ਰੋਟਾ ਵਾਇਰਸ ਵੈਕਸੀਨ ਦੀ ਸ਼ੁਰੂਆਤ ਕਰਨ ਸਬੰਧੀ ਟ੍ਰੇਨਿੰਗ ਦਾ ਆਯੋਜਨ

Jul 9, 2019, 6:22 PM

ਸਿਵਲ ਹਸਪਤਾਲ ਲੁਧਿਆਣਾ ਵਿਖੇ ਹੋਇਆ ਵਿਸ਼ੇਸ਼ ਪ੍ਰੋਗਰਾਮ 

ਲੁਧਿਆਣਾ: 09 ਜੁਲਾਈ 2019: (ਪੰਜਾਬ ਸਕਰੀਨ ਬਿਊਰੋ)::

ਸਿਵਲ ਹਸਪਤਾਲ ਲੁਧਿਆਣਾ ਵਿਖੇ ਰੋਟਾ ਵਾਇਰਸ ਵੈਕਸੀਨ ਦੀ ਸ਼ੁਰੂਆਤ ਕਰਨ ਸਬੰਧੀ ਟ੍ਰੇਨਿੰਗ ਦਾ ਆਯੋਜਨ ਕੀਤਾ ਗਿਆ। ਟ੍ਰੇਨਿੰਗ ਸਮੇਂ ਡਾ.ਰਜਿੰਦਰ ਗੁਲਾਟੀ, ਡਾ.ਪੁਨੀਤ ਜੁਨੇਜਾ ਅਤੇ WHO ਦੇ ਡਾ. ਗਗਨ ਸ਼ਰਮਾ ਵੱਲੋਂ ਜਾਣਕਾਰੀ ਸਾਂਝੀ ਕੀਤੀ ਗਈ। ਇਹ ਟ੍ਰੇਨਿੰਗ ਸਿਵਲ ਸਰਜਨ ਲੁਧਿਆਣਾ ਡਾ.ਰਾਜੇਸ਼ ਕੁਮਾਰ ਬੱਗਾ ਦੇ ਦਿਸ਼ਾ ਨਿਰਦੇਸ਼ਾਂ 'ਤੇ ਡਾ.ਕਿਰਨ ਆਹਲੂਵਾਲੀਆ ਡੀ.ਆਈ.ਓ. ਦੀ ਦੇਖ ਰੇਖ ਅਧੀਨ ਕੀਤੀ ਗਈ। ਸਿਵਲ ਹਸਪਤਾਲ ਲੁਧਿਆਣਾ ਦੇ ਐਸ.ਐਮ.ਓ. ਡਾ.ਅਵਿਨਾ਼ਸ ਜਿੰਦਲ ਵੀ ਵਿਸ਼ੇੇਸ਼ ਤੌਰ 'ਤੇ ਹਾਜਰ ਸਨ। ਆਪਣੇ ਸੰਬੋਧਨ ਵਿੱਚ ਡਾ.ਰਾਜੇਸ਼ ਕੁਮਾਰ ਬੱਗਾ ਸਿਵਲ ਸਰਜਨ ਲੁਧਿਆਣਾ ਨੇ ਕਿਹਾ ਕਿ ਟੀਕਾਕਰਣ ਹਰ ਲਾਭਪਾਤਰੀ ਲਈ ਅਤੀ ਜ਼ਰੂਰੀ ਹੈ। ਜਿਸ ਨਾਲ ਬੱਚਿਆਂ ਅਤੇ ਗਰਭਵਤੀ ਮਾਵਾਂ ਦੀ ਸਿਹਤ ਸੁਰੱਖਿਅਤ ਰਹਿੰਦੀ ਹੈ ਅਤੇ ਸਾਨੂੰ ਸਾਰਿਆਂ ਨੂੰ ਸਮੇਂ-ਸਮੇਂ ਇਹ ਟੀਕਾਕਰਣ ਕਰਾਉਣਾ ਅਤਿ ਜ਼ਰੂਰੀ ਹੈ। ਡੀ.ਆਈ.ਓ. ਡਾ.ਕਿਰਨ ਆਹਲੂਵਾਲੀਆ ਨੇ ਦੱਸਿਆ ਕਿ ਰੋਟਾ ਵਾਈਰਸ ਵੈਕਸੀਨ ਜਲਦ ਹੀ ਰੂਟੀਨ ਟੀਕਾਕਰਣ ਦਾ ਹਿੱਸਾ ਬਨਣ ਜਾ ਰਹੀ ਹੈ। ਜਿਸ ਨਾਲ ਬੱਚਿਆਂ ਵਿੱਚ ਇਸ ਵਾਈਰਸ ਕਾਰਨ ਹੋਣ ਵਾਲੇ ਡਾਇਰੀਆ (ਟੱਟੀਆਂ) ਨੂੰ ਰੋਕਿਆ ਜਾ ਸਕੇਗਾ। ਡਾ.ਗੁਲਾਟੀ, ਡਾ.ਜੁਨੇਜਾ ਅਤੇ ਡਾ.ਗਗਨ ਨੇ ਦੱਸਿਆ ਕਿ ਰੂਟੀਨ ਟੀਕਾਕਰਨ ਨਾਲ 6, 10, 14 ਹਫ਼ਤੇ ਦੇ ਹਰ ਬੱਚੇ ਨੂੰ ਇਸ ਵੈਕਸੀਨ ਦੀਆਂ 5 ਬੂੰਦਾਂ ਦਿੱਤੀਆ ਜਾਣੀਆਂ ਹਨ। ਜਿਸ ਨਾਲ ਬੱਚਿਆਂ ਨੂੰ ਪੇਚਸ ਤੋਂ ਸੁਰੱਖਿਅਤ ਰੱਖਿਆ ਜਾ ਸਕੇਗਾ। ਉਨ੍ਹਾਂ ਕਿਹਾ ਕਿ ਇਹ ਵੈਕਸੀਨ ਬਿਲਕੁੱਲ ਸੁਰੱਖਿਅਤ ਹੈ ਅਤੇ ਜਦੋਂ ਵੀ ਇਹ ਵੈਕਸੀਨ ਸੁਰੂ ਹੁੰਦੀ ਹੈ ਤਾਂ ਸਾਨੂੰ ਹਰ ਮਾਪੇ ਨੂੰ ਇਸ ਬਾਰੇ ਜਾਣਕਾਰੀ ਦੇਣੀ ਬਣਦੀ ਹੈ ਤੇ ਉਨ੍ਹਾਂ ਨੂੰ ਪ੍ਰੇਰਿਤ ਕਰਨਾ ਚਾਹੀਦਾ ਹੈ ਕਿ ਹਰ ਨਵੇਂ ਬੱਚੇ ਦੇ ਜਦੋਂ ਵੀ ਰੂਟੀਨ ਵੈਕਸੀਨ ਲੱਗਣੀ ਹੈ ਉਦੋਂ ਹੀ ਇਹ ਵੈਕਸੀਨ ਜ਼ਰੂਰ ਦਿੱਤੀ ਜਾਵੇ ਤਾਂ ਕਿ ਬੱਚਿਆਂ ਵਿੱਚ ਵਾਈਰਸ ਤੋਂ ਹੋਣ ਵਾਲੀ ਬਿਮਾਰੀ ਨੂੰ ਰੋਕਿਆ ਜਾ ਸਕੇ।

ਇਸ ਟ੍ਰੇਨਿੰਗ ਵਿੱਚ ਸਮੂਹ ਐਸ.ਐਮ.ਓ., ਨੋਡਲ ਅਫਸਰ, ਏ.ਐਨ.ਐਮ, ਐਲ.ਐਚ.ਵੀ. ਤੋ਼ ਇਲਾਵਾ  ਆਂਗਨਵਾੜੀ ਸਬੰਧਤ ਸੀਨੀਅਰ ਮੈਡੀਕਲ ਸਟਾਫ ਅਤੇ ਵਰਕਰ ਵੀ ਹਾਜ਼ਰ ਸਨ।