Showing posts with label Bollywood. Show all posts
Showing posts with label Bollywood. Show all posts

Monday, November 24, 2025

ਧਰਮਿੰਦਰ ਨੇ ਨਿਭਾਈ ਸੀ, ਇਸ ਨਕਸਲੀ ਨਾਲ ਸਾਰੀ ਉਮਰ ਯਾਰੀ

Social Media Post By Rajwinder Singh Rahi  A Special Post Punjab Screen 24th November 2025 at 07:46 PM

ਰਾਜਵਿੰਦਰ ਰਾਹੀ ਵੱਲੋਂ ਅਤੀਤ ਨਾਲ ਸਬੰਧਤ ਅਹਿਮ ਖੁਲਾਸਾ 


ਸੋਸ਼ਲ ਮੀਡੀਆ
ਇੰਟਰਨੈਟ: 24 ਨਵੰਬਰ 2025: (ਮੀਡੀਆ ਲਿੰਕ ਰਵਿੰਦਰ//ਪੰਜਾਬ ਸਕਰੀਨ ਡੈਸਕ)::

ਪੰਜਾਬ ਵਿੱਚ ਪੰਥਕ ਘਟਨਾਕ੍ਰਮ ਅਤੇ ਖੱਬੇ ਪੱਖੀਆਂ ਦੀਆਂ ਸਰਗਰਮੀਆਂ ਨਾਲ ਬਹੁਤ ਨੇੜਿਓਂ ਜੁੜੇ ਰਹਿਣ ਵਾਲੇ ਪ੍ਰਸਿੱਧ ਬੁੱਧੀਜੀਵੀ ਰਾਜਵਿੰਦਰ ਸਿੰਘ ਰਾਹੀਂ ਹੁਰਾਂ ਨੇ ਪ੍ਰਸਿੱਧ ਫ਼ਿਲਮੀ ਸ਼ਖਸ਼ੀਅਤ ਧਰਮਿੰਦਰ ਕੇਵਲ ਕ੍ਰਿਸ਼ਨ ਦਿਉਲ ਹੁਰਾਂ  ਦੇ ਦੇਹਾਂਤ ਮੌਕੇ ਇੱਕ ਅਜਿਹੀ ਜਾਣਕਾਰੀ ਸਾਹਮਣੇ ਲਿਆਂਦੀ ਹੈ ਜਿਸ ਬਾਰੇ ਬਹੁਤਿਆਂ ਨੂੰ ਨਹੀਂ ਸੀ ਪਤਾ। ਇਸ ਲਈ ਇਸ ਜਾਣਕਾਰੀ ਨੇ ਬਹੁਤੀਆਂ ਨੂੰ ਹੈਰਾਨ ਵੀ ਕੀਤਾ ਹੈ। 

ਉਹਨਾਂ ਦੱਸਿਆ ਹੈ ਕਿ ਧਰਮਿੰਦਰ ਨੇ ਨਿਭਾਈ ਸੀ, ਇਸ ਨਾਮ ਦੇ ਨਕਸਲੀ ਨਾਲ ਸਾਰੀ ਉਮਰ ਯਾਰੀ। ਧਰਮਿੰਦਰ ਹੁਰਾਂ ਦੀ ਜ਼ਿੰਦਾਦਿਲੀ , ਦੋਸਤੀ ਵਾਲੀ ਭਾਵਨਾ ਅਤੇ ਇਨਸਾਨੀਅਤ ਦੇ ਜਜ਼ਬੇ ਬਾਰੇ ਪਰਮਜੀਤ ਸਿੰਘ ਕਾਲੜਾ ਵੀ ਸੁਣਾਇਆ ਕਰਦੇ ਸਨ ਜਿਹੜੇ ਲੁਧਿਆਣਾ ਦੇ ਜੰਮਪਲ ਸਨ ਪਰ ਜ਼ਿੰਦਗੀ ਦੀ ਗਰਦਿਸ਼ ਉਹਨਾਂ ਨੂੰ ਮੁੰਬਈ ਲੈ ਗਈ ਸੀ।

ਮੁੰਬਈ ਦੀਆਂ ਗਰਦਿਸ਼ਾਂ ਉਹਨਾਂ ਨੂੰ ਧਰਮਿੰਦਰ ਅਤੇ ਦਾਰਾ ਸਿੰਘ ਹੁਰਾਂ ਦੇ ਹੋਰ ਨੇੜੇ ਲੈ ਗਈਆਂ। ਇਸਤਰ੍ਹਾਂ ਕਿ ਹੋਰ ਲੋਕ ਵੀ ਜਦੋਂ ਮੁੰਬਈ ਜਾਂਦੇ ਤਾਂ ਧਰਮਿੰਦਰ ਨਾਲ ਮੁਲਾਕਾਤ ਵੀ ਉਹਨਾਂ ਦਾ ਸੁਪਨਾ ਹੁੰਦਾ ਸੀ।

ਧਰਮਿੰਦਰ ਅਤੇ ਦਾਰਾ ਸਿੰਘ ਹੁਰਾਂ ਦਾ ਰਵਈਆ ਏਨਾ ਮਿਲਾਪੜਾ ਹੁੰਦਾ ਸੀ ਕਿ ਬਹੁਤਿਆਂ ਲਈ ਮੁੰਬਈ ਦੀ ਫੇਰੀ ਇੱਕ ਯਾਦਗਾਰੀ ਫੇਰੀ ਬਣ ਜਾਂਦੀ। ਇਹ ਤਾਂ ਸੀ ਮੁੰਬਈ ਦੀ ਗੱਲ। ਪਰ ਪੰਜਾਬ ਵਿੱਚ ਝੁੱਲੀਆਂ ਹਨੇਰੀਆਂ ਦੇ ਵੇਲੇ ਵੀ ਜਿਹੜੇ ਲੋਕ ਧਰਮਿੰਦਰ ਦੇ ਮਿੱਤਰ ਬਣੇ ਸਨ ਧਰਮਿੰਦਰ ਨੇ ਉਹਨਾਂ ਮਿੱਤਰਾਂ ਨੂੰ ਵੀ ਗੱਲ ਨਾਲ ਲਾਈ ਰੱਖਿਆ। ਉਹਨਾਂ ਵੇਲਿਆਂ ਦੇ ਹਾਲਾਤ ਦੀ ਝਲਕ ਦੇਖਣੀ ਹੋਵੇ ਤਾਂ ਜਸਵੰਤ ਸਿੰਘ ਕੰਵਲ ਹੁਰਾਂ ਦੇ ਨਾਵਲ "ਲਹੂ ਦੀ ਲੋਅ" ਨੂੰ ਪੜ੍ਹ ਕੇ ਦੇਖ ਸਕਦੇ ਹਨ। ਫਿਰ ਸ਼ਾਇਦ ਇਸਦਾ ਅਹਿਸਾਸ ਹੋ ਸਕੇ ਕਿ ਧਰਮਿੰਦਰ ਨੇ ਕਿੰਨੀ ਦਲੇਰੀ ਨਾਲ ਯਾਰੀ ਨਿਭਾਈ ਸੀ।

ਇਹ ਸਾਰੀ ਕਹਾਣੀ ਤੁਸੀਂ ਰਾਜਵਿੰਦਰ ਰਾਹੀਂ ਹੁਰਾਂ ਦੀ ਪੋਸਟ ਵਿੱਚ ਸਿਧੇ ਤੌਰ 'ਤੇ ਵੀ ਪੜ੍ਹ ਸਕਦੇ ਹੋ।

Thursday, July 13, 2017

ਬਾਲੀਵੁਡ ਅਦਾਕਾਰਾ ਮਨਸ਼ਾ ਬਹਿਲ ਲੁਧਿਆਣਾ ਵਿੱਚ

Thu, Jul 13, 2017 at 1:05 PM
ਕੈਨੇਡੀਅਨ ਇੰਸਟੀਚਿਊਟ ਦਾ ਕੀਤਾ ਉਦਘਾਟਨ 
ਲੁਧਿਆਣਾ: 13 ਜੁਲਾਈ2017:(ਕਾਰਤਿਕਾ ਸਿੰਘ//ਪੰਜਾਬ ਸਕਰੀਨ):: 
ਪੂੰਜੀਵਾਦ ਦੇ ਯੁਗ ਵਿੱਚ ਦੇਸ਼ ਨਾਲ ਪਿਆਰ, ਦੇਸ਼ ਦੀ ਮਿੱਟੀ ਨਾਲ ਮੋਹ ਅਤੇ ਆਪਣਿਆਂ ਦੇ ਨੇੜੇ ਨੇੜੇ ਰਹਿਣਾ ਕਿਸੇ ਗਏ ਗੁਜ਼ਰੇ ਜ਼ਮਾਨੇ ਦੀਆਂ ਗੱਲਾਂ ਹੁੰਦੀਆਂ ਜਾ ਰਹੀਆਂ ਹਨ। ਸਿਰਫ ਇੱਕੋ ਗੱਲ ਅੱਜ ਦਾ ਸੱਚ ਬਣ ਗਈ ਹੈ ਕਿ ਬਾਪ ਬੜਾ ਨ ਭਈਆ; ਸਬਸੇ ਬੜਾ ਰੁਪਈਆ। 
ਪ੍ਰਸਿੱਧ ਸ਼ਾਇਰ ਸੁਰਜੀਤ ਪਾਤਰ ਨੇ ਬਹੁਤ ਪਹਿਲਾਂ ਇੱਕ ਦਰਦ ਬਿਆਨ ਕੀਤਾ ਸੀ--
ਜੋ ਬਦੇਸ਼ਾਂ 'ਚ ਰੁਲਦੇ ਨੇ ਰੋਟੀ ਲਈ;
ਉਹ ਜਦੋਂ ਦੇਸ ਪਰਤਣਗੇ ਆਪਣੇ ਕਦੀ। 
ਜਾਂ ਤਾਂ ਸੇਕਣਗੇ ਮਾਂ  ਦੇ ਸਿਵੇ ਦੀ ਅਗਨ ; 
'ਤੇ ਜਾਂ ਕਬਰਾਂ ਦੇ ਰੁੱਖ ਹੇਠ ਜਾ ਬਹਿਣਗੇ। 
ਦਰਦ ਦੇ ਇਸ ਸ਼ਾਇਰਾਨਾ ਇਜ਼ਹਾਰ ਨੇ ਬਹੁਤ ਵਾਹ ਵਾਹ ਵੀ ਖੱਟੀ ਪਰ ਆਪਣਾ ਦੇਸ਼ ਛੱਡ ਕੇ ਵਿਦੇਸ਼ਾਂ ਵਿੱਚ ਜਾ ਵੱਸਣ ਦੀ ਚਾਹਤ ਦੇ ਗ੍ਰਾਫ ਦੀ ਚੜ੍ਹਤ ਲਗਾਤਾਰ ਜਾਰੀ ਰਹੀ। "ਮੇਰਾ ਭਾਰਤ ਮਹਾਨ" ਕਹਿਣਾ ਇੱਕ ਹਰਮਨ ਪਿਆਰਾ ਨਾਅਰਾ ਜਿਹਾ ਜ਼ਰੂਰ ਬਣ ਗਿਆ ਪਰ ਹਕੀਕਤ ਦੀ ਦੁਨੀਆ ਵਿੱਚ ਵਿਦੇਸ਼ਾਂ ਦੇ ਕੰਮਕਾਜ ਦੀਆਂ ਸਹੂਲਤਾਂ, ਰਹਿਣ ਸਹਿਣ ਦਾ ਅੰਦਾਜ਼, ਕੈਰੀਅਰ ਦੇ ਮੌਕੇ, ਬਿਮਾਰੀ ਅਤੇ ਬੁਢਾਪੇ ਵਿੱਚ ਮਿਲਦੀ ਵਿਸ਼ੇਸ਼ ਸਾਂਭ ਸੰਭਾਲ ਅਤੇ ਹੋਰ ਬਹੁਤ ਸਾਰੀਆਂ ਗੱਲਾਂ ਲੋਕਾਂ ਨੂੰ ਆਪਣੇ ਵੱਲ ਖਿੱਚ ਰਹੀਆਂ ਹਨ। ਵਿਦੇਸ਼ਾਂ ਦੀ ਧਰਤੀ ਤੇ  ਪਹੁੰਚਣ ਲਈ ਸਭ ਤੋਂ ਵੱਧ ਜ਼ਰੂਰਤ ਹੁੰਦੀ ਹੈ ਭਾਸ਼ਾ ਦੀ ਨਿਪੁੰਨਤਾ ਅਤੇ ਸਹੀ ਕਾਨੂੰਨੀ ਪ੍ਰਕ੍ਰਿਆ ਦੀ। ਸ਼ਾਇਦ ਇਹੀ ਕਾਰਨ ਹੈ ਕਿ ਇਸ ਕਿਸਮ ਦੇ ਮੌਕੇ ਦੇਣ ਅਤੇ ਇੰਮੀਗ੍ਰੇਸ਼ਨ ਦਾ ਕੰਮ ਹੁਣ ਲਗਾਤਾਰ ਤੇਜ਼ੀ ਨਾਲ ਵੱਧ ਰਿਹਾ ਹੈ। 
ਅੱਜ ਇਸ ਮਕਸਦ ਦਾ ਇੱਕ ਦਫਤਰ ਲੁਧਿਆਣਾ ਦੀ ਫਿਰੋਜ਼ਗਾਂਧੀ ਮਾਰਕੀਟ ਵਿੱਚ ਵੀ ਸ਼ੁਰੂ ਹੋਇਆ ਜਿਸਦਾ ਉਦਘਾਟਨ ਬਾਲੀਵੁਡ ਅਦਾਕਾਰਾ ਮਨਸ਼ਾ ਬਹਿਲ ਨੇ ਕੀਤਾ। ਮਨਸ਼ਾ ਬਹਿਲ ਨੇ ਆਪਣੀ ਫਿਲਮੀ ਕਰਿਅਰ ਦੀ ਸ਼ੁਰੂਆਤ ਡਾਇਰੈਕਟਰ ਡੇਵਿਡ ਧਵਨ ਤੇ ਕਬੀਰ ਸਦਾਨੰਦ ਨਾਲ ਕੀਤੀ ਸੀ। ਉਨ੍ਹਾਂ ਨੇ 2014 'ਚ ਰਿਲੀਜ ਹੋਈ ਫਿਲਮ ਸਪਾਰਕ ਤੋਂ ਇਲਾਵਾ, ਫਿਲਮ ਰਾਸਕਲ 'ਚ ਅਰਜਨ ਰਾਮਪਾਲ ਦੇ ਉਲਟ ਰੋਲ ਨਿਭਾਇਆ ਤੇ ਫਿਲਮ ਫਗਲੀ 'ਚ ਅਕਸ਼ੈ ਕੁਮਾਰ ਪ੍ਰੋਡਕਸ਼ਨਜ ਦੇ ਬੈਨਰ ਹੇਠਾਂ ਕੰਮ ਕੀਤਾ। ਉਹ ਕਈ ਹਿੰਦੀ ਤੇ ਪੰਜਾਬੀ ਮਿਊਜ਼ਿਕ ਵੀਡੀਓਜ 'ਚ ਵੀ ਕੰਮ ਕਰ ਚੁੱਕੀ ਹਨ। ਹਾਲ ਹੀ ਵਿੱਚ 'ਚ ਉਨ੍ਹਾਂ ਨੂੰ ਟੀ ਸੀਰੀਜ ਦੀ ਪਾਪੁਲਰ ਹਿੰਦੀ ਮਿਊਜਿਕ ਵੀਡੀਓ ਨੀਲੀ ਨੀਲੀ ਆਂਖੇਂ 'ਚ ਵੀ ਦੇਖਿਆ ਗਿਆ ਸੀ।
ਇਸ ਲਾਂਚ ਦੇ ਨਾਲ ਲੁਧਿਆਣਵੀਆਂ ਕੋਲ ਹੁਣ ਸਮਰਪਿਤ ਤੇ ਟ੍ਰੇਨ ਇਮੀਗ੍ਰੇਸ਼ਨ ਸਲਾਹਕਾਰਾਂ ਤੇ ਪ੍ਰੋਫੈਸ਼ਨਲਾਂ ਦੀ ਟੀਮ ਆ ਚੁੱਕੀ ਹੈ, ਜਿਹੜੀ ਉਨ੍ਹਾਂ ਨੂੰ ਕਨੇਡਾ ਲਈ ਸਟੂਡੇਂਟ ਵੀਜਾ, ਫੈਮਿਲੀ ਮਾਈਗ੍ਰੇਸ਼ਨ, ਕਨੇਡੀਅਨ ਪੀ.ਆਰ ਅਰਜੀਆਂ ਸਮੇਤ ਕਈ ਹੋਰ ਫਾਇਦੇਮੰਦ ਜਾਣਕਾਰੀ ਉਪਲਬਧ ਕਰਵਾਏਗੀ।
ਇਸ ਲੜੀ ਹੇਠ, ਫਰਮ ਨੇ ਕਨੇਡਾ (ਮਿਸੀਸਾਗਾ, ਟੋਰੰਟੋ, ਬ੍ਰਹਮਪਟਨ) ਤੋਂ ਬਾਅਦ ਹੁਣ ਲੁਧਿਆਣਾ 'ਚ ਆਪਣਾ ਦਫਤਰ ਖੋਲ੍ਹਿਆ ਹੈ। ਇਸ ਮੌਕੇ ਉਦਘਾਟਨ ਸਮਾਰੋਹ 'ਚ ਮੁੱਖ ਵਿੱਤੀ ਅਫਸਰ ਸ੍ਰੀ ਇਕਬਾਲ ਸਿੰਘ ਗਰੋਵਰ, ਕਾਨੂੰਨੀ ਸਲਾਹਕਾਰ ਸ੍ਰੀ ਗੁਰਪ੍ਰੀਤ ਸਿੰਘ ਗਰੋਵਰ, ਸ੍ਰੀ ਜੋਗਿੰਦਰ ਸਿੰਘ ਤੇ ਐਚ.ਆਰ ਹੈਡ ਤੇ ਬ੍ਰਾਂਚ ਮੈਨੇਜਰ ਡਾ. ਰਾਜ ਉੱਪਲ ਵੀ ਮੌਜੂਦ ਰਹੇ। ਹੁਣ ਦੇਖਣਾ ਹੈ ਕਿ ਦੇਸ਼ ਦੇ ਉਹਨਾਂ ਲੋਕਾਂ ਦੀ ਹਾਲਤ ਕੌਣ ਸਿਧਾਰੇਗਾ ਜਿਹੜੇ ਵਿਦਸ਼ ਵੀ ਨਹੀਂ ਜਾ ਸਕਦੇ ਅਤੇ ਇਥੇ ਵੀ ਚਾਰ ਦਿਨ ਸੁੱਖ ਦੇ ਨਹੀਂ ਲੰਘਾ ਸਕਦੇ। ਆਪਣੇ ਦੇਸ਼ ਨੂੰ ਹੀ ਸਵਰਗ ਬਣਾਉਣ ਦੇ ਹੀਲੇ ਵਸੀਲੇ ਕਰੀਏ। 
ਅਖੀਰ ਵਿੱਚ ਸਵਰਗੀ ਦੁਸ਼ਿਅੰਤ ਕੁਮਾਰ ਹੁਰਾਂ ਦਾ ਇੱਕ ਸ਼ੇਅਰ:
ਜੀਓ ਤੋਂ ਅਪਨੇ ਬਗੀਚੇ ਮੈਂ ਗੁਲਮੋਹਰ ਕੇ ਲਿਏ,
ਮਰੋ ਤੋਂ ਗੈਰ ਕਿ ਗਲੀਓਂ ਮੈਂ ਗੁਲਮੋਹਰ ਕੇ ਲਿਏ। 
------

Sunday, October 23, 2016

ਨਹੀਂ ਰਹੇ ਪੰਜਾਬੀ ਕਮੇਡੀ ਦੇ ਬਾਦਸ਼ਾਹ ਮੇਹਰ ਮਿੱਤਲ

ਰਾਜਸਥਾਨ ਦੇ ਮਾਊਂਟਆਬੂ ਵਿਖੇ ਬ੍ਰਹਮ ਕੁਮਾਰੀ ਆਸ਼ਰਮ 'ਚ ਲਏ ਆਖ਼ਿਰੀ ਸਾਹ 
ਚੰਡੀਗੜ੍ਹ: 22 ਅਕਤੂਬਰ 2016: (ਪੰਜਾਬ ਸਕਰੀਨ ਬਿਊਰੋ): 
ਆਪਣੀ ਕਾਮੇਡੀ ਭਰੀ ਅਦਾਕਾਰੀ ਨਾਲ ਪੰਜਾਬੀ ਫ਼ਿਲਮਾਂ ਦੀ ਪਛਾਣ ਬਣ ਜਾਣ ਵਾਲੇ ਮੇਹਰ ਮਿੱਤਲ ਹੁਣ ਨਹੀਂ ਰਹੇ। ਪੰਜਾਬੀ ਸਿਨੇਮਾ ਦੇ ਮਹਾਨ ਅਦਾਕਾਰ ਤੇ ਕਾਮੇਡੀ ਦੇ ਬਾਦਸ਼ਾਹ ਮੇਹਰ ਮਿੱਤਲ ਦੇ ਦੇਹਾਂਤ ਬਾਰੇ ਜੋ ਖ਼ਬਰ ਕੁਝ ਦਿਨ ਪਹਿਲੀ ਝੂਠੀ ਨਿਕਲੀ ਸੀ, ਉਹ ਅੱਜ ਸੱਚ ਹੋ ਗਈ। ਮਿਹਰ ਮਿੱਤਲ ਪਿਛਲੇ ਕਈ ਦਿਨਾਂ ਤੋਂ ਰਾਜਸਥਾਨ ਦੇ ਮਾਊਂਟਆਬੂ ਵਿਖੇ ਬ੍ਰਹਮ ਕੁਮਾਰੀ ਆਸ਼ਰਮ ਵਿੱਚ ਜ਼ੇਰੇ ਇਲਾਜ ਸਨ। ਮਿੱਤਲ ਨੇ ਕਰੀਬ 100 ਪੰਜਾਬੀ ਫ਼ਿਲਮਾਂ ਵਿੱਚ ਕੰਮ ਕੀਤਾ।
ਮਿਹਰ ਮਿੱਤਲ ਦਾ ਜਨਮ ਪੰਜਾਬ ਦੇ ਮਾਲਵਾ ਖ਼ਿੱਤੇ ਦੇ ਜ਼ਿਲ੍ਹਾ ਬਠਿੰਡਾ ਦੇ ਪਿੰਡ ਚੁੱਘੇ ਖ਼ੁਰਦ ਵਿਖੇ 20 ਸਤੰਬਰ, 1934 ਨੂੰ ਹੋਇਆ। ਸਿੱਖਿਆ ਦੇ ਖੇਤਰ ਵਿੱਚ 10ਵੀਂ ਤੋਂ ਲੈ ਕੇ ਬੀ ਏ ਤੱਕ ਦੀ ਪੜ੍ਹਾਈ ਉਨ੍ਹਾ ਬਠਿੰਡਾ ਤੋਂ ਪੂਰੀ ਕੀਤੀ। ਫ਼ਿਲਮਾਂ ਵਿੱਚ ਆਉਣ ਤੋਂ ਪਹਿਲਾਂ ਮੇਹਰ ਮਿੱਤਲ ਨੇ ਕੁੱਝ ਸਾਲ ਅਧਿਆਪਕ ਵਜੋਂ ਨੌਕਰੀ ਵੀ ਕੀਤੀ। ਇਸ ਤੋਂ ਬਾਅਦ ਮੇਹਰ ਮਿੱਤਲ ਨੇ ਵਕਾਲਤ ਵਿੱਚ ਕਿਸਮਤ ਅਜ਼ਮਾਈ। ਗੱਲ ਤੇ ਹਾਸੇ ਛਨਕਾਉਣ ਵਾਲੇ ਮੇਹਰ ਮਿੱਤਲ ਨਿਜੀ ਜ਼ਿੰਦਗੀ ਵਿੱਚ ਬਹੁਤ ਗੰਭੀਰ ਵੀ ਸਨ ਅਤੇ ਅਕਸਰ ਅਜਿਹੀ ਗੱਲ ਕਰਦੇ ਜੋ ਸੁਣਨ ਵਾਲੇ ਨੂੰ ਜ਼ਿੰਦਗੀ ਭਰ ਸੇਧ ਦੇਂਦੀ।  ਕਲਾ ਅਤੇ ਕੰਮ ਦੇ ਖੇਤਰ ਵਿੱਚ ਆਰਥਿਕ ਮਜਬੂਰੀਆਂ ਨੂੰ ਉਹਨਾਂ ਹੰਢਾਇਆ ਵੀ ਅਤੇ ਇਹਨਾਂ ਨੂੰ ਸਮਝਿਆ ਵੀ। ਇੱਕ ਵਾਰ ਇੱਕ ਮੀਡੀਆ ਇੰਟਰਵਿਊ ਵਿੱਚ ਉਹਨਾਂ ਨੂੰ ਪੁੱਛਿਆ ਗਿਆ ਕਿ ਤੁਸੀਂ ਅਕਸਰ ਜੁੱਤੀਆਂ ਖਾਣ ਵਾਲੇ ਰੋਲ ਕਿਓਂ ਕਰਦੇ ਹੋ? ਉਹਨਾਂ ਜੁਆਬ ਦਿੱਤਾ ਕਿ ਇਹ ਗੱਲ ਉਹਨਾਂ ਦੇ ਬੱਚੇ ਵੀ ਪੁੱਛਦੇ ਅਤੇ ਪਤਨੀ ਵੀ ਪਰ ਹੋਲੀ ਹੋਲੀ ਉਹਨਾਂ ਨੂੰ ਪਤਾ ਲੱਗ ਗਿਆ ਕਿ ਜੁੱਤੀਆਂ ਪੈਣਗੀਆਂ ਤਾਂ ਪੈਸੇ ਆਉਣਗੇ। ਇਸ ਲਈ ਕੜਕੀ ਹੁੰਦਿਆਂ  ਹੀ ਉਹ ਪੁੱਛਦੇ ਪਾਪਾ ਹੁਣ ਤੁਹਾਨੂੰ ਜੁੱਤੀਆਂ ਕਦੋਂ ਪੈਣੀਆਂ? ਕਲਾਕਾਰਾਂਦੀ ਜ਼ਿੰਦਗੀ ਨਾਲ ਜੁੜੀ ਇਹ ਹਕੀਕਤ ਅੱਜ ਦੇ ਪੂੰਜੀਵਾਦੀ ਯੁਗ ਉੱਤੇ ਇੱਕ ਵਿਅੰਗ ਵੀ ਸੀ। ਇਸ ਯੁਗ ਨੇ ਦੋ ਵਕਤ ਦੀ ਰੋਟੀ ਨੂੰ ਜਿਸ ਖੱਜਲ ਖੁਆਰੀ ਨਾਲ ਜੋੜ ਦਿੱਤਾ ਹੈ ਉਸ ਨੂੰ ਮੇਹਰ ਮਿੱਤਲ ਹੁਰਾਂ ਨੇ ਵੀ ਬਹੁਤ ਚੰਗੀ ਤਰਾਂ ਨੇੜਿਓਂ ਹੋ ਕੇ ਦੇਖਿਆ। ਪੂੰਜੀਵਾਦੀ ਸਿਸਟਮ ਦੀ ਇਸ ਬੇਰਹਿਮੀ ਨੇ ਕਲਾ ਨੂੰ ਕਲਾ ਨਹੀਂ ਰਹਿਣ ਦਿੱਤਾ ਬਲਕਿ ਇੱਕ ਵਪਾਰ ਬਣਾ ਦਿੱਤਾ ਹੈ। 
ਦਿਲ ਵਿੱਚ ਦਰਦਾਂ ਦੇ ਸਮੁੰਦਰ ਅਤੇ ਬੁੱਲਾਂ ਉੱਤੇ ਹਾਸੇ---ਜ਼ੁਬਾਨ ਉੱਤੇ ਲਤੀਫ਼ੇ---ਅਜਿਹੀ ਅਦਾਕਾਰੀ ਮੇਹਰ ਮਿੱਤਲ ਹੁਰਾਂ ਨੇ ਅਸਲੀ ਜ਼ਿੰਦਗੀ ਵਿੱਚ ਵੀ ਅਕਸਰ ਕਾਇਮ ਰੱਖੀ।  ਉਹਨਾਂ ਕਦੇ ਕਿਸੇ ਨਾਲ ਗਿਲਾ ਸ਼ਿਕਵਾ ਨਾ ਕੀਤਾ। ਫਿਲਮ ਇੰਡਸਟਰੀ ਦੇ ਸਬੰਧਾਂ ਵਿੱਚ ਅਕਸਰ ਖੱਟੀਆਂ ਮਿੱਠੀਆਂ ਗੱਲਾਂ ਚਲਦੀਆਂ  ਹਨ। ਜਦੋਂ ਕਦੇ ਕਿਸੇ ਪੱਤਰਕਾਰ ਨੇ ਕਿਸੇ ਦੀ ਗੱਲ ਨੂੰ ਭਾਣਾ ਬਣਾ ਕੇ ਮੇਹਰ ਮਿੱਤਲ ਹੁਰਾਂ ਦੇ ਮੂੰਹ ਵਿੱਚ ਕੋਈ ਗੱਲ ਪਾਉਣ ਦੀ ਕੋਸ਼ਿਸ਼ ਕਰਨੀ ਤਾਂ ਉਹਨਾਂ ਮੁਸਕਰਾ ਕੇ ਆਖਣਾ ਉਹ ਤਾਂ ਬੰਦਾ ਈ ਬਹੁਤ ਵਧੀਆ ਐਵੇਂ ਤੁਹਾਨੂੰ ਭੁਲੇਖਾ ਲੱਗਿਆ ਹੋਣੈ। 
ਉਹਨਾਂ ਚੰਡੀਗੜ੍ਹ ਵਿੱਚ ਅੱਠ ਸਾਲ ਟੈਕਸ ਵਕੀਲ ਵਜੋਂ ਪ੍ਰੈਕਟਿਸ ਕੀਤੀ, ਪਰ ਉਨ੍ਹਾ ਦਾ ਅੰਦਰਲਾ ਕਲਾਕਾਰ ਉਨ੍ਹਾ ਨੂੰ ਫ਼ਿਲਮਾਂ ਵੱਲ ਲੈ ਗਿਆ। ਮੇਹਰ ਮਿੱਤਲ ਨੇ 'ਵਲਾਇਤੀ ਬਾਬੂ', 'ਦੋ ਮਦਾਰੀ' ਫ਼ਿਲਮਾਂ ਤੋਂ ਫ਼ਿਲਮੀ ਜੀਵਨ ਦੀ ਸ਼ੁਰੂਆਤ ਕੀਤੀ।ਇਸ ਤੋਂ ਬਾਅਦ ਉਨ੍ਹਾ 'ਯਾਰੀ ਜੱਟ ਦੀ', 'ਬਟਵਾਰਾ', 'ਜੱਟ ਸੂਰਮੇ', 'ਨਿੰਮੋ' ਤੇ 'ਜੱਟ ਤੇ ਜ਼ਮੀਨ' ਵਰਗੀਆਂ ਅਣਗਿਣਤ ਫ਼ਿਲਮ ਦਿੱਤੀਆਂ। ਟੈਕਸ ਦੇ ਵਕੀਲ ਵੱਜੋਂ ਉਹਨਾਂ ਨੂੰ ਚੰਗੀ ਆਮਦਨ ਹੋ ਸਕਦੀ ਸੀ ਪਰ ਕਲਾ ਦੀ ਸਾਧਨਾ ਲਈ ਉਹਨਾਂ ਸਭ ਕੁਝ ਤਿਆਗ ਦਿੱਤਾ। 
ਇੱਕ ਵਾਰ ਕਿਸੇ ਮੀਡੀਆ ਵਾਲੇ ਨੇ ਪੁੱਛਿਆ ਤੁਸੀਂ ਰੋਲ ਤਾਂ ਇਹੋ ਜਿਹੇ ਹੀ ਕਰਦੇ ਹੋ ਪਰ ਤੁਹਾਨੂੰ ਫ਼ਿਲਮਾਂ ਵਿੱਚ ਆਪਣੇ ਨਾਲ ਕੰਮ ਕਰਨ ਲਈ ਕੁੜੀਆਂ ਬਹੁਤ ਸੋਹਣੀਆਂ ਮਿਲ ਜਾਂਦੀਆਂ ਹਨ ਇਸਦਾ ਕੀ ਰਾਜ ਹੈ? ਲੱਗਦਾ ਸੀ ਮੇਹਰ ਮਿੱਤਲ ਨਾਰਾਜ਼ ਹੋ ਜਾਣਗੇ ਪਾਰ ਉਹ ਕੁਝ ਗੰਭੀਰ ਹੋ ਕੇ ਬੋਲੇ--ਸੱਚੀਂ ਦੱਸਾਂ? ਇਹ ਰੱਬ ਦੀ ਕਿਰਪਾ ਬਿਨਾ ਨਹੀਂ ਹੁੰਦਾ। ਉਹ ਅਕਸਰ ਗੰਭੀਰ ਵਿਸ਼ਿਆਂ ਨੂੰ ਹਾਸਿਆਂ ਵਾਲੀ ਛੋਹ ਦੇ ਕੇ ਹਲਕੇ ਫੁਲਕੇ ਪਾਸੇ ਮੋੜ ਦੇਂਦੇ। ਉਹਨਾਂ ਦੀ ਘਾਟ ਕਦੇ ਪੂਰੀ ਨਹੀਂ ਹੋ ਸਕੇਗੀ। 

Monday, October 17, 2016

ਫਿਲਮ ਲਕੀਰਾਂ ਵਿੱਚ ਕਿਸਮਤ ਤੋਂ ਜ਼ਿਆਦਾ ਭਾਰੂ ਹੋਵੇਗੀ ਕਰਮ ਸ਼ਕਤੀ ਦੀ ਗੱਲ

 ਫਿਲਮ ਯੂਨਿਟ ਨੇ ਮੀਡੀਆ ਨਾਲ ਗੱਲਬਾਤ ਕੀਤੀ ਲੁਧਿਆਣਾ ਵਿੱਚ 
                                                                                                              ਸਾਰੀਆਂ ਤਸਵੀਰਾਂ ਪੰਜਾਬ ਸਕਰੀਨ ਲਈ  ਰੈਕਟਰ  ਕਥੂਰੀਆ 
ਲੁਧਿਆਣਾ: 16 ਅਕਤੂਬਰ 2016: (ਪੰਜਾਬ ਸਕਰੀਨ ਬਿਓਰੋ): ਕਿਸਮਤ ਦੀਆਂ ਅਤੇ ਤਕਦੀਰਾਂ ਦੀਆਂ ਕਹਾਣੀਆਂ ਉੱਤੇ ਬੜੀਆਂ ਫ਼ਿਲਮਾਂ ਬਣ ਚੁੱਕੀਆਂ ਹਨ। ਹੁਣ ਨਵੀਂ ਪੰਜਾਬੀ ਫੀਮ ਦਾ ਨਾਮ ਵੀ ਲਕੀਰਾਂ ਹੈ।  ਇਸ ਵਿੱਚ ਕਿਸਮਤ, ਹੋਣੀ ਅਤੇ ਤਕਦੀਰਾਂ ਨੂੰ ਕੱਟੇ ਬਿਨਾ ਕਰਮ ਸ਼ਕਤੀ ਦੀ ਅਹਿਮੀਅਤ ਨੂੰ ਵੀ ਦਿਖਾਇਆ ਗਿਆ ਹੈ।  ਇਹ ਦਾਅਵਾ ਅੱਜ ਲੁਧਿਆਣਾ ਵਿੱਚ ਫਿਲਮ ਯੂਨਿਟ ਨੇ ਇੱਕ ਪ੍ਰੈਸ ਕਾਨਫਰੰਸ ਦੌਰਾਨ ਕੀਤਾ। 
ਵੰਡਰਲੈਂਡ ਇਮਿਊਜ਼ਮੈਂਟ ਪਾਰਕਸ ਪ੍ਰਾਈਵੇਟ ਲਿਮਟਿਡ ਵੱਲੋਂ ਪ੍ਰੋਡਿਊਸ ਲਕੀਰਾਂ, ਪੰਜਾਬੀ ਰੋਮਾਂਟਿਕ ਡ੍ਰਾਮਾ ਆਉਣ ਵਾਲੀ 21ਅਕਤੂਬਰ ਨੂੰ ਰਿਲੀਜ਼ ਹੋਣ ਲਈ ਤਿਆਰ ਹੈ। ਫਿਲਮ ਵਿਚ ਹਰਮਨ ਵਿਰਕ ਅਤੇ ਯੁਵਿਕਾ ਚੌਧਰੀ ਨੇ ਮੁੱਖ ਭੂਮਿਕਾਵਾਂ ਅਦਾ ਕੀਤੀਆਂ ਹਨ ਅਤੇ ਗੁਰਿੰਦਰ ਰਾਏ, ਸ਼ਿਵੇਂਦਰ ਮਾਹਲ, ਬੀਐਨ ਸ਼ਰਮਾ, ਨਿਰਮਲ ਅਤੇ ਰਿਸ਼ੀ ਨੇ ਮਹੱਤਵਪੂਰਣ ਭੂਮਿਕਾਵਾਂ ਅਦਾ ਕੀਤੀਆਂ ਹਨ। ਫਿਲਮ ਦੀ ਕਹਾਣੀ ਕਾਫੀ ਦਿਲਚਸਪ ਅਤੇ ਦਰਸ਼ਕਾਂ ਨੂੰ ਬੰਨ ਕੇ ਰੱਖਦੀ ਹੈ। ਫਿਲਮ ਭਾਵਨਾਵਾਂ ਨਾਲ ਭਰਪੂਰ ਇਕ ਡ੍ਰਾਮਾ ਹੈ। ਫਿਲਮ ਵਿਚ ਦਿਲ ਨੂੰ ਮੋਹ ਲੈਣ ਵਾਲੇ ਕਈ ਦ੍ਰਿਸ਼ ਹਨ ਅਤੇ ਇਹ ਉਨਾਂ ਨੂੰ ਪਿਆਰ ਦੀ ਡੋਰ ਨਾਲ ਬੰਨਦੇ ਹੋਏ ਆਪਣੀ ਮੰਜ਼ਿਲ ਤੱਕ ਪਹੁੰਚਾਉਣ ਦਾ ਸਫਰ ਤੈਅ ਕਰਨ ਦੀ ਕਹਾਣੀ ਬਿਆਨ ਕਰਦੀ ਹੈ। ਇਸ ਵਿਚ ਕਾਮੇਡੀ ਸੀਨ ਵੀ ਦਰਸ਼ਕਾਂ ਨੂੰ ਕੁਤਕਤਾਰੀਆਂ ਕਰਨ ਲਈ ਤਿਆਰ ਹਨ।
ਫਿਲਮ ਨੂੰ ਖੂਬਸੂਰਤ ਪੁਰਤਗਾਲ ਅਤੇ ਪੰਜਾਬ ਦੇ ਹਰੇ-ਭਰੇ ਮਾਹੌਲ ਵਿਚ ਸ਼ੂਟ ਕੀਤਾ ਗਿਆ ਹੈ ਅਤੇ ਇਹ ਦੇਖਣ ਵਿਚ ਕਾਫੀ ਖੂਬਸੂਰਤ ਬਣ ਗਏ ਹਨ। ਫਿਲਮ ਵਿਚ ਮੌਕੇ ਅਨੁਸਾਰ ਕਾਫੀ ਖੂਬਸੂਰਤ ਗੀਤ ਵੀ ਹਨ ਜੋ ਕਿ ਪੰਜਾਬ ਦੇ ਰੰਗੀਲੇ ਮਾਹੌਲ ਨੂੰ ਪੇਸ਼ ਕਰਦੇ ਹਨ। ਲਵ ਸਾਂਗ ਨੂੰ ਕਸ਼ਮੀਰ ਦੀਆਂ ਖੂਬਸੂਰਤ ਵਾਦੀਆਂ ਵਿਚ ਸ਼ੂਟ ਕੀਤਾ ਗਿਆ ਹੈ ਅਤੇ ਧਰਤੀ ‘ਤੇ ਸਵਰਗ ਸਰੀਖੀ ਖੂਬਸੂਰਤੀ ਨੂੰ ਦਰਸ਼ਕਾਂ ਦੇ ਸਾਹਮਣੇ ਪੇਸ਼ ਕਰਦਾ ਹੈ। ਫਿਲਮ ਦੀ ਸਿਨੇਮੇਟੋਗ੍ਰਾਫੀ ਨਵੀਰ ਖਾਨ, ਅੰਸ਼ੁਲ ਚੌਬੇ ਅਤੇ ਜੋਓਮੋਂਗੇ ਨੇ ਕੀਤੀ ਹੈ ਤੇ ਫਿਲਮ ਦੇ ਪ੍ਰੋਮੋਸ਼ਨਲ ਹੈਡ ਹਨ ਗਣਪਤੀ ਕਿ੍ਰਏਸ਼ਨ  
ਫਿਲਮ ਦਾ ਸੰਗੀਤ ਡਾ. ਜੀਯੂਸ, ਸੰਤੋਸ਼ ਕਟਾਰੀਆ ਨੇ ਦਿੱਤਾ ਹੈ। ਫਿਲਮ ਵਿਚ 7 ਖੂਬਸੂਰਤ ਗੀਤ ਹਨ, ਜਿਨਾਂ ਵਿਚ ਦੋ ਲੋਕ ਗੀਤ ਵੀ ਹਨ ਜੋ ਕਿ ਕਿਸਮਤ ਦੀਆਂ ਕਹਾਣੀਆਂ ਨੂੰ ਦਰਸਾਉਂਦੇ ਹਨ ਅਤੇ ਇਨਾਂ ਨੂੰ ਆਰਿਫ ਲੌਹਾਰ ਨੇ ਕੰਪੋਜ ਕੀਤਾ ਹੈ। ਐਨਬਮ ਵਿਚ ਬੇਹੱਦ ਆਤਮਿਕ ਗੀਤ ਹਨ ਜੋ ਕਿ ਦਰਸ਼ਕਾਂ ਨੂੰ ਕੀਲਣ ਦੀ ਸਮਰਥਾ ਰੱਖਦੇ ਹਨ। ਗੀਤਾਂ ਨੂੰ ਮੰਨੇ-ਪ੍ਰਮੰਨੇ ਗਾਇਕਾਂ ਨੇ ਗਾਇਆ ਹੈ ਜਿਨਾਂ ਵਿਚ ਜੋਰਾ ਰੰਧਾਵਾ ਅਤੇ ਫਤਹਿ ਸ਼ਾਮਲ ਹਨ ਅਤੇ ਉਹ ਅੱਜ ਦੇ ਸਰੋਤਾਵਾਂ ਦੀ ਪਹਿਲੀ ਪਸੰਦ ਹਨ। ਉਥੇ ਪਾਰੰਪਰਿਕ ਦਰਸ਼ਕਾਂ ਲਈ ਨਛੱਤਰ ਗਿੱਲ, ਜਸਪਿੰਦਰ ਨਰੂਲਾ ਅਤੇ ਫਿਰੋਜ਼ ਖਾਨ ਨੇ ਵੀ ਖੂਬਸੂਰਤ ਗੀਤ ਗਾਏ ਹਨ।
ਆਉਣ ਵਾਲੀ ਫਿਲਮ ਨੂੰ ਲੈ ਕੇ ਰੋਮਾਂਚਿਤ ਹਰਮਨ ਵਿਰਕ ਨੇ ਕਿਹਾ , ‘‘ ਤਿਉਹਾਰਾਂ ਦੇ ਮੌਕੇ ‘ਤੇ ਮੈਂ ਫਿਲਮ ਦੀ ਰਿਲੀਜ ਨੂੰ ਲੈ ਕੇ ਬੇਹੱਦ ਰੋਮਾਂਚਕ ਹਾਂਉਂ ਫਿਲਮ ਪੂਰੇ ਪਰਿਵਾਰ ਦਾ ਮਨੋਰੰਜਨ ਕਰਨ ਵਿਚ ਸਮਰਥ ਹੈ ਅਤੇ ਦਿਲ ਨੂੰ ਛੂਹ ਲੈਣ ਵਾਲੀ ਰੋਮਾਂਟਿਕ ਫਿਲਮ ਹੈ। ਉਮੀਦ ਹੈ ਕਿ ਦਰਸ਼ਕ ਇਸ ਦਾ ਆਨੰਦ ਲੈਣਗੇ। ਮੈਨੂੰ ਵੀ ਇਸ ਨੂੰ ਬਣਾਉਂਦੇ ਹੋਏ ਬੇਹੱਦ ਆਨੰਦ ਆਇਆ। ਫਿਲਮ 21 ਅਕਤੂਬਰ ਨੂੰ ਰਿਲੀਜ ਹੋਣ ਲਈ ਤਿਆਰ ਹੈ ਅਤੇ ਤੁਸੀਂ ਵੀ ਇਸ ਨੂੰ ਬਹੁਤ ਪਸੰਦ ਕਰੋਗੇ।‘‘
ਲਕੀਰਾਂ 21 ਅਕਤੂਬਰ, 2016 ਨੂੰ ਰਿਲੀਜ ਹੋਣ ਲਈ ਤਿਆਰ ਹੈ। ਤੁਸੀਂ ਇਸ ਖੂਬਸੂਰਤ ਫਿਲਮ ਦਾ ਅਨੰਦ ਲੈਣ ਲਈ ਆਪਣੇ ਨਜ਼ਦੀਕੀ ਸਿਨੇਮਾ ਤੱਕ ਜ਼ਰੂਰ ਜਾਓ। ਹੁਣ ਦੇਖਣਾ ਹੈ ਕਿ ਫਿਲਮ ਨੂੰ ਦਰਸ਼ਕਾਂ ਦੀ ਕਿੰਨੀ ਕੁ ਪਸੰਦ ਨਸੀਬ ਹੁੰਦੀ ਹੈ। 
  

Tuesday, August 25, 2015

ਪੰਜ ਅਹਿਮ ਚੀਜ਼ਾਂ ਵਿੱਚ ਮੀਟ ਸ਼ਰਾਬ ਦੇ ਨਾਲ ਸ੍ਰੀ ਦਰਬਾਰ ਸਾਹਿਬ ਦਾ ਨਾਂ ਵੀ ਸ਼ਾਮਲ

ਸ੍ਰੀ ਅਕਾਲ ਤਖ਼ਤ ਦੇ ਜਥੇਦਾਰ ਵੱਲੋਂ ‘ਸਿੰਘ ਇਜ਼ ਬਲਿੰਗ’ ਦੇ ਦ੍ਰਿਸ਼ਾਂ ’ਤੇ ਇਤਰਾਜ਼
ਅੰਮ੍ਰਿਤਸਰ, 24 ਅਗਸਤ 2015: (ਪੰਜਾਬ ਸਕਰੀਨ ਬਿਊਰੋ): 
ਫਿਲਮਾਂ ਦੇ ਨਿਰਮਾਣ ਵੇਲੇ ਸਿੱਖ ਰਹੁ ਰੀਤਾਂ ਅਤੇ ਸਿੱਖ ਲਾਈਫ ਸਟਾਈਲ ਨੂੰ ਅੱਖੋਂ ਪਰੋਖੇ ਕਰਨ ਦਾ ਸਿਲਸਿਲਾ ਜਾਰੀ ਹੈ। ਇਸ ਲਈ ਜਦੋਂ ਵੀ ਕੋਈ ਫਿਲਮ ਬਣਦੀ ਹੈ ਤਾਂ ਕੋਈ ਨ ਕੋਈ ਵਾਵੇਲਾ ਖੜਾ ਹੁੰਦਾ ਹੀ ਰਹਿੰਦਾ ਹੈ। ਫਿਲਮਾਂ ਵਾਲੇ ਆਮ ਤੌਰ ਤੇ ਸ਼ੁਧ ਕਾਰੋਬਾਰੀ ਸੋਚ ਵਾਲੇ ਹੁੰਦੇ ਹਨ।  ਉਹਨਾਂ ਨੇ ਫਿਲਮ ਚਲਾਉਣ ਲਈ ਪੂਰਾ ਮਸਲਾ ਭਰਨਾ ਹੁੰਦਾ ਹੈ। ਮਾਮਲਾ ਉਦੋਂ ਵਿਗੜਦਾ ਹੈ ਜਦੋਂ ਓਹ ਇਸ ਮਸਾਲੇ ਵਿੱਚ ਸਿੱਖ ਧਰਮ ਨਾਲ ਜੁੜੇ ਧਰਮ ਅਸਥਾਨਾਂ ਅਤੇ ਧਾਰਮਿਕ ਚਿੰਨ੍ਹਾਂ ਨੂੰ ਵੀ ਸ਼ਾਮਲ ਕਰ ਲੈਂਦੇ ਹਨ। ਕੁਝ ਅਜਿਹਾ ਹੀ ਹੋਇਆ ਲੱਗਦਾ ਹੈ ਫਿਲਮ ਸਿੰਘ ਇਜ਼ ਬਲਿੰਗ ਦੇ ਮਾਮਲੇ ਵਿੱਚ। 
ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਜਥੇਦਾਰ ਗਿਆਨੀ ਗੁਰਬਚਨ ਸਿੰਘ ਨੇ ਨਵੀਂ ਆ ਰਹੀ ਫਿਲਮ ‘ਸਿੰਘ ਇਜ਼ ਬਲਿੰਗ’ ਦੇ ਕੁਝ ਦ੍ਰਿਸ਼ਾਂ ’ਤੇ ਇਤਰਾਜ਼ ਪ੍ਰਗਟਾਇਆ ਹੈ। ਉਨ੍ਹਾਂ ਨੇ ਫਿਲਮ ਦੇ ਨਿਰਮਾਤਾ ਤੇ ਨਿਰਦੇਸ਼ਕ ਨੂੰ ਇਹ ਦ੍ਰਿਸ਼ ਹਟਾਉਣ ਲਈ ਕਿਹਾ ਹੈ। ਅੱਜ ਇਥੇ ਸ੍ਰੀ ਅਕਾਲ ਤਖ਼ਤ ਦੇ ਸਕੱਤਰੇਤ ਵਿੱਚ ਜਥੇਦਾਰ ਨੇ ਦੱਸਿਆ ਕਿ ਫਿਲਮ ਵਿੱਚ ਦਿਖਾਏ ਗਏ ਇਤਰਾਜ਼ਯੋਗ ਦ੍ਰਿਸ਼ਾਂ ਦਾ ਮਾਮਲਾ ਇਸ ਵੇਲੇ ਇਕ ਸੋਸ਼ਲ ਸਾਈਟ ’ਤੇ ਚਰਚਾ ਦਾ ਵਿਸ਼ਾ ਬਣਿਆ ਹੋਇਆ ਹੈ, ਜਿਸ ਤੋਂ ਬਾਅਦ ਵੱਡੇ ਪੱਧਰ ’ਤੇ ਸਿੱਖ ਭਾਈਚਾਰੇ ਵੱਲੋਂ ਇਸ ਬਾਰੇ ਸ਼ਿਕਾਇਤਾਂ ਕੀਤੀਆਂ ਜਾ ਰਹੀਆਂ ਹਨ। ਸੋਚਣ ਵਾਲੀ ਗੱਲ ਇਹ ਹੈ ਕਿ ਧਾਰਮਿਕ ਸ਼ਖਸੀਅਤਾਂ ਦੇ ਨੋਟਿਸ ਵਿੱਚ ਅਜਿਹਾ ਮਾਮਲਾ ਵਿਵਾਦਿਤ ਹੋਣ ਤੋਂ ਬਾਅਦ ਹੀ ਕਿਓਂ ਆਉਂਦਾ ਹੈ ਪਹਿਲਾਂ ਕਿਓਂ ਨਹੀਂ? ਇਸ ਕੰਮ ਲਈ ਕੋਈ ਪੱਕੀ ਨਿਗਰਾਨ ਕਮੇਟੀ ਕਿਓਂ ਨਹੀਂ ਬਣਾਈ ਜਾਂਦੀ?
ਫਿਲਮ ਦੀਆਂ ਇਤਰਾਜ਼ਯੋਗ ਗੱਲਾਂ ਬਾਰੇ ਉਨ੍ਹਾਂ ਦੱਸਿਆ ਕਿ ਫਿਲਮ ਵਿੱਚ ਕੜੇ ਦੀ ਦੁਰਵਰਤੋਂ ਕੀਤੀ ਗਈ ਹੈ। ਕੜੇ ਵਾਲੇ ਦ੍ਰਿਸ਼ ਦੌਰਾਨ ਨੰਗੇਜ਼ ਦਿਖਾਇਆ ਗਿਆ ਹੈ ਜਦੋਂ ਕਿ ਕੜੇ ਉਪਰ ਗੁਰਬਾਣੀ ਦੀ ਤੁਕ ਵੀ ਉਕਰੀ ਹੋਈ ਹੈ। ਇਸੇ ਤਰ੍ਹਾਂ ਫਿਲਮ ਦੇ ਇਕ ਦ੍ਰਿਸ਼ ਵਿੱਚ ਪੰਜਾਬ ਦੀ ਸ਼ਲਾਘਾ ਕਰਦਿਆਂ ਪੰਜ ਅਹਿਮ ਚੀਜ਼ਾਂ ਵਿੱਚ ਮੀਟ ਸ਼ਰਾਬ ਦੇ ਨਾਲ ਸ੍ਰੀ ਦਰਬਾਰ ਸਾਹਿਬ ਦਾ ਵੀ ਨਾਂ ਸ਼ਾਮਲ ਕੀਤਾ ਗਿਆ ਹੈ, ਜੋ ਇਤਰਾਜ਼ਯੋਗ ਹੈ। ਉਨ੍ਹਾਂ ਆਖਿਆ ਕਿ ਫਿਲਮ ਦੇ ਨਿਰਮਾਤਾ ਨਿਰਦੇਸ਼ਕ ਸਿੱਖ ਭਾਵਨਾਵਾਂ ਨੂੰ ਧਿਆਨ ਵਿੱਚ ਰੱਖਦਿਆਂ ਇਹ ਇਤਰਾਜ਼ਯੋਗ ਦ੍ਰਿਸ਼ ਫਿਲਮ ਵਿੱਚੋਂ ਹਟਾਉਣ। ਜੇਕਰ ਅਜਿਹਾ ਨਾ ਹੋਇਆ ਤਾਂ ਸਿੱਖ ਭਾਈਚਾਰੇ ਵੱਲੋਂ ਫਿਲਮ ਦੇ ਨਿਰਮਾਤਾ ਨਿਰਦੇਸ਼ਕ ਖ਼ਿਲਾਫ਼ ਕਾਨੂੰਨੀ ਚਾਰਾਜੋਈ ਕੀਤੀ ਜਾਵੇਗੀ। ਇਸ ਤੋਂ ਪਹਿਲਾਂ ਫਿਲਮਾਂ ਸਿੰਘ ਇਜ਼ ਕਿੰਗ, ਸਨ ਆਫ ਸਰਦਾਰ ਅਤੇ ਸਿੰਘ ਸਾਹਿਬ ਦਿ ਗ੍ਰੇਟ ਵੀ ਇਤਰਾਜ਼ ਦਾ ਹਿੱਸਾ ਬਣ ਚੁੱਕੀਆਂ ਹਨ।
ਦਿੱਲੀ ਕਮੇਟੀ ਵੱਲੋਂ ਪੋਸਟਰ ’ਤੇ ਗੁਰਬਾਣੀ ਦੀ ਤੁੱਕ ਦਾ ਵਿਰੋਧ
ਨਵੀਂ ਦਿੱਲੀ:  ਫਿਲਮ ‘ਸਿੰਘ ਇਜ਼ ਬਲਿੰਗ’ ਦੇ ਪੋਸਟਰ ਉਤੇ ਗੁਰਬਾਣੀ ਦੀਆਂ ਤੁੱਕਾਂ ਲਿਖਣ ’ਤੇ ਦਿੱਲੀ ਸਿੱਖ ਗੁਰਦੁਆਰਾ ਪ੍ਬੰਧਕ ਕਮੇਟੀ ਨੇ ਇਤਰਾਜ਼ ਜਤਾਇਆ ਹੈ। ਧਰਮ ਪ੍ਰਚਾਰ ਕਮੇਟੀ ਦੇ ਚੇਅਰਮੈਨ ਪਰਮਜੀਤ ਸਿੰਘ ਰਾਣਾ ਨੇ ਸੈਂਟਰਲ ਬੋਰਡ ਆਫ ਫਿਲਮ ਸਰਟੀਫਿਕੇਸ਼ਨ ਦੇ ਚੇਅਰਮੈਨ ਪਹਿਲਾਜ ਨਿਹਲਾਨੀ ਨੂੰ ਇਸ ਬਾਰੇ ਭੇਜੇ ਪੱਤਰ ਦਾ ਉਤਾਰਾ ਸੈਂਸਰ ਬੋਰਡ ਦੇ ਸਲਾਹਕਾਰ ਪੈਨਲ ’ਚ ਸਿੱਖ ਮੈਂਬਰ ਗੁਰਪ੍ਰੀਤ ਕੌਰ ਚੱਢਾ ਨੂੰ ਵੀ ਭੇਜਿਆ ਹੈ। ਸ੍ਰੀ ਰਾਣਾ ਨੇ ਸੁਖਮਨੀ ਸਾਹਿਬ ਦੀ ਅਸ਼ਟਪਦੀ ਦੀਅਾਂ ਕੁਝ ਤੁੱਕਾਂ ਨੂੰ ਕੜੇ ਉਪਰ ਉਕੇਰਨ ਅਤੇ ਇਸ ਕਡ਼ੇ ਦੇ ਘੇਰੇ ’ਚ ਘੱਟ ਕੱਪੜਿਆਂ ਵਿੱਚ ਕੁੜੀ ਦਾ ਪੋਸਟਰ ਫਿਲਮ ਦੇ ਪ੍ਰਚਾਰ ਲਈ ਵਰਤਣ ’ਤੇ ਇਤਰਾਜ਼ ਜਤਾਇਆ ਹੈ।

Tuesday, May 21, 2013

ਵਿੰਦੂ ਦਾਰਾ ਸਿੰਘ ਦੀ ਗ੍ਰਿਫਤਾਰੀ

ਦਾਰਾ ਸਿੰਘ ਪਰਿਵਾਰ ਦੇ ਸਮਰਥਕਾਂ ਲਈ  ਝਟਕਾ
ਸਪਾਟ ਫਿਕਸਿੰਗ ਦੇ ਮਾਮਲੇ ਵਿੱਚ ਸ਼੍ਰੀਸੰਥ ਤੋਂ ਬਾਅਦ ਵਿੰਦੁ ਦਾਰਾ ਸਿੰਘ ਦਾ ਨਾਮ ਸਾਹਮਣੇ ਆਇਆ ਹੈ। ਦਾਰਾ ਸਿੰਘ ਫਿਲਮੀ ਜ਼ਿੰਦਗੀ ਦੇ ਨਾਲ ਨਾਲ ਕਾਰ ਵਿਹਾਰ ਵਾਲੀ ਨਿਜੀ ਜ਼ਿੰਦਗੀ ਵਿੱਚ ਵੀ ਬੜੇ ਸਾਫ਼ ਸਪਸ਼ਟ ਅਤੇ ਬੇਦਾਗ ਰਹੇ। ਇਸ ਦੁਨੀਆ ਤੋਂ ਉਹਨਾਂ ਦੇ ਤੁਰ ਜਾਣ ਮਗਰੋਂ ਫਿਕਸਿੰਗ ਵਰਗੇ ਮਾਮਲੇ ਵਿੱਚ ਵਿੰਦੁ ਦਾ ਨਾਮ ਆਉਣਾ ਬਹੁਤ ਸਾਰਿਆਂ ਲਈ ਇੱਕ ਸਦਮੇ ਵਾਲੀ ਗੱਲ ਸਾਬਿਤ ਹੋਵੇਗੀ। ਬਿਗ ਬੌਸ-3 ਜਿੱਤਣ ਤੋਂ ਬਾਅਦ ਚਰਚਾ ਵਿਚ ਆਏ ਵਿੰਦੂ ਦਾਰਾ ਸਿੰਘ ਨੂੰਪੁਲਿਸ ਫੋਰਸ ਨੇ ਸਪਾਟ ਫਿਕਸਿੰਗ ਦੇ ਨਾਲ ਜੁੜੇ ਇਕ ਮਾਮਲੇ 'ਚ ਮੁੰਬਈ ਤੋਂ ਹਿਰਾਸਤ 'ਚ ਲਿਆ। ਟੀ ਵੀ ਚੈਨਲ ਬਾਰ ਬਾਰ ਇਹੀ ਖਬਰ ਦਿਖਾ ਰਹੇ ਹਨ। ਇਸ ਸਬੰਧੀ ਮਿਲੇ ਵੇਰਵਿਆਂ ਮੁਤਾਬਿਕ ਮੈਚ ਫਿਕਸਿੰਗ ਦੇ ਦੋਸ਼ ਵਿਚ ਫੜੇ ਗਏ ਬੁਕੀ ਰਮੇਸ਼ ਵਿਆਸ ਨਾਮਕ ਇਕ ਵਿਅਕਤੀ ਵਲੋਂ ਇਸ ਮਾਮਲੇ ਵਿਚ ਵਿੰਦੂ ਦਾਰਾ ਸਿੰਘ ਦੇ ਨਾਂ ਦਾ ਖੁਲਾਸਾ ਕੀਤਾ ਗਿਆ ਸੀ। ਇਹ ਨਾਮ ਸਾਹਮਣੇ ਆਉਣ ਤੋਂ ਬਾਅਦ ਪੁਲਸ ਨੇ ਬੜੀ ਹੀ ਫੁਰਤੀ ਨਾਲ ਵਿੰਦੂ ਦਾਰਾ ਸਿੰਘ ਨੂੰ ਹਿਰਾਸਤ 'ਚ ਲੈ ਲਿਆ। ਦੱਸਿਆ ਜਾਂਦਾ ਹੈ ਕਿ ਪੁਲਸ ਹੁਣ ਇਸ ਮਾਮਲੇ ਵਿਚ ਵਿੰਦੂ ਦਾਰਾ ਸਿੰਘ ਕੋਲੋਂ  ਪੁੱਛਗਿੱਛ ਕਰੇਗੀ। ਪੁਲਸ ਨੂੰ ਸ਼ੱਕ ਹੈ ਕਿ ਵਿੰਦੂ ਦਾਰਾ ਸਿੰਘ ਦਾ ਵੀ ਸਪਾਟ ਫਿਕਸਿੰਗ ਦੇ ਮਾਮਲੇ ਨਾਲ ਜਰੂਰ ਹੀ ਕੋਈ ਡੂੰਘਾ ਸਬੰਧ ਹੈ। ਸ਼੍ਰੀਸੰਥ ਤੋਂ ਬਾਅਦ ਇਸ ਮਾਮਲੇ 'ਚ ਗ੍ਰਿਫਤਾਰ ਹੋਣ ਵਾਲੇ ਵਿੰਦੂ ਦਾਰਾ ਸਿੰਘ ਦੂਜੇ ਵੱਡੇ ਚੇਹਰੇ ਹਨ। ਇੱਕ ਅਜਿਹਾ ਚਿਹਰਾ ਜਿਸ ਨਾਲ ਬਹੁਤ ਸਾਰੇ ਆਮ ਲੋਕਾਂ ਦੀਆਂ ਭਾਵਨਾਵਾਂ ਜੁੜੀਆਂ ਹੋਈਆਂ ਹਨ। ਅਸਲ ਵਿੱਚ ਐਤਵਾਰ ਨੂੰ ਹੀ ਪੁਲਸ ਨੇ ਖੁਲਾਸਾ ਕੀਤਾ ਸੀ ਕਿ ਸਪਾਟ ਫਿਕਸਿੰਗ ਦੇ ਬਾਲੀਵੁੱਡ ਨਾਲ ਵੀ ਕੁਨੈਕਸ਼ਨ ਹਨ ਅਤੇ ਇਸ ਮਾਮਲੇ 'ਚ ਕੁਝ ਹੋਰ ਗ੍ਰਿਫਤਾਰੀਆਂ ਹੋ ਸਕਦੀਆਂ ਹਨ। ਵਿੰਦੂ ਦਾਰਾ ਸਿੰਘ ਦੀ ਗ੍ਰਿਫਤਾਰੀ ਇਸ ਸਿਲਸਿਲੇ ਵਿੱਚ ਪਹਿਲੀ ਅਜਿਹੀ ਗ੍ਰਿਫਤਾਰੀ ਹੈ। ਇਸ ਗਿਰਫਤਾਰੀ ਨਾਲ ਇਹ ਸੰਕੇਤ ਵੀ ਮਿਲ ਰਿਹਾ ਹੈ ਕੀ ਇਸ ਮਾਮਲੇ ਵਿੱਚ ਪੁਲਿਸ ਕੋਲ ਕਈ ਹੋਰ ਨਾਮ ਵੀ ਹੋ ਸਕਦੇ ਹਨ। ਕਾਬਿਲੇ ਜ਼ਿਕਰ ਹੈ ਕਿ ਸਪਾਟ ਫਿਕਸਿੰਗ ਨੂੰ ਲੈ ਕੇ ਦਿੱਲੀ ਪੁਲਸ ਵਲੋਂ ਨਿੱਤ ਨਵੇਂ ਖੁਲਾਸੇ ਕੀਤੇ ਜਾ ਰਹੇ ਹਨ। ਹੁਣ ਤੱਕ ਇਸ ਮਾਮਲੇ ਵਿਚ ਸ਼੍ਰੀਸੰਥ ਅਤੇ ਦੋ ਹੋਰ ਕ੍ਰਿਕਟ ਖਿਡਾਰੀਆਂ ਸਮੇਤ ਕਰੀਬ ਦਰਜਨ ਵਿਅਕਤੀਆਂ ਦੀ ਗ੍ਰਿਫਤਾਰੀ ਕੀਤੀ ਜਾ ਚੁੱਕੀ ਹੈ। ਵਿੰਦੂ ਦੀ ਗ੍ਰਿਫਤਾਰੀ ਦਾਰਾ ਸਿੰਘ ਦੇ ਪ੍ਰਸ਼ੰਸਕਾਂ ਲਈ ਵੱਡੇ ਝਟਕੇ ਵਾਲੀ ਖਬਰ ਹੈ ਕਿਉਂਕਿ ਦਾਰਾ ਸਿੰਘ ਨੇ ਪੂਰੀ ਉਮਰ ਭਲਵਾਨੀ ਕਰਨ ਦੇ ਨਾਲ-ਨਾਲ ਨੌਜਵਾਨਾਂ ਨੂੰ ਸਿਹਤਮੰਦ ਰਹਿਣ ਦਾ ਸੰਦੇਸ਼ ਦਿੱਤਾ ਹੈ ਅਜਿਹੇ ਵਿਚ ਜੇ ਉਨ੍ਹਾਂ ਦੇ ਆਪਣੇ ਪੁੱਤਰ ਦੇ ਖਿਲਾਫ ਇਸ ਮਾਮਲੇ 'ਚ ਕਿਸੇ ਤਰ੍ਹਾਂ ਦੇ ਦੋਸ਼ ਸਾਬਿਤ ਹੁੰਦੇ ਹਨ ਪੰਜਾਬੀਆਂ ਲਈ ਇਹ ਇੱਜ਼ਤ ਨੂੰ  ਢਾਅ ਲਾਉਣ ਵਾਲਾ ਸਾਬਿਤ ਹੋ ਸਕਦਾ ਹੈ। ਬਜਰੰਗ ਬਲੀ ਅਤੇ ਹਨੁਮਾਨ ਵਾਲੀ ਤਸਵੀਰ ਕਾਰਣ ਲੋਕ ਸਾਹ ਰੋਕ ਕੇ ਇਸ ਮਾਮਲੇ ਦੇ ਅਗਲੇ ਵੇਰਵਿਆਂ ਦੀ ਉਡੀਕ ਕਰ ਰਹੇ ਹਨ।  ਇਸਦੇ ਨਾਲ ਹੀ ਚੱਲ ਰਹੀ ਹੈ ਇਹ ਦੁਆ ਕਿ ਹੇ ਰੱਬਾ ਇਹ ਸਭ ਝੂਠ ਨਿਕਲੇ।

Thursday, February 23, 2012

ਛੋਟੇ ਸਫ਼ਰ ਦੀ ਵੱਡੀ ਅਦਾਕਾਰਾ–ਮਧੂਬਾਲਾ // ਰਣਜੀਤ ਸਿੰਘ ਪ੍ਰੀਤ

ਜਿਊਂਦੇ ਜੀ ਕੋਈ ਵੀ ਇਨਾਮ-ਸਨਮਾਨ ਨਾ ਦਿੱਤਾ ਗਿਆ                                          
ਕੁੱਝ ਲੋਕ ਇਸ ਦੁਨੀਆਂ ‘ਤੇ ਆਉਂਦੇ ਹਨ,ਬਗੈਰ ਕੁੱਝ ਜ਼ਿਕਰਯੋਗ ਕਰਿਆਂ ਤੁਰ ਜਾਂਦੇ ਹਨ। ਪਰ ਕੁੱਝ ਅਜਿਹੇ ਵੀ ਹੁੰਦੇ ਹਨ, ਜੋ ਥੋਡ਼੍ਹੀ ਉਮਰ ਭੋਗ ਕੇ ਵੀ ਅਮਿੱਟ ਪੈਡ਼ਾਂ  ਛੱਡ ਜਾਂਦੇ ਹਨ। ਜਿੰਨ੍ਹਾਂ ਨੂੰ ਲੋਕ ਬਹੁਤ ਪਿਆਰ ਸਤਿਕਾਰ ਨਾਲ ਯਾਦ ਕਰਿਆ ਕਰਦੇ ਹਨ। ਅਜਿਹੀ ਹੀ ਸੀ ਅਦਾਕਾਰਾ ‘ਮਧੂਬਾਲਾ’। ਮੁੱਢਲੇ ਨਾਂਅ ਮੁਮਤਾਜ ਬੇਗ਼ਮ ਜਹਾਂ ਦੇਹਲਵੀ ਵਾਲੀ ਮਧੂਬਾਲਾ ਦਾ ਜਨਮ ਦਿੱਲੀ ਵਿੱਚ ਅਤਾਉਲਾ ਖ਼ਾਨ ਦੇ ਘਰ 14 ਫਰਵਰੀ 1933 ਨੂੰ ਹੋਇਆ। ਉਹ ਪਰਿਵਾਰ ਦੇ 11 ਬੱਚਿਆਂ ਵਿੱਚੋਂ ਪੰਜਵਾਂ ਬੱਚਾ ਸੀ। ਮੁਮਤਾਜ ਦੇ ਅੱਬੂ ਜੋ ਪਿਸ਼ਾਵਰ ਵਿਖੇ ਇੰਪੀਰੀਅਲ ਤਮਾਕੂ ਕੰਪਨੀ ਵਿੱਚ ਨੌਕਰੀ ਕਰਦੇ ਸਨ, ਉਹਨਾਂ ਨੂੰ ਉਹ ਛੱਡ ਕੇ ਮੂੰਬਈ ਆਉਣਾ ਪਿਆ। ਸਨ 1942 ਤੋਂ 1960 ਤੱਕ ਫ਼ਿਲਮੀ ਜਗਤ ਵਿੱਚ ਆਪਣੀ ਬਾਦਸ਼ਾਹਤ ਕਾਇਮ ਰੱਖਣ ਵਾਲੀ ਮੁਮਤਾਜ ਨੇ 10 ਕੁ ਸਾਲ ਦੀ ਉਮਰੇ 1942 ਵਿੱਚ ਬਾਲ ਕਲਾਕਾਰਾ ਵਜੋਂ ਫ਼ਿਲਮ ‘ਬਸੰਤ’ਲਈ ਪਹਿਲੀ ਭੂਮਿਕਾ ਨਿਭਾਈ। ਇਸ ਤੋਂ ਪ੍ਰਭਾਵਿਤ ਹੁੰਦਿਆਂ ਅਭਿਨੇਤਰੀ ਦੇਵਿਕਾ ਰਾਣੀ ਨੇ ਮਸ਼ਵਰਾ ਦਿੱਤਾ ਕਿ ਉਹ ਆਪਣਾ ਨਾਂਅ ਮਧੂ ਰੱਖ ਲਵੇ, ਜਿਸ ਦਾ ਅਰਥ ‘ਸ਼ਹਿਦ ਦੀ ਔਰਤ’ ਹੁੰਦਾ ਹੈ ਅਤੇ ਉਹ ਮੁਮਤਾਜ ਤੋਂ ਮਧੂਬਾਲਾ ਅਖਵਾਉਂਣ ਲੱਗੀ।

      ਫਿਰ 1947 ਵਿੱਚ ਬੇਬੀ ਮੁਮਤਾਜ ਨੂੰ ਨਾਇਕਾ ਮੁਮਤਾਜ ਦਾ ਨਾਂਅ ਦਿੰਦਿਆਂ ਨਿਰਮਾਤਾ-ਨਿਰਦੇਸ਼ਕ ਕੇਦਾਰ ਸ਼ਰਮਾ ਨੇ ਫ਼ਿਲਮ ‘ਨੀਲ ਕਮਲ’ ਵਿੱਚ 14 ਵਰ੍ਹਿਆਂ ਦੇ ਰਾਜ ਕਪੂਰ ਨਾਲ ਅਹਿਮ ਰੋਲ ਦਿੱਤਾ। ਇਸ ਫਿਲਮ ਨਾਲ ਉਸਦੀ ਪਹਿਚਾਣ ਨਾਇਕਾ ਵਜੋਂ ਹੋਣ ਲੱਗੀ। ਪਰ ਫ਼ਿਲਮੀ ਸਟਾਰ ਅਦਾਕਾਰਾ ਦਾ ਰੁਤਬਾ 1949 ਵਿੱਚ ਬਣੀ ‘ਮਹਿਲ’ ਫ਼ਿਲਮ ਤੋਂ ਮਿਲਿਆ। ਮਧੂਬਾਲਾ ਦੀ ਗਿਣਤੀ ਭਾਰਤੀ ਸਿਨੇ ਜਗਤ ਦੀ ਮੈਡੋਨਾਂ ਵਜੋਂ ਹੋਣ ਲੱਗੀ।  
        ਮਧੂਬਾਲਾ ਨੇ ਪਹਿਲੇ ਚਾਰ ਸਾਲਾ ਵਿੱਚ 24 ਫ਼ਿਲਮਾਂ ਕੀਤੀਆਂ। ਅਲੋਚਕਾਂ ਦਾ ਕਹਿਣਾ ਸੀ ਕਿ ‘ਉਹ ਕਲਾ ਦੀ ਬਜਾਇ ਸੁੰਦਰਤਾ ਦਾ ਹੀ ਵੱਧ ਲਾਹਾ ਖੱਟ ਰਹੀ ਹੈ। ਉਸਨੇ ਫ਼ਿਲਮ ਨਿਰਦੇਸ਼ਕਾਂ ਮਹਿਬੂਬ ਖ਼ਾਨ (ਅਮਰ), ਗੁਰੂਦੱਤ (ਸ਼੍ਰੀ ਔਰ ਸ਼੍ਰੀਮਤੀ-55),ਕਮਾਲ ਅਮਰੋਹੀ (ਮਹਿਲ),ਕੇ.ਆਸਿਫ਼ (ਮੁਗ਼ਲ-ਇ-ਆਜ਼ਮ),ਲਈ ਕੰਮ ਕਰਿਆ । ‘ਕੱਲ੍ਹ ਹਮਾਰਾ’(1959) ਵਿੱਚ ਉਹ ਦੋਹਰੇ ਰੋਲ ਵਿੱਚ ਆਈ ਅਤੇ ਕਮਾਲ ਕਰ ਵਿਖਾਈ । ਸਨ 1950 ਵਿੱਚ ਉਸਨੇ ਹਰ ਪ੍ਰਕਾਰ ਦੇ ਰੋਲ ਕਰਦਿਆਂ ਟਿਪਣੀਕਾਰਾਂ ਦਾ ਮੂੰਹ ਬੰਦ ਕਰ ਵਿਖਇਆ। ਜਦ 1950 ਵਿੱਚ ਪਹਿਲੀ ਹਿੰਦੀ ਫ਼ਿਲਮ ਸਿਰਫ਼ ਬਾਲਗਾਂ ਲਈ ਫ਼ਿਲਮ ਸੈਂਟਰਲ ਬੋਰਡ ਵਲੋਂ ’ਹੰਸਤੇ ਆਂਸੂੰ’ ਪਾਸ ਹੋ ਕੇ  ਆਈ ,ਤਾਂ ਬਹੁਤ ਪਸੰਦ ਕੀਤੀ ਗਈ। ਸਨ 1951 ਵਿੱਚ  ‘ਬਾਦਲ’ ਅਤੇ ‘ਤਰਾਨਾ’ ਵੀ ਆਈਆਂ। ‘ਸ਼ੀਰੀਂ ਫਰਿਹਾਦ’ ਅਤੇ ‘ਰਾਜ ਹਥ’ ਨੇ ਵੀ ਚੰਗਾ ਨਾਮਣਾ ਖੱਟਿਆ। ਮਧੂਬਾਲਾ ਦਾ ਝੁਕਾਅ ਵੀ ਕੁੱਝ ਹੋਰਨਾਂ ਵਾਂਗ ਦਲੀਪ ਕੁਮਾਰ ਵੱਲ ਹੋਇਆ, ਉਹ ਪਹਿਲੀ ਵਾਰ 1944 ਨੂੰ ‘ਜਵਾਰ ਭਾਟਾ’ ਦੇ ਸੈੱਟ’ਤੇ ਮਿਲੇ। ਫਿਰ ‘ਹਾਰ ਸਿੰਗਾਰ‘(1949) ”ਚ ਇਕੱਠੇ ਨਿਭੇ, ਪਰ ਇਹ ਫ਼ਿਲਮ ਡੱਬਿਆਂ ਵਿੱਚ ਹੀ ਪਈ ਰਹਿ ਗਈ। ਸਨ 1951 ਦੀ ‘ਤਰਾਨਾ’ ਸਮੇਤ ਇਹਨਾਂ ਨੇ 4 ਫ਼ਿਲਮਾਂ ਇਕੱਠਿਆਂ ਕੀਤੀਆਂ। ਦਲੀਪ ਕੁਮਾਰ ਨਾਲ ਇਹ ਸਬੰਧ 5 ਕੁ ਸਾਲਾਂ ਤੱਕ ਬਣੇ ਰਹੇ।
ਮਧੂਬਾਲ ਨੂੰ ਡਾਕਟਰਾਂ ਨੇ ਬਚਪਨ ਵਿੱਚ ਹੀ ਦੱਸ ਦਿੱਤਾ ਸੀ ਕਿ ਉਸ ਦੇ ਦਿਲ ਵਿੱਚ ਮੋਰੀ ਹੈ ਅਤੇ ਇਸ ਦਾ ਇਲਾਜ ਵੀ ਸੰਭਵ ਨਹੀਂ ਹੈ। ਪਰ ਉਸਦਾ ਹੌਂਸਲਾ ਵੀ ਕਮਾਲ ਰਿਹਾ। ਸਨ 1950 ਵਿੱਚ ਉਸ ਨੂੰ ਖੰਘ ਦੇ ਨਾਲ ਹੀ ਖੂਨ ਵੀ ਆਉਣ ਲੱਗਿਆ। ਪਰ ਉਹ ਠੀਕ ਹੋ ਗਈ। ਉਹ ਘਰ ਤੋਂ ਬਾਹਰ ਕੁੱਝ ਨਹੀਂ ਖਾਂਦੀ-ਪੀਂਦੀ ਸੀ। ਇੱਥੋਂ ਤੱਕ ਕਿ ਖਾਣੇ ਦੇ ਨਾਲ ਪਾਣੀ ਵੀ ਘਰੋਂ ਹੀ ਲਿਆਇਆ ਕਰਦੀ ਸੀ। ਸਨ 1954 ਵਿੱਚ ਉਹਨੂੰ ਮਦਰਾਸ ਵਿਖੇ ਐਸ ਐਸ ਵਾਸਨ ਲਈ “ਬਹੁਤ ਦਿਨ ਹੂਏ” ਦੇ ਫ਼ਿਲਮਾਂਕਣ ਸਮੇ ਖ਼ੂਨ ਦੀ ਉਲਟੀ ਆ ਗਈ। ਪਰ ਉਹ ਚੁੱਪ ਅਤੇ ਮਸਤ ਰਹੀ। ਇਸ ਹਾਲਤ ਵਿੱਚ ਉਸਦੀ ਸਾਂਭ ਸੰਭਾਲ ਵਾਸਨ ਅਤੇ ਉਸਦੀ ਪਤਨੀ ਨੇ ਕੀਤੀ।  ਇਹ ਗੱਲ ਮੀਡੀਆ ਵਿੱਚ ਆਉਣ ਨਾਲ ਰਾਜ਼, ਰਾਜ਼ ਨਾ ਰਿਹਾ।                
         ਜਦ 1950 ਵਿੱਚ ਉਸ ਦੀ ਗੁੱਡੀ ਸਿਖ਼ਰਾਂ ‘ਤੇ ਸੀ ਤਾਂ, ਹੌਲੀਵੁੱਡ ਵਿੱਚ ਵੀ ਉਸ ਦੇ ਨਾਂਅ ਦੀ ਬਹੁਤ ਚਰਚਾ ਸੀ। ਅਮਰੀਕਾ ਤੋਂ ਛਪਦੇ ਵਿਸ਼ੇਸ਼ ਮੈਗ਼ਜ਼ੀਨ ‘ਥਿਏਟਰ ਆਰਟਸ’ ਵਿੱਚ ਪੂਰੇ ਪੇਜ਼’ ਤੇ ਛਪੀ ਮਧੂਬਾਲਾ ਦੀ ਤਸਵੀਰ ਸਮੇਤ ਆਰਟੀਕਲ ਛਪਿਆ। ਅਮਰੀਕੀ ਫ਼ਿਲਮ ਨਿਰਮਾਤਾ ਫ਼੍ਰੈਕ ਕਾਪਰਾ ਨੇ ਮਧੂਬਾਲਾ ਨੂੰ ਫ਼ਿਲਮ ਲਈ ਸਾਈਨ ਕਰਨ ਵਾਸਤੇ ਮੁੰਬਈ ਆ ਕੇ ਪ੍ਰਪੋਜ਼ਲ ਵੀ ਰੱਖੀ। ਪਰ ਮਧੂਬਾਲਾ ਦੇ ਪਿਤਾ ਨੇ ਇਨਕਾਰ ਕਰ ਦਿੱਤਾ। ਮਧੂ ਬਾਲਾ ਦੀ ਇਹ ਵੀ ਖ਼ਵਾਇਸ਼ ਸੀ ਕਿ ਜੇ ਇੱਕ ਦਿਨ ਮਰਨਾ ਹੀ ਹੈ ਤਾਂ ਮਾਂਗ ਵਿੱਚ ਸੰਧੂਰ ਪੁਆ ਕੇ ਹੀ ਮਰੇ। ਉਸਨੇ ਕਿਸ਼ੋਰ ਕੁਮਾਰ ਨਾਲ 1958 ਵਿੱਚ ਫ਼ਿਲਮ “ਚਲਤੀ ਕਾ ਨਾਮ ਗਾਡ਼ੀ” ਅਤੇ 1961 ਨੂੰ ਝੁਮਰੂ ਵਿੱਚ ਕੰਮ ਕੀਤਾ । ਇਕੱਠਿਆਂ ਨੇ ਕੁੱਝ ਹੋਰ ਫ਼ਿਲਮਾਂ ਵੀ ਕੀਤੀਆਂ। ਇਸ ਤਰ੍ਹਾਂ ਉਹ ਇੱਕ ਦੂਜੇ ਦੇ ਕਰੀਬ ਆ ਗਏ। ਕਿਸ਼ੋਰ ਦਾ ਪਹਿਲੀ ਪਤਨੀ ਰੂਮਾਂ ਗੁਹਾ ਠਾਕੁਰਤਾ (1950-1958) ਨਾਲੋ ਤਲਾਕ ਦਾ ਕੇਸ ਚੱਲ ਰਿਹਾ ਸੀ, ਜੋ ਜਲਦੀ ਖ਼ਤਮ ਹੋ ਗਿਆ। ਕਿਸ਼ੋਰ ਅਤੇ ਮਧੂ ਨੇ ਜਾਤੀ ਵਿਰੋਧਾਂ ਤੋਂ ਬੇਪ੍ਰਵਾਹ ਹੁੰਦਿਆਂ 16 ਨਵੰਬਰ 1960 ਨੂੰ ਨਿਕਾਹ ਕਰਵਾ ਲਿਆ। 
                    ਫ਼ਿਲਮ ‘ਮੁਗਲ-ਇ-ਆਜ਼ਮ’ ਵਿੱਚ ਅਨਾਰਕਲੀ ਵਜੋਂ ਨਿਭਾਈ ਭੂਮਿਕਾ ਅੱਜ ਵੀ ਤਰੋ-ਤਾਜਾ ਜਾਪਦੀ ਹੈ।ਇਸ ਫ਼ਿਲਮ ਨੂੰ ਐਨੀ ਅਹਿਮੀਅਤ ਹਾਸਲ ਹੈ ਕਿ ਇਸ ਨੂੰ ਹੁਣ ਰੰਗੀਨ ਬਣਾ ਕੇ ਦਰਸ਼ਕਾਂ ਲਈ ਫਿਰ ਤੋਂ ਪੇਸ਼ ਕੀਤਾ ਗਿਆ ਹੈ। ‘ਪਿਆਰ ਕੀਆ ਤੋ ਡਰਨਾ ਕਿਆ’ ਗੀਤ ‘ਤੇ ਨਾਚ ਕਰਨ ਲਈ ਮਧੂਬਾਲਾ ਨੇ ਡੇਢ ਸਾਲ ਅਭਿਆਸ ਕੀਤਾ ਅਤੇ ਇਸ ਵਿੱਚ ਰੂਹ ਭਰ ਵਿਖਾਈ। ਅਨਾਰਕਲੀ ਦੇ ਰੋਲ ਨੂੰ ਮਧੂਬਾਲਾ ਨੇ ਅਮਰ ਕਰ ਵਿਖਾਇਆ ਅਤੇ ਅਨਾਰਕਲੀ ਨੇ ਮਧੂਬਾਲਾ ਨੂੰ ਜ਼ਿੰਦਗੀ ਦਿੱਤੀ ।
               ਮਧੂਬਾਲਾ ਨੇ ਪ੍ਰਾਈਵੇਟ ਲਿਮਟਿਡ ਦੇ ਨਾਅ ਤਹਿਤ ਕੁੱਝ ਖ਼ਾਸ ਭੂਮਿਕਾਵਾਂ ਕਰਨ ਦੀ ਤਮੰਨਾ ਦਾ ਸਿਰ ਵੀ ਪਲੋਸਿਆ। ਉਸ ਨੇ 1949 ਵਿੱਚ ‘ਇਮਤਿਹਾਨ’ 1955 ਵਿੱਚ ‘ਨਾਤਾ’ ਅਤੇ 1960 ਵਿੱਚ ‘ਮਹਿਲੋਂ ਕੇ ਖ਼ਵਾਬ’ ਫ਼ਿਲਮ ਦਾ ਨਿਰਮਾਣ ਵੀ ਕੀਤਾ। ਮਧੂਬਾਲਾ ਨੇ ‘ਧੰਨਾ ਭਗਤ’ (1945)ਅਤੇ ‘ਪੁਜਾਰੀ’ (1946) ਵਿੱਚ ਗੀਤ ਵੀ ਗਾਏ, ਜਿਹਡ਼ੇ ਕਿ ਬੇਬੀ ਮੁਮਤਾਜ ਉੱਤੇ ਹੀ ਫ਼ਿਲਮਾਏ ਗਏ ਸਨ। ਮਧੂਬਾਲਾ ਦੀਆਂ ਕੁੱਝ ਫ਼ਿਲਮਾਂ ਉਸ ਦੇ ਰੁਖ਼ਸਤ ਹੋਣ ਮਗਰੋਂ ਵੀ ਰਿਲੀਜ਼ ਹੋਈਆਂ।

ਕਿਸ਼ੋਰ ਕੁਮਾਰ ਨਾਲ 9 ਸਾਲ ਤੱਕ ਹੀ ਸਾਥ ਨਿਭਾ ਸਕਣ ਵਾਲੀ ਮਧੂ ਬਾਲਾ ਨੂੰ 23 ਫਰਵਰੀ 1969 ਐਤਵਾਰ ਦੀ ਸਵੇਰ ਅਜਿਹਾ ਦਿਲ ਦਾ ਦੌਰਾ ਪਿਆ ਕਿ ਉਹ ਆਪਣੀ ਉਮਰ ਦੇ ਮਹਿਜ 36 ਬਸੰਤ ਵੇਖਣ ਉਪਰੰਤ ਹੀ ਸਦਾ ਦੀ ਨੀਂਦ ਸੌਂ ਗਈ। ਐਨੀ ਮਕਬੂਲੀਅਤ ਵਾਲੀ ਅਦਾਕਾਰਾ, ਜਿਸ ਬਾਰੇ ਪਹਿਲਾਂ ਹੀ ਇਹ ਦੱਸ ਦਿੱਤਾ ਗਿਆ ਸੀ ਕਿ ਉਹ ਪਤਾ ਨਹੀਂ ਕਿਸ ਦਿਨ ਇਸ ਦੁਨੀਆਂ ਤੋਂ ਰੁਖ਼ਸਤ ਹੋ ਜਾਏ, ਨੂੰ ਕੋਈ ਵੀ ਇਨਾਮ-ਸਨਮਾਨ ਨਾਂ ਦਿੱਤਾ ਗਿਆ। ਭਾਵੇਂ ਉਹਦੇ ਕਈ ਰੋਲ ਅਤੇ ਉਹਦੀਆਂ ਕਈ ਫ਼ਿਲਮਾਂ ਬਹੁਤ ਹਿੱਟ ਰਹੀਆਂ। ਜਿਉਂਦੇ ਜੀਅ ਉਹਦੀ ਇਹ ਸੱਧਰ ਖੁਦਕੁਸ਼ੀਆਂ ਕਰਦੀ ਰਹਿ ਗਈ ਅਤੇ ਉਸ ਦੇ ਨਾਲ ਹੀ ਦਫ਼ਨ ਹੋ ਗਈ। ਜਿਸਦਾ ਉਹਦੇ ਚਹੇਤਿਆਂ ਨੂੰ ਕੱਲ੍ਹ ਵੀ ਗਿਲਾ ਸੀ, ਅੱਜ ਵੀ ਗਿਲਾ ਹੈ ਅਤੇ ਇਹ ਕੱਲ੍ਹ ਨੂੰ ਵੀ ਬਰਕਰਾਰ ਰਹੇਗਾ।   ਰਣਜੀਤ ਸਿੰਘ ਪ੍ਰੀਤ 
ਭਗਤਾ-151206 (ਬਠਿੰਡਾ) 
ਮੋਬਾਈਲ ਸੰਪਰਕ:98157-07232
e-ਮੇਲ: ranjitpreet@ymail.com