Showing posts with label Songs. Show all posts
Showing posts with label Songs. Show all posts

Sunday, July 31, 2022

ਪਰਮਜੀਤ ਪੰਮ ਦਾ ਗੀਤ `ਸ਼ਹੀਦ ਊਧਮ ਸਿੰਘ` ਕੀਤਾ ਰਿਲੀਜ਼

Sunday 31st July 2022 at 3:34 PM

 ਲਾਂਚ ਕੀਤਾ ਡੀ.ਸੀ. ਸੁਰਭੀ ਮਲਿਕ ਅਤੇ ਸੀਪੀ ਡਾ. ਕੌਸ਼ਤੁਬ ਸ਼ਰਮਾ ਨੇ  


ਲੁਧਿਆਣਾ
: 31 ਜੁਲਾਈ 2022: (ਪੰਜਾਬ ਸਕਰੀਨ ਬਿਊਰੋ)::

ਗੀਤ ਬਹੁਤ ਸਾਰੇ ਲਿਖੇ ਜਾਂਦੇ ਹਨ, ਬਹੁਤ ਸਾਰੇ ਗਏ ਜਾਂਦੇ ਹਨ ਪਰ ਕਿੰਨੇ ਕੁ ਗੀਤ ਹਨ ਜਿਹੜੇ ਲਿਖਣ, ਪੜ੍ਹਨ, ਗਾਉਣ ਅਤੇ ਸੁਣਨ ਵਾਲੇ ਨੂੰ ਸਕੂਨ ਦੇਂਦੇ ਹੋਣ। ਗੀਤ ਗਾਇਕ ਪਰਮਜੀਤ ਪੰਮ ਦਾ ਕਹਿਣਾ ਹੈ ਕਿ ਉਸਨੂੰ ਇਹ ਗੀਤ ਗਏ ਕੇ ਸਕੂਨ ਮਿਲਿਆ ਹੈ। ਇਸ ਸਕੂਨ ਦਾ ਕਾਰਨ ਆਪਣੇ ਉਸ ਨਾਇਕ ਨੂੰ ਯਾਦ ਕਰਨਾ ਹੈ ਜਿਸਨੇ ਲੰਮੇ ਸਮੇਂ ਦੇ ਵਕਫ਼ੇ ਮਗਰੋਂ ਜਾ ਕੇ ਦੇਸ਼ ਦੀ ਜਨਤਾ ਦੇ ਖੂਨ ਨਾਲ ਹੱਥ ਰੰਗਣ ਵਾਲੇ ਲੰਡਨ ਜਾ ਕੇ ਬਦਲਾ ਲਿਆ ਸੀ। ਇਸ ਗੀਤ ਵਿੱਚ ਸ਼ਹੀਦ ਊਧਮ ਸਿੰਘ ਨੂੰ ਸ਼ਰਧਾਂਜਲੀ ਦਿੱਤੀ ਗਈ ਹੈ ਇਸ ਲਈ ਇਹ ਗੀਤ ਸਾਨੂੰ ਵੀ ਸਕੂਨ ਦੇਂਦਾ ਹੈ। 

ਪਰਮਜੀਤ ਪੰਮ ਜਿੱਥੇ ਪੰਜਾਬ ਪੁਲਿਸ ਵਿਚ ਨੌਕਰੀ ਕਰਦਾ ਹੈ ਉੱਥੇ ਉਹ ਪੰਜਾਬੀ ਸੱਭਿਆਚਾਰ ਅਤੇ ਸਮਾਜਿਕ ਜ਼ਿੰਮੇਵਾਰੀਆਂ ਨਾਲ ਵੀ ਜੁੜਿਆ ਹੋਇਆ ਹੈ।ਉਸਦੇ ਆ ਚੁੱਕੇ ਗੀਤਾਂ `ਭਗਤ ਸਿੰਘ ਮੰਗਦਾ ਜਵਾਬ`, `ਕੋਕਾ ਸੱਜਣਾ ਦਾ ਤੇਰੇ ਨੱਕ ਤੇ ਸਰਦਾਰੀ`, `ਚੰਨ ਨਾਲ ਯਾਰੀ`, `ਮੁੰਡਿਆਂ ਦੀ ਟੋਲੀ`, `ਕਦੋਂ ਹੋਣਗੇ ਮੇਲੇ`, `ਜੱਟ ਦੁਆਬੇ ਦਾ` ਵਰਗੇ ਗੀਤ ਸਰੋਤਿਆਂ ਵਲੋਂ ਪਸੰਦ ਕੀਤੇ ਜਾ ਚੁੱਕੇ ਹਨ। ਉਹ ਸਮੇਂ ਸਮੇਂ `ਤੇ ਦੇਸ਼ ਦੇ ਯੋਧਿਆਂ ਨੂੰ ਯਾਦ ਕਰਨ ਵਾਲੇ ਗੀਤ ਗਾ ਕੇ ਆਪਣਾ ਫਰਜ਼ ਵੀ ਅਦਾ ਕਰਦਾ ਰਹਿੰਦਾ ਹੈ।

ਲੰਡਨ ਵਿਚ ਜਾ ਕੇ ਜਲਿਆਂਵਾਲਾ ਬਾਗ਼ ਦਾ ਬਦਲਾ ਲੈਣ ਵਾਲੇ ਸ਼ਹੀਦ ਊਧਮ ਸਿੰਘ ਦੇ ਸ਼ਹੀਦੀ ਦਿਨ ਤੇ ਉਸ ਵਲੋਂ ਅੱਜ ਗੀਤ `ਸ਼ਹੀਦ ਊਧਮ ਸਿੰਘ` ਰਿਲੀਜ਼ ਕੀਤਾ ਗਿਆ ਜਿਸ ਦੇ ਬੋਲ ਬੌਬੀ ਜਾਜੇ ਵਾਲੇ ਦੇ ਲਿਖੇ ਹਨ ਅਤੇ ਸੰਗੀਤ ਅਮਦਾਦ ਅਲੀ ਨੇ ਦਿੱਤਾ ਹੈ ਤੇ ਵੀਡੀਓ ਸੋਨੂੰ ਢਿੱਲੋਂ ਵਲੋਂ ਤਿਆਰ ਕੀਤਾ ਗਿਆ।
ਪੇਸ਼ਕਾਰ ਅਮਰੀਕ ਸਿੰਘ ਸਰਹਾਲ ਕਾਜ਼ੀਆਂ ਦੀ ਪੇਸ਼ਕਸ਼ ਵਿਚ ਗੁਰੀ ਪ੍ਰੌਡਕਸ਼ਨ ਵਲੋਂ ਵਿਸ਼ਵ ਪੱਧਰ `ਤੇ ਰਿਲੀਜ਼ ਕੀਤੇ ਗਏ ਇਸ ਗੀਤ ਨੂੰ ਅੱਜ ਮਾਣਯੋਗ ਡਿਪਟੀ ਕਮਿਸ਼ਨਰ  ਸ੍ਰੀਮਤੀ ਸੁਰਭੀ ਮਲਿਕ ਅਤੇ ਮਾਣਯੋਗ ਪੁਲਿਸ ਕਮਿਸ਼ਨਰ ਸ੍ਰੀ ਕੌਸ਼ਤੁਬ ਸ਼ਰਮਾ ਨੇ ਲੁਧਿਆਣਾ `ਚ ਰਿਲੀਜ਼ ਕੀਤਾ ਅਤੇ ਕਿਹਾ ਕਿ ਇਹੋ ਜਿਹੇ ਗੀਤਾਂ ਨਾਲ ਸਾਡੀ ਨਵੀਂ ਪੀੜ੍ਹੀ ਵਿਚ ਦੇਸ਼ ਭਗਤੀ ਦਾ ਜਜ਼ਬਾ ਅਤੇ ਸ਼ਹੀਦਾਂ ਪ੍ਰਤੀ ਸਤਿਕਾਰ ਪੈਦਾ ਹੋਵੇਗਾ।
ਇਸ ਮੌਕੇ ਗਾਇਕ ਪਰਮਜੀਤ ਪੰਮ ਨੇ ਕਿਹਾ ਕਿ ਸ਼ਹੀਦ ਊਧਮ ਸਿੰਘ ਨੂੰ ਗੀਤ ਰੂਪੀ ਸ਼ਰਧਾਂਜਲ਼ੀ ਦੇ ਕੇ ਉਸਨੂੰ ਸਕੂਨ ਮਿਲਿਆ ਹੈ ਅਤੇ ਆਉਣ ਵਾਲੇ ਸਮੇਂ ਚ ਦੇਸ਼ ਦੇ ਯੋਧਿਆਂ ਦੀ ਉਸਤਤ ਵਿੱਚ ਗੀਤ ਗਾਉਂਦਾ ਰਹਾਂਗਾ।

Thursday, July 11, 2019

MLA ਕੁਲਦੀਪ ਸਿੰਘ ਵੈਦ ਨਿੱਤਰੇ ਮਹਿਲਾ ਕਮਿਸ਼ਨ ਦੀ ਚੇਅਰਪਰਸਨ ਦੇ ਹੱਕ ਵਿੱਚ

Jul 11, 2019, 5:57 PM
ਰੈਪਰ ਹਨੀ ਸਿੰਘ ਵਰਗੇ ਕਲਾਕਾਰਾਂ ਖ਼ਿਲਾਫ਼ ਸਖ਼ਤ ਕਾਰਵਾਈ ਦੀ ਮੰਗ
ਲੁਧਿਆਣਾ: 11 ਜੁਲਾਈ 2019:(ਪੰਜਾਬ ਸਕਰੀਨ ਬਿਊਰੋ):: 

ਕਾਨੂੰਨ ਵਿੱਚ ਕਾਫੀ ਧਾਰਾਵਾਂ ਹਨ ਜਿਹੜੀਆਂ ਗਲਤ  ਠੀਕ ਦਾ ਫਰਕ ਕੱਢਦੀਆਂ ਗਲਤ ਨੂੰ ਨਿਸ਼ਾਨਾ ਬਣਾ ਸਕਦੀਆਂ ਹਨ। ਇਸੇ ਤਰਾਂ ਅਸ਼ਲੀਲਤਾ ਅਤੇ ਦੋਹਰੇ ਅਰਥਾਂ ਵਾਲੀ "ਕਲਾਕਾਰੀ" ਦੇ ਮਾਮਲੇ ਵਿੱਚ ਵੀ ਕਾਨੂੰਨ ਕੋਲ ਕਾਫੀ ਕੁਝ ਹੈ ਪਰ ਆਮ ਤੌਰ 'ਤੇ ਕਾਨੂੰਨ ਦੀ ਸਖਤੀ ਸਿਰਫ ਸਿਆਸੀ ਵਿਰੋਧ ਦੇ ਮਾਮਲੇ ਵਿੱਚ ਵਰਤੀ ਜਾਂਦੀ ਹੈ ਅਤੇ ਅਜਿਹੇ ਮਾਮਲੇ ਨਜ਼ਰਅੰਦਾਜ਼ ਹੋਏ ਹੀ ਰਹਿ ਜਾਂਦੇ ਹਨ। ਕਾਨੂੰਨ ਦੀ ਇਸ ਢਿੱਲਮੱਠ ਦਾ ਨਤੀਜਾ ਇਹ ਹੋਇਆ ਹੈ ਕਿ ਰੈਪਰ ਹਨੀ ਸਿੰਘ ਖ਼ਿਲਾਫ਼ ਸਖ਼ਤ ਕਾਨੂੰਨੀ ਕਾਰਵਾਈ ਕਰਾਉਣ ਵਿੱਚ ਲੱਗੀ ਪੰਜਾਬ ਰਾਜ ਮਹਿਲਾ ਕਮਿਸ਼ਨ ਦੀ ਚੇਅਰਪਰਸਨ ਸ੍ਰੀਮਤੀ ਮਨੀਸ਼ਾ ਗੁਲਾਟੀ ਨੂੰ ਹਨੀ ਸਿੰਘ ਦੇ ਸਮਰਥਕਾਂ ਵੱਲੋਂ ਧਮਕੀਆਂ ਮਿਲਣ ਲੱਗ ਪਈਆਂ।  ਨਾ ਇਸ ਮਾਮਲੇ ਬਾਰੇ ਕਿਸੇ ਸਿਆਸੀ ਪਾਰਟੀ ਨੇ ਕੋਈ ਆਵਾਜ਼ ਬੁਲੰਦ ਕੀਤੀ ਅਤੇ ਨਾ ਹੀ ਕਿਸੇ ਗੈਂਗਸਟਰ ਜਾਂ ਹੋਰ ਵਿਅਕਤੀ ਨੇ। ਮਨੀਸ਼ਾ ਗੁਲਾਟੀ ਨੂੰ ਮਿਲ ਰਹੀਆਂ ਧਮਕੀਆਂ ਦੀ ਵਿਧਾਇਕ ਸ੍ਰ. ਕੁਲਦੀਪ ਸਿੰਘ ਵੈਦ ਨੇ ਸਖ਼ਤ ਸ਼ਬਦਾਂ ਵਿੱਚ ਖੁੱਲ ਕੇ ਨਿੰਦਾ ਕੀਤੀ ਹੈ।    
ਚੇਅਰਪਰਸਨ ਮਨੀਸ਼ਾ ਗੁਲਾਟੀ ਵੱਲੋਂ ਲਏ ਸਟੈਂਡ ਦੀ ਹਮਾਇਤ ਕਰਦਿਆਂ ਸ੍ਰ. ਵੈਦ ਨੇ ਕਿਹਾ ਕਿ ਰੈਪਰ ਹਨੀ ਸਿੰਘ ਅਤੇ ਉਹਨਾਂ ਸਾਰੇ ਗਾਇਕਾਂ ਅਤੇ ਕਲਾਕਾਰਾਂ ਖ਼ਿਲਾਫ਼ ਸਖ਼ਤ ਕਾਨੂੰਨੀ ਕਾਰਵਾਈ ਹੋਣੀ ਚਾਹੀਦੀ ਹੈ, ਜੋ ਅਸ਼ਲੀਲਤਾ ਨੂੰ ਉਤਸ਼ਾਹਿਤ ਕਰ ਰਹੇ ਹਨ। ਉਸਦੇ ਜੋ ਸਮਰਥਕ ਮਨੀਸ਼ਾ ਗੁਲਾਟੀ ਨੂੰ ਡਰਾ ਧਮਕਾ ਕੇ ਇਸ ਮਸਲੇ ਤੋਂ ਪਿੱਛੇ ਹਟਣ ਲਈ ਮਜ਼ਬੂਰ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ, ਉਹਨਾਂ ਖ਼ਿਲਾਫ਼ ਵੀ ਸਖ਼ਤ ਕਾਨੂੰਨੀ ਕਾਰਵਾਈ ਕੀਤੀ ਜਾਣੀ ਚਾਹੀਦੀ ਹੈ। 
ਸ੍ਰ. ਵੈਦ ਨੇ ਕਿਹਾ ਕਿ ਉਹ ਇਸ ਮਾਮਲੇ ਨੂੰ ਪੰਜਾਬ ਵਿਧਾਨ ਸਭਾ ਵਿੱਚ ਉਠਾਉਣਗੇ ਅਤੇ ਇਸ ਸੰਬੰਧੀ ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨਾਲ ਵੀ ਗੱਲ ਕਰਨਗੇ। ਉਹਨਾਂ ਫ਼ਿਲਮਾਂ ਦੀ ਤਰਾਂ ਗੀਤ ਸੰਗੀਤ ਲਈ ਵੀ ਸੈਂਸਰ ਬੋਰਡ ਦੀ ਸਥਾਪਨਾ ਦੀ ਵਕਾਲਤ ਕੀਤੀ।
ਇਸੇ ਦੌਰਾਨ ਪੰਜਾਬ ਰਾਜ ਮਹਿਲਾ ਕਮਿਸ਼ਨ ਦੀ ਚੇਅਰਪਰਸਨ ਮਨੀਸ਼ਾ ਗੁਲਾਟੀ ਨੇ ਕਿਹਾ ਹੈ ਕਿ ਪੰਜਾਬੀ ਗੀਤਾਂ 'ਚ ਦਿਨੋ-ਦਿਨ ਵੱਧ ਰਹੀਆਂ ਅਸ਼ਲੀਲਤਾ ਨੂੰ ਠੱਲ੍ਹ ਪਾਉਣ ਲਈ ਪੰਜਾਬ ਰਾਜ 'ਚ ਫਿਲਮਾਂ ਵਾਂਗ ਹੀ ਗੀਤਾਂ ਲਈ ਵੀ ਸੈਂਸਰ ਬੋਰਡ ਬਣਾਇਆ ਜਾਵੇ। ਉਕਤ ਪ੍ਰਗਟਾਵਾ ਉਹਨਾਂ ਚੰਡੀਗੜ ਪੱਤਰਕਾਰਾਂ ਨੂੰ ਸੰਬੋਧਨ ਕਰਦਿਆਂ ਕੀਤਾ। 
ਮੈਡਮ ਗੁਲਾਟੀ ਨੇ ਕਿਹਾ ਕਿ ਸਾਡੇ ਸਮਾਜ 'ਚ ਗੀਤ ਸੰਗੀਤ ਦਾ ਅਹਿਮ ਰੋਲ ਹੈ, ਇਹ ਸਾਡੇ ਰਸਮਾਂ ਰਿਵਾਜਾਂ ਦੇ ਹਿੱਸਾ ਹਨ। ਉਨ੍ਹਾਂ ਕਿਹਾ ਕਿ ਹਨੀ ਸਿੰਘ ਵੱਲੋਂ ਗਾਏ ਗਏ ਗੀਤ 'ਮੱਖਣਾਂ' ਇੱਕ ਸ਼ਰਮਨਾਕ ਕਾਰਾ ਹੈ। ਅੱਜਕਲ ਨੌਜਵਾਨ ਪ੍ਰੋਗਰਾਮਾਂ 'ਚ ਵੱਜ ਰਹੇ ਸੰਗੀਤ 'ਤੇ ਜਦੋਂ ਨੱਚ ਰਹੇ ਹੁੰਦੇ ਹਨ ਤਾਂ ਉਹ ਗੀਤ ਦੇ ਬੋਲਾਂ ਵੱਲ ਧਿਆਨ ਨਹੀਂ ਦਿੰਦੇ ਅਤੇ ਇਸ ਗੀਤ ਦੇ ਬੋਲਾਂ ਨੇ ਬੇਸ਼ਰਮੀ ਦੀਆਂ ਸਾਰੀਆਂ ਹੱਦਾਂ ਪਾਰ ਕਰ ਦਿੱਤੀਆਂ ਹਨ ਅਤੇ ਇਸ ਗੀਤ ਦੇ ਬੋਲਾਂ ਰਾਹੀਂ ਮਨੁੱਖ ਨੂੰ ਜਨਮ ਦੇਣ ਵਾਲੀ ਔਰਤ ਪ੍ਰਤੀ ਬਹੁਤ ਹੀ ਗੰਦੀਆਂ ਗੱਲਾਂ ਕਹੀਆਂ ਗਈਆਂ ਹਨ। ਉਨ੍ਹਾਂ ਕਿਹਾ ਕਿ ਇਹ ਮਾਮਲਾ ਬਾਕੀ ਗਾਇਕਾਂ, ਗੀਤਕਾਰਾਂ ਅਤੇ ਪ੍ਰੋਡਿਊਸਰਾਂ ਲਈ ਸਬਕ ਹੋਵੇਗਾ।
ਇਸਦਾ ਹੋਰ ਵੇਰਵਾ ਦੇਂਦਿਆਂ ਮੈਡਮ ਮਨੀਸ਼ਾ ਗੁਲਾਟੀ ਨੇ ਕਿਹਾ ਕਿ ਗਾਇਕਾਂ ਵੱਲੋਂ ਜਲਦ ਪ੍ਰਸਿੱਧ ਹੋਣ ਦੇ ਚੱਕਰ ਵਿੱਚ ਪਰੋਸੇ ਜਾ ਰਹੇ ਗੰਦੇ ਗੀਤਾਂ ਸਬੰਧੀ ਸਮਾਜ ਅਤੇ ਸਰਕਾਰ ਨੂੰ ਗੰਭੀਰ ਹੋਣ ਦੀ ਲੋਡ਼ ਹੈ। ਉਨ੍ਹਾਂ ਕਿਹਾ ਕਿ ਮੁਹਾਲੀ ਪੁਲਿਸ ਵੱਲੋਂ ਹਨੀ ਸਿੰਘ ਵਿਰੁੱਧ ਕਾਨੂੰਨ ਅਨੁਸਾਰ ਮਾਮਲਾ ਦਰਜ ਕਰ ਲਿਆ ਗਿਆ ਹੈ ਅਤੇ ਉਸ ਨੂੰ ਗ੍ਰਿਫਤਾਰ ਕਰਨ ਲਈ ਕੋਸ਼ਿਸ਼ਾਂ ਆਰੰਭ ਕਰ ਦਿੱਤੀਆਂ ਹਨ। ਉਨ੍ਹਾਂ ਕਿਹਾ ਕਿ ਪੰਜਾਬ ਸਰਕਾਰ ਵੱਲੋਂ ਹਮੇਸ਼ਾ ਦੀ ਤਰ੍ਹਾਂ ਇਸ ਮਾਮਲੇ 'ਚ ਵੀ ਕਮਿਸ਼ਨ ਨੂੰ ਪੂਰਾ ਸਹਿਯੋਗ ਦਿੱਤਾ ਜਾ ਰਿਹਾ ਹੈ। ਪੰਜਾਬ ਰਾਜ ਮਹਿਲਾ ਕਮਿਸ਼ਨ ਦੀ ਚੇਅਰਪਰਸਨ ਨੇ ਕਿਹਾ ਕਿ ਕਮਿਸ਼ਨ ਪੰਜਾਬ ਸਰਕਾਰ ਦੇ ਵਕੀਲਾਂ ਰਾਹੀਂ ਹਨੀ ਸਿੰਘ ਵੱਲੋਂ ਇਸ ਮਾਮਲੇ ਸਬੰਧੀ ਲਗਾਈ ਜਾ ਰਹੀ ਬੇਲ ਅਰਜ਼ੀ ਨੂੰ ਖਾਰਜ ਕਰਵਾਉਣ ਲਈ ਵੀ ਪੂਰੀ ਸਰਗਰਮੀ ਨਾਲ ਯਤਨ ਕੀਤਾ ਜਾਵੇਗਾ।
ਉਨ੍ਹਾਂ ਪੰਜਾਬੀ ਦੇ ਮਸ਼ਹੂਰ ਗਾਇਕ ਗੁਰਦਾਸ ਮਾਨ ਨੂੰ ਵੀ ਅਪੀਲ ਕੀਤੀ ਕਿ ਉਹ ਕਮਿਸ਼ਨ ਵੱਲੋਂ ਗੰਦੇ ਗੀਤਾਂ ਵਿਰੁੱਧ ਆਰੰਭੀ ਇਸ ਮੁਹਿੰਮ ਵਿੱਚ ਆਪਣਾ ਸਹਿਯੋਗ ਪਾਉਣ ਅਤੇ ਗਾਇਕਾਂ, ਗੀਤਕਾਰਾਂ ਅਤੇ ਪ੍ਰੋਡਿਊਸਰਾਂ ਨੂੰ ਇਸ ਗੱਲ ਲਈ ਸਹਿਮਤ ਕਰਨ ਕਿ ਉਹ ਭਵਿੱਖ ਵਿੱਚ ਇਸ ਤਰ੍ਹਾਂ ਦਾ ਗਾਣਾ ਨਾ ਬਣਾਉਣ। ਪੰਜਾਬ ਰਾਜ ਮਹਿਲਾ ਕਮਿਸ਼ਨ ਦੀ ਚੇਅਰਪਰਸਨ ਸ੍ਰੀਮਤੀ ਮਨੀਸ਼ਾ ਗੁਲਾਟੀ ਨੇ ਕਿਹਾ ਕਿ ਇਸ ਮਾਮਲੇ ਦੇ ਉਠਣ ਤੋਂ ਬਾਅਦ ਹਨੀ ਸਿੰਘ ਦੇ ਕੁਝ ਪ੍ਰਸ਼ੰਸਕਾਂ ਵੱਲੋਂ ਸੋਸ਼ਲ ਮੀਡੀਆ ਅਤੇ ਫੋਨ ਉੱਤੇ ਧਮਕੀਆਂ ਦਿੱਤੀਆਂ ਜਾ ਰਹੀਆਂ ਹਨ ਅਤੇ ਗਾਲਾਂ ਕੱਢੀਆਂ ਜਾ ਰਹੀਆਂ ਜਿਸ ਬਾਰੇ ਮੈਂ ਪੰਜਾਬ ਪੁਲਿਸ ਨੂੰ ਸੂਚਿਤ ਕਰ ਦਿੱਤਾ ਹੈ। ਉਨ੍ਹਾਂ ਇਹ ਵੀ ਕਿਹਾ ਕਿ ਮੈਂ ਅਜਿਹੀਆਂ ਧਮਕੀਆਂ ਤੋ ਡਰਨ ਵਾਲੀ ਨਹੀਂ ਹਾਂ।
ਹੁਣ ਦੇਖਣਾ ਹੈ ਕਿ ਇਸ ਮਾਮਲੇ 'ਤੇ ਸਮਾਜ ਦੇ ਕਿੰਨੇ ਕੁ ਸੰਗਠਨ ਖੁੱਲ ਕੇ ਮੈਡਮ ਮਨੀਸ਼ਾ ਗੁਲਾਟੀ ਦੇ ਹੱਕ ਵਿੱਚ ਆਉਂਦੇ ਹਨ। ਵਿਦਿਆਰਥੀਆਂ,ਅਧਿਆਪਕਾਂ ਅਤੇ ਇਸਤਰੀਆਂ ਦੇ ਸੰਗਠਨਾਂ ਨਨ ਤਾਂ ਖੁੱਲ ਕੇ ਅੱਗੇ ਆਉਣਾ ਚਾਹੀਦਾ ਹੈ। 

Tuesday, July 09, 2019

ਲੈਨਿਨ 'ਤੇ ਤਿਆਰ ਪਹਿਲਾ ਪੰਜਾਬੀ ਗੀਤ ਹੋ ਰਿਹੈ 10 ਜੁਲਾਈ ਨੂੰ ਰਿਲੀਜ਼

ਗਾਇਆ ਹੈ ਅੰਗਰੇਜ਼ ਸਿੰਘ ਨੇ ਅਤੇ ਲਿਖਿਆ ਹੈ ਅਜੀਤ ਸਿੰਘ ਨੇ
ਲੁਧਿਆਣਾ: 9 ਜੁਲਾਈ 2019: (ਕਾਰਤਿਕਾ ਸਿੰਘ//ਪੰਜਾਬ ਸਕਰੀਨ)::
ਲੈਨਿਨ ਬਾਰੇ ਬਹੁਤ ਕੁਝ ਲਿਖਿਆ ਗਿਆ ਹੈ ਬਹੁਤ ਕੁਝ ਕਿਹਾ ਗਿਆ ਹੈ ਪਰ ਪੰਜਾਬੀ ਵਿੱਚ ਉਹ ਸ਼ਾਇਦ ਬਹੁਤ ਹੀ ਘੱਟ ਹੈ। ਗੀਤ ਸੰਗੀਤ ਦੀ ਦੁਨੀਆ ਦੇ ਖੇਤਰ ਵਿੱਚ ਤਾਂ ਸਾਡੀ ਇਹ ਪ੍ਰਾਪਤੀ ਸ਼ਾਇਦ ਬਹੁਤ ਹੀ ਨਿਗੂਣੀ ਜਿਹੀ ਹੋਵੇ। ਹੁਣ ਇੱਕ ਪੰਜਾਬੀ ਗੀਤ ਤਿਆਰ ਹੋਇਆ ਲੈਨਿਨ ਬਾਰੇ ਵਿਸ਼ੇਸ਼ ਤੌਰ 'ਤੇ। ਸੋਸ਼ਲ ਮੀਡੀਆ ਤੇ ਚਰਚਿਤ ਗੀਤ "ਲੈਨਿਨ" ਦੀ ਪ੍ਰੋਮੋਸ਼ਨ ਲਈ ਖੰਨਾ ਦੇ ਵਸਨੀਕ ਪ੍ਰੋ: ਪਾਸ਼ ਔਜਲਾ ਵੱਖ ਵੱਖ ਸ਼ਹਿਰਾਂ 'ਚ ਜਾ ਕੇ ਗੀਤ "ਲੈਨਿਨ" ਤੇ ਆਧਾਰਿਤ ਗੀਤ ਤੋਂ ਜਾਣੂ ਕਰਵਾ ਰਹੇ ਹਨ। ਜੋ ਕਿ 10 ਜੁਲਾਈ ਨੂੰ ਵਿਸ਼ਵ ਪੱਧਰ ਤੇ ਕਾਰਤੂਸ ਪ੍ਰੋਡਕਸ਼ਨ ਯੂਟਿਊਬ ਚੈਨਲ ਤੇ ਰਿਲੀਜ਼ ਹੋਵੇਗਾ। ਇਸ ਗੀਤ ਨੂੰ ਗਾਇਆ ਹੈ ਅੰਗਰੇਜ਼ ਸਿੰਘ ਨੇ ਅਤੇ ਲਿਖਿਆ ਹੈ ਅਜੀਤ ਸਿੰਘ ਗੋਬਿੰਦਗੜੀਆ ਨੇ। ਇਹ ਪੰਜਾਬੀ ਦਾ ਪਹਿਲਾ ਗੀਤ ਹੈ ਜੋ ਲੈਨਿਨ ਦੀ ਜੀਵਨੀ ਤੇ ਸਿਧਾਂਤ ਪੇਸ ਕਰੇਗਾ। ਉਮੀਦ ਕਰਨੀ ਬਣਦੀ ਹੈ ਕਿ ਲੈਨਿਨ ਬਾਰੇ ਇਹ ਸੰਗੀਤਕ ਉਪਰਾਲਾ ਇੱਕ ਸ਼ਾਹਕਾਰ ਸਾਬਿਤ ਹੋਵੇਗਾ।
ਇਸ ਗੀਤ ਦੀ ਤਿਆਰੀ ਪਿੱਛੇ ਜਿੱਥੇ ਲੈਨਿਨ ਦੇ ਫਲਸਫੇ ਨਾਲ ਜਜ਼ਬਾਤੀ ਸਾਂਝ ਵਾਲਾ ਨੁਕਤਾ ਕੰਮ ਕਰਦਾ ਨਜ਼ਰ ਆਉਂਦਾ ਹੈ ਉੱਥੇ ਅੱਜ ਦੇ ਸਮਿਆਂ ਵਿੱਚ ਲੈਨਿਨ ਦੀ ਪ੍ਰਸੰਗਕਤਾ ਵਧਣ
ਵਾਲਾ ਨੁਕਤਾ ਵੀ ਪੂਰੀ ਤਰਾਂ ਕੰਮ ਕਰਦਾ ਮਹਿਸੂਸ ਹੁੰਦਾ ਹੈ। ਅੱਜ ਜਦੋਂ ਖੱਬੀਆਂ ਪਾਰਟੀਆਂ ਇੱਕ ਵਾਰ ਹਾਸ਼ੀਏ ਤੇ ਆਈਆਂ ਲੱਗਦੀਆਂ ਹਨ ਅਤੇ ਆਮ ਲੋਕਾਂ ਦੇ ਨਾਲ ਨਾਲ ਖੱਬੀ ਸੋਚ ਵਿੱਚ ਸਾਰੀ ਸਾਰੀ ਉਮਰ ਸਮਾਜਵਾਦੀ ਫਲਸਫੇ ਨਾਲ ਲੰਘਾਉਣ ਵਾਲਿਆਂ ਵਿੱਚੋਂ ਵੀ ਕਈਆਂ ਨੂੰ ਪੂੰਜੀਵਾਦੀ ਸਿਸਟਮ ਵਾਲੀਆਂ ਪਾਰਟੀਆਂ ਨੇ ਆਪਣੇ ਮਾਇਆ ਜਾਲ ਵਿੱਚ ਮੋਹ ਲਿਆ ਹੈ।ਇਹ ਸਭ ਦੇਖ ਕੇ ਲੱਗਦਾ ਕਿ ਸ਼ਾਇਦ ਖੱਬੀ ਲਹਿਰ ਹੁਣ ਖਤਮ ਹੋਣ ਦੇ ਕਿਨਾਰੇ ਹੈ। ਅਜਿਹੀ ਉਦਾਸ ਸੋਚ ਵਿੱਚ ਵੀ ਲੈਨਿਨਵਾਦ ਭਰੋਸਾ ਦੁਆਉਂਦਾ ਹੈ ਕਿ ਅਸਲ ਵਿੱਚ ਜੋ ਕੁਝ ਵੀ ਵਾਪਰ ਰਿਹਾ ਹੈ ਉਹ ਮਾਰਕਸਵਾਦ-ਲੈਨਿਨਵਾਦ ਦੇ ਫਲਸਫੇ ਮੁਤਾਬਿਕ ਹੀ ਵਾਪਰ ਰਿਹਾ ਹੈ। ਹੋ ਸਕਦਾ ਹੈ ਪਾਰਟੀਆਂ ਫੇਲ੍ਹ ਹੋਈਆਂ ਹਨ ਪਰ ਫਲਸਫਾ ਅਜੇ ਵੀ ਮਜ਼ਬੂਤ ਹੈ।ਖੱਬੀਆਂ ਧਿਰਾਂ ਦੀ ਚੜ੍ਹਤ ਅਤੇ ਅਮਲ ਵਿੱਚ ਜਿਹੜਾ "ਨਿਘਾਰ" ਫਿਲਹਾਲ ਆਇਆ ਲੱਗਦਾ ਹੈ ਉਹ ਅਸਲ ਵਿੱਚ ਉਸ ਚਮਕ ਕਾਰਨ ਹੀ ਹੈ ਜਿਹੜੀ ਚਮਕ ਦੀਵੇ ਦੇ ਬੁਝਣ ਵੇਲੇ ਬੜੀ ਤੇਜ਼ੀ ਨਾਲ ਆਪਣੀ ਚਮਕ ਦਿਖਾਉਂਦੀ ਹੈ ਕਿਓਂਕਿ ਪੂੰਜੀਵਾਦ ਦਾ ਚਿਰਾਗ ਵੀ ਬਸ ਬੁਝਣ ਹੀ ਵਾਲਾ ਹੈ। ਲੋਕਾਂ ਦੀ ਖਰੀਦ ਸ਼ਕਤੀ ਮੁੱਕ ਰਹੀ ਹੈ। ਪੂੰਜਵਾਦੀਆਂ ਦੇ ਆਪਸੀ ਟਕਰਾਓ ਵੀ ਵੱਧ ਰਹੇ ਹਨ। ਆਮ ਲੋਕਾਂ ਦੀ ਸਹਿਣਸ਼ਕਤੀ ਵੀ ਬਸ ਜੁਆਬ ਦੇਣ ਵਾਲੀ ਹੈ। ਇੰਨਕਲਾਬ ਦੀ ਦਸਤਕ ਨੂੰ ਸੁਣੋ। ਉਹ ਬਹੁਤ ਨੇੜੇ ਹੈ। ਲੋਕ ਬਹੁਤ ਜਲਦੀ ਉੱਠ ਖੜੋਣਗੇ ਅਤੇ ਆਪਣੇ ਲੀਡਰਾਂ ਨੂੰ ਦੱਸ ਦੇਣਗੇ ਕਿ ਸਾਨੂੰ ਲੈਨਿਨ ਵਰਗੇ ਲੀਡਰ ਚਾਹੀਦੇ ਹਨ। ਜੇ ਤੁਸੀਂ ਉਸਦੇ ਰਾਹਾਂ 'ਤੇ ਨਹੀਂ ਚੱਲ ਸਕਦੇ ਤਾਂ ਲਾਂਭੇ ਹੋ ਜਾਓ। ਰਸਤਾ ਖਾਲੀ ਕਰ ਦਿਓ। ਇਨਕਲਾਬ ਨੂੰ ਹੁਣ ਨਾ ਤਾਂ ਕੋਈ ਪੂੰਜੀਵਾਦੀ ਸ਼ਕਤੀ ਰੋਕ ਸਕੇਗੀ ਅਤੇ ਨਾ ਹੀ ਇਸਦੇ ਹੋਰ ਦੁਸ਼ਮਣ। ਉਹ ਆ ਕੇ ਹੀ ਰਹੇਗਾ। ਉੱਠੋ ਉਸਦੀ ਸੁਰ ਨਾਲ ਸੁਰ ਮਿਲਾਓ। ਜਿਥੋਂ ਤੱਕ ਖੱਬੀ ਲਹਿਰ ਵਿੱਚ ਆਈਆਂ ਕਮਜ਼ੋਰੀਆਂ ਅਤੇ ਕਮੀਆਂ ਦੀ ਗੱਲ ਹੈ ਉਸ ਬਾਰੇ ਜਨਾਬ ਕੈਫ਼ੀ ਆਜ਼ਮੀ ਸਾਹਿਬ ਨੇ ਬਹੁਤ ਪਹਿਲਾ ਹੀ ਬੜੇ ਦਰਦ ਨਾਲ ਲੈਨਿਨ ਨੂੰ ਹੀ ਸੰਬੋਧਨ ਕਰਦਿਆਂ ਆਖਿਆ ਸੀ:
ਹਾਦਸਾ ਕਿਤਨਾ ਕੜਾ ਹੈ ਕਿ ਸਰ-ਏ-ਮੰਜ਼ਿਲੇ ਸ਼ੋਂਕ,
ਕਾਫ਼ਿਲਾ ਚੰਦ ਗਿਰੋਹੋਂ ਮੈਂ ਬੰਟਾ ਜਾਤਾ ਹੈ;
ਏਕ ਪੱਥਰ ਸੇ ਤਰਾਸ਼ੀ ਥੀ ਜੋ ਤੁਮਨੇ ਦੀਵਾਰ,
ਇੱਕ ਖਤਰਨਾਕ ਸ਼ਿਗਾਫ ਉਸਮੇਂ ਨਜ਼ਰ ਆਤਾ ਹੈ।
ਲੀਡਰਸ਼ਿਪ ਵੱਲ ਇਸ਼ਾਰਾ ਕਰਦਿਆਂ ਕੈਫ਼ੀ ਸਾਹਿਬ ਨੇ ਬੜੇ ਸਪਸ਼ਟ ਸ਼ਬਦਾਂ ਵਿੱਚ ਆਖਿਆ ਸੀ:
ਰੂਹੇਂ ਆਵਾਰਾ ਹੈਂ ਦੇ ਦੋ ਇਨ੍ਹੇਂ ਪੈਕਰ ਅਪਨਾ,
ਭਰ ਦੋ ਹਰ ਪਾਰਾ-ਏ-ਫੌਲਾਦ ਮੈਂ ਜੌਹਰ ਅਪਨਾ,
ਰਹਿਨੁਮਾ ਫਿਰਤੇ ਹੈਂ ਯਾ ਫਿਰਤੀ ਹੈਂ ਬੇਸਰ ਲਾਸ਼ੇਂ ?
ਰੱਖ ਦੋ ਹਰ ਅਕੜੀ ਹੁਈ ਲਾਸ਼ ਪੇ ਤੁਮ ਸਰ ਅਪਨਾ। 
ਅਜਿਹੇ ਹਾਲਾਤ ਵਿੱਚ ਲੈਨਿਨ ਬਾਰੇ ਗੀਤ ਦਾ ਲਿਖਿਆ ਜਾਣਾ ਅਤੇ ਉਸਨੂੰ ਸੰਗੀਤਕ ਅੰਦਾਜ਼ ਵਿੱਚ ਲਿਆਂਦਾ ਜਾਣਾ ਇੱਕ ਸੰਕੇਤ ਹੈ ਕਿ ਆਮ ਲੋਕਾਂ ਦੇ ਦਿਲਾਂ ਵਿੱਚ ਬੈਠੇ ਲੈਨਿਨ ਨੇ ਕੈਫ਼ੀ ਸਾਹਿਬ ਦੀ ਦਰਦ ਭਰੀ ਆਵਾਜ਼ ਸੁਣ ਲਈ ਹੈ। ਲੀਡਰ ਭਾਵੇਂ ਭੁੱਲ ਜਾਣ ਪਰ ਆਮ ਲੋਕ ਅਤੇ ਖੱਬਾ ਕੇਡਰ ਲੈਨਿਨ ਨੂੰ ਨਹੀਂ ਭੁੱਲੇਗਾ। 

Sunday, September 18, 2016

ਮਨਜੀਤ ਇੰਦਰਾ ਨੂੰ ਦੇਖਦਿਆਂ-ਸੁਣਦਿਆਂ

ਸ਼ੋਹਰਤਾਂ ਦੇ ਖੰਭੀ ਚੜ੍ਹ ਉੱਚਾ ਨਹੀਂਓ ਹੋਈਦਾ,
ਪੁੰਨਿਆਂ ਦੀ ਰਾਤ ਬਾਅਦ ਨ੍ਹੇਰਿਆਂ ਨੂੰ ਢੋਈ ਦਾ । 
ਜ਼ਿੰਦਗੀ ਹਰ ਕਦਮ ਇੱਕ ਨਈ ਜੰਗ ਹੈ----
ਗੀਤ ਬੜਾ ਪੁਰਾਣਾ ਹੈ ਪਰ ਅਕਸਰ ਯਾਦ ਆ ਜਾਂਦਾ ਹੈ। ਇਸ ਜੰਗ ਦੌਰਾਨ ਸਾਥ ਛੱਡਣ ਵਾਲਿਆਂ ਦੇ ਕਿੱਸੇ ਜ਼ਿਆਦਾ ਮਿਲਦੇ ਹਨ। ਪਤਾ ਨਹੀਂ ਸ਼ੀਸ਼ਾ ਜਾਂ ਕੱਚ ਟੁੱਟਣਾ ਇੱਕ ਵਹਿਮ ਹੀ ਹੋਵੇ---ਪਰ ਜਦੋਂ ਵੀ ਕਦੇ ਗਲਾਸ ਜਾਂ ਕੁਝ ਅਜਿਹਾ ਹੀ ਹੋਰ ਟੁੱਟਦਾ ਹੈ---ਭਾਵੇਂ ਕਿਸੇ ਹੋਰ ਕੋਲੋਂ ਹੀ ਟੁੱਟੇ.......ਉਦੋਂ ਸ਼ੱਕ ਹੋਣ ਲੱਗਦਾ ਹੈ ਕਿ ਹੁਣ ਨਵਾਂ ਧੋਖਾ ਕਿਸ ਕੋਲੋਂ ਮਿਲਣ ਵਾਲਾ ਹੈ?   ਕਈ ਨਾਮ ਜ਼ਹਿਨ  ਵਿੱਚ ਆਉਣ ਲੱਗਦੇ ਹਨ---ਖੁਦ ਤੇ ਗੁੱਸਾ ਆਉਂਦਾ ਹੈ---ਏਨਾ ਨੈਗੇਟਿਵ ਕਿਓਂ ਸੋਚਿਆ ਭਲਾ? ਪਰ ਅਕਸਰ ਕੁਝ ਕੁ ਚਿਰ ਮਗਰੋਂ ਹੀ---ਬਹੁਤ ਹੀ ਛੇਤੀ---ਕਿਸੇ ਨ ਕਿਸੇ ਦੇ ਵਿਸ਼ਵਾਸ ਵਾਲਾ ਸ਼ੀਸ਼ਾ ਤੜਕ ਜਾਂਦਾ ਹੈ ਉਦੋਂ ਦੂਸਰਾ ਗੀਤ ਯਾਦ ਆਉਂਦਾ ਹੈ--
ਯੇਹ ਦੁਨੀਆ ਅਗਰ ਮਿਲ ਭੀ ਜਾਏ ਤੋਂ ਕਿਆ ਹੈ...!
-ਉਦੋਂ ਉਹ ਟੁਟਿਆ ਕੱਚ ਬੜੀ ਬੁਰੀ ਤਰਾਂ ਖੁੱਭਦਾ ਹੈ। ਬਾਹਰ ਕੋਈ ਜ਼ਖਮ ਨਹੀਂ ਪਰ ਅੰਦਰ ਖੂਨ ਦਾ ਰਿਸਣਾ ਮਹਿਸੂਸ ਹੁੰਦਾ। 
---ਤੇ ਫਿਰ ਅਚਾਨਕ ਹੀ ਸਭ ਕੁਝ ਸੁਭਾਵਕ ਲੱਗਣ ਲੱਗਦਾ ਹੈ---ਮਹਿਸੂਸ ਹੁੰਦਾ ਹੈ---ਇਹ ਤਾਂ ਹੋਣਾ ਹੀ ਸੀ। ਵਿਸ਼ਵਾਸ ਕਰਨਾ ਸਾਡੀ ਗਲਤੀ ਸੀ----ਤੋੜਨ ਵਾਲੇ ਨੇ ਤਾਂ ਤੋੜਨਾ ਹੀ ਸੀ। ਇੱਕ ਮੁਸਕਰਾਹਟ ਚਿਹਰੇ ਤੇ ਉਭਰ ਆਉਂਦੀ ਹੈ। ਧੋਖਾ ਖਾਣਾ ਬੜੀ ਬਹਾਦਰੀ ਲੱਗਣ ਲੱਗਦਾ ਹੈ। 
ਇਹ ਸਭ ਕੁਝ ਉਦੋਂ ਬੜੀ ਸ਼ਿੱਦਤ ਨਾਲ ਯਾਦ ਆਇਆ ਜਦੋਂ ਮਨਜੀਤ ਇੰਦਰਾ ਨੂੰ ਆਹਮੋ ਸਾਹਮਣੇ ਰਿਕਾਰਡਿੰਗ ਕਰਦਿਆਂ ਤਰੰਨੁਮ ਵਿੱਚ ਗਾਉਂਦਿਆਂ ਸੁਣਿਆ...
ਪਤਾ ਹੁੰਦਾ ਸਾਡੇ ਨਾਲ ਹੋਣੀਆਂ ਨਿਰਾਲੀਆਂ,
ਕੱਚਿਆਂ ਕਚੂਰਾਂ ਸੰਗ ਪਾਉਂਦੇ ਨਾ ਭਿਆਲੀਆਂ। 
ਮਨ ਹੋਰ-ਮੁਖ ਹੋਰ,-ਕਾਹਦੀਆਂ ਹੈਰਾਨੀਆਂ,
ਕੱਚ ਦੀਆਂ ਵੰਗਾਂ ਜਿਹੜਾ ਦੇ ਗਿਆ ਨਿਸ਼ਾਨੀਆਂ। 
ਲਓ ਤੁਸੀਂ ਵੀ ਦੇਖੋ ਅਤੇ ਸੁਣੋ ਇਹ ਰਚਨਾ ਅਤੇ ਹੋਂਸਲਾ ਦਿਓ ਆਪਣੇ ਆਪ ਨੂੰ-----ਵੀਡੀਓ 'ਤੇ ਕਲਿੱਕ ਕਰੋ 
ਗੈਰਾਂ ਦਿਆਂ ਮੋਢਿਆਂ ਦਾ ਆਸਰਾ ਨਾ ਲੋੜੀਏ,
ਆਪਣੇ ਭਰੋਸੇ ਵਿੱਚ ਕਾਂਜੀ ਕਾਹਨੂੰ ਘੋਲੀਏ। 
ਇਸ ਰਚਨਾ ਬਾਰੇ, ਇਸ ਆਵਾਜ਼ ਬਾਰੇ, ਇਸ  ਤਰੰਨੁਮ ਬਾਰੇ ਤੁਹਾਡੇ ਵਿਚਾਰਾਂ ਦੀ ਉਡੀਕ ਰਹੇਗੀ ਹੀ। --ਰੈਕਟਰ ਕਥੂਰੀਆ 

Thursday, March 19, 2015

PAU ਵਿੱਚ "ਸਲਾਮ-ਏ-ਜਜ਼ਬਾ" ਰਿਹਾ ਸ਼ਾਨਦਾਰ ਆਯੋਜਨ

ਅਠ ਥੈਲਾਸੀਮਿਕ ਬੱਚਿਆਂ ਨੂੰ ਅਡਾਪਟ ਕਰਨ ਦੇ ਨਾਲ ਦਿੱਤੇ ਸ਼ਾਨਦਾਰ ਸੁਨੇਹੇ
ਲੁਧਿਆਣਾ: 19 ਮਾਰਚ 2015: (ਰੈਕਟਰ ਕਥੂਰੀਆ//ਪੰਜਾਬ ਸਕਰੀਨ):
ਕਲ੍ਹ ਸ਼ਾਮ ਪੀਏਯੂ ਦੇ ਪਾਲ ਆਡੀਟੋਰੀਅਮ ਵਿੱਚ ਇੱਕ ਹੋਰ ਸ਼ਾਨਦਾਰ ਪ੍ਰੋਗਰਾਮ  ਦੇਖਣ ਦਾ ਮੌਕਾ ਮਿਲਿਆ।  ਨਾ ਕੋਈ ਸ਼ੋਸ਼ੇਬਾਜ਼ੀ ਅਤੇ ਨਾ ਹੀ ਕੋਈ ਹੋਰ ਫਾਲਤੂ ਦਾ ਤਾਮਝਾਮ।  ਪ੍ਰੋਗਰਾਮ ਬੜੇ ਹੀ ਅਪਣਤ ਵਾਲੇ ਮਾਹੌਲ ਵਿੱਚ ਚੱਲ ਰਿਹਾ ਸੀ ਜਿਵੇਂ ਇੱਕੋ ਪਰਿਵਾਰ ਦੇ ਲੋਕ ਕਿਸੇ ਵੱਡੇ ਹਾਲ ਵਿੱਚ ਬੈਠੇ ਅੰਤਾਕਸ਼ਰੀ ਵਰਗਾ ਕੋਈ ਮੁਕਾਬਲਾ ਖੇਡ ਰਹੇ ਹੋਣ। ਅਠ ਥੈਲਾਸੀਮਿਕ ਬੱਚਿਆਂ ਨੂੰ ਅਡਾਪਟ ਕਰਨ ਵਾਲੀ "ਸੋਸ਼ਲ ਵਰਕਰਜ਼ ਐਸੋਸੀਏਸ਼ਨ" ਵੱਲੋਂ ਆਯੋਜਿਤ ਇਸ "ਸਲਾਮ-ਏ-ਜਜ਼ਬਾ" ਨਾਮ ਦੇ ਸਮਾਗਮ ਵਿੱਚ ਨਸ਼ਿਆਂ ਦੇ ਖਿਲਾਫ਼ ਜ਼ੋਰਦਾਰ ਸੰਦੇਸ਼ ਦਿੱਤਾ ਗਿਆ। "ਨਸ਼ਿਆਂ ਨੂੰ ਨਥ  ਪਾ ਲੋ ਹਾਕਮੋਂ--ਨਹੀਂ ਤਾਂ ਲਭਣੇ ਨੀ ਸੂਰਮੇ ਪੰਜਾਬ ਚੋਂ" ਇੱਕ ਸੰਗੀਤ ਨਾਟਕ ਸੀ। ਦਿਲ ਨੂੰ ਧੂਹ ਪਾਉਂਦਾ ਸੀ। ਪੇਸ਼ਕਾਰੀ ਦੀਆਂ ਕੁਝ ਕਮੀਆਂ ਦੇ ਬਾਵਜੂਦ ਬੜਾ ਪ੍ਰਭਾਵਸ਼ਾਲੀ ਸੀ।

"ਬਾਵਾ  ਮਿੱਟੀ ਦਾ ਬਣਾਉਣੀ ਆਂ" ਇੱਕ ਯਾਦਗਾਰੀ ਗੀਤ ਸੀ ਜਿਸ ਨੂੰ ਸਵਿਤਾ ਭੱਲਾ ਨੇ ਬੜੇ ਹੀ ਸ਼ਾਨਦਾਰ ਅੰਦਾਜ਼ ਨਾਲ ਪੇਸ਼ ਕੀਤਾ।
ਇਸੇ ਤਰਾਂ ਇੱਕ ਹੋਰ ਕਲਾਕਾਰਾ ਨੇ ਸ਼ਾਨਦਾਰ ਡਾਂਸ ਗੀਤ ਪੇਸ਼ ਕੀਤਾ--ਬਣ ਮੋਰਨੀ ਬਾਗਾਂ ਦੇ ਵਿੱਚ ਨਚਾਂ ਤੂੰ ਪੈਲਾਂ ਪਾਉਂਦਾ ਆ ਜਾ ਮਿੱਤਰਾ...."  
ਰਵਿੰਦਰ ਬਰਾੜ ਨੇ ਬਿਨਾ ਕਿਸੇ ਸਾਜ਼ ਦੇ ਆਪਣੇ ਗੀਤਾ ਨਾਲ ਚੰਗਾ ਰੰਗ ਬੰਨਿਆ। "ਸਿਰ 'ਤੇ ਚੜ੍ਹ ਗਿਆ ਕਰਜ਼ਾ  ਜੱਟ ਨੂੰ ਵਢ ਵਢ  ਖਾਂਦਾ। ਇੱਕ ਬਹੁਤ ਹੀ ਅਰਥਪੂਰਨ ਗੀਤ ਸੀ ਜੋ ਅੱਜ ਦੀ ਕਿਸਾਨੀ ਦੇ ਭਿਆਨਕ ਹਾਲਾਤ ਨੂੰ ਦਰਸਾ ਰਿਹਾ ਸੀ।

ਅੱਜ ਦੀਆਂ ਮੋਹੱਬਤਾਂ ਅਤੇ ਸੰਬੰਧਾਂ ਤੇ ਚੋਟ ਦਿਲ ਹਲੂਣਵੀ ਚੋਟ ਕਰਦਿਆਂ ਰਵਿੰਦਰ ਬਰਾੜ ਨੇ ਆਪਣੇ ਦੂਜੇ ਗੀਤ ਵਿੱਚ ਅੱਜ ਦੀ ਪੀੜ੍ਹੀ ਨੂੰ ਬਹੁਤ ਹੀ ਸਾਰਥਕ ਸੁਨੇਹਾ ਦਿੱਤਾ। "ਕਿਤੇ  ਤੂੰ ਵੀ ਕੱਲਾ ਸੋਚੀਂ ਵੇ--ਮੈਂ ਕੀ ਕੀ ਜਰਿਆ ਤੇਰੇ ਲਈ.." ਵਾਲੇ ਗੀਤ ਵਿੱਚ ਵਿੱਚ ਉਹ ਆਖਦਾ ਹੈ--ਪਹਿਲਾਂ ਪੀਤੀ ਤੇ ਫਿਰ ਤੋੜ ਦਿੱਤੀ-ਤੇਰੇ ਪਿਆਰ ਗਲਾਸੀ ਵਾਲੇ ਨੇ..... "ਤੂੰ ਜਿੱਤਣ ਦੀ ਗੱਲ ਕਰਦਾ ਏਂ-- ਮੈਂ ਕੀ ਨੀ ਹਰਿਆ ਤੇਰੇ ਲਈ..." ਕੁਲ ਮਿਲਾ ਕੇ ਬੜੀ ਹੀ ਸਾਰਥਕ ਸੀ।

ਅਸੀਂ ਇਸ ਬਾਰੇ ਗੁਰਸ਼ਮਿੰਦਰ ਸਿੰਘ ਨਾਲ ਵੀ ਗੱਲ ਕੀਤੀ। ਉਹਨਾਂ ਇਸ ਸੰਸਥਾ ਅਤੇ ਇਸਦੇ ਇਸ ਪ੍ਰੋਗਰਾਮ  ਬਾਰੇ ਬੜੇ ਹੀ ਸੰਖੇਪ ਸ਼ਬਦਾਂ ਵਿੱਚ ਦੱਸਿਆ।

ਏਸੇ  ਤਰ੍ਹਾਂ ਸਵਿਤਾ ਭੱਲਾ ਨੇ ਵੀ ਇਸ ਸਾਰੇ ਆਯੋਜਨ ਬਾਰੇ ਥੋਹੜੇ ਜਹੇ ਸ਼ਬਦਾਂ ਵਿੱਚ ਦੱਸਿਆ।

Monday, December 02, 2013

ਉਭਰਦੇ ਗਾਇਕਾਂ ਨੇ ਛੇੜੀਆਂ ਸੰਗੀਤਕ ਸੁਰਾਂ

ਇਸ਼ਮੀਤ ਸੰਗੀਤ ਅਕਾਦਮੀ ਵੱਲੋਂ ਸੰਗੀਤਕ ਸ਼ਾਮ ਦਾ ਆਯੋਜਨ
ਲੁਧਿਆਣਾ, 1 ਦਸੰਬਰ 2013: (ਰੈਕਟਰ ਕਥੂਰੀਆ//ਪੰਜਾਬ ਸਕਰੀਨ): ਜ਼ਿਲ੍ਹਾ ਪ੍ਰਸਾਸ਼ਨ ਦੇ ਵਿਸ਼ੇਸ਼ ਉਪਰਾਲੇ ਸਦਕਾ ਇਸ਼ਮੀਤ ਸੰਗੀਤਕ ਅਕਾਦਮੀ, ਲੁਧਿਆਣਾ ਵੱਲੋਂ ਸ਼ੁਰੂ ਕੀਤੀ ਗਈ ਸੰਗੀਤਕ ਸ਼ਾਮਾਂ ਦੀ ਲੜੀ ਤਹਿਤ ਅੱਜ ਸਥਾਨਕ ਨਹਿਰੂ ਰੋਜ਼ ਗਾਰਡਨ ਵਿਖੇ ਸੰਗੀਤਕ ਸ਼ਾਮ ਦਾ ਆਯੋਜਨ ਕੀਤਾ ਗਿਆ, ਜਿਸ ਵਿੱਚ ਨਵੇਂਂ ਉਭਰਦੇ ਗਾਇਕ ਤੇ ਗਾਇਕਾਵਾਂ ਨੇ ਸੰਗੀਤ ਦੀਆਂ ਸੁਰਾਂ ਛੇੜ ਕੇ ਭਾਰਤੀ ਸੰਗੀਤ ਦੇ ਅਮੀਰ ਭਵਿੱਖ ਦੇ ਦਰਸ਼ਨ ਕਰਵਾ ਦਿੱਤੇ।
ਅਕਾਦਮੀ ਦੇ ਡਾਇਰੈਕਟਰ ਅਤੇ ਸੰਗੀਤ ਨੂੰ ਪਿਆਰ ਕਰਨ ਵਾਲੇ ਸ੍ਰ. ਚਰਨ ਕਮਲ ਸਿੰਘ ਦੀ ਰਹਿਨੁਮਾਈ ਹੇਠ ਕਰਵਾਈ ਗਈ ਇਸ ਸੰਗੀਤਕ ਸ਼ਾਮ ਦੀ ਸ਼ੁਰੂਆਤ ਉਭਰਦੇ ਗਾਇਕ ਸਤਵਿੰਦਰ ਸਿੰਘ ਨੇ ਪ੍ਰਸਿੱਧ ਫਿਲਮੀ ਗੀਤ ''ਮੈਂ ਸ਼ਾਇਰ ਤੋ ਨਹੀਂ'' ਨਾਲ ਕੀਤੀ, ਜਿਸ ਨੂੰ ਉਥੇ ਮੌਜੂਦ ਦਰਸ਼ਕਾਂ ਭਰਪੂਰ ਸਰਾਹਿਆ। ਸਤਵਿੰਦਰ ਨੇ ਆਪਣਾ ਦੂਜਾ ਗੀਤ ''ਰੋਤੇ ਹੁਏ ਆਤੇ ਹੈਂ ਸਭ'' ਗਾ ਕੇ ਸਾਰਿਆਂ ਨੂੰ ਜ਼ਿੰਦਗੀ ਨੂੰ ਹੌਂਸਲੇ ਨਾਲ ਜੀਣ ਦਾ ਸੰਦੇਸ਼ ਦਿੱਤਾ। ਇਸ ਤੋਂ ਬਾਅਦ ਗਾਇਕਾ ਨਿਧੀ ਭੱਟ ਨੇ ''ਦਿਲ ਤੋਂ ਪਾਗਲ ਹੈ'' ਨਾਲ ਅਤੇ ਸ਼ਿਵਮ ਨਾਲ ਰਲ ਕੇ ''ਸੂਰਜ ਹੁਆ ਮੱਧਮ'' ਨਾਲ ਭਰਪੂਰ ਹਾਜ਼ਰੀ ਲਗਵਾਈ। ਸ਼ਿਵਮ ਨੇ ਇਕੱਲਿਆਂ ਦੋ ਗੀਤ ''ਅਬ ਮੁਝੇ ਰਾਤ ਦਿਨ'' ਅਤੇ ''ਅਭੀ ਅਭੀ ਤੋ ਮਿਲੇ ਹੋ'' ਨਾਲ ਹਾਜ਼ਰੀ ਲਗਵਾਈ। ਇਸ ਤੋਂ ਇਲਾਵਾ ਗਾਇਕ ਵਿਕਾਸ ਸ਼ਰਮਾ ਨੇ ''ਤੁਮ ਹੀ ਹੋ'' ਨਾਲ ਅਤੇ ਗੁਰਲੀਨ ਨੇ ''ਆਓ ਨਾ'' ਅਤੇ ''ਇੱਕ ਤਾਰਾ'' ਨਾਲ ਦਰਸ਼ਕਾਂ ਦਾ ਚੰਗਾ ਸਮਾਂ ਬੰਨ੍ਹਿਆ।
ਸੰਗੀਤਕ ਸ਼ਾਮ ਦਾ ਆਨੰਦ ਮਾਣਨ ਲਈ ਇਕੱਤਰ ਹੋਏ 200 ਤੋਂ ਵਧੇਰੇ ਦਰਸ਼ਕਾਂ ਨੇ ਜਿੱਥੇ ਲਾਜਵਾਬ ਸੰਗੀਤ ਨਾਲ ਪੂਰੇ ਹਫ਼ਤੇ ਹੀ ਥਕਾਨ ਉਤਾਰੀ ਉਥੇ ਜ਼ਿਲ੍ਹਾ ਪ੍ਰਸਾਸ਼ਨ ਵੱਲੋਂ ਸ਼ੁਰੂ ਕਰਵਾਈ ਗਈ ਇਸ ਨਵੀਂ ਪਹਿਲ ਦੀ ਭਰਪੂਰ ਪ੍ਰਸੰਸਾ ਵੀ ਕੀਤੀ। ਆਪਣੀਆਂ ਪੇਸ਼ਕਾਰੀਆਂ ਦੇਣ ਵਾਲੇ ਇਸ਼ਮੀਤ ਸੰਗੀਤ ਅਕਾਦਮੀ ਦੇ ਬੱਚਿਆਂ ਦੀ ਹੌਸਲਾ ਅਫ਼ਜਾਈ ਕਰਦਿਆਂ ਸ੍ਰ. ਚਰਨ ਕਮਲ ਸਿੰਘ ਨੇ ਕਿਹਾ ਕਿ ਇਹ ਸੰਗੀਤਕ ਸ਼ਾਮ ਹਰ ਐਤਵਾਰ ਇਸੇ ਤਰ੍ਹਾਂ ਨਹਿਰੂ ਰੋਜ਼ ਗਾਰਡਨ ਵਿੱਚ ਸ਼ਾਮ ਨੂੰ 5 ਵਜੇ ਤੋਂ ਲੈ ਕੇ 6 ਵਜੇ ਤੱਕ ਸਜਦੀ ਰਿਹਾ ਕਰੇਗੀ। ਇਸ ਤਰ੍ਹਾਂ ਇਹ ਸ਼ਾਮ ਅਗਲੇ ਐਤਵਾਰ ਦੁਬਾਰਾ ਜੁੜਨ ਦੇ ਵਾਅਦੇ ਨਾਲ ਸਮਾਪਤ ਹੋਈ।  


ਅਜੇ ਤੱਕ ਨਹੀਂ ਰੱਖਿਆ ਗਿਆ ਇਸ਼ਮੀਤ ਦੇ ਨਾਮ ਵਾਲੀ ਸੜਕ ਦਾ ਨੀਂਹ ਪੱਥਰ

Sunday, November 03, 2013

ਕੈਂਸਰ ਦੀ ਜੰਗ ਵਿੱਚ ਹਾਰ ਗਈ ਰੇਸ਼ਮਾ

ਉਸਦੀ ਮੌਤ ਦਾ ਇਸ਼ਾਰਾ ਪੰਜਾਬੀ ਟ੍ਰਿਬਿਊਨ ਨੇ ਅਪ੍ਰੈਲ 'ਚ ਹੀ ਦੇ ਦਿੱਤਾ ਸੀ 
ਰੇਸ਼ਮਾ ਦੀ ਗੱਲ ਕਰਦਿਆਂ…                                                   -ਸਵਰਨ ਸਿੰਘ ਟਹਿਣਾ
Posted On April - 27 - 2013
ਗਾਇਕੀ ਖੇਤਰ ਦੀ ਅਜ਼ੀਮ ਸ਼ਖ਼ਸੀਅਤ ਜਿਸ ਨੇ ਜ਼ਿੰਦਗੀ ਨਿਰਬਾਹ ਲਈ ਗਾਇਕੀ ਖੇਤਰ ਨੂੰ ਅਜਿਹਾ ਚੁਣਿਆ ਕਿ ਇਹੀ ਉਸ ਦਾ ਹਾਸਲ ਬਣ ਗਿਆ,ਅੱਜ ਲਹਿੰਦੇ ਪੰਜਾਬ ਵਿਚਲੇ ਲਾਹੌਰ ਦੇ ਹਸਪਤਾਲ ਵਿੱਚ ਜ਼ਿੰਦਗੀ-ਮੌਤ ਦੀ ਜੰਗ ਲੜ ਰਹੀ ਹੈ। ਕੋਈ ਵਿਰਲਾ-ਟਾਂਵਾਂ ਉਹਦਾ ਪਤਾ ਲੈਣ ਜਾਂਦੈ ਤੇ ਹੱਡੀਆਂ ਦੀ ਮੁੱਠ ਬਣ ਚੁੱਕੇ ਸਰੀਰ ਵੱਲ ਦੇਖ ਉਸ ਦੇ ਕੱਲ੍ਹ ਤੇ ਅੱਜ ਵਿਚਲਾ ਅੰਤਰ ਸਾਫ਼ ਦਿਸਣ ਲੱਗਦੈ। ਚੜ੍ਹਦੇ ਤੇ ਲਹਿੰਦੇ ਪੰਜਾਬ ਦੀ ਆਪਸੀ ਸਾਂਝ ਬਾਰੇ ਜਿੰਨਾ ਕੁਝ ਲਿਖਿਆ ਜਾਵੇ, ਘੱਟ ਏ ਤੇ ਜਿੰਨਾ ਬੋਲਿਆ ਜਾਵੇ, ਥੋਡ਼੍ਹਾ ਏ ਪਰ ਜਦੋਂ ਦੋਵਾਂ ਪਾਸਿਆਂ ਦੇ ਕਲਾਕਾਰਾਂ ’ਤੇ ਵਕਤ ਦਾ ਝੱਖੜ ਝੁੱਲਦਾ ਹੈ ਤਾਂ ਸੂਖ਼ਮ ਭਾਵੀ ਲੋਕਾਂ ਦਾ ਪਿਘਲਣਾ ਕੁਦਰਤੀ ਹੈ। ਗੱਲ ਕਰ ਰਹੇ ਹਾਂ ਪਾਕਿਸਤਾਨ ਦੀ ਮਸ਼ਹੂਰ ਗਾਇਕਾ ਰੇਸ਼ਮਾ ਦੀ। ਉਸ ਨਾਲ ਮੇਲ ਕਦੇ ਨਹੀਂ ਹੋਇਆ, ਬਸ ਗੀਤਾਂ ਜ਼ਰੀਏ ਇੰਜ ਜਾਪਿਐ ਜਿਵੇਂ ਉਸ ਨਾਲ ਪਰਿਵਾਰਕ ਸਾਂਝ ਹੋਵੇ। ਭੋਲ਼ੇ ਚਿਹਰੇ, ਸਾਦੀਆਂ ਗੱਲਾਂ, ਮੂੰਹ ਫੱਟ ਬੋਲਾਂ ਵਾਲੀ ਰੇਸ਼ਮਾ ਕਦਰਦਾਨਾਂ ਨੂੰ ਆਪਣੇ ਪਰਿਵਾਰ ਦਾ ਹਿੱਸਾ ਹੀ ਜਾਪਦੀ ਹੈ। ਉਸ ਦੀਆਂ ਉਦਾਸੀ ਵਾਲੀਆਂ ਮੁਲਾਕਾਤਾਂ ਵੱਖ-ਵੱਖ ਟੀ.ਵੀ. ਚੈਨਲਾਂ ਤੋਂ ਕਈ ਵਾਰ ਦੇਖੀਆਂ ਨੇ, ਜਿਨ੍ਹਾਂ ਵਿੱਚ ਉਹ ਆਪਣਾ ਦਰਦ ਬਿਆਨ ਕਰਦੀ ਰਹੀ ਹੈ ਪਰ ਅੱਜ ਉਸ ਦੀ ਹਾਲਤ ਏਨੀ ਨਾਜ਼ਕ ਹੈ ਕਿ ਕਿਸੇ ਵੀ ਵੇਲੇ ਕੋਈ ਮਾੜੀ ਖ਼ਬਰ ਆ ਸਕਦੀ ਹੈ। ਕੈਂਸਰ ਦੀ ਬੀਮਾਰੀ ਨੇ ਉਸ ਨੂੰ ਅਜਿਹਾ ਘੇਰਿਆ ਕਿ ਉਸ ਦੀ ਗਾਇਕੀ ਛੁੱਟ ਗਈ ਤੇ ਜ਼ਿੰਦਗੀ ਦੀ ਡੋਰ ਵੀ ਨਾ ਛੁੱਟ ਜਾਵੇ, ਇਸ ਦਾ ਫ਼ਿਕਰ ਸਤਾ ਰਿਹੈ। ਪਿਛਲੇ ਕੁਝ ਦਿਨਾਂ ਤੋਂ ਵੱਖ-ਵੱਖ ਅਖ਼ਬਾਰ ਉਸ ਦੀ ਹਾਲ ਬਿਆਨੀ ਕਰ ਰਹੇ ਨੇ, ਸ਼ੌਕਤ ਅਲੀ ਸਮੇਤ ਪਾਕਿਸਤਾਨ ਦੇ ਕਈ ਮਸ਼ਹੂਰ ਗਾਇਕ ਉਸ ਦਾ ਹਾਲ-ਚਾਲ ਪੁੱਛਣ ਹਸਪਤਾਲ ਗਏ, ਜਿਨ੍ਹਾਂ ਦੀਆਂ ਖ਼ਬਰਾਂ ਵੀ ਬਣੀਆਂ ਤੇ ਸਭ ਦੀਆਂ ਨਮ ਅੱਖਾਂ ਇਹ ਦੱਸਣ ਲਈ ਕਾਫ਼ੀ ਸਨ ਕਿ ਕੁਦਰਤ ਅਜਿਹਾ ਕਹਿਰ ਵੈਰੀ ’ਤੇ ਵੀ ਨਾ ਕਮਾਵੇ।
Courtesy Photo
ਰੇਸ਼ਮਾ ਦਾ ਪਿਛੋਕੜ, ਗਾਇਕੀ ਨਾਲ ਜੁੜਨ ਦਾ ਸਬੱਬ ਤੇ ਮੋਹਰਲੀ ਕਤਾਰ ਦੀ ਗਾਇਕਾ ਹੁੰਦਿਆਂ ਵੀ ਸਭ ਕੁਝ ਤੋਂ ਬੇਖ਼ਬਰ ਰਹਿਣਾ ਦੱਸ ਦਿੰਦੈ ਕਿ ਕੁਝ ਕਲਾਕਾਰ ਅਜਿਹੇ ਹੁੰਦੇ ਨੇ, ਜਿਹੜੇ ‘ਖਾਸ’ ਹੁੰਦਿਆਂ ‘ਆਮ’ ਬਣੇ ਰਹਿੰਦੇ ਨੇ। ਪੜ੍ਹਨਾ-ਲਿਖਣਾ ਰੇਸ਼ਮਾ ਹਿੱਸੇ ਨਾ ਆਇਆ ਕਿਉਂਕਿ ਪਰਿਵਾਰਕ ਮਾਹੌਲ ਹੀ ਅਜਿਹਾ ਸੀ ਪਰ ਫੇਰ ਵੀ ਜਿਸ ਤਰ੍ਹਾਂ ਉਸ ਨੇ ਗੀਤਾਂ ਨੂੰ ਕੰਠ ਕੀਤਾ ਤੇ ਉਹ ਰਿਕਾਰਡ ਹੁੰਦਿਆਂ ਜਿਵੇਂ ਪੂਰੀ ਦੁਨੀਆਂ ਵਿੱਚ ਉਸ ਦੀ ਮਸ਼ਹੂਰੀ ਹੋਈ, ਅਲੋਕਾਰੀ ਪ੍ਰਾਪਤੀ ਹੈ। ਇੱਕ ਚੈਨਲ ’ਤੇ ਮੁਲਾਕਾਤ ਦੌਰਾਨ ਰੇਸ਼ਮਾ ਨੇ ਦੱਸਿਆ ਸੀ, ‘‘ਪਹਿਲੀ ਵਾਰ ਜਦੋਂ ਇੱਕ ਅਖ਼ਬਾਰ ਵਿੱਚ ਫੋਟੋ ਛਪੀ ਤਾਂ ਮੈਂ ਡਰ ਗਈ ਕਿ ਕਿਤੇ ਮਾਪੇ ਤੇ ਬਰਾਦਰੀ ਇਹ ਨਾ ਸੋਚਣ ਕਿ ਮੈਂ ਕੀ ਚੰਦ ਚਾੜ੍ਹ ਦਿੱਤੈ…ਪਰ ਫੇਰ ਹੌਲੀ-ਹੌਲੀ ਰੇਡੀਓ ’ਤੇ ਗਾਉਣ ਦੀ ਖੁੱਲ੍ਹ ਹੋ ਗਈ। ਬਰਾਦਰੀ ਤੋਂ ਆਲੇ-ਦੁਆਲੇ ਦੇ ਇਲਾਕਿਆਂ ਵਿੱਚ ਤੇ ਫੇਰ ਸਰਹੱਦਾਂ ਤੋਂ ਪਾਰ ਗੱਲਾਂ ਹੋਣ ਲੱਗੀਆਂ। ਉਸ ਤੋਂ ਬਾਅਦ ਵਿਦੇਸ਼ੀ ਦੌਰੇ ਸ਼ੁਰੂ ਹੋ ਗਏ…ਤੇ ਪਤਾ ਨਹੀਂ ਕਿਵੇਂ ਲੋਕ ਰੇਸ਼ਮਾ..ਰੇਸ਼ਮਾ ਕਹਿ ਵਡਿਆਉਣ ਲੱਗ ਗਏ।’’ ਕੁਝ ਸਾਲ ਪਹਿਲਾਂ ਉਸ ਨੂੰ ਡਾਕਟਰਾਂ ਦੱਸਿਆ ਕਿ ਤੁਹਾਨੂੰ ਕੈਂਸਰ ਹੈ ਤੇ ਉਦੋਂ ਤੋਂ ਗਾਉਣਾ ਲਾਂਭੇ ਹੋ ਗਿਆ। ਇਲਾਜ ਚੱਲਣ ਲੱਗਿਆ ਤੇ ਕੈਂਸਰ ਦੇ ਮਰੀਜ਼ ਦਾ ਹਾਲ ਕੀਮੋਥਰੈਪੀਆਂ ਤੇ ਹੋਰ ਪ੍ਰਣਾਲੀਆਂ ਵਿੱਚੋਂ ਗੁਜ਼ਰਦਿਆਂ ਕੇਹਾ ਹੋ ਜਾਂਦੈ, ਸਭ ਜਾਣਦੇ ਹੀ ਨੇ। ਦੁੱਖ ਹੈ ਕਿ ਕੈਂਸਰ ਦਾ ਇਹ ਚੰਦਰਾ ਰੋਗ ਕੀਮਤੀ ਜਾਨਾਂ ਖਾ ਰਿਹੈ। ਰੋਜ਼ਾਨਾ ਅਖ਼ਬਾਰਾਂ, ਰਸਾਲਿਆਂ ਦੇ ਭਰੇ ਸਫ਼ੇ ਦੱਸਦੇ ਨੇ ਕਿ ਇਹ ਬੀਮਾਰੀ ਕਿਵੇਂ ਪੈਰ ਪਸਾਰਦੀ ਜਾ ਰਹੀ ਏ। ਕਿੰਨੇ ਹੀ ਆਮ ਤੇ ਖਾਸ ਲੋਕ ਇਸ ਦੀ ਭੇਟ ਚੜ੍ਹ ਚੁੱਕੇ ਨੇ। ਕੁਝ ਸਮਾਂ ਪਹਿਲਾਂ ਗਾਇਕਾ ਪਰਮਿੰਦਰ ਸੰਧੂ ਤੇ ਫੇਰ ਉੱਘੇ ਗਾਇਕ ਕਰਨੈਲ ਗਿੱਲ ਦੀ ਅਖੀਰ ਦਾ ਕਾਰਨ ਵੀ ਇਹ ਬੀਮਾਰੀ ਬਣੀ। ਪਾਕਿਸਤਾਨੀ ਸਰਕਾਰ ਨੇ ਰੇਸ਼ਮਾ ਦਾ ਇਲਾਜ ਆਪਣੇ ਪੱਧਰ ’ਤੇ ਕਰਾਉਣ ਦੀ ਗੱਲ ਕਹੀ ਹੈ ਤੇ ਉਸ ਨੂੰ ਦਸ ਹਜ਼ਾਰ ਰੁਪਿਆ ਪ੍ਰਤੀ ਮਹੀਨਾ ਦੇਣ ਦਾ ਵਚਨ ਵੀ ਕੀਤਾ ਹੈ। ਸਭ ਦੀਆਂ ਦੁਆਵਾਂ ਉਸ ਦੇ ਨਾਲ ਹਨ ਪਰ ਰੋਗ ਦੇ ਇਸ ਪੜਾਅ ’ਤੇ ਦੁਆਵਾਂ ਤੇ ਦਵਾਵਾਂ ਬਹੁਤਾ ਅਸਰ ਨਹੀਂ ਕਰਦੀਆਂ। ਇਹ ਸਭ ਲਿਖਦਿਆਂ ਉਸ ਦੇ ‘ਲੰਬੀ ਜੁਦਾਈ’ ਤੇ ‘ਹਾਇ ਓ ਰੱਬਾ ਨਹੀਂਓਂ ਲੱਗਦਾ ਦਿਲ ਮੇਰਾ’, ‘ਵੇ ਮੈਂ ਚੋਰੀ ਚੋਰੀ’ ਤੇ ‘ਦਮਾ ਦਮ ਮਸਤ ਕਲੰਦਰ’ ਗੀਤ ਚੇਤੇ ਆ ਰਹੇ ਨੇ। ਰੇਸ਼ਮਾ ਬੀਮਾਰੀ ਨਾਲ ਲੜ ਰਹੀ ਹੈ ਤੇ ਉਸ ਦੇ ਹਾਲਾਤ ਬਾਰੇ ਗਾਹੇ-ਬਗਾਹੇ ਖ਼ਬਰਾਂ ਛਪ ਰਹੀਆਂ ਨੇ। ਦੁੱਖ ਦੀ ਗੱਲ ਹੈ ਕਿ ਚੰਗੇ ਕਲਾਕਾਰ ਸਾਡਾ ਸਾਥ ਛੱਡ ਰਹੇ ਨੇ, ਜਿਨ੍ਹਾਂ ਦੀ ਮਖ਼ਮਲੀ ਆਵਾਜ਼ ਕਦੇ ਚੇਤੇ ਦੀ ਚੰਗੇਰ ’ਚੋਂ ਉੱਤਰ ਨਹੀਂ ਸਕਦੀ।
ਕੈਂਸਰ ਦੀ ਜੰਗ ਵਿੱਚ ਹਾਰ ਗਈ ਰੇਸ਼ਮਾ

ਰੇਸ਼ਮਾ ਦੀ ਗੱਲ ਕਰਦਿਆਂ…    

Thursday, October 24, 2013

ਮੰਨਾ ਡੇ ਹੁਣ ਸਾਡੇ ਦਰਮਿਆਨ ਨਹੀਂ ਰਹੇ

94 ਸਾਲਾਂ ਦੀ ਉਮਰ ਵਿੱਚ ਲਿਆ ਆਖਿਰੀ ਸਾਹ 
ਮੁੰਬਈ: 24 ਅਕਤੂਬਰ 2013: ਮੁੰਬਈ ਤੋਂ ਆਈ ਬਹੁਤ ਹੀ ਦੁੱਖਦਾਈ ਖਬਰ ਦੇ ਮੁਤਾਬਿਕ ਅਨਗਿਣਤ ਯਾਦਗਾਰੀ ਗੀਤ ਦੇਣ ਵਾਲੇ ਮੰਨਾ ਡੇ ਹੁਣ ਸਾਡੇ ਦਰਮਿਆਨ ਨਹੀਂ ਰਹੇ। ਕੁਝ ਸਮਾਂ ਬੀਮਾਰ ਰਹਿਣ ਮਗਰੋਂ ਬਾਲੀਵੁੱਡ ਦੇ ਮਸ਼ਹੂਰ ਗਾਇਕ ਮੰਨਾ ਡੇ ਦਾ ਵੀਰਵਾਰ ਨੂੰ ਤੜਕੇ ਤੜਕੇ ਦਿਹਾਂਤ ਹੋ ਗਿਆ। ਜਿਕਰਯੋਗ ਹੈ ਕਿ 94 ਸਾਲਾ ਮੰਨਾ ਡੇ ਨੂੰ ਸਾਹ ਲੈਣ ‘ਚ ਤਕਲੀਫ ਅਤੇ ਗੁਰਦੇ ਦੀ ਬੀਮਾਰੀ ਕਾਰਨ ਹਸਪਤਾਲ ‘ਚ ਦਾਖਲ ਕਰਵਾਇਆ ਗਿਆ ਸੀ ਜਿਥੇ ਵੀਰਵਾਰ ਤੜਕੇ 3.45 ਵਜੇ ਉਨ੍ਹਾਂ ਨੇ ਆਖਰੀ ਸਾਹ ਲਿਆ ਅਤੇ ਇਸ ਫਾਨੀ ਸੰਸਾਰ ਨੂੰ ਅਲਵਿਦਾ ਆਖ ਗਏ।
ਉਹਨਾਂ ਨੂੰ ਚਾਹੁਣ ਵਾਲੇ ਬੇਸ਼ੁਮਾਰ ਲੋਕਾਂ ਦੀ ਸ਼ਰਧਾਂਜਲੀ ਲਈ ਸ਼੍ਰੀ ਡੇ ਦੀ ਮ੍ਰਿਤਕ ਦੇਹ ਨੂੰ ਰਵੀਂਦਰ ਕਲਾ ਖੇਤਰ ‘ਚ ਰੱਖਿਆ ਗਿਆ। ਕੁਝ ਦੇਰ ਮਗਰੋਂ ਉਨ੍ਹਾਂ ਦਾ ਅੰਤਿਮ ਸਸਕਾਰ ਹੇਬਲ ‘ਚ ਦੁਪਹਿਰ ਤੋਂ ਬਾਅਦ 12.45 ਵਜੇ ਕਰ ਦਿੱਤਾ ਗਿਆ। ਸ਼੍ਰੀ ਡੇ ਪਿਛਲੇ ਕੁਝ ਸਾਲਾਂ ਤੋਂ ਇਥੇ ਆਪਣੀ ਧੀ ਕੋਲ ਰਹਿ ਰਹੇ ਸਨ ਜਿਥੇ ਉਨ੍ਹਾਂ ਦੀਆਂ ਵੱਖ-ਵੱਖ ਬੀਮਾਰੀਆਂ ਦਾ ਲਗਾਤਾਰ ਇਲਾਜ ਚੱਲ ਰਿਹਾ ਸੀ। ਹਿੰਦੀ (ਬੰਗਲਾ) ਤਮਿਲ ਅਤੇ ਕੰਨੜ ਫਿਲਮਾਂ ‘ਚ ਚਾਰ ਹਜ਼ਾਰ ਤੋਂ ਵੀ ਵੱਧ ਗੀਤਾਂ ਦੀ ਆਪਣੀ ਆਵਾਜ਼ ਦੇਣ ਵਾਲੇ ਡੇ ਨੂੰ ਸਾਲ 1971 ‘ਚ ਪਦਮਸ਼੍ਰੀ ਅਤੇ ਸਾਲ 2005 ‘ਚ ਪਦਮ ਵਿਭੂਸ਼ਣ ਨਾਲ ਸਨਮਾਨਤ ਕੀਤਾ ਗਿਆ ਸੀ। ਸਾਲ 2007 ‘ਚ ਉਨ੍ਹਾਂ ਨੂੰ ਦਾਦਾ ਸਾਹਿਬ ਫਾਲਕੇ ਐਵਾਰਡ ਨਾਲ ਵੀ ਸਨਮਾਨਿਆ ਗਿਆ ਸੀ। ਅਜਿਹੇ ਮਾਣ ਸਨਮਾਨਾਂ ਦੀ ਲਿਸਟ ਬੜੀ ਲੰਮੀ ਹੈ। ਮਜਦੂਰਾਂ ਦੇ ਤਿਓਹਾਰ ਕਿਰਤ ਦਿਵਸ ਅਰਥਾਤ ਸੰਨ 1919 ਦੀ ਪਹਿਲੀ ਮਈ ਵਾਲੇ ਇਤਿਹਾਸਿਕ ਦਿਨ ਕਲਕੱਤਾ ਵਿੱਚ ਜਨਮ ਲੈਣ ਵਾਲੇ ਮੰਨਾ ਡੇ ਦੀ ਸੰਗੀਤ ਸਾਧਨਾ ਬਹੁਤ ਹੀ ਛੋਟੀ ਉਮਰ ਵਿੱਚ ਸ਼ੁਰੂ ਹੋ ਗਈ ਸੀ ਅਤੇ ਦਿਨ-ਬ-ਦਿਨ ਇਸ ਵਿੱਚ ਨਿਖਰ ਆਉਂਦਾ ਗਿਆ। ਉਹਨਾਂ ਦੇ ਗਾਏ ਚਾਰ ਹਜ਼ਾਰ ਗੀਤਾਂ ਵਿੱਚੋਂ ਕੁਝ ਚੋਣਵੇਂ ਗੀਤ ਤੁਸੀਂ ਸੁਣ ਸਕਦੇ ਹੋ ਇਥੇ ਕਲਿੱਕ ਕਰਕੇ।