ਸਰਾਭਾ ਅਤੇ ਹੋਰ ਸ਼ਹੀਦਾਂ ਨੂੰ ਕੌਮੀ ਸ਼ਹੀਦ ਕਿਓਂ ਨਹੀਂ ਮੰਨਦੀ ਭਾਰਤ ਸਰਕਾਰ?

Sunday 24th May 2020 at 1:32 PM

 GSTU ਨੇ ਮਨਾਇਆ ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਦਾ ਜਨਮ ਦਿਨ 

ਲੁਧਿਆਣਾ: 24 ਮਈ 2020: (ਐਮ ਐਸ ਭਾਟੀਆ//ਪੰਜਾਬ ਸਕਰੀਨ):: 

ਦਿਨ ਦਾ ਕਰਫਿਊ ਹਟਣ ਮਗਰੋਂ ਲੋਕ ਪੱਖੀ ਸਰਗਰਮੀਆਂ ਦਾ ਸਿਲਸਿਲਾ ਇੱਕ ਵਾਰ ਫੇਰ ਸ਼ੁਰੂ ਹੋ ਗਿਆ ਹੈ। ਸ਼ੁੱਕਰਵਾਰ ਨੂੰ ਬਹੁਤ ਸਾਰੀਆਂ ਜਨਤਕ ਜੱਥੇਬੰਦੀਆਂ ਨੇ ਪੰਜਾਬੀ ਭਵਨ ਤੋਂ ਲੈ ਕੇ ਡੀਸੀ ਦਫਤਰ ਤੱਕ ਰੋਹ ਭਰਿਆ ਰੋਸ ਮਾਰਚ ਕੀਤਾ ਸੀ।  ਅੱਜ ਗੌਰਮਿੰਟ ਸਕੂਲ ਟੀਚਰਜ਼ ਯੂਨੀਅਨ (ਪੰਜਾਬ) ਵੱਲੋਂ ਅਮਰ ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਦਾ ਜਨਮ ਦਿਨ ਬਹੁਤ ਹੀ ਉਤਸ਼ਾਹ ਨਾਲ ਮਨਾਇਆ ਗਿਆ। ਇਸਦੇ ਨਾਲ ਹੀ ਇੱਕ ਵਾਰ ਫੇਰ ਗਰਮ ਹੋਇਆ ਹੈ ਉਹ ਸੁਆਲ ਕਿ ਭਾਰਤ ਸਰਕਾਰ ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਅਤੇ ਹੋਰ ਸ਼ਹੀਦਾਂ ਨੂੰ ਕੌਮੀ ਸ਼ਹੀਦ ਕਿਓਂ ਨਹੀਂ ਮੰਨਦੀ? ਆਪਣੇ ਆਪ ਨੂੰ ਵੱਡੇ ਰਾਸ਼ਟਰਵਾਦੀ ਅਖਵਾਉਣ ਵਾਲੇ ਸਿਆਸੀ ਲੀਡਰ ਵੀ ਆਖਿਰ ਇਸ ਮੁੱਦੇ ਤੇ ਆ ਕੇ ਜ਼ੁਬਾਨ ਕਿਓਂ ਨਹੀਂ ਖੋਲਦੇ। ਇਸ ਵਾਰ ਪਿੰਡ ਸਰਾਭਾ ਵਿਖੇ ਅਮਰ ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਦਾ ਜਨਮਦਿਨ ਸਿਆਸਤਦਾਨਾਂ ਅਤੇ ਸਰਕਾਰਾਂ ਦੇ ਇਸ ਦੋਗਲੇਪਣ ਨੂੰ ਸ੍ਹਾਮਣੇ ਲਿਆਉਣ ਦੇ ਇੱਕ ਜ਼ਰੂਰੀ ਮਕਸਦ ਨਾਲ ਮਨਾਇਆ ਗਿਆ। 

ਗੋਰਮਿੰਟ ਸਕੂਲ ਟੀਚਰਜ਼ ਯੂਨੀਅਨ (ਪੰਜਾਬ) ਜਿਲ੍ਹਾ ਲੁਧਿਆਣਾ ਪ੍ਰਧਾਨ ਸੌਦਾਗਰ ਸਿੰਘ ਸਰਾਭਾ ਅਤੇ ਸਰਪ੍ਰਸਤ ਚਰਨ ਸਿੰਘ ਸਰਾਭਾ ਦੀ ਅਗਵਾਈ ਹੇਠ ਭਾਰਤੀ ਅਜ਼ਾਦੀ ਸੰਗਰਾਮ ਦੇ ਪ੍ਰਮੁੱਖ ਤੇ ਗਦਰ ਪਾਰਟੀ ਦੇ ਆਗੂ ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਦਾ 125 ਵਾਂ ਜਨਮ ਦਿਨ ਉਹਨਾਂ ਦੇ ਜ਼ੱਦੀ ਪਿੰਡ ਸਰਾਭਾ ਜਿਲ੍ਹਾ ਲੁਧਿਆਣਾ ਵਿਖੇ ਮਨਾਇਆ ਗਿਆ।ਉਹਨਾਂ ਦੱਸਿਆ ਕਿ ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਜੀ ਨੇ 19 ਸਾਲ ਦੀ ਉਮਰ ਵਿੱਚ ਹੀ ਸਾਮਰਾਜਵਾਦੀ ਲੁੱਟ ਨੁੰ ਸਮਝਦੇ ਹੋਏ ਤੇ ਭਾਰਤ ਦੀ ਅਜ਼ਾਦੀ ਦੇ ਸੰਘਰਸ਼ ਵਿੱਚ ਨਿਰਧੜਕ ਯੋਗਦਾਨ ਪਾਉਂਦੇ ਹੋਏੇ ਸ਼ਹਾਦਤ ਦਿੱਤੀ। ਉਹਨਾਂ ਦੀ ਸ਼ਹਾਦਤ ਪੂਰੀ ਨੌਜਵਾਨ ਪੀੜੀ ਤੇ ਮਨੁੱਖਤਾ ਲਈ ਮਿਸਾਲ ਹੈ ਜੋ ਹੱਕ, ਸੱਚ-ਇਨਸਾਫ ਦਾ ਸੰਘਰਸ਼ ਕਰਨ ਦੀ ਪ੍ਰੇਰਨਾ ਦਿੰਦੀ ਹੈ।ਇਸ ਉਪਰੰਤ ਪ੍ਰੈਸ ਸਕੱਤਰ ਟਹਿਲ ਸਿੰਘ ਸਰਾਭਾ ਤੇ ਗੁਰਮੇਲ ਸਿੰਘ ਨੇ ਕਿਹਾ ਕਿ ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਸਮੇਤ ਹੋਰ ਸਾਰੇ ਸ਼ਹੀਦਾਂ ਨੇ ਸਾਮਰਾਜਵਾਦੀ ਪ੍ਰਣਾਲੀ ਤੋਂ ਛੁਟਕਾਰਾ ਪਾਉਂਣ ਲਈ ਆਪਣੀਆਂ ਕੀਮਤੀ ਜਾਨਾਂ ਕੁਰਬਾਨ ਕਰ ਦਿੱਤੀਆਂ ਪਰ ਸਾਡੀਆਂ ਸਰਕਾਰਾਂ ਦੁਆਰਾ ਉਹਨਾਂ ਦੀ ਕੁਰਬਾਨੀ ਦਾ ਕੋਈ ਮੁੱਲ ਨਹੀਂ ਮੋੜਿਆ ਗਿਆ ਸਗੋਂ 1990-91 ਤੋਂ ਬਾਅਦ ਲਗਾਤਾਰ ਖੁੱਲੀ ਮੰਡੀ ਤੇ ਨਵ ਉਦਾਰਵਾਦੀ ਨੀਤੀਆਂ ਲਾਗੂ ਕਰਕੇ ਸਰਕਾਰੀ ਖੇਤਰਾਂ ਦਾ ਨਿੱਜੀਕਰਨ ਕਰਕੇ ਵਪਾਰਿਕ ਘਰਾਣਿਆਂ ਦੇ ਹਵਾਲੇ ਕੀਤਾ ਜਾ ਰਿਹਾ ਹੈ। ਸੰਨ 1947 ਤੋਂ ਪਹਿਲਾਂ ਇੱਕ ਈਸਤ ਇੰਡੀਆ ਕੰਪਨੀ ਲੁੱਟ ਰਹੀ ਸੀ ਅੱਜ ਦੇਸ਼ ਨੂੰ ਵੱਡੀਆਂ ਦੇਸ਼ੀ ਤੇ ਵਿਦੇਸ਼ੀ ਕੰਪਨੀਆਂ ਵੱਡੀ ਗਿਣਤੀ ਵਿੱਚ ਦੇਸ਼ ਦਾ ਸਰਮਾਇਆ ਲੁੱਟ ਰਹੀਆਂ ਹਨ।ਜੱਥੇਬੰਦੀ ਮੰਗ ਕਰਦੀ ਹੈ ਕਿ ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਜੀ ਦੀ ਸੋਚ ਅਨੁਸਾਰ ਸਾਰੇ ਖੇਤਰਾਂ ਦਾ ਸਰਕਾਰੀਕਰਨ ਕੀਤਾ ਜਾਵੇ ਅਤੇ ਕੇਂਦਰ ਸਰਕਾਰ ਦੁਆਰਾ ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਜੀ ਨੂੰ ਕੌਮੀ ਸ਼ਹੀਦ ਦਾ ਦਰਜਾ ਦਿੱਤਾ ਜਾਵੇ। ਇਸ ਸਮੇਂ ਬਲਵਿੰਦਰ ਸਿੰਘ, ਚਰਨ ਸਿੰਘ ਤਾਜਪੁਰੀ, ਰਮਨਦੀਪ ਸਿੰਘ ਪੱਖੋਵਾਲ, ਕੁਲਜੀਤ ਸਿੰਘ ਭਮਰਾ,ਸੰਤੋਖ ਸਿੰਘ, ਪਰਦੀਪ ਸਿੰਘ, ਇਕਬਾਲ ਸਿੰਘ ਆਦਿ ਆਗੂ ਹਾਜ਼ਰ ਸਨ। ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਅਤੇ ਹੋਰਨਾਂ ਸ਼ਹੀਦਾਂ ਨੂੰ ਕੌਮੀ ਸ਼ਹੀਦ ਦਾ ਦਰਜ ਦਵਾਉਣ ਦੀ ਇਹ ਮੰਗ ਹੁਣ ਕੌਮੀ ਅਤੇ ਕੌਮਾਂਤਰੀ ਪੱਧਰ ਤੇ ਵੀ ਵਡੇ ਰੂਪ ਵਿੱਚ ਸਾਹਮਣੇ ਆਉਣ ਦੀ ਸੰਭਾਵਨਾ ਹੈ। ਰਾਸ਼ਟਰਵਾਦ ਦੇ ਨਾਂਅ ਤੇ ਜੋਸ਼ੋ ਖਰੋਸ਼ ਨਾਲ ਪ੍ਰਚਾਰ ਕਰਨ ਵਾਲੀ ਭਾਜਪਾ ਸਰਕਾਰ ਵੀ ਇਸ ਮੰਗ ਨੂੰ ਹੁਣ ਕਿਓਂ ਨਹੀਂ ਮੰਨ ਰਹੀ? ਇਸ ਸੁਆਲ ਦਾ ਜੁਆਬ ਲੱਭਦਿਆਂ ਕਈ ਹੋਰ ਹਕੀਕਤਾਂ ਵੀ ਬੇਨਕਾਬ ਹੋਣਗੀਆਂ। ਇਹਸੁਆਲ ਹੁਣ ਘਰ ਘਰ ਵਿੱਚੋਂ ਪੁੱਛਿਆ ਜਾਣਾ ਚਾਹੀਦਾ  ਹੈ ਕਿ ਦੇਸ਼ ਦੀਆਂ ਕੌਮੀ ਅਤੇ ਸੂਬਾਈ ਸਰਕਾਰਾਂ ਸਾਡੇ ਸ਼ਹੀਦਾਂ ਨੂੰ ਕੌਮੀ ਸ਼ਹੀਦ ਦਾ ਦਰਜ ਆਖਿਰ ਕਿਓਂ ਨਹੀਂ ਦੇਂਦੀਆਂ? ਕੀ ਰਾਜ਼ ਹੈ ਇਸ ਦੋਗਲੇਪਣ ਪਿੱਛੇ? ਇਹ ਸੁਆਲ ਇਸ ਵਾਰ ਇੱਕ ਨਵੀਂ ਮੁਹਿੰਮ ਬਣਦੀ ਜਾਪਦੀ ਹੈ। 

PAU ਦੇ ਵਿਦਿਆਰਥੀਆਂ ਨੇ ਕੀਤਾ ਸਰਾਭਾ ਦੀ ਯਾਦ ਵਿੱਚ ਕੈਂਡਲ ਮਾਰਚ

Sun, May 24, 2015 at 8:51 PM

ਭਵਿੱਖ ਵਿੱਚ ਵੀ ਅਜਿਹੀਆਂ ਸਰਗਰਮੀਆਂ ਜਾਰੀ ਰੱਖਣ ਦਾ ਐਲਾਨ  

ਲੁਧਿਆਣਾ: 24 ਮਈ 2015: (ਰੈਕਟਰ ਕਥੂਰੀਆ//ਪੰਜਾਬ ਸਕਰੀਨ):

ਅੱਜ ਦੇ ਇਤਿਹਾਸਿਕ ਦਿਹਾੜੇ ਮੌਕੇ ਵੀ ਵਿਚਾਰਧਾਰਕ ਚੇਤਨਾ ਵਿਆਪਕ ਪਧਰ ਤੇ ਨਹੀਂ ਸੀ ਜਾਗੀ। ਮੀਡੀਆ ਦੇ ਨਾਲ ਨਾਲ ਪੰਜਾਬ ਦੀ ਨੌਜਵਾਨ ਪੀੜ੍ਹੀ ਵੀ ਜਾਣਬੁਝ ਕੇ ਚਲਵਾਈਆਂ ਗਈਆਂ ਅਸ਼ਲੀਲਤਾ ਦੀਆਂ ਸਾਜ਼ਿਸ਼ੀ ਹਨੇਰੀਆਂ ਦੇ ਵਿੱਚ ਉੱਡਦੀ ਜਾ ਰਹੀ ਸੀ ਉਦੋਂ ਇਸ ਨਿਰਾਸ਼ਾਜਨਕ ਮਾਹੌਲ ਵਿੱਚ ਵੀ ਆਸ ਦੀਆਂ ਕੁਝ ਕਿਰਨਾਂ ਬਾਕੀ ਸਨ। ਜਦ ਜਦ ਵੀ ਪੰਜਾਬ 'ਤੇ ਭੀੜ੍ਹ ਬਣੀ ਤਾਂ ਹਰ ਨਾਜ਼ੁਕ ਮੌਕੇ ਅੱਗੇ ਹੋ ਕੇ ਨਿੱਤਰੀ ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਇਸ ਵਾਰ ਫਿਰ ਮਿਸਾਲ ਬਣੀ। 

ਪੀਏਯੂ ਦੇ ਕੁਝ ਰੌਸ਼ਨ ਦਿਮਾਗ ਨੌਜਵਾਨਾਂ ਅਤੇ ਮੁਟਿਆਰਾਂ ਨੇ ਆਪਣੇ ਨਾਇਕ ਅਮਰ ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਨੂੰ ਯਾਦ ਕਰਦਿਆਂ ਕੈਂਡਲ ਮਾਰਚ ਕਢਿਆ। ਮੈਂਬਰ ਬੜੇ ਥੋਹੜੇ ਸਨ ਪਰ ਇਹਨਾਂ ਸਾਰਿਆਂ  ਦੇ ਮੋਢਿਆਂ 'ਤੇ ਆਪਣੇ ਅਣਖੀ ਸਿਰ ਲੱਗੇ ਹੋਏ ਸਨ ਜਿਹਨਾਂ ਨੂੰ ਥੋੜ੍ਹ ਚੀਰੇ ਫਾਇਦਿਆਂ ਖਾਤਰ ਝੁਕਨਾ ਨਹੀਂ ਆਉਂਦਾ। ਇਹਨਾਂ ਸਿਰਾਂ ਵਿੱਚ ਨਾ ਕੋਈ ਲਾਲਚ ਸੀ ਅਤੇ ਨਾ ਹੀ ਕਿਸੇ ਦਾ ਡਰ। ਸ਼ਹੀਦਾਂ ਦੀ ਸੋਚ ਨੂੰ ਪ੍ਰਣਾਏ ਇਹਨਾਂ ਨੌਜਵਾਨਾਂ ਨੇ ਯੂਨੀਵਰਸਿਟੀ ਦੇ ਅੰਦਰ ਹੀ ਗੇੜਾ ਕਢਿਆ ਅਤੇ ਸ਼ਹੀਦ ਜਰਤਾਰ ਸਿੰਘ ਸਰਾਭਾ ਦੇ ਰਸਤੇ ਅਤੇ ਉਸਦੇ ਵਿਚਾਰਾਂ ਦੀ ਅਲਖ ਜਗਾਈ। ਉਹੀ ਸਰਾਭਾ ਜਿਸਨੂੰ ਭਗਤ ਸਿੰਘ ਆਪਣਾ ਗੁਰੂ ਮੰਨਦਿਆਂ ਉਸਦੀ ਫੋਟੋ ਆਪਣੀ ਜੇਬ ਵਿੱਚ ਰੱਖਦਾ ਸੀ। ਉਹੀ ਸਰਾਭਾ ਜਿਸਨੇ ਬਹੁਤ ਹੀ ਛੋਟੀ ਉਮਰ ਵਿੱਚ ਫਾਂਸੀ ਦੇ ਰੱਸੇ ਨੂੰ ਚੁੰਮ ਕੇ ਇੱਕ ਮਿਸਾਲ ਪੈਦਾ ਕੀਤੀ ਅਤੇ ਗਦਰ ਦੀ ਮਸ਼ਾਲ ਜਗਾਈ। ਉਹੀ ਸਰਾਭਾ ਜਿਸ ਨੇ ਗਦਰ ਦੀਆਂ ਗੂੰਜਾਂ ਨਾਲ ਕਲਮ ਦੀ ਜਿੰਮੇਵਾਰੀ ਦੱਸੀ ਸੀ ਅਤੇ ਮੀਡੀਆ ਦੀ ਸਹੀ ਅਰਥ ਸਮਝਾਏ ਸਨ। ਗਦਰ ਦੀ ਗੂੰਜ ਨੇ ਮੀਡੀਆ ਨੂੰ ਜਿਹੜੇ ਅਰਥ ਦਿੱਤੇ ਸਨ ਉਹਨਾਂ ਤੋਂ ਥਿੜਕਿਆ ਹੋਇਆ ਮੀਡੀਆ ਅੱਜ ਸਰਕਾਰੀ ਦਫਤਰਾਂ ਦੇ ਗੇੜੇ ਕਢਣ ਜੋਗਾ ਹੀ ਰਹੀ ਗਿਆ ਹੈ। ਦੇਸ਼, ਸਮਾਜ ਜਾਂ ਲੋਕਾਂ ਨਾਲ ਜਿਵੇਂ ਉਸਦਾ ਕੋਈ ਵਾਸਤਾ ਹੀ ਨਹੀਂ ਹੁੰਦਾ। ਇਸ ਕੈੰਡਲ ਮਾਰਚ ਨੇ ਸਭ ਨੂੰ ਕੁਝ ਨ ਕੁਝ ਯਾਦ ਕਰਾਇਆ ਅਤੇ ਮੌਨ ਰਹਿ  ਕੇ ਪੁਛਿਆ ਤੁਸੀਂ ਕੀ ਕਰਨਾ ਸੀ ਤੇ ਕੀ ਕਰੀ ਜਾ ਰਹੇ ਹੋ? ਇਸ ਕੈੰਡਲ ਮਾਰਚ ਨੇ ਦੱਸਿਆ ਕਿ ਜੇ ਸਰਕਾਰਾਂ ਆਪਣੇ ਸ਼ਹੀਦਾਂ ਨੂੰ ਭੁੱਲ ਕੇ ਅਕਿਰਤਘਣ ਬਣ ਸਕਦੀਆਂ ਹਨ ਤਾਂ ਸ਼ਹੀਦਾਂ ਦੇ ਵਾਰਸ ਆਪਣੇ ਫਰਜ਼ ਨੂੰ ਚੇਤੇ ਰੱਖਦੇ ਹੋਏ ਸ਼ਹੀਦਾਂ ਦੇ ਵਿਚਾਰਾਂ ਨੂੰ ਘਰ ਘਰ ਲਿਜਾਣਗੇ। 

ਸਿਰਫ ਤੀਹਾਂ ਵਿਦਿਆਰਥੀਆਂ ਦੇ ਇਸ ਛੋਟੇ ਜਹੇ ਕਾਫ਼ਿਲੇ ਨੇ ਦੱਸਿਆ ਕਿ ਗਿਣਤੀ ਘੱਟ ਹੋਣ ਨਾਲ ਕੋਈ ਫਰਕ ਨਹੀਂ ਪੈਂਦਾ। ਹਨੇਰੇ ਨੂੰ ਚੁਨੌਤੀ ਦੇਣ ਲਈ ਇੱਕ ਚਿਰਾਗ ਹੀ ਕਾਫੀ ਹੁੰਦਾ ਹੈ। ਇੱਕ ਚੰਗਿਆੜੀ ਸਾਰੇ ਜੰਗਲ ਨੂੰ  ਕਰ ਸਕਦੀ ਹੈ ਅਤੇ ਇਹ ਤਾਂ ਤੀਹ ਸਨ। ਇਹਨਾਂ ਨੇ ਸ਼ੁਭ ਆਰੰਭ ਕੀਤਾ ਸ੍ਤੂਦੈੰਟ੍ਸ ਹੋਮ ਤੋਂ ਅਤੇ ਵੱਖ ਸੜਕਾਂ ਤੋਂ ਹੁੰਦੇ ਹੋਏ ਇਹ ਡਾਕਟਰ ਐਮ ਐਸ ਰੰਧਾਵਾ ਲਾਇਬ੍ਰੇਰੀ ਸਾਹਮਣੇ ਸਥਿਤ ਫਲੈਗ ਪੋਸਟ ਵਿਖੇ ਪੁੱਜੇ। ਜਸਪ੍ਰੀਤ ਸਿੰਘ ਨੇ ਇਸ ਦਿਨ ਦੇ ਮਹਾਂ ਇਤਿਹਾਸ ਬਾਰੇ ਦੱਸਿਆ। ਕਰਤਿਕਾ ਗੁਪਤਾ, ਜਾਸਰੇਮਨ ਸਿੰਘ, ਨਰਜੀਤ ਸਿੰਘ, ਹਿਮਾਨੀ ਲਾਹਟ, ਅੰਕਿਤਾ ਬੱਤਰਾ, ਯੋਗਰਾਜ ਬਰਾੜ, ਕਮਲਜੀਤ ਮੰਡੋਤੀਆ ਵੀ ਇਹਨਾਂ ਦੇ ਨਾਲ ਸਨ।  ਇਹਨਾਂ ਨੇ ਸਪਸ਼ਟ ਆਖਿਆ ਕੀ ਅਸੀਂ ਭਵਿੱਖ ਵਿੱਚ ਅਜਿਹੀਆਂ ਸਰਗਰਮੀਆਂ ਜਾਰੀ ਰੱਖਾਂਗੇ। ਇਹ ਸਾਰੇ ਜਣੇ ਅੱਜ ਦੇ ਸੰਘਣੇ ਹਨੇਰੇ ਨੂੰ ਚੁਨੌਤੀ ਦੇਂਦੀਆਂ ਕਿਰਨਾਂ ਵਾਂਗ ਹੀ ਤਾਂ ਲੱਗ ਰਹੇ ਸਨ। ਇੰਝ ਲੱਗਦਾ ਸੀ  ਬਸ ਹੁਣੇ ਥੋਹੜੀ ਦੇਰ ਮਗਰੋਂ ਹੀ ਪ੍ਰਭਾਤ ਹੋਣ ਵਾਲੀ ਹੈ।  ਸ਼ਹੀਦਾਂ ਦਾ ਸੂਰਜ ਲੋਕਾਂ ਦੇ ਦੁੱਖਾਂ ਦਾ ਕਾਰਨ ਬਣੇ ਹਨੇਰਿਆਂ ਨੂੰ ਚੀਰਨ ਲਈ ਤੇਜ਼ੀ ਨਾਲ ਆ ਰਿਹਾ ਹੈ। ਆਓ ਇਸ ਸੋਚ ਨੂੰ ਇਸ ਕਾਫ਼ਿਲੇ ਨੂੰ ਜੀ ਆਇਆਂ ਆਖੀਏ। ਇਹਨਾਂ ਦੀ ਲੋੜ ਹਰ ਰੋਜ਼ ਪੈਣੀ ਹੈ। ਉਦੋਂ ਤੱਕ ਜਦੋਂ ਤੱਕ ਸ਼ਹੀਦਾਂ ਦੇ ਸੁਪਨਿਆਂ ਵਾਲੀ ਆਜ਼ਾਦੀ ਨਹੀਂ ਆ ਜਾਂਦੀ। ਭਵਿੱਖ ਦੀ ਕਿਸੇ ਅਜਿਹੀ ਲੋਕ ਪੱਖੀ ਸਰਗਰਮੀ ਬਾਰੇ ਕਿਸੇ ਨੇ ਇਸ ਕਾਫ਼ਿਲੇ ਨਾਲ ਜੁੜਨਾ ਹੋਵੇ ਤਾਂ ਸੰਪਰਕ ਕੀਤਾ ਜਾ ਸਕਦਾ ਹੈ-ਜਸਪ੍ਰੀਤ ਸਿੰਘ ਨਾਲ 9988646091.ਵਾਲੇ ਮੋਬਾਇਲ ਨੰਬਰ 'ਤੇ।

ਸ਼ਹੀਦ ਸਰਾਭਾ ਦੇ ਜਨਮ ਦਿਵਸ 'ਤੇ ਹੋਣਗੇ ਵਿਸ਼ਾਲ ਸਮਾਗਮ

ਸਵਰਾਜ ਲਹਿਰ ਦੇ ਕੌਮੀ ਆਗੂ  ਪੁੱਜਣਗੇ ਪਿੰਡ ਸਰਾਭਾ

ਲੁਧਿਆਣਾ: 21 ਮਈ 2015: (ਪੰਜਾਬ ਸਕਰੀਨ ਬਿਊਰੋ):

ਦੇਸ਼ ਲਈ ਜਾਨ ਵਾਰਨ ਵਾਲੇ ਅਮਰ ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਨੂੰ ਸ਼ਹੀਦ ਦਾ ਦਰਜਾ ਦੇਣ ਵਿੱਚ ਸਰਕਾਰਾਂ ਭਾਵੇਂ ਆਨਾਕਾਨੀ ਕਰੀ ਜਾਨ ਪਰ ਲੋਕਾਂ ਦੇ ਦਿਲਾਂ ਵਿੱਚ ਉਸ ਮਹਾਂ ਸਪੂਤ ਦਾ ਸਤਿਕਾਰ ਲਗਾਤਾਰ ਵਧ ਰਿਹਾ ਹੈ। ਲੋਕਾਂ ਦੇ ਦਿਲਾਂ ਵਿੱਚ ਸ਼ਹੀਦਾਂ ਦਾ ਅਕਸ ਧੁੰਦਲਾ ਕਰਨ ਜਾਂ ਮਿਟਾਉਣ ਦੀਆਂ ਨਾਪਾਕ ਕੋਸ਼ਿਸ਼ਾਂ ਬੁਰੀ ਤਰਾਂ ਨਾਕਾਮ ਹੋ ਰਹੀਆਂ ਹਨ। ਇਸ ਗੱਲ ਦਾ ਸਬੂਤ ਇੱਕ ਵਾਰ ਫਿਰ ਮਿਲੇਗਾ 24 ਮਈ ਨੂੰ ਪਿੰਡ ਸਰਾਭਾ ਦੀ ਇਤਿਹਾਸਿਕ ਧਰਤੀ ਵਿਖੇ ਜਿੱਥੇ ਮੁਕੰਮਲ ਆਜ਼ਾਦੀ ਦੇ ਨਾਅਰੇ ਜੋਸ਼ੋ ਖਰੋਸ਼ ਨਾਲ ਗੂੰਜਣਗੇ।

 ਇਸ ਸਬੰਧ ਵਿੱਚ ਸਵਰਾਜ ਲਹਿਰ ਜਿਲ੍ਹਾ ਲੁਧਿਆਣਾ ਦੇ ਵਲੰਟੀਅਰਾਂ ਦੀ ਇੱਕ ਮੀਟਿੰਗ ਸਥਾਨਕ ਅੰਬੈਂਸੀ ਪੈਲੇਸ ਵਿਖੇ ਪ੍ਰੋ. ਸੰਤੋਖ ਸਿੰਘ ਦੀ  ਪ੍ਰਧਾਨਗੀ ਹੇਠ ਹੋਈ ਜਿਸ ਵਿੱਚ 24 ਮਈ ਦਿਨ ਐਤਵਾਰ ਨੂੰ ਸਥਾਨਕ ਸ਼ਹਿਰ ਅੰਦਰ ਮਲਹੋਤਰਾ ਰਿਜ਼ੋਰਟ ਨੇੜੇ ਜਲੰਧਰ ਬਾਈਪਾਸ ਵਿਖੇ ਕੀਤੀ ਜਾ ਰਹੀ ਸੂਬਾ ਪੱਧਰੀ ਕਨਵੈਨਸ਼ਨ ਦੀਆਂ ਤਿਆਰੀਆਂ ਦਾ ਲੇਖਾ ਜੋਖਾ ਕੀਤਾ ਗਿਆ ਅਤੇ ਵਲੰਟੀਅਰਾਂ ਦੀਆਂ ਡਿਊਟੀਆਂ ਲਗਾਈਆਂ ਗਈਆਂ । ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਦੇ ਜਨਮ ਦਿਵਸ ਨੂੰ ਸਮਰਪਿਤ ਇਸ ਕਨਵੈਨਸ਼ਨ ਵਿੱਚ ਸਵਰਾਜ ਲਹਿਰ ਦੇ ਕੌਮੀ ਆਗੂਆਂ ਡਾ. ਯੋਗਿੰਦਰ ਯਾਦਵ, ਪ੍ਰੋ. ਆਨੰਦ ਕੁਮਾਰ, ਪ੍ਰੋ. ਅਜੀਤ ਝਾਅ, ਪ੍ਰੋ. ਮਨਜੀਤ ਸਿੰਘ ਅਤੇ ਸ੍ਰੀ ਰਜੀਵ ਗੋਦਾਰਾ ਆਦਿ ਪਹੁੰਚ ਰਹੇ ਹਨ । ਇਸ ਕਨਵੈਨਸ਼ਨ ਦਾ ਮਨੋਰਥ ਬਾਦਲ ਸਰਕਾਰ ਦੇ ਮਾਫੀਆ ਅਤੇ ਜੰਗਲ ਰਾਜ ਵਿਰੁੱਧ ਲੋਕਾਂ ਨੂੰ ਜਾਗਰੂਕ ਕਰਨਾ ਅਤੇ ਉਹਨਾਂ ਨੂੰ ਸੰਘਰਸ਼ਾਂ ਲਈ ਤਿਆਰ ਕਰਨਾ ਹੈ । ਪੰਜਾਬ ਵਿੱਚ ਲੁਟੇਰਾ ਰਾਜਨੀਤੀ ਨੂੰ ਖਤਮ ਕਰਕੇ ਇਕ ਲੋਕ ਪੱਖੀ ਬਦਲਵੀ ਰਾਜਨੀਤੀ ਸਥਾਪਿਤ ਕਰਨ ਲਈ ਪੰਜਾਬ ਦੇ ਵੱਖ-ਵੱਖ ਵਰਗਾਂ ਨੂੰ ਸੱਦਾ ਦੇਣਾ ਹੈ ।

ਪ੍ਰੈਸ ਨੂੰ ਜਾਰੀ ਬਿਆਨ ਵਿੱਚ ਮੀਟਿੰਗ ਦੀ ਕਾਰਵਾਈ ਦੱਸਦਿਆਂ ਨਵਦੀਪ ਜੋਧਾਂ ਨੇ ਦੱਸਿਆ ਕਿ ਉਸੇ ਦਿਨ ਸਵੇਰੇ ਸਵਰਾਜ ਲਹਿਰ ਦੇ ਕੌਮੀ ਆਗੂ ਸ਼ਹੀਦ ਦੇ ਜੱਦੀ ਪਿੰਡ ਸਰਾਭਾ ਵਿਖੇ ਸਵੇਰੇ 10 ਵਜੇ ਪਹੁੰਚ ਕੇ ਸ਼ਹੀਦ ਨੂੰ ਫੁੱਲ ਮਲਾਵਾਂ ਭੇਂਟ ਕਰਨਗੇ । ਉਹਨਾਂ ਦੱਸਿਆ ਕਿ ਸਵਰਾਜ ਲਹਿਰ ਦਾ ਮੁੱਖ ਮਨੋਰਥ ਪੰਜਾਬ ਦੀ ਭਿ੍ਰਸ਼ਟ ਸਰਕਾਰ ਹੱਥੋਂ ਪੀੜ੍ਹਿਤ ਲੋਕਾਂ ਨੂੰ ਇੱਕ ਮੰਚ ਤੇ ਇਕੱਠਾ ਕਰਨਾ ਹੈ ਜਿਸ ਨਾਲ ਪੰਜਾਬ ਵਿੱਚ ਆਮ ਆਦਮੀ ਪੱਖੀ ਰਾਜਨੀਤੀ ਸਥਾਪਿਤ ਕੀਤੀ ਜਾ ਸਕੇ ਅਤੇ ਲੋਕਾਂ ਨੂੰ ਇੱਕ ਬਦਲਵਾ ਰਾਜਨੀਤਿਕ ਪ੍ਰਬੰਧ ਦਿੱਤਾ ਜਾ ਸਕੇ । ਅੱਜ ਦੀ ਇਸ ਮੀਟਿੰਗ ਵਿੱਚ ਸਵਰਾਜ ਲਹਿਰ ਦੇ ਜਿਲ੍ਹਾ ਆਗੂ ਕੁੰਵਰਰੰਜਨ, ਡਾ. ਪ੍ਰਸ਼ਾਤ ਰਾਹੀ, ਨਰਿੰਦਰ ਜੀਤ ਕੌਰ, ਅਮਿਤ ਗੋਇਲ, ਕੇ.ਐਸ. ਯਾਦਵ, ਬਲਵੀਰ ਅਗਰਵਾਲ, ਗੁਰਜੀਤ ਸਿੰਘ ਕਾਲਾ, ਰਜੇਸ਼ ਕੁਮਾਰ, ਅਸੋਕ ਕੁਮਾਰ ਸ਼ਰਮਾ, ਸਾਦਨਾ ਸ਼ਰਮਾ, ਅਮਨ ਸ਼ਰਮਾ, ਮੇਜਰ ਬਲਵਿੰਦਰ ਸਿੰਘ, ਕਰਨਲ ਜਗਦੀਸ਼ ਸਿੰਘ, ਹਰਦੇਵ ਸਿੰਘ ਸੁਨੇਤ ਵੀ ਮੌਜੂਦ ਸਨ।  ਹੁਣ ਦੇਖਣਾ ਹੈ ਕਿ ਪੰਜਾਬ ਦੇ ਜੁਝਾਰੂ ਲੋਕ ਇਸ ਕੋਸ਼ਿਸ਼ ਨੂੰ ਕਿੰਨਾ ਕੁ ਹੁੰਗਾਰਾ ਭਰਦੇ ਹਨ?

ਖਟਕੜ ਕਲਾਂ ’ਚ ਸ਼ਹੀਦੀ ਸਮਾਗਮ ’ਤੇ ਮਸ਼ਾਲ ਮਾਰਚ

ਪ੍ਰੋ. ਅਜਮੇਰ ਔਲਖ ਦਾ ਨਾਟਕ ‘ਲੋਹੇ ਦਾ ਪੁੱਤ’ ਖੇਡਿਆ 

ਜਲੰਧਰ: 23 ਮਾਰਚ 2015: (ਪੰਜਾਬ ਸਕਰੀਨ ਬਿਊਰੋ):

ਖਟਕੜ ਕਲਾਂ, ਸ਼ਹੀਦ ਭਗਤ ਸਿੰਘ ਦੇ ਜੱਦੀ ਘਰ ਦੇ ਲਾਗੇ, ਖਟਕੜ ਕਲਾਂ ਨਗਰ, ਇਲਾਕਾ ਨਿਵਾਸੀਆਂ ਅਤੇ ਲੋਕ ਮੋਰਚਾ ਪੰਜਾਬ ਦੁਆਬਾ ਰਿਜਨ ਕਮੇਟੀ ਵੱਲੋਂ ਸ਼ਹੀਦ ਭਗਤ ਸਿੰਘ ਰਾਜਗੁਰੂ ਅਤੇ ਸੁਖਦੇਵ ਦੀ ਯਾਦ ’ਚ ਸ਼ਰਧਾਂਜ਼ਲੀ ਸਮਾਗਮ ਕੀਤਾ ਗਿਆ।
    ਇਹ ਸਮਾਗਮ ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਦੀ ਸ਼ਹੀਦੀ ਸ਼ਤਾਬਦੀ (1915-2015) ਨੂੰ ਵਿਸ਼ੇਸ਼ ਤੌਰ ਤੇ ਸਮਰਪਤ ਕੀਤਾ ਗਿਆ ਜਿਸ ਬਾਲ ਜਰਨੈਲ ਨੂੰ, ਸ਼ਹੀਦ ਭਗਤ ਸਿੰਘ ਆਪਣਾ ਗੁਰੂ, ਭਰਾ ਅਤੇ ਸਾਥੀ ਕਿਹਾ ਕਰਦਾ ਸੀ।
ਸਮਾਗਮ ’ਚ ਸਥਾਨਕ ਵਾਸੀਆਂ ਤੋਂ ਇਲਾਵਾ ਇਲਾਕੇ ਭਰ ਦੇ ਪਿੰਡਾਂ ਤੋਂ ਜੱਥਿਆਂ ਦੇ ਜੱਥੇ ਆਕਾਸ਼ ਗੁੰਜਾਊ ਨਾਅਰੇ ਮਾਰਦੇ ਸ਼ਾਮਲ ਹੋਏ।  ਮਰਦਾਂ, ਔਰਤਾਂ ਨੇ ਆਪਣੇ ਹੱਥਾਂ ’ਚ ਜਗਦੀਆਂ ਮਸ਼ਾਲਾਂ ਲੈ ਕੇ ਪਿੰਡ ’ਚ ਸੂਹਾ ਮਾਰਚ ਕੀਤਾ।
ਸਮਾਗਮ ’ਚ ਖੋਜ਼ਕਾਰ ਅਤੇ ਲੇਖਕ ਸੀਤਾ ਰਾਮ ਬਾਂਸਲ ਅਤੇ ਬਲਵਿੰਦਰ ਕੌਰ ਬਾਂਸਲ ਵੱਲੋਂ ਇਤਿਹਾਸਕ ਦਸਤਾਵੇਜ਼ਾਂ ਅਤੇ ਦੁਰਲੱਭ ਤਸਵੀਰਾਂ ਦੀ ਲਗਾਈ ਪ੍ਰਦਰਸ਼ਨੀ ਵਿਸ਼ੇਸ਼ ਖਿੱਚ ਦਾ ਕੇਂਦਰ ਬਣੀ ਰਹੀ।
ਪੰਜਾਬ ਲੋਕ ਸਭਿਆਚਾਰਕ ਮੰਚ ਦੇ ਪ੍ਰਧਾਨ ਅਮੋਲਕ ਸਿੰਘ ਨੇ ਸ਼ਰਧਾਂਜ਼ਲੀ ਸਮਾਗਮ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਮੁਲਕ ਦੇ ਕੁਦਰਤੀ ਸਰੋਤਾਂ ਅਤੇ ਕਿਰਤ ਉਪਰ ਦੇਸੀ ਬਦੇਸੀ ਕੰਪਨੀਆਂ ਦਾ ਗਲਬਾ ਜਮਾਉਣ ਵਾਲੇ ਵੰਨ-ਸੁਵੰਨੇ ਹਾਕਮ ਸ਼ਹੀਦਾਂ ਨੂੰ ਸ਼ਰਧਾਂਜ਼ਲੀ ਭੇਂਟ ਕਰਨ ਦੇ ਹੱਕਦਾਰ ਨਹੀਂ।  ਸ਼ਹੀਦਾਂ ਦੇ ਹਕੀਕੀ ਵਾਰਸ ਉਹ ਲੋਕ ਨੇ ਜਿਹੜੇ ਉਹਨਾਂ ਦੇ ਸੁਪਨਿਆਂ ਦੀ ਆਜ਼ਾਦੀ, ਸਾਂਝੀਵਾਲਤਾ ਧਰਮ-ਨਿਰਪੱਖਤਾ ਅਤੇ ਨਿਆਂ ਭਰੇ ਸਮਾਜ ਦੀ ਸਿਰਜਣਾ ਲਈ ਸੰਗਰਾਮ ਜਾਰੀ ਰੱਖ ਰਹੇ ਹਨ।
ਪ੍ਰੋ. ਅਜਮੇਰ ਸਿੰਘ ਔਲਖ ਦਾ ਲਿਖਿਆ ਨਾਟਕ ‘ਲੋਹੇ ਦਾ ਪੁੱਤ’ ਮਾਨਵਤਾ ਕਲਾ ਮੰਚ ਨਗਰ ਵੱਲੋਂ ਜਸਵਿੰਦਰ ਪੱਪੀ ਦੀ ਨਿਰਦੇਸ਼ਨਾਂ ’ਚ ਖੇਡਿਆ ਗਿਆ।  ਉਹਨਾਂ ਵੱਲੋਂ ‘‘ਚੋਰਾਂ ਦੇ ਵਸ ਪੈ ਕੇ ਭਾਰਤ ਮਾਂ ਕੁਰਲਾਉਂਦੀ ਏ’’ ਅਤੇ ਜਗਮੋਹਣ ਲੋਹੀਆਂ ਦੇ ਗੀਤ ‘‘ਆਓ! ਕਿਰਤੀਓ ਆਓ’’ ਤੇ ਕੋਰਿਓਗਰਾਫ਼ੀਆਂ ਪੇਸ਼ ਕੀਤੀਆਂ ਗਈਆਂ।
ਗਰਚਾ ਮਿਊਜ਼ਕ ਅਕੈਡਮੀ ਬੰਗਾ ਵੱਲੋਂ ਜੋਗਾ ਸਿੰਘ ਗਰਚਾ ਦੀ ਨਿਰਦੇਸ਼ਨਾ ’ਚ ਗੀਤ-ਸੰਗੀਤ ਦਾ ਪ੍ਰਭਾਵਸ਼ਾਲੀ ਰੰਗ ਬਿਖੇਰਿਆ ਗਿਆ।
ਸਮਾਜ ਸੇਵੀ, ਅਗਾਂਹਵਧੂ ਖਿਆਲਾਂ ਦੇ ਧਾਰਨੀ ਮੁਖ਼ਤਾਰ ਖ਼ਾਨ ਖਾਨਖਾਨਾ, ਸੀਤਾ ਰਾਮ ਬਾਂਸਲ ਅਤੇ ਬਲਵਿੰਦਰ ਕੌਰ ਬਾਂਸਲ ਦਾ ਸ਼ਹੀਦੀ ਯਾਦਗਾਰ ਕਮੇਟੀ ਅਤੇ ਲੋਕ ਮੋਰਚਾ ਵੱਲੋਂ ਸਨਮਾਨ ਕੀਤਾ ਗਿਆ।  ਇਸ ਮੌਕੇ ਕੁਸ਼ਤੀ ਦੇ ਕੌਮਾਂਤਰੀ ਕੋਚ ਪੀ.ਆਰ.ਸੌਂਧੀ ਅਤੇ ਸੁਖਦੇਵ ਸਿੰਘ ਰਾਏਪੁਰ ਡੱਬਾ ਨੇ ਮੁਖ਼ਤਾਰ ਦੇ ਜੀਵਨ ਸਫ਼ਰ ਅਤੇ ਬਾਂਸਲ ਜੋੜੀ ਦੇ ਕਾਰਜ਼ਾਂ ’ਤੇ ਝਾਤ ਪੁਆਈ ਅਤੇ ਸ਼ਹੀਦਾਂ ਨੂੰ ਸ਼ਰਧਾਂਜ਼ਲੀ ਅਰਪਤ ਕੀਤੀ।
ਮੰਚ ਸੰਚਾਲਨ ਤੀਰਥ ਰਸੂਲਪੁਰੀ ਅਤੇ ਮਾਸਟਰ ਅਵਤਾਰ ਸਿੰਘ ਨੇ ਕੀਤਾ।

ਰਿਪੋਰਟਿੰਗ: ਕਾਮਾਗਾਟਾ ਮਾਰੂ ਦੀ 100ਵੀਂ ਵਰੇਗੰਢਮੌਕੇ ਸਮਾਗਮ

Fri, May 23, 2014 at 5:28 PM
ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਦੇ ਜਨਮ ਦਿਹਾੜੇ ਦੀ ਪੂਰਵ-ਸੰਧਿਆ ’ਤੇ ਨਾਟਕ ਨੇ ਛੇੜਿਆ ਇਕ ਹੋਰ ਕਰਾਂਤੀ ਦਾ ਨਗ਼ਮਾ
‘ਜਿਥੇ ਕਵਿਤਾ ਖ਼ਤਮ ਹੁੰਦੀ ਹੈ’ ਦੇ ਮੰਚਨ ਨੇ  ਝੰਜੋੜੇ ਲੋਕਾਂ ਦੇ  ਅਤੇ ਦਿਮਾਗ

ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਦੇ ਜਨਮ ਦਿਹਾੜੇ ਦੀ ਪੂਰਵ-ਸੰਧਿਆ ਦੇ ਮੌਕੇ ਅਤੇ ਇਤਿਹਾਸਕ ਕਾਮਾਗਾਟਾ ਮਾਰੂ ਜਹਾਜ਼ ਨੂੰ 23 ਮਈ 1914 ’ਚ ਵੈਨਕੂਵਰ ਕਨੇਡਾ ਦੇ ਪਾਣੀਆਂ ’ਚ ਰੋਕੇ ਜਾਣ ਦੀ 100ਵੀਂ ਵਰੇ ਗੰਢ ’ਤੇ ਦੇਸ਼ ਭਗਤ ਯਾਦਗਾਰ ਕਮੇਟੀ ਜਲੰਧਰ ਦੁਆਰਾ ਯੁਵਾ ਥੀਏਟਰ ਜਲੰਧਰ ਦਾ ਨਵਾਂ ਨਾਟਕ ‘ਜਿਥੇ ਕਵਿਤਾ ਖ਼ਤਮ ਹੁੰਦੀ ਹੈ’ ਦਾ ਮੰਚਨ 23 ਮਈ ਨੂੰ ਦੇਸ਼ ਭਗਤ ਯਾਦਗਾਰ ਹਾਲ ਦੇ ਵਿਚ ਕਰਵਾਇਆ ਗਿਆ। ‘ਜਿੱਥੇ ਕਵਿਤਾ ਖ਼ਤਮ ਹੁੰਦੀ ਹੈ...’ ਨਾਟਕ ਪਾਸ਼ ਦੀ ਕਵਿਤਾ ਦੇ ਬੋਲਾਂ ਨਾਲ ਹੀ ਸਿਖ਼ਰ ’ਤੇ ਸੁਨੇਹਾ ਦਿੰਦਾ ਹੈ ਕਿ:
ਮਸਲਿਆਂ ਦਾ ਮਤਾ ਮੇਰੇ ਦੋਸਤੋ ਕੁਝ ਇਸ ਤਰਾਂ ਹੁੰਦੈ
ਕਿ ਕਵਿਤਾ ਉੱਕਾ ਹੀ ਨਾਕਾਫ਼ੀ ਹੁੰਦੀ ਹੈ
ਤੇ ਤੁਸੀਂ ਬੜੀ ਦੂਰ ਨਿਕਲ ਜਾਂਦੇ ਹੋ-
ਤਿੱਖੀਆਂ ਚੀਜ਼ਾਂ ਦੀ ਭਾਲ਼ ਵਿੱਚ
ਮਸਲਿਆਂ ਦਾ ਮਤਾ ਕੁਝ ਏਦਾਂ ਦਾ ਹੁੰਦਾ ਹੈ
ਕਿ ਤੁਹਾਡਾ ਸਬਰ ਥੱਪੜ ਮਾਰ ਦਿੰਦਾ ਹੈ
ਤੁਹਾਡੇ ਕਾਇਰ ਮੂੰਹ ਉੱਤੇ
ਅਤੇ ਤੁਸੀਂ ਉਸ ਜਗਾ ਤੋਂ ਸ਼ੁਰੂ ਕਰਦੇ ਹੋ
ਜਿੱਥੇ ਕਵਿਤਾ ਖ਼ਤਮ ਹੁੰਦੀ ਹੈ...
ਨਾਟਕ ਵਿਚ ਦਿਖਾਇਆ ਗਿਆ ਹੈ ਕਿ ਕਿਸ ਤਰਾਂ ਭਿ੍ਰਸ਼ਟਾਚਾਰ, ਸਵਾਰਥ ਅਤੇ ਭਾਵ-ਹੀਣਤਾ ਚਰਮ-ਸੀਮਾ ’ਤੇ ਪਹੁੰਚ ਚੁੱਕੇ ਹਨ। ਨੌਜਵਾਨ ਬੇਰੁਜ਼ਗਾਰ ਹਨ।  ਗੁੰਮਰਾਹ ਕਰਕੇ ਕੁਰਾਹੇ ਪਾਏ ਜਾ ਰਹੇ ਹਨ।  ਸਭਿਆਚਾਰ ਅਤੇ ਨੈਤਿਕ ਕਦਰਾਂ ਕੀਮਤਾਂ ਵਿਚ ਗਿਰਾਵਟ ਆ ਚੁੱਕੀ ਹੈ ਪਰ ਫਿਰ ਵੀ ਅਸੀਂ ਆਪ ਕੁਝ ਕਰਨ ਦੀ ਬਜਾਏ ਇਸ ਉਡੀਕ ਵਿਚ ਜਿਉਦੇ ਰਹਿੰਦੇ ਹਾਂ ਕਿ ਕੁਝ ਨਾ ਕੁਝ ਤਾਂ ਹੋਵੇਗਾ ਕੋਈ ਤੇ ਪਹਿਲ ਕਰੇਗਾ।  ਨਾਟਕ ਦਾ ਮੁੱਖ ਪਾਤਰ ਭਗਤ ਇਕ ਪੜਿਆ ਲਿਖਿਆ ਬੀ.ਟੈਕ., ਐਮ.ਟੈਕ. ਨੌਜਵਾਨ ਹੈ, ਜਿਹੜਾ ਸਹੀ ਨੌਕਰੀ ਮਿਲਣ ਨਾ ਕਰਕੇ ਆਪਣੇ ਹੀ ਕਾਲਜ ਸਾਹਮਣੇ ਚਾਹ ਦੀ ਦੁਕਾਨ ਲਾ ਲੈਂਦਾ ਹੈ, ਉਹ ਮੇਹਨਤੀ ਹੈ ਅਤੇ ਜੁਝਾਰੂ ਹੈ।  ਉਸ ਦੁਕਾਨ ’ਤੇ ਰੋਜ਼ ਕਈ ਤਰਾਂ ਦੇ ਲੋਕ ਚਾਹ ਪੀਣ ਆਉਦੇ ਹਨ, ਜਿਹੜੇ ਸਾਡੇ ਸਮਾਜ ਦੇ ਬਦਲਦੇ ਰੂਪ ਦਾ ਸ਼ੀਸ਼ਾ ਦਿਖਾਉਦੇ ਹਨ। ਭਗਤ ਖਾਲੀ ਸਮੇਂ ਵਿਚ ਆਪਣੀ ਦੁਕਾਨ ਵਿਚ ਹੀ ਇਤਿਹਾਸਕ ਕਿਤਾਬਾਂ ਪੜਦਾ ਹੈ। ਸਭ ਠੀਕ ਠਾਕ ਚੱਲ ਰਿਹਾ ਹੁੰਦਾ ਹੈ, ਪਰ ਅਚਾਨਕ ਇਹ ਖ਼ਬਰ ਆਉਂਦੀ ਹੈ ਕਿ ਕਾਲਜ ਅਤੇ ਉਸ ਦੇ ਆਲੇ ਦੁਆਲੇ ਦੀ ਜ਼ਮੀਨ ਵੇਚੀ ਜਾ ਰਹੀ ਹੈ ਬਹੁ-ਕੌਮੀ ਕੰਪਨੀਆਂ ਨੂੰ।  ਇਹ ਖਬਰ ਸਾਰੇ ਲੋਕਾਂ ਨੂੰ ਹਿਲਾ ਦਿੰਦੀ ਹੈ।  ਭਗਤ, ਇਹ ਫੈਸਲਾ ਲੈਂਦਾ ਹੈ ਕਿ ਉਹ ਆਪਣੀ ਦੁਕਾਨ ਅਤੇ ਥਾਂ ਨਹੀਂ ਛੱਡੇਗਾ। ਬਹੁਤ ਸਾਰੇ ਲੋਕ ਉਸਦੇ ਸਮਰਥਨ ਲਈ ਇਕੱਠੇ ਹੋ ਜਾਂਦੇ ਹਨ।  ਹੌਲੀ-ਹੌਲੀ ਇਹ ਇਕੱਠ ‘ਜਨ-ਅੰਦੋਲਨ’ ਦਾ ਰੂਪ ਧਾਰ ਲੈਂਦਾ ਹੈ।  ਬਹੁ-ਕੌਮੀ ਕੰਪਨੀਆਂ ਦੇ ਨਾਲ ਮਿਲੇ ਹੋਏ ਸੱਤਾਧਾਰੀ ਧਿਰ ਤੇ ਵਿਰੋਧੀ ਧਿਰ ਦੇ ਨੇਤਾ ਉਹਨਾਂ ਨੂੰ ਧਮਕੀਆਂ ਅਤੇ ਲਾਲਚ ਨਾਲ ਤੋੜਨ ਦਾ ਯਤਨ ਕਰਦੇ ਹਨ।  ਭਗਤ, ਉਦੋਂ ਨਿਰਾਸ਼ ਹੋ ਜਾਂਦਾ ਹੈ ਜਦੋਂ ਉਸਦੇ ਸਾਰੇ ਸਾਥੀ ਉਸ ਦਾ ਸਾਥ ਛੱਡਣ ਲੱਗਦੇ ਹਨ ਪਰ ਫਿਰ ਵੀ ਉਹ ਸਾਰਿਆਂ ਨੂੰ ਇਕੱਠਾ ਕਰਦਾ ਹੈ ਤੇ ਹਿੰਮਤ ਦਿੰਦਾ ਹੈ। ਉਹ ਸੋਸ਼ਲ ਨੈਟਵਰਕ ਸਾਈਟਸ ਦੇ ਰਾਹੀਂ ਨੌਜਵਾਨਾਂ ਤੱਕ ਪਹੁੰਚਣ ਦੀ ਯੋਜਨਾ ਬਣਾਉਦਾ ਹੈ। ਲੋਕ ਗੀਤਾਂ ਵਿਚ ਨਵੇਂ ਭਾਵ ਭਰਕੇ ਆਮ ਜਨਤਾ ਅਤੇ ਪਿੰਡ-ਪਿੰਡ ਵਿਚ ਪਹੁੰਚਣ ਦੀ ਜੁਗਤ ਬਣਾਉਦਾ ਹੈ।  ਉਹ ਆਪਣੇ ਖ਼ੂਨ ਦਾ ਤਿਲਕ ਲਗਾਉਣ ਲਈ ਇਕ ਸੰਗਰਾਮ ਆਰੰਭ ਕਰਨ ਦਾ ਐਲਾਨ ਕਰਦਾ ਹੈ।
ਨਾਟਕ ਅਜੇਹੀ ਸਿਖ਼ਰ ਛੋਹਦੇ ਸੁਆਲ ਉਭਾਰਦਾ ਹੈ ਕਿ ਇਸ ਮੌਕੇ ਸਮਾਜੀ ਉਲਝਣ ਦਾ ਹੱਲ ਇਸ ਬਣੇ ਬਣਾਏ ਪ੍ਰਬੰਧ ਦੇ ਅੰਦਰ ਨਹੀਂ ਹੋਣਾ ਸਗੋਂ ਇਸ ਪ੍ਰਬੰਧ ਦੇ ਕੋਹਜ ਨੂੰ ਰੂਪਮਾਨ ਕਰਦੀ ਕਵਿਤਾ ‘ਜਿਥੇ ਕਵਿਤਾ ਖ਼ਤਮ ਹੁੰਦੀ ਹੈ’ ਤੋਂ ਹੁਣ ਪਾਰ, ਅਗੇਰੇ ਹੋਰ ਅਗੇਰੇ ਜਾਣਾ ਪਏਗਾ।
ਇਹ ਨਾਟਕ, ਯੁਵਾ ਥੀਏਟਰ ਦੇ ਨਿਰਦੇਸ਼ਕ ਡਾ. ਅੰਕੁਰ ਸ਼ਰਮਾ ਦੁਆਰਾ ਲਗਾਈ 40 ਦਿਨਾਂ ਦੀ ਥੀਏਟਰ ਵਰਕਸ਼ਾਪ ਦੇ ਦੌਰਾਨ ਤਿਆਰ ਕੀਤਾ ਗਿਆ। ਇਸ ਵਿਚ 25 ਨੌਜਵਾਨ ਕਲਾਕਾਰਾਂ ਨੇ ਭਾਗ ਲਿਆ।  ਵਰਕਸ਼ਾਪ ਦਾ ਮਕਸਦ ਇਨਾਂ ਕਲਾਕਾਰਾਂ ਨੂੰ ਥੀਏਟਰ ਦੇ ਵੱਖ-ਵੱਖ ਰੂਪਾਂ ਨਾਲ  ਨਿਰਦੇਸ਼ਨ, ਅਭਿਨੈ, ਡਿਜ਼ਾਈਨ, ਸੰਗੀਤ ਅਤੇ ਰੌਸ਼ਨੀ ਆਦਿ ਤੋਂ ਜਾਣੂੰ ਕਰਵਾਉਣਾ ਸੀ। ਇਸ ਨਾਟਕ ਦੀ ਨਿਰਦੇਸ਼ਨਾ ਦੋ ਨੌਜਵਾਨਾ - ਵਿਸ਼ੇਸ਼ ਅਰੋੜਾ ਅਤੇ ਹਰੀਸ਼ ਡੋਗਰਾ ਨੇ ਕੀਤੀ ਹੈ। ਮੁੱਖ ਪਾਤਰ ਦੀ ਭੂਮਿਕਾ ਨਿਭਾਉਣ ਵਾਲੇ ਪ੍ਰਾਜਨੇ ਸੂਫ਼ੀ ਅਹਿਆ (  1) ਜੋ ਕਿ ਸ਼ਹਿਰ ਵਿਚ ਆਰ.ਜੇ. ਦੇ ਤੌਰ ’ਤੇ ਬਤੌਰ ਐਂਕਰ ਦੇ ਰੂਪ ਵਿਚ ਮਸ਼ਹੂਰ ਹੈ, ਪਹਿਲੀ ਵਾਰ ਰੰਗਮੰਚ ਦੀ ਦੁਨੀਆਂ ਨਾਲ ਜੁੜਿਆ ਹੈ। ਬਾਕੀ ਭੂਮਿਕਾਵਾਂ ਵਿਚ  ਧਰੁਵ, ਸੋਨੀਆ, ਜੀਵਨਜੋਤ, ਕੁਮਾਰ ਸੱਭਰਵਾਲ, ਮਰੀਦੁਅਲ, ਜਿੰਕੀ, ਹੇਮੰਤ, ਸ਼ੁਭਮ, ਗੌਰਵ, ਮਨਪ੍ਰੀਤ ਸਿੰਘ, ਵਿਕਾਸ, ਵਿਕਾਸ ਆਰੀਆ, ਅਮਿਤ, ਕਨਵ ਵਰਗੇ ਨਵੇਂ ਕਲਾਕਾਰ ਹਨ।  ਇਨਾਂ ਦਾ ਸਾਥ ਕੀਤਾ ਹੈ ਯੁਵਾ ਦੇ ਹਰਜੀਤ ਸਿੰਘ, ਵਿਕਾਰ ਆਨੰਦ, ਗੋਬਿੰਦ ਵਰਮਾ, ਹੀਨਾ ਸ਼ਰਮਾ ਅਤੇ ਮਨਦੀਪ ਕੌਰ ਨੇ।
ਇਸ ਮੌਕੇ ਦੇਸ਼ ਭਗਤ ਯਾਦਗਾਰ ਕਮੇਟੀ ਦੇ ਜਨਰਲ ਸਕੱਤਰ ਡਾ. ਰਘਬੀਰ ਕੌਰ ਤੇ ਸਭਿਆਚਾਰਕ ਵਿੰਗ ਦੇ ਕਨਵੀਨਰ ਅਮੋਲਕ ਸਿੰਘ ਨੇ ਇਸ ਇਤਿਹਾਸਕ ਦਿਹਾੜੇ ’ਤੇ ਨਾਟਕ ਦੀ ਪ੍ਰਸੰਗਕਤਾ ਸਬੰਧੀ ਵਿਚਾਰ ਪੇਸ਼ ਕੀਤੇ।  ਇਸ ਮੌਕੇ ਕਮੇਟੀ ਦੇ ਮੀਤ ਪ੍ਰਧਾਨ ਕਾ. ਅਜਮੇਰ ਸਿੰਘ, ਖਜ਼ਾਨਚੀ ਸੀਤਲ ਸਿੰਘ ਸੰਘਾ, ਕਮੇਟੀ ਮੈਂਬਰ ਗੁਰਮੀਤ, ਗੁਰਮੀਤ ਢੱਡਾ, ਦੇਵਰਾਜ ਨਾਇਰ, ਡਾ. ਕਰਮਜੀਤ ਸਿੰਘ ਹਾਜ਼ਰ ਸਨ।
ਜਾਰੀ ਕਰਤਾ:
ਅਮੋਲਕ ਸਿੰਘ
ਕਨਵੀਨਰ, ਸਭਿਆਚਾਰਕ ਵਿੰਗ
94170 76735

ਸਰਕਾਰਾਂ ਨੇ ਸ਼ਹੀਦ ਸਰਾਭੇ ਦੀ ਕੁਰਬਾਨੀ ਦਾ ਕੌਡੀ ਮੁੱਲ ਨਹੀਂ ਪਾਇਆ--ਸੁਖਦੇਵ ਕੌਰ

Mon, Jan 6, 2014 at 3:43 PM
ਸਰਾਬ ਪੀ ਕੇ ਮਰਨ ਵਾਲਿਆਂ ਨੂੰ ਤਾਂ 66 ਘੰਟਿਆਂ 'ਚ ਹੀ ਸ਼ਹੀਦ ਬਣਾ ਸਕਦੀਆਂ  
ਪਰ ਅਜ਼ਾਦੀ ਦੇ ਪਰਵਾਨਿਆ ਦੀ 66 ਸਾਲ ਬੀਤ ਜਾਣ  ਤੇ ਵੀ ਯਾਦ ਨਹੀਂ ਆਈ

ਬੀਬੀ ਸੁਖਦੇਵ ਕੌਰ ਮੀਟਿੰਗ ਦੌਰਾਨ ਵੱਖ ਵੱਖ ਜੱਥੇਬੰਦੀਆਂ ਦੇ ਆਗੂਆਂ ਨਾਲ

ਲੁਧਿਆਣਾ, 6 ਜਨਵਰੀ ( ਸਤਪਾਲ ਸੋਨੀ//ਪੰਜਾਬ ਸਕਰੀਨ):

ਪੰਜਾਬੀ ਭਵਨ ਲੁਧਿਆਣਾ ਵਿਖੇ ਅਜ਼ਾਦੀ ਦੇ ਮਹਾਨ ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਨੂੰ ਸ਼ਹੀਦ ਹੋਏ 99 ਸਾਲ ਸਾਲ ਬੀਤ ਜਾਣ ਤੇ ਹਾਲੇ ਤੱਕ ਉਸ ਨੂੰ ਸ਼ਹੀਦ ਨਾ ਮਨ ਕੇ ਉਸ ਦੀ ਭਰ ਜਵਾਨੀ ‘ਚ ਦਿੱਤੀ ਕੁਰਬਾਨੀ ਦਾ ਕੌਡੀ ਮੁੱਲ ਵੀ ਨਹੀਂ ਪਾਇਆ । । ਇਹ ਵਿਚਾਰ ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਜੀ ਦੀ ਭੈਣ ਧੰਨ ਕੌਰ ਦੀ ਪੋਤਰੀ ਸੁਖਦੇਵ ਕੌਰ ਨੇ ਮੀਟਿੰਗ ਦੌਰਾਨ ਆਖੇ।ਉਹਨਾਂ ਕਿਹਾ ਕਿ ਅੱਜ ਸਾਡੀਆਂ ਸਰਕਾਰਾਂ ਸਰਾਬੀਆਂ ਨੂੰ ਤਾਂ ਸ਼ਹੀਦ ਮਨ ਸਕਦੀਆ ਹਨ ਪਰ ਦੇਸ਼ ਕੌਮ ਦੀ ਖਾਤਰ ਆਪਣਾ ਸਾਰਾ ਕੁਝ ਵਾਰਨ ਵਾਲਿਆਂ ਨੂੰ ਹਾਲੇ ਤੱਕ ਸ਼ਹੀਦ ਮੰਨਣ ਲਈ ਤਿਆਰ ਨਹੀਂ ਹਨ। । ਇਸ ਮੌਕੇ ਵੱਖ ਵੱਖ ਜੱਥੇਬੰਦੀਆਂ ਜਿੰਨਾਂ ਵਿੱਚ ਸ਼ਹੀਦ ਭਗਤ ਸਿੰਘ ਸੱਭਿਆਚਾਰ ਕੇਂਦਰ ਲੁਧਿਆਣਾ ਦੇ ਪ੍ਰਧਾਨ ਸੁਖਵਿੰਦਰ ਸਿੰਘ ਲੀਲ, ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਯਾਦਗਾਰ ਕਮੇਟੀ ਦੇ ਆਗੂ ਬਲਦੇਵ ਸਿੰਘ ਸਰਾਭਾ, ਪੰਜਾਬ ਸਟੂਡੈਂਟ ਯੂਨੀਅਨ ਦੇ ਆਗੂ ਅਰੁਣ ਕੁਮਾਰ, ਡੀ. ਈ . ਐਫ ਦੇ ਪ੍ਰਧਾਨ ਰਮਨਜੀਤ ਸੰਧੂ, ਪਰਮਜੀਤ ਸਿੰਘ ਕੈਲੇ, ਅੰਮ੍ਰਿਤ ਸਿੰਘ ਸਰਾਭਾ, ਸਨੀ ਦੌਰਾਹਾ, ਦਵਿੰਦਰ ਸਿੰਘ ਕੋਟਕਪੂਰਾ ਸਤਿੰਦਰ ਖੰਡੂਰ ਅਤੇ ਦੀਪਕ ਖੰਡੂਰ ਨੇ ਸਾਂਝੇ ਤੌਰ ਤੇ ਕਿਹਾ ਕਿ ਇਹ ਇੱਕ ਬਹੁਤ ਹੀ ਸੋਚੀ ਸਮਝੀ ਸਾਜਿਸ ਅਧੀਨ ਹੀ ਸਾਡੇ ਦੇਸ਼ ਦੀਆਂ ਸਰਕਾਰਾਂ ਵੱਲੋਂ ਸਾਡੇ ਦੇਸ਼ ਦੀ ਅਜ਼ਾਦੀ ਲਈ ਕੁਰਬਾਨ ਹੋਣ ਵਾਲੇ ਸ਼ਹੀਦ ਕਰਤਾਰ ਸਿੰਘ ਸਰਾਭਾ  ਨੂੰ ਬਣਦਾ ਮਾਣ ਸਤਿਕਾਰ ਨਹੀਂ ਦਿਤਾ ਜਾ ਸਕਿਆ।।  ਉਹਨਾਂ ਅੱਗੇ ਕਿਹਾ ਕਿ ਇਹ ਸਰਕਾਰਾਂ ਸਰਾਬ ਪੀ ਕੇ ਮਰਨ ਵਾਲਿਆ ਨੂੰ ਤਾਂ 66 ਘੰਟਿਆਂ ਵਿੱਚ ਹੀ ਸ਼ਹੀਦ ਬਣਾ ਸਕਦੀਆ ਪਰ ਸਾਡੇ ਦੇਸ਼ ਦੀ ਅਜ਼ਾਦੀ ਦੇ ਪਰਵਾਨਿਆ ਦੀ 66 ਸਾਲ ਬੀਤ ਜਾਣ ਬਾਅਦ ਵੀ ਯਾਦ ਨਹੀਂ ਆਈ । ਇਸ ਮੌਕੇ ਆਗੂਆਂ ਨੇ ਚਿਤਾਵਨੀ ਦਿੰਦਿਆ ਕਿਹਾ ਕਿ ਜੇਕਰ 26 ਜਨਵਰੀ ਤੱਕ ਸ਼ਹੀਦ ਸਰਾਭਾ ਨੂੰ ਕੌਮੀ ਸ਼ਹੀਦ ਮੰਨਣ, ਸ਼ਹੀਦ ਸਰਾਭਾ ਮਾਰਗ ਨੂੰ ਸਖਤੀ ਨਾਲ ਲਾਗੂ ਕਰਨ, ਸ਼ਹੀਦ ਸਰਾਭੇ ਦੇ ਘਰ ਦੇ ਕੰਮ ਨੂੰ ਜਲਦੀ ਸੁਰੂ ਕਰਨ ਅਤੇ 16 ਨਵੰਬਰ ਦੀ ਸਰਕਾਰੀ ਛੁੱਟੀ ਦਾ ਐਲਾਨ ਕਰਨ  ਵਰਗੀਆਂ ਹੱਕੀ ਮੰਗਾਂ ਵੱਲ ਨਾ ਧਿਆਨ ਦਿੱਤਾ ਤਾਂ 12 ਜਨਵਰੀ ਨੂੰ ਸ਼ਹੀਦ ਸਰਾਭਾ ਦੇ ਜੱਦੀ ਪਿੰਡ ਸਰਾਭਾ ਵਿਖੇ ਸਵੇਰੇ 11 ਵਜੇ ਰੱਖੀ ਗਈ ਸਮੂਹ ਜੱਥੇਬੰਦੀਆਂ ਦੀ ਮੀਟਿੰਗ ਕਰਨ ਉਪਰੰਤ ਸ਼ਹੀਦ ਸਰਾਭਾ ਸੰਘਰਸ਼ ਕਮੇਟੀ ਦੀ ਚੋਣ ਕਰਕੇ ਅਗਲੇ ਸੰਘਰਸ਼ ਦੀ ਰੂਪ ਰੇਖਾ ਤਿਆਰ ਕੀਤੀ ਜਾਵੇਗੀ। ।