Attack on Janchetna: ਜਮਹੂਰੀ ਅਧਿਕਾਰ ਸਭਾ ਪੰਜਾਬ ਵੱਲੋਂ ਜਾਂਚ ਰਿਪੋਰਟ ਜਾਰੀ

ਆਓ ਸਫ਼ਦਰ ਨੂੰ ਚੇਤੇ ਕਰਦਿਆਂ ਜਨਚੇਤਨਾ ਉੱਤੇ ਹਮਲੇ ਦੇ ਅਰਥ ਸਮਝੀਏ 

ਲੁਧਿਆਣਾ: 7  ਜਨਵਰੀ 2017: (ਪੰਜਾਬ ਸਕਰੀਨ ਬਿਊਰੋ); 

ਜਿਸ ਦਿਨ ਪੰਜਾਬੀ ਭਵਨ ਵਿੱਚ ਜਨਚੇਤਨਾ ਦੀ ਦੁਕਾਨ ਉੱਤੇ ਹਮਲਾ ਹੁੰਦਾ ਹੈ ਉਹ ਇੱਕ ਇਤਿਹਾਸਿਕ ਦਿਨ ਵੀ ਹੈ। ਦੋ ਜਨਵਰੀ ਵਾਲੇ ਦਿਨ ਹੀ ਸਫ਼ਦਰ ਹਾਸ਼ਮੀ ਨੇ ਇਸ ਦੁਨੀਆ ਨੂੰ ਅਲਵਿਦਾ ਆਖਦਿਆਂ ਆਖ਼ਿਰੀ ਸਾਹ ਲਿਆ ਸੀ। ਉਸ ਉੱਤੇ ਵੀ ਪਹਿਲੀ ਜਨਵਰੀ ਵਾਲੇ ਦਿਨ ਹੀ ਫਿਰਕੂ ਜਨੂੰਨੀਆਂ ਨੇ ਕਾਤਲਾਨਾ ਹਮਲਾ ਕੀਤਾ ਸੀ।
For More Pics Click Here Please

ਸਟੇਜ ਦੀ ਦੁਨੀਆ ਵਿੱਚ ਨੁੱਕੜ ਨਾਟਕਾਂ ਨੂੰ ਦੇਸ਼ ਦੇ ਕੋਨੇ ਕੋਨੇ ਵਿੱਚ  ਲੋਕ ਦੁਸ਼ਮਣਾਂ ਨੂੰ ਬੇਨਕਾਬ ਕਰਨ ਵਾਲੇ ਖੱਬੇਪੱਖੀ ਰੰਗਕਰਮੀ ਸਫ਼ਦਰ ਹਾਸ਼ਮੀ ਦਾ ਸ਼ਹੀਦੀ ਦਿਨ ਵੀ ਹੈ। ਖੱਬੇ ਪੱਖੀ ਵਿਚਾਰਾਂ ਨੂੰ ਪ੍ਰਣਾਏ ਹੋਏ ਕਲਾਕਾਰ ਆਪੋ ਆਪਣੇ ਅੰਦਾਜ਼ ਵਿੱਚ ਸਫ਼ਦਰ ਹਾਸ਼ਮੀ ਨੂੰ ਯਾਦ ਕਰਦੇ ਹਨ।  ਪਰ ਸਫ਼ਦਰ ਦੇ ਦੁਸ਼ਮਣ ਕੈਂਪ ਨਾਲ ਜੁੜੇ ਕਿਸੇ ਨ ਕਿਸੇ ਸਫ਼ਦਰ ਹਾਸ਼ਮੀ ਨੂੰ ਆਪਣੀ ਹਿੰਸਾ ਦਾ ਸ਼ਿਕਾਰ ਬਣਾਉਣ ਦੀਆਂ ਸਾਜ਼ਿਸ਼ਾਂ ਰਚਦੇ ਹਨ।  ਚੇਤੇ ਰਹੇ ਕਿ ਕੁਝ ਫਿਰਕਾਪ੍ਰਸਤ ਜਨੂੰਨੀ ਲੋਕਾਂ ਨੇ 1 ਜਨਵਰੀ 1989 ਨੂੰ ਨਾਟਕ ‘ਹੱਲਾਬੋਲ’ ਕਰਦਿਆਂ ਸਫ਼ਦਰ ਹਾਸ਼ਮੀ ’ਤੇ ਕਾਤਲਾਨਾ ਹਮਲਾ ਕੀਤਾ ਸੀ। ਸਫ਼ਦਰ ਨੇ ਆਪਣੇ ਸਾਥੀਆਂ ਨੂੰ ਬਚਾਉਣ ਲਈ ਆਪਣੀ ਜਾਨ ਖਤਰੇ ਵਿੱਚ ਪਾਈ ਪਰ ਖੁਦ ਉਹ ਇਸ ਵਹਿਸ਼ੀਆਨਾ ਕੁੱਟਮਾਰ ਦਾ ਸ਼ਿਕਾਰ ਹੋ ਕੇ 2 ਜਨਵਰੀ ਵਾਲੇ ਦਿਨ ਇਸ ਸੰਸਾਰ ਨੂੰ ਅਲਵਿਦਾ ਕਹਿ ਗਿਆ। ਉਸਦਾ ਸ਼ਹੀਦੀ ਦਿਨ ਉਸਦੇ ਸਮਰਥਕਾਂ ਨੂੰ ਤਾਂ ਯਾਦ ਹੈ ਪਰ ਸ਼ਾਇਦ ਉਸਦੇ ਵਿਰੋਧੀ ਵੀ ਇਸ ਦਿਨ ਨੂੰ ਨਹੀਂ ਭੁੱਲੇ। ਜਨਚੇਤਨਾ ਵਾਲੇ ਸਟਾਲ ਉੱਤੇ ਹਮਲਾ ਕੁਝ ਅਜਿਹਾ ਹੀ ਸੰਕੇਤ ਦੇਂਦਾ ਹੈ। ਸ਼ਾਇਦ ਪੰਜਾਬੀ ਭਵਨ ਵਿੱਚ ਵੀ ਕੁਝ ਅਜਿਹਾ ਹੀ ਹੋਣਾ ਸੀ। ਇਸ ਵਾਰ ਫਿਰਕਾਪ੍ਰਸਤਾਂ ਦਾ ਵਿਸ਼ੇਸ਼ ਨਿਸ਼ਾਨਾ ਕੌਣ ਸੀ ਇਸ ਬਾਰੇ ਭਾਵੇਂ ਸਪਸ਼ਟ ਨਹੀਂ ਹੋ ਸਕਿਆ ਪਰ ਇੱਕ ਗੱਲ ਪੱਕੀ ਹੈ ਕਿ ਉਹ ਸਫ਼ਦਰ ਵਰਗੇ ਲੋਕ ਪੱਖੀ ਕਲਾਕਾਰਾਂ ਦੇ ਮਨਾਂ ਵਿੱਚ ਦਹਿਲ ਜ਼ਰੂਰ ਪਾਉਣਾ  ਚਾਹੁੰਦੇ ਸਨ।   ਇਹ ਹਮਲਾ ਹੱਲਾ ਬੋਲ ਵਰਗੇ ਅੰਦਾਜ਼ ਵਾਲਾ ਹੀ ਸੀ। 

ਹਿੰਦੂ ਕੱਟੜਪੰਥੀਆਂ ਵੱਲੋਂ ਪੰਜਾਬੀ ਭਵਨ ਵਿੱਚ ਸਥਿਤ ਜਨ ਚੇਤਨਾ ਅਦਾਰੇ ਦੀ ਦੁਕਾਨ ਤੇ ਕੀਤੇ ਹੱਲੇ-ਗੁੱਲੇ ਸਬੰਧੀ ਵੱਕਾਰੀ ਸੰਸਥਾ ਜਮਹੂਰੀ ਅਧਿਕਾਰ ਸਭਾ ਨੇ   ਅੱਜ ਸ਼ਨੀਵਾਰ 7 ਜਨਵਰੀ ਨੂੰ ਬਾਕਾਇਦਾ ਮੀਡੀਆ ਸਾਹਮਣੇ ਇਸ ਘਟਨਾ ਸੰਬੰਧੀ ਆਪਣੀ ਜਾਂਚ ਰਿਪੋਰਟ ਜਾਰੀ ਕਰ ਦਿੱਤੀ। ਇਸ ਨਾਜ਼ੁਕ ਮਸਲੇ ਨਾਲ ਸਬੰਧਿਤ ਜਾਂਚ ਦਾ ਕੰਮ ਬਾਕਾਇਦਾ ਇੱਕ ਕਮੇਟੀ ਨੂੰ ਸੌਂਪਿਆ ਗਿਆ ਸੀ ਜਿਸ ਵਿੱਚ  ਉੱਘੇ ਚਿੰਤਕ ਪ੍ਰੋ. ਏ.ਕੇ. ਮਲੇਰੀ, ਸ਼ਹੀਦ ਭਗਤ ਸਿੰਘ ਦੇ ਭਾਣਜੇ ਪ੍ਰੋ. ਜਗਮੋਹਣ ਸਿੰਘ, ਖੱਬੇਪੱਖੀ ਵਿਚਾਰਕ ਡਾ. ਹਰਬੰਸ ਗਰੇਵਾਲ,  ਲੋਕ ਸੰਘਰਸ਼ਾਂ ਨਾਲ ਜੁੜੇ ਹੋਏ ਜਸਵੰਤ ਜੀਰਖ, ਮੀਡੀਆ ਤੋਂ ਸਤੀਸ਼ ਸੱਚਦੇਵਾ ਅਤੇ ਐਡਵੋਕੇਟ ਸ਼ਾਮਲ ਹਨ।          For More Pics Click Here Please

ਜਾਂਚ ਰਿਪੋਰਟ ਮੁਤਾਬਿਕ ਪੰਜਾਬੀ ਭਵਨ ਲੁਧਿਆਣਾ ਵਿਖੇ ਜਨ ਚੇਤਨਾ ਪਬਲੀਕੇਸ਼ਨ ਕੇਂਦਰ `ਚ ਹੋਈ ਘਟਨਾ ਬਾਰੇ ਮੌਕੇ ਤੇ ਹਾਜ਼ਰ ਲੜਕੀ ਬਿੰਨੀ ਜੋ ਇਸ ਕੇਂਦਰ ਦੀ ਮੈਨੇਜਰ ਹੈ ਨੇ ਦੱਸਿਆ ਕਿ ਮਿਤੀ 02.01.2017 ਨੂੰ ਸਵੇਰੇ 11:30 ਵਜੇ ਦੇ ਕਰੀਬ ਇੱਕ ਬੀ ਐਸ ਸੀ ਕਰ ਰਹੀ 21 ਸਾਲਾ ਵਿਦਿਆਰਣ ਸ਼ਿਵਾਨੀ ਦੇ ਪਿਤਾ ਨਾਲ ਕਈ ਹੋਰ ਬੰਦੇ ਦੁਕਾਨ ਤੇ ਆਏ। ਇਹਨਾਂ ਦੀ ਅਗਵਾਈ ਰੋਹਿਤ ਸਾਹਨੀ ਨਾਮ ਦਾ ਵਿਅਕਤੀ ਕਰ ਰਿਹਾ ਸੀ ਜੋ ਆਪਣੇ ਨੂੰ ਹਿੰਦੂ ਤਖਤ ਦਾ ਆਗੂ ਦੱਸ ਰਿਹਾ ਸੀ । ਉਹਨਾਂ ਆ ਕੇ ਦੁਕਾਨ ਵਿੱਚ ਪਈਆਂ ਕਿਤਾਬਾਂ ਦੀ ਫੋਲਾ-ਫਰਾਲ਼ੀ ਕਰਦਿਆਂ ਕਿਹਾ ਕਿ ਤੁਹਾਡੀਆਂ ਕਿਤਾਬਾਂ ਸਾਨੂੰ ਪਸੰਦ ਨਹੀਂ ਜੋ ਅਸੀਂ ਲੋਕਾਂ ਨੂੰ ਪੜ੍ਹਨ ਨਹੀਂ ਦੇਣੀਆਂ । ਇਸ ਸਮੇਂ ਉਹਨਾਂ ਬਿੰਨੀ ਦੀ ਬੇਇਜਤੀ ਵੀ ਕੀਤੀ ਤੇ ਲਲਕਾਰੇ ਮਾਰਦੇ ਹੋਏ ਅਸ਼ਲੀਲ ਗਾਲ੍ਹਾ ਕੱਢੀਆਂ ਤੇ ਦੁਕਾਨ ਅੰਦਰ ਜਬਰੀ ਦਾਖਲ ਹੋਕੇ ਅਤੇ ਕਿਤਾਬਾਂ ਨੂੰ ਅੱਗ ਲਾਉਣ ਦੀ ਧਮਕੀ ਦਿੱਤੀ। ਧਮਕੀਆਂ ਦੇ ਲਹਿਜੇ ਵਿੱਚ ਬੋਲਣ ਲੱਗੇ ਕਿ ਤੁਸੀਂ ਹਿੰਦੂਆਂ ਦੀਆਂ ਭਾਵਨਾਵਾਂ ਨੂੰ ਠੇਸ ਪਹੁੰਚਾ ਕੇ ਨੌਜਵਾਨਾਂ ਨੂੰ ਵਿਗਾੜ ਰਹੇ ਹੋ। ਮੈਨੇਜਰ ਲੜਕੀ ਬਿੰਨੀ ਨੇ ਉਹਨਾਂ ਨੂੰ ਕਿਹਾ ਕਿ ਤੁਸੀਂ ਹੰਗਾਮਾ ਨਾ ਕਰੋ ਜੋ ਗੱਲ ਹੈ ਬੈਠਕੇ ਕਰੋ। ਪਰ ਜਦੋਂ ਉਹ ਹੱਲਾ ਗੁੱਲਾ ਕਰਨੋ ਨਾ ਹਟੇ ਤਾਂ ਬਿੰਨੀ ਨੇ 100 ਨੰਬਰ ਤੇ ਫੋਨ ਕੀਤਾ ਜੋ ਕਿਸੇ ਨੇ ਨਹੀਂ ਚੁੱਕਿਆ, ਇਸੇ ਸਮੇਂ ਉਸ ਨੇ ਲਖਵਿੰਦਰ, ਸਮਰ ਤੇ ਸਤਬੀਰ ਨੂੰ ਵੀ ਫੋਨ ਕੀਤਾ ਜੋ ਕੁੱਝ ਸਮੇਂ ਬਾਅਦ ਉੱਥੇ ਆ ਗਏ। ਸ਼ਿਵਾਨੀ ਦੇ ਪਾਪਾ ਹੋਰਾਂ ਚੋਂ ਵੀ ਕਿਸੇ ਨੇ ਪੁਲੀਸ ਨੂੰ ਫੋਨ ਕੀਤਾ ਜਿਸ ਤੇ ਪੁਲੀਸ ਕੁਲਵੰਤ ਚੰਦ ਏ.ਐੱਸ.ਆਈ. ਦੀ ਅਗਵਾਈ `ਚ ਮੌਕੇ ਤੇ ਆ ਗਈ ਜਿਸ ਵਿੱਚ ਦੋ ਲੇਡੀ ਸਿਪਾਹੀ ਵੀ ਸਨ। ਪੁਲੀਸ ਦੀ ਹਾਜ਼ਰੀ ਵਿੱਚ ਵੀ ਉਹ ਗਾਲੀ ਗਲੋਚ ਕਰਦੇ ਰਹੇ ਅਤੇ ਲੇਡੀ ਪੁਲੀਸ ਨੇ ਵੀ ਬਿੰਨੀ ਨਾਲ ਹੱਥੋ ਪਾਈ ਕੀਤੀ। ਪੁਲੀਸ ਨੇ ਵੀ ਬਿੰਨੀ ਦੀ ਗੱਲ ਸੁਣਨ ਦੀ ਬਜਾਏ ਹੱਲਾ ਗੁੱਲਾ ਕਰਨ ਵਾਲਿਆਂ ਦਾ ਹੀ ਸਾਥ ਦਿੱਤਾ । ਮੌਕੇ ਦੇ ਹੋਰ ਚਸਮਦੀਦ ਵਿਆਕਤੀਆਂ ਨੇ ਵੀ ਇਸ ਗੱਲ ਦੀ ਪੁਸ਼ਟੀ ਕੀਤੀ। ਜਦੋਂ ਬਿੰਨੀ ਨੇ ਪੁਲੀਸ ਨੂੰ ਕਿਹਾ ਕਿ ਤੁਸੀਂ ਦੁਕਾਨ ਤੇ ਆਕੇ ਹੁਲੜਬਾਜੀ ਕਰਨ ਵਾਲਿਆਂ ਖਿਲਾਫ ਮੇਰੀ ਸ਼ਕਾਇਤ ਤੇ ਕਾਰਵਾਈ ਕਰੋ, ਤਾਂ ਪੁਲੀਸ ਨੇ ਕਿਹਾ ਕਿ ਤੇਰੀ ਸ਼ਕਾਇਤ ਤੇ ਕਾਰਵਾਈ ਕਿਉਂ ਕਰੀਏ ? For More Pics Click Here Please

ਜਿਸ ਸ਼ਿਵਾਨੀ ਨਾਂ ਦੀ ਲੜਕੀ ਦਾ ਇਸ ਘਟਨਾ ਵਿੱਚ ਹਵਾਲਾ ਆਇਆ ਹੈ ਉਸ ਬਾਰੇ ਪਤਾ ਲੱਗਾ ਕਿ ਉਹ ਬੀ ਐਸ ਸੀ ਦੀ ਵਿਦਿਆਰਥਣ ਹੈ ਅਤੇ ਇਸ ਦੁਕਾਨ ਤੇ ਆਕੇ ਕਿਤਾਬਾਂ ਪੜ੍ਹਦੀ ਹੈ। ਦੇਸ਼ ਪ੍ਰਤੀ ਕੁਰਬਾਨੀਆਂ ਦੇਣ ਵਾਲੇ ਲੋਕਾਂ ਦੀਆਂ ਜੀਵਨੀਆਂ ਪੜ੍ਹਕੇ ਉਹ ਚਾਹੁੰਦੀ ਹੈ ਕਿ ਮੈਂ ਵੀ ਸਮਾਜ ਬਾਰੇ ਗਿਆਨ ਹਾਸਲ ਕਰਕੇ ਗਰੀਬ ਬੱਚਿਆਂ ਨੂੰ ਪੜ੍ਹਾਵਾਂ। ਪਰ ਉਸਦੇ ਮਾਂ ਬਾਪ ਉਸ ਨੂੰ ਅਜਿਹਾ ਨਹੀਂ ਕਰਨ ਦੇਣਾ ਚਾਹੁੰਦੇ। ਦੁਕਾਨ ਤੇ ਇਹ ਹੰਗਾਮਾ 3-4 ਘੰਟੇ ਚੱਲਦਾ ਰਿਹਾ ਪਰ ਪੁਲੀਸ ਨੇ ਉਹਨਾਂ ਨੂੰ ਨਹੀਂ ਰੋਕਿਆ ਸਗੋਂ ਬਿੰਨੀ, ਲਖਵਿੰਦਰ, ਸਮਰ ਤੇ ਸਤਬੀਰ ਨੂੰ ਸ਼ਾਮ 3 ਵਜੇ ਦੇ ਕਰੀਬ ਚੁਕਕੇ ਥਾਣਾ ਨੰਬਰ 5 ਵਿੱਚ ਲੈ ਗਏ । ਹੁਲੜਬਾਜ ਕਈ ਕਿਤਾਬਾਂ ਵੀ ਚੁੱਕਕੇ ਲੈ ਗਏ, ਉਹਨਾਂ ਨੂੰ ਵੀ ਪੁਲੀਸ ਨੇ ਨਹੀਂ ਰੋਕਿਆ ਅਤੇ ਨਾ ਹੀ ਲੁੱਟੀਆਂ ਗਈਆਂ ਕਿਤਾਬਾਂ ਵਾਪਸ ਲਈਆਂ । ਪੁਲੀਸ ਜਬਰੀ ਦੁਕਾਨ ਬੰਦ ਕਰਕੇ ਚਾਬੀਆਂ ਵੀ ਆਪਣੇ ਨਾਲ ਲੈ ਗਈ। ਜਦੋਂ ਸ਼ਾਮ ਤੱਕ ਇਸ ਘਟਨਾ ਦਾ ਸ਼ਹਿਰ ਦੀਆਂ ਹੋਰ ਇਨਕਲਾਬੀ, ਜਮਹੂਰੀ ਜੱਥੇਬੰਦੀਆਂ ਦੇ ਆਗੂਆਂ ਨੂੰ ਪਤਾ ਲੱਗਾ ਤਾਂ ਉਹ ਵੀ ਥਾਣੇ ਪਹੁੰਚ ਗਏ ਅਤੇ ਸਾਰੀ ਘਟਨਾ ਬਾਰੇ ਪੁਲੀਸ ਨਾਲ ਗੱਲਬਾਤ ਕੀਤੀ । ਸਿਵਾਨੀ ਵੀ ਇਸ ਸਮੇਂ ਤੱਕ ਆਪਣੇ ਆਪ ਹੀ ਥਾਣੇ ਪਹੁੰਚ ਗਈ ਸੀ । ਇਥੇ ਵੀ ਕਈ ਹਿੰਦੂ ਕੱਟੜਵਾਦੀ ਮੌਜੂਦ ਸਨ ਜੋ ਹੱਲਾ-ਗੁੱਲਾ ਕਰ ਰਹੇ ਸਨ ਪਰ ਪੁਲੀਸ ਉਹਨਾਂ ਨੂੰ ਨਹੀਂ ਰੋਕ ਰਹੀ ਸੀ । ਜਿਹੜੀਆਂ ਕਿਤਾਬਾਂ ਬਾਰੇ ਧਾਰਮਿਕ ਭਾਵਨਾਵਾਂ ਨੂੰ ਠੇਸ ਪਹੁੰਚਾਉਣ ਦੀ ਗੱਲ ਆਈ ਹੈ ਉਨ੍ਹਾਂ ਵਿੱਚ ਸ਼ਹੀਦ ਭਗਤ ਸਿੰਘ ਦੀ ਮੈਂ ਨਾਸਤਿਕ ਕਿਉਂ ਹਾਂ, ਰਾਧਾ ਮੋਹਨ ਗੋਕੁਲ ਦੀਆਂ ਈਸ਼ਵਰ ਦਾ ਵਹਿਸ਼ਕਾਰ, ਧਰਮ ਦਾ ਢਕੌਂਸਲਾ ਅਤੇ ਲੈਨਿਨ ਦੀਆਂ ਕੁੱਝ ਕਿਤਾਬਾਂ ਹਨ । 

ਇਸ ਸਮੇਂ ਪੁਲੀਸ ਨੇ ਜੱਥੇਬੰਦੀਆਂ ਦੇ ਆਗੂਆਂ ਨੂੰ ਕਿਹਾ ਕਿ ਇਤਰਾਜ ਯੋਗ ਕਿਤਾਬਾਂ ਚੁੱਕਣ ਅਤੇ ਦੁਕਾਨ ਬੰਦ ਕਰਵਾਉਣ ਲਈ ਕਾਰਵਾਈ ਕਰਨ ਲਈ ਦੁਕਾਨ ਦਾ ਜ਼ੁੰਮੇਵਾਰ ਇੱਕ ਬੰਦਾ ਪੁਲੀਸ ਨਾਲ ਭੇਜੋ। ਇਹ ਗੱਲ ਵਰਨਣਯੋਗ ਹੈ ਕਿ ਪੁਲੀਸ ਦੁਕਾਨ ਪਹਿਲਾਂ ਹੀ ਬੰਦ ਕਰਕੇ ਚਾਬੀਆਂ ਆਪਣੇ ਨਾਲ ਲੈ ਆਈ ਸੀ । ਉਸ ਸਮੇਂ ਪੁਲੀਸ ਨੇ ਪੰਜਾਬੀ ਭਵਨ ਆਕੇ ਦੁਕਾਨ ਚੋਂ ਸਬੰਧਤ ਕਿਤਾਬਾਂ ਚੁੱਕਕੇ ਦੁਕਾਨ ਨੂੰ ਜ਼ਿੰਦਰਾ ਮਾਰਕੇ ਚਾਬੀ ਫਿਰ ਥਾਣੇ ਲੈ ਆਈ । ਜੱਥੇਬੰਦੀਆਂ ਦੇ ਨੁਮਾਇੰਦਿਆਂ ਨਾਲ ਪੁਲੀਸ ਦੀ ਹੋਈ ਵਾਰਤਾ ਉਪਰੰਤ ਪੁਲੀਸ ਨੇ ਲਖਵਿੰਦਰ, ਸਮਰ, ਸਤਵੀਰ ਤੇ ਬਿੰਨੀ ਨੂੰ ਇਸ ਸ਼ਰਤ ਤੇ ਰਿਹਾ ਕਰ ਦਿੱਤਾ ਕਿ ਉਹ ਕੱਲ 12 ਵਜੇ ਪੁਲੀਸ ਸਟੇਸ਼ਨ ਆਉਣਗੇ ਅਤੇ ਲੜਕੀ ਸਿਵਾਨੀ ਦੇ ਮਾਂ-ਪਿਤਾ ਨੂੰ ਵੀ ਇਸ ਸਮੇਂ ਬੁਲਾਇਆ ਗਿਆ। ਸਿਵਾਨੀ ਨੂੰ ਉਸ ਦੀ ਵੱਡੀ ਭੈਣ ਨਾਲ ਇਸ ਸ਼ਰਤ ਤੇ ਭੇਜ ਦਿੱਤਾ ਗਿਆ ਕਿ ਉਹ ਵੀ ਕੱਲ ਸਿਵਾਨੀ ਨੂੰ ਨਾਲ ਲੈ ਕੇ 12 ਵਜੇ ਥਾਣੇ ਆਉਣਗੇ ।

ਦੂਜੇ ਦਿਨ ਪੁਲੀਸ ਵੱਲੋਂ ਦਿੱਤੇ ਸਮੇਂ ਅਨੁਸਾਰ 12 ਵਜੇ ਕਈ ਅਗਾਂਹਵਧੂ ਜੱਥੇਬੰਦੀਆਂ ਦੇ ਕਾਰਕੁਨਾਂ ਨੇ ਥਾਣੇ ਆਕੇ ਮੁਜਾਹਰਾ ਕੀਤਾ ਅਤੇ ਦੁਕਾਨ ਤੇ ਧਮਕੀਆਂ ਦੇਣ, ਅੱਗ ਲਗਾਉਣ ਤੇ ਭੰਨਤੋੜ ਕਰਨ ਦਾ ਇਰਾਦਾ ਰੱਖਣ ਵਾਲਿਆਂ ਖਿਲਾਫ਼ ਕਾਨੂੰਨੀ ਕਾਰਵਾਈ ਕਰਨ ਦੀ ਮੰਗ ਕੀਤੀ । ਅਗਾਂਹ ਵਧੂ ਸਾਹਿਤ ਛਾਪਣ, ਵੰਡਣ ਨੂੰ ਫਿਰਕੂ ਰੰਗਤ ਦੇਣ ਲਈ ਜ਼ੁੰਮੇਵਾਰਾਂ ਖਿਲਾਫ਼ ਕਾਨੂੰਨੀ ਕਾਰਵਾਈ ਕਰਨ ਦੀ ਵੀ ਮੰਗ ਕੀਤੀ।  For More Pics Click Here Please

ਪੁਲੀਸ ਨੇ ਇਸ ਵੇਲੇ ਵਾਅਦਾ ਕੀਤਾ ਕਿ ਉਹ 24 ਘੰਟੇ ਦੇ ਅੰਦਰ ਗਲਤ ਰੰਗਤ ਦੇਣ ਵਾਲਿਆਂ ਖਿਲਾਫ਼ ਕਾਰਵਾਈ ਕੀਤੀ ਜਾਵੇਗੀ । ਉਸੇ ਵੇਲੇ ਦੁਕਾਨ ਦੀਆਂ ਚਾਬੀਆਂ ਵੀ ਵਾਪਸ ਦੇ ਦਿੱਤੀਆਂ ਗਈਆਂ। For More Pics Click Here Please

ਸਭਾ ਦੀ ਸਮਝ 

ਸਭਾ ਸਮਝਦੀ ਹੈ ਕਿ ਕੋਈ ਵੀ ਸਮਾਜ ਜਜ਼ਬਾਤਾਂ ਨਾਲ ਨਹੀਂ ਚੱਲਦਾ ਸਗੋਂ ਸੂਝਬੂਝ ਨਾਲ ਚੱਲਦਾ ਹੈ ਜਿਸ ਬਾਰੇ ਸਵਿਧਾਨ ਵਿੱਚ ਹਰ ਬੰਦੇ ਨੂੰ ਜਮਹੂਰੀ ਹੱਕ, ਪੜ੍ਹਨ, ਲਿਖਣ, ਬੋਲਣ ਤੇ ਵਿਚਾਰ ਪ੍ਰਗਟਾਵੇ ਦੀ ਅਜ਼ਾਦੀ ਦਾ ਅਧਿਕਾਰ ਹੈ । ਇਸ ਦੇ ਨਾਲ ਹੀ ਸਵਿਧਾਨ ਦੀ ਧਾਰਾ 42-ਏ ਤਹਿਤ ਹਰ ਸ਼ਹਿਰੀ ਦੀਆਂ ਜ਼ੁੰਮੇਵਾਰੀਆਂ ਵੀ ਨਿਯਤ ਕੀਤੀਆਂ ਹੋਈਆਂ ਹਨ ਜਿਵੇਂ ਅਜ਼ਾਦੀ ਸੰਗਰਾਮ ਦੇ ਅਸੂਲਾ ਤੇ ਵਿਚਾਰਾਂ ਤੇ ਚੱਲਣਾ ਅਤੇ ਉਹਨਾਂ ਨੂੰ ਹੋਰ ਮਜ਼ਬੂਤ ਕਰਨਾ। 

ਦੂਜਾ ਵਿਗਿਆਨਕ ਵਿਚਾਰਧਾਰਾ ਬਣਾਉਣ ਤੇ ਉਸ ਉਪਰ ਚੱਲਣ ਵਰਗੀਆਂ ਜ਼ੁੰਮੇਵਾਰੀਆਂ ਦਿੱਤੀਆਂ ਗਈਆਂ ਹਨ। ਜਿਹੜੇ ਲੋਕ ਇਹਨਾਂ ਜ਼ੁੰਮੇਵਾਰੀਆਂ ਨੂੰ ਨਿਭਾਉਣ ਵਿੱਚ ਅੜਿੱਕਾ ਬਣਦੇ ਹਨ ਉਹ ਦੇਸ਼ ਦੇ ਭਵਿੱਖ ਲਈ ਇੱਕ ਵੱਡਾ ਖਤਰਾ ਹਨ ਅਤੇ ਲੋਕ ਵਿਰੋਧੀ ਹਨ। For More Pics Click Here Please

ਲੜਕੀ ਸ਼ਿਵਾਨੀ ਜੋ ਕਿ ਬਾਲਗ ਹੈ ਤੇ ਉਪਰੋਕਤ ਅਧਿਕਾਰਾਂ ਦਾ ਹੱਕ ਰੱਖਦੀ ਹੈ, ਨੂੰ ਜਬਰਦਸਤੀ ਰੋਕਣਾ ਸੰਵਿਧਾਨਕ ਉਲੰਘਣਾ ਹੈ।    For More Pics Click Here Please

ਜਿਹੜੀਆਂ ਕਿਤਾਬਾਂ ਤੇ ਹਿੰਦੂ ਕੱਟੜਪੰਥੀਆਂ ਨੇ ਕਿੰਤੂ ਪ੍ਰੰਤੂ ਕੀਤਾ ਹੈ ਉਹਨਾਂ ਵਿੱਚ ਸ਼ਹੀਦ ਭਗਤ ਸਿੰਘ ਦੀ `ਮੈਂ ਨਾਸਤਿਕ ਕਿਉਂ ਹਾਂ` ਇੱਕ ਇਤਿਹਾਸਕ ਅਤੇ ਵਿਗਿਆਨਕ ਵਿਚਾਰਧਾਰਾ ਦੀ ਪ੍ਰੋੜਤਾ ਕਰਦਾ ਲੇਖ ਹੈ।

ਦੂਜੇ ਜਿਸ ਲੇਖਕ ਰਾਧਾ ਮੋਹਨ ਗੋਕੁਲ ਦੀਆਂ ਦੋ ਕਿਤਾਬਾਂ `ਈਸ਼ਵਰ ਦਾ ਵਹੀਸ਼ਕਾਰ` ਅਤੇ `ਧਰਮ ਦਾ ਢਕੋਂਸਲਾ` ਹਨ। ਇਹ ਲੇਖਕ ਇੰਨਕਲਾਬੀ ਰਾਮ ਪ੍ਰਸ਼ਾਦ ਬਿਸਮਲ, ਅਸਫਾਕ ਉਲਾ, ਚੰਦਰ ਸ਼ੇਖਰ ਆਜ਼ਾਦ ਤੇ ਭਗਤ ਸਿੰਘ ਦੇ ਇੰਨਕਲਾਬੀ ਗੁਰੂ ਸਨ, ਜਿਨ੍ਹਾਂ ਨੇ ਦਿਮਾਗੀ ਗੁਲਾਮੀ ਤੋਂ ਮੁਕਤੀ ਨੂੰ ਅੰਗਰੇਜ਼ ਸਾਮਰਾਜ ਤੋਂ ਆਜ਼ਾਦੀ ਦੇ ਘੋਲ ਦਾ ਅਹਿਮ ਅੰਗ ਬਣਾਇਆ ਸੀ। ਅਜ਼ਾਦੀ ਦੀ ਲੜਾਈ ਵਿੱਚ ਇੱਕ ਅਹਿਮ ਹਿੱਸਾ ਇਸ ਗੱਲ ਦਾ ਸੀ ਕਿ ਜਦੋਂ ਤੱਕ ਨੌਜਵਾਨ ਦਿਮਾਗੀ ਗੁਲਾਮੀ ਤੋਂ ਮੁਕਤ ਨਹੀਂ ਹੁੰਦੇ ਉਦੋਂ ਤੱਕ ਆਜ਼ਾਦੀ ਸੰਘਰਸ਼ ਨੂੰ ਕਾਮਯਾਬੀ ਨਹੀਂ ਮਿਲ ਸਕਦੀ। 

ਭਗਤ ਸਿੰਘ ਤੇ ਸਾਥੀਆਂ ਨੇ ਦੁਨੀਆਂ ਦੇ ਉਸ ਤਜਰਬੇ ਤੋਂ ਜਿਸ ਨੂੰ ਰੂਸੀ ਇੰਨਕਲਾਬ ਕਿਹਾ ਜਾਂਦਾ ਹੈ ਜਿਸ ਵਿੱਚ ਲੈਨਨ ਦਾ ਬਹੁਤ ਵੱਡਾ ਯੋਗਦਾਨ ਹੈ। ਲੈਨਿਨ ਦੀਆਂ ਕਿਤਾਬਾਂ ਤੇ ਕਿੰਤੂ ਪ੍ਰੰਤੂ ਕਰਨਾ ਮਹਾਂਮੂਰਖਤਾ ਦੀ ਨਿਸ਼ਾਨੀ ਹੈ । 

ਇਹ ਘਟਨਾ ਔਰਤਾਂ ਨੂੰ ਅਜ਼ਾਦਾਨਾ ਤੌਰ ਤੇ ਵਿਕਸਤ ਹੋਣ ਤੋਂ ਰੋਕਣ ਵਾਲੇ ਇਕ ਸਮਾਜਕ ਵਰਤਾਰੇ ਨੂੰ ਵੀ ਨੰਗਿਆਂ ਕਰਦੀ ਹੈ। ਜਿਸ ਸੋਚ ਦੀ ਜੜ੍ਹ ਮੰਨੂ ਸਮਰਿਤੀ ਵਿੱਚ ਪਈ ਹੈ ਜਿਸ ਨੂੰ ਕਿ ਇਹ ਕੱਟੜਵਾਦੀ ਲਾਗੂ ਕਰਨਾ ਚਾਹੁੰਦੇ ਹਨ। 

ਸਭਾ ਮੰਗ ਕਰਦੀ ਹੈ ਕਿ ਪੁਲੀਸ ਨੂੰ ਇਹੋ ਜਿਹੀ ਅਸਵਿੰਧਾਨਕ ਹਰਕਤ ਕਰਨ ਅਤੇ ਜ਼ੁੰਮੇਵਾਰੀ ਤੋਂ ਕੁਤਾਹੀ ਵਰਤਣ ਲਈ ਬਣਦੀ ਸਜਾ ਦਿੱਤੀ ਜਾਣੀ ਚਾਹੀਦੀ ਹੈ। For More Pics Click Here Please

ਮੰਗਾਂ 

1. ਜਨਚੇਤਨਾ ਦੀ ਕਾਰਨੂੰਨ ਬਿੰਨੀ ਨਾਲ ਬਦਸਲੂਕੀ ਕਰਨ, ਸ਼ਰੇਆਮ ਇੱਜ਼ਤ ਦੀ ਤੋਹੀਨ ਕਰਨ, ਅਸ਼ਲੀਲ ਗਾਲ੍ਹਾਂ ਕੱਢਣ, ਧੱਕਾਮੁੱਕੀ ਕਰਨ, ਦੇਸ਼ ਭਗਤਾਂ ਦੀਆਂ ਰਚਨਾਵਾਂ ਨੂੰ ਅੱਗ ਲਗਾਉਣ ਦੀ ਧਮਕੀ ਦੇਣ, ਦੰਗਾਂ ਕਰਨ ਤੇ ਜਾਨੋਂ ਮਾਰਨ ਦੀਆਂ ਧਮਕੀਆਂ ਦੇਣ ਸਬੰਧੀ ਹਿੰਦੂ ਕੱਟੜਪੰਥੀਆਂ ਦੇ ਆਗੂਆਂ ਅਤੇ ਉਹਨਾਂ ਦੇ ਸਾਥੀਆਂ ਉਪਰ ਸੰਵਿਧਾਨਕ ਧਾਰਾਵਾਂ ਤਹਿਤ ਕੇਸ ਦਰਜ ਕਰਕੇ ਤੁਰੰਤ ਗ੍ਰਿਫਤਾਰ ਕੀਤਾ ਜਾਵੇ। For More Pics Click Here Please

2. ਪੁਲੀਸ ਦੁਆਰਾ ਜਨਚੇਤਨਾ ਦੇ ਕਾਰਕੁੰਨਾਂ ਨੂੰ ਨਜਾਇਜ਼ ਤੇ ਜਬਰੀ ਤਰੀਕੇ ਨਾਲ ਦੁਕਾਨ ਨੂੰ ਤਾਲਾ ਲਾਉਣ, ਗ਼ੈਰਕਾਨੂੰਨੀ ਤਰੀਕੇ ਨਾਲ ਗ਼ੈਰਕਾਨੂੰਨੀ ਤੌਰ ਤੇ ਹਿਰਾਸਤ ਵਿੱਚ ਰੱਖਣ ਅਤੇ ਦੁਕਾਨ ਨੂੰ ਜਬਰੀ ਤਾਲਾ ਲਗਾਉਣ ਵਾਲੇ ਪੁਲੀਸ ਅਧਿਕਾਰੀਆਂ ਖਿਲਾਫ਼ ਬਣਦੀ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇ।
For More Pics Click Here Please

ਜਾਂਚ ਰਿਪੋਰਟ ਜਾਰੀ ਕੀਤੇ ਜਾਣ ਵੇਲੇ ਜਾਂਚ ਕਮੇਟੀ ਦੇ  ਸਾਰੇ ਮੈਂਬਰ ਮੀਡੀਆ ਸਾਹਮਣੇ ਮੌਜੂਦ ਰਹੇ।