Monday, June 24, 2019

ਸਾਂਝੇ ਡੁੱਲੇ ਖੂਨ ਦੀ ਚੀਸ ਦਾ ਅਹਿਸਾਸ ਕਰਾਇਆ ਨਾਟਕ ਨੇ

SSMFB Messenger: 24th June 2019: 06:29 PM
ਫਿਰੋਜ਼ਪੁਰ ਵਿੱਚ ਯਾਦ ਕਰਾਇਆ ਗਿਆ ਅਤੀਤ ਦਾ ਉਹ ਲਹੂ ਭਿੱਜਿਆ ਪੰਨਾ 
ਫਿਰੋਜ਼ਪੁਰ: 24 ਜੂਨ 2019: (ਪੰਜਾਬ ਸਕਰੀਨ ਬਿਊਰੋ):: 
ਜਲਿਆਂ ਵਾਲੇ ਬਾਗ਼ ਦਾ ਸਾਕਾ ਭਾਰਤੀ ਆਜ਼ਾਦੀ ਦੇ ਇਤਿਹਾਸ ਦਾ ਲਹੂ ਵਿੱਚ ਭਿੱਜਿਆ ਅਜਿਹਾ ਪੰਨਾ ਹੈ ਜਿਸ ਤੇ ਹਿੰਦੂ ਮੁਸਲਮਾਨ ਸਿੱਖ ਸਭ ਦਾ ਖੂਨ ਡੁੱਲ੍ਹਿਆ ਹੈ। ਤੇਰਾਂ ਅਪ੍ਰੈਲ 1919 ਨੂੰ ਵਾਪਰੇ ਇਸ ਘੱਲੂਘਾਰੇ ਦੀ ਚੀਸ ਸੌ ਸਾਲ ਬੀਤਣ ਤੋਂ ਬਾਅਦ ਅੱਜ ਵੀ ਪੂਰਾ ਹਿੰਦੁਸਤਾਨ ਮਹਿਸੂਸ ਕਰਦਾ ਹੈ। ਸਾਲ 2019 ਬ੍ਰਿਟਿਸ਼ ਸਰਕਾਰ ਦੇ ਇਸ ਸਭ ਤੋਂ ਵੱਧ ਕਰੂਰ ਘਟਨਾਕ੍ਰਮ ਦਾ ਸ਼ਤਾਬਦੀ ਵਰ੍ਹਾ ਹੈ। ਪੰਜਾਬ ਸੰਗੀਤ ਨਾਟਕ ਅਕੈਡਮੀ ਚੰਡੀਗੜ੍ਹ ਵੱਲੋਂ ਸਮੁੱਚੇ ਪੰਜਾਬ ਵਿੱਚ ਨਾਟਕਾਂ ਰਾਹੀਂ ਚੇਤਨਾ ਪੈਂਦਾ ਕਰਨ ਦੀ ਯੋਜਨਾ ਵਜੋਂ ਰਕਸ਼ਾ ਫਾਊਂਡੇਸ਼ਨ, ਵਿਵੇਕਾਨੰਦ ਵਰਲਡ ਸਕੂਲ ਅਤੇ ਐਗਰੀਡ ਫ਼ਾਊਂਡੇਸ਼ਨ ਦੇ ਸਹਿਯੋਗ ਨਾਲ ਬੀਤੀ ਰਾਤ ਜੈਨੇਸਿਸ ਇੰਸਟੀਚਿਊਟ ਆਫ਼ ਡੈਂਟਲ ਕਾਲਜ ਅਤੇ ਰਿਸਰਚ ਸੈਂਟਰ ਵਿਖੇ ਉੱਘੇ ਨਾਟ ਲੇਖਕ ਸ਼ਬਦੀਸ਼ ਦੇ ਲਿਖੇ  ਨਾਟਕ " ਚੱਲ ਅਮ੍ਰਿਤਸਰ ਲੰਡਨ ਚੱਲੀਏ " ਨੂੰ ਸੁਚੇਤਕ ਰੰਗ ਮੰਚ  ਮੁਹਾਲੀ ਵੱਲੋਂ ਅਨੀਤਾ ਸ਼ਬਦੀਸ਼ ਦੀ ਨਿਰਦੇਸ਼ਨਾ ਹੇਠ ਖੇਡਿਆ ਗਿਆ। ਜਲਿਆਂ ਵਾਲੇ ਬਾਗ ਦੇ ਸਾਕੇ ਦਾ ਬਦਲਾ ਲੈਣ ਵਾਲਾ ਸ਼ਹੀਦ ਊਧਮ ਸਿੰਘ ਸ਼ਹੀਦ ਏ ਆਜ਼ਮ ਭਗਤ ਸਿੰਘ ਨੂੰ ਆਪਣਾ ਆਦਰਸ਼ ਮੰਨਦਾ ਸੀ। ਹੁਸੈਨੀਵਾਲਾ ਭਗਤ ਸਿੰਘ ਦੀ ਆਖ਼ਰੀ ਪਨਾਹਗਾਹ ਹੋਣ ਕਰਕੇ ਇਸ ਨਾਟਕ ਦਾ ਫ਼ਿਰੋਜ਼ਪੁਰ ਹੋਣਾ ਇਤਿਹਾਸਕ ਮਹੱਤਵ ਰੱਖਦਾ ਹੈ। ਇਸ ਮੌਕੇ ਤੇ ਮੋਹਨ ਲਾਲ ਭਾਸਕਰ ਫਾਊਂਡੇਸ਼ਨ ਦੀ ਸਰਪ੍ਰਸਤ ਸ਼੍ਰੀ ਮਤੀ ਪ੍ਰਭਾ ਭਾਸਕਰ ਮੁੱਖ ਮਹਿਮਾਨ ਵਜੋਂ ਸ਼ਾਮਲ ਹੋਏ ਜਦੋਂ ਕਿ ਸ਼੍ਰੀ ਵਰਿੰਦਰ ਸਿੰਗਲ ਚੇਅਰਮੈਨ ਜੈਨੇਸਿਸ ਇੰਸਟੀਚਿਊਟ ਵਿਸ਼ੇਸ਼ ਮਹਿਮਾਨ ਵਜੋਂ ਸ਼ਾਮਲ ਹੋਏ। ਜੋਤੀ ਰੌਸ਼ਨ ਕਰਨ ਦੀ ਰਸਮ ਵਿੱਚ ਸ਼੍ਰੀ ਮਤੀ ਪ੍ਰਭਾ ਭਾਸਕਰ, ਸ਼੍ਰੀ ਮਤੀ ਮਿਨਾਕਸ਼ੀ ਸਿੰਗਲ, ਡਾ.ਐਸ.ਐਨ. ਰੁਦਰਾ, ਝਲਕੇਸ਼ਵਰ ਭਾਸਕਰ, ਡਾ.ਸਤਿੰਦਰ ਸਿੰਘ, ਅਮਰਜੀਤ ਭੋਗਲ ਸ਼ਾਮਲ ਹੋਏ। ਡਾ. ਰੁਦਰਾ ਨੇ ਆਏ ਹੋਏ ਮਹਿਮਾਨਾਂ ਅਤੇ ਦਰਸ਼ਕਾਂ ਨੂੰ ਜੀ ਆਇਆਂ ਨੂੰ ਕਿਹਾ। ਸ਼ਬਦੀਸ਼ ਵੱਲੋਂ ਨਾਟਕ ਬਾਰੇ ਜਾਣਕਾਰੀ ਦਿੰਦਿਆਂ ਹੀ ਪਰਦਾ ਖੁੱਲਿਆ। ਦਿਲਖੁਸ਼ ਥਿੰਦ ਦੇ ਸੰਗੀਤ ਨਾਲ ਮੰਚ ਤੇ ਊਧਮ ਸਿੰਘ (ਮਨਦੀਪ ਮਨੀ) ਹਾਜ਼ਰ ਸੀ ਭਾਰਤੀ ਆਜ਼ਾਦੀ ਦੀ ਲੜਾਈ ਦਾ ਅਜਿਹਾ ਨਾਇਕ ਜਿਸ ਤੇ ਕਿਸੇ ਵੀ ਖਿੱਤੇ, ਕੌਮ ਯਾ ਭਾਈਚਾਰੇ ਨੂੰ ਨਾਜ਼ ਹੋ ਸਕਦਾ ਹੈ।ਜਲਿਆਂ ਵਾਲੇ ਬਾਗ ਦੇ ਸਾਕੇ ਨੇ ਸਮੁੱਚੇ ਭਾਰਤੀ ਸਮਾਜ ਵਿਸ਼ੇਸ਼ ਕਰਕੇ ਪੰਜਾਬੀ ਕੌਮ ਨੂੰ ਇੱਕ ਮੁੱਠ ਕਰ ਦਿੱਤਾ। ਜਨਰਲ ਡਾਇਰ ਵੱਲੋਂ ਅੰਨ੍ਹੀ ਗੋਲੀਬਾਰੀ ਤੋਂ ਬਾਅਦ ਉਸ ਬਾਗ ਵਿੱਚ ਆਪਣੇ ਪਤੀ ਦੀ ਲਾਸ਼ ਲੱਭ ਰਹੀ ਰਤਨਾ ਦੇਵੀ (ਅਨੀਤਾ ਸ਼ਬਦੀਸ਼)  ਦੇ ਵੈਣ ਇਸ ਨਾਟਕ ਦਾ ਪਹਿਲਾ ਸਿਖ਼ਰ ਹੋ ਨਿੱਬੜਦਾ ਹੈ। ਊਧਮ ਸਿੰਘ ਨੂੰ ਜਦ ਇਸ ਭਿਆਨਕ ਸਾਕੇ ਦੀ ਖ਼ਬਰ ਮਿਲਦੀ ਹੈ ਤਾਂ ਉਹ ਇਸਦਾ ਬਦਲਾ ਲੈਣ ਲਈ ਆਪਣੀ ਜ਼ਿੰਦਗੀ ਨੂੰ ਨਿੱਕੀਆਂ ਵੱਡੀਆਂ ਛੋਹਾਂ ਦਿੰਦਿਆਂ ਵੱਡੇ ਸੰਘਰਸ਼ ਵੱਲ ਤੁਰਦਾ ਹੈ।
ਲਗਾਤਾਰ ਇੱਕੀ ਸਾਲ ਦੀ ਭਟਕਣਾ ਅਤੇ ਉਡੀਕ ਤੋਂ ਬਾਅਦ ਲੰਡਨ ਦੇ ਕੈਕਸਟਨ ਹਾਲ ਵਿੱਚ ਉਹ ਮਾਈਕਲ ਉਡਵਾਇਰ ਨੂੰ ਗੋਲੀ ਮਾਰ ਕੇ ਆਪਣਾ ਬਦਲਾ ਪੂਰਾ ਕਰਦਾ ਹੈ। ਨਿੱਕੀਆਂ ਨਿੱਕੀਆਂ ਛੋਹਾਂ ਰਾਹੀਂ ਉਸ ਵੇਲੇ ਦੇ ਰਾਜਨੀਤਕ ਅਤੇ ਸਮਾਜੀ ਹਾਲਾਤ ਨੂੰ ਅੱਜ ਨਾਲ ਜੋੜ ਕੇ ਬਿਹਤਰ ਭਾਰਤ ਲਈ ਨਵੀਂ ਲੱਭਣ ਦਾ ਸੁਨੇਹਾ ਪੂਰੇ ਨਾਟਕ ਦੀ ਆਤਮਾ ਵਿੱਚ ਸਮਾਇਆ ਹੋਇਆ ਸੀ।ਸਾਅਦਤ ਹਸਨ ਮੰਟੋ ਦੀ ਕਹਾਣੀ "ਥੈਲਾ ਕੰਜਰ" ਦੇ ਮੁੱਖ ਪਾਤਰ ਥੈਲਾ ਕੰਜਰ ਜੋ ਕਿ ਦਸ ਅਪ੍ਰੈਲ 1919 ਨੂੰ ਕਤਲ ਕਰ ਦਿੱਤਾ ਗਿਆ ਸੀ ਦੀ ਰੂਹ ਨੂੰ ਊਧਮ ਸਿੰਘ ਦੇ ਰਾਹ ਦਸੇਰੇ ਵਜੋਂ ਸਿਰਜ ਕੇ ਲੇਖਕ ਨੇ ਕਹਾਣੀ ਨੂੰ ਕਮਾਲ ਦਾ ਰੰਗ ਦਿੱਤਾ ਹੈ।ਢੰਡੋਰਚੀ, ਉਜਾਗਰ ਅਤੇ ਪੁਲਿਸ ਵਾਲੇ ਦੀ ਭੂਮਿਕਾ ਵਿੱਚ ਸਿੰਘ ਅਮਨਦੀਪ, ਪੁਲਿਸ ਅਫ਼ਸਰ ਅਤੇ ਊਧਮ ਸਿੰਘ ਦੇ ਦੋਸਤ ਦੀ ਭੂਮਿਕਾ ਵਿੱਚ ਸੰਦੀਪ ਕੁਮਾਰ, ਬਾਗੀ ਬੱਚਿਆਂ ਦੇ ਰੋਲ ਵਿੱਚ ਅਨਿਕੇਤ ਅਤੇ ਅਨੁਰਾਗ, ਥੈਲੇ ਕੰਜਰ ਦੀ ਚੇਤਨਾ ਦੇ ਰੂਪ ਵਿੱਚ ਅਰਮਾਨ ਸੰਧੂ,ਜਨਰਲ ਡਾਇਰ ਅਤੇ ਲੰਬੜ ਦੀ ਭੂਮਿਕਾ ਵਿੱਚ ਸਾਗਰ, ਮਾਈਕਲ ਉਡਵਾਇਰ ਅਤੇ ਜੱਜ ਦੇ ਰੋਲ ਵਿੱਚ ਅਰਵਿੰਦਰ, ਜੌਹਲ ਸਾਬ ਅਤੇ ਤੋਤੇ ਦੀ ਭੂਮਿਕਾ ਵਿੱਚ ਅੰਤਰਜੀਤ, ਜਲਿਆਂ ਵਾਲਾ ਬਾਗ ਵਿੱਚ ਦਰਸ਼ਕਾਂ ਦੀ ਭੂਮਿਕਾ ਵਿੱਚ ਜਸਪ੍ਰੀਤ, ਪਰਮਿੰਦਰ, ਰਾਹੁਲ ਅਤੇ ਲਖਵਿੰਦਰ ਆਪਣੇ ਕਿਰਦਾਰਾਂ ਨਾਲ ਪੂਰ ਇਨਸਾਫ਼ ਕੀਤਾ।ਬੈਕ ਸਟੇਜ ਤੇ ਚਰਨਜੀਤ ਅਤੇ ਗੀਤਾਂ ਨੂੰ ਅਵਾਜ਼ ਸਿਕੰਦਰ ਸਲੀਮ ਨੇ ਦਿੱਤੀ।
ਇਸ ਕਮਾਲ ਦੀ ਪੇਸ਼ਕਾਰੀ ਉਪਰੰਤ ਵਰਿੰਦਰ ਸਿੰਗਲ ਨੇ ਸਮੂਹ ਕਲਾਕਾਰਾਂ ਦਾ ਸਨਮਾਨ ਕੀਤਾ। ਪ੍ਰਬੰਧਕਾਂ ਵੱਲੋਂ ਅਨੀਤਾ ਸ਼ਬਦੀਸ਼ ਨੂੰ ਵੀ ਸਨਮਾਨਿਤ ਕੀਤਾ। ਮੁੱਖ ਮਹਿਮਾਨ ਅਤੇ ਵਿਸ਼ੇਸ਼ ਮਹਿਮਾਨ ਨੂੰ ਸਨਮਾਨ ਚਿੰਨ੍ਹ ਭੇਂਟ ਕੀਤੇ ਗਏ। ਗੌਰਵ ਸਾਗਰ ਭਾਸਕਰ ਨੇ ਛੇਤੀ ਹੀ ਇੱਕ ਹੋਰ ਨਾਟਕ ਮੇਲਾ ਕਰਵਾਉਣ ਦਾ ਐਲਾਨ ਕੀਤਾ। ਡਾ.ਸਤਿੰਦਰ ਸਿੰਘ ਨੇ ਆਏ ਹੋਏ ਮਹਿਮਾਨਾਂ, ਦਰਸ਼ਕਾਂ, ਨਾਟਕ ਟੀਮ ਅਤੇ ਪੰਜਾਬ ਸੰਗੀਤ ਨਾਟਕ ਅਕੈਡਮੀ ਦਾ ਧੰਨਵਾਦ ਕੀਤਾ।ਮੰਚ ਸੰਚਾਲਨ ਸ਼ਾਇਰ ਹਰਮੀਤ ਵਿਦਿਆਰਥੀ ਨੇ ਕੀਤਾ। ਇਸ ਸਮਾਗਮ ਦੀ ਸਫ਼ਲਤਾ ਲਈ ਸ਼੍ਰੀ ਵਿਪਨ ਕੁਮਾਰ, ਨਵਦੀਪ, ਮੇਜਰ ਰੰਧਾਵਾ ਸਮੇਤ ਬਹੁਤ ਸਾਰੇ ਦੋਸਤਾਂ ਦਾ ਮਹੱਤਵਪੂਰਨ ਯੋਗਦਾਨ ਰਿਹਾ। ਕਮਲ ਦਰਾਵਿੜ,ਕਮਲ ਸ਼ਰਮਾ, ਅਨਿਲ ਆਦਮ, ਪ੍ਰੋ਼ ਕੁਲਦੀਪ, ਡਾ ਜਗਦੀਪ, ਜਗਤਾਰ ਸੋਖੀ, ਪੀ.ਡੀ.ਸ਼ਰਮਾ, ਰਾਜੀਵ ਖ਼ਯਾਲ, ਸੁਖਜਿੰਦਰ,ਵਿਪਨ, ਮੰਗਤ ਵਜੀਦਪੁਰੀ, ਸ਼ੈਲੇਂਦਰ ਭੱਲਾ, ਇੰਸਟੀਚਿਊਟ ਦੇ ਸਟਾਫ, ਵਿਦਿਆਰਥੀਆਂ ਸਮੇਤ ਤਿੰਨ ਸੌ ਤੋਂ ਵੱਧ ਦਰਸ਼ਕਾਂ ਨੇ ਇਸ ਨਾਟ ਪੇਸ਼ਕਾਰੀ ਦਾ ਆਨੰਦ ਮਾਣਿਆ।

Sunday, June 23, 2019

6 ਜੂਨ ਨੂੰ ਪੰਜਾਬ ਵਿੱਚ ਵਾਪਰੀਆਂ ਘਟਨਾਵਾਂ ਕਮਿਉਨਿਸਟਾਂ ਦੇ ਲਈ ਵੱਡੀ ਚੁਣੌਤੀ

ਫ਼ਿਰਕੂ ਸ਼ਕਤੀਆਂ ਨੂੰ ਹਾਰ ਦੇਣਾ ਪਰਮੁੱਖ ਕੰਮ
6 ਜੂਨ 2019 ਵਾਲੇ ਦਿਨ ਵੀ ਅਜਿਹੀਆਂ ਬਹੁਤ ਸਾਰੀਆਂ ਘਟਨਾਵਾਂ ਹੋਈਆਂ ਜਿਹਨਾਂ ਨੇ ਪੰਜਾਬ ਦੇ ਸੰਤਾਪ ਵਾਲੇ ਦਹਾਕੇ ਦੇ ਦਿਨਾਂ ਦੀ ਯਾਦ ਤਾਜ਼ਾ ਕਰਵਾ ਦਿੱਤੀ। ਇਹ ਘਟਨਾਵਾਂ ਲੁਧਿਆਣਾ ਵਿੱਚ ਵੀ ਹੋਈਆਂ ਅਤੇ ਹੋਰਨਾਂ ਥਾਂਵਾਂ 'ਤੇ ਵੀ। ਇਹਨਾਂ ਘਟਨਾਵਾਂ ਬਾਰੇ ਕਮਿਊਨਿਸਟ ਦ੍ਰਿਸ਼ਟੀਕੋਣ ਖਾਸ ਕਰਕੇ ਸੀਪੀਆਈ ਦੇ ਨਜ਼ਰੀਏ ਤੋਂ ਜਾਣੂ ਕਰਵਾ ਰਹੇ ਹਨ-ਡਾਕਟਰ ਅਰੁਣ ਮਿੱਤਰਾ। 
ਰੈਫ਼ਰੈਂਡਮ ਦੀਆਂ ਗੱਲਾਂ ਚਲਦੇ ਨੂੰ ਤਾਂ ਕੁੱਝ ਸਮਾਂ ਹੋ ਗਿਆ ਹੈ, ਪਰ ਇਸਨੂੰ ਹਵਾ ਦੇਣ ਲਈ 6 ਜੂਨ ਨੂੰ ਬਾਕਾਇਦਾ ਵਿਉਂਤ ਬਣਾ ਕੇ ਥਾਂ ਪਰ ਥਾਂ ਤੇ ਗੜਬੜਾਂ ਕੀਤੀਆਂ ਗਈਆਂ। ਭਾਵੇਂ ਪੰਜਾਬ ਦੇ ਲੋਕਾਂ ਨੇ, ਜੋ ਕਿ ਵੱਡੇ ਸੰਤਾਪ ਵਿਚੋਂ ਗੁਜ਼ਰ ਚੁੱਕੇ ਹਨ ਤੇ ਉਸ ਸਮੇਂ ਵਰਗੇ ਹਾਲਾਤ ਮੁੜ ਨਹੀਂ ਚਾਹੁੰਦੇ, ਇਹਨਾਂ ਕੱਟੜ ਪੰਥੀਆਂ ਨੂੰ ਮੂੰਹ ਨਹੀਂ ਲਾਇਆ, ਪਰ ਇਸਤੋਂ ਅਵੇਸਲੇ ਹੋ ਕੇ ਬੈਠਣਾ ਵੀ ਸਹੀ ਨਹੀਂਂ ਹੈ। ਕਿਸਨੇ ਸੋਚਿਆ ਸੀ ਕਿ ਭਾਰਤ ਵਿੱਚ ਆਰ ਐਸ ਐਸ ਦੀ ਹੱਥਠੋਕੀ ਸਰਕਾਰ ਬਣ ਜਾਏਗੀ ਤੇ ਦੁਬਾਰਾ ਵੀ ਜਿੱਤ ਜਾਏਗੀ। ਇਤਹਾਸ ਗਵਾਹ ਹੈ ਕਿ ਆਰ ਐਸ ਐਸ ਤੇ ਇਸਦੀਆਂ ਇਕਾਈਆਂ ਅਜ਼ਾਦੀ ਦੇ ਸੰਘਰਸ਼ ਦੌਰਾਨ ਅੰਗਰੇਜ਼ਾਂ ਦੀਆਂ ਪਿੱਠੂ ਸਨ। ਇਹਨਾਂ ਨੇ ਤਿਰੰਗੇ ਝੰਡੇ ਸਾੜੇ, ਭਾਰਤ ਛੱਡੋ ਅੰਦੋਲਨ ਦਾ ਵਿਰੋਧ ਕੀਤਾ, ਭਗਤ ਸਿੰਘ ਵਰਗੇ ਇਨਕਲਾਬੀਆਂ ਨੂੰ ਕੁਰਾਹੇ ਪਏ ਨੌਜਵਾਨ ਦੱਸਿਆ ਤੇ ਇਹਨਾਂ ਦੇ ਸਫ਼ਾਂ ਦੇ ਲੋਕਾਂ ਨੇ ਸ਼ਹੀਦਾਂ ਦੇ ਵਿਰੁੱਧ ਗਵਾਈਆਂ ਦਿੱਤੀਆਂ। ਇਹਨਾਂ ਨੇ ਨੌਜਵਾਨਾਂ ਨੂੰ ਇਹ ਵੀ ਕਿਹਾ ਕਿ ਉਹ ਅੰਗਰੇਜ਼ ਸਰਕਾਰ ਵਿਰੁੱਧ ਸੰਘਰਸ਼ ਕਰਨ ਵਿੱਚ ਆਪਣੀ ਸ਼ਕਤੀ ਵਿਅਰਥ ਨਾ ਗਵਾਉਣ, ਇਸਦੀ ਬਜਾਏ ਆਪਣੀ ਉਰਜਾ ਮੁਸਲਮਾਨਾਂ, ਇਸਾਈਆਂ ਤੇ ਕਮਿਊਨਿਸਟਾਂ ਵਿਰੁੱਧ ਲੜਨ ਦੇ ਲਈ ਬਚਾ ਕੇ ਰਖੱਣ। ਅੱਜ ਉਹੀ ਸ਼ਕਤੀਆਂ ਆਪਣੇ ਆਪ ਨੂੰ ਦੇਸ਼ ਭਗਤ ਸਾਬਿਤ ਕਰਨ ਵਿੱਚ ਕਾਮਯਾਬ ਹੋ ਗਈਆਂ ਹਨ। ਆਮ ਲੋਕ ਛੇਤੀ ਹੀ ਪੁਰਾਣੀਆਂ ਗੱਲਾਂ ਨੂੰ ਭੁੱਲ ਜਾਂਦੇ ਹਨ। ਅੱਜ ਦੀ ਨੌਜਵਾਨ ਪੀੜ੍ਹੀ ਹਿਤਹਾਸ ਦੇ ਉਹਨਾ ਤੱਥਾਂ ਤੋਂ ਵਾਕਫ਼ ਨਹੀਂ ਹੈ, ਇਸ ਲਈ ਉਹਨਾਂ ਨੂੰ ਇਤਹਾਸ ਬਾਰੇ ਗਲਤ ਬਿਆਨੀ ਕਰਕੇ ਮਗਰ ਲਾਉਣਾ ਅਸਾਨ ਹੈ।
ਇਸ ਵੇਰ 6 ਜੂਨ ਨੂੰ ਇੱਕ ਹੋਰ ਪੱਖ ਸ੍ਹਾਮਣੇ ਆਇਆ ਹੈ ਕਿ ਲੁਧਿਆਣਾ ਵਿੱਚ ਸ਼ਹੀਦ ਸੁਖਦੇਵ ਦੀ ਬਰਸੀ ਮਨਾਉਣ ਦੇ ਬਹਾਨੇ ਕੁੱਝ ਹਿੰਦੂ ਕੱਟੜਪੰਥੀਆਂ ਵਲੋਂ ਭੜਕਾਊ ਪੋਸਟਰ ਛਾਪੇ ਗਏ। ਇਹਨਾਂ ਪੋਸਟਰਾਂ ਨੂੰ ਖਾਲਿਸਤਾਨੀ ਕੱਟੜਪੰਥੀਆਂ ਨੇ ਪਾੜਿਆ ਜਿਸ ਕਾਰਨ ਤਣਾਅ ਵੱਧ ਗਿਆ। ਇਹ ਵੀ ਇੱਕ ਸਾਜ਼ਿਸ਼ ਤਹਿਤ ਹੀ ਹੋਇਆ ਜਾਪਦਾ ਹੈ। ਇਸ ਗੱਲ ਬਾਰੇ ਕੋਈ ਸ਼ੱਕ ਨਹੀਂ ਕਿ ਕੱਟੜਪੰਥੀ ਸ਼ਕਤੀਆਂ ਇੱਕ ਦੂਜੇ ਦੀਆਂ ਪੂਰਕ ਹੁੰਦੀਆਂ ਹਨ। ਅੰਤ ਧਰਮ ਨਿਰਪੱਖਤਾ ਤੇ ਸਮਾਜੀ ਭਾਈਚਾਰਾ ਹੀ ਇਹਨਾਂ ਦਾ ਨਿਸ਼ਾਨਾ ਹੁੰਦਾ ਹੈ। ਇਹ ਸ਼ਕਤੀਆਂ  ਵਿਰੋਧੀ ਜਾਂ ਵੱਖਰੇ ਵਿਚਾਰ ਨੂੰ ਨਹੀਂ ਸਹਿੰਦੀਆਂ ਤੇ ਫ਼ਾਸ਼ੀਵਾਦੀ ਰੂਪ ਅਖ਼ਤਿਆਰ ਕਰ ਲੈਂਦੀਆਂ ਹਨ। ਇਹਨਾਂ ਦੇ ਲਈ ਮਨੁੱਖੀ ਜੀਵਨ ਦੀ ਕੋਈ ਅਹਿਮੀਅਤ ਨਹੀਂ ਹੁੰਦੀ।
ਇਤਹਾਸ ਵਿੱਚ ਵਾਪਰੀਆਂ ਘਟਨਾਵਾਂ ਤੋਂ ਸਬਕ ਸਿੱਖ ਲੈਣਾ ਚਾਹੀਦਾ ਹੈ ਤਾਂ ਜੋ ਗਲਤੀਆਂ ਦੋਹਰਾਈਆਂ ਨਾ ਜਾਣ। ਪੰਜਾਬ ਦੇ ਮਾੜੇ ਦਿਨਾ ਵਿੱਚ ਜੋ ਕੁਝ ਵਾਪਰਿਆ ਉਸਦੇ ਪਿਛੋਖੜ ਤੇ ਉਸ ਦੌਰਾਨ ਹੋਈਆਂ ਘਟਨਾਵਾਂ ਅਤੇ ਵੱਖ ਵੱਖ ਰਾਜਨੀਤਿਕ ਪਾਰਟੀਆਂ ਦੀ ਭੂਮਿਕਾ ਦਾ ਵਿਗਿਆਨਕ ਢੰਗ ਨਾਲ ਵਿਸ਼ਲੇਸ਼ਣ ਕਰਕੇ ਅੱਜ ਦੀ ਪੀੜ੍ਹੀ ਨੂੰ ਦੱਸਿਆ ਜਾਏ ਤਾਂ ਜੋ ਉਹ ਗਲਤ ਸੂਚਨਾਵਾਂ ਤੇ ਪਰਚਾਰ ਦੇ ਰੌਹ ਵਿੱਚ ਨਾ ਵਹਿ ਜਾਣ।
ਉਸ ਵੇਲੇ ਜਦੋਂ ਅੱਤਵਾਦੀ ਦਨਦਨਾਂਦੇ ਪਏ ਸਨ, ਤੇ ਅਨੇਕਾਂ ਪੁਲਿਸ ਵਾਲੇ ਵੀ ਡਰਦੇ ਮਾਰੇ ਮੂੰਹ ਮੋੜ ਲੈਂਦੇ ਸਨ, ਭਾਰਤੀ ਕਮਿਉਨਿਸਟ ਪਾਰਟੀ ਦੇ ਕਾਰਕੁਨਾਂ ਨੇ ਵਿਚਾਰਧਾਰਕ ਲੜਾਈ ਲੜ ਕੇ ਅਤੇ ਆਪਣੇ ਜੀਵਨ ਦੇ ਬਲਿਦਾਨ ਦੇ ਕੇ ਦੇਸ਼ ਦੀ ਏਕਤਾ ਅਖੰਡਤਾ ਦੀ ਰਾਖੀ ਕੀਤੀ। ਇਸ ਦੌਰਾਨ  ਪਾਰਟੀ ਕਾਰਕੁਨਾਂ ਨੇ ਅੱਤਵਾਦੀਆਂ ਦਾ ਮੁਕਾਬਲਾ ਵੀ ਕੀਤਾ ਤੇ ਸਮਾਜਿਕ ਸਦਭਾਵਨਾ ਕਾਇਮ ਕਰਨ ਵਿੱਚ ਵੀ ਭੂਮਿਕਾ ਅਦਾ ਕੀਤੀ। ਕਈ ਥਾਵਾਂ ਤੇ ਫਿਰਕੂ ਦੰਗੇ ਰੋਕਣ ਵਿੱਚ ਵੀ ਸਾਥੀਆਂ ਨੇ ਆਪਣੀ ਜਾਨ ਨੂੰ ਖਤਰੇ ਵਿੱਚ ਪਾ ਕੇ ਰੋਲ ਅਦਾ ਕੀਤਾ। ਇਸ ਸੰਘਰਸ਼ ਵਿੱਚ ਕਾਮਰੇਡ ਅਰਜਨ ਸਿੰਘ ਮਸਤਾਨਾ, ਦਰਸ਼ਨ ਸਿੰਘ ਕੈਨੇਡੀਅਨ, ਗੁਰਮੇਲ ਹੂੰਝਣ, ਅਮੋਲਕ ਸਿੰਘ, ਗੁਰਸੇਵਕ ਸਿੰਘ, ਰਵਿੰਦਰ ਰਵੀ, ਹਰਪਾਲ ਸਿੰਘ ਖੋਖਰ ਵਰਗੇ ਅਨੇਕਾਂ ਹੀਰੇ ਸ਼ਹੀਦੀਆਂ ਪਾ ਗਏ। ਪਾਰਟੀ ਨੇ ਸਹੀ ਮਾਹਣਿਆਂ ਵਿੱਚ ਸਾਮਰਾਜੀ ਸਾਜ਼ਿਸ਼ ਨੂੰ ਪਛਾਣਿਆ ਅਤੇ ਤਿੱਖੀ ਵਿਚਾਰਕ ਲੜਾਈ ਦੇ ਕੇ ਇਸਦਾ ਪਰਦਾ ਫਾਸ਼ ਕੀਤਾ। ਉਸ ਦੌਰ ਵਿੱਚ ਪਾਰਟੀ ਵਲੋਂ ਦਿੱਤਾ ਨਾ ਹਿੰਦੂ ਰਾਜ ਨਾ ਖਾਲਿਸਤਾਨ ਜੁਗ ਜੁਗ ਜੀਵੇ ਹਿੰਦੋਸਤਾਨ ਦਾ ਨਾਅਰਾ ਨਾ ਕੇਵਲ ਪੰਜਾਬ ਵਿੱਚ ਦੇਸ਼ ਦੀ ਏਕਤਾ ਅਖੰਡਤਾ ਦੀ ਰਾਖੀ ਦਾ ਸੋਮਾ ਬਣਿਆ ਬਲਕਿ ਸਾਰੇ ਦੇਸ਼ ਵਿੱਚ ਸਲਾਹਿਆ ਗਿਆ।
ਇਹ ਯਾਦ ਰੱਖਣਾ ਚਾਹੀਦਾ ਹੈ ਕਿ ਪੰਜਾਬ ਵਿੱਚ ਅਕਾਲੀ ਪਾਰਟੀ ਅਤੇ ਭਾਰਤੀ ਜਨਤਾ ਪਾਰਟੀ (ਪੁਰਾਣੀ ਭਾਰਤੀ ਜਨਸੰਘ ਪਾਰਟੀ) ਹਮੇਸ਼ਾਂ ਇੱਕ ਦੂਜੇ ਦੇ ਵਿਰੁੱਧ ਫ਼ਿਰਕੂ ਤੋਹਮਤਾਂ ਲਾਉਂਦੇ ਹੋਏ ਲੋਕਾਂ ਦੇ ਭਾਈਚਾਰੇ ਨੂੰ ਕਮਜ਼ੋਰ ਕਰਨ ਦੀ ਕਰਨ ਦੀ ਕੋਸ਼ਿਸ਼ ਕਰਦੇ ਰਹੇ। ਇਸ ਮਾਹੌਲ ਨੇ ਭਿੰਡਰਾਂਵਾਲੇ ਵਰਗੇ ਫ਼ਿਰਕੂ ਸੌੜੀ ਸੋਚ ਵਾਲਿਆਂ ਨੂੰ ਅੱਗੇ ਵਧਣ ਦਾ ਮੌਕਾ ਦਿੱਤਾ। ਕਾਂਗਰਸ ਵਲੋਂ ਸੌੜੇ ਰਾਜਨੀਤਿਕ ਹਿੱਤਾਂ ਲਈ ਭਿਂਡਰਾਂਵਾਲੇ ਨੂੰ ਵਰਤਣ ਦੇ ਕਾਰਨ ਮਹੌਲ ਹੋਰ ਖਰਾਬ ਹੋਇਆ। ਕਾਂਗਰਸ ਦੀ ਉਸ ਗਲਤ ਨੀਤੀ ਕਰਕੇ ਬਾਅਦ ਵਿੱੰਚ ਪੰਜਾਬ ਦੀ ਜਨਤਾ ਨੂੰ ਗੰਭੀਰ ਸਿੱਟੇ ਭੁਗਤਣੇ ਪਏ। ਪਹਿਲਾਂ ਅਕਾਲੀ ਭਿੰਡਰਾਂਵਾਲੇ ਨੂੰ ਕਾਂਗਰਸ ਦਾ ਏਜੰਟ ਦਸਦੇ ਰਹੇ ਪਰ ਬਾਅਦ ਵਿੱਚ ਉਹਨਾ ਨੇ ਉਸਨੂੰ ਵਰਤਣ ਵਿੱਚ ਕੋਈ ਕਸਰ ਨਾ ਛੱਡੀ। ਚੰਗੀ ਤਰਾਂ ਯਾਦ ਹੈ ਕਿ ਉਸ ਵੇਲੇ ਕਿਵੇਂ ਅਕਾਲੀ ਤੇ ਭਾਜਪਾਈ ਘੁਰਨਿਆਂ ਵਿੱਚ ਵੜੇ ਬੈਠੇ ਸਨ। ਅਕਾਲੀਆਂ ਵਲੋਂ ਸੰਵਿਧਾਨ ਨੂੰ ਪਾੜਨ ਦੀ ਘਟਨਾ ਪੂਰੀ ਤਰਾਂ ਚੇਤੇ ਹੈ। ਇਹ ਵੀ ਨਹੀਂ ਭੁੱਲਣਾ ਚਾਹੀਦਾ ਕਿ ਉਸ ਵੇਲੇ ਅਕਾਲੀਆਂ ਵਿੱਚ ਨਰਮ ਤੇ ਗਰਮ ਖਿਆਲੀਆਂ ਦੀ ਚਰਚਾ ਵੀ ਚੱਲੀ ਸੀ।  ਨਿਰਦੋਸ਼ਾਂ ਦੇ ਕਾਤਿਲ ਅੱਤਵਾਦੀਆਂ ਨੂੰ ਸਿਵਾਏ ਕਮਿਉਨਿਸਟਾਂ ਦੇ ਸਭ ਡਰਦੇ ਮਾਰੇ ਖਾੜਕੂ ਆਖਣ ਲੱਗ ਪਏ ਸਨ। ਇਹ ਗੱਲ ਭੁੱਲੀ ਨਹੀਂ ਕਿ ਕਿਵੇਂ ਅਮਨ ਕਮੇਟੀਆਂ ਵਿੱਚ ਅਕਾਲੀ ਤੇ ਸੰਘੀ ਇੱਕ ਦੂਸਰੇ ਤੇ ਫ਼ਿਰਕੂ ਦ੍ਰਿਸ਼ਟੀਕੋਣ ਨਾਲ ਦੂਸ਼ਣਬਾਜ਼ੀ ਕਰਦੇ ਸਨ ਤੇ ਕਮਿਉਨਿਸਟ ਅਤੇ ਅਗਾਂਹਵਧੂ ਲੋਕ ਉਹਨਾਂ ਨੂੰ ਠੰਡੇ ਕਰਦੇ ਰਹਿ ਜਾਂਦੇ ਸਨ। ਇਸ ਕਿਸਮ ਦਾ ਮਾਹੌਲ ਬਣਾ ਦਿੱਤਾ ਗਿਆ ਸੀ ਕਿ ਜੋ ਕੋਈ ਵੀ ਵੱਖਵਾਦੀ ਅਤੇ ਫ਼ਿਰਕੂ ਸੋਚ ਦਾ ਵਿਰੋਧ ਕਰਦਾ ਸੀ ਉਸਨੂੰ ਡਰਾਉਣਾ ਧਮਕਾਉਣਾ ਆਮ ਗੱਲ ਸੀ ਅਤੇ ਅਤੇ ਕਈਆਂ ਨੂੰ ਤਾਂ ਜਾਨੋਂ  ਮਾਰ ਦਿੱਤਾ ਗਿਆ।
ਅੱਜ ਬਲਿਊ ਸਟਾਰ ਦੀ ਗੱਲ ਤਾਂ ਕੀਤੀ ਜਾ ਰਹੀ ਹੈ, ਪਰ ਉਸਦੇ ਪਿੱਛੇ ਪਵਿੱਤਰ ਦਰਬਾਰ ਸਾਹਿਬ ਦੀ ਬੇਅਦਬੀ ਜੋ ਲਗਾਤਾਰ ਹੋ ਰਹੀ ਸੀ ਬਾਰੇ ਅੱਖਾਂ ਮੀਟੀਆਂ ਹੋਈਆਂ ਹਨ। ਬਲੈਕ ਥੰਡਰ ਆਪਰੇਸ਼ਨ ਜੋ ਬਰਨਾਲਾ ਸਰਕਾਰ ਵੇਲੇ ਕੀਤਾ ਗਿਆ, ਉਸਨੂੰ ਤਾਂ ਬਿਲਕੁਲ ਭੁਲਾ ਹੀ ਦਿੱਤਾ ਗਿਆ ਹੈ ਕਿਓਂਕਿ  ਉਸ ਵਿੱਚ ਸਭ ਕੁੱਝ ਟੈਲੀਵੀਜ਼ਨ ਤੇ ਦਿਖਾਇਆ ਜਾ ਰਿਹਾ ਸੀ ਤੇ ਹਰ ਚੀਜ਼ ਪਾਰਦਰਸ਼ੀ ਸੀ। ਅੱਜ ਪੰਜਾਬ ਵਿੱਚ ਨਿਰਦੋਸ਼ਾਂ ਦੇ ਕਤਲਾਂ ਦੀ ਗੱਲ ਦਾ ਜ਼ਿਕਰ ਤੱਕ ਨਹੀਂ ਹੋ ਰਿਹਾ। ਇਸ ਗੱਲ ਦਾ ਵੀ ਕੋਈ ਜਿਕਰ ਨਹੀ ਹੋ ਰਿਹਾ ਹੈ ਕਿ ਕਿਵੇ ਭਾਰਤੀ ਜਨਤਾ ਪਾਰਟੀ ਨੇ ਸਰਕਾਰ ਉੱਪਰ ਫੌਜੀ ਕਾਰਵਾਈ ਦਾ ਦਬਾਅ ਪਾਇਆ। ਦੂਜੇ ਪਾਸੇ  ਅਕਾਲੀ ਡਰਦੇ ਹੋਏ ਕੁਝ ਨਹੀ ਸਨ ਬੋਲਦੇ।  ਦਿੱਲੀ ਤੇ ਹੋਰ ਥਾਵਾਂ ਤੇ ਦੰਗਿਆਂ ਵਿੱਚ ਸੰਘੀਆਂ ਦਾ ਵੀ ਹੱਥ ਸੀ, ਇਸਦੀ ਪੜਤਾਲ ਦੀ ਗੱਲ ਕੋਈ ਨਹੀਂ ਕਰਦਾ। ਮਈ ਵਿੱਚ ਹੋਈਆਂ ਸੰਸਦੀ ਚੋਣਾਂ ਦੌਰਾਨ ਪੰਜਾਬ ਵਿੱਚ ਲੋਕ ਮੁੱਦੇ ਪਿੱਛੇ ਰਹਿ ਗਏ ਤੇ ਬਰਗਾੜੀ ਦੀਆਂ ਘਟਨਾਵਾਂ ਨੂੰ ਚੋਣ ਪਰਚਾਰ ਵਿੱਚ ਬਹੁਤ ਅਹਿਮੀਅਤ ਦਿੱਤੀ ਗਈ। ਪੰਜਾਬ ਦਾ ਮੁੱਖ ਮੰਤਰੀ ਵੀ ਇਸ ਕਿਸਮ ਦੀ ਸੋਚ ਦਾ ਸਮਰਥਕ ਹੈ।
ਇਸ ਲਈ ਅੱਜ ਇਸ ਗੱਲ ਦੀ ਲੋੜ ਹੈ ਕਿ ਸੱਚ ਲੋਕਾਂ ਨੂੰ ਦੱਸਿਆ ਜਾਏ। ਘਟਨਾਵਾਂ ਦਾ ਜ਼ਿਕਰ ਵਿਗਿਆਨਕ ਢੰਗ ਦੇ ਨਾਲ ਨਾ ਕਿ ਫ਼ਿਰਕੂ ਨਿਗਾਹ ਨਾਲ ਕੀਤਾ ਜਾਏ। ਜਿਹੜੇ ਧਰਮਨਿਰਪੱਖ ਤੇ ਜਮਹੂਰੀ ਸੋਚ ਰੱਖਣ ਵਾਲੇ ਬੁੱਧੀਜੀਵੀ ਉਦੋਂ ਕਾਰਜਸ਼ੀਲ ਸਨ ਉਹਨਾਂ ਨੂੰ ਚਾਹੀਦਾ ਹੈ ਕਿ ਜੋ ਮਾਹੌਲ ਅੱਜ ਬਣਾਇਆ ਜਾ ਰਿਹਾ ਹੈ ਉਸਤੇ ਚੁੱਪ ਨਾ ਬੈਠਣ ਬਲਕਿ ਆਪਣੇ ਉਸ ਸਮੇਂ ਦੇ ਅਨੁਭਵਾਂ ਨੂੰ ਲੋਕਾਂ ਨਾਲ ਬਿਨਾਂ ਕਿਸੇ ਭੜਕਾਹਟ ਦੇ ਸਾਂਝਾ ਕਰਨ। ਅੱਜ ਹਾਲਾਤ 1980ਵਿਆਂ ਨਾਲੋਂ ਇਸ ਕਾਰਨ ਵੀ ਬਦਤਰ ਹਨ ਕਿ ਕੇਂਦਰ ਵਿੱਚ ਅੱਤ ਦੀ ਫ਼ਿਰਕੂ ਸਰਕਾਰ ਸੱਤਾ ਵਿੱਚ ਦੁਬਾਰਾ ਆ ਗਈ ਹੈ।  ਫ਼ਿਰਕੂ ਸ਼ਕਤੀਆਂ ਹਮੇਸ਼ਾਂ ਹੀ ਇੱਕ ਦੂਸਰੇ ਦੀਆਂ ਪੂਰਕ ਹੁੰਦੀਆਂ ਹਨ। ਕੇਂਦਰ ਵਿੱਚ ਬੈਠੇ ਸ਼ਾਸਕ ਸੂਬੇ ਅੰਦਰ ਫ਼ਿਰਕੂ ਸਦਭਾਵਨਾ ਨੂੰ ਅੱਗ ਲਾਉਣ ਵਿੱਚ ਦੇਰ ਨਹੀਂ ਲਾਉਣਗੇ। ਵਿਦੇਸ਼ਾਂ ਵਿੱਚ ਬੈਠੇ ਜੀਵਨ ਦਾ ਅਨੰਦ ਮਾਣਦੇ ਸਾਜ਼ਿਸ਼ਾਂ ਕਰਨ ਵਾਲੇ ਕੁੱਝ ਮੁੱਠੀਭਰ ਧਨੀ ਲੋਕ ਇੱਕ ਵਾਰ ਫਿਰ ਪੰਜਾਬ ਵਿੱਚ ਮਾਹੌਲ ਖਰਾਬ ਕਰਨ ਦਾ ਉਪਰਾਲਾ ਕਰ ਰਹੇ ਹਨ। ਇਸਦੇ ਵਿਰੁੱਧ ਚੇਤਨ ਰਹਿਣਾ ਤੇ ਇਸਨੂੰ ਸ਼ਿਕਸਤ ਦੇਣੀ ਜ਼ਰੂਰੀ ਹੈ। ਪੰਜਾਬ ਸਰਕਾਰ ਇਸ ਬਾਰੇ ਬਿਲਕੁਲ ਅਵੇਸਲੀ ਹੈ। ਸੱਤਾ ਦੀ ਇਹ ਜੁੰਮੇਵਾਰੀ ਬਣਦੀ ਹੈ ਕਿ ਦੇਸ਼ ਦੀ ਏਕਤਾ, ਅਖੰਡਤਾ, ਸਮਾਜੀ ਸਦਭਾਵਨਾ ਦੀ ਰਾਖੀ ਵਿੱਚ ਸਮਾਂ ਰਹਿੰਦੇ ਕਦਮ ਚੁੱਕੇ।
ਇਸ ਲਈ ਅੱਜ ਕਮਿਉਨਿਸਟਾਂ ਦੇ ਲਈ ਜਰੂਰੀ ਬਣ ਗਿਆ ਹੈ ਕਿ ਜਿੱਥੇ ਲੋਕਾਂ ਦੀਆਂ ਹੱਕੀ ਮੰਗਾਂ ਦੇ ਲਈ ਸੰਘਰਸ਼ ਕੀਤੇ ਜਾਣ ਉੱਥੇ ਨਾਲ ਹੀ ਮੌਜੂਦਾ ਹਾਲਾਤ ਉੱਪਰ ਲਗਾਤਾਰ ਤਿੱਖੀ ਨਜ਼ਰ ਰੱਖ ਕੇ ਇਹਨਾਂ ਨੂੰ ਸਹੀ ਦਿਸ਼ਾ ਵੱਲ ਲਿਜਾਉਣ ਲਈ ਲੋਕ ਲਾਮਬੰਦੀ ਕੀਤੀ ਜਾਏ। ਅਸੀਂ ਭੁੱਲੇ ਨਹੀਂ ਕਿ ਉਸ ਵੇਲੇ ਦੇ ਮਾਹੌਲ ਵਿੱਚ ਲੋਕਾਂ ਦੇ ਰੋਜ਼ਮਰਾ ਜ਼ਿੰਦਗੀ ਦੇ ਮੁੱਦੇ ਤੇ ਉਹਨਾਂ ਲਈ ਸੰਘਰਸ਼ ਪਿੱਛੇ ਪੈ ਗਏ ਸੀ ਕਿਉਂਕਿ ਡਰ, ਖੌਫ਼ ਤੇ ਜ਼ਿੰਦਗੀ ਨੂੰ ਬਚਾਉਣ ਦਾ ਸਵਾਲ ਸਭ ਤੋਂ ਪਰਮੁੱਖ ਬਣ ਗਿਆ ਸੀ। 
ਅੱਤਵਾਦ ਵਲੋਂ ਦਿੱਤੇ ਜ਼ਖ਼ਮ, 31 ਸਾਲਾਂ ਬਾਅਦ ਵੀ 'ਅੱਲ੍ਹੇ

ਲੈਨਿਨ ਦਾ ਸਾਮਰਾਜਵਾਦ ਬਾਰੇ ਥੀਸਿਸ ਅੱਜ ਵੀ ਸਾਰਥਿਕ-ਅੰਮ੍ਰਿਤਪਾਲ

ਸੀਪੀਆਈ ਲੁਧਿਆਣਾ ਵਲੋਂ ਪੁਲਿਸ ਦੇ ਖਿਲਾਫ ਪਰੈਸ ਕਾਨਫਰੰਸ

Wednesday, June 19, 2019

ਸੂਬੇ ਭਰ ਦੀਆਂ ਜੇਲ੍ਹਾਂ ਵਿੱਚ ਪੋਲੀਥੀਨ ਲਿਫ਼ਾਫ਼ਿਆਂ ਦੀ ਵਰਤੋਂ 'ਤੇ ਪਾਬੰਦੀ

Jun 19, 2019, 5:23 PM
ਕੈਦੀ ਅਖ਼ਬਾਰਾਂ ਅਤੇ ਹੋਰ ਕਾਗਜ਼ਾਂ ਦੀ ਰੱਦੀ ਦੇ ਖੁਦ ਬਣਾਉਣਗੇ ਲਿਫ਼ਾਫ਼ੇ
ਲੁਧਿਆਣਾ19 ਜੂਨ 2019: (ਪੰਜਾਬ ਸਕਰੀਨ ਬਿਊਰੋ)::
ਪੰਜਾਬ ਸਰਕਾਰ ਨੇ ਸੂਬੇ ਦੀਆਂ ਵੱਖ-ਵੱਖ ਜੇਲ੍ਹਾਂ ਵਿੱਚ ਬੰਦ ਕੈਦੀਆਂ ਦੇ ਜੀਵਨ ਵਿੱਚ ਸੁਧਾਰ ਲਿਆਉਣ ਲਈ ਸ਼ੁਰੂ ਕੀਤੇ ਯਤਨਾਂ ਤਹਿਤ ਹੁਣ ਵੱਧ ਤੋਂ ਵੱਧ ਕੈਦੀਆਂ ਨੂੰ ਹੱਥੀਂ ਕਿਰਤ ਨਾਲ ਜੋੜਨ ਦਾ ਉਪਰਾਲਾ ਕੀਤਾ ਹੈ। ਜੇਲ੍ਹਾਂ ਵਿੱਚ ਬੰਦ ਕੈਦੀ ਹੁਣ ਕਾਗਜ਼ਾਂ ਦੀ ਰੱਦੀ ਤੋਂ ਲਿਫ਼ਾਫੇ ਬਣਾਇਆ ਕਰਨਗੇ। ਮੁੱਢਲੇ ਗੇੜ ਵਿੱਚ ਇਹ ਲਿਫ਼ਾਫੇ ਜੇਲ੍ਹਾਂ ਵਿੱਚ ਹੀ ਵਰਤੇ ਜਾਣਗੇ, ਪਰ ਜਲਦ ਹੀ ਇਹ ਬਾਜ਼ਾਰ ਵਿੱਚ ਵੀ ਲਿਆਂਦੇ ਜਾਣਗੇ।  

ਇਸ ਸੰਬੰਧੀ ਜਾਣਕਾਰੀ ਦਿੰਦਿਆਂ ਕੇਂਦਰੀ ਜੇਲ੍ਹ ਲੁਧਿਆਣਾ ਦੇ ਸੁਪਰਡੈਂਟ ਸ੍ਰ. ਸ਼ਮਸ਼ੇਰ ਸਿੰਘ ਬੋਪਾਰਾਏ ਨੇ ਦੱਸਿਆ ਕਿ ਜੇਲ੍ਹਾਂ ਦੇ ਸੁਧਾਰ ਸੰਬੰਧੀ ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਵੱਲੋਂ ਸਮੇਂ-ਸਮੇਂ 'ਤੇ ਉਸਾਰੂ ਫੈਸਲੇ ਲਏ ਜਾਂਦੇ ਰਹਿੰਦੇ ਹਨ। ਬੀਤੇ ਦਿਨੀਂ ਮੁੱਖ ਮੰਤਰੀ ਦੀ ਪ੍ਰਧਾਨਗੀ ਹੇਠ ਕੀਤੀ ਗਈ ਰਿਵਿਊ ਮੀਟਿੰਗ ਵਿੱਚ ਫੈਸਲਾ ਕੀਤਾ ਗਿਆ ਹੈ ਕਿ ਹੁਣ ਕੇਂਦਰੀ ਜੇਲ੍ਹਾਂ ਵਿੱਚ ਬਾਜ਼ਾਰੂ ਲਿਫ਼ਾਫਿਆਂ ਦੀ ਵਰਤੋਂ 'ਤੇ ਮੁਕੰਮਲ ਰੂਪ ਵਿੱਚ ਪਾਬੰਦੀ ਲਗਾਈ ਜਾਵੇ। ਇਸਦੇ ਬਦਲ ਵਿੱਚ ਅਖ਼ਬਾਰਾਂ ਅਤੇ ਹੋਰ ਕਾਗਜ਼ਾਂ ਦੀ ਰੱਦੀ ਤੋਂ ਤਿਆਰ ਲਿਫ਼ਾਫ਼ੇ ਹੀ ਵਰਤੇ ਜਾਇਆ ਕਰਨ। ਇਹ ਲਿਫ਼ਾਫ਼ੇ ਵੀ ਜੇਲ੍ਹਾਂ ਦੇ ਕੈਦੀ ਖੁਦ ਤਿਆਰ ਕਰਿਆ ਕਰਨਗੇ।
ਉਹਨਾਂ ਕਿਹਾ ਕਿ ਵੈਸੇ ਤਾਂ ਜੇਲ੍ਹਾਂ ਵਿੱਚ ਬੰਦ ਕੈਦੀਆਂ ਨੂੰ ਹੱਥੀਂ ਕਿਰਤ ਨਾਲ ਜੋੜਨ ਲਈ ਪਹਿਲਾਂ ਵੀ ਕਈ ਉਪਰਾਲੇ ਜਾਰੀ ਹਨ, ਜਿਸ ਤਹਿਤ ਕੇਂਦਰੀ ਜੇਲ੍ਹ ਲੁਧਿਆਣਾ ਵਿੱਚ ਕੈਦੀ ਬਿਸਕੁਟ ਬਣਾਉਣ, ਕੱਪੜੇ ਦੀ ਬੁਣਾਈ, ਦਸਤਕਾਰੀ ਅਤੇ ਹਸਤਕਾਰੀ ਦਾ ਕੰਮ ਸਿੱਖਦੇ ਅਤੇ ਕਰਦੇ ਹਨ। ਉਹਨਾਂ ਕਿਹਾ ਕਿ ਜੇਲ੍ਹ ਵਿਭਾਗ ਨੇ ਫੈਸਲਾ ਕੀਤਾ ਹੈ ਕਿ ਹੁਣ ਜੇਲ੍ਹਾਂ ਦੇ ਕੈਦੀ ਹੱਥਾਂ ਨਾਲ ਲਿਫ਼ਾਫੇ ਖੁਦ ਤਿਆਰ ਕਰਿਆ ਕਰਨਗੇ ਅਤੇ ਉਹੀ ਲਿਫ਼ਾਫੇ ਜੇਲ੍ਹ ਵਿੱਚ ਵਰਤੇ ਜਾਇਆ ਕਰਨਗੇ। ਕੇਂਦਰੀ ਜੇਲ੍ਹ ਲੁਧਿਆਣਾ ਵਿੱਚ ਲਿਫ਼ਾਫ਼ੇ ਬਣਾਉਣ ਦਾ ਕੰਮ ਪਹਿਲਾਂ ਹੀ ਸ਼ੁਰੂ ਕਰ ਦਿੱਤਾ ਗਿਆ ਹੈ। 
ਇਸ ਲਈ ਲੋੜੀਂਦੀ ਰੱਦੀ ਦੀ ਉਪਲੱਬਧਤਾ ਬਾਰੇ ਪੁੱਛੇ ਜਾਣ 'ਤੇ ਉਹਨਾਂ ਦੱਸਿਆ ਕਿ ਪੰਜਾਬ ਸਰਕਾਰ ਦੇ ਹੁਕਮਾਂ 'ਤੇ ਸੂਬੇ ਭਰ ਦੇ ਡਿਪਟੀ ਕਮਿਸ਼ਨਰਾਂ ਰਾਹੀਂ ਸਾਰੇ ਦਫ਼ਤਰਾਂ ਨੂੰ ਹਦਾਇਤ ਕੀਤੀ ਗਈ ਹੈ ਕਿ ਉਹ ਭਵਿੱਖ ਵਿੱਚ ਦਫ਼ਤਰਾਂ ਵਿੱਚ ਇਕੱਠੀ ਹੁੰਦੀ ਅਖ਼ਬਾਰਾਂ ਅਤੇ ਹੋਰ ਕਾਗਜ਼ਾਂ ਦੀ ਰੱਦੀ ਨੂੰ ਵੇਚਣ ਦੀ ਬਿਜਾਏ ਜੇਲ੍ਹ ਨੂੰ ਭੇਜਣ ਤਾਂ ਜੋ ਇਸ ਰੱਦੀ ਦੇ ਲਿਫ਼ਾਫੇ ਬਣਾਏ ਜਾ ਸਕਣ। ਉਹਨਾਂ ਕਿਹਾ ਕਿ ਮੁੱਢਲੇ ਗੇੜ ਵਿੱਚ ਇਹ ਲਿਫ਼ਾਫ਼ੇ ਜੇਲ੍ਹ ਵਿੱਚ ਵਰਤੇ ਜਾਣਗੇ, ਜਦੋਂ ਰੱਦੀ ਦੀ ਆਮਦ ਅਤੇ ਲਿਫ਼ਾਫ਼ਿਆਂ ਦੀ ਮੰਗ ਵਿੱਚ ਵਾਧਾ ਹੋਵੇਗਾ ਤਾਂ ਇਹ ਲਿਫ਼ਾਫੇ ਬਾਜ਼ਾਰ ਵਿੱਚ ਵੀ ਭੇਜੇ ਜਾਣਗੇ। 

ਸ੍ਰ. ਬੋਪਾਰਾਏ ਨੇ ਕਿਹਾ ਕਿ ਜੇਲ੍ਹ ਵਿਭਾਗ ਦੀ ਇਹ ਪੁਰਜ਼ੋਰ ਕੋਸ਼ਿਸ਼ ਹੈ ਕਿ ਜੋ ਵੀ ਵਿਅਕਤੀ ਕਿਸੇ ਨਾ ਕਿਸੇ ਕਾਰਨ ਕੇਂਦਰੀ ਜੇਲ੍ਹ ਆਉਂਦਾ ਹੈ ਉਹ ਇਥੋਂ ਇੱਕ ਚੰਗਾ ਇਨਸਾਨ ਬਣ ਕੇ ਬਾਹਰ ਜਾਣ ਦੇ ਨਾਲ-ਨਾਲ ਹੁਨਰਮੰਦ ਹੋ ਕੇ ਜਾਵੇ ਤਾਂ ਜੋ ਉਹ ਆਪਣੀ ਸਜ਼ਾ ਪੂਰੀ ਕਰਨ ਉਪਰੰਤ ਸਮਾਜ ਵਿੱਚ ਹੱਥੀਂ ਕੰਮ ਕਰਕੇ ਆਪਣਾ ਜੀਵਨ ਨਿਰਬਾਹ ਕਰ ਸਕਣ। ਇੱਕ ਵਾਰ ਫੇਰ ਪੋਲੀਥੀਨ ਲਿਫ਼ਾਫ਼ਿਆਂ ਦੀ ਵਰਤੋਂ 'ਤੇ ਪਾਬੰਦੀ ਪਰ ਬਣਾਉਣ ਦੀ ਖੁੱਲ ਕਦੋਂ ਤੱਕ?

Monday, June 17, 2019

ਦਿੱਲੀ ਪੁਲਸ ਵੱਲੋਂ ਸਿੱਖ ਪਿਉ-ਪੁੱਤ ਦੀ ਕੁੱਟ-ਮਾਰ ਦੀ ਕਰੜੇ ਸ਼ਬਦਾਂ ਵਿੱਚ ਨਿੰਦਾ

ਇੰਨਕਲਾਬੀ ਕੇਂਦਰ, ਪੰਜਾਬ ਨੇ ਲਿਆ ਗੰਭੀਰ ਨੋਟਿਸ 
ਲੁਧਿਅਣਾ: 17 ਜੂਨ 2019: (ਪੰਜਾਬ ਸਕਰੀਨ ਬਿਊਰੋ)::
ਜਸਵੰਤ ਜੀਰਖ 
ਇਨਕਲਾਬੀ ਕੇਂਦਰ, ਪੰਜਾਬ ਦੇ ਆਗੂਆਂ ਜਸਵੰਤ ਜੀਰਖ ਅਤੇ ਅੰਮ੍ਰਿਤ ਪਾਲ ਪੀ. ਏ. ਯੂ. ਨੇ ਮੁਖਰਜੀ ਨਗਰ ਦੀ ਦਿੱਲੀ ਪੁਲਸ ਵੱਲੋਂ ਪਿਉ-ਪੁੱਤ ਦੀ ਬਿਨਾਂ ਕਿਸੇ ਕਸੂਰ ਤੋਂ ਕੀਤੀ ਕੁੱਟ-ਮਾਰ ਦੀ ਕਰੜੇ ਸ਼ਬਦਾਂ ਵਿੱਚ ਨਿੰਦਾ ਕੀਤੀ ਹੈ ਅਤੇ ਪੀੜਤਾਂ ਨਾਲ ਹਮਦਰਦੀ ਦਾ ਇਜ਼ਹਾਰ ਕੀਤਾ ਹੈ।  ਸੋਸ਼ਲ ਮੀਡੀਆ ਤੇ ਜਾਰੀ ਹੋਈ ਵੀਡੀਓ ਸਾਫ ਤੌਰ ਤੇ ਦਿਖਾਉਂਦੀ ਹੈ ਕਿ ਸਿੱਖ ਆਟੋ ਡਰਾਈਵਰ ਨੇ ਪੁਲਸ ਨੂੰ ਕੋਈ ਨੁਕਸਾਨ ਨਹੀਂ ਪਹੁੰਚਾਇਆ, ਸਿਰਫ ਜਬਾਨੀ ਗੱਲ-ਬਾਤ ਹੋਈ ਹੈ ਪਰ, ਡਰਾਈਵਰ ਸਰਬਜੀਤ ਸਿੰਘ ਅਤੇ ਉਸਦੇ ਬੇਟੇ ਬਲਵੰਤ ਸਿੰਘ ਨੂੰ ਬੇਰਹਿਮੀ ਨਾਲ ਡੰਡਿਆਂ ਨਾਲ ਕੱਟਿਆ ਗਿਆ ਅਤੇ ਬੂਟਾਂ ਦੇ ਠੁੱਡੇ ਮਾਰੇ ਗਏ। ਦਿੱਲੀ ਪੁਲਸ ਅਜਿਹੀਆਂ ਨਾਂਹਪੱਖੀ ਘਟਨਾਵਾਂ ਕਰਕੇ ਹਮੇਸ਼ਾ ਚਰਚਾ ਵਿੱਚ ਰਹਿੰਦੀ ਹੈ। ਇਹ ਉਹੀ ਦਿੱਲੀ ਪੁਲਸ ਹੈ ਜੋ ਲੜਕੀਆਂ ਨੂੰ ਸੁਰੱਖਿਆ ਦੇਣ ‘ਚ ਨਾਕਾਮ ਰਹੀ ਹੈ। ਇਸੇ ਦਿੱਲੀ ਪੁਲਸ ਦਾ ਇਹ ਬਦਨਾਮ ਰਿਕਾਰਡ ਹੈ ਕਿ ਉਹ ਯੂਨੀਵਰਸਿਟੀ ਕੈਂਪਸ ਵਿੱਚ ਜਾਂਦੀ ਹੈ ਅਤੇ ਵਿਦਿਆਰਥੀਆਂ ਨੂੰ ਝੂਠੇ ਕੇਸਾਂ ਵਿੱਚ ਫਸਾਉਂਦੀ ਹੈ ਅਤੇ ਬਾਅਦ ਵਿੱਚ ਉਨੀ ਦੇਰ ਉਨ੍ਹਾਂ ਤੇ ਚਾਰਜਸ਼ੀਟ ਦਾਖਲ ਕਰਨ ਦੀ ਹਿੰਮਤ ਨਹੀ ਕੀਤੀ ਜਦੋਂ ਤੱਕ ਪੁਲਸ ਦੇ ਫਿਰਕੂ ਹੁਕਮਰਾਨਾਂ ਵੱਲੋਂ ਅਜਿਹਾ ਕਰਨ ਲਈ ਕਿਹਾ ਨਹੀਂ ਗਿਆ। 
ਪਿਛਲੇ ਕੁੱਝ ਸਾਲਾਂ ‘ਚ ਘੱਟ ਗਿਣਤੀਆਂ ਤੇ ਹਰ ਸ਼ਕਲ ਵਿੱਚ ਹਮਲਾ ਕਰਨਾ ਨੰਗੀ-ਚਿੱਟੀ ਗੱਲ ਰਹੀ ਹੈ ਅਤੇ ਸਰਬਜੀਤ ਸਿੰਘ ਤੇ ਬਲਵੰਤ ਸਿੰਘ ਇਸਦੀ ਤਾਜਾ ਸ਼ਿਕਾਰ ਹਨ। ਇਸ ਸੰਕਟ ਦੀ ਘੜੀ 'ਚ ਇਨਕਲਾਬੀ ਕੇਂਦਰ ਪੰਜਾਬ ਦਿੱਲੀ ਪੁਲਸ ਦੀ ਧੱਕੇਸ਼ਾਹੀ ਦੇ ਖਿਲਾਫ ਜਮਹੂਰੀਅਤ ਪਸੰਦ ਅਤੇ ਇਨਸਾਫ ਪਸੰਦ ਲੋਕਾਂ ਦੇ ਨਾਲ ਖੜ੍ਹਾ ਹੈ। ਜ਼ਿਕਰਯੋਗ ਹੈ ਕਿ ਨਵੰਬਰ-84 ਵਿੱਚ ਵੀ ਦਿੱਲੀ ਪੁਲਿਸ ਦਾ ਰੋਲ ਪੂਰੀ ਤਰਾਂ ਨਿਖੇਧੀ ਯੋਗ ਰਿਹਾ ਸੀ। ਇਹੀ ਪੁਲਿਸ ਆਪਣੇ ਸਾਹਮਣੇ ਬੇਗੁਨਾਹਾਂ ਨੂੰ ਸੜਦਾ ਦੇਖਦੀ ਰਹੀ।
ਮਾਮਲਾ ਕੀ ਹੈ 
ਇਹ ਵਿਵਾਦ ਉਦੋਂ ਪੈਦਾ ਹੋਇਆ ਜਦੋਂ ਦਿੱਲੀ ਦੇ ਡਾਕਟਰ ਮੁਖਰਜੀ ਨਗਰ ਇਲਾਕੇ ਵਿੱਚ ਪੁਲਿਸ ਦੀ ਇਕ ਗੱਡੀ ਅਤੇ ਕੁੱਟਮਾਰ ਦਾ ਸ਼ਿਕਾਰ ਹੋਏ ਸਿੱਖ ਵਿਅਕਤੀ ਦੇ ਆਟੋ ਦੀ ਟੱਕਰ ਹੋ ਗਈ। ਪੁਲਿਸ ਦੀ ਗੱਡੀ ਐਮਰਜੰਸੀ ਰਿਸਪੌਂਸ ਵਾਹਨ (ਈ ਆਰ ਵੀ) ਸੀ। ਝਗੜਾ ਵਧਦਾ ਨਜ਼ਰ ਆਇਆ ਤਾਂ ਸਿੱਖ ਡਰਾਈਵਰ ਨੇ ਆਪਣੇ ਬਚਾਅ ਲਈ ਕਿਰਪਾਨ ਕੱਢ ਲਈ। ਇਸ ਤੋਂ ਬਾਅਦ ਪੁਲਿਸ ਨੇ ਪੂਰੀ ਫੋਰਸ ਲਿਆ ਕੇ ਇਸ ਸਿੱਖ ਡਰਾਈਵਰ ਅਤੇ ਉਸਦੇ ਮੁੰਡੇ ਨੂੰ ਬੜੀ ਬੇਰਹਿਮੀ ਨਾਲ ਕੁੱਟਿਆ। 
ਕੇਜਰੀਵਾਲ ਨੇ ਕੀਤੇ ਤਿੰਨ ਪੁਲਿਸ ਵਾਲੇ ਸਸਪੈਂਡ
ਇਸੇ ਦੌਰਾਨ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੇ ਪੀੜਤ ਸਿੱਖ ਪਰਿਵਾਰ ਨਾਲ ਮੁਲਾਕਾਤ ਵੀ ਕੀਤੀ ਅਤੇ ਤਿੰਨ ਸਬੰਧਿਤ ਪੁਲਿਸ ਵਾਲਿਆਂ ਨੂੰ ਸਸਪੈਂਡ ਕਰਨ ਦੇ ਹੁਕਮ ਵੀ ਜਾਰੀ ਕੀਤੇ।  ਇਸਦੇ ਬਾਵਜੂਦ ਸਿੱਖ ਹਲਕਿਆਂ ਵਿੱਚ ਰੋਸ ਅਤੇ ਰੋਹ ਜਾਰੀ ਹੈ। 
ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਟਵੀਟ ਕਰ ਕੇ ਕਿਹਾ ਹੈ ਕਿ ਦਿੱਲੀ ਪੁਲਿਸ ਦਾ ਵਤੀਰਾ ਬੇਹੱਦ ਸ਼ਰਮਨਾਕ ਹੈ। ਪੀੜਤਾਂ ਨੂੰ ਇਨਸਾਫ ਮਿਲਣਾ ਚਾਹੀਦਾ ਹੈ ਅਤੇ ਅਜਿਹੇ ਪੁਲਿਸ ਵਾਲਿਆਂ ਖਿਲਾਫ ਐਕਸ਼ਨ ਲਿਆ ਜਾਣਾ ਚਾਹੀਦਾ ਹੈ। 
ਇਸੇ ਦੌਰਾਨ ਪ੍ਰਸਿੱਧ ਸ਼ਾਇਰ Baljit Saini ਬਲਜੀਤ ਸੈਣੀ ਨੇ ਕਿਹਾ ਹੈ,"ਕਸੂਰ ਕੋਈ ਵੀ ਹੋਵੇ... ਮੈਂ ਇਸ ਅਣਮਨੁੱਖੀ ਰਵਈਏ ਲਈ ਦਿੱਲੀ ਪੁਲੀਸ ਨੂੰ ਲਾਹਨਤ ਭੇਜਦੀ ਹਾਂ....."
ਇਸੇ ਤਰਾਂ ਇੱਕ ਹੋਰ ਲੇਖਿਕਾ Bhupinder Kaur Preet ਭੁਪਿੰਦਰ ਕੌਰ ਪ੍ਰੀਤ ਨੇ ਕਿਹਾ ਹੈ,"ਇਸੇ ਲਈ ਆਪਣੇ ਮੁਲਕ ਵਿਚ ਵੀ ਸਾਨੂੰ ਬੇਗਾਨਗੀ ਦਾ ਅਹਿਸਾਸ ਹੁੰਦਾ ਹੈ।ਸ਼ਰਮਨਾਕ ਹੈ ,ਦਰਿੰਦਗੀ ਹੈ ਇਹ...."
Mohinder Kaur ਨੇ ਕਿਹਾ,"84 ਵਾਲਾ ਹਾਲ ਹੈ"
Karanjeet Dard ਨੇ ਕਿਹਾ,"ਵਤਨ ਆਪਣੇ ਨੂੰ ਆਪਣਾ ਕਹਿਣ ਤੇ ਹੁਣ ਸ਼ਰਮ ਆਉਂਦੀ ਹੈ!"

Sunday, June 16, 2019

ਥਾਣਾ ਪੀਏਯੂ ਦੀ ਪੁਲਸ ਅਤੇ ਵਖਾਵਾਕਾਰੀ ਹੋਏ ਆਹਮੋ ਸਾਹਮਣੇ

Updated on 18th June 2019 at 06:10 PM
ਲੀਡਰਾਂ ਨੂੰ ਥੋਹੜੀ ਦੇਰ ਥਾਣੇ "ਰੋਕ" ਕੇ ਘੰਟੇ ਕੁ ਬਾਅਦ ਛੱਡਿਆ 

ਲੁਧਿਆਣਾ:16 ਜੂਨ 2019: (ਪੰਜਾਬ ਸਕਰੀਨ ਬਿਊਰੋ)::  
ਬਹੁਤ ਪਹਿਲਾਂ ਇੱਕ ਹਿੰਦੀ ਫਿਲਮ ਆਈ ਸੀ ਜਿਸ ਵਿੱਚ ਕੁਝ ਗੁੰਡੇ ਇੱਕ ਵਿਧਵਾ ਔਰਤ ਨੂੰ ਜਬਰੀ ਚੁੱਕ ਕੇ ਲਿਆਉਂਦੇ ਹਨ ਅਤੇ ਉਸਦੇ ਜਵਾਨ ਬੱਚਿਆਂ ਦੇ ਸਾਹਮਣੇ  ਉਸਦੀ ਮਾਂਗ ਵਿੱਚ ਜਬਰਦਸਤੀ ਸਿੰਧੂਰ ਭਰਨ ਦੀ ਨਾਪਾਕ ਕੋਸ਼ਿਸ਼ ਕਰਦੇ ਹਨ। ਇਹ ਇੱਕ ਫਿਲਮੀ ਸੀਨ ਸੀ ਅਤੇ ਕਿਸੇ ਨੇ ਸੋਚਿਆ ਵੀ ਨਹੀਂ ਸੀ ਕਿ ਆਜ਼ਾਦ ਭਾਰਤ ਵਿੱਚ ਇਹ ਕੁਝ ਆਮ ਹੋਣ ਲੱਗ ਪਵੇਗਾ। ਹਾਲ ਹੀ ਵਿੱਚ ਲੁਧਿਆਣਾ ਦੇ ਰਿਸ਼ੀ ਨਗਰ ਦਾ ਇੱਕ ਮਾਮਲਾ ਸਾਹਮਣੇ ਆਇਆ ਹੈ ਜਿੱਥੇ ਅਨੂ ਨਾਮ ਦੀ ਇੱਕ ਔਰਤ ਦਾ ਜਬਰੀ ਗੈਰਕਾਨੂੰਨੀ ਤਲਾਕ ਕਰਵਾ ਕੇ ਉਸਨੂੰ ਕਿਸੇ ਹੋਰ ਨਾਲ ਭੇਜ ਦਿੱਤਾ ਗਿਆ। ਅਨੂ ਦਾ ਕਹਿਣਾ ਹੈ ਕਿ ਉਸ ਨੂੰ ਵੇਚਿਆ ਗਿਆ। ਇਹ ਕੁਝ ਵਾਪਰਿਆ ਏਥੋਂ ਦੇ ਹੀ ਮਨਜਿੰਦਰ ਸਿੰਘ ਦੀ ਪਤਨੀ ਅਨੂ ਨਾਲ। ਇਸ ਗੈਰਕਾਨੂੰਨੀ ਤਲਾਕ ਮਗਰੋਂ ਅਨੂ ਨੂੰ ਨਰੇਂਦਰ ਨਾਮ ਦੇ ਕਿਸੇ ਵਿਅਕਤੀ ਨਾਲ ਜਬਰੀ ਤੋਰ ਦਿੱਤਾ ਗਿਆ। ਦਿਲਚਸਪ ਗੱਲ ਸੀ ਕਿ ਇਹ ਸਭ ਕੁਝ ਕਰਨ ਕਰਾਉਣ ਵਿੱਚ ਅਨੂ ਦਾ ਪਤੀ ਮਨਜਿੰਦਰ ਸਿੰਘ ਖੁਦ ਹੀ ਸਭ ਤੋਂ ਮੂਹਰੇ ਰਿਹਾ। ਹਾਲਾਂਕਿ ਇਸ ਵਿਆਹ ਤੋਂ ਇੱਕ ਬੱਚੀ ਨੇ ਵੀ ਜਨਮ ਲਿਆ। ਜਿਹੜੀ ਇਸ ਵੇਲੇ ਪੰਜਾਂ ਸਾਲਾਂ ਦੀ ਹੈ ਅਤੇ ਉਸਨੂੰ ਮਾਂ ਤੋਂ ਲਗਾਤਾਰ ਦੂਰ ਰੱਖਿਆ ਜਾ ਰਿਹਾ ਹੈ। ਸ਼ਾਇਦ ਆਂਦਰਾਂ ਦੀ ਇਹ ਖਿੱਚ ਹੀ ਅਨੂ ਨੂੰ ਕਿਸੇ ਇੱਕ ਪਾਸੇ ਨਹੀਂ ਟਿਕਣ ਦੇਂਦੀ। ਇਸ ਬੱਚੀ ਨੂੰ ਅਜੇ ਵੀ ਅਨੂ ਤੋਂ ਦੂਰ ਰੱਖਿਆ ਜਾ ਰਿਹਾ ਹੈ। ਅਨੂ ਨਹੀਂ ਜਾਣਦੀ ਕਿ ਉਸਦੀ ਬੱਚੀ ਕਿਸ ਹਾਲਤ ਵਿੱਚ ਹੈ। 
ਕੁਝ ਮਹੀਨਿਆਂ ਮਗਰੋਂ ਫਰਵਰੀ 2018 ਵਿੱਚ ਮਨਜਿੰਦਰ ਸਿੰਘ ਦਾ ਦਿਲ ਫਿਰ ਆਪਣੀ ਪਹਿਲੀ "ਤਲਾਕਸ਼ੁਦਾ" ਪਤਨੀ ਅਨੂ 'ਤੇ ਆ ਗਿਆ ਅਤੇ ਉਹ ਉਸਨੂੰ ਵਾਪਿਸ ਆਉਣ ਲਈ ਦਬਾਅ ਬਣਾਉਣ ਲੱਗਾ। ਇਸ ਮਕਸਦ ਲਈ ਹੀ ਉਸਨੇ ਨਰੇਂਦਰ  ਦੇ ਖਿਲਾਫ 376 ਦੀ ਦਰਖ਼ਾਸਤ ਵੀ ਆਪਣੀ ਪਤਨੀ ਅਨੂ ਕੋਲੋਂ ਹੀ ਦੁਆਈ। ਸਤੰਬਰ-2018 ਤੱਕ ਇਹ ਫਿਰ ਅਨੂ ਦਾ ਸਰੀਰਕ ਸ਼ੋਸ਼ਣ ਕਰਦਾ ਰਿਹਾ ਅਤੇ ਜਦੋਂ ਫਿਰ ਮਨ ਭਰ ਗਿਆ ਤਾਂ ਉਸਨੂੰ ਫਿਰ ਘਰੋਂ ਭਜਾ ਦਿੱਤਾ। ਇੱਕ ਚੰਗਭਲੀ ਵਿਆਹੁਤਾ ਔਰਤ ਦੀ ਜ਼ਿੰਦਗੀ ਮੰਡੀ ਦੀ ਇੱਕ ਜਿਣਸ ਬਣ ਕੇ ਰਹਿ ਗਈ। ਹਾਲਾਂਕਿ ਇਹ ਸਾਰਾ ਮਾਮਲਾ ਵੁਮੈਨ ਸੈਲ ਵਾਲਿਆਂ ਕੋਲ ਵੀ ਹੈ ਅਤੇ ਇਸ 'ਤੇ ਕੰਮ ਵੀ ਹੋ ਰਿਹਾ ਹੈ ਪਰ ਖੱਜਲ ਖੁਆਰੀਆਂ ਹਰ ਵਿਅਕਤੀ ਨੂੰ ਕੋਈ ਸੌਖਾ ਰਾਹ ਲੱਭਣ ਲਈ ਮਜਬੂਰ ਕਰ ਦੇਂਦੀਆਂ ਹਨ। ਅਨੂ ਵੀ ਪ੍ਰੇਸ਼ਾਨ ਸੀ। ਉਹ ਵੀ ਕੋਈ ਸੌਖਾ ਰਾਹ ਲੱਭ ਰਹੀ ਸੀ ਜਿੱਥੇ ਜਲਦੀ ਨਿਬੇੜਾ ਹੋ ਜਾਏ। ਇਸ ਸੌਖੇ ਰਾਹ ਦੀ ਭਾਲ ਵਿੱਚ ਹੀ ਉਸਦਾ ਮੇਲ ਹੁੰਦਾ ਹੈ ਭਾਰਤੀ ਕਮਿਊਨਿਸਟ ਪਾਰਟੀ ਦੇ ਸਥਾਨਕ ਆਗੂ ਅਤੇ ਸਰਗਰਮ ਸਮਾਜਸੇਵੀ ਕਾਮਰੇਡ ਗੁਰਨਾਮ ਸਿੰਘ ਸਿੱਧੂ ਨਾਲ। 
ਜਦੋਂ ਉਸਨੇ ਇਹ ਸਾਰਾ ਮਾਮਲਾ ਕਾਮਰੇਡ ਗੁਰਨਾਮ ਸਿੰਘ ਸਿੱਧੂ ਦੀ ਜਾਣਕਾਰੀ ਵਿੱਚ ਲਿਆਂਦਾ ਤਾਂ ਉਹਨਾਂ ਨੇ ਇਸ ਮਾਮਲੇ ਨੂੰ ਸਬੰਧਤ ਧਿਰਾਂ ਤੱਕ ਉਠਾਇਆ। ਕੋਸ਼ਿਸ਼ ਕੀਤੀ ਕਿ ਮਸਲਾ ਜਲਦੀ ਹੱਲ ਹੋ ਜਾਏ। ਏਨੇ ਵਿੱਚ ਹੀ ਹਾਲਾਤ ਨੇ ਨਵੀਂ ਕਰਵਟ ਲਈ। ਇਸ ਕੇਸ ਨੂੰ ਲੈ ਕੇ ਕਿਸੇ ਨੇ ਕਾਮਰੇਡ ਗੁਰਨਾਮ ਸਿੱਧੂ ਦੇ ਖਿਲਾਫ ਹੀ ਕੋਈ ਦਰਖ਼ਾਸਤ ਦੇ ਦਿੱਤੀ। ਸ਼ਾਇਦ ਇਹ ਉਹ ਲੋਕ ਹੋ ਸਕਦੇ ਹਨ ਜਿਹੜੇ ਨਹੀਂ ਚਾਹੁੰਦੇ ਹੋਣੇ ਕਿ ਅਨੂ ਆਪਣੇ ਘਰ ਵਾਪਿਸ ਜਾ ਕੇ ਫਿਰ ਵੱਸ ਜਾਏ। ਅਜਿਹੇ ਅਨਸਰਾਂ ਨੇ ਹੀ ਇਸ ਸਾਰੇ ਮਾਮਲੇ ਨੂੰ ਵਿਗਾੜਨ ਲਈ ਪੂਰੀ ਵਾਹ ਲਾਈ। 
ਹੁਣ ਕਾਮਰੇਡ ਗੁਰਨਾਮ ਸਿੰਘ ਸਿੱਧੂ ਅਤੇ ਉਹਨਾਂ ਦੀ ਧਰਮਪਤਨੀ ਕੁਲਵੰਤ ਕੌਰ ਦਾ ਕਹਿਣਾ ਹੈ ਕਿ ਉਹਨਾਂ ਦੇ ਖਿਲਾਫ ਵੀ ਝੂਠੇ ਕੇਸਾਂ ਦੀਆਂ ਸਾਜ਼ਿਸ਼ਾਂ ਰਚੀਆਂ ਜਾ ਰਹੀਆਂ ਹਨ। ਇਸ ਸਾਰੇ ਮਾਮਲੇ ਨੂੰ ਲੈ ਕੇ ਇਲਾਕੇ ਵਿੱਚ ਭਾਰੀ ਰੋਸ ਹੈ ਅਤੇ ਗੁਰਨਾਮ ਸਿੱਧੂ ਦੇ ਹਮਾਇਤੀਆਂ ਨੇ ਇਸ ਮੁੱਦੇ ਨੂੰ ਲੈ ਕੇ ਥਾਣਾ ਪੀਏਯੂ ਦੇ ਸਾਹਮਣੇ ਰੋਸ ਮੁਜ਼ਾਹਰਾ ਵੀ ਕੀਤਾ ਅਤੇ ਧਰਨਾ ਵੀ ਮਾਰਿਆ।  ਇਸ ਮੌਕੇ ਸੀਪੀਆਈ ਲੀਡਰ ਡਾਕਟਰ ਅਰੁਣ ਮਿੱਤਰਾ, ਡੀ ਪੀ ਮੌੜ, ਚਮਕੌਰ ਸਿੰਘ, ਰਮੇਸ਼ ਰਤਨ, ਐਮ ਐਸ ਭਾਟੀਆ ਅਤੇ ਖੁਦ ਕਾਮਰੇਡ ਗੁਰਨਾਮ ਸਿੱਧੂ ਸਮੇਤ ਕਈ ਹੋਰ ਸਰਗਰਮ ਵਰਕਰ ਵੀ ਮੌਜੂਦ ਰਹੇ। 
ਪੁਲਿਸ ਚਾਹੁੰਦੀ ਸੀ ਕਿ ਇਹ ਧਰਨਾ ਥਾਣੇ ਦੇ ਵਿਹੜੇ ਤੋਂ ਬਾਹਰ ਸੜਕ 'ਤੇ ਲਿਜਾਇਆ ਜਾਏ ਤਾਂਕਿ ਹੋਰਨਾਂ ਕੰਮਾਂਕਾਜਾਂ ਲਈ ਥਾਣੇ ਵਿੱਚ ਆਉਣ ਵਾਲਿਆਂ ਨੂੰ ਕੋਈ ਦਿੱਕਤ ਪੇਸ਼ ਨਾ ਆਵੇ। ਇਸ  ਨੂੰ ਲੈ ਕੇ ਹੀ ਗੱਲ ਭੜਕੀ ਅਤੇ ਮਾਮਲਾ ਤੂਲ ਫੜ ਗਿਆ। ਪੁਲਿਸ ਨੇ ਮਾਈਕ ਅਤੇ ਸਪੀਕਰ ਦੋਵੇਂ ਜਬਰੀ ਆਪਣੇ ਕਬਜ਼ੇ ਵਿੱਚ ਲੈ ਲਏ। ਮੁਜ਼ਾਹਰੇ ਵਿੱਚ ਆਏ ਸਾਰੇ ਲੋਕਾਂ ਦੀ ਵੀਡੀਓ ਵੀ ਬਣਾਈ। ਇਸ ਤੋਂ ਬਾਅਦ ਪੁਲਿਸ ਨੇ ਮੀਡੀਆ ਦੀ ਹਾਜ਼ਿਰੀ ਵਿੱਚ ਇੱਕ ਇੱਕ ਕੋਲੋਂ ਵਾਰੋਵਾਰੀ ਪੁੱਛਣਾ ਸ਼ੁਰੂ ਕੀਤਾ ਕਿ ਤੁਸੀਂ ਇਸ ਧਰਨੇ ਵਿੱਚ ਕਿਓਂ ਆਏ ਹੋ। ਬਹੁਤਿਆਂ ਨੇ ਕਿਹਾ ਕਿ ਸਾਨੂੰ ਨਹੀਂ ਪਤਾ। ਜਿਸ ਜਿਸ ਨੇ ਵੀ ਕਿਹਾ ਕਿ ਸਾਨੂੰ ਇਸ ਧਰਨੇ ਦੇ ਮਕਸਦ ਬਾਰੇ ਕੁਝ ਨਹੀਂ ਪਤਾ ਉਸ ਨੂੰ ਥਾਣੇ ਤੋਂ ਬਾਹਰ ਨਿਕਲ ਕੇ ਘਰ ਜਾਣ ਦੀ ਇਜ਼ਾਜ਼ਤ ਦੇ ਦਿੱਤੀ ਗਈ ਅਤੇ ਬਾਕੀਆਂ ਨੂੰ ਥਾਣੇ ਵਿੱਚ ਰੋਕ ਲਿਆ ਗਿਆ ਜਿਹਨਾਂ ਨੂੰ ਦੇਰ ਸ਼ਾਮ ਨੂੰ ਛੱਡ ਦਿੱਤਾ ਗਿਆ। ਇਸੇ ਦੌਰਾਨ ਚੰਡੀਗੜ ਤੋਂ ਸੀਪੀਆਈ ਦੇ ਸਕੱਤਰ ਕਾਮਰੇਡ ਬੰਤ ਬਰਾੜ ਅਤੇ ਪੀਡੀਏ ਦੇ ਸਰਗਰਮ ਆਗੂ ਸਿਮਰਜੀਤ ਸਿੰਘ ਬੈਂਸ ਦੇ ਆਉਣ ਦੀ ਚਰਚਾ ਵੀ ਸੁਣੀ ਗਈ ਪਰ ਉਹ ਨਹੀਂ ਪੁੱਜੇ। 
ਇਸ ਤੋਂ ਬਾਅਦ ਜਿਊਂ ਹੀ ਅਨੂ ਨਾਮ ਦੀ ਔਰਤ ਰਿਸ਼ੀ ਨਗਰ ਆਪਣੇ ਘਰ ਪੁੱਜੀ ਤਾਂ ਕੁਝ ਲੋਕਾਂ ਵੱਲੋਂ ਉਸਤੇ ਫਿਰ ਹਮਲਾ ਕਰ ਦਿੱਤਾ ਗਿਆ। ਇਸਤੇ ਲੋਕਾਂ ਨੇ ਪੁਲਿਸ ਨੂੰ ਫੋਨ ਕੀਤਾ ਤਾਂ ਪੀਸੀਆਰ ਵਾਲਿਆਂ ਨੇ ਉੱਥੇ ਪਹੁੰਚ ਕੇ ਦਖਲ ਦਿੱਤਾ। ਅਨੂ ਦਾ ਘਰ ਹੁਣ ਕਦੋਂ ਅਤੇ ਕਿੱਥੇ ਵੱਸਦਾ ਹੈ ਇਸਦਾ ਪਤਾ ਨੇੜ ਭਵਿੱਖ ਵਿੱਚ ਹੀ ਲੱਗ ਸਕੇਗਾ ਪਰ ਇਸ ਸਾਰੇ ਘਟਨਾਕਰਮ ਨੇ ਸਮਾਜ ਦੀ ਮੌਜੂਦਾ ਸਥਿਤੀ ਅਤੇ ਔਰਤਾਂ ਦੀ ਹਾਲਤ ਬਾਰੇ ਬਹੁਤ ਕੁਝ ਉਜਾਗਰ ਕੀਤਾ ਹੈ। ਵਿਆਹ ਤੋਂ ਬਾਅਦ ਪਤਨੀ ਨੂੰ ਕਿਸੇ ਹੋਰ ਕੋਲ ਵੇਚਿਆ ਜਾ ਸਕਦਾ ਹੈ। ਉਸਦੀ ਮਾਸੂਮ ਬੱਚੀ ਨੂੰ ਖੋਹ ਕੇ ਲਾਪਤਾ ਕੀਤਾ ਜਾ ਸਕਦਾ ਹੈ। ਜੇ ਉਹ ਔਰਤ ਕੋਈ ਚਾਰਾਜੋਈ ਕਰੇ ਤਾਂ ਉਸਨੂੰ ਸਾਰੇ ਮੋਹੱਲੇ ਦੇ ਸਾਹਮਣੇ ਸਰੇ ਬਾਜ਼ਾਰ ਦਿਨ ਦਿਹਾੜੇ ਕੁੱਟਿਆ ਜਾ ਸਕਦਾ ਹੈ। ਕਿੱਥੇ ਸੁੱਤੀਆਂ  ਹਨ ਔਰਤਾਂ ਦੀਆਂ ਜੱਥੇਬੰਦੀਆਂ? ਕਿੱਥੇ ਹਨ ਮਨੁੱਖੀ ਅਧਿਕਾਰ ਸੰਗਠਨ? ਕਿੱਥੇ ਹਨ ਬੱਚਿਆਂ ਲਈ ਬਣੀਆਂ ਸੰਸਥਾਵਾਂ? ਕਿੱਥੇ ਹਨ ਗੱਲ ਗੱਲ 'ਤੇ ਟਾਹਰਾਂ ਮਾਰਨ ਵਾਲੇ ਸਿਆਸੀ ਲੀਡਰ?

Saturday, June 15, 2019

ਕਿਸ ਪਤਾਲ ਜਾਂ ਅਸਮਾਨ ਵਿੱਚ ਜਾ ਲੁੱਕੇ ਮਾਤਾ ਚੰਦ ਕੌਰ ਦੇ ਕਾਤਲ?

ਅਜੇ ਵੀ ਕਾਇਮ ਹਨ ਇਸ ਕਤਲ ਨਾਲ ਸੰਬੰਧਿਤ ਕੁੱਝ ਅਹਿਮ ਸਵਾਲ
ਜਲੰਧਰ//ਲੁਧਿਆਣਾ:  15 ਜੂਨ 2019: (ਪੰਜਾਬ ਸਕਰੀਨ ਬਿਊਰੋ):: 
ਕੇਸਰੀ ਟੀ ਵੀ ਵੱਲੋਂ ਦਿਖਾਈ ਗਈ ਵੀਡੀਓ ਦੀ ਮੁੱਖ ਤਸਵੀਰ 
ਸੁਰੱਖਿਆ ਗਾਰਡ ਕੇਸਰ ਸਿੰਘ ਲਾਡੀ
ਜੋ ਉਸ ਦਿਨ ਛੁੱਟੀ 'ਤੇ ਸੀ
 
ਨਾਮਧਾਰੀ  ਸਵਰਗੀ ਮੁਖੀ ਸਤਿਗੁਰੂ ਜਗਜੀਤ ਸਿੰਘ ਅਹਿੰਸਾ ਦੇ ਪੁਜਾਰੀ ਸਨ। ਉਹਨਾਂ ਦਾ ਹੁਕਮ ਸੀ ਕਿ ਜਦੋਂ ਉਹ ਦਰਖਤਾਂ ਹੇਠਾਂ ਆਰਾਮ ਕਰ ਰਹੇ ਹੋਣ ਜਾਂ ਕਿਸੇ ਨਾਲ ਗਲਬਾਤ ਕਰ ਰਹੇ ਹੋਣ ਤਾਂ ਉਦੋਂ ਵੀ ਰੌਲਾ ਪਾਉਣ ਵਾਲੇ ਪੰਛੀਆਂ ਨੂੰ ਉਡਾਉਣ ਲਈ ਨਾਂ ਤਾਂ ਕੋਈ ਵੱਟਾ ਨਾ ਮਾਰਿਆ ਜਾਏ ਅਤੇ ਨਾ ਹੀ ਕੋਈ ਹਵਾਈ ਫਾਇਰ ਕੀਤਾ ਜਾਏ। ਉਹਨਾਂ ਦੇ  ਹੁਕਮਾਂ ਮੁਤਾਬਿਕ ਹੀ ਇਸ ਮਕਸਦ ਲਈ ਉਦੋਂ ਉੱਥੇ ਮੌਜੂਦ ਸੇਵਕ ਛੋਟੇ ਛੋਟੇ ਸ਼ੀਸ਼ੇ ਆਪਣੇ ਕੋਲ ਰੱਖਦੇ ਸਨ ਜਿਹਨਾਂ ਦੀ ਲਿਸ਼ਕੌਰ ਨਾਲ ਪੰਛੀਆਂ ਨੂੰ ਉੱਥੋਂ ਉਡਾਇਆ ਜਾਂਦਾ ਸੀ। ਸਤਿਗੁਰਾਂ ਨੇ ਆਪਣੇ ਹੁਕਮਾਂ ਵਿੱਚ ਇਹ ਵੀ ਕਿਹਾ ਹੋਇਆ ਸੀ ਕਿ ਜੇ ਕਿਧਰੇ ਸੱਪ ਵੀ ਅਚਾਨਕ ਸਾਹਮਣੇ ਆ ਨਿਕਲੇ ਤਾਂ ਉਸਨੂੰ ਵੀ ਕੋਈ ਨੁਕਸਾਨ ਨਾ ਪਹੁੰਚਾਇਆ ਜਾਏ। ਸ੍ਰੀ ਭੈਣੀ ਸਾਹਿਬ ਦੀ ਨੇੜਤਾ ਵਾਲੇ ਵਾਤਾਵਰਨ ਵਿੱਚ ਹੀ ਵਾਲੇ ਬਹੁਤ ਸਾਰੇ ਸੇਵਕ ਅਜਿਹੀਆਂ ਬਹੁਤ ਸਾਰੀਆਂ ਗੱਲਾਂ ਜਾਣੂ ਹਨ। ਇਹੀ ਕਾਰਨ ਹੈ ਕਿ ਉਸ ਅਸਥਾਨ ਵਿੱਚ ਪੈਰ ਰੱਖਦਿਆਂ ਹੀ ਮਨ ਵਿਕਾਰਾਂ ਤੋਂ ਦੂਰ ਹੋ ਕੇ ਸ਼ਾਂਤ ਹੋਣ ਲੱਗਦਾ ਹੈ ਅਤੇ ਉਸਦੀ ਲਿਵ ਪਰਮਾਤਮਾ ਨਾਲ ਜੁੜਨ ਲੱਗ ਪੈਂਦੀ ਹੈ। ਹੈਰਾਨੀ ਦੀ ਗੱਲ ਹੈ ਕਿ ਇਸੇ ਥਾਂ 'ਤੇ ਹਿੰਸਾ ਦਾ ਜਿਹੜਾ ਭਾਣਾ ਵਰਤਿਆ ਉਹ ਸਭ ਕਿਵੇਂ ਹੋਇਆ? ਇਹੋ ਜਿਹੀ ਤਪੋਭੂਮੀ ਵਾਲੇ ਅਸਥਾਨ 'ਤੇ ਉਸ ਮਹਾਨ ਸ਼ਖ਼ਸੀਅਤ ਸਤਿਗੁਰੂ ਜਗਜੀਤ ਸਿੰਘ ਜੀ ਦੀ ਬੇਹੱਦ ਬਜ਼ੁਰਗ ਧਰਮਪਤਨੀ ਨੂੰ ਗੋਲੀਆਂ ਨਾਲ ਵਿੰਨ ਦਿੱਤਾ ਗਿਆ। ਉਹ ਵੀ ਜਦੋਂ ਉਹ ਇੱਕਲੇ ਸਨ। ਇਸ ਧਰਤੀ 'ਤੇ ਕਦੇ ਕੋਈ ਅਜਿਹਾ ਭਾਣਾ ਵੀ ਵਾਪਰੇਗਾ ਇਹ ਕਿਸੇ ਨੇ ਸੋਚਿਆ ਤੱਕ ਵੀ ਨਹੀਂ ਸੀ। 
ਦਿ ਟ੍ਰਿਬਿਊਨ ਅਖਬਾਰ ਵੱਲੋਂ ਦਿਖਾਇਆ ਗਿਆ ਸਕੈਚ 
ਨਾਮਧਾਰੀ  ਮੁਖੀ ਸਤਿਗੁਰੂ ਜਗਜੀਤ ਸਿੰਘ ਜੀ ਦੀ ਧਰਮਪਤਨੀ ਮਾਤਾ ਚੰਦ ਕੌਰ ਜੀ, ਜਿਨ੍ਹਾ ਦੀ ਅਪ੍ਰੈਲ 2016 ਵਿੱਚ ਸ੍ਰੀ ਭੈਣੀ ਸਾਹਿਬ ਦੇ ਧਾਰਮਿਕ ਸਥਾਨ ਤੇ ਦਿਨ ਦਿਹਾੜੇ ਹੱਤਿਆ ਕਰ ਦਿੱਤੀ ਗਈ ਸੀ, ਓਹਨਾਂ ਸੰਬੰਧੀ ਹਾਲੇ ਤੱਕ ਕੋਈ ਵੀ ਸੁਰਾਗ ਸਾਹਮਣੇ ਆਇਆ ਨਜ਼ਰ ਨਹੀਂ ਆਇਆ ਜਦਕਿ ਮਾਮਲਾ ਪੰਜਾਬ ਪੁਲਿਸ ਤੋਂ ਸੀ.ਬੀ.ਆਈ ਕੋਲ ਵੀ ਪਹੁੰਚ ਚੁੱਕਾ ਹੈ। ਕਾਤਿਲਾਂ  ਦੇ ਸਕੈਚ ਵੀ ਦੋ ਵਾਰ ਜਾਰੀ ਹੋ ਚੁੱਕੇ ਹਨ। ਇਸ ਦੇ ਨਾਲ ਹੀ ਵਰਤਮਾਨ ਸਮੇਂ ਨਾਮਧਾਰੀ ਪੰਥ ਦੇ ਵੰਡੇ ਹੋਏ ਦੋਨੋਂ ਧੜਿਆਂ ਦਾ ਆਪਸੀ ਆਰੋਪ ਪ੍ਰਤਿਆਰੋਪ ਦਾ ਸਿਲਸਿਲਾ ਵੀ ਜਾਰੀ ਹੈ। ਪਿਛਲੇ ਦਿਨੀਂ ਠਾਕੁਰ ਉਦੈ ਸਿੰਘ ਦੇ ਇੱਕ ਸਮਰਥਕ ਵਲੋਂ ਠਾਕੁਰ ਦਲੀਪ ਸਿੰਘ ਜੀ ਅਤੇ ਓਹਨਾਂ ਦੇ ਸਮਰਥਕਾਂ ਤੇ ਬੇਬੁਨਿਆਦ ਆਰੋਪ ਲਾਏ ਜਾਣ ਤੇ ਸੰਗਤ ਦੇ ਮਨ ਵਿੱਚ ਉਠ ਰਿਹਾ ਰੋਸ ਅਤੇ ਮਾਤਾ ਜੀ ਦੇ ਕੇਸ ਨਾਲ ਸੰਬੰਧਿਤ ਅਣ-ਸੁਲਝੇ ਸਵਾਲ ਫਿਰ ਤੋਂ ਸਾਹਮਣੇ ਆਏ। ਠਾਕੁਰ ਦਲੀਪ ਸਿੰਘ ਜੀ ਦੇ ਸਕੱਤਰ ਨਵਤੇਜ ਸਿੰਘ ਅਤੇ ਪੰਥਕ ਏਕਤਾ ਕਮੇਟੀ ਦੇ ਮੈਂਬਰ ਅਰਵਿੰਦਰ ਸਿੰਘ ਲਾਡੀ, ਸੂਬਾ ਦਰਸ਼ਨ ਸਿੰਘ, ਪਲਵਿੰਦਰ ਸਿੰਘ ਅਤੇ ਰਾਜਪਾਲ ਕੌਰ ਨੇ ਇੱਕ ਪ੍ਰੈਸ ਕਾਨਫਰੰਸ ਵਿੱਚ ਗੱਲ ਬਾਤ ਕਰਦਿਆਂ ਦੱਸਿਆ ਕਿ ਇਸ ਸਬੰਧੀ ਕਈ ਨੁਕਤੇ ਧਿਆਨ ਮੰਗਦੇ ਹਨ। ਜਿਸ ਥਾਂ ਇਹ ਵਾਰਦਾਤ ਹੋਈ ਉਹ ਥਾਂ ਭੈਣੀ ਸਾਹਿਬ ਦੀ ਕਿਲੇ ਵਰਗੀ ਚਾਰਦੀਵਾਰੀ ਵਾਲੇ ਸਥਾਨ 'ਤੇ ਹੈ ਜਿੱਥੇ ਤਕਰੀਬਨ 60-70 ਬੰਦਿਆਂ ਦੀ ਸਕਿਉਰਟੀ ਹਰ ਵੇਲੇ ਤੈਨਾਤ ਰਹਿੰਦੀ ਹੈ। ਇਸ ਥਾਂ 'ਤੇ ਠਾਕੁਰ ਉਦੈ ਸਿੰਘ ਜੀ ਦੇ ਹੁਕਮ ਤੋਂ ਬਿਨਾ ਚਿੜੀ ਵੀ ਪਰ ਨਹੀਂ ਮਾਰ ਸਕਦੀ, ਇਥੋਂ ਤੱਕ ਕਿ ਓਹਨਾਂ ਦੇ ਸਕੀ ਮਾਤਾ ਬੇਬੇ ਦਲੀਪ ਕੌਰ ਜੀ ਨੂੰ ਵੀ ਨਹੀਂ ਵੜਨ ਦਿੱਤਾ ਗਿਆ ਸੀ। ਫਿਰ ਅਜਿਹੀ ਥਾਂ 'ਤੇ ਉੱਥੇ ਦੋ ਮੋਟਰ ਸਾਈਕਲ ਸਵਾਰ ਹਥਿਆਰਬੰਦ ਹੋ ਕੇ ਕਿੱਦਾਂ ਅੰਦਰ ਆ ਗਏ ਅਤੇ ਫਿਰ ਮਹਾਨ ਹਸਤੀ ਮਾਤਾ ਚੰਦ ਕੌਰ ਜੀ ਨੂੰ ਗੋਲੀਆਂ ਮਾਰ ਕੇ ਵਾਪਸ ਕਿੱਦਾਂ ਚਲੇ ਗਏ? ਕੀ ਪ੍ਰਬੰਧਕਾਂ ਦੀ ਮਰਜ਼ੀ ਤੋਂ ਬਗੈਰ ਇੱਦਾਂ ਹੋਇਆ ਅਤੇ ਕੀ ਚੱਪੇ- ਚੱਪੇ ਤੇ ਲੱਗੇ ਸੀ.ਸੀ. ਟੀ. ਵੀ ਕੈਮਰਿਆਂ ਵਿੱਚ ਵੀ ਉਹ ਨਹੀਂ ਆਏ? 
ਹੋਰ ਸੋਚਣ ਵਾਲੀ ਗੱਲ ਇਹ ਵੀ ਹੈ ਕਿ ਓਸੇ ਦਿਨ ਓਹਨਾਂ ਦਾ ਨਿਜੀ ਡਰਾਈਵਰ ਅਤੇ ਬਾਡੀਗਾਰਡ ਕੇਸਰ ਸਿੰਘ ਲਾਡੀ ਕਿੱਥੇ ਚਲਾ ਗਿਆ ਸੀ ਜਿਹੜਾ ਕੀ ਪਿਛਲੇ ਗਿਆਰਾਂ ਸਾਲਾਂ ਤੋਂ ਇਸ ਜਿੰਮੇਵਾਰੀ ਨੂੰ ਨਿਭਾ ਰਿਹਾ ਸੀ। ਇਸ ਵਾਰਦਾਤ ਵੇਲੇ ਨਾਲ ਬੈਠੇ ਡਰਾਈਵਰ ਕਰਤਾਰ ਸਿੰਘ ਅਤੇ ਬੀਬੀ ਸੀਤੋ ਨੂੰ ਕੋਈ ਖਰੋਂਚ ਤੱਕ ਵੀ ਕਿਓਂ ਨਹੀਂ ਆਈ? ਨਾ ਹੀ ਪ੍ਰਸ਼ਾਸਨ ਨੇ ਇਹਨਾਂ ਤੋਂ ਸਖ਼ਤੀ ਨਾਲ ਪੁੱਛ ਪੜਤਾਲ ਕਰਨ ਦੀ ਕੋਸ਼ਿਸ਼ ਕੀਤੀ। ਪਿਛਲੇ ਸਾਢੇ ਤਿੰਨ ਸਾਲਾਂ ਵਿੱਚ ਇਹਨਾਂ ਵਿੱਚੋਂ ਕੋਈ ਵੀ ਬੰਦਾ ਆਖਿਰ ਕਿਓਂ ਨਹੀਂ ਫੜਿਆ ਜਾ ਸਕਿਆ। 
ਇਸ ਤੋਂ ਇਲਾਵਾ ਠਾਕੁਰ ਉਦੈ ਸਿੰਘ ਤੇ ਯੂ.ਕੇ. ਵਿਖੇ ਹੋਏ ਹਮਲੇ ਦਾ ਦੋਸ਼ ਠਾਕੁਰ ਦਲੀਪ ਸਿੰਘ ਜੀ ਤੇ ਲਾਏ ਜਾਣ ਵਾਲੀ ਗੱਲ ਨੂੰ ਸਪੱਸ਼ਟ ਕਰਦਿਆਂ ਦੱਸਿਆ ਕਿ ਨਾ ਤਾਂ ਪੁਲਿਸ ਵਲੋਂ, ਨਾ ਕੋਰਟ ਵਲੋਂ ਅਤੇ ਨਾ ਹੀ ਠਾਕੁਰ ਉਦੈ ਸਿੰਘ ਵਲੋਂ ਇੱਕ ਵਾਰ ਵੀ ਇਸ ਕੇਸ ਵਿੱਚ ਠਾਕੁਰ ਦਲੀਪ ਸਿੰਘ ਜੀ ਦਾ ਨਾਮ ਨਹੀਂ ਲਿਆ ਗਿਆ। ਇਸ ਤੋਂ ਇਲਾਵਾ ਹਰਜੀਤ ਸਿੰਘ ਤੂਰ ਵੱਲੋਂ ਹਮਲਾ ਕਰਨ ਦਾ ਸ਼ਰਮਸਾਰ ਹੋਣ ਵਾਲਾ ਕਾਰਨ ਦੱਸਣ ਤੇ ਅਤੇ ਅਖਬਾਰਾਂ ਦੀਆਂ ਸੁਰਖੀਆਂ ਵਿੱਚ ਆਉਣ ਤੇ ਠਾਕੁਰ ਦਲੀਪ ਸਿੰਘ ਜੀ ਵਲੋਂ ਇਸ ਗੱਲ ਦੀ ਨਿਖੇਧੀ ਕੀਤੀ ਗਈ ਸੀ ਅਤੇ ਆਪਣੇ ਭਰਾ ਉਦੈ ਸਿੰਘ ਨੂੰ ਬੇਕਸੂਰ ਦੱਸਦੇ ਹੋਏ ਦੁੱਖ ਦੀ ਘੜੀ ਵਿੱਚ ਓਹਨਾਂ ਦੇ ਨਾਲ ਖੜ੍ਹਨ ਦਾ ਵਾਇਦਾ ਵੀ ਕੀਤਾ ਸੀ । ਇਸ ਤਰ੍ਹਾਂ ਦੂਜੇ ਧਿਰ ਵਲੋਂ ਲਾਏ ਜਾਣ ਵਾਲੇ ਹੋਰ ਵੀ ਝੂਠੇ ਆਰੋਪਾਂ ਨੂੰ ਬੇਬੁਨਿਆਦ ਦੱਸਿਆ ਅਤੇ ਕਿਹਾ ਕਿ ਠਾਕੁਰ ਉਦੈ ਸਿੰਘ ਵੱਲੋਂ ਧੱਕੇ ਨਾਲ ਆਪਣੇ ਆਪ ਨੂੰ ਗੁਰੂ ਮਨਵਾਉਣ ਅਤੇ ਗੁਰੂ ਘਰ ਦੀ ਪ੍ਰਾਪਰਟੀ ਤੇ ਕਬਜੇ ਕਰਨ ਲਈ ਬੇਕਸੂਰ ਸੰਗਤ ਤੇ ਕਈ ਵਾਰ ਜਾਨਲੇਵਾ ਹਮਲੇ ਵੀ ਕਰਵਾਏ ਹਨ ਅਤੇ ਅਜੇ ਤੱਕ ਸਾਨੂੰ ਕੋਈ ਇਨਸਾਫ ਵੀ ਨਹੀਂ ਮਿਲਿਆ। ਪਰ ਹੁਣ ਸਾਡੇ ਗੁਰੂ ਮਾਤਾ ਚੰਦ ਕੌਰ ਜੀ ਦਾ ਇਨਸਾਫ ਸਾਨੂੰ ਜਰੂਰ ਮਿਲਣਾ ਚਾਹੀਦਾ ਹੈ।
        ਪੰਥਕ ਏਕਤਾ ਕਮੇਟੀ ਦੇ ਮੈਂਬਰਾਂ ਨੇ ਆਪਣੇ ਵਿਚਾਰਾਂ ਨੂੰ ਪ੍ਰਸ਼ਾਸ਼ਨ ਅੱਗੇ ਰੱਖਦੇ ਹੋਏ ਦੱਸਿਆ ਕਿ ਕੁੱਝ ਹੋਰ ਤੱਥਾਂ ਨੂੰ ਸਾਹਮਣੇ ਰੱਖ ਕੇ, ਇਹ ਮਾਮਲਾ ਸਪਸ਼ਟ ਰੂਪ ਵਿੱਚ ਗੱਦੀ ਅਤੇ ਪ੍ਰਾਪਰਟੀ ਉਪਰ ਕਬਜ਼ੇ ਦਾ ਹੈ। ਕਿਉਂਕਿ ਮਾਤਾ ਜੀ ਤੋਂ ਬਾਅਦ ਓਹਨਾਂ ਦੀ ਸਾਰੀ ਪ੍ਰੋਪਰਟੀ ਓਹਨਾਂ ਦੀ ਸਪੁੱਤਰੀ ਬੀਬਾ ਸਾਹਿਬ ਕੌਰ ਰਾਹੀਂ ਸੰਤ ਜਗਤਾਰ ਸਿੰਘ ਕੋਲ ਚਲੀ ਗਈ ਹੈ ਅਤੇ ਠਾਕੁਰ ਉਦੈ ਸਿੰਘ ਜੀ ਨੇ ਵੀ ਆਪਣੀ ਗੱਦੀ ਹੋਰ ਪੱਕੀ ਕਰਨ ਵੱਲ ਕਦਮ ਪੁੱਟਿਆ ਹੈ ਕਉਂਕਿ ਮਾਤਾ ਜੀ ਆਪਣੇ ਦੋਹਤੇ ਕਾਕਾ ਜੈ ਸਿੰਘ ਨੂੰ ਗੱਦੀ ਤੇ ਬਿਠਾਉਣਾ ਚਾਹੁੰਦੇ ਸਨ। ਇਸ ਲਈ ਸਾਨੂੰ ਪ੍ਰਸ਼ਾਸਨ ਤੋਂ ਪੂਰੀ ਆਸ ਹੈ ਕਿ ਸਾਡੇ ਸਵਾਲਾਂ ਅਤੇ ਕਾਰਨਾਂ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਮਾਤਾ ਚੰਦ ਕੌਰ ਜੀ ਨਾਲ ਜੁੜੇ ਅਣ ਸੁਲਝੇ ਤੱਥਾਂ ਨੂੰ ਜਰੂਰ ਸਾਹਮਣੇ ਲਿਆਂਦਾ ਜਾਵੇਗਾ। ਹੁਣ ਦੇਖਣਾ ਹੈ ਕਿ ਇਹ ਜਾਂਚ ਕਿੰਨੀ ਕੁ ਤੇਜ਼ੀ ਫੜਦਿਆਂ ਕਿੰਨੀ ਕੁ ਜਲਦੀ ਸਿਰੇ ਲੱਗਦੀ ਹੈ। 

ਲੋਕਲ ਬਾਡੀ ਵਿਭਾਗ ਵਿੱਚ ਕੋਈ ਕਨੂੰਨ ਜਾਂ ਨਿਯਮ ਨਹੀਂ-ਬੇਲਣ ਬ੍ਰਿਗੇਡ

Jun 15, 2019, 2:50 PM
ਕਿਵੇਂ ਬਿਲਡਿੰਗ ਬ੍ਰਾਂਚ ਵਿੱਚ ਲਏ ਦਿੱਤੇ ਬਿਨਾਂ ਹੀ ਨਕਸ਼ੇ ਪਾਸ ਹੋ ਜਾਣਗੇ
ਲੁਧਿਆਣਾ: 15 ਜੂਨ 2019: (ਪੰਜਾਬ ਸਕਰੀਨ ਬਿਊਰੋ)::
ਜਦੋਂ ਪੰਜਾਬ ਵਿੱਚ ਕਾਂਗਰਸ ਸਰਕਾਰ ਬਣੀ ਤਾਂ ਉਦੋਂ ਲੋਕਾਂ ਨੂੰ ਉਮੀਦ ਸੀ ਕਿ ਬਹੁਤ ਕੁਝ ਬਦਲੇਗਾ। ਸਮਾਰਟ ਫੋਨ ਮਿਲਣਗੇ। ਵਧੀਆ ਨੌਕਰੀਆਂ ਅਤੇ ਹੋਰ ਵੀ ਬਹੁਤ ਕੁਝ। ਗੀਤ ਸੰਗੀਤ ਦੇ ਜਾਦੂ ਨੇ ਇਸ ਪ੍ਰਚਾਰ ਨੂੰ ਲੋਕਾਂ ਦੇ ਦਿਲਾਂ ਤੱਕ ਉਤਾਰ ਦਿੱਤਾ ਸੀ। ਇਸ ਪ੍ਰਚਾਰ ਤੋਂ ਮੋਹਿਤ ਹੋਈ ਬੇਲਣ ਬ੍ਰਿਗੇਡ ਮੁਖੀ ਅਨੀਤਾ ਸ਼ਰਮਾ ਨੂੰ ਵੀ ਲੱਗਿਆ ਸੀ ਕਿ ਕਾਂਗਰਸ ਸਰਕਾਰ ਆਉਣ ਤੇ ਨਸ਼ੇ ਸੱਚਮੁੱਚ ਖਤਮ ਹੋ ਜਾਣਗੇ। ਕਿੱਤੇ ਵੱਜੋਂ ਮੰਨੀ ਪ੍ਰਮੰਨੀ ਆਰਕੀਟੈਕਟ ਅਨੀਤਾ ਸ਼ਰਮਾ ਨੇ ਆਪਣੇ ਸਾਰੇ ਸੁਪਨੇ ਇਸ ਉਮੀਦ ਤੋਂ ਕੁਰਬਾਨ ਕਰ ਦਿੱਤੇ। ਨਾ ਬੇਲਣ ਬ੍ਰਿਗੇਡ ਨੂੰ ਸੰਭਾਲਿਆ ਨਾ ਹੀ ਆਪਣੇ ਕੰਮਕਾਜ ਨੂੰ ਅਤੇ ਨਾ ਹੀ ਘਰ ਨੂੰ। ਉਸ ਨੂੰ ਵੀ ਲੱਗਿਆ ਸੀ ਕਿ ਚਾਹੁੰਦਾ ਹੈ ਪੰਜਾਬ-ਕੈਪਟਨ ਦੀ ਸਰਕਾਰ। ਹੁਣ ਅਨੀਤਾ ਸ਼ਰਮਾ ਅਤੇ ਟੀਮ ਦੇ ਸਾਰੇ ਮੈਂਬਰ ਨਿਰਾਸ਼ ਹਨ। ਇੱਕ ਵੀ ਵਾਅਦਾ ਪੂਰਾ ਨਹੀਂ ਹੋਇਆ। ਹੋਰ ਤਾਂ ਹੋਰ ਨਕਸ਼ਿਆਂ ਵਾਲਾ ਕਿੱਤਾ ਵੀ ਖੜੋਤ ਵਿੱਚ ਆ ਗਿਆ। ਅਨੀਤਾ ਸ੍ਰਮ ਅਤੇ ਬੇਲਣ ਬ੍ਰਿਗੇਡ ਟੀਮ ਦੇ ਮੈਂਬਰਾਂ ਨੇ ਬਹੁਤ ਹੀ ਦੁਖੀ ਹਿਰਦੇ ਨਾਲ ਕਿਹਾ ਹੈ ਕਿ ਆਮ ਲੋਕਾਂ ਦੀ ਬਸ ਹੋ ਗਈ ਹੈ ਹੁਣ।  
ਨਗਰਨਿਗਮ ਦੇ ਕੰਮ ਕਾਜ ਅਤੇ ਵਰਕਿੰਗ ਸਟਾਈਲ ਬਾਰੇ ਵੀ ਬਹੁਤ ਗਿਲੇ ਸ਼ਿੱਕਵੇ ਹਨ। ਮੈਡਮ ਅਨੀਤਾ ਸ਼ਰਮਾ ਦਾ ਕਹਿਣਾ ਹੈ ਕਿ ਪੰਜਾਬ ਸਰਕਾਰ ਵਿੱਚ ਲੱਗਦਾ ਹੈ ਕਿ ਕੋਈ ਵੀ ਬੁੱਧੀਜੀਵੀ ਅਤੇ ਸਮਝਦਾਰ ਨੇਤਾ ਨਹੀਂ ਹੈ, ਤਾਂਹੀ ਤਾਂ ਪੰਜਾਬ ਸਰਕਾਰ ਦੇ ਲੋਕਲ ਬਾਡੀ ਵਿਭਾਗ ਵਿੱਚ ਕੋਈ ਲਾ ਐਂਡ ਆਰਡਰ ਵਰਗੀ ਚੀਜ਼ ਨਹੀਂ ਹੈ। ਹਰ ਰੋਜ ਹੀ ਇੱਥੇ ਨਿਯਮ ਕਨੂੰਨ ਬਦਲਦੇ ਰਹਿੰਦੇ ਹਨ ਜਿਸਦੇ ਨਾਲ ਲੱਗਦਾ ਹੈ ਕਿ ਉਹ ਹਿਸਾਬ ਹੋ ਗਿਐ ਜਿਸਕੀ ਲਾਠੀ-ਉਸਕੀ ਭੈਂਸ।   
ਬੇਲਨ ਬ੍ਰਿਗੇਡ ਦੀ ਕੌਮੀ ਪ੍ਰਧਾਨ ਅਨੀਤਾ ਸ਼ਰਮਾ ਨੇ ਕਿਹਾ ਕਿ ਪੰਜਾਬ ਦੇ ਲੋਕਲ ਬਾਡੀ ਵਿਭਾਗ ਵਿੱਚ ਕੋਈ ਕਨੂੰਨ ਜਾਂ ਨਿਯਮ ਨਹੀਂ ਹੈ। ਲੁਧਿਆਣਾ ਸ਼ਹਿਰ ਦੇ ਨਗਰ ਨਿਗਮ ਵਿੱਚ ਪਹਿਲਾਂ ਨਕਸ਼ੇ ਹੱਥ ਨਾਲ ਤਿਆਰ ਕਰਨ ਤੋਂ ਬਾਅਦ ਫਾਈਲ ਬਣਾ ਕੇ ਜ਼ਾਤੀ ਤੌਰ ਤੇ ਹੀ ਖੁਦ ਜਾ ਕੇ ਬਿਲਡਿੰਗ ਬ੍ਰਾਂਚ ਵਿੱਚ ਪਾਸ ਕਰਾਏ ਜਾਂਦੇ ਸਨ। ਇਸ ਤਰਾਂ ਹਰ "ਸਮਝਦਾਰ" ਵਿਅਕਤੀ ਰਿਸ਼ਵਤ ਲੈ ਦੇ ਕੇ ਨਕਸ਼ੇ ਪਾਸ ਕਰਵਾ ਲੈਂਦਾ ਸੀ। ਪਿਛਲੇ ਸਾਲ ਮੰਤਰੀ ਨਵਜੋਤ ਸਿੰਘ ਸਿੱਧੂ ਨੇ ਕਾਨੂੰਨ ਪਾਸ ਕੀਤਾ ਸੀ ਕਿ ਹੁਣ ਨਕਸ਼ੇ ਆਨਲਾਈਨ  ਹੀ  ਪਾਸ ਹੋਣਗੇ।  ਸਾਲ ਤੋਂ ਉੱਤੇ ਹੋ ਗਿਆ ਜਦੋਂ ਨਕਸ਼ੇ ਆਨਲਾਈਨ ਜਮਾਂ ਹੋਣ ਲੱਗੇ ਤਾਂ ਜਨਤਾ ਨੇ ਸੁਖ ਦਾ ਸਾਹ ਲਿਆ ਕਿ ਹੁਣ ਬਿਲਡਿੰਗ ਬ੍ਰਾਂਚ ਵਿੱਚ ਕੁਝ ਲਏ ਦਿੱਤੇ ਬਿਨਾਂ ਹੀ ਨਕਸ਼ੇ ਪਾਸ ਹੋ ਜਾਣਗੇ।  ਪਰ ਹੁਣ ਫੇਰ ਨਵੇਂ ਲੋਕਲ ਬਾਡੀ ਮੰਤਰੀ ਜੀ ਨੇ ਕਿਹਾ ਕਿ ਆਨਲਾਈਨ ਸਿਸਟਮ  ਦੇ ਨਾਲ ਨਾਲ ਨਕਸ਼ੇ ਬਾਈ  ਹੈਂਡ ਫਾਈਲ ਰਾਹੀਂ ਵੀ ਜਮਾਂ ਕਰਵਾਏ ਜਾ ਸਕਦੇ ਹਨ।  
ਅਨੀਤਾ ਸ਼ਰਮਾ ਨੇ ਅੱਗੇ ਦੱਸਿਆ ਕਿ ਇਹ ਕਿਸ ਤਰਾਂ ਦਾ ਸਰਕਾਰੀ ਸਿਸਟਮ ਹੈ ਇੱਕ ਮੰਤਰੀ  ਆਉਂਦਾ ਹੈ ਸਾਰਾ ਕੰਮ ਆਨਲਾਈਨ ਕਰਨਾ ਚਾਹੁੰਦਾ ਹੈ ਤਾਂਕਿ ਰਿਸ਼ਵਤਖੋਰੀ ਉੱਤੇ ਰੋਕ ਲੱਗੇ ਅਤੇ ਦੂਸਰਾ ਮੰਤਰੀ ਕੁਰਸੀ ਸੰਭਾਲਦੇ ਹੀ ਆਰਡਰ ਕਰਦਾ ਹੈ ਕਿ ਨਕਸ਼ੇ ਫਾਈਲ ਬਣਾ ਕੇ ਮੈਨਿਉਅਲ ਵੀ ਪਾਸ ਕੀਤੇ ਜਾ ਸਕਣਗੇ।  ਨਕਸ਼ੇ ਪਾਸ ਕਰਵਾਉਣ ਦੇ ਇਸ ਖੇਲ ਨੂੰ ਵੇਖਕੇ ਅਜਿਹਾ ਲੱਗਦਾ ਹੈ ਕਿ ਹੁਣ ਤੱਕ ਸਰਕਾਰੀ ਕੰਮ ਨੇਤਾਵਾਂ ਦੁਆਰਾ ਬਿਨਾਂ ਦਿਮਾਗ ਦੇ ਹੀ ਕੀਤੇ ਜਾ ਰਹੇ ਹਨ।

ਪੰਜਾਬ ਵਿੱਚ ਜਾਗ ਪਈ ਸਰਕਾਰ !

Jun 15, 2019, 2:34 PM
ਖੁੱਲੇ ਬੋਰਾਂ ਦੀ ਜਾਣਕਾਰੀ ਦੇਣ ਲਈ ਜਾਰੀ ਕੀਤਾ ਵਟਸਐਪ ਨੰਬਰ
ਲੁਧਿਆਣਾ: 15 ਜੂਨ  2019: (ਪੰਜਾਬ ਸਕਰੀਨ ਬਿਊਰੋ):: 
ਉੱਤੋੜਿੱਤੀ ਹੋਏ ਦੋ ਹਾਦਸਿਆਂ ਵਿੱਚ ਹੋਈ ਸਰਕਾਰ ਦੀ ਰਿਕਾਰਡਤੋੜ ਬਦਨਾਮੀ ਤੋਂ ਬਾਅਦ ਆਖਿਰ ਪੰਜਾਬ ਸਰਕਾਰ ਜਾਗ ਪਈ ਹੈ ਅਤੇ ਥਾਂ ਥਾਂ ਖੁੱਲੇ ਬੋਰਾਂ ਦੇ ਮਾਮਲੇ ਨੂੰ ਗੰਭੀਰਤਾ ਨਾਲ ਲੈ ਰਹੀ ਹੈ। ਡਿਪਟੀ ਕਮਿਸ਼ਨਰ ਸ੍ਰੀ ਪ੍ਰਦੀਪ ਕੁਮਾਰ ਅਗਰਵਾਲ ਨੇ ਖੁੱਲੇ ਬੋਰਾਂ ਕਾਰਨ ਵਾਪਰਨ ਵਾਲੇ ਹਾਦਸਿਆਂ ਨੂੰ ਧਿਆਨ ਵਿੱਚ ਰੱਖਦਿਆਂ ਜ਼ਿਲ੍ਹਾ ਵਾਸੀਆਂ ਨੂੰ ਅਪੀਲ ਕੀਤੀ ਹੈ ਕਿ ਜੇਕਰ ਉਨ੍ਹਾਂ ਦੇ ਧਿਆਨ ਵਿੱਚ ਕਿਸੇ ਖੁੱਲੇ ਬੋਰ ਦਾ ਮਾਮਲਾ ਆਉਂਦਾ ਹੈ ਤਾਂ ਉਹ ਇਸ ਸਬੰਧੀ ਜ਼ਿਲ੍ਹਾ ਪ੍ਰਸਾਸ਼ਨ ਨੂੰ ਸੂਚਨਾ ਦੇ ਸਕਦੇ ਹਨ। ਉਨ੍ਹਾਂ ਇਸ ਸਬੰਧੀ ਇੱਕ ਵਟਸਐਪ ਨੰਬਰ (99154-08834) ਜਾਰੀ ਕਰਕੇ ਲੋਕਾਂ ਨੂੰ ਇਸ ਨੰਬਰ 'ਤੇ ਸੂਚਨਾ ਦੇਣ ਲਈ ਕਿਹਾ ਹੈ। ਸ੍ਰੀ ਅਗਰਵਾਲ ਨੇ ਦੱਸਿਆ ਕਿ ਉਨ੍ਹਾਂ ਨੇ ਜ਼ਿਲ੍ਹੇ ਵਿੱਚ ਪੈਂਦੇ ਸਾਰੇ ਖੁੱਲੇ ਬੋਰਾਂ ਨੂੰ ਤੁਰੰਤ ਬੰਦ ਕਰਾਉਣ ਲਈ ਵੱਖ-ਵੱਖ ਵਿਭਾਗਾਂ ਅਤੇ ਸਮੂਹ ਐਸ.ਡੀ.ਐਮਜ਼ ਸਹਿਬਾਨ ਨੂੰ ਹਿਦਾਇਤਾਂ ਜਾਰੀ ਕੀਤੀਆਂ ਹੋਈਆਂ ਹਨ। ਇਹ ਤਾਂ ਹੋਇਆ ਬੋਰਾਂ ਦਾ ਮਾਮਲਾ ਪਰ ਬਿਜਲੀ ਦੀਆਂ ਲਟਕਦੀਆਂ ਤਾਰਾਂ ਅਤੇ ਬਹੁਤ ਹੀ ਨਵੇਂ ਲੱਗੇ ਬਿਜਲੀ ਦੇ ਮੀਟਰਾਂ ਵਾਲੇ ਪਾਸੇ ਅਜੇ ਧਿਆਨ ਦਿੱਤਾ ਜਾਣਾ ਬਾਕੀ ਹੈ। ਸਰਕਾਰ ਤਾਂ ਜਾਗ ਪਈ ਹੈ ਅਤੇ ਇਸ ਮਕਸਦ ਲਈ ਕਾਫੀ ਕੁਝ ਕੀਤਾ ਜਾ ਰਿਹਾ ਹੈ ਪਰ ਦੇਖਣਾ ਹੈ ਕਿ ਹੁਣ ਲੋਕ ਕਦੋਂ ਜਾਗਦੇ ਹਨ!

Friday, June 14, 2019

ਨਾਟਕ "ਮਿਊਜ਼ੀਅਮ" ਖੇਡਣ-ਖਿਡਾਉਣ ਵਾਲਿਆਂ ਵੱਲੋਂ ਮੁਆਫੀ ਮੰਗਣ ਦੀ ਪੁਸ਼ਟੀ

ਬਜਰੰਗ ਦਲ ਨੇ ਮੀਡੀਆ ਨੂੰ ਜਾਰੀ ਕੀਤੀ ਲਿਖਤੀ ਮੁਆਫੀਨਾਮੇ ਦੀ ਫੋਟੋ
ਲੁਧਿਆਣਾ: 14 ਜੂਨ 2019: (ਪੰਜਾਬ ਸਕਰੀਨ ਬਿਊਰੋ):: 
ਬਜਰੰਗ ਦਲ ਨੇ ਲੁਧਿਆਣਾ ਦੇ ਇੱਕ ਪ੍ਰਸਿੱਧ ਕਾਲਜ ਦੇ ਪ੍ਰਬੰਧਕਾਂ ਵੱਲੋਂ ਮੰਗੀ ਮੁਆਫੀ ਦੀ ਨਕਲ ਅੱਜ ਬਾਕਾਇਦਾ ਮੀਡੀਆ ਨੂੰ ਵੀ ਜਾਰੀ ਕਰ ਦਿੱਤੀ ਹੈ। ਨਾਟਕ ਵਿਵਾਦ ਦੇ ਮੁੱਦੇ 'ਤੇ ਦਬਾਅ ਅਧੀਨ ਆਏ ਕਾਲਜ ਪ੍ਰਬੰਧਕਾਂ ਨੇ ਸੁਖਜਿੰਦਰ ਮਹੇਸ਼ਰੀ, ਵਿਕੀ ਮਹੇਸ਼ਰੀ, ਪ੍ਰੀਤ ਬਲਾਚੌਰੀਆ ਅਤੇ ਨੌਜਵਾਨ ਭਾਰਤ ਸਭ ਨੂੰ ਸ਼ਰਾਰਤੀ ਅਨਸਰ ਦੱਸਦਿਆਂ ਕਿਹਾ ਗਿਆ ਹੈ ਕਿ ਸਾਡਾ ਇਹਨਾਂ ਨਾਲ ਕੋਈ ਸੰਬੰਧ ਨਹੀਂ। ਪ੍ਰਗਤੀਸ਼ੀਲ ਹਲਕਿਆਂ ਨੇ ਇਸ ਮੁਆਫੀਨਾਮੇ ਦਾ ਗੰਭੀਰ ਨੋਟਿਸ ਲਿਆ ਹੈ। ਜਲਦੀ ਹੀ ਇਸਦਾ ਸਖਤ ਪ੍ਰਤੀਕਰਮ ਵੀ ਸਾਹਮਣੇ ਆ ਸਕਦਾ ਹੈ। 
ਚੇਤੇ ਰਹੇ ਕਿ ਮਰਾਠੀ ਲੇਖਿਕਾ ਰਸਿਕਾ ਅਗਾਸ਼ੇ ਦੇ ਬਹੁਤ ਹੀ ਹਰਮਨ ਪਿਆਰੇ ਨਾਟਕ "ਮਿਊਜ਼ੀਅਮ" ਦੇ ਲੁਧਿਆਣਾ ਵਿੱਚ ਹੋਏ ਮੰਚਨ ਨੂੰ ਲੈ ਕੇ ਰੋਹ ਵਿੱਚ ਆਏ ਹਿੰਦੂ ਸੰਗਠਨਾਂ ਨੇ ਇਸਦਾ ਤਿੱਖਾ ਵਿਰੋਧ ਕੀਤਾ ਸੀ। ਇਹ ਨਾਟਕ ਐਸ ਸੀ ਡੀ ਗੌਰਮਿੰਟ ਕਾਲਜ ਲੁਧਿਆਣਾ ਵਿੱਚ 7 ਅਪ੍ਰੈਲ 2019 ਨੂੰ ਖੇਡਿਆ ਗਿਆ ਸੀ। ਇਸ ਨਾਟਕ ਤੋਂ ਬਾਅਦ ਜਦੋਂ ਬਜਰੰਗ ਦਲ ਨੇ ਆਪਣਾ ਇਤਰਾਜ਼ ਅਤੇ ਰੋਸ ਪ੍ਰਗਟ ਕੀਤਾ ਤਾਂ 15 ਅਪ੍ਰੈਲ ਵਾਲੇ ਦਿਨ ਇਸ ਮਾਮਲੇ ਨੂੰ ਲੈ ਕੇ ਐਫ ਆਈ ਆਰ ਵੀ ਦਰਜ ਕਰ ਲਈ ਗਈ। ਹੁਣ ਪਤਾ ਲੱਗਿਆ ਹੈ ਕਿ ਇਸ ਵਿਵਾਦ ਨੂੰ ਲੈ ਕੇ ਨਾਟਕ ਖੇਡਣ ਵਾਲੀ ਟੀਮ ਅਤੇ ਹੋਰ ਪ੍ਰਬੰਧਕਾਂ ਨੇ "ਮੁਆਫੀ" ਮੰਗ ਲਈ ਹੈ। ਇਹ ਦਾਅਵਾ ਬਜਰੰਗ ਦਲ ਦੇ ਆਗੂ ਚੇਤਨ ਮਲਹੋਤਰਾ ਨੇ ਕੀਤਾ ਹੈ। ਜ਼ਿਕਰਯੋਗ ਹੈ ਕਿ ਕਾਲਜ ਦੀ ਇੱਕ ਸੀਨੀਅਰ ਮਹਿਲਾ ਪ੍ਰੋਫੈਸਰ ਨੇ ਪਹਿਲਾਂ ਹੀ ਇਸ ਮੁੱਦੇ ਨੂੰ ਲੈ ਕੇ ਪੇਸ਼ਗੀ ਜ਼ਮਾਨਤ ਵੀ ਕਰਵਾ ਲਈ ਹੋਈ ਹੈ। ਬਜਰੰਗ ਦਲ ਨੇ ਅੱਜ ਬਾਕਾਇਦਾ ਇਸ ਦੀ ਨਕਲ ਮੀਡੀਆ ਨੂੰ ਵੀ ਜਾਰੀ ਕਰ ਦਿੱਤੀ ਹੈ। ਮੀਡੀਆ ਨੂੰ ਦਿੱਤੇ ਦਸਤਾਵੇਜਾਂ ਵਿੱਚ ਪ੍ਰਿੰਸਿਪਲ ਵੱਲੋਂ ਮੰਗੀ ਗਈ ਮੁਆਫੀ, ਸਬੰਧਤ ਮਹਿਲਾ ਪ੍ਰੋਫੈਸਰ ਵੱਲੋਂ ਮੰਗੀ ਗਈ ਮੁਆਫੀ ਅਤੇ ਨਾਟਕ ਵਿੱਚ ਕਥਿਤ ਭਾਗ ਲੈਣ ਵਾਲੇ ਵਿਦਿਆਰਥੀਆਂ ਵੱਲੋਂ ਮੰਗੀ ਗਈ ਮੁਆਫੀ ਦੀਆਂ ਨਕਲਾਂ ਸ਼ਾਮਲ ਹਨ। 
ਦੂਜੇ ਪਾਸੇ ਖੱਬੇ ਪੱਖੀ ਕਲਾਕਾਰਾਂ ਅਤੇ ਬੁਧੀਜੀਵੀਆਂ ਨੇ "ਮੁਆਫੀ" ਵਾਲੀ ਗੱਲ ਨੂੰ ਬਹੁਤ ਹੀ ਮੰਦਭਾਗਾ ਅਤੇ ਚਿੰਤਾਜਨਕ ਦੱਸਿਆ ਹੈ। ਇਹਨਾਂ ਦਾ ਕਹਿਣਾ ਹੈ "ਮੁਆਫੀਆਂ ਮੰਗਵਾਉਣ" ਅਤੇ ਕਲਾਕਾਰਾਂ ਦੇ ਸੂਖਮ ਮਨਾਂ ਉੱਤੇ ਦਬਾਅ ਪਾਉਣ ਦਾ ਇਹ ਸਿਲਸਿਲਾ ਅਸਲ ਵਿੱਚ ਸੰਘ ਪਰਿਵਾਰ ਦੇ ਹੀ ਏਜੰਡੇ ਨੂੰ ਅੱਗੇ ਵਧਾਉਣ ਵਾਲੀ ਗੱਲ ਹੈ ਅਤੇ ਅਸੀਂ ਇਸ ਸਾਜ਼ਿਸ਼ ਨੂੰ ਕਾਮਯਾਬ ਨਹੀਂ  ਹੋਣ ਦਿਆਂਗੇ। ਕਾਲਜ ਵਾਲੇ ਨਾ ਤਾਂ ਇਸ ਗੱਲ ਦੀ ਪੁਸ਼ਟੀ ਕਰ ਰਹੇ ਹਨ ਅਤੇ ਨਾ ਹੀ ਖੰਡਨ। ਪਿਛਲੇ ਕੁਝ ਹਫਤਿਆਂ ਦੌਰਾਨ ਸਾਹਿਤ, ਸਟੇਜ, ਕਲਾ ਅਤੇ ਸੱਭਿਆਚਾਰ 'ਤੇ ਛਾਇਆ ਰਿਹਾ ਨਾਟਕ "ਮਿਊਜ਼ੀਅਮ" ਦਾ ਵਿਵਾਦ ਅੱਜ ਨਵਾਂ ਰੁੱਖ ਅਖਤਿਆਰ ਕਰਦਾ ਮਹਿਸੂਸ ਹੋਇਆ। ਬਜਰੰਗ ਦਲ ਦੇ ਆਗੂਆਂ ਨੇ ਦਾਅਵਾ ਕੀਤਾ ਕਿ ਨਾਟਕ ਖੇਡਣ ਵਾਲਿਆਂ ਅਤੇ ਖਿਡਾਉਣ ਵਾਲਿਆਂ ਨੇ ਅੱਜ ਸਾਡੇ ਕੋਲੋਂ "ਮੁਆਫੀ" ਮੰਗ ਲਈ ਹੈ ਜਿਸ ਨਾਲ ਸਾਡੀ "ਜਿੱਤ" ਹੋਈ ਹੈ। ਇਹ "ਮੁਆਫੀ" ਪਿਛਲੇ ਦਿਨੀਂ  ਲੁਧਿਆਣਾ ਦੇ ਸਿਵਲ ਲਾਈਨਜ਼ ਇਲਾਕੇ ਵਿੱਚ ਸਥਿਤ ਸੰਘ ਪਰਿਵਾਰ ਦੇ ਹੀ ਇੱਕ ਬਹੁਤ ਪ੍ਰਸਿੱਧ ਅਤੇ ਪੁਰਾਣੇ ਦਫਤਰ "ਸਮਿਤੀ ਕੇਂਦਰ" ਵਿੱਚ ਮੰਗੀ ਗਈ। 
ਇਸ ਦਫਤਰ ਤੋਂ ਮੁਖ ਤੌਰ ਤੇ "ਵਿਸ਼ਵ ਹਿੰਦੂ ਪਰੀਸ਼ਦ" ਦੀਆਂ ਸਰਗਰਮੀਆਂ ਸੰਚਾਲਿਤ ਹੁੰਦੀਆਂ ਹਨ। ਇਸ "ਮੁਆਫੀ" ਦੇ ਮੌਕੇ ਵਿਵਾਦਿਤ ਨਾਟਕ "ਮਿਊਜ਼ੀਅਮ" ਵਿੱਚ ਭਾਗ ਲੈਣ ਵਾਲੇ ਕਲਾਕਾਰ ਬੱਚੇ ਅਤੇ ਉਹਨਾਂ ਦੇ ਮਾਤਾ-ਪਿਤਾ ਵੀ  ਮੌਜੂਦ ਸਨ ਜਿਹਨਾਂ ਨੂੰ "ਸਮਿਤੀ ਕੇਂਦਰ" ਵਿੱਚ ਮੌਜੂਦ "ਧਾਰਮਿਕ" ਆਗੂਆਂ ਨੇ ਬਡ਼ੇ ਹੀ "ਪਿਆਰ ਅਤੇ ਸਤਿਕਾਰ" ਨਾਲ ਸਮਝਾਇਆ ਕਿ ਆਹ ਦੇਖੋ ਤੁਹਾਡੇ ਬੱਚੇ ਕਿੱਧਰ ਨੂੰ ਵਧਦੇ ਜਾ ਰਹੇ ਹਨ। ਮੁਆਫੀ ਮੰਗਣ ਵਾਲੇ ਇਹਨਾਂ ਵਿਦਿਆਰਥੀ ਕਲਾਕਾਰਾਂ ਦੇ ਗਿਣਤੀ ਦਸ ਸੀ। ਇਹਨਾਂ ਦੇ ਨਾਲ ਕਾਲਜ ਦੇ ਸੀਨੀਅਰ ਪ੍ਰੋਫੈਸਰ ਵੀ ਮੌਜੂਦ ਸਨ। 
ਮੀਡੀਆ ਲਈ "ਮੁਆਫੀਨਾਮੇ" ਦੀ ਨਕਲ ਮੰਗੇ ਜਾਣ 'ਤੇ ਬਜਰੰਗ ਦਲ ਦੇ ਆਗੂ ਚੇਤਨ ਮਲਹੋਤਰਾ ਨੇ ਕਿਹਾ ਸੀ ਕਿ ਮੁਆਫੀਨਾਮੇ ਦੀ ਲਿਖਤ ਸਾਡੇ ਤੱਕ ਜਲਦੀ ਹੀ ਪਹੁੰਚ ਜਾਏਗੀ। ਜਦੋਂ ਸਾਡੇ ਕੋਲ ਲਿਖਤੀ ਬਿਆਨ ਆਏਗਾ ਅਸੀਂ ਵੀ ਦਸਖਤ ਉਦੋਂ ਹੀ ਕਰਾਂਗੇ। ਉਹਨਾਂ ਦੱਸਿਆ ਕਿ ਨਾਟਕ ਖੇਡਣ ਵਾਲੀ ਟੀਮ ਦੇ ਮੁਖੀਆਂ ਨਾਲ ਅੱਜ ਸਾਡੀ ਮੁਲਾਕਾਤ "ਸਮਿਤੀ ਕੇਂਦਰ" ਵਿੱਚ ਹੋਈ ਜਿਸ ਵਿੱਚ ਐਸ ਸੀ ਡੀ ਗੌਰਮਿੰਟ ਕਾਲਜ, ਲੁਧਿਆਣਾ ਦੇ ਪ੍ਰੋਫੈਸਰ ਅਤੇ ਬੱਚੇ ਸ਼ਾਮਲ ਸਨ। ਇਹਨਾਂ ਨੇ ਸਿਧਾਂਤਕ ਤੌਰ 'ਤੇ ਤਾਂ ਮੁਆਫੀ ਮੰਗ ਲਈ ਹੈ ਅਤੇ ਸਾਡੀਆਂ ਦਲੀਲਾਂ ਨਾਲ ਸਹਿਮਤ ਵੀ ਹੋ ਗਏ ਹਨ ਪਰ ਅਜੇ ਇਹ ਸਭ ਕੁਝ ਜ਼ੁਬਾਨੀ ਹੈ। ਲਿਖਤੀ ਮੁਆਫੀ ਮੰਗੇ ਬਿਨਾ ਗੱਲ ਨਹੀਂ ਬਣਨੀ। ਭਰੋਸੇਯੋਗ ਸੂਤਰਾਂ ਦਾ ਕਹਿਣਾ ਹੈ ਕਿ ਪਹਿਲਾਂ ਇਸ ਮੁਆਫੀ ਲਈ ਸ਼ਰਤ ਰੱਖੀ ਗਈ ਸੀ ਕਿ ਇਹ ਮੁਆਫੀ ਭਾਰਤ ਨਗਰ ਚੌਂਕ ਵਿੱਚ ਭਾਰੀ ਇਕੱਠ ਕਰਕੇ ਸਭਨਾਂ ਦੇ ਸਾਹਮਣੇ ਮੰਗੀ ਜਾਏ। ਸੰਘ ਪਰਿਵਾਰ ਨਾਲ ਸਬੰਧਤ  ਕੁਝ ਬਾਰਸੂਖ "ਸਿਆਸੀ ਆਗੂਆਂ" ਦੇ ਦਖਲ ਦੇਣ ਤੇ "ਬਜਰੰਗ ਦਲ" ਅਤੇ "ਵਿਸ਼ਵ ਹਿੰਦੂ ਪਰੀਸ਼ਦ" ਨੇ ਇਸ ਅਡ਼ੀ ਨੂੰ ਛੱਡ ਦਿੱਤਾ। ਇਸਤੋਂ ਬਾਅਦ ਹੀ ਇਹ ਮੀਟਿੰਗ ਸਮਿਤੀ ਕੈਂਦਰ ਵਿੱਚ ਨਿਸਚਿਤ ਕੀਤੀ ਗਈ ਸੀ। ਹੁਣ ਜਦੋਂ ਕੀ ਮੁਆਫੀਨਾਮੇ ਵਾਲੀ ਨਕਲ ਸਾਹਮਣੇ ਆ ਚੁੱਕੀ ਹੈ ਅਤੇ ਕਾਲਜ ਪ੍ਰਬੰਧਕ ਇਸ ਬਾਰੇ ਆਪਣੀ ਖਾਮੋਸ਼ੀ ਤੋੜਨ ਲਈ ਲਗਾਤਾਰ ਟਾਲਮਟੋਲ ਵਾਲਾ ਰਵਈਆਂ ਆਪਣਾ ਰਹੇ ਹਨ ਉਦੋਂ ਪ੍ਰਗਤਿਸ਼ੀਲ ਕਲਾਕਾਰਾਂ ਦੇ ਮਨਾਂ ਅੰਦਰ ਸੁਲਗ ਰਹੀ ਚਿੰਗਾਰੀ ਦੀ ਅਗਨੀ ਜਲਦੀ ਹੀ ਭੜਕ ਪੈਣ ਦਾ ਖਦਸ਼ਾ ਹੈ। ਸ਼ਹੀਦ ਭਗਤ ਸਿੰਘ ਦੀ ਵਿਚਾਰਧਾਰਾ ਉੱਤੇ ਪਹਿਰਾਦੇਣ ਵਾਲੇ ਇਸ ਗੱਲ ਤੇ ਬਹੁਤ ਗੁੱਸੇ ਵਿੱਚ ਹਨ ਕਿ ਕਿਸੇ ਵੱਲੋਂ ਵੀ ਕਿਸੇ ਦੇ ਵੀ ਦਬਾਅ ਹੇਠ ਆ ਕੇ ਨੌਜਵਾਨ ਭਾਰਤ ਸਭਾ ਨੂੰ ਸ਼ਰਾਰਤੀ ਅਨਸਰ ਗਰਦਾਨਿਆ ਜਾਏ। ਉਹਨਾਂ ਦਾ ਕਹਿਣਾ ਹੈ ਕਿ ਅਸੀਂ ਸ਼ਹੀਦ ਭਗਤ ਸਿੰਘ ਵੱਲੋਂ ਸਥਾਪਿਤ ਇਸ ਨੌਜਵਾਨਾਂ ਦੀ ਸਿਰਮੌਰ ਜੱਥੇਬੰਦੀ ਦਾ ਅਪਮਾਨ ਨਹੀਂ ਹੋਣ ਦਿਆਂਗੇ। 

''ਨਸ਼ਿਆਂ ਨੇ ਮੇਰਾ ਜੀਵਨ ਤਬਾਹ ਕਰ ਦਿੱਤਾ ਸੀ''

Jun 14, 2019, 2:05 PM
ਲਗਾਤਾਰ 8 ਸਾਲ 'ਚਿੱਟਾ' ਲੈਣ ਵਾਲੇ ਮਨੀਸ਼ ਵੱਲੋਂ ਨਸ਼ਿਆਂ ਉੱਤੇ ਜਿੱਤ 
ਲੁਧਿਆਣਾ: 14 ਜੂਨ 2019: (ਪੰਜਾਬ ਸਕਰੀਨ ਬਿਊਰੋ)::

38 ਸਾਲਾਂ ਦੇ ਸ਼ਹਿਰ ਵਾਸੀ ਮਨੀਸ਼ ਸੈਣੀ ਦੀ ਉਮਰ ਉਸ ਵੇਲੇ 29 ਸਾਲਾਂ ਦੀ ਸੀ ਕਿ ਉਹ 'ਚਿੱਟੇ' ਦੇ ਨਾਮ ਨਾਲ ਜਾਣੇ ਜਾਂਦੇ ਨਸ਼ੇ ਦੀ ਗ੍ਰਿਫ਼ਤ ਵਿੱਚ ਆ ਗਿਆ। ਇਸੇ ਚੱਕਰ ਵਿੱਚ ਉਸਨੇ ਆਪਣੇ ਲੱਖਾਂ ਰੁਪਏ ਉਜਾੜ ਦਿੱਤੇ, ਪਤਨੀ ਵੀ ਸਾਥ ਛੱਡ ਗਈ ਅਤੇ ਉਹ ਸ਼ਰਾਬ ਦੀ ਤਸਕਰੀ ਦੇ ਗੋਰਖਧੰਦੇ ਵਿੱਚ ਫਸ ਗਿਆ। ਮਨੀਸ਼ ਦਾ ਕਹਿਣਾ ਹੈ ''ਮੇਰਾ ਜੀਵਨ ਤਬਾਹ ਹੋ ਗਿਆ ਸੀ ਅਤੇ ਮੈਂ ਮਹਿਸੂਸ ਕਰ ਸਕਦਾ ਸੀ ਕਿ ਮੈਂ ਅੰਦਰੋਂ ਕਮਜ਼ੋਰ ਰਿਹਾ ਹਾਂ ਅਤੇ ਜੀਵਨ ਦੇ ਦਿਨ ਬਹੁਤ ਘੱਟ ਹਨ। ਪਰ ਇੱਕ ਦਿਨ ਮੇਰੀ ਮਾਂ ਸੁਦੇਸ਼ ਦੀ ਪ੍ਰੇਰਨਾ ਨਾਲ ਮੈਂ ਇਹਨਾਂ ਨਸ਼ਿਆਂ ਦਾ ਖਹਿੜਾ ਛੁਡਾਉਣ ਦਾ ਮਨ ਬਣਾ ਲਿਆ, ਜਿਸ ਵਿੱਚ ਮੈਂ ਸਫ਼ਲ ਵੀ ਰਿਹਾ।'' 
ਉਸਨੇ ਕਿਹਾ ਕਿ ਉਸਨੇ ਉਸ ਤੋਂ ਬਾਅਦ ਪਿੱਛੇ ਮੁੜ ਕੇ ਕਦੇ ਨਹੀਂ ਵੇਖਿਆ ਅਤੇ ਹੁਣ ਤੱਕ ਖੁਦ ਨਸ਼ੇ ਤੋਂ ਦੂਰ ਰਹਿਣ ਦੇ ਨਾਲ-ਨਾਲ ਉਹ 10 ਹੋਰ ਨਸ਼ੇ ਦੇ ਆਦੀ ਨੌਜਵਾਨਾਂ ਨੂੰ ਇਸ ਗ੍ਰਿਫ਼ਤ ਵਿੱਚੋਂ ਬਾਹਰ ਕੱਢਣ ਵਿੱਚ ਸਫ਼ਲਤਾ ਹਾਸਿਲ ਕਰ ਚੁੱਕਿਆ ਹੈ। ਦੱਸਣਯੋਗ ਹੈ ਕਿ ਮਨੀਸ਼ ਇਸ ਵੇਲੇ ਸ਼ਿਵਪੁਰੀ ਖੇਤਰ ਵਿੱਚ ਹੌਜ਼ਰੀ ਸਨਅਤ ਨਾਲ ਸੰਬੰਧਤ ਦੁਕਾਨ ਵਿੱਚ ਬਤੌਰ ਮੈਨੇਜਰ ਕੰਮ ਕਰ ਰਿਹਾ ਹੈ।  
ਆਪਣੇ ਜੀਵਨ ਬਾਰੇ ਜਾਣਕਾਰੀ ਦਿੰਦਿਆਂ ਮਨੀਸ਼ ਦੱਸਦਾ ਹੈ ਕਿ ਉਸ ਦਾ ਆਪਣੇ ਵੱਡੇ ਭਰਾ ਨਾਲ ਕਾਫੀ ਪਿਆਰ ਸੀ। ਉਹ ਕਹਿੰਦਾ ਹੈ ਕਿ ''ਜਦੋਂ ਮੇਰੇ ਭਰਾ ਦੀ ਮੌਤ ਹੋਈ ਸੀ ਤਾਂ ਮੈਂ ਅੰਦਰੋਂ ਕਾਫੀ ਝੰਜੋੜਿਆ ਗਿਆ ਸੀ ਜਿਸ ਕਾਰਨ ਮੈਂ ਨਸ਼ੇ ਦੇ ਜਾਲ ਵਿੱਚ ਫਸ ਗਿਆ। ਉਸ ਵੇਲੇ ਮੇਰੇ ਕੋਲ 2 ਕਾਰਾਂ ਅਤੇ ਬੈਂਕ ਖਾਤਿਆਂ ਵਿੱਚ 10 ਲੱਖ ਰੁਪਏ ਦੇ ਕਰੀਬ ਜਮਾ ਰਾਸ਼ੀ ਸੀ, ਇਸ ਤੋਂ ਇਲਾਵਾ 12 ਲੱਖ ਰੁਪਏ ਕੀਮਤ ਵਾਲਾ ਘਰ ਵੀ ਸੀ। ਪਰ ਨਸ਼ੇ ਦੀ ਲਤ ਕਾਰਨ ਇਹ ਸਭ ਘੱਟਦਾ ਚਲਾ ਗਿਆ ਅਤੇ ਅੰਤ ਮੇਰੇ ਕੋਲ ਕੁੱਝ ਵੀ ਨਾ ਰਿਹਾ।''
ਉਸਨੇ ਕਿਹਾ ਕਿ ਉਸਨੇ ਆਪਣੇ ਨਿੱਤ ਦਿਨ ਦਾ ਜੀਵਨ ਨਿਰਬਾਹ ਕਰਨ ਲਈ ਸ਼ਰਾਬ ਦੀ ਤਸਕਰੀ ਕਰਨੀ ਸ਼ੁਰੂ ਕਰ ਦਿੱਤੀ। ਉਸ ਵੇਲੇ ਉਸ ਨੂੰ ਸਿਰਫ਼ 'ਚਿੱਟਾ' ਹੀ ਚਾਹੀਦਾ ਹੁੰਦਾ ਸੀ, ਇਸ ਤੋਂ ਇਲਾਵਾ ਹੋਰ ਕੁਝ ਵੀ ਨਹੀਂ ਸੁੱਝਦਾ ਸੀ। ਉਸਦਾ ਪਰਿਵਾਰਕ ਜੀਵਨ ਪੂਰੀ ਤਰਾਂ ਪ੍ਰਭਾਵਿਤ ਹੋ ਚੁੱਕਾ ਸੀ ਕਿ ਇੱਕ ਦਿਨ ਉਸਦੀ ਪਤਨੀ ਵੀ ਸਾਥ ਛੱਡ ਕੇ ਚਲੀ ਗਈ। ਉਸ ਦਿਨ ਉਸਨੇ ਮਹਿਸੂਸ ਕੀਤਾ ਕਿ ਪਰਿਵਾਰ ਤੋਂ ਬਿਨ•ਾ ਅਤੇ ਨਸ਼ਿਆਂ ਦੇ ਨਾਲ ਜੀਵਨ ਕੁਝ ਵੀ ਨਹੀਂ। ਉਸਦਾ ਕਹਿਣਾ ਹੈ ਕਿ ਉਸਦੀ ਮਾਂ ਸੁਦੇਸ਼ ਹਮੇਸ਼ਾਂ ਉਸ ਦੇ ਨਾਲ ਖੜੀ ਅਤੇ ਉਸਨੂੰ ਸਮੇਂ-ਸਮੇਂ 'ਤੇ ਨਸ਼ਾ ਛੱਡਣ ਲਈ ਪ੍ਰੇਰਿਤ ਕਰਦੀ ਰਹੀ। 
ਉਸਨੇ ਕਿਹਾ ਕਿ ਇੱਕ ਸਾਲ ਪਹਿਲਾਂ ਉਸਨੇ ਨਸ਼ੇ ਨੂੰ ਪੂਰੀ ਤਰਾਂ ਤਿਆਗਣ ਦਾ ਮਨ ਬਣਾ ਲਿਆ। ਉਸਦੀ ਮਾਂ ਉਸਨੂੰ ਸਿਵਲ ਹਸਪਤਾਲ ਲੁਧਿਆਣਾ ਸਥਿਤ ਨਸ਼ਾ ਛੁਡਾਊ ਕੇਂਦਰ ਵਿਖੇ ਇਲਾਜ ਲਈ ਲਿਆਈ। ਦ੍ਰਿੜ ਨਿਸ਼ਚੇ ਦੇ ਨਾਲ ਉਸਨੇ ਇਥੋਂ ਤਿੰਨ ਹਫ਼ਤੇ ਦਾ ਇਲਾਜ਼ ਕਰਵਾਇਆ ਅਤੇ ਉਹ ਪੂਰੀ ਤਰਾਂ  ਨਸ਼ੇ ਤੋਂ ਰਹਿਤ ਹੋ ਗਿਆ। ਮਨੀਸ਼ ਬੜੀ  ਖੁਸ਼ੀ ਨਾਲ ਕਹਿੰਦਾ ਹੈ ਕਿ ਉਕਤ ਨਸ਼ਾ ਛੁਡਾਊ ਕੇਂਦਰ ਦੇ ਡਾਕਟਰ ਅਤੇ ਹੋਰ ਸਟਾਫ਼ ਬਹੁਤ ਵਧੀਆ ਹਨ, ਜਿਹਨਾਂ ਦੇ ਸਹਿਯੋਗ ਦੇ ਨਾਲ ਹੀ ਉਸਦਾ ਨਸ਼ਾ ਛੱਡ ਕੇ ਵਧੀਆ ਇਨਸਾਨ ਬਣਨਾ ਸੰਭਵ ਹੋਇਆ ਹੈ। ਉਸਨੇ ਕਿਹਾ ਕਿ ਉਸਦਾ ਪੰਜਾਬ ਸਰਕਾਰ ਵੱਲੋਂ ਬਿਲਕੁਲ ਮੁਫ਼ਤ ਇਲਾਜ਼ ਕੀਤਾ ਗਿਆ। 
ਮਨੀਸ਼ ਕਹਿੰਦਾ ਹੈ ਕਿ ਕੁਝ ਨਿੱਜੀ ਨਸ਼ਾ ਛੁਡਾਊ ਕੇਂਦਰ ਨਸ਼ਾ ਛੁਡਾਉਣ ਦੇ ਨਾਮ 'ਤੇ ਨਸ਼ੇ ਦੇ ਆਦੀ ਲੋਕਾਂ ਤੋਂ ਲੱਖਾਂ ਰੁਪਏ ਬਟੋਰ ਰਹੇ ਹਨ ਪਰ ਉਹ ਹਾਲੇ ਵੀ ਨਸ਼ੇ ਦੀ ਗ੍ਰਿਫ਼ਤ ਤੋਂ ਪੂਰੀ ਤਰਾਂ ਬਾਹਰ ਨਹੀਂ ਆ ਸਕੇ ਹਨ। ਪਰ ਪੰਜਾਬ ਸਰਕਾਰ ਵੱਲੋਂ ਚਲਾਏ ਜਾ ਰਹੇ ਨਸ਼ਾ ਛੁਡਾਊ ਕੇਂਦਰਾਂ ਵਿੱਚ ਇਹ ਇਲਾਜ਼ ਬਹੁਤ ਹੀ ਵਧੀਆ ਅਤੇ ਬਿਲਕੁਲ ਮੁਫ਼ਤ ਮੁਹੱਈਆ ਕਰਵਾਇਆ ਜਾ ਰਿਹਾ ਹੈ।
ਮਨੀਸ਼ ਨੇ ਕਿਹਾ ਕਿ ਉਹ ਹੁਣ ਸਵੇਰੇ 9.30 ਵਜੇ ਕੰਮ 'ਤੇ ਜਾਂਦਾ ਹੈ ਅਤੇ ਰਾਤ ਨੂੰ 10.00 ਵਜੇ ਵਾਪਸ ਆਉਂਦਾ ਹੈ। ਉਹ ਲੋਕਾਂ ਮੂਹਰੇ ਇਹ ਸਾਬਿਤ ਕਰਨ ਲਈ ਬਹੁਤ ਸਖ਼ਤ ਮਿਹਨਤ ਕਰ ਰਿਹਾ ਹੈ ਕਿ ਜੇਕਰ ਇੱਛਾ ਸ਼ਕਤੀ ਹੋਵੇ ਤਾਂ 'ਚਿੱਟਾ' ਆਸਾਨੀ ਨਾਲ ਛੱਡਿਆ ਜਾ ਸਕਦਾ ਹੈ। ਉਹ ਬੜੇ ਮਾਣ ਨਾਲ ਕਹਿੰਦਾ ਹੈ ਕਿ ਉਸ ਦੀ ਪ੍ਰੇਰਨਾ ਸਦਕਾ 10 ਹੋਰ ਵਿਅਕਤੀ ਇਸ ਨਸ਼ੇ ਦੀ ਬਿਮਾਰੀ ਤੋਂ ਨਿਜ਼ਾਤ ਪਾ ਕੇ ਆਮ ਜੀਵਨ ਬਤੀਤ ਕਰ ਰਹੇ ਹਨ।