Showing posts with label Fire. Show all posts
Showing posts with label Fire. Show all posts

Friday, August 23, 2019

ਲੁਧਿਆਣਾ ਵਿੱਚ ਫਿਰ ਭਿਆਨਕ ਅੱਗ:ਤਕਰੀਬਨ 20 ਗੱਡੀਆਂ ਨੇ ਪਾਇਆ ਕਾਬੂ

ਫਾਇਰ ਬ੍ਰਿਗੇਡ ਨੂੰ ਕਰਨੀ ਪਈ ਪੰਜ ਘੰਟੇ ਦੀ ਮੁਸ਼ੱਕਤ
ਲੁਧਿਆਣਾ: 23 ਅਗਸਤ 2019: (ਪੰਜਾਬ ਸਕਰੀਨ ਟੀਮ)::
ਅੱਜ ਅਗਨੀ ਨੇ ਲੁਧਿਆਣਾ ਵਿੱਚ ਫਿਰ ਆਪਣੀ ਕਰੋਪੀ ਦਿਖਾਈ। ਹੜਾਂ ਦੀ ਮਾਰ ਤੋਂ ਬਾਅਦ ਹੁਣ ਅੱਗ ਦੀ ਮਾਰ ਨੇ ਲੋਕਾਂ ਦਾ ਸਾਹ ਸੂਤ ਲਿਆ। ਅੱਗ ਦੀ ਇਹ ਕਰੋਪੀ ਅੱਜ ਲੁਧਿਆਣਾ ਦੇ ਗਿੱਲ ਰੋਡ ਸਥਿਤ ਕ੍ਰਿਸ਼ਨਾ ਨਗਰ 'ਚ ਇਕ ਪਲਾਸਟਿਕ ਦੀ ਫ਼ੈਕਟਰੀ 'ਚ  ਦਿਖਾਈ ਦਿੱਤੀ ਜਿੱਥੇ ਅਚਾਨਕ ਭਿਆਨਕ ਅੱਗ ਲੱਗ ਗਈ। ਅੱਗ ਦੀ ਸੂਚਨਾ ਮਿਲਦੇ ਹੀ ਮੌਕੇ 'ਤੇ ਪਹੁੰਚੀਆਂ 5 ਅੱਗ ਬੁਝਾਊ ਦਸਤਿਆਂ ਦੀ ਗੱਡੀਆਂ ਵੱਲੋਂ ਅੱਗ 'ਤੇ  ਕਾਬੂ ਪਾਉਣ ਦੀ ਮੁਸ਼ੱਕਤ ਸ਼ੁਰੂ  ਕੀਤੀ ਗਈ।  ਬਾਅਦ ਵਿੱਚ ਫੇਯਰ ਬ੍ਰਿਗੇਡ  ਗੱਡੀਆਂ ਵੀ ਮੰਗਵਾਉਣੀਆਂ ਪਈਆਂ। ਅੱਗ ਤੇ ਕਾਬੂ ਪਾਉਣ ਦੀਆਂ ਕੋਸ਼ਿਸ਼ਾਂ ਜੰਗੀ ਪੱਧਰ ਤੇ ਕਰਨੀਆਂ ਪਈਆਂ। ਅੱਗ ਇੰਨੀ ਭਿਆਨਕ ਸੀ ਕਿ ਇਸ ਨੇ ਦੇਖਦੇ ਹੀ ਦੇਖਦੇ ਪੂਰੀ ਫ਼ੈਕਟਰੀ ਨੂੰ ਆਪਣੀ ਲਪੇਟ 'ਚ ਲੈ ਲਿਆ। ਇਹ ਫੈਕਟਰੀ ਲੁਧਿਆਣਾ ਦੀ  ਰੁੱਝੀ ਹੋਈ ਸੜਕ ਗਿੱਲ ਰੋਡ 'ਤੇ ਦੇ ਨੇੜੇ ਪੈਂਦੀ ਹੈ। ਜੇ ਅੱਗ ਬੁਝਾਉਣ ਵਾਲੀਆਂ ਟੀਮਾਂ ਕੁਝ ਦੇਰ ਨਾਲ ਪਹੁੰਚਦੀਆਂ  ਤਾਂ ਅੱਗ ਆਲੇ ਦੁਆਲੇ ਵੀ ਫੈਲ ਸਕਦੀ ਸੀ। ਖੁਸ਼ਕਿਸਮਤੀ ਇਹ ਰਹੀ ਕਿ ਜਿਸ ਸਮੇਂ ਫੈਕਟਰੀ ’ਚ ਅੱਗ ਲੱਗੀ, ਉਸ ਸਮੇਂ ਕੋਈ ਵੀ ਮਜ਼ਦੂਰ ਫੈਕਟਰੀ ਦੇ ਅੰਦਰ ਕੰਮ ਨਹੀਂ ਕਰ ਰਿਹਾ ਸੀ। ਅੱਗ ਲੱਗਣ ਦਾ ਕਾਰਨ ਸ਼ਾਟ ਸਰਕਟ ਦੱਸਿਆ ਜਾ ਰਿਹਾ ਹੈ, ਪਰ ਹਾਲੇ ਤੱਕ ਸਪਸ਼ਟ ਕਾਰਨ ਪਤਾ ਨਹੀਂ ਲੱਗਿਆ ਹੈ।
ਪ੍ਰਾਪਤ ਜਾਣਕਾਰੀ ਅਨੁਸਾਰ ਗਿੱਲ ਰੋਡ ਸੈਂਟਰਲ ਮਾਰਕੀਟ ਦੇ ਪਿੱਛੇ ਕਿਸ਼ਨਪੁਰਾ ਇਲਾਕਾ ਹੈ। ਜਿੱਥੇ ਪਲਾਸਟਿਕ ਨੂੰ ਰੀਸਾਈਕਲ ਕਰਨ ਤੋਂ ਬਾਅਦ ਪਲਾਸਟਿਕ ਦਾ ਦਾਣਾ ਤਿਆਰ ਕੀਤਾ ਜਾਂਦਾ ਹੈ ਤੇ ਦਾਣਾ ਅੱਗੇ ਦੁਕਾਨਾਂ ’ਚ ਸਪਲਾਈ ਕੀਤਾ ਜਾਂਦਾ ਹੈ। ਇਹ ਫੈਕਟਰੀ ਇਲਾਕੇ ’ਚ ਦੋ ਮੰਜ਼ਿਲਾਂ ਸੀ। ਪਹਿਲੀ ਮੰਜ਼ਿਲ ’ਤੇ ਲੈਂਟਰ ਅਤੇ ਦੂਸਰੀ ’ਤੇ ਸ਼ੈਡ ਲੱਗਿਆ ਹੋਇਆ ਸੀ। ਸ਼ੁੱਕਰਵਾਰ ਦੀ ਸਵੇਰੇ ਫੈਕਟਰੀ ’ਚ ਅਚਾਨਕ ਅੱਗ ਲੱਗ ਗਈ। ਦੇਖਦੇ ਹੀ ਦੇਖਦੇ ਅੱਗ ਜ਼ਿਆਦਾ ਫੈਲ ਗਈ ਤਾਂ ਅੱਗ ਦਾ ਧੂੰਆਂ ਬਾਹਰ ਦਿਖਾਈ ਦੇਣ ਲੱਗਿਆ। ਜਿਸ ਤੋਂ ਬਾਅਦ ਆਸਪਾਸ ਦੇ ਲੋਕਾਂ ਨੇ ਅੱਗ ’ਤੇ ਕਾਬੂ ਪਾਉਣ ਦੀ ਕੋਸ਼ਿਸ਼ ਕੀਤੀ, ਪਰ ਉਹ ਕਾਮਯਾਬ ਨਹੀਂ ਹੋ ਸਕੇ। ਇਸੇ ਦੌਰਾਨ ਕਿਸੇ ਨੇ ਇਸਦੀ ਜਾਣਕਾਰੀ ਫਾਇਰ ਬ੍ਰਿਗੇਡ ਨੂੰ ਦਿੱਤੀ। ਇੱਕ ਤੋਂ ਬਾਅਦ ਇੱਕ ਫਾਇਰ ਬ੍ਰਿਗੇਡ ਦੀਆਂ ਕਰੀਬ 10 ਗੱਡੀਆਂ ਮੌਕੇ ’ਤੇ ਪੁੱਜੀਆਂ। ਜਿਨ੍ਹਾਂ ਨੇ ਚੱਕਰ ਲਾ ਕੇ ਲਗਾਤਾਰ ਪਾਣੀ ਅੱਗ ’ਤੇ ਪਾਇਆ। ਅੱਗ ਇੰਨੀ ਭਿਆਨਕ ਸੀ ਕਿ ਅੱਗ ਦੀਆਂ ਲਪਟਾਂ ਵਿੱਚੋਂ ਨਿਕਲੇ ਸੇਕ ਨਾਲ ਦੂਸਰੀ ਮੰਜ਼ਿਲ ’ਤੇ ਪਿਆ ਸਾਰਾ ਸ਼ੈੱਡ ਥੱਲੇ ਡਿੱਗ ਗਿਆ। ਜਿਸ ਨਾਲ ਆਸਪਾਸ ਖੜ੍ਹੇ ਲੋਕ ਬਾਲ ਬਾਲ ਬਚ ਗਏ। ਇਲਾਕੇ ਦੇ ਲੋਕਾਂ ਦਾ ਦੋਸ਼ ਹੈ ਕਿ ਰਿਹਾਇਸ਼ੀ ਇਲਾਕਿਆਂ ’ਚ ਦੋ ਮੰਜ਼ਿਲਾਂ ਨੂੰ ਵੀ ਸ਼ੈੱਡ ਪਾ ਕੇ ਫੈਕਟਰੀ ਬਿਨਾਂ ਮੰਨਜ਼ੂਰੀ ਹੀ ਚਲਾਈ ਜਾ ਰਹੀ ਹੈ। ਲੋਕਾਂ ਨੇ ਪ੍ਰਸ਼ਾਸ਼ਨ ਨੂੰ ਇਸ ਪਾਸੇ ਧਿਆਨ ਦੇਣ ਦੀ ਗੱਲ ਕੀਤੀ ਹੈ। ਫਾਇਰ ਬ੍ਰਿਗੇਡ ਦਾ ਕਹਿਣਾ ਹੈ ਕਿ 30 ਗੱਡੀਆਂ ਨੇ ਪੰਜ ਘੰਟੇ ਦੀ ਮਿਹਨਤ ਤੋਂ ਬਾਅਦ ਅੱਗ ’ਤੇ ਕਾਬੂ ਪਾਇਆ ਹੈ। ਫਾਇਰ ਬ੍ਰਿਗੇਡ ਦੇ ਅਫ਼ਸਰਾਂ ਦਾ ਕਹਿਣਾ ਹੈ ਕਿ ਉਹ ਮਾਮਲੇ ਦੀ ਜਾਂਚ ਕਰ ਰਹੇ ਹਨ, ਦੇਖਿਆ ਜਾ ਰਿਹਾ ਹੈ ਕਿ ਫੈਕਟਰੀ ਮਾਲਕ ਨੇ ਐਨਓਸੀ ਲਈਆਂ ਸਨ ਜਾ ਨਹੀਂ। ਉਸ ਤੋਂ ਬਾਅਦ ਫੈਕਟਰੀ ਮਾਲਕ ਖ਼ਿਲਾਫ਼ ਬਣਦੀ ਕਾਰਵਾਈ ਕੀਤੀ ਜਾਏਗੀ।

Wednesday, December 20, 2017

ਅਗਨੀਕਾਂਡ:ਕਿਸੇ ਉੱਚ ਅਧਿਕਾਰੀ ਨੇ ਨਹੀਂ ਲਈ ਸ਼ਹੀਦਾਂ ਦੇ ਪਰਿਵਾਰਾਂ ਦੀ ਸਾਰ

ਲੁਧਿਆਣਾ ਅਗਨੀਕਾਂਡ ਨੂੰ ਇੱਕ ਮਹੀਨਾ ਲੰਘ ਗਿਆ 
ਪੀੜਿਤ ਪਰਿਵਾਰਾਂ ਅਤੇ ਹੋਰ ਸੰਗਠਨਾਂ ਵੱਲੋਂ ਜਮਹੂਰੀ ਅਧਿਕਾਰ ਸਭਾ ਦੀ ਜਾਂਚ ਰਿਪੋਰਟ ਨਾਲ ਸਹਿਮਤੀ 
ਲੁਧਿਆਣਾ: 19 ਦਸੰਬਰ 2017: (ਪੰਜਾਬ ਸਕਰੀਨ ਟੀਮ)::
ਲੁਧਿਆਣਾ ਦੇ ਸੂਫ਼ੀਆਂ ਬਾਗ ਨੇੜੇ ਹੋਏ ਸਨਅਤੀ ਹਾਦਸੇ ਨੂੰ ਅੱਜ ਪੂਰਾ ਇੱਕ ਮਹੀਨਾ ਹੋ ਗਿਆ ਹੈ। ਇਸ ਭਿਆਨਕ ਹਾਦਸੇ ਮਗਰੋਂ ਭਾਵੇਂ ਆਂਢ ਗੁਆਂਡ ਦੇ ਪਰਿਵਾਰਾਂ ਨੇ ਆਪੋ ਆਪਣੇ ਘਰਾਂ ਦੀ ਮੁਰੰਮਤ ਸ਼ੁਰੂ ਕਰ ਦਿੱਤੀ ਹੈ ਪਰ ਇਸ ਅਗਨੀ ਵਿੱਚ ਸ਼ਹੀਦ ਹੋਏ ਫਾਇਰ ਵਿਭਾਗ ਵਾਲੇ ਜਵਾਨਾਂ ਦੇ ਪਰਿਵਾਰ ਲਗਾਤਾਰ ਆਪਣੇ ਗਮ ਵਿੱਚ ਇੱਕਲੇ ਹੀ ਘੁਲ ਰਹੇ ਹਨ। ਉਹਨਾਂ ਦੀ ਸਾਰ ਲੈਣੀ ਤਾਂ ਦੂਰ ਕੋਈ ਉੱਚ ਅਧਿਕਾਰੀ ਉਹਨਾਂ ਦੇ ਘਰਾਂ ਵਿੱਚ ਰਸਮੀ ਅਫਸੋਸ ਕਰਨ ਤੱਕ ਵੀ ਨਹੀਂ ਆਇਆ। ਅਮਰਸਨ ਪਲਾਸਟਿਕ ਫੈਕਟਰੀ ਅਗਨੀਕਾਂਡ ਸਬੰਧੀ ਜਮਹੂਰੀ ਅਧਿਕਾਰ ਸਭਾ ਵੱਲੋਂ ਜਾਰੀ ਕੀਤੀ ਗਈ ਜਾਂਚ ਰਿਪੋਰਟ ਨਾਲ ਅੱਜ ਇਹਨਾਂ ਪੀੜਿਤ ਪਰਿਵਾਰਾਂ ਅਤੇ ਹੋਰ ਸੰਗਠਨਾਂ ਨੇ ਸਹਿਮਤੀ ਪ੍ਰਗਟਾਈ ਹੈ। 
ਇਸ ਜਾਂਚ ਸਬੰਧੀ ਇੱਕ ਵਿਸ਼ੇਸ਼ ਮੀਟਿੰਗ ਆਰਤੀ ਸਿਨੇਮਾ ਦੇ ਸਾਹਮਣੇ ਅੱਜ ਮਾਤਾ ਅਮਰ ਕੌਰ ਮੈਮੋਰੀਅਲ ਹਾਲ ਵਿਖੇ ਹੋਈ ਪਰੋਫੈਸਰ ਜਗਮੋਹਨ ਸਿੰਘ ਹੁਰਾਂ ਦੀ ਪਰਧਾਨਗੀ ਹੇਠ ਹੋਈ। ਇਸ ਮੀਟਿੰਗ ਵਿੱਚ ਇਸ ਰਿਪੋਰਟ ਨੂੰ ਪੜ ਕੇ ਵੀ ਸੁਣਾਇਆ ਗਿਆ ਅਤੇ ਇਸਦੀਆਂ ਕਾਪੀਆਂ ਸਾਰੇ ਮੌਜੂਦ ਵਿਅਕਤੀਆਂ ਨੂੰ ਵੰਡੀਆਂ ਵੀ ਗਈਆਂ।  ਇਸ ਮੌਕੇ 'ਤੇ ਜਮਹੂਰੀ ਅਧਿਕਾਰ ਸਭਾ ਵੱਲੋਂ ਪਰੋਫੈਸਰ ਜਗਮੋਹਨ ਸਿੰਘ ਅਤੇ ਜਸਵੰਤ ਜੀਰਖ, ਬੇਲਣ ਬਰਗੇਡ ਅਤੇ ਟਰੇਡ ਯੂਨੀਅਨ "ਇੰਟਕ" ਵੱਲੋਂ ਅਨੀਤਾ ਸ਼ਰਮਾ, ਸਤ ਪਾਲ ਸ਼ਰਮਾ ਅਤੇ ਚੰਦਰ ਸ਼ੇਖਰ ਸਹੋਤਾ, ਏਟਕ ਨਾਲ ਸਬੰਧਤ ਡਿਸਪੋਜ਼ਲ ਵਰਕਰਜ਼ ਯੂਨੀਅਨ ਵੱਲੋਂ ਕਾਮਰੇਡ ਵਿਜੇ ਕੁਮਾਰ ਅਤੇ ਕਾਮਰੇਡ ਸਤਪਾਲ, ਦਲਿਤ ਮਹਾਂਪੰਚਾਇਤ ਵੱਲੋਂ ਜਸਵੀਰ ਗਿੱਲ, ਪੀਪਲਜ਼ ਮੀਡੀਆ ਲਿੰਕ ਵੱਲੋਂ ਰੈਕਟਰ ਕਥੂਰੀਆ ਅਤੇ ਰਾਜਿੰਦਰ ਭਾਟੀਆ ਨੇ ਸ਼ਮੂਲੀਅਤ ਕੀਤੀ। 
ਇਸ ਮੌਕੇ ਫਾਇਰ ਵਿਭਾਗ ਦੇ ਪੀੜਿਤ ਪਰਿਵਾਰਾਂ ਵੱਲੋਂ ਮਨਜੀਤ ਮੈਡਮ, ਜਰਨੈਲ ਸਿੰਘ, ਕਰਮਜੀਤ ਸਿੰਘ, ਅਜੀਤ ਸਿੰਘ, ਕੁਲਦੀਪ ਕੌਰ, ਤੇਜਿੰਦਰ ਕੌਰ, ਬਲਵਿੰਦਰ ਕੌਰ, ਹਰਭਜਨ ਕੌਰ, ਪਰਮਿੰਦਰ ਸਿੰਘ, ਹਰਿੰਦਰ ਪਾਲ ਸਿੰਘ ਅਤੇ ਕਈ ਹੋਰਾਂ ਨੇ ਇਸ ਤਰਾਸਦੀ ਮਗਰੋਂ ਆਪਣੇ ਘਰਾਂ ਦੀ ਹਾਲਤ ਬਾਰੇ ਦੱਸਦਿਆਂ ਆਪਣਾ ਦੁੱਖ ਸਾਂਝਾ ਕੀਤਾ। ਇਸ ਮੀਟਿੰਗ ਵਿੱਚ ਇਹ ਗੱਲ ਬੜੇ ਦੁਖੀ ਹਿਰਦੇ ਨਾਲ ਨੋਟ ਕੀਤੀ ਗਈ ਕਿ ਸਰਕਾਰ ਦੇ ਉੱਚ ਅਧਿਕਾਰੀ ਇਹਨਾਂ ਸ਼ਹੀਦਾਂ ਦੇ ਪਰਿਵਾਰਾਂ ਦੀ ਸਾਰ ਲੈਣ ਤੱਕ ਵੀ ਨਹੀਂ ਆਏ।  ਕਿਸੇ ਨੇ ਕਿਸੇ ਪਰਿਵਾਰ ਨੂੰ ਇਹ ਨਹੀਂ ਪੁੱਛਿਆ ਕਿ ਪਰਿਵਾਰਾਂ ਦੇ ਮੁਖੀਆਂ ਦੇ ਤੁਰ ਜਾਣ ਮਗਰੋਂ ਤੁਹਾਡਾ ਗੁਜ਼ਾਰਾ ਕਿਸ ਤਰਾਂ ਹੋ ਰਿਹਾ ਹੈ? ਅਫਸਰਸ਼ਾਹੀ ਅਤੇ ਨੌਕਰਸ਼ਾਹੀ ਦੇ ਰਵਾਇਤੀ ਟਾਲ ਮਟੋਲ ਵਿੱਚ ਫਾਇਰ ਵਿਭਾਗ ਦੇ ਇਹਨਾਂ ਜਵਾਨਾਂ ਦੀ ਕੁਰਬਾਨੀ ਲਗਾਤਾਰ ਰੁਲ ਰਹੀ ਹੈ ਅਤੇ ਇਸ ਨੂੰ ਰੱਬ ਦਾ ਭਾਣਾ ਕਹਿ ਕੇ ਇਨਸਾਨੀ ਗਲਤੀਆਂ ਉੱਤੇ ਪਰਦਾ ਪਾਉਣ ਦੀਆਂ ਸਾਜ਼ਿਸ਼ਾਂ ਜਾਰੀ ਹਨ। 

Friday, December 15, 2017

ਲੁਧਿਆਣਾ ਅਗਨੀਕਾਂਡ: ਜਮਹੂਰੀ ਅਧਿਕਾਰ ਸਭਾ ਵੱਲੋਂ ਜਾਂਚ ਰਿਪੋਰਟ ਜਾਰੀ

ਜਾਂਚ ਰਿਪੋਰਟ ਵਿੱਚ ਕਈ ਅਹਿਮ ਖੁਲਾਸੇ 
ਲੁਧਿਆਣਾ: 15 ਦਸੰਬਰ (ਪੰਜਾਬ ਸਕਰੀਨ ਬਿਊਰੋ):: More Pics on Facebook Please
ਜਮਹੂਰੀ ਅਧਿਕਾਰ ਸਭਾ ਪੰਜਾਬ (ਜ਼ਿਲ੍ਹਾ ਲੁਧਿਆਣਾ) ਵੱਲੋਂ ਸਥਾਨਕ ਸੂਫ਼ੀਆਂ ਚੌਕ, ਮੁਸ਼ਤਾਕਗੰਜ ਵਿਖੇ ਅਮਰਸਨ ਪਲਾਸਟਿਕ ਫ਼ੈਕਟਰੀ (ਗੋਲਾ ਫ਼ੈਕਟਰੀ) ਵਿੱਚ ਭਿਆਨਕ ਅੱਗ ਲੱਗਣ ਦੀ ਘਟਨਾ ਬਾਰੇ ਜਾਂਚ ਕੀਤੀ ਗਈ ਸੀ। ਜਾਂਚ ਕਮੇਟੀ ਮੈਂਬਰ ਪ੍ਰੋ. ਜਗਮੋਹਣ ਸਿੰਘ, ਜਸਵੰਤ ਜੀਰਖ, ਸਤੀਸ਼ ਸੱਚਦੇਵਾ, ਰੈਕਟਰ ਕਥੂਰੀਆ, ਪ੍ਰਦੀਪ ਸ਼ਰਮਾ ਅਤੇ ਐਡਵੋਕੇਟ ਹਰਪ੍ਰੀਤ ਜੀਰਖ ਵੱਲੋਂ ਅੱਜ ਉਸ ਜਾਂਚ ਰਿਪੋਰਟ ਦਾ ਪਹਿਲਾ ਭਾਗ ਜਾਰੀ ਕੀਤਾ ਗਿਆ। ਜਾਂਚ ਕਮੇਟੀ ਨੇ ਇਹ ਰਿਪੋਰਟ ਖੁਦ ਮੌਕੇ ਤੇ ਜਾ ਕੇ ਅਤੇ ਲੋਕਾਂ ਦੇ ਵਿਚਾਰ ਸੁਣਨ ਮਗਰੋਂ  ਤਿਆਰ ਕੀਤੀ ਗਈ। ਇਸਦਾ ਕੰਮ ਅਜੇਡ ਵੀ ਲਗਾਤਾਰ ਜਾਰੀ ਹੈ। ਛੇਤੀ ਹੀ ਇਸਦੇ ਬਾਕੀ ਅੱਪਡੇਟ ਵੀ ਸਾਹਮਣੇ ਲਿਆਂਦੇ ਜਾਣਗੇ। More Pics on Facebook Please
ਸਾਮਾਨ ਕੱਢਣ ਦੀ ਜਲਦਬਾਜ਼ੀ ਕਾਰਨ ਹੋਈਆਂ ਮੌਤਾਂ? 
ਇਸ ਰਿਪੋਰਟ ਵਿੱਚ ਸਪਸ਼ਟ ਕੀਤਾ ਹੈ ਕਿ ਅੱਗ ਬਾਰੇ ਸਵੇਰੇ 6.10 ਵਜੇ ਫ਼ੈਕਟਰੀ ਦੀ ਉੱਪਰਲੀ ਮੰਜ਼ਲ ਵਿਚੋਂ ਧੂਆੰ ਨਿਕਲਣ ਤੇ ਪਤਾ ਲੱਗਾ। ਫਾਇਰ ਬ੍ਰਗੇਡ 7.15 ਵਜੇ ਦੇ ਕਰੀਬ ਪੁਜਾ ਜਿਸ ਨੇ 10.07 ਵਜੇ ਤੱਕ ਅੱਗ ਉੱਪਰ ਕਾਬੂ ਪਾ ਲਿਆ ਸੀ। ਇਸ ਬਾਅਦ ਜਦੋਂ ਸ੍ਰੀ ਲਕਸ਼ਮਣ ਦਰਾਵੜ ਆਪਣੇ ਸਹਿਯੋਗੀਆਂ ਸਮੇਤ ਉਥੇ ਪੁੱਜੇ ਤਾਂ ਉਹਨਾਂ ਅੱਗ ਬੁਝਾਊ ਅਮਲੇ ਦੇ ਕੰਮ ਵਿੱਚ ਦਖ਼ਲ ਅੰਦਾਜੀ ਕਰਦਿਆਂ ਫ਼ੈਕਟਰੀ ਅੰਦਰੋਂ ਸਮਾਨ ਕੱਢਣ ਲਈ ਜਲਦਬਾਜੀ ਕੀਤੀ। ਉਹ ਆਪਣੇ ਨਾਲ ਹੋਰਾਂ ਨੂੰ ਵੀ ਨਾਲ ਲੈਕੇ ਸਮਾਨ ਕੱਢਣ ਲਈ ਫ਼ੈਕਟਰੀ ਅੰਦਰ ਚਲੇ ਗਏ ਤੇ ਇਸੇ ਦੌਰਾਨ ਸਾਰੀ ਫ਼ੈਕਟਰੀ ਢਹਿਢੇਰੀ ਹੋ ਗਈ ਤੇ ਸਾਰੇ ਹੀ ਮਲਬੇ ਹੇਠ ਦੱਬਣ ਕਾਰਣ ਮਾਰੇ ਗਏ। More Pics on Facebook Please
ਲਕਸ਼ਮਣ ਦਰਾਵੜ ਅਤੇ ਫੈਕਟਰੀ ਮਾਲਕ ਦਰਮਿਆਨ ਕਹਾ-ਸੁਣੀ ਵੀ ਹੋਈ ਸੀ?
ਜਾਂਚ ਦੌਰਾਨ ਪਾਇਆ ਗਿਆ ਕਿ ਲਕਸ਼ਮਣ ਦਰਾਵੜ ਇਸ ਘਟਨਾ ਤੋਂ ਇਕ ਦਿਨ ਪਹਿਲਾਂ ਵੀ ਆਪਣੇ ਦੋ ਸਾਥੀਆਂ ਸਮੇਤ ਫ਼ੈਕਟਰੀ 'ਚ ਆਏ ਸਨ। ਉਸ ਸਮੇਂ ਉਹਨਾਂ ਇਥੇ ਚਾਹ ਪੀਂਦਿਆਂ ਉੱਚੀ ਆਵਾਜ 'ਚ ਗੱਲਾਂ ਵੀ ਕੀਤੀਆਂ ਜੋ ਪੈਸੇ ਦੇ ਲੈਣ ਦੇਣ ਬਾਰੇ ਸਨ। ਇਹ ਵੀ ਪਤਾ ਲਗਾ ਕਿ ਇਥੇ ਰਾਜ ਕਰਦੀਆਂ ਸਿਆਸੀ ਪਾਰਟੀਆਂ ਦੇ ਲੀਡਰਾਂ ਦੀ ਵੀ ਕਾਫ਼ੀ ਆਵਾਜਾਈ ਰਹਿੰਦੀ ਸੀ। ਲੋਕਾਂ ਨੇ ਇਸ ਫ਼ੈਕਟਰੀ ਨੂੰ ਇਸ ਰਿਹਾਇਸ਼ੀ ਇਲਾਕੇ ਵਿਚੋਂ ਬਾਹਰ ਕਢਾਉਣ ਲਈ ਵੀ ਚਾਰਾ ਜੋਈ ਕੀਤੀ ਸੀ ,ਪਰ ਕੋਈ ਵਿਭਾਗੀ ਕਾਰਵਾਈ ਨਹੀਂ ਹੋਈ।  More Pics on Facebook Please
ਜਦੋਂ ਅੱਗ ਲੱਗੀ ਉਦੋਂ ਬਿਜਲੀ ਬੰਦ ਸੀ 
ਜਾਂਚ ਦੌਰਾਨ ਇਹ ਗੱਲ ਵੀ ਸਾਹਮਣੇ ਆਈ ਕਿ ਅੱਗ ਲੱਗਣ ਸਮੇਂ ਫੈਕਟਰੀ ਬੰਦ ਸੀ ਤੇ ਉਸ ਵੇਲੇ ਬਿਜਲੀ ਵੀ ਬੰਦ ਸੀ। ਇਸ ਕਰਕੇ ਅੱਗ ਲੱਗਣ ਦੇ ਕਾਰਣਾਂ ਨੂੰ ਪੜਤਾਲਣ ਦੀ ਲੋੜ ਹੈ। ਪਰ ਇਲਾਕੇ ਦੇ ਸਿਆਸੀ ਲੀਡਰ ਇਸ ਨੂੰ ਕੁਦਰਤੀ ਹਾਦਸਾ ਦਸ ਰਹੇ ਹਨ। ਉਹਨਾਂ ਅਨੁਸਾਰ ਜੋ ਲੋਕ ਬਚ ਗਏ ਹਨ, ਉਹ ਪਰਮਾਤਮਾ ਨੇ ਹੀ ਬਚਾ ਲਏ ਹਨ। ਕਿਸੇ ਨੂੰ ਇਹ ਵੀ ਪਤਾ ਨਹੀਂ ਸੀ ਕਿ ਫ਼ੈਕਟਰੀ ਅੰਦਰ ਕਿਹੜੇ-ਕਿਹੜੇ ਜਲਣਸ਼ੀਲ ਕੈਮੀਕਲ ਕਿੰਨੀ ਕਿੰਨੀ ਮਾਤਰਾ 'ਚ ਪਏ ਹਨ। ਨਾ ਹੀ ਕਿਸੇ ਅਧਿਕਾਰੀ ਨੇ ਫ਼ੈਕਟਰੀ ਮਾਲਕ ਤੋਂ ਇਹ ਪੁੱਛਣ ਦੀ ਲੋੜ ਸਮਝੀ ਹੈ। ਇਸ ਕਰਕੇ ਅੱਗ ਬਝਾਊ ਅਮਲੇ ਨੂੰ ਵੀ ਇਸ ਸਬੰਧੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ। ਫ਼ੈਕਟਰੀ ਦੀ ਹੇਠਲੀ ਮੰਜ਼ਲ ਦੀ ਸੀਮਿੰਟ ਦੀ ਬਜਾਏ ਗਾਰੇ ਨਾਲ ਚੁਣਾਈ ਕਰੇ ਹੋਣ ਬਾਰੇ ਵੀ ਜਾਂਚ ਕਮੇਟੀ ਨੂੰ ਪਤਾ ਲੱਗਾ।  More Pics on Facebook Please
ਪ੍ਰਸ਼ਾਸਨ ਦਾ ਜ਼ਿਆਦਾ ਜ਼ੋਰ ਗੋਲਾ ਫ਼ੈਕਟਰੀ ਦਾ ਸਮਾਨ ਸਾਂਭਣ 'ਚ ਹੀ ਲੱਗਾ 
ਮੌਕੇ ਤੇ ਮਲਬੇ ਹੇਠ ਦੱਬੇ ਮੁਲਾਜ਼ਮਾਂ ਦੇ ਪਰਿਵਾਰਕ ਮੈਂਬਰਾਂ ਨੂੰ ਇਸ ਗੱਲ ਦਾ ਵੀ ਗਿਲਾ ਸੀ ਕਿ ਭਾਵੇਂ ਇਸ ਕੰਮ ਵਿੱਚ ਮਦਦ ਕਰਨ ਲਈ ਮਿਲਟਰੀ ਵੀ ਬੁਲਾਈ ਗਈ , ਪਰ ਉਸ ਤੋਂ ਕੋਈ ਕੰਮ ਲਏ ਬਿਨਾ ਹੀ ਵਾਪਸ ਭੇਜ ਦਿੱਤਾ ਗਿਆ। ਪਤਾ ਨਹੀਂ ਇਹ ਕਿਸ ਦੇ ਹੁਕਮ ਨਾਲ ਵਾਪਸ ਭੇਜੀ ਗਈ। ਉਹਨਾਂ ਇਹ ਵੀ ਦੱਸਿਆ ਕਿ ਲਕਸ਼ਮਣ ਦਰਾਵੜ ਦਾ ਮਿਰਤਕ ਸਰੀਰ ਮਿਲਣ ਬਾਅਦ ਪਹਿਲਾਂ ਦੀ ਤਰਾਂ ਵਾਲੀ ਤੇਜ਼ੀ, ਮਲਬਾ ਹਟਾਉਣ ਵਿੱਚ  ਨਹੀਂ ਵਰਤੀ ਗਈ। ਵਾਰਸਾਂ ਨੇ ਇਹ ਦੁੱਖ ਵੀ ਜ਼ਾਹਰ ਕੀਤਾ ਕਿ ਪ੍ਰਸ਼ਾਸਨ ਦਾ ਜ਼ਿਆਦਾ ਜ਼ੋਰ ਗੋਲਾ ਫ਼ੈਕਟਰੀ ਦਾ ਸਮਾਨ ਸਾਂਭਣ 'ਚ ਹੀ ਲੱਗਾ ਹੋਇਆ ਸੀ ਜਿਸ ਦੀ ਪੁਸ਼ਟੀ ਉਥੇ ਪਈ ਇਕ ਮਹਿੰਗੀ ਮਸ਼ੀਨ ਚੁੱਕ ਕੇ ਲੈ ਜਾਣ ਤੋਂ ਵੀ ਹੋਈ। More Pics on Facebook Please
ਫਾਇਰ ਬ੍ਰਿਗੇਡ ਜਵਾਨਾਂ ਨੇ ਸਾਧਨਾਂ ਦੀ ਕਮੀ ਦੇ ਬਾਵਜੂਦ ਦਿਖਾਈ ਬਹਾਦਰੀ 
ਜਾਂਚ ਰਿਪੋਰਟ ਵਿੱਚ ਸਪਸ਼ਟ ਕੀਤਾ ਗਿਆ ਹੈ ਕਿ  ਫਾਇਰ ਬ੍ਰਗੇਡ ਦੇ ਮੁਲਾਜ਼ਮਾਂ ਕੋਲ ਅਜਿਹੀ ਘਟਨਾ ਨਾਲ ਨਜਿੱਠਣ ਲਈ ਲੋੜੀਂਦੇ ਸਾਧਨਾਂ ਦੀ ਕਮੀ ਦੇ ਬਾਵਜੂਦ ਵੀ ਉਹਨਾਂ ਆਪਣੀਆਂ ਜਾਨਾਂ ਨੂੰ ਖ਼ਤਰੇ 'ਚ ਪਾਕੇ ਪੂਰੀ ਮਿਹਨਤ ਨਾਲ ਕੰਮ ਕੀਤਾ। ਉਹ ਆਪਣੇ ਸਰੀਰ ਦੁਆਲੇ ਗਿੱਲੀਆਂ ਬੋਰੀਆਂ ਲਪੇਟਕੇ ਕੰਮ ਚਲਾ ਰਹੇ ਸਨ। ਸਰਕਾਰ ਅਤੇ ਪ੍ਰਸ਼ਾਸਨ ਵੱਲੋਂ ਮਸ਼ੀਨਾਂ ਤਾਂ ਖਰੀਦ ਲਈਆਂ ਜਾਂਦੀਆਂ ਹਨ ਪਰ ਹੋਰ ਸਾਜ਼ੋ-ਸਮਾਨ ਦੀ ਪੂਰਤੀ ਵੱਲ ਕੋਈ ਧਿਆਨ ਨਹੀਂ ਦਿੱਤਾ ਜਾਂਦਾ। ਇਹ ਘਟਨਾ 20 ਨਵੰਬਰ ਨੂੰ ਵਾਪਰੀ ਪਰ ਐਫ ਆਈ ਆਰ 22 ਨਵੰਬਰ ਨੂੰ ਲਿਖਾਉਣੀ ਵੀ ਪ੍ਰਸ਼ਾਸਨ ਦੀ ਲਾਪਰਵਾਹੀ ਜ਼ਾਹਰ ਕਰਦੀ ਹੈ।
ਡਾਗ ਸੁਕਐਡ ਦੀ ਅਣਹੋਂਦ   
ਰਿਪੋਰਟ ਵਿੱਚ ਇਹ ਵੀ ਪਾਇਆ ਗਿਆ ਕਿ ਫਾਇਰ ਬ੍ਰਗੇਡ ਦਾ ਪੂਰੀ ਤਰਾਂ ਵਿਗਿਆਨਕ ਤੌਰ ਤੇ ਲੈਸ ਨਾ ਹੋਣਾ, ਸੁਰੱਖਿਆ ਕਵਚ ਦੀ ਅਣਹੋਂਦ ਅਤੇ ਕੈਮੀਕਲ ਵਾਲੀ ਅੱਗ ਬੁਝਾਉਣ ਲਈ ਉਚਿੱਤ ਪ੍ਰਬੰਧ ਦੀ ਕਮੀ ਸੀ। ਮਲਬੇ ਵਿੱਚ ਫਸੇ ਲੋਕਾਂ ਨੂੰ ਲੱਭਣ ਲਈ ਡਾਗ ਸੁਕਐਡ ਦੀ ਅਣਹੋਂਦ ਪਾਈ ਗਈ। ਉਦਯੋਗਿਕ ਬਿਲਡਿੰਗ ਉਸਾਰੀ, ਲੇਬਰ ਅਤੇ ਪ੍ਰਦੂਸਨ ਵਿਭਾਗਾਂ ਵੱਲੋਂ ਨਿਯਮਾਂ ਦੀ ਪਾਲਣਾ ਕਰਨ ਵਿੱਚ ਵਰਤੀ ਕੁਤਾਹੀ ਲਈ ਇਹਨਾਂ ਵਿਭਾਗਾਂ ਦੇ ਜ਼ੁੰਮੇਵਾਰ ਅਧਿਕਾਰੀ ਵੀ ਇਸ ਘਟਨਾ ਲਈ ਬਰਾਬਰ ਦੇ ਜ਼ੁੰਮੇਵਾਰ ਹਨ।  More Pics on Facebook Please
ਮਾਣਯੋਗ ਹਾਈ ਕੋਰਟ ਦੇ ਜੱਜ ਦੀ ਨਿਗਰਾਨੀ ਹੇਠ ਐਸ ਆਈ ਟੀ ਦੀ ਮੰਗ 
ਜਾਂਚ ਕਮੇਟੀ ਮੰਗ ਕਰਦੀ ਹੈ ਕਿ ਇਸ ਵੱਡੇ ਹਾਦਸੇ ਦੀਆਂ ਖਾਮੀਆਂ ਦੀ ਮਾਣਯੋਗ ਹਾਈ ਕੋਰਟ ਦੇ ਜੱਜ ਦੀ ਨਿਗਰਾਨੀ ਹੇਠ ਸਪੈਸ਼ਲ ਇਨਵੈਸਟੀਗੇਸਨ ਟੀਮ ਤੋਂ ਜਾਂਚ ਕਰਵਾਈ ਜਾਵੇ ਤਾਂ ਕਿ ਠੀਕ ਸਿੱਟੇ ਕੱਢਕੇ ਲੋਕਾਂ ਅਤੇ ਮਜ਼ਦੂਰਾਂ ਦੀ ਸੁਰੱਖਿਆ ਲਈ ਜ਼ਰੂਰੀ ਆਦੇਸ਼  ਜਾਰੀ ਹੋ ਸਕਣ ਤੇ ਹੋਰ ਸਬੰਧਤ ਅਦਾਰਿਆਂ 'ਤੇ ਵੀ ਲਾਗੂ ਕੀਤੇ ਜਾਣ। 
ਸ਼ਹੀਦ ਹੋਏ ਫਾਇਰਮੈਂ ਜਵਾਨਾਂ ਨੂੰ ਸੈਨਿਕਾਂ ਵਾਂਗ ਸਨਮਾਨ ਦੇਣ ਦੀ ਮੰਗ                     
9 ਫਾਇਰਮੈਨਾਂ ਦੀ ਡਿਊਟੀ ਦੌਰਾਨ ਲੋਕਾਂ ਦੀ ਸੁਰੱਖਿਆ ਕਰਦੇ ਹੋਏ ਮੌਤ ਹੋਈ, ਉਹਨਾਂ ਨੂੰ ਦੇਸ਼ ਦੀ ਸੁਰੱਖਿਆ ਕਰਨ ਵਾਲੇ ਸੈਨਿਕਾਂ ਦੇ ਬਰਾਬਰ ਰੱਖਦੇ ਹੋਏ ਸਨਮਾਨ ਦਿੱਤਾ ਜਾਣਾ ਚਾਹੀਦਾ ਹੈ। ਮਲਬੇ ਹੇਠ ਦੱਬੇ ਹੋਰ ਮਜ਼ਦੂਰਾਂ ਨੂੰ ਵੀ ਇਸੇ ਪੱਧਰ ਤੇ ਮੁਆਵਜਾ ਦਿੱਤਾ ਜਾਵੇ। 
ਮਲਬਾ ਹਟਾਉਣ ਲਈ ਹੋਇਆ ਖਰਚਾ ਫੈਕਟਰੀ ਮਾਲਕ ਪਾਸੋਂ ਵਸੂਲਣ ਦੀ ਮੰਗ 
ਮਲਬਾ ਹਟਾਉਣ ਲਈ ਹੋਇਆ ਕੁਲ ਖ਼ਰਚਾ ਫ਼ੈਕਟਰੀ ਮਾਲਕ ਪਾਸੋਂ ਵਸੂਲਿਆ ਜਾਵੇ। ਆਸਪਾਸ ਦੇ ਨੁਕਸਾਨੇ ਗਏ ਘਰਾਂ ਦੇ ਮਾਲਕਾਂ ਨੂੰ ਹੋਏ ਨੁਕਸਾਨ ਦੀ ਫ਼ੈਕਟਰੀ ਮਾਲਕ ਤੋਂ ਭਰਪਾਈ ਕਰਵਾਈ ਜਾਵੇ। ਖ਼ਤਰਨਾਕ ਉਦਯੋਗ ਰਿਹਾਇਸ਼ੀ ਇਲਾਕੇ ਵਿੱਚ ਨਾ ਲੱਗਣ ਨੂੰ ਯਕੀਨੀ ਬਣਾਇਆ ਜਾਵੇ। ਫ਼ੈਕਟਰੀ ਮਾਲਕ ਸਮੇਤ ਹੋਰ ਸਬੰਧਤ ਵਿਭਾਗਾਂ ਦੇ ਜ਼ੁੰਮੇਵਾਰ ਅਧਿਕਾਰੀਆਂ ਜਿਨ੍ਹਾਂ ਨੇ ਅਣਗਹਿਲੀ ਵਰਤੀ ਹੈ ਦੇ ਖ਼ਿਲਾਫ਼ ਬਣਦੀ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇ।

Saturday, December 02, 2017

ਇੰਟਕ ਵੱਲੋਂ ਮੁਸ਼ਤਾਕਗੰਜ ਲੁਧਿਆਣਾ ਅਗਨੀ ਕਾਂਡ ਬਾਰੇ ਗੁਪਤ ਜਾਂਚ ਰਿਪੋਰਟ?

ਅਨੀਤਾ ਸ਼ਰਮਾ ਨੇ ਭੇਜੀ ਪੰਜਾਬ ਸਰਕਾਰ ਨੂੰ ਪਰਦੇ ਪਿੱਛੇ ਲੁੱਕੀ ਅਸਲੀਅਤ? 
ਲੁਧਿਆਣਾ:1 ਦਸੰਬਰ 2017:(ਪੰਜਾਬ ਸਕਰੀਨ ਬਿਊਰੋ):: 
ਪੰਜਾਬ ਇੰਟਕ ਮਹਿਲਾ ਵਿੰਗ ਦੀ ਸੂਬਾਈ ਪਰਧਾਨ ਅਤੇ ਬੇਲਣ ਬਰਗੇਡ ਸੁਪਰੀਮੋ ਅਨੀਤਾ ਸ਼ਰਮਾ ਨੇ ਅੱਜ ਮੁਸ਼ਤਾਕਗੰਜ ਅਗਨੀਕਾਂਡ ਵਿੱਚ ਸ਼ਹੀਦ ਹੋਏ ਮੁਲਾਜ਼ਮਾਂ ਮਨੋਹਰ ਲਾਲ ਅਤੇ ਰਾਜਕੁਮਾਰ ਦੇ ਪਰਿਵਾਰਾਂ ਨਾਲ ਡੂੰਘੀ ਸੰਵੇਦਨਾ ਦਾ ਪਰਗਟਾਵਾ ਕੀਤਾ। ਉਹਨਾਂ ਨੇ ਅੱਜ ਉਨਾਂ ਦੀ ਅੰਤਿਮ ਅਰਦਾਸ ਮੌਕੇ ਵੀ ਆਪਣੀ ਟੀਮ ਨਾਲ ਸ਼ਮੂਲੀਅਤ ਕੀਤੀ। ਉਨਾਂ ਇਸ ਗੱਲ ਤੇ ਡੂੰਘੇ ਦੁੱਖ ਦਾ ਪਰਗਟਾਵਾ ਕੀਤਾ ਕਿ ਵੱਡੇ ਪਰਭਾਵ ਵਾਲੇ ਆਗੂ ਦਾ ਸ਼ਰਧਾਂਜਲੀ ਸਮਾਗਮ ਵੱਡੇ ਪੱਧਰ ਉੱਤੇ ਕੀਤਾ ਗਿਆ ਜਦਕਿ ਆਰਥਿਕ ਅਤੇ ਸਿਆਸੀ ਪੱਖੋਂ ਕਮਜ਼ੋਰ ਪਰਿਵਾਰਾਂ ਨੂੰ ਇਹ ਦੁੱਖਦਾਈ ਰਸਮ ਵੀ ਆਪਣੇ ਸੀਮਿਤ ਵਸੀਲਿਆਂ ਨਾਲ ਪੂਰੀ ਕਰਨੀ ਪਈ। ਮੈਡਮ ਅਨੀਤਾ ਸ਼ਰਮਾ ਨੇ ਉਨਾਂ ਵਿਅਕਤੀਆਂ ਅਤੇ ਆਗੂਆਂ ਦੇ ਬਿਆਨਾਂ ਦਾ ਸਵਾਗਤ ਕੀਤਾ ਜਿਹਨਾਂ ਨੇ ਖੁਲ ਕੇ ਇਹ ਕਹਿਣ ਦੀ ਹਿੰਮਤ ਦਿਖਾਈ ਕਿ ਗਲਤੀਆਂ ਕਿਸੇ ਹੋਰ ਦੀਆਂ ਸਨ ਪਰ ਭੁਗਤਣੀਆਂ ਪਈਆਂ ਇਹਨਾਂ ਜਾਂਬਾਜ਼ ਫਾਇਰ ਵਰਕਰਾਂ ਨੂੰ। ਕੀ ਇਹਨਾਂ ਦੀਆਂ ਮੌਤਾਂ ਲਈ ਜ਼ਿੰਮੇਦਾਰ ਅਨਸਰਾਂ ਦੀਆਂ ਗਲਤੀਆਂ ਨੂੰ ਜਾਣਬੁਝ ਕੇ ਨਜ਼ਰ ਅੰਦਾਜ਼ ਕੀਤਾ ਜਾਏਗਾ? 
ਮੈਡਮ ਅਨੀਤਾ ਸ਼ਰਮਾ ਨੇ ਇੱਕ ਪਰੈਸ ਬਿਆਨ ਰਾਹੀਂ ਦੱਸਿਆ ਕਿ ਉਨਾਂ ਦੀ ਟੀਮ ਨੇ ਇਸ ਸਬੰਧੀ ਸਾਰੇ ਤੱਥਾਂ ਅਤੇ ਅੰਕੜਿਆਂ ਦੀ ਘੋਖ ਪੜਤਾਲ ਕੀਤੀ ਹੈ ਜਿਸ ਨੂੰ ਉਹ ਸਿਧੇ ਤੌਰ ਤੇ ਪੰਜਾਬ ਸਰਕਾਰ ਅਤੇ ਕਾਂਗਰਸ ਹਾਈ ਕਮਾਨ ਨੂੰ ਭੇਜ ਰਹੇ ਹਨ। ਉਨਾਂ ਕਿਹਾ ਕਿ ਫਿਲਹਾਲ ਉਹ ਇਸ ਬਾਰੇ ਮੀਡੀਆ ਵਿੱਚ ਕੁਝ ਨਹੀਂ ਕਹਿਣਗੇ ਪਰ ਹਾਂ ਇਹ ਗੱਲ ਜ਼ਰੂਰ ਹੈ ਕਿ ਇਸ ਭਿਆਨਕ ਅਗਨੀ ਕਾਂਡ ਨੂੰ ਰੱਬ ਦਾ ਭਾਣਾ ਆਖ ਕੇ ਮਨੁੱਖੀ ਗਲਤੀਆਂ ਨੂੰ ਨਜ਼ਰ ਅੰਦਾਜ਼ ਕਰਨ ਜਾਂ ਇਨਾਂ ਤੋਂ ਧਿਆਨ ਹਟਾਉਣ ਦੀ ਸਾਜ਼ਿਸ਼ ਨੂੰ ਵੀ ਉਹ ਕਾਮਯਾਬ ਨਹੀਂ ਹੋਣ ਦੇਣਗੇ। ਮੈਡਮ ਅਨੀਤਾ ਸ਼ਰਮਾ ਨੇ ਸਪਸ਼ਟ ਕਿਹਾ ਕਿ ਇਸ ਅਗਨੀ ਕਾਂਡ ਨੂੰ  ਜਿਸ ਤਰਾਂ ਨਜਿੱਠਿਆ ਗਿਆ ਹੈ ਉਸ ਨਾਲ ਲੋਕਾਂ ਦੇ ਦਿਲਾਂ ਵਿੱਚ ਬਹੁਤ ਗੁੱਸਾ ਹੈ ਜਿਹੜਾ ਫਿਲਹਾਲ ਦਿਲਾਂ ਵਿੱਚ ਦੱਬਿਆ ਹੋਇਆ ਹੈ। ਜੇ ਲੋਕਾਂ ਨੂੰ ਵੇਲੇ ਸਿਰ ਇਨਸਾਫ ਨਾ ਮਿਲਿਆ ਜਾਂ ਫਿਰ ਗਲਤੀਆਂ ਕਰਨ ਵਾਲਿਆਂ ਨੂੰ ਸਜ਼ਾ ਨਾ ਮਿਲੀ ਤਾਂ ਗੁਸੇ ਦਾ ਇਹ ਜਵਾਲਾਮੁਖੀ ਕਿਸੇ ਵੇਲੇ ਵੀ ਫਟ ਸਕਦਾ ਹੈ। ਪੰਜਾਬ ਵਿੱਚ ਇਸ ਵੇਲੇ ਕਾਂਗਰਸ ਪਾਰਟੀ ਦੀ ਸਰਕਾਰ ਹੈ ਅਤੇ ਮਜ਼ਦੂਰ ਸੰਗਠਨ ਇੰਟਕ ਸਾਡੀ ਕਾਂਗਰਸ ਪਾਰਟੀ ਦਾ ਇੱਕ ਅਹਿਮ ਹਿੱਸਾ ਹੈ। ਅਸੀਂ ਮਜ਼ਦੂਰਾਂ ਅਤੇ ਵਰਕਰਾਂ ਨਾਲ ਬੇਇਨਸਾਫ਼ੀ ਕੀਤੇ ਜਾਣ ਦੀ ਕੋਈ ਸਾਜ਼ਿਸ਼ ਸਫਲ ਨਹੀਂ ਹੋਣ ਦਿਆਂਗੇ। ਉਹਨਾਂ ਕਿਹਾ ਕਿ ਇਸ ਘਟਨਾ ਵਾਲੀ ਥਾਂ 'ਤੇ ਜਾ ਕੇ ਹੀ ਪਤਾ ਲੱਗਿਆ ਕਿ ਨੇੜੇ ਤੇੜੇ ਰਹਿ ਰਹੇ ਲੋਕਾਂ ਦੇ ਦਿਲਾਂ  ਵਿੱਚ ਬਹੁਤ ਸਾਰੇ ਖਦਸ਼ੇ ਅਤੇ ਅਤੇ ਸੁਆਲ ਹਨ। ਇਹਨਾਂ ਸੁਆਲਾਂ ਦੇ ਜੁਆਬ ਲੱਭਦਿਆਂ ਹੀ ਮਹਿਸੂਸ ਹੁੰਦਾ ਹੈ ਇਸ ਘਟਨਾ ਪਿਛੇ ਲੁੱਕੇ ਕਾਰਨਾਂ ਦੀ ਗੰਭੀਰਤਾ ਦਾ ਅਹਿਸਾਸ। ਮੈਡਮ ਅਨੀਤਾ ਸ਼ਰਮਾ ਨੇ ਇਹ ਵੀ ਦੱਸਿਆ ਕਿ ਇਸ ਵਿਸ਼ੇਸ਼ ਰਿਪੋਰਟ ਦਾ ਪਹਿਲਾ ਭਾਗ ਭੇਜ ਦਿੱਤਾ ਗਿਆ ਹੈ ਜਦਕਿ ਦੂਜਾ ਭਾਗ ਅਜੇ ਤਿਆਰੀ ਅਧੀਨ ਹੈ। ਜੇ ਕਿਸੇ ਨੇ ਇਸ ਬਾਰੇ ਕੋਈ ਖਾਸ ਗੱਲ ਦੱਸਣੀ ਹੋਵੇ ਤਾਂ ਉਹ ਆਪਣੀ ਜਾਣਕਾਰੀ ਸਾਨੂੰ ਜਾਂ ਸਾਡੀ ਟੀਮ ਨੂੰ ਦੇ ਸਕਦਾ ਹੈ। 

Friday, May 13, 2016

ਤਿੰਨ ਮਜ਼ਦੂਰਾਂ ਦੀ ਦਰਦਨਾਕ ਮੌਤ ਦਾ ਪ੍ਰਤੀਕਰਮ ਹੋਰ ਤਿੱਖਾ

Fri, May 13, 2016 at 3:31 PM
ਕਾਰਖਾਨਿਆਂ ‘ਚ ਢੁੱਕਵੇਂ ਸੁਰੱਖਿਆ ਪ੍ਰਬੰਧਾਂ ਦੀ ਮੰਗ ਨੇ ਵੀ ਜੋਰ ਫੜ੍ਹਿਆ 
ਮਜ਼ਦੂਰਾਂ ਨੇ ਕੀਤਾ ਡੀ.ਸੀ. ਦਫਤਰ ’ਤੇ  ਜ਼ੋਰਦਾਰ ਮੁਜ਼ਾਹਰਾ
 ਹਾਦਸੇ ਦੇ ਕਸੂਰਵਾਰ ਗਿਆਨਚੰਦ ਡਾਈਂਗ ਦੇ ਮਾਲਕ ਨੂੰ ਗ੍ਰਿਫਤਾਰ ਕਰਨ ਦੀ ਅਵਾਜ਼ ਵੀ ਬੁਲੰਦ
ਲੁਧਿਆਣਾ: 13 ਮਈ, 2016: (*ਗੁਰਜੀਤ//ਪੰਜਾਬ ਸਕਰੀਨ):
ਅੱਜ ਟੈਕਸਟਾਈਲ-ਹੌਜ਼ਰੀ ਕਾਮਗਾਰ ਯੂਨੀਅਨ, ਕਾਰਖਾਨਾ ਮਜ਼ਦੂਰ ਯੂਨੀਅਨ ਅਤੇ ਬਿਗੁਲ ਮਜ਼ਦੂਰ ਦਸਤਾ ਦੀ ਅਗਵਾਈ ਵਿੱਚ ਲੁਧਿਆਣੇ ਦੇ ਸਨਅਤੀ ਮਜ਼ਦੂਰਾਂ ਨੇ ਡੀ.ਸੀ. ਦਫਤਰ, ਲੁਧਿਆਣਾ ਵਿਖੇ ਜੋਰਦਾਰ ਰੋਸ ਮੁਜਾਹਰਾ ਕੀਤਾ। ਮਿਹਰਬਾਨ, ਲੁਧਿਆਣਾ ਦੀ ਗਿਆਨਚੰਦ, ਡਾਈਂਗ (ਗੁਲਸ਼ਨ ਹੌਜ਼ਰੀ) ਵਿੱਚ ਲੰਘੀ 6 ਮਈ ਨੂੰ ਲੱਗੀ ਅੱਗ ਕਾਰਕ ਤਿੰਨ ਮਜ਼ਦੂਰਾਂ ਦੀ ਦਰਦਨਾਕ ਮੌਤ ਦੇ ਕਸੂਰਵਾਰ ਫੈਕਟਰੀ ਮਾਲਕ ‘ਤੇ ਧਾਰਾ 304 ਆਈ.ਪੀ.ਸੀ. ਤਹਿਤ ਕੇਸ ਦਰਜ ਕਰਨ, ਜੇਲ੍ਹ ’ਚ ਡੱਕਣ, ਮਾਮਲੇ ਨੂੰ ਰਫਾ-ਦਫਾ ਕਰਨ ਦੇ ਦੋਸ਼ੀ ਪੁਲੀਸ ਅਫ਼ਸਰਾਂ ਦੀ ਬਰਖਾਸਤਗੀ, ਕਸੂਰਵਾਰ ਕਿਰਤ ਵਿਭਾਗ ਦੇ ਅਫ਼ਸਰਾਂ ’ਤੇ ਸਖ਼ਤ ਕਾਰਵਾਈ ਕਰਨ, ਸਾਰੇ ਕਾਰਖਾਨਿਆਂ ਵਿੱਚ ਹਾਦਸਿਆਂ ਨੂੰ ਰੋਕਣ ਲਈ ਸੁਰੱਖਿਆ ਦੇ ਢੁੱਕਵੇਂ ਪ੍ਰਬੰਧ ਕਰਨ ਦੀ ਮੰਗ ਉਠਾਈ। ਮਜ਼ਦੂਰਾਂ ਨੇ ਕਾਰਖਾਨਿਆਂ ਵਿੱਚ ਪਹਿਚਾਣ ਪੱਤਰ, ਈ.ਐਸ.ਆਈ., ਪੱਕੇ ਹਾਜ਼ਰੀ ਕਾਰਡ/ਰਜਿਸ਼ਟਰ ਆਦਿ ਸਮੇਤ ਸਾਰੇ ਕਿਰਤ ਕਨੂੰਨ ਲਾਗੂ ਕਰਨ, ਸੁਰੱਖਿਆ ਦੇ ਪ੍ਰਬੰਧਾਂ ਦੀ ਅਣਦੇਖੀ ਕਰਨ ਵਾਲੇ ਕਾਰਖਾਨਾ ਮਾਲਕਾਂ ਖਿਲਾਫ਼ ਸਖਤ ਕਾਰਵਾਈ ਕਰਨ, ਪੀਡ਼ਤ ਪਰਿਵਾਰਾਂ ਨੂੰ ਢੁੱਕਵਾਂ ਮੁਆਵਜਾ ਦੇਣ ਲਈ ਵੀ ਜੋਰਦਾਰ ਅਵਾਜ ਉਠਾਈ। ਡੀ.ਸੀ. ਲੁਧਿਆਣਾ ਦੇ ਦਫਤਰ ਵਿੱਚ ਹਾਜ਼ਰ ਨਾ ਹੋਣ ਕਾਰਨ ਏ.ਡੀ.ਸੀ ਨੇ ਮੰਗ ਪੱਤਰ ਲਿਆ। ਮਜ਼ਦੂਰਾਂ ਦੇ ਦਬਾਅ ਕਾਰਨ ਏ.ਡੀ.ਸੀ. ਨੂੰ ਬਾਹਰ ਆ ਕੇ ਮੰਗ ਪੱਤਰ ਲੈਣਾ ਪਿਆ। ਏ.ਡੀ.ਸੀ. ਨੇ ਦੋਸ਼ੀਆਂ ਉੱਤੇ ਕਿਸੇ ਵੀ ਪ੍ਰਕਾਰ ਦੀ ਕਾਰਵਾਈ ਕਰਨ ਦਾ ਕੋਈ ਭਰੋਸਾ ਨਹੀਂ ਦਿੱਤਾ। ਏ.ਡੀ.ਸੀ. ਦਾ ਅੱਜ ਦਾ ਰਵੱਈਆ ਲੁਧਿਆਣਾ ਪ੍ਰਸ਼ਾਸਨ ਦੇ ਮਜ਼ਦੂਰ ਵਿਰੋਧੀ ਨਜ਼ਰੀਏ ਦੀ ਇੱਕ ਵੱਡੀ ਉਦਾਹਰਣ ਹੈ।
06 ਮਈ ਦੀ ਰਾਤ 2 ਵਜੇ ਬੰਟੀ ਝਾਅ, ਸਤੀਸ਼ ਰਾਊਤ ਅਤੇ ਭੋਲਾ ਨਾਂ ਦੇ ਤਿੰਨ ਮਜ਼ਦੂਰਾਂ ਦੀ ਉਪਰੋਕਤ ਫੈਕਟਰੀ ਵਿੱਚ ਲੱਗੀ ਅੱਗ ਵਿੱਚ ਝੁਲਸ ਕੇ ਮਾਰੇ ਗਏ ਸਨ। ਫੈਕਟਰੀ ਦੇ ਜਿਸ ਕਮਰੇ ਵਿੱਚ ਉਹ ਕੰਮ ਕਰ ਰਹੇ ਸਨ ਉੱਥੇ ਬਾਹਰ ਨਿੱਕਲਣ ਦਾ ਇੱਕ ਹੀ ਰਾਹ ਸੀ ਜਿੱਥੋਂ ਭਿਅੰਕਰ ਅੱਗ ਲੱਗੀ ਹੋਣ ਕਾਰਨ ਬਾਹਰ ਨਿੱਕਲਣਾ ਸੰਭਵ ਨਹੀਂ ਸੀ। ਐਮਰਜੰਸੀ ਹਾਲਤ ਲਈ ਕੋਈ ਰਾਹ ਨਹੀਂ ਸੀ। ਕਾਰਖਾਨੇ ਵਿੱਚ ਅੱਗ ਲੱਗਣ ਤੋਂ ਬਚਾਉਣ ਅਤੇ ਬਝਾਉਣ ਦੇ ਪ੍ਰਬੰਧ ਨਹੀਂ ਸਨ। 
ਇਸ ਮੌਕੇ ਕਾਰਖਾਨਾ ਮਜ਼ਦੂਰ ਯੂਨੀਅਨ ਦੇ ਪ੍ਰਧਾਨ ਸਾਥੀ ਲਖਵਿੰਦਰ ਨੇ ਆਪਣੇ ਸੰਬੋਧਨ ਵਿੱਚ ਕਿਹਾ ਕਿ ਮਜ਼ਦੂਰਾਂ ਦੀ ਮੌਤ ਦਾ ਕਸੂਰਵਾਰ ਸਪੱਸ਼ਟ ਰੂਪ ਵਿੱਚ ਕਾਰਖਾਨੇ ਦਾ ਮਾਲਕ ਹੈ ਜਿਸਨੇ ਮੁਨਾਫੇ ਦੇ ਲਾਲਚ ਵਿੱਚ ਸੁਰੱਖਿਆ ਪ੍ਰਬੰਧਾਂ ਦੇ ਪ੍ਰਬੰਧਾਂ ਦੀ ਅਣਦੇਖੀ ਕੀਤੀ ਹੈ। ਸੁਰੱਖਿਆ ਪ੍ਰਬੰਧਾਂ ਅਤੇ ਹੋਰ ਕਿਰਤ ਕਨੂੰਨਾਂ ਦੇ ਲਾਗੂ ਨਾ ਹੋਣ ਦੇ ਕਸੂਰਵਾਰ ਕਿਰਤ ਵਿਭਾਗ ਦੇ ਅਫ਼ਸਰ ਵੀ ਹਨ। ਪੁਲੀਸ ਨੇ ਸਦਮੇ ਦਾ ਸ਼ਿਕਾਰ ਪੀਡ਼ਤ ਪਰਿਵਾਰ ਉੱਤੇ ਸਮਝੌਤੇ ਦਾ ਦਬਾਅ ਪਾ ਕੇ ਮਾਮਲਾ ਰਫਾ ਦਫਾ ਕਰਨ ਦੀ ਸਾਜਿਸ਼ ਰਚੀ ਹੈ। ਮਾਲਕ ਉੱਤੇ ਧਾਰਾ 304 ਤਹਿਤ ਕਾਰਵਾਈ ਬਣਦੀ ਸੀ ਪਰ ਪੁਲੀਸ ਨੇ ਧਾਰਾ 174 ਤਹਿਤ ਕਾਰਵਾਈ ਕੀਤੀ ਹੈ। ਉਹਨਾਂ ਕਿਹਾ ਇਸ ਮਾਮਲੇ ਦੇ ਦੋਸ਼ੀਆਂ ਨੂੰ ਸਖਤ ਤੋਂ ਸਖਤ ਸਜਾ ਦਿੱਤੀ ਜਾਣੀ ਚਾਹੀਦੀ ਹੈ ਤਾਂ ਕਿ ਪੀਡ਼ਤ ਮਜ਼ਦੂਰਾਂ ਨੂੰ ਇਨਸਾਫ਼ ਮਿਲ ਸਕੇ। ਉਨ੍ਹਾਂ ਕਿਹਾ ਕਿ ਮਾਲਕ ਅਤੇ ਸਰਕਾਰ ਵੱਲੋਂ ਪੀਡ਼ਤ ਪਰਿਵਾਰਾਂ ਨੂੰ ਵੀਹ-ਵੀਹ ਲੱਖ ਰੁਪਏ ਮੁਆਵਜਾ ਮਿਲਣਾ ਚਾਹੀਦਾ ਹੈ। 
ਬਿਗੁਲ ਮਜ਼ਦੂਰ ਦਸਤਾ ਦੇ ਆਗੂ ਵਿਸ਼ਵਨਾਥ ਨੇ ਕਿਹਾ ਲੁਧਿਆਣਾ ਹੀ ਸਗੋਂ ਦੇਸ਼ ਦੇ ਸਾਰੇ ਕਾਰਖਾਨਿਆਂ ਵਿੱਚ ਰੋਜਾਨਾਂ ਭਿਆਨਕ ਹਾਦਸੇ ਵਾਪਰਦੇ ਹਨ ਜਿਨ੍ਹਾਂ ਵਿੱਚ ਮਜ਼ਦੂਰਾਂ ਦੀਆਂ ਮੌਤਾਂ ਹੁੰਦੀਆਂ ਹਨ ਤੇ ਅਪਾਹਿਜ ਵੀ ਹੁੰਦੇ ਹਨ। ਮਾਲਕਾਂ ਨੂੰ ਸਿਰਫ਼ ਆਪਣੇ ਮੁਨਾਫੇ ਦੀ ਚਿੰਤਾ ਹੈ। ਮਜ਼ਦੂਰ ਤਾਂ ਉਹਨਾਂ ਲਈ ਸਿਰਫ਼ ਮਸ਼ੀਨਾਂ ਦੇ ਪੁਰਜੇ ਬਣ ਰਹਿ ਗਏ ਹਨ। ਸਾਰੇ ਦੇਸ਼ ਵਿੱਚ ਸਰਮਾਏਦਾਰ ਸੁਰੱਖਿਆ ਸਬੰਧੀ ਨਿਯਮ-ਕਨੂੰਨਾਂ ਸਮੇਤ ਸਾਰੇ ਕਿਰਤ ਕਨੂੰਨਾਂ ਦੀਆਂ ਧੱਜੀਆਂ ਉਡਾ ਰਹੇ ਹਨ। ਸਰਮਾਏਦਾਰਾਂ, ਸਰਕਾਰ, ਕਿਰਤ ਵਿਭਾਗ, ਪੁਲੀਸ-ਪ੍ਰਸ਼ਾਸਨ, ਗੁੰਡਿਆਂ ਦਾ ਨਾਪਾਕ ਗਠਜੋਡ਼ ਮਜ਼ਦੂਰਾਂ ਦੇ ਹੱਕਾਂ ਨੂੰ ਕੁਚਲ ਰਿਹਾ ਹੈ। ਉਹਨਾਂ ਕਿਹਾ ਕਿ ਮਜ਼ਦੂਰਾਂ ਨੂੰ ਇਸ ਲੁੱਟ-ਖਸੁੱਟ, ਬੇਇਨਸਾਫੀ ਖਿਲਾਫ਼ ਜੋਰਦਾਰ ਇੱਕਮੁੱਠਤਾ ਕਾਇਮ ਕਰਨੀ ਪਵੇਗੀ। 
ਆਗੂਆਂ ਨੇ ਕਿਹਾ ਕਿ ਜਦੋਂ ਤੋਂ ਕੇਂਦਰ ਵਿੱਚ ਮੋਦੀ ਸਰਕਾਰ ਬਣੀ ਹੈ ਉਦੋਂ ਤੋਂ ਮਜ਼ਦੂਰਾਂ ਦੀ ਹਾਲਤ ਹੋਰ ਵੀ ਭੈੜੀ ਹੋ ਗਈ ਹੈ। ਮੋਦੀ ਸਰਕਾਰ ਇਸ ਤੋਂ ਪਹਿਲੀਆਂ ਸਰਕਾਰਾਂ ਤੋਂ ਵੀ ਤੇਜੀ ਅਤੇ ਸਖਤੀ ਨਾਲ਼ ਮਜੂਦਰਾਂ ਦੇ ਹੱਕਾਂ ਨੂੰ ਕੁਚਲ ਰਹੀ ਹੈ। ਸਰਮਾਏਦਾਰਾਂ ਨੂੰ ਕਿਰਤ ਕਨੂੰਨਾਂ ਦੀਆਂ ਧੱਜੀਆਂ ਉਡਾਉਣ ਦੀ ਪੂਰੀ ਖੁੱਲ੍ਹ ਮਿਲ ਚੁੱਕੀ ਹੈ ਜਿਸ ਕਾਰਨ ਸਨਅਤੀ ਹਾਦਸਿਆਂ ਵਿੱਚ ਵੀ ਵਾਧਾ ਹੋ ਚੁੱਕਾ ਹੈ।  
ਕਾਰਖਾਨਾ ਮਜ਼ਦੂਰ ਯੂਨੀਅਨ ਦੇ ਪ੍ਰਧਾਨ ਲਖਵਿੰਦਰ, ਟੈਕਸਟਾਈਲ-ਹੌਜ਼ਰੀ ਕਾਮਗਾਰ ਯੂਨੀਅਨ ਦੇ ਆਗੂ ਘਨਸ਼ਿਆਮ, ਬਿਗੁਲ ਮਜ਼ਦੂਰ ਦਸਤਾ ਦੇ ਆਗੂ ਵਿਸ਼ਵਨਾਥ, ਨੌਜਵਾਨ ਭਾਰਤ ਸਭਾ ਦੀ ਆਗੂ ਬਲਜੀਤ ਤੋਂ ਇਲਾਵਾ ਮੌਲਡਰ ਐਂਡ ਸਟੀਲ ਵਰਕਰਜ ਯੂਨੀਅਨ ਦੇ ਆਗੂ ਹਰਜਿੰਦਰ ਸਿੰਘ, ਵਿਜੇ ਨਾਰਾਇਣ, ਲੋਕ ਮੋਰਚਾ ਪੰਜਾਬ ਦੇ ਆਗੂ ਕਸਤੂਰੀ ਲਾਲ, ਇਨਕਲਾਬੀ ਕੇਂਦਰ ਪੰਜਾਬ ਦੇ ਆਗੂ ਜਸਵੰਤ ਜੀਰਖ ਆਦਿ ਨੇ ਸੰਬੋਧਿਤ ਕੀਤਾ। 
ਆਗੂਆਂ ਨੇ ਕਿਹਾ ਕਿ ਪ੍ਰਸ਼ਾਸਨ ਮਜ਼ਦੂਰਾਂ ਦੀਆਂ ਮੰਗਾਂ ਤੁਰੰਤ ਮੰਨੇ। ਅਜਿਹਾ ਨਾ ਹੋਣ ਦੀ ਸੂਰਤ ਵਿੱਚ ਪ੍ਰਸ਼ਾਸਨ ਨੂੰ ਮਜ਼ਦੂਰਾਂ ਦੇ ਤਿੱਖੇ ਘੋਲ ਦਾ ਸਾਹਮਣਾ ਕਰਨਾ ਪਵੇਗਾ। 

*ਗੁਰਜੀਤ  ਕਾਰਖਾਨਾ ਮਜ਼ਦੂਰ ਯੂਨੀਅਨ, ਪੰਜਾਬ ਦੇ ਬੁਲਾਰੇ ਵੀ ਹਨ ਅਤੇ ਉਹਨਾਂ ਦਾ ਸੰਪਰਕ ਫੋਨ ਨੰ.- 7508681081

Wednesday, September 02, 2015

ਸ਼ਾਰਟ ਸਰਕਟ ਨਾਲ ਅੱਗ ਲਗਣ ਦੀਆਂ ਵਾਰਦਾਤਾਂ ਜਾਰੀ

ਸਮਰਾਲਾ ਚੋਂਕ ਨੇੜੇ ਧਾਗਾ ਫੈਕਟਰੀ 'ਚ ਹੋਇਆ ਭਾਰੀ ਨੁਕਸਾਨ 
ਲੁਧਿਆਣਾ: 1 ਸਤੰਬਰ  2015: (ਪੰਜਾਬ ਸਕਰੀਨ ਬਿਊਰੋ):  
ਤਕਨੀਕੀ ਵਿਕਾਸ ਸਿਖਰਾਂ ਛੋ ਰਿਹਾ ਹੈ ਪਰ ਸ਼ਾਰਟ ਸਰਕਟ  ਨਾਲ ਅੱਗ ਲੱਗਣ ਦੀਆਂ ਘਟਨਾਵਾਂ ਲਗਾਤਾਰ ਜਾਰੀ ਹਨ।  ਇਹਨਾਂ ਦੀ ਕੋਈ ਰੋਕਥਾਮ ਨਹੀਂ ਹੋ ਰਹੀ। ਹੁਣ ਲੁਸ਼ਿਆਨਾ ਦੇ ਸੰਘਣੀ ਆਵਾਜਾਈ ਵਾਲੇ ਸਮਰਾਲਾ ਚੋਂਕ ਵਿੱਚ ਅੱਗ ਲੱਗੀ ਹੈ। ਸਮਰਾਲਾ ਚੌਕ ਦੇ ਨੇੜੇ ਇਕ ਧਾਗਾ ਫੈਕਟਰੀ 'ਚ ਬਿਜਲੀ ਦੇ ਕਥਿਤ ਸ਼ਾਰਟ ਸਰਕਟ ਕਾਰਨ ਲੱਗੀ ਭਿਆਨਕ ਅੱਗ ਨਾਲ ਜਿਥੇ ਕਰੋੜਾਂ ਰੁਪਏ ਦਾ ਸਾਮਾਨ ਸੜ ਗਿਆ, ਉਥੇ ਫਾਇਰ ਬ੍ਰਿਗੇਡ ਦੀਆਂ ਸੈਂਕੜੇ ਗੱਡੀਆਂ ਨੂੰ ਅੱਗ 'ਤੇ ਕਾਬੂ ਪਾਉਣ ਸਿਰਤੋੜ ਯਤਨ ਕਰਨੇ ਪਏ।  ਅੱਗ ਲੱਗਣ ਦੀ ਸੂਚਨਾ ਮਿਲਦੇ ਹੀ ਏ. ਡੀ. ਸੀ. ਪੀ.-4 ਸਤਵੀਰ ਸਿੰਘ ਅਟਵਾਲ, ਏ. ਸੀ. ਪੀ. ਗੁਰਜੀਤ ਸਿੰਘ ਅਤੇ ਥਾਣਾ ਡਵੀਜ਼ਨ ਨੰ. 7 ਦੀ ਪੁਲਸ ਫੋਰਸ ਮੌਕੇ 'ਤੇ ਪਹੁੰਚੀ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਵੱਲਭ ਵੂਲਜ਼ ਤੇ ਕਰਨ ਇੰਪੋਰਟ ਅਤੇ ਐਕਸਪੋਰਟ 'ਚ ਹੋਏ ਹਾਦਸੇ ਬਾਰੇ ਜਾਣਕਾਰੀ ਦਿੰਦਿਆਂ ਫੈਕਟਰੀ ਮਾਲਕ ਹੇਮ ਰਾਜ ਜੈਨ ਨੇ ਦੱਸਿਆ ਕਿ ਉਕਤ ਫਰਮਾਂ 'ਚ ਉਨ੍ਹਾਂ ਵੱਲੋਂ ਧਾਗਾ ਤਿਆਰ ਕੀਤਾ ਜਾਂਦਾ ਹੈ। ਸਵੇਰੇ ਕਰੀਬ 11 ਵਜੇ ਫੈਕਟਰੀ ਦੇ ਗੇਟਮੈਨ ਨੇ ਸੂਚਨਾ ਦਿੱਤੀ ਕਿ ਫੈਕਟਰੀ 'ਚ ਅੱਗ ਲੱਗੀ ਹੈ, ਜਦੋਂ ਉਨ੍ਹਾਂ ਨੇ ਮੌਕੇ 'ਤੇ ਪਹੁੰਚ ਕੇ ਦੇਖਿਆ ਤਾਂ ਅੱਗ ਭਿਆਨਕ ਤਰੀਕੇ ਨਾਲ ਫੈਲੀ ਹੋਈ ਸੀ, ਜਿਸ 'ਤੇ ਉਨ੍ਹਾਂ ਤੁਰੰਤ ਫਾਇਰ ਬ੍ਰਿਗੇਡ ਨੂੰ ਸੂਚਿਤ ਕੀਤਾ।   ਮੌਕੇ 'ਤੇ ਪਹੁੰਚੀਆਂ ਫਾਇਰ ਬ੍ਰਿਗੇਡ ਦੀਆਂ ਗੱਡੀਆਂ ਨੇ ਅੱਗ 'ਤੇ ਕਾਬੂ ਪਾਉਣ ਦੀ ਕਾਫੀ ਕੋਸ਼ਿਸ਼ ਕੀਤੀ। ਫੈਕਟਰੀ ਮਾਲਕ ਅਨੁਸਾਰ ਇਸ ਅੱਗ ਨਾਲ ਉਨ੍ਹਾਂ ਦਾ ਲਗਭਗ 5 ਕਰੋੜ ਰੁਪਏ ਦਾ ਨੁਕਸਾਨ ਹੋਇਆ ਹੈ। ਅੱਗ ਬਹੁਤ ਹੀ ਭਿਆਨਕ ਸੀ। 
ਅੱਗ ਇਕ ਦਮ ਧਮਾਕੇ ਨਾਲ ਲੱਗੀ?
ਫੈਕਟਰੀ ਦੇ ਗੇਟਮੈਨ ਰਾਮ ਪਰਾਗ ਨੇ ਦੱਸਿਆ ਕਿ ਫੈਕਟਰੀ ਦੀ ਉੱਪਰਲੀ ਮੰਜ਼ਿਲ 'ਤੇ ਕੰਮ ਚੱਲ ਰਿਹਾ ਸੀ। ਇਸ ਦੌਰਾਨ ਇਕ ਜ਼ੋਰਦਾਰ ਧਮਾਕਾ ਹੋਇਆ, ਜਿਸ ਨਾਲ ਬਿਜਲੀ ਦੇ ਉਪਕਰਨਾਂ 'ਚੋਂ ਨਿਕਲੀਆਂ ਕਥਿਤ ਅੱਗ ਦੀਆਂ ਲਪਟਾਂ ਕਾਰਨ ਅੱਗ ਫੈਲਣ ਲੱਗੀ। ਭਾਵੇਂ ਫੈਕਟਰੀ 'ਚ ਕੰਮ ਕਰ ਰਹੇ ਵਰਕਰਾਂ ਨੇ ਅੱਗ ਬੁਝਾਊ ਯੰਤਰਾਂ ਨਾਲ ਅੱਗ 'ਤੇ ਕਾਬੂ ਪਾਉਣ ਦੀ ਕੋਸ਼ਿਸ਼ ਕੀਤੀ ਪਰ ਅੱਗ ਦੇ ਭਿਆਨਕ ਤਰੀਕੇ ਨਾਲ ਫੈਲਣ 'ਤੇ ਵਰਕਰ ਆਪਣੀ ਜਾਨ ਬਚਾ ਕੇ ਬਾਹਰ ਨਿਕਲ ਗਏ। ਘਟਨਾ ਸਮੇਂ ਫੈਕਟਰੀ 'ਚ ਲਗਭਗ 8-9 ਵਰਕਰ ਕੰਮ ਕਰ ਰਹੇ ਸਨ। ਇਸ ਘਟਨਾ 'ਚ ਕਿਸੇ ਕਿਸਮ ਦੇ ਜਾਨੀ ਨੁਕਸਾਨ ਦੀ ਕੋਈ ਖਬਰ ਨਹੀਂ ਹੈ।
ਸੈਂਕੜੇ ਗੱਡੀਆਂ ਦੇ ਬਾਵਜੂਦ ਵੀ ਅੱਗ ਹੋਈ ਬੇਕਾਬੂ: 
ਧਾਗਾ ਫੈਕਟਰੀ 'ਚ ਲੱਗੀ ਅੱਗ ਨੇ ਭਿਆਨਕ ਰੂਪ ਧਾਰਨ ਕੀਤਾ ਹੋਇਆ ਸੀ। ਸਵੇਰੇ ਕਰੀਬ 11 ਵਜੇ ਤੋਂ ਲੱਗੀ ਅੱਗ ਦੇਰ ਸ਼ਾਮ ਤੱਕ ਮੁੜ-ਮੁੜ ਉੱਠਦੀ ਰਹੀ। ਅੱਗ 'ਤੇ ਕਾਬੂ ਪਾਉਣ ਲਈ ਲੱਗੀਆਂ ਫਾਇਰ ਬ੍ਰਿਗੇਡ ਦੀਆਂ ਸੈਂਕੜੇ ਗੱਡੀਆਂ ਅੱਗ 'ਤੇ ਕਾਬੂ ਪਾਉਣ ਦੀ ਕੋਸ਼ਿਸ਼ ਕਰਦੀਆਂ ਰਹੀਆਂ ਸਨ ਪਰ ਅੱਗ ਸ਼ਾਂਤ ਹੋਣ ਦਾ ਨਾਮ ਹੀ ਨਹੀਂ ਸੀ ਲੈ ਰਹੀ। ਅੱਗ ਬੁਝਾਉਣ ਲਈ ਕਰੇਨਾਂ ਬਿਲਡਿੰਗ ਨੂੰ ਵੱਖ-ਵੱਖ ਹਿੱਸਿਆਂ ਤੋਂ ਤੋੜ ਕੇ ਅੱਗ 'ਤੇ ਕਾਬੂ ਪਾਉਣ ਦੀ ਕੋਸ਼ਿਸ਼ ਕਰ ਰਹੀਆਂ ਸਨ। 
ਅੱਗ ਬਾਰ ਬਾਰ ਉੱਠਦੀ ਰਹੀ:
ਅੱਗ ਬੁਝਣ ਤੋਂ ਬਾਅਦ ਅਚਾਨਕ ਹੀ ਫਿਰ ਉਠ ਪੈਂਦੀ।  ਇਸ ਤਰਾਂ ਕਈ ਵਾਰ ਹੋਇਆ। ਸ਼ਾਇਦ ਇਹ ਸਭ ਧਾਗੇ ਦੇ ਮਾਲ ਕਾਰਣ ਹੋ ਰਿਹਾ ਸੀ।  ਅੱਗ ਉੱਪਰੋਂ ਉੱਪਰੋਂ ਬੁਝ ਜਾਂਦੀ ਪਰ ਹੇਠਾਂ ਕਿਤੇ ਸੁਲਗਦੀ ਰਹਿੰਦੀ।  ਮਾੜੀ ਮੋਟੀ ਹਵਾ ਮਿਲਦਿਆਂ ਹੀ ਉਹ ਫਿਰ ਭੜਕ ਪੈਂਦੀ। 


Wednesday, October 15, 2014

ਜ਼ਿਲਾ ਪ੍ਰਸਾਸ਼ਨ ਵੱਲੋਂ ਕੁਦਰਤੀ ਆਫ਼ਤ ਨਾਲ ਨਿਪਟਣ ਸੰਬੰਧੀ ਸਫ਼ਲ ਰਿਹਰਸਲ

Wed, Oct 15, 2014 at 7:16 PM
ਅੱਗ ਲੱਗਣ ਦੀ ਅਫ਼ਵਾਹ ਨਾਲ ਤੁਰੰਤ ਹਰਕਤ 'ਚ ਆਏ ਸੰਬੰਧਤ ਵਿਭਾਗ
ਲੁਧਿਆਣਾ: 15 ਅਕਤੂਬਰ 2014: (ਪੰਜਾਬ ਸਕਰੀਨ ਬਿਊਰੋ): 
ਕਿਸੇ ਵੀ ਤਰਾਂ ਦੀ ਕੁਦਰਤੀ ਆਫ਼ਤ ਨਾਲ ਸਫ਼ਲਤਾ ਪੂਰਵਕ ਨਜਿੱਠਣ ਦੇ ਜ਼ਿਲਾਪ੍ਰਸਾਸ਼ਨ ਕੋਲ ਪੁਖ਼ਤਾ ਇੰਤਜ਼ਾਮ ਹਨ ਅਤੇ ਕਿਸੇ ਵੀ ਹੰਗਾਮੀ ਹਾਲਾਤ ਨੂੰ ਧੀਰਜ ਅਤੇ ਸਹੀ ਕਦਮਾਂ ਨਾਲ ਦੂਰ ਕੀਤਾ ਜਾ ਸਕਦਾ ਹੈ। ਇਸ ਗੱਲ ਦਾ ਪ੍ਰਮਾਣ ਉਸ ਵੇਲੇ ਲੱਗਾ ਜਦੋਂ ਕੁਦਰਤੀ ਆਫ਼ਤਾਂ ਨਾਲ ਨਜਿੱਠਣ ਲਈ ਵਿਸ਼ੇਸ਼ ਤੌਰ 'ਤੇ ਸਥਾਪਤ ਕੀਤੇ ਗਏ 'ਡਿਜਾਸਟਰ ਮੈਨੇਜਮੈਂਟ ਵਿਭਾਗ' ਵੱਲੋਂ ਸਥਾਨਕ ਫਿਰੋਜ਼ਪੁਰ ਸੜਕ ਸਥਿਤ ਵੈੱਸਟਐਂਡ ਮਾਲ ਵਿਖੇ ਅੱਗ ਲੱਗਣ ਦੀ ਝੂਠੀ ਖ਼ਬਰ ਸੰਬੰਧੀ ਸੰਬੰਧਤ ਵਿਭਾਗਾਂ ਨੂੰ ਸੂਚਿਤ ਕੀਤਾ ਗਿਆ ਤਾਂ ਸਾਰੇ ਵਿਭਾਗਾਂ ਨੇ ਤੁਰੰਤ ਹਰਕਤ ਵਿੱਚ ਆਉਂਦਿਆਂ ਮੌਕੇ 'ਤੇ ਪਹੁੰਚ ਕੇ ਰਾਹਤ ਕਾਰਜ ਸ਼ੁਰੂ ਕਰ ਦਿੱਤੇ।
ਰਿਹਰਸਲ ਤਹਿਤ ਕੀਤੀ ਗਈ ਇਸ ਕਾਰਵਾਈ ਤਹਿਤ ਅੱਜ ਸਵੇਰੇ 9.45 ਵਜੇ ਡਿਜਾਸਟਰ ਮੈਨੇਜਮੈਂਟ ਵਿਭਾਗ ਵੱਲੋਂ ਉਪਰੋਕਤ ਮਾਲ ਵਿੱਚ ਪਹੁੰਚ ਕੇ ਜ਼ਿਲਾ ਪ੍ਰਸਾਸ਼ਨ, ਫਾਇਰ ਬ੍ਰਿਗੇਡ ਵਿਭਾਗ, ਸਿਹਤ ਵਿਭਾਗ, ਪੁਲਿਸ ਵਿਭਾਗ, ਐੱਨ. ਡੀ. ਆਰ. ਐੱਫ. (ਨੈਸ਼ਨਲ ਡਿਜਾਸਟਰ ਰਿਸਪਾਂਸ ਫੋਰਸ) ਅਤੇ ਹੋਰ ਸੰਬੰਧਤ ਵਿਭਾਗਾਂ ਨੂੰ ਹੰਗਾਮੀ ਨੰਬਰਾਂ 'ਤੇ ਫੋਨ ਕਰਕੇ ਸੂਚਨਾ ਦਿੱਤੀ ਕਿ ਮਾਲ ਦੀ ਦੂਜੀ ਮੰੰਜਿਲ 'ਤੇ ਅਚਾਨਕ ਅੱਗ ਲੱਗ ਗਈ ਹੈ। ਇਸ ਫੋਨ ਨੂੰ ਗੰਭੀਰਤਾ ਨਾਲ ਲੈਂਦਿਆਂ ਸਾਰੇ ਵਿਭਾਗਾਂ ਨੇ ਕਰੀਬ 15 ਮਿੰਟ ਵਿੱਚ ਮਾਲ ਵਿੱਚ ਪਹੁੰਚ ਕੇ ਰਾਹਤ ਕਾਰਜ ਸ਼ੁਰੂ ਕਰ ਦਿੱਤੇ ਅਤੇ ਮੌਕੇ 'ਤੇ ਹਾਜ਼ਰ 200 ਤੋਂ ਵਧੇਰੇ ਲੋਕਾਂ ਨੂੰ ਮਾਲ ਵਿੱਚੋਂਂ ਸੁਰੱਖਿਅਤ ਬਾਹਰ ਕੱਢਿਆ। ਇਸ ਰਿਹਰਸਲ ਤੋਂ ਬਾਅਦ ਮਾਲ ਵਿੱਚ ਹਾਜ਼ਰ ਲੋਕਾਂ ਅਤੇ ਕਰਮਚਾਰੀਆਂ ਨੂੰ ਅਜਿਹੀ ਹੰਗਾਮੀ ਹਾਲਤ ਨਾਲ ਨਿਪਟਣ ਸੰਬੰਧੀ ਸਿੱਖਿਅਤ ਵੀ ਕੀਤਾ ਗਿਆ।
ਇਸ ਸਾਰੇ ਆਪਰੇਸ਼ਨ ਦੀ ਅਗਵਾਈ ਐੱਸ. ਡੀ. ਐੱਮ. ਪੱਛਮੀ ਸ੍ਰ. ਕੁਲਜੀਤਪਾਲ ਸਿੰਘ ਮਾਹੀ ਨੇ ਕੀਤੀ ਅਤੇ ਕਿਹਾ ਕਿ ਜ਼ਿਲਾ ਪ੍ਰਸਾਸ਼ਨ ਵੱਲੋਂ ਅਜਿਹੀਆਂ ਰਿਹਰਸਲਾਂ ਭਵਿੱਖ ਵਿੱਚ ਵੀ ਕਰਾਈਆਂ ਜਾਂਦੀਆਂ ਰਹਿਣਗੀਆਂ ਤੇ ਲੋਕਾਂ ਨੂੰ ਕੁਦਰਤੀ ਆਫ਼ਤਾਂ ਨਾਲ ਨਿਪਟਣ ਬਾਰੇ ਸਿੱਖਿਅਤ ਕੀਤਾ ਜਾਂਦਾ ਰਹੇਗਾ। ਇਸ ਮੌਕੇ ਹੋਰਨਾਂ ਤੋਂ ਇਲਾਵਾ ਜ਼ਿਲਾ ਮਾਲ ਅਫ਼ਸਰ ਸ੍ਰੀ ਮੁਕੇਸ਼ ਕੁਮਾਰ, ਏ. ਸੀ. ਪੀ. ਸ੍ਰ. ਜਸਕੀਰਤ ਸਿੰਘ, ਤਹਿਸੀਲਦਾਰ ਸ੍ਰੀਮਤੀ ਸਵਿਤਾ, ਜ਼ਿਲਾ ਕੋਆਰਡੀਨੇਟਰ ਸ੍ਰੀ ਸੁਰੇਸ਼ ਕੁਮਾਰ ਅਤੇ ਹੋਰ ਅਧਿਕਾਰੀ ਵੀ ਹਾਜ਼ਰ ਸਨ।
ਉਮੀਦ ਕਰਨੀ ਚਾਹੀਦੀ ਹੈ ਕਿ ਜੇ ਰੱਬ ਨਾ ਕਰੇ ਕਿਤੇ ਕੋਈ ਅਸਲੀ ਮੁਸੀਬਤ ਵੀ ਆ ਪਵੇ ਤਾਂ ਚੌਕਸ ਹੋਇਆ ਲੁਧਿਆਣਾ ਦੇ ਸਾਰੇ ਵਿਭਾਗਾਂ ਦਾ ਇਹ ਸਾਵਧਾਨ ਸਟਾਫ਼ ਲੋਕਾਂ ਦੀ ਸੁਰੱਖਿਆ ਕਰਨ ਵਿੱਚ ਪੂਰੀ ਤਰਾਂ ਕਾਮਯਾਬ ਰਹੇਗਾ। ਅਜਿਹੀਆਂ ਰਿਹਰਸਲਾਂ ਸਟਾਫ਼ ਦੀ ਚੌਕਸੀ ਵਿੱਚ ਕਾਫੀ ਸਹਾਇਕ ਸਾਬਿਤ ਹੁੰਦੀਆਂ ਹਨ।