ਜਪੁ ਪ੍ਰਯੋਗਾਂ ਵਿੱਚ ਸ਼ਾਮਲ ਹੋ ਕੇ ਜ਼ਿੰਦਗੀ ਵੀ ਬਦਲ ਜਾਂਦੀ ਹੈ ਅਤੇ ਕਿਸਮਤ ਵੀ

25th September 2021 at 4:50 PM

ਗੱਲ ਸਿਰਫ ਕਹਿਣ ਸੁਣਨ ਦੀ ਨਹੀਂ ਹਕੀਕਤ ਦੀ ਹੈ-ਬੇਸ਼ਕ ਕਰ ਕੇ ਦੇਖ ਲਓ 

ਸਾਲਾਨਾ ਜਪ-ਪ੍ਰਯੋਗ ਦੇ ਮਹਾਕੁੰਭ ਦੀ ਇੱਕ ਰਿਪੋਰਟ ਰਾਜਪਾਲ ਕੌਰ ਵੱਲੋਂ 

ਸ੍ਰੀ ਠਾਕੁਰ ਦਲੀਪ ਸਿੰਘ ਜੀ ਦੇ ਅੰਮ੍ਰਿਤਮਈ ਬਚਨਾਂ ਦਾ ਚਲ ਰਿਹਾ ਪ੍ਰਵਾਹ  

ਜੀਵਨ ਨਗਰ (ਸਿਰਸਾ)//ਜਲੰਧਰ: 25 ਸਤੰਬਰ 2021:(ਰਾਜਪਾਲ ਕੌਰ//ਕਾਰਤਿਕਾ ਸਿੰਘ//ਪੰਜਾਬ ਸਕਰੀਨ ਡੈਸਕ)::

ਸਾਡੇ ਸਮਾਜ ਵਿੱਚ ਉਮਰ ਉਸ ਦਿਨ ਤੋਂ ਗਿਣੀ ਜਾਂਦੀ ਹੈ ਜਦੋਂ ਬੱਚ ਇਸ ਸੰਸਾਰ ਵਿੱਚ ਆਉਂਦਾ ਹੈ। ਜਪਾਨ ਵਰਗੇ ਵਿਕਸਿਤ ਦੇਸ਼ ਅਜੇ ਵੀ ਉਮਰ ਦੀ ਗਿਣਤੀ ਦੇ ਉਸ ਪੁਰਾਣੇ ਸਿਸਟਮ ਨੂੰ ਪਹਿਲ ਦੇਂਦੇ ਹਨ ਜਿਸ ਵਿੱਚ ਉਮਰ ਦੇ ਨਾਲ ਗਰਭਕਾਲ ਵਾਲੇ 9/10 ਮਹੀਨੇ ਸ਼ਾਮਲ ਕੀਤੇ ਜਾਂਦੇ ਹਨ। ਇਸ ਤਰ੍ਹਾਂ ਉਸ ਸਮੇਂ ਨੂੰ ਵੀ ਉਮਰ ਵਿੱਚ ਸ਼ਾਮਲ ਕੀਤਾ ਜਾਂਦਾ ਹੈ ਜਿਹੜਾ ਸਮਾਂ ਦੁਨੀਆ ਸਾਹਮਣੇ ਨਹੀਂ ਆਇਆ ਹੁੰਦਾ। ਸੰਸਾਰ ਦੇ ਕਈ ਕਬੀਲਿਆਂ, ਕੌਮੀਅਤਾਂ ਅਤੇ ਹੋਰ ਵਰਗਾਂ ਵਿਚ ਇਸਦਾ ਵੀ ਪਤਾ ਲਗਾਇਆ ਜਾਂਦਾ ਹੈ ਕਿ ਗਰਭ ਵਿੱਚ ਆਤਮਾ ਕਿਹੜੀ ਆਈ ਹੈ? ਤਿੱਬਤੀ ਮੈਡੀਸਿਨ ਸਿਸਟਮ ਵਾਲਿਆਂ ਕੋਈ ਨਬਜ਼ ਨਾਲ ਬਿਮਾਰੀ ਲੱਭਣ ਦਾ ਵਬਹੁਤ ਹੀ ਸਫਲ ਤਰੀਕਾ ਹੈ। ਉਹ ਕੁਝ ਮਿੰਟ ਨਬਜ਼ ਚੈਕ ਕਰਕੇ ਉਹ ਸਭ ਕੁਝ ਦੱਸ ਦੇਂਦੇ ਹਨ ਜਿਹੜਾ ਇਥੋਂ ਦੇ ਹਸਪਤਾਲਾਂ ਵਾਲੇ ਬਾਰ ਬਾਰ ਐਕਸਰੇ ਅਤੇ ਹੋਰ ਬਥੇਰੇ ਟੈਸਟ ਕਰ ਕੇ ਵੀ ਨਹੀਂ ਲੱਭ ਸਕਦੇ। ਇਸਦੇ ਮੁਤਾਬਿਕ ਹੀ ਉਹ ਹਰਬਲ ਦਵਾਈਆਂ ਵਾਲਾ ਇਲਾਜ ਵੀ ਕਰਦੇ ਹਨ। ਇਸ ਦੇ ਨਾਲ ਨਾਲ ਉਹਨਾਂ ਦਾ ਇੱਕ ਸੈਕਸ਼ਨ ਜੋਤਿਸ਼ ਵਿਗਿਆਨ ਨਾਲ ਸਬੰਧਤ ਵੀ ਹੈ। ਕੈਂਸਰ ਵਰਗੀ ਕੋਈ ਬਹੁਤੀ ਹੀ ਗੰਭੀਰ ਬਿਮਾਰੀ ਹੋਵੇ ਤਾਂ ਉਹ ਜਨਮ ਤਾਰੀਖ ਅਤੇ ਸਹੀ ਸਮਾਂ ਵੀ ਪੁੱਛਦੇ ਹਨ। ਫਿਰ ਦੱਸ ਦੇਂਦੇ ਹਨ ਕਿ ਇਸਦਾ ਇਲਾਜ ਸਫਲ ਹੋਵੇਗਾ ਕਿ ਨਹੀਂ? ਉਹਨਾਂ ਕੋਲ ਵੀ ਪਿਛਲੇ ਜਨਮਾਂ ਵਿੱਚ ਜਾ ਕੇ ਕਾਫੀ ਕੁਝ ਲੱਭਣ ਵਾਲਾ ਸਿਸਟਮ ਮੌਜੂਦ ਹੈ। ਮੈਡੀਟੇਸ਼ਨ ਵਿੱਚ ਉਹ ਬਹੁਤ ਕੁਝ ਲਭਦੇ ਹਨ। ਉਹਨਾਂ ਦੇ ਮੰਦਰਾਂ ਵਿਚ ਜਾ ਕੇ ਦੇਖੀਏ ਤਾਂ ਉਥੇ ਬੈਠੇ ਮੈਡੀਟੇਸ਼ਨ ਕਰਦੇ ਸਾਧਕਾਂ ਦੇ ਚਿਹਰਿਆਂ ਤੇ ਬੜਾ ਨੂਰ ਅਤੇ ਸ਼ਾਂਤੀ ਨਜ਼ਰ ਆਏਗੀ। ਓਸ਼ੋ ਨੇ ਤਾਂ ਅਜਿਹੇ ਬਹੁਤ ਸਾਰੇ ਸਫਲ ਤਜਰਬੇ ਕਰਕੇ ਦੁਨੀਆ ਸਾਹਮਣੇ ਮਿਸਾਲ ਵੀ ਕਾਇਮ ਕੀਤੀ।

ਨਵਰਾਤਰੇ ਵੀ ਆਉਣ ਵਾਲੇ ਹਨ। ਵਰਤ ਦਾ ਵਿਗਿਆਨ ਵੀ ਵਿਗਿਆਨ ਦੀ ਝਲਕ ਦੇਂਦਾ ਹੈ। ਰੋਜ਼ਿਆਂ ਦਾ ਹਿਸਾਬ ਕਿਤਾਬ ਵੀ ਬੜਾ ਵਿਗਿਆਨਕ ਹੀ ਹੈ। ਕਿਹਾ ਜਾਂਦਾ ਹੈ ਜੇ ਕਰ 40 ਦਿਨਾਂ ਤੱਕ ਸਰੀਰ ਨੂੰ ਵਿਸ਼ੇਸ਼ ਅਵਸਥਾ ਵਿਚ ਸਾਧ ਲਿਆ ਜਾਵੇ ਤਾਂ ਸਰੀਰ ਵੀ ਉਸੇ ਤਰ੍ਹਾਂ ਬਣ ਜਾਂਦਾ ਹੈ ਅਤੇ ਮਨ ਵੀ। ਇਸ ਨਾਲ ਆਤਮਾ ਅਤੇ ਪ੍ਰਮਾਤਮਾ ਦਾ ਜਿਊਂਦੇ ਜੀਅ ਮਿਲਣਾ ਸੰਭਵ ਵੀ ਹੋ ਜਾਂਦਾ ਹੈ ਅਤੇ ਆਸਾਨ ਵੀ। 

ਜਪੁ ਪ੍ਰਯੋਗਾਂ ਵਿਚਲਾ ਵਿਗਿਆਨ ਵੀ ਬੜਾ ਕਾਰਗਰ ਹੈ। ਫਾਇਦਾ ਉਸੇ ਨੂੰ ਮਿਲਦਾ ਹੈ ਜਿਸਨੇ ਸੱਚੇ ਦਿਲੋਂ ਸੱਚੀ ਸਾਧਨਾ ਕੀਤੀ ਹੈ। ਜਿਸ ਨੇ ਬੱਧਗਿਰੀ ਸਮਾਂ ਕੱਟਿਆ ਉਸਨੂੰ ਸ਼ਾਇਦ ਫਲ ਘੱਟ ਮਿਲੇ ਪਰ ਮਿਲਦਾ ਜ਼ਰੂਰ ਹੈ। ਜਾਪੁ ਪ੍ਰਯੋਗ ਮਨ ਅਤੇ ਤਨ ਦੋਹਾਂ ਨੂੰ ਸਾਧ ਕੇ ਤੁਹਾਨੂੰ ਆਤਮਾਂ ਦੀ ਝਲਕ ਦਿਖਾਉਂਦੇ ਹਨ। ਫਿਰ ਆਤਮਾ ਪ੍ਰਮਾਤਮਾ ਵਾਲੇ ਪਾਸੇ ਤੁਰਦੀ ਹੈ। ਤੁਹਾਨੂੰ ਨਜ਼ਰ ਆਉਣਾ ਲੱਗਦਾ ਹੈ ਇਹ ਪੈਸੇ ਦੀ ਦੌੜ ਤਾਂ ਹਜ਼ਾਰਾਂ ਵਾਰ ਦੇਖ ਲਈ। ਇਹ ਇਥੇ ਹੀ ਰਹਿ ਜਾਂਦਾ ਹੈ। ਇਹ ਮਕਾਨ ਇਹ ਦੁਕਾਨ ਬੜੀ ਵਾਰ ਬਣਾਏ ਪਰ ਇਥੇ ਹੀ ਰਹਿ ਗਏ। ਹੁਣ ਹੋਰ ਜਨਮਾਂ ਤੋਂ ਮੁਕਤ ਹੋ ਕੇ ਸਿਰਫ ਰੱਬ  ਦੇ ਚਰਨਾਂ ਵਿਚ ਉਸਦੀ ਹਜ਼ੂਰੀ ਬੈਠਣਾ ਹੈ। ਹੁਣ ਉੱਥੇ ਜਾਣਾ ਹੈ ਜਿੱਥੇ ਭੁੱਖ ਨਹੀਂ ਲੱਗਦੀ। ਜਿੱਥੇ ਦੁੱਖ ਨਹੀਂ ਲੱਗਦੇ। ਜਿੱਥੇ ਵਿਛੋੜੇ ਨਹੀਂ ਪੈਂਦੇ। ਜਿੱਥੇ ਬੁਢਾਪਾ ਨਹੀਂ ਆਉਂਦਾ। ਜਿੱਥੇ ਮੌਤ ਵੀ ਨਹੀਂ ਆਉਂਦੀ। ਜਿੱਥੇ ਗਮ ਨਹੀਂ ਹੁੰਦੇ। ਬੇਗਮਪੁਰਾ ਪਹੁੰਚਣਾ ਹੈ ਬਸ। ਉਸਦੀ ਝਲਕ ਮਿਲਦੀਆਂ ਹੀ ਉਸਦੀ ਪਿਆਸ ਲੱਗਣੀ ਸ਼ੁਰੂ ਹੁੰਦੀ ਹੈ ਅਤੇ ਨਾਮ ਰਸ ਉਸ ਪਿਆਸ ਨੂੰ ਬੁਝਾਉਂਦਾ ਚਲਾ ਜਾਂਦਾ ਹੈ ,ਫਰ ਚਿਹਰਿਆਂ ਤੋਂ ਮੱਕਾਰੀ ਅਤੇ ਚਲਾਕੀ ਉੱਡ ਜਾਂਦੀ ਹੈ। ਮਨ ਵਿੱਚੋਂ ਵੀ ਸ਼ੈਤਾਨ ਚਲੀ ਜਾਂਦੀ ਹੈ। ਚਿਹਰੇ ਤੇ ਨਾਮ ਜਪਣ ਦੀ ਲਾਲੀ ਦਿਖਾਈ ਦੇਣ ਲੱਗਦੀ ਹੈ। ਉਸ ਪਰਮਪਿਤਾ ਦੀ ਗੋਦ ਦਾ ਅਹਿਸਾਸ ਹੋਣ ਲੱਗਦਾ ਹੈ।  ਬਾਣੀ ਸਮਝ ਆਉਣ ਲੱਗਦੀ ਹੈ। ਬਾਣੀ ਨਾਲ ਲਿਵ ਜੁੜਨ ਲੱਗਦੀ ਹੈ। 

ਸੁਣਿਐ ਸਿਧ ਪੀਰ ਸੁਰਿ ਨਾਥ॥ 

ਸੁਣਿਐ ਧਰਤਿ ਧਵਲ ਆਕਾਸ॥ 

ਸੁਣਿਐ ਦੀਪ ਲੋਅ ਪਾਤਾਲ॥ 

ਸੁਣਿਐ ਪੋਹਿ ਨ ਸਕੈ ਕਾਲੁ॥ 

ਨਾਨਕ ਭਗਤਾ ਸਦਾ ਵਿਗਾਸੁ॥ 

ਸੁਣਿਐ ਦੂਖ ਪਾਪ ਕਾ ਨਾਸੁ॥8॥

ਗੁਰਬਾਣੀ ਅਨੁਸਾਰ ਨਾਮ-ਬਾਣੀ ਦੇ ਮਹਾਤਮ ਨੂੰ ਮੁੱਖ ਰੱਖਦੇ ਹੋਏ ਨਾਮਧਾਰੀ ਸੰਪਰਦਾ ਦੇ ਸਤਿਗੁਰੂ ਰਾਮ ਸਿੰਘ ਜੀ ਨੇ ਸਿੱਖਾਂ ਨੂੰ ਨਾਮ ਬਾਣੀ ਨਾਲ ਜੋੜ ਕੇ ਮਨੁੱਖ ਤੋਂ ਦੇਵਤੇ ਬਣਾਇਆ। ਜਿਵੇਂ ਕਿ ਗੁਰਬਾਣੀ ਵਿਚ ਲਿਖਿਆ ਹੈ: ਬਲਿਹਾਰੀ ਗੁਰ ਆਪਣੇ ਦਿਉਹਾੜੀ ਸਦ ਵਾਰ।। ਜਿਨਿ ਮਾਣਸ ਤੇ ਦੇਵਤੇ ਕੀਏ ਕਰਤ ਨ ਲਾਗੀ ਵਾਰ।। 

ਸਤਿਗੁਰੂ ਰਾਮ ਸਿੰਘ ਜੀ ਦੁਆਰਾ ਦਿੱਤੇ ਦਿਸ਼ਾ ਨਿਰਦੇਸ਼ਾਂ ਅਨੁਸਾਰ, ਸ੍ਰੀ ਸਤਿਗੁਰੂ ਪ੍ਰਤਾਪ ਸਿੰਘ ਜੀ ਨੇ 40 ਦਿਨਾਂ ਦੇ ਜਪ-ਪ੍ਰਯੋਗ ਦੀ ਅਰੰਭਤਾ ਕੀਤੀ ਜੋ ਕਿ ਸਤਿਗੁਰੂ ਜਗਜੀਤ ਸਿੰਘ ਜੀ ਦੀ ਕਿਰਪਾ ਨਾਲ ਸਾਲ-ਸਾਲ  ਭਰ ਵੀ ਚਲਦਾ ਰਿਹਾ। ਗੁਰੂ ਸਾਹਿਬਾਨਾਂ ਦੇ ਦਰਸ਼ਾਏ ਮਾਰਗ ਤੇ ਚਲਦੇ ਹੋਏ, ਵਰਤਮਾਨ ਨਾਮਧਾਰੀ ਮੁਖੀ ਸ੍ਰੀ ਸਤਿਗੁਰੂ ਦਲੀਪ ਸਿੰਘ ਜੀ ਦੀ ਕਿਰਪਾ-ਬਖਸ਼ਿਸ਼ ਸਦਕਾ ਸ੍ਰੀ ਜੀਵਨ ਨਗਰ (ਹਰਿਆਣਾ) ਵਿਖੇ 40 ਦਿਨਾਂ ਦਾ ਜਪ-ਪ੍ਰਯੋਗ ਨਿਰੰਤਰ ਚੱਲ ਰਿਹਾ ਹੈ। ਇਹ ਜਪ-ਪ੍ਰਯੋਗ ਵਾਤਾਵਰਨ ਵਿਚ ਸਵਰਗ ਜਿਹਾ ਮਾਹੌਲ ਪ੍ਰਦਾਨ ਕਰ, ਕਲਿਜੁਗ ਦੇ ਇਸ ਦੌਰ ਵਿਚ ਇੱਕ ਵਿਲੱਖਣ ਮਿਸਾਲ ਕਾਇਮ ਕਰਦਾ ਪ੍ਰਤੀਤ ਹੋ ਰਿਹਾ ਹੈ। 

                                  ਇਹ 5 ਸਤੰਬਰ ਤੋਂ ਸ਼ੁਰੂ ਹੋਇਆ ਹੈ ਅਤੇ 15 ਅਕਤੂਬਰ ਤਕ ਲਗਾਤਾਰ ਚੱਲੇਗਾ। ਇਸ ਦੌਰਾਨ ਰੋਜ਼ਾਨਾ ਅੰਮ੍ਰਿਤ ਵੇਲੇ ਤੋਂ ਲੈ ਕੇ ਨਾਮ ਸਿਮਰਨ, ਕਥਾ ਕੀਰਤਨ ਦਾ ਪ੍ਰਵਾਹ ਨਿਰੰਤਰ ਚਲਦਾ ਹੈ, ਦੂਰੋਂ ਨੇੜਿਓਂ ਸੰਗਤ ਇੱਥੇ ਪਹੁੰਚ ਕੇ ਲਾਹਾ ਲੈਂਦੀ ਹੈ। ਇਸ ਮੌਕੇ ਸਤਿਗੁਰੂ ਜੀ ਹਰ ਰੋਜ ਅੰਮ੍ਰਿਤ ਵੇਲੇ ਸੰਗਤ ਨੂੰ ਆਪਣੇ ਪ੍ਰਵਚਨਾਂ ਰਾਹੀਂ ਜਿੱਥੇ ਆਪਣੇ ਸਤਿਗੁਰੂ ਜੀ ਦੇ ਚਰਨਾਂ ਨਾਲ ਧਿਆਨ ਲਗਾ ਕੇ ਨਾਮ ਸਿਮਰਨ ਕਰਨ ਅਤੇ ਗੁਰਬਾਣੀ ਪੜ੍ਹਨ ਦੀ ਪ੍ਰੇਰਣਾ ਦਿੰਦੇ ਹਨ, ਉਸ ਦੇ ਨਾਲ ਹੀ ਆਪਣੇ ਜੀਵਨ ਨੂੰ ਉੱਚਾ-ਸੁੱਚਾ ਬਣਾਉਣ ਲਈ ਸ਼ੁਭ ਕਰਮ ਕਰਨ ਦੇ ਨਾਲ, ਸਾਤਵਿਕ ਭੋਜਨ ਕਰਕੇ ਅਤੇ ਕੋਵਿਡ ਦੇ ਨਿਯਮਾਂ ਦਾ ਪਾਲਣ ਕਰਦੇ ਹੋਏ, ਸਿਹਤ ਨੂੰ ਵੀ ਦੁਰੁਸਤ ਰੱਖਣ ਲਈ ਭਲੀ-ਭਾਂਤ ਪ੍ਰੇਰਿਤ ਕਰ ਰਹੇ ਹਨ। ਇਸ ਸਾਰੇ ਪ੍ਰੋਗਰਾਮ ਨੂੰ ਵੀਰ ਅਮਨ ਸਿੰਘ ਖੀਵਾ ਵਲੋਂ ਗੁਰਦੁਆਰਾ ਸ੍ਰੀ ਜੀਵਨ ਨਗਰ ਤੋਂ ਫੇਸ-ਬੁੱਕ ਲਾਈਵ ਅਤੇ ਚੈਨਲ ਰਾਹੀਂ ਦੂਰ ਬੈਠੀਆਂ ਸੰਗਤਾਂ ਤੱਕ ਵੀ ਪ੍ਰਸਾਰਿਤ ਕੀਤਾ ਜਾਂਦਾ ਹੈ।   

ਨਾਮਧਾਰੀ ਸੰਗਤ ਵੱਲੋਂ ਸਿਮਰਨ ਸਾਧਨਾ ਅਤੇ ਅੱਸੂ ਦਾ ਮੇਲਾ

 ਮੇਲਾ ਬਣਿਆ ਬਣਿਆ ਸਮਾਜ ਕਲਿਆਣ ਅਤੇ ਆਪਸੀ ਭਾਈਚਾਰੇ ਦਾ ਪ੍ਰਤੀਕ

ਠਾਕੁਰ ਦਲੀਪ ਸਿੰਘ ਜੀ ਨੇ ਦਿੱਤਾ ਵੱਧ ਤੋ ਵੱਧ  ਵਿੱਦਿਆ ਗ੍ਰਹਿਣ ਕਰਨ  ਸੰਦੇਸ਼ 

ਦਸੂਹਾ: 15 ਅਕਤੂਬਰ 2017: (ਪੰਜਾਬ ਸਕਰੀਨ ਬਿਊਰੋ)::

ਨਾਮਧਾਰੀ ਸੰਗਤ ਵੱਲੋਂ ਸ੍ਰੀ ਸਤਿਗੁਰੂ ਦਲੀਪ ਸਿੰਘ ਜੀ ਦੀ ਪਾਵਨ ਪਵਿੱਤਰ ਹਜ਼ੂਰੀ ਵਿੱਚ ਵਿਸ਼ਵ ਸ਼ਾਂਤੀ, ਆਪਸੀ ਭਾਈਚਾਰੇ ਤੇ ਸਿਮਰਨ ਸਾਧਨਾ ਦਾ ਪ੍ਰਤੀਕ ਸਾਲਾਨਾ ਜੱਪ-ਪ੍ਰਯੋਗ ਅਤੇ ਅੱਸੂ ਦੇ ਮੇਲੇ ਦੇ ਮਹਾਨ ਸਮਾਗਮ ਦਾ ਸਮਾਪਤੀ ਸਮਾਰੋਹ ਬਹੁਤ ਹੀ ਵਿੱਲਖਣ ਢੰਗ ਨਾਲ ਸੰਪੰਨ ਹੋਇਆ। ਜਿਸ ਵਿੱਚ ਬਹੁਤ ਵੱਡੀ ਗਿਣਤੀ ਵਿੱਚ ਸੰਗਤਾ ਨਤਮਸਤਕ ਹੋਇਆ। ਇਹ ਸਮਾਗਮ 4 ਸਤੰਬਰ ਤੋਂ 15 ਅਕਤੁਬਰ ਤੱਕ ਪ੍ਰਚੀਨ ਪਾਂਡਵ ਤਲਾਬ ਮੰਦਿਰ ਦਸੂਹਾ ਵਿੱਖੇ ਚੱਲਿਆ। ਗੁਰਬਾਣੀ ਅਨੁਸਾਰ ਨਾਮਧਾਰੀ ਸੰਗਤ ਨੇ 40 ਦਿਨ ਜਲ ਦੇ ਕਿਨਾਰੇ ਬਹਿ ਕੇ ਨਾਮ-ਸਿਮਰਨ  ਕੀਤਾ ਹੈ ਕਿਉਂਕਿ ਜਲ ਕਿਨਾਰੇ ਬੈਠ ਕੇ ਨਾਮ-ਸਿਮਰਨ ਕਰਨ ਦੀ ਬਹੁਤ ਮਹੱਤਤਾ ਗੁਰਬਾਣੀ ਵਿੱਚ ਲਿਖੀ ਹੈ।

ਸ੍ਰੀ ਸਤਿਗੁਰੂ ਦਲੀਪ ਸਿੰਘ ਜੀ ਨੇ ਦੱਸਿਆ ਕਿ ਅਸੀਂ ਸ੍ਰੀ ਦਸਮ ਗ੍ਰੰਥ ਸਾਹਿਬ ਬਾਣੀ ਦਾ ਸਿਰਫ ਇਹ ਕਹਿ ਕੇ ਨਾ ਵਿਰੋਧ ਕਰੀਏ ਕਿ ਇਸ ਵਿੱਚਪੁਰਾਣਿਕ ਕਥਾਵਾਂ ਦਾ ਵਰਨਣ ਹੈ ਕਿਉਂਕਿ ਪੁਰਾਣਿਕ ਕਥਾਵਾਂ ਦਾ ਵਰਨਣ ਤਾਂ ਸ੍ਰੀ ਗੁਰੂ ਗਰੰਥ ਸਾਹਿਬ ਵਿੱਚ ਵੀ ਹੈ। ਇਸੇ ਤਰਾਂ ਸਾਨੂੰ ਆਯੁਰਵੈਦ ਤੇ ਯੋਗ ਨੂੰ ਅਪਨਾਉਣ ਦੀ ਲੋੜ ਹੈ ਕਿਉਂਕਿ ਇਹ ਸਾਰੀਆਂ ਸਵਦੇਸ਼ੀ ਹਨ ਅਤੇ ਸਾਡੇ ਫਾਇਦੇ ਲਈ ਹਨ। ਉਹਨਾਂ ਨੇ ਸੰਗਤਾਂ ਨੂੰ ਆਪਣੇ ਘਰਾਂ ਵਿੱਚ ਤੁਲਸੀ ਦੇ ਬੂਟੇ ਲਾਉਣ ਲਈ ਵੀ ਪ੍ਰੇਰਿਆ ਅਤੇ ਕਿਹਾ ਕਿ ਜੇਕਰ ਰੋਜ 5-7 ਪੱਤੇ ਤੁਲਸੀ ਦੇ ਨਿਰਣੇ ਕਾਲਜੇ ਖਾ ਲਏ ਜਾਣ ਤਾਂ ਕਈ ਤਰਾਂ ਦੀਆਂ ਬਿਮਾਰੀਆਂ ਤੋਂ ਛੁਟਕਾਰਾ ਮਿਲ ਜਾਂਦਾ ਹੈ।

ਉਹਨਾਂ ਹਿੰਦੂ ਸਿੱਖਾਂ ਨੂੰ ਆਪਸ ਵਿੱਚ ਆਪਸੀ ਭਾਈਚਾਰਾ ਗੁਰਬਾਣੀ ਦੀਆਂ ਤੁਕਾਂ ਦੀ ਉਦਾਹਰਣ ਦੇ ਕੇ ਵਧਾਉਣ ਲਈ ਪ੍ਰੇਰਿਆ।ਇਸ ਸਮੇਂ ਉਹਨਾਂ ਨੇ ਵੇਦਾਂਤ ਨੂੰ ਸਮਝਣ ਲਈ ਵੀ ਪ੍ਰੇਰਿਆ ਕਿਉਂਕਿ ਵੇਦਾਂਤ ਸਮਝੇ ਬਗੈਰ ਸਾਨੂੰ ਗੁਰਬਾਣੀ ਸਮਝ ਨਹੀਂ ਆ ਸਕਦੀ।

ਇਸ ਮੌਕੇ ਸਤਿਗੁਰੂ ਦਲੀਪ ਸਿੰਘ ਜੀ ਨੇ ਸਤਿਗੁਰੂ ਗੋਬਿੰਦ ਸਿੰਘ ਜੀ ਦੇ ਵਿਦਿਆ ਦੇ ਪੱਖ ਨੂੰ ਵੀ ਉਜਾਗਰ ਕੀਤਾ ਅਤੇ ਦੱਸਿਆ ਕਿ ਉਹਨਾਂ ਵੱਲੋਂ ਤਿਆਰ ਕੀਤੇ ਅਤੇ ਕਰਵਾਏ ਗਏ ਗ੍ਰੰਥਾਂ ਦਾ ਭਾਰ ਨੌਂ ਮਣ ਸੀ। ਇਸ ਬਾਰੇ ਸਾਨੂੰ ਬਹੁਤ ਹੀ ਘੱਟ ਜਾਣਕਾਰੀ ਹੈ।ਸਾਨੂੰ ਚਾਹੀਦਾ ਹੈ ਕਿ ਅਸੀਂ ਵੱਧ ਤੋਂ ਵੱਧ ਵਿਦਿਆ ਲਈਏ ਅਤੇ ਉੱਚ ਪਦਵੀਆਂ ਗ੍ਰਹਿਣ ਕਰੀਏ ਕਿਉਂਕਿ ਉੱਚ ਵਿਦਿਆ ਪ੍ਰਾਪਤ ਕਰਨ ਵਾਲੇ ਹੀਵੱਡੇ ਕਾਰੋਬਾਰ, ਵੱਡੀਆਂ ਪਦਵੀਆਂ, ਮੰਤਰੀ, ਆਈ.ਏ.ਐਸ., ਆਈ.ਪੀ.ਐਸ. ਬਣਦੇ  ਹਨ ਅਤੇ ਉਹ ਹੀ ਕਲਾਕਾਰ ਤੇ ਲੀਡਰ ਬਣਦੇ ਹਨ। 

ਇਸ ਸਮਾਗਮ ਦੋਰਾਨ ਸ੍ਰੀ ਸਤਿਗੁਰੂ ਦਲੀਪ ਸਿੰਘ ਜੀ ਨੂੰ ਸਮੂਹ ਸੰਗਤ ਨੂੰ ਆਪਣੀ ਨਿਰੋਗ ਸਿਹਤ , ਖਾਣ-ਪੀਣ , ਨਿਰਮਲ ਕਰਮ, ਉੱਚਵਿੱਦਿਆ, ਚੋਹਗਿਰਦੇ ਦੀ ਸਫਾਈ ਅਤੇ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਵਿੱਚ ਅੰਕਿਤ ਬਾਣੀ ਨੂੰ ਪੂਰੀ ਤਰ੍ਹਾ ਮੰਨਣ ਲਈ ਪ੍ਰੇਰਿਤ ਕੀਤਾ।

ਇਸ ਤੋਂ ਇਲਾਵਾ ਆਪ ਜੀ ਨੇ ਇਸ ਗੱਲ ਤੇ ਵੀ ਜ਼ੋਰ ਦਿੱਤਾ ਕਿ ਇਸਤਰੀਆਂ ਨੂੰ ਸਮਾਜ ਵਿੱਚ ਹੋਰ ਉੱਚਾ ਦਰਜਾ ਦਿੱਤਾ ਜਾਵੇ, ਜਿਸ ਲਈ ਆਪਜੀ ਦਵਾਰਾ ਲਗਾਤਾਰ ਉਪਰਾਲੇ ਕੀਤੇ ਜਾ ਰਹੇ ਹਨ।ਇਸ ਵਾਸਤੇ ਨਾਮਧਾਰੀ ਅੰਮ੍ਰਿਤਧਾਰੀ ਸਿੰਘਣੀਆਂ ਦਵਾਰਾ ਅੱਜ ਅਨੰਦਕਾਰਜ ਦੀ ਰਸਮ ਸ਼ੁਰੂ ਤੋਂ ਲੈ ਕੇ ਅਖੀਰ ਤੱਕ ਪੂਰੀ ਤਰਾਂ ਨਿਭਾਈ ਗਈ ਜਿਸ ਵਿੱਚ ਅੰਮ੍ਰਿਤ ਬਨਾਉਣਾ, ਛਕਾਉਣਾ, ਹਵਨ ਕਰਨਾ, ਲਾਵਾਂ ਤੇ ਸਲੋਕ ਪੜਨੇ ਸ਼ਾਮਲ ਸਨ। ਲੜਕੀਆਂ ਨੂੰ ਹਰ ਪੱਖੋਂ ਸਮਾਜ ਵਿੱਚ ਮੂਹਰੇ ਰੱਖਿਆ ਜਾਵੇ। ਨੂੰਹਾਂ-ਧੀਆਂ ਵਿੱਚ ਫਰਕ ਨਾ ਕੀਤਾ ਜਾਵੇ। ਇਹ ਸਾਰਾ ਕੁਝ ਕਰਵਾ ਕੇ ਸਤਿਗੁਰੂ ਜੀ ਨੇ ਇਹਨਾਂ ਗੱਲਾਂ ਨੂੰ ਕਿਰਿਆਤਮਕ ਰੂਪ ਦਿੱਤਾ ਹੈ।

ਆਪ ਜੀ ਨੇ ਦੱਸਿਆ ਕਿ ਰੋਜ ਹੀ ਕਿਸੇ ਗਰੀਬ ਦੀ ਨਿਮਰਤਾ ਨਾਲ ਮਦਦ ਕਰੋ ਅਤੇ ਰੋਜ ਭਾਵੇਂ ਉਹਨਾਂ ਨੂੰ ਜਲ ਦਾ ਗਿਲਾਸ ਹੀ ਛਕਾ ਦਿਉ ਅਤੇ ਜੀ ਕਹਿ ਕੇ ਬੁਲਾਉ। ਫਿਰ ਕਲਪਨਾ ਕਰੋ ਕਿ ਇਹ ਸਤਿਗੁਰੂ ਨਾਨਕ ਦੇਵ ਜੀ ਜਾਂ ਭਗਵਾਨ ਦਾ ਰੂਪ ਹਨ। ਐਸਾ ਰੋਜ ਕਰਨ ਨਾਲ ਆਪ ਜੀ ਦੀ ਕਲਪਨਾ ਦ੍ਰਿੜ ਹੋ ਜਾਵੇਗੀ ਅਤੇ ਆਪ ਜੀ ਬ੍ਰਹਮਗਿਆਨੀ ਦੀ ਅਵਸਥਾ ਨੂੰ ਪ੍ਰਾਪਤ ਕਰ ਸਕੋਗੇ।

ਵਿਧਵਾ ਵਿਵਾਹ ਜਾਂ ਕਿਸੇ ਪੱਖੋਂ ਮਾਤਾ-ਪਿਤਾਦੇ ਘਰ ਬੈਠੀ ਬੇਟੀ ਦੇ ਪੁਨਰ ਵਿਆਹ ਕਰਵਾਉ ਅਤੇ ਸਮਾਜ ਨੂੰ ਚਾਹੀਦਾ ਹੈ ਕਿ ਉਹ ਵੀ ਉਹਨਾਂ ਨੂੰ ਅਪਨਾਉਣ। ਅਰਦਾਸ ਤੋਂ ਬਾਅਦ ਏਕਤਾ ਦਾ ਨਾਅਰਾ ਸੰਗਤ ਨੇ ਮਿਲਕੇ ਪੜ੍ਹਿਆ: “ਗੁਰੂ ਨਾਨਕ ਦੇ ਸਿੱਖ ਹਾਂ, ਅਸੀਂ ਸਾਰੇ ਇੱਕ ਹਾਂ”।

ਵਿੱਸ਼ਵ ਨਾਮਧਾਰੀ ਵਿੱਦਿਅਕ ਜੱਥੇ ਦੇ ਪ੍ਰਧਾਨ ਸੰਤ ਪਲਵਿੰਦਰ ਸਿੰਘ ਨੇ ਦੱਸਿਆ ਕਿ ਇਸ ਸਮਾਗਮ ਵਿੱਚ ਬੱਚਿਆਂ ਨੂੰ ਅਰਦਾਸ ਕਰਨ, ਪਾਠ , ਗੁਰਬਾਣੀ ਦੇ ਸ਼ਬਦ ਗਾਇਣ ਕਰਨ ਦਾ ਮੌਕਾ ਦਿੱਤਾ, ਗੁਰਬਾਣੀ ਦਾ ਅਭਿਆਸ ਅਤੇ ਬਾਣੀ ਕੰਠ ਕਰਵਾਈ ਗਈ।

ਅੱਜ ਵਿਸ਼ੇਸ਼ ਰੂਪ ਵਿੱਚ ਸ਼੍ਰੀ ਵਿਨੋਦ ਕੁਮਾਰ ਸਾਂਪਲਾ ਜੀ ਪ੍ਰਧਾਨ ਬੀ.ਜੇ.ਪੀ., ਸ਼੍ਰੀ ਅਰੁਨੇਸ਼ ਠਾਕੁਰ ਜੀਐਮ.ਐਲ.ਏ., ਸੰਤ ਬਾਬਾ ਤੇਜਾ ਸਿੰਘ ਜੀ ਨਿਰਮਲੇ, ਸੰਤ ਯਾਦਵਿੰਦਰ ਸਿੰਘ ਜੀ, ਸੰਤ ਬਾਬਾ ਛਿੰਦਾ ਸਿੰਘ ਜੀ, ਸੰਤ ਬਾਬਾ ਸੂਬਾ ਭਗਤ ਸਿੰਘਜੀ, ਸੂਬਾਭਗਤਸਿੰਘਜੀ, ਸ੍ਰੀ ਬਲਜਿੰਦਰ ਸਿੰਘ ਪਨੇਸਰ, ਸ਼੍ਰੀ ਰਜੇਸ਼ ਮਿਸ਼ਰਾ ਜੀ, ਸੰਤ ਬਲਵਿੰਦਰ ਸਿੰਘ ਜੀ ਦਸੂਹਾ, ਸੰਤ ਬੂਟਾ ਸਿੰਘ ਜੀ, ਸੰਤ ਸੁਖਵਿੰਦਰ ਸਿੰਘ ਜੀ, ਸੰਤ ਦਿਲਬਾਗ ਸਿੰਘ, ਸੰਤ ਜੁਗਿੰਦਰ ਸਿੰਘ ਆਦਿ ਹਾਜ਼ਰ ਸਨ।  

ਵਿਸ਼ਵ ਅਮਨ ਅਤੇ ਏਕਤਾ ਲਈ ਚਲ ਰਿਹਾ ਸਾਲਾਨਾ ਜੱਪ-ਪ੍ਰਯੋਗ ਦਾ ਮਹਾਂ ਕੁੰਭ

Wed, Sep 13, 2017 at 10:01 AM
"ਝਾਲਾਘੇ ਉਠਿ ਨਾਮੁ ਜਪਿ ਨਿਸਿ ਬਾਸੁਰ ਅਰਾਧਿ।

ਕਾਰ੍ਹਾ ਤੁਝੈ ਨ ਵਿਆਪਈ ਨਾਨਕ ਮਿਟੈ ਉਪਾਧਿ।"
ਗਉੜੀ ਬਾਵਨ ਅਖਰੀ ਮ.5 ਪੰਨਾ 255                   

ਗੁਰਬਾਣੀ ਵਿੱਚ ਨਾਮ ਸਿਮਰਨ ਕਰਨ ਦੇ ਮਹਾਤਮ ਨੂੰ ਮੁਖ ਰੱਖਦੇ ਹੋਏ ਨਾਮਧਾਰੀ ਸਤਿਗੁਰੂ ,ਸਤਿਗੁਰੂ ਪ੍ਰਤਾਪ ਸਿੰਘ ਜੀ ਨੇ ਸਭ ਤੋਂ ਪਹਿਲੇ ਸਨ 1906 ਈਸਵੀ ,ਭਾਦੋਂ ਮਹੀਨੇ ਤੋਂ ਅੱਸੂ ਮਹੀਨੇ ਤੱਕ ਨੀਲੋਂ ਨਹਿਰ ਦੇ ਕੰਡੇ ਤੇ ਸਰਬੱਤ ਦੇ ਭਲੇ ਲਈ 40 ਦਿਨਾਂ ਦੀ ਸਿਮਰਨ-ਸਾਧਨਾ ਸ਼ੁਰੂ ਕਰਵਾਈ। ਸੰਗਤ ਨੇ ਵੱਧ-ਚੜ੍ਹ ਕੇ ਹਿੱਸਾ ਪਾਇਆ ਅਤੇ ਆਪਣਾ ਜਨਮ ਸਫਲਾ ਕੀਤਾ। ਬਾਦ ਵਿਚ ਸਤਿਗੁਰੂ ਜਗਜੀਤ ਸਿੰਘ ਜੀ ਨੇ ਉਸ ਲੜੀ ਨੂੰ ਅਗੇ ਤੋਰਿਆ। ਆਪ ਜੀ ਦੀ ਪ੍ਰੇਰਣਾ ਅਤੇ ਸੰਗਤ ਦੇ ਉਤਸ਼ਾਹ ਨਾਲ ਸਾਲ-ਸਾਲ ਭਰ ਜੱਪ ਪ੍ਰਯੋਗ ਨਿਰੰਤਰ ਚਲਦਾ ਰਿਹਾ। ਅੱਜ ਵੀ ਉਹਨਾਂ ਮਹਾਨ ਸੰਸਕਾਰਾਂ ਵਿਚ ਹੋਰ ਪ੍ਰੋੜ੍ਹਤਾ ਲਿਆ ਕੇ ਸਰਬੱਤ ਦੇ ਭਲੇ ਦੀ ਮਹਾਨ ਸੋਚ ਰੱਖਣ ਵਾਲੇ, ਸਾਂਝੀਵਾਲਤਾ ਦੀ ਮੂਰਤ, ਏਕਤਾ ਦੇ ਬਾਨੀ ਨਾਮਧਾਰੀ ਪ੍ਰਮੁੱਖ ਸਤਿਗੁਰੂ ਦਲੀਪ ਸਿੰਘ ਜੀ ਨੇ ਸੰਗਤ ਨੂੰ ਨਾਮ ਬਾਣੀ ਦਾ ਮਹਾਤਮ ਦੱਸਦੇ ਹੋਏ ਹਰ ਸਾਲ ਦੀ ਤਰ੍ਹਾਂ ਇਸ ਸਾਲ ਵੀ 40 ਦਿਨਾਂ ਦਾ ਜੱਪ ਪ੍ਰਯੋਗ ਸ਼ੁਰੂ ਕਰਵਾਇਆ ਹੈ। ਜੋ ਇਸ ਵਾਰ ਦਸੂਹਾ ਵਿਖੇ ਇਤਿਹਾਸਿਕ ਸਰੋਵਰ, ਪ੍ਰਾਚੀਨ ਪਾਂਡਵ ਤਾਲਾਬ, ਭਗਵਾਨ ਸ਼ਿਵ ਜੀ ਦੀ ਮੂਰਤੀ ਵਾਲੇ ਮੰਦਰ ਵਿਖੇ ਬੜੀ ਸ਼ਰਧਾ-ਭਾਵਨਾ ਅਤੇ ਅਨੁਸ਼ਾਸ਼ਨ ਨਾਲ ਆਯੋਜਿਤ ਕੀਤਾ ਹੈ। ਇਸ ਮਹਾਨ ਜੱਪ-ਪ੍ਰਯੋਗ (ਸਿਮਰਨ-ਸਾਧਨਾ) ਦੇ ਦੌਰਾਨ ਸਵੇਰੇ ਅੰਮ੍ਰਿਤ ਵੇਲੇ 3 ਵਜੇ ਤੋਂ ਲੈਕੇ ਸ਼ਾਮ ਤੱਕ ਲਗਭਗ 8 ਘੰਟੇ ਨਾਮ ਸਿਮਰਨ, ਕਥਾ ਕੀਰਤਨ ਆਦਿ ਦਾ ਪ੍ਰਵਾਹ ਚਲ ਰਿਹਾ ਹੈ। ਇਸ ਦੌਰਾਨ ਸੰਗਤ ਅੰਮ੍ਰਿਤ ਵੇਲੇ ਉੱਠ ਕੇ ਇਸ਼ਨਾਨ ਕਰ, ਨਾਮ ਸਿਮਰਨ ਕਰ ਸਤਿਗੁਰੂ ਜੀ ਦੇ ਅਨਮੋਲ ਖਜਾਨੇ ਦਾ ਆਨੰਦ ਤਾਂ ਪ੍ਰਾਪਤ ਕਰਦੀ ਹੀ ਹੈ, ਨਾਲ ਦੇ ਨਾਲ ਸਾਤਵਿਕ ਆਹਾਰ ਅਤੇ ਸਾਦੇ ਪਹਿਰਾਵੇ ਨੂੰ ਅਪਣਾਉਂਦੇ ਹੋਏ, ਸੇਵਾ-ਸਿਮਰਨ ਕਰਦੇ ਹੋਏ ਸਾਰਾ ਦਿਨ ਸਤਿਗੁਰੂ ਦੇ ਰੰਗ ਵਿਚ ਹੀ ਰੰਗੀ ਰਹਿੰਦੀ ਹੈ। ਇਸ ਵਾਰ ਸਤਿਗੁਰੂ ਜੀ ਨੇ ਪਹਿਲੇ ਦਿਨ ਇਸ ਜੱਪ ਪ੍ਰਯੋਗ ਦੀ ਸ਼ੁਰੂਆਤ ਵਿੱਚ ਸੰਗਤ ਵਿਚ ਦਰਸ਼ਨ ਦੇ ਕੇ ਸੰਗਤ ਨੂੰ ਆਪਣੇ ਅਨਮੋਲ ਬਚਨ ਦੱਸ ਕੇ ਨਿਹਾਲ ਕੀਤਾ। ਆਪ ਜੀ ਨੇ ਸਾਧ ਸੰਗਤ ਨੂੰ ਆਪਣੇ-ਆਪਣੇ ਆਸਣ ਤੇ ਬੈਠ ਕੇ, ਜਲ ਨਾਲ ਗੜਵਾ ਭਰ ਕੇ ਮਾਲਾ ਫੇਰ ਕੇ ਸਤਿਗੁਰੂ ਜੀ ਦਾ ਧਿਆਨ ਧਾਰ, ਸਮਾਧੀਲੀਨ  ਹੋ ਕੇ ਪੰਜੇ ਗਿਆਨ-ਇੰਦਰੀਆਂ ਨੂੰ ਸੰਕੋਚ, ਇਕਾਗਰ ਚਿੱਤ ਹੋ ਨਾਮ ਸਿਮਰਨ ਕਰਨ ਦੀ ਜਾਚ ਦੱਸੀ। ਇਸ ਤੋਂ ਇਲਾਵਾ ਆਪ ਜੀ ਨੇ ਸਾਧ ਸੰਗਤ ਨੂੰ ਇਨ੍ਹਾਂ ਚਾਲੀ ਦਿਨਾਂ ਦਾ ਲਾਹਾ ਲੈਣ ਲਈ ਗੁਰਬਾਣੀ ਅਨੁਸਾਰ ਅੰਮ੍ਰਿਤ ਵੇਲੇ ਉੱਠ ਕੇ ਨਾਮ ਜੱਪਣ ਦੀ ਮਹੱਤਤਾ, ਸੁੱਚ- ਸਫਾਈ ਰੱਖਣ ਬਾਰੇ, ਨਿਰਮਾਣਤਾ ਬਾਰੇ ਅਤੇ ਵੱਧ ਤੋਂ ਵੱਧ ਮੌਨ ਰਹਿ ਕੇ ਇਸ ਸੁਭਾਗੇ ਮੌਕੇ ਦੀ ਸਹੀ ਵਰਤੋਂ ਕਰਨ ਦੀ ਜਾਚ ਦੱਸੀ। ਇਹ ਭਾਦੋਂ-ਅੱਸੂ ਮਹੀਨੇ ਦੇ  ਜੱਪ ਪ੍ਰਯੋਗ ਦਾ ਮਹਾਕੁੰਭ 4 ਸਤੰਬਰ 2017 ਤੋਂ 13 ਅਕਤੂਬਰ 2017 ਤੱਕ ਚਲੇਗਾ। ਫਿਰ 13 ਅਕਤੂਬਰ ਤੋਂ 15 ਅਕਤੂਬਰ 2017 ਤੱਕ ਅੱਸੂ  ਦੇ ਮੇਲੇ ਦਾ ਸਮਾਗਮ ਧੂਮ-ਧਾਮ ਨਾਲ ਮਨਾਇਆ ਜਾਵੇਗਾ। ਸਮੁੱਚੀ ਨਾਮਧਾਰੀ ਸਾਧ-ਸੰਗਤ, ਸਾਰੇ ਸ਼ਰਧਾਵਾਨ, ਪ੍ਰੇਮੀ ਸੱਜਣਾਂ ਨੂੰ ਸਨਿਮਰ ਨਿੱਘਾ ਸੱਦਾ ਵੀ ਦੇਂਦੀ ਹੈ ਜੀ ਤੇ ਬੇਨਤੀ ਕਰਦੀ ਹੈ ਕਿ ਵਿਸ਼ਵ ਵਿੱਚ ਅਮਨ, ਸ਼ਾਂਤੀ ਅਤੇ ਏਕਤਾ ਲਈ ਚਲ ਰਹੇ ਇਸ ਸਾਲਾਨਾ ਜੱਪ-ਪ੍ਰਯੋਗ (ਸਿਮਰਨ ਸਾਧਨਾ) ਵਿੱਚ  ਹਾਜਰੀ ਭਰ ਕੇ ਆਪਣੇ ਜੀਵਨ ਨੂੰ  ਸਫਲ ਬਣਾਓ ਜੀ। 
ਪ੍ਰਿੰਸੀਪਲ ਰਾਜਪਾਲ ਕੌਰ,
ਪ੍ਰੈਸ ਸਕੱਤਰ    

ਮੋਬਾਈਲ ਸੰਪਰਕ ਨੰਬਰ: 9023150008