ਗੁਰਦੁਆਰਾ ਬੰਗਲਾ ਸਾਹਿਬ ਵਿਚ ਬਜ਼ਾਰ ਨਾਲੋਂ ਬਹੁਤ ਘੱਟ ਰੇਟ ਤੇ ਹੋਏਗਾ ਟੈਸਟ

21st July 2022 at 06:01 PM

ਬਰੈਸਟ ਕੈਂਸਰ ਦੀ ਜਾਂਚ ਲਈ ਮੈਮੋਗ੍ਰਾਫੀ ਮਸ਼ੀਨ ਦਾ ਹੋਇਆ ਉਦਘਾਟਨ

ਨਵੀਂ ਦਿੱਲੀ: 21 ਜੁਲਾਈ 2022: (ਮਨਪ੍ਰੀਤ ਸਿੰਘ ਖਾਲਸਾ//ਪੰਜਾਬ ਸਕਰੀਨ)::

ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵੱਲੋਂ ਸ੍ਰੀ ਗੁਰਦੁਆਰਾ ਬੰਗਲਾ ਸਾਹਿਬ ਵਿਚ ਚਲਾਏ ਜਾ ਰਹੇ ਗੁਰੂ ਹਰਿਕ੍ਰਿਸ਼ਨ ਪੋਲੀਕਲੀਨਿਕ ਵਿਚ ਮੈਮੋਗ੍ਰਾਫੀ ਮਸ਼ੀਨ ਦਾ ਉਦਘਾਟਨ ਕਾਰ ਸੇਵਾ ਵਾਲੇ ਬਾਬਾ ਬਚਨ ਸਿੰਘ ਜੀ ਨੇ ਕਮੇਟੀ ਦੇ ਪ੍ਰਧਾਨ ਸਰਦਾਰ ਹਰਮੀਤ ਸਿੰਘ ਕਾਲਕਾ, ਜਨਰਲ ਸਕੱਤਰ ਸਰਦਾਰ ਜਗਦੀਪ ਸਿੰਘ ਕਾਹਲੋਂ ਤੇ ਹੋਰ ਪਤਵੰਤਿਆਂ ਦੀ ਹਾਜ਼ਰੀ ਵਿਚ ਕੀਤਾ।

ਇਸ ਮੌਕੇ ਸਰਦਾਰ ਹਰਮੀਤ ਸਿੰਘ ਕਾਲਕਾ ਤੇ ਸਰਦਾਰ ਜਗਦੀਪ ਸਿੰਘ ਕਾਹਲੋਂ ਅਤੇ ਸ. ਭੁਪਿੰਦਰ ਸਿੰਘ ਭੁੱਲਰ ਚੇਅਰਮੈਨ ਗੁਰੂ ਹਰਿਕ੍ਰਿਸ਼ਨ ਪੌਲੀਕਲੀਨਿਕ ਗੁਰਦੁਆਰਾ ਬੰਗਲਾ ਸਾਹਿਬ ਨੇ ਦੱਸਿਆ ਕਿ ਇਹ ਮੈਮੋਗ੍ਰਾਫੀ ਮਸ਼ੀਨ ਬਰੈਸਟ ਕੈਂਸਰ ਦੀ ਜਾਂਚ ਲਈ ਟੈਸਟ ਕਰਦੀ ਹੈ। ਉਹਨਾਂ ਕਿਹਾ ਕਿ ਇਸ ਮਸ਼ੀਨ ਦੇ ਲੱਗਣ ਨਾਲ ਦਿੱਲੀ ਵਿਚ ਮਾਵਾਂ ਤੇ ਭੈਣਾਂ ਨੁੰ ਵੱਡੀ ਸਹੂਲਤ ਮਿਲ ਗਈ ਹੈ। ਉਹਨਾਂ ਇਹ ਵੀ ਦੱਸਿਆ ਕਿ ਇਸ ਮੈਮੋਗ੍ਰਾਫੀ ਟੈਸਟ ਦੀ ਫੀਸ ਬਜ਼ਾਰ ਨਾਲੋਂ ਕਿਤੇ ਘੱਟ ਹੋਵੇਗੀ ਤੇ ਜਲਦੀ ਹੀ ਫੀਸ ਤੈਅ ਕਰ ਲਈ ਜਾਵੇਗੀ।

ਉਹਨਾਂ ਦੱਸਿਆ ਕਿ ਇਸ ਤੋਂ ਪਹਿਲਾਂ ਇਸ ਸੈਂਟਰ ਵਿਚ ਡੇਢ ਸਾਲ ਪਹਿਲਾਂ ਐਮ ਆਰ ਆਈ ਤੇ ਸੀ ਟੀ ਸਕੈਨ ਦੀ ਸਹੂਲਤ ਸ਼ੁਰੂ ਕੀਤੀ ਗਈ ਸੀ ਜਿਥੇ ਟੈਸਟ 50 ਰੁਪਏ ਦਾ ਕੀਤਾ ਜਾ ਰਿਹਾ ਹੈ ਤੇ ਹੁਣ ਤੱਕ 22 ਹਜ਼ਾਰ ਲੋਕ ਇਸਦਾ ਲਾਭ ਲੈ ਚੁੱਕੇ ਹਨ।

ਉਹਨਾਂ ਇਹ ਵੀ ਦੱਸਿਆ ਕਿ ਇਹ ਪੋਲੀਕਲੀਨਿਕ ਚਲਾਉਣ ਵਿਚ ਬਾਬਾ ਬਚਨ ਸਿੰਘ ਜੀ ਕਾਰ ਸੇਵਾ ਵਾਲਿਆਂ ਦਾ ਵੱਡਾ ਹੱਥ ਹੈ।

ਸਰਦਾਰ ਕਾਲਕਾ ਤੇ ਸਰਦਾਰ ਕਾਹਲੋਂ ਤੇ ਸਰਦਾਰ ਭੁੱਲਰ ਨੇ ਦਿੱਲੀ ਦੀਆਂ ਸੰਗਤਾਂ ਦਾ ਧੰਨਵਾਦ ਵੀ ਕੀਤਾ ਜਿਹਨਾਂ ਦੇ ਸਹਿਯੋਗ ਨਾਲ ਇਹ ਮਸ਼ੀਨਾਂ ਸਥਾਪਿਤ ਕੀਤੀਆਂ ਜਾ ਰਹੀਆਂ ਹਨ ਤੇ ਇਹ ਪੋਲੀਕਲੀਨਿਕ ਚਲ ਰਿਹਾ ਹੈ। ਉਹਨਾਂ ਦੱਸਿਆ ਕਿ ਇਹ ਸਿਰਫ ਦੇਸ਼ ਹੀ ਨਹੀਂ ਬਲਕਿ ਦੁਨੀਆਂ ਦਾ ਸਭ ਤੋਂ ਸਸਤਾ ਪੋਲੀਕਲੀਨਿਕ ਹੈ।

ਉਹਨਾਂ ਇਹ ਵੀ ਦੱਸਿਆ ਕਿ ਜਲਦੀ ਹੀ ਇਥੇ ਅਤਿ ਆਧੁਨਿਕ ਲੈਬ ਵੀ ਸ਼ੁਰੂ ਕੀਤੀ ਜਾ ਰਹੀ ਹੈ ਜਿਸ ਵਿਚ ਅਤਿ ਆਧੁਨਿਕ ਮਸ਼ੀਨਾਂ ਲਗਾ ਕੇ ਲੋਕਾਂ ਨੂੰ ਹੋਰ ਟੈਸਟਾਂ ਦੀ ਸਹੂਲਤ ਦਿੱਤੀ ਜਾਵੇਗੀ।

ਜੋ ਕੰਮ ਸਰਕਾਰਾਂ ਨੇ ਕਰਨਾ ਸੀ ਉਹ ਕੀਤਾ ਲੁਧਿਆਣਾ ਮੈਡੀਵੇਜ ਹਸਪਤਾਲ ਨੇ

ਲੋਕ ਹਿਤ ਤੇ ਲੋਕ ਭਲਾਈ ਨੂੰ ਮਿਲੇਗੀ ਪਹਿਲ

*ਜਨਰਲ ਓਪੀਡੀ ਦੀ ਫੀਸ ਹੋਵੇਗੀ 100 ਰੁਪਏ

*ਹਸਪਤਾਲ ਵਿੱਚ ਅਲਟਰਾ ਮਾਡਰਨ ਕੈਥਲੈਬ ਸ਼ੁਰੂ 

*ਐਂਜਿਓਗਰਾਫੀ ਤੇ ਮਿਲੇਗੀ ਛੂਟ

*ਹਰ ਮਹੀਨੇ ਦੇ ਪਹਿਲੇ ਮੰਗਲਵਾਰ ਸਾਰੀ ਓਪੀਡੀ ਤੇ ਕਈ ਮਹੱਤਵਪੂਰਣ ਟੈਸਟ ਵੀ ਹੋਣਗੇ ਮੁਫਤ

*ਭਾਊ ਭਗਵਾਨ ਸਿੰਘ ਵੱਲੋਂ ਖੁਦ ਵੀ ਕੀਤੇ ਗਏ ਅਹਿਮ ਐਲਾਨ 

ਲੁਧਿਆਣਾ: 2 ਜਨਵਰੀ 2018: (ਪੰਜਾਬ ਸਕਰੀਨ ਟੀਮ)::

ਫਿਰੋਜਪੁਰ ਰੋਡ ਸਥਿੱਤ ਲੁਧਿਆਣਾ ਮੈਡੀਵੇਜ ਹਸਪਤਾਲ ਦੀ ਮੈਨੇਜਮੈਂਟ ਬਦਲਣ ਦੇ ਨਾਲ ਹੀ ਜਰੂਰਤਮੰਦ ਲੋਕਾਂ ਨੂੰ ਕਈ ਤਰਾਂ ਦੀਆਂ ਨਵੀਆਂ ਸੁਵਿਧਾਵਾਂ ਵੀ ਦਿੱਤੀਆ ਜਾ ਰਹੀਆਂ ਹਨ। ਨਵੀਂ ਮੈਨੇਜਮੈਂਟ ਨੇ ਕਿਹਾ ਕਿ ਲੋਕ ਹਿਤ ਤੇ ਲੋਕ ਭਲਾਈ ਨੂੰ ਹਮੇਸ਼ਾ ਪਹਿਲ ਦਿੱਤੀ ਜਾਵੇਗੀ। 

ਬੁੱਧਵਾਰ ਨੂੰ ਹਸਪਤਾਲ ਵਿਖੇ ਹੋਈ ਪਰੈਸ ਕਾਨਫਰੰਸ ਦੌਰਾਨ ਹਸਪਤਾਲ ਦੇ ਨਵੇਂ ਚੇਅਰਮੈਨ ਤੇ ਗੁਰਮੇਲ ਮੈਡੀਕੇਅਰ ਦੇ ਮਾਲਿਕ ਭਗਵਾਨ ਸਿੰਘ ਭਾਊ ਨੇ ਕਿਹਾ ਕਿ ਉਹਨਾਂ ਦਾ ਮਕਸਦ ਉਹਨਾਂ ਮਰੀਜਾਂ ਦੀ ਸੇਵਾ ਕਰਨਾ ਹੈ, ਜਿਹੜੇ ਵੱਡੇ ਹਸਪਤਾਲਾਂ ਵਿੱਚ ਮਹਿੰਗਾ ਇਲਾਜ ਨਹੀਂ ਕਰਾ ਸਕਦੇ। ਇਸ ਕਰਕੇ ਮਰੀਜਾਂ ਨੂੰ ਕਿਫਾਇਤੀ ਰੇਟ ਤੇ ਐਂਜਿਓਗਰਾਫੀ ਦੀ ਸੁਵਿਧਾ ਮੁਹੱਈਆ ਕਰਾਉਣ ਲਈ ਅਲਟਰਾ ਮਾਡਰਲ ਕੈਥਲੈਬ ਸਥਾਪਿਤ ਕੀਤੀ ਗਈ ਹੈ। ਹਰ ਮਹੀਨੇ ਦੇ ਪਹਿਲੇ ਮੰਗਲਵਾਰ ਸਾਰੀ ਓਪੀਡੀ ਦੇ ਨਾਲ-ਨਾਲ ਕਈ ਮਹੱਤਵਪੂਰਣ ਟੈਸਟ ਵੀ ਬਿਲਕੁਲ ਮੁਫਤ ਕੀਤੇ ਜਾਣਗੇ। ਹਸਪਤਾਲ ਵਿੱਚ ਅਨੁਭਵੀ ਕੈੰਸਰ ਸਰਜਨ, ਪਲਾਸਟਿਕ ਸਰਜਨ, ਕਿਡਨੀ ਰੋਗਾਂ ਦੇ ਮਾਹਿਰ,  ਦਿਮਾਗ ਤੇ ਰੀੜ ਦੀ ਹੱਡੀ ਰੋਗਾਂ ਦੇ ਮਾਹਿਰ, ਪੇਸ਼ਾਬ ਦੇ ਰੋਗਾਂ ਦੇ ਮਾਹਿਰ, ਹੱਡੀਆਂ ਨਾਲ ਸਬੰਧਿਤ ਰੋਗਾਂ ਦੇ ਮਾਹਿਰ, ਮੈਡੀਸਨ ਸਪੈਸ਼ਲਿਸਟ, ਔਰਤਾਂ ਤੇ ਬੱਚਿਆਂ ਦੇ ਰੋਗਾਂ ਦੇ ਮਾਹਿਰ ਅਤੇ ਡਾਈਟੀਸ਼ੀਅਨ ਨਿਯੁੱਕਤ ਕੀਤੇ ਗਏ ਹਨ। ਤਾਂ ਜੋ ਮਰੀਜਾਂ ਨੂੰ ਹਰ ਤਰਾਂ ਦੇ ਇਲਾਜ ਦੀ ਸੁਵਿਧਾ ਇੱਕੋ ਥਾਂ ਮਿਲ ਸਕੇ। ਇਸ ਹਸਪਤਾਲ ਵਿੱਚ ਹਰ ਕੈਟਾਗਿਰੀ ਦੇ ਮੁਤਾਬਿਕ ਹੀ ਇਲਾਜ ਦਾ ਪੈਕੇਜ ਬਣਾਇਆ ਗਿਆ ਹੈ। ਕਿਓੰਕਿ ਮੈਨੇਜਮੈਂਟ ਦਾ ਮਕਸਦ ਲੋਕ ਹਿਤ ਤੇ ਲੋਕ ਭਲਾਈ ਨੂੰ ਪਹਿਲ ਦਿੰਦੇ ਹੋਏ ਮਰੀਜਾਂ ਦੀ ਸੇਵਾ ਕਰਨਾ ਹੈ।

ਮੈਡੀਕਲ ਡਾਇਰੈਕਟਰ ਡਾ. ਸਤੀਸ਼ ਜੈਨ ਨੇ ਕਿਹਾ ਕਿ ਹਸਪਤਾਲ ਵਿੱਚ ਹਰ ਬੀਮਾਰੀ ਲਈ ਸੁਪਰ ਸਪੈਸ਼ਲਿਸਟ ਡਾਕਟਰ ਤੇ ਟ੍ਰੇਂਡ ਸਟਾਫ ਮੌਜੂਦ ਹੈ। ਇੱਥੇ ਮਰੀਜਾਂ ਦਾ ਇਲਾਜ ਉਹਨਾਂ ਦੀ ਸੇਵਾ ਹਿਤ ਕੀਤਾ ਜਾਂਦਾ ਹੈ। ਇਸ ਕਰਕੇ ਜਨਰਲ ਓਪੀਡੀ ਸ਼ੁਰੂ ਕੀਤੀ ਗਈ ਹੈ। ਜਿਸਦੀ ਫੀਸ ਕੇਵਲ 100 ਰੁਪਏ ਹੋਵੇਗੀ। ਹਸਪਤਾਲ ਦੀ ਸੀਈਓ ਮਨਪ੍ਰੀਤ ਕੌਰ ਨੇ ਕਿਹਾ ਕਿ ਅਸੀਂ ਮਾਨਵਤਾ ਦੀ ਸੇਵਾ ਨੂੰ ਸਭ ਤੋਂ ਊੱਪਰ ਮੰਨਦੇ ਹਾਂ। ਇਸ ਮੌਕੇ ਤੇ ਡਾ. ਰਵਿੰਦਰ ਤਾਹ, ਡਾ. ਕਰਮਵੀਰ ਗੋਇਲ, ਡਾ. ਸੰਜੀਵ ਰਾਜਪੂਤ, ਡਾ. ਸਰਵੇਸ਼ ਮਾਥੁਰ, ਡਾ. ਸੁਪਰੀਤ ਓਬਰਾਏ, ਡਾ. ਐਸਜੇਐਸ ਖੁਰਾਨਾ, ਡਾ. ਨੀਰਜ ਗੋਇਲ, ਡਾ. ਵੀਨਾ ਜੈਨ, ਡਾ, ਮਨਦੀਪ ਕੌਰ, ਡਾ. ਕਾਰਤਿਕ ਬਾਂਸਲ, ਹਸਪਤਾਲ ਦੇ ਜਰਨਲ ਮੈਨੇਜਰ ਨਵੀਨ ਅਗਰਵਾਲ ਤੇ ਕਾਰਪੋਰੇਟ ਸੈਲ ਦੀ ਮੈਨੇਜਰ ਮੋਨਿਕਾ ਸੂਦ ਵੀ ਮੌਜੂਦ ਰਹੀ।

Mediways:ਡਾ. ਸਤੀਸ਼ ਜੈਨ ਬਣੇ ਮੈਡੀਕਲ ਡਾਇਰੈਕਟਰ, ਮਨਪ੍ਰੀਤ ਬਣੀ CEO

ਮਰੀਜ਼ਾਂ ਨੂੰ ਮਿਲਣਗੀਆਂ ਹੁਣ ਹੋਰ ਸਹੂਲਤਾਂ 

ਲੁਧਿਆਣਾ: 16 ਦਸੰਬਰ 2018:  (ਪੰਜਾਬ  ਸਕਰੀਨ ਬਿਊਰੋ)::

ਅੱਜਕਲ ਦੇ ਸਵਾਰਥ ਭਰੇ ਦੌਰ ਵਿੱਚ ਮਨੁੱਖੀ ਭਲੇ ਨੂੰ ਯਾਦ ਰੱਖਣਾ ਅਤੇ ਨਿਸ਼ਕਾਮ ਹੋ ਕੇ ਚੱਲਣਾ ਕੋਈ ਆਸਾਨ ਨਹੀਂ। ਇਸ ਹਕੀਕਤ ਦੇ ਬਾਵਜੂਦ ਮੈਡੀਵੇਜ਼ ਹਸਪਤਾਲ ਆਪਣੀ ਸਥਾਪਨਾ ਦੇ ਸਮੇਂ ਤੋਂ ਹੀ ਆਮ ਲੋਕਾਂ ਦੇ ਦੁੱਖ ਦਰਦ ਨੂੰ  ਨੂੰ ਦੂਰ ਕਰਨ ਲਈ ਜਤਨਸ਼ੀਲ ਹੈ। ਹੁਣ ਹਸਪਤਾਲ  ਦੀ ਮੈਨੇਜਮੈਂਟ ਨੇ ਇਸੇ  ਨੇਕ ਮਕਸਦ ਨੂੰ ਸਾਹਮਣੇ ਰੱਖ ਕੇ ਕੁਝ ਨਵੀਆਂ ਤਬਦੀਲੀਆਂ ਕੀਤੀਆਂ ਹਨ। 

ਮੈਨੇਜਮੈਂਟ ਵਿੱਚ ਬਦਲਾਅ ਹੋਣ ਤੋਂ ਬਾਦ ਪ੍ਰਬੰਧਕਾਂ ਨੇ ਸੀਨੀਅਰ ਕੈਂਸਰ ਸਰਜਨ ਡਾ. ਸਤੀਸ਼ ਜੈਨ ਨੂੰ ਲੁਧਿਆਣਾ ਮੈਡੀਵੇਜ ਹਸਪਤਾਲ ਦਾ ਮੈਡੀਕਲ ਡਾਇਰੈਕਟਰ ਨਿਯੁਕਤ ਕੀਤਾ ਹੈ। ਇਸਦੇ ਨਾਲ ਹੀ ਮਨਪ੍ਰੀਤ ਕੌਰ ਨੂੰ ਚੀਫ ਐਗਜ਼ੀਕਿਊਟਿਵ ਅਫਸਰ (ਸੀਈਓ) ਦੀ ਜ਼ਿੰਮੇਵਾਰੀ ਦਿੱਤੀ ਗਈ ਹੈ।

ਹਸਪਤਾਲ ਵੱਲੋਂ ਜਾਰੀ ਪਰੈਸ ਨੋਟ ਵਿੱਚ ਹਸਪਤਾਲ ਦੇ ਚੇਅਰਮੈਨ ਭਗਵਾਨ ਸਿੰਘ ਭਾਊ ਨੇ ਦੱਸਿਆ ਕਿ ਮੈਨੇਜਮੈਂਟ ਵਿੱਚ ਬਦਲਾਅ ਹੋਣ ਦੇ ਨਾਲ ਹੀ ਹਸਪਤਾਲ ਵਿੱਚ ਵੀ ਕਈ ਬਦਲਾਅ ਕੀਤੇ ਗਏ ਹਨ। ਮਰੀਜਾਂ ਨੂੰ ਨਵੀਆਂ ਸਹੂਲਤਾਂ ਸ਼ੁਰੂ ਕੀਤੀਆਂ ਗਈਆਂ ਹਨ। ਹਸਪਤਾਲ ਦੇ ਪ੍ਰਸ਼ਾਸਨਿਕ ਕੰਮ ਸਹੀ ਢੰਗ ਨਾਲ ਚਲਾਉਣ ਲਈ ਕੈਂਸਰ ਸਪੈਸ਼ਲਿਸਟ ਡਾ. ਸਤੀਸ਼ ਜੈਨ ਨੂੰ ਮੈਡੀਕਲ ਡਾਇਰੈਕਟਰ ਬਣਾਇਆ ਗਿਆ ਹੈ। ਇਸਦੇ ਨਾਲ ਹੀ ਮਨਪ੍ਰੀਤ ਕੌਰ ਨੂੰ ਸੀਈਓ ਦੀ ਜਿੰਮੇਵਾਰੀ ਸੌਂਪੀ ਗਈ ਹੈ ਤਾਂ ਜੋ ਉਹ ਮਰੀਜ਼ਾਂ ਦੀ ਜ਼ਰੂਰਤ ਦੇ ਮੁਤਾਬਿਕ ਹਸਪਤਾਲ ਵਿੱਚ ਜ਼ਰੂਰੀ ਪ੍ਰਬੰਧਾਂ ਦਾ ਇੰਤਜਾਮ ਕਰ ਸਕਣ। ਪੰਜਾਬ ਮੈਡੀਕਲ ਕੌਂਸਿਲ ਦੇ ਮੈਂਬਰ ਤੇ ਮੈਡੀਸਨ ਸਪੈਸ਼ਲਿਸਟ ਡਾ. ਕਰਮਵੀਰ ਗੋਇਲ, ਹਸਪਤਾਲ ਦੇ ਜਨਰਲ ਮੈਨੇਜਰ ਨਵੀਨ ਅਗਰਵਾਲ ਤੇ ਕਾਰਪੋਰੇਟ ਸੈਲ ਦੀ ਇੰਚਾਰਜ ਮੈਨੇਜਰ ਮੋਨਿਕਾ ਸੂਦ ਨੇ ਨਵੇਂ ਅਧਿਕਾਰੀਆਂ ਦਾ ਸਵਾਗਤ ਕੀਤਾ।

  

ਮੈਡੀਵੇਜ਼ ਵੱਲੋਂ ਗਰੀਬ ਅਤੇ ਮੱਧਵਰਗੀ ਲੋਕਾਂ ਲਈ ਇੱਕ ਵਾਰ ਫੇਰ ਵਿਸ਼ੇਸ਼ ਮੈਡੀਕਲ ਕੈਂਪ

ਬਰੇਨ ਕੋਆਇਲਿੰਗ ਅਤੇ ਐਂਜੀਉਗਰਾਫੀ ਦੀਆਂ ਸਹੂਲਤਾਂ ਵੀ ਮੁਫ਼ਤ ਦਿੱਤੀਆਂ  

ਲੁਧਿਆਣਾ: 4 ਦਸੰਬਰ 2018: (ਐਮ ਐਸ ਭਾਟੀਆ//ਪੰਜਾਬ ਸਕਰੀਨ)::

ਨੌਜਵਾਨ ਪੁੱਤਰ ਦਾ ਵਿਛੋੜਾ ਇੱਕ ਅਸਹਿ ਦਰਦ ਸੀ। ਜ਼ਿੰਦਗੀ ਦਾ ਇੱਕ ਇੱਕ ਪਲ ਭਾਰੂ ਹੋ ਗਿਆ ਸੀ। ਨਿਰਾਸ਼ਾ ਦਾ ਹਨੇਰਾ ਹਰ ਪਲ ਘਿਰਨ ਲੱਗ ਪਿਆ। ਉਹ ਸਮਾਂ ਸਚਮੁਚ ਹੀ ਬੜਾ ਮੁਸ਼ਕਿਲ ਸਮਾਂ ਸੀ। ਉਸ ਵੇਲੇ ਭਾਊ ਭਗਵਾਨ ਸਿੰਘ ਨੇ ਫੈਸਲਾ ਕੀਤਾ ਕਿ ਉਹ ਇਸ ਦਰਦ ਨੂੰ ਹੀ ਆਪਣੀ ਦਵਾ ਬਣਾਉਣਗੇ। ਉਹਨਾਂ ਪੂਰੇ ਸਮਾਜ ਲਈ ਬਹੁਤ ਸਾਰੇ ਅਜਿਹੇ ਕੰਮ ਅਰੰਭੇ ਜਿਹਨਾਂ ਨਾਲ ਆਮ ਗਰੀਬ ਲੋਕਾਂ ਨੂੰ ਰਾਹਤ ਮਿਲਦੀ ਸੀ। ਕਿਤੇ ਮੈਡੀਕਲ ਕੈਂਪ ਲਗਵਾਏ, ਕਿਤੇ ਹਸਪਤਾਲ ਖੋਹਲੇ ਅਤੇ ਕਿਤੇ ਡਿਸਪੈਂਸਰੀਆਂ ਖੋਹਲੀਆਂ। ਗੁਰਮੇਲ ਮੈਡੀਕਲ ਹਾਲ ਵਾਲੇ ਪਰਿਵਾਰ ਵੱਜੋਂ ਜਾਣੇ ਜਾਂਦੇ ਇਸ ਪਰਿਵਾਰ ਨੇ ਲੁਧਿਆਣਾ ਦੀ ਹਰ ਨੁੱਕਰ ਵਿੱਚ ਰਾਹਤ ਦੇ ਇਸ ਮਿਸ਼ਨ ਨੂੰ ਲਿਜਾਣ ਦਾ ਇਹ ਬੇਹੱਦ ਔਖਾ ਕੰਮ ਅਰੰਭਿਆ। ਅੱਜ ਲੁਧਿਆਣਾ ਦੀ ਫਿਰੋਜ਼ਪੁਰ ਰੋਡ 'ਤੇ ਸਥਿਤ ਮੈਡੀਵੇਜ਼ ਹਸਪਤਾਲ ਵਿੱਚ ਵੀ ਇੱਕ ਵਿਸ਼ੇਸ਼ ਮੈਡੀਕਲ ਕੈਂਪ ਸੀ। 

ਵਿਸ਼ੇਸ਼ ਇਸ ਲਈ ਕਿ ਇਸ ਵਿੱਚ ਬਰੇਨ ਕੋਆਇਲਿੰਗ ਅਤੇ ਐਂਜੀਉਗਰਾਫੀ ਵਰਗੇ ਮਹਿੰਗੇ ਟੈਸਟਾਂ ਦੀਆਂ ਸਹੂਲਤਾਂ ਵੀ ਬਿਲਕੁਲ ਮੁਫ਼ਤ ਦਿੱਤੀਆਂ ਗਈਆਂ ਸਨ। ਇਕੱਲੇ ਐਂਜੀਉਗਰਾਫੀ ਟੈਸਟ ਦੀ ਕੀਮਤ ਹੀ ਬਾਜ਼ਾਰ ਵਿੱਚ ਘਟੋਘੱਟ ਦਸ ਹਜ਼ਾਰ ਰੁਪਏ ਹੈ। ਇਸ ਤਰਾਂ ਬਰੇਨ ਕੋਇਲਿੰਗ ਦੇ ਸਬੰਧ ਵਿੱਚ ਦਾਅਵਾ ਕੀਤਾ ਗਿਆ ਕਿ ਇਹ ਸਹੂਲਤ ਲੁਧਿਆਣਾ ਵਿੱਚ ਕਿਸੇ ਵੀ ਹਸਪਤਾਲ ਕੋਲ ਨਹੀਂ। ਇਸ ਬਾਰੇ ਗੱਲਬਾਤ ਕਰਦਿਆਂ ਡਾਕਟਰ ਸੰਜੀਵ ਰਾਜਪੂਤ ਨੇ ਦੱਸਿਆ ਕਿ ਜੇ ਸਮੇਂ ਸਿਰ ਇਲਾਜ ਹੋ ਜਾਵੇ ਤਾਂ ਮਰੀਜ਼ ਬੜੀ ਜਲਦੀ ਸਿਹਤਮੰਦ ਹੋ ਕੇ ਘਰ ਚਲਾ ਜਾਂਦਾ ਹੈ। ਇਸੇ ਤਰਾਂ ਡਾਕਟਰ ਵੀਨਾ ਜੈਨ ਨੇ ਬਰੈਸਟ ਕੈਂਸਰ ਬਾਰੇ ਦੱਸਿਆ ਕਿ ਲਾਈਫ ਸਟਾਈਲ ਸੁਧਾਰ ਕੇ ਇਸ ਬਿਮਾਰੀ ਤੋਂ ਬਚਿਆ ਜਾ ਸਕਦਾ ਹੈ ਪਰ  ਜੇ ਇਹ ਬਿਮਾਰੀ ਹੋ ਹੀ ਜਾਵੇ ਤਾਂ ਫਿਰ ਸਮੇਂ ਸਿਰ ਇਲਾਜ ਕਰਾਉਣਾ ਬਹੁਤ ਜ਼ਰੂਰੀ ਹੈ। ਇਸਦੇ ਲੱਛਣ ਦਿਖਾਈ ਦੇਂਦਿਆਂ ਹੀ ਤੁਰੰਤ ਡਾਕਟਰ ਨਾਲ ਸੰਪਰਕ ਕਰਨਾ ਚਾਹੀਦਾ ਹੈ। 

ਇਸ ਮੈਡੀਕਲ ਕੈਂਪ ਬਾਰੇ ਜਾਣਕਾਰੀ ਦੇਂਦਿਆਂ ਡਾਕਟਰ ਕਰਮਵੀਰ ਗੋਇਲ ਨੇ ਦੱਸਿਆ ਕਿ ਅੱਜਕਲ ਸਾਵਧਾਨੀ ਵਾਲਾ ਮੌਸਮ ਹੈ ਇਸ ਲਈ ਕਿਸੇ ਵੀ ਬਿਮਾਰੀ ਦਾ ਕੋਈ ਸੰਕੇਤ ਦਿਖਾਈ ਦੇਵੇ ਤਾਂ ਤੁਰੰਤ ਡਾਕਟਰ ਦੀ ਸਲਾਹ ਲੈਣੀ ਚਾਹੀਦੀ ਹੈ। 

ਡਾਕਟਰ ਸਤੀਸ਼ ਜੈਨ ਹੁਰਾਂ ਨੇ ਵੀ ਕੈਂਸਰ ਦੀ ਭਿਆਨਕਤਾ ਅਤੇ ਇਸਦੇ ਖਤਰਿਆਂ ਬਾਰੇ ਅਗਾਹ ਕਰਦਿਆਂ ਕਿਹਾ ਕਿ ਸਮੇਂ ਸਿਰ ਡਾਕਟਰ ਦੀ ਸਲਾਹ ਲੈਣੀ ਬਹੁਤ ਜ਼ਰੂਰੀ ਹੈ। 

ਜ਼ਿੰਦਗੀ ਵਿੱਚ ਬਹੁਤੀਆਂ ਬਿਮਾਰੀਆਂ ਕਿਸੇ ਕੁਦਰਤੀ ਕਰੋਪੀ ਕਰਕੇ ਨਹੀਂ ਬਲਕਿ ਗਲਤ ਲਾਈਫ ਸਟਾਈਲ ਜਾਂ ਗਲਤ ਖਾਣਪਾਣ ਨਾਲ ਹੁੰਦੀਆਂ ਹਨ। ਡਾਈਟੀਸ਼ੀਅਨ ਅਮਨਦੀਪ ਕੌਰ ਨੇ ਦੱਸਿਆ ਕਿ ਜੇ ਲਾਈਫ ਸਟਾਈਲ ਠੀਕ ਹੋਵੇ, ਖਾਣਪੀਣ ਅਤੇ ਪਹਿਰਾਵੇ ਦੇ ਮਾਮਲੇ ਵਿੱਚ ਸੁਚੇਤ ਰਿਹਾ ਜਾਵੇ ਤਾਂ ਬਹੁਤ ਸਾਰੀਆਂ ਬਿਮਾਰੀਆਂ ਤੋਂ ਬਚਿਆ ਜਾ ਸਕਦਾ ਹੈ। 

ਜ਼ਿਕਰਯੋਗ ਹੈ ਕਿ ਇਹ ਹਸਪਤਾਲ ਵੀ ਰਵਿੰਦਰਪਾਲ ਸਿੰਘ ਮਿੰਕੂ ਦੀ ਯਾਦ ਵਿੱਚ ਹੀ ਬਣਾਇਆ ਗਿਆ ਹੈ। ਇਸ ਹਸਪਤਾਲ ਵਿੱਚ ਹਰ ਮੰਗਲਵਾਰ ਮੁਫ਼ਤ ਮੈਡੀਕਲ ਕੈਂਪ ਲੱਗਦਾ ਹੈ।