ਕਾਮਰੇਡ ਲੈਨਿਨ ਦਾ ਸ਼ੰਘਰਸਮਈ ਜੀਵਨ ਹੀ ਇਨਕਲਾਬੀਆਂ ਲਈ ਰਾਹ ਦਰਸਾਵਾ

Jun 2, 2019, 5:16 PM

ਲੈਨਿਨ ਨੇ ਹੀ ਸਾਨੂੰ ਪਾਰਟੀ ਉਸਾਰਨ ਵਾਲੀ ਜੁਗਤ ਦੱਸੀ-ਅੰਮ੍ਰਿਤ ਪਾਲ ਪੀਏਯੂ 

ਲੁਧਿਆਣਾ: 2 ਜੂਨ 2019: (ਪੰਜਾਬ ਸਕਰੀਨ ਬਿਊਰੋ)::

ਸ਼ਹੀਦ ਭਗਤ ਸਿੰਘ ਵਿਚਾਰ ਮੰਚ ਅਤੇ ਨੌਜਵਾਨ ਸਭਾ , ਭਾਈ ਰਣਧੀਰ ਸਿੰਘ ਨਗਰ( ਐਲ ਬਲਾਕ) ਲੁਧਿਆਣਾ ਵੱਲੋਂ ਗਦਰੀ ਸ਼ਹੀਦ ਬਾਬਾ ਭਾਨ ਸਿੰਘ ਯਾਦਗਾਰੀ ਹਾਲ ਸੁਨੇਤ ਵਿਖੇ “ ਮਹਾਨ ਕਾਮਰੇਡ ਲੈਨਿਨ ਦੀ ਸੰਘਰਸ਼ਮਈ ਜੀਵਨ-ਗਾਥਾ “ ਤੇ ਵਿਸ਼ੇਸ਼ ਸੈਮੀਨਾਰ ਕਰਵਾਇਆ ਗਿਆ। ਇਸ ਦੇ ਮੁੱਖ ਬੁਲਾਰੇ ਅੰਮ੍ਰਿਤਪਾਲ ਪੀਏਯੂ ਨੇ ਕਿਹਾ ਕਿ ਕਾਮਰੇਡ ਲੈਨਿਨ ਦੀ ਸੰਘਰਸ਼ਮਈ ਜ਼ਿੰਦਗੀ ਅੱਜ ਵੀ ਇਨਕਲਾਬੀਆਂ ਲਈ ਪ੍ਰੇਰਨਾ ਦਾ ਸਰੋਤ ਹੈ। ਕਿਉਂਕਿ ਉਸਦੀ ਜ਼ਿੰਦਗੀ ਸੰਸਾਰ ਇਨਕਲਾਬ ਨੂੰ ਅੱਗੇ ਵਧਾਉਣ , ਖ਼ਾਸ ਕਰਕੇ ਸੋਵੀਅਤ ਯੂਨੀਅਨ ਵਿੱਚ  ਮਹਾਨ ਅਕਤੂਬਰ ਸਮਾਜਵਾਦੀ ਇਨਕਲਾਬ ਕਰਨ ਅਤੇ ਇਨਕਲਾਬੀ ਵਿਚਾਰਾਂ ਦਾ ਦੁਨੀਆਂ ਭਰ ਵਿੱਚ ਪ੍ਰਚਾਰ-ਪ੍ਰਸਾਰ ਦੀ ਦਾਸਤਾਨ ਹੈ। ਅੰਮ੍ਰਿਤਪਾਲ ਨੇ ਕਿਹਾ ਕਿ ਜਿੱਥੇ ਲੈਨਿਨ ਨੇ ਮੁਲਕ ਪੱਧਰੀ ਪੇਸ਼ੇਵਰ ਕਮਿਉਨਿਸਟਾਂ ਦੀ ਪਾਰਟੀ ਉਸਾਰਨ ਦੀ ਜੁਗਤ ਤੇ ਦਾਅ-ਪੇਚ ਦੱਸੇ , ਉੱਥੇ ਸਮੇਂ ਸਮੇਂ ਸਿਰ ਬਦਲਵੀਆਂ ਹਾਲਤਾਂ ਦਾ ਮਾਰਕਸਵਾਦੀ ਨਜ਼ਰੀਏ ਤੋਂ ਵਿਸ਼ਲੇਸ਼ਣ ਕਰਕੇ ਦਰੁਸਤ ਲੀਹ ਵੀ ਅਪਣਾਈ। ਮਾਰਕਸ ਦੀ ਬੁਨਿਆਦੀ ਵਿਆਖਿਆ ਤੇ ਟਿਕੇ ਖੁੱਲ੍ਹੇ ਮੁਕਾਬਲੇ ਵਾਲੇ ਪੂੰਜੀਵਾਦ ਨੂੰ ਇਜਾਰੇਦਾਰ ਪੂੰਜੀਵਾਦ , ਭਾਵ ਸਾਮਰਾਜਵਾਦ ਵਜੋਂ ਪ੍ਰੀਭਾਸ਼ਤ ਕਰਨ ਤੇ ਉਸ ਦੇ ਸਿਫਤੀ ਲੱਛਣਾਂ ਨੂੰ ਸੂਤਰਬੱਧ ਕਰਨ ਦਾ   ਕੰਮ ਵੀ ਲੈਨਿਨ ਦੇ ਹਿੱਸੇ ਆਇਆ, ਜਿਸ ਨਾਲ ਤੀਜੀ ਦੁਨੀਆਂ ਦੇ ਦੇਸ਼ਾਂ ਦੀਆਂ ਕਮਿਉਨਿਸਟ ਪਾਰਟੀਆਂ ਨੂੰ ਸਾਮਰਾਜ ਵਿਰੁੱਧ ਲੜਾਈ ਲੜਨ ‘ਚ ਠੀਕ ਅਤੇ ਨਵੀਂ ਸੇਧ ਦਿੱਤੀ।

                   ਕਾ: ਲੈਨਿਨ ਅੰਤਾਂ ਦੇ ਔਖੇ ਸਮਿਆਂ ‘ਚ ਵੀ ਸਰਗਰਮ ਰਿਹਾ, ਭਾਵੇਂ ਉਹ ਗ੍ਰਿਫ਼ਤਾਰੀ ਦਾ ਸਮਾਂ ਹੋਵੇ , ਭਾਵੇਂ ਜਲਾਵਤਨੀ ਤੇ ਗੰਭੀਰ ਬਿਮਾਰੀ ਦਾ ਸਮਾਂ ਹੋਵੇ। ਲੈਨਿਨ ਨੇ ਤਾਂ ਉਮਰ ਭਰ ਆਪਣੇ ਆਪ ਨੂੰ ਰੂਸ ਵਿੱਚ ਸਮਾਜਵਾਦੀ ਉਸਾਰੀ ਅਤੇ ਸੰਸਾਰ  ਇਨਕਲਾਬ ਨੂੰ ਸਮਰਪਿਤ ਕੀਤਾ।ਜਿੱਥੇ ਉਹਨਾਂ ਨੇ ਰੂਸ ਅੰਦਰ ਮੌਕਾਪ੍ਰਸਤੀ ਤੇ ਸੋਧਵਾਦ ਖ਼ਿਲਾਫ਼ ਲੜਾਈ ਲੜੀ , ਉੱਥੇ ਕੌਮਾਂਤਰੀ ਪੱਧਰ ਤੇ ਵੀ ਮਾਰਕਸਵਾਦ ਤੋਂ ਭਟਕਣ ਵਾਲਿਆਂ ਖ਼ਿਲਾਫ਼ ਵੀ ਬੇਕਿਰਕ ਜੱਦੋ-ਜਹਿਦ ਕੀਤੀ । ਲੈਨਿਨ ਨੇ  ਕਿਸੇ  ਸਮੇਂ  ਰੂਸ ਨੂੰ        “ ਕੌਮਾਂ ਦਾ ਜੇਲ੍ਹ “ ਕਹੇ ਜਾਣ ਵਾਲੇ ਦੇਸ਼ ਨੂੰ ਕੌਮਾਂ ਦੇ ਸਵਰਗ ਵਜੋਂ ਵਿਕਸਿਤ ਕੀਤਾ। ਇਕ ਵੀ ਮਿੰਟ ਵਿਹਲਾ ਨਾ ਬੈਠਣ ਵਾਲਾ ਲੈਨਿਨ ਅੰਤ ਗੰਭੀਰ ਬਿਮਾਰੀ ਦੀ ਹਾਲਤ ਵਿੱਚ 21 ਜਨਵਰੀ 1924 ਨੂੰ 54 ਸਾਲ ਦੀ ਉਮਰ ‘ਚ ਇਸ ਦੁਨੀਆਂ ਤੋਂ ਸਦੀਵੀ ਵਿਦਾਇਗੀ ਲੈ ਗਿਆ। ਪਰ ਉਸਦਾ ਦਰਸਾਇਆ ਰਾਹ ਅੱਜ ਵੀ ਕਮਿਉਨਿਸਟਾਂ ਦੀ ਰਾਤ ਰੁਸ਼ਨਾਉਂਦਾ ਹੈ।

      ਸੈਮੀਨਾਰ ਦੀ ਸਟੇਜ ਦੀ ਕਾਰਵਾਈ ਨਿਭਾਉਂਦਿਆਂ ਜਸਵੰਤ ਜੀਰਖ ਨੇ ਬਹੁਤ ਸਾਰੀਆਂ ਜੀਵੰਤ ਟਿੱਪਣੀਆਂ ਕੀਤੀਆਂ ਅਤੇ ਭਾਰਤ ਦੇ ਕਮਿਉਨਿਸਟਾਂ ਨੂੰ ਲੈਨਿਨ ਦੀ ਘਾਲਣਾ ਭਰੀ ਜੀਵਨੀ ਤੋਂ ਸੇਧ ਲੈਕੇ ਚੱਲਣ ਲਈ ਅਪੀਲ ਕੀਤੀ। ਸੁਆਲਾਂ ਜੁਆਬਾਂ ਦੇ ਦੌਰ ਵਿੱਚ ਸੁਰਜੀਤ ਦੌਧਰ, ਕੰਵਲਜੀਤ ਜਗਰਾਓਂ, ਕਸਤੂਰੀ ਲਾਲ, ਜਸਦੇਵ ਲਲਤੋਂ, ਰੁਪਿੰਦਰਪਾਲ ਜੰਡਿਆਲੀ, ਸੁਖਵਿੰਦਰ ਲੀਲ, ਰਾਕੇਸ ਆਜਾਦ ਨੇ ਭਾਗ ਲਿਆ ਜ਼ਿਹਨਾਂ ਦੇ ਜਵਾਬ ਦਿੰਦਿਆਂ ਅੰਮ੍ਰਿਤਪਾਲ ਨੇ ਹੋਰ ਸਪਸ਼ਟਤਾ ਨਾਲ ਆਪਣੇ ਵੱਲੋਂ ਕਹੀਆਂ ਗੱਲਾਂ ਦੀ ਪ੍ਰੋੜ੍ਹਤਾ ਕੀਤੀ। ਇਸ ਸਮੇਂ ਤਰਕਸ਼ੀਲ ਆਗੂ ਆਤਮਾ ਸਿੰਘ, ਮਾ ਸੁਰਜੀਤ ਸਿੰਘ, ਅਰੁਣ ਕੁਮਾਰ, ਅਜਮੇਰ ਦਾਖਾ, ਸਾਬਕਾ ਅਧਿਆਪਕ ਆਗੂ ਚਰਨ ਨੂਰਪੁਰਾ, ਡਾ ਮੋਹਨ ਸਿੰਘ,ਐਡਵੋਕੇਟ ਹਰਪ੍ਰੀਤ ਜੀਰਖ ਅਤੇ ਗੁਰਚਰਨ ਜੀਤ, ਕਾ. ਸੁਰਿੰਦਰ, ਕਰਤਾਰ ਸਿੰਘ ਸਮੇਤ ਕਈ ਜੱਥੇਬੰਦੀਆਂ ਦੇ ਕਾਰਕੁਨ ਔਰਤਾਂ ਸਮੇਤ ਹਾਜ਼ਰ ਸਨ।ਜਸਦੇਵ ਲਲਤੋਂ ਨੇ ਇਨਕਲਾਬੀ ਗੀਤ ਰਾਹੀਂ ਵੀ ਆਪਣੇ ਜਜਬਾਤ ਸਾਂਝੇ ਕੀਤੇ । ਨੌਜਵਾਨ ਸਭਾ ਦੇ ਪ੍ਰਧਾਨ ਰਾਕੇਸ ਆਜ਼ਾਦ ਨੇ ਅੰਤ ਵਿੱਚ ਆਪਣੇ ਵਿਚਾਰ ਪ੍ਰਗਟਾਉਂਦਿਆਂ ਸਭ ਦਾ ਧੰਨਵਾਦ ਕੀਤਾ।

ਇਹਨਾਂ ਸੈਮੀਨਾਰਾਂ ਨਾਲ ਜੁੜਨ ਲਈ ਸੰਪਰਕ ਜਸਵੰਤ ਜੀਰਖ ਹੁਰਾਂ ਨਾਲ  ਮੋਬਾਈਲ ਨੰਬਰ  98151-69825 'ਤੇ ਸੰਪਰਕ ਕਰ ਸਕਦੇ ਹੋ। 

ਸਾਡੇ ਕੋਲ ਨਾਟਕ ਵਿਵਾਦ ਦੇ ਸਾਰੇ ਸਬੂਤ ਮੌਜੂਦ ਹਨ-ਚੇਤਨ ਮਲਹੋਤਰਾ

ਜੇ ਗ੍ਰਿਫਤਾਰੀ ਨਾ ਹੋਈ ਤਾਂ ਅੰਦੋਲਨ ਪੂਰੇ ਪੰਜਾਬ ਵਿੱਚ ਫੈਲੇਗਾ-ਬਜਰੰਗ ਦਲ

ਲੁਧਿਆਣਾ: 21 ਅਪ੍ਰੈਲ 2019: (ਪੰਜਾਬ ਸਕਰੀਨ ਟੀਮ)::

ਚੇਤਨ ਮਲਹੋਤਰਾ ਅਤੇ ਉਹਨਾਂ ਦੇ ਸਾਥੀਆਂ ਦਾ ਦਾਅਵਾ ਹੈ ਕਿ ਇਹ ਤਸਵੀਰ ਵਿਵਾਦਿਤ
ਨਾਟਕ ਦੇ ਰਿਹਰਸਲ ਨੂੰ ਦੇਖਣ ਸਮੇਂ ਦੀ ਹੈ ਜਿਸ ਵਿੱਚ ਕਈ ਕਲਾਕਾਰ ਅਤੇ ਵਿਦਿਆਰਥੀ 
ਕਮਿਊਨਿਸਟਾਂ ਦੇ ਲਾਲ ਪਰਨੇ ਨੂੰ ਸਨਮਾਨ  ਚਿੰਨ ਵਾਂਗ ਗੱਲ ਵਿੱਚ ਪਾ ਕੇ ਖੜੇ ਹਨ। 

ਲੁਧਿਆਣਾ ਦੇ ਵਿਦਿਅਕ ਅਦਾਰਿਆਂ ਵਿੱਚ ਚੁੱਪ ਜਿਹੀ ਛਾਈ ਹੈ। ਇੱਕ ਸਹਿਮ ਭਰੀ ਚੁੱਪ। ਸਤੀਸ਼ ਚੰਦਰ ਧਵਨ ਸਰਕਾਰੀ ਕਾਲਜ ਦੇ ਮਾਮਲੇ ਵਿੱਚ ਦਰਜ ਸ਼ਿਕਾਇਤ ਨੂੰ ਲੈ ਕੁਝ ਖੱਬੇਪੱਖੀ ਸੰਗਠਨਾਂ ਤੋਂ ਇਲਾਵਾ ਹੋਰ ਕੋਈ ਨਹੀਂ ਬੋਲ ਰਿਹਾ। ਵਿਵਾਦਿਤ ਨਾਟਕ,"ਮਿਊਜ਼ੀਅਮ" ਦਾ ਵਿਵਾਦ ਇਸ ਚੁੱਪ ਨਾਲ ਹੋਰ ਡੂੰਘਾ ਹੁੰਦਾ ਮਹਿਸੂਸ ਹੋ ਰਿਹਾ ਹੈ। ਇਸੇ ਦੌਰਾਨ ਬਜਰੰਗ ਦਲ ਦੇ ਸਥਾਨਕ ਪਰ ਸਰਗਰਮ ਆਗੂ ਚੇਤਨ ਮਲਹੋਤਰਾ ਨੇ ਸਪਸ਼ਟ ਕੀਤਾ ਹੈ ਜੇ ਹਿੰਦੂ ਧਰਮ ਨਾਲ ਸਬੰਧਤ ਸ਼ਖਸੀਅਤਾਂ ਦਾ ਅਪਮਾਨ ਕਰਨ ਵਾਲਿਆਂ ਦੀ ਗ੍ਰਿਫਤਾਰੀ ਨ ਹੋਈ ਤਾਂ ਇਹ ਅੰਦੋਲਨ ਪੂਰੇ ਪੰਜਾਬ ਵਿੱਚ ਫੈਲੇਗਾ। "ਪੰਜਾਬ ਸਕਰੀਨ" ਦੀ ਟੀਮ ਨਾਲ ਇੱਕ ਸੰਖੇਪ ਜਿਹੀ ਮੁਲਾਕਾਤ ਦੌਰਾਨ ਉਹਨਾਂ ਕਿਹਾ ਕਿ ਸਾਡੇ ਕੋਲ ਇਸ ਮਾਮਲੇ ਨਾਲ ਸਬੰਧਤ ਸਾਰੇ ਸਬੂਤ ਮੌਜੂਦ ਹਨ। 

ਉਹਨਾਂ ਕਿਹਾ ਕਿ ਕਾਲਜ ਪ੍ਰਿੰਸੀਪਲ ਵੱਲੋਂ ਇਹ ਕਹਿਣਾ ਕਿ ਉਹਨਾਂ ਨੇ ਨਾਟਕ ਦੋ ਤੋਂ ਤਿੰਨ ਮਿੰਟਾਂ ਬਾਅਦ ਹੀ ਰੁਕਵਾ ਦਿੱਤਾ ਸੀ ਪੂਰੀ ਤਰਾਂ ਗਲਤ ਹੈ। ਨਾਟਕ ਪੂਰਾ ਖੇਡਿਆ ਗਿਆ।  ਜਦੋਂ ਨਾਟਕ ਰੁਕਵਾਇਆ ਗਿਆ ਉਦੋਂ ਤਾਂ ਨਾਟਕ ਰਹਿ ਹੀ ਦੋ ਕੁ ਮਿੰਟਾਂ ਦਾ ਗਿਆ ਸੀ। ਕਾਲਜ ਪ੍ਰਿੰਸੀਪਲ ਬਾਰੇ ਚੇਤਨ ਮਲਹੋਤਰਾ ਅਤੇ ਉਹਨਾਂ ਦੇ ਸਾਥੀਆਂ ਨੇ ਇਹ ਵੀ ਕਿਹਾ ਕਿ ਪ੍ਰਿੰਸੀਪਲ ਅਤੇ ਉਹਨਾਂ ਦੇ ਸਟਾਫ ਨੇ ਇਸ ਨਾਟਕ ਦੇ ਮੰਚਨ ਨੂੰ ਇਸ ਨਾਟਕ ਦੀ ਰਿਹਰਸਲ ਦੌਰਾਨ ਪੂਰਾ ਦੇਖਿਆ ਹੈ ਇਸ ਲਈ ਉਹ ਇਹ ਨਹੀਂ ਕਹਿ ਸਕਦੇ ਕਿ ਉਹਨਾਂ ਨੂੰ ਪਤਾ ਨਹੀਂ ਸੀ ਕਿ ਨਾਟਕ ਵਿੱਚ ਕੀ ਹੈ। ਬਜਰੰਗ ਦਲ ਦੀ ਟੀਮ ਨੇ ਸਾਨੂੰ ਰਿਹਰਸਲ ਦੀਆਂ ਤਸਵੀਰਾਂ ਵੀ ਦਿਖਾਈਆਂ। 

ਇਸਦੇ ਨਾਲ ਹੀ ਚੇਤਨ ਮਲਹੋਤਰਾ ਅਤੇ ਉਹਨਾਂ ਦੇ ਸਾਥੀਆਂ ਨੇ ਕਿਹਾ ਕਿ ਸਾਡਾ ਵਿਰੋਧ ਸਿਰਫ ਕਮਿਊਨਿਸਟ ਸੋਚ ਵਾਲੇ ਹੀ ਕਰ ਰਹੇ ਹਨ ਕਿਓਂਕਿ ਕਮਿਊਨਿਸਟਾਂ ਦੀ ਕਾਲਜ ਦੇ ਕੁਝ ਪ੍ਰਬੰਧਕਾਂ ਅਤੇ ਨਾਟਕ ਕਰਨ ਵਾਲਿਆਂ ਨਾਲ ਬਹੁਤ ਨੇੜਤਾ ਹੈ। ਅਸਲ ਵਿੱਚ ਅਜਿਹੇ ਨਾਟਕਾਂ ਦੇ ਬਹਾਨੇ ਉਹ ਸਮਾਜ ਵਿੱਚ ਜਿੱਥੇ ਨਾਸਤਿਕਤਾ ਫੈਲਾ ਰਹੇ ਹਨ ਉੱਥੇ ਸਕੂਲਾਂ ਕਾਲਜਾਂ ਵਿੱਚ ਮਾਰਕਸਵਾਦ ਅਤੇ ਮਾਓਵਾਦ ਦੀ ਸਿਆਸੀ ਸੋਚ ਨੂੰ ਵੀ ਗੁਪਤ ਤਰੀਕੇ ਨਾਲ ਦਾਖਲ ਕਰ ਰਹੇ ਹਨ। ਸਾਰੇ ਦੇਸ਼ ਨੂੰ ਲਾਲ ਰੰਗ ਵਾਲੀ ਸੋਚ ਵਿੱਚ ਰੰਗਣਾ ਇਹਨਾਂ ਕਾਮਰੇਡਾਂ ਦਾ ਪੁਰਾਣਾ ਮਕਸਦ ਹੈ। ਅਸੀਂ ਇਸ ਨਾਪਾਕ ਸਾਜ਼ਿਸ਼ ਨੂੰ ਕਾਮਯਾਬ ਨਹੀਂ ਹੋਣ ਦਿਆਂਗੇ। ਕਦੇ ਧਰਮ ਨਿਰਪੱਖਤਾ, ਕਦੇ ਔਰਤਾਂ ਦੇ ਅਧਿਕਾਰਾਂ ਅਤੇ ਕਦੇ ਕਿਸੇ ਕਿਸੇ ਹੋਰ ਬਹਾਨੇ ਇਹ ਲੋਕ ਆਪਣੇ ਸਿਆਸੀ ਏਜੰਡੇ ਨੂੰ ਲਾਗੂ ਕਰਨ ਦੀ ਤਾਕ ਵਿੱਚ ਹਨ। ਅਫਸੋਸ ਹੈ ਕਿ ਕੁਝ ਅਖੌਤੀ ਬੁੱਧੀਜੀਵੀ ਇਹਨਾਂ ਦਾ ਸਾਥ ਦੇ ਰਹੇ ਹਨ। 

ਉਹਨਾਂ ਕਿਹਾ ਕਿ ਅਸੀਂ ਇਸ ਗੱਲ ਦਾ ਵੀ ਪਤਾ ਲਗਾ ਰਹੇ ਹਾਂ ਕਿ ਨਾਟਕ ਕਰਨ ਵਾਲਿਆਂ ਨੂੰ ਕਿਸ ਵੱਲੋਂ ਕਿੰਨੇ ਪੈਸੇ ਦਿੱਤੇ ਗਏ? ਉਹਨਾਂ ਕਮਿਊਨਿਸਟ ਸੋਚ ਵਾਲੀਆਂ ਨਾਟਕ ਮੰਡਲੀਆਂ ਵੱਲੋਂ ਨਾਟਕ ਖੇਡਣ ਲਈ ਚਾਰਜ ਕੀਤੇ ਜਾਂਦੇ ਪੈਸਿਆਂ ਦਾ ਰੇਟ ਪਤਾ ਕਰਨ ਦੀ ਵੀ ਗੱਲ ਕਹੀ। 

ਉਹਨਾਂ  ਦੱਸਿਆ ਕਿ ਸਾਡੇ ਵੱਲੋਂ ਦਿੱਤੀ ਸ਼ਿਕਾਇਤ ਨੂੰ ਕਮਜ਼ੋਰ ਕਰਨ ਲਈ ਇਹਨਾਂ ਨੇ ਘੁਮਾਰ ਮੰਡੀ ਦੇ ਵੀਡਿਓ ਵਾਲੇ ਨੂੰ ਵੀ ਡਰਾਇਆ ਧਮਕਾਇਆ ਅਤੇ ਉਸ ਨੂੰ ਦਬਾਅ ਪਾ ਕੇ ਕਿਹਾ ਕਿ ਉਹ ਇਸ ਨਾਟਕ ਨਾਲ ਸਬੰਧਤ ਸਾਰੀਆਂ ਵੀਡੀਓ ਡਿਲੀਟ ਕਰ ਦੇਵੇ। ਇਸਦੇ ਬਾਵਜੂਦ ਹਾਲ ਵਿੱਚ ਮੌਜੂਦ ਕੁਝ ਲੋਕਾਂ ਨੇ ਸਾਨੂੰ ਇਸ ਬੇਹੱਦ ਇਤਰਾਜ਼ਯੋਗ ਨਾਟਕ ਦੀਆਂ ਵੀਡੀਓ ਮੁਹਈਆ ਕਰਾਈਆਂ ਹਨ। ਅਸੀਂ ਆਪਣੀ ਸ਼ਿਕਾਇਤ ਦੇ ਨਾਲ ਪੂਰੀ ਸੀਡੀ ਵੀ ਦਿੱਤੀ ਹੈ। ਨਾਟਕ ਬੇਹੱਦ ਇਤਰਾਜ਼ਯੋਗ ਸੀ। ਜੋ ਸ਼ਬਦ ਮਾਤਾ ਸੀਤਾ ਅਤੇ ਦਰੋਪਦੀ ਬਾਰੇ ਕਹੇ ਗਏ ਹਨ ਜੇ ਉਹੀ ਸ਼ਬਦ ਕਿਸੇ ਆਮ ਪਰਿਵਾਰ ਦੀ ਔਰਤ ਬਾਰੇ ਕਹੇ ਜਾਂਦੇ ਹਨ ਤਾਂ ਨੌਬਤ ਕਤਲੋ-ਗੈਰਤ ਤੱਕ ਪਹੁੰਚ ਸਕਦੀ ਹੈ। ਅਸੀਂ ਹਿੰਦੂ ਹਾਂ ਅਤੇ ਹਿੰਦੂ ਧਰਮ ਦਾ ਅਪਮਾਨ ਨਹੀਂ ਹੋਣ ਦਿਆਂਗੇ। ਅਸੀਂ ਬਾਕੀ ਧਰਮਾਂ ਵਾਲਿਆਂ  ਨੂੰ ਵੀ ਸੱਦਾ ਦੇਂਦੇ ਹਾਂ ਕਿ ਸਾਡਾ ਸਾਥ ਦਿਓ। ਜੇ ਅੱਜ ਹਿੰਦੂ ਧਰਮ ਦਾ ਅਪਮਾਨ ਹੋਇਆ ਹੈ ਤਾਂ ਕੱਲ ਨੂੰ ਤੁਹਾਡੇ ਧਰਮ ਦਾ ਵੀ ਅਪਮਾਨ ਹੋ ਸਕਦਾ ਹੈ। ਇਸ ਤਰਾਂ ਲੱਗਦਾ ਹੈ ਕਿ ਨਾਟਕ ਨੂੰ ਲੈ ਕੇ ਸ਼ੁਰੂ ਹੋਇਆ ਇਹ ਵਿਵਾਦ ਛੇਤੀ ਹੀ ਕਮਿਊਨਿਸਟਾਂ ਅਤੇ ਗੈਰ ਕਮਿਊਨਿਸਟਾਂ ਵਿਚਕਾਰ ਸੰਭਾਵਤ ਟਕਰਾਓ ਦਾ ਰੂਪ ਲੈ ਸਕਦਾ ਹੈ। 

ਸਬੰਧਤ ਪੋਸਟਾਂ:

SCD ਕਾਲਜ ਵਿਰੁੱਧ ਐਫ ਆਈ ਆਰ ਦਾ ਮਾਮਲਾ ਹੋਰ ਗਰਮਾਇਆ

SCD ਸਰਕਾਰੀ ਕਾਲਜ ਵਿਰੁੱਧ ਦਰਜ ਸ਼ਿਕਾਇਤ ਦਾ ਮਾਮਲਾ ਗਰਮਾਇਆ

ਤਰਕਸ਼ੀਲ ਸੰਗਠਨਾਂ ਵੱਲੋਂ ਮਿਊਜ਼ੀਅਮ ਨਾਟਕ ਪੰਜਾਬ ਭਰ 'ਚ ਖੇਡਣ ਦਾ ਐਲਾਨ

ਤਰਕਸ਼ੀਲਾਂ ਵੱਲੋਂ ਸਾਖਸ਼ੀ ਮਹਾਰਾਜ ਤੇ ਸਾਧਵੀ ਪ੍ਰੱਗਿਆ ਠਾਕੁਰ ਨੂੰ ਚੁਣੌਤੀ

ਸਾਡੇ ਕੋਲ ਨਾਟਕ ਵਿਵਾਦ ਦੇ ਸਾਰੇ ਸਬੂਤ ਮੌਜੂਦ ਹਨ-ਚੇਤਨ ਮਲਹੋਤਰਾ

ਆਰ.ਐਮ. ਪੀ.ਆਈ ਅਤੇ ਇਨਕਲਾਬੀ ਜਥੇਬੰਦੀਆਂ ਵਲੋਂ ਫਲੈਗ ਮਾਰਚ

ਮਹਾਨ ਅਕਤੂਬਰ ਇਨਕਲਾਬ ਦੀ ਸ਼ਤਾਬਦੀ, ਜੋਸ਼ੋ ਖਰੋਸ਼ ਨਾਲ ਮਨਾਈ ਗਈ

ਲੁਧਿਆਣਾ: 7 ਨਵੰਬਰ 2017: (ਪੰਜਾਬ ਸਕਰੀਨ ਟੀਮ)::

ਕਾਮਰੇਡਾਂ ਨੂੰ ਨਾਸਤਿਕ ਕਹੋ, ਜਨੂੰਨੀ ਕਹੋ ਜਾਂ  ਕੁਝ ਹੋਰ ਪਰ ਕਾਮਰੇਡਾਂ ਨੇ ਹੀ ਮਨੁੱਖ ਨੂੰ ਦੈਵੀ ਚਮਤਕਾਰਾਂ ਅਤੇ ਅਲੌਕਿਕ ਆਸਾਂ ਉਮੀਦਾਂ ਦੇ ਭਰਵਾਸੇ ਛੱਡ ਕੇ ਆਪਣੇ ਸੰਘਰਸ਼ਾਂ ਨਾਲ ਆਪਣੇ ਸੁਪਨੇ ਸਾਕਾਰ ਕਰਨ ਦਾ ਰਾਹ ਦਿਖਾਇਆ। ਕਰੀਬ 300 ਸਾਲਾਂ ਦੀ ਰਾਜਸ਼ਾਹੀ ਨੂੰ ਅਕਤੂਬਰ ਇਨਕਲਾਬ ਰਾਹੀਂ ਉਖਾੜ ਸੁੱਟਿਆ ਗਿਆ। ਕਿਰਤੀਆਂ, ਮਜ਼ਦੂਰਾਂ ਕਿਸਾਨਾਂ ਦਾ ਪਹਿਲਾ ਰਾਜ ਇੱਕ ਸੁਪਨਾ ਸੀ ਜਿਹੜਾ ਕਾਮਰੇਡਾਂ ਨੇ ਸੱਚ ਕਰ ਦਿਖਾਇਆ। ਲੋਕ ਸ਼ਕਤੀ ਦਾ ਅਸਲੀ ਕ੍ਰਿਸ਼ਮਾ ਦਿਖਾਉਣ ਵਾਲੇ ਕਾਮਰੇਡ ਲੈਨਿਨ ਨੇ 24 ਅਕਤੂਬਰ 1917 ਵਾਲੇ ਦਿਨ ਲਾਲ ਗਾਰਡਾਂ ਨੂੰ ਕ੍ਰਾਂਤੀ ਦਾ ਸੁਨੇਹਾ ਦਿੱਤਾ। ਇਹ ਸੁਨੇਹਾ ਅੱਗ ਵਾਂਗ ਫੈਲਿਆ। ਲੈਨਿਨ ਨੇ ਬਗਾਵਤ ਦੀ ਇਹ ਕਮਾਨ ਸਿਧ ਆਪਣੇ ਹੱਥ ਵਿੱਚ ਲਾਇ ਲਈ। ਅਗਲੇ ਹੀ ਦਿਨ 25 ਅਕਤੂਬਰ 1917 ਨੂੰ ਸਾਰੇ ਦਫਤਰਾਂ ਅਤੇ ਵਿਭਾਗਾਂ ਤੇ ਬਲਸ਼ਵਿਕਾਂ ਦਾ ਕਬਜ਼ਾ ਹੋ ਗਿਆ। ਜਦ ਜਦ ਵੀ ਲਾਮਰੇਡਾਂ ਨੇ ਆਪਣੇ ਰਹਿਬਰ ਲੈਨਿਨ ਦਾ ਫਲਸਫਾ ਸਾਹਮਣੇ ਰੱਖ ਕੇ ਸੰਘਰਸ਼ ਕੀਤਾ ਉਹਨਾਂ ਨੂੰ ਜਿੱਤ ਮਿਲੀ। ਜਦ ਜਦ ਵੀ ਉਹਨਾਂ ਆਪਣਾ ਇਹ ਰਸਤਾ ਬਦਲਿਆ ਜਾਂ ਕੁਝ ਤਜਰਬੇ ਕੀਤੇ ਉਦੋਂ ਉਦੋਂ ਹੀ ਉਹਨਾਂ ਨੂੰ ਹਾਰ ਹੋਈ। ਲੈਨਿਨਵਾਦ ਅਤੇ ਮਾਰਕਸਵਾਦ ਨੇ ਕਾਮਰੇਡਾਂ ਦੀਆਂ ਹੈਰਾਨ ਨੂੰ ਬਾਰ ਬਾਰ ਜਿੱਤਾਂ ਵਿੱਚ ਬਦਲਿਆ।  ਅੱਜ ਵੇਰਕਾ ਮਿਲਕ ਪਲਾਂਟ ਸਾਹਮਣੇ ਅਕਤੂਬਰ ਇੰਨਕਲਾਬ ਦੀ ਕ੍ਰਾਂਤੀ ਦਾ ਜਸ਼ਨ ਇਹਨਾਂ ਜਿੱਤਾਂ ਦੀ ਯਾਦ ਤਾਜ਼ਾ ਕਰ ਰਿਹਾ ਸੀ। 

ਅਕਤੂਬਰ 1917 ’ਚ ਰੂਸ ’ਚ ਕਾਮਰੇਡ ਲੈਨਿਨ ਦੀ ਅਗਵਾਈ ਵਿਚ ਆਈ ਮਹਾਨ ਕ੍ਰਾਂਤੀ ਨੇ ਪੂਰੀ ਦੁਨੀਆਂ ਨੂੰ ਪ੍ਰਭਾਵਿਤ ਕੀਤਾ। ਇਸ ਕ੍ਰਾਂਤੀ ਤੋਂ ਬਾਅਦ ਦੁਨੀਆਂ ਦੇ ਕਈ ਦੇਸ਼ਾਂ ਵਿਚ ਸਮਾਜਵਾਦ ਆਇਆ ਅਤੇ ਇਸਦੀ ਲਹਿਰ ਹੋਰ ਪ੍ਰਚੰਡ ਹੋਈ। ਇਹ ਕ੍ਰਾਂਤੀ ਜਿਹੜੀ ਕਿ ਮਾਰਕਸਵਾਦ ਦੇ ਫਲਸਫੇ ’ਤੇ ਅਧਾਰਿਤ ਸੀ। ਇਸ ਕ੍ਰਾਂਤੀ ਨੇ ਸਾਡੇ ਦੇਸ਼ ਦੀ ਆਜ਼ਾਦੀ ਦੀ ਲੜਾਈ ’ਤੇ ਵੀ ਡੂੰਘਾ ਅਸਰ ਪਾਇਆ। ਇਹ ਆਜ਼ਾਦੀ ਦੀ ਲੜਾਈ ਜਿਹੜੀ ਕਿ ਸ਼ਹੀਦ ਭਗਤ ਸਿੰਘ ਅਤੇ ਉਸਦੇ ਸਾਥੀਆਂ ਵਲੋਂ ਲੜੀ ਜਾ ਰਹੀ ਸੀ ਤੇ ਕਾਮਰੇਡ ਲੈਨਿਨ ਉਨਾਂ ਦਾ ਪ੍ਰੇਰਣਾ ਸਰੋਤ ਬਣ ਗਏ। ਸ਼ਹੀਦਾਂ ਦੀਆਂ ਕੁਰਬਾਨੀਆਂ ਸਦਕਾ ਦੇਸ਼ ਤਾਂ ਆਜ਼ਾਦ  ਹੋ ਗਿਆ ਪਰ ਉਨਾਂ ਦੇ ਸੁਪਨਿਆਂ ਦਾ ਆਜ਼ਾਦੀ ਵਾਲਾ ਦੇਸ਼ ਨਹੀਂ ਬਣ ਸਕਿਆ। ਅੱਜ ਦੇ ਇਸ ਜੋਸ਼ੀਲੇ ਮਾਰਚ ਵਿੱਚ ਲੈਨਿਨ ਅਤੇ ਮਾਰਕਸ ਦਾ ਫਲਸਫਾ ਇੱਕ ਸੁਨੇਹੇ ਵੱਜੋਂ ਘਰ ਘਰ ਪਹੁੰਚਾਇਆ। ਵੇਰਕਾ ਮਿਲਕ ਪਲਾਂਟ ਤੋਂ ਸ਼ੁਰੂ ਹੋਇਆ ਇਹ ਮਾਰਚ ਪੂਰਾ ਸ਼ਹਿਰ ਘੁੰਮਿਆ। ਜਦੋਂ ਲੋਕ ਇਹ ਸਮਝ ਰਹੇ ਸਨ ਕਿ ਕਮਿਊਨਿਸਟ ਤਾਂ ਖਤਮ ਹੋ ਚੁੱਕੇ ਹਨ ਉਦੋਂ ਇਸ ਮਾਰਚ ਨੇ ਦੱਸਿਆ ਕਿ ਅਕਤੂਬਰ ਇੰਨਕਲਾਬ ਦੇ ਚਾਹੁਣ ਵਾਲੇ ਕਦੇ ਖਤਮ ਨਹੀਂ ਕੀਤੇ ਜਾ ਸਕਦੇ। ਲੈਨਿਨ ਅਤੇ ਮਾਰਕਸ ਦੇ ਅਸਲੀ ਵਾਰਿਸ ਕਮਿਊਨਿਸਟ ਲਹਿਰ ਨੂੰ ਫਿਰ ਬੁਲੰਦੀਆਂ ਉੱਤੇ ਲੈ ਜਾਣਗੇ। 

ਉਕਤ ਵਿਚਾਰ ਭਾਰਤੀ ਇਨਕਲਾਬੀ ਮਾਰਕਸਵਾਦੀ ਪਾਰਟੀ ਅਤੇ ਇਨਕਲਾਬੀ ਜਥੇਬੰਦੀਆਂ ਜਮਹੂਰੀ ਕਿਸਾਨ ਸਭਾ ਪੰਜਾਬ, ਸ਼ਹੀਦ ਭਗਤ ਸਿੰਘ ਨੌਜਵਾਨ ਸਭਾ ਪੰਜਾਬ, ਪੰਜਾਬ ਸਟੂਡੈਂਟਸ ਫੈਡਰੇਸ਼ਨ , ਮਨਰੇਗਾ ਵਰਕਰਜ਼ ਯੂਨੀਅਨ, ਭੱਠਾ ਲੇਬਰ ਮਜ਼ਦੂਰ ਯੂਨੀਅਨ, ਉਸਾਰੀ ਮਜ਼ਦੂਰ ਯੂਨੀਅਨ ਵਲੋਂ ਅਕਤੂਬਰ ਇਨਕਲਾਬ ਦੀ ਮਨਾਈ ਗਈ 100ਵੀਂ ਵਰ੍ਹੇਗੰਢ ਦੇ ਦੌਰਾਨ ਕੀਤੇ ਗਏ ਜੋਸ਼ੀਲੇ ਫਲੈਗ ਮਾਰਚ ਦੌਰਾਨ ਵੱਖ ਵੱਖ ਆਗੂਆਂ ਪ੍ਰੋ. ਜੈਪਾਲ ਸਿੰਘ ਤੂਰ, ਜਗਤਾਰ ਸਿੰਘ ਚਕੋਹੀ, ਰਘਵੀਰ ਸਿੰਘ ਬੈਨੀਪਾਲ, ਚਰਨਜੀਤ ਸਿੰਘ ਹਿਮਾਯੂਪੁਰਾ, ਮਹਿੰਦਰ ਸਿੰਘ ਅੱਚਰਵਾਲ, ਰਾਜੂ ਹਿੰਮਾਯੂਪੁਰਾ, ਹਰਨੇਕ ਸਿੰਘ ਗੁੱਜਰਵਾਲ, ਅਮਰਜੀਤ ਸਿੰਘ ਸ਼ਹਿਜਾਦ ਨੇ ਪ੍ਰਗਟ ਕੀਤੇ। ਹਰ ਚਿਹਰੇ ਤੇ ਜੋਸ਼ ਸੀ। ਅੱਖਾਂ ਵਿੱਚ ਇੱਕ ਨਵੀਂ ਚਮਕ ਸੀ। ਇੰਨਕਲਾਬ ਦੀ ਚਮਕ। ਅਕਤੂਬਰ ਇੰਨਕਲਾਬ ਵਾਲੀ ਜਿੱਤ ਦਾ ਹੋਂਸਲਾ ਬਾਰ ਬਾਰ ਨਵੀਂ ਹਿੰਮਤ ਦੇ ਰਿਹਾ ਸੀ। ਲਾਲ ਝੰਡਾ ਅੱਜ ਫਿਰ ਲਾਲ ਖੂਨ ਨੂੰ ਫਿਰ ਗਰਮ ਰਿਹਾ ਸੀ। ਨਾਅਰੇ ਲਾਉਂਦੇ ਹੋਏ ਕੱਸਵੇਂ ਮੁੱਕੇ ਇੱਕ ਐਲਾਨ ਕਰ ਰਹੇ ਸਨ। ਇੰਨਕਲਾਬ ਲਈ ਹਰ ਹਾਲ ਵਿੱਚ ਜੂਝਣ ਵਾਲੇ ਸੰਕਲਪ ਦਾ ਐਲਾਨ।  

ਇਸ ਮੌਕੇ ’ਤੇ ਗੁਰਦੀਪ ਸਿੰਘ ਕਲਸੀ ਰਾਏਕੋਟ, ਗੁਰਚਰਨ ਸਿੰਘ ਮੁੱਲਾਂਪੁਰ, ਗੁਰਜੀਤ ਸਿੰਘ ਕਾਲਾ ਮਨਸੂਰਾਂ, ਰੁਪਿੰਦਰ ਸਿੰਘ ਜੋਧਾਂ, ਜਗਤਾਰ ਸਿੰਘ ਮੁੱਲਾਂਪੁਰ, ਇੰਦਰ ਸਿੰਘ ਗੋਰਸੀਆਂ, ਅਮਰਜੀਤ ਹਿਮਾਂਯੂਪੁਰਾ ਹੁਕਮ ਰਾਜ ਦੇਹੜਕਾ, ਮਨਜੀਤ ਸਿੰਘ ਉਧੋਵਾਲ, ਸਤਪਾਲ ਸਿੰਘ ਕੂਮਕਲਾਂ ਸਾਬਕਾ ਚੇਅਰਮੈਨ, ਸਿਕੰਦਰ ਮਨਸੂਰਾਂ, ਅਮਰੀਕ ਮੀਕਾ ਜੋਧਾਂ, ਰਾਣਾ ਲਤਾਲਾ, ਗੁਰਪਿੰਦਰ ਮਨਸੂਰਾਂ, ਗੁਰਪਿੰਦਰ ਜੋਧਾਂ, ਦੀਪੀ ਜੋਧਾਂ, ਨਛੱਤਰ ਸਿੰਘ ਸ਼ਹਿਜਾਦ, ਗਗਨ ਸ਼ਹਿਜਾਦ, ਚਮਨ ਲਾਲ, ਹਰਜਿੰਦਰ ਖੰਡੂਰ, ਸਵਰਨ ਸਿੰਘ ਸਾਬਕਾ ਸਰਪੰਚ ਮੱਲੀਪੁਰ, ਮੇਵਾ ਸਿੰਘ ਅੜੈਚਾ ਅਤੇ ਹੋਰ ਵੱਖ ਵੱਖ ਜਥੇਬੰਦੀਆਂ ਦੇ ਆਗੂਆਂ ਨੇ ਇਸ ਫਲੈਗ ਮਾਰਚ ਦੀ ਅਗਵਾਈ ਕੀਤੀ। ਮਾਰਚ ਦਾ ਅਨੁਸ਼ਾਸਨ ਦੇਖਣ ਵਾਲਾ ਸੀ। ਮਾਰਚ ਵਿੱਚ ਸ਼ਾਮਲ  ਲੋਕਾਂ ਦੀ ਹਿੰਮਤ ਅਤੇ ਜਜ਼ਬਾ ਉਹਨਾਂ ਦੇ ਕੋਲ ਖੜੋ ਕੇ ਹੀ ਮਹਿਸੂਸ ਕੀਤਾ ਜਾ ਸਕਦਾ ਸੀ। ਇੰਨਕਲਾਬ ਲਈ ਇਹਨਾਂ ਦੀ ਪ੍ਰਤੀਨਿਧਤਾ ਦੱਸ ਰਹੀ ਸੀ ਕਿ ਆ ਕੇ ਰਹੇਗਾ ਇੰਨਕਲਾਬ। 

ਫਲੈਗ ਮਾਰਚ ਦੀ ਅਗਵਾਈ ਕਰਦੇ ਹੋਏ ਪ੍ਰੋ. ਜੈਪਾਲ ਸਿੰਘ ਤੂਰ, ਜਗਤਾਰ ਸਿੰਘ ਚਕੋਹੀ, ਰਘਵੀਰ ਸਿੰਘ ਬੈਨੀਪਾਲ, ਚਰਨਜੀਤ ਸਿੰਘ ਹਿਮਾਯੂਪੁਰਾ, ਮਹਿੰਦਰ ਸਿੰਘ ਅੱਚਰਵਾਲ, ਹਰਨੇਕ ਸਿੰਘ ਗੁੱਜਰਵਾਲ, ਅਮਰਜੀਤ ਸਿੰਘ ਸ਼ਹਿਜ਼ਾਦਾ ਅਤੇ ਹੋਰਾਂ ਨੇ ਮੌਜੂਦਾ ਹਾਲਾਤਾਂ ਦੀ ਵੀ ਗੱਲ ਕੀਤੀ।  ਪ੍ਰੋਫੈਸਰ ਜੈਪਾਲ ਸਿੰਘ ਤੂਰ ਨੇ ਮੌਜੂਦਾ ਸਥਿਤੀਆਂ ਅਤੇ ਕਮਿਊਨਿਸਟ ਲਹਿਰ ਵਿੱਚ ਆਈ ਖੜੋਤ ਵਾਲੀ ਸਥਿਤੀ ਬਾਰੇ ਬਹੁਤ ਹੀ ਠਰੰਮੇ ਨਾਲ ਹਰ ਗੱਲ ਦਾ ਜੁਆਬ ਦਿੱਤਾ।  ਇਹ ਗੱਲਬਾਤ ਤੁਸੀਂ ਵੀਡੀਓ ਕਲਿੱਕ ਕਰਕੇ ਸੁਣ ਸਕਦੇ ਹੋ।  

  

ਸੱਤਾਧਾਰੀ ਪਾਰਟੀਆਂ ਨੂੰ ਹਰਾਉਣ ਲਈ MCPI(U) ਚੁੱਕੇਗੀ ਜ਼ਰੂਰੀ ਕਦਮ

ਹੈਦਰਾਬਾਦ ਵਿਖੇ 1 ਤੋਂ 3 ਅਕਤੂਬਰ ਤੱਕ ਹੋਣੀ ਹੈ ਕੇਂਦਰੀ ਕਮੇਟੀ ਦੀ ਮੀਟਿੰਗ

ਦੋਰਾਹਾ: 19 ਸਤੰਬਰ 2016: (ਪੰਜਾਬ ਸਕਰੀਨ ਬਿਊਰੋ):

ਮਾਰਕਸਵਾਦੀ ਕਮਿਊਨਿਸਟ ਪਾਰਟੀ ਆਫ ਇੰਡੀਆ (ਯੂਨਾਈਟਡ) ਦੀ ਪੰਜਾਬ ਸੂਬਾ ਕਮੇਟੀ ਦੀ ਮੀਟਿੰਗ ਸਾਥੀ ਲੱਖਵਿੰਦਰ ਸਿੰਘ ਬੁਆਣੀ ਦੀ ਪ੍ਰਧਾਨਗੀ ਹੇਠ ਹੋਈ।ਮੀਟਿੰਗ ਵਿੱਚ ਐਮ ਸੀ ਪੀ ਆਈ (ਯੂ) ਦੇ ਕੁੱਲ ਹਿੰਦ ਸਕੱਤਰ ਸਾਥੀ ਮੂਹਮੰਦ ਗਾਊਸ ਵਿਸ਼ੇਸ਼ ਤੌਰ ਤੇ ਸ਼ਾਮਲ ਹੋਏ।ਮੀਟਿੰਗ ਦੇ ਸ਼ੁਰੂ ਵਿੱਚ ਸੀ ਪੀ ਆਈ ਐਮ ਐਲ-ਲਿਬਰੇਸ਼ਨ ਦੇ ਪੋਲਿਟ ਬਿਊਰੋ ਮੈਂਬਰ ਸਾਥੀ ਸਵਪਨ ਮੁਖਰਜੀ ਦੀ ਅਚਾਨਕ ਹੋਈ ਬੇਵਕਤ ਮੌਤ ਉਪੱਰ ਦੋ ਮਿੰਟ ਦਾ ਮੋਨ ਰੱਖਕੇ ਸ਼ੋਕ ਪ੍ਰਗਟ ਕੀਤਾ ਅਤੇ ਉਨ੍ਹਾਂ ਪਰੀਵਾਰ ਨਾਲ ਦੁੱਖ ਸਾਂਝਾ ਕਰਦੇ ਹੋਏ ਸ਼ਰਧਾਂਜਲੀ ਭੇਂਟ ਕੀਤੀ ਗਈ।

ਮੀਟਿੰਗ ਦੀ ਕਾਰਵਾਈ ਪ੍ਰੈਸ ਨਾਲ ਸਾਂਝੀ ਕਰਦਿਆਂ ਐਮ ਸੀ ਪੀ ਆਈ (ਯੂ) ਦੇ ਸੂਬਾ ਸਕੱਤਰ ਪਵਨ ਕੁਮਾਰ ਕੌਸ਼ਲ ਨੇ ਦਸਿਆ ਕਿ ਮੀਟੰਗ ਦੇ ਮੁੱਖ ਏਜੰਡਿਆਂ ਵਿੱਚ ਪਾਰਟੀ ਅਤੇ ਇਸਦੀਆਂ ਜਨਤਕ ਜਥੇਬੰਦੀਆਂ ਦੀ ਮੌਜੂਦਾ ਸਥਿਤੀ ਨੂੰ ਮਜਬੂਤ ਕਰਨ ਅਤੇ ਇਨਕਲਾਬੀ ਲੀਹਾਂ ਉਪੱਰ ਉਸਾਰਨ ਲਈ ਵਿਚਾਰ ਚਰਚਾ ਕੀਤੀ ਗਈ। ਇਸਤੋਂ ਇਲਾਵਾ ਪੰਜਾਬ ਅੰਦਰ ਅਗਲੇ ਸਾਲ ਦੇ ਸ਼ੁਰੂ ਵਿੱਚ ਹੋਣ ਜਾ ਰਹੀਆਂ ਅਸੈਂਬਲੀ ਚੋਣਾ ਨੂੰ ਲੈਕੇ ਮੌਜੂਦਾ ਅਕਾਲੀ ਭਾਜਪਾ ਅਤੇ ਕਾਂਗਰਸ ਦੀਆਂ ਲੋਕ ਮਾਰੂ ਨੀਤੀਆਂ ਵਿਰੁੱਧ ਭਾਰੀ ਰੋਹ ਅਤੇ ਗੁੱਸਾ ਹੋਣ ਦੇ ਬਾਵਜੂਦ ਪੰਜਾਬ ਅੰਦਰ ਇਨ੍ਹਾਂ ਪਾਰਟੀਆਂ ਵਿਰੁੱਧ ਕੋਈ ਲੋਕ ਪੱਖੀ ਸਾਰਥਕ ਬਦਲ ਨੂੰ ਲੈਕੇ ਸਥਿਤੀ ਅਨਿਸਚਿਤ ਬਣੀ ਹੋਈ ਹੈ ਅਤੇ ਅਗੋਂ ਹੋਰ ਗੁੰਝਲਦਾਰ ਬਣਦੀ ਜਾ ਰਹੀ ਹਾਲਤ ਉਪੱਰ ਵੀ ਗੰਭੀਰ ਚਰਚਾ ਕੀਤੀ ਗਈ ਅਤੇ ਇਨ੍ਹਾਂ ਚੋਣਾ ਨੂੰ ਲੈਕੇ ਸੂਬੇ ਅੰਦਰ ਇੱਕ ਲੋਕ ਪੱਖੀ ਖੱਬੇ ਜਮਹੂਰੀ ਮੋਰਚੇ ਦੀ ਸੰਭਾਵਨਾ ਉਪੱਰ ਵੀ ਚਰਚਾ ਕੀਤੀ ਗਈ।

ਐਮ ਸੀ ਪੀ ਆਈ (ਯੂ) ਦੇ ਕੁੱਲ ਹਿੰਦ ਸਕੱਤਰ ਸਾਥੀ ਮੂਹਮੰਦ ਗਾਊਸ ਨੇ ਦੇਸ਼ ਅੰਦਰ ਪਾਰਟੀ ਦੇ ਜਥੇਬੰਦਕ ਢਾਂਚੇ ਬਾਰੇ ਜਾਣਕਾਰੀ ਦਿੱਤੀ ਅਤੇ ਇਸਨੂੰ ਹੋਰ ਮਜਬੂਤ ਕਰਨ ਅਤੇ ਐਮ ਸੀ ਪੀ ਆਈ (ਯੂ) ਦੇ ਅੱਪਡੇਟਡ ਪ੍ਰੋਗਰਾਮ ਅਨੂਸਾਰ ਪਾਰਟੀ ਨੂੰ ਇਨਕਲਾਬੀ ਲੀਹਾਂ ਉਪੱਰ ਉਸਾਰਨ ਲਈ ਸੂਬਾ ਕਮੇਟੀ ਮੈਂਬਰਾਂ ਤੋਂ ਸੁਝਾਅ ਮੰਗੇ ਅਤੇ ਸਾਰੇ ਸਾਥੀਆਂ ਨੇ ਆਪਣੇ ਆਪਣੇ ਵੱਡਮੁੱਲੇ ਸੁਝਾਅ ਦਿੱਤੇ। ਮੀਟਿੰਗ ਵਿੱਚ ਪੋਲਿਟ ਬਿਊਰੋ ਮੈਂਬਰ ਸਰਵ ਸਾਥੀ ਕੁਲਦੀਪ ਸਿੰਘ, ਪ੍ਰੇਮ ਸਿੰਘ ਭੰਗੂ, ਕਿਰਜੀਤ ਸਿੰਘ ਸੇਖੋਂ ਅਤੇ ਸੂਬਾ ਸਕੱਤਰ ਪਵਨ ਕੁਮਾਰ ਕੌਸ਼ਲ ਨੇ ਇਸ ਚਰਚਾ ਵਿੱਚ ਵਿਸ਼ੇਸ਼ ਯੋਗਦਾਨ ਪਾਇਆ। ਮੀਟਿੰਗ ਵਿੱਚ ਇਹ ਭੀ ਫੈਸਲਾ ਕੀਤਾ ਗਿਆ ਕਿ ਸੂਬਾ ਕਮੇਟੀ ਵਲੋਂ ਦਿੱਤੇ ਸੁਝਾਵਾਂ ਨੂੰ ਅਗੋਂ ਵਿਚਾਰਨ ਲਈ ਹੈਦਰਾਬਾਦ ਵਿਖੇ 1,2 ਅਤੇ 3 ਅਕਤੂਬਰ ਨੂੰ ਹੋਣ ਵਾਲੀ ਕੇਂਦਰੀ ਕਮੇਟੀ ਦੀ ਮੀਟਿੰਗ ਵਿੱਚ ਅੰਤਮ ਫੈਸਲੇ ਲਈ ਰਖਿਆ ਜਾਵੇਗਾ ਅਤੇ ਇਹ ਭੀ ਫੈਸਲਾ ਕੀਤਾ ਗਿਆ ਕਿ ਪੰਜਾਬ ਅੰਦਰ ਹੋਣ ਵਾਲੀਆਂ ਚੋਣਾ ਪ੍ਰਤੀ ਸੱਤਾ ਧਾਰੀ ਪਾਰਟੀਆਂ ਨੂੰ ਹਰਾਉਣ ਲਈ ਕਿਸੇ ਸਾਰਥਕ ਬਦਲ ਦੀ ਹਮਾਇਤ ਕਰਨ ਦਾ ਅੰਤਮ ਫੈਸਲਾ ਕੇਂਦਰੀ ਕਮੇਟੀ ਦੇ ਨਿਰਣੇ ਮੁਤਾਬਕ ਲਿਆ ਜਾਵੇਗਾ।

ਇੱਕ ਮਤੇ ਰਾਂਹੀ ਮੀਟਿੰਗ ਨੇ ਅਕਾਲੀ- ਭਾਜਪਾ ਸਰਕਾਰ ਵਲੋਂ ਆਪਣੇ ਸੌੜੇ ਸਿਆਸੀ ਹਿਤਾਂ ਅਤੇ ਸਤ੍ਹਾ ਹਥਿਆਉਣ ਲਈ ਲੋਕਾਂ ਦੀਆਂ ਧਾਰਮਕ ਭਾਵਨਾਵਾਂ ਨੂੰ ਵਰਤਣ ਅਤੇ ਗਊ ਰਖਿਆ ਦੇ ਨਾਂ ਉਪੱਰ ਅਖੌਤੀ ਗਊ ਰਖਿਅਕ ਸੰਗਠਨਾ ਅਤੇ ਇਸਦੇ ਨਾਂ ਉਪੱਰ ਧਾਰਮਕ ਸੰਪਰਦਾਇਕ ਸਦਭਾਵਨਾ ਨੂੰ ਠੇਸ ਪਹੁੰਚਾਉਣ ਦੇ ਯਤਨਾ ਦੀ ਨਿਖੇਧੀ ਕੀਤੀ ਗਈ। 

ਪੰਜਾਬ ਵਿੱਚ ਫਿਰ ਬੁਲੰਦ ਹੋ ਰਿਹਾ ਹੈ ਲਾਲ ਝੰਡਾ

ਚਾਰ ਖੱਬੀਆਂ ਪਾਰਟੀਆਂ ਨੇ ਕੀਤੇ ਸਾਰੇ ਜ਼ਿਲ੍ਹਿਆਂ 'ਚ ਜ਼ਬਰਦਸਤ ਰੋਸ ਮੁਜ਼ਾਹਰੇ

ਚੰਡੀਗੜ੍ਹ: 12 ਅਕਤੂਬਰ 2015: (ਪੰਜਾਬ ਸਕਰੀਨ ਬਿਊਰੋ):

File photo 

ਪੰਜਾਬ ਵਿੱਚ ਲਾਲ ਝੰਡਾ ਫਿਰ ਬੁਲੰਦ ਹੋ ਰਿਹਾ ਹੈ। ਖੱਬੀਆਂ ਪਾਰਟੀਆਂ ਆਏ ਦਿਨ ਕੋਈ ਨ ਕੋਈ ਸਾਰਥਕ ਅੰਦੋਲਨ ਕਰਕੇ ਲੋਕਾਂ ਨਾਲ ਆਪਣੀ ਸਾਂਝ ਫਿਰ ਮਜਬੂਤ ਬਣਾ ਰਹੀਆਂ ਹਨ। ਪੰਜਾਬ ਦੀਆਂ ਚਾਰ ਖੱਬੀਆਂ ਪਾਰਟੀਆਂ ਸੀ ਪੀ ਆਈ, ਸੀ ਪੀ ਆਈ (ਐਮ), ਸੀ ਪੀ ਐਮ ਪੰਜਾਬ ਅਤੇ ਸੀ ਪੀ ਆਈ (ਐਮ ਐਲ) ਲਿਬਰੇਸ਼ਨ ਦੇ ਸੱਦੇ 'ਤੇ ਸਾਰੇ ਜ਼ਿਲ੍ਹਿਆਂ 'ਚ ਡੀ ਸੀ ਦਫ਼ਤਰਾਂ ਸਾਹਮਣੇ ਜ਼ਬਰਦਸਤ ਰੋਸ ਮੁਜ਼ਾਹਰੇ ਕੀਤੇ ਅਤੇ ਧਰਨੇ ਦਿੱਤੇ ਗਏ। ਖੱਬੀਆਂ ਪਾਰਟੀਆਂ ਵੱਲੋਂ ਇਹ ਧਰਨੇ ਕਿਸਾਨੀ ਦੀ ਮੰਡੀਆਂ 'ਚ ਹੋ ਰਹੀ ਲੁੱਟ ਅਤੇ ਨਰਮੇ ਦੀ ਬਰਬਾਦੀ ਵਿਰੁੱਧ ਦਿੱਤੇ ਗਏ। ਚਾਰ ਖੱਬੀਆਂ ਪਾਰਟੀਆਂ ਨੇ ਕਿਸਾਨ ਮਸਲਿਆਂ ਦੇ ਸਮੱਰਥਨ 'ਚ ਸੂਬੇ ਭਰ 'ਚ ਧਰਨਿਆਂ ਦਾ ਸੱਦਾ ਦਿੱਤਾ ਸੀ, ਜੋ ਕਿ ਬਹੁਤ ਹੀ ਸਫ਼ਲ ਰਹੇ। 

ਬੁਲਾਰਿਆਂ ਨੇ ਧਰਨਿਆਂ ਨੂੰ ਸੰਬੋਧਨ ਕਰਦਿਆਂ ਕਪਾਹ ਉਤਪਾਦਕਾਂ ਨੂੰ ਘਟੀਆ ਮਿਆਰ ਦੀਆਂ ਕੀੜੇਮਾਰ ਦਵਾਈਆਂ ਵੇਚੇ ਜਾਣ 'ਤੇ ਚਿੰਤਾ ਪ੍ਰਗਟ ਕਰਦਿਆਂ ਕਿਹਾ ਕਿ ਇਸ ਨਾਲ ਫਸਲ ਦਾ 3 ਹਜ਼ਾਰ ਕਰੋੜ ਰੁਪਏ ਤੋਂ ਵੱਧ ਦਾ ਨੁਕਸਾਨ ਹੋਇਆ। ਬੁਲਾਰਿਆਂ ਨੇ ਕਿਹਾ ਕਿ ਸੂਬਾ ਸਰਕਾਰ ਨੇ ਬਾਸਮਤੀ 'ਤੇ 7 ਫੀਸਦੀ ਟੈੱਕਸ ਲਾ ਦਿੱਤਾ ਹੈ ਅਤੇ ਦਾਣਾ ਮੰਡੀਆਂ ਵਿੱਚ ਸਰਕਾਰੀ ਏਜੰਸੇਆਂ ਵੱਲੋਂ ਘੱਟੋ-ਘੱਟ ਸਮੱਰਥਨ ਮੁੱਲ 'ਤੇ ਵੀ ਬਾਸਮਤੀ ਦੀ ਖਰੀਦ ਨਹੀਂ ਕੀਤੀ ਜਾ ਰਹੀ ਅਤੇ ਗੰਨਾ ਮਿੱਲਾਂ ਵੱਲੋਂ ਗੰਨਾ ਕਿਸਾਨਾਂ ਦੇ ਬਕਾਏ ਦਾ ਭੁਗਤਾਨ ਨਹੀਂ ਕੀਤਾ ਜਾ ਰਿਹਾ ਅਤੇ ਪੰਜਾਬ ਸਰਕਾਰ ਦੇ ਰਵੱਈਏ ਨਾਲ ਪੰਜਾਬ ਦੀ ਕਿਸਾਨੀ ਪੂਰੀ ਤਰ੍ਹਾਂ ਤਬਾਹ ਹੋ ਗਈ ਹੈ। ਉਨ੍ਹਾ ਕਿਹਾ ਕਿ ਮੋਦੀ ਸਰਕਾਰ ਵੱਲੋਂ ਸ਼ੁਰੂ ਕੀਤੀਆਂ ਗਈਆਂ ਨਵ-ਉਦਾਰਵਾਦੀ ਨੀਤੀਆਂ ਅਤੇ ਸੂਬਾ ਸਰਕਾਰ ਦੇ ਰਵੱਈਏ ਨਾਲ ਕਿਸਾਨੀ, ਖੇਤੀ ਕਾਮੇ, ਨੌਜੁਆਨ, ਵਿਦਿਆਰਥੀ, ਸਮਾਜ ਦੇ ਦੂਜੇ ਵਰਗ ਬੁਰੀ ਤਰ੍ਹਾਂ ਪ੍ਰਭਾਵਤ ਹੋਏ ਹਨ। ਬੁਲਾਰਿਆਂ ਨੇ ਬਿਨਾਂ ਦੇਰੀ ਜਨਤਕ ਵੰਡ ਪ੍ਰਣਾਲੀ ਸ਼ੁਰੂ ਕੀਤੇ ਜਾਣ ਦੀ ਮੰਗ ਕਰਦਿਆਂ ਕਿਹਾ ਕਿ ਜ਼ਰੂਰੀ ਵਸਤੂਆਂ ਦੀਆਂ ਕੀਮਤਾਂ ਅਸਮਾਨ ਛੂਹ ਰਹੀਆਂ ਹਨ, ਪਰ ਸਰਕਾਰ ਵੱਲੋਂ ਮਹਿੰਗਾਈ ਰੋਕਣ ਲਈ ਕੁਝ ਨਹੀਂ ਕੀਤਾ ਜਾ ਰਿਹਾ। ਬੁਲਾਰਿਆਂ ਨੇ ਮੰਗ ਕੀਤੀ ਕਿ ਬੇਰੁਜ਼ਗਾਰੀ ਖਤਮ ਕੀਤੀ ਜਾਵੇ ਅਤੇ ਡਰੱਗ ਮਾਫੀਆ, ਟਰਾਂਸਪੋਰਟ ਮਾਫੀਆ ਅਤੇ ਰੇਤ ਮਾਫੀਆ 'ਤੇ ਰੋਕ ਲਾਈ ਜਾਵੇ। ਉਨ੍ਹਾ ਮੰਗ ਕੀਤੀ ਕਿ ਬੇਜ਼ਮੀਨਿਆਂ ਨੂੰ 10-10 ਮਰਲੇ ਦੇ ਪਲਾਟ ਦਿੱਤੇ ਜਾਣ ਅਤੇ ਮਕਾਨਾਂ ਦੀ ਉਸਾਰੀ ਲਈ ਤਿੰਨ-ਤਿੰਨ ਲੱਖ ਰੁਪਏ ਦਿੱਤੇ ਜਾਣ, ਨਰੇਗਾ ਦੇ ਬਕਾਏ ਅਦਾ ਕੀਤੇ ਜਾਣ, ਸਿਹਤ ਸੁਵਿਧਾਵਾਂ ਸਸਤੀਆਂ ਕੀਤੀਆਂ ਜਾਣ, ਬੁਢਾਪਾ ਅਤੇ ਵਿਧਵਾ ਪੈਨਸ਼ਨ ਪ੍ਰਤੀ ਮਹੀਨਾ ਤਿੰਨ ਹਜ਼ਾਰ ਰੁਪਏ ਕੀਤੀ ਜਾਵੇ ਅਤੇ ਘੱਟੋ-ਘੱਟ 15 ਹਜ਼ਾਰ ਰੁਪਏ ਮਹੀਨਾ ਮਿਥੀ ਜਾਵੇ। 

ਉਨ੍ਹਾ ਮੰਗ ਕੀਤੀ ਕਿ ਕਪਾਹ ਉਤਪਾਦਕਾਂ ਨੂੰ 40 ਹਜ਼ਾਰ ਰੁਪਏ ਪ੍ਰਤੀ ਏਕੜ ਅਤੇ ਖੇਤੀ ਕਾਮਿਆਂ ਨੂੰ 25 ਹਜ਼ਾਰ ਰੁਪਏ ਮੁਆਵਜ਼ਾ ਦਿੱਤਾ ਜਾਵੇ, ਬਾਸਮਤੀ 1509 ਦੀ ਕੀਮਤ 3500 ਰੁਪਏ ਪ੍ਰਤੀ ਕੁਇੰਟਲ ਮਿਥੀ ਜਾਵੇ ਅਤੇ ਗੰਨੇ ਦਾ ਬਕਾਇਆ ਤੁਰੰਤ ਅਦਾ ਕੀਤਾ ਜਾਵੇ। ਉਨ੍ਹਾ ਚਿਤਾਵਨੀ ਦਿੱਤੀ ਕਿ ਜੇ ਉਨ੍ਹਾ ਦੀਆਂ ਮੰਗਾਂ ਨਾ ਮੰਨੀਆਂ ਗਈਆਂ ਤਾਂ ਸੰਘਰਸ਼ ਹੋਰ ਤਿੱਖਾ ਕੀਤਾ ਜਾਵੇਗਾ।

ਜ਼ਿਲ੍ਹਾ ਪੱਧਰੀ ਧਰਨਿਆਂ ਨੂੰ ਹੋਰਨਾਂ ਤੋਂ ਇਲਾਵਾ ਸੀ ਪੀ ਆਈ ਆਗੂਆਂ ਕਾਮਰੇਡ ਅਰਸ਼ੀ, ਡਾ. ਜੋਗਿੰਦਰ ਦਿਆਲ, ਬੰਤ ਬਰਾੜ, ਸੀ ਪੀ ਐੱਮ ਵੱਲੋਂ ਚਰਨ ਸਿੰਘ ਵਿਰਦੀ, ਵਿਜੈ ਮਿਸ਼ਰਾ, ਰਘੂਨਾਥ ਸਿੰਘ, ਸੀ ਪੀ ਆਈ ਐੱਮ ਪੰਜਾਬ ਵੱਲੋਂ ਮੰਗਤ ਰਾਮ ਪਾਸਲਾ, ਹਰਕੰਵਲ ਸਿੰਘ, ਕੁਲਵੰਤ ਸੰਧੂ ਅਤੇ ਸੀ ਪੀ ਆਈ (ਐੱਮ ਐੱਲ) ਲਿਬਰੇਸ਼ਨ ਦੇ ਗੁਰਮੀਤ ਸਿੰਘ ਬਖਤਪੁਰਾ, ਸੁਖਦਰਸ਼ਨ ਨੱਤ ਅਤੇ ਬਲਕਰਨ ਸਿੰਘ ਨੇ ਵੀ ਸੰਬੋਧਨ ਕੀਤਾ।

ਮਾਨਸਾ: ਪੰਜਾਬ ਦੀਆਂ ਚਾਰ ਖੱਬੀਆਂ ਪਾਰਟੀਆਂ ਸੀ.ਪੀ.ਆਈ., ਸੀ.ਪੀ.ਆਈ. (ਐੱਮ.), ਸੀ.ਪੀ.ਐੱਮ. ਪੰਜਾਬ, ਸੀ.ਪੀ.ਆਈ. (ਐੱਮ.ਐੱਲ.) ਲਿਬਰੇਸ਼ਨ ਦੇ ਸੱਦੇ 'ਤੇ ਚਿੱਟੇ ਮੱਛਰ ਦੇ ਹਮਲੇ ਕਾਰਨ ਬਰਬਾਦ ਹੋਈ ਨਰਮੇ ਦੀ ਫਸਲ ਦਾ ਮਜ਼ਦੂਰਾਂ ਨੂੰ ਪ੍ਰਤੀ ਪਰਵਾਰ 20,000/- ਰੁਪਏ ਮੁਆਵਜ਼ਾ ਅਤੇ ਕਿਸਾਨਾਂ ਪ੍ਰਤੀ ਏਕੜ 40,000/- ਰੁਪਏ ਮੁਆਵਜ਼ਾ ਦਿਵਾਉਣ ਅਤੇ 15 ਨੁਕਾਤੀ ਪ੍ਰੋਗਰਾਮ ਨੂੰ ਲਾਗੂ ਕਰਵਾਉਣ ਲਈ ਸਥਾਨਕ ਜ਼ਿਲ੍ਹਾ ਕੰਪਲੈਕਸ ਵਿਖੇ ਸੈਂਕੜੇ ਕਮਿਊਨਿਸਟ ਵਰਕਰਾਂ ਵੱਲੋਂ ਵਿਸ਼ਾਲ ਧਰਨਾ ਦੇ ਕੇ ਸ਼ਹਿਰ ਵਿਚ ਹੱਥਾਂ ਵਿੱਚ ਲਾਲ ਝੰਡੇ ਲੈ ਕੇ ਰੋਸ ਮਾਰਚ ਕੀਤਾ ਅਤੇ ਧਰਨੇ ਦੀ ਅਗਵਾਈ ਸੀ.ਪੀ.ਆਈ. ਦੇ ਜ਼ਿਲ੍ਹਾ ਸਕੱਤਰ ਕ੍ਰਿਸ਼ਨ ਚੌਹਾਨ, ਸੀ.ਪੀ.ਆਈ.ਐੱਮ ਦੇ ਜ਼ਿਲ੍ਹਾ ਸਕੱਤਰ ਕੁਲਵਿੰਦਰ ਉÎੱਡਤ, ਸੀ.ਪੀ.ਐੱਮ. ਪੰਜਾਬ ਦੇ ਜ਼ਿਲ੍ਹਾ ਸਕੱਤਰ ਲਾਲ ਚੰਦ ਸਰਦੂਲਗੜ੍ਹ ਅਤੇ ਸੀ.ਆਈ.ਐੱਮ.ਐੱਲ. ਲਿਬਰੇਸ਼ਨ ਦੇ ਸਾਥੀ ਅਮਰੀਕ ਸਿੰਘ ਸਮਾਓਂ ਆਗੂਆਂ ਨੇ ਕੀਤੀ। 

ਧਰਨੇ ਨੂੰ ਸੰਬੋਧਨ ਕਰਦਿਆਂ ਸੀ.ਪੀ.ਆਈ. ਦੇ ਸੂਬਾ ਸਕੱਤਰ ਹਰਦੇਵ ਸਿੰਘ ਅਰਸ਼ੀ, ਸੀ.ਪੀ.ਆਈ. ਐੱਮ.ਐੱਲ. ਲਿਬਰੇਸ਼ਲ ਦੇ ਸੂਬਾ ਸਕੱਤਰੇਤ ਮੈਂਬਰ ਰਾਜਵਿੰਦਰ ਸਿੰਘ ਰਾਣਾ ਨੇ ਕਿਹਾ ਕਿ ਪੰਜਾਬ ਦੇ ਕਿਸਾਨਾਂ, ਮਜ਼ਦੂਰਾਂ ਅਤੇ ਆਮ ਵਰਗ ਨੂੰ ਕੰਗਾਲੀ ਦੇ ਰਸਤੇ 'ਤੇ ਲੈ ਕੇ ਜਾਣ ਲਈ ਸੂਬੇ ਦੀ ਅਕਾਲੀ-ਭਾਜਪਾ ਸਰਕਾਰ ਸਿੱਧੇ ਤੌਰ 'ਤੇ ਮੁੱਖ ਦੋਸ਼ੀ ਹੈ ਅਤੇ ਲੰਬੇ ਸਮੇਂ ਤੋਂ ਪੰਜਾਬ ਦੇ ਲੋਕਾਂ ਨਾਲ ਧਰਮਾਂ ਅਤੇ ਜਾਤਾਂ ਦੀ ਵੰਡ ਕਰਕੇ ਲੋਕਾਂ ਨੂੰ ਧੋਖੇ ਵਿੱਚ ਰੱਖ ਕੇ ਆਪਣੀ ਰਾਜ ਸੱਤਾ ਨੂੰ ਕਾਇਮ ਰੱਖਿਆ ਹੈ, ਪ੍ਰੰਤੂ ਪੰਜਾਬ ਅੰਦਰ ਸੂਬਾ ਸਰਕਾਰ ਦੀਆਂ ਨੀਤੀਆਂ ਕਾਰਨ ਪੰਜਾਬ ਦਾ ਹਰ ਵਰਗ ਪ੍ਰਭਾਵਿਤ ਹੋਇਆ ਹੈ। ਮਜ਼ਦੂਰ-ਕਿਸਾਨ ਲਗਾਤਾਰ ਇਨ੍ਹਾਂ ਨੀਤੀਆਂ ਕਰਨ ਖੁਦਕੁਸ਼ੀਆਂ ਕਰ ਰਹੇ ਹਨ, ਪਰ ਆਮ ਲੋਕਾਂ ਲਈ ਕੋਈ ਬਦਲ ਨਹੀਂ ਹੈ। ਉਹਨਾਂ ਚੇਤਾਵਨੀ ਦਿੰਦਿਆਂ ਕਿਹਾ ਕਿ ਖੁਦਕੁਸ਼ੀਆਂ ਕਰਨ ਦੀ ਬਜਾਇ ਰਿਸ਼ਵਤਖੋਰ ਅਫ਼ਸਰਸ਼ਾਹੀ ਅਤੇ ਸਰਕਾਰ ਖਿਲਾਫ ਇੱਕ ਪਲੇਟਫਾਰਮ ਤਿਆਰ ਕਰਕੇ ਸੰਘਰਸ਼ ਲਈ ਤਿਆਰ ਹੋਣਾ ਪਏਗਾ। ਉਹਨਾਂ ਸਰਕਾਰ ਦੀ ਆਲੋਚਨਾ ਕਰਦਿਆਂ ਕਿਹਾ ਕਿ ਬਾਦਲ ਸਰਕਾਰ ਵੱਲੋਂ ਕੇਵਲ ਆਪਣੇ ਚਹੇਤਿਆਂ ਨੂੰ ਨਾ-ਮਾਤਰ ਮੁਆਵਜ਼ੇ ਦੇ ਚੈੱਕ ਦੇ ਕੇ ਮਗਰਮੱਛ ਵਾਲੇ ਅੱਥਰੂ ਵਹਾ ਰਹੀ ਹੈ ਅਤੇ ਕਿਸਾਨ ਪੱਖੀ ਹੋਣ ਦਾ ਡਰਾਮਾ ਕੀਤਾ ਜਾ ਰਿਹਾ ਹੈ, ਜਦੋਂਕਿ ਪੰਜਾਬ ਦਾ ਬੱਚਾ-ਬੱਚਾ ਪੰਜਾਬ ਸਰਕਾਰ ਦੀਆਂ ਇਨ੍ਹਾਂ ਚਾਲਾਂ ਨੂੰ ਸਮਝ ਚੁੱਕਾ ਹੈ ਅਤੇ ਸੰਘਰਸ਼ ਦੇ ਰਾਹ ਪਿਆ ਹੋਇਆ ਹੈ। ਉਹਨਾਂ ਕਿਹਾ ਕਿ ਪੰਜਾਬ ਦੀਆਂ ਚਾਰ ਖੱਬੀਆਂ ਪਾਰਟੀਆਂ ਵੱਲੋਂ ਸੰਘਰਸ਼ ਦੀ ਰੂਪ-ਰੇਖਾ ਉਲੀਕੀ ਜਾ ਰਹੀ ਹੈ, ਜਿਸ ਵਿੱਚ ਕਿਸਾਨਾਂ ਨੂੰ 40,000/- ਰੁਪਏ ਪ੍ਰਤੀ ਏਕੜ ਅਤੇ ਮਜ਼ਦੂਰਾਂ ਨੂੰ 20,000/- ਰੁਪਏ ਪ੍ਰਤੀ ਪਰਵਾਰ ਮੁਆਵਜ਼ਾ ਦਿਵਾਉਣ ਅਤੇ ਨਕਲੀ ਕੀੜੇਮਾਰ ਦਵਾਈਆਂ ਦੀ ਸੀ.ਬੀ.ਆਈ. ਤੋਂ ਜਾਂਚ ਕਰਵਾਉਣ ਅਤੇ 15 ਨੁਕਾਤੀ ਮੰਗਾਂ ਦਾ ਪ੍ਰੋਗਰਾਮ ਲਾਗੂ ਕਰਵਾਉਣ ਸੰਬੰਧੀ ਸੰਘਰਸ਼ ਕੀਤਾ ਜਾ ਰਿਹਾ ਹੈ। ਇਸ ਸਮੇਂ ਸੀ.ਪੀ.ਐੱਮ. ਪੰਜਾਬ ਦੇ ਸੂਬਾਈ ਆਗੂ ਮਾਸਟਰ ਛੱਜੂ ਰਾਮ, ਸੀ.ਪੀ.ਐੱਮ. ਲਿਬਰੇਸ਼ਨ ਦੇ ਗੁਰਮੀਤ ਸਿੰਘ ਨੰਦਗੜ੍ਹ, ਨਿੱਕਾ ਸਿੰਘ ਬਹਾਦਰਪੁਰ, ਗੁਰਸੇਵਕ ਸਿੰਘ ਮਾਨ, ਜੀਤ ਸਿੰਘ ਬੋਹਾ, ਸਰਪੰਚ ਰਣਜੀਤ ਸਿੰਘ ਤਾਮਕੋਟ, ਸੁਰਜੀਤ ਸਿੰਘ ਕੋਟਧਰਮੂ, ਨਰਿੰਦਰ ਕੌਰ, ਸੀ.ਪੀ.ਆਈ. ਦੇ ਜਗਰਾਜ ਸਿੰਘ ਹੀਰਕੇ, ਰੂਪ ਸਿੰਘ ਢਿੱਲੋਂ, ਡਾ. ਆਤਮਾ ਸਿੰਘ ਆਤਮਾ, ਸੀਤਾ ਰਾਮ ਗੋਬਿੰਦਪੁਰਾ, ਮਾਸਟਰ ਗੁਰਬਚਨ ਸਿੰਘ ਮੰਦਰਾਂ, ਰਤਨ ਭੋਲਾ, ਮੇਘਾ ਸਿੰਘ ਪ੍ਰਧਾਨ ਨਗਰ ਪੰਚਾਇਤ ਜੋਗਾ, ਮੇਜਰ ਸਿੰਘ ਅਤੇ ਹਰੀ ਸਿੰਘ ਸੰਮਤੀ ਮੈਂਬਰ, ਮਨਜੀਤ ਗਾਮੀਵਾਲਾ, ਮੰਗਤ ਰਾਮ ਭੀਖੀ, ਸੀ.ਪੀ.ਐਮ. ਪੰਜਾਬ ਮੇਜਰ ਸਿੰਘ ਮਾਨਸਾ, ਨਰਿੰਦਰ ਸੋਮਾ, ਰਜਿੰਦਰ ਕੁਲੈਹਰੀ, ਆਤਮਾ ਸਿੰਘ ਸਰਦੂਲਗੜ੍ਹ, ਸੀ.ਪੀ.ਆਈ. ਐਮ. ਦੇ ਘੋਕਾ ਦਾਸ ਰੱਲਾ, ਰਾਜਵਿੰਦਰ ਸਿੰਘ ਹੀਰੇਵਾਲਾ ਆਦਿ ਆਗੂਆਂ ਨੇ ਸੰਬੋਧਨ ਕੀਤਾ।

ਲੁਧਿਆਣਾ: ਚਾਰ ਖੱਬੀਆਂ ਪਾਰਟੀਆਂ ਸੀ ਪੀ ਆਈ, ਸੀ ਪੀ ਆਈ (ਐਮ), ਸੀ ਪੀ ਐਮ ਪੰਜਾਬ ਅਤੇ ਸੀ ਪੀ ਆਈ (ਐੱਮ ਐਲ) ਲਿਬਰੇਸ਼ਨ ਦੇ ਸੱਦੇ 'ਤੇ ਕਿਸਾਨਾਂ ਦੀਆਂ ਮੰਗਾਂ ਦੇ ਸਮੱਰਥਨ ਵਿੱਚ ਅੱਜ ਇੱਥੇ ਮਿੰਨੀ ਸਕਤਰੇਤ ਲੁਧਿਆਣਾ ਵਿਖੇ ਵਿਸ਼ਾਲ ਧਰਨਾ ਦਿੱਤਾ ਗਿਆ। ਪਾਰਟੀਆਂ ਨੇ ਮੰਗ ਕੀਤੀ ਕਿ ਚਿੱਟੀ ਮੱਖੀ ਨਾਲ ਤਬਾਹ ਹੋਏ ਨਰਮੇ ਦਾ ਪੂਰਾ ਮੁਆਵਜ਼ਾ 40000 ਰੁਪਏ ਪ੍ਰਤੀ ਏਕੜ ਦੇ ਹਿਸਾਬ ਨਾਲ ਕਿਸਾਨ ਨੂੰ ਅਤੇ 20000 ਰੁਪਏ ਦੇ ਹਿਸਾਬ ਨਾਲ ਖੇਤ ਮਜ਼ਦੂਰਾਂ ਨੂੰ ਦਿੱਤਾ ਜਾਏ। ਇਸ ਮੌਕੇ ਬੋਲਦਿਆਂ ਕੁਲ ਹਿੰਦ ਜਨਵਾਦੀ ਇਸਤਰੀ ਸਭਾ ਦੀ ਕੌਮੀ ਜਨਰਲ ਸਕੱਤਰ ਕਾ. ਜਗਮਤੀ ਸਾਂਗਵਾਂ ਅਤੇ ਕਾ. ਸੁਮੀਤ ਚੋਪੜਾ-ਕੁਲ ਹਿੰਦ ਖੇਤ ਮਜ਼ਦੂਰ ਯੂਨੀਅਨ ਦੇ ਕੌਮੀ ਸਕੱਤਰ ਨੇ ਦੋਸ਼ ਲਗਾਇਆ ਕਿ ਪੰਜਾਬ ਸਰਕਾਰ ਕਿਸਾਨਾਂ ਅਤੇ ਮਜ਼ਦੂਰਾਂ ਨੂੰ ਬਚਾਉਣ ਦੀ ਬਜਾਏ 33 ਕਰੋੜ ਦਾ ਕੀਟਨਾਸ਼ਕ ਦਾ ਘਪਲਾ ਕਰਨ ਵਾਲੇ ਪੰਜਾਬ ਸਰਕਾਰ ਵਿੱਚ ਉੱਚ ਅਹੁਦਿਆਂ 'ਤੇ ਬੈਠੇ ਅਸਲ ਦੋਸ਼ੀਆਂ ਨੂੰ ਬਚਾਉਣ ਵਿੱਚ ਲੱਗੀ ਲੱਗੀ ਹੋਈ ਹੈ। 

ਇਸ ਮੌਕੇ ਸੰਬੋਧਨ ਕਰਦੇ ਹੋਏ ਕਾ. ਕਰਤਾਰ ਸਿੰਘ ਬੁਆਣੀ-ਸਕੱਤਰ ਸੀ ਪੀ ਆਈ ਜ਼ਿਲ੍ਹਾ ਲੁਧਿਆਣਾ, ਕਾ. ਅਮਰਜੀਤ ਸਿੰਘ ਮੱਟੂ-ਸਕੱਤਰ ਸੀ ਪੀ ਆਈ (ਐਮ) ਜ਼ਿਲ੍ਹਾ ਲੁਧਿਆਣਾ ਅਤੇ ਕਾ. ਮਹਿੰਦਰ ਅੱਚਰਵਾਲ-ਜ਼ਿਲ੍ਹਾ ਸਕੱਤਰ ਸੀ ਪੀ ਐਮ ਪੰਜਾਬ ਨੇ ਕਿਹਾ ਕਿ ਇਸ ਸਮੇਂ ਕਿਸਾਨੀ ਤੇ ਖੇਤ ਮਜ਼ਦੂਰ ਵਰਗ ਗੰਭੀਰ ਆਰਥਿਕ ਸੰਕਟ ਵਿੱਚੋਂ ਲੰਘ ਰਿਹਾ ਹੈ। ਚਿੱਟੀ ਮੱਖੀ ਦੇ ਹਮਲੇ ਕਾਰਨ ਨਰਮੇ ਦੀ ਫ਼ਸਲ ਤਬਾਹ ਹੋਣ ਕਰ ਕੇ ਅਤੇ ਬਾਸਮਤੀ ਦੇ ਨਿਗੂਨੇ ਭਾਅ ਨੇ ਉਨ੍ਹਾਂ ਦਾ ਕਚੂਮਰ ਕੱਢ ਦਿੱਤਾ ਹੈ। ਇਹਨਾਂ ਤੋਂ ਇਲਾਵਾ ਕਾ. ਡੀ ਪੀ ਮੌੜ, ਕਾ. ਜਗਦੀਸ਼, ਕਾ. ਗੁਰਨਾਮ ਸਿੱਧੂ, ਕਾ. ਰਮੇਸ਼ ਰਤਨ, ਕਾ. ਪਰਮਜੀਤ ਸਿੰਘ, ਕਾ. ਭਰਪੂਰ ਸਿੰਘ, ਕਾ. ਸੁਰਿੰਦਰ ਜਲਾਲਦੀਵਾਲ, ਕਾ. ਅਮਨਦੀਪ ਸਿੰਘ, ਕਾ. ਬਲਦੇਵ ਲਤਾਲਾ, ਕਾ. ਸੁਖਵਿੰਦਰ ਲੋਟੇ, ਕਾ. ਅਵਤਾਰ ਗਿੱਲ, ਕਾ. ਸਿਕੰਦਰ ਸਿੰਘ ਜੜਤੌਲੀ, ਕਾ. ਜਗਤਾਰ ਸਿੰਘ, ਕਾ. ਰਾਜਾ ਰਾਮ, ਕਾ. ਗੁਰਦੀਪ ਸਿੰਘ ਕਲਸੀ ਆਦਿ ਨੇ ਵੀ ਸੰਬੋਧਨ ਕੀਤਾ।

ਪਠਾਨਕੋਟ : ਅੱਜ ਚਾਰ ਖੱਬੀਆਂ ਪਾਰਟੀਆਂ ਸੀ ਪੀ ਆਈ, ਸੀ ਪੀ ਆਈ ਐਮ, ਸੀ ਪੀ ਐਮ ਪੰਜਾਬ ਅਤੇ ਸੀ ਪੀ ਆਈ (ਐਮ ਐਲ) ਲਿਬਰੇਸ਼ਨ ਵੱਲੋਂ ਪੰਜਾਬ ਅੰਦਰ ਚੱਲ ਰਹੇ ਕਿਸਾਨਾਂ-ਮਜ਼ਦੂਰਾਂ ਦਾ ਰੇਲ ਰੋਕੋ ਅੰਦੋਲਨ ਦੇ ਸਮੱਰਥਨ ਵਿੱਚ ਕਾਮਰੇਡ ਅਮਰੀਕ ਸਿੰਘ, ਕਾਮਰੇਡ ਕੇਵਲ ਕਾਲੀਆ, ਕਾਮਰੇਡ ਦਲਬੀਰ ਸਿੰਘ ਅਤੇ ਕਾਮਰੇਡ ਦਰਸ਼ਨ ਅਖਰੋਟਾ ਦੀ ਸਾਂਝੀ ਪ੍ਰਧਾਨਗੀ ਹੇਠ ਡੀ ਸੀ ਦਫਤਰ ਪਠਾਨਕੋਟ ਅੱਗੇ ਵਿਸ਼ਾਲ ਧਰਨਾ ਮਾਰਿਆ ਗਿਆ।

ਲੋਕਾਂ ਦੇ ਵਿਸ਼ਾਲ ਇਕੱਠ ਨੂੰ ਸੰਬੋਧਨ ਕਰਦਿਆਂ ਸਮੂਹ ਬੁਲਾਰਿਆਂ ਸੀ ਪੀ ਆਈ ਦੇ ਠਾਕੁਰ ਰਮੇਸ਼ ਸਿੰਘ, ਸੱਤਿਆ ਦੇਵ ਸੈਣੀ, ਉਂਕਾਰ ਸਿੰਘ, ਸੀ ਪੀ ਆਈ ਐਮ ਦੇ ਡਾ ਸੁਰਿੰਦਰ ਸਿੰਘ, ਲਖਵਿੰਦਰ ਮਰੜ, ਗਨੇਸ਼ ਰਾਜ, ਸੀ ਪੀ ਐਮ ਪੰਜਾਬ ਦੇ ਕਾਮਰੇਡ ਨੱਥਾ ਸਿੰਘ, ਮਾਸਟਰ ਸੁਭਾਸ਼ ਸ਼ਰਮਾ, ਕਾਮਰੇਡ ਹਜ਼ਾਰੀ ਲਾਲ ਅਤੇ ਸੀ ਪੀ ਆਈ (ਐਮ ਐਲ) ਲਿਬਰੇਸ਼ਨ ਦੇ ਸੁਖਦੇਵ ਸਿੰਘ ਭਾਗੋਕਾਵਾਂ ਅਤੇ ਅਸ਼ਵਨੀ ਕੁਮਾਰ ਹੈਪੀ ਨੇ ਕਿਹਾ ਕਿ ਪੰਜਾਬ ਅੰਦਰ ਅਨਾਜ ਪੈਦਾ ਕਰਨ ਵਾਲੇ ਕਿਸਾਨਾਂ ਅਤੇ ਮਜ਼ਦੂਰਾਂ ਨੂੰ ਮਜਬੂਰ ਹੋ ਕੇ ਪਿਛਲੀ 7 ਅਕਤੂਬਰ ਤੋਂ ਰੇਲ ਰੋਕੋ ਅੰਦੋਲਨ ਸ਼ੁਰੂ ਕਰਨਾ ਪਿਆ ਹੈ। ਕੇਂਦਰ ਅਤੇ ਪੰਜਾਬ ਸਰਕਾਰ ਦੀ ਬੇਰੁਖੀ ਤੇ ਅਣਦੇਖੀ ਕਾਰਨ ਸੰਘਰਸ਼ ਦਿਨ ਪ੍ਰਤੀ ਦਿਨ ਅੱਗੇ ਵਧਾਉਣਾ ਪੈ ਰਿਹਾ ਹੈ। ਪੰਜਾਬ ਸਰਕਾਰ ਨਾ ਤਾਂ ਕਿਸਾਨਾਂ ਮਜ਼ਦੂਰਾਂ ਦੀਆਂ ਵੱਧ ਰਹੀਆਂ ਮੁਸ਼ਕਲਾਂ ਦੀ ਪ੍ਰਵਾਹ ਕਰਦੀ ਹੈ, ਨਾ ਹੀ ਲੋਕਾਂ ਨੂੰ ਹੋਣ ਵਾਲੀ ਪਰੇਸ਼ਾਨੀ ਬਾਰੇ ਸੋਚਦੀ ਹੈ।

ਅੰਮ੍ਰਿਤਸਰ:: ਅੱਠ ਕਿਸਾਨ ਜਥੇਬੰਦੀਆਂ ਵੱਲੋਂ 1121 ਬਾਸਮਤੀ ਅਤੇ 1509, ਕਿਸਮ ਦੇ ਉਚਿਤ ਭਾਅ, ਨਰਮੇ ਦੇ ਖਰਾਬੇ ਦਾ ਮੁਆਵਜ਼ਾ, ਅਬਾਦਕਾਰਾਂ ਨੂੰ ਪੱਕੇ ਮਾਲਕੀ ਹੱਕ, ਮੰਡ ਖੇਤਰ ਦੀ ਹੋਈ ਫਸਲ ਦੀ ਤਬਾਹੀ ਅਤੇ ਗੰਨੇ ਦੇ ਬਕਾਏ ਨੂੰ ਲੈ ਕੇ ਵਿੱਢਿਆ ਸੰਘਰਸ਼ ਅੱਜ ਛੇਵੇਂ ਦਿਨ ਵਿੱਚ ਸ਼ਾਮਲ ਹੋ ਗਿਆ ਹੈ ਅਤੇ ਕਿਸਾਨਾਂ ਅੰਮ੍ਰਿਤਸਰ ਦਿੱਲੀ ਰੇਲਵੇ ਮਾਰਗ ਨੂੰ ਪਿੰਡ ਮੁੱਛਲ ਕੋਲ ਪੂਰੀ ਤਰ੍ਹਾਂ ਜਾਮ ਕਰਕੇ ਬੈਠੇ ਹੋਏ ਹਨ, ਜਦ ਕਿ ਸੰਘਰਸ਼ ਨੂੰ ਸਫਲ ਕਰਨ ਲਈ ਪਿੰਡਾਂ ਵਿੱਚੋਂ ਲੋਕ ਤਰ੍ਹਾਂ-ਤਰ੍ਹਾਂ ਦਾ ਲੰਗਰ ਸਾਜ਼ੋ-ਸਾਮਾਨ ਲੈ ਕੇ ਆਪ-ਮੁਹਾਰੇ ਪਹੁੰਚ ਰਹੇ ਹਨ। ਜਾਰੀ ਇੱਕ ਬਿਆਨ ਰਾਹੀਂ ਕਿਸਾਨ ਆਗੂ ਤੇ ਕਿਸਾਨ ਸੰਘਰਸ਼ ਕਮੇਟੀ ਦੇ ਪ੍ਰੈਸ ਸਕੱਤਰ ਹਰਪ੍ਰੀਤ ਸਿੰਘ ਨੇ ਦੱਸਿਆ ਕਿ ਕਿਸਾਨਾਂ ਨੇ ਆਪਣੀਆਂ ਮੰਗਾਂ ਨੂੰ ਮਨਵਾਉਣ ਲਈ ਰੇਲਵੇ ਟਰੈਕ 'ਤੇ ਪੱਕੇ ਡੇਰੇ ਲਾ ਰੱਖੇ ਹਨ, ਹਰ ਰੋਜ਼ ਧਰਨੇ 'ਤੇ ਬੈਠੇ ਕਿਸਾਨਾਂ ਦੀ ਗਿਣਤੀ ਵਿੱਚ ਹੋ ਰਿਹਾ ਵਾਧਾ ਕਿਸਾਨਾਂ ਵਿੱਚ ਫੈਲੇ ਰੋਹ ਦੀ ਮੂੰਹ ਬੋਲਦੀ ਤਸਵੀਰ ਪੇਸ਼ ਕਰਦਾ ਹੈ। ਉਹਨਾਂ ਦੱਸਿਆ ਕਿ ਕਿਸਾਨ ਸੰਘਰਸ਼ ਕਮੇਟੀ ਪੰਜਾਬ ਦੇ ਜਨਰਲ ਸਕੱਤਰ ਸਵਿੰਦਰ ਸਿੰਘ ਚੁਤਾਲਾ, ਜਮਹੂਰੀ ਕਿਸਾਨ ਸਭਾ ਦੇ ਪ੍ਰਗਟ ਸਿੰਘ ਜਾਮਾਰਾਏ, ਕਿਰਤੀ ਕਿਸਾਨ ਯੂਨੀਅਨ ਦੇ ਧੰਨਵੰਤ ਸਿੰਘ ਖਤਰਾਏ ਕਲਾਂ, ਕਿਸਾਨ ਸੰਘਰਸ਼ ਕਮੇਟੀ ਦੇ ਗੁਰਸਾਹਿਬ ਸਿੰਘ ਚਾਟੀਵਿੰਡ, ਬੀ.ਕੇ.ਯੂ ਦੇ ਕਸ਼ਮੀਰ ਸਿੰਘ ਧੰਗਈ ਆਦਿ ਨੇ ਕਿਹਾ ਕਿ ਬਾਦਲ ਸਰਕਾਰ ਨੇ ਪਹਿਲਾਂ ਕਿਸਾਨਾਂ ਦੀਆਂ ਮੰਗਾਂ ਵੱਲ ਧਿਆਨ ਨਹੀਂ ਦਿੱਤਾ , ਜਿਸ ਕਾਰਨ ਮਜਬੂਰੀ ਵੱਸ ਕਿਸਾਨਾਂ ਨੂੰ ਰੇਲਵੇ ਮਾਰਗਾਂ 'ਤੇ ਆਉਣਾ ਪਿਆ ।ਇਸ ਸਮੇਂ ਹੋਰਨਾਂ ਤੋਂ ਇਲਾਵਾ ਸਤਨਾਮ ਸਿੰਘ ਝੰਡੇਰ, ਜਗਜੀਤ ਸਿੰਘ ਕਲਾਨੌਰ, ਇੰਦਰਜੀਤ ਸਿੰਘ ਕੋਟ ਬੁੱਢਾ, ਸੁਖਵਿੰਦਰ ਸਿੰਘ ਸਭਰਾ, ਹਰਦਿਆਲ ਸਿੰਘ ਮਠੌਲਾ ਆਦਿ ਆਗੂਆਂ ਨੇ ਵੀ ਸੰਬੋਧਨ ਕੀਤਾ।

ਉਮੀਦ ਕਰਨੀ ਚਾਹੀਦੀ ਹੈ ਕਿ ਆਉਂਦੇ ਦਿਨਾਂ ਵਿੱਚ ਕਾਮਰੇਡ ਆਪਣੀ ਪੁਰਾਣੀ ਸ਼ਾਨੋ ਸ਼ੌਕਤ ਬਹਾਲ ਕਰਨ ਵਿੱਚ ਕਾਮਯਾਬ ਰਹਿਣਗੇ। 

ਮਹਾਨ ਅਕਤੁਬਰ ਇਨਕਲਾਬ ਅਤੇ ਸਾਡੇ ਕੰਮ- ਰਾਜੇਸ਼ ਤਿਆਗੀ

                                                                           ਅੰਗ੍ਰੇਜ਼ੀ ਤੋਂ ਪੰਜਾਬੀ ਅਨੁਵਾਦ --ਰਜਿੰਦਰ

ਲੀਡਰਸ਼ੀਪ ਦੀ ਅਣਹੋਂਦ ਹੋਵੇਗੀ ਤਾਂ ਮੌਕਾ ਖੁੱਸ ਜਾਵੇਗਾ

Courtesy Photo 

ਅਕਤੂਬਰ 1917 'ਚ, ਸੰਸਾਰ ਸਾਮਰਾਜਵਾਦ ਦੀ ਲੜੀ ਰੂਸ 'ਚ ਆਪਣੀ ਸਭ ਤੋਂ ਕਮਜ਼ੋਰ ਕੜੀ ਤੋਂ ਟੁੱਟ ਗਈ, ਜਿਸਦਾ ਨਤੀਜਾ ਸੀ, ਪ੍ਰੋਲੇਤਾਰੀ ਦੀ ਸਪੱਸ਼ਟ ਸਿਆਸੀ ਜਿੱਤ। ਸਾਡੀ ਪੀੜ੍ਹੀ  ਲਈ ਇਤਿਹਾਸ 'ਚ ਪਹਿਲੀ ਵਾਰ ਹੋਣ ਵਾਲ਼ੀ, ਇੱਕ ਕਾਮਯਾਬ ਉੱਥਲ-ਪੁਥਲ, ਜਿਸਨੇ ਸੱਤਾ ਮਜ਼ਦੂਰ ਜਮਾਤ ਦੇ ਹੱਥਾਂ 'ਚ ਸੌਂਪ ਦਿੱਤੀ, ਨੂੰ ਸਮਝਣਾ ਬਹੁਤ ਜ਼ਰੂਰੀ ਹੈ। ਅਕਤੂਬਰ ਇਨਕਲਾਬ ਕਰੇਂਸਕੀ ਅਧੀਨ ਬੁਰਜੂਆ ਹਕੁਮਤ ਨੂੰ ਢਾਉਂਦੇ ਹੋਏ, ਨਾਲ਼ ਦੀ ਨਾਲ਼ ਜ਼ਾਰਸ਼ਾਹੀ ਦੀ ਪਾਸ਼ਵਿਕ ਰਹਿੰਦ-ਖੁੰਹਦ ਨੂੰ ਖ਼ਤਮ ਕਰਦੇ ਹੋਏ ਮਜ਼ਦੂਰ ਜਮਾਤ ਦੀ ਤਾਨਾਸ਼ਾਹੀ ਤੱਕ ਪੁੱਜਿਆ।

ਇਸ ਜਿੱਤ ਨੂੰ ਕਿਵੇਂ ਹਾਸਲ ਕੀਤਾ ਅਤੇ ਅਸਲ 'ਚ ਮਜ਼ਦੂਰ ਜਮਾਤ ਦੀ ਇਸ ਇਤਿਹਾਸਕ ਸਫ਼ਲਤਾ ਦੇ ਸਬਕ ਕੀ ਸਨ, ਅਤੇ ਇਸ ਤੋਂ ਵੀ ਵੱਧ ਦਿਲਚਸਪ ਹੈ ਕਿ ਇਹ ਜਿੱਤ ਸੰਸਾਰ ਪ੍ਰੋਲੇਤਾਰੀ ਇਨਕਲਾਬ ਦੀ ਤੌਰ ਕਿਉਂ ਨਹੀਂ ਉੱਭਰੀ, ਇਹ ਅਜਿਹੇ ਮੁੱਦੇ ਹਨ ਜਿਹੜੇ ਇਸ ਮਹਾਨ ਜਿੱਤ ਅਤੇ ਇਸ ਤੋਂ ਬਾਅਦ ਦੀਆਂ ਹਾਰਾਂ ਨੂੰ ਸਮਝਣ ਲਈ  ਫੈਸਲਾਕੁੰਨ ਹਨ।

ਰੂਸ 'ਚ 'ਅਕਤੂਬਰ' ਨੂੰ ਸਮਝਣ ਲਈ ਸਾਨੂੰ ਪਹਿਲਾਂ 'ਫਰਵਰੀ' ਨੂੰ ਸਮਝਣਾ ਪਏਗਾ। ਫਰਵਰੀ ਇਨਕਲਾਬ ਰੂਸ 'ਚ ਬਿਨਾਂ ਕਿੱਥੋਂ ਵੀ ਪੂਰਵ-ਅਨੁਮਾਨ ਤੋਂ ਸ਼ੁਰੂ ਹੋਇਆ। ਜ਼ਾਰ ਹੀ ਨਹੀਂ ਸਗੋਂ ਉਸਦਾ ਕੋਈ ਵੀ ਸਹਿਯੋਗੀ ਇਸ ਦਾ ਅਗਾਊ ਪਤਾ ਨਹੀਂ ਲਗਾ ਸਕਿਆ। ਪਹਿਲੀ ਸੰਸਾਰ ਜੰਗ 'ਚ ਜ਼ਾਰ ਦੀ ਹਾਰ ਅਤੇ ਉਸਦੀ ਹਕੂਮਤ 'ਚ ਡੂੰਘੀਆਂ ਹੁੰਦੀਆਂ ਵਿਰੋਧਤਾਈਆਂ ਨੇ 'ਫਰਵਰੀ' ਦੀਆਂ ਘਟਨਾਵਾਂ ਨੂੰ ਅਸਾਨ ਬਣਾਇਆ। ਸਾਰੇ ਵਿਰੋਧੀ ਆਗੂ, ਬਾਲਸ਼ਵਿਕ ਅਤੇ ਮੇਨਸ਼ਵਿਕ ਰੂਸ ਤੋਂ ਦੂਰ ਸਨ ਅਤੇ ਇਨਕਲਾਬ ਹਰ ਰੂਪ ਹੇਠਾਂ ਤੋਂ ਆਪ-ਮੂਹਾਰੀ ਕਾਰਵਾਈ ਸੀ।

ਮਜ਼ਦੂਰਾਂ ਦੀਆਂ ਸੋਵੀਅਤਾਂ, ਪ੍ਰੋਲੇਤਾਰੀਏ ਦੀ ਦੀ ਅਸਲੀ ਜਮਾਤੀ ਸੱਤਾ ਦੇ ਅੰਗ, ਜਿਹੜੀਆਂ ਹੜਤਾਲ ਕਮੇਟੀਆਂ 1905 ਦੇ ਵਿਦਰੋਅ ਦੌਰਾਨ ਪੈਦਾ ਹੋਈਆਂ, 1917 'ਚ ਫਰਵਰੀ ਇਨਕਲਾਬ 'ਚ ਦੁਬਾਰਾ ਉੱਭਰੀਆਂ। ਫਰਵਰੀ ਇਨਕਲਾਬ ਨੇ ਅਸਲ 'ਚ ਮਜ਼ਦੂਰਾਂ ਦੇ ਹੱਥਾਂ ਸਿਆਸੀ ਸੱਤਾ ਨੂੰ ਸੌਂਪਿਆਂ, ਜਿਹੜੇ ਹਥਿਆਰਬੰਦ ਸਨ ਅਤੇ ਉਹਨਾਂ ਨੇ ਆਪਣੀ ਅਸਲ ਜਮਾਤੀ ਸੱਤਾ ਕਾਇਮ ਕੀਤੀ। ਸਾਰੇ ਛੋਟੇ, ਵੱਡੇ ਫੈਸਲਿਆਂ ਲਈ, ਸਾਰੇ ਰਸਮੀ ਅਧਿਕਾਰੀ ਸੋਵੀਅਤਾਂ ਦੀ ਮਾਨਤਾ ਲੈਂਦੇ ਸਨ, ਇਸ ਤੋਂ ਬਿਨਾਂ ਕੰਮ ਨੂੰ ਅਮਲ 'ਚ ਨਹੀਂ ਸੀ ਲਿਆ ਜਾਂਦਾ।

ਫਰਵਰੀ ਇਨਕਲਾਬ ਦੀ ਤਰਾਸਦੀ ਇਹ ਸੀ ਕਿ ਜਦੋਂ ਕਿ ਅਸਲੀ ਸੱਤਾ ਸੋਵੀਅਤਾਂ ਦੀ ਕਮਾਂਡ ਹੈਠ ਹਥਿਆਰਬੰਦ ਪ੍ਰੋਲੇਤਾਰੀਏ ਦੇ ਹੱਥਾਂ 'ਚ ਸੀ, ਪਰ ਸੋਵੀਅਤਾਂ ਦੀ ਲੀਡਰਸ਼ੀਪ ਮੈਨਸ਼ਵਿਕਾਂ ਦੇ ਹੱਥਾਂ 'ਚ ਸੀ, ਜਿਹੜੇ ਸੋਚਦੇ ਸਨ ਕਿ ਫਰਵਰੀ ਇਨਕਲਾਬ ਇੱਕ ਬੁਰਜੂਆ-ਜਮਹੂਰੀ ਇਨਕਲਾਬ ਹੈ, ਇਸ ਤਰਾਂ ਬੁਰਜੂਆਜ਼ੀ ਇਸ ਦੀ ਨਿਆਂਸੰਗਤ ਆਗੂ ਹੈ। ਮੈਨਸ਼ਵਿਕ ਇਸ ਗੱਲ 'ਤੇ ਸਹਿਮਤ ਸਨ ਕਿ ਬੁਰਜੂਆਜ਼ੀ ਨੂੰ 'ਫਰਵਰੀ' 'ਚ ਸੱਤਾ 'ਚ ਆ ਕੇ ਆਪਣੀ ਬੁਰਜੂਆ ਜਮਹੂਰੀਅਤ ਕਾਇਮ ਕਰਨੀ ਚਾਹੀਦੀ ਹੈ, ਇਸਦੇ ਵਿਕਾਸ ਨਾਲ਼ ਮਜ਼ਦੂਰ ਜਮਾਤ ਮਜ਼ਬੂਤ ਹੋਵੇਗੀ, ਇੱਕ ਇਤਿਹਾਸਕ ਦੌਰ ਮਗਰੋਂ ਰੂਸ 'ਚ ਮਜ਼ਦੂਰ ਜਮਾਤ ਸੱਤਾ 'ਚ ਆਏਗੀ। ਬਾਲਸ਼ਵਿਕ ਮੈਨਸ਼ਵਿਕਾਂ ਤੋਂ ਭਿੰਨ ਸੋਚਦੇ ਸਨ ਕਿ ਬੁਰਜੂਆਜ਼ੀ ਰੂਸ 'ਚ ਬਹੁਤ ਕਮਜ਼ੋਰ ਹੈ ਇਸ ਬੁਰਜੂਆ ਰੀਪਬਲੀਕ ਮਜ਼ਦੂਰਾਂ ਅਤੇ ਕਿਸਾਨਾਂ ਦੀ ਸਾਂਝੀ ਹਕੂਮਤ ਅਧੀਨ ਸਥਾਪਿਤ ਹੋਵੇਗੀ। ਲੈਨਿਨ ਅਨੁਸਾਰ ਮਜ਼ਦੂਰਾਂ ਅਤੇ ਕਿਸਾਨਾਂ ਦੀ ਸਾਂਝੀ ਹਕੂਮਤ ਅਧੀਨ ਇਨਕਲਾਬੀ ਬੁਰਜੂਆ ਜਮਹੂਰੀਅਤ ਦੀ ਸਥਾਪਤੀ ਤਾਨਾਸ਼ਾਹੀ ਅਤੇ ਖੜੋਤ ਦੀ ਪੰਜਾਲੀ ਨੂੰ ਤੋੜ ਦਏਗੀ, ਅਤੇ ਪੱਛਮ ਦੇ ਮੁਲਕਾਂ ਨੂੰ ਚਿੰਗਾਰੀਆਂ ਭੇਜੇਗੀ ਖਾਸ ਕਰਕੇ ਜਰਮਨੀ ਨੂੰ ਜਿਹੜਾ ਕਿ ਪ੍ਰੋਲੇਤਾਰੀ ਇਨਕਲਾਬ ਲਈ ਪ੍ਰੋੜ੍ਹ ਹੋ ਰਿਹਾ ਸੀ। ਉਸਨੇ ਨਿਰੂਪਣ ਕੀਤਾ ਕਿ ਪੱਛਮ ਦਾ ਪ੍ਰੋਲੇਤਾਰੀਆ ਪਹਿਲਾਂ ਸੱਤਾ 'ਚ ਆਏਗਾ ਅਤੇ ਫਿਰ ਰੂਸ 'ਚ ਮਜ਼ਦੂਰ ਜਮਾਤ ਨੂੰ ਸੱਤਾ ਹਾਸਲ ਕਰਨ ਲਈ ਮਦਦ ਕਰੇਗਾ। ਜਦੋਂ ਕਿ ਬਾਲਸ਼ਵਿਕ ਅਤੇ ਮੈਨਸ਼ਵਿਕ ਦੋਨੋ ਇਸ ਗੱਲ 'ਤੇ ਸਹਿਮਤ ਸਨ ਕਿ ਪੱਛਮੀ ਯੂਰਪ ਦੇ ਉੱਨਤ ਦੇਸ਼ਾਂ 'ਚ ਪ੍ਰੋਲੇਤਾਰੀਏ ਦੇ ਸੱਤਾ 'ਚ ਆਉਣ ਤੋਂ ਪਹਿਲਾਂ ਪ੍ਰੋਲੇਤਾਰੀ ਇੱਕਲਾ ਰੂਸ 'ਚ ਸੱਤਾ ਨਹੀਂ ਆ ਸਕਦਾ।

ਦੋਨਾਂ ਧਿਰਾਂ ਨੇ ਆਪਣੇ-ਆਪਣੇ ਢੰਗ ਨਾਲ਼ ਰੂਸ 'ਚ ਇਨਕਲਾਬ ਦੇ ਰਾਹ ਨੂੰ ਸਮਝਣ ਲਈ, ਇਤਿਹਾਸ 'ਚ ਸਮਾਂ ਵਿਹਾ ਚੁੱਕੇ, ਯੂਰਪ ਦੇ ਪੁਰਾਣੇ ਬੁਰਜੂਆ ਇਨਕਲਾਬਾਂ ਵੱਲ ਦੇਖਿਆ, ਅਤੇ 'ਮੰਜਲਵਾਦ' ਦੇ ਸਿਧਾਂਤ ਨੂੰ ਈਜ਼ਾਦ ਕੀਤਾ, ਮਤਲਬ ਇਨਕਲਾਬ ਦੋ ਮੰਜਲਾਂ 'ਚ ਉੱਭਰੇਗਾ- ਪਹਿਲੀ ਜਮਹੂਰੀ ਅਤੇ ਦੂਜੀ ਸਮਾਜਵਾਦੀ। ਇਹਨਾਂ ਇਨਕਲਾਬਾਂ ਨੂੰ ਇਤਿਹਾਸਕ ਕਾਰਨਾਂ ਕਰਕੇ ਬੁਰਜੂਆਜ਼ੀ ਦੀ ਅਗਵਾਈ 'ਚ ਲੜਿਆ ਗਿਆ ਸੀ, ਅਤੇ ਬਿਨਾਂ ਸ਼ੱਕ ਬੁਰਜੂਆਜ਼ੀ ਨੂੰ ਸੱਤਾ 'ਚ ਲਿਆਂਦਾ। ਬੁਰਜੂਆਜ਼ੀ ਨੇ ਪਹਿਲਾਂ ਮਜ਼ਦੂਰਾਂ ਅਤੇ ਕਿਸਾਨਾਂ ਨੂੰ ਸੱਤਾ ਪ੍ਰਾਪਤੀ 'ਚ ਮਦਦ ਹਾਸਲ ਕਰਨ ਲਈ ਹਥਿਆਰਬੰਦ ਕੀਤਾ, ਆਪਣੀ ਤਾਨਾਸ਼ਾਹੀ ਦੀ ਕਾਇਮੀ ਦੇ ਤੁਰੰਤ ਬਾਅਦ ਇਸਨੇ ਉਹਨਾਂ ਨੂੰ ਨਿਹੱਥਾ ਕਰ ਦਿੱਤਾ ਅਤੇ ਆਪਣੀ ਸੱਤਾ ਨੂੰ ਇਨਕਲਾਬੀ ਮਜ਼ਦੂਰ ਜਮਾਤ ਵਿਰੁੱਧ ਮੋੜ ਦਿੱਤਾ। ਇਸ ਤਰਾਂ ਇਨਕਲਾਬ ਨੂੰ ਆਪਣੀ ਦੂਜੀ ਮੰਜਲ 'ਚ ਆਉਣਾ ਪਿਆ – ਬੁਰਜੂਆ ਹਕੂਮਤ ਦੇ ਵਿਰੁੱਧ ਪ੍ਰੋਲੇਤਾਰੀ।

ਪੁਰਾਣੇ ਯੂਰਪੀ ਇਨਕਲਾਬਾਂ ਦੀ 'ਦੋ ਮੰਜਲ' ਦੀ ਵਿਸ਼ੇਸਤਾ ਹੀ ਹੈ ਜਿਹੜੀ ਉਸ ਸਮੇਂ ਇਤਿਹਾਸਕ ਦੌਰ ਰਾਹੀਂ ਹੋਂਦ 'ਚ ਆਈ,  ਪਰ ਮਗਰੋਂ ਮਾਰਕਸ ਦੇ ਪੈਰੋਕਾਰਾਂ ਰਾਹੀਂ ਇਸ ਨੂੰ ਪੱਕੇ ਤੌਰ 'ਤੇ ਇਨਕਲਾਬ ਦੇ 'ਦੋ ਮੰਜਲ ਦੇ ਸਿਧਾਂਤ' ਦੇ ਸੂਤਰੀਕਰਨ ਵਿੱਚ ਰੂਪਾਂਤਰਿਤ ਕਰ ਦਿੱਤਾ ਗਿਆ – 'ਸਰਮਾਏਦਾਰੀ ਅੱਜ – ਸਮਾਜਵਾਦ ਕੱਲ', ਅਤੇ ਅਸੀਂ ਦੇਖਾਂਗੇ ਕਿ ਕਿਵੇਂ ਇਹ ਸੂਤਰ ਪ੍ਰੋਲੇਤਾਰੀ ਦੀ ਤਾਨਾਸ਼ਾਹੀ ਨੂੰ ਪੱਕੇ ਤੌਰ 'ਤੇ ਟਾਲਣ ਦਾ ਅੰਧਵਿਸ਼ਵਾਸ ਬਣ ਗਿਆ।

ਇਸ 'ਚ ਹੈਰਾਨੀ ਵਾਲ਼ੀ ਕੋਈ ਗੱਲ ਨਹੀਂ ਹੈ ਕਿ ਜਦੋਂ ਕਿ ਫਰਵਰੀ ਇਨਕਲਾਬ ਨੇ ਅਸਲੀ ਸੱਤਾ ਮਜ਼ਦੂਰ ਜਮਾਤ ਦੇ ਹੱਥਾਂ 'ਚ ਦਿੱਤੀ, ਜੋ ਕਿ ਸੋਵੀਅਤਾਂ 'ਚ ਚੰਗੀ ਤਰ੍ਹਾਂ ਜਥੇਬੰਦ ਸਨ, ਜਿਨ੍ਹਾਂ ਦੀ ਲੀਡਰਸ਼ੀਪ ਨੇ ਬੁਰਜੂਆ ਗੁੱਟ ਅੱਗੇ ਆਤਮਸਮਰਪਣ ਕਰ ਦਿੱਤਾ, ਜਿਹੜਾ ਕਿ ਉਹਨਾਂ ਦੇ ਅਨੁਮਾਨ ਮੁਤਾਬਕ ਇਨਕਲਾਬ ਦਾ ਇੱਕੋ-ਇੱਕ ਨਿਆਂਸੰਗਤ ਦਾਅਵੇਦਾਰ ਸੀ। ਇਸ ਤਰਾਂ ਆਰਜੀ ਬੁਰਜੂਆ ਸਰਕਾਰ ਪਹਿਲਾਂ ਪ੍ਰਿਸ ਲਵੋਵ ਅਤੇ ਫਿਰ ਕਰੇਂਸਕੀ ਦੇ ਅਧੀਨ ਪੈਦਾ ਹੋਈ। ਸਿਰਫ਼ ਮੈਨਸ਼ਵਿਕ ਹੀ ਨਹੀਂ ਸਗੋਂ ਸਤਾਲਿਨ ਸਮੇਤ, ਸਾਰੇ ਮੁੱਖ ਬਾਲਸ਼ਵਿਕ ਆਗੂਆਂ ਨੇ ਵੀ ਮਜ਼ਦੂਰ ਜਮਾਤ ਨੂੰ 'ਫਰਵਰੀ ਸਰਕਾਰ' ਦੀ ਹਮਾਇਤ ਕਰਨ ਨੂੰ ਕਿਹਾ, ਜਿਹੜੀ ਉਹਨਾਂ ਮੁਤਾਬਕ ਸਮਾਜਿਕ ਇਨਕਲਾਬ ਦੀ ਆਗੂ ਸੀ।

ਲਿਓ ਟਰਾਟਸਕੀ, ਰੂਸੀ ਇਨਕਲਾਬ ਦੇ ਸਾਂਝੇ ਆਗੂ ਨੇ  ਬਹੁਤ ਪਹਿਲਾਂ 1906 'ਚ 'ਨਤਿਜੇ ਅਤੇ ਸੰਭਾਵਨਾਵਾਂ' 'ਚ ਘੋਸ਼ਿਤ ਉਸਦੀ 'ਸਥਾਈ ਇਨਕਲਾਬ' ਦੇ ਸਿਧਾਂਤ ਰਾਹੀਂ ਮੈਨਸ਼ਵਿਕਾਂ ਅਤੇ ਬਾਲਸ਼ਵਿਕਾਂ ਦੀ ਸਾਂਝੀ ਤਜਵੀਜ 'ਤੇ ਵੱਖਰਾ ਮੱਤ ਰੱਖਿਆ ਸੀ। ਟਰਾਟਸਕੀ ਨੇ ਮੱਤ ਰੱਖਿਆ ਕਿ ਪ੍ਰੋਲੇਤਾਰੀਆ ਹੀ ਸੱਤਾ ਲਈ ਨਿਆਂਸੰਗਤ ਦਾਅਵੇਦਾਰ ਹੈ ਅਤੇ ਰੂਸੀ ਇਨਕਲਾਬ, ਪ੍ਰੋਲੇਤਾਰੀ ਇਨਕਲਾਬ ਦੀ ਤੌਰ 'ਤੇ ਹੀ ਸਫ਼ਲ ਹੋ ਸਕਦਾ ਹੈ।

ਜਦੋਂ ਕਿ ਸਾਰੀ ਬਾਲਸ਼ਵਿਕ ਲੀਡਰਸ਼ੀਪ ਨੇ ਮੈਨਸ਼ਵਿਕਾਂ ਦੇ ਹੱਥਾਂ 'ਚ ਹੱਥ ਪਾ ਕੇ ਫਰਵਰੀ ਸਰਕਾਰ ਦੀ ਹਮਾਇਤ ਨੂੰ ਜ਼ਾਰੀ ਰੱਖਿਆ, ਲੈਨਿਨ ਅਤੇ ਟਰਾਟਸਕੀ ਨੇ ਇਸਦਾ ਵਿਰੋਧ ਕੀਤਾ। ਜਦੋਂ ਲੈਨਿਨ ਜਲਾਵਤਨ ਸਨ, ਸਵਿਟਜ਼ਰਲੈਂਡ ਅੰਦਰ ਉਹਨਾਂ ਨੂੰ 'ਦੋ ਮੰਜਲ ਦੇ ਸਿਧਾਂਤ' ਦੇ ਅਤੇ 'ਜਮਹੂਰੀ ਤਾਨਾਸ਼ਾਹੀ' ਦੇ ਪੂਰਾਣੇ ਸੂਤਰੀਕਰਨ ਦੇ ਤਰਕ-ਦੋਸ਼ ਦਾ ਅਹਿਸਾਸ ਹੋਇਆ ਅਤੇ ਉਹਨਾਂ ਆਰਜ਼ੀ ਸਰਕਾਰ ਦੀ ਹਮਾਇਤ ਦੀ ਆਪਣੇ ਪੰਜ ਖ਼ਤਾਂ 'ਚ ਅਲੋਚਨਾ ਵੀ ਕੀਤੀ। ਬਾਲਸ਼ਵਿਕ ਆਗੂਆਂ ਨੇ ਇਹਨਾਂ ਪੰਜ ਖ਼ਤਾਂ 'ਚੋਂ ਸਿਰਫ਼ ਪਹਿਲਾਂ ਹੀ ਬਹੁਤ ਜ਼ਿਆਦਾ ਤੋੜ-ਮਰੋੜ ਨਾਲ਼ ਪੇਸ਼ ਕੀਤਾ ਇਹ ਕਹਿ ਕੇ ਕਿ ਇਹ ਲੈਨਿਨ ਦੇ ਵਿਚਾਰ ਹਨ ਪਾਰਟੀ ਨੇ ਇਹਨਾਂ ਤੋਂ ਕੁਝ ਨਹੀਂ ਲੈਣਾ। ਜਿਵੇਂ ਹੀ ਲੈਨਿਨ 3 ਮਾਰਚ ਨੂੰ ਰੂਸ ਪੁੱਜੇ, ਅਪ੍ਰੈਲ ਥੀਸਸ ਪੇਸ਼ ਕੀਤੀ ਜਿਸ 'ਚ ਉਹਨਾਂ ਨੇ ਗੜਕਵੀਂ ਅਵਾਜ 'ਚ ਫਰਵਰੀ ਸਰਕਾਰ ਨੂੰ ਢਾਹ ਦੇਣ ਲਈ ਕਿਹਾ, ਸਖ਼ਤੀ ਨਾਲ਼ ਬਾਲਸ਼ਵਿਕ ਅਤੇ ਮੈਨਸ਼ਵਿਕ ਆਗੂਆਂ ਦੀ ਆਰਜੀ ਸਰਕਾਰ ਦੀ ਹਮਾਇਤ ਕਰਨ ਲਈ ਅਲੋਚਨਾ ਕੀਤੀ। ਲੈਨਿਨ ਪਾਰਟੀ 'ਚ ਇੱਕਲੇ ਰਹਿ ਗਏ ਅਤੇ ਉਹਨਾਂ ਟਰਾਟਸਕੀਵਾਦੀ ਦਾ ਠੱਪਾ ਲਗਾ ਦਿੱਤਾ।

ਜਿਵੇਂ ਜਿਵੇਂ ਆਉਣ ਵਾਲ਼ੇ ਦਿਨ ਆਰਜੀ ਸਰਕਾਰ ਦੇ ਖ਼ਾਸੇ ਨੂੰ ਮਜ਼ਦੂਰ ਜਮਾਤ ਵਿਰੁੱਧ ਬੁਰਜੂਆ ਹਿੱਤਾਂ ਦੇ ਸੰਦ ਦੀ ਤੌਰ 'ਤੇ ਉਜਾਗਰ ਕਰਦੇ ਗਏ, ਬਾਲਸ਼ਵਿਕ ਅਹੁਦੇਦਾਰ ਅਤੇ ਕਤਾਰਾਂ, ਲੈਨਿਨ ਮਗਰ ਇੱਕਠੇ ਹੋਣ ਲੱਗੇ, ਅਤੇ ਆਗੂ ਉਸ ਦੇ ਪਿੱਛੇ ਲੱਗਣ ਲਈ ਮਜ਼ਬੂਰ ਹੋਏ। ਜੁਲਾਈ ਮੁਜ਼ਾਹਰੇ 'ਤੇ ਫਾਇਰਿੰਗ ਨੇ ਨਾ ਸਿਰਫ਼ ਸਮਾਜਿਕ ਜਨਵਾਦੀਆਂ ਦੀਆਂ ਅੱਖਾਂ ਖੋਲ੍ਹ ਦਿੱਤੀਆਂ ਸਗੋਂ ਸਮਾਜਵਾਦੀ ਇਨਕਲਾਬੀਆਂ ਦੀਆਂ ਅੱਖਾਂ ਵੀ ਖੋਲ੍ਹ ਦਿੱਤੀਆਂ ਜਿਹੜੇ ਕਿਸਾਨੀ ਦੇ ਨੁਮਾਇੰਦੇ ਸਨ। ਹਾਲਤਾਂ ਨੇ 'ਨਵੀਂ ਸਮਝਦਾਰੀ' ਦੀ ਜਿੱਤ ਨੂੰ ਅਸਾਨ ਬਣਾਇਆ, ਜਿਨ੍ਹਾਂ ਨੇ ਜਮਹੂਰੀ ਇਨਕਲਾਬ ਨੂੰ ਨਕਾਰ ਦਿੱਤਾ ਅਤੇ ਪ੍ਰੋਲੇਤਾਰੀ ਇਨਕਲਾਬ ਲਈ ਕਿਹਾ ਕਿ 'ਅਕਤੂਬਰ' ਦਾ ਰਾਹ ਸਪੱਸ਼ਟ ਹੈ। ਇਹ 'ਦੋ ਮੰਜਲ ਦੇ ਸਿਧਾਂਤ' ਵਿਰੁੱਧ 'ਸਥਾਈ ਇਨਕਲਾਬ' ਦਾ ਰਾਹ ਸੀ।

ਲੈਨਿਨ ਨੇ ਕਿਹਾ ਕਿ ਫਰਵਰੀ 'ਚ, ਰੂਸ 'ਚ, ਬੁਰਜੂਆਜੀ ਨੇ ਖੁਦ ਨੂੰ ਮਜ਼ਬੂਤ ਬਣਾਇਆ ਅਤੇ ਸੱਤਾ 'ਚ ਇਸ ਕਰਕੇ ਨਹੀਂ ਆਈ ਕਿ ਉਹ ਇਨਕਲਾਬ ਦੀ ਨਿਆਂਸੰਗਤ ਦਾਅਵੇਦਾਰ ਸੀ ਜਾਂ ਉਸਦੀ ਪ੍ਰੋਲੇਤਾਰੀਏ 'ਤੇ ਸਿਆਸੀ ਸ਼੍ਰੇਸ਼ਠਤਾ ਸੀ, ਸਗੋਂ ਸਮਾਂ-ਵਿਹਾ ਚੁੱਕੇ ਸੂਤਰਾਂ 'ਚ, ਪ੍ਰੋਲੇਤਾਰੀ ਦੇ ਆਗੂਆਂ ਦੇ ਉਲਝੇ ਰਹਿਣ ਕਰਕੇ ਸੱਤਾ 'ਚ ਆਈ। 'ਮੰਜਲਵਾਦ' ਦੇ ਪੁਰਾਣੇ ਸਿਧਾਂਤ ਨਾਲ਼ ਤੋੜ-ਵਿਛੋੜਾ ਕਰਕੇ ਹੀ ਪ੍ਰੋਲੇਤਾਰੀਆ ਇਤਿਹਾਸਕ ਜਿੱਤ, ਅਕਤੂਬਰ ਇਨਕਲਾਬ ਦੀ ਜਿੱਤ ਵੱਲ ਅੱਗੇ ਵਧਿਆ।

ਫਰਵਰੀ ਹਕੂਮਤ ਇੱਥੋਂ ਤੱਕ ਕਿ ਇਨਕਲਾਬ ਦੇ ਘੱਟੋ-ਘੱਟ ਜਮਹੂਰੀ ਕੰਮਾਂ ਨੂੰ ਵੀ ਨਹੀਂ ਪੂਰਾ ਕਰ ਸਕਿਆ। ਨਾ ਤਾਂ ਇਹ ਜੰਗ ਨੂੰ ਰੋਕ ਸਕਿਆ ਅਤੇ ਨਾ ਹੀ ਇਸ ਨੇ ਵੱਧ ਜ਼ਰੂਰੀ ਜ਼ਰਈ ਸੁਧਾਰਾ ਨੂੰ ਜਾਰੀ ਕੀਤਾ। ਕੌਮੀਅਤਾਂ ਦੀ ਸਮਸਿਆ ਜਿਉਂ ਦੀ ਤਿਉਂ ਬਣੀ ਰਹੀ। ਬੁਰਜੂਆ ਹਕੂਮਤ ਜਮਹੂਰੀਅਤ ਦੇ ਕੰਮਾਂ ਨੂੰ ਹੱਲ ਕਰਨ ਦੀ ਬਜਾਏ ਉਹਨਾਂ ਵਿਰੋਧਤਾਈਆਂ ਡੂੰਘਾ ਕਰਦੇ ਹੋਏ ਸਿਖਰ-ਬਿੰਦੂ 'ਤੇ ਲੈ ਗਈ। ਇਸ ਤਰ੍ਹਾਂ ਬੁਰਜੂਆ ਜਮਹੂਰੀਅਤ ਦੇ ਅਧੂਰੇ ਕੰਮਾਂ ਨੂੰ ਪੂਰਾ ਕਰਨ ਦਾ ਜਿੰਮਾਂ ਪ੍ਰੋਲੇਤਾਰੀਏ 'ਤੇ ਆ ਗਿਆ, ਪ੍ਰੋਲੇਤਾਰੀਏ ਨੇ ਇਹ ਜਿੰਮੇਵਾਰੀ ਮਨੁੱਖਤਾ ਦੇ ਇਤਿਹਾਸ 'ਚ ਹੁਣ ਤੱਕ ਦੇ ਸਭ ਤੋਂ ਮਹਾਨ ਸਮਾਜਿਕ ਇਨਕਲਾਬ- ਮਹਾਨ ਅਕਤੂਬਰ ਇਨਕਲਾਬ ਰਾਹੀਂ ਪੂਰੀ ਕੀਤੀ।

'ਅਕਤੂਬਰ' ਸੰਸਾਰ ਪ੍ਰੋਲੇਤਾਰੀਏ ਦੀ ਸੰਸਾਰ ਬੁਰਜੂਆਜੀ ਵਿਰੁੱਧ ਜਿੱਤ ਦਾ ਪਹਿਲਾ ਧਮਾਕਾ ਸੀ ਅਤੇ ਇਸ ਤਰ੍ਹਾਂ ਸਾਰਤੱਤ 'ਚ ਕੌਮਾਂਤਰੀ ਘਟਨਾ ਸੀ। ਇਸਨੇ ਉੱਨਤ ਪੱਛਮ ਦੇ ਇਨਕਲਾਬੀ ਪ੍ਰੋਲੇਤਾਰੀਏ ਅਤੇ ਪੂਰਬ ਦੇ ਮੁਕਤੀ ਸੰਘਰਸ਼ਾਂ ਨੂੰ ਚਿੰਗਾਰੀ ਭੇਜੀ।  ਇਸਨੇ ਸੰਸਾਰ ਸਮਾਜਵਾਦੀ ਇਨਕਲਾਬ ਦੀ ਲੜਾਈ ਦੀ ਚੀਖ਼ ਦੇ ਨਾਲ਼, ਪ੍ਰੋਲੇਤਾਰੀਏ ਦੀ ਸੰਸਾਰ ਪਾਰਟੀ ਨੂੰ ਜਥੇਬੰਦ ਕਰਨ ਦਾ ਤਾਰਕਿਕ ਅਧਾਰ ਤਿਆਰ ਕੀਤਾ-ਤੀਜੀ ਇੰਟਰਨੈਸ਼ਨਲ ਦੇ ਰੂਪ 'ਚ (ਕੋਮਿੰਟਰਨ)।

ਜਿਵੇਂ ਹੀ ਪ੍ਰੋਲੇਤਾਰੀਏ ਦੀ ਸੰਸਾਰ ਨੂੰ ਜਿੱਤਣ ਦੀ ਲੜਾਈ  ਵਲਾਵੇਂਦਾਰ ਤਰੀਕੇ ਨਾਲ਼, ਸ਼ੁਰੂ 'ਚ ਜਰਮਨੀ, ਹੰਗਰੀ ਹੋਰ ਕਿਤੇ ਵੀ ਪਛਾੜਾਂ ਝੱਲਦੇ ਹੋਏ, ਸ਼ੁਰੂ ਹੋਈ, ਗੈਰ-ਫੈਸਲਾਕੁੰਨ, ਦੂਜੀ ਲੀਹ ਵਾਲ਼ੀ ਲੀਡਰਸ਼ੀਪ ਨੇ ਪ੍ਰੋਲੇਤਾਰੀਏ ਦੀ ਸੰਸਾਰ ਇਨਕਲਾਬ ਦੀ ਜਿੱਤ ਮੁਹਿੰਮ ਨੂੰ ਰੋਕਣ ਲਈ, ਆਪਣੇ ਆਪ ਨੂੰ ਨੌਕਰਸ਼ਾਹੀ ਦੇ ਰੂਪ 'ਚ ਢਾਲ਼ ਲਿਆ। ਜਿਵੇਂ ਹੀ ਪਹਿਲੀ ਲੀਹ ਵਾਲ਼ੀ ਲੀਡਰਸ਼ੀਪ ਜਿਹੜੀ 'ਅਕਤੂਬਰ' ਨੂੰ ਸਿਰਜਣ ਸਰਗਰਮ ਸੀ, ਨੇ ਦੂਜੀ ਲੀਹ ਵਾਲ਼ਿਆਂ ਵਿਰੁੱਧ ਸੰਘਰਸ਼ ਕੀਤਾ, ਸਤਾਲਿਨ ਨੇ ਕੇਂਦਰ 'ਤੇ ਕਬਜਾ ਕਰਨ ਲਈ ਇੱਕ ਸਫ਼ਲ ਤਖ਼ਤਾਪਲਟ ਜਥੇਬੰਦ ਕੀਤਾ, ਬੇਰਹਿਮੀ ਨਾਲ਼ 'ਅਕਤੂਬਰ' ਦੀ ਜੀਵਤ ਲੀਡਰਸ਼ੀਪ ਦਾ ਖ਼ਾਤਮਾ ਕਰ ਦਿੱਤਾ, ਸੰਸਾਰ ਸਮਾਜਵਾਦੀ ਇਨਕਲਾਬ ਨੂੰ ਮਿੱਟੀ 'ਚ ਮਿਲਾਉਂਦੇ ਹੋਏ 'ਇੱਕ ਦੇਸ਼ 'ਚ ਸਮਾਜਵਾਦ' ਦਾ ਗੱਦਾਰੀ ਭਰਿਆ ਨਾਅਰਾ ਦਿੱਤਾ। ਉਹਨਾਂ ਨੇ ਨਾ ਸਿਰਫ ਇਨਕਲਾਬ ਨੂੰ ਬਰਬਾਦ ਕੀਤਾ ਸਗੋਂ ਇਸਨੂੰ ਖੱਸੀ ਕਰ ਦਿੱਤਾ, ਅੰਤ 'ਚ ਉਹਨਾਂ ਨੇ ਪ੍ਰੋਲੇਤਾਰੀਏ ਦੀ ਸੰਸਾਰ ਪਾਰਟੀ–ਕੋਮਿੰਟਰਨ ਨੂੰ 1943 'ਚ ਭੰਗ ਕਰ ਦਿੱਤਾ।

'ਅਕਤੂਬਰ' ਨੇ ਅਸਲ ਸੰਘਰਸ਼ ਦੇ ਅਖਾੜੇ 'ਚ ਵੱਖ-ਵੱਖ ਮੱਤਾਂ ਨੂੰ ਪਰਖਿਆ, ਅਤੇ ਆਪਣੀ ਗਤੀ 'ਚ ਇਹਨਾਂ ਨੂੰ ਜਾਂ ਤਾਂ ਨਕਾਰ ਦਿੱਤਾ ਜਾਂ ਹਿਮਾਇਤ ਕੀਤੀ। ਬਾਲਸ਼ਵਿਜ਼ਮ ਜੇਤੂ ਹੋਇਆ ਪਰ ਉਦੋਂ ਹੀ ਜਦੋਂ ਇਸਨੇ ਖੁਦ ਨੂੰ 'ਅਪ੍ਰੈਲ ਥੀਸਸ' ਦੀ  ਕਪਾਂਸ ਨੂੰ ਵਰਤਦੇ ਹੋਏ ਆਪਣੇ ਆਪ ਨੂੰ ਮੋੜ ਲਿਆ, ਜਿਹੜਾ ਕਿ 'ਮੰਜਲਵਾਦ' ਦੇ ਸਿਧਾਂਤ ਤੋਂ 'ਸਥਾਈ ਇਨਕਲਾਬ' ਵੱਲ ਸਪੱਸ਼ਟ ਮੌੜਾ ਸੀ। ਮੈਨਸ਼ਵਿਜ਼ਮ ਹਾਰ ਗਿਆ ਜਿਵੇਂ ਕਿ ਇਸਦਾ ਝੁਕਾਅ ਬੁਰਜੂਆਜ਼ੀ ਅਤੇ ਇਨਕਲਾਬ ਦੇ 'ਦੋ ਮੰਜਲ' ਦੇ ਸਿਧਾਂਤ ਵੱਲ ਸੀ।

'ਮੰਜਲਵਾਦ' ਅਕਤੂਬਰ ਇਨਕਲਾਬ ਰਾਹੀਂ ਦਫ਼ਨਾ ਦਿੱਤਾ ਗਿਆ, ਪਰ ਮਾਰਕਸਵਾਦ ਦੇ ਪੈਰੋਕਾਰਾਂ ਲਈ ਨਹੀਂ। ਪ੍ਰੋਲੇਤਾਰੀ ਰੂਸ 'ਚ ਸਫ਼ਲ ਰਿਹਾ, ਪਰ ਪੈਰੋਕਾਰਾਂ ਨੇ 'ਅਕਤੂਬਰ' ਦੇ ਸਬਕਾਂ ਨੂੰ ਫਿਰ ਭੁਲਾ ਲਿਆ, ਅਤੇ ਬਾਅਦ 'ਚ 'ਮੰਜਲਵਾਦ' ਦੇ ਉਸੇ ਸਿਧਾਂਤ ਨੂੰ ਇਤਿਹਾਸ ਦੇ ਕੁੜੇਦਾਨ ਤੋਂ ਫਿਰ ਕੱਢ ਲਿਆ। ਸਤਾਲਿਨ ਦੀ ਅਗਵਾਈ 'ਚ ਕਰੇਮਲੀਨ ਨੂੰ ਪੂਰੇ ਸੰਸਾਰ 'ਚ ਬੁਰਜੂਆਜ਼ੀ ਨਾਲ਼ ਗਠਜੋੜ ਕਰਨ ਲਈ ਸ਼ਰਮਿੰਦਾ ਹੋਣਾ ਪਿਆ। ਜੇਕਰ ਕੇਐਮਟੀ ਅਤੇ ਚੀਨ 'ਚ ਚਿਆਂਗ ਕਾਈ ਸ਼ੇਕ ਨਾਲ਼ ਗਠਜੋੜ ਨੇ 1927 'ਚ ਇਨਕਲਾਬ ਦਾ ਗਰਭਪਾਤ ਕੀਤਾ,  ਜਰਮਨੀ ਅਤੇ ਸਪੇਨ 'ਚ ਇਹ 'ਹਰਮਨਪਿਆਰੇ ਮੋਰਚੇ' ਦੇ ਰੂਪ 'ਚ ਸਾਹਮਣੇ ਆਇਆ, ਸਤਾਲਿਨ ਅਧੀਨ ਕੋਮਿੰਟਰਨ ਦੇ ਦਫ਼ਤਰੀ ਸਿਧਾਂਤ ਜਰਮਨੀ 'ਚ 1932 ਅਤੇ ਸਪੇਨ 'ਚ 1937 'ਚ ਫਾਸਿਸਟਾਂ ਦੇ ਹੱਥੋਂ ਪ੍ਰੋਲੇਤਾਰੀਏ ਦੀਆਂ ਤਰਾਸਦਿਕ ਹਾਰਾਂ ਵੱਲ ਲੈ ਗਏ।

ਸਤਾਨਿਲਵਾਦੀ ਅਤੇ ਮਾਓਵਾਦੀ 'ਮੰਜਲਵਾਦ' ਮਤਲਬ 'ਦੋ ਮੰਜਲ 'ਚ ਇਨਕਲਾਬ' ਦੀ ਵਕਾਲਤ ਕਰਦੇ ਹਨ- ਪਹਿਲਾਂ ਜਮਹੂਰੀ ਅਤੇ ਫਿਰ ਸਮਾਜਵਾਦੀ – ਜਿਸਨੇ ਨੌਜਵਾਨਾਂ ਅਤੇ ਮਜ਼ਦੂਰਾਂ ਦੀਆਂ ਕਈ ਪੀੜ੍ਹੀਆਂ ਨੂੰ ਇਤਿਹਾਸ ਦੇ ਸਹੀ ਇਨਕਲਾਬੀ ਸਬਕ ਨਾਲ਼ ਲੈਸ ਕਰਨ ਦੀ ਬਜਾਏ ਕੁਰਾਹੇ ਪਾ ਦਿੱਤਾ। ਨੌਜਵਾਨਾਂ ਅਤੇ ਮਜ਼ਦੂਰਾਂ ਨੂੰ ਇਨਕਲਾਬੀ ਸਿਧਾਂਤ ਨਾਲ਼ ਲੈਸ ਕਰਨ ਦੀ ਬਜਾਏ, ਉਹ ਲਗਾਤਾਰ ਬੁਰਜੂਆਜ਼ੀ ਅੰਦਰ ਅਗਾਂਹਵਧੂ ਤੱਤਾਂ ਦੀ ਭਾਲ 'ਚ ਲੱਗੇ ਰਹੇ ਅਤੇ ਸਾਰੇ ਮੁਲਕਾਂ 'ਚ ਬੁਰਜੂਆਜ਼ੀ ਦੇ ਇਸ ਜਾਂ ਉਸ ਤਬਕੇ ਨਾਲ਼ ਚਿਪਕੇ ਰਹੇ।

ਅਕਤੂਬਰ ਦੀ ਸਮਝਦਾਰੀ ਦਾ ਮਤਲਬ ਇਹ ਨਹੀਂ ਹੈ ਕਿ ਅਸੀਂ ਅਕਤੂਬਰ ਦੇ ਤੈਅਸ਼ੂਦਾ ਖਾਕੇ 'ਤੇ ਇਸਦੀ ਨਕਲ ਕਰ ਸਕਦੇ ਹਾਂ। ਬਿਨਾਂ ਸ਼ੱਕ, ਜਮਾਂਤੀ ਤਾਕਤਾਂ ਦੇ ਮੌਜੂਦਾ ਸੁਮੇਲ ਮੁਤਾਬਕ ਇਨਕਲਾਬ ਦਾ ਰਾਹ ਹਰੇਕ ਦੇਸ਼ 'ਚ ਇੱਕ ਦੂਜੇ ਤੋਂ ਵੱਖਰਾ ਹੋਵੇਗਾ। ਫਿਰ ਵੀ ਹਰ ਦੇਸ਼ 'ਚ ਬਹੁਤ ਸਾਰੀਆਂ ਵਸਤੂਗਤ ਹਾਲਤਾਂ ਦਾ ਹੋਣਾ ਲੋੜੀਂਦਾ ਹੈ। ਪਰ ਜਦੋਂ ਇੱਕ ਵਾਰ ਸਾਰੀਆਂ ਵਸਤੂਗਤ ਹਾਲਤਾਂ ਮਿਲ ਜਾਂਦੀਆਂ ਹਨ, ਸਹੀ ਨਜ਼ਰੀਏ ਨਾਲ਼ ਲੈਸ ਲੀਡਰਸ਼ੀਪ ਦਾ ਸਵਾਲ ਫੈਸਲਾਕੁੰਨ ਹੋ ਜਾਂਦਾ ਹੈ, ਅਤੇ ਜੇਕਰ ਇਨਕਲਾਬ ਨੂੰ ਜਿੱਤ ਦੇ ਅੰਤ ਤੱਕ ਲੈ ਜਾਣ ਵਾਲ਼ੀ ਲੀਡਰਸ਼ੀਪ ਦੀ ਅਣਹੋਂਦ ਹੋਵੇਗੀ ਤਾਂ ਮੌਕਾ ਖੁੱਸ ਜਾਵੇਗਾ। ਇਹ ਇੱਕ ਹਾਲਤ ਹੈ ਜਿਹੜੀ ਰੂਸੀ 'ਅਕਤੂਬਰ' ਤੋਂ ਬਾਅਦ ਹਰ ਮੁਲਕ 'ਚ ਦਰਜਨਾਂ ਵਾਰੀ ਆਪਣੇ ਆਪ ਨੂੰ ਦੋਹਰਾ ਚੁੱਕੀ ਹੈ।

ਇਸ ਤਰਾਂ ਅਕਤੂਬਰ ਇਨਕਲਾਬ ਦੇ ਸਬਕਾਂ ਨੂੰ ਸਮਝਣਾ ਬਹੁਤ ਜ਼ਰੂਰੀ ਹੈ, ਇੱਕ ਸਫ਼ਲਤਾਪੂਰਵਕ ਸੱਤਾ 'ਤੇ ਕਬਜ਼ਾ ਕਰਨ ਲਈ ਨਾ ਕਿ ਇਸਦੀ ਕਿਤੇ ਵੀ ਨਕਲ ਕਰਨ ਲਈ, ਸਗੋਂ ਭੱਵਿਖੀ ਇਨਕਲਾਬਾਂ ਦਾ ਰਾਹ ਰੁਸ਼ਨਾਉਣ ਲਈ ਅਤੇ ਗ਼ਲਤੀਆਂ ਦੇ ਵਾਰ-ਵਾਰ ਦੁਹਰਾਅ ਨੂੰ ਰੋਕਣ ਲਈ ਜਿਨ੍ਹਾਂ ਨੇ ਪਿਛਲੀ ਸਦੀ 'ਚ ਸੰਸਾਰ ਮਜ਼ਦੂਰ ਜਮਾਤ 'ਤੇ ਸੱਟ ਤੋਂ ਬਾਅਦ ਸੱਟ ਮਾਰੀ ਹੈ।

ਅਕਤੂਬਰ ਇਨਕਲਾਬ ਦੀ ਇੱਕ ਸਦੀ ਮਗਰੋਂ, ਸੰਸਾਰ ਮਜ਼ਦੂਰ ਜਮਾਤ ਦੀ ਲਹਿਰ ਦੀਆਂ ਹਾਰਾਂ ਅਤੇ ਪਛਾੜਾਂ ਦੀ ਸਾਰੀ ਕੜੀ ਨਾਲ਼ ਬਹੁਤ ਸਾਰਾ ਇਨਕਲਾਬੀ ਅਨੁਭਵ ਇੱਕਠਾ ਹੋਇਆ ਹੈ। ਜਿੱਤਾਂ ਅਤੇ ਹਾਰਾਂ ਦੇ ਰੂਪ 'ਚ ਅਮੀਰ ਅਨੁਭਵ ਹੁਣ ਸਾਡੇ ਹੱਥਾਂ 'ਚ ਹੈ। ਜਿਵੇਂ ਹੀ ਸੰਸਾਰ ਸਰਮਾਏਦਾਰੀ ਦਾ ਆਮ ਸੰਕਟ ਗਹਿਰਾ ਰਿਹਾ ਹੈ, ਵਸਤੂਗਤ ਹਾਲਤਾਂ ਬਹੁਤ ਸਾਰੇ ਦੇਸ਼ਾਂ 'ਚ ਪ੍ਰੋਲੇਤਾਰੀ ਯੁਗ-ਪਲਟੇ ਲਈ ਪ੍ਰੋੜ੍ਹ ਹੋ ਰਹੀਆਂ ਹਨ। ਪ੍ਰੋਲੇਤਾਰੀਏ ਦੀ ਗਿਣਾਤਮਕ ਗਿਣਤੀ 'ਚ ਸੰਸਾਰ ਭਰ 'ਚ ਵਾਧੇ ਨੇ ਅਤੀਤ ਤੋਂ ਇੱਕ ਹੋਰ ਵਾਧਾ ਨਾਲ਼ ਜੋੜ ਦਿੱਤਾ ਹੈ। ਪਿਛਲੀ ਸਦੀ ਦੇ ਮੁਕਾਬਲੇ, ਜਦੋਂ ਕਿਸਾਨੀ ਬਹੁਗਿਣਤੀ ਸੀ, ਅੱਜ ਮਜ਼ਦੂਰ ਜਮਾਤ ਸੱਭ ਤੋਂ ਵੱਡਾ ਜਮਾਤੀ ਤਬਕਾ ਹੈ। ਇਹ ਵੱਧ ਇੱਕਠੀ ਹੈ, ਵੱਧ ਤੁਰਦੀ-ਫਿਰਦੀ ਅਤੇ ਪਹਿਲਾਂ ਤੋਂ ਕਿਤੇ ਵੱਧ ਅਨੁਭਵੀ ਹੈ।

ਫਿਰ ਵੀ, ਹਾਰਾਂ ਅਤੇ ਪਛਾੜਾਂ ਦੀ ਸਾਰੀ ਸਦੀ, ਪਹਲਾਂ ਸਤਾਲਿਨ ਦੀ ਅਗਵਾਈ 'ਚ ਕਮਿੰਟਰਨ ਦੀਆਂ ਅਧਾਰਹੀਨ ਨੀਤੀਆਂ ਨੇ ਅਤੇ ਫਿਰ ਸਤਾਲਿਨਵਾਦੀਆਂ ਅਤੇ ਮਾਓਵਾਦੀਆਂ ਰਾਹੀਂ ਪੂਰੇ ਸੰਸਾਰ 'ਚ ਪ੍ਰੋਲੇਤਾਰੀ ਨੂੰ ਨਿਰਾਸ਼ਾ ਅਤੇ ਦਿਸ਼ਾਹੀਣ ਅਵਸਥਾ 'ਚ ਛੱਡ ਦਿੱਤਾ ਹੈ। ਮਜ਼ਦੂਰ ਜਮਾਤ ਨੇ ਆਪਣੀ ਤਾਕਤ ਅਤੇ ਸਮਾਜਵਾਦ ਦੀ ਜਿੱਤ 'ਤੇ ਭਰੋਸਾ ਗੁਆ ਦਿੱਤਾ ਹੈ। ਇਹ ਵਿਰਾਸਤ ਸਤਾਲਿਨਵਾਦੀ ਅਤੇ ਮਾਓਵਾਦੀ ਸਾਡੇ ਲਈ ਛੱਡ ਗਏ ਹਨ।

ਇੱਥੇ ਇੱਕ ਪਾਸੇ, ਪ੍ਰੋੜ੍ਹ  ਵਸਤੂਗਤ ਹਾਲਤਾਂ ਅਤੇ ਪਹਿਲਾਂ ਤੋਂ ਕਿਤੇ ਵੱਧ ਸੰਸਾਰ ਸਮਾਜਵਾਦੀ ਇਨਕਲਾਬ ਦੀ ਸੰਭਾਵਨਾਵਾਂ ਅਤੇ ਦੂਜੇ ਪਾਸੇ ਮਜ਼ਦੂਰ ਜਮਾਤ ਦੀ ਆਪਣੇ ਜਮਾਤੀ ਦੁਸ਼ਮਣ ਵਿਰੁੱਧ, ਸੰਸਾਰ ਬੁਰਜੂਆਜ਼ੀ ਅਤੇ ਵੱਖ-ਵੱਖ ਦੇਸ਼ਾਂ 'ਚ ਉਸਦੀ ਸੱਤਾ ਵਿਰੁੱਧ ਬਗਾਵਤ ਲਈ ਉੱਠਣ ਲਈ ਤਿਆਰੀ ਦੀ ਅਣਹੋਂਦ ਵਿਚਕਾਰ ਡੂੰਘੀ ਖਾਈ ਪੈਦਾ ਹੋ ਚੁੱਕੀ ਹੈ। ਇਸ ਖਾਈ ਨੂੰ ਭਰਨ ਲਈ ਸਾਡੀ ਪੀੜ੍ਹੀ ਦੇ ਇਨਕਲਾਬੀਆਂ ਮੂਹਰੇ ਬਹੁਤ ਵੱਡੀ ਚਿਤਾਵਨੀ ਹੈ।

(ਵਰਕਰਜ਼ ਸੋਸ਼ਲਿਸਟ ਬਲਾਗ 'ਚ 16 ਅਕਤੂਬਰ 2010 ਨੂੰ ਪ੍ਰਕਾਸ਼ਿਤ, ਅੰਗਰੇਜ਼ੀ ਤੋਂ ਅਨੁਵਾਦਿਤ) 

ਅਨੁਵਾਦਕ-ਰਜਿੰਦਰ, 9592709990 www.workersocialist.blogspot.com