Showing posts with label Dr Sonia. Show all posts
Showing posts with label Dr Sonia. Show all posts

Tuesday, November 06, 2018

ਡਾ: ਸੋਨੀਆ (ਸਵੀਡਨ) ਦੀ ਕਿਤਾਬ "ਧੁੰਦ" ਦਾ ਲੋਕ ਅਰਪਨ ਅੱਜ

ਪੰਜਾਬੀ ਭਵਨ ਲੁਧਿਆਣਾ 'ਚ ਜੁੜਣਗੇ ਪੰਜਾਬ ਦਾ ਦਰਦ ਮਹਿਸਸ ਕਰਨ ਵਾਲੇ  
ਲੁਧਿਆਣਾ: 5 ਨਵੰਬਰ 2018: (ਪੰਜਾਬ ਸਕਰੀਨ ਬਿਊਰੋ)::
ਪੰਜਾਬੀ ਲੇਖਕ ਸਭਾ ਲੁਧਿਆਣਾ ਵੱਲੋਂ ਸਵੀਡਨ ਵੱਸਦੀ ਪੰਜਾਬੀ ਲੇਖਿਕਾ ਡਾ: ਸੋਨੀਆ ਸਿੰਘ ਦੀ ਵਾਰਤਕ ਪੁਸਤਕ ਧੁੰਦ ਦਾ ਲੋਕ ਅਰਪਨ ਸਮਾਗਮ 6 ਨਵੰਬਰ ਨੂੰ ਪੰਜਾਬੀ ਭਵਨ ਲੁਧਿਆਣਾ ਵਿਖੇ ਬਾਦ ਦੁਪਹਿਰ 2 ਵਜੇ ਹੋਵੇਗਾ। 
ਪੁਸਤਕ ਲੋਕ ਅਰਪਨ ਸਮਾਰੋਹ ਦੇ ਮੁੱਖ ਮਹਿਮਾਨ ਡਾ: ਐੱਸ ਪੀ ਸਿੰਘ ਸਾਬਕਾ ਵਾਈਸ ਚਾਂਸਲਰ ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ ਅੰਮ੍ਰਿਤਸਰ ਹੋਣਗੇ। 
ਵਿਸ਼ੇਸ਼ ਮਹਿਮਾਨ ਵਜੋਂ ਪ੍ਰੋ: ਰਵਿੰਦਰ ਭੱਂਠਲ, ਪ੍ਰਧਾਨ ਪੰਜਾਬੀ ਸਾਹਿੱਤ ਅਕਾਡਮੀ ਲੁਧਿਆਣਾ, ਸ: ਗੁਰਪ੍ਰੀਤ ਸਿੰਘ ਤੂਰ ਆਈ ਪੀ ਐੱਸ ,ਡੀ ਆਈ ਜੀ ਪੰਜਾਬ ਤੇ ਪ੍ਰੋ: ਗੁਰਭਜਨ ਗਿੱਲ ਸਾਬਕਾ ਪ੍ਰਧਾਨ ਪੰਜਾਬੀ ਸਾਹਿੱਤ ਅਕਾਡਮੀ ਲੁਧਿਆਣਾ ਹੋਣਗੇ। 
ਇਹ ਜਾਣਕਾਰੀ ਪੰਜਾਬੀ ਲੇਖਕ ਸਭਾ ਲੁਧਿਆਣਾ ਦੇ ਸੀਨੀਅਰ ਮੀਤ ਪ੍ਰਧਾਨ ਤ੍ਰੈਲੋਚਨ ਲੋਚੀ,ਜਨਰਲ ਸਕੱਤਰ ਮਨਜਿੰਦਰ ਧਨੋਆ ਤੇ ਪ੍ਰੈੱਸ ਸਕੱਤਰ ਕ੍ਰਿਪਾਲ ਸਿੰਘ ਚੌਹਾਨ ਨੇ ਦਿੱਤੀ। 
ਧਰਮ ਕਰਮ ਦੇ ਨਾਮ ਤੇ ਚੱਲ ਰਹੇ ਭਰਮ ਜਾਲ ਤੇ ਪਾਖੰਡੀ ਡੇਰਾਵਾਦ ਦੇ ਖ਼ਿਲਾਫ਼ ਲਿਖੀ ਇਹ ਪੁਸਤਕ ਪਹਿਲਾਂ ਅੰਗਰੇਜ਼ੀ ਚ ਛਪ ਕੇ ਚੰਗਾ ਨਾਮਣਾ ਖੱਟ ਚੁਕੀ ਹੈ। ਆਪ ਜੀ ਨੇ ਸਮਾਗਮ ਵਿੱਚ ਸਮੇਂ ਸਿਰ ਪੁੱਜਣ ਦੀ ਖੇਚਲ ਕਰਨਾ ਜੀ ਕਿਓਂਕਿ ਇਸ ਸਮਾਗਮ ਦਾ ਏਜੰਡਾ ਆਪਣੇ ਸਾਰਿਆਂ ਨਾਲ ਸਬੰਧਤ ਹੈ। ਆਪਣੇ ਸਭਨਾਂ ਦੇ ਸਰੋਕਾਰਾਂ ਨਾਲ ਸਬੰਧਤ ਹੈ। 

Sunday, June 12, 2016

ਦੁਖਤਰ ਦੇ ਬਹਾਨੇ ਇਕੱਤਰ ਹੋਏ ਪੰਜਾਬ ਦੇ ਦਰਦ ਨਾਲ ਤੜਪ ਰਹੇ ਲੋਕ

ਰਲੀਜ਼ ਕਰਨ ਦੀ ਰਸਮ ਨਿਭਾਈ ਡਾਕਟਰ ਸੁਰਜੀਤ ਪਾਤਰ ਨੇ
 ਲੁਧਿਆਣਾ: 11 ਜੂਨ 2016: (ਪੰਜਾਬ ਸਕਰੀਨ ਬਿਊਰੋ): 
ਕੁਝ ਲੋਕ ਅਜਿਹੇ ਨਿਕਲੇ-ਜਿਹੜੇ ਪੰਜਾਬ ਦਾ ਪਾਣੀ ਪੀ ਕੇ, ਇਸਦਾ ਅੰਨ ਖਾ ਕੇ, ਇਸਦੀ ਹਵਾ ਵਿੱਚੇ ਸਾਹ ਲੈ ਕੇ ਇਸ ਨਾਲ ਧ੍ਰੋਹ ਕਮਾਉਂਦੇ ਰਹੇ। ਪੰਜਾਬੀ ਹੋ ਕੇ ਵੀ ਪੰਜਾਬੀ ਹੋਣ ਤੋਂ ਮੁਨਕਰ ਹੁੰਦੇ ਰਹੇ। ਸਿਆਸੀ ਆਕਾਵਾਂ ਦੇ ਨਿਸ਼ਾਨੇ ਪੂਰੇ ਕਰਨ ਲਈ ਉਹਨਾਂ ਆਪਣੀ ਜ਼ਮੀਰ ਵੀ ਮਾਰ ਲਈ ਅਤੇ ਧਰਮ ਕਰਮ ਵੀ ਭੁਲਾ ਦਿੱਤਾ। ਕੁਝ ਲੋਕ ਅਜਿਹੇ ਨਿਕਲੇ-ਜਿਹੜੇ ਪੰਜਾਬ ਦੀ ਹੱਸਦੀ ਵੱਸਦੀ ਧਰਤੀ ਦੇ ਸਭਿਆਚਾਰ ਨੂੰ ਲਾਂਬੂ ਲਾਉਣ ਤੁਰ ਪਏ। ਜਦੋਂ ਸੁਆਲ ਉਹਨਾਂ ਦੇ ਖੁਦ ਦਾ ਆਇਆ ਤਾਂ ਪਤਾ ਲੱਗਿਆ-ਅੱਗ ਲਾ ਕੇ ਆਪ ਡੱਬੂ ਕੰਧ ਉੱਤੇ ਜਾ ਚੜ੍ਹਿਆ। ਪੰਜਾਬ ਲਹੂਲੁਹਾਨ ਹੁੰਦਾ ਰਿਹਾ। ਪੰਜਾਬ ਬਾਰ ਬਾਰ ਟੁਕੜੇ ਹੁੰਦਾ ਰਿਹਾ। ਪੰਜਾਬ ਬਾਰ ਬਾਰ ਜ਼ਿਆਦਤੀਆਂ ਦਾ ਸ਼ਿਕਾਰ ਹੁੰਦਾ ਰਿਹਾ 'ਤੇ ਵਪਾਰਕ ਸੋਚ ਵਾਲੇ ਆਪਣੇ ਮੁਨਾਫਿਆਂ ਦਾ ਹਿਸਾਬ ਕਿਤਾਬ ਲਾਉਂਦੇ ਰਹੇ। 
ਦੂਜੇ ਪਾਸੇ ਕੁਝ ਅਜਿਹੇ ਵੀ ਮੌਜੂਦ ਰਹੇ ਜਿਹੜੇ ਦੂਰ ਬੈਠ ਕੇ ਵੀ ਇਸ ਦਰਦ ਨੂੰ ਮਹਿਸੂਸ ਕਰਦੇ ਰਹੇ। ਇਹਨਾਂ ਜਾਗਦੀ ਜ਼ਮੀਰ ਵਾਲੇ ਕੁਝ ਪੰਜਾਬੀਆਂ ਵਿੱਚੋਂ ਕੁਝ ਇਕੱਤਰ ਹੋਏ ਲੁਧਿਆਣਾ ਦੇ ਸਰਾਭਾ ਨਗਰ ਦੀ ਮੇਨ ਮਾਰਕੀਟ ਵਿੱਚ ਸਥਿਤ ਹੋਟ  ਬ੍ਰੈਡ ਵਿਖੇ। ਥਾਂ ਥੋਹੜੀ ਸੀ ਪਰ ਜਿਹੜੇ ਜਿਹੜੇ ਵੀ ਪੁੱਜੇ ਹੋਏ ਸਨ ਉਹਨਾਂ ਦੇ ਦਿਲ ਵੱਡੇ ਸਨ। ਮੇਲ ਮੌਕਾ ਡਾਕਟਰ ਸੋਨੀਆ ਦੀ ਹਿੰਦੀ ਪੁਸਤਕ "ਦੁਖਤਰ"--ਅਰਥਾਤ ਬੇਟੀ---ਮਤਲਬ ਦੁੱਖਾਂ ਤੋਂ ਤਾਰਨ ਵਾਲੀ। ਇਹ ਇੱਕ ਉਰਦੂ ਸ਼ਬਦ ਹੈ ਅਤੇ ਦੱਸਦਾ ਹੈ ਕਿ ਡਾਕਟਰ ਸੋਨੀਆ ਨੂੰ ਹਿੰਦੀ ਪੰਜਾਬੀ ਦੇ ਨਾਲ ਉਰਦੂ ਵਿੱਚ ਮੁਹਾਰਤ ਹੈ। ਤੁਸੀਂ ਹੈਰਾਨ ਹੋ ਸਕਦੇ ਹੋ ਪਰ ਸ਼ਾਇਰੀ ਦੇ ਨਾਲ ਨਾਲ ਡਾਕਟਰ ਸੋਨੀਆ ਅਰਥ ਸ਼ਾਸਤਰ ਵਿੱਚ ਵੀ ਨਿਪੁੰਨ ਹੈ, ਐਂਕਰਿੰਗ ਵਿੱਚ ਵੀ ਅਤੇ ਕੱਥਕ ਨ੍ਰਿਤ ਵਿੱਚ ਵੀ। ਹੰਸੂ ਹੰਸੂ ਕਰਦੇ ਇਸ ਮੁਸਕਰਾਉਂਦੇ ਚੇਹਰੇ ਤੇ ਕਿਸੇ ਕਿਸੇ ਵੇਲੇ ਇੱਕ ਦਰਦ ਦੀ ਰੇਖਾ ਜਿਹੀ ਉਭਰਦੀ ਹੈ ਜਿਸ ਨਾਲ ਮਧੂਬਾਲਾ ਯਾਦ ਆ ਜਾਂਦੀ ਹੈ। ਇਹ ਦਰਦ ਪੰਜਾਬ ਦਾ ਦਰਦ ਹੈ। ਨਸ਼ਿਆਂ ਵਿੱਚ ਡੁੱਬੇ ਪੰਜਾਬ ਦਾ ਦਰਦ, ਰਾਂਗਲੇ ਪੰਜਾਬ ਦੇ ਗੁੰਮ ਹੋ ਜਾਣ ਦਾ ਦਰਦ, ਜਿਹੜਾ ਪੰਜਾਬ ਖੁਸ਼ਹਾਲੀ ਲਈ ਪ੍ਰਸਿਧ ਸੀ ਉਸ ਵਿੱਚ ਆਏ ਦਿਨ ਹੋ ਰਹੀਆਂ ਖੁਦਕੁਸ਼ੀਆਂ ਦਾ ਦਰਦ।  ਆਏ ਦਿਨ ਰੇਪ ਦੀਆਂ ਘਟਨਾਵਾਂ ਤੋਂ ਪਤਾ ਲੱਗਦੇ ਇਖਲਾਕੀ ਨਿਘਾਰ ਦਾ ਦਰਦ। ਇਹ ਦਰਦ ਡਾਕਟਰ ਸੋਨੀਆ ਨੂੰ ਫਿਰ ਪੰਜਾਬ ਲੈ ਆਇਆ। 
ਕਿਤਾਬ ਦੀ ਰਲੀਜ਼ਿੰਗ ਤਾਂ ਅਸਲ ਵਿੱਚ ਇੱਕ ਬਹਾਨਾ ਸੀ।  ਇਸ ਕਿਤਾਬ ਨੇ ਪੰਜਾਬ ਦੇ ਦਰਦ ਨਾਲ ਤੜਪ ਰਹੇ ਪੰਜਾਬੀਆਂ ਨੂੰ ਇੱਕ ਮੰਚ 'ਤੇ ਲੈ ਆਂਦਾ ਸੀ ਜਿਹੜੇ ਇੱਕ ਦੂਜੇ ਨੂੰ ਹੋਂਸਲਾ ਦੇਂਦੇ ਹੋਏ ਯਕੀਨ ਦੁਆ ਰਹੇ ਸਨ ਕਿ ਅਸੀਂ ਪੰਜਾਬ ਨੂੰ ਫਿਰ ਪਹਿਲਾਂ ਵਰਗਾ ਬਣਾ ਦਿਆਂਗੇ। 
ਕਿਤਾਬ ਰਲੀਜ਼ ਕੀਤੀ ਡਾਕਟਰ ਸੁਰਜੀਤ ਪਾਤਰ ਨੇ। ਇਸ ਵਿੱਚ ਆਮ ਆਦਮੀ ਪਾਰਟੀ ਦੀ ਰਾਜਿੰਦਰ ਪਾਲ ਕੌਰ ਵੀ ਸੀ। ਕਲਮੀ ਦੁਨੀਆ ਦੇ ਪੁਰਾਣੇ ਹਸਤਾਖਰ ਕਿਰਪਾਲ ਸਿੰਘ ਚੌਹਾਨ ਵੀ ਅਤੇ ਬਹੁਤ ਸਾਰੀਆਂ ਹੋਰ ਸ਼ਖਸੀਅਤਾਂ ਵੀ। ਕੁਲ ਮਿਲਾ ਕੇ ਕੁਝ ਓਹ ਲੋਕ ਆ ਮਿਲੇ ਜਿਹੜੇ ਪੰਜਾਬ ਨੂੰ ਬਦਲਣ ਲਈ ਦ੍ਰਿੜ ਸੰਕਲਪ ਹਨ। ਇਸ ਮਕਸਦ ਲਈ ਕਲਮ ਨੂੰ ਵੀ ਹਥਿਆਰ ਬਣਾਇਆ ਜਾਵੇਗਾ, ਰੰਗਮੰਚ ਨੂੰ ਵੀ ਅਤੇ ਫਿਲਮਸਾਜ਼ੀ ਨੂੰ ਵੀ। 

Thursday, February 26, 2015

ਗੁਰਬਾਣੀ ਦਾ ਕੀਰਤਨ ਹੀ ਬਣਿਆ ਮੇਰੇ ਲਈ ਸੰਗੀਤ ਦਾ ਪ੍ਰੇਰਣਾ ਸਰੋਤ- ਨਿਰਮਲ ਸਿੱਧੂ


ਉਘੇ ਗਾਇਕ ਨਿਰਮਲ ਸਿੱਧੂ ਨਾਲ ਡਾ. ਸੋਨੀਆ ਦੀ ਇੱਕ ਖਾਸ ਮੁਲਾਕਾਤ 
ਪਿਆਰੇ ਦੋਸਤੋ ਅੱਜ ਅਸੀ ਜਾਣਾਂਗੇ ਭੰਗੜੇ ਦੇ ਬਾਦਸ਼ਾਹ ਗਾਇਕ ਜਨਾਬ ਨਿਰਮਲ ਸਿੱਧੂ ਬਾਰੇ ਜੋ ਕਿ ਬੜੇ ਹੀ ਸੁਹਿਰਦ ਅਤੇ ਮਿਲਾਪੜੇ ਸੁਭਾਅ ਦੇ ਇਨਸਾਨ ਹਨ । ਉਹ ਮਾਲਵੇ ਦੇ ਪਿੰਡ ਟਹਿਣਾ  ਜ੍ਹਿਲਾ ਫ਼ਰੀਦਕੋਟ ਵਿਖੇ ਜੰਮੇ ਅਤੇ ਵੱਡੇ ਹੋਏ । ਨਿਰਮਲ ਸਿੱਧੂ ਇੱਕ ਮੱਧ ਵਰਗੀ ਪਰਿਵਾਰ ਦੇ ਪਿਛੋਕੜ ਵਾਲ ਕਲਾਕਾਰ ਹੈ ਜੋ ਪਰਿਵਾਰ ਨਾ ਤਾਂ ਉਸਦੀ ਗਾਇਕੀ ਨੂੰ ਲੈਕੇ ਖੁਸ਼ ਸੀ ਅਤੇ ਨਾ ਹੀ ਉਸਦੇ ਪਰਿਵਾਰ ਵਿੱਚ ਕੋਈ ਕਲਾਕਾਰ ਜਾਂ ਫ਼ਿਰ ਗਾਇਕ ਸੀ । ਉਹ ਬਹੁਪੱਖੀ ਕਲਾਕਾਰ ਹੈ  ਜਿਸ ਨੇ ਕਿ ਅਪਣੇ ਸੰਗੀਤਕ ਸਫ਼ਰ ਦੌਰਾਨ ਅਨੇਕਾਂ ਹੀ ਗੀਤ ਸੁਰ ਬੱਧ ਕੀਤੇ ,ਪੰਜਾਬੀ ਫਿਲਮਾਂ , ਵੀਡੀਓ ਗੀਤ ਅਤੇ ਟੀ ਵੀ ਸੀਰੀਅਲਸ ਨੂੰ ਆਪਣੇ ਸੰਗੀਤ ਨਾਲ ਸਜਾਇਆ ਹੈ । ਉਹ ਹਰ ਦਿਨ ਰਿਆਜ਼ ਕਰਦਾ ਹੈ ਅਤੇ ਇਸ ਤੋਂ ਬਿਨਾਂ ਖੁਦ ਨੂੰ ਅਧੂਰਾ ਸਮਝਦਾ ਹੈ । ਉਸ ਨੇ ਬਹੁਤ ਸਾਰੀਆਂ ਮਿਊਜ਼ਿਕ ਐਲਬਮ ਨੂੰ ਸੰਗੀਤ ਦਿੱਤਾ ਹੈ । ਜ੍ਹਿਨਾਂ ਵਿਚੋਂ ਇਕ "ਤੇਰੇ ਦਰਸ਼ਨ ਕਰਕੇ" ਮੇਰੀ ਬਹੁਤ ਹੀ ਮਨਪਸੰਦ ਹੈ ।
ਜਨਾਬ ਨਿਰਮਲ ਸਿੱਧੂ ਜੀ ਇੱਕ ਚੰਗੇ ਸਮਾਜ ਸੇਵੀ ਵੀ ਨੇ ਉਹ ਅਪਣੇ ਪਿਤਾ ਜੀ ਦੀ ਬਰਸੀ 21 ਫ਼ਰਵਰੀ ਨੂੰ ਗਰੀਬ ਲੜਕੀਆਂ ਦੇ ਵਿਆਹ ਕਰਵਾਉਂਦੇ ਹਨ ਜ੍ਹਿਨਾਂ ਉੱਤੇ ਆਇਆ ਸਾਰਾ ਖ਼ਰਚ ਉਹ ਖ਼ੁਦ ਕਰਦੇ ਹਨ।
ਹੁਣ ਕੁਝ ਮੇਰੇ ਸਵਾਲ ਅਤੇ ਨਿਰਮਲ ਸਿੱਧੂ ਜੀ ਦੇ ਜਵਾਬ ਪਾਠਕਾਂ ਸਾਹਮਣੇ ਕਰਦੀ ਹਾਂ -
-ਤੁਹਾਨੂੰ ਗਾਉਣ ਦੀ ਚੇਟਕ ਕਿਵੇਂ ਅਤੇ ਕਿੱਥੋਂ ਲੱਗੀ ?
ਮੈ ਨੇੜੇ ਦੇ ਗੁਰਦੁਆਰਾ ਸਾਹਿਬ ਵਿਖੇ ਰੋਜ਼ਾਨਾ ਕੀਰਤਨ ਅਤੇ ਗੁਰਬਾਣੀ ਸੁਣਦਾ ਰਹਿੰਦਾ ਸੀ ਅਤੇ ਇਹੀ ਮੇਰਾ ਪ੍ਰੇਰਨਾ ਸ੍ਰੋਤ ਹੈ ।
ਤੁਸੀ ਸੰਗੀਤ ਸਿੱਖਣਾ ਕਦੋਂ ਸੁਰੂ ਕੀਤਾ ?
ਮੈਂ 12 ਸਾਲ ਦੀ ਉਮਰ ਵਿੱਚ ਸੰਗੀਤ ਸਿੱਖਣਾ ਸੁਰੂ ਕੀਤਾ ਅਤੇ ਮਾਸਟਰ ਨਗਿੰਦਰ ਸਿੰਘ ਜੀ ਹੋਰਾਂ ਕੋਲੋ ਸੰਗੀਤ ਸਿੱਖਿਆ ਹਾਸਿਲ ਕੀਤੀ । ਉਸ ਤੋਂ ਬਾਅਦ ਮੈਂ ਐਮ ਏ ਮਿਊਜ਼ਿਕ ਕੀਤੀ ।
ਤੁਹਾਡਾ ਪਹਿਲਾ ਗੀਤ ਕਿਹੜਾ ਸੀ ?
ਮੇਰਾ ਗੀਤ "ਦਿਲ ਦਾ ਖਿਡੌਣਾ" 1987 ਵਿੱਚ ਰੀਲੀਜ਼ ਹੋਇਆ ਸੀ ਜੋ ਕਿ ਇੱਕ ਉਦਾਸ ਗੀਤ ਸੀ ਅਤੇ ਇਹ ਗੀਤ ਬਹੁਤ ਹੀ ਮਕਬੂਲ ਹੋਇਆ । ਇਹ ਗੀਤ ਮੇਰੀ ਪਛਾਣ ਬਣਿਆ ।
ਤੁਸੀ ਹੋਰ ਗਾਇਕਾਂ ਨੂੰ ਅੱਗੇ ਆਉਣ ਵਿੱਚ ਕਿਵੇਂ ਪ੍ਰੇਰਦੇ ਹੋ ?
ਮੈਂ ਹਮੇਸ਼ਾ ਹੀ ਹੋਰਾਂ ਗਾਇਕਾਂ ਦੀ ਮਦਦ ਕੀਤੀ ਹੈ । ਮੈਂ 1992 ਵਿੱਚ ਮਾਸਟਰ ਸਲੀਮ ਦੀ ਐਲਬਮ "ਚਰਖ਼ੇ ਦੀ ਘੂਕ" ਨੂੰ ਆਪਣਾ ਸੰਗੀਤ ਦੇਕੇ ਰੀਲੀਜ਼ ਕੀਤਾ।
ਕੀ ਤੁਸੀ ਆ ਰਹੇ ਨਵੇ ਗਾਇਕਾਂ ਨੂੰ ਕੋਈ ਸਲਾਹ ਦੇਣੀ ਚਾਹੋਗੇ ?
ਇੱਕ ਵਧੀਆ ਗਾਇਕ ਬਣਨ ਵਾਸਤੇ ਸੰਗੀਤ ਦੀ ਸਿੱਖਿਆ ਲੈਣੀ ਬੜੀ ਜਰੂਰੀ ਹੈ । ਅਤੇ ਲਿਖਤ ਦਾ ਜਰੂਰ ਖਿਆਲ ਰਖਣਾ ਚਾਹੀਦਾ ਹੈ ਕਿ ਉਸ ਵਿੱਚ ਨਸ਼ੇ, ਰੇਪ ਅਤੇ ਦੌਹਰੇ ਮਤਲਬ ਵਾਲੇ ਖਿਆਲਾਂ ਨੂੰ ਉਤਸ਼ਾਹਿਤ ਨਾ ਕੀਤਾ ਜਾਵੇ । ਇਹ ਪੰਜਾਬੀ ਸੰਗੀਤ ਜਗਤ ਲਈ ਹਾਨੀਕਾਰਕ ਗੱਲਾਂ ਨੇ ।
ਤੁਸੀ ਆਪਣੇ ਸੰਗੀਤਕ ਸਫ਼ਰ ਵਿੱਚ ਬਹੁਤ ਸਾਰੇ ਐਵਾਰਡ ਵੀ ਜਿੱਤੇ ਹਨ ਕੁਝ ਕੁ  ਵੀ ਦੱਸੋ?
ਹਾਂ ਜੀ , ਪਰ ਮੇਰੇ ਲਈ ਇਹ ਮਹੱਤਵਪੂਰਨ ਨਹੀ। ਮੇਰੇ ਸਰੋਤਿਆਂ ਦਾ ਮੇਰੇ ਲਈ ਹਾਂਪੱਖੀ ਨਜ਼ਰੀਆ ਹੀ ਮੇਰਾ  ਅਸਲ ਐਵਾਰਡ ਹੈ ।
ਤੁਸੀ ਕੋਈ ਹਿੰਦੀ ਗੀਤ ਵੀ ਗਾਇਆ ਹੈ?
ਹਾਂ ਜੀ , ਮੈ ਸੰਨ 2000 ਵਿੱਚ Ḕਸ਼ੀਸ਼ੇ ਕਾ ਦਿਲ ਗਾਇਆ ਅਤੇ ਹੁਣ ਹੋਰ ਵੀ ਹਿੰਦੀ ਗੀਤ ਆਉਣ ਵਾਲੇ ਸਮੇ ਵਿੱਚ ਤੁਹਾਨੂੰ ਸੁਣਨ ਨੂੰ ਮਿਲਣਗੇ ।
ਤੁਹਾਡੇ ਸੰਗੀਤਕ ਸਫ਼ਰ ਵਿੱਚ ਤੁਹਾਡੇ ਲਈ ਸਭ ਤੋਂ ਮਾਣ ਵਾਲੀ ਗੱਲ ਕੀ ਹੈ ?
ਬਹੁਤ ਕੁਝ ਹੈ ਮਾਣ ਮਹਿਸੂਸ ਕਰਨ ਵਾਲਾ ਜਿਵੇ ਕਿ ਮੇਰਾ ਯੂਕੇ ਵਿੱਚ ਹਿੱਟ ਹੋਣ ਵਾਲਾ ਪਹਿਲਾ ਗੀਤ "ਜਿੱਥੇ ਜਾਣ ਪੰਜਾਬੀ" ਇਸ ਗੀਤ ਨਾਲ ਯੂਕੇ ਵਿੱਚ ਮੇਰੇ ਪ੍ਰਸੰਸਕਾਂ ਦੀ ਗਿਣਤੀ ਬਹੁਤ ਵੱਧ ਗਈ। ਜਿਸ ਕਰਕੇ ਮੈਂ ਸਾਲ ਵਿੱਚ 6 ਮਹੀਨੇ ਯੂਕੇ ਸਿਰਫ਼ ਸੋਅਜ਼ ਲਈ ਬਤੀਤ ਕਰਦਾ ਹਾਂ ।ਮੈ ਆਪਣੇ ਆਪ ਨੂੰ ਬੜਾ ਖੁਸ਼ਕਿਸਮਤ ਸਮਝਦਾ ਹਾਂ  ਕਿ ਬਹੁਤ ਸਾਰੇ ਪ੍ਰਸਿੱਧ ਗਾਇਕਾ ਨਾਲ ਕੰਮ ਕੀਤਾ ਹੈ ਜਿਵੇਂ ਕਿ ਜਨਾਬ ਯਮਲਾ ਜੱਟ ਜੀ ਅਤੇ ਬਹੁਤ ਸਾਰੇ ਗਾਇਕਾ ਨੂੰ ਮਾਰਕੀਟ ਵਿੱਚ ਵੀ ਲਿਆਂਦਾ ਹੈ ਜੋ ਅੱਗੇ ਜਾਕੇ ਬਹੁਤ ਪ੍ਰਸਿੱਧ ਵੀ ਹੋਏ । ਮੈਂ ਆਪਣੇ ਸੰਗੀਤਕ ਸਫ਼ਰ ਵਿੱਣ ਲਗਭਗ 3000 ਗੀਤ ਕੰਮਪੋਜ਼ ਵੀ ਕੀਤੇ ਹਨ ।
ਤੁਹਾਡਾ ਪਾਲੀਵੁੱਡ ਅਤੇ ਬਾਲੀਵੁੱਡ ਵਿੱਚ ਕੰਮ ਕਰਨ ਬਾਰੇ ਕੀ ਵਿਚਾਰ ਹੈ ?
ਹਾਂ ਜੀ ,ਮੈਂ ਇੱਕ ਪਾਲੀਵੁੱਡ ਫ਼ਿਲਮ "ਯੋਧਾ" ਵਾਸਤੇ ਇੱਕ ਗੀਤ ਲਿਖਿਆ ਤੇ ਗਾਇਆ ਹੈ ਅਤੇ ਬੌਲੀਵੁੱਡ ਲਈ ਬਹੁਤ ਸਾਰਾ ਹੋਰ ਕੰਮ ਵੀ ਵਿਚਾਰ ਅਧੀਨ ਹੈ । ਉਮੀਦ ਹੈ ਤੁਸੀ ਜਲਦ ਹੀ ਸੁਣੋਗੇ।
ਤੁਹਾਡੇ ਆਉਣ ਵਾਲੇ ਪ੍ਰੋਜੈਕਟ ਕੀ ਹਨ ?
ਆਉਣ ਵਾਲੇ ਸਮੇ ਵਿੱਚ ਸਰੋਤਿਆਂ ਲਈ ਕਾਫ਼ੀ ਕੁਝ ਨਵਾਂ ਲੈਕੇ ਆ ਰਹੇ ਹਾਂ ਜਿਵੇਂ ਕਿ ਇੱਕ ਸੂਫੀ ਗੀਤ ਜੋ ਕਿ ਅਸੀਂ ਅਪ੍ਰੈਲ ਵਿੱਚ ਰੀਲੀਜ਼ ਕਰ ਰਹੇ ਹਾਂ ਅਤੇ ਇੱਕ ਵਿਆਹ ਵਾਲੇ ਗੀਤ ਦੇ ਨਾਲ ਇਕ ਹੋਰ ਗੀਤ Ḕਹੈਂਡਸ ਅੱਪḔ ਜਿਸ ਨੂੰ ਯੂਕੇ ਵਿੱਚ ਰਿਲੀਜ਼ ਕਰ ਰਹੇ ਹਾਂ ।
ਕੋਈ ਹੋਰ ਭਵਿੱਖ ਵਿੱਚ ਜੋ ਤੁਹਾਡੇ ਵਿਚਾਰ ਅਧੀਨ ਹੋਵੇ?
ਆਪਣੇ ਸਰੋਤਿਆਂ ਲਈ ਸੰਗੀਤ ਬਣਾਉਣ ਤੋਂ ਇਲਾਵਾ ਮੈਂ ਗਲੋਬਲ ਵਾਰਮਿੰਗ ਅਤੇ ਜਲਵਾਯੂ ਪਰਿਵਰਤਨ ਵਿੱਚ ਕੁਝ ਚੰਗਾ ਕਰਨ ਦੀ ਯਜਿਨਾ ਬਣਾ ਰਿਹਾ ਹਾਂ। ਇੱਕ ਪੰਜਾਬੀ ਹੋਣ ਦੇ ਨਾਂ ਤੇ ਮੈਂ ਪੰਜਾਬ ਦੇ ਲੋਕਾਂ ਵਿੱਚ  ਘੱ&ਛ੍ਹ   ਬਾਰੇ ਜਾਗਰੂਕਤਾ ਲੈਕੇ ਆਉਣੀ ਚਾਹੁੰਦਾ ਹਾਂ।
ਇਸ ਗੱਲ ਬਾਤ ਤੋਂ ਬਾਅਦ ਮੈਂ ਮਹਿਸੂਸ ਕਰ ਰਹੀ ਹਾਂ ਕਿ ਨਿਰਮਲ ਸਿੱਧੂ ਇੱਕ ਵੱਡੇ ਦਿਲ ਵਾਲਾ ਇਨਸਾਨ ਹੈ ਜੋਕਿ ਮਨੁੱਖਤਾ ਅਤੇ ਵਾਤਾਵਰਨ ਦੀ ਪਰਵਾਹ ਕਰਕੇ  ਕੁਝ ਚੰਗੇ ਕਾਰਜ ਆਰੰਭ ਕਰ ਰਿਹਾ ਹੈ । ਇਸ ਤਰਾਂ ਦੇ ਕਲਾਕਾਰ ਆਦਰਸ਼ ਹੁੰਦੇ ਹਨ ਆਪਣੇ ਪ੍ਰਸ਼ੰਸ਼ਕਾਂ ਲਈ ਕਿਉਂਕਿ ਸਮੱਸਿਆ ਬਾਰੇ ਜਾਗਰੂਕ ਕਰਨਾ ਬਹੁਤ ਹੀ ਮਹੱਤਵਪੂਰਨ ਹੈ । ਮੈਂ ਉਸ ਦੇ ਇਸ ਜ਼ਜ਼ਬੇ ਨੂੰ ਸਲਾਮ ਕਰਦੀ ਹਾਂ ਕਿ ਉਹ ਆਪਣੇ ਖੇਤਰ ਤੋਂ ਬਾਹਰਲੇ ਮੁੱਦਿਆਂ ਬਾਰੇ ਵੀ ਐਨਾ ਜਾਗਰੂਕ ਹੈ । ਦੁਨੀਆਂ ਨੂੰ ਨਿਰਮਲ ਸਿੱਧੂ ਵਰਗੇ ਇਨਸਾਨਾ ਦੀ ਬਹੁਤ ਲੋੜ ਹੈ ।
ਆਖ਼ਿਰ ਵਿੱਚ ਮੈਂ ਨਿਰਮਲ ਸਿੱਧੂ ਜੀ ਦਾ ਬਹੁਤ ਬਹੁਤ ਧੰਨਵਾਦ ਕਰਦੀ ਹਾਂ ਅਤੇ ਮੇਰੀ ਦੁਆ ਕਿ ਰੱਬ ਓਹਨਾਂ ਸਦਾ ਤਰੱਕੀਆਂ ਬਖ਼ਸ਼ਦਾ ਰਹੇ ।