Showing posts with label ਭੈਣੀ ਸਾਹਿਬ. Show all posts
Showing posts with label ਭੈਣੀ ਸਾਹਿਬ. Show all posts

Friday, December 14, 2012

ਸਤਿਗੁਰੂ ਜਗਜੀਤ ਸਿੰਘ ਵੱਲੋਂ ਦੇਹ ਦਾ ਓਹਲਾ

ਧਰਮ ਅਤੇ ਸਿੱਖੀ ਅਸੂਲਾਂ ਦੀ ਪਾਲਣਾ ਦੇ ਨਾਲ ਨਾਲ ਜਬਰ ਅਤੇ ਹਕੂਮਤ ਨਾਲ ਟੱਕਰ ਦੇ ਮਾਮਲੇ ਵਿੱਚ ਵੀ ਨਵੇਂ ਰਿਕਾਰਡ ਬਣਾਉਣ ਵਾਲੇ ਨਾਮਧਾਰੀ ਸੰਪਰਦਾ ਦੇ ਮੁਖੀ ਸਤਿਗੁਰੂ ਜਗਜੀਤ ਸਿੰਘ ਜੀ ਹੁਣ ਇਸ ਦੁਨੀਆ ਵਿੱਚ ਨਹੀਂ ਰਹੇ।ਸੰਗੀਤ ਸਮਰਾਟ ਰਵੀਸ਼ੰਕਰ ਜੀ ਦੇ ਵਿਛੋੜੇ ਦਾ ਦਰਦ ਅਜੇ ਤਾਜ਼ਾ ਹੀ ਸੀ ਕਿ ਇੱਕ ਹੋਰ ਸੋਗੀ ਖਬਰ ਨੇ ਉਦਾਸ ਕਰ ਦਿੱਤਾ। ਸੰਗੀਤ ਦੀ ਦੁਨੀਆ ਨਾਲ ਸਤਿਗੁਰੂ ਜਗਜੀਤ ਸਿੰਘ ਅਤੇ ਨਾਮਧਾਰੀ ਸੰਪਰਦਾ ਦਾ ਵੀ ਅਟੁੱਟ ਸੰਬੰਧ ਸੀ। ਮਨੁੱਖਾਂ ਦੇ ਨਾਲ ਨਾਲ ਪਸ਼ੂ ਪੰਛੀਆਂ ਪ੍ਰਤੀ ਵੀ ਸੰਵੇਦਨਾ ਰੱਖਨ ਵਾਲੇ ਇਸ ਮਹਾਂਪੁਰਸ਼ ਦੇ ਤੁਰ ਜਾਣ ਤੇ ਹਰ ਪਾਸੇ ਉਦਾਸੀ ਪਾਈ ਜਾ ਰਹੀ ਹੈ।ਮੀਡੀਆ ਨੇ ਵੀ ਇਸ ਖਬਰ ਨੂੰ ਬਣਦੀ ਪ੍ਰਮੁੱਖਤਾ ਨਾਲ ਪ੍ਰਕਾਸ਼ਿਤ ਕੀਤਾ ਹੈ।ਹੇਠਾਂ ਦੋ ਪ੍ਰਮੁੱਖ ਪੰਜਾਬੀ 'ਚ ਛਪੀ ਇਸ ਸੋਗੀ ਖਬਰ ਨੂੰ ਇਥੇ ਵੀ ਧੰਨਵਾਦ ਸਹਿਤ ਪ੍ਰਕਾਸ਼ਿਤ ਕੀਤਾ ਜਾ ਰਿਹਾ ਹੈ। --ਰੈਕਟਰ ਕਥੂਰੀਆ  
ਨਾਮਧਾਰੀ ਸੰਪਰਦਾ ਦੇ ਮੁਖੀ ਸਤਿਗੁਰੂ ਜਗਜੀਤ ਸਿੰਘ ਚੱਲ ਵਸੇ
Posted On December - 13 - 2012
ਰੋਜ਼ਾਨਾ ਜਗ ਬਾਣੀ 'ਚ 
ਹਰਜੋਤ ਅਰੋਡ਼ਾ/ਗੁਰਦੀਪ ਟੱਕਰ
ਲੁਧਿਆਣਾ/ਮਾਛੀਵਾਡ਼ਾ, 13 ਦਸੰਬਰ
ਨਾਮਧਾਰੀ ਸੰਪਰਦਾ ਦੇ ਮੁਖੀ ਸਤਿਗੁਰੂ ਜਗਜੀਤ ਸਿੰਘ (92) ਦਾ ਅੱਜ ਸ਼ਾਮ ਦੇਹਾਂਤ ਹੋ ਗਿਆ। ਉਨ੍ਹਾਂ ਨੇ ਵੀਰਵਾਰ ਸ਼ਾਮ 6.28 ਵਜੇ ਸਤਿਗੁਰੂ ਪ੍ਰਤਾਪ ਸਿੰਘ ਅਪੋਲੋ ਹਸਪਤਾਲ ਲੁਧਿਆਣਾ ਵਿਖੇ ਆਖ਼ਰੀ ਸਾਹ ਲਿਆ। ਉਨ੍ਹਾਂ ਦੇ ਦੇਹਾਂਤ ਦੀ ਖ਼ਬਰ ਸੁਣਦਿਆਂ ਹੀ ਇੱਥੋਂ ਕੁੱਝ ਦੂਰ ਸਥਿਤ ਨਾਮਧਾਰੀ ਸੰਪਰਦਾ ਦੇ ਸਦਰ ਮੁਕਾਮ ਸ੍ਰੀ ਭੈਣੀ ਸਾਹਿਬ ਵਿਖੇ ਸੋਗ ਪਸਰ ਗਿਆ। ਨਾਮਧਾਰੀ ਮੁਖੀ ਦੇ ਦੇਹਾਂਤ ਦੀ ਪੁਸ਼ਟੀ ਕਰਦਿਆਂ ਉਨ੍ਹਾਂ ਦੇ ਭਤੀਜੇ ਠਾਕੁਰ ਉਧੇ ਸਿੰਘ ਅਤੇ ਦਮਾਦ ਸੰਤ ਜਗਤਾਰ ਸਿੰਘ ਨੇ ਦੱਸਿਆ ਕਿ ਉਹ ਪਿਛਲੇ ਕੁੱਝ ਦਿਨਾਂ ਤੋਂ ਪੇਟ ਦੀ ਇਨਫ਼ੈਕਸ਼ਨ ਕਾਰਨ ਐਸ.ਪੀ.ਐਸ. ਅਪੋਲੋ ਹਸਪਤਾਲ ਲੁਧਿਆਣਾ ਵਿਖੇ ਜ਼ੇਰੇ ਇਲਾਜ ਸਨ। ਉਨ੍ਹਾਂ ਦਾ ਅੰਤਮ ਸੰਸਕਾਰ 14 ਦਸੰਬਰ ਨੂੰ ਬਾਅਦ ਦੁਪਹਿਰ 2 ਵਜੇ ਸ੍ਰੀ ਭੈਣੀ ਸਾਹਿਬ ਵਿਖੇ ਕੀਤਾ ਜਾਵੇਗਾ। ਉਹ ਆਪਣੇ ਪਿੱਛੇ ਧਰਮ ਪਤਨੀ ਮਾਤਾ ਚੰਦ ਕੌਰ,ਧੀ ਸਾਹਿਬ ਕੌਰ ਅਤੇ ਦਾਮਾਦ ਸੰਤ ਜਗਤਾਰ ਸਿੰਘ ਛੱਡ ਗਏ ਹਨ। 20 ਨਵੰਬਰ 1920 ਨੂੰ ਜਨਮੇ ਸਤਿਗੁਰੂ ਜਗਜੀਤ ਸਿੰਘ ਨੇ ਨਾਮਧਾਰੀ ਸੰਪਰਦਾ ਦੇ ਮੁਖੀ ਵਜੋਂ ਆਪਣੇ ਪਿਤਾ ਤੇ ਸਤਿਗੁਰੂ ਸ੍ਰੀ ਪ੍ਰਤਾਪ ਸਿੰਘ ਦੇ ਦੇਹਾਂਤ ਬਾਅਦ 1959 ਵਿੱਚ ਗੱਦੀ ਸੰਭਾਲੀ ਸੀ। ਉਨ੍ਹਾਂ ਦੇ ਕਾਰਜਕਾਲ ਦੌਰਾਨ ਜਿੱਥੇ ਸ੍ਰੀ ਭੈਣੀ ਸਾਹਿਬ ਅੰਤਰਰਾਸ਼ਟਰੀ ਮੁਕਾਮ ’ਤੇ ਪੁੱਜਾ ਉੱਥੇ ਇਸ ਪਵਿੱਤਰ ਨਗਰ ਦੇ ਵਿਕਾਸ ਦਾ ਸਿਹਰਾ ਵੀ ਉਨ੍ਹਾਂ ਸਿਰ ਬੱਝਦਾ ਹੈ। ਉਨ੍ਹਾਂ ਦੇ ਯਤਨਾਂ ਸਦਕਾ ਹੀ ਨਾਮਧਾਰੀ ਸ਼ਹੀਦਾਂ ਨਾਲ ਸਬੰਧਤ ਯਾਦਗਾਰਾਂ ਮਲੇਰਕੋਟਲਾ, ਪੁਰਾਣੀ ਜੇਲ੍ਹ ਲੁਧਿਆਣਾ ਅਤੇ ਸ੍ਰੀ ਅੰਮ੍ਰਿਤਸਰ ਵਿਖੇ ਉਸਾਰੀਆਂ ਗਈਆਂ। ਲੁਧਿਆਣਾ ਦਾ ਸਤਿਗੁਰੂ ਪ੍ਰਤਾਪ ਸਿੰਘ ਅਪੋਲੋ ਹਸਪਤਾਲ ਵੀ ਉਨ੍ਹਾਂ ਦੀਆਂ ਕੋਸ਼ਿਸ਼ਾਂ ਨਾਲ ਹੀ ਸਥਾਪਿਤ ਹੋਇਆ। ਜੰਗ-ਏ-ਅਜ਼ਾਦੀ ਦੇ ਮਹੱਤਵਪੂਰਣ ਅਧਿਆਇ ਅਤੇ ਨਾਮਧਾਰੀ ਮੁਖੀ ਸਤਿਗੁਰੂ ਰਾਮ ਸਿੰਘ ਦੀ ਅਗਵਾਈ ਵਿੱਚ ਚਲਾਏ ਗਏ ‘ਕੂਕਾ ਅੰਦੋਲਨ’ ਦਾ ਸਾਲ 2007 ਵਿੱਚ 150 ਸਾਲਾ ਵੀ ਉਨ੍ਹਾਂ ਦੀ ਅਗਵਾਈ ਵਿੱਚ ਮਨਾਇਆ ਗਿਆ, ਜਿਸ ਦੌਰਾਨ ਸਿੱਕੇ, ਡਾਕ ਟਿਕਟ ਜਾਰੀ ਕਰਨ ਤੋਂ ਇਲਾਵਾ ਪੰਜਾਬ ਭਰ ਵਿੱਚ ਸਰਕਾਰ ਵੱਲੋਂ ਨਾਮਧਾਰੀ ਸ਼ਹੀਦਾਂ ਦੇ ਨਾਂ ’ਤੇ ਵੱਖ-ਵੱਖ ਥਾਂਵਾਂ,ਸਡ਼੍ਹਕਾਂ ਤੇ ਚੌਕਾਂ ਦਾ ਨਾਮਕਰਣ ਕੀਤਾ ਗਿਆ। ਇਸ ਤੋਂ ਇਲਾਵਾ ਸਤਿਗੁਰੂ ਰਾਮ ਸਿੰਘ ਜੀ ਦੀ ਸੰਸਦ ਵਿੱਚ ਤਸਵੀਰ ਵੀ ਉਨ੍ਹਾਂ ਦੇ ਯਤਨਾਂ ਨਾਲ ਲੱਗੀ।
ਸੰਗੀਤ ਦੇ ਬਹੁਤ ਹੀ ਜ਼ਿਆਦਾ ਉਪਾਸਕ ਹੋਣ ਕਾਰਨ ਉਨ੍ਹਾਂ ਨੇ ਬਹੁਤ ਸਾਰੇ ਸੰਗੀਤਕਾਰ ਭੈਣੀ ਸਾਹਿਬ ਦੀ ਧਰਤੀ ਤੋਂ ਪੈਦਾ ਕੀਤੇ ਅਤੇ ਵੱਡੇ-ਵੱਡੇ ਸੰਗੀਤ ਸੰਮੇਲਨ ਕਰਵਾਏ, ਜਿਨ੍ਹਾਂ ਵਿੱਚ ਅੰਤਰਰਾਸ਼ਟਰੀ ਪ੍ਰਸਿੱਧੀ ਵਾਲੇ ਸੰਗੀਤਕਾਰ ਸ਼ਿਰਕਤ ਕਰਦੇ ਰਹੇ। ਉਨ੍ਹਾਂ ਦੀ ਹਾਜ਼ਰੀ ਵਿੱਚ ਹੀ ਭੈਣੀ ਸਾਹਿਬ ਵਿਖੇ ਨਿਰਧਾਰਤ ਰਾਗਾਂ ਵਿੱਚ ਤੰਤੀ ਸਾਜ਼ਾਂ ਨਾਲ ਗੁਰਬਾਣੀ ਦੇ ਕੀਰਤਨ ਦੀ ਰਵਾਇਤ ਸ਼ੁਰੂ ਹੋਈ ਜੋ ਅੱਜ ਵੀ ਜਾਰੀ ਹੈ।
ਖੇਡਾਂ ਦੇ ਖੇਤਰ ਵਿੱਚ ਮਹੱਤਵਪੂਰਣ ਯੋਗਦਾਨ ਪਾਉਂਦਿਆਂ ਉਨ੍ਹਾਂ ਨੇ ਨਾਮਧਾਰੀ ਹਾਕੀ ਟੀਮ ਨੂੰ ਅੰਤਰਰਾਸ਼ਟਰੀ ਪੱਧਰ ’ਤੇ ਪਛਾਣ ਦਿਵਾਈ ਅਤੇ ਭੈਣੀ ਸਾਹਿਬ ਵਿਖੇ ਨਾਮਧਾਰੀ ਖੇਡ ਅਕਾਡਮੀ ਸਥਾਪਤ ਕਰਕੇ ਹਾਕੀ ਐਸਟਰੋਟਰਫ਼, ਆਊਟਡੋਰ ਤੇ ਇੰਨਡੋਰ ਸਟੇਡੀਅਮ ਵੀ ਬਣਵਾਏ। ਇਸ ਤੋਂ ਇਲਾਵਾ ਖੇਤੀ ਵਿੱਚ ਫ਼ਸਲੀ ਵਿਭਿੰਨਤਾ ਨੂੰ ਬਾਗ਼ਬਾਨੀ ਰਾਹੀਂ ਬਹੁਤ ਪਹਿਲਾਂ ਲਾਗੂ ਕਰਕੇ, ਦੇਸ਼ਾਂ-ਵਿਦੇਸ਼ਾਂ ਵਿੱਚ ਨਾਮਧਾਰੀ ਸੀਡ ਅਤੇ ਨਾਮਧਾਰੀ ਸੀਡ ਦੁਆਰਾ ਤਿਆਰ ਕੀਤੀਆਂ ਫ਼ਲ ਅਤੇ ਸਬਜ਼ੀਆਂ ਦੀ ਵੱਡੀ ਪੱਧਰ ’ਤੇ ਬਰਾਮਦ ਕਰਵਾਈ।
ਨਾਮਧਾਰੀ ਸਤਿਗੁਰੂ ਸ੍ਰੀ ਰਾਮ ਸਿੰਘ ਦੁਆਰਾ ਸੰਨ 1863 ਵਿੱਚ ਪਿੰਡ ਖੋਟੇ ਤੋਂ ਸ਼ੁਰੂ ਕੀਤੀ ਸਵਾ ਰੁਪਈਏ ਨਾਲ ਸਮੂਹਿਕ ਆਨੰਦ ਕਾਰਜ ਦੀ ਰੀਤ ਨੂੰ ਉਨ੍ਹਾਂ ਹੁਣ ਤੱਕ ਬਾਦਸਤੂਰ ਜਾਰੀ ਰੱਖਿਆ। ਪਸ਼ੂ ਧਨ ਦੀ ਸੰਭਾਲ ਵਿੱਚ ਗਊਆਂ ਦੇ ਦੁੱਧ ਅਤੇ ਸੁੰਦਰਤਾ ਦੇ ਅਨੇਕਾਂ ਹੀ ਮੁਕਾਬਲੇ ਜਿੱਤਣ ਪਿੱਛੋਂ  ਉਨ੍ਹਾਂ ਨੂੰ ਗੋਪਾਲ ਰਤਨ ਦੀ ਉਪਾਧੀ ਨਾਲ ਸਨਮਾਨਤ ਵੀ ਕੀਤਾ ਗਿਆ। ਸ੍ਰੀ ਭੈਣੀ ਸਾਹਿਬ ਵਿਖੇ ਹਰ ਸਾਲ ਸਵਾ ਮਹੀਨੇ ਦਾ ਜਪੁ ਪ੍ਰਯੋਗ, ਹੋਲੇ ਮਹੱਲੇ ਦੇ ਸਮਾਗਮ ਕਰਵਾਉਣ ਵਾਲੇ ਅਤੇ ਕੌਮਾਂਤਰੀ ਪੱਧਰ ’ਤੇ ਵਿਦਿਅਕ ਕਾਨਫ਼ਰੰਸਾਂ ਵਿੱਚ ਸ਼ਮੂਲੀਅਤ ਕਰਨ ਵਾਲੇ ਸਤਿਗੁਰੂ ਜਗਜੀਤ ਸਿੰਘ ਨੇ ਪੰਜਾਬੀ ਭਾਸ਼ਾ ਦੇ ਪਸਾਰ ਅਤੇ ਪੰਜਾਬੀ ਸਾਹਿਤ ਨੂੰ ਉਤਸ਼ਾਹਿਤ ਕਰਨ ਵਿੱਚ ਵੀ ਬਹੁਤ ਯੋਗਦਾਨ ਪਾਇਆ।
ਪੰਜਾਬੀ ਸਹਿਤ ਅਕਾਦਮੀ ਵੱਲੋਂ ਦੁੱਖ ਦਾ ਪ੍ਰਗਟਾਵਾ
ਲੁਧਿਆਣਾ, (ਟ੍ਰਿਬਿਊਨ ਨਿਊਜ਼ ਸਰਵਿਸ) -  ਪੰਜਾਬੀ ਸਹਿਤ ਅਕਾਦਮੀ, ਲੁਧਿਆਣਾ ਦੇ ਪ੍ਰਧਾਨ ਡਾ. ਗੁਰਭਜਨ ਸਿੰਘ ਗਿੱਲ ਅਤੇ ਜਨਰਲ ਸਕੱਤਰ ਡਾ. ਸੁਖਦੇਵ ਸਿੰਘ ਸਿਰਸਾ ਨੇ ਸਤਿਗੁਰੂ ਜਗਜੀਤ ਸਿੰਘ ਦੇ ਅਕਾਲ ਚਲਾਣੇ ’ਤੇ ਸੋਗ ਪ੍ਰਗਟ ਕਰਦਿਆਂ ਕਿਹਾ ਕਿ ਅਕਾਦਮੀ ਦੇ ਵਿਕਾਸ ਵਿੱਚ ਉਨ੍ਹਾਂ ਦੀ ਵੱਡੀ ਦੇਣ ਸੀ।
ਮੁੱਖ ਮੱਤਰੀ ਤੇ ਉਪ ਮੁੱਖ ਮੰਤਰੀ ਵੱਲੋਂ ਦੁੱਖ ਦਾ ਪ੍ਰਗਟਾਵਾ
ਟ੍ਰਿਬਿਊਨ ਨਿਊਜ਼ ਸਰਵਿਸ
ਚੰਡੀਗਡ਼੍ਹ, 13 ਦਸੰਬਰ
ਪੰਜਾਬ ਦੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਅਤੇ ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਨੇ ਸਤਿਗੁਰੂ ਜਗਜੀਤ ਸਿੰਘ ਦੇ ਦੇਹਾਂਤ ’ਤੇ ਡੂੰਘੇ ਦੁੱਖ ਦਾ ਪ੍ਰਗਟਾਵਾ ਕੀਤਾ ਹੈ। ਦੁਖੀ ਪਰਿਵਾਰ ਅਤੇ ਨਾਮਧਾਰੀ ਦਰਬਾਰ ਨੂੰ ਆਪਣੇ ਦੁੱਖ ਭਰੇ ਸੰਦੇਸ਼ ’ਚ ਮੁੱਖ ਮੰਤਰੀ ਅਤੇ ਉਪ ਮੁੱਖ ਮੰਤਰੀ ਨੇ ਕਿਹਾ ਕਿ ਸਤਿਗੁਰੂ ਜਗਜੀਤ ਸਿੰਘ ਜੀ ਦੇ ਦੇਹਾਂਤ ਨਾਲ ਪੂਰੀ ਮਨੁੱਖਤਾ ਨੂੰ ਘਾਟਾ ਪਿਆ ਹੈ। ਉਨ੍ਹਾਂ ਨੇ ਨਾ ਸਿਰਫ ਨਾਮਧਾਰੀ ਦਰਬਾਰ, ਬਲਕਿ ਪੂਰੀ ਮਨੁੱਖਤਾ ਦਾ ਮਾਰਗ ਦਰਸ਼ਨ ਕੀਤਾ। ਉਨ੍ਹਾਂ ਕਿਹਾ ਕਿ  ਅਜਿਹਾ ਘਾਟਾ ਹੈ, ਜਿਸਨੂੰ ਕਦੇ ਵੀ ਪੂਰਾ ਨਹੀਂ ਕੀਤਾ ਜਾ ਸਕੇਗਾ। ਇਸੇ ਦੌਰਾਨ ਪੰਜਾਬ ਦੇ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਕਿਹਾ ਹੈ ਕਿ ਸਤਿਗੁਰੂ ਜਗਜੀਤ ਸਿੰਘ ਦੇ ਅਕਾਲ ਚਲਾਣੇ ਨਾਲ ਮਨੁੱਖਤਾ ਨੂੰ ਬਹੁਤ ਵੱਡਾ ਘਾਟਾ ਪਿਆ ਹੈ।

(ਰੋਜ਼ਾਨਾ ਪੰਜਾਬੀ ਟ੍ਰਿਬਿਊਨ ਚੋਂ ਧੰਨਵਾਦ ਸਹਿਤ)

Sunday, October 16, 2011

ਧੂੜੀ ਏਸ ਧਰਤੀ ਦੀ


ਥੋਹੜੇ ਜਿਹੇ ਸਮੇਂ ਵਿੱਚ ਬਹੁਤ ਕੁਝ ਦਿਖਾਉਂਦੀ ਹੈ ਇਹ ਫਿਲਮ
ਧੂੜੀ ਏਸ ਧਰਤੀ ਦੀ ਇੱਕ ਅਜਿਹੀ ਫਿਲਮ ਹੈ ਜਿਹੜੀ ਉਹਨਾਂ ਲਈ ਵੀ ਇੱਕ ਵਰਦਾਨ ਹੈ ਜਿਹੜੇ ਕਿਸੇ ਕਾਰਣ ਭੈਣੀ ਸਾਹਿਬ ਨਹੀਂ ਪੁੱਜ ਸਕੇ ਅਤੇ ਉਹਨਾਂ ਸੁਭਾਗਿਆਂ ਲਈ ਵੀ ਜਿਹੜੇ ਇਸ ਧਰਤੀ ਦੇ ਦਰਸ਼ਨ ਅਕਸਰ ਹੀ ਕਰਦੇ ਹਨ.ਇਸ ਧਰਤੀ ਤੇ ਪਹੁੰਚਦਿਆਂ ਹੀ ਅੰਤਰ ਆਤਮਾ ਨੂੰ ਇੱਕ ਸਕੂਨ ਮਿਲਦਾ ਹੈ. ਮਨ ਨੂੰ ਇੱਕ ਸ਼ਾਂਤੀ ਜਿਹੀ ਮਿਲਦੀ ਹੈ. ਦਿਮਾਗ ਵਿਚਲੇ ਖਿਆਲਾਂ ਦੀ ਦੌੜ ਵੀ ਰੁਕ ਜਾਂਦੀ ਹੈ ਅਤੇ ਚਿੰਤਾ ਵੀ ਮੁੱਕ ਜਾਂਦੀ ਹੈ. ਰਹਿ ਜਾਂਦੀ ਹੈ ਸਿਰਫ ਇੱਕ ਸ਼ਾਂਤੀ ਜਾਂ ਫੇਰ ਉਥੇ ਉਠਦੀਆਂ ਸਰਗਮਾਂ ਦਾ ਸੰਗੀਤ. ਨਾ ਉਥੇ ਕੋਈ ਕਿਸੇ ਦੀ ਚੁਗਲੀ ਕਰਦਾ ਸੁਣਿਆ ਦੇਖਿਆ, ਨਾ ਹੀ ਕਿਸੇ ਨੂੰ ਰਾਜਨੀਤੀ ਤੇ ਬਹਿਸ ਕਰਦਿਆਂ ਸੁਣਿਆ ਤੇ ਨਾ ਹੀ ਅਜਿਹਾ ਕੁਝ ਹੋ. ਬਸ ਨਾਮ ਦੀ ਚਰਚਾ,ਨਾਮ ਦੀ ਮਹਿਮਾ, ਨਾਮ ਦੀ ਸ਼ਕਤੀ, ਸਤਿਗੁਰੂ ਦੀ ਕਿਰਪਾ.ਹਰ ਇੱਕ ਦੀ ਜ਼ੁਬਾਨ ਤੇ ਪਿਆਰ ਹੀ ਪਿਆਰ, ਮਿਠਾਸ ਹੀ ਮਿਠਾਸ. ਨਿਮਰਤਾ ਹੀ ਨਿਮਰਤਾ. ਹਰ ਕਿਸੇ ਵਿੱਚ ਸਹਿਯੋਗ ਅਤੇ ਸੇਵਾ ਭਾਵਨਾ ਵਾਲੀ  ਤਤਪਰਤਾ.  


ਉਸ ਧਰਤੀ ਦੇ ਆਨੰਦ ਨੂੰ ਕੈਮਰੇ ਵਿੱਚ ਕੈਦ ਕਰ ਸਕਣ ਦਾ ਕ੍ਰਿਸ਼ਮਾ ਕਰ ਦਿਖਾਇਆ ਹੈ ਤਰਨਜੀਤ ਸਿੰਘ ਨੇ. ਸੰਨ ੧੯੭੧ ਵਿੱਚ ਹੈਦਰਾਬਾਦ ਵਿਖੇ ਜਨਮੇ ਤਰਨਜੀਤ ਸਿੰਘ ਨੇ ਬਹੁਤ ਹੀ ਲਗਨ ਅਤੇ ਮੇਹਨਤ ਨਾਲ ਫਿਲਮ ਐਡੀਟਿੰਗ, ਸੰਪਾਦਨ ਅਤੇ ਨਿਰਦੇਸ਼ਨ ਦਾ ਕੰਮ ਸਿੱਖਿਆ ਅਤੇ ਲੰਬੇ ਅਭਿਆਸ ਮਗਰੋਂ ਇਸ ਖੇਤਰ ਵਿੱਚ ਮੁਹਾਰਤ ਵੀ ਹਾਸਿਲ ਕੀਤੀ. ਇਸ ਮੁਹਾਰਤ ਸਦਕਾ ਕਈ ਇਨਾਮ ਸਨਮਾਨ ਵੀ ਪ੍ਰਾਪਤ ਕੀਤੇ. ਉਸਦੀ ਫਿਲਮ ਕਲਾ ਬਾਰੇ ਤੁਸੀਂ ਇਸ
ਡਾਕੂਮੈਂਟਰੀ ਨੂੰ ਦੇਖ ਕੇ ਹੀ ਅੰਦਾਜ਼ਾ ਲਾ ਸਕਦੇ ਹੋ. ਇਸ ਲਈ ਫਿਲਹਾਲ ਸਿਰਫ ਏਨਾ ਹੀ ਕਿ ਦੇਖੋ ਇਸ ਫਿਲਮ ਨੂੰ ਅਤੇ ਮਾਣੋ ਇਸਦਾ ਆਨੰਦ. --ਰੈਕਟਰ ਕਥੂਰੀਆ 

ਭੈਣੀ ਸਾਹਿਬ ਦਾ ਉਹ ਪਾਰਕ ਜਿਥੇ ਸੰਭਾਲੀਆਂ ਹਨ ਪੁਰਾਣੀਆਂ ਯਾਦਾਂ


ਭੈਣੀ ਸਾਹਿਬ ਦਾ ਗੋਲ ਮੰਦਰ

ਭੈਣੀ ਸਾਹਿਬ ਦਾ ਉਹ ਪਾਰਕ ਜਿਥੇ ਸੰਭਾਲੀਆਂ ਹਨ ਪੁਰਾਣੀਆਂ ਯਾਦਾਂ


ਇਸ ਪਾਰਕ ਵਿੱਚ ਪਰਤ ਆਉਂਦਾ ਹੈ ਗੁਜ਼ਰ ਚੁੱਕਿਆ ਵੇਲਾ
ਇਸ ਗੱਲ ਦਾ ਜ਼ਿਕਰ ਪਹਿਲਾਂ ਵੀ ਕੀਤਾ ਜਾ ਚੁੱਕਿਆ ਹੈ ਕਿ ਸਮੇਂ ਦੇ ਨਾਲ ਨਾਲ ਤਰੱਕੀ ਦੀ ਰਫਤਾਰ ਨਾਲ ਕਦਮ ਮਿਲਾਉਂਦਿਆਂ ਭੈਣੀ ਸਾਹਿਬ ਬੜੀ ਤੇਜ਼ੀ ਨਾਲ ਬਦਲ ਰਿਹਾ ਹੈ. ਖੇਡਾਂ, ਸੰਗੀਤ ਅਤੇ ਹੋਰ ਸਾਰੇ ਵਰਗਾਂ ਵਿੱਚ ਸ਼ਾਇਦ ਹੀ ਕੋਈ ਖੇਤਰ ਬਚਿਆ ਹੋਵੇ ਜਿਸ ਵਿੱਚ ਨਾਮਧਾਰੀ ਪੰਥ ਨੇ ਆਪਣੀ ਹਾਜ਼ਿਰੀ ਨਾ ਲਗਾਈ ਹੋਵੇ ਪਰ ਇਸ ਤਰੱਕੀ ਦੇ ਬਾਵਜੂਦ ਇੱਕ ਪਲ ਲੈ ਵੀ ਨਾਮਧਾਰੀ ਪੰਥ ਨਾ ਆਪਣੇ ਅਸੂਲਾਂ ਨੂੰ ਭੁੱਲਿਆ ਅਤੇ ਨਾ ਹੀ ਆਪਣੇ ਵਿਰਸੇ ਨੂੰ. ਗੁਰੂ ਵੱਲੋਂ ਦਰਸਾਈ ਮਾਰਗ ਉਹਨਾਂ ਲੈ ਹਰ ਪਲ ਅੱਖਾਂ ਸਾਹਮਣੇ ਰਹਿੰਦਾ ਹੈ. ਨਾਮਧਾਰੀਆਂ ਨੇ ਕਦੇ ਵੀ ਮਨ ਉੱਪਰੋਂ ਗੁਰੂ ਦੀ ਸਿੱਖਿਆ ਵਾਲੀ ਲਗਾਮ ਢਿੱਲੀ ਨਹੀਂ ਹੋਣ ਦਿੱਤੀ.
ਇਸ ਤੇਜ਼ ਰਫਤਾਰ ਅਤੇ ਬਹੁ ਪੱਖੀ ਤਰੱਕੀ ਦੇ ਨਾਲ ਨਾਲ ਨਾਮਧਾਰੀ ਦਰਬਾਰ ਇਸ ਗੱਲੋਂ ਵੀ ਪੂਰੀ ਤਰ੍ਹਾਂ ਸੁਚੇਤ ਰਿਹਾ ਹੈ ਕਿ ਸੰਘਰਸ਼ ਅਤੇ ਔਖਿਆਂ ਵੇਲੇ ਦੀਆਂ ਯਾਦਾਂ ਨੂੰ ਸੰਭਾਲ ਕੇ ਰੱਖਿਆ ਜਾਵੇ. ਇਹੀ ਕਾਰਣ ਹੈ ਕਿ ਸਤਿਗੁਰੂ ਰਾਮ ਸਿੰਘ ਦਾ ਵਿਛੋੜਾ ਅੱਜ ਵੀ ਹਰ ਨਾਮਧਾਰੀ ਨੂੰ ਹਲੂਣਦਾ ਹੈ ਅਤੇ ਉਸਦੇ ਮਨ ਵਿੱਚ ਉਠੀਆਂ ਤਰੰਗਾਂ ਅੱਖਾਂ ਨੂੰ ਨਮ ਕਰ ਦੇਂਦੀਆਂ ਹਨ. ਪੁਰਾਣੇ ਵੇਲੇ ਦੀਆਂ ਯਾਦਾਂ ਨੂੰ ਸੰਭਾਲਣ ਦੀਆਂ ਕੋਸ਼ਿਸ਼ਾਂ ਵੱਜੋਂ ਹੀ ਇੱਕ ਮਿਨੀਏਚਰ ਪਾਰਕ ਪਾਰਕ ਵੀ ਬਣਾਇਆ ਗਿਆ ਹੈ.ਇਸ ਪਾਰਕ ਵਿੱਚ ਸੰਭਾਲੀਆਂ ਉਹਨਾਂ ਯਾਦਾਂ ਬਾਰੇ ਤਰਨਜੀਤ ਸਿੰਘ ਨੇ ਇੱਕ ਫਿਲ ਵੀ ਬਣਾਈ ਹੈ ਜੋ ਅਸੀਂ ਧੰਨਵਾਦ ਸਹਿਤ ਇਥੇ ਤੁਹਾਡੇ ਨਾਲ ਵੀ ਸਾਂਝੀ ਕਰ ਰਹੇ ਹਨ. ਦੇਖੋ ਕਿ ਇਸ ਛੋਟੀ ਜਿਹੀ ਫਿਲਮ ਵਿੱਚ ਕਿੰਨਾ ਕੁਝ ਹੈ. ਭੈਣੀ ਸਾਹਿਬ ਦਾ ਉਹ ਪਾਰਕ ਜਿਥੇ ਸੰਭਾਲੀਆਂ ਪਈਆਂ ਹਨ ਪੁਰਾਣੀਆਂ ਯਾਦਾਂ .-ਰੈਕਟਰ ਕਥੂਰੀਆ
ਭੈਣੀ ਸਾਹਿਬ ਦਾ ਗੋਲ ਮੰਦਰ

ਭੈਣੀ ਸਾਹਿਬ ਦਾ ਗੋਲ ਮੰਦਰ

ਨਵੀਂ ਤਕਨੀਕ ਦੇ ਨਾਲ ਨਾਲ ਵਿਰਸੇ ਦੀ ਸੰਭਾਲ ਵੀ ਜਾਰੀ
ਭੈਣੀ ਸਾਹਿਬ ਇੱਕ ਅਜਿਹਾ ਅਸਥਾਨ ਹੈ ਜਿਥੇ ਟੇਕਨੌਲੋਜੀ ਦੀ ਨਵੀਂ ਤੋਂ ਨਵੀਂ ਤਰੱਕੀ ਵੀ ਹੈ,.ਜ਼ਿੰਦਗੀ ਦੇ ਕੰਮ ਆਉਣ ਵਾਲੀ ਹਰ ਸਹੂਲਤ ਵੀ ਮੌਜੂਦ ਹੈ. ਭਾਵੇਂ ਸੂਰਜੀ ਊਰਜਾ ਨਾਲ ਬਿਜਲੀ ਬਣਾਉਣ ਦੀ ਗੱਲ ਹੋਵੇ ਤੇ ਭਾਵੇਂ ਵਿੱਦਿਆ, ਸੰਗੀਤ ਜਾਂ ਫੇਰ ਖੇਡਾਂ ਦਾ ਖੇਤਰ  ਹਰ ਖੇਤਰ ਵਿੱਚ ਨਾਮਧਾਰੀਆਂ ਦਾ ਪੂਰਾ ਬੋਲਬਾਲਾ ਹੈ. ਏਨੀ ਤਰੱਕੀ ਅਤੇ ਏਨੀਆਂ ਪ੍ਰਾਪਤੀਆਂ ਦੇ ਬਾਵਜੂਦ ਹਰ ਨਾਮਧਾਰੀ ਹਮੇਸ਼ਾਂ ਇਹੀ ਆਖਦਾ ਹੈ ਕੀ ਸਤਿਗੁਰੂ ਜਗਜੀਤ ਸਿੰਘ ਜੀ ਦੀ ਕਿਰਪਾ ਹੈ ਜੀ. 14 ਤੋਂ 17  ਅਕਤੂਬਰ ਤੱਕ ਚੱਲੇ ਨਾਮਧਾਰੀ ਸਮਾਗਮ ਦੌਰਾਨ ਉਥੇ ਜਾਂ ਦਾ ਮੌਕਾ ਮਿਲਿਆ ਤਾਂ ਦੇਖਿਆ ਕੀ ਨਕਸ਼ਾ ਹੀ ਪਲਟਿਆ ਪਿਆ ਸੀ. ਦਸ ਬਾਰਾਂ ਸਾਲ ਪਹਿਲਾਂ ਵਾਲੀ ਹੁਣ ਉਥੇ ਕੋਈ ਗੱਲ ਹੀ ਨਜਰ ਨਹੀਂ ਸੀ ਆ ਰਹੀ. ਤਰੱਕੀ ਦੀਆਂ ਇਹਨਾਂ ਸਿਖਰਾਂ ਨੂੰ ਦੇਖ ਕੇ ਬਹੁਤ ਹੀ ਖੁਸ਼ੀ ਵੀ ਹੋਈ ਕੀ ਦੇਖੋ ਸੰਗਤਾਂ ਨੂੰ ਦੀਵਾਨ ਹਾਲ ਤੱਕ ਲਿਜਾਣ ਅਤੇ ਲਿਆਉਣ ਵਾਸਤੇ ਕਲੱਬ ਕਾਰਣ ਦਾ ਪ੍ਰਬੰਧ ਹੈ ਅਤੇ ਇਹ ਸਹੂਲਤ ਹਰ ਕਿਸੇ ਲਈ ਹੈ ਕੋਈ ਵਿਤਕਰਾ ਨਹੀਂ. ਫਿਰ ਮਨ ਵਿੱਚ ਉਦਾਸੀ ਵੀ ਆਈ. .

ਇੰਝ ਲੱਗਦਾ ਸੀ ਜਿਵੇਂ ਭੈਣੀ ਸਾਹਿਬ ਦੇ ਉਸ ਪ੍ਰਾਚੀਨ ਰੂਪ ਦੇ ਨਾਲ ਸ਼ਾਇਦ ਕਿਤੇ ਉਹ ਵਿਰਸਾ ਵੀ ਨਾ ਗੁਆਚ ਗਿਆ ਹੋਵੇ. ਕੁਝ ਕੁ ਮਿਨਟਾਂ ਮਗਰੋਂ ਹੀ ਅਹਿਸਾਸ ਹੋਇਆ ਕਿ ਮੇਰੇ ਮਨ ਵਿੱਚ ਆਈ ਸ਼ੰਕਾ ਨਿਰਮੂਲ ਸੀ. ਭੈਣੀ ਸਾਹਿਬ ਵਿਖੇ ਪ੍ਰਾਚੀਨ ਵਿਰਸੇ ਨੂੰ ਸੰਭਾਲਾਂ ਵਾਲਾ ਇੱਕ ਮਿਊਜੀਅਮ ਵਰਗਾ ਪਾਰਕ ਵੀ ਹੈ ਜਿਥੇ ਉਸ ਪੁਰਾਣੇ ਵੇਲਿਆਂ ਦੇ ਵਿਰਸੇ ਨੂੰ ਪੂਰੀ ਤਰ੍ਹਾਂ ਸੰਭਾਲਿਆ ਜਾ ਰਿਹਾ ਹੈ. ਇਸ ਦੇ ਨਾਲ ਹੀ ਉਥੇ ਇੱਕ ਗੋਲ ਮੰਦਰ ਵੀ ਨਜ਼ਰ ਆਇਆ. ਇਹ ਗੋਲ ਮੰਦਿਰ ਅਸਲ ਵਿੱਚ ਉਹ ਅਸਥਾਨ ਹੈ ਜਿਥੇ ਨਾਮਧਾਰੀ ਸੰਪਰਦਾ ਨੂੰ ਤਰੱਕੀ ਅਤੇ ਖੁਸ਼ਹਾਲੀ ਵਾਲੇ ਨਾਵੇੰ ਰਸਤੇ ਦਿਖਾਉਣ ਵਾਲੇ ਸਤਿਗੁਰੂ ਪ੍ਰਤਾਪ ਸਿੰਘ ਜੀ ਨੇ ਆਪਣੇ ਸੁਆਸ ਤਿਆਗੇ ਸਨ.ਅਠਾਂ ਦਰਵਾਜਿਆਂ ਵਾਲੇ ਇਸ ਗੋਲ ਮੰਦਰ ਵਿੱਚ ਸਤਿਕਾਰ ਵੱਜੋਂ ਇੱਕ ਵਿਛੀ ਹੋਈ ਮੰਜੀ ਅਤੇ ਉਸ ਉੱਪਰ ਇਲ ਪੇਂਟਿੰਗ ਲੱਗੀ ਹੋਈ ਹੈ.ਪੇਂਟਿੰਗ ਵਿੱਚ ਆਖਿਰੀ ਸੁਆਸਾਂ ਵੇਲੇ ਸਤਿਗੁਰੂ ਪ੍ਰਤਾਪ ਸਿੰਘ, ਸਿਰਹਾਣੇ ਵਾਲੇ ਪਾਸੇ ਨਾਲ ਖੜੇ ਹਨ ਭਰਾ ਹਰਿ ਸਿੰਘ ਜੀ ਅਤੇ ਜਮੀਨ ਤੇ ਚਰਨਾਂ ਵਾਲੇ ਪਾਸੇ ਬੈਠੇ ਹਨ ਬੇਟੇ ਜਗਜੀਤ ਸਿੰਘ ਜੀ ਜੋ ਕੀ ਅੱਜ ਕਲ ਸਤਿਗੁਰੂ ਜਗਜੀਤ ਸਿੰਘ ਦੇ ਨਾਮ ਨਾਲ ਜਾਣੇ ਜਾਂਦੇ ਹਨ..
ਇਸ ਗੋਲ ਮੰਦਰ ਦੀ ਛਤ ਅੱਜ ਕਲ ਵੀ ਕਾਨਿਆਂ ਵਾਲੀ ਰੱਖੀ ਗਈ ਹੈ. ਜਦੋਂ ਵੀ ਮੀਂਹ, ਹਨੇਰੀ ਜਾਂ  ਤੁਫਾਨ ਵਰਗੇ ਕਿਸੇ ਮੌਸਮੀ  ਪ੍ਰਭਾਵ ਨਾਲ ਇਹ ਛੱਤ ਖਰਾਬ ਹੁੰਦੀ ਹੈ ਤਾਂ ਕਾਨੇ ਬਦਲ ਦਿੱਤੇ ਜਾਂਦੇ ਹਨ ਪਰ ਵਿਰਸੇ ਦੀ ਸਾਂਭ ਸੰਭਾਲ ਨੂੰ ਕਿਮ ਰਖਦਿਆਂ ਇਥੇ ਕਦੇ ਵੀ ਪੱਕਾ ਲੈਂਟਰ ਨਹੀਂ ਪਾਇਆ ਜਾਂਦਾ. ਲਾਓ ਦੇਖੋ ਇਸਦੀ ਇੱਕ ਛੋਟੀ ਜਿਹੀ ਝਲਕ ਇਸ ਵੀਡੀਓ ਰਾਹੀਂ. ਭੈਣੀ ਸਾਹਿਬ ਵਿਖੇ ਮੌਜੂਦ ਕੁਝ ਹੋਰ ਮਹਤਵਪੂਰਣ ਥਾਵਾਂ ਬਾਰੇ ਅਗਲੀਆਂ ਅਗਲੇਰੀਆਂ ਪੋਸਟਾਂ ਵਿੱਚ ਵੀ ਚਰਚਾ ਹੁੰਦੀ ਰਹੇਗੀ.--ਰੈਕਟਰ ਕਥੂਰੀਆ