Showing posts with label Video. Show all posts
Showing posts with label Video. Show all posts

Friday, October 13, 2017

ਭਾਜਗਵਿਜ ਵੱਲੋਂ ਪ੍ਰਦੂਸ਼ਣ ਮੁਕਤ ਦੀਵਾਲੀ ਦਾ ਸੱਦਾ

ਨਾ ਕੋਈ ਹਾਦਸਾ-ਨਾ ਕੋਈ ਰੋਗ-ਖੁਸ਼ੀਆਂ ਵਿੱਚ ਨਾ ਹੋਵੇ ਸੋਗ 
ਲੁਧਿਆਣਾ: 12 ਅਕਤੂਬਰ 2017: (ਪੰਜਾਬ ਸਕਰੀਨ ਬਿਊਰੋ):: 
ਹਰ ਵਾਰ ਦੀਵਾਲੀ ਵਾਲੀ ਰਾਤ ਲੱਗਦੀਆਂ ਅੱਗਾਂ ਅਤੇ ਹੋਰ ਹਾਦਸਿਆਂ ਤੋਂ ਚਿੰਤਿਤ ਹੋਏ ਭਾਰਤ ਜਨ ਗਿਆਨ ਵਿਗਿਆਨ ਜੱਥਾ ਨੇ ਅਪੀਲ ਕੀਤੀ ਹੈ ਕਿ ਇਸ ਵਾਰ ਪ੍ਰਦੂਸ਼ਣ ਮੁਕਤ ਦੀਵਾਲੀ ਮਨਾਈ ਜਾਏ। ਨਾ ਭਾਰੀ ਭਰਕਮ ਬਾਰੂਦ ਵਾਲੇ ਪਟਾਕਿਆਂ ਨਾਲ ਇੱਕ ਦੂਜੇ ਤੋਂ ਜ਼ਿਆਦਾ ਸ਼ੋਰ ਪਾਉਣ ਦੀ ਰੇਸ ਲਾਇ ਜਾਏ ਅਤੇ ਨਾ ਹੀ ਲੋਕਾਂ   ਦੀਆਂ ਅੱਖਾਂ, ਕੰਨਾਂ ਅਤੇ ਗਲੇ ਨੂੰ ਨੁਕਸਾਨ ਪਹੁੰਚਾਇਆ ਜਾਏ। ਇਸ ਮਕਸਦ ਲਈ ਅੱਜ ਮੈਡਮ ਕੁਸਮ ਲਤਾ, ਡਾਕਟਰ ਗੁਰਚਰਨ ਕੌਰ ਕੋਚਰ, ਪ੍ਰਦ੍ਵਨ ਰਣਜੀਤ ਸਿੰਘ, ਸੀਨੀਅਰ ਮੈਂਬਰ ਇੰਦਰ ਸਿੰਘ ਸੋਢੀ, ਅਮ੍ਰਿਤਪਾਲ ਸਿੰਘ ਅਤੇ ਪ੍ਰਦੀਪ ਸ਼ਰਮਾ 'ਤੇ ਅਧਾਰਿਤ ਇਕ ਵਫਦ ਜ਼ਿਲਾ ਸਿੱਖਿਆ ਅਧਿਕਾਰੀ (ਸੈਕੰਡਰੀ) ਮੈਡਮ ਸਵਰਨਜੀਤ ਕੌਰ ਅਤੇ ਹੋਰਨਾਂ ਅਧਿਕਾਰੀਆਂ ਨੂੰ ਵੀ ਮਿਲਿਆ। 
ਭਾਰਤ ਜਨ ਗਆਨ ਵਿਗਿਆਨ ਜੱਥਾ ਲੁਧਿਆਣਾ ਦਾ ਇੱਕ ਡੈਪੂਟੇਸ਼ਨ ਜ਼ਿਲਾ ਸਿਖਿਆ ਅਫਸਰਾਂ ਨੂੰ ਮਿਲਿਆ ਅਤੇ ਉਹਨਾਂ ਨੂੰ ਇੱਕ ਮੰਗ ਪੱਤਰ ਦੇ ਕੇ ਮੰਗ ਕੀਤੀ ਕਿ ਜ਼ਿਲੇ ਦੇ ਸਾਰੇ ਸਕੂਲਾਂ ਨੂੰ ਹਿਦਾਇਤ ਕਰਨ ਕਿ ਬੱਚਿਆਂ ਨੂੰ ਦਿਵਾਲੀ ਦੇ ਮੌਕੇ ਤੇ ਪਟਾਕਿਆਂ ਤੇ ਹਰ ਆਤਿਸ਼ਬਾਜ਼ੀ ਦੇ ਨਾਲ ਫੈਲਣ ਵਾਲੇ ਪ੍ਰਦੂਸ਼ਣ ਬਾਰੇ ਜਣਕਾਰੀ ਦੇਣ ਅਤੇ ਬੱਚਿਆਂ ਨੂੰ ਹਰੀ ਦਿਵਾਲੀ ਮਨਾਉਣ ਦੇ ਲਈ ਉਤਸ਼ਾਹਿਤ ਕਰਨ।
ਇਸ ਡੈਪੂਟੇਸ਼ਨ ਦੀ ਅਗਵਾਈ ਜੱਥਾ ਦੇ ਪ੍ਰਧਾਨ ਸ: ਰਣਜੀਤ ਸਿੰਘ ਨੇ ਕੀਤੀੇ ਉਹਨਾਂ ਤੋ  ਇਲਾਵਾ ਇਸ ਵਿੱਚ ਸ਼ਾਮਿਲ ਸਨ, ਡਾ: ਗੁਰਚਰਨ ਕੋਚਰ, ਇੰਦਰਜੀਤ ਸਿੰਘ ਸੋਢੀ, ਸ਼੍ਰੀਮਤੀ ਕੁਸੁਮ ਲਤਾ, ਮਨਜੀਤ ਸਿੰਘ ਮਹਿਰਮ, ਸਵਰੂਪ ਸਿੰਘ, ਅਮਿ੍ਰਤਪਾਲ ਸਿੰਘ, ਅਵਤਾਰ ਛਿੱਬੜ, ਬੀ ਐਸ ਢੱਟ, ਮੇਘਨਾਥ, ਭਜਨ ਸਿੰਘ, ਰੈਕਟਰ ਕਥੂਰੀਆ,ਅਤੇ ਪਰਦੀਪ ਸ਼ਰਮਾ।    ਇਸ ਮੌਕੇ ਤੇ ਜਾਰੀ ਬਿਆਨ ਵਿੱਚ  ਜੱਥਾ ਦੇ ਜਨਰਲ ਸਕੱਤਰ ਡਾ: ਅਰੁਣ ਮਿੱਤਰਾ ਨੇ ਕਿਹਾ ਕਿ ਦਿਵਾਲੀ ਦੇ ਮੌਕੇ ਅਸੀ ਪਟਾਕੇ ਵਜਾਉਂਦੇ ਹਾਂ ਅਤੇ ਸ਼ੋਰ ਤੇ ਧੂਆਂ ਪੈਦਾ ਕਰਦੇ ਹਾਂ। ਪਟਾਕਿਆਂ ਦੇ ਨਾਲ ਪੈਦਾ ਹੋਣ ਵਾਲੇ ਪ੍ਰਦੂਸ਼ਣ ਬਾਰੇ ਜਾਣਕਾਰੀ ਦਿੰਦਿਆਂ ਉਹਨਾਂ ਨੇ ਕਿਹਾ ਕਿ ਤੇਜ਼ ਬੰਬ 142 ਡੈਸੀਬਲ ਤੱਕ ਅਵਾਜ਼ ਪੈਦਾ ਕਰਦੇ ਹਨ ਜਿਸਦੇ ਨਾਲ ਕੰਨ ਸਦਾ ਲਈ ਵੀ ਬੋਲੇ ਹੋ ਸਕਦੇ ਹਨ। ਆਮ ਕਰਕੇ ਅਸੀਂ 50 ਡੈਸੀਬਲ ਦੇ ਕਰੀਬ ਅਵਾਜ਼ ਵਿੱਚ ਗੱਲ ਬਾਤ ਕਰਦੇ ਹਾਂ। ਧੂਏਂ ਦੇ ਨਾਲ ਫ਼ੇਫ਼ੜਿਆਂ ਦੀਆਂ ਅਤੇ ਸਾਹ ਦੀ ਨਾਲੀ ਦੀਆਂ ਅਨੇਕਾਂ ਬੀਮਾਰੀਆਂ ਲਗਦੀਆਂ ਹਨ। ਜੱਥੇ ਦੇ ਪ੍ਰਧਾਨ ਰਣਜੀਤ ਸਿੰਘ  ਨੇ ਜੱਥੇ ਵਲੋਂ ਪਿਛਲੇ 25 ਸਾਲਾਂ ਤੋਂ ਵਾਤਾਵਰਣ ਦੀ ਸੰਭਾਲ ਲਈ ਚਲਾਈ ਜਾ ਰਹੀ ਜਨ ਚੇਤਨਾ ਮੁਹਿੰਮ ਬਾਰੇ ਜਾਣਕਾਰੀ ਦਿੱਤੀ। ਉਹਨਾਂ ਨੇ ਕਿਹਾ ਕਿ ਦਿੱਲੀ ਵਿੱਚ ਪਟਾਕਿਆਂ ਤੇ ਪਾਬੰਦੀ ਲਾਉਣਾ ਇੱਕ ਸ਼ਲਾਘਾਯਗ ਕਦਮ ਹੈ ਪਰ ਇਹ ਸਾਰਾ ਪਟਾਕਾ ਪੰਜਾਬ ਵਿੱਚ ਸਸਤੇ ਭਾਅ ਵਿੱਚ ਵਿਕ ਰਿਹਾ ਹੈ। ਪਟਾਕਿਆਂ ਦੇ ਬਣਾਉਣ ਤੇ ਹੀ ਪਾਬੰਦੀ ਹੌਣੀ ਚਾਹੀਦੀ ਹੈ। ਜੱਥਾ ਦੇ ਜੱਥੇਬੰਦਕ ਸਕੱਤਰ ਸ਼੍ਰੀ ਮਨਿੰਦਰ ਸਿੰਘ ਭਾਟੀਆ ਨੇ ਕਿਹਾ ਕਿ ਕੁਦਰਤ ਨੇ ਹਰ ਚੀਜ਼ ਦਾ ਸੰਤੁਲਨ ਬਣਾ ਕੇ ਰਖਿਆ ਹੈ। ਪਰ ਮਨੱੁਖ ਨੇ ਆਪਣੇ ਸੁਆਰਥਾਂ ਦੇ ਲਈ ਇਸਨੂੰ ਵਿਗਾੜ ਦਿੱਤਾ ਹੈ ਜਿਸਦਾ ਖ਼ਮਿਆਜ਼ਾ ਸਾਨੂੰ ਵੱਖ ਵੱਖ ਕੁਦਰਤੀ ਅਫ਼ਤਾਂ ਦੇ ਰੂਪ ਵਿੱਚ ਭੁਗਤਣਾ ਪੈ ਰਿਹਾ ਹੈ।
ਇਸ ਜੱਥੇ ਨਾਲ ਜੁੜਨ ਲਈ ਸੰਪਰਕ ਕਰ ਸਕਦੇ ਹੋ-ਐਮ ਐਸ ਭਾਟੀਆ ਹੁਰਾਂ ਨਾਲ ਜਿਹੜੇ ਇਸ ਭਾਰਤ ਜਨ ਗਿਆਨ ਵਿਗਿਆਨ ਜੱਥਾ ਦੇ ਜੱਥੇਬੰਦਕ ਸਕੱਤਰ ਹਨ। ਉਹਨਾਂ ਦਾ ਸੰਪਰਕ ਨੰਬਰ ਹੈ:  9988491002
  

Sunday, May 22, 2016

ਆਈ ਐੱਸ ਵੱਲੋਂ ਭਾਰਤ 'ਤੇ ਹਮਲਿਆਂ ਦੀ ਧਮਕੀ

22 ਮਿੰਟ ਦਾ ਇੱਕ ਵੀਡੀਓ ਜਾਰੀ ਕਰਕੇ ਦਿੱਤੀ ਹਮਲਿਆਂ ਦੀ ਧਮਕੀ 
ਨਵੀਂ ਦਿੱਲੀ: 21ਮਈ 2016: (ਪੰਜਾਬ ਸਕਰੀਨ ਬਿਊਰੋ+ਇੰਟ.):
ਬਹੁਤ ਹੀ ਖਤਰਨਾਕ ਅਤੇ ਗੰਭੀਰ ਖਬਰ ਆ ਰਹੀ ਹੈ ਇੰਟਰਨੈਟ 'ਤੇ। ਆਈ ਐੱਸ ਨੇ ਬਦਲਾ ਲੈਣ ਲਈ ਭਾਰਤ ਤੇ ਹਮਲੇ ਕਰਨ ਦੀ ਧਮਕੀ ਦਿੱਤੀ ਹੈ। ਖ਼ਤਰਨਾਕ ਅੱਤਵਾਦੀ ਜਥੇਬੰਦੀ ਆਈ ਐੱਸ ਆਈ ਐੱਸ ਨੇ 22 ਮਿੰਟ ਦਾ ਇੱਕ ਵੀਡੀਓ ਜਾਰੀ ਕਰਕੇ ਭਾਰਤ ਵਿਰੁੱਧ ਆਪਣੇ ਖ਼ਤਰਨਾਕ ਇਰਾਦੇ ਜ਼ਾਹਿਰ ਕਰ ਦਿੱਤੇ ਹਨ। ਜਥੇਬੰਦੀ ਨੇ ਅਰਬੀ ਭਾਸ਼ਾ 'ਚ ਜਾਰੀ ਇਸ ਵੀਡੀਓ 'ਚ ਗੁਜਰਾਤ, ਕਸ਼ਮੀਰ, ਮੁਜ਼ੱਫਰਨਗਰ ਅਤੇ ਬਾਬਰੀ ਮਸਜਿਦ ਕਾਂਡ ਦਾ ਬਦਲਾ ਲੈਣ ਦਾ ਐਲਾਨ ਕੀਤਾ ਹੈ। ਵੀਡੀਓ ਸਮੁੰਦਰ ਕਿਨਾਰੇ ਸ਼ੂਟ ਕੀਤਾ ਗਿਆ ਹੈ ਅਤੇ ਇਸ 'ਚ ਜ਼ਿਆਦਾਤਰ ਇੰਟਰਵਿਊ ਹੀ ਹਨ। ਆਈ ਐੱਸ ਵੱਲੋਂ ਭਾਰਤ ਅਤੇ ਦੱਖਣੀ ਏਸ਼ੀਆ 'ਚ ਜਾਰੀ ਕੀਤਾ ਗਿਆ ਇਹ ਪਹਿਲਾ ਵੀਡੀਓ ਹੈ।  ਵੀਡੀਓ ਵਿੱਚ ਸਥਾਨਕ ਜੇਹਾਦੀਆਂ ਨੂੰ ਵਰਤੇ ਜਾਣ ਦੀ ਗੱਲ ਕਹੀ ਗਈ ਹੈ। 
ਇਸ ਵੀਡੀਓ 'ਚ ਠਾਣੇ ਦਾ ਰਹਿਣ ਵਾਲਾ ਇੰਜੀਨੀਅਰਿੰਗ ਦਾ ਵਿਦਿਆਰਥੀ ਫਰਹਾਦ ਤਨਵੀਰ ਸ਼ੇਖ ਸਪਸ਼ਟ ਸ਼ਬਦਾਂ ਵਿੱਚ ਬਦਲਾ ਲੈਣ ਦੀ ਧਮਕੀ ਦੇ ਰਿਹਾ ਹੈ। ਸ਼ੇਖ ਆਖਦਾ ਹੈ, ਅਸੀਂ ਪਰਤਾਂਗੇ, ਪਰ ਤਲਵਾਰ ਹੱਥ 'ਚ ਲੈ ਕੇ। ਬਾਬਰੀ ਮਸਜਿਦ ਨੂੰ ਡੇਗਣ ਦਾ ਬਦਲਾ ਲਵਾਂਗੇ। ਕਸ਼ਮੀਰ, ਗੁਜਰਾਤ ਅਤੇ ਮੁਜ਼ੱਫਰਨਗਰ ਦੇ ਮੁਸਲਮਾਨਾਂ ਦੇ ਕਤਲਾਂ ਦਾ ਬਦਲਾ ਲਿਆ ਜਾਵੇਗਾ। ਉਹ ਆਖਦਾ ਹੈ ਕਿ ਭਾਰਤ 'ਚ ਆਈ ਐੱਸ ਦੇ ਸਥਾਨਕ ਜੇਹਾਦੀ ਹੀ ਹਮਲੇ ਕਰਨਗੇ। ਜ਼ਿਕਰਯੋਗ ਹੈ ਕਿ ਸ਼ੇਖ 2014 'ਚ ਤਿੰਨ ਸਾਥੀਆਂ ਸਮੇਤ ਸੀਰੀਆ ਗਿਆ ਅਤੇ ਆਈ ਐੱਸ ਆਈ ਐੱਸ 'ਚ ਭਰਤੀ ਹੋ ਗਿਆ। ਅਜਿਹੇ ਕਿੰਨੇ ਕੁ ਨੌਜਵਾਨ ਆਈ ਐੱਸ ਦੀਆਂ ਸਫਾਂ ਵਿੱਚ ਹਨ ਇਸ ਬਾਰੇ ਕੁਝ ਵੀ ਸਾਫ਼ ਸਾਫ਼ ਨਹੀਂ ਕਿਹਾ ਸਕਦਾ।  
ਵੀਡੀਓ ਵਿੱਚ ਸ਼ੇਖ ਨੇ ਆਪਣਾ ਨਾਂਅ ਅਬੂ ਅਮਰ ਅਲ ਹਿੰਦੀ ਦੱਸਿਆ ਹੈ। ਵੀਡੀਓ 'ਚ ਇੱਕ ਹੋਰ ਜੇਹਾਦੀ ਆਖਦਾ ਹੈ ਕਿ ਸਾਡੇ ਕਹਿਰ ਤੋਂ ਬਚਣ ਲਈ ਤੁਹਾਡੇ ਕੋਲ ਸਿਰਫ਼ ਤਿੰਨ ਬਦਲ ਹਨ-ਪਹਿਲਾ ਇਸਲਾਮ ਕਬੂਲ ਕਰੋ, ਦੂਜਾ ਜਜ਼ੀਆ ਦਿਓ ਜਾਂ ਫੇਰ ਮਰਨ ਲਈ ਤਿਆਰ ਜੋ ਜਾਓ। ਵੀਡੀਓ 'ਚ ਉਨ੍ਹਾ ਨੇ ਖੁਦ ਨੂੰ ਹਿੰਦ ਵੱਲ ਸਿੰਗ ਦਾ ਦੱਸਿਆ ਹੈ। ਪਤਾ ਚੱਲਿਆ ਹੈ ਕਿ ਆਈ ਐੱਸ ਆਈ ਐੱਸ 'ਚ ਇਹ ਲਫ਼ਜ਼ ਭਾਰਤ ਅਤੇ ਪਾਕਿਸਤਾਨ ਲਈ ਵਰਤਿਆ ਜਾਂਦਾ ਹੈ। ਵੀਡੀਉ 'ਚ ਹਿੰਦੂਆਂ ਨੂੰ ਗਾਂ ਦੀ ਪੂਜਾ ਕਰਨ ਵਾਲਾ ਅਤੇ ਮੁਸਲਮਾਨਾਂ ਵਿਰੁੱਧ ਹਿੰਸਾ ਕਰਨ ਵਾਲਾ ਦੱਸਿਆ ਗਿਆ ਹੈ। ਵੀਡੀਓ 'ਚ ਇੱਕ ਥਾਂ ਮੁਗਲ ਰਾਜਾ ਮੁਹੰਮਦ ਬਿਨ ਕਾਸਿਮ ਦਾ ਵੀ ਜ਼ਿਕਰ ਹੈ। ਅੱਤਵਾਦੀ ਉਸ ਨੂੰ ਭਾਰਤ 'ਚ ਇਸਲਾਮੀ ਰਾਜ ਦੀ ਸਥਾਪਨਾ ਕਰਨ ਵਾਲਾ ਪਹਿਲਾ ਰਾਜਾ ਮੰਨਦੇ ਹਨ। 
ਵੀਡੀਉ 'ਚ ਉਵੈਸੀ ਅਤੇ ਬਦਰੂਦੀਨ ਅਜਮਲ ਦੇ ਫੋਟੋਗ੍ਰਾਫ਼ ਵੀ ਨਜ਼ਰ ਆਉਂਦੇ ਹਨ। ਉਨ੍ਹਾਂ 'ਤੇ ਦੋਸ਼ ਲਾਇਆ ਗਿਆ ਕਿ ਉਹ ਗ਼ੈਰ-ਮੁਸਲਿਮ ਲੀਡਰਾਂ ਨਾਲ ਮਿਲੇ ਹੋਏ ਹਨ ਅਤੇ ਮੁਸਲਮਾਨਾਂ ਨਾਲ ਹੋਏ ਅੱਤਿਆਚਾਰ ਨੂੰ ਬਰਦਾਸ਼ਤ ਕਰ ਰਹੇ ਹਨ। 
ਵੀਡੀਓ 'ਚ ਕਿਹਾ ਗਿਆ ਕਿ ਉਨ੍ਹਾਂ ਲੋਕਾਂ ਦੀ ਗੱਲ 'ਤੇ ਧਿਆਨ ਨਾ ਦਿਓ, ਜਿਹੜੇ ਆਖਦੇ ਹਨ ਕਿ ਇਸਲਾਮ ਸ਼ਾਂਤੀ ਦਾ ਧਰਮ ਹੈ, ਬਲਕਿ ਇਸਲਾਮ ਜੰਗ ਦਾ ਧਰਮ ਹੈ। ਪੈਗੰਬਰ ਨੇ ਕਿਹਾ ਸੀ ਕਿ ਉਦੋਂ ਤੱਕ ਲੜਦੇ ਰਹੋ, ਜਦੋਂ ਤੱਕ ਅੱਲਾ ਦਾ ਰਾਜ ਕਾਇਮ ਨਾ ਹੋ ਜਾਵੇ।ਹੁਣ ਦੇਖਣਾ ਹੈ ਕਿ ਇਸ ਸੰਭਾਵਤ ਹਮਲੇ ਦੀ ਰੋਕਥਾਮ ਲਈ ਕੀ ਕਦਮ ਚੁੱਕਿਆ ਜਾਂਦਾ ਹੈ?
 ਦੌਰਾਨ ਗ੍ਰਹਿ ਮੰਤਰੀ ਰਾਜਨਾਥ ਸਿੰਘ ਨੇ ਕਿਹਾ ਹੈ ਕਿ ਅਸੀਂ ਆਈ ਐੱਸ ਦੇ ਖਤਰਿਆਂ  ਕਰਨ ਲਈ ਤਰਾਂ  ਸਮਰਥ ਹਾਂ। 

Friday, April 11, 2014

ਹਜ਼ਾਰਾਂ ਜਾਅਲੀ ਸੀ. ਡੀਜ਼ ਬਰਾਮਦ, 7 ਕਾਬੂ

Fri, Apr 11, 2014 at 7:23 PM
ਨਵੀਆਂ ਹਿੱਟ ਫਿਲਮਾਂ ਦੇ ਨਾਲ ਅਸ਼ਲੀਲ ਫਿਲਮਾਂ ਵੀ ਵੇਚਦੇ ਸਨ 
ਲੁਧਿਆਣਾ: 11 ਅਪ੍ਰੈਲ 2014: (ਰੈਕਟਰ ਕਥੂਰੀਆ//ਪੰਜਾਬ ਸਕਰੀਨ):

ਅਸ਼ਲੀਲ ਅਤੇ ਨਕਲੀ ਸੀਡੀਆਂ ਦੀ ਰੋਕਥਾਮ ਲਈ ਪੁਲਿਸ ਲਗਾਤਾਰ ਸਰਗਰਮ ਹੈ। ਇਸੇ ਮੁਹਿੰਮ ਅਧੀਨ ਸੀ. ਆਈ. ਏ. ਵਨ ਦੀ ਪੁਲਸ ਨੇ ਘੰਟਾ ਘਰ ਦੇ ਨੇੜੇ ਭਦੌੜ ਹਾਊਸ ਸਥਿਤ ਦੁਕਾਨਾਂ 'ਤੇ ਰੇਡ ਕਰਦੇ ਹੋਏ ਹਜ਼ਾਰਾਂ ਦੀ ਗਿਣਤੀ ਵਿਚ ਜਾਅਲੀ ਸੀ. ਡੀਜ਼ ਤੇ ਡੀ. ਵੀ. ਡੀਜ਼ ਦਾ ਭੰਡਾਰ ਬਰਾਮਦ ਕੀਤਾ ਹੈ। ਇਸ ਕਾਰੋਬਾਰ ਨੂੰ ਕਰਨ ਵਾਲੇ 7 ਦੋਸ਼ੀਆਂ ਨੂੰ ਪੁਲਸ ਨੇ ਕਾਬੂ ਕਰ ਲਿਆ ਹੈ, ਜਦਕਿ 3 ਫਰਾਰ ਹੋ ਗਏ ਹਨ। ਉਕਤ ਖੁਲਾਸਾ ਏ. ਸੀ. ਪੀ. ਕ੍ਰਾਈਮ ਜਸਵਿੰਦਰ ਸਿੰਘ ਨੇ ਪ੍ਰੈੱਸ ਨੋਟ ਦੇ ਜ਼ਰੀਏ ਕੀਤਾ ਹੈ। ਜਾਣਕਾਰੀ ਦਿੰਦੇ ਹੋਏ ਏ. ਸੀ. ਪੀ. ਕ੍ਰਾਈਮ ਜਸਵਿੰਦਰ ਸਿੰਘ ਨੇ ਦੱਸਿਆ ਕਿ ਸੂਚਨਾ ਦੇ ਆਧਾਰ 'ਤੇ ਜਦੋਂ ਭਦੌੜ ਹਾਊਸ ਵਿਚ ਵੱਖ ਦੁਕਾਨਾਂ 'ਤੇ ਰੇਡ ਕੀਤੀ ਗਈ ਤਾਂ ਮੌਕੇ ਤੋਂ ਹਜ਼ਾਰਾਂ ਦੀ ਤਦਾਦ ਵਿਚ ਜਾਅਲੀ ਸੀ. ਡੀਜ਼ ਬਰਾਮਦ ਹੋਈਆਂ। ਦੁਕਾਨ ਨੰ. 26 ਤੇ 28 'ਤੇ ਰੇਡ ਕਰਨ ਉਪਰੰਤ 25 ਹਜ਼ਾਰ ਦੇ ਕਰੀਬ ਜਾਅਲੀ ਸੀ. ਡੀਜ਼ ਬਰਾਮਦ ਕੀਤੀਆਂ ਗਈਆਂ, ਜਿਨ੍ਹਾਂ ਵਿਚ ਨਵੀਆਂ ਰਿਲੀਜ਼ ਹੋਈਆਂ ਫਿਲਮਾਂ ਦੇ ਨਾਲ-ਨਾਲ ਬਲਿਊ ਫਿਲਮਾਂ ਦੀਆਂ ਸੀ ਡੀਜ਼ ਤੇ ਡੀ. ਵੀ. ਡੀਜ਼ ਵੀ ਸਨ। 

ਪੁਲਿਸ ਨੇ ਇਹਨਾਂ ਕੋਲੋਂ 9159-ਡੀਵੀਡੀ, ਪੰਜ ਡੀਵੀਡੀ ਰਾਈਟਰ, 50 ਸੀਡੀਜ਼, 220-ਨਿਊਡ ਫਿਲਮਾਂ, ਪੰਜ ਹਜ਼ਾਰ-ਨਿਊਡ ਰੈਪਰ, 210-ਮਾਸਟਰ ਪ੍ਰਿੰਟ, 9550-ਫਿਲਮਾਂ ਅਤੇ ਗਾਣਿਆਂ ਦੇ ਰੈਪਰ ਅਤੇ 1711 ਐਮਪੀ-ਥ੍ਰੀ ਸੀਡੀਜ਼ ਵਗੈਰਾ ਬਰਾਮਦ ਕੀਤੀਆਂ ਗਈਆਂ ਹਨ। ਫੜੇ ਗਏ ਇਹਨਾਂ ਆਰੋਪੀਆਂ ਦੀ ਪਛਾਣ ਰਜੇਸ਼ ਕੁਮਾਰ, ਅਸ਼ੋਕ ਕੁਮਾਰ, ਗੋਪਾਲ ਕ੍ਰਿਸ਼ਨ, ਪਵਨ ਕੁਮਾਰ, ਵਿਨੇ ਕੁਮਾਰ, ਭਗਤ ਸਿੰਘ ਤੇ ਯੋਗੇਸ਼ ਦੇ ਰੂਪ ਵਿਚ ਹੋਈ ਹੈ। ਇਹਨਾਂ ਵਿੱਚੋਂ ਰਾਜੇਸ਼, ਅਸ਼ੋਕ ਅਤੇ ਗੋਪਾਲ ਟਰੰਕਾਂ ਵਾਲੇ ਬਾਜ਼ਾਰ ਵਿਚਲੀ ਬਾਗ ਵਾਲੀ ਗਲੀ ਦੇ ਰਹਿਣ ਵਾਲੇ ਹਨ। ਪਵਨ ਕੁਮਾਰ ਇਸਲਾਮ ਗੰਜ ਦਾ ਰਹਿਣ ਵਾਲਾ ਹੈ ਅਤੇ ਵਿਨੇ ਕੁਮਾਰ ਨਿਊ ਸੰਤ ਨਗਰ ਹੈਬੋਵਾਲ ਦਾ ਵਸਨੀਕ ਹੈ। ਭਗਤ ਸਿੰਘ ਨਵੀਂ ਸਬਜ਼ੀ ਮੰਡੀ ਦੀ ਬੈਕਸਾਇਡ ਤੇ ਪੈਂਦੇ ਮੁਹਲ੍ਲ ਨਾਨਕ ਨਗਰ ਦਾ ਰਹਿਣ ਵਾਲਾ ਹੈ ਜਦਕਿ ਯੁਗੇਸ਼ ਕੁਮਾਰ ਜਲੰਧਰ ਬਾਈਪਾਸ ਨੇੜੇ ਅਸ਼ੋਕ ਨਗਰ ਇਲਾਕੇ ਵਸਨੀਕ ਹੈ। ਫਰਾਰ ਹੋਏ ਦੋਸ਼ੀਆਂ ਦੀ ਪਛਾਣ ਲੰਬੂ, ਮੋਚੀ ਉਰਫ ਵਿੱਕੀ ਤੇ ਬੰਟੀ ਦੇ ਰੂਪ ਵਿਚ ਹੋਈ ਹੈ। ਪੁਲਸ ਨੇ ਸਾਰੇ ਦੋਸ਼ੀਆਂ ਦੇ ਖਿਲਾਫ ਕਾਪੀ ਰਾਈਟ ਐਕਟ ਦੇ ਤਹਿਤ ਮਾਮਲਾ ਦਰਜ ਕੀਤਾ ਹੈ। ਇਹਨਾਂ ਕੋਲੋਂ ਪੁਛਗਿਛ ਜਾਰੀ ਹੈ। ਛੇਤੀ ਹੀ ਇਸ ਮਾਮਲੇ ਵਿੱਚ ਹੋਰ ਕਾਫੀ ਕੁਝ ਸਾਹਮਣੇ ਆਉਣ ਦੀ ਵੀ ਸੰਭਾਵਨਾ ਹੈ।  

Tuesday, May 01, 2012

ਇਨਕ਼ਲਾਬ ਦੀ ਲੋੜ ਬਾਰੇ ਤਿੱਖਾ ਅਹਿਸਾਸ ਕਰਾਉਂਦੀ ਇੱਕ ਅਮਰ ਰਚਨਾ

ਮਾਂ ਧਰਤੀਏ  ਤੇਰੀ ਗੋਦ ਨੂੰ ਚੰਨ ਹੋਰ ਬਥੇਰੇ
ਤੂੰ ਮਘਦਾ ਰਹੀੰ  ਵੇ ਸੂਰਜਾ ਕੰਮੀਆਂ ਦੇ ਵੇਹੜੇ  
ਅੱਜ ਮਈ ਦਿਵਸ ਦੇ ਮੌਕੇ ਤੇ ਅਸੀਂ ਤੁਹਾਡੇ ਸਾਹਮਣੇ ਇੱਕ ਵਾਰ ਫੇਰ ਰੱਖ ਰਹੇ ਹਾਂ ਕਾਮਰੇਡ ਸੰਤ ਰਾਮ ਉਦਾਸੀ ਦੀ ਇੱਕ ਅਮਰ ਰਚਨਾ ਜਿਹੜੀ ਸਮੇਂ ਸਮੇਂ ਦੇ ਨਾਲ ਆਪਣੇ ਅਰਥਾਂ ਅਤੇ ਭਾਵਾਂ ਨੂੰ ਹੋਰ ਗੂਹੜਾ ਕਰ ਰਹੀ ਹੈ. ਸਾਡੇ ਜਹੇ ਸ਼ਬਦਾਂ ਵਿੱਚ ਦਰਸਾਈਆਂ ਗਈਆਂ  ਕੌੜੀਆਂ ਹਕੀਕਤਾਂ ਨੂੰ ਜੇ ਇਨਕ਼ਲਾਬ ਦੇ ਰਸਤੇ 'ਤੇ ਤੁਰ ਰਹੇ ਕਾਫਲਿਆਂ ਚੋਂ  ਕੋਈ ਭੁੱਲਣ ਵੀ ਲੱਗੇ ਤਾਂ ਉਦਾਸੀ ਦੇ ਸ਼ਬਦ ਉਸਨੂੰ ਫਿਰ ਕਾਫਲੇ ਦੀ ਗੰਭੀਰਤਾ ਅਤੇ ਇਮਾਨਦਾਰੀ ਯਾਦ ਕਰਾਉਣ ਦੀ ਸਮਰਥਾ ਰੱਖਦੇ ਹਨ ਕਿਓਂਕਿ ਇਹ ਸ਼ਬਦ ਦਿਲ  ਚੋਂ  ਨਿਕਲੀ ਆਵਾਜ਼ ਵਾਂਗ ਹਨ. ਕੁਰਸੀਆਂ ਦੇ ਲਾਲਚਾਂ ਅਤੇ 
ਹੋਰ ਨਿਜੀ ਫਾਇਦਿਆਂ ਤੋਂ ਨਿਰਲੇਪ ਇਹ ਆਵਾਜ਼ ਲਗਾਤਾਰ ਦੱਬੇ ਕੁਚਲੇ ਵਰਗਾਂ ਦੀ ਦਿਨ ਬਦਿਨ ਨਿਘਰਦੀ ਜਾ ਰਹੀ ਹਾਲਤ ਬਾਰੇ ਇੰਕ਼ਲਾਬੀ ਕਾਫਲਿਆਂ ਨੂੰ ਬਾਰ ਬਾਰ ਯਾਦ ਕਰਾਉਂਦੀ ਰਹੇਗੀ ਕਿ ਮੰਜਿਲਾਂ ਤੋਂ ਪਹਿਲਾਂ ਕੋਈ ਹੋਰ ਮੰਜ਼ਿਲ ਨਹੀਂ ਹੋ ਸਕਦੀ. ਉਦਾਸੀ ਦੇ ਸ਼ਬਦਾਂ ਵਿੱਚ ਅੱਜ ਵੀ ਭਰਮਾਂ ਭੁਲੇਖਿਆਂ ਦੀ ਧੁੰਧ ਨੂੰ ਚੀਰਨ ਦੀ ਸਮਰਥਾ ਮੌਜੂਦ ਹੈ. ਆਜ ਦੇ ਹਾਲਾਤ ਵਿੱਚ ਤੁਹਾਨੂੰ ਇਹ ਗੀਤ ਕਿਵੇਂ ਲੱਗਿਆ ਜ਼ਰੂਰ ਦੱਸਣਾ.-ਰੈਕਟਰ ਕਥੂਰੀਆ 
ਤੁਸੀਂ ਪੂਰੀ ਕਵਿਤਾ ਪੜ੍ਹ ਵੀ ਸਕਦੇ ਹੋ 

ਮਾਂ ਧਰਤੀਏ ਤੇਰੀ ਗੋਦ ਨੂੰ, ਚੰਨ ਹੋਰ ਬਥੇਰੇ,
ਤੂੰ ਮੱਘਦਾ ਰਹੀਂ ਵੇ ਸੂਰਜਾ, ਕੰਮੀਆਂ ਦੇ ਵੇਹਡ਼ੇ!
ਜਿੱਥੇ ਤੰਗ ਨਾ ਸਮਝਣ ਤੰਗੀਆਂ ਨੂੰ,
ਜਿੱਥੇ ਮਿਲਣ ਅੰਗੂਠੇ ਸੰਘੀਆਂ ਨੂੰ,
ਜਿੱਥੇ ਵਾਲ ਤਰਸਦੇ ਕੰਘੀਆਂ ਨੂੰ,
ਅੱਖਾਂ ਸੁੰਨੀਆਂ, ਤੇ ਦੰਦ ਤਰੇਡ਼ੇ,
ਤੂੰ ਮੱਘਦਾ ਰਹੀਂ ਵੇ ਸੂਰਜਾ, ਕੰਮੀਆਂ ਦੇ ਵੇਹਡ਼ੇ!
ਜਿੱਥੇ ਬੰਦਾ ਜੰਮਦਾ ਸੀਰ੍ਹੀ ਹੈ,
ਡੱਕਿਆਂ ਦੀ ਮੀਰੀ-ਪੀਰੀ ਹੈ,
ਜਿੱਥੇ ਕਰਜ਼ੇ ਹੇਠ ਪੰਜ਼ੀਰੀ ਹੈ,
ਬਾਪੂ ਦੇ ਕਰਜ਼ ਦਾ ਸੂਦ ਨੇ ਪੁੱਤ ਜੰਮਦੇ ਘੇਰੇ,
ਤੂੰ ਮੱਘਦਾ ਰਹੀਂ ਵੇ ਸੂਰਜਾ, ਕੰਮੀਆਂ ਦੇ ਵੇਹਡ਼ੇ!
ਜਿੱਥੇ ਹਾਰ ਮੰਨ ਲਈ ਚਾਵਾਂ ਨੇ,
ਜਿੱਥੇ ਕੂੰਜ ਘੇਰ ਲਈ ਕਾਵਾਂ ਨੇ,
ਜਿੱਥੇ ਅਣਵਿਆਈਆਂ ਹੀ ਮਾਵਾਂ ਨੇ,
ਜਿੱਥੇ ਧੀਆਂ ਹੌਕੇ ਲੈਂਦੀਆਂ ਅਸਮਾਨ ਜਡੇਰੇ,
ਮੱਘਦਾ ਰਹੀਂ ਵੇ ਸੂਰਜਾ, ਕੰਮੀਆਂ ਦੇ ਵੇਹਡ਼ੇ!
ਜਿੱਥੇ ਰੋਟੀ ਵਿੱਚ ਮਨ ਘੁੱਟਿਆ ਹੈ,
ਜਿੱਥੇ ਨ੍ਹੇਰਾ ਦੱਬ ਕੇ ਜੁੱਟਿਆ ਹੈ,
ਜਿੱਥੇ ਗ਼ੈਰਤ ਦਾ ਤਗ ਟੁੱਟਿਆ ਹੈ,
ਜਿੱਥੇ ਵੋਟਾਂ ਵਾਲਿਆਂ ਟਟਵੈਰ ਸਹੇਡ਼ੇ
ਮੱਘਦਾ ਰਹੀਂ ਵੇ ਸੂਰਜਾ, ਕੰਮੀਆਂ ਦੇ ਵੇਹਡ਼ੇ!
ਤੂੰ ਆਪਣਾ ਆਪ ਹੀ ਮਚਾਂਦਾ ਹੈਂ,
ਪਰ ਆਪਾ ਹੀ ਰੁਸ਼ਨਾਂਦਾ ਹੈਂ,
ਕਿਉਂ ਕੰਮੀਆਂ ਤੋਂ ਸ਼ਰਮਾਂਦਾ ਹੈਂ
ਇਹ ਸਦਾ ਸਦਾ ਨਾ ਰਹਿਣਗੇ ਮੰਦਹਾਲ ਮਰੇਡ਼ੇ
ਹਾਏ! ਮੱਘਦਾ ਰਹੀਂ ਵੇ ਸੂਰਜਾ, ਕੰਮੀਆਂ ਦੇ ਵੇਹਡ਼ੇ!
ਜਿੱਥੇ ਲੋਕ ਬਡ਼ੇ ਮਜ਼ਬੂਰ ਜਿਹੇ,
ਦਿੱਲੀ ਦੇ ਦਿਲ ਤੋਂ ਦੂਰ ਜਿਹੇ,
ਤੇ ਭੁੱਖਾਂ ਵਿੱਚ ਮਸ਼ਹੂਰ ਜਿਹੇ,
ਭੁੱਖਾਂ ਵਿੱਚ ਮਸ਼ਹੂਰ ਜਿਹੇ,
ਜਿੱਥੇ ਮਰ ਕੇ ਚੰਮ ਲਿਜਾਂਵਦੇ,
ਹਨ ਪੂਜਕ ਤੇਰੇ!
ਮੱਘਦਾ ਰਹੀਂ ਵੇ ਸੂਰਜਾ, ਕੰਮੀਆਂ ਦੇ ਵੇਹਡ਼ੇ!
ਮਾਂ ਧਰਤੀਏੇ ਤੇਰੀ ਗੋਦ ਨੂੰ, ਮਾਂ ਧਰਤੀਏੇ ਤੇਰੀ ਗੋਦ ਨੂੰ,
ਮਾਂ ਧਰਤੀਏ ਤੇਰੀ ਗੋਦ ਨੂੰ, ਚੰਨ ਹੋਰ ਬਥੇਰੇ,
ਤੂੰ ਮੱਘਦਾ ਰਹੀਂ ਵੇ ਸੂਰਜਾ, ਕੰਮੀਆਂ ਦੇ ਵੇਹਡ਼ੇ!

                                                     --ਸੰਤ ਰਾਮ ਉਦਾਸੀ