Showing posts with label Team Pics. Show all posts
Showing posts with label Team Pics. Show all posts

Wednesday, March 02, 2022

ਪੰਜਾਬੀ ਸਾਹਿਤ ਅਕਾਦਮੀ ਲੁਧਿਆਣਾ ਦਾ ਨਵਾਂ ਚੈਪਟਰ ਸ਼ੁਰੂ

2nd March 2022 at 6:34 PM Via WhatsApp  

ਨਵੀਂ ਟੀਮ ਨੇ ਪਲੇਠੀ ਮੀਟਿੰਗ ਵਿੱਚ ਦਿਖਾਈ ਆਪਣੇ ਬਲਿਊ ਪ੍ਰਿੰਟ ਦੀ ਝਲਕ 


ਲੁਧਿਆਣਾ
: 2 ਮਾਰਚ 2022: (ਪੰਜਾਬ ਸਕਰੀਨ ਡੈਸਕ)::

ਨਵੀਂ ਚੋਣ ਅਤੇ ਅਹੁਦਿਆਂ ਦੀਆਂ ਨਿਯੁਕਤੀਆਂ ਮਗਰੋਂ ਉਡੀਕ ਸੀ ਕਿ ਹੁਣ ਪੰਜਾਬੀ ਸਾਹਿਤ ਅਕਾਦਮੀ ਦੀ ਨਵੀਂ ਟੀਮ ਕੀ ਕੀ ਕਰੇਗੀ? ਕਿਹੜੇ ਕਿਹੜੇ ਕਦਮ ਚੁੱਕੇਗੀ? ਪੰਜਾਬੀ ਭਵਨ ਅਤੇ ਪੰਜਾਬੀ ਸਾਹਿਤ ਅਕਾਦਮੀ ਸੰਬੰਧੀ ਹੁੰਦੀਆਂ ਚਿਰਾਂ ਤੋਂ ਹੁੰਦੀਆਂ ਆ ਰਹੀਆਂ ਸਰਗੋਸ਼ੀਆਂ ਵੱਲ ਕੰਨ ਧਰੀਏ ਤਾਂ ਅਜਿਹਾ ਕਾਫੀ ਕੁਝ ਸੀ ਜਿਸ ਬਾਰੇ ਲੁੜੀਂਦੇ ਕਦਮ ਚੁੱਕੇ ਜਾਣ ਦੀ ਲੋੜ ਮਹਿਸੂਸ ਕੀਤੀ ਜਾ ਰਹੀ ਹੈ। ਕੁਝ ਕਦਮ ਚੁੱਕੇ ਵੀ ਗਏ ਹਨ ਅਤੇ ਕੁਝ ਅਜੇ ਬਾਕੀ ਵੀ ਹਨ। ਪੰਜਾਬੀ ਸਾਹਿਤ ਅਕਾਡਮੀ, ਲੁਧਿਆਣਾ ਦੇ ਪ੍ਰਬੰਧਕੀ ਬੋਰਡ ਦੀ ਇਹ ਬੇਹੱਦ ਮਹੱਤਵਪੂਰਨ ਅਤੇ ਪਲੇਠੀ ਇਕੱਤ੍ਰਤਾ ਪੰਜਾਬੀ ਭਵਨ, ਲੁਧਿਆਣਾ ਵਿਖੇ ਅਕਾਡਮੀ ਦੇ ਪ੍ਰਧਾਨ ਡਾ. ਲਖਵਿੰਦਰ ਸਿੰਘ ਜੌਹਲ ਦੀ ਪ੍ਰਧਾਨਗੀ ਹੇਠ ਹੋਈ ਜਿਸ ਵਿੱਚ ਅਕਾਡਮੀ ਦੇ ਨਵ-ਨਿਯੁਕਤ ਅਹੁਦੇਦਾਰਾਂ ਅਤੇ ਪ੍ਰਬੰਧਕੀ ਬੋਰਡ ਦੇ ਮੈਂਬਰ ਆਪੋ ਆਪਣੇ ਧੜਿਆਂ ਦੀ ਨੁਮਾਂਇੰਦਗੀ ਦਾ ਅਹਿਸਾਸ ਕਰਾਉਂਦੇ ਹੋਏ ਸ਼ਾਮਲ ਹੋਏ। ਇਸ ਪਲੇਠੀ ਇਕੱਤ੍ਰਤਾ ਵਿਚ ਪਿਛਲੇ ਸਮੇਂ ਦੌਰਾਨ ਵਿਛੜ ਚੁੱਕੇ ਲੇਖਕ ਮੈਂਬਰਾਂ ਅਤੇ ਉਨ੍ਹਾਂ ਦੇ ਸਕੇ ਸੰਬੰਧੀਆਂ ਬਾਰੇ ਦਾ ਮੌਨ ਧਾਰ ਕੇ ਸ਼ਰਧਾਂਜਲੀ ਭੇਟ ਕੀਤੀ ਗਈ।

ਇਸ ਮੀਟਿੰਗ ਦੌਰਾਨ 2021 ਵਿਚ ਭਾਰਤੀ ਸਾਹਿਤ ਅਕਾਡਮੀ ਵੱਲੋਂ ਅਕਾਡਮੀ ਦੇ ਜੀਵਨ ਮੈਂਬਰ ਜਨਾਬ ਖ਼ਾਲਿਦ ਹੁਸੈਨ ਨੂੰ ਉਨ੍ਹਾਂ ਦੀ ਕਹਾਣੀਆਂ ਦੀ ਪੁਸਤਕ ‘ਸੂਲਾਂ ਦਾ ਸਾਲਣ’’’ਤੇ ਪੁਰਸਕਾਰ ਦੇਣ ਤੇ ਅਕਾਡਮੀ ਵੱਲੋਂ ਵਧਾਈ ਦਿੱਤੀ ਗਈ ਅਤੇ ਪੰਜਾਬ ਕਲਾ ਪਰਿਸ਼ਦ ਵੱਲੋਂ ਸਾਹਿਤਕਾਰਾਂ, ਕਲਾ ਪ੍ਰੇਮੀਆਂ ਨੂੰ ਗੌਰਵ ਪੰਜਾਬ ਦਾ ਪੁਰਸਕਾਰ ਮਿਲਣ ’ਤੇ ਵਧਾਈ ਦਿੱਤੀ ਗਈ।  ਹੁਣ ਸਾਲ 2022-2024 ਦੋ ਸਾਲਾਂ ਲਈ ਪੰਜਾਬੀ ਸਾਹਿਤ ਅਕਾਡਮੀ, ਲੁਧਿਆਣਾ ਦੀਆਂ ਗਤੀ ਵਿਧੀਆਂ, ਸਰਗਰਮੀਆਂ, ਸੈਮੀਨਾਰ, ਕਾਨਫ਼ੰਰਸ, ਸਾਹਿਤ ਉਤਸਵ, ਰੂ-ਬ-ਰੂ ਸਮਾਗਮਾਂ ਲਈ ਸਰਬਸੰਮਤੀ ਨਾਲ ਕਮੇਟੀਆਂ ਦਾ ਗਠਿਨ ਕੀਤਾ ਗਿਆ ਤੇ ਕਮੇਟੀਆਂ ਦੇ ਕਨਵੀਨਰ ਥਾਪ ਕੇ ਉਨ੍ਹਾਂ ਨੂੰ ਯੋਜਨਾਬੱਧ ਤਰੀਕੇ ਨਾਲ ਅਕਾਡਮੀ ਦੇ ਪ੍ਰੋਗਰਾਮ ਕਰਨ ਲਈ ਬੇਨਤੀ ਕੀਤੀ ਗਈ।

ਇਸ ਮੌਕੇ ਅਕਾਡਮੀ ਦੇ ਪ੍ਰਧਾਨ ਡਾ. ਲਖਵਿੰਦਰ ਸਿੰਘ ਜੌਹਲ ਨੇ ਪ੍ਰਬੰਧਕੀ ਬੋਰਡ ਲਈ ਸਾਹਿਤ ਅਤੇ ਸਭਿਆਚਾਰ ਨਾਲ ਜੁੜੀਆਂ ਤਿੰਨ ਸ਼ਖ਼ਸੀਅਤਾਂ ਡਾ. ਸ. ਪ. ਸਿੰਘ ਜੀ ਸਾਬਕਾ ਉਪ-ਕੁਲਪਤੀ, ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ, ਅੰਮ੍ਰਿਤਸਰ, ਸਤਨਾਮ ਮਾਣਕ ਤੇ, ਨਾਮਵਰ ਕਹਾਣੀ ਲੇਖਕ ਸ੍ਰੀ ਸੁਖਜੀਤ ਮਾਛੀਵਾੜਾ ਨੂੰ ਦੋ ਸਾਲ ਲਈ ਕਾਰਜਕਾਰਨੀ ਦਾ ਮੈਂਬਰ ਨਾਮਜ਼ਦ ਕੀਤਾ। ਜਨਰਲ ਸਕੱਤਰ ਡਾ. ਗੁਰਇਕਬਾਲ ਸਿੰਘ ਦੀ ਸਿਫ਼ਾਰਸ਼ ’ਤੇ ਪ੍ਰਬੰਧਕੀ ਬੋਰਡ ਨੇ ਸਰਬਸੰਮਤੀ ਨਾਲ ਤਿੰਨ ਸਕੱਤਰ ਡਾ. ਗੁਰਚਰਨ ਕੌਰ ਕੋਚਰ, ਸ. ਬਲਦੇਵ ਸਿੰਘ ਝੱਜ ਸਕੱਤਰ, ਸ੍ਰੀ ਕੇ. ਸਾਧੂ ਸਿੰਘ ਨਾਮਜ਼ਦ ਕੀਤਾ ਗਿਆ।

ਪ੍ਰਧਾਨ ਡਾਃ ਲਖਵਿੰਦਰ ਸਿੰਘ ਜੌਹਲ ਨੇ ਇਹ ਐਲਾਨ ਕੀਤਾ ਕਿ ਸਾਲ 2022 ਨੂੰ ਕਿੱਸਾ ਕਵਿਤਾ ਦੇ ਸਿਰਮੌਰ ਹਸਤਾਖ਼ਰ ਸੱਯਦ ਵਾਰਿਸ ਸ਼ਾਹ  ਦੀ 300 ਵੀਂ ਵਰੇਗੰਢ ਨੂੰ ਸਮਰਪਿਤ ਕੀਤਾ ਜਾਵੇਗਾ। ਪੰਜਾਬੀ ਸਾਹਿਤ ਅਕਾਡਮੀ, ਲੁਧਿਆਣਾ ਦੇ ਕੰਮਕਾਜ ਅਤੇ ਗਤੀ ਵਿਧੀਆਂ ਨੂੰ ਉਸਾਰੂ ਰੂਪ ਨਾਲ ਚਲਾਉਣ ਲਈ ਪ੍ਰਬੰਧਕੀ ਬੋਰਡ ਵੱਲੋਂ ਨਿੱਗਰ ਸੁਝਾਅ ਦਿੱਤੇ ਗਏ ਅਤੇ ਅਕਾਡਮੀ ਦੇ ਖੁੱਲ੍ਹੇ ਰੰਗਮੰਚ ’ਚ ਹਰ ਮਹੀਨੇ ਇਕ ਪੰਜਾਬੀ ਨਾਟਕ ਕਰਨ ਦੀ ਲੋੜ ’ਤੇ ਜ਼ੋਰ ਦਿੱਤਾ।

ਉਨ੍ਹਾਂ ਇਹ ਵੀ ਸੁਝਾਅ ਦਿੱਤਾ ਕਿ ਅਕਾਡਮੀ ਨੂੰ ਸਕੂਲਾਂ, ਕਾਲਜਾਂ ਅਤੇ ਪਿੰਡਾਂ ਵਿਚ ਪ੍ਰੋਗਰਾਮ ਕਰਕੇ ਲੋਕਾਂ ਨੂੰ ਨਾਲ ਜੋੜਨਾ ਚਾਹੀਦਾ ਹੈ। ਇਸ ਲਈ ਠੋਸ ਪ੍ਰੋਗਰਾਮ ਉਲੀਕੇ ਗਏ। ਇਸ ਸੰਬੰਧ ਵਿਚ 19 ਮਾਰਚ 2022, ਦਿਨ ਸ਼ਨੀਵਾਰ ਨੂੰ ਅੰਤਰਰਾਸ਼ਟਰੀ ਮਾਤ ਭਾਸ਼ਾ ਦਿਵਸ ਨੂੰ ਸਮਰਪਿਤ ‘ਪੰਜਾਬੀ ਮਾਤ ਭਾਸ਼ਾ ਮੇਲੇ’ ਦਾ ਆਯੋਜਿਨ ਕੀਤਾ ਜਾ ਰਿਹਾ ਹੈ ਜਿਸ ਵਿਚ ਵੱਖ ਵੱਖ ਕਾਲਜਾਂ ਦੇ ਵਿਦਿਆਰਥੀਆਂ ਦੇ  ਸਾਹਿਤਕ ਮੁਕਾਬਲੇ ਕਰਵਾਏ ਜਾਣਗੇ। 

ਅਕਾਡਮੀ ਦੇ ਪ੍ਰਧਾਨ ਡਾ. ਲਖਵਿੰਦਰ ਸਿੰਘ ਜੌਹਲ ਨੇ ਪੰਜਾਬੀ ਸਾਹਿਤ ਅਕਾਡਮੀ ਦੇ ਮੈਂਬਰਾ ਤੋਂ ਨਿਰੰਤਰਤਾ ਫੀਸ ਨਾ ਲੈਣ ਤੇ ਪੈਣ ਵਾਲਾ ਘਾਟਾ ਪੂਰਨ ਲਈ ਇਕ ਲੱਖ ਅਤੇ ਅਕਾਡਮੀ ਵਿੱਚ ਕੈਮਰੇ ਲਗਾਉਣ ਲਈ ਇਕ ਲੱਖ ਰੁਪਏ ਦੀ ਵਿੱਤੀ ਸਹਾਇਤਾ ਦਾ ਨੇੜ ਭਵਿੱਖ ਵਿੱਚ ਪ੍ਰਬੰਧ ਕਰਨ ਦੀ ਪੇਸ਼ਕਸ਼ ਕੀਤੀ। 

ਇਸ ਇਕੱਤਰਤਾ ਵਿੱਚ ਅਕਾਡਮੀ ਦੀਆਂ ਪ੍ਰਕਾਸ਼ਨਾਵਾਂ ਨੂੰ ਨਵੇਂ ਸਿਰੇ ਤੋਂ ਵਿਉਂਤਣ ਲਈ ਸਾਬਕਾ ਪ੍ਰਧਾਨ ਗੁਰਭਜਨ ਗਿੱਲ ਦੀ ਚੇਅਰਮੈਨ ਸ਼ਿਪ ਹੇਠ ਕਮੇਟੀ ਦਾ ਗਠਨ ਕੀਤਾ ਗਿਆ। ਬਦ਼ੁਰਗ ਲਿਖਾਰੀ ਸਃ ਰਘਬੀਰ ਸਿੰਘ ਭਰਤ ਮਾਛੀਵਾੜਾ ਵੱਲੋਂ ਪੋਠੋਹਾਰੀ ਲੋਕ ਗੀਤਾਂ ਦੇ ਸੰਗ੍ਰਹਿ ਅਤੇ ਜਾਃ ਗੁਰਦੇਵ ਸਿੰਘ ਸਿੱਧੂ ਵੱਲੋਂ ਪੰਜਾਬੀ ਕਿੱਸਾ ਕਾਵਿ ਸੂਚੀ ਦੇ ਪ੍ਰਕਾਸ਼ਨ ਨੂੰ ਵੀ ਪ੍ਰਵਾਨਗੀ ਦਿੱਤੀ ਗਈ। 

ਪਿਛਲੀ ਟੀਮ ਵਿੱਚ ਸ਼ਾਮਿਲ ਪ੍ਰਧਾਨ ਪ੍ਰੋਃ ਰਵਿੰਦਰ ਭੱਠਲ, ਸੀਨੀਅਰ ਮੀਤ ਪ੍ਰਧਾਨ ਸੁਰਿੰਦਰ ਕੈਲੇ ਤੇ ਜਨਰਲ ਸਕੱਤਰ ਡਾਃ ਸੁਰਜੀਤ ਵੱਲੋਂ ਕੀਤੇ ਪ੍ਰਕਾਸ਼ਨ ਕਾਰਜਾਂ, ਆਲੋਚਨਾ ਮੈਗਜ਼ੀਨ ਦੀ ਪ੍ਰਕਾਸ਼ਨਾ, ਸਰਗਰਮੀਆਂ ਲਈ ਕਰੋਨਾ ਸੰਕਟ ਦੇ ਬਾਵਜੂਦ ਕਾਰਜ ਕਰਨ ਦੀ ਸ਼ਲਾਘਾ ਕੀਤੀ ਗਈ। 

ਪੰਜਾਬੀ ਸਾਹਿਤ ਅਕਾਦਮੀ ਦੀਆਂ ਇਹਨਾਂ ਚੋਣਾਂ ਦੌਰਾਨ ਡਾਕਟਰ ਗੁਲਜ਼ਾਰ ਸਿੰਘ ਪੰਧੇਰ ਨੇ ਵੀ ਜਨਰਲ ਸਕੱਤਰ ਦੇ ਅਹੁਦੇ ਲਈ ਚੋਣ ਲੜੀ ਸੀ। ਵੋਟ ਪਰਚੀਆਂ ਦੌਰਾਨ  ਡਾ. ਗੁਲਜ਼ਾਰ ਪੰਧੇਰ ਦੇ ਨਾਮ ਨਾਲੋਂ ਪੰਧੇਰ ਸ਼ਬਦ ਹੀ ਕੱਟ ਦਿੱਤਾ ਗਿਆ। ਉਹਨਾਂ ਦੇ ਸਮਰਥਕਾਂ ਨੇ ਇਸ ਸੰਬੰਧੀ ਇਤਰਾਜ਼ ਵੀ ਕੀਤਾ ਸੀ।  ਬੋਰਡ ਦੇ ਮੈਂਬਰਾਂ ਦੀ ਪਲੇਠੀ ਮੀਟਿੰਗ ਵਿਚ ਇਸ ਬਾਰੇ ਕੀ ਹੋਇਆ ਇਸ ਬਾਰੇ ਅਜੇ ਪ੍ਰਗਟ ਤੌਰ ਤੇ ਕੁਝ ਨਹੀਂ ਦੱਸਿਆ ਗਿਆ।  

ਮਿੱਤਰ ਸੈਨ ਮੀਤ ਹੁਰੀਂ ਸਾਹਿਤਕ ਸਦਾਚਾਰ ਅਤੇ ਨੇਮਾਂ ਬਾਰੇ ਕਾਫੀ ਸਮੇਂ ਤੋਂ ਕਈ ਨੁਕਤੇ ਉਠਾਉਂਦੇ ਆ ਰਹੇ ਹਨ। ਉਹਨਾਂ ਨੇ ਪੰਜਾਬੀ ਭਵਨ ਅਤੇ ਪੰਜਾਬੀ ਸਾਹਿਤ ਅਕਾਦਮੀ ਸੰਬੰਧੀ ਵੀ ਕਾਫੀ ਕੁਝ ਆਪਣੀ ਵੈਬਸਾਈਟ 'ਤੇ ਦਰਜ ਕੀਤਾ ਹੋਇਆ ਹੈ। ਸ਼੍ਰੋਮਣੀ ਇਨਾਮਾਂ ਸ਼ਨਾਮਾਂ ਦਾ ਮਾਮਲਾ ਤਾਂ ਅਦਾਲਤ ਵਿੱਚ ਵੀ ਗਿਆ ਹੋਇਆ ਹੈ। ਪੰਜਾਬੀ ਸਾਹਿਤ ਅਕਾਦਮੀ ਮੀਤ ਹੁਰਾਂ ਦੇ ਨਾਲ ਹੈ ਜਾਂ ਵਿਰੋਧ ਵਿੱਚ ਇਸ ਬਾਰੇ ਵੀ ਪਲੇਠੀ ਮੀਟਿੰਗ ਮਗਰੋਂ ਪ੍ਰਗਟ ਤੌਰ ਤੇ ਕੁਝ ਨਹੀਂ ਦੱਸਿਆ ਗਿਆ। ਕਨਸੋਅ ਸੀ ਕਿ ਚੋਣ ਅਧਿਕਾਰੀ ਦਾ ਰਸਮੀ ਧੰਨਵਾਦ ਵੀ ਨਹੀਂ ਕੀਤਾ ਗਿਆ ਜਿਹੜਾ ਕਿ ਅਕਸਰ  ਹਰ ਵਾਰ ਹੋਇਆ ਕਰਦਾ ਹੈ। 

ਹੁਣ ਦੇਖਣਾ ਹੈ ਕਿ ਅੰਦਰਲੀਆਂ ਧੜੇਬੰਦੀਆਂ ਨੂੰ ਸਮਾਪਤ ਕਰ ਕੇ ਏਕਤਾ ਵਾਲਾ ਮਾਹੌਲ ਕਿੰਨੀ ਜਲਦੀ ਸਿਰਜਿਆ ਜਾਂਦਾ ਹੈ। ਮੈਂਬਰਸ਼ਿਪ ਦੇ ਨਿਯਮਾਂ ਬਾਰੇ ਕੋਈ ਛੋਟਾ ਦਿੱਤੀ ਜਾਂਦੀ ਹੈ ਜਾਂ ਨਹੀਂ? ਜਿਹਨਾਂ ਲੇਖਕਾਂ ਕੋਲ ਕਿਤਾਬਾਂ ਛਪਵਾਉਣ ਲਈ ਕੋਈ ਜਮਾਂ ਪੂੰਜੀ ਨਹੀਂ ਉਹਨਾਂ ਦੀਆ ਕਿਤਾਬਾਂ ਛਾਪਣ ਬਾਰੇ ਪੰਜਾਬੀ ਸਾਹਿਤ ਅਕਾਦਮੀ ਕੋਈ ਪ੍ਰਕਾਸ਼ਨ ਅਦਾਰੇ ਸਰਗਰਮੀ ਨਾਲ ਚਲਾਉਣ ਦਾ ਮਨ ਬਣਾਉਂਦੀ ਹੈ ਜਾਂ ਨਹੀਂ?

ਪੰਜਾਬੀ ਭਵਨ ਵਿਚਲੀ ਮਾਰਕੀਟ ਸਿਰਫ ਉਹਨਾਂ ਲਈ ਰਾਖਵੀਂ ਵਰਗੀ ਹੈ ਜਿਹੜੇ ਪੁਸਤਕਾਂ ਛਾਪਣ/ਵੇਚਣ ਦਾ ਵਪਾਰ ਕਰਦੇ ਹਨ ਪਰ ਸਾਹਿਤਕ ਪੱਤਰਕਾਰੀ ਕਰਨ ਵਾਲਿਆਂ ਜਾਂ ਸਾਹਿਤਿਕ ਐਡੀਸ਼ਨ ਕੱਢਣ ਵਾਲਿਆਂ ਅਖਬਾਰਾਂ ਰਸਾਲਿਆਂ ਲਈ ਅਜਿਹਾ ਕੁਝ ਵੀ ਸ਼ਾਇਦ ਰਾਖਵਾਂ ਨਹੀਂ ਹੈਂ। ਸਤਨਾਮ ਮਾਣਕ ਹੁਰਾਂ ਨੂੰ ਨਾਮਜ਼ਦ ਕੀਤੇ ਜਾਣ ਮਗਰੋਂ ਸ਼ਾਇਦ ਇਸ ਪਾਸੇ ਵੀ ਕੋਈ ਰਸਤਾ ਨਿਕਲੇ। ਇਥੇ ਹੁੰਦੇ ਸਾਹਿਤਿਕ ਸਮਾਗਮਾਂ ਦੀ ਕਵਰੇਜ ਰਿਪੋਰਟਿੰਗ ਲਈ ਵੀ ਸਾਹਿਤਿਕ ਬੀਟ ਵਾਲੇ ਪੱਤਰਕਾਰਾਂ ਲਈ ਕੋਈ ਨਿਊਜ਼ ਰੂਮ ਵਰਗੀ ਸਹੂਲਤ ਨਹੀਂ ਦਿੱਤੀ ਜਾਂਦੀ ਜਿਥੇ ਇੰਟਰਨੈਟ ਅਤੇ ਚਾਹ ਕੋਫੀ ਵਰਗੀਆਂ ਸਹੂਲਤਾਂ ਮੁਹਈਆ ਕੀਤੀਆਂ ਜਾਣ। ਜਿਹੜੇ ਪ੍ਰੈਸ ਨੋਟ ਮੀਡੀਆ ਨੂੰ  ਭੇਜੇ ਜਾਂਦੇ ਹਨ ਉਹ ਵੀ ਅਕਸਰ ਮੋਬਾਈਲ ਫੋਨਾਂ ਤੇ ਹੀ ਟਾਈਪ ਕੀਤੇ ਜਾਂਦੇ ਹਨ ਨਾ ਕਿ ਕੰਪਿਊਟਰ 'ਤੇ। ਮੋਬਾਈਲ ਤੇ ਟਾਈਪਿੰਗ ਕਰਨ ਵੇਲੇ ਅਕਸਰ ਇਹਨਾਂ ਪ੍ਰੈਸ ਨੋਟਾਂ ਦਾ ਆਕਾਰ ਅਤੇ ਮੁਹਾਂਦਰਾ ਵਿਗੜਿਆ ਹੁੰਦਾ ਹੈ। ਸਾਹਿਤਕ ਕਵਰੇਜ ਨੂੰ ਉਤਸ਼ਾਹਿਤ ਕਰਨ ਲਈ ਸਾਹਿਤਿਕ ਰਿਪੋਰਟਿੰਗ ਕਰਨ ਵਾਲੇ ਪੱਤਰਕਾਰਾਂ ਤੇ ਅਧਾਰਿਤ ਮੀਡੀਆ ਕਮੇਟੀ ਦੀ ਵੀ ਸਖਤ ਲੋੜ ਹੈ। 

ਆਉਣ ਵਾਲੇ ਸਮੇਂ ਵਿਚ ਕੁਝ ਹੋਰ ਚੁਣੌਤੀਆਂ ਵੀ ਹਨ ਜਿਹੜੀਆਂ ਸਾਹਮਣੇ ਆਉਣੀਆਂ ਅਜੇ ਬਾਕੀ ਹਨ। 

Monday, March 23, 2020

ਕਰਫਿਊ ਦੌਰਾਨ ਖੁੱਲ੍ਹ 25 ਮਾਰਚ (ਬੁੱਧਵਾਰ) ਤੋਂ ਹੀ ਮਿਲੇਗੀ

Monday: 23rd March 2020 at 9:38 PM
ਮੰਗਲਵਾਰ 24 ਮਾਰਚ ਨੂੰ ਰਹੇਗਾ ਮੁਕੰਮਲ ਕਰਫਿਊ 
ਲੁਧਿਆਣਾ: 23 ਮਾਰਚ 2020: (*ਪੰਜਾਬ ਸਕਰੀਨ ਟੀਮ)::
ਨੋਵੇਲ ਕੋਰੋਨਾ ਵਾਇਰਸ (ਕੋਵਿਡ 19)- ਦਾ ਖਤਰਾ ਲਗਾਤਾਰ ਗੰਭੀਰ ਬਣਿਆ ਹੋਇਆ ਹੈ ਪਰ ਸਾਡੇ ਲੋਕ ਅਜੇ ਤੱਕ ਵੀ ਇਸਨੂੰ ਗੰਭੀਰਤਾ ਨਾਲ ਨਹੀਂ ਲੈ ਰਹੇ। ਸਾਰੀ ਦੁਨੀਆ ਦੇ ਸਿਰ 'ਤੇ ਮੌਤ ਮੰਡਰਾ ਰਹੀ ਹੈ। ਰਾਜ ਸਰਕਾਰਾਂ ਦੇ ਨਾਲ ਕੇਂਦਰ ਸਰਕਾਰ ਵੀ ਡੂੰਘੀ ਚਿੰਤਾ ਵਿੱਚ ਹੈ।  ਲੋਕਾਂ ਨੂੰ ਬਚਾਉਣ ਲਈ ਹੀ ਤਰਾਂ ਤਰਾਂ ਦੇ ਕਈ ਉਪਰਾਲੇ ਵੀ ਕੀਤੇ ਜਾ ਰਹੇ ਹਨ ਪਰ ਲੋਕ ਇਸ ਬੇਹੱਦ ਨਾਜ਼ੁਕ ਮੌਕੇ ਨੂੰ ਵੀ ਪਿਕਨਿਕ ਵਾਂਗ ਲੈ ਰਹੇ ਹਨ। ਗਲੀਆਂ ਸੜਕਾਂ ਉੱਤੇ ਹੀ ਹੀ ਹੂ ਹੂ ਕਰਦੇ ਬਾਈਕਾਂ 'ਤੇ ਗੇੜੀਆਂ ਲਾ ਰਹੇ ਹਨ। ਸਰਕਾਰ ਇਕੱਲੀ ਕੀ ਕਰੇ? ਆਪੋ ਆਪਣੇ ਦਰਵਾਜ਼ਿਆਂ ਦੇ ਬਾਹਰ ਖੜੇ ਇੱਕ ਦੂਜੇ ਨਾਲ ਉੱਚੀ ਉੱਚੀ ਗੱਲਾਂ ਮਾਰ ਰਹੇ ਹਨ।  ਕਈ ਇਲਾਕਿਆਂ ਵਿੱਚ ਤਾਂ ਲੋਕ ਤਾਸ਼ ਖੇਡ ਰਹੇ ਹਨ। ਬਹੁਤ ਮੁਸ਼ਕਿਲ ਹੈ ਇਸ ਦੇਸ਼ ਨੂੰ ਵਿਕਾਸ ਦੇ ਰਸਤੇ ਤੇ ਲਿਜਾਣਾ। ਕਰਫਿਊ ਦੀ ਉਲੰਘਣਾ ਕਰ ਰਹੇ ਅਜਿਹੇ ਲੋਕਾਂ ਨੂੰ ਪੁਲਿਸ ਫੋਰਸਾਂ ਨੇ ਸਖਤੀ ਨਾਲ ਨਜਿੱਠਣਾ ਸ਼ੁਰੂ ਕਰ ਦਿੱਤਾ ਹੈ। ਪਹਿਲਾਂ ਪਿਆਰ ਨਾਲ ਵੀ ਸਮਝਾਇਆ ਪਰ ਲੱਗਦਾ ਹੈ ਇਹਨਾਂ ਤੇ ਕੋਈ ਅਸਰ ਨਹੀਂ। ਹੁਣ ਪੁਲਿਸ ਵਾਲੇ ਇਹਨਾਂ ਦੇ ਗਲੇ ਵਿੱਚ ਤਖਤੀਆਂ ਲਟਕਾ ਰਹੇ ਹਨ ਜਿਹਨਾਂ ਤੇ ਲਿਖਿਆ ਹੈ,"ਮੈਂ ਸਮਾਜ ਦਾ ਦੁਸ਼ਮਣ ਹਾਂ। ਮੈਂ ਘਰ ਨਹੀਂ ਰਹਿ ਸਕਦਾ। ਇਸ ਕਿਸਮ ਦੀਆਂ ਤਸਵੀਰਾਂ ਉੱਘੇ ਸਮਾਜ ਸੇਵੀ ਅਤੇ ਸ਼ਾਇਰ ਗੁਰਚਰਨ ਨਾਰੰਗ ਹੁਰਾਂ ਨੇ ਵੀ ਸ਼ੇਅਰ ਕੀਤੀਆਂ ਹਨ।  
ਇਸੇ ਦੌਰਾਨ ਕਰਫਿਊ ਵਿੱਚ ਮੰਗਲਵਾਰ ਵਾਲੀ ਢਿੱਲ ਦਾ ਐਲਾਨ ਸੋਧਿਆ ਗਿਆ ਹੈ। ਹੁਣ ਬੁਧਵਾਰ 25 ਮਾਰਚ ਤੋਂ ਹੀ ਕਰਫਿਊ ਦੌਰਾਨ ਛੂਟ ਮਿਲੇਗੀ। ਇਹ ਫੈਸਲਾ ਚੰਡੀਗੜ੍ਹ ਵਿੱਚ ਵੀ ਲਾਗੂ ਕੀਤੇ ਗਏ ਕਰਫਿਊ ਕਾਰਨ ਲਿਆ ਗਿਆ ਹੈ।ਵਿਸ਼ਵ ਭਰ ਵਿੱਚ ਫੈਲੀ ਨੋਵੇਲ ਕੋਰੋਨਾ ਵਾਇਰਸ (ਕੋਵਿਡ 19) ਬਿਮਾਰੀ ਨੂੰ ਹੋਰ ਫੈਲਣ ਤੋਂ ਰੋਕਣ ਲਈ ਪੰਜਾਬ ਸਰਕਾਰ ਦੀਆਂ ਹਦਾਇਤਾਂ 'ਤੇ ਜ਼ਿਲਾ ਲੁਧਿਆਣਾ ਵਿੱਚ ਵੀ ਜ਼ਿਲਾ ਮੈਜਿਸਟ੍ਰੇਟ-ਕਮ-ਡਿਪਟੀ ਕਮਿਸ਼ਨਰ ਸ੍ਰੀ ਪ੍ਰਦੀਪ ਕੁਮਾਰ ਅਗਰਵਾਲ ਵੱਲੋਂ ਮਿਤੀ 23 ਮਾਰਚ ਦੇ ਬਾਅਦ ਦੁਪਹਿਰ 2 ਵਜੇ ਤੋਂ ਕਰਫਿਊ ਲਗਾ ਦਿੱਤਾ ਗਿਆ ਹੈ। ਪਰ ਆਮ ਲੋਕਾਂ ਨੂੰ ਜ਼ਰੂਰੀ ਵਸਤਾਂ ਦੀ ਖਰੀਦੋ-ਫਰੋਖ਼ਤ ਕਰਨ ਦੇਣ ਲਈ ਸਵੇਰੇ 6 ਵਜੇ ਤੋਂ 9 ਵਜੇ ਤੱਕ ਖੁੱਲ੍ਹ ਦੇਣ ਦਾ ਜਿਹੜਾ ਫੈਸਲਾ ਜ਼ਿਲਾ ਪ੍ਰਸਾਸ਼ਨ ਵੱਲੋਂ ਲਿਆ ਗਿਆ ਸੀ ਉਸਨੂੰ ਬਦਲ ਦਿੱਤਾ ਗਿਆ ਹੈ। ਸਮਝਿਆ ਜਾਂਦਾ ਹੈ ਕਿ ਅਜਿਹਾ ਕਦਮ ਲੋਕਾਂ ਦੇ ਗੈਰ ਗੰਭੀਰ ਰਵਈਏ ਨੂੰ ਦੇਖਦਿਆਂ ਚੁੱਕਿਆ ਗਿਆ ਹੈ। ਹੁਣ ਇਹ ਖੁੱਲ ਮਿਤੀ 25 ਮਾਰਚ ਦਿਨ ਬੁੱਧਵਾਰ ਤੋਂ ਮਿਲੇਗੀ।
ਇਸ ਸੰਬੰਧੀ ਜਾਣਕਾਰੀ ਦਿੰਦਿਆਂ ਸ੍ਰੀ ਅਗਰਵਾਲ ਨੇ ਦੱਸਿਆ ਕਿ ਜ਼ਿਲਾ ਵਾਸੀਆਂ ਨੂੰ ਇਹ ਖੁੱਲ੍ਹ ਮਿਤੀ 24 ਮਾਰਚ ਤੋਂ ਦੇਣ ਦਾ ਫੈਸਲਾ ਕੀਤਾ ਗਿਆ ਸੀ ਪਰ ਹੁਣ ਚੰਡੀਗੜ੍ਹ ਵਿੱਚ ਵੀ ਕਰਫਿਊ ਲਗਾ ਦੇਣ ਨਾਲ ਇਹ ਖੁੱਲ ਹੁਣ ਮਿਤੀ 25 ਮਾਰਚ ਦਿਨ ਬੁੱਧਵਾਰ ਤੋਂ ਮਿਲਣਯੋਗ ਹੋਵੇਗੀ। ਉਹਨਾਂ ਕਿਹਾ ਕਿ ਮਿਤੀ 24 ਮਾਰਚ ਦਿਨ ਮੰਗਲਵਾਰ ਨੂੰ ਕੋਈ ਵੀ ਵਿਅਕਤੀ ਆਪਣੇ ਘਰਾਂ ਤੋਂ ਬਾਹਰ ਨਹੀਂ ਨਿਕਲ ਸਕੇਗਾ। ਮੰਗਲਵਾਰ ਨੂੰ ਮੁਕੰਮਲ ਕਰਫਿਊ ਰਹੇਗਾ। ਸਵੇਰੇ 6 ਵਜੇ ਤੋਂ 9 ਵਜੇ (ਤਿੰਨ ਘੰਟੇ) ਤੱਕ ਦੀ ਖੁੱਲ੍ਹ  ਮਿਤੀ 25 ਮਾਰਚ ਦਿਨ ਬੁੱਧਵਾਰ ਤੋਂ ਹੀ ਦਿੱਤੀ ਜਾਵੇਗੀ। ਸ੍ਰੀ ਅਗਰਵਾਲ ਨੇ ਲੋਕਾਂ ਨੂੰ ਕਰਫਿਊ ਦੌਰਾਨ ਸਰਕਾਰ ਵੱਲੋਂ ਜਾਰੀ ਹਦਾਇਤਾਂ ਦੀ ਪਾਲਣਾ ਕਰਨ ਦੀ ਹਦਾਇਤ ਕੀਤੀ ਹੈ।
ਇਸ ਕਰਫਿਊ ਦੌਰਾਨ ਲੋਕਾਂ ਵਿਛ ਭਾਈਚਾਰਕ ਸਾਂਝ ਜ਼ਰੂਰ ਵੱਧ ਰਹੀ ਲਗੱਗਦੀ ਹੈ। ਹੁਣ ਲੋਕ ਜਿੱਥੇ ਮੋਬਾਈਲਾਂ ਤੇ ਇੱਕ ਦੂਜੇ ਦਾ ਹਾਲ ਪੁੱਛ ਰਹੇ ਹਨ ਉੱਥੇ ਗਲੀ ਗੁਆਂਢ ਵੀ ਇੱਕ ਦੂਜੇ ਨਾਲ ਬੜੀ ਅਪਣੱਤ ਨਾਲ ਦੁਆ ਸਲਾਮ ਕਰ ਰਹੇ ਹਨ। ਲੱਗਦਾ ਗਈ ਕੋਰੋਨਾ ਦੀ ਇਸ ਮੁਸੀਬਤ ਨੇ ਲੋਕਾਂ ਵਿੱਚ ਹਾਂ ਪੱਖੀ ਮਾਨਸਿਕ ਤਬਦੀਲੀ ਵੀ ਲਿਆਂਦੀ ਹੈ।
पंजाब स्क्रीन हिंदी में भी पढ़िए यही खबर
कर्फ्यू के दौरान छूट अब बुधवार 25 मार्च को ही मिलेगी

Read in Punjab Screen English also
Curfew Relaxation Starts From 25th March Wednesday

Friday, November 15, 2019

ਵਪਾਰ ਅਤੇ ਆਰਥਿਕਤਾ ਅੱਜ ਦੇ ਸਮੇਂ ਦੀ ਮੰਗ

SCD ਕਾਲਜ ਵਿੱਚ ਵਪਾਰ ਦੀ ਅਹਿਮੀਅਤ ਬਾਰੇ ਵਿਸ਼ੇਸ਼ ਵਿਚਾਰ ਗੋਸ਼ਠੀ
ਲੁਧਿਆਣਾ: 15 ਨਵੰਬਰ 2019: (ਪੰਜਾਬ ਸਕਰੀਨ ਬਿਊਰੋ):: 
100 ਸਾਲਾਂ ਦੀ ਸਮਾਗਮੀ ਲੜੀ ਨੂੰ ਅੱਗੇ ਵਧਾਉਦਿਆਂ ਅੱਜ ਸਥਾਨਕ ਸਤੀਸ਼ ਚੰਦਰ ਧਵਨ, ਸਰਕਾਰੀ ਕਾਲਜ, ਲੁਧਿਆਣਾ ਵਿਖੇ ਇੱਕ ਰੋਜ਼ਾ ਸਿਮਪੋਜ਼ੀਅਮ ਕਰਵਾਇਆ ਗਿਆ ਜਿਸਦਾ ਵਿਸ਼ਾ ਤਕਨੀਕੀ ਸੂਚਨਾ, ਵਪਾਰ ਅਤੇ ਉਦਯੋਗਿਕ ਉੱਨਤੀ ਰਿਹਾ। ਸਮਾਗਮ ਦਾ ਆਰੰਭ ਕਾਲਜ ਦੇ ਮੁੱਖ ਹਾਲ ਸਾਹਿਰ ਆਡੀਟੋਰੀਅਮ ਵਿਖੇ ਹੋਇਆ।  ਇਸ ਆਯੋਜਨ  ਦੇ ਪ੍ਰਮੁੱਖ ਮਹਿਮਾਨ ਡਾ. ਸੁਖਵਿੰਦਰ ਸਿੰਘ ਬਿੰਦਰਾ (ਚੇਅਰਮੈਨ, ਯੂਥ ਡਿਵੈੱਲਪਮੈਂਟ ਬੋਰਡ, ਪੰਜਾਬ, ਸ਼੍ਰੀ ਐਮ.ਪੀ. ਅਰੋੜਾ (ਵਿਸ਼ੇਸ਼ ਸਕੱਤਰ, ਉਚੇਰੀ ਸਿੱਖਿਆ ਵਿਭਾਗ(ਆਈ.ਏ.ਐਸ), ਸ਼੍ਰੀ ਜੇ.ਆਰ ਸਿੰਗਲ ਪ੍ਰਮੁੱਖ ਉਦਯੋਗਪਤੀ, ਡਾ. ਐਸ.ਸੀ. ਵੈਦਯ ਵਿਸ਼ੇਸ਼ ਮਹਿਮਾਨ ਡਾ. ਸੰਜੇ ਕੋਸ਼ਿਕ ਡੀਨ, ਕਾਲਜ ਡਿਵੈਲਪਮੈਂਟ ਕੋਂਸਲ ਪੰਜਾਬ ਯੂਨੀਵਰਸਿਟੀ, ਚੰਡੀਗੜ੍ਹ ਪ੍ਰਮੁੱਖ ਰੂਪ ਵਿੱਚ ਪਹੁੰਚੇ। ਸਮਾਗਮ ਦਾ ਆਗਾਜ਼ ਕਾਲਜ ਦੇ ਸ਼ਬਦ ਗਾਇਨ ਨਾਲ ਹੋਇਆ। ਉਪਰੰਤ ਯੂਨੀਵਰਸਿਟੀ ਦਾ ਐਨਥਮ ਚੱਲਿਆ। 
ਆਏ ਹੋਏ ਮਹਿਮਾਨਾਂ ਅਤੇ ਪ੍ਰਮੁੱਖ ਮੇਜ਼ਬਾਨਾਂ ਨੇ ਸਮਾਗਮ ਦੀ ਸ਼ੁਰੂਆਤ ਸ਼ਮਾ ਰੌਸ਼ਨ ਕਰਕੇ ਕੀਤੀ। ਕਾਲਜ ਦੇ ਪ੍ਰਿੰਸੀਪਲ ਡਾ. ਧਰਮ ਸਿੰਘ ਸੰਧੂ ਨੇ ਆਏ ਮਹਿਮਾਨਾਂ ਨੂੰ ਸਮੂਹ ਅਧਿਆਪਕ ਅਤੇ ਵਿਦਿਆਰਥੀਆਂ ਨਾਲ ਰੁਬਰੂ ਕਰਵਾਇਆ ਅਤੇ ਕਾਲਜ ਦਾ 100 ਸਾਲਾ ਇਤਿਹਾਸ ਦੱਸਦਿਆਂ ਆਏ ਮਹਿਮਾਨਾਂ ਦਾ ਸਵਾਗਤ ਫੁੱਲਾਂ ਦੇ ਗੁਲਦਸਤੇ ਭੇਂਟ ਕਰਕੇ ਕੀਤਾ। ਉਹਨਾਂ ਆਪਣੇ ਸਵਾਗਤੀ ਭਾਸ਼ਣ ਦੌਰਾਨ ਦੱਸਿਆ ਕਿ ਵਪਾਰ ਅਤੇ ਆਰਥਿਕਤਾ ਅੱਜ ਦੇ ਸਮੇਂ ਦੀ ਮੰਗ ਹੈ। 
ਇਸ ਸਮਾਗਮ ਦੇ ਇੰਚਾਰਜ ਅਤੇ ਕੋ ਆਰਡੀਨੇਟਰ ਡਾ. ਅਸ਼ਵਨੀ ਭੱਲਾ ਨੇ ਸਿੰਮਪੋਜ਼ੀਅਮ ਦੇ ਵਿਸ਼ੇ ਨਾਲ ਜਾਣੂ ਕਰਵਾਇਆ ਅਤੇ ਦੱਸਿਆ ਕਿ ਆਧੁਨਿਕ ਯੁੱਗ ਵਪਾਰ ਦਾ ਯੁੱਗ ਹੈ। ਵਪਾਰਕ ਅਤੇ ਤਕਨੀਕੀ ਨੁੱਕਤਿਆਂ ਨਾਲ ਹੀ ਸਾਡਾ ਸਮਾਜ ਵਿਸ਼ਵ ਪੱਧਰ ਤੇ ਜੁੜ ਸਕਦਾ ਹੈ। ਸਿੰਮਪੋਜ਼ੀਅਮ ਵਿੱਚ ਕੁੰਜੀਵਤ ਭਾਸ਼ਣ ਡਾ. ਐਸ.ਸੀ. ਵੈਦਯ ਵੱਲੋਂ ਪੇਸ਼ ਕੀਤਾ ਗਿਆ। 
ਵਿਸ਼ੇਸ਼ ਮਹਿਮਾਨਾਂ ਦੁਆਰਾ ਇਸ ਵਿਸ਼ੇ ਉੱਪਰ ਆਪਣੇ ਯੋਗ ਵਿਚਾਰ ਪ੍ਰਸਤੁੱਤ ਕੀਤੇ ਗਏ। ਸੈਸ਼ਨ ਓਪਨ ਕਰਕੇ ਵਿਦਿਆਰਥੀਆਂ ਦੀਆਂ ਸਮੱਸਿਆਵਾਂ ਅਤੇ ਪ੍ਰਸ਼ਨਾਂ ਦੇ ਹੱਲ ਦਿੱਤੇ ਗਏ। ਪ੍ਰਮੁੱਖ ਮਹਿਮਾਨ ਸ. ਸੁਖਵਿੰਦਰ ਸਿੰਘ ਬਿੰਦਰਾ ਨੇ ਆਪਣੇ ਵਿਸ਼ੇਸ਼ ਵਿਚਾਰ ਪ੍ਰਗਟ ਕੀਤੇ। ਅੰਤ ਤੇ ਆਏ ਮਹਿਮਾਨਾਂ ਨੂੰ ਸਨਮਾਨ ਚਿੰਨ ਦੇ ਕੇ ਸਨਮਾਨਤ ਕੀਤਾ ਗਿਆ। ਉਹਨਾਂ ਦਾ ਦਿਲੀ ਧੰਨਵਾਦ ਡਾ. ਹਰਬੰਸ ਸਿੰਘ ਦੁਆਰਾ ਨਿੱਘੇ ਸ਼ਬਦਾਂ ਨਾਲ ਕੀਤਾ ਗਿਆ। ਇਸ ਸਮਾਗਮ ਵਿੱਚ ਵਿਸ਼ੇਸ਼ ਰੂਪ ਵਿੱਚ ਡਾ. ਗੁਰਸ਼ਰਨ ਜੀਤ ਸਿੰਘ ਸੰਧੂ ਨੇ ਆਪਣੀ ਭੂਮਿਕਾ ਨਿਭਾਈ। ਸਮੂਹ ਅਧਿਆਪਕ ਅਤੇ ਵਿਦਿਆਰਥੀਆਂ ਨੇ ਇਸ ਵਿਸ਼ੇ ਤੋਂ ਯੋਗ ਜਾਣਕਾਰੀ ਹਾਸਲ ਕੀਤੀ ਅਤੇ ਸਮਾਗਮ ਦਾ ਅੰਤ ਰਾਸ਼ਟਰੀ ਗਾਣ ਨਾਲ ਕੀਤਾ ਗਿਆ।