Showing posts with label Lakhwinder Johal. Show all posts
Showing posts with label Lakhwinder Johal. Show all posts

Wednesday, March 02, 2022

ਪੰਜਾਬੀ ਸਾਹਿਤ ਅਕਾਦਮੀ ਲੁਧਿਆਣਾ ਦਾ ਨਵਾਂ ਚੈਪਟਰ ਸ਼ੁਰੂ

2nd March 2022 at 6:34 PM Via WhatsApp  

ਨਵੀਂ ਟੀਮ ਨੇ ਪਲੇਠੀ ਮੀਟਿੰਗ ਵਿੱਚ ਦਿਖਾਈ ਆਪਣੇ ਬਲਿਊ ਪ੍ਰਿੰਟ ਦੀ ਝਲਕ 


ਲੁਧਿਆਣਾ
: 2 ਮਾਰਚ 2022: (ਪੰਜਾਬ ਸਕਰੀਨ ਡੈਸਕ)::

ਨਵੀਂ ਚੋਣ ਅਤੇ ਅਹੁਦਿਆਂ ਦੀਆਂ ਨਿਯੁਕਤੀਆਂ ਮਗਰੋਂ ਉਡੀਕ ਸੀ ਕਿ ਹੁਣ ਪੰਜਾਬੀ ਸਾਹਿਤ ਅਕਾਦਮੀ ਦੀ ਨਵੀਂ ਟੀਮ ਕੀ ਕੀ ਕਰੇਗੀ? ਕਿਹੜੇ ਕਿਹੜੇ ਕਦਮ ਚੁੱਕੇਗੀ? ਪੰਜਾਬੀ ਭਵਨ ਅਤੇ ਪੰਜਾਬੀ ਸਾਹਿਤ ਅਕਾਦਮੀ ਸੰਬੰਧੀ ਹੁੰਦੀਆਂ ਚਿਰਾਂ ਤੋਂ ਹੁੰਦੀਆਂ ਆ ਰਹੀਆਂ ਸਰਗੋਸ਼ੀਆਂ ਵੱਲ ਕੰਨ ਧਰੀਏ ਤਾਂ ਅਜਿਹਾ ਕਾਫੀ ਕੁਝ ਸੀ ਜਿਸ ਬਾਰੇ ਲੁੜੀਂਦੇ ਕਦਮ ਚੁੱਕੇ ਜਾਣ ਦੀ ਲੋੜ ਮਹਿਸੂਸ ਕੀਤੀ ਜਾ ਰਹੀ ਹੈ। ਕੁਝ ਕਦਮ ਚੁੱਕੇ ਵੀ ਗਏ ਹਨ ਅਤੇ ਕੁਝ ਅਜੇ ਬਾਕੀ ਵੀ ਹਨ। ਪੰਜਾਬੀ ਸਾਹਿਤ ਅਕਾਡਮੀ, ਲੁਧਿਆਣਾ ਦੇ ਪ੍ਰਬੰਧਕੀ ਬੋਰਡ ਦੀ ਇਹ ਬੇਹੱਦ ਮਹੱਤਵਪੂਰਨ ਅਤੇ ਪਲੇਠੀ ਇਕੱਤ੍ਰਤਾ ਪੰਜਾਬੀ ਭਵਨ, ਲੁਧਿਆਣਾ ਵਿਖੇ ਅਕਾਡਮੀ ਦੇ ਪ੍ਰਧਾਨ ਡਾ. ਲਖਵਿੰਦਰ ਸਿੰਘ ਜੌਹਲ ਦੀ ਪ੍ਰਧਾਨਗੀ ਹੇਠ ਹੋਈ ਜਿਸ ਵਿੱਚ ਅਕਾਡਮੀ ਦੇ ਨਵ-ਨਿਯੁਕਤ ਅਹੁਦੇਦਾਰਾਂ ਅਤੇ ਪ੍ਰਬੰਧਕੀ ਬੋਰਡ ਦੇ ਮੈਂਬਰ ਆਪੋ ਆਪਣੇ ਧੜਿਆਂ ਦੀ ਨੁਮਾਂਇੰਦਗੀ ਦਾ ਅਹਿਸਾਸ ਕਰਾਉਂਦੇ ਹੋਏ ਸ਼ਾਮਲ ਹੋਏ। ਇਸ ਪਲੇਠੀ ਇਕੱਤ੍ਰਤਾ ਵਿਚ ਪਿਛਲੇ ਸਮੇਂ ਦੌਰਾਨ ਵਿਛੜ ਚੁੱਕੇ ਲੇਖਕ ਮੈਂਬਰਾਂ ਅਤੇ ਉਨ੍ਹਾਂ ਦੇ ਸਕੇ ਸੰਬੰਧੀਆਂ ਬਾਰੇ ਦਾ ਮੌਨ ਧਾਰ ਕੇ ਸ਼ਰਧਾਂਜਲੀ ਭੇਟ ਕੀਤੀ ਗਈ।

ਇਸ ਮੀਟਿੰਗ ਦੌਰਾਨ 2021 ਵਿਚ ਭਾਰਤੀ ਸਾਹਿਤ ਅਕਾਡਮੀ ਵੱਲੋਂ ਅਕਾਡਮੀ ਦੇ ਜੀਵਨ ਮੈਂਬਰ ਜਨਾਬ ਖ਼ਾਲਿਦ ਹੁਸੈਨ ਨੂੰ ਉਨ੍ਹਾਂ ਦੀ ਕਹਾਣੀਆਂ ਦੀ ਪੁਸਤਕ ‘ਸੂਲਾਂ ਦਾ ਸਾਲਣ’’’ਤੇ ਪੁਰਸਕਾਰ ਦੇਣ ਤੇ ਅਕਾਡਮੀ ਵੱਲੋਂ ਵਧਾਈ ਦਿੱਤੀ ਗਈ ਅਤੇ ਪੰਜਾਬ ਕਲਾ ਪਰਿਸ਼ਦ ਵੱਲੋਂ ਸਾਹਿਤਕਾਰਾਂ, ਕਲਾ ਪ੍ਰੇਮੀਆਂ ਨੂੰ ਗੌਰਵ ਪੰਜਾਬ ਦਾ ਪੁਰਸਕਾਰ ਮਿਲਣ ’ਤੇ ਵਧਾਈ ਦਿੱਤੀ ਗਈ।  ਹੁਣ ਸਾਲ 2022-2024 ਦੋ ਸਾਲਾਂ ਲਈ ਪੰਜਾਬੀ ਸਾਹਿਤ ਅਕਾਡਮੀ, ਲੁਧਿਆਣਾ ਦੀਆਂ ਗਤੀ ਵਿਧੀਆਂ, ਸਰਗਰਮੀਆਂ, ਸੈਮੀਨਾਰ, ਕਾਨਫ਼ੰਰਸ, ਸਾਹਿਤ ਉਤਸਵ, ਰੂ-ਬ-ਰੂ ਸਮਾਗਮਾਂ ਲਈ ਸਰਬਸੰਮਤੀ ਨਾਲ ਕਮੇਟੀਆਂ ਦਾ ਗਠਿਨ ਕੀਤਾ ਗਿਆ ਤੇ ਕਮੇਟੀਆਂ ਦੇ ਕਨਵੀਨਰ ਥਾਪ ਕੇ ਉਨ੍ਹਾਂ ਨੂੰ ਯੋਜਨਾਬੱਧ ਤਰੀਕੇ ਨਾਲ ਅਕਾਡਮੀ ਦੇ ਪ੍ਰੋਗਰਾਮ ਕਰਨ ਲਈ ਬੇਨਤੀ ਕੀਤੀ ਗਈ।

ਇਸ ਮੌਕੇ ਅਕਾਡਮੀ ਦੇ ਪ੍ਰਧਾਨ ਡਾ. ਲਖਵਿੰਦਰ ਸਿੰਘ ਜੌਹਲ ਨੇ ਪ੍ਰਬੰਧਕੀ ਬੋਰਡ ਲਈ ਸਾਹਿਤ ਅਤੇ ਸਭਿਆਚਾਰ ਨਾਲ ਜੁੜੀਆਂ ਤਿੰਨ ਸ਼ਖ਼ਸੀਅਤਾਂ ਡਾ. ਸ. ਪ. ਸਿੰਘ ਜੀ ਸਾਬਕਾ ਉਪ-ਕੁਲਪਤੀ, ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ, ਅੰਮ੍ਰਿਤਸਰ, ਸਤਨਾਮ ਮਾਣਕ ਤੇ, ਨਾਮਵਰ ਕਹਾਣੀ ਲੇਖਕ ਸ੍ਰੀ ਸੁਖਜੀਤ ਮਾਛੀਵਾੜਾ ਨੂੰ ਦੋ ਸਾਲ ਲਈ ਕਾਰਜਕਾਰਨੀ ਦਾ ਮੈਂਬਰ ਨਾਮਜ਼ਦ ਕੀਤਾ। ਜਨਰਲ ਸਕੱਤਰ ਡਾ. ਗੁਰਇਕਬਾਲ ਸਿੰਘ ਦੀ ਸਿਫ਼ਾਰਸ਼ ’ਤੇ ਪ੍ਰਬੰਧਕੀ ਬੋਰਡ ਨੇ ਸਰਬਸੰਮਤੀ ਨਾਲ ਤਿੰਨ ਸਕੱਤਰ ਡਾ. ਗੁਰਚਰਨ ਕੌਰ ਕੋਚਰ, ਸ. ਬਲਦੇਵ ਸਿੰਘ ਝੱਜ ਸਕੱਤਰ, ਸ੍ਰੀ ਕੇ. ਸਾਧੂ ਸਿੰਘ ਨਾਮਜ਼ਦ ਕੀਤਾ ਗਿਆ।

ਪ੍ਰਧਾਨ ਡਾਃ ਲਖਵਿੰਦਰ ਸਿੰਘ ਜੌਹਲ ਨੇ ਇਹ ਐਲਾਨ ਕੀਤਾ ਕਿ ਸਾਲ 2022 ਨੂੰ ਕਿੱਸਾ ਕਵਿਤਾ ਦੇ ਸਿਰਮੌਰ ਹਸਤਾਖ਼ਰ ਸੱਯਦ ਵਾਰਿਸ ਸ਼ਾਹ  ਦੀ 300 ਵੀਂ ਵਰੇਗੰਢ ਨੂੰ ਸਮਰਪਿਤ ਕੀਤਾ ਜਾਵੇਗਾ। ਪੰਜਾਬੀ ਸਾਹਿਤ ਅਕਾਡਮੀ, ਲੁਧਿਆਣਾ ਦੇ ਕੰਮਕਾਜ ਅਤੇ ਗਤੀ ਵਿਧੀਆਂ ਨੂੰ ਉਸਾਰੂ ਰੂਪ ਨਾਲ ਚਲਾਉਣ ਲਈ ਪ੍ਰਬੰਧਕੀ ਬੋਰਡ ਵੱਲੋਂ ਨਿੱਗਰ ਸੁਝਾਅ ਦਿੱਤੇ ਗਏ ਅਤੇ ਅਕਾਡਮੀ ਦੇ ਖੁੱਲ੍ਹੇ ਰੰਗਮੰਚ ’ਚ ਹਰ ਮਹੀਨੇ ਇਕ ਪੰਜਾਬੀ ਨਾਟਕ ਕਰਨ ਦੀ ਲੋੜ ’ਤੇ ਜ਼ੋਰ ਦਿੱਤਾ।

ਉਨ੍ਹਾਂ ਇਹ ਵੀ ਸੁਝਾਅ ਦਿੱਤਾ ਕਿ ਅਕਾਡਮੀ ਨੂੰ ਸਕੂਲਾਂ, ਕਾਲਜਾਂ ਅਤੇ ਪਿੰਡਾਂ ਵਿਚ ਪ੍ਰੋਗਰਾਮ ਕਰਕੇ ਲੋਕਾਂ ਨੂੰ ਨਾਲ ਜੋੜਨਾ ਚਾਹੀਦਾ ਹੈ। ਇਸ ਲਈ ਠੋਸ ਪ੍ਰੋਗਰਾਮ ਉਲੀਕੇ ਗਏ। ਇਸ ਸੰਬੰਧ ਵਿਚ 19 ਮਾਰਚ 2022, ਦਿਨ ਸ਼ਨੀਵਾਰ ਨੂੰ ਅੰਤਰਰਾਸ਼ਟਰੀ ਮਾਤ ਭਾਸ਼ਾ ਦਿਵਸ ਨੂੰ ਸਮਰਪਿਤ ‘ਪੰਜਾਬੀ ਮਾਤ ਭਾਸ਼ਾ ਮੇਲੇ’ ਦਾ ਆਯੋਜਿਨ ਕੀਤਾ ਜਾ ਰਿਹਾ ਹੈ ਜਿਸ ਵਿਚ ਵੱਖ ਵੱਖ ਕਾਲਜਾਂ ਦੇ ਵਿਦਿਆਰਥੀਆਂ ਦੇ  ਸਾਹਿਤਕ ਮੁਕਾਬਲੇ ਕਰਵਾਏ ਜਾਣਗੇ। 

ਅਕਾਡਮੀ ਦੇ ਪ੍ਰਧਾਨ ਡਾ. ਲਖਵਿੰਦਰ ਸਿੰਘ ਜੌਹਲ ਨੇ ਪੰਜਾਬੀ ਸਾਹਿਤ ਅਕਾਡਮੀ ਦੇ ਮੈਂਬਰਾ ਤੋਂ ਨਿਰੰਤਰਤਾ ਫੀਸ ਨਾ ਲੈਣ ਤੇ ਪੈਣ ਵਾਲਾ ਘਾਟਾ ਪੂਰਨ ਲਈ ਇਕ ਲੱਖ ਅਤੇ ਅਕਾਡਮੀ ਵਿੱਚ ਕੈਮਰੇ ਲਗਾਉਣ ਲਈ ਇਕ ਲੱਖ ਰੁਪਏ ਦੀ ਵਿੱਤੀ ਸਹਾਇਤਾ ਦਾ ਨੇੜ ਭਵਿੱਖ ਵਿੱਚ ਪ੍ਰਬੰਧ ਕਰਨ ਦੀ ਪੇਸ਼ਕਸ਼ ਕੀਤੀ। 

ਇਸ ਇਕੱਤਰਤਾ ਵਿੱਚ ਅਕਾਡਮੀ ਦੀਆਂ ਪ੍ਰਕਾਸ਼ਨਾਵਾਂ ਨੂੰ ਨਵੇਂ ਸਿਰੇ ਤੋਂ ਵਿਉਂਤਣ ਲਈ ਸਾਬਕਾ ਪ੍ਰਧਾਨ ਗੁਰਭਜਨ ਗਿੱਲ ਦੀ ਚੇਅਰਮੈਨ ਸ਼ਿਪ ਹੇਠ ਕਮੇਟੀ ਦਾ ਗਠਨ ਕੀਤਾ ਗਿਆ। ਬਦ਼ੁਰਗ ਲਿਖਾਰੀ ਸਃ ਰਘਬੀਰ ਸਿੰਘ ਭਰਤ ਮਾਛੀਵਾੜਾ ਵੱਲੋਂ ਪੋਠੋਹਾਰੀ ਲੋਕ ਗੀਤਾਂ ਦੇ ਸੰਗ੍ਰਹਿ ਅਤੇ ਜਾਃ ਗੁਰਦੇਵ ਸਿੰਘ ਸਿੱਧੂ ਵੱਲੋਂ ਪੰਜਾਬੀ ਕਿੱਸਾ ਕਾਵਿ ਸੂਚੀ ਦੇ ਪ੍ਰਕਾਸ਼ਨ ਨੂੰ ਵੀ ਪ੍ਰਵਾਨਗੀ ਦਿੱਤੀ ਗਈ। 

ਪਿਛਲੀ ਟੀਮ ਵਿੱਚ ਸ਼ਾਮਿਲ ਪ੍ਰਧਾਨ ਪ੍ਰੋਃ ਰਵਿੰਦਰ ਭੱਠਲ, ਸੀਨੀਅਰ ਮੀਤ ਪ੍ਰਧਾਨ ਸੁਰਿੰਦਰ ਕੈਲੇ ਤੇ ਜਨਰਲ ਸਕੱਤਰ ਡਾਃ ਸੁਰਜੀਤ ਵੱਲੋਂ ਕੀਤੇ ਪ੍ਰਕਾਸ਼ਨ ਕਾਰਜਾਂ, ਆਲੋਚਨਾ ਮੈਗਜ਼ੀਨ ਦੀ ਪ੍ਰਕਾਸ਼ਨਾ, ਸਰਗਰਮੀਆਂ ਲਈ ਕਰੋਨਾ ਸੰਕਟ ਦੇ ਬਾਵਜੂਦ ਕਾਰਜ ਕਰਨ ਦੀ ਸ਼ਲਾਘਾ ਕੀਤੀ ਗਈ। 

ਪੰਜਾਬੀ ਸਾਹਿਤ ਅਕਾਦਮੀ ਦੀਆਂ ਇਹਨਾਂ ਚੋਣਾਂ ਦੌਰਾਨ ਡਾਕਟਰ ਗੁਲਜ਼ਾਰ ਸਿੰਘ ਪੰਧੇਰ ਨੇ ਵੀ ਜਨਰਲ ਸਕੱਤਰ ਦੇ ਅਹੁਦੇ ਲਈ ਚੋਣ ਲੜੀ ਸੀ। ਵੋਟ ਪਰਚੀਆਂ ਦੌਰਾਨ  ਡਾ. ਗੁਲਜ਼ਾਰ ਪੰਧੇਰ ਦੇ ਨਾਮ ਨਾਲੋਂ ਪੰਧੇਰ ਸ਼ਬਦ ਹੀ ਕੱਟ ਦਿੱਤਾ ਗਿਆ। ਉਹਨਾਂ ਦੇ ਸਮਰਥਕਾਂ ਨੇ ਇਸ ਸੰਬੰਧੀ ਇਤਰਾਜ਼ ਵੀ ਕੀਤਾ ਸੀ।  ਬੋਰਡ ਦੇ ਮੈਂਬਰਾਂ ਦੀ ਪਲੇਠੀ ਮੀਟਿੰਗ ਵਿਚ ਇਸ ਬਾਰੇ ਕੀ ਹੋਇਆ ਇਸ ਬਾਰੇ ਅਜੇ ਪ੍ਰਗਟ ਤੌਰ ਤੇ ਕੁਝ ਨਹੀਂ ਦੱਸਿਆ ਗਿਆ।  

ਮਿੱਤਰ ਸੈਨ ਮੀਤ ਹੁਰੀਂ ਸਾਹਿਤਕ ਸਦਾਚਾਰ ਅਤੇ ਨੇਮਾਂ ਬਾਰੇ ਕਾਫੀ ਸਮੇਂ ਤੋਂ ਕਈ ਨੁਕਤੇ ਉਠਾਉਂਦੇ ਆ ਰਹੇ ਹਨ। ਉਹਨਾਂ ਨੇ ਪੰਜਾਬੀ ਭਵਨ ਅਤੇ ਪੰਜਾਬੀ ਸਾਹਿਤ ਅਕਾਦਮੀ ਸੰਬੰਧੀ ਵੀ ਕਾਫੀ ਕੁਝ ਆਪਣੀ ਵੈਬਸਾਈਟ 'ਤੇ ਦਰਜ ਕੀਤਾ ਹੋਇਆ ਹੈ। ਸ਼੍ਰੋਮਣੀ ਇਨਾਮਾਂ ਸ਼ਨਾਮਾਂ ਦਾ ਮਾਮਲਾ ਤਾਂ ਅਦਾਲਤ ਵਿੱਚ ਵੀ ਗਿਆ ਹੋਇਆ ਹੈ। ਪੰਜਾਬੀ ਸਾਹਿਤ ਅਕਾਦਮੀ ਮੀਤ ਹੁਰਾਂ ਦੇ ਨਾਲ ਹੈ ਜਾਂ ਵਿਰੋਧ ਵਿੱਚ ਇਸ ਬਾਰੇ ਵੀ ਪਲੇਠੀ ਮੀਟਿੰਗ ਮਗਰੋਂ ਪ੍ਰਗਟ ਤੌਰ ਤੇ ਕੁਝ ਨਹੀਂ ਦੱਸਿਆ ਗਿਆ। ਕਨਸੋਅ ਸੀ ਕਿ ਚੋਣ ਅਧਿਕਾਰੀ ਦਾ ਰਸਮੀ ਧੰਨਵਾਦ ਵੀ ਨਹੀਂ ਕੀਤਾ ਗਿਆ ਜਿਹੜਾ ਕਿ ਅਕਸਰ  ਹਰ ਵਾਰ ਹੋਇਆ ਕਰਦਾ ਹੈ। 

ਹੁਣ ਦੇਖਣਾ ਹੈ ਕਿ ਅੰਦਰਲੀਆਂ ਧੜੇਬੰਦੀਆਂ ਨੂੰ ਸਮਾਪਤ ਕਰ ਕੇ ਏਕਤਾ ਵਾਲਾ ਮਾਹੌਲ ਕਿੰਨੀ ਜਲਦੀ ਸਿਰਜਿਆ ਜਾਂਦਾ ਹੈ। ਮੈਂਬਰਸ਼ਿਪ ਦੇ ਨਿਯਮਾਂ ਬਾਰੇ ਕੋਈ ਛੋਟਾ ਦਿੱਤੀ ਜਾਂਦੀ ਹੈ ਜਾਂ ਨਹੀਂ? ਜਿਹਨਾਂ ਲੇਖਕਾਂ ਕੋਲ ਕਿਤਾਬਾਂ ਛਪਵਾਉਣ ਲਈ ਕੋਈ ਜਮਾਂ ਪੂੰਜੀ ਨਹੀਂ ਉਹਨਾਂ ਦੀਆ ਕਿਤਾਬਾਂ ਛਾਪਣ ਬਾਰੇ ਪੰਜਾਬੀ ਸਾਹਿਤ ਅਕਾਦਮੀ ਕੋਈ ਪ੍ਰਕਾਸ਼ਨ ਅਦਾਰੇ ਸਰਗਰਮੀ ਨਾਲ ਚਲਾਉਣ ਦਾ ਮਨ ਬਣਾਉਂਦੀ ਹੈ ਜਾਂ ਨਹੀਂ?

ਪੰਜਾਬੀ ਭਵਨ ਵਿਚਲੀ ਮਾਰਕੀਟ ਸਿਰਫ ਉਹਨਾਂ ਲਈ ਰਾਖਵੀਂ ਵਰਗੀ ਹੈ ਜਿਹੜੇ ਪੁਸਤਕਾਂ ਛਾਪਣ/ਵੇਚਣ ਦਾ ਵਪਾਰ ਕਰਦੇ ਹਨ ਪਰ ਸਾਹਿਤਕ ਪੱਤਰਕਾਰੀ ਕਰਨ ਵਾਲਿਆਂ ਜਾਂ ਸਾਹਿਤਿਕ ਐਡੀਸ਼ਨ ਕੱਢਣ ਵਾਲਿਆਂ ਅਖਬਾਰਾਂ ਰਸਾਲਿਆਂ ਲਈ ਅਜਿਹਾ ਕੁਝ ਵੀ ਸ਼ਾਇਦ ਰਾਖਵਾਂ ਨਹੀਂ ਹੈਂ। ਸਤਨਾਮ ਮਾਣਕ ਹੁਰਾਂ ਨੂੰ ਨਾਮਜ਼ਦ ਕੀਤੇ ਜਾਣ ਮਗਰੋਂ ਸ਼ਾਇਦ ਇਸ ਪਾਸੇ ਵੀ ਕੋਈ ਰਸਤਾ ਨਿਕਲੇ। ਇਥੇ ਹੁੰਦੇ ਸਾਹਿਤਿਕ ਸਮਾਗਮਾਂ ਦੀ ਕਵਰੇਜ ਰਿਪੋਰਟਿੰਗ ਲਈ ਵੀ ਸਾਹਿਤਿਕ ਬੀਟ ਵਾਲੇ ਪੱਤਰਕਾਰਾਂ ਲਈ ਕੋਈ ਨਿਊਜ਼ ਰੂਮ ਵਰਗੀ ਸਹੂਲਤ ਨਹੀਂ ਦਿੱਤੀ ਜਾਂਦੀ ਜਿਥੇ ਇੰਟਰਨੈਟ ਅਤੇ ਚਾਹ ਕੋਫੀ ਵਰਗੀਆਂ ਸਹੂਲਤਾਂ ਮੁਹਈਆ ਕੀਤੀਆਂ ਜਾਣ। ਜਿਹੜੇ ਪ੍ਰੈਸ ਨੋਟ ਮੀਡੀਆ ਨੂੰ  ਭੇਜੇ ਜਾਂਦੇ ਹਨ ਉਹ ਵੀ ਅਕਸਰ ਮੋਬਾਈਲ ਫੋਨਾਂ ਤੇ ਹੀ ਟਾਈਪ ਕੀਤੇ ਜਾਂਦੇ ਹਨ ਨਾ ਕਿ ਕੰਪਿਊਟਰ 'ਤੇ। ਮੋਬਾਈਲ ਤੇ ਟਾਈਪਿੰਗ ਕਰਨ ਵੇਲੇ ਅਕਸਰ ਇਹਨਾਂ ਪ੍ਰੈਸ ਨੋਟਾਂ ਦਾ ਆਕਾਰ ਅਤੇ ਮੁਹਾਂਦਰਾ ਵਿਗੜਿਆ ਹੁੰਦਾ ਹੈ। ਸਾਹਿਤਕ ਕਵਰੇਜ ਨੂੰ ਉਤਸ਼ਾਹਿਤ ਕਰਨ ਲਈ ਸਾਹਿਤਿਕ ਰਿਪੋਰਟਿੰਗ ਕਰਨ ਵਾਲੇ ਪੱਤਰਕਾਰਾਂ ਤੇ ਅਧਾਰਿਤ ਮੀਡੀਆ ਕਮੇਟੀ ਦੀ ਵੀ ਸਖਤ ਲੋੜ ਹੈ। 

ਆਉਣ ਵਾਲੇ ਸਮੇਂ ਵਿਚ ਕੁਝ ਹੋਰ ਚੁਣੌਤੀਆਂ ਵੀ ਹਨ ਜਿਹੜੀਆਂ ਸਾਹਮਣੇ ਆਉਣੀਆਂ ਅਜੇ ਬਾਕੀ ਹਨ। 

Thursday, May 25, 2017

ਪੰਜਾਬ ਪ੍ਰੈਸ ਕਲੱਬ ਦੇ ਨਤੀਜੇ ਜਗਾਉਂਦੇ ਹਨ ਨਵੀਆਂ ਉਮੀਦਾਂ

ਪ੍ਰੋਗਰੈਸਿਵ ਗਰੁੱਪ ਦੀ ਟੀਮ ਨੇ ਦੇਖਿਆ ਹੈ ਪੰਜਾਬ ਅਤੇ ਮੀਡੀਆ ਦਾ ਔਖਾ ਸਮਾਂ 
ਜਲੰਧਰ: 24 ਮਈ 2017: (ਪੰਜਾਬ ਸਕਰੀਨ ਬਿਊਰੋ):: 
ਕੰਮ ਕਰਨ ਵਾਲਿਆਂ ਲਈ ਜਿੱਤਾਂ ਹਾਰਾਂ ਕੋਈ ਬਹੁਤ ਅਰਥ ਨਹੀਂ ਰੱਖਦੀਆਂ ਪਰ ਪੰਜਾਬ ਪ੍ਰੈਸ ਕਲੱਬ ਦੇ ਨਤੀਜਿਆਂ ਨਾਲ ਪੰਜਾਬ ਦੇ ਮੀਡੀਆ ਨੇ ਇੱਕ ਨਵੀਂ ਕਰਵਟ ਲਈ ਮਹਿਸੂਸ ਹੁੰਦੀ ਹੈ। ਪਿਛਲੇ ਕੁਝ ਕੁ ਅਰਸੇ ਦੌਰਾਨ ਪ੍ਰੈਸ ਨੂੰ ਆਈਆਂ ਚੁਣੌਤੀਆਂ ਨੇ ਬੜਾ ਅਜੀਬ ਜਿਹਾ ਮਾਹੌਲ ਬਣਾ ਦਿੱਤਾ ਸੀ। ਮੀਡੀਆ ਵਿੱਚ ਕਈ ਤਰਾਂ ਦੀ ਵੰਡ ਜਿਹੀ ਮਹਿਸੂਸ ਹੋਣ ਲੱਗ ਪੈ ਸੀ ਜਿਸਦੀ ਅਸੀਂ ਇਥੇ ਚਰਚਾ ਨਹੀਂ ਕਰਨੀ ਪਰ ਅਫਸੋਸ ਹੈ ਕਿ ਮੀਡੀਆ ਵਾਲੇ ਹੀ ਖੁਦ ਆਪਣੇ ਭਾਈਚਾਰੇ ਦੇ ਮੈਂਬਰਾਂ ਨੂੰ ਛੋਟਾ ਵੱਡਾ ਕਰਕੇ ਦੇਖਣ ਲੱਗ ਪਏ ਸਨ। ਉਮੀਦ ਹੈ ਇਹਨਾਂ ਨਤੀਜਿਆਂ ਮਗਰੋਂ ਵਾਗਡੋਰ ਸੰਭਾਲਣ ਵਾਲੀ ਲਖਵਿੰਦਰ ਜੋਹਲ ਹੁਰਾਂ ਦੀ ਟੀਮ ਇਸ ਸਾਰੀ ਸਥਿਤੀ ਵਿੱਚ ਹਾਂ ਪੱਖੀ ਮੋੜਾ ਲਿਆਵੇਗੀ ਅਤੇ ਪੰਜਾਬ ਪ੍ਰੈਸ ਕਲੱਬ ਦੀਆਂ ਸ਼ਾਖਾਵਾਂ ਪੰਜਾਬ ਦੇ ਬਾਕੀ ਹਿੱਸਿਆਂ ਵਿੱਚ ਵੀ ਖੁੱਲਣਗੀਆਂ। ਇਸ ਟੀਮ ਨੇ ਪੰਜਾਬ ਦੇ ਨਾਜ਼ੁਕ ਸਮੇਂ ਨੂੰ ਬੜਾ ਨੇੜਿਉਂ ਹੋ ਕੇ ਦੇਖਿਆ ਹੈ ਇਸ ਲਈ ਇਸ ਟੀਮ ਕੋਲੋਂ ਉਮੀਦਾਂ ਵੀ ਕਾਫੀ ਹਨ। 
ਇਹਨਾਂ ਨਤੀਜਿਆਂ ਮੁਤਾਬਿਕ ਪਿਛਲੇ ਲੰਬੇ ਸਮੇਂ ਤੋਂ ਪ੍ਰਿੰਟ ਅਤੇ ਬਿਜਲਈ ਮੀਡੀਆ ਨਾਲ ਪੂਰੀ ਤਰ੍ਹਾਂ ਜੁੜੇ ਡਾ. ਲਖਵਿੰਦਰ ਸਿੰਘ ਜੌਹਲ ਪੰਜਾਬ ਪ੍ਰੈੱਸ ਕਲੱਬ ਜਲੰਧਰ ਦੇ ਨਵੇਂ ਪ੍ਰਧਾਨ ਚੁਣੇ ਗਏ ਹਨ। ਪ੍ਰੈੱਸ ਕਲੱਬ ਦੀਆਂ ਹੋਈਆਂ ਚੋਣਾਂ 'ਚ ਉਨ੍ਹਾਂ ਨੇ ਆਪਣੇ ਵਿਰੋਧੀ ਉਮੀਦਵਾਰ ਮੀਡੀਆ ਯੂਨਿਟੀ ਗਰੁੱਪ ਦੇ ਡਾ. ਸੁਰਿੰਦਰਪਾਲ ਨੂੰ 31 ਵੋਟਾਂ ਦੇ ਫਰਕ ਨਾਲ ਹਰਾਇਆ। ਡਾ. ਲਖਵਿੰਦਰ ਸਿੰਘ ਜੌਹਲ ਨੂੰ 99 ਵੋਟਾਂ ਪਈਆਂ ਜਦਕਿ ਡਾ. ਸੁਰਿੰਦਰਪਾਲ ਨੂੰ 68 ਅਤੇ ਫਰੀਡਮ ਗਰੁੱਪ ਦੇ ਸੁਨੀਲ ਰੁਦਰਾ 63 ਵੋਟਾਂ ਲੈ ਕੇ ਤੀਸਰੇ ਸਥਾਨ 'ਤੇ ਰਹੇ। ਇਨ੍ਹਾਂ ਚੋਣਾਂ 'ਚ ਡਾ. ਲਖਵਿੰਦਰ ਸਿੰਘ ਜੌਹਲ ਦੀ ਅਗਵਾਈ ਵਾਲੇ ਪ੍ਰੋਗਰੈਸਿਵ ਗਰੁੱਪ ਨੇ ਸ਼ਾਨਦਾਰ ਜਿੱਤ ਹਾਸਿਲ ਕਰਦੇ ਹੋਏ ਸਾਰੇ ਅਹੁਦਿਆਂ 'ਤੇ ਕਬਜ਼ਾ ਕੀਤਾ। ਪ੍ਰੋਗਰੈਸਿਵ ਗਰੁੱਪ ਦੇ ਚੁਣੇ ਗਏ ਹੋਰਨਾਂ ਅਹੁਦੇਦਾਰਾਂ ਵਿਚ ਸੀਨੀਅਰ ਮੀਤ ਪ੍ਰਧਾਨ ਸ੍ਰੀ ਮਨਦੀਪ ਸ਼ਰਮਾ ਨੇ ਆਪਣੇ ਵਿਰੋਧੀ ਉਮੀਦਵਾਰ ਪਰਮਜੀਤ ਸਿੰਘ ਰੰਗਪੁਰੀ ਨੂੰ 33, ਜਨਰਲ ਸਕੱਤਰ ਮੇਜਰ ਸਿੰਘ ਨੇ ਰਾਜੀਵ ਭਾਸਕਰ ਨੂੰ 43, ਮੀਤ ਪ੍ਰਧਾਨ ਰਾਜੇਸ਼ ਯੋਗੀ ਨੇ ਅਸ਼ਵਨੀ ਖੁਰਾਣਾ ਨੂੰ 3, ਜੁਆਇੰਟ ਸਕੱਤਰ ਸੰਜੀਵ ਟੋਨੀ ਨੇ ਸਰਬਜੀਤ ਸਿੰਘ ਕਾਕਾ ਨੂੰ 25 ਅਤੇ ਖਜ਼ਾਨਚੀ ਸ਼ਿਵ ਸ਼ਰਮਾ ਨੇ ਆਪਣੇ ਵਿਰੋਧੀ ਉਮੀਦਵਾਰ ਮਹਾਂਬੀਰ ਸੇਠ ਨੂੰ 43 ਵੋਟਾਂ ਨਾਲ ਹਰਾਇਆ। ਵੋਟਾਂ ਪੈਣ ਤੋਂ ਬਾਅਦ ਚੋਣ ਅਧਿਕਾਰੀ ਉੱਘੇ ਪੱਤਰਕਾਰ ਸਤਨਾਮ ਸਿੰਘ ਮਾਣਕ, ਆਈ. ਪੀ. ਸਿੰਘ ਅਤੇ ਰਚਨਾ ਖਹਿਰਾ ਵੱਲੋਂ ਚੋਣ ਨਤੀਜਿਆਂ ਦਾ ਐਲਾਨ ਕੀਤਾ ਗਿਆ ਤਾਂ ਪ੍ਰੋਗਰੈਸਿਵ ਗਰੁੱਪ ਦੇ ਮੈਂਬਰਾਂ 'ਚ ਖੁਸ਼ੀ ਦੀ ਲਹਿਰ ਦੌੜ ਗਈ ਤੇ ਉਨ੍ਹਾਂ ਨੇ ਡਾ. ਜੌਹਲ ਸਮੇਤ ਗਰੁੱਪ ਦੇ ਹੋਰਨਾਂ ਜੇਤੂ ਉਮੀਦਵਾਰਾਂ ਨੂੰ ਮੋਢਿਆਂ 'ਤੇ ਚੁੱਕ ਕੇ ਆਪਣੀ ਖੁਸ਼ੀ ਦਾ ਪ੍ਰਗਟਾਵਾ ਕੀਤਾ। ਇਸ ਦੌਰਾਨ ਪੱਤਰਕਾਰ ਭਾਈਚਾਰੇ ਵਲੋਂ ਡਾ. ਜੌਹਲ ਦੀ ਅਗਵਾਈ ਵਾਲੀ ਸਮੁੱਚੀ ਟੀਮ ਨੂੰ ਫੁੱਲਾਂ ਦੇ ਹਾਰਾਂ ਨਾਲ ਲੱਦ ਦਿੱਤਾ ਗਿਆ ਤੇ ਮਠਿਆਈ ਵੰਡੀ ਗਈ। ਇਸ ਮੌਕੇ ਨਵੇਂ ਚੁਣੇ ਗਏ ਪ੍ਰਧਾਨ ਡਾ. ਲਖਵਿੰਦਰ ਸਿੰਘ ਜੌਹਲ ਨੇ ਵੋਟਰਾਂ ਤੇ ਸਮੂਹ ਪੱਤਰਕਾਰ ਭਾਈਚਾਰੇ ਦਾ ਧੰਨਵਾਦ ਕਰਦੇ ਹੋਏ ਕਿਹਾ ਕਿ ਉਹ ਪੱਤਰਕਾਰਾਂ ਦੀ ਬਿਹਤਰੀ ਲਈ ਬਿਨਾਂ ਕਿਸੇ ਭੇਦਭਾਵ ਦੇ ਸਾਰਿਆਂ ਨੂੰ ਨਾਲ ਲੈ ਕੇ ਚੱਲਣਗੇ। ਉਮੀਦ ਹੈ ਕਿ ਇਸ ਟੀਮ ਦੀ ਜਿੱਤ ਨਾਲ ਪੱਤਰਕਾਰ ਭਾਈਚਾਰੇ ਦੀ ਏਕਤਾ ਅਤੇ ਸ਼ਕਤੀ ਹੋਰ ਮਜ਼ਬੂਤ ਹੋਵੇਗੀ। 

Wednesday, September 21, 2016

ਐਂਕਰ ਤੋਂ ਪੰਜਾਬ ਆਰਟਸ ਕੌਂਸਲ ਦੀ ਚੇਅਰਮੈਨੀ ਤੱਕ ਸਤਿੰਦਰ ਸੱਤੀ

ਕਈ ਨਾਮੀ ਵਿਦਵਾਨਾਂ ਨੂੰ ਅੱਖੋਂ ਪਰੋਖੇ ਕਰਕੇ ਹੋਈ ਨਿਯੁਕਤੀ 
ਚੰਡੀਗੜ੍ਹ: 20 ਸਤੰਬਰ 2016: (ਪੰਜਾਬ ਸਕਰੀਨ ਬਿਊਰੋ): 
ਵਿਵਾਦਾਂ ਦੇ ਬਾਵਜੂਦ ਸਤਿੰਦਰ ਸੱਤੀ ਦੇ ਨਾਮ ਦਾ ਰਸਮੀ ਐਲਾਨ ਹੋ ਗਿਆ ਹੈ। ਇਸ ਮਕਸਦ ਲਈ ਚੰਡੀਗੜ੍ਹ ਵਿੱਚ ਤਕਰੀਬਨ ਸਾਰੀਆਂ ਸਬੰਧਿਤ ਧਿਰਾਂ ਮੌਜੂਦ ਸਨ। ਪੰਜਾਬ ਕਲਾ ਪ੍ਰੀਸ਼ਦ ਚੰਡੀਗੜ੍ਹ ਦੀ ਮਿਆਦ ਜੋ ਇਸ ਸਾਲ 29 ਜੁਲਾਈ ਨੂੰ ਖ਼ਤਮ ਹੋ ਗਈ ਸੀ ਅੱਜ ਉਸ ਦਾ ਪੁਨਰਗਠਨ ਕਰਦੇ ਹੋਏ ਉੱਘੀ ਮੰਚ ਸੰਚਾਲਕ, ਅਦਾਕਾਰਾ ਤੇ ਗਾਇਕਾ ਸਤਿੰਦਰ ਸੱਤੀ ਨੂੰ ਪੰਜਾਬ ਕਲਾ ਪ੍ਰੀਸ਼ਦ ਦਾ 3 ਸਾਲਾਂ ਲਈ ਚੇਅਰਪਰਸਨ ਲਗਾਇਆ ਗਿਆ ਹੈ। ਇਨ੍ਹਾਂ ਤੋਂ ਇਲਾਵਾ ਇਸ ਪ੍ਰੀਸ਼ਦ 'ਚ ਉੱਘੇ ਉਦਯੋਗਪਤੀ ਇੰਜ: ਸੁਰਿੰਦਰ ਸਿੰਘ ਵਿਰਦੀ ਨੂੰ ਉਪ ਚੇਅਰਮੈਨ ਬਣਾਇਆ ਗਿਆ ਹੈ, ਜਦੋਂਕਿ ਕਲਾ ਖੇਤਰ ਨਾਲ ਲੰਬੇ ਸਮੇਂ ਤੋਂ ਜੁੜੇ ਆ ਰਹੇ ਸ. ਲਖਵਿੰਦਰ ਸਿੰਘ ਜੌਹਲ ਨੂੰ ਪੰਜਾਬ ਆਰਟਸ ਕੌਂਸਲ ਚੰਡੀਗੜ੍ਹ ਦਾ ਸਕੱਤਰ ਜਨਰਲ ਲਗਾਇਆ ਗਿਆ ਹੈ। 
ਚੇਤੇ ਰਹੇ ਕਿ ਸੱਤੀ ਦੇ ਨਾਮ ਨੂੰ ਲੈ ਕੇ ਕਾਫੀ ਵਾਵੇਲਾ ਹੋਇਆ ਸੀ। ਉੱਘੀ ਲੇਖਿਕਾ ਮਨਜੀਤ ਇੰਦਰਾ ਨੇ ਇਸ ਨਾਮ 'ਤੇ ਖੁਲ੍ਹਾ ਇਤਰਾਜ਼ ਉਠਾਇਆ ਸੀ। ਉਸਨੇ ਸਾਫ ਕਿਹਾ ਸੀ ਕਿ ਸੱਤੀ ਸਾਹਿਤ ਅਤੇ ਕਲਾ ਦਾ ਕੁਝ ਨਹੀਂ ਸੰਵਾਰ ਸਕਦੀ। ਕਾਬਿਲੇ ਜ਼ਿਕਰ ਹੈ ਕਿ ਸਤਿੰਦਰ ਸੱਤੀ ਨੇ ਕੁੱਝ ਸਮਾਂ ਪਹਿਲਾਂ ਹੀ ਅਕਾਲੀ ਦਲ ਵਿਚ ਸ਼ਮੂਲੀਅਤ ਕੀਤੀ ਸੀ ਅਤੇ ਸਿਆਸਤ ਦੀ ਪਹਿਲੀ ਪੌੜੀ ਚੜ੍ਹਦਿਆਂ ਹੀ ਉਸ ਨੇ ਇਹ ਵਕਾਰੀ ਅਹੁਦਾ ਹਾਸਲ ਕਰ ਲਿਆ ਹੈ। ਸਾਹਿਤਕਾਰਾਂ ਨੇ ਕਲਾ ਪ੍ਰੀਸ਼ਦ ਦੇ ਵਕਾਰੀ ਅਹੁਦੇ ਜਿਸ 'ਤੇ ਐਮ.ਐਸ. ਰੰਧਾਵਾ, ਕੁਲਵੰਤ ਸਿੰਘ ਵਿਰਕ, ਸਰਦਾਰ ਅੰਜੁਮ, ਕਰਤਾਰ ਸਿੰਘ ਦੁੱਗਲ ਵਰਗੀਆਂ ਸ਼ਖ਼ਸੀਅਤਾਂ ਬਿਰਾਜਮਾਨ ਰਹੀਆਂ ਹਨ, ਲਈ ਸਤਿੰਦਰ ਸੱਤੀ ਨੂੰ ਅਯੋਗ ਦਸਿਆ ਹੈ। ਉਧਰ, ਸਭਿਆਚਾਰਕ ਮਾਮਲੇ ਵਿਭਾਗ ਦੇ ਮੰਤਰੀ ਸੋਹਣ ਸਿੰਘ ਠੰਡਲ ਦਾ ਕਹਿਣਾ ਹੈ ਕਿ ਸਤਿੰਦਰ ਸੱਤੀ 'ਚ ਐਂਕਰਿੰਗ ਤੋਂ ਇਲਾਵਾ ਹੋਰ ਵੀ ਪ੍ਰਤਿਭਾ ਹੈ। 
ਸਤਿੰਦਰ ਸੱਤੀ ਦਾ ਜਨਮ ਬਟਾਲਾ ਵਿਖੇ ਹੋਇਆ। ਸੱਤੀ ਨੇ ਐਲ.ਐਲ.ਐਮ (ਵਕਾਲਤ ਦੀ ਉੱਚ ਡਿਗਰੀ) ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ, ਅੰਮ੍ਰਿਤਸਰ ਤੋਂ ਹਾਸਲ ਕੀਤੀ। ਉਸ ਸਮੇਂ ਸੱਤੀ ਨੂੰ ਵੀ ਨਹੀਂ ਸੀ ਪਤਾ ਸੀ ਕਿ ਉਹ ਇਸ ਵੱਕਾਰੀ ਅਹੁਦੇ ਦੀ ਚੇਅਰਮੈਨੀ ਤੱਕ ਜਾ ਪੁੱਜੇਗੀ। ਸੱਤੀ ਨੂੰ ਜਲੰਧਰ ਦੂਰਦਰਸ਼ਨ ਦੇ ‘ਲਿਸ਼ਕਾਰਾ’ ਪ੍ਰੋਗਰਾਮ ਵਿੱਚ ਪਹਿਲਾ ਮੌਕਾ ਐਂਕਰ ਵਜੋਂ ਮਿਲਿਆ ਜੋ ਸੱਤੀ ਦੇ ਕਰੀਅਰ ਲਈ ਮੀਲ ਪੱਥਰ ਸਾਬਤ ਹੋਇਆ। 
ਉਨ੍ਹਾਂ ਕਿਹਾ ਕਿ ਕਾਰਜਕਾਰਣੀ ਦੀ ਮੀਟਿੰਗ ਵਿਚ ਇਹ ਫ਼ੈਸਲਾ ਕੀਤਾ ਗਿਆ ਹੈ ਤੇ ਹੁਣ ਕਿੰਤੂ ਪ੍ਰੰਤੂ ਨਹੀਂ ਕੀਤਾ ਜਾ ਸਕਦਾ।  ਇਸ ਮੌਕੇ 'ਤੇ ਪੰਜਾਬ ਦੇ ਸੱਭਿਆਚਾਰਕ ਮਾਮਲਿਆਂ ਦੇ ਮੰਤਰੀ ਸ. ਸੋਹਣ ਸਿੰਘ ਠੰਡਲ, ਡਾਇਰੈਕਟਰ ਸੱਭਿਆਚਾਰਕ ਮਾਮਲਿਆਂ ਪੰਜਾਬ ਨਵਜੋਤਪਾਲ ਸਿੰਘ ਰੰਧਾਵਾ, ਡਾ. ਸਰਬਜੀਤ ਕੌਰ ਸੋਹਲ, ਨਿਰਮਲ ਜੌੜਾ, ਡਾ. ਸਤੀਸ਼ ਵਰਮਾ, ਗੁਰਮੀਤ ਜੌੜਾ ਆਦਿ ਨੇ ਵੀ ਸ਼ਿਰਕਤ ਕੀਤੀ।  ਪੰਜਾਬ ਕਲਾ ਪ੍ਰੀਸ਼ਦ ਦੇ ਗਠਨ ਨਾਲ ਹੀ ਪ੍ਰੀਸ਼ਦ ਤਹਿਤ ਕੰਮ ਕਰ ਰਹੀਆਂ 3 ਅਕਾਦਮੀਆਂ ਦਾ ਵੀ ਗਠਨ ਕੀਤਾ ਗਿਆ ਹੈ। ਇਸ 'ਚ ਪੰਜਾਬ ਸੰਗੀਤ ਨਾਟਕ ਅਕਾਦਮੀ ਦਾ ਉੱਘੇ ਰੰਗਕਰਮੀ ਕੇਵਲ ਧਾਲੀਵਾਲ ਨੂੰ ਪ੍ਰਧਾਨ, ਨਿਰਮਲ ਜੋੜਾ ਨੂੰ ਮੀਤ ਪ੍ਰਧਾਨ ਤੇ ਪ੍ਰੀਤਮ ਰੁਪਾਲ ਨੂੰ ਇਸ ਅਕਾਦਮੀ ਦਾ ਸਕੱਤਰ ਬਣਾਇਆ ਗਿਆ ਹੈ। ਪੰਜਾਬ ਸਾਹਿਤ ਅਕਾਦਮੀ ਦੀ ਪ੍ਰਧਾਨ ਵਜੋਂ ਜ਼ਿੰਮੇਵਾਰੀ ਉੱਘੀ ਲੇਖਿਕਾ ਡਾ. ਸਰਬਜੀਤ ਕੌਰ ਸੋਹਲ ਨੂੰ ਸੌਾਪੀ ਗਈ ਹੈ, ਜਦਕਿ ਸਮਾਜ ਸੇਵੀ ਗੁਰਮੀਤ ਜੌੜਾ ਨੂੰ ਮੀਤ ਪ੍ਰਧਾਨ ਤੇ ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਦੇ ਜ਼ਰੀਏ ਚੰਗਾ ਨਾਮਣਾ ਖੱਟਣ ਵਾਲੀ ਸ਼ਖ਼ਸੀਅਤ ਡਾ. ਸਤੀਸ਼ ਵਰਮਾ ਨੂੰ ਇਸ ਅਕਾਦਮੀ ਦਾ ਸਕੱਤਰ ਬਣਾਇਆ ਗਿਆ ਹੈ। ਇਸੇ ਤਰ੍ਹਾਂ ਕਲਾ ਪ੍ਰੀਸ਼ਦ ਤਹਿਤ ਕੰਮ ਕਰਨ ਵਾਲੀ ਲਲਿਤ ਕਲਾ ਅਕਾਦਮੀ 'ਚ ਦੀਵਾਨ ਮੰਨਾ ਨੂੰ ਪ੍ਰਧਾਨ, ਪ੍ਰਮੁੱਖ ਚਿੱਤਰਕਾਰ ਮਲਕੀਅਤ ਸਿੰਘ ਨੂੰ ਉਪ ਪ੍ਰਧਾਨ ਤੇ ਸ੍ਰੀਮਤੀ ਸਾਧਨਾ ਸੰਗਰ ਨੂੰ ਸਕੱਤਰ ਬਣਾਇਆ ਗਿਆ ਹੈ। ਇਸੇ ਤਰ੍ਹਾਂ ਪੰਜਾਬ ਕਲਾ ਪ੍ਰੀਸ਼ਦ ਦੀ ਸਟੇਟ ਬਾਡੀ ਦੀ ਕਾਰਜਕਾਰਨੀ ਵੀ ਬਣਾਈ ਗਈ। ਜਿਸ 'ਚ ਪੰਜਾਬ ਕਲਾ ਪ੍ਰੀਸ਼ਦ ਦੇ ਤਿੰਨੋ ਅਹੁਦੇਦਾਰ (ਸਤਿੰਦਰ ਸੱਤੀ, ਇੰਜ: ਐਸ.ਐਸ.ਵਿਰਦੀ ਤੇ ਲਖਵਿੰਦਰ ਜੌਹਲ) ਤੋਂ ਇਲਾਵਾ ਤਿੰਨੋ ਅਕਾਦਮੀਆਂ ਦੇ ਪ੍ਰਧਾਨ, ਸਕੱਤਰ ਕਲਚਰਲ ਤੇ ਸਕੱਤਰ ਵਿੱਤ ਪੰਜਾਬ ਸਰਕਾਰ, ਦੇ ਨਾਲ-ਨਾਲ ਵੱਖੋ-ਵੱਖ ਖੇਤਰਾਂ 'ਚ ਨਾਮੀਂ ਸ਼ਖ਼ਸੀਅਤਾਂ ਵਿਚ ਸਟੇਟ ਐਵਾਰਡੀ ਡਾ. ਦਵਿੰਦਰ ਸਿੰਘ ਛੀਨਾ, ਡਾ. ਸਤੀਸ਼ ਵਰਮਾ ਤੇ ਕਿਰਨਜੀਤ ਕੌਰ ਧਾਮੀ (ਹੁਸ਼ਿਆਰਪੁਰ) ਨੂੰ ਇਸ ਸਟੇਟ ਬਾਡੀ ਵਿਚ ਸ਼ਾਮਿਲ ਕੀਤਾ ਗਿਆ ਹੈ। ਇਸ ਮੌਕੇ 'ਤੇ ਸਤਿੰਦਰ ਸੱਤੀ ਨੂੰ ਚੇਅਰਪਰਸਨ ਦੀ ਕੁਰਸੀ 'ਤੇ ਬਿਠਾਉਂਦੇ ਹੋਏ ਸੱਭਿਆਚਾਰਕ ਮਾਮਲਿਆਂ ਦੇ ਮੰਤਰੀ ਸ. ਸੋਹਣ ਸਿੰਘ ਠੰਡਲ ਨੇ ਕਿਹਾ ਕਿ ਸਾਡੇ ਸੱਭਿਆਚਾਰ ਤੇ ਕਲਾ ਨੂੰ ਨਵੀਂ ਪੀੜੀ ਤੱਕ ਪਹੁੰਚਾਉਣ ਦੇ ਠੋਸ ਉਪਰਾਲੇ ਕੀਤੇ ਜਾਣਗੇ। ਇਸ ਮੌਕੇ ਸਤਿੰਦਰ ਸੱਤੀ ਨੇ ਆਪਣਾ ਅਹੁਦਾ ਸੰਭਾਲਦੇ ਹੋਏ ਕਿਹਾ ਕਿ ਉਹ ਪੰਜਾਬ ਸਰਕਾਰ ਵੱਲੋਂ ਸੱਭਿਆਚਾਰਕ ਖੇਤਰ 'ਚ ਕੀਤੇ ਜਾ ਰਹੇ ਉਪਰਾਲਿਆਂ ਦੇ ਨਾਲ ਪੰਜਾਬ ਦੀ ਸੱਭਿਆਚਾਰ ਨੀਤੀ ਬਣਾਉਣ ਲਈ ਪਹਿਲ ਦੇ ਆਧਾਰ 'ਤੇ ਤਵੱਜੋਂ ਦੇਵੇਗੀ। ਇਸੇ ਦੌਰਾਨ ਕੌਂਸਲ ਦੇ ਉਪ ਚੇਅਰਮੈਨ ਇੰਜ: ਐਸ.ਐਸ. ਵਿਰਦੀ ਨੇ ਕਿਹਾ ਪੰਜਾਬ ਦੇ ਸੱਭਿਆਚਾਰ ਨੂੰ ਪਿੰਡ-ਪਿੰਡ ਤੱਕ ਲਿਜਾਉਣ ਦੇ ਯਤਨ ਕੀਤੇ ਜਾਣਗੇ। ਅੱਜ ਦੀ ਇਸ ਵਿਸ਼ੇਸ਼ ਇਕੱਤਰਤਾ 'ਚ ਪੰਜਾਬ ਯੂਨੀਵਰਸਿਟੀ ਚੰਡੀਗੜ੍ਹ, ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ ਅੰਮਿ੍ਤਸਰ, ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ, ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਲੁਧਿਆਣਾ ਦੇ ਉਪ-ਕੁਲਪਤੀਆਂ ਵੱਲੋਂ ਆਪਣੇ ਨੁਮਾਂਇੰਦੇ ਭੇਜੇ ਗਏ ਉੱਥੇ ਖੇਤਰੀ ਡਾਇਰੈਕਟਰ ਆਈ.ਸੀ.ਸੀ.ਆਰ ਸ੍ਰੀਮਤੀ ਨਲਿਨੀ ਸਿੰਘਲ ਆਦਿ ਵੀ ਹਾਜ਼ਰ ਸਨ।