ਏਜੀਆਈ-ਗੈਸਟ੍ਰੋਸੀਟੀ 'ਤੇ ਐਡਵਾਂਸਡ ਐਡੋਸਕੋਪੀ ਵਰਕਸ਼ਾਪ ਦਾ ਆਯੋਜਨ

Friday 3rd December 2021 at 03:53 PM

ਇੱਕ ਦਿਨ ਦੀ ਲਾਈਵ ਵਰਕਸ਼ਾਪ 'ਚ ਦੂਰੋਂ ਦੂਰੋਂ ਪੁੱਜੇ ਮਾਹਰ ਡਾਕਟਰ 

ਲੁਧਿਆਣਾ: 3 ਦਸੰਬਰ 2021: (ਕਾਰਤਿਕਾ ਸਿੰਘ//ਪੰਜਾਬ ਸਕਰੀਨ)::

ਪੇਟ ਦੀਆਂ ਵੱਧ ਰਹੀਆਂ ਸਮਸਿਆਵਾਂ ਅਤੇ ਹੋਰ ਸਬੰਧਤ ਬਿਮਾਰੀਆਂ ਕਾਰਨ ਸਥਿਤੀ ਗੰਭੀਰ ਹੁੰਦੀ ਜਾ ਰਹੀ ਹੈ। ਮਰੀਜ਼ਾਂ ਦੀ ਗਿਣਤੀ ਵੀ ਲਗਾਤਾਰ ਵੱਧ ਰਹੀ ਹੈ ਅਤੇ ਇਹਨਾਂ ਬਿਮਾਰੀਆਂ ਦੀਆਂ ਗੁੰਝਲਾਂ ਵੀ ਵੱਧ ਰਹੀਆਂ ਹਨ। ਐਡਵਾਂਸਡ ਗੈਸਟ੍ਰੋਐਂਟਰੌਲੋਜੀ ਇੰਸਟੀਚਿਊਟ (ਏ.ਜੀ.ਆਈ) - ਗੈਸਟਰੋਸੀਟੀ, ਲੁਧਿਆਣਾ ਨੇ ਐਡਵਾਂਸਡ ਜੀ ਆਈ ਐਡੋਸਕੋਪੀ ਅਤੇ ਟੈਕਨੀਸ਼ੀਅਨ ਸਿਖਲਾਈ ਪ੍ਰੋਗਰਾਮ 'ਤੇ ਇੱਕ ਦਿਨ ਦੀ ਲਾਈਵ ਵਰਕਸ਼ਾਪ ਦਾ ਆਯੋਜਨ ਕੀਤਾ। ਇਸ ਵਰਕਸ਼ਾਪ ਵਿੱਚ ਬਹੁਤ ਸਾਰੇ ਸਬੰਧਤ ਮੁੱਦਿਆਂ ਤੇ ਗੱਲਬਾਤ ਹੋਈ ਜਿਸਦਾ ਲਾਹਾ ਤਕਨੀਕੀ ਸਟਾਫ ਨੇ ਭੀ ਲਿਆ ਅਤੇ ਡਾਕਟਰਾਂ ਨੇ ਵੀ। ਇਹਨਾਂ ਸਾਰੀਆਂ ਦੇ ਤਾਲਮੇਲ ਦਾ ਫਾਇਦਾ ਇਲਾਕੇ ਦੇ ਮਰੀਜ਼ਾਂ ਨੂੰ ਵੀ ਨਿਸਚੇ ਹੀ ਪੁੱਜੇਗਾ। 

ਇਸ ਵਰਕਸ਼ਾਪ ਵਿੱਚ ਪੂਰੇ ਪੰਜਾਬ, ਹਿਮਾਚਲ ਪ੍ਰਦੇਸ਼ ਅਤੇ ਉੱਤਰਾਖੰਡ ਦੇ ਉੱਘੇ ਮਾਹਰ ਡਾਕਟਰ ਆਏ। ਇਹਨਾਂ ਵਿੱਚ ਗੈਸਟ੍ਰੋਐਂਟਰੌਲੋਜਿਸਟ ਉਚੇਚੇ ਤੌਰ ਤੇ ਸ਼ਾਮਲ ਰਹੇ ਜਿਹੜੇ ਪੇਟ ਦੇ ਮਾਹਿਰ ਡਾਕਟਰ ਹੁੰਦੇ ਹਨ। ਇਹਨਾਂ ਡਾਕਟਰਾਂ ਨੇ ਆਪਣੀ ਜਾਣਕਾਰੀ ਅਤੇ ਤਜਰਬਿਆਂ ਨੂੰ ਇਥੇ ਸਭਨਾਂ ਨਾਲ ਸਾਂਝਿਆਂ  ਕੀਤਾ। ਇਹਨਾਂ ਤਜਰਬਿਆਂ ਨਾਲ ਹੀ ਖੁੱਲ ਰਹੀਆਂ ਸਨ ਇਸ ਵਿਸ਼ੇ ਨਾਲ ਸਬੰਧਤ ਗੁੰਝਲਾਂ। 

ਈਵੈਂਟ ਏ.ਜੀ.ਆਈ ਲਾਈਵ 2021 ਵਿੱਚ ਐਡਵਾਂਸਡ ਗੈਸਟਰੋ ਐਡੋਸਕੋਪੀ ਪ੍ਰਕਿਰਿਆਵਾਂ ਦਾ ਲਾਈਵ ਪ੍ਰਦਰਸ਼ਨ ਅਤੇ ਬੁਨਿਆਦੀ ਅਤੇ ਐਡਵਾਂਸਡ ਨਵੀਆਂ ਪ੍ਰਕਿਰਿਆਵਾਂ ਵਿੱਚ ਤਕਨੀਕਾਂ ਅਤੇ ਵਿਵਾਦਾਂ 'ਤੇ ਵੀਡੀਓ ਗੱਲਬਾਤ ਅਤੇ ਪੈਨਲ ਚਰਚਾ ਸ਼ਾਮਲ ਸੀ। ਲਾਈਵ ਸੈਸ਼ਨ ਵਿੱਚ ਖਾਣੇ ਦੀ ਨਾਲੀ ਦੀ ਬਿਮਾਰੀ ਐਕਲੇਸ਼ੀਆ ਕਾਰਡੀਆ ਲਈ POEM ਦੇ ਕੇਸ, ਵੱਡੇ ਗੁੰਝਲਦਾਰ ਪਿੱਤੇ ਦੀ ਨਾਲੀ ਦੀ ਪੱਥਰੀ ਲਈ ਸਪਾਈਗਲਾਸ ਕੋਲੌਂਜੀਓਸਕੋਪੀ, ਲੂਮੈਨ ਐਪੋਸਿੰਗ ਮੈਟਲ ਸਟੈਂਟ (HOT AXICS) ਦੀ ਨਵੀ ਕਾਢ ਦੀ ਵਰਤੋਂ ਕਰਦੇ ਹੋਏ ਸੂਡੋਮਿਸਟ ਦੀ ਐਡੋਸਕੋਪੀ ਅਲਟਰਾਸਾਊਂਡ ਡਰੇਨੇਜ,ਐਡੋਸਕੋਪੀ ਅਲਟਰਾਸਾਉਂਡ ਗਾਈਡਿਡ ਵੈਰੀਸੀਅਲ ਕੁਆਇਲ ਇਮਥੇਲਾਈਜ਼ੇਸ਼ਨ ਅਤੇ ਗੈਸਟ੍ਰਿਕ ਰਾਈਡ ਐਡੋਸਕੋਪੀ ਅਲਟਰਾਸਾਊਂਡ ਦੁਆਰਾ ਲਿੰਫ ਨੋਡਸ ਅਤੇ ਪੈਨਕ੍ਰੀਅਸ ਤੋਂ ਟਿਸ਼ੂ ਦੀ ਬਿਓਪਸੀ ਦੀ ਤਕਨੀਕ ਦਾ ਪ੍ਰਦਰਸ਼ਨ ਕੀਤਾ ਗਿਆ। 

ਇਸ ਸਮਾਗਮ ਦੀ ਖਾਸ ਗੱਲ ਇਹ ਰਹੀ ਕਿ ਪੰਜਾਬ ਵਿੱਚ ਪਹਿਲੀ ਵਾਰ ਇੱਕ ਨਵੀਂ ਤਕਨੀਕ ਦਾ ਪ੍ਰਦਰਸ਼ਨ ਸੀ ਜਿਸਨੂੰ ਐਂਡੋਬਿਲਰੀ ਆਰ ਐਫ ਏ (ਰੇਡੀਓਵੀਕੁਐਂਸੀ ਐਬਲੇਸ਼ਨ) ਕਿਹਾ ਜਾਂਦਾ ਹੈ ਜਿਸਦੇ ਨਾਲ ਪਿੱਤੇ ਦੇ ਨਾਲੀ ਦਾ ਟਿਊਮਰ ਦਾ ਇਲਾਜ ਕੀਤਾ ਗਿਆ । ਸੰਖੇਪ ਵਿੱਚ, ਇਸ ਵਿਲੱਖਣ ਵਰਕਸ਼ਾਪ ਨੇ ਪੂਰੇ ਖੇਤਰ ਵਿੱਚ ਗੈਸਟਰੋ ਭਾਈਚਾਰੇ ਨੂੰ ਉੱਨਤ ਅਤੇ ਨਵੀਨਤਮ ਐਡੋਸਕੋਪਿਕ ਤਕਨੀਕਾਂ ਦੇ ਵਿਆਪਕ ਦ੍ਰਿਸ਼ਟਾਂਤ ਨੂੰ ਯਕੀਨੀ ਬਣਾਇਆ ਅਤੇ ਸਾਰਿਆਂ ਦੁਆਰਾ ਵਿਆਪਕ ਤੌਰ 'ਤੇ ਪ੍ਰਸ਼ੰਸਾ ਕੀਤੀ ਗਈ।

ਤ੍ਰਾਸਦੀ: ਜਨਮ ਵੇਲੇ ਹੀ ਬੱਚੀ ਦੀਆਂ ਅੰਤੜੀਆਂ ਪੇਟ ਤੋਂ ਬਾਹਰ ਸਨ

ਸੀਐਮਸੀ ਨੇ ਦਿੱਤਾ ਨਵਾਂ ਜਨਮ-ਪਿਤਾ ਤਾਂ ਛੱਡ ਕੇ ਹੀ ਦੌੜ ਗਿਆ ਸੀ 

ਲੁਧਿਆਣਾ: 20 ਅਗਸਤ 2021: (ਕਾਰਤਿਕਾ ਸਿੰਘ//ਪੰਜਾਬ ਸਕਰੀਨ)::

ਕਹਿੰਦੇ ਨੇ ਡਾਕਟਰ ਭਗਵਾਨ ਹੁੰਦਾ ਹੈ। ਰੱਬ ਦਾ ਦੂਜਾ ਨਾਮ ਹੁੰਦਾ ਹੈ ਡਾਕਟਰ। ਇਸ ਗੱਲ ਨੂੰ ਇੱਕ ਵਾਰ ਫੇਰ ਸਾਬਿਤ ਕੀਤਾ ਹੈ ਸੀਐਮਸੀ ਹਸਪਤਾਲ ਲੁਧਿਆਣਾ ਦੇ ਡਾਕਟਰਾਂ ਦੀ ਟੀਮ ਨੇ ਆਪਣੇ ਇੱਕ ਨਵੇਂ ਕ੍ਰਿਸ਼ਮੇ ਨਾਲ। 

ਮਾਮਲਾ ਇੱਕ ਅਜਿਹੀ ਬਿਮਾਰੀ ਦਾ ਹੈ ਜਿਸ ਨੂੰ ਗੈਸਟਰੋਸਿਸ ਕਿਹਾ ਜਾਂਦਾ ਹੈ। ਇਸ ਬਿਮਾਰੀ ਦਾ ਸ਼ਿਕਾਰ ਹੋਣ ਵਾਲੇ ਬੱਚੇ ਦੀਆਂ ਅੰਤੜੀਆਂ ਪੇਟ ਤੋਂ ਬਾਹਰ ਆ ਜਾਂਦੀਆਂ ਹਨ। ਇਹ  ਨੁਕਸ ਜਨਮ ਸਮੇਂ ਤੇ ਵੀ ਹੋ ਸਕਦਾ ਹੈ। ਆਮ ਤੌਰ ਤੇ ਹੁੰਦਾ ਵੀ ਜਨਮ ਸਮੇਂ ਤੇ ਹੀ ਹੈ। ਬਿਮਾਰੀ ਬੇਹੱਦ ਖਤਰਨਾਕ ਹੈ। ਜੇ ਹੋ ਜਾਏ ਤਾਂ ਬਚਣਾ ਬਿਲਕੁਲ ਹੀ ਮੁਸ਼ਕਿਲ। ਬਲਕਿ ਇਹ ਕਹਿ ਲਵੋ ਕਿ ਨਾਮੁਮਕਿਨ ਵਰਗਾ ਮਾਮਲਾ। 

ਇਸ ਖੌਫਨਾਕ ਦ੍ਰਿਸ਼ ਨੂੰ ਦੇਖਣਾ ਵੀ ਹਰ ਕਿਸੇ ਦੇ ਵੱਸ ਦੀ ਗੱਲ ਨਹੀਂ ਹੁੰਦੀ। ਕਮਜ਼ੋਰ ਦਿਲ ਵਾਲੇ ਨਿੱਕੇ ਜਿਹੇ ਮਰੀਜ਼ ਬੱਚੇ ਨੂੰ ਦੇਖ ਕੇ ਹੀ ਲੋਕ ਦਹਿਲ ਜਾਂਦੇ ਹਨ। ਲੋਕਾਂ ਨੇ ਮੀਟ ਮੰਡੀ ਵਿੱਚ ਕੱਟੇ ਵੱਢੇ ਜਾਂਦੇ ਜਾਨਵਰਾਂ ਦੀਆਂ ਅੰਤੜੀਆਂ ਤਾਂ ਅਕਸਰ ਪੇਟ ਤੋਂ ਬਾਹਰ ਤੜਫਦੀਆਂ ਦੇਖੀਆਂ ਹੋਣਗੀਆਂ ਪਰ ਇੱਕ ਇਨਸਾਨੀ ਬੱਚੇ ਨਾਲ ਇਹੋ ਜਿਹਾ ਦ੍ਰਿਸ਼ ਨਜ਼ਰ ਆਵੇ ਤਾਂ ਅਜਿਹਾ ਸੋਚ ਕੇ ਵੀ ਡਰ ਲੱਗਦਾ ਹੈ। 

ਇਸ ਬੱਚੀ ਨੂੰ ਦੇਖ ਕੇ ਇਸਦਾ ਪਿਤਾ ਵੀ ਛੱਡ ਕੇ ਦੌੜ ਗਿਆ ਸੀ। ਨਿਜੀ ਹਸਪਤਾਲ ਦੇ ਡਾਕਟਰਾਂ, ਸਟਾਫ ਅਤੇ ਨਰਸਾਂ ਨੇ ਵੀ ਕੋਈ ਕੇਅਰ ਨਾ ਕੀਤੀ। ਅਸਲ ਵਿਚ ਉਹ ਵੀ ਇਹ ਸਭ ਦੇਖ ਕੇ ਘਬਰਾ ਗਏ ਸਨ। ਉਹਨਾਂ ਅਜਿਹੀ ਡਲਿਵਰੀ ਪਹਿਲਾਂ ਕਦੇ ਨਹੀਂ ਸੀ ਦੇਖੀ। 

ਜਦੋਂ ਇਹ ਬੱਚੀ ਸੀਐਮਸੀ ਵਿੱਚ ਲਿਆਂਦੀ ਗਈ ਉਦੋਂ ਇਹ ਸਿਰਫ ਇੱਕ ਦਿਨ ਦੀ। ਇਸਦੀ ਮਾਨ ਨੇ ਇਸਦਾ ਸਾਥ ਨਹੀਂ ਛੱਡਿਆ। ਆਰਤੀ ਨਾਮ ਦੀ ਉਸ ਔਰਤ ਦਾ ਇਹ ਪਪਹਿਲਾ ਬੱਚਾ ਸੀ। ਇਹ ਪਰਿਵਾਰ ਕਾਫੀ ਦੇਰ ਤੋਂ ਪੰਜਾਬ ਵਿੱਚ ਹੈ ਅਤੇ ਅੱਜਕਲ੍ਹ ਫੀਲਡਗੰਜ ਅਤੇ ਇਸਲਾਮਗੰਜ ਦਰਮਿਆਨ ਪੈਂਦੇ ਅਮਰਪੁਰਾ ਵਿਚ ਹੀ ਰਹਿੰਦਾ ਹੈ।

 

ਸੀਐਮ ਸੀ ਹਸਪਤਾਲ ਵਾਲਿਆਂ ਕੋਲ ਜਿਹੜਾ ਇਹ ਕੇਸ ਆਇਆ ਉਹ ਅਸਲ ਵਿੱਚ ਬਾਹਰ ਕਿਸੇ ਨਿਜੀ ਹਸਪਤਾਲ ਵਿਚ ਹੋਏ ਜਨਮ ਦਾ ਸੀ। ਡਲਿਵਰੀ ਹੋ ਗਈ ਪਰਿਵਾਰ ਕੋਲ ਪੈਸੇ ਵੀ ਮੁੱਕ ਗਏ।  ਖਰਾਬ ਕਿ ਬਚਣ ਦੀਆਂ ਕੋਈ ਸੰਭਾਵਨਾਵਾਂ ਨਹੀਂ ਸਨ। ਉਸ ਹਸਪਤਾਲ ਵਾਲਿਆਂ ਨੇ ਵੀ ਬੜੀ ਹੀ ਬੇਰਹਿਮੀ ਨਾਲ ਪਰਿਵਾਰ ਨੂੰ ਘਰ ਭੇਜ ਦਿੱਤਾ ਸੀ। ਵੀ ਪੈਸੇ ਬਿਨਾ ਇਲਾਜ ਕਿੰਝ ਕਰਦੇ! ਪਰ ਫਿਰ ਵੀ ਚੰਗੇ ਭਾਗਾਂ ਨੂੰ ਪਰਿਵਾਰ ਦੇ ਲੋਕ ਕਿਸੇ ਨ ਕਿਸੇ ਦੇ ਕਹਿਣ ਤੇ ਇਸ ਬੱਚੀ ਅਤੇ ਇਸਦੀ ਮਾਂ ਨੂੰ ਸੀਐਮਸੀ ਹਸਪਤਾਲ ਵਿੱਚ ਲੈ ਆਏ। ਇਸ ਬੱਚੀ ਦੇ ਠੀਕ ਹੋ ਜਾਣ ਦੀ ਸਭ ਤੋਂ ਵੱਧ ਉਮੀਦ ਇਸ ਬੱਚੀ ਦੀ ਮਾਂ ਆਰਤੀ ਨੂੰ ਸੀ। ਉਸਦਾ ਪਹਿਲਾ ਬੱਚਾ ਸੀ ਇਹ ਵਿਆਹ ਤੋਂ ਬਾਅਦ। ਉਹ ਸੋਚਦੀ ਸੀ ਪੰਜਾਬ ਦੇ ਲੋਕ ਵੱਡੇ ਦਿਲ ਵਾਲੇ ਹੁੰਦੇ ਨੇ ਮੇਰੀ ਬੱਚੀ ਨੂੰ ਕੁਝ ਨਹੀਂ ਹੋਣ ਦੇਣਗੇ।  

ਸੀਐਮਸੀ ਦੇ ਡਾਕਟਰਾਂ ਦੀ ਟੀਮ ਨੇ ਇਸ ਨਿੱਕੀ ਜਿਹੀ ਬੱਚੀ ਨੂੰ 20 ਦਿਨਾਂ ਤੱਕ ਆਈਸੀਯੂ ਵਿੱਚ ਰੱਖਿਆ ਗਿਆ। ਇਲਾਜ ਦੌਰਾਨ ਹੋਲੀ ਹੋਲੀ ਇਸ ਬੱਚੀ ਦੀਆਂ ਆਂਤਾਂ ਨੂੰ ਪੇਟ ਦੇ ਅੰਦਰ ਕੀਤਾ ਗਿਆ। ਇੱਕ ਅਜਿਹਾ ਕੰਬਮ ਸੀ ਜਿਹੜਾ ਨਾਮੁਮਕਿਨ ਜਾਪਦਾ ਸੀ। ਕੁਦਰਤ ਦੀ ਕਰੋਪੀ ਕਹੋ ਜਾਂ ਬਿਮਾਰੀ ਦਾ ਕਹਿਰ ਮਾਮਲਾ ਬੜਾ ਹੀ ਨਾਉਮੀਦ ਕਰਨ ਵਾਲਾ ਅਤੇ ਨਿਰਾਸ਼ਾਜਨਕ ਸੀ। ਇਸ ਸਭ ਕੁਝ ਦੇ ਬਾਵਜੂਦ ਇਸ ਬੱਚੀ ਨੂੰ ਇੱਕ ਵਾਰ ਫਿਰ ਤੋਂ ਨਾਰਮਲ ਬੱਚੀ ਬਣਾਇਆ ਗਿਆ ਇਸੇ ਸੀਐਮਸੀ ਵਿੱਚ ਸਿਰਫ ਡਾਕਟਰੀ ਵਿਗਿਆਨ ਦੇ ਸਹਾਰੇ। ਬਿਨਾ ਕਿਸੇ ਡੇਰੇ ਤੋਂ। ਬਿਨਾ ਕਿਸੇ ਰੱਬ ਤੋਂ। ਬਿਨਾਕ ਕਿਸੇ ਮੰਤਰ ਤੰਤਰ ਤੋਂ।  

ਉੱਪਰੋਂ ਇਸ ਬੱਚੀ ਦੇ ਮਾਪੇ ਬੇਹੱਦ ਗਰੀਬ ਸਨ। ਬੁਰੀ ਤਰ੍ਹਾਂ ਨਿਰਾਸ ਹੋਏ ਹੋਏ ਸਨ। ਉਹਨਾਂ ਕੋਲ ਕੋਈ ਪੈਸੇ ਵੀ ਨਹੀਂ ਸੀ। ਇਸ  ਮੁਲਕ ਵਿੱਚ ਇਨਸਾਨ ਬਿਮਾਰ ਹੋ ਜਾਈ ਅਤੇ ਉਸ ਕੋਲ ਕੋਈ ਪੈਸੇ ਨਾ ਹੋਵੇ ਤਾਂ ਉਸ ਲਈ ਇਹ ਬਹੁਤ ਹੀ ਵੱਡਾ ਗੁਨਾਹ ਵਰਗਾ ਹੈ। ਰਿਸ਼ਤੇਦਾਰ, ਵਾਕਿਫ, ਸਲਾਹਾਂ ਦੇਣ ਵਾਲੇ ਸਭ ਦੌੜ ਜਾਂਦੇ ਹਨ। ਖੂਨ ਦੀ ਇੱਕ ਬੋਤਲ ਕੋਈ ਨਹੀਂ ਦੇਂਦਾ ਲੱਖਾਂ ਨ ਰੁਪਏ ਤਾਂ ਬਹੁਤ ਹੀ ਦੂਰ ਦੀ ਗੱਲ ਹੈ। 

ਸੀਐਮਸੀ ਵਾਲਿਆਂ ਨੇ ਇਸ ਬੱਚੀ ਦਾ ਇਲਾਜ ਬਿਲਕੁਲ ਮੁਫ਼ਤ ਕੀਤਾ। ਅੱਜ ਦੇ ਕਾਰੋਬਾਰੀ ਜ਼ਮਾਨੇ ਵਿੱਚ ਇਹ ਕਿਸੇ
ਚਮਤਕਾਰ ਤੋਂ ਘੱਟ ਨਹੀਂ। ਸੀਐਮਸੀ ਹਸਪਤਾਲ ਵਿੱਚ ਬੱਚਿਆਂ ਦਾ ਇਹ ਵਿਭਾਗ ਸੰਨ 1972 ਤੋਂ ਇਸੇ ਤਰ੍ਹਾਂ ਦੇ ਗੰਭੀਰ ਕੇਸਾਂ ਨੂੰ ਹੱਲ ਕਰਦਾ ਆ ਰਿਹਾ ਹੈ। ਨਿੱਕੀ ਨਿੱਕੀ ਉਮਰ ਦੇ ਬੱਚਿਆਂ ਦੀਆਂ ਨਿੱਕੀਆਂ ਨਿੱਕੀਆਂ ਸਰਜਰੀਆਂ ਇਥੇ ਬੜੀ ਸਫਲਤਾ ਨਾਲ ਕੀਤੀਆਂ ਗਈਆਂ ਹਨ ਜੋ ਕਿ ਅਸਲ ਵਿੱਚ ਬੜੀਆਂ ਹੀ ਪੇਚੀਦਾ ਕਿਸਮ ਦੀਆਂ ਗੁੰਝਲਾਂ ਵਾਲੀਆਂ ਹੁੰਦੀਆਂ ਹਨ। 

ਇਸ ਮਕਸਦ ਲਈ ਇਸ ਹਸਪਤਾਲ ਕੋਲ ਬਹੁਤ ਸਾਰੀਆਂ ਤਕਨੀਕੀ ਸਹੂਲਤਾਂ ਮੌਜੂਦ ਹਨ। ਸੀਐਮਸੀ ਦੇ ਡਾਕਟਰਾਂ ਨੇ ਬਾਰ ਬਾਰ ਇਹ ਸਾਬਿਤ ਕੀਤਾ ਹੈ ਕਿ ਤੁਹਾਡੇ ਕਰਮ ਹੀ ਚੰਗੇ ਫਲ ਦੇਂਦੇ ਹਨ ਨਾ ਕਿ ਸਾਧਾਂ ਦੇ ਅੰਧਵਿਸ਼ਵਾਸੀ ਡੇਰੇ। ਇਹ ਪੰਜਾਬ ਦਾ ਇਕਲੌਤਾ ਹਸਪਤਾਲ ਹੈ ਜਿਹੜਾ ਬੱਚਿਆਂ ਦੀ ਸਰਜਰੀ ਵਿੱਚ ਐਮ ਸੀ ਐਚ ਪ੍ਰੋਗਰਾਮ ਨੂੰ ਸਫਲਤਾ ਪੂਰਬਕ ਚਲਾ ਰਿਹਾ ਹੈ। 

ਜੇ ਤੁਹਾਨੂੰ ਇਹ ਖਬਰ ਚੰਗੀ ਲੱਗੀ ਹੈ ਤਾਂ ਸਿਹਤ ਦੀਆਂ ਅਜਿਹੀਆਂ ਸੰਸਥਾਵਾਂ ਨੂੰ ਮਜ਼ਬੂਤ ਬਣਾਓ। ਆਪਣਾ ਦਾਨ ਧਾਰਮਿਕ ਅਦਾਰਿਆਂ ਨੂੰ ਨਹੀਂ ਸਿਹਤ ਅਤੇ ਵਿਦਿਅਕ ਅਦਾਰਿਆਂ ਨੂੰ ਦਿਓ। ਇਸ ਬੱਚੀ ਦੇ ਇਸ ਇਲਾਜ ਤੇ ਤਿੰਨ ਲੱਖ ਰੁਪਏ ਤੋਂ ਵੱਧ ਦਾ ਖਰਚਾ ਆਇਆ ਹੈ। ਤੁਸੀਂ ਜੇ ਚਾਹੋ ਤਾਂ ਸੀਐਮਸੀ ਦੇ ਫ਼ੰਡ ਵਿਚ ਡੋਨੇਸ਼ਨ ਦੇ ਸਕਦੇ ਹੋ। ਸਰਕਾਰਾਂ ਨੂੰ ਮਜਬੂਰ ਕਰ ਸਕਦੇ ਹੋ ਕਿ ਹਰ ਕਿਸੇ ਦੇ ਲਈ ਇਲਾਜ ਜ਼ਰੂਰੀ ਹੋ। ਇਸ ਵਾਰ ਦੀਆਂ ਚੋਣਾਂ ਵਿੱਚ ਯਾਦ ਵੀ ਰੱਖਿਓ। ਹਰ ਵਾਰ ਸੀਐਮਸੀ ਵੀ ਸਾਰਾ ਖਰਚਾ ਭਰ ਸਕੇ ਕੋਈ ਜ਼ਰੂਰੀ ਤਾਂ ਨਹੀਂ ਨ? ਆਓ ਸੀਐਮਸੀ ਹਸਪਤਾਲ ਦੇ ਫ਼ੰਡ ਨੂੰ ਕਿਸੇ ਵੀ ਹੀਲੇ ਘਟਣ ਨਾ ਦੇਈਏ। ਇਸ ਖਜ਼ਾਨੇ ਨੂੰ ਹਰ ਵੇਲੇ ਭਰਿਆ ਭਰਿਆ ਰੱਖੀਏ। ਖੁਸ਼ੀ ਗਮੀ ਦੇ ਖਰਚੇ ਕੱਢਣ ਵੇਲੇ ਫਾਲਤੂ ਫਜ਼ੂਲ ਖਰਚਿਆਂ ਦੀ ਬਜਾਏ ਇਹਨਾਂ ਅਦਾਰਿਆਂ ਲਈ ਫ਼ੰਡ ਦੇਈਏ। ਫ਼ੰਡ ਦੇਣ ਲਈ ਸਬੰਧਤ ਨੰਬਰ ਅਤੇ ਜਾਣਕਾਰੀ ਇਥੇ ਨਾਲ ਹੀ ਦਿੱਤੀ ਜਾ ਰਹੀ ਹੈ।