਪਰ ਭਾਰੀ ਪੁਲੁਸ ਫੋਰਸ ਨੇ ਲਗਾਈ ਸਖਤ ਨਾਕੇਬੰਦੀ ਨਾਲ ਇਹ ਸਾਰੀ ਯੋਜਨਾ ਨਾਕਾਮ ਬਣਾ ਦਿੱਤੀ। 

ਜ਼ਿਕਰਯੋਗ ਹੈ ਕਿ ਇਸ ਗਲੀ ਦੇ ਨਾਲ ਹੀ ਹੀ ਲੱਗਦੀ ਗਲੀ ਵਿੱਚ ਆਪਣੇ ਵੇਲੇ ਦੇ ਪ੍ਰ੍ਸਿਧ ਹਿੰਦੂ ਲੀਡਰ "ਸ਼ੇਰੇ ਪੰਜਾਬ" ਕਾਲੀ ਚਰਨ ਦਾ ਘਰ ਵੀ ਮੌਜੂਦ ਹੈ ਜਿਹਨਾਂ ਨੂੰ ਦਹਿਸ਼ਤਗਰਦੀ ਵਾਲੇ ਦਿਨਾਂ ਦੌਰਾਨ ਗੋਲੀਆਂ ਮਾਰ ਕੇ ਕਤਲ ਕਰ ਦਿੱਤਾ ਗਿਆ ਸੀ। ਉਹਨਾਂ ਦੀ ਯਾਦ ਵਿੱਚ ਇਥੇ ਚੋਂਕ ਦਾ ਨਾਂ ਵੀ ਰੱਖਿਆ ਗਿਆ ਹੈ।  ਉਹਨਾਂ ਦੇ ਸ਼ਰਧਾਲੂ ਉਹਨਾਂ ਦੀ ਸ਼ਹਾਦਤ ਨੂੰ ਅੱਜ ਵੀ ਯਾਦ ਕਰਦੇ ਹਨ। 

ਮੁਖਮੰਤਰੀ ਅਤੇ ਡੀਜੀਪੀ ਨੂੰ ਸੋਨੇ ਦੇ ਮੈਡਲ ਨਾਲ ਸਨਮਾਨਿਤ ਕਰੇਗਾ ਸ਼੍ਰੀ ਹਿੰਦੂ ਤਖਤ

Wed, Nov 8, 2017 at 5:12 PM

ਅਮਿਤ ਸ਼ਰਮਾ ਦੇ ਕਤਲ ਨੂੰ ਵਖਵਾਦੀ ਤਾਕਤਾਂ ਨੇ ਦਿੱਤਾ ਅੰਜਾਮ: ਵਰੁਣ ਮਹਿਤਾ 

ਲੁਧਿਆਣਾ: 8 ਨਵੰਬਰ 2017: (ਪੰਜਾਬ ਸਕਰੀਨ ਬਿਊਰੋ)::

ਪਿਛਲੇ ਕੁਝ ਕੁ ਸਮੇਂ ਤੋਂ ਪੰਜਾਬ ਦੀ ਸਿਆਸਤ ਵਿੱਚ ਸਰਗਰਮ ਹੋਏ ਸ਼੍ਰੀ ਹਿੰਦੂ ਤਖਤ ਨੇ ਆਪਣੀਆਂ ਬਿਆਨਬਾਜ਼ੀਆਂ ਵਿੱਚ ਇੱਕ ਵਾਰ ਫੇਰ ਸਰਗਰਮੀ ਲਿਆਂਦੀ ਹੈ। ਸ਼੍ਰੀ ਹਿੰਦੂ ਤਖਤ ਦੇ ਧਰਮਾਧਿਸ਼ ਅਤੇ ਜੂਨਾ ਅਖਾੜਾ ਦੇ ਜਗਤ ਗੁਰੁ ਪੰਚਨੰਦ ਗਿਰੀ ਜੀ ਅਤੇ ਤਖਤ ਦੇ ਮੁੱਖ ਸੂਬਾ ਪ੍ਰਚਾਰਕ ਵਰੁਣ ਮਹਿਤਾ ਨੇ ਪੰਜਾਬ ਪੁਲਿਸ ਵਲੋਂ ਸੂਬੇ ਚ ਹੋਏ ਸਾਰੇ ਮੁੱਖ ਹਿੰਦੂ ਲੀਡਰਾਂ ਅਮਿਤ ਸ਼ਰਮਾ, ਜਗਦੀਸ਼ ਗਗਨੇਜਾ, ਪਾਸਟਰ ਮਸੀਹ, ਰਵਿੰਦਰ ਗੋਸਾਈ ਸਣੇ ਹੋਰ ਦੇ ਕਤਲ ਦੇ ਮਾਮਲੇ ਦੀ ਗੁੱਥੀ ਨੂੰ ਹੱਲ ਕਰਨ ਤੇ ਸੂਬੇ ਦੇ ਮੁਖਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਅਤੇ ਡੀਜੀਪੀ ਪੰਜਾਬ ਸ਼੍ਰੀ ਸੁਰੇਸ਼ ਅਰੋੜਾ ਨੂੰ ਵਧਾਈ ਦਿੱਤੀ ਹੈ। ਛੇਤੀ ਹੀ ਸ਼੍ਰੀ ਹਿੰਦੂ ਤਖਤ ਵਲੋਂ ਉਹਨਾਂ ਨੂੰ ਸੋਨੇ ਦੇ ਮੈਡਲ ਨਾਲ ਸਨਮਾਨਿਤ ਕਰਨ ਦਾ ਐਲਾਨ ਕੀਤਾ।  

ਜਗਤ ਗੁਰੁ ਅਤੇ ਮਹਿਤਾ ਨੇ ਕੁਛ ਹਿੰਦੂ ਸੰਗਠਨਾਂ ਵਲੋਂ ਅਮਿਤ ਸ਼ਰਮਾ ਦੇ ਕੇਸ ਨੂੰ ਲੈਕੇ ਪੁਲਿਸ ਦੀ ਜਾਂਚ ਨੂੰ ਗੁਮਰਾਹ ਕਰਨ ਦੇ ਮਾਮਲੇ 'ਚ ਉਹਨਾਂ ਸੰਗਠਨਾਂ ਦੇ ਆਗੂਆਂ ਅਤੇ ਵਖਵਾਦੀ ਤਾਕਤਾਂ ਦੇ ਰਿਸ਼ਤਿਆਂ ਦੀ ਵੀ ਉਚ ਪੱਧਰੀ ਜਾਂਚ ਕਰਵਾਣ ਦੀ ਮੰਗ ਕੀਤੀ। 

ਉਹਨਾਂ ਦਾਅਵਾ ਕੀਤਾ ਕਿ ਅਸੀਂ ਪਹਿਲੇ ਦਿਨ ਤੋਂ ਕਹਿ ਰਹੇ ਹਾਂ ਕਿ ਸਾਡੇ ਵਲੋਂ ਦੇਸ਼ ਵਿਰੋਧੀ ਖਾਲਿਸਤਾਨੀ ਤਾਕਤਾਂ ਦੇ ਖਿਲਾਫ ਚਲਾਈ ਜਾ ਰਹੀ  ਮੁਹਿੰਮ ਕਾਰਣ ਵਖਵਾਦੀ ਤਾਕਤਾਂ ਨੇ ਸਾਡੇ ਜ਼ਿਲਾ ਪ੍ਰਚਾਰਕ ਅਮਿਤ ਸ਼ਰਮਾ ਨੂੰ ਸ਼ਹੀਦ ਕਰ ਦਿਤਾ ਹੈ।  

ਪੰਚਨੰਦ ਗਿਰੀ ਅਤੇ ਵਰੁਣ ਮਹਿਤਾ ਨੇ ਕਿਹਾ ਕਿ ਸਾਨੂੰ ਪੰਜਾਬ ਪੁਲਿਸ ਦੀ ਕਾਰਗੁਜ਼ਾਰੀ 'ਤੇ ਪੱਕਾ ਯਕੀਨ ਸੀ ਕਿਉਂਕਿ ਜਿਸ ਬਹਾਦਰ ਪੁਲਿਸ ਫੋਰਸ ਨੇ ਲੰਬੇ ਦਹਾਕੇ ਤੱਕ ਚਲੇ ਅੱਤਵਾਦ ਦਾ ਜੜੋਂ ਖਾਤਮਾ ਕੀਤਾ ਹੋਵੇ ਉਸ ਫੋਰਸ ਲਈ ਅਜੇਹੇ ਹਿੰਦੂ ਲੀਡਰਾਂ ਦੇ ਕਤਲ ਇਕ ਚੁਣੌਤੀ ਬਣ ਗਏ ਸਨ ਕਿਉਂਕਿ ਵਿਦੇਸ਼ੀ ਤਾਕਤਾਂ ਸੂਬੇ ਦੇ ਅਮਨ ਚੈਨ ਨੂੰ ਖਰਾਬ ਕਰਨ ਲਈ ਖ਼ਾਸ ਤੌਰ 'ਤੇ ਹਿੰਦੂ ਸਮਾਜ ਦੇ ਲੀਡਰਾਂ ਨੂੰ ਨਿਸ਼ਾਨਾ ਬਣਾ ਕੇ ਹਿੰਦੂ ਸਿੱਖ ਭਾਈਚਾਰੇ ਨੂੰ ਤੋੜਨ ਦੀ ਸਾਜ਼ਿਸ਼ ਰਚ ਰਹੇ ਹਨ ਪਰ ਅਜਿਹੇ ਕਤਲਾਂ ਦੇ ਬਾਵਜੂਦ ਅਮਨਪਸੰਦ ਲੋਕਾ ਨੇ ਖਾਲਿਸਤਾਨੀ ਸੋਚ ਨੂੰ ਸਿਰੇ ਤੋਂ ਨਕਾਰਿਆ ਹੈ। 

ਉਕਤ ਹਿੰਦੂ ਆਗੂਆਂ ਨੇ ਸੂਬੇ ਦੇ ਡੀਜੀਪੀ ਤੋਂ ਮੰਗ ਕੀਤੀ ਕਿ ਕੁਝ ਕੱਟੜਪੰਥੀ ਖਾਲਿਸਤਾਨੀ ਸੋਚ ਵਾਲੇ ਅਤੇ ਕੁੱਛ ਹਿੰਦੂ ਸੰਗਠਨਾਂ ਵਲੋਂ ਇਕ ਦੂਜੇ ਦੀ ਧਾਰਮਿਕ ਭਾਵਨਾਵਾਂ ਨੂੰ ਠੇਸ ਪਹੁੰਚਾਣ ਲਯੀ ਸੋਸ਼ਲ ਮੀਡੀਆ ਰਾਹੀਂ ਕੀਤੀਆਂ ਜਾ ਰਹੀ ਟਿੱਪਣੀਆਂ ਨੂੰ ਵੀ ਗੰਭੀਰਤਾ ਨਾਲ ਲੈਣਾ ਚਾਹੀਦਾ ਹੈ। ਇਸਦੇ ਨਾਲ ਹੀ ਉਹਨਾਂ ਸਾਈਬਰ ਸੈਲ ਰਾਹੀਂ ਅਜਿਹੇ ਲੋਕਾਂ ਦੀ ਪਹਿਚਾਣ ਕਰ ਕੇ ਦੋਸ਼ੀਆਂ ਖਿਲਾਫ ਸਖਤ ਕਾਰਵਾਈ ਕਰਨ ਦੀ ਵੀ ਮੰਗ ਕੀਤੀ।

ਰਾਮਨੌਮੀ: ਅਯੁੱਧਿਆ ਵਿੱਚ ਨਾਮਧਾਰੀ ਸੰਗਤ ਵੱਲੋਂ ਬੋਲੇ ਸੋ ਨਿਹਾਲ ਦੇ ਨਾਅਰੇ

ਨਾਮਧਾਰੀ ਸਿੱਖਾਂ ਨੇ ਅਯੋਧਿਆ ਵਿਖੇ ਮਨਾਇਆ ਰਾਮਨੌਮੀ ਦਾ ਤਿਓਹਾਰ 
9 ਅਪ੍ਰੈਲ ਨੂੰ ਦਿੱਲੀ ਵਿਖੇ ਵੀ ਰਾਮ ਨੌਮੀ ਸਮਾਗਮਾਂ ਦੀਆਂ ਤਿਆਰੀਆਂ 

ਅਯੁੱਧਿਆ//ਲੁਧਿਆਣਾ: 6 ਅਪ੍ਰੈਲ 2017: (ਪੰਜਾਬ ਸਕਰੀਨ ਬਿਊਰੋ):: 

ਪੰਜਾਬ ਵਿੱਚ ਹਿੰਦੂਆਂ ਅਤੇ ਸਿੱਖਾਂ ਦੇ ਧਾਰਮਿਕ ਗ੍ਰੰਥਾਂ ਦੀਆਂ ਬੇਅਦਬੀਆਂ ਦੇ ਜ਼ਖਮ ਭਾਵੇਂ ਅਜੇ ਵੀ ਤਾਜ਼ਾ ਹਨ ਪਰ ਨਾਮਧਾਰੀ ਪੰਥ ਨੇ ਕਿਸੇ ਵੀ ਸੰਭਾਵਤ ਫੁੱਟ ਅਤੇ ਟਕਰਾਓ ਨੂੰ ਟਾਲਣ ਲਈ ਹਿੰਦੂ ਸਿੱਖ ਏਕਤਾ ਦੀਆਂ ਕੋਸ਼ਿਸ਼ਾਂ ਤੇਜ਼ ਕਰ ਦਿੱਤੀਆਂ ਗਈਆਂ ਹਨ। ਅਯੁੱਧਿਆ ਵਿੱਚ ਨਾਮਧਾਰੀ ਸੰਗਤ ਅਤੇ ਹਿੰਦੂ ਸੰਗਤ ਵੱਲੋਂ ਬੋਲੇ ਸੋ ਨਿਹਾਲ ਦੇ ਨਾਅਰਿਆਂ ਨੇ ਇਸ ਏਕਤਾ ਨੂੰ ਮਜ਼ਬੂਤ ਕਰਨ ਦੇ ਮਾਮਲੇ ਵਿੱਚ ਇੱਕ ਨਵਾਂ ਇਤਿਹਾਸ ਰਚਿਆ ਹੈ। 

ਨਾਮਧਾਰੀ ਸਿੱਖਾਂ ਵੱਲੋਂ ਹਿੰਦੂ ਸਿੱਖ ਏਕਤਾ ਨੂੰ ਮਜ਼ਬੂਤ ਕਰਨ ਦੇ ਉਪਰਾਲੇ ਲਗਾਤਾਰ ਜਾਰੀ ਹਨ। ਇਸ ਮਕਸਦ ਨਾਲ ਹੀ ਅਯੋਧਿਆ ਵਿਖੇ ਰਾਮ ਨੌਮੀ ਦਾ ਤਿਓਹਾਰ ਨਾਮਧਾਰੀ ਸਿੰਘਾਂ ਵੱਲੋਂ ਬੜੀ ਸ਼ਰਧਾ ਅਤੇ ਉਤਸ਼ਾਹ ਨਾਲ ਮਨਾਇਆ ਗਿਆ। ਇਹੀ ਤਿਓਹਾਰ ਹੁਣ 9 ਅਪ੍ਰੈਲ ਨੂੰ ਦਿੱਲੀ ਵਿਖੇ ਵੀ ਧੂਮਧਾਮ ਨਾਲ ਮਨਾਇਆ ਜਾਣਾ ਹੈ। ਨਾਮਧਾਰੀ ਸੰਗਤਾਂ ਨੇ ਇਸ ਸਬੰਧੀ ਹੋਏ ਸਮਾਗਮਾਂ ਵਿੱਚ ਅਯੁੱਧਿਆ ਵਿਖੇ ਵੀ ਵੱਧ ਚੜ੍ਹ ਕੇ ਭਾਗ ਲਿਆ ਅਤੇ ਦਿੱਲੀ ਵਿੱਚ ਵੀ ਨਾਮਧਾਰੀ ਸੰਗਤ ਵਹੀਰਾਂ ਘੱਟ ਕੇ ਪੁੱਜੇਗੀ। ਨਾਮਧਾਰੀ ਪੰਥਕ ਏਕਤਾ ਸੰਗਤ ਵੱਲੋਂ ਇਹ ਜਾਣਕਾਰੀ ਦੇਂਦਿਆਂ ਸੰਤ ਤੇਜਿੰਦਰ ਸਿੰਘ ਨੇ ਕਿਹਾ ਕਿ ਇਹ ਸਭ ਕੁਝ ਨਾਮਧਾਰੀ ਪੰਥ ਦੇ ਵਰਤਮਾਨ ਮੁਖੀ ਸ੍ਰੀ ਸਤਿਗੁਰੂ ਦਲੀਪ ਸਿੰਘ ਜੀ ਦੇ ਹੁਕਮ ਅਨੁਸਾਰ ਕੀਤਾ ਜਾ ਰਿਹਾ ਹੈ। 

ਸੰਤ ਤੇਜਿੰਦਰ ਸਿੰਘ ਨਾਮਧਾਰੀ ਨੇ ਦੱਸਿਆ ਕਿ ਹਿੰਦੂ-ਸਿੱਖ ਏਕਤਾ ਦੇ ਮੰਤਵ ਨੂੰ ਮੁੱਖ ਰੱਖਦਿਆਂ ਹੋਇਆ ਭਗਵਾਨ ਸ੍ਰੀ ਰਾਮ ਚੰਦਰ ਜੀ ਦੀ ਜਨਮ ਭੂਮੀ ਅਯੋਧਿਆ ਵਿੱਖੇ ਰਾਮ ਨੋਮੀ ਦਾ ਪੁਰਬ ਹਿੰਦੂ ਭਰਾਵਾਂ ਨਾਲ ਮਿਲ ਕੇ ਮਨਾਇਆ ਗਿਆ ਹੈ। ਹਿਂਦੂ ਸਿੱਖ ਏਕਤਾ ਨੂੰ ਹੋਰ ਮਜਬੂਤ ਕਰਨ ਵਾਸਤੇ ਇਹ ਇਕ ਹੋਰ ਪਹਿਲ ਕਦਮੀ ਹੈ ਜਿਸ ਦਾ ਹਿੰਦੂ ਸੰਗਠਨਾਂ ਨੇ ਵੀ ਨਿੱਘਾ ਸਵਾਗਤ ਕੀਤਾ ਹੈ। ਵਿਸ਼ਵ ਹਿੰਦੂ ਪ੍ਰੀਸ਼ਦ ਦੇ ਜਨਰਲ ਸਕੱਤਰ ਚਂਪਤ ਰਾਏ ਵੱਲੋਂ ਇਸਨੂੰ ਅੱਜ ਦੇ ਹਾਲਾਤ ਵਿੱਚ ਇੱਕ ਇਤਿਹਾਸਿਕ ਕਦਮ ਦੱਸਿਆ ਗਿਆ ਹੈ।  

ਇਹਨਾਂ ਸਮਾਗਮਾਂ ਦਾ ਵੇਰਵਾ ਮੀਡੀਆ ਨੂੰ ਦੇਂਦਿਆਂ ਸੰਤ ਤਜਿੰਦਰ ਸਿੰਘ ਨਾਮਧਾਰੀ ਨੇ ਕਿਹਾ ਕਿ ਸੁਬਾ ਭਗਤ ਸਿੰਘ ਜੀ ਦੀ ਅਗਵਾਈ ਹੇਠ ਉੱਤਰ ਪ੍ਰਦੇਸ਼ ਦੀ  ਨਾਮਧਾਰੀ ਸੰਗਤਾਂ ਦਾ ਬਹੁਤ ਵੱਡਾ ਜੱਥਾ ਸ੍ਰੀ ਸਤਿਗੁਰੂ ਦਲੀਪ ਸਿੰਘ ਜੀ ਦੇ ਹਿੰਦੂ-ਸਿੱਖ ਏਕਤਾ ਦੇ ਨਾਅਰੇ ਨੂੰ ਅਮਲੀ ਜਾਮਾ ਪਹਿਨਾਉਣ ਲਈ ਅਯੋਧਿਆ ਵਿਖੇ ਰਾਮਨੌਮੀ ਪੁਰਬ ਮਨਾਉਣ ਲਈ ਪਹੁੰਚਿਆ। ਜਿੱਥੇ ਇਸ ਜੱਥੇ ਵੱਲੋ ਅੰਮ੍ਰਿਤ ਵੇਲੇ ਜਾਨਕੀ ਘਾਟ ਵਿਖੇ ਆਸਾ ਦੀ ਵਾਰ ਦਾ ਕੀਰਤਨ  ਕੀਤਾ ਗਿਆ ਉਥੇ ਹੀ ਭਗਵਾਨ ਸ੍ਰੀ ਰਾਮ ਚੰਦਰ ਜੀ ਦੀ ਆਰਤੀ ਨਾਮਧਾਰੀ ਸਿੱਖਾਂ ਵੱਲੋਂ ਅਤੇ ਹਿੰਦੂ ਵੀਰਾਂ ਵੱਲੋ ਰਲ ਮਿਲ ਕੇ ਕੀਤੀ ਗਈ। ਹਿੰਦੂ ਵੀਰਾਂ ਵੱਲੋ ਅਯੋਧਿਆ ਰਾਮ ਮੰਦਰ ਵਿੱਚ ਬੋਲੇ ਸੋ ਨਿਹਾਲ ਦੇ ਜੈਕਾਰੇ ਵੀ ਲਗਾਏ ਗਏ। ਹਿੰਦੂ ਅੱਤੇ ਨਾਮਧਾਰੀ ਸਿੱਖਾਂ ਨੂੰ ਇਕੱਠਿਆਂ ਰਾਮਨੌਮੀ ਪੁਰਬ ਮਨਾਉਂਦੇ ਦੇਖ ਕੇ ਪਹੁੰਚੀ ਹੋਈ ਸਾਰੀ ਸੰਗਤ ਦਾ ਉਤਸ਼ਾਹ ਠਾਠਾਂ ਮਾਰ ਰਿਹਾ ਸੀ। ਸੰਤ ਹਰਵਿੰਦਰ ਸਿੰਘ ਯੂ ਪੀ ਨੇ ਕਿਹਾ ਕਿ ਅਸੀ ਦੇਸ਼ ਅੰਦਰ ਸ਼ਾਂਤੀ ਚਾਹੁੰਦੇ ਹਾਂ। ਇਹ ਤਾਂ ਹੀ ਸੰਭਵ ਹੋ ਸਕਦਾ ਹੈ ਅਗਰ ਅਸੀ ਭਾਰਤੀ ਆਪਸ ਵਿੱਚ ਮਿਲ ਕੇ ਰਹਾਂਗੇ। ਇਸ ਮੌਕੇ ਉਪਰ ਕਥਾ ਕਰਦੇ ਹੋਏ ਸ੍ਰੀ ਅਤੁਲ ਭਾਰਦਵਾਜ ਜੀ ਨੇ ਉਚੇਚੇ ਤੌਰ ਤੇ ਸ੍ਰੀ ਸਤਿਗੁਰੂ ਤੇਗ ਬਹਾਦਰ ਸਾਹਿਬ ਜੀ, ਸ੍ਰੀ ਸਤਿਗੁਰੂ ਗੋਬਿੰਦ ਸਿੰਘ ਜੀ ਅਤੇ ਚਾਰੇ ਸਾਹਿਬਜ਼ਾਦਿਆਂ ਦੀ ਦੇਸ਼ ਲਈ ਕੀਤੀ ਕੁਰਬਾਨੀ ਦੀ ਬਹੁਤ ਹੀ ਸ਼ਲਾਘਾ ਕੀਤੀ ।

ਇਸ ਮੌਕੇ ਉਪਰ ਨਾਮਧਾਰੀ ਸਿੱਖਾਂ ਵੱਲੋ ਮੰਦਰ ਵਿਚ ਸ੍ਰੀ ਸਤਿਗੁਰੂ ਨਾਨਕ ਦੇਵ ਜੀ ਦੀਆਂ ਤਸਵੀਰਾਂ ਵੀ ਵੰਡੀਆਂ ਗਈਆਂ। ਜਿਸ ਨੂੰ ਹਿੰਦੂ ਵੀਰਾਂ ਨੇ ਖੁਸ਼ੀ ਨਾਲ ਪ੍ਰਾਪਤ ਕਰਕੇ ਨਮਸ਼ਕਾਰ ਕੀਤੀ।

ਨਾਮਧਾਰੀ ਸੰਗਤ ਵੱਲੋਂ ਸ੍ਰੀ ਸਤਿਗੁਰੂ ਦਲੀਪ ਸਿੰਘ ਜੀ ਦੀ ਪਵਿੱਤਰ ਹਜੂਰੀ ਵਿੱਚ ਹਿੰਦੂ-ਸਿੱਖ ਏਕਤਾ ਕਰਵਾਉਣ ਵਾਸਤੇ ਰਾਮਨੌਮੀ ਪੁਰਬ ਮਿਤੀ  9 ਅਪ੍ਰੈਲ 2017  ਨੂੰ ਸ਼ਾਮ 5 ਵਜੇ ਤੋ 9 ਵਜੇ ਤੱਕ ਨਵੀ ਦਿੱਲੀ ਵਿਖੇ ਬਹੁਤ ਹੀ ਵੱਡੇ ਪੱਧਰ ਤੇ ਮਨਾਇਆ ਜਾ ਰਿਹਾ ਹੈ।

ਆਖਿਰ ਕੌਣ ਹਨ ਠਾਕੁਰ ਦਲੀਪ ਸਿੰਘ ਦੇ ਪੋਸਟਰ ਪਾੜਨ ਵਾਲੇ ਲੋਕ?

ਕੌਣ ਹੈ ਸਭਨਾਂ ਨੂੰ ਇੱਕ ਕਰਨ ਦੇ ਮਿਸ਼ਨ ਦਾ ਵਿਰੋਧੀ?
ਲੁਧਿਆਣਾ: 28 ਸਤੰਬਰ 2016: (ਪੰਜਾਬ ਸਕਰੀਨ ਬਿਊਰੋ): 

ਠਾਕੁਰ ਦਲੀਪ ਸਿੰਘ ਦੇ ਪੋਸਟਰ ਪਾੜੇ ਜਾਣ ਦਾ ਸਿਲਸਿਲਾ ਜਨਮ ਅਸ਼ਟਮੀ ਦੇ ਸਮਾਗਮ ਮੌਕੇ ਵੀ ਹੋਇਆ ਸੀ। ਉਦੋਂ ਕਈਆਂ ਨੂੰ ਫੋਨ ਕਰ ਕਰ ਕੇ ਇਸ ਸਮਾਗਮ ਵਿੱਚ ਸ਼ਾਮਲ ਨਾ ਹੋਣ ਲਈ ਵੀ ਕਿਹਾ ਗਿਆ ਸੀ। ਹੁਣ ਸਤੰਬਰ ਦੇ ਆਖ਼ਿਰੀ ਹਫਤੇ ਫਿਰ ਉਹੀ ਕੁਝ ਦੋਹਰਾਇਆ ਗਿਆ ਹੈ।  ਪਹਿਲੀ ਘਟਨਾ ਸ਼ਾਇਦ 27 ਸਤੰਬਰ ਨੂੰ ਵਾਪਰੀ। ਗਿਆਨ ਮੰਦਰ ਵੱਲੋਂ ਹਰ ਮਹੀਨੇ ਇੱਕ ਰਾਸ਼ਣ ਵੰਡ ਸਮਾਗਮ ਕੀਤਾ ਜਾਂਦਾ ਹੈ ਜਿਸ ਵਿੱਚ ਕਿਸੇ ਨ ਕਿਸੇ ਖਾਸ ਸ਼ਖ਼ਸੀਅਤ ਨੂੰ ਉਚੇਚ ਨਾਲ ਸੱਦਾ ਦੇ ਕੇ ਬੁਲਾਇਆ ਜਾਂਦਾ ਹੈ। ਪੰਜਾਬ ਕੇਸਰੀ-ਹਿੰਦ ਸਮਾਚਾਰ ਦੇ ਸੰਸਥਾਪਕ ਲਾਲਾ ਜਗਤ ਨਾਰਾਇਣ ਦੇ ਸਪੁੱਤਰ ਵਿਜੇ ਕੁਮਾਰ ਚੋਪੜਾ ਦੀ ਪ੍ਰੇਰਣਾ ਨਾਲ ਸਥਾਪਿਤ ਹੋਈ ਅਤੇ ਲਗਾਤਾਰ ਚੱਲ ਰਹੀ ਇਸ ਸੰਸਥਾ ਯਾਦ ਸੰਚਾਲਨ ਗਿਆਨ ਸਥਲ ਮੰਦਰ ਦੀ ਪ੍ਰਬੰਧਕ ਕਮੇਟੀ ਦੇ ਮੁਖੀ ਜਗਦੀਸ਼ ਬਜਾਜ ਕਰਦੇ ਹਨ। ਉਹਨਾਂ ਦੀ ਅਕਸਰ ਕੋਸ਼ਿਸ਼ ਹੁੰਦੀ ਹੈ ਕਿ ਇਸ ਯੱਗ ਨਾਲ ਵੱਧ ਤੋਂ ਵੱਧ ਲੋਕਾਂ ਨੂੰ ਜੋੜਿਆ ਜਾਵੇ। ਇਸ ਰਾਸ਼ਨ ਵੰਡ ਸਮਾਗਮ ਵਿੱਚ ਹੁਣ ਤੱਕ ਕਈ ਪ੍ਰਮੁੱਖ ਸ਼ਖਸੀਅਤਾਂ ਸ਼ਿਰਕਤ ਕਰ ਚੁੱਕੀਆਂ ਹਨ। ਦੇਖ ਦੇਖੀ ਕਈ ਹੋਰਾਂ  ਨੇ ਵੀ ਅਜਿਹੇ ਚੰਗੇ ਜਨਮ ਸ਼ੁਰੂ ਕੀਤਾ ਅਤੇ ਆਪੋ ਆਪਣੇ ਸੰਗਠਨ ਬਣਾਏ ਪਰ ਗਿਆਨ ਸਥਲ ਮੰਦਿਰ ਦੇ ਇਸ ਯੱਗ ਦਾ ਜੋਸ਼ੋ ਖਰੋਸ਼ ਹਮੇਸ਼ਾਂ ਪਹਿਲੇ ਨੰਬਰ 'ਤੇ ਰਿਹਾ। 

ਜਨਮ ਅਸ਼ਟਮੀ ਮਨਾਉਣ ਅਤੇ ਫਿਰ ਦਮਦਮੀ ਟਕਸਾਲ ਦੇ ਮੁਖੀ ਬਾਬਾ ਹਰਨਾਮ ਸਿੰਘ ਧੁੰਮਾ ਦੇ ਪਿਤਾ ਦੀ ਯਾਦ ਵਿੱਚ ਰੱਖੇ ਗਏ ਭੋਗ ਸਮਾਗਮ ਵਿੱਚ ਸ਼ਾਮਲ ਹੋਣ ਵਾਲੇ ਠਾਕੁਰ ਦਲੀਪ ਸਿੰਘ ਇਸ ਵਾਰ ਗਿਆਨ ਸਥਲ ਮੰਦਰ ਦੇ ਰਾਸ਼ਣ ਵੰਡ ਸਮਾਗਮ ਵਿੱਚ ਵੀ ਸ਼ਾਮਲ ਹੋ ਰਹੇ ਹਨ। ਇਸ ਸਮਾਗਮ ਐਡ ਵੱਡੇ ਵੱਡੇ ਹੋਰਡਿੰਗਜ਼ ਹਮੇਸ਼ਾਂ ਦੀ ਤਰਾਂ ਇਸ ਵਾਰ ਵੀ ਕਈ ਥਾਵਾਂ ਤੇ ਲਗਾਏ ਗਏ ਹਨ।  ਜਨਮ ਅਸ਼ਟਮੀ ਦੇ ਹੋਰਡਿੰਗਜ਼ ਨੂੰ ਵੀ ਨੁਕਸਾਨ ਪਹੁੰਚਾਇਆ ਗਿਆ ਸੀ ਅਤੇ ਇਸ ਵਾਰ ਇਹਨਾਂ ਪੋਸਟਰਾਂ ਨੂੰ ਵੀ ਪੜਿਆ ਗਿਆ ਹੈ। ਆਖਿਰ ਕੌਣ ਹਨ ਇਹਨਾਂ ਨੂੰ ਪਾੜਣ ਵਾਲੇ? ਚੇਤੇ ਰਹੇ ਕਿ ਦਮਦਮੀ ਟਕਸਾਲ ਦੇ ਸਮਾਗਮ ਵਿੱਚ ਠਾਕੁਰ ਦਲੀਪ ਸਿੰਘ ਨੇ ਹਿੰਸਾ ਦਾ ਵਿਰੋਧ ਕੀਤਾ ਸੀ ਅਤੇ ਖਾਲਿਸਤਾਨ ਦੇ ਸੰਕਲਪ ਨੂੰ ਆਪਣੇ ਵਿਚਾਰ ਮੁਤਾਬਿਕ ਸਾਹਮਣੇ ਰੱਖਿਆ ਸੀ। ਇਸ ਤੋਂ ਬਾਅਦ ਉਹਨਾਂ ਆਰ ਐਸ ਐਸ ਆਗੂ ਜਗਦੀਸ਼ ਗਗਨੇਜਾ ਦੀ ਅੰਤਿਮ ਅਰਦਾਸ ਵਾਲੇ ਸਮਾਗਮ ਵਿੱਚ ਵੀ ਸ਼ਿਰਕਤ ਕੀਤੀ। 

ਕੁਲ ਮਿਲਾ ਕੇ ਠਾਕੁਰ ਦਲੀਪ ਸਿੰਘ ਬਿਨਾ ਕਿਸੇ ਜ਼ੈੱਡ ਸੁਰੱਖਿਆ ਤੋਂ ਆਮ ਲੋਕਾਂ ਵਿੱਚ ਵਿਚਰਦੇ ਹੋਏ ਗੁਰੂ ਨਾਨਕ ਸਾਹਿਬ ਦੇ ਮਿਸ਼ਨ ਨੂੰ ਅੱਗੇ ਤੋਰਨ ਦਾ ਦਾਅਵਾ ਕਰਦੇ ਹਨ।  ਉਹਨਾਂ ਦਾ ਕਹਿਣਾ ਹੈ ਕਿ ਧੰਨ ਗੁਰੂ ਨਾਨਕ ਸਾਹਿਬ ਨੂੰ ਮੰਨਣ ਵਾਲੇ ਬਹੁਤ ਸਾਰੇ ਲੋਕ ਹਨ ਅਤੇ ਉਹ ਸਾਰੇ ਸਿੱਖ ਹਨ ਜਿਹਨਾਂ ਨੂੰ ਕਿਸੇ ਕੋਲੋਂ ਸਿੱਖੀ ਦਾ ਪ੍ਰਮਾਣ ਪੱਤਰ ਲੈਣ ਦੀ ਕੋਈ ਲੋੜ ਨਹੀਂ। ਇਹ ਗੱਲ ਉਹਨਾਂ ਸਹਿਜਧਾਰੀ ਸਿੱਖਾਂ ਦੇ ਮਾਮਲੇ ਵਿੱਚ ਆਏ ਇੱਕ ਕਾਨੂੰਨੀ ਫੈਸਲੇ ਦੇ ਸੰਦਰਭ ਵਿੱਚ ਵੀ ਕਹੀ ਸੀ। ਇਸ ਦੇ ਨਾਲ ਹੀ ਉਹ ਬਾਬਾ ਨਾਨਕ ਦੇ ਭਾਈ ਲਾਲੋ ਵਾਲੇ ਸੰਕਲਪ ਨੂੰ ਵੀ ਆਪਣੀ ਸੰਗਤ ਵਿੱਚ ਲਾਗੂ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ। ਠਾਕੁਰ ਦਲੀਪ ਸਿੰਘ ਦੀ ਸੰਗਤ ਸੀਮਿਤ ਸਾਧਨਾਂ ਦੇ ਬਾਵਜੂਦ ਉਹਨਾਂ ਲੋਕਾਂ ਤੱਕ ਪਹੁੰਚ ਕਰ ਰਹੀ ਹੈ ਜਿਹੜੇ ਸੱਚਮੁੱਚ ਗਰੀਬੀ ਦੀ ਰੇਖਾ ਤੋਂ ਹੇਠਾਂ ਰਹਿ ਰਹੇ ਹਨ ਪਰ ਉਹਨਾਂ ਕੋਲ ਇਸ ਦਾ ਕੋਈ ਸਬੂਤ ਨਹੀਂ। ਉਹਨਾਂ ਕੋਲ ਕੋਈ ਲਾਲ, ਨੀਲਾ, ਪੀਲਾ ਕਾਰਡ ਨਹੀਂ। ਅਜਿਹਾ ਕੋਈ ਕਾਰਡ ਬਣਵਾ ਸਕਣ ਦੀ ਨਾ ਤਾਂ ਉਹਨਾਂ ਕੋਲ ਹਿੰਮਤ ਅਤੇ ਨਾ ਹੀ ਕੋਈ ਪਹੁੰਚ। ਠਾਕੁਰ ਦਲੀਪ ਸਿੰਘ ਦੇ ਪੈਰੋਕਾਰ ਇਹਨਾਂ ਲੋਕਾਂ ਤੱਕ ਪਹੁੰਚ ਰਹੇ ਹਨ। ਜੇ ਇਹ ਲੋਕ ਸਿੱਖੀ ਵੱਲ ਆਕਰਸ਼ਿਤ ਹੁੰਦੇ ਹਨ ਤਾਂ ਸਭ ਤੋਂ ਵੱਡੀ ਸੱਟ ਉਸ ਸਿਲਸਿਲੇ ਤੇ ਲੱਗਦੀ ਹੈ ਜਿਸ ਅਧੀਨ ਬਹੁਤ ਸਾਰੇ ਲੋਕਾਂ ਨੂੰ ਰੋਟੀ ਦੀ ਮਜਬੂਰੀ ਕਾਰਣ ਧਰਮ ਪਰਿਵਰਤਨ ਕਰਨਾ ਪੈਂਦਾ ਹੈ।  ਇਹ ਕੰਮ ਸਰਦੇ ਪੁੱਜਦੇ ਸਿੱਖਾਂ ਹਿੰਦੂਆਂ ਦੋਹਾਂ ਦਾ ਬਣਦਾ ਸੀ ਪਰ ਕਰ ਰਹੇ ਹਨ ਠਾਕੁਰ ਦਲੀਪ ਸਿੰਘ ਆਪਣੇ ਸੀਮਿਤ ਸਾਧਨਾਂ ਨਾਲ।   

ਇਸ ਦੌਰਾਨ ਨਾਮਧਾਰੀ ਭਾਈਚਾਰੇ ਦੇ ਸਤਿਗੁਰੂ ਮਹਾਰਾਜ ਦਲੀਪ ਸਿੰਘ ਦੀ ਤਸਵੀਰ ਵਾਲੇ ਕੁਝ ਸ਼ਰਾਰਤੀ ਅਨਸਰਾਂ ਵੱਲੋਂ ਪੋਸਟਰ ਪਾੜੇ ਜਾਣ 'ਤੇ ਉਨ੍ਹਾਂ ਦੀਆਂ ਸੰਗਤਾਂ ਵਿਚ ਭਾਰੀ ਰੋਸ ਪਾਇਆ ਜਾ ਰਿਹਾ ਹੈ। ਨਾਮਧਾਰੀ ਭਾਈਚਾਰੇ ਦੇ ਆਗੂ ਅਤੇ ਸਤਿਗੁਰੂ ਮਹਾਰਾਜ ਠਾਕੁਰ ਦਲੀਪ ਸਿੰਘ ਦੇ ਸ਼ਰਧਾਲੂ ਅਰਵਿੰਦਰ ਸਿੰਘ ਦਾ ਕਹਿਣਾ ਹੈ ਕਿ ਇਸ ਨਾਲ ਸਬੰਧਤ ਸ਼ਰਾਰਤੀ ਲੋਕਾਂ ਵੱਲੋਂ ਪੋਸਟਰ ਪਾੜੇ ਜਾਣ ਤੇ ਸੰਗਤਾਂ ਦੇ ਹਿਰਦੇ ਵਲੂੰਧਰੇ ਗਏ ਹਨ ਅਤੇ ਭਾਰੀ ਰੋਸ ਪਾਇਆ ਜਾ ਰਿਹਾ ਹੈ। ਇਸ ਮੌਕੇ ਉਨ੍ਹਾਂ ਪੁਲਿਸ ਪ੍ਰਸ਼ਾਸਨ ਤੋਂ ਮੰਗ ਕੀਤੀ ਕਿ ਧਾਰਮਿਕ ਭਾਵਨਾਵਾਂ ਨੂੰ ਠੇਸ ਪਹੁੰਚਾਉਣ ਵਾਲੇ ਅਨਸਰਾਂ ਵਿਰੁੱਧ ਬਣਦੀ ਕਾਰਵਾਈ ਕੀਤੀ ਜਾਵੇ ਕਿਉਂਕਿ ਸ਼ਰਾਰਤੀ ਅਨਸਰ ਅਜਿਹੀਆਂ ਘਿਣਾਉਣੀਆਂ ਹਰਕਤਾਂ ਕਰਕੇ ਮਾਹੌਲ ਨੂੰ ਖਰਾਬ ਕਰਨ ਦੀ ਸਾਜਿਸ਼ ਰਚ ਰਹੇ ਹਨ।
ਹੁਣ ਸੁਆਲ ਉੱਠਦਾ ਹੈ ਕਿ ਕੌਣ ਹਨ ਅਜਿਹੇ ਅਨਸਰ? ਆਖਦੇ ਨੇ ਜਦੋਂ ਵੱਸ ਚੱਲੇ ਤਾਂ ਦੁਸ਼ਮਣ ਨੂੰ ਕਤਲ ਕਰ ਦਿਓ ਤੇ ਜਦੋਂ ਵੱਸ ਨਾ ਚੱਲੇ ਤਾਂ ਉਸਦਾ ਪੋਸਟਰ ਫੜ ਦਿਓ। ਪਾੜੇ ਪਾਉਣ ਦੀਆਂ ਹਰਕਤਾਂ ਹਮੇਸ਼ਾਂ ਸਵਾਰਥੀ ਅਨਸਰਾਂ ਨੇ ਕੀਤੀਆਂ ਹਨ।
ਪ੍ਰੋਫੈਸਰ ਮੋਹਨ ਸਿੰਘ ਆਪਣੀ ਇੱਕ ਲੰਮੀ ਕਵਿਤਾ ਵਿੱਚ ਲਿਖਦੇ ਹਨ:
ਦੋ ਟੋਟਿਆਂ ਦੇ ਵਿਚ ਭੋਂ ਟੁੱਟੀ,
ਇਕ ਮਹਿਲਾਂ ਦਾ ਇਕ ਢੋਕਾਂ ਦਾ,
ਦੋ ਧੜਿਆਂ ਵਿਚ ਖ਼ਲਕਤ ਵੰਡੀ,
ਇਕ ਲੋਕਾਂ ਦਾ ਇਕ ਜੋਕਾਂ ਦਾ। 
ਇਹਨਾਂ ਲੋਕ ਵਿਰੋਧੀ ਅਨਸਰਾਂ ਦੀਆਂ ਸਾਜ਼ਿਸ਼ਾਂ ਬਾਰੇ ਲਿਖਦਿਆਂ ਪ੍ਰੋਫੈਸਰ ਮੋਹਨ ਸਿੰਘ ਆਖਦੇ ਹਨ:

ਜਨਤਾ ਨੂੰ ਥਹੁ ਨਾ ਲਗਣ ਦਿਤਾ

ਇਨ੍ਹਾਂ ਜਾਦੂਗਰ ਵਿਥਕਾਰਾਂ ਨੇ,

ਅਸਲੀਅਤ ਵਿਚ ਨੇ ਦੋ ਵਿੱਥਾਂ,

ਬਾਕੀ ਸਭ ਕੂੜੀਆਂ ਪਾੜਾਂ ਨੇ। 

ਕਿਤੇ ਅਜਿਹਾ ਤਾਂ ਨਹੀਂ ਕਿ ਠਾਕੁਰ ਦਲੀਪ ਸਿੰਘ ਹੋਈ ਹੋਲੀ ਮਨੁੱਖ ਨੂੰ ਮਨੁੱਖ ਨਾਲ ਲੜਾਉਣ ਵਾਲੀ ਇਸ ਅਸਲੀ ਸਾਜ਼ਿਸ਼ ਨੂੰ ਨਾਕਾਮ ਕਰਨ ਦਾ ਜਤਨ ਕਰ ਰਹੇ ਹੋਣ। ਜੇ ਠਾਕੁ ਦਲੀਪ ਸਿੰਘ ਲੋਕਾਂ ਨਾਲ ਨੇੜਤਾ ਵਧ ਰਹੇ ਹਨ ਤਾਂ ਨਿਸਚੇ ਹੀ ਜੋਕਾਂ ਨੇ ਉਹਨਾਂ ਦਾ ਵਿਰੋਧ ਕਰਨਾ ਹੀ ਕਰਨਾ ਹੈ ਭਾਵੈਂ ਇਹ ਜੋਕਾਂ ਕਿਸੇ ਵੀ ਰੰਗ ਰੂਪ ਵਿੱਚ ਖੜੀਆਂ ਹੋਣ। ਹੁਣ ਦੇਖਣਾ ਹੈ ਕਿ ਥਾਂ ਥਾਂ ਲੱਗੇ ਕਲੋਜ਼ ਸਰਕਟ ਟੀਵੀ ਕੈਮਰਿਆਂ ਵਾਲੇ ਇਸ ਆਧੁਨਿਕ ਯੁਗ ਵਿੱਚ ਪੋਸਟਰ ਪਾੜਣ ਦਾ ਪਤਾ ਕਿੰਨੀ ਛੇਤੀ ਲਾਇਆ ਜਾਂਦਾ ਹੈ। 

ਹਿੰਦੂ ਸੰਯੁਕਤ ਮੋਰਚਾ ਦੇ ਧਰਨੇ ਦੌਰਾਨ ਭਾਰੂ ਰਿਹਾ ਖਾਲਿਸਤਾਨ ਦਾ ਮੁੱਦਾ

Updated on 2nd September 2015 at 1:45 AM
ਰਾਜੀਵ ਟੰਡਨ ਨੇ ਸਰਕਾਰ ਨੂੰ ਪੰਥਕ ਦੱਸਦਿਆਂ ਕੀਤੀ ਸਖਤ ਆਲੋਚਨਾ 

ਘੰਟਾ ਚੋਂਕ ਵਿੱਚ ਆਤਮਦਾਹ ਲਈ ਤੇਲ ਪਾਉਂਦਿਆਂ ਸਾਰ "ਗ੍ਰਿਫਤਾਰ" 

ਲੁਧਿਆਣਾ: 1 ਸਤੰਬਰ 2015: (ਰੈਕਟਰ ਕਥੂਰੀਆ//ਪੰਜਾਬ ਸਕਰੀਨ): 

ਬਹੁਤ ਪਹਿਲਾਂ ਸੰਨ 1973 ਵਿੱਚ ਆਈ ਸੀ ਫਿਲਮ ਬੋਬੀ। ਇਸ ਫਿਲਮ ਵਿੱਚ ਭੇਟਾਂ ਗਾਉਣ ਵਾਲੇ ਪ੍ਰਸਿਧ ਗਾਇਕ ਨਰਿੰਦਰ ਚੰਚਲ ਨੇ  ਇੱਕ ਗੀਤ ਗਾਇਆ ਸੀ:

ਬੇਸ਼ਕ ਮੰਦਰ ਮਸਜਿਦ ਤੋੜੋ, ਬੁੱਲੇ ਸ਼ਾਹ ਯੇਹ ਕਹਿਤਾ 

ਪਰ ਪਿਆਰ ਭਰਾ ਦਿਲ ਕਭੀ ਨ ਤੋੜੋ, ਇਸ ਦਿਲ ਮੇਂ  ਰਹਿਤਾ। 

ਗੀਤ ਹਿੱਟ ਹੋਇਆ ਅਤੇ ਨਾਲ ਹੀ ਗਾਇਕ ਨਰਿੰਦਰ ਚੰਚਲ ਵੀ। ਇਹ ਗੀਤ ਅਕਸਰ ਹਰ ਗਲੀ ਮੋਹੱਲੇ ਦੇ ਕਿਸੇ ਨ ਕਿਸੇ ਮੋੜ 'ਤੇ ਸੁਣਾਈ ਦੇ ਜਾਂਦਾ। ਗੀਤ ਦੇ ਬੋਲ ਥਾਂ ਥਾਂ ਪਹੁੰਚੇ ਪਰ ਸੁਨੇਹਾ ਕਿਤੇ ਵੀ ਨਹੀਂ , ਨ ਦਿਲ ਟੁੱਟਣ ਤੋਂ ਰੁਕੇ ਤੇ ਨਾ ਹੀ ਮੰਦਰ ਜਾਂ ਮਸਜਿਦ। ਤਾਜ਼ੀ ਘਟਨਾ ਵਾਪਰੀ ਲੁਧਿਆਣਾ ਦੇ ਪ੍ਰੇਮ ਨਗਰ ਵਿੱਚ ਜਿੱਥੇ ਨਗਰ ਨਿਗਮ ਦੇ ਦਸਤੇ ਨੇ ਇੱਕ ਸ਼ਿਵ ਮੰਦਰ ਤੋੜ ਦਿੱਤਾ।  ਸ਼ਿਬ ਭਗਤਾਂ ਵਿਛ੍ਕ ਰੋਸ ਪੈਦਾ ਹੋਣਾ  ਲਾਜ਼ਮੀ ਸੀ ਸੋ ਹੋਇਆ ਵੀ।  ਕਈ ਵਾਰ ਧਰਨੇ ਲੱਗੇ ਕਈ ਵਾਰ ਰੋਸ ਵਖਾਵੇ ਹੋਏ ਪਰ ਗੱਲ ਕਿਸੇ ਸਿਰੇਨ ਲੱਗੀ। ਅੱਜ ਨਗਰ ਨਿਗਮ ਦਫਤਰ ਦੇ ਸਾਹਮਣੇ ਆਰ ਪਾਰ ਵਾਲਾ ਧਰਨਾ ਸੀ। ਮਾਮਲਾ ਮੰਦਰ ਦਾ ਸੀ, ਰੋਸ ਵਖਾਵਾ ਅਤੇ ਧਰਨਾ ਹਿੰਦੂ ਸੰਗਠਨਾਂ ਦਾ ਸੀ ਪਰ ਗੱਲ ਘੁੰਮ ਫਿਰ ਕੇ ਆ ਜਾਂਦੀ ਸੀ ਖਾਲਿਸਤਾਨ 'ਤੇ। ਸ਼ਿਵਸੇਨਾ ਆਗੂ ਰਾਜੀਵ ਟੰਡਨ ਨੇ ਸਾਫ਼ ਕਿਹਾ ਕਿ ਜੇ ਹੁਣ ਵੀ ਹਿੰਦ੍ਦੋ ਨ ਜਾਗੇ ਤਾਂ ਖਾਲਿਸਤਾਨ ਤਾਂ ਫਿਰ ਬਣਿਆ ਈ  ਪਿਐ। ਇਸ ਪੰਥਕ ਸਰਕਾਰ ਵਿੱਚ ਸਿਰਫ ਉਹਨਾਂ ਦੇ ਕੰਮ ਹੁੰਦੇ ਹਨ।  ਸ਼੍ਰੀ ਟੰਡਨ ਨੇ ਨਵੰਬਰ-84 ਵਾਲੇ ਦੰਗਾ ਪੀੜਿਤਾਂ ਤੋਂ ਲੈ ਕੇ ਕਈ ਹੋਰ ਮਾਮਲਿਆਂ ਵਿੱਚ ਵੀ ਦੱਸਿਆ ਕਿ ਜੇ ਮਾੜੀ ਮੋਟੀ ਗੱਲ ਹੋ ਜਾਵੇ ਤਾਂ ਝੱਟਪੱਟ ਸਰਕਾਰੀ ਨੌਕਰੀ ਅਤੇ 25 ਲੱਖ ਰੁਪਏ ਦਾ ਐਲਾਨ ਹੋ ਜਾਂਦਾ ਹੈ। ਦੂਜੇ ਪਾਸੇ ਹਿੰਦ੍ਦੋ ਦੀ ਕੋਈ ਸੁਣਵਾਈ ਨਹੀਂ ਹੁੰਦੀ। 

ਅਕਾਲੀ ਵਿਧਾਇਕਾਂ ਨੂੰ ਲੰਮੇ ਹਥੀਂ ਲੈਂਦਿਆਂ ਸ਼੍ਰੀ ਟੰਡਨ ਨੇ ਸਾਫ਼ ਆਖਿਆ ਕੀ ਇਹਨਾਂ ਨੇ ਮੰਦਰ ਟੁੱਟਣ ਤੇ ਕੀ ਬੋਲਣਾ ! ਇਹ ਤਾਂ ਆਪਣੇ ਪਿਓ ਦਾ ਘਰ ਢਹਿਣ 'ਤੇ ਵੀ ਨਹੀਂ ਸੀ ਬੋਲੇ।  ਸ਼ਾਇਦ ਉਹਨਾਂ ਦਾ ਇਸ਼ਾਰਾ ਬਲਿਊ ਸਟਾਰ  ਓਪਰੇਸ਼ਨ ਵੱਲ ਸੀ। ਅਕਾਲੀ ਵਿਧਾਇਕਾਂ 'ਤੇ ਅਜਿਹੇ ਦੋਸ਼ ਕੱਟੜ ਅਤੇ ਗਰਮ ਖਿਲਾਈ ਸਿੱਖ ਸੰਗਠਨਾਂ ਨੇ ਭਾਵੇਂ ਲਾਏ  ਹੋਣ ਪਰ ਕਿਸੇ ਹਿੰਦੂ ਸੰਗਠਨ ਵੱਲੋਂ ਅਜਿਹੀ ਆਲੋਚਨਾ ਸ਼ਾਇਦ ਪਹਿਲੀ ਵਾਰ ਸਾਹਮਣੇ ਆਈ ਹੈ। ਸ਼੍ਰੀ ਟੰਡਨ ਨੇ ਨਗਰ ਨਿਗਮ ਕਮਿਸ਼ਨਰ 'ਤੇ ਵੀ  ਅਕਾਲੀ ਪੱਖੀ ਹੋਣ ਦੇ ਦੋਸ਼ ਲਗਾਏ। ਧਰਨੇ ਦੌਰਾਨ ਸਾਫ਼ ਕਿਹਾ ਗਿਆ ਕਿ ਦੋ ਮਹੀਨਿਆਂ ਦੇ ਲੰਮੇ ਇੰਤਜ਼ਾਰ ਮਗਰੋਂ ਅੱਜ ਅਸੀਂ ਕੋਈ ਲਾਲੀਪੋਪ ਨਹੀਂ ਲੈਣਾ। ਅੱਜ ਜਾਂ ਤਾਂ ਅਧਿਕਾਰੀ ਮੰਦਰ ਬਣਾਉਣ ਦਾ ਐਲਾਨ ਕਰਨਗੇ ਤੇ ਜਾਂ ਫੇਰ ਅੱਜ ਰਾਜੀਵ ਗਾਂਧੀ ਆਤਮਦਾਹ ਕਰਨਗੇ। ਇਸਤੇ ਜੋਸ਼ ਵਿੱਚ ਆਏ ਵਖਾਵਾਕਾਰੀਆਂ ਨੇ ਬਾਕਾਇਦਾ ਮਾਈਕ 'ਤੇ ਐਲਾਨ ਕੀਤਾ ਕਿ ਜੇ ਸਾਡੇ ਪ੍ਰਧਾਨ ਜੇ ਨੇ ਇੱਕ ਬੂੰਦ ਵੀ ਤੇਲ ਪਾਇਆ ਤਾਂ ਇਸਦੇ ਨਾਲ ਹੀ ਸਾੜਫੂਕ ਅਤੇ  ਭ੍ਨ੍ਨ੍ਤੋਦਾ ਦਾ ਸਿਲਸਿਲਾ ਸ਼ੁਰੂ ਹੋ ਜਾਏਗਾ। ਇਸਤੇ ਕੋਤਵਾਲੀ ਦੇ ਐਸ ਐਚ ਓ ਧਰਮਪਾਲ ਹੁਰਾਂ ਨੇ ਮਾਈਕ ;ਤੇ ਆ ਕੇ ਕਿਹਾ ਕਿ ਜਲਦਬਾਜ਼ੀ ਵਿੱਚ ਕੋਈ ਗਲਤ ਕਦਮ ਨ ਉਠਾਇਆ ਜਾਏ।  ਉਹ ਇਸ ਬਾਰੇ ਕੋਸ਼ਿਸ਼ ਕਰ ਰਹੇ ਹਨ। 

ਸ਼੍ਰੀ ਟੰਡਨ ਨੇ ਆਪਣਾ ਭਾਸ਼ਣ ਇਸਤੋਂ ਬਾਅਦ ਵੀ ਜਾਰੀ ਰੱਖਿਆ ਅਤੇ ਕਿਹਾ ਕਿ ਸਾਡੇ ਤੇ ਹਮਲੇ ਹੋ ਰਹੇ ਹਨ ਗੁਰਦਸਪੂਰ ਵਿੱਚ ਸਾਡੇ ਕਿਸੇ ਵੀਰ ਨੂੰ ਗੋਲੀ ਮਾਰ ਦਿੱਤੀ ਗਈ ਤਾਂ ਸਰਕਾਰ ਬੋਲੀ ਕਿ ਨਿਜੀ ਰੰਜਿਸ਼ ਹੈ। ਸਰਹਿੰਦ ਵਿੱਚ ਬਾਡੀਗਾਰਡ ਨੇ ਸਾਡੇ ਇੱਕ ਹੋਰ ਵੀਰ ਨੂੰ ਗੋਲੀ ਮਾਰ ਦਿੱਤੀ ਤਾਂ ਕਿਹਾ ਗਿਆ ਕਿ ਉਸਨੇ ਸ਼ਰਾਬ ਪੀਤੀ ਹੋਈ ਸੀ। ਉਹਨਾਂ ਹੈਰਾਨੀ ਜ਼ਾਹਿਰ ਕੀਤੀ ਕਿ ਸਬੰਧਿਤ ਸੰਗਠਨ ਪਤਾ ਨਹੀਂ ਕਿਓਂ ਨਹੀਂ ਇਸ ਬਾਰੇ ਖੁਲ੍ਹ ਕੇ ਬੋਲੇ। ਸ਼ਾਇਦ ਉਹਨਾਂ ਦੀ ਕੋਈ ਮਜਬੂਰੀ ਹੋਵੇ। 

ਇਸੇ ਦੌਰਾਨ  ਦੋ ਘੰਟੇ ਲਗਾਤਾਰ ਧੁੱਪ ਵਿੱਚ ਬੈਠਣ ਮਗਰੋਂ ਇੱਕ ਪ੍ਰਦਰਸ਼ਨਕਾਰੀ ਅਚਾਨਕ ਬੇਹੋਸ਼ ਹੋ ਗਿਆ ,ਪਤਾ ਲੱਗਿਆ ਕਿ ਉਹ ਤੋੜੇ ਗਏ ਮੰਦਰ ਦਾ ਪੁਜਾਰੀ ਸੀ। ਵਖਾਵਾਕਾਰੀ ਉਸਨੂੰ ਇੱਕ ਪਾਸੇ ਛਾਂ ਵਿੱਚ ਲੈ ਗਏ ਪਰ ਪ੍ਰਸ਼ਾਸਨ ਵੱਲੋਂ ਉਸਨੂੰ ਮੁਢਲੀ ਸਹਾਇਤਾ  ਦੇਣ ਲਈ ਕੁਝ ਨਹੀਂ ਕੀਤਾ ਗਿਆ। 

ਧਰਨੇ ਨੂੰ ਢਾਈ  ਕੁ ਘੰਟੇ ਦਾ ਸਮਾਂ ਪੂਰਾ ਹੁੰਦਿਆਂ ਸਾਰ ਹੀ ਸਾਰੇ ਪ੍ਰਦਰਸ਼ਨਕਾਰੀ ਘੰਟਾਘਰ ਵੱਲ ਤੁਰ ਪਏ। ਰਾਹ ਵਿੱਚ ਜਬਰੀ ਦੁਕਾਨਾਂ ਬੰਦ ਕਰਾਉਣ ਦਾ ਸਿਲਸਿਲਾ ਵੀ ਨਾਲ ਹੀ ਸ਼ੁਰੂ ਹੋ ਗਿਆ। ਵੱਡੇ ਵੱਡੇ ਸ਼ੋਰੂਮ ਵੀ ਬੰਦ ਕਰਾਏ  ਗਏ।  ਨਾਲ ਨਾਲ ਸਪੀਕਰ ਤੇ ਅਨਾਊਂਸਮੈਂਟ ਕੀਤੀ ਜਾ ਰਹੀ ਸੀ ਕਿ ਦੁਕਾਨਾਂ ਬੰਦ ਕਰ ਦਿਓ ਵਰਨਾ ਨੁਕਸਾਨ ਦੀ ਜ਼ਿੰਮੇਵਾਰੀ ਸਾਡੀ ਨਹੀਂ ਹੋਵੇਗੀ। ਸਾਫ਼ ਕਿਹਾ ਜਾ ਰਿਹਾ ਸੀ ਕਿ  ਭੰਨ-ਤੋੜ ਵੀ ਹੋ ਸਕਦੀ ਹੈ ਅੱਗਜ਼ਨੀ ਵੀ ਹੋ ਸਕਦੀ ਹੈ। ਏਨੇ ਵਿੱਚ ਘੰਟਾ ਘਰ ਆਉਂਦਿਆਂ ਹੀ ਵੱਡਾ ਟੋਲਾ ਛੋਡਾ ਬਾਜ਼ਾਰ ਵੱਲ ਦੁਕਾਨਾਂ ਬੰਦ ਕਰਾਉਣ ਨਿਕਲ ਗਿਆ ਅਤੇ ਰਾਜੀਵ ਟੰਡਨ, ਰੋਹਿਤ ਸਾਹਨੀ ਅਤੇ ਕਈ ਹੋਰ ਸੀਨੀਅਰ ਲੀਡਰ ਘੰਟਾ ਘਰ ਵਾਲੇ ਚੋਂਕ ਵਿੱਚ ਰੁਕੇ।  ਉਮੀਦ ਸੀ ਕਿ ਇਥੇ ਵੀ ਕੁਝ ਭਾਸ਼ਣ ਹੋਣਗੇ ਪਰ ਸ਼੍ਰੀ ਟੰਡਨ ਨੇ ਜਦੋਂ ਅਚਾਨਕ ਹੀ ਤੇਲ ਪਾ ਲਿਆ ਤਾਂ ਉਥੇ ਮੌਜੂਦ ਪੁਲਿਸ ਨੇ ਤੁਰੰਤ ਫੁਰਤੀ ਦਿਖਾਉਂਦਿਆਂ ਝਪਟਾ ਮਾਰਿਆ ਅਤੇ ਟੰਡਨ ਨੂੰ ਗ੍ਰਿਫਤਾਰ ਕਰ ,ਲਿਆ।

ਦੋ ਚਾਰ ਮਿੰਟਾਂ ਦੀ ਹਲਕੀ ਜਹੀ ਹੱਥਾਪਾਈ ਮਗਰੋਂ ਮਾਹੌਲ ਕੰਟਰੋਲ ਹੇਠ ਹੋ ਗਿਆ। ਬਚੇ ਹੋਏ ਮੈਂਬਰਾਂ ਨੇ ਮਾਤਾ ਰਾਨੀ ਚੋਂਕ ਨੇੜੇ ਆ ਕੇ ਇੱਕ ਸਥਾਨਕ ਅਖਬਾਰ ਦੇ ਦਫਤਰ ਸਾਹਮਣੇ ਧਰਨਾ ਦਿੱਤਾ ਅਤੇ ਨਾਅਰੇ ਲਾਏ। ਟੰਡਨ ਨੇ ਕਿਹਾ ਕਿ ਇਸ ਲਈ ਪ੍ਰਸ਼ਾਸਨ ਨੂੰ ਸੋਮਵਾਰ ਤੱਕ ਦਾ ਅਲਟੀਮੇਟਮ ਦਿੱਤਾ ਗਿਆ ਸੀ, ਜਿਸ ਦੇ ਪੂਰਾ ਹੋਣ 'ਤੇ ਵੀ ਕੋਈ ਸਾਕਾਰਾਤਮਕ ਨਤੀਜੇ ਨਹੀਂ ਆਏ ਤਾਂ ਉਨ੍ਹਾਂ ਨੇ ਪਹਿਲਾਂ ਕੀਤੇ ਐਲਾਨ ਮੁਤਾਬਕ ਜ਼ੋਨ 'ਤੇ ਧਰਨਾ ਲਗਾਇਆ, ਜਿਥੇ ਭਾਰੀ ਪੁਲਸ ਫੋਰਸ ਤਾਇਨਾਤ ਕਰ ਦਿੱਤੀ ਗਈ,

ਜੋ ਉਨ੍ਹਾਂ 'ਤੇ ਧਰਨਾ ਚੁੱਕਣ ਦਾ ਦਬਾਅ ਬਣਾਉਂਦੇ ਰਹੇ, ਜਦੋਂ ਕਿ ਨਿਗਮ ਪ੍ਰਸ਼ਾਸਨ ਵੱਲੋਂ ਕੋਈ ਉਹਨਾਂ ਦੀ ਸੁਧ ਲੈਣ ਨਹੀਂ ਆਇਆ।  ਇਇਸ ਮੌਕੇ ਇੱਕ ਵਿਅਕਤੀ ਦੇ ਬੇਹੋਸ਼ ਹੋ ਜਾਣ  ਦੀ ਘਟਨਾ ਨੂੰ ਵੀ ਗੰਭੀਰਤਾ ਨਾਲ ਨਹੀਂ ਲਿਆ ਗਿਆ। ਇਸ 'ਤੇ ਗੁੱਸੇ 'ਚ ਆਏ ਮੈਂਬਰਾਂ ਨੇ ਨਿਗਮ ਦਫਤਰ ਦੇ ਗੇਟ 'ਤੇ ਤਾਲਾ ਲਗਾ ਕੇ ਸਾਰਿਆਂ ਦਾ ਆਉਣਾ ਜਾਣਾ ਬੰਦ ਕਰ ਦਿੱਤਾ ਤੇ ਟੰਡਨ ਨੇ ਆਤਮ-ਦਾਹ ਦਾ ਐਲਾਨ ਕਰ ਦਿੱਤਾ ਅਤੇ ਘੰਟਾਘਰ ਵੱਲ ਨੂੰ ਚੱਲ ਪਏ। ਪੁਲਸ ਨੂੰ ਚਕਮਾ ਦੇ ਕੇ ਟੰਡਨ ਦੇ ਨਾਲ ਭਾਨੂ ਪ੍ਰਤਾਪ ਨੇ ਵੀ ਆਪਣੇ ਉੱਪਰ ਤੇਲ ਪਾ ਲਿਆ, ਜਿਸ 'ਤੇ ਹਰਕਤ ਵਿਚ ਆਏ ਅਫਸਰਾਂ ਨੇ ਉਨ੍ਹਾਂ ਦੀ ਕੋਸ਼ਿਸ਼ ਅਸਫਲ ਕਰ ਦਿੱਤੀ ਅਤੇ ਦੋਵਾਂ ਨੂੰ ਘੇਰੇ ਵਿਚ ਲੈ ਕੇ ਉਥੋਂ ਚੁੱਕ ਲਿਆ ਤੇ ਗੱਡੀ ਵਿਚ ਪਾ ਕੇ ਕਿਤੇ ਲੈ ਗਏ।  ਇਸ 'ਤੇ ਭੜਕੇ ਵਰਕਰਾਂ ਨੇ ਬਾਜ਼ਾਰ ਬੰਦ ਕਰਵਾਉਣੇ ਸ਼ੁਰੂ ਕਰ ਦਿੱਤੇ, ਜਿਨ੍ਹਾਂ 'ਤੇ ਪੁਲਸ ਨੇ ਹਲਕਾ ਲਾਠੀਚਾਰਜ ਕਰ ਕੇ ਉਥੋਂ ਖਦੇੜਨ ਦੀ ਕੋਸ਼ਿਸ਼ ਕੀਤੀ, ਜਿਸ ਕਾਰਨ ਕਾਫੀ ਦੇਰ ਤੱਕ ਇਲਾਕੇ ਵਿਚ ਦਹਿਸ਼ਤ ਦਾ ਮਾਹੌਲ ਰਿਹਾ।  ਇਸ ਮੌਕੇ ਪ੍ਰਾਣ ਨਾਥ ਭਾਟੀਆ, ਸੁਨੀਲ ਮਹਿਰਾ, ਤਰੁਣ ਜੈਨ ਬਾਵਾ, ਦਵਿੰਦਰ ਜੱਗੀ, ਕੌਂਸਲਰ ਸੁਮਿਤ ਮਲਹੋਤਰਾ, ਵਰਿੰਦਰ ਸਹਿਗਲ, ਸੰਨੀ ਬੱਲਾ, ਮਹੇਸ਼ ਦੱਤ ਸ਼ਰਮਾ, ਦੀਪਕ ਸ਼ਰਮਾ, ਬਿੱਟੂ ਗੁੰਬਰ, ਰੋਹਿਤ ਸਾਹਨੀ, ਲੱਕੀ ਕਪੂਰ, ਅਮਿਤ ਅਰੋੜਾ, ਰਾਕੇਸ਼ ਅਰੋੜਾ, ਅਮਿਤ ਕੌਂਡਲ ਤੇ ਹੋਰ ਸ਼ਾਮਲ ਸਨ।ਅੱਜ ਦੇ ਇਸ ਐਕਸ਼ਨ ਵਿੱਚ ਕਈ ਹਿੰਦੂ ਆਗੂਆਂ ਨੇ ਸਰਗਰਮੀ ਨਾਲ ਭਾਗ ਲਿਆ। ਸਥਿਤੀ ਕੰਟਰੋਲ ਹੇਠ ਆਉਣ ਮਗਰੋਂ ਬਾਜ਼ਾਰ ਵਾਲਿਆਂ ਨੇ ਵੀ ਸੁੱਖ ਦਾ ਸਾਹ ਲਿਆ। ਪ੍ਰਦਰਸ਼ਨਕਾਰੀਆਂ ਨੇ  ਦੁਗਰੀ ਤੋਂ ਜੱਸੀਆਂ ਜਾਣ ਵਾਲੀ ਲੋਕਲ ਸਿਟੀ ਬਸ ਦਾ ਰਸਤਾ ਕਾਫੀ ਦੇਰ ਤੱਕ ਰੋਕਿਆ।

ਹੁਣ ਦੇਖਣਾ ਇਹ ਹੈ ਕਿ ਮੰਦਰ ਅਤੇ ਹੋਰ ਧਾਰਮਿਕ ਅਸਥਾਨਾਂ ਨੂੰ ਢਾਹੇ ਜਾਣ ਦੀਆਂ ਘਟਨਾਵਾਂ ਕਦੋਂ ਰੁਕਣਗੀਆਂ ? ਇਸ ਮਕਸਦ ਲਈ ਨਿਯਮ ਕਦੋਂ ਬਣਨਗੇ ? ਬਾਰ ਬਾਰ ਲੋਕਾਂ ਦੇ ਧਾਰਮਿਕ ਜਜਬਾਤਾਂ ਨਾਲ ਖੇਡਣ ਦਾ ਸਿਲਸਿਲਾ ਕਦੋਂ ਟੇਕ ਜਾਰੀ ਰਹੇਗਾ?