Showing posts with label Retirement. Show all posts
Showing posts with label Retirement. Show all posts

Tuesday, May 16, 2023

ਬੈਂਕ ਰਿਟਾਇਰੀਆਂ ਨੇ MP ਰਵਨੀਤ ਸਿੰਘ ਬਿੱਟੂ ਨੂੰ ਮੰਗ ਪੱਤਰ ਸੌਂਪਿਆ

ਪੈਨਸ਼ਨਰਾਂ ਦੀ ਪੈਨਸ਼ਨ ਵਿੱਚ ਅਪਡੇਸ਼ਨ  ਦੁਹਰਾਈ  


ਲੁੁਧਿਆਣਾ
: 16 ਮਈ 2023: (ਐਮ ਐਸ ਭਾਟੀਆ//ਪੰਜਾਬ ਸਕਰੀਨ)::

ਬੈਂਕਾਂ ਵਿੱਚ ਕੰਮ ਕਰਦੇ ਲੋਕ ਦੇਸ਼ ਦੀ ਅਰਥ ਵਿਵਸਥਾ ਨਾਲ ਬਹੁਤ ਹੀ ਨੇੜਿਓਂ ਜੁੜੇ ਹੁੰਦੇ ਹਨ। ਇਸ ਲਈ ਦੇਸ਼ ਦੀਆਂ ਸਰਕਾਰਾਂ ਵੱਲੋਂ ਸਮੇਂ ਸਮੇਂ ਬਣਾਈਆਂ ਜਾਂਦੀਆਂ ਨੀਤੀਆਂ ਨੂੰ ਮੁਖ ਰੱਖਦਿਆਂ ਦੇਸ਼ ਦੇ ਲੋਕਾਂ ਨੂੰ ਘੱਟ ਵਿਆਜ ਵਾਲੇ ਕਰਜ਼ੇ ਅਤੇ ਹੋਰ ਬਹੁਤ ਸਾਰੀਆਂ ਸਹੂਲਤਾਂ ਵੀ ਦੇਂਦੇ ਹਨ। ਬੈਂਕਿੰਗ ਦੇ ਖੇਤਰ ਦੀਆਂ ਜ਼ਿੰਮੇਵਾਰੀਆਂ ਸੰਭਾਲਦਿਆਂ ਇਹਨਾਂ ਦੀ ਉਮਰ ਦਾ ਸੁਨਹਿਰੀ ਦੌਰ ਲੰਘ ਜਾਂਦਾ ਹੈ। ਸਾਰੀ ਉਮਰ ਦੀ ਨੌਕਰੀ ਤੋਂ ਬਾਅਦ ਜਦੋਂ ਰਿਟਾਇਰਮੈਂਟ ਦਾ ਸਮਾਂ ਆਉਂਦਾ ਹੈ ਤਾਂ ਉਮੀਦ ਹੁੰਦੀ ਹੈ ਕਿ ਉਮਰ ਦੇ ਆਖਰੀ ਪੜਾਅ ਵਾਲੇ ਚਾਰ ਦਿਹਾੜੇ ਸੁਖ ਨਾਲ ਲੰਘ ਜਾਣਗੇ ਪਰ ਜ਼ਿੰਦਗੀ ਦੇ ਝਮੇਲੇ ਇਹ ਸੁਪਨਾ ਵੀ ਪੂਰਾ ਨਹੀਂ ਹੋਣ ਦੇਂਦੇ। 

ਸਮੇਂ ਦੇ ਨਾਲ ਨਾਲ ਤਕਰੀਬਨ ਸਾਰੇ ਖੇਤਰਾਂ ਦੇ ਮੁਲਾਜ਼ਮਾਂ ਦੀਆਂ ਤਨਖਾਹਾਂ ਵਧਦੀਆਂ ਰਹਿੰਦੀਆਂ ਹਨ। ਬੈਂਕ ਮੁਲਾਜ਼ਮਾਂ ਦੀਆਂ ਤਨਖਾਹਾਂ ਵਿਚ ਵੀ ਹਰ ਪੰਜਾਂ ਸਾਲਾਂ ਮਗਰੋਂ ਵਾਧਾ ਹੁੰਦਾ ਰਹਿੰਦਾ ਹੈ ਕਿਓਂ ਵੱਧ ਰਹੀ ਮਹਿੰਗਾਈ ਨਾਲ ਨਜਿੱਠਣ ਲਈ ਹੋਰ ਕੋਈ ਰਸਤਾ ਵੀ  ਨਹੀਂ ਹੁੰਦਾ। ਇਹ ਸਾਰੀ ਸਥਿਤੀ ਬੈਂਕਾਂ ਵਿਚੋਂ ਰਿਟਾਇਰ ਹੋਣ ਵਾਲਿਆਂ ਲਈ ਨਾਜ਼ੁਕ ਬਣ ਜਾਂਦੀ ਹੈ ਕਿਓਂਕਿ ਇਹਨਾਂ ਦੀਆਂ ਪੈਨਸ਼ਨਾਂ ਉਮਰ ਦੇ ਆਖ਼ਿਰੀ ਸਾਹਾਂ ਤੀਕ ਇਸੇ ਤਰ੍ਹਾਂ ਚੱਲਦੀਆਂ ਰਹਿੰਦੀਆਂ ਹਨ। 

ਇਸ ਮਸਲੇ ਨੂੰ ਲੈ ਕੇ ਇੱਕ ਵਾਰ ਫੇਰ ਬੈਂਕਾਂ ਦੇ ਰਿਟਾਇਰੀਆਂ ਵਿੱਚ ਬੇਚੈਨੀ ਹੈ।  ਆਲ ਇੰਡੀਆ ਬੈੰਕ ਰਿਟਾਇਰੀਜ਼ ਫੈਡਰੇਸ਼ਨ (ਏ.ਆਈ.ਬੀ.ਆਰ.ਐਫ)  ਦੀ  ਲੁਧਿਆਣਾ ਇਕਾਈ ਵੱਲੋਂ ਇਥੋਂ ਦੇ ਮੈਂਬਰ ਪਾਰਲੀਮੈਂਟ ਰਵਨੀਤ ਸਿੰਘ ਬਿੱਟੂ ਨੂੰ ਮੈਮੋਰੰਡਮ ਸੌਂਪਿਆ ਗਿਆ। ਵੱਖ ਵੱਖ ਬੈਂਕਾਂ  ਤੋਂ ਆਏ ਸਾਥੀਆਂ ਨੇ ਵੱਡੀ ਗਿਣਤੀ ਵਿੱਚ ਇਕੱਠੇ ਹੋ ਕੇ ਮੈਮੋਰੰਡਮ ਦਿੱੱਤਾ। 

ਉਨ੍ਹਾਂ ਦੱਸਿਆ ਕਿ 1995 ਵਿੱਚ ਜਦੋਂ ਤੋਂ  ਪੈਨਸ਼ਨ ਲਾਗੂ ਹੋਈ ਉਦੋਂ ਤੋਂ ਲੈ ਕੇ ਅੱਜ ਤੱਕ ਕਰਮਚਾਰੀਆਂ ਅਤੇ ਅਧਿਕਾਰੀਆਂ ਦੀਆਂ  ਤਨਖਾਹਾਂ ਵਿੱਚ ਵਾਧੇ ਦਾ ਸਮਝੌਤਾ ਹਰ ਪੰਜ ਸਾਲ ਬਾਅਦ ਹੁੰਦਾ ਰਹਿੰਦਾ ਹੈ ਪਰ ਪੈਨਸ਼ਨਰਾਂ ਦੀ ਪੈਨਸ਼ਨ ਵਿੱਚ ਅਪਡੇਸ਼ਨ ਨਹੀਂ ਕੀਤੀ ਗਈ। 

ਇਸ  ਮੌਕੇ ਰਵਨੀਤ ਸਿੰਘ ਬਿੱਟੂ ਨੇ ਡੈਲੀਗੇਸ਼ਨ ਮੈਂਬਰਾਂ ਦੀ ਗੱਲ ਨੂੰ ਬੜੇ ਧਿਆਨ ਨਾਲ ਸੁਣਿਆ ਅਤੇ ਇਸ ਮਸਲੇ ਨੂੰ ਸੰਸਦ ਵਿੱਚ ਉਠਾਉਣ ਦਾ ਭਰੋਸਾ ਦਿੱਤਾ। ਡੈਲੀਗੇਸ਼ਨ ਵਿੱਚ ਲੁਧਿਆਣਾ ਏਆਈਬੀਆਰਐਫ  ਦੇ  ਸਕੱਤਰ ਸ਼੍ਰੀ ਦਰਸ਼ਨ ਸਿੰਘ ਰੀਹਲ, ਪ੍ਰਧਾਨ ਸ਼੍ਰੀ ਐਮ ਪੀ ਬੱੱਸੀ,ਚੇਅਰਮੈਨ ਸ਼੍ਰੀ ਵਿਨੋਦ ਸੂਦ ਤੋਂ ਇਲਾਵਾ ਐਮ ਐਸ ਭਾਟੀਆ, ਅਵਤਾਰ ਛਿੱਬੜ, ਪੀ ਐਸ ਸੈਣੀ, ਜਗਤਾਰ ਸਿੰਘ, ਆਤਮਜੀਤ ਸਿੰਘ, ਮੇਘ ਨਾਥ, ਸੁਭਾਸ਼ ਮਲਿਕ, ਐਮ.ਆਰ. ਗਰਗ, ਐਸ.ਕੇ.ਰਿਸ਼ੀ,ਐਮ.ਪੀ.ਭਗਤ, ਰਾਜੇਸ਼ ਅੱਤਰੀ ਅਤੇ ਵੱਡੀ ਗਿਣਤੀ ਵਿੱਚ ਸਾਥੀ ਸ਼ਾਮਲ ਹੋਏ।

ਸਮਾਜਿਕ ਚੇਤਨਾ ਅਤੇ ਜਨ ਸਰੋਕਾਰਾਂ ਨਾਲ ਜੁੜੇ  ਹੋਏ ਬਲਾਗ ਮੀਡੀਆ ਨੂੰ ਜਾਰੀ ਰੱਖਣ ਵਿੱਚ ਸਹਿਯੋਗੀ ਬਣੋ। ਜੋ ਵੀ ਰਕਮ ਤੁਸੀਂ ਹਰ ਰੋਜ਼, ਹਰ ਹਫਤੇ, ਹਰ ਮਹੀਨੇ ਜਾਂ ਕਦੇ ਕਦਾਈਂ ਇਸ ਸ਼ੁਭ ਕੰਮ ਲਈ ਕੱਢ ਸਕਦੇ ਹੋ ਉਹ ਜ਼ਰੂਰ ਕੱਢੋ। ਹੇਠਲੇ ਬਟਨ 'ਤੇ ਕਲਿੱਕ ਕਰ ਕੇ ਤੁਸੀਂ ਸਹਿਜੇ ਹੀ ਅਜਿਹਾ ਕਰ ਸਕਦੇ ਹੋ।

Monday, July 09, 2018

ਵਿਦਾਇਗੀ ਸਮਾਰੋਹ ਤੇ ਕਵੀ ਦਰਬਾਰ ਅਯੋਜਿਤ ਕਰਵਾ ਕੇ ਪਾਈ ਨਵੀਂ ਪਿਰਤ

Jul 9, 2018, 3:35 PM
ਇੰਨਕ਼ਲਾਬੀ ਗੀਤਾਂ ਨਾਲ ਦਿੱਤੀ ਸੇਵਾ ਮੁਕਤੀ ਮਗਰੋਂ ਵਿਦਾਇਗੀ 
ਲੁਧਿਆਣਾ: 9 ਜੁਲਾਈ 2018: (ਪੰਜਾਬ ਸਕਰੀਨ ਟੀਮ)::
ਸਥਾਨਕ ਪੰਜਾਬੀ ਭਵਨ ਵਿਖੇ ਮੈਡਮ ਕਮਲੇਸ਼ ਕੁਮਾਰੀ ਸਰਕਾਰੀ ਹਾਈ ਸਕੂਲ ਸ਼ਾਹਪੁਰ ਰੋਡ ਦੀ ਸੇਵਾ ਮੁਕਤੀ ਮੌਕੇ ਸ਼ਹੀਦ ਭਗਤ ਸਿੰਘ ਸਭਿਆਚਾਰ ਮੰਚ ਲੁਧਿਆਣਾ ਦੇ ਸਹਿਯੋਗ ਨਾਲ ਕਵੀ ਦਰਬਾਰ ਕਰਵਾ ਕੇ ਨਵੇਕਲੀ ਪਿਰਤ ਪਾਈ। ਇਸ ਕਵੀ ਦਰਬਾਰ ਦੀ ਪ੍ਰਧਾਨਗੀ ਕਮਲੇਸ਼ ਕੁਮਾਰੀ, ਸੁਰਿੰਦਰ ਕੌਰ, ਕਸਤੂਰੀ ਲਾਲ, ਰੁਪਿੰਦਰਪਾਲ ਸਿੰਘ ਗਿੱਲ ਅਤੇ ਸੁਖਵਿੰਦਰ ਲੀਲ ਨੇ ਕੀਤੀ। ਇਸ ਮੌਕੇ ਵੱਖ ਵੱਖ ਕਵੀਆਂ ਜਿਨਾਂ ਵਿੱਚ ਸਵਜੀਤ ਸਿੰਘ, ਤਰਲੋਚਨ ਲੋਚੀ, ਜਗਵਿੰਦਰ ਯੋਧਾ, ਹਰਬੰਸ ਮਾਲਵਾ, ਸੁਖਚਰਨਜੀਤ ਕੌਰ ਗਿੱਲ, ਜਤਿੰਦਰ ਮਲਿਕ, ਵਾਹਿਦ, ਕੁਲਵਿੰਦਰ ਮੋਰਕਰੀਮਾ, ਰਾਮ ਸਿੰਘ, ਕਰਮਜੀਤ ਗਰੇਵਾਲ, ਮਾਸਟਰ ਹਰਬੰਸ ਅਖਾੜਾ, ਲਖਵਿੰਦਰ ਆਦਿ ਨੇ ਭੱਖਦੇ ਸਮਾਜਿਕ ਮੁੱਦਿਆ ਅਤੇ ਜ਼ਿੰਦਗੀ ਨੂੰ ਸੇਧ ਦੇਣ ਵਾਲੀਆਂ ਕਵਿਤਾਵਾਂ ਪੇਸ਼ ਕੀਤੀਆਂ। ਇਸ ਮੌਕੇ ਸਤਿਕਰਤਾਰ ਸਿੰਘ ਅਤੇ ਗੁਰਮੀਤ ਸਿੰਘ ਮਾਲੜਾ ਨੇ ਵੀ ਇਨਕਲਾਬੀ ਗੀਤ ਪੇਸ਼ ਕੀਤੇ।
ਇਸ ਮੌਕੇ "ਪਲਸ ਮੰਚ" ਦੇ ਆਗੂ ਕਸਤੂਰੀ ਲਾਲ ਨੇ ਮੁਲਾਜ਼ਮ ਵਰਗ ਨੂੰ ਅਪੀਲ ਕੀਤੀ ਕਿ ਉਨਾ ਨੂੰ ਵੀ ਅਜਿਹੇ ਉਸਾਰੂ ਪਰੋਗਰਾਮ ਉਲੀਕਣੇ ਚਾਹੀਦੇ ਹਨ। ਇਸ ਮੌਕੇ ਕਮਲੇਸ਼ ਕੁਮਾਰੀ ਦੇ ਸੰਘਰਸ਼ੀ ਜੀਵਨ ਉੱਪਰ ਮੈਡਮ ਸੁਰਿੰਦਰ ਕੌਰ ਨੇ ਵਿਸਥਾਪੂਰਵਕ ਚਾਨਣਾ ਪਾਇਆ। ਅੰਤ ਵਿੱਚ ਕਮਲੇਸ਼ ਕੁਮਾਰੀ ਨੇ ਸਾਰੇ ਆਏ ਸਰੋਤਿਆਂ ਅਤੇ ਕਵੀਆਂ ਦਾ ਧੰਨਵਾਦ ਕਰਦੇ ਹੋਏ ਕਿਹਾ ਕਿ ਜੇਕਰ ਦੇਸ਼ ਨੂੰ ਵਿਕਾਸ ਵੱਲ ਤੋਰਨਾ ਹੈ ਤਾਂ ਸਾਨੂੰ ਆਪਣੇ ਕੰਮ ਆਪਣੇ ਹੱਥੀਂ ਆਪ ਕਰਕੇ ਨੌਕਰਸ਼ਾਹੀ ਕਲਚਰ ਨੂੰ ਖਤਮ ਕਰਨਾ ਪਵੇਗਾ। ਇਸ ਮੌਕੇ ਹਰੀਸ਼ ਪੱਖੋਵਾਲ,ਪਿੰਸੀਪਲ ਪਰੇਮ ਸਿੰਘ ਬਜਾਜ, ਰਮਨਜੀਤ ਸੰਧੂ, ਇੰਦਰਜੀਤ ਸਿੰਘ, ਪਿੰ:ਹਰੀ ਕਿਸ਼ਨ ਮਾਇਰ, ਦਲਬੀਰ ਕਲੇਰ, ਰਵਿੰਦਰ ਦਿਵਾਨਾ ਅਤੇ ਜਸਕਰਨ ਸ਼ੀਨਾ ਆਦਿ ਹਾਜ਼ਰ ਸਨ।
  

Tuesday, February 28, 2017

PAU ਦੇ ਰਜਿਸਟਰਾਰ ਅਤੇ ਨਿਰਦੇਸ਼ਕ ਖੋਜ ਸੇਵਾ ਮੁਕਤ

Tue, Feb 28, 2017 at 5:14 PM
"ਡਾ. ਖੰਨਾ ਇੱਕ ਸਮਰਪਿਤ, ਉਚ ਪੱਧਰੀ ਪ੍ਰਸਾਸ਼ਕ ਅਤੇ ਖੋਜ ਵਿਗਿਆਨੀ"
ਲੁਧਿਆਣਾ: 28 ਫ਼ਰਵਰੀ 2017: (ਪੰਜਾਬ ਸਕਰੀਨ ਬਿਊਰੋ)::
ਪੰਜਾਬ ਐਗਰੀਕਲਚਰਲ ਯੂਨੀਵਰਸਿਟੀ ਦੇ ਦੋ ਸੀਨੀਅਰ ਅਧਿਕਾਰੀ ਰਜਿਸਟਰਾਰ ਡਾ. ਪੀ ਕੇ ਖੰਨਾ ਅਤੇ ਨਿਰਦੇਸ਼ਕ ਖੋਜ ਡਾ. ਮਨਜੀਤ ਸਿੰਘ ਗਿੱਲ ਅੱਜ ਸੇਵਾ ਮੁਕਤ ਹੋ ਗਏ । ਪੀਏਯੂ ਵਾਈਸ ਚਾਂਸਲਰ ਡਾ. ਬਲਦੇਵ ਸਿੰਘ ਢਿੱਲੋਂ ਦੇ ਨਾਲ ਯੂਨੀਵਰਸਿਟੀ ਦੇ ਡੀਨ, ਪਸਾਰ ਅਤੇ ਅਪਰ ਨਿਰਦੇਸ਼ਕਾਂ, ਵਿਭਾਗ ਦੇ ਮੁਖੀਆਂ ਅਤੇ ਸਟਾਫ਼ ਨੇ ਵਿਦਾਇਗੀ ਸਮਾਰੋਹ ਵਿੱਚ ਆਪਣੀ ਹਾਜ਼ਰੀ ਲਗਵਾਈ। 
ਡਾ. ਖੰਨਾ ਨੂੰ ਇੱਕ ਸਮਰਪਿਤ, ਉਚ ਪੱਧਰੀ ਪ੍ਰਸਾਸ਼ਕ ਅਤੇ ਖੋਜ ਵਿਗਿਆਨੀ ਸੰਬੋਧਨ ਕਰਦਿਆਂ ਡਾ. ਢਿੱਲੋਂ ਨੇ ਕਿਹਾ ਕਿ ਉਹਨਾਂ ਦੁਆਰਾ ਆਪਣੇ ਪਿਛਲੇ 34 ਸਾਲਾਂ ਕਾਰਜਕਾਲ ਦੌਰਾਨ ਪੀਏਯੂ ਅਤੇ ਮਾਈਕ੍ਰੋਬਾਇਆਲੋਜੀ ਨੂੰ ਵਿਕਾਸ ਦੀਆਂ ਲੀਹਾਂ ਤੇ ਤੋਰਨ ਲਈ ਮਹੱਤਵਪੂਰਨ ਯੋਗਦਾਨ ਪਾਇਆ ਗਿਆ । ਇਸ ਤੋਂ ਇਲਾਵਾ ਡਾ. ਢਿੱਲੋਂ ਨੇ ਡਾ. ਗਿੱਲ ਦੀ ਇੱਕ ਬਚਨਵੱਧ ਕਾਮੇ ਦੇ ਤੌਰ ਤੇ ਪ੍ਰਸ਼ੰਸ਼ਾ ਕਰਦਿਆਂ ਕਿਹਾ ਕਿ ਉਹਨਾਂ ਨੇ ਨਰਮੇ ਦੀਆਂ ਕਿਸਮਾਂ ਨੂੰ ਵਿਕਸਤ ਕਰਨ, ਨਰਮਾ ਉਤਪਾਦਨ ਵਧਾਉਣ ਅਤੇ ਨਰਮਾ ਉਤਪਾਦਕਾਂ ਦੀ ਮਾਲੀ ਸਥਿਤੀ ਵਿੱਚ ਸੁਧਾਰ ਲਿਆਉਣ ਵਿੱਚ ਮਹੱਤਵਪੂਰਨ ਯੋਗਦਾਨ ਪਾਇਆ ਗਿਆ। ਡਾ. ਢਿੱਲੋਂ ਨੇ ਦੋਵਾਂ ਅਧਿਕਾਰੀਆਂ ਨੂੰ ਸਿਹਤਮੰਦ ਅਤੇ ਖੁਸ਼ਹਾਲ ਜ਼ਿੰਦਗੀ ਲਈ ਸ਼ੁਭ ਕਾਮਨਾਵਾਂ ਭੇਂਟ ਕੀਤੀਆਂ । ਡਾ. ਖੰਨਾ ਨੇ ਪੀਏਯੂ ਵਾਈਸ ਚਾਂਸਲਰ, ਸਟਾਫ਼, ਸੀਨੀਅਰ ਅਧਿਕਾਰੀਆਂ, ਵਿਭਾਗਾਂ ਦੇ ਮੁਖੀਆਂ ਅਤੇ ਵਿਦਿਆਰਥੀਆਂ ਦਾ ਪੀਏਯੂ ਵਿਖੇ ਉਹਨਾਂ ਦੇ ਕਾਰਜਕਾਲ ਦੌਰਾਨ ਦਿੱਤੇ ਗਏ ਸਾਥ ਅਤੇ ਸਹਿਯੋਗ ਲਈ ਧੰਨਵਾਦ ਕੀਤਾ। 
ਡਾ. ਗਿੱਲ ਨੇ ਵੀ ਸਾਰੇ ਅਧਿਕਾਰੀਆਂ, ਮੁਖੀਆਂ, ਸਟਾਫ਼ ਅਤੇ ਵਿਦਿਆਰਥੀਆਂ ਨੂੰ ਜੀਵਨ ਦੇ ਹਰ ਪਲ ਵਿੱਚ ਸਾਥ ਨਿਭਾਉਣ ਲਈ ਧੰਨਵਾਦ ਦੇ ਸ਼ਬਦ ਕਹੇ। 
ਡਾ. ਖੰਨਾ ਨੇ ਆਪਣੇ ਖੋਜ ਕਾਰਜ, ਖੁੰਬਾਂ ਦੀ ਕਾਸ਼ਤ ਲਈ ਫ਼ਸਲ ਦੀ ਰਹਿੰਦ-ਖੂੰਹਦ ਦਾ ਚੰਗਾ ਪ੍ਰਬੰਧ, ਭੋਜਨ, ਊਰਜਾ ਦੇ ਸੋਮਿਆਂ ਅਤੇ ਵਪਾਰਕ ਪੱਧਰ ਤੇ ਖਮੀਰ ਤੇ ਕੇਂਦਰਤ ਰੱਖੇ । ਉਹ 2004 ਤੋਂ 2009 ਤੱਕ ਮਾਈਕ੍ਰੋਬਾਇਆਲੋਜੀ ਵਿਭਾਗ ਦੇ ਮੁਖੀ ਰਹੇ । ਇਸ ਤੋਂ ਇਲਾਵਾ ਉਹਨਾਂ ਨੇ ਖੋਜ ਸੰਚਾਲਕ (ਬੇਸਿਕ ਸਾਇੰਸਜ਼ ਐਂਡ ਹਿਊਮੈਨਟੀਜ਼), ਕਾਰਜਕਾਰੀ ਡੀਨ (ਬੇਸਿਕ ਸਾਇੰਸਜ਼ ਐਂਡ ਹਿਊਮੈਨਟੀਜ਼), ਨਿਰਦੇਸ਼ਕ (ਆਈ ਟੀ ਸਕੂਲ), ਅਪਰ ਖੋਜ ਨਿਰਦੇਸ਼ਕ (ਫੂਡ ਸਾਇੰਸ, ਨਿਊਟ੍ਰੀਸ਼ਨ ਐਂਡ ਇੰਜਨੀਅਰਿੰਗ) ਵਾਈਸ ਚਾਂਸਲਰ ਦੇ ਤਕਨੀਕੀ ਸਲਾਹਕਾਰ ਅਤੇ ਰਜਿਸਟਰਾਰ ਆਦਿ ਦੀ ਸੇਵਾ ਮਾਰਚ 2013 ਤੱਕ ਨਿਭਾਈ । ਡਾ. ਖੰਨਾ ਫਰੈਂਚ ਸਰਕਾਰ ਦੇ ਫੈਲੋ 1981 ਤੋਂ 1983 ਤੱਕ ਰਹੇ ਅਤੇ ਨਾਲ ਹੀ ਉਹਨਾਂ ਨੇ ਵਿਗਿਆਨ ਤਕਨਾਲੋਜੀ ਵਿਭਾਗ, ਭਾਰਤ ਸਰਕਾਰ ਤੋਂ ਪਲਾਂਟ ਸਾਇੰਸ ਕੋਲੋਕੁਇਮ ਐਵਾਰਡ (1987) ਵੀ ਪ੍ਰਾਪਤ ਕੀਤਾ। ਉਹਨਾਂ ਨੇ 300 ਤੋਂ ਵੱਧ ਖੋਜ ਪਰਚੇ ਪ੍ਰਕਾਸ਼ਿਤ ਕਰਵਾਏ ਅਤੇ ਉਹ ਮਾਈਕ੍ਰੋਬਾਇਆਲੋਜੀ ਪੀ ਐਚ ਡੀ ਦੇ 8 ਅਤੇ ਐਮ ਐਸ ਸੀ ਦੇ 20 ਵਿਦਿਆਰਥੀਆਂ ਦੇ ਨਿਗਰਾਨ ਵੀ ਰਹੇ । ਉਹਨਾਂ ਨੂੰ ਕਈ ਪ੍ਰੋਜੈਕਟਾਂ ਲਈ ਰਾਸ਼ਟਰੀ ਫੰਡ ਵੀ ਮਿਲੇ । ਜਿਸ ਸਦਕਾ ਉਹਨਾਂ ਨੇ ਫਰਾਂਸ, ਯੂ ਕੇ, ਕੈਨੇਡਾ, ਸਵਿਟਜ਼ਰਲੈਂਡ ਅਤੇ ਯੂ ਐਸ ਏ ਦਾ ਦੌਰਾ ਕੀਤਾ । 
ਪੀਏਯੂ ਦੇ ਪੁਰਾਣੇ ਵਿਦਿਆਰਥੀ ਡਾ. ਗਿੱਲ ਨੇ ਨਰਮੇ ਦੀਆਂ 15 ਕਿਸਮਾਂ, ਸੋਇਆਬੀਨ ਅਤੇ ਜਵਾਰ ਦੀਆਂ ਦੋ-ਦੋ ਕਿਸਮਾਂ ਨੂੰ ਵਿਕਸਤ ਕਰਨ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਈ । ਇਸ ਤੋਂ ਇਲਾਵਾ ਉਹਨਾਂ ਨੇ ਪਲਾਂਟ ਬਰੀਡਿੰਗ ਅਤੇ ਜੈਨੇਟਿਕਸ ਵਿਭਾਗ ਦੇ ਮੁਖੀ, ਅਪਰ ਨਿਰਦੇਸ਼ਕ ਖੋਜ (ਫ਼ਸਲ ਸੁਧਾਰ) ਅਤੇ ਨਿਰਦੇਸ਼ਕ ਖੋਜ ਦੀ ਸੇਵਾ ਦਸੰਬਰ 2016 ਤੱਕ ਨਿਭਾਈ । ਉਹ ਐਮ ਐਸ ਸੀ ਦੇ 10 ਵਿਦਿਆਰਥੀਆਂ ਅਤੇ ਪੀ ਐਚ ਡੀ ਦੇ 3 ਵਿਦਿਆਰਥੀਆਂ ਦੇ ਨਿਗਰਾਨ ਵੀ ਰਹੇ। ਡਾ. ਗਿੱਲ ਨੇ ਵੱਖ-ਵੱਖ ਜਰਨਲਾਂ ਅਤੇ ਪੁਸਤਕਾਂ ਵਿੱਚ 110 ਖੋਜ ਪਰਚੇ ਪ੍ਰਕਾਸ਼ਿਤ ਕਰਵਾਏ। 

Thursday, December 29, 2016

ਵਿਗਿਆਨ ਅਤੇ ਸਾਹਿਤ ਦਾ ਸੁਮੇਲ ਡਾ.ਜਗਤਾਰ ਸਿੰਘ ਧੀਮਾਨ

‘ਸਮੁੰਦਰ ਕੰਢੇ ਸਿੱਪੀਆਂ’ ਹੈ ਵੱਖਰੇ ਅੰਦਾਜ਼ ਦੀ ਰਚਨਾ
ਸੇਵਾ ਮੁਕਤੀ ਤੇ ਵਿਸ਼ੇਸ਼                                                                   *ਪ੍ਰੋ: ਗੁਰਭਜਨ ਸਿੰਘ ਗਿੱਲ 
ਡਾ.ਧੀਮਾਨ ਨੇ ਪੰਜਾਬ ਐਗਰੀਕਲਚਰਲ ਯੂਨੀਵਰਸਿਟੀ, ਲੁਧਿਆਣਾ ਵਿਖੇ ਵੱਖ-ਵੱਖ ਅਹੁਦਿਆਂ ਤੇ ਸੇਵਾ ਨਿਭਾਈ ਹੈ। ਪੀ ਏ ਯੂ ਦੇ ਐਡੀਸ਼ਨਲ ਡਇਰੈਕਟਰ ਕਮਿਊਨੀਕੇਸ਼ਨ (2007-2012) ਅਤੇ ਐਡੀਸ਼ਨਲ ਡਾਇਰੈਕਟਰ ਖੋਜ (2012-2016) ਵਜੋਂ ਉਹਨਾਂ ਵੱਲੋਂ ਪੰਜਾਬ ਵਿੱਚ ਖੇਤੀ ਖੋਜ ਰਾਹੀਂ ਕੁਦਰਤੀ ਸਰੋਤਾਂ ਦੀ ਸਾਂਭ-ਸੰਭਾਲ ਕਰਨ ਅਤੇ ਸੰਚਾਰ ਵਿਧੀਆਂ ਰਾਹੀਂ ਖੋਜਾਂ ਨੂੰ ਕਿਸਾਨਾਂ ਤਕ ਪਹੁੰਚਾਉਣ ਵਿਚ ਅਹਿਮ ਯੋਗਦਾਨ ਪਾਇਆ ਗਿਆ। ਉਨ੍ਹਾਂ ਵੱਲੋਂ, ਕਿਰਸਾਨੀ ਦੀ ਭਲਾਈ ਵਾਸਤੇ ਟੈਲੀਵੀਜਨ, ਰੇਡੀਓ ਸਮੇਤ ਇਲੈਕਟ੍ਰੋਨਿਕ ਅਤੇ ਪਿ੍ਰੰਟ ਮੀਡੀਆ ਦੀ ਖੁੱਲ੍ਹ ਕੇ ਵਰਤੋਂ ਕੀਤੀ ਗਈ। ਡਾ.ਧੀਮਾਨ ਨੇ ਪੀ ਏ ਯੂ ਵੱਲੋਂ ਪ੍ਰਕਾਸ਼ਿਤ ਖੇਤੀ ਰਸਾਲਿਆਂ ਅਤੇ ਲੋੜ ਅਨੁਸਾਰ ਵਧੀਆ ਸਾਹਿਤ ਪ੍ਰਕਾਸ਼ਨਾਵਾਂ ਕਰਕੇ ਕਿਸਾਨਾਂ ਤਕ ਸਮੇਂ ਸਿਰ ਪਹੁੰਚਾਉਣ ਨੂੰ ਪਹਿਲ ਦਿੱਤੀ। ਉਹ ਪੌਦਾ ਰੋਗਾਂ ਦੇ ਜਾਣ-ਮੰਨੇ ਮਾਹਿਰ ਹਨ। ਉਹ ਇੰਡੀਅਨ ਸੋਸਾਇਟੀ ਆਫ਼ ਪਲਾਂਟ ਪੈਥਾਲੋਜਿਸਟ, ਲੁਧਿਆਣਾ (2015) ਦੇ ਫੈਲੋ ਹਨ।
ਉਹ 30 ਦਸੰਬਰ, 2016 ਨੂੰ ਪੀ ਏ ਯੂ ਤੋਂ ਸੇਵਾ ਮੁਕਤ ਹੋ ਰਹੇ ਹਨ। ਉਨ੍ਹਾਂ ਵੱਲੋਂ ਇਸ ਮੌਕੇ ਨਿੱਕੇ ਨਿੱਕੇ ਸਿਰਜਣਾਤਮਕ ਲੇਖਾਂ ਦਾ ਸੰਗ੍ਰਹਿ  ‘‘ਸਮੁੰਦਰ ਕੰਢੇ ਸਿੱਪੀਆਂ’’ ਪ੍ਰਕਾਸ਼ਤ ਕੀਤਾ ਗਿਆ ਹੈ ਜੋ ਕਿ ਪੀ ਏ ਯੂ ਵਿਖੇ 29 ਦਸੰਬਰ ਨੂੰ ਹੋ ਰਹੇ ਵਿਦਾਇਗੀ ਸਮਾਰੋਹ ਮੌਕੇ ਇਕ ਕਵੀ ਦਰਬਾਰ ਕਰਵਾਇਆ ਜਾ ਰਿਹਾ ਹੈ ਜਿਸ ਵਿੱਚ ਇਸ ਪੁਸਤਕ ਦਾ ਲੋਕ ਅਰਪਣ ਹੋਵੇਗਾ। ਆਪਣੀ ਸੇਵਾ ਮੁਕਤੀ ਵੇਲੇ ਡਾ: ਧੀਮਾਨ ਵੱਲੋਂ ਸ਼ਬਦ ਜੱਗ ਦੀ ਇਹ ਪਿਰਤ ਨਿਵੇਕਲੀ ਹੈ।  ‘ਸਮੁੰਦਰ ਕੰਢੇ ਸਿੱਪੀਆਂ’ ਵੱਖਰੇ ਅੰਦਾਜ਼ ਦੀ ਉਹ ਰਚਨਾ ਹੈ ਜਿਸ ਤੋਂ ਭਵਿੱਖ ਪੀੜ੍ਹੀਆਂ ਨੂੰ ਚੇਤਨਾ ਅਤੇ ਪ੍ਰੇਰਨਾ ਭਰਪੂਰ ਲਿਖਤ ਰਾਹੀਂ ਸਰਵਪੱਖੀ ਸੰਪੂਰਨ ਸ਼ਖਸੀਅਤ ਉਸਾਰਨ ਲਈ ਮਦਦ ਮਿਲੇਗੀ। ਇਹ ਪੁਸਤਕ ਸਿਰਫ਼ ਲੇਖ ਨਹੀਂ ਹਨ ਸਗੋਂ ਪ੍ਰੇਰਨਾ ਦੇ ਭਰਪੂਰ ਪਿਆਲੇ ਹਨ ਜਿੰਨ੍ਹਾਂ ਤੋਂ ਰੂਹ ਨੂੰ ਤਿ੍ਰਪਤੀ ਮਿਲਦੀ ਹੈ। ਵਿਰਲੇ-ਵਿਰਲੇ ਵਾਰਤਕਕਾਰ ਹੀ ਹਨ ਜਿੰਨ੍ਹਾਂ ਨੂੰ ਤ੍ਰੈਕਾਲ ਦਰਸ਼ੀ ਲਿਖਤ ਲਿਖਣ ਦਾ ਸੁਭਾਗ ਪ੍ਰਾਪਤ ਹੁੰਦਾ ਹੈ। 
ਇਤਿਹਾਸਕ ਕਸਬੇ ਕਰਤਾਰਪੁਰ (ਜਲੰਧਰ) ਦੇ ਜੰਮੇ ਜਾਏ ਡਾ. ਜਗਤਾਰ ਸਿੰਘ ਧੀਮਾਨ ਨੇ ਵਿਗਿਆਨ ਦੀ ਸਿੱਖਿਆ ਹਾਸਿਲ ਕਰਕੇ ਉਚੇਰੀ ਪੜ੍ਹਾਈ ਲਈ ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਲੁਧਿਆਣਾ ਨੂੰ ਆਪਣਾ ਅਹਿਮ ਪੜਾਅ ਬਣਾਇਆ ਅਤੇ ਇਥੋਂ ਹੀ ਐੱਮ ਐੱਸ ਸੀ, ਪੀ ਐੱਚ ਡੀ ਕਰਕੇ ਰੁਜ਼ਗਾਰ ਲਈ ਵੀ ਇਸ ਸੰਸਥਾ ਨੂੰ ਹੀ ਚੁਣਿਆ। ਹੋਰ ਉਚੇਰੀ ਸਿੱਖਿਆ ਲਈ ਭਾਵੇਂ ਇਹਨਾਂ ਨੂੰ ਕਾਮਨਵੈਲਥ ਪੋਸਟ ਡਾਕਟਰਲ ਫ਼ੈਲੋਸ਼ਿਪ ਦੇ ਸਿਲਸਿਲੇ ਵਿੱਚ ਇੰਗਲੈਂਡ ਵਿੱਚ ਇੱਕ ਸਾਲ ਖੋਜ ਕਰਨ ਦਾ ਮੌਕਾ ਮਿਲਿਆ ਪਰ ਇਹ ਸਾਰਾ ਕੁਝ ਆਤਮਸਾਤ ਕਰਕੇ ਉਨ੍ਹਾਂ ਨੇ ਖ਼ੁਦ ਨੂੰ ਆਪਣੇ ਤੋਂ ਫ਼ਾਸਲੇ ਤੇ ਖਲੋਣ ਦਾ ਢੰਗ ਤਰੀਕਾ ਸਿੱਖ ਲਿਆ। ਆਪਣੇ ਬਚਪਨ, ਜਵਾਨੀ ਅਤੇ ਪੁੱਤਰਾਂ ਦੀ ਪਰਵਰਿਸ਼ ਕਰਦਿਆਂ ਉਸ ਨੂੰ ਜਿਹੜੇ ਸਵਾਲਾਂ ਦੇ ਰੂ-ਬਰੂ ਹੋਣਾ ਪਿਆ, ਇਹ ਪੁਸਤਕ ਉਨ੍ਹਾਂ ਦਾ ਸਵਾਲਾਂ ਦਾ ਉੱਤਰ ਹੈ। ਕੁਦਰਤ ਨੂੰ ਇੱਕ ਖੁੱਲੀ ਕਿਤਾਬ ਵਾਂਗ ਵੇਖਣ ਦੀ ਵਿਧੀ, ਕਾਮਯਾਬੀ ਲਈ ਨਿਰੰਤਰ ਲਗਨਸ਼ੀਲ ਹਿੰਮਤ, ਅਨੁਸ਼ਾਸਨ, ਭਾਈਚਾਰਕ ਸਹਿਚਾਰ, ਵਿਸ਼ਵ ਵਿਚਰਨ ਮੌਕੇ ਬਾਕੀ ਦੇਸ਼ਾਂ ਅਤੇ ਧਰਮਾਂ ਦੇ ਲੋਕਾਂ ਨਾਲ ਵਰਤੋਂ ਵਿਹਾਰ, ਆਪਣੇ ਤੋਂ ਪਾਰ ਜਾ ਕੇ ਦੂਸਰੇ ਦੀਆਂ ਖੁਸ਼ੀਆਂ ਲਈ ਕੁਰਬਾਨੀ ਦੇਣ ਦੀ ਭਾਵਨਾ, ਵਣ ਤਿ੍ਰਣ ਨਾਲ ਵਾਰਤਾਲਾਪ ਰਾਹੀਂ ਉਸ ਨੂੰ ਜੀਵਨ ਜਾਚ ਅਤੇ ਸਭਿਆਚਾਰ ਦਾ ਪਾਲਣਹਾਰਾ ਸਮਝਣ ਦੀ ਲਿਆਕਤ, ਸਮੇਂ ਦੀ ਕਦਰ, ਬੋਲਚਾਲ ਵਿੱਚ ਮਿੱਠਤ, ਆਪਣੇ ਆਪੇ ਨੂੰ ਸਮਝਣ ਦੀ ਜੁਗਤ, ਚੁੱਪ ਦਾ ਸੰਗੀਤ ਨਾਲ ਜੀਵੰਤ ਰਿਸ਼ਤਾ, ਸ਼ੋਰ ਮੁਕਤੀ ਲਈ ਕੋਸ਼ਿਸ਼, ਸਮੇਂ ਦੀ ਸਹੀ ਸਮੇਂ ਵਾਗ ਫੜਨ ਦੀ ਵਿਧੀ, ਨਵੀਂ ਸੋਚ ਦਾ ਤੀਸਰਾ ਨੇਤਰ, ਦੁਨੀਆਂ ਦੇ ਹਰ ਕਿਣਕੇ ਦੀ ਹੋਂਦ ਨੂੰ ਪ੍ਰਵਾਨਗੀ, ਦੂਸਰੇ ਲਈ ਹਰ ਪਲ ਨਿਛਾਵਰ ਕਰਨ ਦੀ ਯਤਨਸ਼ੀਲਤਾ, ਨਜ਼ਰ ਅਤੇ ਨਜ਼ਰੀਏ ਵਿਚਕਾਰ ਫ਼ਾਸਲਾ ਅਤੇ ਅੰਤਰ ਸੰਬੰਧ, ਆਸਾਂ ਦੀ ਵੰਝਲੀ ਦਾ ਵੱਜਦਾ ਸੰਗੀਤ, ਹਰ ਰੋਜ਼ ਨਵੇਂ ਗਿਆਨ ਦੇ ਰੂ-ਬਰੂ ਹੋ ਕੇ ਆਪਣੇ ਆਪ ਨੂੰ ਵਿਕਾਸਮੁਖੀ ਮਾਰਗ ਦਾ ਪਾਂਧੀ ਬਣਾਉਣਾ, ਸਹਿਜ ਸੰਤੋਖ ਅਤੇ ਵਿਗਿਆਨਕ ਵਿਧੀ ਰਾਹੀਂ ਬੂੰਦ-ਬੂੰਦ ਤੋਂ ਗਾਗਰ ਭਰਨ ਦੀ ਜੀਵਨ ਜਾਚ, ਬਚਪਨ ਦੀ ਕੱਚੀ ਮਿੱਟੀ ਨੂੰ ਕਲਾਵੰਤ ਹੱਥਾਂ ਦੀ ਛੋਹ ਦਾ ਵਰਦਾਨ, ਸੱਜਰੀ ਮੁਸਕਾਨ, ਧਰਮ ਦੀ ਅਰਥਵਾਨਤਾ, ਬੁਲੰਦ ਹੌਸਲੇ ਦੀ ਸਰਦਾਰੀ ਵਰਗੇ ਅਨੇਕਾਂ ਵਿਸ਼ੇ ਹਨ ਜੋ ਸਾਡੇ ਮਨ ਦੀ ਮਿੱਟੀ ਵਿੱਚ ਬੀਜ ਦਾ ਕੰਮ ਕਰਦੇ ਉਨ੍ਹਾਂ ਦਾਣਿਆਂ ਵਰਗੇ ਹਨ ਜਿੰਨ੍ਹਾਂ ਦੀ ਹਸਤੀ ਜ਼ਮੀਨ ਬਗੈਰ ਕਿਸੇ ਅਰਥ ਵੀ ਨਹੀਂ ਹੈ। 
ਇਹ ਗੱਲਾਂ ਕੋਈ ਰਾਤੋ ਰਾਤ ਨਾ ਤਾਂ ਸਿੱਖ ਸਕਦਾ ਹੈ ਅਤੇ ਨਾ ਹੀ ਸਿਖਾ ਸਕਦਾ ਹੈ। ਜ਼ਹੀਨ ਮਾਪਿਆਂ ਦੀ ਗੁੜ੍ਹਤੀ ਅਤੇ ਭਾਈਚਾਰੇ ਦੇ ਸੁਜਿੰਦ ਵਿਅਕਤੀਆਂ, ਸੰਸਥਾਵਾਂ ਅਤੇ ਜੀਵਨ ਸਾਥ ਵਿੱਚੋਂ ਹੀ ਇਹ ਲਿਆਕਤ ਉਗਮਦੀ ਅਤੇ ਵਿਗਸਦੀ ਹੈ। ਪਰਿਵਾਰਕ ਤੌਰ ਤੇ ਡਾ: ਜਗਤਾਰ ਸਿੰਘ ਧੀਮਾਨ ਨਾਲ ਵਿਚਰਨ ਕਰਕੇ ਇਹ ਗੱਲ ਮੈਂ ਗਵਾਹੀ ਰੂਪ ਵਿੱਚ ਪੇਸ਼ ਕਰ ਸਕਦਾ ਹਾਂ ਕਿ  ਉਹ ਆਪਣੇ ਮਾਪਿਆਂ, ਅਧਿਆਪਕਾਂ, ਦੁਆਬਾ ਕਾਲਜ ਜਲੰਧਰ, ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਅਤੇ ਹਾਰਟੀਕਲਚਰ ਰਿਸਰਚ ਇੰਟਰਨੈਸ਼ਨਲ ਲਿਟਲਹੈਂਪਟਨ (ਇੰਗਲੈਂਡ) ਦੇ ਅਧਿਆਪਕਾਂ ਅਤੇ ਵਿਗਿਆਨੀਆਂ ਪਾਸੋਂ ਬਹੁਤ ਕੁਝ ਹਾਸਿਲ ਕਰ ਚੁੱਕਾ ਹੈ। ਮਧੂ ਮੱਖੀ ਵਾਂਗ ਇੰਨੇ ਖੂਬਸੂਰਤ ਫੁੱਲਾਂ ਦਾ ਰਸ ਚੂਸ ਕੇ ਹੀ ਰਸਵੰਤੀ ਵਾਰਤਕ ਦਾ ਜਨਮ ਹੁੰਦਾ ਹੈ। ਡਾ: ਧੀਮਾਨ ਸਹਿਜ ਅਤੇ ਸੁਹਜ ਦਾ ਪ੍ਰਤੀਕ ਵਿਅਕਤੀ ਹੈ ਜਿਸ ਨੂੰ ਕਦੇ ਵੀ ਕਿਸੇ ਵੀ ਵਿਸ਼ੇ ਤੇ ਮੈਂ ਭਟਕਦੇ ਨਹੀਂ ਵੇਖਿਆ ਸਗੋਂ ਕੇਂਦਰਬਿੰਦੂ ਤੇ ਅੰਤਰ ਧਿਆਨ ਹੋਏ ਹੀ ਵੇਖਿਆ ਹੈ। 
‘‘ਸਮੁੰਦਰ ਕੰਢੇ ਸਿੱਪੀਆਂ’’ ਵਿਚਲੀਆਂ ਲਿਖਤਾਂ ਇਸ ਗੱਲ ਦਾ ਪ੍ਰਮਾਣ ਹਨ ਕਿ ਇਹ ਕਿਸੇ ਵਿਸ਼ੇਸ਼ ਉਚੇਚ ਦੀ ਰਚਨਾ ਨਹੀਂ ਸਗੋਂ ਉਹ ਵਿਚਾਰ ਹਨ ਜੋ ਜ਼ਿੰਦਗੀ ਵਿੱਚ ਤੁਰੇ ਫਿਰਦਿਆਂ ਉਨ੍ਹਾਂ ਸਿੱਪੀਆਂ ਵਾਂਗ ਸਮੁੰਦਰ ਕੰਢੇ ਆ ਨਿਕਲੀਆਂ ਜਿਹੜੀਆਂ ਰਿੜਕਿਆਂ ਵੀ ਨਹੀਂ ਸਨ ਮਿਲਣੀਆਂ। ਅਸਲ ਵਿੱਚ ਦਿਲ ਦਰਿਆ ਨੂੰ ਸਮੁੰਦਰ ਤੋਂ ਡੂੰਘਾ ਕਹਿਣ ਵਾਲੇ ਸੁਲਤਾਨ ਬਾਹੂ ਨੂੰ ਵੀ ਇਸ ਗੱਲ ਦਾ ਇਲਮ ਸੀ ਕਿ ਇਸ ਦੀ ਥਾਹ ਕੋਈ ਨਹੀਂ ਪਾ ਸਕਦਾ  ਪਰ ਡਾ: ਧੀਮਾਨ ਨੇ ਆਪਣੇ ਦਿਲ ਦੇ ਵਰਕੇ ਸਾਡੇ ਸਾਹਮਣੇ ਪ੍ਰਕਾਸ਼ਮਾਨ ਕਰਕੇ ਇਹ ਸਾਰਾ ਕੁਝ ਸਪਸ਼ਟ ਦੱਸ ਦਿੱਤਾ ਹੈ ਕਿ ਮੇਰੇ ਅੰਦਰ ਕਿਸ ਕਿਸਮ ਦੀ ਜੀਵੰਤ ਰੌਸ਼ਨੀ ਹੈ। 
ਡਾ. ਧੀਮਾਨ ਸਾਹਿਤਕ ਗਤੀਵਿਧੀਆਂ ਵਿੱਚ ਵੀ ਦਿਲਚਸਪੀ ਲੈਂਦੇ ਹਨ। ਉਨ੍ਹਾਂ ਵੱਲੋਂ 20 ਤੋਂ ਵੱਧ ਵਿਗਿਆਨਕ ਅਤੇ ਸਾਹਿਤਕ ਕਿਤਾਬਾਂ ਲਿਖੀਆਂ/ਸੰਪਾਦਤ ਕੀਤੀਆਂ ਗਈਆਂ ਹਨ। ਇਨ੍ਹਾਂ ਤੋਂ ਇਲਾਵਾ ਡਾ. ਧੀਮਾਨ ਨੇ 300 ਦੇ ਕਰੀਬ ਪ੍ਰਕਾਸ਼ਨਾਂਵਾਂ, ਜਿਨ੍ਹਾਂ ਵਿੱਚ 80 ਖੋਜ ਪੱਤਰ, 20 ਰਿਵਿਊ ਅਤੇ 46 ਬੁਲੇਟਿਨ ਸ਼ਾਮਿਲ ਹਨ ਅਤੇ ਉਨ੍ਹਾਂ ਨੇ 10 ਤੋਂ ਵੱਧ ਕਿਤਾਬਾਂ ਦੇ ਚੈਪਟਰ/ਰਿਵਿਊ ਲਿਖੇ ਹਨ। ਡਾ.ਧੀਮਾਨ ਨੇ 16 ਤੋਂ ਜ਼ਿਆਦਾ ਕਿਤਾਬਾਂ ਦਾ ਪੰਜਾਬੀ ਤੋਂ ਅੰਗਰੇਜ਼ੀ ਜਾਂ ਅੰਗਰੇਜ਼ੀ ਤੋਂ ਪੰਜਾਬੀ ਵਿੱਚ ਅਨੁਵਾਦ ਕੀਤਾ ਹੈ। ਇਸ ਤੋਂ ਇਲਾਵਾ ਡਾ. ਧੀਮਾਨ ਕੌਮਾਂਤਰੀ ਰਸਾਲੇ ਜਰਨਲ ਆਫ ਕਰਾਪ ਇੰਪਰੂਵਮੈਂਟ (ਵਿਗਿਆਨਕ) ਅਤੇ ਸਾਂਝ (ਸਾਹਿਤਕ) ਦੇ ਸੰਪਾਦਨ ਕਾਰਜਾਂ ਨਾਲ ਵੀ ਜੁੜੇ ਰਹੇ ਹਨ। ਉਨ੍ਹਾਂ ਨੂੰ ਮਿਲੇ ਮਾਨ-ਸਨਮਾਨਾਂ ਵਿੱਚ ਐਨ ਐਨ ਮੋਹਨ ਮੈਮੋਰੀਅਲ ਐਵਾਰਡ ਕਿਨੂੰ ਦੀ ਤੁੜਾਈ ਉਪਰੰਤ ਸੰਭਾਲ ਬਾਰੇ  ਖੋਜ ਲਈ (2004), ਪੀ ਏ ਯੂ ਟੀਚਰਜ਼ ਐਸੋਸੀਏਸ਼ਨ ਵੱਲੋਂ ‘ਬੈਸਟ ਟੀਚਰ ਐਵਾਰਡ’ (1991), ਮਾਲਵਾ ਸਭਿਆਚਾਰਕ ਮੰਚ ਦੇ ਅਕਾਦਮਿਕ ਵਿੰਗ ਵੱਲੋਂ ਡਾ. ਐਮ ਐਸ ਰੰਧਾਵਾ ਮੈਮੋਰੀਅਲ ਅਵਾਰਡ (2006), ਪ੍ਰੋ. ਮੋਹਨ ਸਿੰਘ ਅਵਾਰਡ, ਅਤੇ ਬਾਬਾ ਬੁੱਲ੍ਹੇ ਸ਼ਾਹ ਅਵਾਰਾਡ ਪ੍ਰਮੁੱਖ ਹਨ। ਸਾਲ 2000 ਤੋਂ ਇਹ ਸਫ਼ਰ ਆਰੰਭ ਕਰਕੇ ਉਹ ਹੁਣ ਤੀਕ ਸਿਰਜਣਾਤਮਕ ਤੇ ਅਨੁਵਾਦਤ ਡੇਢ ਦਰਜਨ ਪੁਸਤਕਾਂ ਪੰਜਾਬੀ ਅਤੇ ਅੰਗਰੇਜ਼ੀ ਸਾਹਿਤ ਦੀ ਝੋਲੀ ਪਾ ਚੁੱਕਾ ਹੈ। 
ਬਨਸਪਤੀ ਰੋਗ ਵਿਗਿਆਨ ਦਾ ਸੀਨੀਅਰ ਪ੍ਰੋਫ਼ੈਸਰ ਹੁੰਦਿਆਂ ਉਸ ਨੇ ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਲੁਧਿਆਣਾ ਦੀ ਖੋਜ ਦਾ ਵੀ ਨਿਰਦੇਸ਼ਨ ਕੀਤਾ ਹੈ। ਚੰਗੀ ਸੰਚਾਰ ਯੋਗਤਾ ਕਾਰਨ ਯੂਨੀਵਰਸਿਟੀ ਦੇ ਗਿਆਨ ਵਿਗਿਆਨ ਨੂੰ ਖੇਤਾਂ ਬੰਨਿਆਂ ਤੀਕ ਪਹੰੁਚਾਉਣ ਲਈ ਸੰਚਾਰ ਕੇਂਦਰ ਦੇ ਮੁਖੀ ਵਜੋਂ ਵੀ ਲੰਮਾਂ ਸਮਾਂ ਜ਼ਿੰਮੇਂਵਾਰੀਆਂ ਨਿਭਾਈਆਂ ਹਨ। ਉਸ ਦਾ ਰੋਲ ਮਾਡਲ ਡਾ: ਮਹਿੰਦਰ ਸਿੰਘ ਰੰਧਾਵਾ ਰਿਹਾ ਹੈ ਜੋ ਖ਼ੁਦ ਬਨਸਪਤੀ ਵਿਗਿਆਨੀ ਸਨ ਪਰ ਉਨ੍ਹਾਂ ਨੇ ਪ੍ਰਸ਼ਾਸ਼ਨਿਕ ਸੇਵਾ ਨਿਭਾਉਣ ਦੇ ਨਾਲ ਨਾਲ ਪੰਜਾਬ ਦੇ ਨਕਸ਼ ਸੰਵਾਰਨ ਵਾਸਤੇ ਵੀ ਹਰ ਪਲ ਨੂੰ ਪੰਜਾਬ ਲਈ ਖ਼ਰਚਿਆ । ਡਾ: ਧੀਮਾਨ ਨੇ ਵਿਗਿਆਨ ਦਾ ਅਧਿਆਪਨ ਅਤੇ ਖੋਜ ਕਰਨ ਦੇ ਨਾਲ-ਨਾਲ ਸਿਰਫ਼ ਪ੍ਰਸ਼ਾਸਨਿਕ ਕਲਗੀਆਂ ਹੀ ਨਹੀਂ ਹਾਸਿਲ ਕੀਤੀਆਂ ਸਗੋਂ ਸਾਹਿਤ ਅਤੇ ਸਭਿਆਚਾਰ ਦੇ ਖੇਤਰ ਵਿੱਚ ਵੀ ਵਡਮੁੱਲੀਆਂ ਮੱਲ੍ਹਾਂ ਮਾਰੀਆਂ ਹਨ। ਆਪ ਨੂੰ ਪ੍ਰੋਫ਼ੈਸਰ ਮੋਹਨ ਸਿੰਘ ਮੈਮੋਰੀਅਲ ਫਾਉਂਡੇਸ਼ਨ ਵੱਲੋਂ 20 ਅਕਤੂਬਰ, 2016 ਨੂੰ ਪ੍ਰੋਫੈਸਰ ਮੋਹਨ ਸਿੰਘ ਯਾਦਗਾਰੀ ਪੁਰਸਕਾਰ ਨਾਲ ਸਨਮਾਨਿਤ ਕੀਤਾ ਗਿਆ। 
ਇਕ ਵਿਗਿਆਨੀ ਹੋਣ ਦੇ ਨਾਲੋਂ ਨਾਲ ਉਹ ਸਾਹਿਤਕ ਰੁਚੀਆਂ ਵੀ ਰੱਖਦੇ ਹਨ। ਅੰਗਰੇਜ਼ੀ ਅਤੇ ਪੰਜਾਬੀ ਭਾਸ਼ਾ ਉੱਤੇ ਉਨ੍ਹਾਂ ਦੀ ਪੂਰੀ ਪਕੜ ਹੈ । ਜਿਥੇ ਉਹ ਫ਼ਸਲਾਂ ਨੂੰ ਰੋਗਾਂ ਤੋਂ ਬਚਾਉਣ ਲਈ ਢੰਗ ਤਰੀਕੇ ਲਭਦੇ ਹਨ ਉਥੇ ਨਰੋਏ ਸਮਾਜ ਦੀ ਸਿਰਜਣਾ ਵਿੱਚ ਵੀ ਆਪਣੀਆਂ ਲਿਖਤਾਂ ਰਾਹੀਂ ਅਹਿਮ ਯੋਗਦਾਨ ਪਾ ਰਹੇ ਹਨ। ਮੈਨੂੰ ਇਸ ਗੱਲ ਦਾ ਸੁਭਾਗ ਹਾਸਲ ਹੈ ਕਿ ਮੇਰੀ ਭਰੂਣ ਹੱਤਿਆ ਖ਼ਿਲਾਫ ਰਚਨਾ ‘ਲੋਰੀ’ ਨੂੰ ਅੰਗਰੇਜ਼ੀ ’ਚ ਅਨੁਵਾਦ ਕਰਕੇ ਵਿਸ਼ਵ ਭਰ ’ਚ ਮਕਬੂਲ ਬਣਾਇਆ। ਇਹ ਉਸਦਾ ਪਹਿਲਾ ਸਾਹਿੱਤਕ ਯਤਨ ਸੀ। ਇਸ ਤੋਂ ਬਾਅਦ ਨਿਰੰਤਰ ਕਰਮਸ਼ੀਲ ਸਿਰਜਕ ਡਾ. ਜਗਤਾਰ ਸਿੰਘ ਧੀਮਾਨ ਨੇ ਵਿਗਿਆਨਕ ਜਥੇਬੰਦੀਆਂ ਵਿੱਚ ਕਰਮਸ਼ੀਲ ਰਹਿਣ ਦੇ ਨਾਲ ਨਾਲ ਪੰਜਾਬੀ ਸਾਹਿੱਤ ਅਕਾਡਮੀ ਦੇ ਜੀਵਨ ਮੈਂਬਰ ਬਣ ਕੇ ਪੰਜਾਬੀ ਸਾਹਿੱਤ ਜਗਤ ਵਿੱਚ ਨਿਵੇਕਲੀਆਂ ਪੈੜਾਂ ਕੀਤੀਆਂ ਹਨ। ਹੁਣ ਸੇਵਾ ਮੁਕਤੀ ਤੋਂ ਬਾਅਦ ਕੁਲਵਕਤੀ ਬਣ ਕੇ ਉਹ ਹੋਰ ਵਧੇਰੇ ਸਿਰਜਣਾਤਮਕ ਜੰੁਮੇਵਾਰੀਆਂ ਨਿਭਾਅ ਸਕੇਗਾ। 
ਡਾ: ਜਗਤਾਰ ਸਿੰਘ ਧੀਮਾਨ ਨੇ ਪੰਜਾਬ  ਖੇਤੀਬਾੜੀ ਯੂਨੀਵਰਸਿਟੀ ਵਿੱਚ 35 ਸਾਲ ਲਗਾਤਾਰ ਪੜ੍ਹਾਇਆ ਅਤੇ ਖੋਜਕਾਰਜ ਕੀਤਾ ਹੈ। ਇਹ ਸਮਾਂਕਾਲ ਸਿਰਫ ਉਸ ਲਈ ਹੀ ਨਹੀਂ ਸਗੋਂ ਯੂਨੀਵਰਸਿਟੀ ਦੇ ਇਤਿਹਾਸ ਲਈ ਵੀ ਮਹੱਤਵਪੂਰਨ ਰਿਹਾ ਹੈ। 31 ਦਸੰਬਰ ਨੂੰ ਸੇਵਾ ਮੁਕਤੀ ਮੌਕੇ  ਉਸ ਦੀ ਇਹੀ ਰੀਝ ਹੈ ਕਿ ਮੈਂ ਆਖ਼ਰੀ ਸਵਾਸਾਂ ਤੀਕ ਗਿਆਨ ਵਿਗਿਆਨ ਰਾਹੀਂ ਪੰਜਾਬ ਦੇ ਨਕਸ਼ ਸੰਵਾਰਨ ਅਤੇ ਨਿਖਾਰਨ ਲਈ ਕਰਮਸ਼ੀਲ ਰਹਾਂ। ਜਿਵੇਂ ਪ੍ਰੋਫ਼ੈਸਰ ਮੋਹਨ ਸਿੰਘ ਜੀ ਨੇ ਲਿਖਿਆ ਸੀ 

ਕੋਈ ਲੱਭ ਸਿਰਾ ਨਾ ਸਕਿਆ ਜ਼ਿੰਦਗੀ ਦੇ ਰਾਹਵਾਂ ਦਾ। 
ਹਰ   ਪੜਾਅ  ਸੁਨੇਹਾ ਹੈ, ਅਗਲਿਆਂ  ਪੜਾਵਾਂ  ਦਾ। 

ਡਾ: ਜਗਤਾਰ ਸਿੰਘ ਧੀਮਾਨ ਨੇ ਬੀਤੇ ਨੂੰ ਜਾਣਿਆ ਹੈ, ਵਰਤਮਾਨ ਨੂੰ ਪਛਾਣਿਆ ਹੈ ਅਤੇ ਭਵਿੱਖ ਉਸ ਨੂੰ ਉਡੀਕ ਰਿਹਾ ਹੈ। ਬੰਧਨ ਮੁਕਤ ਜੀਵਨ ਜੁਗਤ ਦਾ ਆਨੰਦ ਉਸਦੇ ਸਹਿਜ ਅਤੇ ਸੁਹਜ ਵਿੱਚ ਹੋਰ ਵਾਧਾ ਕਰੇਗਾ। ਇਹ ਲਿਖਤ ਅਜੇ ਸਿਰਫ਼ ਭਵਿੱਖ ਨਾਲ ਇਕਰਾਰਨਾਮਾ ਹੈ, ਅਸਲ ਸਿਰਜਣਾ ਅਜੇ ਕਰਨੀ ਹੈ।
*ਪ੍ਰੋ: ਗੁਰਭਜਨ ਸਿੰਘ ਗਿੱਲ ਪੰਜਾਬੀ ਸਾਹਿਤ ਅਕਾਡਮੀ, ਲੁਧਿਆਣਾ ਦੇ ਸਾਬਕਾ ਪ੍ਰਧਾਨ ਹਨ ਅਤੇ ਸਾਹਿਤਿਕ ਖੇਤਰ ਵਿੱਚ ਆਧੁਨਿਕ ਤਕਨੌਲਿਜੀ ਦੇ ਨਾਲ ਲਗਾਤਾਰ ਸਰਗਰਮ ਹਨ।