Showing posts with label ਥਾਵਾਂ. Show all posts
Showing posts with label ਥਾਵਾਂ. Show all posts

Sunday, October 16, 2011

ਭੈਣੀ ਸਾਹਿਬ ਦਾ ਗੋਲ ਮੰਦਰ

ਨਵੀਂ ਤਕਨੀਕ ਦੇ ਨਾਲ ਨਾਲ ਵਿਰਸੇ ਦੀ ਸੰਭਾਲ ਵੀ ਜਾਰੀ
ਭੈਣੀ ਸਾਹਿਬ ਇੱਕ ਅਜਿਹਾ ਅਸਥਾਨ ਹੈ ਜਿਥੇ ਟੇਕਨੌਲੋਜੀ ਦੀ ਨਵੀਂ ਤੋਂ ਨਵੀਂ ਤਰੱਕੀ ਵੀ ਹੈ,.ਜ਼ਿੰਦਗੀ ਦੇ ਕੰਮ ਆਉਣ ਵਾਲੀ ਹਰ ਸਹੂਲਤ ਵੀ ਮੌਜੂਦ ਹੈ. ਭਾਵੇਂ ਸੂਰਜੀ ਊਰਜਾ ਨਾਲ ਬਿਜਲੀ ਬਣਾਉਣ ਦੀ ਗੱਲ ਹੋਵੇ ਤੇ ਭਾਵੇਂ ਵਿੱਦਿਆ, ਸੰਗੀਤ ਜਾਂ ਫੇਰ ਖੇਡਾਂ ਦਾ ਖੇਤਰ  ਹਰ ਖੇਤਰ ਵਿੱਚ ਨਾਮਧਾਰੀਆਂ ਦਾ ਪੂਰਾ ਬੋਲਬਾਲਾ ਹੈ. ਏਨੀ ਤਰੱਕੀ ਅਤੇ ਏਨੀਆਂ ਪ੍ਰਾਪਤੀਆਂ ਦੇ ਬਾਵਜੂਦ ਹਰ ਨਾਮਧਾਰੀ ਹਮੇਸ਼ਾਂ ਇਹੀ ਆਖਦਾ ਹੈ ਕੀ ਸਤਿਗੁਰੂ ਜਗਜੀਤ ਸਿੰਘ ਜੀ ਦੀ ਕਿਰਪਾ ਹੈ ਜੀ. 14 ਤੋਂ 17  ਅਕਤੂਬਰ ਤੱਕ ਚੱਲੇ ਨਾਮਧਾਰੀ ਸਮਾਗਮ ਦੌਰਾਨ ਉਥੇ ਜਾਂ ਦਾ ਮੌਕਾ ਮਿਲਿਆ ਤਾਂ ਦੇਖਿਆ ਕੀ ਨਕਸ਼ਾ ਹੀ ਪਲਟਿਆ ਪਿਆ ਸੀ. ਦਸ ਬਾਰਾਂ ਸਾਲ ਪਹਿਲਾਂ ਵਾਲੀ ਹੁਣ ਉਥੇ ਕੋਈ ਗੱਲ ਹੀ ਨਜਰ ਨਹੀਂ ਸੀ ਆ ਰਹੀ. ਤਰੱਕੀ ਦੀਆਂ ਇਹਨਾਂ ਸਿਖਰਾਂ ਨੂੰ ਦੇਖ ਕੇ ਬਹੁਤ ਹੀ ਖੁਸ਼ੀ ਵੀ ਹੋਈ ਕੀ ਦੇਖੋ ਸੰਗਤਾਂ ਨੂੰ ਦੀਵਾਨ ਹਾਲ ਤੱਕ ਲਿਜਾਣ ਅਤੇ ਲਿਆਉਣ ਵਾਸਤੇ ਕਲੱਬ ਕਾਰਣ ਦਾ ਪ੍ਰਬੰਧ ਹੈ ਅਤੇ ਇਹ ਸਹੂਲਤ ਹਰ ਕਿਸੇ ਲਈ ਹੈ ਕੋਈ ਵਿਤਕਰਾ ਨਹੀਂ. ਫਿਰ ਮਨ ਵਿੱਚ ਉਦਾਸੀ ਵੀ ਆਈ. .

ਇੰਝ ਲੱਗਦਾ ਸੀ ਜਿਵੇਂ ਭੈਣੀ ਸਾਹਿਬ ਦੇ ਉਸ ਪ੍ਰਾਚੀਨ ਰੂਪ ਦੇ ਨਾਲ ਸ਼ਾਇਦ ਕਿਤੇ ਉਹ ਵਿਰਸਾ ਵੀ ਨਾ ਗੁਆਚ ਗਿਆ ਹੋਵੇ. ਕੁਝ ਕੁ ਮਿਨਟਾਂ ਮਗਰੋਂ ਹੀ ਅਹਿਸਾਸ ਹੋਇਆ ਕਿ ਮੇਰੇ ਮਨ ਵਿੱਚ ਆਈ ਸ਼ੰਕਾ ਨਿਰਮੂਲ ਸੀ. ਭੈਣੀ ਸਾਹਿਬ ਵਿਖੇ ਪ੍ਰਾਚੀਨ ਵਿਰਸੇ ਨੂੰ ਸੰਭਾਲਾਂ ਵਾਲਾ ਇੱਕ ਮਿਊਜੀਅਮ ਵਰਗਾ ਪਾਰਕ ਵੀ ਹੈ ਜਿਥੇ ਉਸ ਪੁਰਾਣੇ ਵੇਲਿਆਂ ਦੇ ਵਿਰਸੇ ਨੂੰ ਪੂਰੀ ਤਰ੍ਹਾਂ ਸੰਭਾਲਿਆ ਜਾ ਰਿਹਾ ਹੈ. ਇਸ ਦੇ ਨਾਲ ਹੀ ਉਥੇ ਇੱਕ ਗੋਲ ਮੰਦਰ ਵੀ ਨਜ਼ਰ ਆਇਆ. ਇਹ ਗੋਲ ਮੰਦਿਰ ਅਸਲ ਵਿੱਚ ਉਹ ਅਸਥਾਨ ਹੈ ਜਿਥੇ ਨਾਮਧਾਰੀ ਸੰਪਰਦਾ ਨੂੰ ਤਰੱਕੀ ਅਤੇ ਖੁਸ਼ਹਾਲੀ ਵਾਲੇ ਨਾਵੇੰ ਰਸਤੇ ਦਿਖਾਉਣ ਵਾਲੇ ਸਤਿਗੁਰੂ ਪ੍ਰਤਾਪ ਸਿੰਘ ਜੀ ਨੇ ਆਪਣੇ ਸੁਆਸ ਤਿਆਗੇ ਸਨ.ਅਠਾਂ ਦਰਵਾਜਿਆਂ ਵਾਲੇ ਇਸ ਗੋਲ ਮੰਦਰ ਵਿੱਚ ਸਤਿਕਾਰ ਵੱਜੋਂ ਇੱਕ ਵਿਛੀ ਹੋਈ ਮੰਜੀ ਅਤੇ ਉਸ ਉੱਪਰ ਇਲ ਪੇਂਟਿੰਗ ਲੱਗੀ ਹੋਈ ਹੈ.ਪੇਂਟਿੰਗ ਵਿੱਚ ਆਖਿਰੀ ਸੁਆਸਾਂ ਵੇਲੇ ਸਤਿਗੁਰੂ ਪ੍ਰਤਾਪ ਸਿੰਘ, ਸਿਰਹਾਣੇ ਵਾਲੇ ਪਾਸੇ ਨਾਲ ਖੜੇ ਹਨ ਭਰਾ ਹਰਿ ਸਿੰਘ ਜੀ ਅਤੇ ਜਮੀਨ ਤੇ ਚਰਨਾਂ ਵਾਲੇ ਪਾਸੇ ਬੈਠੇ ਹਨ ਬੇਟੇ ਜਗਜੀਤ ਸਿੰਘ ਜੀ ਜੋ ਕੀ ਅੱਜ ਕਲ ਸਤਿਗੁਰੂ ਜਗਜੀਤ ਸਿੰਘ ਦੇ ਨਾਮ ਨਾਲ ਜਾਣੇ ਜਾਂਦੇ ਹਨ..
ਇਸ ਗੋਲ ਮੰਦਰ ਦੀ ਛਤ ਅੱਜ ਕਲ ਵੀ ਕਾਨਿਆਂ ਵਾਲੀ ਰੱਖੀ ਗਈ ਹੈ. ਜਦੋਂ ਵੀ ਮੀਂਹ, ਹਨੇਰੀ ਜਾਂ  ਤੁਫਾਨ ਵਰਗੇ ਕਿਸੇ ਮੌਸਮੀ  ਪ੍ਰਭਾਵ ਨਾਲ ਇਹ ਛੱਤ ਖਰਾਬ ਹੁੰਦੀ ਹੈ ਤਾਂ ਕਾਨੇ ਬਦਲ ਦਿੱਤੇ ਜਾਂਦੇ ਹਨ ਪਰ ਵਿਰਸੇ ਦੀ ਸਾਂਭ ਸੰਭਾਲ ਨੂੰ ਕਿਮ ਰਖਦਿਆਂ ਇਥੇ ਕਦੇ ਵੀ ਪੱਕਾ ਲੈਂਟਰ ਨਹੀਂ ਪਾਇਆ ਜਾਂਦਾ. ਲਾਓ ਦੇਖੋ ਇਸਦੀ ਇੱਕ ਛੋਟੀ ਜਿਹੀ ਝਲਕ ਇਸ ਵੀਡੀਓ ਰਾਹੀਂ. ਭੈਣੀ ਸਾਹਿਬ ਵਿਖੇ ਮੌਜੂਦ ਕੁਝ ਹੋਰ ਮਹਤਵਪੂਰਣ ਥਾਵਾਂ ਬਾਰੇ ਅਗਲੀਆਂ ਅਗਲੇਰੀਆਂ ਪੋਸਟਾਂ ਵਿੱਚ ਵੀ ਚਰਚਾ ਹੁੰਦੀ ਰਹੇਗੀ.--ਰੈਕਟਰ ਕਥੂਰੀਆ   

Friday, June 24, 2011

ਉਹ ਵੀ ਸਮਾਂ ਸੀ

ਤੁਸੀਂ ਅੰਗ੍ਰੇਜ਼ਾਂ ਦੇ ਜਮਾਨੇ ਨੂੰ ਜਿੰਨਾ ਮਰਜ਼ੀ  ਮਾੜਾ  ਕਹਿ ਲਓ ਪਰ ਬਜੁਰਗ ਅੱਜ ਵੀ ਉਸ ਜ਼ਮਾਨੇ ਦੀਆਂ ਸਿਫਤਾਂ ਕਰਦੇ ਨਹੀਂ ਥੱਕਦੇ. ਅੰਗ੍ਰੇਜ਼ ਆਪਣੇ ਰਾਜਨੀਤਕ ਵਿਰੋਧੀਆਂ ਨਾਲ ਸਖਤੀਆਂ ਕਰਦੇ ਹੋਣਗੇ ਪਰ ਆਮ ਇਨਸਾਨ ਪ੍ਰਤੀ ਉਹਨਾਂ ਦੀ ਪਹੁੰਚ ਕੁਝ ਅਜਿਹੀ ਸੀ ਕਿ ਲੋਕ ਅੱਜ ਵੀ ਉਸਨੂੰ ਯਾਦ ਕਰਦੇ ਹਨ. ਇਸਦੀ ਇੱਕ ਮਿਸਾਲ ਬਣ ਕੇ ਖੜਾ ਹੈ ਰੇਲਵੇ ਸਟੇਸ਼ਨ ਬੜੋਗ. ਸ਼ਿਮਲਾ ਨੇੜੇ ਸੋਲਾਂ ਜ਼ਿਲੇ ਵਿੱਚ ਬਣੇ ਹੋਏ ਇਸ ਰੇਲਵੇ ਸਟੇਸ਼ਨ ਅਤੇ ਇਸਦੇ ਨਾਮ ਬਾਰੇ ਇੱਕ ਅਜਿਹੀ ਕਹਾਣੀ ਹੈ ਜੋ ਉਸ ਯੁਗ ਅਤੇ ਅੱਜ ਦੇ ਸਮੇਂ ਬਾਰੇ ਬਿਨਾ ਕੋਈ ਭੂਮਿਕਾ ਬੰਨਿਆਂ ਬਹੁਤ ਕੁਝ ਦੱਸ ਦੇਂਦੀ ਹੈ. ਇਸ ਸਟੇਸ਼ਨ ਦਾ ਨਾਮ ਇੱਕ ਅਜਿਹੇ ਇੰਜੀਨੀਅਰ ਦੇ ਨਾਮ ਤੇ ਹੈ ਜਿਸ ਨੇ ਲਾਪਰਵਾਹੀ ਦਾ ਮਾਮੂਲੀ ਜਿਹਾ ਇਲਜ਼ਾਮ ਲੱਗਣ ਅਤੇ ਸਿਰਫ ਇੱਕ ਰੁਪੈ ਦਾ ਜੁਰਮਾਨਾ ਹੋਣ ਤੇ ਖੁਦਕੁਸ਼ੀ ਕਰ ਲਈ ਸੀ ਤੇ ਪਛਤਾਵੇ ਵੱਜੋਂ ਅੰਗ੍ਰੇਜ਼ਾਂ ਦੀ ਸਰਕਾਰ ਨੇ ਇਸ ਰੇਲਵੇ ਸਟੇਸ਼ਨ ਦਾ ਨਾਮ ਉਸਦੇ ਨਾਮ ਤੇ ਹੀ ਰੱਖ ਦਿੱਤਾ ਸੀ. ਦੇਖੋ ਇਹ ਸੀ ਅਧਿਕਾਰੀਆਂ ਅਤੇ ਸਰਕਾਰਾਂ ਦਰਮਿਆਨ ਇੱਕ ਰਿਸ਼ਤਾ ਜਿਸ ਵਿੱਚ ਮਾਮੂਲੀ ਜਿਹੀ ਦਰਾੜ ਵੀ ਕਿੰਨੀ ਗੰਭੀਰ ਬਣ ਜਾਂਦੀ ਸੀ. ਤੇ ਜਦੋਂ ਸਰਕਾਰਾਂ ਨੂੰ ਗਲਤੀਆਂ ਦਾ ਅਹਿਸਾਸ ਹੁੰਦਾ ਤਾਂ ਓਹ ਵੀ ਆਪਣੇ ਅਫਸਰਾਂ ਦਾ ਮਾਣ ਰੱਖਦੀਆਂ. ਹੁਣ ਕੀ ਹੁੰਦਾ ਹੈ ਇਹ ਸਾਰੇ ਜਾਣਦੇ ਹੀ ਹਨ. ਆਓ ਗੱਲ ਕਰਦੇ ਹਾਂ ਉਸ ਸਮੇਂ ਦੀ ਜਦੋਂ ਲੋਕਾਂ ਨੂੰ ਅਹਿਸਾਸ ਹੁੰਦਾ ਸੀ ਆਪਣੀ ਜਿੰਮੇਵਾਰੀ ਦਾ, ਆਪਣੇ ਕੰਮ ਦੇ ਮਾਨ ਦਾ, ਆਪਣੀ ਇਜ਼ਤ ਦਾ, ਆਪਣੀ ਮਰਿਯਾਦਾ ਦਾ, ਆਪਣੇ ਵੱਕਾਰ ਦਾ, ਮਾੜੀ ਜਿਹੀ ਉਂਗਲੀ ਦੇਖ ਕੇ ਲੋਕ ਆਪਣੇ ਬਾਰੇ ਸੋਚਾਂ ਲੱਗ ਪੈਂਦੇ ਸਨ. ਇਹ ਉਹ ਦੌਰ ਸੀ ਜਦੋਂ ਲੋਕ ਅੰਦਰੋਂ ਬਾਹਰੋਂ ਸੱਚੇ ਸੁੱਚੇ ਸਨ. ਮਾੜੀ ਜਿਹੀ ਗੱਲ ਹੋਵੇ ਸਹੀ ਬਾਸ ਚਿੰਤਾ ਲੱਗ ਜਾਂਦੀ ਸੀ...ਲਾਗਾ ਚੁਨਰੀ ਪੈ ਦਾਗ ਛੁਪਾਊਂ ਕੈਸੇ, ਘਰ ਜੂਨ ਕੈਸੇ....ਹੁਣ ਤਾਂ ਸਭ ਕੁਝ ਸਾਬਿਤ ਹੋ ਜਾਣ ਤੇ ਵੀ ਲੋਕ ਕੈਮਰੇ ਮੂਹਰੇ ਦੰਦ ਕਢਨੋਂ ਨੀ ਸ਼ਰਮਾਉਂਦੇ.
ਤੇ ਵਿਚਾਰੇ ਉਸ ਲਾਇਕ ਇੰਜੀਨੀਅਰ ਤੇ ਇਲ੍ਜ਼ਾਮ ਸੀ ਸਿਰਫ ਲਾਪਰਵਾਹੀ ਦਾ ਅਤੇ ਇਸ ਲਈ ਉਸਤੇ ਲਗਾਇਆ ਗਿਆ ਸੀ ਸਿਰਫ ਇੱਕ ਰੁਪਏ ਦਾ ਜੁਰਮਾਨਾ. ਕਾਲਕਾ ਤੋਂ  ਤਕਰੀਬਨ 42 ਕਿਲੋਮੀਟਰ ਦੂਰ ਬੜੋਗ ‘ਚ ਬਣੀ ਹੋਈ 1143.61 ਮੀਟਰ ਲੰਬਾਈ ਵਾਲੀ ਇਹ ਸੁਰੰਗ ਸੰਸਰ ਵਿੱਚ ਸਭ ਤੋਂ ਸਿਧੀ ਸੁਰੰਗ ਹੈ. ਇਸਦੇ ਖਤਮ ਹੁੰਦੀਆਂ ਸਾਰ ਹੀ ਸਟੇਸ਼ਨ ਆ ਜਾਂਦਾ ਹੈ.1.14 ਕਿਲੋਮੀਟਰ ਦੀ ਇਹ ਸਭ ਤੋਂ ਲੰਬੀ ਸੁਰੰਗ ਨੂੰ ਬਣਾਉਣ ਦਾ ਕੰਮ ਜੁਲਾਈ 1900 ‘ਚ ਸ਼ੁਰੂ ਹੋਇਆ ਸੀ ਤੇ 1903 ਤੱਕ ਜਾਰੀ ਰਿਹਾ. ਇਸ ਇਲਾਕੇ ਦੀਆਂ 103 ਸੁਰੰਗਾਂ ਵਿੱਚੋਂ ਇਹ ਸ਼ਾਇਦ ਸਭ ਤੋਂ ਲੰਮੀ ਸੁਰੰਗ ਹੈ. ਯੋਜਨਾ ਮੁਤਾਬਿਕ ਇਹ 2 ਕਿਲੋਮੀਟਰ ਲੰਬੀ ਸੁਰੰਗ ਬਣਾਈ ਜਾਣੀ ਸੀ, ਪਰ ਜਾਂਚ ਪੜਤਾਲ ਦੌਰਾਨ ਸੁਰੰਗ ਦੇ ਦੋਵਾਂ ਪਾਸਿਆਂ ਵਾਲੇ ਕਿਨਾਰਿਆਂ ਤੇ ਅਲਾਈਮੈਂਟ ਠੀਕ ਨਹੀ ਬੈਠਿਆ ਤੇ ਅਖੀਰ ਇਸ ਨੂੰ ਏਸੇ ਤਰਾਂ ਹੀ  ਛੱਡ ਦਿੱਤਾ ਗਿਆ. ਇਸ ਕੁਤਾਹੀ ਬਦਲੇ ਬ੍ਰਿਟਿਸ਼ ਹਕੂਮਤ ਨੇ ਉਸ ਇੰਜੀਨਿਅਰ ਬੜੋਗ ਤੇ ਇਕ ਰੁਪਏ ਦਾ ਜ਼ੁਰਮਾਨਾ ਵੀ ਲਗਾਇਆ.ਸੰਵੇਦਨਸ਼ੀਲ ਮਨ ਵਾਲੇ ਉਸ ਇਮਾਨਦਾਰ ਅਤੇ ਮਿਹਨਤੀ ਇੰਜੀਨੀਅਰ ਨੂੰ ਇਸ ਜੁਰਮਾਨੇ ਵਾਲੇ ਹੁਕਮ ਨੇ ਡੂੰਘਾ ਸਦਮਾ ਦਿੱਤਾ. ਉਦਾਸੀ ਅਤੇ ਨਿਰਾਸ਼ਾ ਦੇ ਆਲਮ ਵਿੱਚ ਉਸਨੇ ਸ਼ਰਮਸਾਰ ਹੋ ਕੇ  ਆਪਣੇ ਆਪ ਨੂੰ ਗੋਲੀ ਮਾਰ ਕੇ ਖੁਦਕੁਸ਼ੀ ਕਰ ਲਈ. ਆਉਣ ਵਾਲੇ ਜੁਲਾਈ ਮਹੀਨੇ ਵਿੱਚ ਇਸ ਦੁੱਖਦਾਈ ਘਟਨਾ ਨੂੰ 111 ਸਾਲ ਹੋ ਜਾਣਗੇ. ਅੰਗ੍ਰੇਜ਼ ਸਰਕਾਰ ਨੂੰ ਵੀ ਇਹ ਖਬਰ ਸੁਣ ਕੇ ਪਛਤਾਵਾ ਜਿਹਾ ਹੋਇਆ ਅਤੇ ਸ਼ਰਧਾਂਜਲੀ ਵਜੋਂ ਇਸ ਰੇਲਵੇ ਸਟੇਸ਼ਨ ਦਾ ਨਾਮ ਹੀ ਉਸ ਇੰਜੀਨੀਅਰ ਬਰੋਦ ਦੇ ਨਾਮ ਤੇ ਰੱਖ ਦਿੱਤਾ ਗਿਆ. ਹੁਣ ਦੇਖਣਾ ਇਹ ਹੈ ਕਿ ਅਰਬਾਂ ਰੁਪਏ ਦੇ 2 ਜੀ ਸਪੈਕਟ੍ਰਮ ਘੋਟਾਲੇ ਤੇ ਕਰੋਡ਼ਾਂ ਰੁਪਏ ਦੇ ਰਾਸ਼ਟਰਮੰਡਲ ਖੇਡ ਘੋਟਾਲੇ ਦੇ ਦੋਸ਼ੀ ਜੇਲ ਜਾਣ ਤੇ ਵੀ ਸ਼ਰਮਸਾਰ ਨਹੀ ਹੋਏ. ਜੁੱਤੀਆਂ ਦੇ ਹਰ ਪੈਣ ਤੇ ਵੀ ਕਦੇ ਮਾਯੂਸ ਨਹੀਂ ਹੁੰਦੇ, ਬੂਟ ਸੁੱਟੇ ਜਾਣ ਤੇ ਵੀ ਉਹਨਾਂ ਨੂੰ ਕੋਈ ਅਹਿਸਾਸ ਨਹੀਂ ਹੁੰਦਾ....ਆਖਿਰ ਕੀ ਬਣੇਗਾ ਇਸ ਦੇਸ਼ ਦਾ ? ਕੁਰੱਪਸ਼ਨ ਦੇ ਇਹਨਾਂ ਅਵਤਾਰਾਂ  ਦੇ ਅਕਾਲ ਚਲਾਣੇ ਤੇ ਇਹਨਾਂ ਨੂੰ ਕਿਸਤਰਾਂ ਦੀ ਸ਼ਰਧਾਂਜਲੀ ਦਿੱਤੀ ਜਾਏਗੀ ? ਹਾਂ ਤੁਸੀਂ ਉਸ ਇੰਜੀਨੀਅਰ ਨੂੰ ਸ਼ਰਧਾਂਜਲੀ ਦੇਣ ਲਈ ਬੜੋਗ ਜਾਣਾ ਚਾਹੋ ਤਾਂ ਸ਼ਿਮਲਾ-ਕਾਲਕਾ ਰੂਟ ਵਾਲੇ ਇਸ ਸਟੇਸ਼ਨ ਤੇ ਤੁਸੀਂ ਚੰਡੀਗੜ੍ਹ ਤੋਂ ਵੀ ਪੁੱਜ ਸਕਦੇ ਹੋ ਜਿਥੋਂ ਇਹ ਸਿਰਫ 60-65 ਕਿਲੋਮੀਟਰ ਦੂਰ ਪਏਗਾ. ਜੇ ਤੁਹਾਨੂੰ ਉਥੋਂ ਦੇ ਲੋਕ ਇਸ ਬਾਰੇ ਕੁਝ ਹੋਰ ਵੀ ਦੱਸਣ ਤਾਂ ਉਸ ਬਾਰੇ ਕੁਝ ਲਿਖ ਕੇ ਭੇਜਣਾ ਨਾ ਭੁੱਲਣਾ. ਤੁਹਾਡੇ ਵਿਚਾਰਾਂ ਦੀ ਉਡੀਕ ਹਮੇਸ਼ਾਂ ਦੀ ਤਰਾਂ ਇਸ ਵਾਰ ਵੀ ਬਣੀ ਰਹੇਗੀ. --ਬਿਊਰੋ ਰਿਪੋਰਟ