Showing posts with label Sant Aasa Ram. Show all posts
Showing posts with label Sant Aasa Ram. Show all posts

Friday, June 18, 2021

ਆਸਾਰਾਮ ਨੂੰ ਫਿਰ ਸੁਪਰੀਮ ਕੋਰਟ ਤੋਂ ਲੱਗਿਆ ਵੱਡਾ ਝਟਕਾ

Friday 18th June 2021 at 6:46 PM

ਜ਼ਮਾਨਤ ਦੀ ਸੁਣਵਾਈ ਹੋਈ ਮੁਲਤਵੀ

ਨਵੀਂ ਦਿੱਲੀ: 18 ਜੂਨ 2021: (ਮਨਪ੍ਰੀਤ ਸਿੰਘ ਖਾਲਸਾ//ਪੰਜਾਬ ਸਕਰੀਨ)::
ਜਿਨਸੀ ਸ਼ੋਸ਼ਣ ਦੇ ਕੇਸ ਵਿਚ ਮੌਤ ਹੋਣ ਤਕ ਉਮਰ ਕੈਦ ਦੀ ਸਜ਼ਾ
ਕੱਟ ਰਹੇ ਆਸਾਰਾਮ ਨੂੰ ਜੇਲ੍ਹ ਤੋਂ ਬਾਹਰ ਆਉਣ ਵਾਲੀ ਉਹਨਾਂ ਦੀ ਉਮੀਦ ਨੂੰ ਵੱਡਾ ਝਟਕਾ ਲੱਗਿਆ ਹੈ। ਸੁਪਰੀਮ ਕੋਰਟ ਵਿਚ ਸ਼ੁੱਕਰਵਾਰ ਨੂੰ ਉਸ ਦੀ ਜ਼ਮਾਨਤ ਪਟੀਸ਼ਨ 'ਤੇ ਸੁਣਵਾਈ ਅਗਲੇ ਕੁਝ ਦਿਨਾਂ ਲਈ ਮੁਲਤਵੀ ਕਰ ਦਿੱਤੀ ਗਈ ਹੈ।  ਅੱਜ ਰਾਜ ਸਰਕਾਰ ਨੇ ਉਸ ਨੂੰ ਜ਼ਮਾਨਤ ਦੇਣ ਦਾ ਵਿਰੋਧ ਕੀਤਾ ਸੀ। ਸੁਪਰੀਮ ਕੋਰਟ ਦੇ ਡਿਵੀਜ਼ਨ ਬੈਂਚ ਨੇ ਜੁਲਾਈ ਵਿੱਚ ਗਰਮੀ ਦੀਆਂ ਛੁੱਟੀਆਂ ਤੋਂ ਬਾਅਦ ਮਾਮਲੇ ਦੀ ਸੁਣਵਾਈ ਕਰਨ ਦਾ ਫੈਸਲਾ ਕੀਤਾ ਹੈ।
ਇਥੇ ਜ਼ਿਕਰਯੋਗ ਹੈ ਕਿ ਆਸਾਰਾਮ ਵੱਲੋਂ ਸੁਪਰੀਮ ਕੋਰਟ ਵਿੱਚ ਪੇਸ਼ ਕੀਤੀ ਅੰਤ੍ਰਿਮ ਜ਼ਮਾਨਤ ਪਟੀਸ਼ਨ ‘ਤੇ ਸ਼ੁੱਕਰਵਾਰ ਨੂੰ ਜਸਟਿਸ ਇੰਦਰਾ ਬੈਨਰਜੀ ਅਤੇ ਜਸਟਿਸ ਮੁਕੇਸ਼ ਕੁਮਾਰ ਸ਼ਾਹ ਦੀ ਡਿਵੀਜ਼ਨ ਬੈਂਚ ਕੋਲ ਸੁਣਵਾਈ ਹੋਈ ਸੀ। ਸੁਣਵਾਈ ਸ਼ੁਰੂ ਹੁੰਦੇ ਸਾਰ ਹੀ ਜੱਜ ਸ਼ਾਹ ਨੇ ਆਸਾਰਾਮ ਦੇ ਵਕੀਲ ਸਿਧਾਰਥ ਲੂਥਰਾ ਨੂੰ ਕਿਹਾ ਕਿ ਤੁਸੀਂ ਪਿਛਲੀ ਸੁਣਵਾਈ ਵਿੱਚ ਪੇਸ਼ ਨਹੀਂ ਹੋਏ। ਤੁਹਾਡੇ ਲਈ ਸੁਪਰੀਮ ਕੋਰਟ ਦੀ ਸੁਣਵਾਈ ਨੂੰ ਛੱਡ ਕੇ ਕੋਲਕਾਤਾ ਹਾਈ ਕੋਰਟ ਵਿਚ ਜਾਣਾ ਮਹੱਤਵਪੂਰਨ ਸੀ, ਸੁਪਰੀਮ ਕੋਰਟ ਅੰਦਰ ਮੌਜੂਦਗੀ ਤੁਹਾਡੇ ਲਈ ਪਹਿਲੀ ਤਰਜੀਹ ਹੋਣੀ ਚਾਹੀਦੀ ਹੈ।  
ਇਸ ਤੋਂ ਬਾਅਦ ਲੂਥਰਾ ਨੇ ਕਿਹਾ ਕਿ ਆਸਾਰਾਮ ਦੀ ਸਿਹਤ ਬਹੁਤ ਖਰਾਬ ਹੈ ਅਤੇ ਉਹ ਹਸਪਤਾਲ ਵਿਚ ਦਾਖਲ ਹਨ।  ਅਜਿਹੀ ਸਥਿਤੀ ਵਿੱਚ ਸੁਣਵਾਈ ਅਗਲੇ ਹਫ਼ਤੇ ਤੱਕ ਮੁਲਤਵੀ ਕੀਤੀ ਜਾਣੀ ਚਾਹੀਦੀ ਹੈ।  ਮੈਂ ਉਸਦੀ ਮੈਡੀਕਲ ਰਿਪੋਰਟ ਮੰਗੀ ਹੈ।  ਰਾਜ ਸਰਕਾਰ ਨੂੰ ਵੀ ਆਪਣੀ ਨਵੀਂ ਡਾਕਟਰੀ ਰਿਪੋਰਟ ਪੇਸ਼ ਕਰਨੀ ਚਾਹੀਦੀ ਹੈ।
ਦੂਜੇ ਪਾਸੇ ਰਾਜ ਸਰਕਾਰ ਦੇ ਵਕੀਲ ਡਾ: ਮਨੀਸ਼ ਸਿੰਘਵੀ ਨੇ ਕਿਹਾ ਕਿ ਆਸਾਰਾਮ ਦੀ ਜ਼ਮਾਨਤ ਪਟੀਸ਼ਨ ਹੁਣ ਅਰਥਹੀਣ ਹੈ। ਉਹ ਹਸਪਤਾਲ ਵਿੱਚ ਭਰਤੀ ਹੈ ਅਤੇ ਗੰਭੀਰ ਹੈ।  ਅਜਿਹੀ ਸਥਿਤੀ ਵਿੱਚ, ਉਸਨੂੰ ਆਯੁਰਵੈਦ ਨਾਲ ਇਲਾਜ ਲਈ ਉਤਰਾਖੰਡ ਭੇਜਿਆ ਜਾਣਾ ਸੰਭਵ ਨਹੀਂ ਹੋਵੇਗਾ।  ਉਨ੍ਹਾਂ ਕਿਹਾ ਕਿ ਤਾਜ਼ਾ ਸਥਿਤੀ ਦੇ ਮੱਦੇਨਜ਼ਰ ਆਸਾਰਾਮ ਨੂੰ ਇੱਕ ਵਾਰ ਫਿਰ ਹਾਈ ਕੋਰਟ ਵਿੱਚ ਜ਼ਮਾਨਤ ਦੀ ਅਰਜ਼ੀ ਦਾਇਰ ਕਰਨੀ ਚਾਹੀਦੀ ਹੈ।
ਇਸ ਤੋਂ ਬਾਅਦ ਜੱਜ ਸ਼ਾਹ ਨੇ ਲੂਥਰਾ ਨੂੰ ਪੁੱਛਿਆ ਕਿ ਕੀ ਤੁਸੀਂ ਆਪਣੀ ਪਟੀਸ਼ਨ ਵਾਪਸ ਲੈ ਰਹੇ ਹੋ?  ਤੁਹਾਡੇ ਲਈ ਉੱਚਿਤ ਹੋਵੇਗਾ ਕਿ ਤੁਸੀਂ ਹਾਈ ਕੋਰਟ ਵਿਚ ਨਵੀਂ ਪਟੀਸ਼ਨ ਦਾਇਰ ਕਰੋ । ਇਸ 'ਤੇ ਲੂਥਰਾ ਨੇ ਕਿਹਾ ਕਿ ਉਹ ਇਸ ਆਧਾਰ' ਤੇ ਹਾਈ ਕੋਰਟ ਗਏ ਸਨ, ਪਰ ਸਾਡੀ ਪਟੀਸ਼ਨ ਰੱਦ ਕਰ ਦਿੱਤੀ ਗਈ।  ਇਸ ਦੇ ਨਾਲ ਜਸਟਿਸ ਇੰਦਰਾ ਬੈਨਰਜੀ ਨੇ ਸੁਣਵਾਈ ਮੁਲਤਵੀ ਕਰ ਦਿੱਤੀ ਅਤੇ ਕਿਹਾ ਕਿ ਗਰਮੀਆਂ ਦੀਆਂ ਛੁੱਟੀਆਂ ਤੋਂ ਬਾਅਦ ਇਸ ਮਾਮਲੇ ਦੀ ਸੁਣਵਾਈ ਕੀਤੀ ਜਾਏਗੀ।
ਇਸੇ ਦੌਰਾਨ ਆਸਾਰਾਮ ਆਸ਼ਰਮ ਵੱਲੋਂ ਆਪਣੀ ਵੈਬਸਾਈਟ ਤੇ ਕਿਹਾ ਗਿਆ ਹੈ ਕਿ ਉਹਨਾਂ ਦੇ ਪੈਰੋਕਾਰ ਉਹਨਾਂ ਦੀ ਜਲਦੀ ਰਿਹੈ ਅਤੇ ਜ਼ੰਦਰੁਸਤੀ ਲਈ ਜਪ ਪ੍ਰਾਰਥਨਾ ਸੰਕਲਪ ਜ਼ਰੂਰ ਕਰਨ। ਆਸ਼ਰਮ ਨੇ ਆਪਣੇ ਪ੍ਰਚਾਰ ਪ੍ਰਸਾਰ ਦੀਆਂ ਸਰਗਰਮੀਆਂ ਹੋਰ ਵਧ ਦਿੱਤੀਆਂ ਹਨ. ਵਟਸਐਪ ਅਤੇ ਟੈਲੀਗ੍ਰਾਮ ਵਰਗੇ ਸੰਚਾਰ ਮਾਧਿਅਮਾਂ ਤੇ ਬਣਾਏ ਗਰੁੱਪਾਂ ਨੂੰ ਵੀ ਸਰਗਰਮ ਕੀਤਾ ਗਿਆ ਹੈ। 
ਆਸ਼ਰਮ ਦਾ ਇਹ ਵੀ ਕਹਿਣਾ ਹੈ ਕਿ ਵੈਕੇਸ਼ਨ ਬੈਂਚ ਜੂਨ ਦੇ ਅਖੀਰ ਤਕ ਰਹੇਗੀ ਇਸ ਲਈ ਦੀ ਤਾਰੀਖ ਬਾਅਦ ਵਿੱਚ ਹੀ ਪਤਾ ਲੱਗੇਗੀ। 

Wednesday, September 18, 2013

ਜਾਗ ਮਨ ਜਾਗਣ ਦਾ ਵੇਲਾ//Kulwnt Singh Dhesi

ਨਾ ਚੋਰਾਂ ਕੋਲੋਂ ਤੇ ਨਾ ਹਥਿਆਰਾਂ ਤੋਂ ਡਰ ਲੱਗਦਾ ਹੈ;             -ਕੁਲਵੰਤ ਸਿੰਘ ਢੇਸੀ 
ਏਥੋਂ ਦੇ ਲੋਕਾਂ ਨੂੰ  ਪਹਿਰੇਦਾਰਾਂ ਤੋਂ ਡਰ ਲੱਗਦਾ ਹੈ !            
*ਸਾਧ  ਰਲ ਗਏ ਚੋਰਾਂ ਨਾਲ ਤੇ ਕੁੱਤੀ ਵੀ ਰਲ ਗਈ 
*ਇੰਡੀਆ ਸ਼ਾਈਨ ਦਾ ਨ੍ਹੇਰਾ ਜੱਗ ਜਾਹਰ ਹੋਣ  ਲੱਗਾ  
*ਆਓ ਦੋਸਤੋ ਗਿਆਨ ਦੀ ਮਿਸ਼ਾਲ ਬਾਲੀਏ
ਹਿੰਦੋਸਤਾਨ ਦਾ ਇੱਕ ਮਹਾਨ ‘ਧਰਮ ਉਪਦੇਸ਼ਕ’ ਬਾਪੂ ਆਸਾ ਰਾਮ ਕਾਨੂੰਨ ਦੇ ਸ਼ਿਕੰਜੇ ਵਿਚ ਫਸਦਾ ਨਜ਼ਰ ਆ ਰਿਹਾ ਹੈ ਪਰ ਅਜੇ ਵੀ ਕੁੱਤੀ ਦਾ ਚੋਰਾਂ ਨਾਲ ਰਲ ਜਾਣ ਦਾ ਸੰਦੇਹ ਬਰਾਬਰ ਬਣਿਆ ਹੋਇਆ ਹੈ। ਭਾਰਤ ਵਰਗੇ ਦੇਸ਼ ਵਿਚ ਜਿਸ ਵੀ ਵਿਅਕਤੀ ਕੋਲ ਅੰਨ੍ਹਾ ਪੈਸਾ ਅਤੇ ਚਾਰ ਲੱਠ ਮਾਰ ਹਨ ਉਹਨਾਂ ਦੇ ਚਰਨਾਂ ਤੇ ਰਾਜਨੀਤੀ ਅਤੇ ਪੁਲਸ ਪ੍ਰਸ਼ਾਂਸਨ ਸਲਾਮਾਂ ਕਰਨ ਲੱਗ ਪੈਂਦਾ ਹੈ। ਆਸਾ ਰਾਮ ਜੋ ਕਦੀ ਅਜਮੇਰ ਦੇ ਸਟੇਸ਼ਨ ਤੇ ਟਾਂਗਾ ਚਲਾਉਂਦਾ ਸੀ ਅੱਜ ਉਸ ਦੇ 400 ਆਸ਼ਰਮ ਦੇਸ਼ ਭਰ ਵਿਚ ਹਨ ਅਤੇ ਉਸ ਨੇ ਅਰਬਾਂ ਦੀ ਜਾਇਦਾਦ ਜਬਰੀ ਮੱਲੀ ਹੋਈ ਦੱਸੀ ਜਾਂਦੀ ਹੈ। ਅੋਰਤਾਂ ਦੇ ਸ਼ਰੀਰਕ ਸ਼ੋਸ਼ਣ ਦੇ ਨਾਲ ਨਾਲ ਇੱਕ ਤੋਂ ਬਾਅਦ ਇੱਕ ਉਸ ਦੇ ਸਕੈਂਡਲਾਂ ਦੀਆਂ ਨਿੱਤ ਸੁਰਖੀਆਂ ਭਾਰਤੀ ਅਖਬਾਰਾਂ ਵਿਚ ਚਮਕਦੀਆਂ ਹਨ। ਆਸਾ ਰਾਮ ਵਰਗੇ ਸਾਧਾਂ ਦੇ ਜ਼ੁਲਮਾਂ ਦਾ ਸ਼ਿਕਾਰ ਅਕਸਰ ਹੀ ਉਹਨਾਂ ਦੇ ਆਪਣੇ ਅੰਨ੍ਹੇ ਭਗਤਾਂ ਦੇ ਪਰਿਵਾਰ ਹੀ ਹੁੰਦੇ ਹਨ। ਹੁਣ ਵੀ ਜਿਸ ਸੋਲਾਂ ਸਾਲਾਂ ਦੀ ਬੱਚੀ ਦੇ ਪਰਿਵਾਰ ਨੇ ਆਸਾ ਰਾਮ ਤੇ ਯੌਨ ਸ਼ੋਸ਼ਣ ਦੇ ਦੋਸ਼ ਲਾਏ ਹਨ ਉਹ ਵੀ ਆਸਾ ਰਾਮ ਦਾ ਭਗਤ ਪਰਿਵਾਰ ਹੀ ਸੀ। ਇਸ ਬੱਚੀ ਦੀ ਆਪ ਬੀਤੀ ਬਾਰੇ ਜੋ ਬਿਆਨ ਅਖਬਾਰਾਂ ਵਿਚ ਛਪੇ ਹਨ ਉਹਨਾਂ ਵਿਚੋਂ ਟੂਕ ਮਾਤਰ ਹੀ ਅਸੀਂ ਇਥੇ ਦੇ ਰਹੇ ਹਾਂ ਤਾਂ ਕਿ ਪਾਠਕਾਂ ਨੂੰ ਪੀੜਤ ਬੱਚੀ ਦੇ ਦੁਖਾਂਤ ਦਾ ਕੁਝ ਅਹਿਸਾਸ ਹੋ ਸਕੇ—
-----ਮੈਨੂੰ ਉਸ ਦੇ ਕਮਰੇ ਦੇ ਮਗਰਲੇ ਦਰਵਾਜ਼ੇ ਰਾਹੀਂ ਅੰਦਰ ਵਾੜ ਕੇ ਰੌਸ਼ਨੀ ਬੁਝਾ ਦਿੱਤੀ ਗਈ---ਅੰਦਰੋਂ ਕੁੰਡੀ ਲਾ ਕੇ ਉਸ ਨੇ ਮੇਰੇ ਸ਼ਰੀਰ ਨਾਲ ਗੰਦੀਆਂ ਹਰਕਤਾਂ ਕਰਨੀਆਂ ਸ਼ੁਰੂ ਕਰ ਦਿੱਤੀਆਂ----ਜਦੋਂ ਮੈਂ ਵਧੇਰੇ ਰੌਲਾ ਪਾਇਆ ਤਾਂ ਉਸ ਨੇ ਮੇਰੇ ਪਿਤਾ ਜੀ ਅਤੇ ਪਰਿਵਾਰ ਨੂੰ ਕਤਲ ਕਰਨ ਦਾ ਡਰਾਵਾ ਦੇ ਕੇ ਮੇਰਾ ਮੂੰਹ ਬੰਦ ਕਰ ਦਿੱਤਾ। ਉਸ ਨੇ ਮੇਰੇ ਸ਼ਰੀਰ ਨਾਲ ਦੁਸ਼ਟ ਕਰਮ ਕਰਨੇ ਸ਼ੁਰੂ ਕਰ ਦਿੱਤੇ ਅਤੇ ਮੈਨੂੰ ਓਰਲ ਸੈਕਸ (ਮੂੰਹ ਨਾਲ ਸੈਕਸ) ਕਰਨ ਲਈ ਕਹਿਣ ਲੱਗਾ----ਉਹ ਖੁਦ ਨਿਰਵਸਤਰ ਸੀ ਅਤੇ ਮੈਨੂੰ ਵੀ ਜ਼ਬਰਦਸਤੀ ਨਿਰਵਸਤਰ ਕਰਨ ਲੱਗ ਪਿਆ---ਮੈਂ ਚੀਕਦੀ ਕੁਰਲਾਂਦੀ ਰਹੀ ਅਤੇ ਉਸ ਨੇ ਮੇਰਾ ਮੂੰਹ ਜਬਰੀ ਬੰਦ ਕਰ ਦਿੱਤਾ----ਜਦੋਂ ਮੈਂ ਕਮਰੇ ਵਿਚੋਂ ਬਾਹਰ ਆ ਰਹੀ ਸਾਂ ਤਾਂ ਉਸ ਨੇ ਮੈਨੂੰ ਫਿਰ ਧਮਕੀ ਦਿੱਤੀ ਕਿ ਜੇਕਰ ਮੈਂ ਇਹ ਗੱਲ ਕਿਸੇ ਨੂੰ ਦੱਸੀ ਤਾ ਨਤੀਜੇ ਭੁਗਤਣ ਲਈ ਤਿਆਰ ਰਹਾਂ ----- 
ਇਹ ਇੱਕ ਬੱਚੀ ਤੇ ਹੋਏ ਜ਼ੁਲਮ ਦੀ ਅਧੂਰੀ ਕਹਾਣੀ ਹੈ ਪਰ ਆਸਾ ਰਾਮ ਅਤੇ ਉਸ ਦੇ ਚੇਲਿਆਂ ਨੇ ਕਿੰਨੀਆਂ ਮਾਸੂਮ ਜਿੰਦਾਂ ਨਾਲ ਖੇਡ ਕੇ ਉਹਨਾਂ ਦੀਆਂ ਜ਼ੁਬਾਨਾਂ ਧਮਕੀਆਂ ਅਤੇ ਲਾਲਚਾਂ ਨਾਲ ਬੰਦ ਕੀਤੀਆਂ ਹੋਣਗੀਆਂ ਉਹਨਾਂ ਦਾ ਅੰਦਾਜ਼ਾ ਲਗਾਉਣਾਂ ਮੁਸ਼ਕਲ ਹੈ। ਉਸ ਦੇ ਇੱਕ ਸਾਬਕਾ ਮੈਨੇਜਰ ਨੇ ਹਜ਼ਾਰ ਔਰਤਾਂ ਨਾਲ ਆਸਾ ਰਾਮ ਦੇ ਸਬੰਧਾਂ ਬਾਰੇ ਪੁਲਸ ਨੂੰ ਬਿਆਨ ਦਿੱਤੇ ਹਨ ਜਿਸ ਦੇ ਸਬੂਤ ਵਜੋਂ ਉਸ ਨੇ ਕਿਸੇ ਸੀ ਡੀ ਦਾ ਜ਼ਿਕਰ ਵੀ ਕੀਤਾ ਹੈ। ਆਸਾ ਰਾਮ ਨੇ ਬਹੁਤੇ ਡੇਰਿਆਂ ਅਤੇ ਜਮੀਨਾਂ ਤੇ ਜਬਰੀ ਕਬਜੇ ਕੀਤੇ ਹੋਏ ਹਨ ਹਨ ਜਿਹਨਾਂ ਬਾਰੇ ਰੋਜ਼ਾਨਾਂ ਖਬਰਾਂ ਲੱਗਦੀਆਂ ਹਨ। ਕਿਹਾ ਜਾਂਦਾ ਹੈ ਕਿ ਮੱਧ ਪ੍ਰਦੇਸ਼ ਦੇ ਇੱਕ ਡੇਰੇ ਵਿਚ ਉਸ ਨੇ 700 ਕਰੋੜ ਰੁਪਏ ਦੀ ਜਾਇਦਾਦ ਹੜੱਪ ਕੀਤੀ ਹੋਈ ਹੈ।
ਭਾਰਤ ਦੇ ਲੋਕ ਅਜੇਹੇ ਸੰਤਾਂ ਨੂੰ ਪ੍ਰਮਾਤਮਾਂ ਦੇ ਸਾਖਸ਼ਾਤ ਰੂਪ ਵਜੋਂ ਪੂਜਦੇ ਹਨ ਅਤੇ ਰਾਜਨੀਤਕ ਆਗੂ ਅਤੇ ਪੁਲਸ ਪ੍ਰਸ਼ਾਂਸਨ ਤਾਂ ਇਹਨਾਂ ਦੇ ਕਦਮਾਂ ਤੇ ਲਿਟਦੇ ਹਨ। ਇਹ ਹੀ ਕਾਰਨ ਹੈ ਕਿ ਹਾਰੀ ਸਾਰੀ ਇਹਨਾਂ ਨੂੰ ਨੱਥ ਨਹੀਂ ਪਾ ਸਕਦੀ। ਵੱਡੇ ਸਿੱਤਮ ਦੀ ਗੱਲ ਇਹ ਹੈ ਕਿ ਆਪਣੇ ਵੋਟ ਬੈਂਕ ਦੀ ਪੂਰਤੀ  ਲਈ ਰਾਜਨੀਤਕ ਪਾਰਟੀਆਂ ਅਜੇਹੇ ਸਾਧਾਂ ਨੂੰ ਬੋਚਣ ਲਈ ਸ਼ਹਿ ਲਾਈ ਰੱਖਦੀਆਂ ਹਨ ਅਤੇ ਜਦੋਂ ਕਿਧਰੇ ਕਿਸੇ ਅਜੇਹੇ ਸਾਧ ਦਾ ਕੋਈ ਪਾਪ ਜੱਗ ਜਾਹਰ ਹੋ ਜਾਵੇ ਤਾਂ ਪੁਲਸ, ਪ੍ਰਸ਼ਾਸਨ ਅਤੇ ਆਗੂ ਲੋਕ ਉਸ ਦੀ ਰੱਖਿਆ ਤੇ ਆ ਖੜ੍ਹਦੇ ਹਨ। 
ਆਸਾ ਰਾਮ ਦੀਆਂ ਸੁਰਖੀਆਂ ਦੇ ਨਾਲ ਨਾਲ ਹੀ ਭਾਰਤੀ ਰੁਪਏ ਦੇ ਚੌਫਾਲ ਪਤਾਲ ਤਕ ਜਾ ਡਿੱਗਣ ਦੀਆਂ ਖਬਰਾਂ ਨੇ ਵੀ ਦੁਨੀਆਂ ਨੂੰ ਹੈਰਾਨ ਕਰ ਦਿੱਤਾ ਹੈ। ਅਜੇ ਦੋ ਵਰੇ ਪਹਿਲਾਂ ਹੀ ਭਾਰਤੀ ਅਰਥ ਸ਼ਾਸਤਰੀ ਦੋ ਅੰਕੜਿਆਂ ਦੀ ਆਰਥਕ ਬੜੌਤਰੀ ਬਾਰੇ ਉਚੀ ਸੁਰ ਵਿਚ ਬੋਲ ਰਹੇ ਸਨ ਅਤੇ ਭਾਰਤ ਦੇ ਆਰਥਕ ਕਰਿਸ਼ਮੇ ਅਤੇ ਚਮਕ ਦਮਕ ਦੀਆਂ ਫੜਾਂ ਮਾਰੀਆਂ ਜਾ ਰਹੀਆਂ ਸਨ, ਪਰ ਅਚਾਨਕ ਹੀ ਸਭ ਗੜਬੜ ਹੋ ਗਿਆ। ਕਈ ਵਿਚਾਰਵਾਨ ਇਸ ਗਿਰਾਵਟ ਨੂੰ ਡਾ:
ਮਨਮੋਹਨ ਸਿੰਘ ਦੀਆਂ 1991 ਵਾਲੀਆਂ ਸੰਸਾਰੀਕਰਨ ਅਤੇ ਉਦਾਰੀਕਰਨ ਦੀਆਂ ਨੀਤੀਆਂ ਦਾ ਨਤੀਜਾ ਦਸਦੇ ਸਨ ਜਦ ਕਿ ਕੁਝ ਹੋਰ ਲੋਕ ਭਾਰਤੀ ਆਰਥਕ ਗਿਰਾਵਟ ਨੂੰ ਦੇਸ਼ ਦੇ ਭ੍ਰਿਸ਼ਟਾਚਾਰ ਨਾਲ ਜੋੜਦੇ ਹਨ। ਇਹ ਸਮਝਿਆ ਜਾ ਰਿਹਾ ਹੈ ਕਿ ਦਿਨੋ ਦਿਨ ਵਧਦੇ ਭ੍ਰਿਸ਼ਟਾਚਾਰ ਕਾਰਨ ਭਾਰਤ ਵਿਕਾਸ ਦੇ ਟੀਚਿਆਂ ਤੋਂ ਪਛੜਦਾ ਜਾ ਰਿਹਾ ਹੋਣ ਕਾਰਨ ਬਾਹਰਲੇ ਨਿਵੇਸ਼ਕਾਂ ਨੇ ਆਪਣੇ ਆਪ ਨੂੰ ਸੰਕੋਚ ਲਿਆ ਹੈ ਅਤੇ ਹੁਣ ਕੋਈ ਵੀ ਭਾਰਤੀ ਅਰਥਚਾਰੇ ਨਾਲ ਆਪਣੀ ਕਿਸਮਤ ਨੂੰ ਜੋੜ ਕੇ ਖਤਰੇ ਵਿਚ ਨਹੀਂ ਪੈਣਾਂ ਚਾਹੁੰਦਾ। ਕਾਰਨ ਕੁਝ ਵੀ ਹੋਣ ਜਦੋਂ ਵੀ ਕਿਸੇ ਦੇਸ ਵਿਚ ਭ੍ਰਿਸ਼ਟਾਚਾਰ ਅਤੇ ਮੰਦਵਾੜਾ ਵਧਦਾ ਹੈ ਤਾਂ ਉਸ ਦੇ ਨਾਲ ਹੀ ਅਮਨ ਕਾਨੂੰਨ ਅਤੇ ਫਿਰਕੂ ਅਮਲ ਵੀ ਪ੍ਰਭਾਵਤ ਹੋਣ ਲੱਗਦੇ ਹਨ ਅਤੇ ਇਹਨਾ ਅਮਲਾਂ ਨੇ ਘੱਟ ਗਿਣਤੀਆਂ ਤੇ ਵਧੇਰੇ ਅਸਰ ਅੰਦਾਜ਼ ਹੋਣਾਂ ਹੁੰਦਾ ਹੈ।
Courtesy  Photo 
ਡੇਰਾਵਾਦ, ਭ੍ਰਿਸ਼ਟਾਚਾਰ ਅਤੇ ਫਿਰਕਾਪ੍ਰਸਤੀ ਭਾਰਤ ਵਰਗੇ ਦੇਸ਼ ਦੇ ਲੋਕਾਂ ਦੇ ਜਨ ਜੀਵਨ ਦਾ ਨਾਸੂਰ ਬਣ ਕੇ ਰਹਿ ਗਏ ਹਨ ਅਤੇ ਘੱਟ ਗਿਣਤੀ ਸਿੱਖਾਂ, ਮੁਸਲਮਾਨਾਂ, ਇਸਾਈਆਂ, ਦਲਿਤਾਂ ਅਤੇ ਗਰੀਬਾਂ ਨੂੰ ਇਹਨਾਂ ਦੇ ਵਧੇਰੇ ਡੰਗ ਵੱਜਦੇ ਹਨ। ਜਿਥੋਂ ਤਕ ਡੇਰਾਵਾਦ ਦਾ ਸਵਾਲ ਹੈ ਉਸ ਦੇ ਸਬੰਧ ਵਿਚ ਇਸ ਸਚਾਈ ਤੋਂ ਅਸੀਂ ਸਾਰੇ ਹੀ ਵਾਕਿਫ ਹਾਂ ਕਿ ਇੱਕ ਨਹੀਂ ਸਗੋਂ ਅਨੇਕਾਂ ਸਾਧਾਂ ਦੇ ਸੈਕਸ ਅਤੇ ਮਾਰਧਾੜ ਦੇ ਸਕੈਂਡਲ ਸਮੇਂ ਸਮੇਂ ਅਖਬਾਰਾਂ ਦੀਆਂ ਸੁਰਖੀਆਂ ਬਣਦੇ ਹਨ ਪਰ ਅਫਸਰਸ਼ਾਹੀ ਅਤੇ ਪੁਲਸ ਪ੍ਰਸ਼ਾਸਨ ਇਹਨਾਂ ਅਖੋਤੀ ਸਾਧਾਂ ਦਾ ਪਾਣੀ ਭਰਦੇ ਹੋਣ ਕਾਰਨ ਇਹਨਾਂ ਦਾ ਵਾਲ ਵੀ ਵਿੰਗਾ ਨਹੀਂ ਹੁੰਦਾ। ਫਿਰਕਾਪ੍ਰਸਤੀ ਅਤੇ ਭ੍ਰਿਸ਼ਟਾਚਾਰ ਤਾਂ ਵੈਸੇ ਵੀ ਜੀਵਨ ਨੂੰ ਬੁਰੀ ਤਰਾਂ ਪ੍ਰਦੂਸ਼ਤ ਅਤੇ ਅਪਾਹਜ ਕਰਦੇ ਹੋਣ ਕਾਰਨ ਇਹਨਾ ਤੋਂ ਸਮਾਜ ਨੂੰ ਬਚਾਉਣਾਂ ਹੀ ਸਰਬਤ ਦਾ ਭਲਾ ਹੈ। ਹਰ ਸਿੱਖ ਆਪਣੇ ਦੋ ਵੇਲੇ ਦੀ ਅਰਦਾਸ ਵਿਚ ਸਰਬਤ ਦਾ ਭਲਾ ਮੰਗਦਾ ਹੈ ਇਸ ਕਾਰਨ ਹਰ ਇੱਕ ਸਿੱਖ ਦਾ ਇਹ ਆਹਲਾ ਫਰਜ਼ ਬਣਦਾ ਹੈ ਕਿ ਹਨੇਰੇ ਨਾਲ ਲੜਨ ਲਈ ਗਿਆਨ ਦੀ ਮਿਸ਼ਾਲ ਬਾਲ ਕੇ ਆਪਣੇ ਚੌਫੇਰੇ ਨੂੰ ਰੌਸ਼ਨ ਕਰਨ ਲਈ ਆਪਣਾਂ ਯੋਗਦਾਨ ਪਾਵੇ। 

Wednesday, September 04, 2013

ਬਾਬੇ, ਬਲਾਤਕਾਰ ਅਤੇ ਅਸੀਂ

ਬਾਬੇ ਕਾਮ ਦੇ ਜਹਾਜ਼ੇ ਚੜ੍ਹ ਗਏ
ਨਾਮ ਦਾ ਜਹਾਜ਼ ਛੱਡ ਕੇ...!
ਜਗਸੀਰ ਜੀਦਾ 
ਭਾਰਤ ਦੇ ਇੱਕ ਆਸ਼ਰਮ ਵਿੱਚ ਬਲਾਤਕਾਰ ਦੀ ਘਟਨਾ ਤੋਂ ਬਾਅਦ ਭਾਵੇਂ ਸਮਾਜ ਵਿੱਚ ਅਜੇ ਤੱਕ ਉਹ ਉਬਾਲ ਨਹੀਂ ਉੱਠਿਆ ਜਿਹੜਾ ਦਾਮਿਨੀ ਵੇਲੇ  ਪੂਰੇ ਦੇਸ਼ ਵਿੱਚ ਉਠ ਖਲੋਤਾ ਸੀ ਪਰ ਸੋਸ਼ਲ ਮੀਡੀਆ ਦੇ ਮੰਚ ਤੇ ਇਸਦੀ ਚਰਚਾ ਪੂਰੀ ਤਰ੍ਹਾ ਸਰਗਰਮ ਹੈ। ਪੰਜਾਬ ਦੇ ਉਘੇ ਲੋਕ ਪੱਖੀ ਸ਼ਾਇਰ Jagsir Jeeda ਜਗਸੀਰ ਜੀਦਾ ਨੇ ਆਪਣੀ ਜਾਣੀ ਪਛਾਣੀ ਵਿਅੰਗਮਈ ਕਾਵਿਕ ਸ਼ੈਲੀ ਵਿੱਚ ਆਖਿਆ ਹੈ: 
ਬਾਬਾ ਜਹਾਜ਼ ਤੇ ਤਰੀਕਾਂ ਭੁਗਤੂ..! 
ਨਾਮ ਦਾ ਜਹਾਜ਼ ਛੱਡ ਕੇ....!!
ਕੇਹਰ ਸ਼ਰੀਫ਼ 
ਏਸੇ ਸਬੰਧ ਵਿੱਚ ਜੀਦਾ ਹੁਰਾਂ ਦੀਆਂ ਦੋ ਸਤਰਾਂ ਹੋਰ--
.....ਮੇਰੇ ਦੇਸ਼ ਦੇ ਬਲਾਤਕਾਰੀ ਬਾਬੇ. ..! 
ਮੋਹ-ਮਾਇਆ ਵਿੱਚ "ਧਸ" ਗਏ..... !"
ਤੁਹਾਨੂੰ ਯਾਦ ਹੋਵੇਗਾ ਜਦੋਂ ਅਕਾਲੀ ਦਲ ਨੇ ਗੋਆ ਵਿੱਚ ਜਾ ਕੇ ਆਪਣਾ ਚਿੰਤਨ ਕੈਂਪ ਲਾਇਆ ਸੀ ਤਾਂ ਉਦੋਂ ਵੀ ਜਗਸੀਰ ਜੀਦਾ ਨੇ ਬੜੀ ਹੀ ਸਾਦਗੀ ਨਾਲ ਇੱਕ ਕਮਿਊਨਿਸਟ ਸਟੇਜ ਤੋਂ ਆਖਿਆ ਸੀ---
ਸਾਡੇ ਗੁਰਾਂ ਨੇ ਜਹਾਜ਼ ਬਣਾਇਆ...!
ਚਲੋ ਜੇ ਕਿਸੇ ਗੋਆ ਚੱਲਣਾ।...!!
ਇਹ ਸਤਰਾਂ ਸੁਣਦਿਆਂ ਸਾਰ ਹੀ ਉਸ ਗੰਭੀਰ ਰੈਲੀ ਵਿੱਚ ਵੀ ਇੱਕ ਹਾਸਾ ਜਿਹਾ ਛਨਕ ਪਿਆ...! ਹੁਣ ਬਲਾਤਕਾਰ ਦੇ ਮਾਮਲੇ ਵਿੱਚ ਇੱਕ ਪ੍ਰਸਿਧ ਬਾਬੇ ਖਿਲਾਫ਼ ਚੱਲ ਰਹੀ ਕਾਨੂੰਨ ਦੀ ਕਾਰਵਾਈ ਵੱਲ ਇਸ਼ਾਰਾ ਕਰਦਿਆਂ ਜੀਦਾ ਹੁਰਾਂ ਨਵੀਂ ਰਚਨਾ ਲਿਖੀ--
ਬਾਬਾ ਜਹਾਜ਼ ਤੇ ਤਰੀਕਾਂ ਭੁਗਤੂ...!
ਨਾਮ ਦਾ ਜਹਾਜ਼ ਛੱਡ ਕੇ....!! ਇਹ ਸਤਰਾਂ ਵੀ ਬਹੁਤ ਹਰਮਨ ਪਿਆਰਿਆਂ ਹੋ ਰਹੀਆਂ ਹਨ...ਅਤੇ ਚਰਚਾ ਵਿੱਚ ਵੀ ਹਨ...! ਲੋਕ ਗੱਲਬਾਤ ਦੌਰਾਨ ਇਹਨਾਂ ਟੂਕਾਂ ਦਾ ਹਵਾਲਾ ਦੇ ਰਹੇ ਹਨ...
ਇਹਨਾਂ ਸਤਰਾਂ ਤੇ ਆਪਣੀ ਟਿੱਪਣੀ ਪੋਸਟ ਕਰਦਿਆਂ ਜਨਾਬ ਕੇਹਰ ਸ਼ਰੀਫ਼ ਆਖਦੇ ਨੇ:
ਬਾਬੇ ਕਾਮ ਦੇ ਜਹਾਜ਼ੇ ਚੜ੍ਹ ਗਏ 
ਨਾਮ ਦਾ ਜਹਾਜ਼ ਛੱਡ ਕੇ! 
ਕਰਮਜੀਤ ਕੌਰ ਵੱਲੋਂ ਵੀ ਪੂਰੇ ਸਮਾਜ ਨੂੰ ਖਰੀਆਂ ਖਰੀਆਂ
ਕਰਮਜੀਤ ਕੌਰ 
ਇਸੇ ਤਰ੍ਹਾਂ ਕਰਮਜੀਤ ਕੌਰ ਹੁਰਾਂ ਨੇ ਵੀ ਬੜੀ ਹੀ ਸਪਸ਼ਟ ਗੱਲ ਕੀਤੀ ਹੈ:
Karamjit Kaur :
ਹਰ ਪਾਸੇ ਬਾਬਿਆਂ ਤੇ ਲਾਹਨਤਾਂ ਪਾਈਆਂ ਜਾ ਰਹੀਆਂ ਨੇ--ਕੁਸ਼ ਦਿਨ ਇਹ ਚਰਚਾ ਗਰਮ ਰਹੂ ਤੇ ਫੇਰ ਓਹੀ ਸਿਲਸਿਲਾ ਜਾਰੀ--ਜਦੋਂ ਕੋਈ ਬਾਬਾ ਫੜਿਆ ਜਾਂਦਾ ਜਾਂ ਗਰਿਫਤਾਰ ਹੋ ਜਾਂਦਾ--ਰੌਲਾ ਰੱਪਾ ਸ਼ੁਰੂ ਹੋ ਜਾਂਦੈ ਉਸ ਤੋਂ ਬਾਦ ਕੋਈ ਬੀਬੀ ਸੱਸ ਤੋਂ ਤੰਗ,ਕੋਈ ਨੂੰਹ ਤੋਂ,ਕੋਈ ਪੁੱਤਰ ਲੈਣ ਤੇ ਕੋਈ ਬਾਂਝ ਹੋਣ ਦੇ ਠੱਪੇ ਤੋਂ ਬਚਣ ਲਈ ਬਾਬੇ ਦੀ ਸ਼ਰਨ 'ਚ। ਪਤੀ ਦੇਵ ਵੀ ਖੁਸ਼ ਤੇ ਸੱਸ ਵੀ ਖੁਸ਼ ਕਿ ਮਹਾਭਾਰਤ ਦੇ ਦੌਰਾਨ ਜੰਮੇ ਨਿਆਣਿਆਂ ਵਾਂਗੂ ਬੱਚੇ ਉੱਤੋਂ ਡਿਗ ਪਏ--ਓਦੋਂ ਨੀ ਸੋਚਦੇ ਕਿ ਬਾਬੇ ਨੇ ਕਿਹੜੀ ਕਿਰਪਾ ਕੀਤੀ ਹੋਊ। ਕੁੜੀਆਂ ਓਥੇ ਕਰਨ ਕੀ ਜਾਂਦੀਆਂ ਨੇ--ਮਾਂ ਬਾਪ ਓਥੇ ਓਹਨਾਂ ਨੂੰ ਜਾਣ ਕਿਉਂ ਦਿੰਦੇ ਨੇ--ਜਦੋਂ ਗੱਲ ਬਾਹਰ ਨਿੱਕਲਦੀ ਹੈ ਫੇਰ ਟੱਪਣ ਲੱਗ ਜਾਂਦੇ ਨੇ--ਬਾਬੇ ਕਿਸੇ ਦੇ ਘਰ ਜਾ ਕੇ ਰੇਪ ਕਰਨ ਤਾਂ ਸਿਰਫ ਬਾਬੇ ਦੋਸ਼ੀ--ਪਰ ਜੇ ਕੋਈ ਓਨਾਂ ਕੋਲ ਚੱਲ ਕੇ ਜਾਵੇ ਕਿਰਪਾ ਲਈ ਤਾਂ ਜਾਂ ਦੋਨੇ ਦੋਸ਼ੀ ਜਾਂ ਰਜ਼ਾਮੰਦੀ ਨਾਲ ਹੋਈ ਮੌਜ ਮਸਤੀ--
ਸਾਇੰਸ ਦਾ ਯੁਗ ਹੈ--ਸਾਇੰਸ ਤੇ ਮੈਡੀਕਲ ਤੇ ਵਿਸ਼ਵਾਸ਼ ਕਰੋ--ਨਹੀਂ ਤਾਂ ਇਹ ਤਮਾਸ਼ਾ ਚਲਦਾ ਹੀ ਰਹੇਗਾ।
ਇਸੇ ਤਰ੍ਹਾਂ Pargatjit Sandhu ਨੇ ਵੀ ਇਸ ਮਾਮਲੇ ਤੇ ਬਾਬਿਆਂ ਨੂੰ ਲੰਮੇ ਹਥੀਂ ਲਿਆ ! ਉਹਨਾਂ ਆਖਿਆ:ਜਿੰਨਾ ਨੂੰ ਤੁਸੀ ਰੱਬ ਸਮਝਕੇ ਇੱਜਤ ਦਿੱਤੀ ਅੱਜ ਉਹ ਤੁਹਾਡੀਆਂ ਇੱਜਤਾ ਲਈ ਘਾਤਿਕ ਬਣਦੇ ਜਾ ਰਹੇ ਹਨ"
ਪਰਗਟਜੀਤ ਸੰਧੂ ਇਸ ਬਾਰੇ ਅੱਗੇ ਲਿਖਦੇ ਹਨ:
ਆਏ ਦਿਨ ਸੰਤਾਂ ਬਾਬਿਆ ਦੇ ਕਾਰਨਾਮੇ ਲੋਕਾਂ ਸਾਹਮਣੇ ਆ ਰਹੇ ਹਨ ਲੱਖਾ ਕਰੋੜਾਂ ਲੋਕਾਂ ਨੂੰ ਰੱਬ ਦੇ ਘਰ ਦਾ ਰਾਹ ਦਿਖਾਉਣ ਵਾਲੇ ਖੁਦ ਆਪ ਜੇਲ ਜਾਣ ਤੋ ਬਚਣ ਦੇ ਰਸਤੇ ਲੱਭਦੇ ਨਜਰ ਆਉਦੇ ਹਨ। ਆਪਣੀਆ ਪੋਤਰੀਆਂ ਦੀ ਉਮਰ ਦੀਆ ਬੱਚੀਆ ਦਾ ਸਰੀਰਕ ਸ਼ੋਸ਼ਣ ਕਰਨ ਵਾਲੇ ਇਹ ਹੱਵਸ ਦੇ ਪੁਜਾਰੀ ਉਹਨਾਂ ਲੋਕਾਂ ਲਈ ਰੱਬ ਬਣੇ ਬੈਠੇ ਹਨ ਜਿੰਨਾ ਬਾਰੇ ਮੈ ਸੋਚਣ ਲਈ ਮਜਬੂਰ ਹੋ ਜਾਂਦਾ ਕਿ ਕੀ ਫਰਕ ਹੈ ਇਸ ਇਨਸਾਨੀ ਭੀੜ ਤੇ ਇੱਕ ਭੇਡਾ ਦੇ ਝੁੰਡ ਵਿੰਚ ? 
ਪਰਗਟਜੀਤ ਸੰਧੂ
ਜਿੰਨੀ ਵੱਡੀ ਗਿਣਤੀ ਵਿੰਚ ਅੱਕਲ ਤੋ ਅੰਨੇ ਲੋਕ ਇਹਨਾ ਪਖੰਡੀਆ ਦੇ ਸਮਾਗਮਾ ਵਿੰਚ ਪਹੁੰਚਦੇ ਹਨ ਇਹਨੀ ਗਿਣਤੀ ਨਾਲ ਕਿਤੇ ਸਿਸਟਮ ਦੇ ਖਿਲਾਫ ਖਡ਼ੇ ਹੋ ਜਾਣ ਤਾਂ ਮੁਲਕ ਦਾ ਨਿਜਾਮ ਬਦਲ ਸਕਦੇ ਹਨ ।ਮੌਤ ਤੋ ਬਾਅਦ ਸਵੱਰਗਾ ਵਿੰਚ ਜਗਾ ਪੱਕੀ ਕਰਨ ਦੇ ਚੱਕਰ ਵਿੰਚ ਮੌਜੂਦਾ ਜਿੰਦਗੀ ਨੂੰ ਨਰਕ ਵਾਂਗ ਭੋਗ ਰਹੇ ਲੋਕ ਆਪਣੇ ਬੱਚਿਆ ਦਾ ਹੱਕ ਇਹਨਾ ਧਾਰਮਿਕ ਡਾਕੂਆ ਦੀ ਝੋਲੀ ਪਾ ਰਹੇ ਹਨ। ਪਰ ਜੋ ਲੋਕ ਸਦੀਆ ਤੋ ਬੇਰੀਆਂ ਕਿੱਕਰਾ ਨੂੰ ਮੱਥੇ ਟੇਕਦੇ ਆਏ ਹੋਣ ਜੋ ਗੁਰਦੁਆਰੇ ਦੀਆਂ ਦਹਿਲੀਜਾ ਵਿੰਚ ਪੈਰ ਸਾਫ ਕੀਤਾ ਗੰਦਾਂ ਪਾਣੀ ਸ਼ਰਧਾ ਦੇ ਨਾਮ ਤੇ ਪੀਦੇਂ ਰਹੇ ਹੋਣ । ਉਹਨਾ ਨੂੰ ਇੱਕ ਸ਼ਾਤਿਰ ਸਾਧ ਵੱਲੋ ਮੂਰਖ ਬਣਾਉਣਾ ਕੋਈ ਔਖਾ ਕੰਮ ਨਹੀ ।ਕਹਿ ਦਿੰਦੇ ਗੁਰਦੁਆਰਿਆ ਵਿੰਚ ਹਰ ਵੇਲੇ ਕੀਰਤਨ ਹੁੰਦਾਂ ਕਰਕੇ ਬੰਦੇ ਦਾ ਮਨ ਪਵਿੱਤਰ ਤੇ ਨਿਰਮਲ ਹੋ ਜਾਂਦਾ । ਪਰ ਮੈ ਸੋਚਦਾ ਇਹਨੀ ਵੀ ਪਵਿੱਤਰਤਾ ਠੀਕ ਨਹੀ ਕਿ ਇਸ਼ਨਾਨ ਕਰਕੇ ਬੰਦੇ ਦਾ ਸੁੱਕਣੇ ਪਾਇਆ ਤੌਲੀਆ ਕੱਛਾ ਵੀ ਚੋਰੀ ਹੋ ਜਾਵੇ । ਜੇਬ ਕੱਟੀ ਜਾਵੇ ਔਰਤਾਂ ਦੇ ਕੰਨਾ ਵਿੱਚੋ ਵਾਲੀਆ ਖਿੱਚੀਆਂ ਜਾਣ। ਸਾਡੇ ਲੋਕਾਂ ਦੀ ਸੋਚ ਬੀਮਾਰ ਹੈ ਮੈਨੂੰ ਕੱਲ ਪਤਾ ਲੱਗਾ ਅਮਰੀਕਾ ਦੇ ਗੁਰਦੁਆਰਿਆ ਵਿੰਚ ਵੀ ਕਈ ਗਰੰਥੀ ਸਿੰਘ ਲੋਕਾ ਲਈ ਹੱਥ ਹੌਲਾ ਕਰਦੇ ਹਨ ਜਲ ਦਿੰਦੇ ਹਨ। ਪੰਜਾਬ ਵਿੰਚ ਮੇਰੇ ਏਰੀਏ ਵਿੰਚ ਇੱਕ ਨਾਨਕਸਰੀਆ ਦਾ ਕਾਫੀ ਮਸ਼ਹੂਰ ਡੇਰਾ ਹੈ ਜਿੱਥੇ ਇੱਕ ਸਾਧ ਕਾਬਜ ਸੀ ਬਾਬਾ ਨਾਹਰ ਸਿੰਘ ਸਨੇਹਰਾਂ ਵਾਲਾ ਕਰਕੇ ਜਿਸਦੀ ਕੁਝ ਸਾਲ ਪਹਿਲਾ ਮੌਤ ਹੋ ਗਈ । ਇਹ ਪੈਰ ਧੌਅਕੇ ਗੰਦਾਂ ਪਾਣੀ ਵੀ ਪਿਆਉਦਾਂ ਰਿਹਾ ਬੀਬੀਆ ਨੂੰ । ਉਹ ਬੀਮਾਰ ਸੀ ਤਾਂ ਉਸਨੂੰ ਉਸਦੀ ਹੀ ਇਨੋਵਾ ਗੱਡੀ ਵਿੰਚ ਚੰਡੀਗੜ੍ਹ ਲਿਜਾਇਆ ਜਾ ਰਿਹਾ ਸੀ ਅਤੇ ਰਸਤੇ ਵਿੰਚ ਹੀ ਉਸਦੀ ਮੌਤ ਹੋ ਗਈ। ਉਸਦੀ ਮੌਤ ਤੋ ਬਾਅਦ ਜੋ ਨਵਾਂ ਠੱਗ ਆਇਆ ਉਸਦੀ ਜਗਾ ਉਸਨੇ ਕਮਾਈ ਕਰਨ ਦਾ ਨਵਾਂ ਢੰਗ ਲੱਭ ਲਿਆ ਹੈ ਇੱਕ ਦੋਸਤ ਨੇ ਦੱਸਿਆ ਉਸਨੇ ਇਨੋਵਾ ਗੱਡੀ ਜਿਸ ਵਿੰਚ ਵੱਡੇ ਸਾਧ ਦੀ ਮੌਤ ਹੋਈ ਸੀ ਨੂੰ ਇੱਕ ਸ਼ੀਸ਼ੇ ਦਾ ਕਮਰਾ ਬਣਾਕੇ ਵਿੰਚ ਖੜੀ ਕਰ ਦਿੱਤਾ ਹੈ ਕਿ ਇਹ ਗੱਡੀ ਹੈ ਜਿਸ ਵਿੰਚ ਮਹਾਪੁਰਸ਼ਾ ਨੇ ਆਖਰੀ ਸਵਾਸ ਲਿਆ । ਹੁਣ ਸ਼ਰਧਾਲੂੰ ਪੈਸੇ ਸੁੱਟ ਸੁੱਟ ਉਸ ਗੱਡੀ ਨੂੰ ਮੱਥਾ ਟੇਕ ਰਹੇ ਹਨ ।ਗੱਡੀ ਨੂੰ ਸੀਸ ਨਿਵਾਉਣ ਲਈ ਲਾਈਨ ਵਿੰਚ ਲੱਗਣਾ ਪੈਦਾਂ ਹੈ ਮੇਰੇ ਖਿਆਲ ਨਾਲ ਗੱਡੀ ਦਸ ਕੁ ਲੱਖ ਦੀ ਹੋਣੀ ਹੈ ਅਤੇ ਸੰਤਾ ਨੇ ਖੜੀ ਕਰਕੇ ਹੁਣ ਤੱਕ ਕਰੋੜ ਕਮਾ ਲਿਆ ਹੋਣਾਂ ।ਇੱਕ ਸੰਤ ਜਿਸਦੇ ਕਰੋਡ਼ਾ ਸ਼ਰਧਾਲੂ ਹਨ ਜਦੋ ਕਿਸੇ ਵੀ ਬਲਾਤਕਾਰ ਵਰਗੇ ਕੇਸ ਵਿੰਚ ਫਸਦਾ ਹੈ ਪਤਾ ਲੱਗਣ ਦੇ ਬਾਵਜੂਦ ਲੋਕਾ ਦਾ ਲਗਾਤਾਰਤਾ ਨਾਲ ਉਥੇ ਜਾਣਾ ਬੇਹੱਦ ਸ਼ਰਮਨਾਕ ਹੈ । ਇੰਝ ਲਗਦਾ ਇਸ ਭੀੜ ਦੀ ਮਾਨਸਿਕਤਾ ਅਤੇ ਸੋਚ ਦਾ ਵੀ ਬਲਾਤਕਾਰ ਹੋ ਚੁੱਕਾ ਹੈ
ਸ਼ਬਦ ਬਣਾਕੇ ਵਜਾਏ ਜਾਂਦੇ ਰਹੇ ਹਨ ਕਿ " ਅੰਮ੍ਰਿਤਸਰ ਵੱਲ ਜਾਂਦਿਆ ਰਾਹੀਆ ਜਾਣਾ ਗੁਰੂ ਦੁਆਰੇ ਬਈ , ਹਰਮੰਦਿਰ ਦੇ ਦਰਸ਼ਨ ਕਰਕੇ ਕੱਟ ਜਾਂਦੇ ਦੁੱਖ ਸਾਰੇ ਬਈ....." ਹਰਮੰਦਿਰ ਦੇ ਦਰਸ਼ਨ ਉਹ ਅਪਾਹਿਜ ਭਿਖਾਰੀ ਕਈ ਸਾਲਾ ਤੋ ਰੋਜਾਨਾ ਕਰ ਰਿਹਾ ਜੋ ਬਾਹਰ ਪੇਟ ਦੀ ਭੁੱਖ ਮਿਟਾਉਣ ਵਾਸਤੇ ਲੋਕਾਂ ਤੋ ਰੁਪਈਆ ਰੁਪਈਆ ਮੰਗਦਾ ਹੈ ਉਸਦੇ ਦੁੱਖ ਤਾਂ ਕੱਟੇ ਨਹੀ ਗਏ । ਹਰਮੰਦਿਰ ਦੇ ਦਰਸ਼ਨ ਕਰਕੇ ਪਰਤਦੇ ਸ਼ਰਧਾਲੂ ਕਈ ਵਾਰ ਸਡ਼ਕੀ ਹਾਦਸਿਆ ਵਿੰਚ ਜਾਨਾਂ ਵੀ ਗਵਾਂ ਲੈਦੇ ਹਨ ਉਹਨਾਂ ਦੇ ਦੁੱਖ ਤੁਸੀ ਕਹਿ ਸਕਦੇ ਹੋ ਕਿ ਕੱਟੇ ਗਏ ।ਜਦੋ ਇਨਸਾਨ ਨਾ ਰਿਹਾ ਤੇ ਦੁੱਖ ਕਾਹਦਾ ? ਇਹੋ ਜਿਹੇ ਸ਼ਬਦ ਅਤੇ ਧਾਰਮਿਕ ਗੀਤ ਲੋਕਾਂ ਦੀ ਸੋਚ ਨੂੰ ਬੀਮਾਰ ਕਰਨ ਵਿੰਚ ਕਾਰਗਰ ਸਿੱਧ ਹੁੰਦੇ ਹਨ । ਇਹਨਾ ਅਸਰ ਹੋ ਜਾਂਦਾ ਕਈਆ ਤੇ ਕਿ ਜੇ ਘਰ ਵਿੰਚ ਕੋਈ ਬੀਮਾਰ ਰਹਿਣ ਲੱਗ ਪਵੇ ਤਾਂ ਡਾਕਟਰ ਨੂੰ ਚੈੱਕ ਕਰਵਾਉਣ ਦੀ ਬਜਾਇ ਲੋਕ ਧਾਰਮਿਕ ਅਸਥਾਨਾਂ ਤੇ ਰੁਮਾਲੇ ਤੇ ਇਸ਼ਨਾਨ ਸੁੱਖਣ ਲੱਗ ਪੈਦੇ ਹਨ ।ਪਰ ਸੋਚਣ ਵਾਲੀ ਗੱਲ ਕਿ ਚੰਦਰਮਾਂ ਨੂੰ ਮਾਮਾ ਕਹਿਣ ਵਾਲੇ ਉੱਥੇ ਕਿੰਵੇ ਜਾਣਗੇ ? ਨਾਨਕੇ ਤਾਂ ਇਹਨਾਂ ਦੇ ਸੀ ਪਰ ਉੱਥੇ ਅੰਗਰੇਜ ਪਹਿਲਾ ਪਹੁੰਚ ਗਏ ।ਇਹ ਵਿਚਾਰੇ ਆਪਣੇ ਹੀ ਮਰੇ ਬਜੁਰੱਗ ਤੋ ਡਰਨ ਵਾਲੇ ਲੋਕ ਹਨ ਉਸਦੀ ਆਤਮਿਕ ਸ਼ਾਤੀ ਲਈ ਪਾਠ ਕਰਾਂਉਦੇ ਫਿਰਦੇ ਹਨ ਕਿ ਕਿਤੇ ਬਾਪੂ ਆਕੇ ਸਾਨੂੰ ਨਾ ਕਹਿ ਦੇਵੇ ਕਿ ਆਜੋ ਚੱਲੀਏ । ਇੱਕ ਤਾਂ ਇਹ ਰੱਬ ਨੂੰ ਵੀ ਆਪਣਾ ਚੌਕੀਦਾਰ ਸਮਝਦੇ ਹਨ ਪੰਜ ਰੁਪਏ ਦਾ ਪ੍ਰਸ਼ਾਦ ਕਰਵਾਕੇ ਕਹਿਣਗੇ ਕਿ ਸਾਡੇ ਅੰਗ ਸੰਘ ਸਹਾਈ ਹੋਵੀ ਮਾਲ ਡੰਗਰ ਦੀ ਰਾਖੀ ਕਰੀ ਸਾਨੂੰ ਮੱਤ ਦੇਵੀ ਕਿਸੇ ਦਾ ਮਾਡ਼ਾ ਨਾ ਕਰਾਂਵੀ ।ਕਿਹੋ ਜਿਹਾ ਰੱਬ ਹੈ ਜਿਸਨੂੰ ਉਸਦਾ ਭਗਤ ਅੱਕਲ ਦੇ ਰਿਹਾ ਹੈ ਕਿ ਰੱਬਾ ਮਾਡ਼ਾ ਕੰਮ ਨਾ ਕਰਾਵੀ । ਮਤਲੱਬ ਰੱਬ ਨੂੰ ਚੰਗੇ ਮਾਡ਼ੇ ਦੀ ਸਮਝ ਨਹੀ ਹੈਗੀ ।ਜਿੰਦਗੀ ਲਈ ਅੱਛੀ ਮੈਨਜਮੈਟ ਕਰਨ ਦੀ ਜਰੂਰਤ ਹੈ ਨਾ ਕਿ ਸਾਧਾ ਪਿੱਛੇ ਲੱਗਣ ਦੀ ਇਹ ਵਿਹਲਡ਼ ਤੁਹਾਡੀ ਮਿਹਨਤ ਦੀ ਕਮਾਈ ਲੁੱਟ ਰਹੇ ਹਨ । ਸਾਰੀ ਰਾਤ ਇਹਨਾ ਦਾ ਸੱਤਸੰਗ ਸੁਨਣ ਦੀ ਥਾਂ ਇੱਕ ਘੰਟਾ ਡਿਸਕੱਵਰੀ ਜਾਂ ਹਿਸਟਰੀ ਚੈਨਲ ਦੇਖ ਲਿਆ ਕਰੋ ਪੁਖਤਾ ਗਿਆਨ ਲੱਭੇਗਾ ਇਹਨਾ ਵਾਂਗ ਨਰਕਾਂ ਦੇ ਡਰਾਵੇ ਜਾਂ ਸਵੱਰਗਾ ਦੇ ਸੱਬਜ ਬਾਗ ਨਹੀ।----ਪਰਗਟਜੀਤ ਸੰਧੂ

Wednesday, August 28, 2013

ਸੰਤ ਆਸਾ ਰਾਮ ਵਿਰੁਧ ਸਿੱਖ ਰੋਹ ਹੋਰ ਭਖਿਆ

ਐਸਜੀਪੀਸੀ ਨੇ ਮਾਮਲਾ ਬਾਕਾਇਦਾ ਪੁਲਿਸ ਕੋਲ ਵੀ ਉਠਾਇਆ
ਅੰਮ੍ਰਿਤਸਰ: 28 ਅਗਸਤ 2013: (ਪੰਜਾਬ ਸਕਰੀਨ ਬਿਊਰੋ): ਵਿਵਾਦਾਂ ਵਿੱਚ ਘਿਰੇ ਆ ਰਹੇ ਸੰਤ ਆਸਾ ਰਾਮ ਦੇ ਸਮਰਥਕਾਂ ਵੱਲੋਂ ਥਾਂ ਥਾਂ ਸਮਰਥਨ ਮੁਜ਼ਾਹਰੇ ਕਰਨ ਦੇ ਬਾਵਜੂਦ ਵੀ ਸੰਤ ਦੇ ਖਿਲਾਫ਼ ਖੜਾ ਹੋਇਆ ਲੋਕ ਰੋਹ ਮੱਥਾ ਹੋਣ ਦਾ ਨਾਮ ਨਹੀਂ ਲੈ ਰਿਹਾ। ਹੁਣ  ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਨੇ ਵੀ ਇਸ ਮਸਲੇ ਤੇ ਠੋਸ ਕਦਮ ਚੁੱਕਦਿਆਂ ਪੁਲਿਸ ਕੋਲ ਆਪਣਾ ਇਤਰਾਜ਼ ਪਹੁੰਚਾਇਆ ਹੈ। ਕਾਬਿਲ-ਏ-ਜ਼ਿਕਰ ਹੈ ਕਿ ਸੰਤ ਆਸਾ ਰਾਮ ਆਸ਼ਰਮ ਦੀ ਇੱਕ ਸੀਨੀਅਰ ਬੁਲਾਰਾ ਹੋਣ ਦਾ ਦਾਵਾ ਕਰਨ ਵਾਲੀ ਨੀਲਮ ਦੁੱਬੇ ਨੇ ਇੱਕ ਟੀਵੀ ਇੰਟਰਵਿਊ ਦੌਰਾਨ ਸੰਤ ਆਸਾ ਰਾਮ ਦੀ ਤੁਲਣਾ ਸ੍ਰੀ ਗੁਰੂ ਨਾਨਕ ਦੇਵ ਜੀ ਨਾਲ ਕੀਤੀ ਸੀ। ਇਸਦੇ ਨਾਲ ਹੀ ਗੌਤਮ ਬੁਧ ਅਤੇ ਕਈ ਹੋਰਨਾਂ ਸ਼ਖਸੀਅਤਾਂ ਨਾਲ ਵੀ ਸੰਤ ਆਸਾ ਰਾਮ ਦੀ ਬਰਾਬਰੀ ਕੀਤੀ ਗਈ ਸੀ। ਇਸ ਇੰਟਰਵਿਊ ਦੇ ਪ੍ਰਸਾਰਨ ਤੋਂ ਬਾਅਦ ਦਿੱਲੀ ਦੀਆਂ ਸਿੱਖ ਸੰਸਥਾਵਾਂ ਵੀ ਹਰਕਤ ਵਿੱਚ ਆਈਆਂ ਅਤੇ ਇਨਡੋਰ ਵਿੱਚ ਵੀ ਸਿੱਖ ਜਗਤ ਵੱਲੋਂ ਭਰਵੇਂ ਮੁਜ਼ਾਹਰੇ ਹੋਏ। ਮਾਹੌਲ ਵਿੱਚ ਤੇਜ਼ੀ ਆਉਣ ਤੇ ਐਸਜੀਪੀਸੀ ਨੇ ਵੀ ਮਾਮਲਾ ਪੁਲਿਸ ਕੋਲ ਜਾ ਉਠਾਇਆ। ਇਸ ਤਸਵੀਰ ਕੁਝ ਉਹਨਾਂ ਪਲਾਂ ਦੀ ਹੀ ਹੈ ਜਦੋਂ ਇਹ ਮਾਮਲਾ ਉਠਾਉਣ ਲਈ ਐਸਜੀਪੀਸੀ ਦੇ ਉਚ ਅਧਿਕਾਰੀ ਪੁਲਿਸ ਕੋਲ ਪੁੱਜੇ। ਹੁਣ ਦੇਖਣਾ ਹੈ ਕਿ ਪੰਜਾਬ ਵਿੱਚ ਸਿੱਖ ਜਗਤ ਦਾ ਵਿਰੋਧ ਅਤੇ ਰੋਹ ਭਖਣ ਤੋਂ ਬਾਅਦ ਸੰਤ ਆਸਾ ਰਾਮ ਦੇ ਸਮਰਥਕ ਅਤੇ ਕਈ ਹੋਰ ਸੰਸਥਾਵਾਂ ਕੀ ਰੁੱਖ ਅਖਤਿਆਰ ਕਰਦਿਆਂ ਹਨ ?

Tuesday, August 27, 2013

ਯੋਗ ਵੇਦਾਂਤ ਸੇਵਾ ਸਮਿਤਿ ਨੇ ਕੀਤਾ ਰੋਸ ਮਾਰਚ

ਹਜ਼ਾਰਾਂ ਸਾਧਕਾਂ ਨੇ ਲਿਆ ਸੰਤ ਆਸਾ ਰਾਮ ਦੇ ਹੱਕ ਵਿੱਚ ਸਟੈਂਡ 
ਛੇਤੀ ਤੋਂ  ਛੇਤੀ ਸਾਜ਼ਸ਼ੀਆਂ ਦਾ ਪਤਾ ਲਾਉਣ ਦੀ ਮੰਗ ਵੀ ਕੀਤੀ
ਲੁਧਿਆਣਾ 26 ਅਗਸਤ 2013: (*ਜਤਿੰਦਰ ਸਚਦੇਵਾ/ਪੰਜਾਬ ਸਕਰੀਨ)  ਯੋਗ ਵੇਦਾਂਤ ਸੇਵਾ ਦੀ ਅਗਵਾਈ ਹੇਠ ਹਜਾਰਾਂ ਸਾਧਕਾਂ ਨੇ ਪਰਮ ਪੂਜਨੀਕ ਸੰਤ ਸ਼੍ਰੀ ਆਸਾ ਰਾਮ ਜੀ ਦੇ ਵਿਰੁੱਧ ਸਾਜਿਸ਼ ਦੇ ਤਹਿਤ ਕੀਤੇ ਜਾ ਰਹੇ ਦੁਸ਼ਪ੍ਰਚਾਰ  ਦੇ ਵਿਰੋਧ ਵਿੱਚ ਜਗਰਾਂਵਾਂਪੁਲ ਸਥਿਤ ਦੁਰਗਾ ਮਾਤਾ ਮੰਦਰ ਤੋਂ ਮਿਨੀ ਸਕੱਤਰੇਤ ਤੱਕ ਹਰਿ ਬੋਲ - ਹਰਿ ਬੋਲ ਦਾ ਜਾਪ ਕਰਦੇ ਹੋਏ ਰੋਸ਼ ਮਾਰਚ ਕਰਕੇ ਜਿਲਾ ਪ੍ਰਸ਼ਾਸਨ ਨੂੰ ਮੰਗ ਪੱਤਰ ਦਿਤਾ ।  ਪ੍ਰਰਦਸ਼ਨਕਾਰੀ ਹੱਥਾਂ ਵਿੱਚ ਸੰਤਾਂ ਦਾ ਅਪਮਾਨ ਨਹੀਂ ਸਹੇਗਾ ਹਿੰਦੁਸਤਾਨ , ਸ਼ਾਜਿਸ਼ ਰੱਚਣ ਵਾਲਿਆਂ ਤੇ ਹੋਵੇ ਤੁੰਰਤ ਕਾਰਵਾਈ , ਸੰਤ ਦਾ ਨਿੰਦਕ ਮਹਾਂ ਹਤਿਆਰਾ ,  ਸੱਚ  ਨੰੂ ਕੋਈ ਲਕੋ ਨਹੀਂ ਸਕਦਾ, ਝੂਠ  ਦੇ ਪੈਰ ਨਹੀਂ, ਸਾਜਿਸ਼ ਰੱਚਣ ਵਾਲੀਆਂ ਤੋਂ ਸੁਚੇਤ ਰੋਹ ਦੀਆਂ ਤਖਤੀਆਂ ਹਥਾਂ ਵਿੱਚ ਫੜ ਕੇ ਰੋਸ਼ ਜ਼ਾਹਰ ਕਰ ਰਹੇ ਸਨ।  ਯੋਗ ਵੇਦਾਂਤ ਸਮਿਤਿ ਦੀ ਲੁਧਿਆਣਾ ਇਕਾਈ ਨੇ ਜਿਲਾ ਪ੍ਰਸ਼ਾਸਨ ਨੂੰ ਦਿੱਤੇ ਮੰਗ ਪੱਤਰ ਵਿੱਚ ਬਾਪੂ ਆਸਾ ਰਾਮ ਜੀ   ਦੇ ਖਿਲਾਫ ਬਿਨਾਂ ਦੋਸ਼ ਸਿੱਧ ਹੋਏ ਪ੍ਰਸਾਰਿਤ ਹੋ ਰਹੀਆਂ ਬੇਬੁਨਿਆਦ ਖਬਰਾਂ  ਦੇ ਪ੍ਰਸਾਰਣ ਤੇ ਰੋਕ ਲਗਾਉਣ ਦੀ ਮੰਗ ਕੀਤੀ ।  ਯੋਗ ਵੇਦਾਂਤ ਸੇਵਾ ਸਮਿਤਿ ਲੁਧਿਆਣਾ  ਦੇ ਪ੍ਰਧਾਨ ਜਤਿੰਦਰ ਸਚਦੇਵਾ , ਉਪ-ਪ੍ਰਧਾਨ ਰਮੇਸ਼ ਸ਼ਰਮਾ  ਅਤੇ ਸੀਨੀਅਰ ਆਗੂਆਂ ਸੁਰਿੰਦਰ ਕਪੂਰ, ਵਿਜੈ ਸੂਦ , ਮੰਗਤ ਰਾਏ , ਸ਼ੀਤਲ ਮਹਿੰਦਰਾ,ਚੇਤਨ ਵਰਮਾ, ਰਾਜੇਸ਼ ਸਚਦੇਵਾ,ਸ਼ਸ਼ੀ ਓਝਾ, ਮਹਿੰਦਰਪਾਲ ਗੁਪਤਾ,ਐਸ ਕੇ ਨਇਅਰ,ਭਾਰਤ ਭੂਸ਼ਣ,ਰੋਸ਼ਨ ਲਾਲ, ਰਮਨ ਵਰਮਾ,ਮੋਹਨ ਲਾਲ ਸ਼ਰਮਾ ਨੇ ਕਿਹਾ ਕਿ ਪਰਮ ਪੂਜਨੀਕ ਸੰਤ ਸ਼੍ਰੀ ਆਸਾ ਰਾਮ ਜੀ  ਦੇ ਵਿਰੁੱਧ ਸਾਜਿਸ਼ ਦੇ ਤਹਿਤ ਦਸ਼ਪ੍ਰਚਾਰ ਹੋਣ  ਦੇ ਚਲਦੇ ਹਜਾਰਾਂ ਸਾਧਕਾਂ ਦੀਆਂ ਧਾਰਮਿਕ ਭਾਵਨਾਵਾਂ ਨੂੰ ਠੇਸ ਪੰਹੁਚ ਰਹੀ ਹੈ। ਉਥੇ ਭਾਰਤੀ ਸੰਸਕਿ੍ਰਤੀ  ਦੇ ਆਧਾਰ ਥੰਮ ਮੰਨੇ ਜਾਣ ਵਾਲੇ ਇਸ ਮਹਾਨ ਸੰਤ  ਦੇ ਖਿਲਾਫ ਦੁਸ਼ ਪ੍ਰਚਾਰ ਅਤੇ ਮੰਨਘੜੰਤ ਖਬਰਾਂ  ਦੇ ਪ੍ਰਸਾਰਣ ਨਾਲ ਬਾਪੂ ਜੀ ਤੇ  ਵਿਸ਼ਵਾਸ ਅਤੇ ਅਟੂਟ ਸ਼ਰਧਾ ਰੱਖਣ ਵਾਲੇ ਹਜਾਰਾਂ ਸਾਧਕਾਂ ਅਤੇ ਸ਼ਰੱਧਾਲੁਆਂ ਦੀਆਂ ਧਾਰਮਿਕ ਭਾਵਨਾਵਾਂ ਨੰੂ ਟੇਸ ਪੁੱਜ ਰਹੀ ਹੈ। ਅਤੇ ਉਨਾਂ ਦਾ ਸਾਮਾਜਿਕ ਜੀਵਨ ਵੀ ਤਨਾਵ ਗ੍ਰਸਤ ਹੋ ਰਿਹਾ ਹੈ ।  ਰੋਸ਼ ਮਾਰਚ ਨੂੰ ਸਫਲ ਬਣਾਉਣ ਵਿੱਚ ਸੁਰਿੰਦਰ ਕੌਸ਼ਲ,ਪ੍ਰੇਮ ਸ਼ਰਮਾ, ਸੁਭਾਸ਼ ਅਰੋੜਾ, ਅਮਨ ਖੁਰਾਣਾ,ਦੇਸਰਾਜ ਗੋਗਨਾ, ਸੁਰਿੰਦਰ ਨਾਗਪਾਲ , ਸਾਹੂ,ਸੁਰਿੰਦਰ ਵਾਸਨ, ਸੁਰਿੰਦਰ ਬਾਂਸਲ,ਪਿਤਾੰਬਰ ਗਰਗ, ਤਿ੍ਰਪਾਠੀ ਜੀ , ਅਸ਼ਵਨੀ ਸ਼ਰਮਾ, ਪੱਪੀ ਭਾਈ,ਕੇ ਐਨ ਮੰਡਲ, ਗੌਰਵ, ਭੈਣ ਹੇਮਲਤਾ, ਸਰੋਜ, ਕਵਿਤਾ, ਨਾਰੀ ਉੱਥਾਨ ਪ੍ਰਚਾਰ ਮੰਡਲ ਦੀ ਪ੍ਰਧਾਨ ਰੇਖਾ ਸ਼ਰਮਾ,ਅਨਿਤਾ ਨਾਗਪਾਲ  ਸਹਿਤ ਲੁਧਿਆਣਾ ,ਜਗਰਾਉ,ਫਿੱਲੌਰ, ਖੰਨਾ ਅਤੇ ਮਲੇਰਕੋਟਲਾ ਤੋਂ ਹਜਾਰਾਂ ਸਾਧਕਾਂ, ਵਿਸ਼ਵ ਹਿੰਦੂ ਪਰਿਸ਼ਦ ਅਤੇ ਬਜਰੰਗ ਦਲ  ਦੇ  ਸੇਵਕਾਂ ਨੇ ਵੀ ਵਿਸ਼ੇਸ਼ ਯੋਗਦਾਨ ਦਿੱਤਾ ।

*ਜਤਿੰਦਰ ਸਚਦੇਵਾ ਯੋਗ ਵੇਦਾਂਤ ਸੇਵਾ ਸਮਿਤਿ ਲੁਧਿਆਣਾ ਦੇ  ਸਰਗਰਮ ਪ੍ਰਧਾਨ ਹਨ ਉਹਨਾਂ ਦਾ ਮੋਬਾਈਲ ਨੰਬਰ ਹੈ: 98150 83004