21 ਅਫਗਾਨੀ ਸਿੱਖ ਅਫਗਾਨਿਸਤਾਨ ਛੱਡ ਪਹੁੰਚੇ ਹਿੰਦੁਸਤਾਨ

 14th July 2022 at 05:51 PM

ਐਸਜੀਪੀਸੀ ਕਰ ਰਹੀ ਹੈ ਇਨ੍ਹਾਂ ਦਾ ਹਵਾਈ ਖਰਚ 

ਨਵੀਂ ਦਿੱਲੀ: 14 ਜੁਲਾਈ 2022: (ਮਨਪ੍ਰੀਤ ਸਿੰਘ ਖਾਲਸਾ//ਪੰਜਾਬ ਸਕਰੀਨ)::

ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਸ. ਹਰਜਿੰਦਰ ਸਿੰਘ ਧਾਮੀ ਅਤੇ ਰਘੁਜੀਤ ਸਿੰਘ ਵਿਰਕ ਸੀਨੀਅਰ ਮੀਤ ਪ੍ਰਧਾਨ ਦੇ ਦਿਸ਼ਾ ਨਿਰਦੇਸ਼ਾਂ ਅਨੁਸਾਰ ਅੱਜ ਅਫਗਾਨਿਸਤਾਨ ਤੋਂ ਆਏ 21 ਮੈਂਬਰਾਂ ਦੇ ਵਫਦ ਨੂੰ ਨਵੀਂ ਦਿੱਲੀ ਏਅਰਪੋਰਟ ਤੇ ਆਉਣ ਤੇ ਸਵਾਗਤ ਕੀਤਾ ਗਿਆ। ਸ. ਸੁਖਵਿੰਦਰ ਸਿੰਘ ਬੱਬਰ ਮੈਂਬਰ ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਤੇ ਸਿੱਖ ਮਿਸ਼ਨ ਧਰਮ ਪ੍ਰਚਾਰ ਕਮੇਟੀ ਮੈਂਬਰ ਅਤੇ ਸੁਰਿੰਦਰ ਪਾਲ ਸਿੰਘ ਸਮਾਣਾ ਇੰਚਾਰਜ ਸਿੱਖ ਮਿਸ਼ਨ ਵਲੋਂ ਵਿਸ਼ੇਸ ਤੌਰ ਤੇ ਪੁੰਹਚ ਕੇ ਆਏ ਵਫਦ ਦਾ ਸਵਾਗਤ ਕੀਤਾ ਉਪਰੰਤ ਆਏ ਵਫਦ ਦੇ ਮੈਂਬਰਾਂ ਨੂੰ ਏਅਰਪੋਰਟ ਤੋ ਉਹਨਾਂ ਦੀ ਰਿਹਾਇਸ਼ ਤੇ ਪਹੁੰਚਾਣ ਦਾ ਵੀ ਪ੍ਰਬੰਧ ਕੀਤਾ ਗਿਆ। 

ਜ਼ਿਕਰ ਯੋਗ ਹੈ ਅਜ ਇਹਨਾਂ ਆਏ ਸਾਰੇ ਸਿੱਖ ਯਾਤਰੀਆਂ ਤੋਂ ਪਹਿਲਾਂ ਆਏ 11 ਸਿੱਖ ਯਾਤਰੀਆਂ ਅਤੇ ਅੱਗੋਂ ਆਉਣ ਵਾਲੇ ਸਿੱਖ ਯਾਤਰੀਆਂ ਦੀਆਂ ਹਵਾਈ ਜਹਾਜ਼ ਦੀਆਂ ਟਿਕਟਾਂ ਦਾ ਖਰਚ ਸ੍ਰੋਮਣੀ ਕਮੇਟੀ ਵਲੋਂ ਕੀਤਾ ਜਾ ਰਿਹਾ ਹੈ। ਇਸ ਮੌਕੇ ਆਏ ਵਫਦ ਵਲੋਂ ਇਹਨਾਂ ਸਾਰੀਆਂ ਸੇਵਾਵਾਂ ਲਈ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਸ੍ਰੀ ਅੰਮ੍ਰਿਤਸਰ ਦਾ ਤਹਿ ਦਿਲੋਂ ਧੰਨਵਾਦ ਕੀਤਾ।

ਸਾਹਨੇਵਾਲ ਏਅਰਪੋਰਟ ਤੋਂ ਹੁਣ ਹਰ ਐਤਵਾਰ ਦਿੱਲੀ ਲਈ ਉਡਾਰੀ ਭਰੇਗਾ ਏਅਰਕ੍ਰਾਫਟ

29 ਜੁਲਾਈ ਤੋਂ ਹਰ ਐਤਵਾਰ ਨੂੰ ਵੀ ਲੁਧਿਆਣਾ-ਦਿੱਲੀ ਫਲਾਈਟ ਸ਼ੁਰੂ

ਲੁਧਿਆਣਾ: 21 ਜੁਲਾਈ 2018: (ਉੱਤਮ ਕੁਮਾਰ ਰਾਠੌਰ//ਪੰਜਾਬ ਸਕਰੀਨ)::

ਸਾਹਨੇਵਾਲ ਏਅਰਪੋਰਟ ਤੋਂ ਹੁਣ ਅਲਾਇੰਸ ਏਅਰ ਦਾ 72-ਸੀਟਰ ਏਅਰਕ੍ਰਾਫਟ ਏ. ਟੀ. ਆਰ.-72 ਲੁਧਿਆਣਾ-ਦਿੱਲੀ ਲਈ ਹਫਤੇ ਵਿਚ 5 ਦਿਨ ਉਡਾਰੀ ਭਰੇਗਾ। ਮਹਾਨਗਰ ਦੇ ਕਾਰੋਬਾਰੀਆਂ ਅਤੇ ਨਿਰਯਾਤਕਾਂ ਦੀ ਭਾਰੀ ਮੰਗ ’ਤੇ ਅਲਾਇੰਸ ਏਅਰ 29 ਜੁਲਾਈ 2018 ਤੋਂ ਹਫਤੇ ਦੇ ਹਰ ਐਤਵਾਰ ਨੂੰ ਵੀ ਲੁਧਿਆਣਾ ਤੋਂ ਦਿੱਲੀ (ਅਪ-ਡਾਊਨ) ਫਲਾਈਟ ਸ਼ੁਰੂ ਕਰਨ ਜਾ ਰਿਹਾ ਹੈ। 

ਇਸ ਸਬੰਧੀ ਜਾਣਕਾਰੀ ਦਿੰਦੇ ਹੋਏ ਡੀ. ਸੀ. ਪ੍ਰਦੀਪ ਅਗਰਵਾਲ ਅਤੇ ਸਾਹਨੇਵਾਲ ਏਅਰਪੋਰਟ ਦੇ ਡਾਇਰੈਕਟਰ ਏ. ਐੱਨ. ਸ਼ਰਮਾ ਨੇ ਕਿਹਾ ਕਿ ਮੌਜੂਦਾ ਸਮੇਂ ਵਿਚ ਸਾਹਨੇਵਾਲ ਏਅਰਪੋਰਟ ਤੋਂ ਹਫਤੇ ਦੇ ਹਰ ਸੋਮਵਾਰ, ਮੰਗਲਵਾਰ, ਵੀਰਵਾਰ ਅਤੇ ਸ਼ਨੀਵਾਰ ਨੂੰ ਮਿਸ਼ਨ ਉਡਾਣ ਦੇ ਤਹਿਤ ਲੁਧਿਆਣਾ-ਦਿੱਲੀ ਲਈ ਉਡਾਰੀਆਂ ਜਾਰੀ ਹਨ। ਹੁਣ ਐਤਵਾਰ ਨੂੰ ਏਅਰਕ੍ਰਾਫਟ ਦਿੱਲੀ ਤੋਂ ਸਵੇਰੇ 8 ਵੱਜ ਕੇ 45 ਮਿੰਟ ’ਤੇ ਲੁਧਿਆਣਾ ਲੈਂਡ ਕਰੇਗਾ ਜਦੋਂਕਿ ਇੱਥੋਂ ਜਹਾਜ਼ 9 ਵੱਜ ਕੇ 15 ਮਿੰਟ ’ਤੇ ਦਿੱਲੀ ਦੇ ਲਈ ਰਵਾਨਾ ਹੋਵੇਗਾ। 29 ਜੁਲਾਈ ਤੋਂ ਸ਼ੁਰੂ ਹੋਣ ਵਾਲੀ ਇਹ ਹਵਾਈ ਸੇਵਾ ਪ੍ਰਧਾਨ ਮੰਤਰੀ  ਨਰਿੰਦਰ ਮੋਦੀ ਦੀ ਮਿਸ਼ਨ ਉਡਾਣ ਦੇ ਤਹਿਤ ਨਹੀਂ ਹੋਵੇਗੀ, ਸਗੋਂ ਇਸ ਦਾ ਕਿਰਾਇਆ ਆਮ ਉਡਾਰੀਆਂ ਦੇ ਮੁਤਾਬਕ ਲੱਗੇਗਾ।
 ਦੱਸ ਦੇਈਏ ਕਿ 3 ਸਾਲ ਦੇ ਲੰਬੇ ਵਕਫੇ ਤੋਂ ਬਾਅਦ 2 ਸਤੰਬਰ 2017 ਨੂੰ ਸਾਹਨੇਵਾਲ ਏਅਰਪੋਰਟ ਤੋਂ ਲੁਧਿਆਣਾ-ਦਿੱਲੀ ਦੀ ਹਵਾਈ ਸੇਵਾ ਸ਼ੁਰੂ ਹੋਣ ਨਾਲ ਮਹਾਨਗਰ ਦੇ ਟ੍ਰੇਡ ਅਤੇ ਇੰਡਸਟਰੀ ਵਿਚ ਇਸ ਦੇ ਪ੍ਰਤੀ ਬੇਹੱਦ ਉਤਸ਼ਾਹ ਕਾਰਨ ਯਾਤਰੀ ਲੋਡ 80 ਤੋਂ 90 ਫੀਸਦੀ ਚੱਲ ਰਿਹਾ ਹੈ। ਕਾਰੋਬਾਰੀਆਂ ਵੱਲੋਂ ਹਫਤੇ ਦੇ ਸੱਤੇ ਦਿਨ ਉਡਾਣਾਂ ਸ਼ੁਰੂ ਕਰਨ ਦੀ ਮੰਗ ਕੀਤੀ ਜਾ ਰਹੀ ਸੀ।
 ਏਅਰਪੋਰਟ ਡਾਇਰੈਕਟਰ ਏ. ਐੱਨ. ਸ਼ਰਮਾ ਨੇ ਕਿਹਾ ਕਿ ਉਦਯੋਗਪਤੀਆਂ ਅਤੇ ਹੋਰਨਾਂ ਹਵਾਈ ਯਾਤਰੀਆਂ ਦੀ ਮੰਗ ’ਤੇ ਵਿਚਾਰ ਕੀਤਾ ਜਾ ਰਿਹਾ ਹੈ ਅਤੇ ਆਉਣ ਵਾਲੇ ਦਿਨਾਂ ਵਿਚ ਹਫਤੇ ਦੇ ਸੱਤੇ ਦਿਨ ਫਲਾਈਟ ਸ਼ੁਰੂ ਕਰਨ ਦੀ ਯੋਜਨਾ ਨੂੰ ਅਮਲ ਵਿਚ ਲਿਆਂਦਾ ਜਾਵੇਗਾ। ਮੌਜੂਦਾ ਸਮੇਂ ਵਿਚ ਹਫਤੇ ਦੇ 4 ਦਿਨ ਦਿੱਲੀ ਤੋਂ ਜਹਾਜ਼ ਸ਼ਾਮ 3 ਵੱਜ ਕੇ 55 ਮਿੰਟ ’ਤੇ ਲੁਧਿਆਣਾ ਪੁੱਜਦਾ ਹੈ ਜਦੋਂਕਿ ਇੱਥੋਂ ਦਿੱਲੀ ਲਈ ਸ਼ਾਮ 4 ਵੱਜ ਕੇ 15 ਮਿੰਟ ’ਤੇ ਟੇਕ ਆਫ ਕਰਦਾ ਹੈ। ਹੁਣ ਐਤਵਾਰ ਨੂੰ ਸ਼ੁਰੂ ਹੋਣ ਜਾ ਰਹੀ ਉਡਾਣ ਦਾ ਸ਼ਡਿਊਲ ਸਵੇਰ ਦਾ ਰੱਖਿਆ ਗਿਆ ਹੈ।