Showing posts with label Baba Gurmukh Singh. Show all posts
Showing posts with label Baba Gurmukh Singh. Show all posts

Saturday, July 01, 2017

ਕੌਮਾਗਾਟਾਮਾਰੂ ਕਮੇਟੀ ਦੇ ਸਾਲਾਨਾ ਇਜਲਾਸ ਵਿੱਚ ਅਹਿਮ ਮਤੇ ਪਾਸ

 ਦੇਸ਼ ਅੰਦਰ ਬਣਾਏ ਜਾ ਰਹੇ ਫਿਰਕੂ ਹਾਲਾਤਾਂ ਵਿਰੁੱਧ ਚੇਤਨਾ ਲਹਿਰ ਸਰਗਰਮ 
ਲੁਧਿਆਣਾ: 1 ਜੁਲਾਈ 2017: (ਪੰਜਾਬ ਸਕਰੀਨ ਬਿਊਰੋ)::  More Pics on Facebook
ਜਦੋਂ ਦੇਸ਼ ਦੀ ਜਨਤਾ ਨੂੰ ਜੰਗ ਦੇ ਜਨੂੰਨ ਅਤੇ ਫਿਰਕੂ ਨਫਰਤਾਂ ਦੀ ਅੱਗ ਵਿੱਚ ਝੋਕਣ ਦੀਆਂ ਸਾਜ਼ਿਸ਼ਾਂ ਸਿਖਰਾਂ ਛੂਹ ਰਹੀਆਂ ਹਨ ਉਦੋਂ ਕੌਮਾਗਾਟਾਮਾਰੂ ਯਾਦਗਾਰ  ਕਮੇਟੀ ਦੇ ਦੂਸਰੇ ਸਾਲਾਨਾ ਇਜਲਾਸ ਵਿੱਚ ਮੌਜੂਦਾ ਸਥਿਤੀ ਨੂੰ ਲੈ ਕੇ ਨਾ ਸਿਰਫ ਖੁੱਲ੍ਹ ਕੇ ਚਰਚਾ ਕੀਤੀ ਗਈ ਬਲਕਿ ਅਹਿਮ ਮਤੇ ਵੀ ਪਾਸ ਕੀਤੇ ਗਏ। ਆਰ ਐਸ ਐਸ ਅਤੇ ਇਸਦੀਆਂ ਵੱਖ ਵੱਖ ਜੱਥੇਬੰਦੀਆਂ ਦੀ ਚਰਚਾ ਕਰਦਿਆਂ ਇਤਿਹਾਸਕ ਘਟਨਾਵਾਂ ਦੀ ਵੀ ਚਰਚਾ ਹੋਈ। 
ਜ਼ਿਕਰਯੋਗ ਹੈ ਕਿ ਗਦਰੀ ਸ਼ਹੀਦਾਂ ਸਮੇਤ ਦੇਸ਼ ਦੇ ਸਮੂਹ ਦੇਸ਼ ਭਗਤਾਂ ਦੀ ਮਹਾਨ ਵਿਰਾਸਤ ਨੂੰ ਸਾਂਭਣ, ਖੋਜਣ ਅਤੇ ਪ੍ਰਚਾਰਨ-ਪ੍ਰਸਾਰਨ ਵਾਲੀ ਕੌਮਾਗਾਟਾਮਾਰੂ ਯਾਦਗਾਰ ਕਮੇਟੀ ਜ਼ਿਲ੍ਹਾ ਲੁਧਿਆਣਾ ਦਾ ਦੂਜਾ ਸਾਲਾਨਾ ਇਜਲਾਸ ਅੱਜ ਪੈਨਸ਼ਨਰ ਭਵਨ, ਮਿੰਨੀ ਸਕੱਤਰੇਤ ਲੁਧਿਆਣਾ ਵਿਖੇ ਸਰਵ ਸ਼੍ਰੀ ਉਜਾਗਰ ਸਿੰਘ ਬੱਦੋਵਾਲ, ਕਾਮਰੇਡ ਗੁਰਨਾਮ ਸਿੰਘ ਸਿੱਧੂ ਅਤੇ ਐਡਵੋਕੇਟ ਕੁਲਦੀਪ ਸਿੰਘ ਦੀ ਪ੍ਰਧਾਨਗੀ ਹੇਠ ਹੋਇਆ। ਸਭ ਤੋਂ ਪਹਿਲਾਂ ਅੰਗਰੇਜ਼ ਸਾਮਰਾਜ ਵਿਰੁੱਧ ਸੰਘਰਸ਼ ਕਰਨ ਵਾਲੇ ਤੇ ਸੱਚਾ ਲੋਕ ਜਮਹੂਰੀ ਪ੍ਰਬੰਧ ਸਿਰਜਣ ਲਈ ਅਪਣੀਆਂ ਜਾਨਾਂ ਕੁਰਬਾਨ ਕਰਨ ਵਾਲੇ ਗਦਰੀ ਯੋਧਿਆਂ ਨੂੰ 2 ਮਿੰਟ ਦਾ ਮੌਨ ਧਰਕੇ ਸ਼ਰਧਾਂਜਲੀ ਭੇਂਟ ਕੀਤੀ ਗਈ। ਇਸ ਮੌਕੇ ਐਡਵੋਕੇਟ ਕੁਲਦੀਪ ਸਿੰਘ ਗਰੇਵਾਲ ਨੇ ਗਦਰ ਪਾਰਟੀ ਦੇ ਮਿਸ਼ਨ, ਅਧੂਰੇ ਕਾਰਜਾਂ, ਮੌਜੂਦਾ ਸਥਿਤੀ ਅਤੇ ਬਣਦੇ ਫਰਜ਼ਾਂ ਤੇ ਚੁਣੌਤੀਆਂ ਬਾਰੇ ਰੌਸ਼ਨੀ ਪਾਈ। ਕਾਮਰੇਡ ਗੁਰਨਾਮ ਸਿੰਘ ਸਿੱਧੂ ਨੇ ਹਿੰਦ-ਪਾਕ ਵਿਚਕਾਰ ਬਣਾਏ ਜਾ ਰਹੇ ਜੰਗੀ ਹਾਲਾਤਾਂ’ਤੇ ਆਪਣੇ ਵਿਚਾਰ ਪੇਸ਼ ਕਰਦਿਆਂ ਤੁਰੰਤ ਗੱਲਬਾਤ ਦੀ ਮੇਜ਼’ਤੇ ਆਕੇ ਦੋਨਾਂ ਦੇਸ਼ਾਂ ਵਿਚਕਾਰ ਸੱਦਭਾਵਨਾ ਵਾਲਾ ਮਾਹੌਲ ਸਿਰਜਣ ਦਾ ਹੋਕਾ ਦਿੱਤਾ। ਇਸ ਮੌਕੇ ਮਾਸਟਰ ਜਸਦੇਵ ਸਿੰਘ ਲਲਤੋਂ ਨੇ ਆਪਣੇ ਵਿਚਾਰ ਪੇਸ਼ ਕਰਦਿਆਂ ਦੇਸ਼ ਅੰਦਰ ਹਿੰਦੂ ਰਾਸ਼ਟਰ ਦੇ ਨਾਂ ਹੇਠ ਆਰ.ਐੱਸ.ਐੱਸ. ਵੱਲੋਂ ਬਣਾਏ ਜਾ ਰਹੇ ਫਿਰਕੂ ਹਾਲਾਤਾਂ ਅਤੇ ਇਹਨਾਂ ਦੇ ਸਿੱਟੇ ਵਜੋਂ ਧਾਰਮਿਕ ਘੱਟ ਗਿਣਤੀਆਂ ਉੱਤੇ ਕੀਤੇ ਜਾ ਰਹੇ ਜ਼ੁਲਮ ਨੂੰ ਬੰਦ ਕਰਕੇ ਗਦਰੀ ਬਾਬਿਆਂ ਤੇ ਦੇਸ਼ ਭਗਤਾਂ ਦੇ ਧਰਮ ਨਿਰਪੱਖ ,ਜਮਹੂਰੀ,ਬਰਾਬਰੀ ਵਾਲੇ ਪ੍ਰਬੰਧ ਨੂੰ ਸਮੇਂ ਦੀ ਮੁੱਖ ਲੋੜ ਦੱਸਿਆ। ਇਸ ਸਮੇਂ ਉਘੇ ਸ਼ਾਇਰ ਅਮਰੀਕ ਤਲਵੰਡੀ ਤੇ ਬਾਲ ਕ੍ਰਿਸ਼ਨ ਨੇ ਇਨਕਲਾਬੀ ਕਵਿਤਾ ਅਤੇ ਰਮਨਜੀਤ ਸੰਧੂ ਨੇ ਉਨੀਵੀਂ ਸਦੀ ਦੇ ਮਹਾਨ ਦੇਸ਼ ਭਗਤ ‘ਨਿਜ਼ਾਮ ਲੁਹਾਰ’ ਦੀ ਜੀਵਨੀ ਪੇਸ਼ ਕੀਤੀ। ਸ਼ੁਰੂ ਵਿੱਚ ਜਸਦੇਵ ਲਲਤੋਂ ਨੇ ਸਾਲਾਨਾ ਰੀਵਿਊ ਰੀਪੋਰਟ ਪੇਸ਼ ਕੀਤੀ, ਜਿਸ ਨੂੰ ਹਾਊਸ ਨੇ ਪ੍ਰਵਾਨ ਕਰ ਲਿਆ। ਇਜਲਾਸ ਦੇ ਸਿਖਰ’ਤੇ ਆਰ.ਐੱਸ.ਐੱਸ. ਦੇ ਗੁਪਤ ਸਰਕੂਲਰ 411/300311/ਸੀ.ਓ.3 ਦੀ ਗਹਿਰਾਈ ਨਾਲ ਜਾਂਚ ਕਰਨ ਲਈ ਸੁਪਰੀਮ ਕੋਰਟ ਦੇ 3 ਸਿਟਿੰਗ ਜੱਜਾਂ ਦੇ ਅਧਾਰ’ਤੇ ਜਾਂਚ ਕਮਿਸ਼ਨ ਬਨਾਉਣ; ਮੰਦਸੌਰ (ਮੱਧ ਪ੍ਰਦੇਸ਼) ਵਿੱਚ ਮਾਰੇ ਗਏ 6 ਕਿਸਾਨਾਂ ਦੀ ਮੌਤ ਲਈ ਜ਼ਿੰਮੇਵਾਰ ਪੁਲੀਸ ਅਫਸਰਾਂ ਦੇ ਖਿਲਾਫ ਮੁਕੱਦਮਾ ਦਰਜ ਕਰਕੇ ਗ੍ਰਿਫਤਾਰ ਕਰਨ; ਜੋਧਾਂ ਥਾਣੇ ਅੰਦਰ ਮਰੀ ਮਹਿਲਾ ਮੁਲਾਜ਼ਮ ਅਮਨਪ੍ਰੀਤ ਕੌਰ ਦੇ ਕੇਸ ਦੀ ਪੜਤਾਲ ਜਲਦੀ ਮੁਕੰਮਲ ਕਰਕੇ ਦੋਸ਼ੀਆਂ ਨੂੰ ਸਖਤ ਸਜ਼ਾ ਦਿਵਾਉਣ, 31 ਮਹੀਨਿਆਂ ਤੋਂ ਲਟਕ ਰਹੇ ਗਦਰੀ ਬਾਬਾ ਗੁਰਮੁੱਖ ਸਿੰਘ ਲਲਤੋਂ ਦੇ ਬੁੱਤ ਨੂੰ ਤੋੜਨ ਵਾਲੇ ਦੋਸ਼ੀਆਂ ਦਾ ਚਲਾਣ ਪੇਸ਼ ਕਰਾਉਣ, ਸੜਕ ਹਾਦਸਿਆਂ ਵਿੱਚ ਹੋ ਰਹੀਆਂ ਸੈਂਕੜੇ ਮੌਤਾਂ ਨੂੰ ਰੋਕਣ ਲਈ 8 ਨੁਕਾਤੀ ਪ੍ਰੋਗਰਾਮ’ਤੇ ਗੱਲਬਾਤ ਕਰਨ ਲਈ ਮੁੱੱਖ ਮੰਤਰੀ ਪੰਜਾਬ ਤੋਂ ਸਮਾਂ ਲੈਣ, ਆਮ ਲੋਕਾਂ ਉੱਪਰ ਭਾਰੀ ਆਰਥਿਕ ਬੋਝ ਲੱਦਣ ਵਾਲੇ ਜੀ.ਐੱਸ.ਟੀ.ਟੈਕਸ ਨੂੰ ਰੱਦ ਕਰਾਉਣ ਸਬੰਧੀ ਮਤੇ ਸਰਬਸੰਮਤੀ ਨਾਲ ਪਾਸ ਕੀਤੇ ਗਏ।  ਇਸ ਵਿਚਾਰ ਪ੍ਰਵਾਹ ਵਿੱਚ ਹੋਰਨਾਂ ਤੋਂ ਇਲਾਵਾ ਸਰਵ ਸ਼੍ਰੀ ਉਜਾਗਰ ਬੱਦੋਵਾਲ, ਕਮਲਜੀਤ ਸਿੰਘ ਸਾਹਾਬਾਣਾ, ਗੁਲਜ਼ਾਰ ਪੰਧੇਰ, ਬਲਕੌਰ ਸਿੰਘ, ਦੇਵ ਸਰਾਭਾ, ਚਰਨ ਸਰਾਭਾ, ਕਾਮਰੇਡ ਡੀ.ਪੀ.ਮੌੜ ਤੇ ਸਤੀਸ਼ ਸਚਦੇਵਾ ਨੇ ਬੜੀ ਗਰਮਜੋਸ਼ੀ ਨਾਲ ਹਿੱਸਾ ਲਿਆ। ਅੰਤ ਵਿੱਚ ਕਾਮਰੇਡ ਗੁਰਨਾਮ ਸਿੱਧੂ ਨੇ ਲੋਕਾਂ ਦਾ ਧੰਨਵਾਦ ਕਰਦਿਆਂ ਦੇਸ਼ ਪ੍ਰੇਮ ਦੀ ਲਹਿਰ ਨੂੰ ਹੋਰ ਮਜ਼ਬੂਤ ਕਰਨ ਦਾ ਸੱਦਾ ਦਿਤਾ। More Pics on Facebook

Sunday, March 15, 2015

ਜੋਸ਼ੋ ਖਰੋਸ਼ ਨਾਲ ਮਨਾਈ ਗਈ ਬਾਬਾ ਗੁਰਮੁਖ ਸਿੰਘ ਲਲਤੋਂ ਦੀ ਬਰਸੀ

ਬੁੱਤ ਤੋੜਣ ਵਾਲਿਆਂ ਨੂੰ ਬੁਲਾਰਿਆਂ ਵੱਲੋਂ ਸਖਤ ਚੇਤਾਵਨੀ 
ਬੇਅਦਬੀ ਕਰਨ ਵਾਲਿਆਂ ਵਿਰੁਧ ਦੇਸ਼ ਧ੍ਰੋਹ ਦੀ ਧਾਰਾ ਲਾਗੂ ਕਰਾਉਣ ਦੀ ਮੰਗ ਦਾ ਮਤਾ ਵੀ ਪਾਸ 
ਲੁਧਿਆਣਾ: 15 ਮਾਰਚ 2015: (ਰੈਕਟਰ ਕਥੂਰੀਆ//ਪੰਜਾਬ ਸਕਰੀਨ):
ਲੋਕ ਦੋਖੀ ਅਨਸਰਾਂ ਦੀਆਂ ਸਾਜ਼ਿਸ਼ਾਂ ਨੂੰ ਬੁਰੀ ਤਰਾਂ ਨਾਕਾਮ ਕਰਦਿਆਂ ਅੱਜ ਗਦਰੀ ਬਾਬਿਆਂ ਦੇ  ਪੈਰੋਕਾਰਾਂ ਨੇ ਬੜੇ ਹੀ ਜੋਸ਼ੋ ਖਰੋਸ਼ ਨਾਲ ਬਾਬਾ ਗੁਰਮੁਖ ਸਿੰਘ ਲਲਤੋਂ ਦੀ ਬਰਸੀ ਮਨਾਈ। ਇਸ ਮੌਕੇ ਖੇਡੇ ਗਏ  ਨਾਟਕ, ਪੇਸ਼ ਕੀਤੀ ਗਏ  ਗੀਤ ਸੰਗੀਤ ਅਤੇ ਭਾਸ਼ਣਾਂ ਰਾਹੀਂ ਸਪਸ਼ਟ ਚੇਤਾਵਨੀ ਦਿੱਤੀ ਗਈ ਕਿ ਜੇ ਕਾਨੂੰਨ ਨੇ ਬੁੱਤ ਤੋੜਨ ਵਾਲਿਆਂ ਨੂੰ ਸਜ਼ਾ ਨਾ ਦਿੱਤੀ ਤਾਂ ਦੇਸ਼ ਭਗਤਾਂ ਦੇ ਵਾਰਸ ਖੁਦ ਵੀ ਉਹਨਾਂ ਨੂੰ ਸਜ਼ਾ ਦੇਣਾ ਜਾਣਦੇ ਹਨ। ਚੇਤੇ ਰਹੇ ਕਿ ਬਾਬਾ ਜੀ ਦੇ ਬੁੱਤ ਉੱਪਰ ਤਿੰਨ ਚਾਰ ਵਾਰ ਹਮਲੇ ਹੋ ਚੁੱਕੇ ਹਨ ਪਰ  ਦੋਸ਼ੀਆਂ ਖਿਲਾਫ਼ ਬਣਦੀ ਕਾਰਵਾਈ ਨਹੀਂ ਕੀਤੀ ਗਈ। ਇਸ ਸਬੰਧੀ ਬਣੀ ਕਮੇਟੀ ਦੇ ਮੁਤਾਬਿਕ ਪੁਲਿਸ ਨੇ ਇਸ ਮਾਮਲੇ ਵਿੱਚ ਸਤਬੀਰ ਗੈਂਗ ਦੇ ਮੈਂਬਰ ਕਈ ਦਿਨ ਪਹਿਲਾਂ ਹੀ ਕਾਬੂ ਕੀਤੇ ਹਨ ਪਰ ਇਸ ਬਾਰੇ ਅਜੇ ਤੱਕ ਅਧਿਕਾਰਕ ਸੂਚਨਾ ਨਹੀਂ ਕਿ ਸਤਬੀਰ ਗਿਰੋਹ ਦੇ ਇਹਨਾਂ ਮੈਂਬਰਾਂ ਨੇ ਇਹ ਬੁੱਤ ਕਿਓਂ ਤੋੜਿਆ? ਬਰਸੀ ਮੌਕੇ ਇਕੱਤਰ ਸਮਾਗਮ ਵਿੱਚ ਮਤਾ ਪਾਸ ਕਰਕੇ ਉਹਨਾਂ ਖਿਲਾਫ਼ ਦੇਸ਼ ਧ੍ਰੋਹ ਦੀ ਧਾਰਾ ਲਾਗੂ ਕਰਨ ਅਤੇ ਉਹਨਾਂ ਦੀ ਪਿਠ ਥਾਪੜਨ  ਵਾਲੇ ਸਾਜ਼ਿਸ਼ੀਆਂ ਨੂੰ ਵੀ ਬੇਨਕਾਬ ਕਰਕੇ ਬਣਦੀ ਕਾਰਵਾਈ ਦੀ ਮੰਗ ਕੀਤੀ ਗਈ।
ਇਸ ਸਮਾਗਮ ਵਿੱਚ ਭਾਗ ਲੈਣ ਲਈ ਲੋਕ ਵੱਖ ਵੱਖ ਇਲਾਕਿਆਂ ਵਿੱਚੋਂ ਕਾਫ਼ਿਲੇ ਬਣਾ ਕੇ ਆਏ। ਲੁਧਿਆਣਾ ਤੋਂ ਕਾਮਰੇਡ ਗੁਰਨਾਮ   ਸਿਧੂ ਅਤੇ ਕਾਮਰੇਡ ਰਮੇਸ਼ ਰਤਨ ਦੀ ਅਗਵਾਈ ਹੇਠ ਵਿਸ਼ਾਲ ਕਾਫ਼ਿਲਾ ਪਿੰਡਾਂ ਵਿੱਚੋਂ ਦੀ ਹੁੰਦਾ ਹੋਇਆ ਲਲਤੋਂ ਖੁਰਦ ਪਹੁੰਚਿਆ। 
ਲੋਕਾਂ ਨੇ ਬੜੀ ਸ਼ਰਧਾ ਨਾਲ ਬਾਬਾ ਜੀ ਨੂੰ ਆਪਣੀ ਅਕੀਦਤ ਦੇ ਫੁੱਲ ਭੇਂਟ ਕੀਤੇ ਅਤੇ ਜੋਸ਼ੀਲੀ ਨਾਅਰੇਬਾਜ਼ੀ ਨਾਲ ਦੱਸਿਆ ਕਿ ਉਹ ਬੁੱਤ ਦੀ ਬੇਅਦਬੀ ਕਰਨ ਵਾਲਿਆਂ ਨੂੰ ਸਜ਼ਾਵਾਂ  ਦੁਆਏ ਬਿਨਾ ਚੈਨ ਨਾਲ ਨਹੀਂ ਬੈਠਣਗੇ। ਦਿੱਲੀ ਤੋਂ ਆਈ ਇਨਕ਼ਲਾਬੀ ਸ਼ਾਇਰਾ  ਰੁਪਿੰਦਰ ਕੌਰ ਨੇ ਵੀ ਆਪਣੀ ਇੱਕ ਛੋਟੀ ਜਿਹੀ ਕਵਿਤਾ ਰਾਹੀਂ ਸਮੁੱਚੀ ਇਸਤਰੀ ਜਾਤੀ ਅਤੇ ਖਾਸ ਕਰਕੇ ਅੱਜ ਦੀਆਂ ਮੁਟਿਆਰਾਂ ਨੂੰ ਹਲੂਣਾ ਦੇਂਦਿਆਂ ਕਿਹਾ ਕਿ ਓਹ ਸਵੈ ਨਿਰਭਰ ਬਣਨ ਅਤੇ ਏਨਾ ਮਜਬੂਤ ਹੋ ਕੇ ਵਿਚਰਣ ਕਿ ਉਹਨਾਂ ਵੱਲ ਅੱਖ ਚੁੱਕਣ ਵਾਲਾ ਹਰ ਹਨੇਰਾ ਵੀ ਦਹਿਲ ਜਾਵੇ।
ਇਸ ਮੌਕੇ ਤੇ ਇੰਕ਼ਲਾਬੀ ਕੇਂਦਰ ਪੰਜਾਬ ਦੇ ਬੁਲਾਰੇ ਹਰਦੇਵ ਮੁੱਲਾਂਪੁਰੀ ਨੇ ਬੜੇ ਸਖਤ ਪਰ ਜਜ਼ਬਾਤੀ ਬੋਲਾਂ ਵਿੱਚ ਜਿੱਥੇ ਬਾਬਾ ਜੀ ਨੂੰ ਸ਼ਰਧਾ ਦੇ ਫੁੱਲ ਭੇਂਟ ਕੀਤੇ ਉੱਥੇ ਅੱਜ ਦੇ ਹਾਲਾਤ ਅਤੇ  ਕਾਨੂੰਨ ਦੀ ਹਾਲਤ ਬਾਰੇ ਵੀ ਡੂੰਘੀ ਚਿਤਾ ਪ੍ਰਗਟ ਕੀਤੀ। ਉਹਨਾਂ ਦੱਸਿਆ ਕਿ ਅੱਜ ਆਮ ਜਨਤਾ ਖਾਸ ਕਰਕੇ ਕੁੜੀਆਂ ਨਾਲ ਕੀ ਕੀ ਵਾਪਰ ਰਿਹਾ ਹੈ। ਹਰਦੇਵ ਮੁੱਲਾਂਪੁਰੀ ਨੇ ਬੜੇ ਹੀ ਥੋਹੜੇ ਸ਼ਬਦਾਂ ਵਿੱਚ ਅੱਜ ਦੇ ਭਿਆਨਕ ਹਾਲਾਤ ਦੀ ਤਸਵੀਰ ਖਿੱਚੀ।
ਦੇਸ਼ ਭਗਤ ਯਾਦਗਾਰ ਕਮੇਟੀ ਜਲੰਧਰ ਵੱਲੋਂ ਉਚੇਚੇ ਤੌਰ ਤੇ ਪੁੱਜੇ ਕਾਮਰੇਡ ਅਮੋਲਕ ਸਿੰਘ ਨੇ  ਪਛਾਣੇ ਹਰਮਨ  ਵਿੱਚ ਅੱਜ ਦੇ ਹਾਲਾਤ ਦੀ ਚਰਚਾ ਕਰਦਿਆਂ ਬੜੇ ਹੀ ਸਿਧੇ ਸਾਧੇ ਸ਼ਬਦਾਂ ਵਿੱਚ ਅਨਸਰਾਂ ਦੀਆਂ ਸਾਜ਼ਿਸ਼ਾਂ ਅਤੇ ਖਤਰਨਾਕ ਚਾਲਾਂ ਨੂੰ ਬੇਨਕਾਬ ਕੀਤਾ। 
 ਦੇਸ਼ਭਗਤ ਪਰਿਵਾਰ ਦੇ ਸਰਗਰਮ ਮੈਂਬਰ ਕਾਮਰੇਡ ਸੁਰਿੰਦਰ ਸਿੰਘ ਜਲਾਲਦੀਵਾਲ ਨੇ ਇਸ ਵਾਰ ਵੀ ਸ਼ਹੀਦਾਂ ਨੂੰ ਯਾਦ ਕਰਦਿਆਂ ਇਕੱਤਰਤਾ ਨੂੰ ਟੁੰਬਿਆ ਕਿ ਜ਼ਰਾ ਸੋਚੋ ਕਿ ਦੇਸ਼ ਭਗਤ ਗਦਰੀ ਬਾਬਿਆਂ ਨੇ ਆਪਣੇ ਜਿਸਮਾਂ ਤੇ ਜ਼ੁਲਮੋ-ਤਸ਼ੱਦਦ ਦਾ ਉਹ ਭਿਆਨਕ ਦੌਰ ਕਿਵੇਂ ਹੰਡਾਇਆ ਹੋਵੇਗਾ ਜਿਸ ਬਾਰੇ ਸੁਣਦਿਆਂ ਸੋਚਦਿਆਂ ਵੀ ਰੌਂਗਟੇ ਖੜੇ ਹੋ ਜਾਂਦੇ ਹਨ।
ਇਸ ਮੌਕੇ ਚੰਡੀਗੜ੍ਹ ਤੋਂ ਆਏ ਬੀਬੀ ਦਲਬੀਰ ਕੌਰ ਨੇ ਜਿੱਥੇ ਬਾਬਾ ਜੀ ਨਾਲ ਬੀਤੇ ਪਲਾਂ ਨੂੰ ਚੇਤੇ ਕੀਤਾ ਉੱਥੇ ਬਾਬਾ ਜੀ ਦੇ ਵਿਚਾਰਾਂ ਦੀ ਰੌਸ਼ਨੀ ਵਿੱਚ ਲੋਕਾਂ ਨੂੰ ਸੱਦਾ ਦਿੱਤਾ ਕਿ ਓਹ ਆਪਣੇ ਹੁਨਰ ਨੂੰ ਵਿਕਸਿਤ ਕਰਨ, ਆਪਣੀ ਇਮਾਨਦਾਰੀ ਨੂੰ ਰੋਜ਼ ਪਰਖਣ  ਅਤੇ ਹਰ ਕੰਮ ਨੂੰ ਪੂਰੀ ਜ਼ਿੰਮੇਦਾਰੀ ਨਾਲ ਨੇਪਰੇ ਚਾੜ੍ਹਨ। ਅਸੀਂ ਜਿੱਥੇ ਰਹਿ  ਰਹੇ ਹਾਂ ਉਸ ਧਰਤੀ ਨੂੰ, ਉੱਥੋਂ ਦੇ ਬਸ਼ਿੰਦਿਆਂ ਨੂੰ ਹੋਰ ਅੱਗੇ ਲਿਜਾਣਾ ਸਦਾ ਫਰਜ਼ ਬਣਦਾ  ਹੈ। ਕਾਬਿਲੇ  ਜ਼ਿਕਰ ਹੈ ਕਿ ਬੀਬੀ ਦਲਬੀਰ ਕੌਰ ਮਹਾਨ ਦੇਸ਼ ਭਗਤ ਬਾਬਾ ਗੁਰਮੁਖ ਸਿੰਘ ਜੀ ਦੀ ਭਤੀਜੀ ਹਨ। ਵੱਲੋਂ ਸੱਦਾ
ਮਾਸਟਰ ਜਸਦੇਵ ਸਿੰਘ ਲਲਤੋਂ ਦਾ ਲਿਖਿਆ ਨਾਟਕ ਬੁੱਤ ਬੋਲ ਪਿਆ ਹਲੂਣਾ ਦੇਣ ਵਾਲਾ ਸਟੇਜ ਡਰਾਮਾ ਸੀ ਜਿਸ ਵਿੱਚ ਉਹਨਾਂ ਸਾਰੇ ਲੋਕਾਂ ਦੇ ਦਿਲਾਂ ਦੀ ਆਵਾਜ਼ ਸਮਾਈ ਹੋਈ ਸੀ ਜਿਹੜੇ ਬਾਬਾ ਜੀ ਦੇ ਬੁੱਤ ਨੂੰ ਤੋੜੇ ਜਾਣ  ਦੀ ਘਟਨਾ ਤੋਂ ਬੇਹੱਦ
ਦੁਖੀ ਹੋਏ ਹਨ। 
ਉਜਾਗਰ ਸਿੰਘ ਬੱਦੋਵਾਲ ਨੇ ਮਤੇ ਪੜ੍ਹਦਿਆਂ ਬੜੇ ਸੰਖੇਪ ਵਿੱਚ ਇਸ ਸਾਰੇ ਘਟਨਾਕ੍ਰਮ ਦੀ ਜਾਣਕਾਰੀ ਦੁਹਰਾਈ।
  

Saturday, February 28, 2015

ਬਾਬਾ ਗੁਰਮੁਖ ਸਿੰਘ ਲਲਤੋਂ ਦੀ 38 ਵੀਂ ਬਰਸੀ ਮਨਾਈ ਜਾਏਗੀ 15 ਮਾਰਚ ਨੂੰ

ਲਲਤੋਂ ਖੁਰਦ ਸਕੂਲ ਵਿਖੇ ਹੋਵੇਗਾ ਮੁੱਖ ਸਮਾਗਮ  
ਲੁਧਿਆਣਾ: 28 ਫਰਵਰੀ 2015: (ਰੈਕਟਰ ਕਥੂਰੀਆ//ਪੰਜਾਬ ਸਕਰੀਨ):
ਗਦਰੀ ਬਾਬਾ ਗੁਰਮੁਖ ਸਿੰਘ ਯਾਦਗਾਰ ਕਮੇਟੀ ਲਲਤੋਂ ਖੁਰਦ ਵੱਲੋਂ ਇਸ ਮਹਾਨ  ਗਦਰੀ ਸੂਰਮੇ ਦੀ 38ਵੀਂ ਬਰਸੀ ਰਵਾਇਤੀ ਜੋਸ਼ੋ ਖਰੋਸ਼ ਅਤੇ ਇਨਕ਼ਲਾਬੀ ਜਾਹੋ ਜਲਾਲ ਨਾਲ ਮਨਾਈ ਜਾਏਗੀ। ਇਹ ਸਮਾਗਮ 15 ਮਾਰਚ ਨੂੰ ਲਲਤੋਂ ਖੁਰਦ ਸਕੂਲ ਵਿਖੇ ਸਵੇਰੇ ਇਸਦਾ ਰਸਮੀ ਐਲਾਨ ਕਮੇਟੀ ਵੱਲੋਂ ਪੰਜਾਬੀ ਭਵਨ ਵਿੱਚ ਆਪਣੀ ਇੱਕ ਵਿਸ਼ੇਸ਼ ਮੀਟਿੰਗ ਮਗਰੋਂ ਕੀਤਾ ਗਿਆ। ਬਾਬਾ ਜੀ ਦੇ ਬੁੱਤ ਦੀ ਭੰਨਤੋੜ ਅਤੇ ਇਸ ਭੰਨਤੋੜ ਦੇ ਦੋਸ਼ੀਆਂ ਦੇ ਗਿਰਫਤਾਰੀ ਵਿੱਚ ਸ਼ਰਮਨਾਕ ਦੇਰੀ ਕਾਰਨ ਪੈਦਾ ਹੋਈਆਂ ਚੁਣੌਤੀਆਂ ਦੇ ਕਾਰਣ ਉਹਨਾਂ ਸਾਰੀਆਂ ਸਫਾਂ ਲਈ ਇਹ ਐਲਾਨ ਇੱਕ ਵਿਸ਼ੇਸ਼ ਮਹਤਵ ਰੱਖਦਾ ਹੈ ਜਿਹੜੀਆਂ ਸਫਾਂ ਦੇਸ਼ਭਗਤਾਂ ਦੀਆਂ ਕੁਰਬਾਨੀਆਂ ਤੋਂ ਜਾਣੂ ਹਨ। ਕਮੇਟੀ ਮੈਂਬਰਾਂ ਨੇ ਕਿਹਾ ਕਿ ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਦੇ ਇਸ ਮਹਾਨ ਸਾਥੀ ਦਾ ਅਪਮਾਨ ਕਦਾਚਿਤ ਬਰਦਾਸ਼ਤ ਨਹੀਂ ਕੀਤਾ ਜਾਏਗਾ। ਸਰਕਾਰ ਇਸ ਮਾਮਲੇ ਨੂੰ ਲੈ ਕੇ  ਦੇਸ਼ ਭਗਤ ਸ਼ਕਤੀਆਂ ਦਾ ਇਮਤਿਹਾਨ ਨਾ ਲਵੇ। ਇਸ ਬਰਸੀ ਦੇ ਆਯੋਜਨ ਸਮੇਂ ਕਈ ਤਰਾਂ ਦੇ ਪ੍ਰੋਗਰਾਮ ਹੋਣਗੇ।ਇੰਕ਼ਲਾਬੀ ਗੀਤ ਸੰਗੀਤ ਦੇ ਨਾਲ ਨਾਲ ਕਵੀਸ਼ਰੀ, ਕੋਰੀਓਗ੍ਰਾਫੀ, ਨਾਟਕ ਅਤੇ ਕਈ ਹੋਰ ਆਈਟਮਾਂ ਪੇਸ਼ ਕੀਤੀਆਂ ਜਾਣਗੀਆਂ। ਕਮੇਟੀ ਨੇ ਕਿਹਾ ਹੈ ਕਿ ਜੇਕਰ ਸਾਡੀ ਜ਼ਮੀਰ ਜਾਗਦੀ ਹੈ, ਜੇਕਰ ਸਦਾ ਖੂਨ ਸੱਚਾ ਹੈ, ਜੇਕਰ ਸਾੜਿਆ ਆਂਖ ਜਾਗਦੀ ਹੈ, ਜੇਕਰ ਅਸੀਂ ਦੇਸ਼ ਭਗਤਾਂ ਦੇ ਵਾਰਸ ਹਾਂ ਤਾਂ ਹਰ ਘਰ ਚੋਣ ਆਓ ਅਤੇ ਇਸ ਦੇਸ਼ ਭਗਤ ਮੇਲੇ ਵਿੱਚ ਸ਼ਾਮਲ ਹੋਵੋ। 

Thursday, February 05, 2015

ਬਾਬਾ ਗੁਰਮੁਖ ਸਿੰਘ ਲਲਤੋਂ ਹੁਰਾਂ ਦੇ ਸਮਰਥਕਾਂ ਵੱਲੋਂ ਲੁਧਿਆਣਾ ਵਿੱਚ ਵਿਸ਼ਾਲ ਰੋਸ ਰੈਲੀ

ਖੱਬੇ ਪੱਖੀ ਅਤੇ ਦੇਸ਼ ਭਗਤ ਸੰਗਠਨਾਂ ਨੇ ਦਿੱਤੀ ਤਿੱਖੇ ਐਕਸ਼ਨ ਦੀ ਚੇਤਾਵਨੀ
ਲੁਧਿਆਣਾ: 5 ਫਰਵਰੀ 2015: (ਰੈਕਟਰ ਕਥੂਰੀਆ): 
ਲੁਧਿਆਣਾ ਅੱਜ ਫਿਰ ਲਾਲੋਲਾਲ ਸੀ। ਲਾਲ ਝੰਡੀਆਂ ਨਾਲ, ਰੋਹ ਨਾਲ, ਜੋਸ਼ ਨਾਲ ਅਤੇ ਦੇਸ਼ ਭਗਤੀ ਦੇ ਜਜ਼ਬੇ ਨਾਲ। ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਦੇ ਨੇੜਲੇ ਸਾਥੀ ਅਤੇ ਗਦਰ ਦੀ ਲਹਿਰ ਦੇ ਪ੍ਰੇਰਨਾ ਸਰੋਤ ਸਾਥੀ ਬਾਬਾ ਗੁਰਮੁਖ ਸਿੰਘ ਲਲਤੋਂ ਹੁਰਾਂ ਦੇ ਬੁੱਤ ਦੀ ਬੇਹੁਰਮਤੀ ਦੀ ਚੁਨੌਤੀ ਨੂੰ ਕਬੂਲ ਕਰਦਿਆਂ ਦੇਸ਼ ਭਗਤ ਸਫਾਂ ਨੇ ਚੇਤਾਵਨੀ ਦਿੱਤੀ ਕਿ ਇਸ ਅਪਮਾਨ ਨੂੰ ਅਸੀਂ ਹਰਗਿਜ਼ ਸਹਿਣ ਨਹੀਂ ਕਰਾਂਗੇ। ਪ੍ਰਸ਼ਾਸਨ ਅਤੇ ਪੁਲਿਸ ਨੇ ਭਾਵੇਂ ਬੇਹੁਰਮਤੀ ਅਤੇ ਭੰਨਤੋੜ ਦੀ ਇਸ ਸ਼ਰਮਨਾਕ ਘਟਨਾ ਨੂੰ ਗੰਭੀਰਤਾ ਨਾਲ ਨਹੀਂ ਸੀ ਲਿਆ ਪਰ ਬੜੇ ਲੰਮੇ ਸੰਘਰਸ਼ਾਂ ਮਗਰੋਂ ਲਈ ਆਜ਼ਾਦੀ ਵਾਸਤੇ ਕੁਰਬਾਨੀਆਂ  ਦੇਣ ਵਾਲੇ ਮਹਾਨ ਦੇਸ਼ ਭਗਤਾਂ ਨੂੰ ਚੇਤੇ ਕਰਦਿਆਂ ਦੇਸ਼ ਭ੍ਗੱਟ ਤਾਕਤਾਂ ਨੇ ਅੱਜ ਫਿਰ ਸੰਕਲਪ ਲਿਆ ਕਿ ਜੇ  ਲੋੜ ਪਈ ਤਾਂ ਅਸੀਂ ਇਸ ਸੰਘਰਸ਼ ਨੂੰ ਹੋਰ ਤਿੱਖਾ ਕਰਨ ਤੋਂ  ਪਿੱਛੇ ਨਹੀਂ ਹਟਾਂਗੇ। 
ਕਾਬਿਲੇ ਜ਼ਿਕਰ ਹੈ ਕਿ ਚਾਰ ਮਹੀਨੇ ਬੀਤਣ ਦੇ ਬਾਵਜੂਦ ਮਹਾਨ ਦੇਸ਼ ਭਗਤ ਗਦਰੀ ਬਾਬਾ ਗੁਰਮੁਖ ਸਿੰਘ ਜੀ ਦੇ ਆਦਮਕਦ ਬੁੱਤ  ਦੀ ਭੰਨਤੋੜ ਕਰਨ ਵਾਲੇ ਦੋਸ਼ੀਆਂ ਨੂੰ ਅਜੇ ਤੱਕ ਗ੍ਰਿਫਤਾਰ ਨਹੀਂ  ਕੀਤਾ ਗਿਆ। ਇਸ ਸਾਜ਼ਿਸ਼ੀ ਚੁੱਪ ਦੇ ਖਿਲਾਫ਼ ਰੋਹ ਪ੍ਰਗਟ ਕਰਨ ਲਈ ਅੱਜ ਕੋਮਾਗਾਟਾ ਮਾਰੂ ਕਮੇਟੀ  ਲੁਧਿਆਣਾ, ਜ਼ਿਲੇ ਦੀਆਂ ਦਰਜਨਾਂ ਕਿਸਾਨ ਅਤੇ ਮਜਦੂਰ ਜੱਥੇਬੰਦੀਆਂ , ਜਮਹੂਰੀ ਅਤੇ ਤਰਕਸ਼ੀਲ ਸੰਗਠਨਾਂ, ਅਤੇ ਹੋਰ ਲੋਕ ਪੱਖੀ ਜੱਥੇਬੰਦੀਆਂ ਅੱਜ ਬਾਅਦ  ਤੱਕ ਰਹੀਆਂ।
ਸਭ ਤੋਂ ਪਹਿਲਾਂ ਮਿੰਨੀ ਸਕੱਤਰੇਤ ਦੇ ਬਾਹਰ ਭਰਵੀਂ ਰੈਲੀ ਕੀਤੀ ਗਈ। ਜ਼ੋਰਦਾਰ ਨਾਅਰਿਆਂ ਨੇ ਆਲੇ ਦੁਆਲੇ ਨੂੰ ਦੱਸ ਦਿੱਤਾ ਕਿ ਦੇਸ਼ ਭਗਤਾਂ ਦੇ ਵਾਰਿਸ ਅਜੇ ਜਿਊਂਦੇ ਹਨ। ਬੁਲਾਰਿਆਂ ਨੇ ਵਾਰੋਵਾਰੀ ਇਸ ਸਾਜਿਸ਼ੀ ਹਰਕਤ ਪਿੱਛੇ ਲੁਕੇ ਨਾਪਾਕ ਇਰਾਦਿਆਂ ਨੂੰ ਬੇਨਕਾਬ ਕੀਤਾ। ਦੇਸ਼ ਭਗਤ ਯਾਦਗਾਰ ਕਮੇਟੀ ਜਲੰਧਰ ਵੱਲੋਂ ਉਚੇਚੇ ਤੌਰ ਤੇ ਪੁੱਜੇ ਕਾਮਰੇਡ ਗੁਰਮੀਤ ਸਿੰਘ ਨੇ ਚੇਤੇ ਕਰਾਇਆ ਕਿ ਪਹਿਲਾਂ ਵੀ ਜਦੋ ਜਦੋਂ ਦੇਸ਼ ਦੁਸ਼ਮਣ ਅਨਸਰਾਂ ਨੇ ਦੇਸ਼ ਭਗਤਾਂ ਨੂੰ ਚੁਨੌਤੀ ਦਿੱਤੀ ਹੈ ਤਾਂ ਉਸਦਾ ਮੂੰਹ ਤੋੜ ਜੁਆਬ ਦਿੱਤਾ ਗਿਆ ਹੈ। ਹੁਣ ਵੀ ਅਸੀਂ ਕਿਸੇ ਅੰਦੋਲਨ ਤੋਂ ਪਿਛੇ ਨਹੀਂ ਹਟਾਂਗੇ। ਲੋੜ  ਪਈ ਤਾਂ ਡਾਂਗਾਂ ਗੋਲੀਆਂ ਦਾ ਸਾਹਮਣਾ ਵੀ ਕੀਤਾ ਜਾਏਗਾ  ਪਰ ਦੇਸ਼ ਭਗਤੀ ਦੇ ਜਜ਼ਬੇ ਨੂੰ ਮਾਰਨ ਵਾਲੀ ਸਾਜ਼ਿਸ਼ ਕਿਸੇ ਵੀ ਹਾਲਤ ਵਿੱਚ ਸਫਲ  ਨਹੀਂ ਹੋਣ ਦਿੱਤੀ ਜਾਏਗੀ। ਉਹਨਾਂ ਕਿਹਾ ਕਿ  ਇਸ ਸ਼ਰਮਨਾਕ ਕਾਰੇ ਪਿਛੇ ਕਿਸੇ ਐਮ ਐਲ ਏ ਦੇ ਰਲੇ ਹੋਣ ਦੀ ਗੱਲ ਕੀਤੀ ਜਾ ਰਹੀ ਹੈ ਪਰ ਅਸਲ ਵਿੱਚ ਬਾਦਲ ਅਤੇ ਮੋਦੀ ਤੱਕ  ਸਾਰੇ   ਹੀ ਦੇਸ਼ ਦੇ ਖਿਲਾਫ਼ ਸਾਜਿਸ਼ਾਂ ਵਿੱਚ ਰਲੇ ਹੋਏ ਹਨ। ਕਾਮਰੇਡ ਗੁਰਮੀਤ ਨੇ ਇਤਿਹਾਸ ਦੇ ਵਰਕੇ ਫਰੋਲਦਿਆਂ ਲੋਕ ਪੱਖੀ ਤਾਕਤਾਂ ਦੇ ਸ਼ਾਨਦਾਰ ਵਿਰਸੇ ਅਤੇ ਅਜਿਹੇ ਕਈ ਐਕਸ਼ਨਾਂ ਦਾ ਵੀ ਜ਼ਿਕਰ ਕੀਤਾ। 
ਕਈ ਹੋਰ ਬੁਲਾਰਿਆਂ ਨੇ ਵੀ ਪੁਲਿਸ ਅਤੇ ਸਿਆਸੀ ਗੁੰਡਾ ਗਠਜੋੜ ਦੀ ਨਿਖੇਧੀ ਕਰਦਿਆਂ ਇਸ ਨੂੰ ਬੇਨਕਾਬ ਕੀਤਾ।
ਇਸ ਬੁੱਤ ਦੀ ਬੇਹੁਰਮਤੀ ਕਰਨ ਵਾਲੇ ਅਨਸਰਾਂ ਦੀ ਗਿਰਫਤਾਰੀ ਦੀ ਮੰਗ ਨੂੰ ਲੈ ਕੇ 7 ਵਾਰ ਪੁਲਿਸ ਕਮਿਸ਼ਨਰ ਨਾਲ ਮੁਲਾਕਾਤ ਕੀਤੀ ਜਾ ਚੁੱਕੀ ਹੈ। ਤਿੰਨ ਵਾਰ ਡਿਪਟੀ ਕਮਿਸ਼ਨਰ ਨੂੰ ਮਿਲਿਆ ਜਾ ਚੁੱਕਿਆ ਹੈ। ਰੈਲੀਆਂ, ਧਰਨਿਆਂ ਅਤੇ ਰੋਸ ਵਖਾਵਿਆਂ ਦੇ ਬਾਵਜੂਦ ਪੁਲਿਸ ਅਤੇ ਪ੍ਰਸ਼ਾਸਨ ਦੇ ਕੰਨਾਂ ਉੱਤੇ ਜੂੰ ਨਹੀਂ ਸਰਕ ਰਹੀ। ਅੱਜ ਇਹ ਰੋਸ ਮਾਰਚ ਚੇਤਾਵਨੀ ਸੀ ਕਿ ਜੇ ਅਜੇ ਵੀ ਕੋਈ ਠੋਸ ਕਦਮ ਨਾ ਚੁੱਕਿਆ ਗਿਆ ਤਾਂ ਅੰਦੋਲਨ ਹੋਰ ਤਿੱਖਾ ਹੋਵੇਗਾ।
ਬੁਲਾਰਿਆਂ ਨੇ ਜੋਰ ਦਿੱਤਾ ਕਿ ਅਸੀਂ ਆਪਣੇ ਨਾਇਕਾਂ ਦੇ ਸਨਮਾਣ ਕਰਨਾ ਵੀ ਜਾਂਦੇ ਹਾਂ ਅਤੇ ਅਪਮਾਨ ਕਰਨ ਵਾਲਿਆਂ ਨੂੰ ਸਬਕ ਸਿਖਾਉਣਾ ਵੀ ਸਾਨੂੰ ਆਉਂਦਾ ਹੈ।  ਬੁਲਾਰਿਆਂ ਨੇ ਕਿਹਾ ਕੀ ਜੇ ਕਿਸੇ ਬਾਬੇ ਦੀ ਫਿਲਮ ਦੇ ਪੋਸਟਰ ਨੂੰ ਕੋਈ ਪਾੜ੍ਹ ਜਾਏ ਤਾਂ ਉਸ ਪੋਸਟਰ ਦੀ ਰਾਖੀ ਲਈ ਕਾਰਵਾਈ ਹੁੰਦੀ ਹੈ ਪਰ ਦੇਸ਼ ਭਗਤਾਂ ਦੇ ਮਾਮਲੇ ਵਿੱਚ ਸ਼ਰਮਨਾਕ ਨਮੋਸ਼ੀ ਭਰੀ ਚੁੱਪ ਵਰਤੀ ਗਈ ਹੈ।
ਇਸ  ਮੌਕੇ ਉੱਤੇ ਕਾਮਰੇਡ ਡੀ ਪੀ ਮੌੜ ਨੇ ਮੰਚ ਸੰਚਾਲਨ ਕੀਤਾ। ਉਜਾਗਰ ਸਿੰਘ ਬੱਦੋਵਾਲ, ਕਾਮਰੇਡ ਬਲਵੰਤ ਸਿੰਘ ਮਖੂ, ਐਡਵੋਕੇਟ ਕੁਲਦੀਪ ਸਿੰਘ, ਕਸਤੂਰੀ ਲਾਲ, ਡਾਕਟਰ ਅਰੁਣ ਮਿੱਤਰਾ, ਕਾਮਰੇਡ ਜਗਦੀਸ਼ ਚੰਦ, ਕਾਮਰੇਡ ਮਨਜੀਤ ਸਿੰਘ, ਜਸਦੇਵ ਸਿੰਘ ਲਲਤੋਂ, ਹਰਜਿੰਦਰ ਸਿੰਘ, ਕਾਮਰੇਡ ਸੁਰਿੰਦਰ ਸਿੰਘ ਜਲਾਲਦੀਵਾਲ, ਸੌਦਾਗਰ ਸਿੰਘ ਘੁਢਾਣੀ, ਕਾਮਰੇਡ ਗੁਰਨਾਮ ਸਿੰਘ ਸਿਧੂ ਅਤੇ ਕਈ ਹੋਰਾਂ ਨੇ ਇਸ ਬਾਰੇ ਆਪਣੇ ਵਿਚਾਰ ਪ੍ਰਗਟਾਏ। ਕਾਮਰੇਡ ਲਖਵਿੰਦਰ ਨੇ ਸਾਵਧਾਨ ਕੀਤਾ ਕਿ ਸਾਡੇ ਮਹਾਂ ਦੇਸ਼ ਭਗਤਾਂ ਨੂੰ ਫਿਰਕੂ ਲੀਹਾਂ ਤੇ ਵੰਡਣ ਦੀ ਸਾਜਿਸ਼ ਵੀ ਜੋਰਾਂ ਤੇ ਹੈ ਸੋ ਇਸਤੋਂ ਸੁਚੇਤ ਰਹਿਣਾ ਜਰੂਰੀ ਹੈ।
ਇਸ ਭਰਵੇਂ ਇਕਠ ਨੂੰ ਦੇਖ ਕੇ ਸਾਰਾ ਪ੍ਰਸ਼ਾਸਨ ਵੀ ਘਬਰਾਇਆ ਹੋਇਆ ਲੱਗ ਰਿਹਾ ਸੀ। ਪੁਲਿਸ ਦੇ ਭਾਰੀ ਬੰਦੋਬਸਤ ਕੀਤੇ ਗਏ ਸਨ। ਡੀਸੀ ਨੇ ਰੋਹ ਭਰੇ ਲੋਕਾਂ ਦਾ ਸਾਹਮਣਾ ਕਰਨ ਦੀ ਬਜਾਏ ਆਪਣਾ ਪ੍ਰਤੀਨਿਧੀ ਭੇਜ ਕੇ ਮੰਗ ਪੱਤਰ ਲਿਆ ਅਤੇ ਯੋਗ ਕਾਰਵਾਈ ਦਾ  ਭਰੋਸਾ ਵੀ ਦਿੱਤਾ।

Wednesday, February 04, 2015

ਬਾਬਾ ਗੁਰਮੁਖ ਸਿੰਘ ਹੁਰਾਂ ਦੇ ਬੁੱਤ ਦੀ ਬੇਹੁਰਮਤੀ ਦਾ ਮਾਮਲਾ ਗਰਮਾਇਆ

 5 ਦੇ ਰੋਸ ਵਖਾਵੇ ਮਗਰੋਂ ਕਿਸੇ ਵੀ ਵੇਲੇ ਫਟ ਸਕਦਾ ਹੈ ਲੋਕ ਰੋਹ ਦਾ ਜਵਾਲਾਮੁਖੀ
ਲੁਧਿਆਣਾ: 5 ਫਰਵਰੀ 2015: (ਰੈਕਟਰ ਕਥੂਰੀਆ):
ਰੋਹ ਵਿੱਚ 80 ਸਾਲਾ ਬਾਬਾ ਗੁਰਦੀਪ ਸਿੰਘ
ਦੇਸ਼ ਭਗਤ ਵੀ ਹਮੇਸ਼ਾਂ ਰਹੇ ਹਨ ਅਤੇ ਦੇਸ਼ ਨਾਲ ਗਦਾਰੀਆਂ ਕਰਨ ਵਾਲੇ ਵੀ ਆਪਣੇ ਸ਼ਰਮਨਾਕ ਕਾਰੀਆਂ ਤੋਂ ਕਦੇ ਬਾਜ਼ ਨਹੀਂ ਆਏ। ਲੋਕਾਂ ਦੇ ਦੁੱਖ ਸੁੱਖ ਨਾਲ ਖੜੇ  ਹੋਣ ਵਾਲਿਆਂ ਨੇ ਵੀ ਆਪਣੀ ਜ਼ਿੰਦਗੀ ਲੋਕਾਂ ਲੇਖੇ ਲਾਉਣ ਤੋਂ ਕਦੇ ਗੁਰੇਜ਼ ਨਹੀਂ ਕੀਤਾ ਅਤੇ ਲੋਕਾਂ ਨਾਲ ਦੁਸ਼ਮਣੀ ਦਾ ਕਲੰਕ ਖੱਟਣ ਵਾਲੇ ਵੀ ਹਮੇਸ਼ਾਂ ਰਹੇ। ਸ਼ਾਇਦ ਇਹੀ ਹੈ ਨੇਕੀ ਅਤੇ ਬੜੀ ਦਰਮਿਆਨ ਹਰ ਪਲ ਜਾਰੀ ਰਹਿਣ ਵਾਲੀ ਜੰਗ। ਸ਼ਾਇਦ ਇਹੀ ਹੈ ਅਸਲੀ ਧਰਮਯੁਧ। ਹੁਣ ਇਸ ਜੰਗ ਦੀ ਦਸਤਕ ਸੁਣਾਈ ਦੇ ਰਹੀ ਹੈ ਲੁਧਿਆਣਾ ਦੇ ਪਿੰਡ ਲਲਤੋਂ ਕਲਾਂ ਵਿੱਚ। ਪਿੰਡ ਦੇ ਲੋਕਾਂ ਦਾ ਜਵਾਲਾਮੁਖੀ ਕਿਸੇ ਵੀ ਵੇਲੇ ਫਟ ਸਕਦਾ ਹੈ। ਲੋਕ ਸਖਤ ਗੁੱਸੇ ਵਿੱਚ ਹਨ ਕਿ ਦੇਸ਼ ਦੀ ਆਜ਼ਾਦੀ ਦੇ ਨਾਇਕ ਬਾਬਾ  ਗੁਰਮੁਖ ਸਿੰਘ ਲਲਤੋਂ ਦੇ ਬੁੱਤ ਦੀ ਬੇਹੁਰਮਤੀ ਕਰਨ ਵਾਲੇ ਅਨਸਰਾਂ ਦਾ ਪੁਲਿਸ ਅਜੇ ਵੀ ਪਤਾ ਨਹੀਂ ਲਾ ਰਹੀ। ਕੁਝ ਲੋਕਾਂ ਦਾ ਕਹਿਣਾ ਹੈ ਕਿ ਪੁਲਿਸ ਨੂੰ ਸਭ ਕੁਝ ਪਤਾ ਹੈ ਕਿ ਕਿਵੇਂ ਇੱਕ ਐਮ ਐਲ ਏ ਦੇਸ਼ ਭਗਤਾਂ ਦੇ ਦੋਖੀ ਅਨਸਰਾਂ ਦੀ ਪੁਸ਼ਤ ਪਨਾਹੀ ਕਰ ਰਿਹਾ ਹੈ।
ਇਸ ਮਹਾਨ ਸ਼ਖਸੀਅਤ  ਦੇ ਬੁੱਤ ਦੀ ਭੰਨ ਤੋੜ ਕਰਨ ਵਾਲੇ ਇਸ ਕਾਰੇ ਵਿਰੁਧ ਪੰਜ ਫਰਵਰੀ 2015 ਨੂੰ ਹੋਣ ਵਾਲੇ ਰੋਸ ਵਖਾਵੇ ਤੋਂ ਇੱਕ ਦਿਨ ਪਹਿਲਾਂ 4 ਫ਼ਰਵਰੀ ਨੂੰ ਜਦੋਂ ਪੰਜਾਬ ਸਕਰੀਨ ਦੀ ਟੀਮ ਨੇ ਪਿੰਡ ਦਾ ਦੌਰਾ ਕੀਤਾ ਤਾਂ ਪਿੰਡ ਵਿੱਚ ਰੋਸ ਵਖਾਵੇ ਦੀਆਂ ਤਿਆਰੀਆਂ ਜ਼ੋਰਾਂ ਤੇ ਸਨ। ਲੋਕ ਖੁਦ ਲੋਕਾਂ ਦੀ ਲਾਮਬੰਦੀ ਕਰਨ ਵਿੱਚ ਰੁਝੇ ਹੋਏ ਸਨ। ਨੌਜਵਾਨਾਂ ਦੇ ਨਾਲ ਨਾਲ ਬਜੁਰਗ ਵੀ ਸਰਗਰਮ ਸਨ। ਇਸ ਮੌਕੇ ਇਸ ਐਕਸ਼ਨ ਕਮੇਟੀ ਦੇ ਇੱਕ ਸਰਗਰਮ ਨੌਜਵਾਨ ਜਸਮੇਰ ਸਿੰਘ ਨੇ ਦੱਸਿਆ ਕਿ ਕਿਵੇਂ ਇਸ ਬੁੱਤ ਤੇ ਕੀਤੇ ਗਿਆ ਹਮਲਾ ਅਸਲ ਵਿੱਚ ਵਿਚਾਰਧਾਰਾ ਦੇ ਖਿਲਾਫ਼ ਕੀਤਾ ਗਿਆ ਹਮਲਾ ਹੈ। ਕਾਮਰੇਡ ਗੁਰਨਾਮ ਸਿੰਘ ਸਿਧੂ ਨੇ ਕਿਹਾ ਕਿ ਜੇ ਕਲ੍ਹ ਦੇ ਰੋਸ ਵਖਾਵੇ ਨਾਲ ਵੀ ਕੋਈ ਠੋਸ ਕਾਰਵਾਈ ਨ ਹੋਈ ਤਾਂ ਅਗਲਾ ਐਕਸ਼ਨ ਹੋਰ ਵੀ ਸਖਤ ਹੋਵੇਗਾ। ਉਜਾਗਰ ਸਿੰਘ ਲਲਤੋਂ ਨੇ ਇਸ ਸਾਰੇ ਮਾਮਲੇ ਵਿੱਚ ਇੱਕ ਐਮ ਐਲ ਏ ਦਾ ਨਾਮ ਲਿਆ। ਕਾਮਰੇਡ ਕਸਤੂਰੀ ਲਾਲ ਨੇ ਇਸ ਸ਼ਰਮਨਾਕ ਹਰਕਤ ਕਾਰਣ ਦੇਸ਼ ਭਗਤ ਹਲਕਿਆਂ ਵਿੱਚ ਪੈਦਾ ਹੋਏ ਰੋਸ ਬਾਰੇ ਚਾਨਣਾ ਪਾਇਆ।
ਇਸ ਮੌਕੇ ਪੰਜਾਬ ਸਕਰੀਨ ਦੀ ਟੀਮ ਨੇ 80 ਸਾਲਾਂ ਦੀ ਬਜੁਰਗ ਅਵਸਥਾ ਵਾਲੇ ਗੁਰਦੀਪ ਸਿੰਘ ਨਾਲ ਵੀ ਮੁਲਾਕਾਤ ਕੀਤੀ . ਇਹ ਬਜੁਰਗ ਬਾਬਾ ਗੁਰਮੁਖ ਸਿੰਘ ਦੀ ਚਰਚਾ ਸੁਣ ਕੇ ਇਸ ਬਿਰਧ ਅਵਸਥਾ ਵਿੱਚ ਮੰਜੇ ਨੂੰ ਛੱਡ ਕੇ ਕੈਮਰਾ ਟੀਮ ਤੱਕ ਪਹੁੰਚ ਗਿਆ ਅਤੇ ਬਾਬਾ ਗੁਰਮੁਖ ਸਿੰਘ ਹੁਰਾਂ ਦੇ ਜੀਵਨ ਕਾਲ ਦੀਆਂ ਕਈ ਦਿਲਚਸਪ ਗੱਲਾਂ ਸੁਣਾਈਆਂ।  ਇਸ ਬਜੁਰਗ ਨੇ ਬਾਬਾ ਗੁਰਮੁਖ ਸਿੰਘ ਹੁਰਾਂ ਦੇ ਬੁੱਤ ਦੀ ਉਸਾਰੀ ਵਿੱਚ ਵੀ ਸਰਗਰਮ ਯੋਗਦਾਨ ਪਾਇਆ। ਇਸ ਬਜੁਰਗ ਨੇ ਪਿੰਡ ਦੀ ਟੀਮ ਨੂੰ ਨਾਲ ਲੈ ਕੇ ਪੰਜਾਬ ਸਕਰੀਨ ਨੂੰ ਉਹ ਮਕਾਨ ਵੀ ਦਿਖਾਇਆ ਜਿੱਥੇ ਬਾਬਾ ਗੁਰਮੁਖ ਸਿੰਘ ਰਹਿੰਦੇ ਹੁੰਦੇ ਸਨ। ਹੁਣ ਇਸ ਪਾਵਨ ਅਸਥਾਨ ਤੇ ਇੱਕ ਲਾਇਬ੍ਰੇਰੀ ਸੁਸ਼ੋਭਿਤ ਹੈ।

ਕੀ ਦੇਸ਼ ਦੇ ਨਾਇਕਾਂ ਦਾ ਅਪਮਾਨ ਸਰਕਾਰਾਂ ਲਈ ਕੋਈ ਅਰਥ ਨਹੀਂ ਰੱਖਦਾ?

ਕੀ ਦੇਸ਼ ਦੇ ਨਾਇਕਾਂ ਦਾ ਅਪਮਾਨ ਸਰਕਾਰਾਂ ਲਈ ਕੋਈ ਅਰਥ ਨਹੀਂ ਰੱਖਦਾ? 
ਲੁਧਿਆਣਾ: 4 ਫਰਵਰੀ 2014:  
ਜਦੋਂ ਤੱਕ ਆਪਣੇ ਵੇਲਿਆਂ ਦਾ ਲੋਕ ਨਾਇਕ ਸੱਦਾਮ ਹੁਸੈਨ ਆਪਣੇ ਦੁਸ਼ਮਣਾਂ ਦੇ ਹੇਠ ਨਹੀਂ ਆਇਆ ਓਹ ਉਸਦੇ ਬੁੱਤਾਂ ਨੂੰ ਰੱਸਿਆਂ ਨਾਲ ਖਿਚ ਕੇ ਫਾਂਸੀਆਂ ਲਾਉਂਦੇ ਰਹੇ। ਉਹਨਾਂ ਦੇ ਇਹ ਅੰਦਾਜ਼ ਉਹਨਾਂ ਦੇ ਮਣਸ਼ਿਆਂ ਨੂੰ ਜ਼ਾਹਿਰ ਕਰਦੇ ਸਨ। ਉਹਨਾਂ ਦੀ ਨਫਰਤ ਅਤੇ ਇਰਾਦਿਆਂ ਨੂੰ ਜ਼ਾਹਿਰ ਕਰਦੇ ਸਨ। ਉਹਨਾਂ ਆਪਣੇ ਇਰਾਦਿਆਂ ਨੂੰ ਜ਼ਾਹਿਰ ਕਰਨ ਦੇ ਮਾਮਲੇ ਵਿੱਚ ਕੋਈ ਓਹਲਾ ਨਹੀਂ ਸੀ ਰੱਖਿਆ। 
ਅੱਜ ਇਹ ਗੱਲ ਯਾਦ ਆ ਰਹੀ ਹੈ ਭਾਰਤੀ ਮਾਮਲਿਆਂ ਵਿੱਚ। ਗਦਰ ਦੀ ਲਹਿਰ ਦੇ ਹੀਰੋ ਅਤੇ ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਦੇ ਸਾਥੀ ਬਾਬਾ ਗੁਰਮੁਖ ਸਿੰਘ ਲਲਤੋਂ ਦੇ ਬੁੱਤ ਦੀ ਭੰਨਤੋੜ ਕੀਤਿਆਂ ਕਰੀਬ ਚਾਰ ਮਹੀਨੇ ਬੀਤ ਹਨ। ਇਹ ਵਾਰਦਾਤ ਹੋਈ 3 ਅਕਤੂਬਰ 2014 ਨੂੰ। ਪਿੰਡ ਦੇ ਦੇਸ਼ ਭਗਤ ਲੋਕਾਂ ਨੇ ਕੌਮਾਗਾਟਾ ਮਾਰੂ ਯਾਦਗਾਰ ਕਮੇਟੀ ਨਾਲ ਇੱਕਜੁੱਟਤਾ ਪ੍ਰਗਟ ਕਰਦਿਆਂ ਲਲਤੋਂ ਕਲਾਂ ਦੀ  ਚੌਂਕੀ ਤੇ ਦਬਾਅ ਬਣਾ ਕੇ ਪਰਚਾ ਦਰਜ ਕਰਾਇਆ। ਇਸ ਤੋਂ ਬਾਅਦ ਕਾਰਵਾਈ ਲਈ 7 ਵਾਰ ਪੁਲਿਸ ਕਮਿਸ਼ਨਰ ਅਤੇ 3 ਵਾਰ ਡੀ ਸੀ ਲੁਧਿਆਣਾ ਨਾਲ ਮੁਲਾਕਾਤ ਕੀਤੀ ਗਈ। ਇਸ ਸਭਕੁਝ ਦੇ ਬਾਵਜੂਦ ਜਦੋਂ
ਫਿਰ ਵੀ ਕੋਈ ਗੱਲ ਨਹੀਂ ਬਣੀ ਤਾਂ 27 ਅਕਤੂਬਰ ਨੂੰ ਪੁਲਿਸ ਕਮਿਸ਼ਨਰ ਸਾਹਮਣੇ ਰੋਸ ਵਖਵਾ ਕੀਤਾ ਗਿਆ। ਇਸਤੇ ਵੀ ਕੋਈ ਅਸਰ ਨਹੀਂ ਹੋਇਆ ਤਾਂ 20 ਨਵੰਬਰ 2014 ਨੂੰ ਪੁਲਿਸ ਚੌਂਕੀ ਲਲਤੋਂ ਕਲਾਂ ਮੂਹਰੇ ਧਰਨਾ ਦੇ ਕੇ ਟ੍ਰੈਫਿਕ ਜਾਮ ਕੀਤਾ ਗਿਆ। ਦੇਸ਼ ਭਗਤ ਯਾਦਗਾਰ ਕਮੇਟੀ ਵੱਲੋਂ 16 ਦਸੰਬਰ ਨੂੰ ਫਿਰ ਡੀਸੀ  ਨਾਲ ਮੁਲਾਕਾਤ ਕੀਤੀ ਗਈ। ਪੁਲਿਸ ਅਤੇ ਸਰਕਾਰ ਦੀ ਢਿੱਲੀ ਕਾਰਗੁਜ਼ਾਰੀ ਇਹੀ ਜ਼ਾਹਿਰ ਕਰਦੀ ਹੈ ਕਿ ਦੇਸ਼ ਦੇ ਨਾਇਕਾਂ ਦਾ ਅਪਮਾਨ ਉਹਨਾਂ ਲਈ ਕੋਈ ਅਰਥ ਨਹੀਂ ਰੱਖਦਾ। 
ਇਸ ਸਭ ਕੁਝ ਦੇ ਬਾਵਜੂਦ ਪ੍ਰਣਾਲਾ ਉੱਥੇ ਦਾ ਉੱਥੇ। ਅਜੇ ਤੱਕ ਵੀ ਇਸ ਮਹਾਂ ਵਿਅਕਤੀ ਦੇ ਬੁੱਤ 'ਤੇ ਹਮਲਾ ਕਰਨ ਵਾਲੇ ਅਨਸਰਾਂ ਨੂੰ ਕਾਬੂ ਨਹੀਂ ਕੀਤਾ ਜਾ ਸਕਿਆ। ਬੁੱਤ ਉੱਪਰ ਹਮਲਾ ਕਰਨ ਦਾ ਮਕਸਦ ਹੈ ਕਿ ਜੇ ਅੱਜ ਬਾਬਾ ਜੀ ਜਿਊਂਦੇ ਹੁੰਦੇ ਤਾਂ ਇਹਨਾਂ ਅਨਸਰਾਂ ਨੇ ਉਹਨਾਂ ਉੱਪਰ ਵੀ ਹਮਲੇ ਕਰਨੇ ਸਨ। ਪੁਲਿਸ ਦੀ ਕਾਰਗੁਜ਼ਾਰੀ ਦੱਸਦੀ ਹੈ ਕਿ ਪੁਲਿਸ ਨੇ ਉਦੋਂ ਵੀ ਇਹੀ ਕੁਝ ਕਰਨਾ ਸੀ। ਕੀ ਦੇਸ਼ ਵਿੱਚ ਆਜ਼ਾਦੀ ਆਉਣ ਤੋਂ ਬਾਅਦ ਅਜਿਹੇ ਹਮਲੇ ਬਰਦਾਸ਼ਤ ਹੋਣੇ ਚਾਹੀਦੇ ਹਨ? ਕੀ ਮੰਨ ਲਿਆ ਜਾਏ ਆਜ਼ਾਦ ਦੇਸ਼ ਦੇ ਹੁਕਮਰਾਨਾ ਨੂੰ ਅਜਿਹਾ ਕਾਰਾ ਦੇਸ਼ ਧ੍ਰੋਹ  ਨਹੀਂ ਜਾਪਦਾ? ਕੀ ਮੰਨ ਲਿਆ ਜਾਏ ਕਿ ਗੋਰਿਆਂ ਦੇ ਤੁਖਮ ਅਜੇ ਵੀ ਸਰਗਰਮ ਹਨ?
ਜੇ ਅਜਿਹਾ ਵਰਤਾਰਾ ਜਾਰੀ ਰਹਿੰਦਾ ਹੈ ਤਾਂ ਇੱਕ ਗੱਲ ਪੱਕੀ ਹੈ ਕਿ ਦੇਸ਼ ਭਗਤਾਂ ਦੇ ਵਾਰਿਸ ਫਿਰ ਮੈਦਾਨ ਵਿੱਚ ਆਉਣਗੇ। ਗਦਰ ਦੀ ਲਹਿਰ ਫਿਰ ਗੂੰਜੇਗੀ। ਜਦੋਂ ਲੋਕ ਜਾਗ ਪਏ ਤਾਂ ਲੋਕ ਦੁਸ਼ਮਣਾਂ ਨੂੰ ਭੱਜਣ ਲੱਗਿਆਂ ਰਾਹ ਨਹੀਂ ਲਭਣਾ। -ਰੈਕਟਰ ਕਥੂਰੀਆ

Monday, October 06, 2014

ਬਾਬਾ ਗੁਰਮੁਖ ਸਿੰਘ ਦੇ ਬੁੱਤ ਦੀ ਭੰਨਤੋੜ ਇੱਕ ਚੁਨੌਤੀ

ਸਮੂਹ ਦੇਸ਼ ਭਗਤਾਂ ਲਈ ਇੱਕ ਵੰਗਾਰ-ਸਮੂਹ ਹਲਕਿਆਂ ਵੱਲੋਂ ਤਿੱਖੀ ਨਿਖੇਧੀ 
ਲੁਧਿਆਣਾ: 7 ਅਕਤੂਬਰ 2014: (ਪੰਜਾਬ ਸਕਰੀਨ ਬਿਊਰੋ):

ਪਿੰਡ ਲਲਤੋਂ ਕਲਾਂ ਤੋਂ ਇੱਕ ਹਿਰਦੇ ਵੇਧਕ ਖਬਰ ਆਈ ਹੈ। ਦੇਸ਼ ਦੀ ਆਜ਼ਾਦੀ ਅਤੇ ਆਜ਼ਾਦੀ ਤੋਂ ਬਾਅਦ ਦੇਸ਼ ਭਗਤਾਂ ਦੇ ਸੁਪਨਿਆਂ ਦਾ ਭਾਰਤ ਸਿਰਜਣ ਲਈ ਆਪਣੇ ਆਖਿਰੀ ਸਾਹਾਂ ਤੀਕ ਸੰਘਰਸ਼ਸ਼ੀਲ ਰਹਿਣ ਵਾਲੇ ਮਹਾਨ ਦੇਸ਼ ਭਗਤ ਗਦਰੀ ਬਾਬੇ ਬਾਬਾ ਗੁਰਮੁਖ ਸਿੰਘ ਲਲਤੋਂ ਦੇ ਬੁੱਤ ਦੀ ਬੇਹੁਰਮਤੀ ਕੀਤੀ ਗਈ ਹੈ। ਕਿਸੇ ਸ਼ਰਾਰਤੀ ਅਨਸਰ ਨੇ ਇਸ ਮਹਾਨ ਸ਼ਖਸੀਅਤ ਦੇ ਬੁੱਤ ਦੀ ਭੰਨਤੋੜ ਕੀਤੀ ਹੈ। ਇਹ ਨਿੰਦਣਯੋਗ ਕਾਰਾ ਅਸਲ ਵਿੱਚ ਸਮੂਹ ਦੇਸ਼ ਭਗਤ ਸ਼ਕਤੀਆਂ ਲਈ ਇੱਕ ਚੁਨੌਤੀ ਹੈ। ਇੱਕ ਚੈਲੰਜ ਹੈ। ਇਸਦੇ ਨਾਲ ਹੀ ਇਹ ਘਿਨਾਉਣੀ ਹਰਕਤ ਇਲਾਕੇ ਦੀਆਂ ਖੁਫੀਆਂ ਏਜੰਸੀਆਂ ਅਤੇ ਸੁਰੱਖਿਆ ਫੋਰਸਾਂ ਪ੍ਰਤੀ ਵੀ ਇੱਕ ਸੁਆਲ ਹੈ। ਇਹ ਕਮੀਨਗੀ ਦੀ ਹੱਦ ਹੈ। ਲੋਕ ਆਪਣੇ ਨਾਇਕਾਂ ਦੇ ਬੁੱਤ ਲਾਉਣੇ ਵੀ ਜਾਂਦੇ ਹਨ, ਉਹਨਾਂ ਦੀ ਸਾਂਭ ਸੰਭਾਲ ਵੀ ਕਰ ਸਕਦੇ ਹਨ ਅਤੇ ਉਹਨਾਂ ਦੀ ਬੇਹੁਰਮਤੀ ਕਰਨ ਵਾਲਿਆਂ ਨੂੰ ਤਕੜਾ ਜੁਆਬ ਦੇਣ ਦੀ ਵੀ ਸਮਰਥਾ ਰੱਖਦੇ ਹਨ। ਪੁਲਿਸ ਤੁਰੰਤ ਅਜਿਹੇ ਅਨਸਰਾਂ ਦਾ ਪਤਾ ਲਾ ਕੇ ਉਹਨਾਂ ਨੂੰ ਕਾਨੂੰਨ ਦੇ ਸ਼ਿਕੰਜੇ ਵਿੱਚ ਲਿਆਵੇ। ਇਸ ਮਾਮਲੇ ਵਿੱਚ ਕੀਤੀ ਗਈ ਕਿਸੇ ਵੀ ਢਿੱਲ ਨੂੰ ਲੋਕ ਕਦਾਚਿੱਤ ਬਰਦਾਸ਼ਤ ਨਹੀਂ ਕਰਨਗੇ। 

ਇਸੇ ਦੌਰਾਨ ਸੀਪੀਆਈ ਦੇ ਸੀਨੀਅਰ ਆਗੂ, ਕਾਮਰੇਡ ਕਰਤਾਰ ਸਿੰਘ ਬੁਆਣੀ, ਡਾਕਟਰ ਅਰੁਣ ਮਿੱਤਰਾ, ਕਾਮਰੇਡ ਗੁਰਨਾਮ ਸਿਧੂ, ਜੀਤ ਕੁਮਾਰੀ ਅਤੇ ਕਈ ਹੋਰਨਾਂ ਨੇ ਇਸ ਦੀ ਸਖਤ ਸ਼ਬਦਾਂ ਵਿੱਚ ਨਿਖੇਧੀ ਕੀਤੀ ਹੈ। 
ਗਦਰੀ ਬਾਬਾ ਗੁਰਮੁਖ ਸਿੰਘ ਯਾਦਗਾਰੀ ਕਮੇਟੀ ਲਲਤੋਂ ਖੁਰਦ ਦੇ ਆਗੂਆਂ ਦੀ ਮੀਟਿੰਗ ਪਰਮਿੰਦਰ ਸਿੰਘ ਪਿੰਦੀ ਦੀ ਪ੍ਰਧਾਨਗੀ ਹੇਠ ਹੋਈ। ਕਮੇਟੀ ਦੇ ਸਕੱਤਰ ਮਾਸਟਰ ਜਸਦੇਵ ਸਿੰਘ ਲਲਤੋਂ ਨੇ ਦੱਸਿਆ ਕਿ ਗਦਰੀ ਬਾਬਾ ਲਲਤੋਂ ਦੇ ਬੁੱਤ ‘ਤੇ ਹਮਲੇ ਦੌਰਾਨ ਉਨ੍ਹਾਂ ਦੇ ਦੋਵੇਂ ਹੱਥਾਂ, ਇਕ ਬਾਂਹ ਤੇ ਚਿਹਰੇ ਦੇ ਭੰਨਤੋੜ ਕੀਤੀ ਗਈ। ਉਨ੍ਹਾਂ ਕਿਹਾ ਕਿ ਸ਼ਰਾਰਤੀਆਂ ਨੇ ਇਹ ਘਿਨਾਉਣਾ ਕਾਰਾ ਪਿਛਲੇ ਦਿਨੀਂ ਕਾਮਾਗਾਟਾ ਮਾਰੂ ਸ਼ਤਾਬਦੀ ਦੇ ਸੰਬੰਧ ‘ਚ ਲਲਤੋਂ ਖੁਰਦ ਵਿਖੇ ਹੋਏ ਸਮਾਗਮ ਤੋਂ ਘਬਰਾ ਕੇ ਬੁਖਲਾਹਟ ‘ਚ ਆ ਕੇ ਕੀਤਾ ਹੈ। ਉਨ੍ਹਾਂ ਦੱਸਿਆ ਕਿ ਇਸ ਸੰਬੰਧ ਵਿੱਚ ਪੁਲਸ ਚੌਕੀ ਲਲਤੋਂ ਵਿਖੇ ਰਿਪੋਰਟ ਵੀ ਦਰਜ ਕਰਵਾਈ ਗਈ ਹੈ।
ਬਾਬਾ ਗੁਰਮੁਖ ਸਿੰਘ ਜੀ ਦੇ ਬੁੱਤ ਉੱਪਰ ਕੀਤੇ ਗਾਏ ਇਸ ਹਮਲੇ ਨਾਲ ਇੱਕ ਗੱਲ ਫਿਰ ਸਾਬਿਤ ਹੋ ਗਈ ਹੈ ਕਿ ਉਹਨਾਂ ਦੇ ਵਿਚਾਰਾਂ ਤੋਂ ਇਹ ਦੇਸ਼ਧ੍ਰੋਹੀ ਅਤੇ ਲੋਕ ਵਿਰੋਧੀ ਅਨਸਰ ਅੱਜ ਵੀ ਭੈਅਭੀਤ ਹਨ। ਅੱਜ ਵੀ ਬਾਬਾ ਗੁਰਮੁਖ ਸਿੰਘ ਨੂੰ ਯਾਦ ਕੀਤੇ ਜਾਣ ਤੇ ਉਹਨਾਂ ਨੂੰ ਘਬਰਾਹਟ ਹੁਣ ਦੀ ਹੈ। ਬੁੱਤ ਦੀ ਭੰਨਤੋੜ ਉਹਨਾਂ ਦੀ ਬੁਖਲਾਹਟ ਦਾ ਹੀ ਨਤੀਜਾ ਹੈ। 
ਬਾਬਾ ਗੁਰਮੁਖ ਸਿੰਘ ਲਲਤੋਂ ਦੇ ਬੁੱਤ ਉਪ੍ਪ੍ਰਟ ਇਹ ਤੀਜਾ ਚੌਥਾ ਹਮਲਾ ਹੈ।  ਅਫਸੋਸ ਦੀ ਗੱਲ ਹੈ ਕਿ ਏਨੇ ਹਮਲਿਆਂ ਦੇ ਬਾਵਜੂਦ ਬੁੱਤ ਦੇ ਮਾਣ ਸਨਮਾਣ ਨੂੰ ਗੰਭੀਰਤਾ ਨਾਲ ਨਹੀਂ ਲਿਆ ਗਿਆ। ਮੁਢਲੀਆਂ ਰਿਪੋਰਟਾਂ ਮੁਤਾਬਿਕ ਪ੍ਰੇਰਣਾ ਦਾ ਸਰੋਤ ਬਣੇ ਬਾਬਾ ਜੀ ਦੇ ਇਸ ਬੁੱਤ ਦੇ ਦੋਵੇਂ ਹੱਥ ਤੇ ਇੱਕ ਬਾਂਹ ਤੋੜਨ ਤੋਂ ਇਲਾਵਾ ਉਨ੍ਹਾਂ ਦੇ ਚਿਹਰੇ ਤੇ ਵੀ ਕਾਫੀ ਸੱਟਾ ਮਾਰੀਆਂ ਗਈਆਂ ਹਨ। ਇੰਝ ਲੱਗਦਾ ਹੈ ਜਿਵੇਂ ਕੋਈ ਆਪਣਾ ਜੱਦੀ ਪੁਸ਼ਤੀ ਵੈਰ ਕਢ ਰਿਹਾ ਹੋਵੇ। ਜਿਕਰਯੋਗ ਹੈ ਕਿ 2005 ਵੀ ਅਜਿਹਾ ਕੁਝ ਵਾਪਰਿਆ ਸੀ ਜਦੋਂ ਕੁਝ ਅਜਿਹੇ ਹੀ ਸਰਾਰਤੀ ਅਨਸਰਾਂ ਨੇ ਬਾਬਾ ਜੀ ਦੇ ਬੁੱਤ ਤੇ ਲੱਗੇ ਗਦਰ ਪਾਰਟੀ ਦੇ ਝੰੰਡੇ ਪਾੜ ਦਿੱਤੇ ਸਨ। ਫਿਰ ਸੰਨ 2009 ਵਿੱਚ ਵੀ ਬੁੱਤ ਤੇ ਇਸੇ ਤਰ੍ਹਾਂ ਹੀ ਹਮਲਾ ਕਰਕੇ ਬੁੱਤ ਦੀ ਭੰਨਤੋੜ ਕੀਤੀ ਸੀ। ਹੁਣ ਕੱਲ੍ਹ ਰਾਤ ਹਮਲਾ ਕਰਕੇ ਬੁੱਤ ਦੀ ਬੁਰੀ ਤਰ੍ਹਾਂ ਨਾਲ ਭੰਨਤੋੜ ਕੀਤੀ ਗਈ ਹੈ। ਕਮੇਟੀ ਮੈਂਬਰਾਂ ਨੇ ਅੱਗੇ ਦੱਸਿਆ ਕਿ ਇਸ ਮੰਦਭਾਗੀ ਘਟਨਾ ਦੀ ਸਰਪੰਚ ਮਹਿੰਦਰ ਸਿੰਘ ਬਿੱਲੂ, ਪੰਚ ਹਰਭਜਨ ਸਿੰਘ , ਮਲਕੀਤ ਸਿੰਘ, ਗਿੰਦਰ ਸਿੰਘ, ਹਰਜੀਤ ਕੌਰ ਅਤੇ ਸਮੂਹ ਗ੍ਰਾਮ ਪੰਚਾਇਤ ਲਲਤੋਂ ਖੁਰਦ ਨੂੰ ਸੂਚਨਾ ਦੇਣ ਉਪਰੰਤ ਪੁਲਸ ਚੌਂਕੀ ਲਲਤੋਂ ਕਲਾਂ ਨੂੰ ਵੀ ਸੂਚਿਤ ਕਰਕੇ ਦੋਸੀਆਂ ਖਿਲਾਫ ਰਿਪੋਰਟ ਦਰਜ ਕਰਵਾਈ ਗਈ। ਜਲਦੀ ਹੀ ਦੋਸੀਆਂ ਵਿਰੁੱਧ ਕਾਰਵਾਈ ਲਈ ਤਿੱਖਾਂ ਸੰਘਰਸ ਵਿੱਢਣ ਲਈ ਤਿਆਰੀ ਕੀਤੀ ਜਾਵੇਗੀ। ਦੇਸ਼ ਭਗਤ ਯਾਦਗਾਰੀ ਕਮੇਟੀ ਦੇ ਫਾਊਂਡਰ ਜਨਰਲ ਸਕੱਤਰ ਅਤੇ ਦੇਸ਼ ਭਗਤ ਯਾਦਗਾਰ ਹਾਲ ਦੇ ਸੰਸਥਾਪਕ ਬਾਬਾ ਗੁਰਮੁਖ ਸਿੰਘ ਨੇ ਕਾਮਾਗਾਟਾ ਮਾਰੂ ਵਾਲਾ ਸਾਰਾ ਵਰਤਾਰਾ ਅੱਖੀਂ ਦੇਖਿਆ ਸੀ।ਉਹਨਾਂ ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਦੇ ਨਾਲ ਕੰਮ ਕੀਤਾ ਸੀ। ਅੱਜ ਉਹਨਾਂ ਦੇ ਬੁੱਤ ਦਾ ਨਿਰਾਦਰ ਅਸਲ ਵਿੱਚ ਸ਼ਹੀਦ ਭਗਤ ਸਿੰਘ ਕਰਤਾਰ ਸਿੰਘ ਸਰਾਭਾ ਅਤੇ ਅਤੇ ਹੋਰ ਸਮੂਹ ਆਜ਼ਾਦੀ ਘੁਲਾਟੀਆਂ ਲਈ ਇੱਕ ਵੰਗਾਰ ਹੈ।