ਇੰਡੀਆ ਗੇਟ ਨੂੰ ਵੀ ਢਾਹੋ ਅਤੇ ਉਸੇ ਥਾਂ 'ਤੇ "ਵਿਲੱਖਣ ਆਜ਼ਾਦੀ ਯਾਦਗਾਰ" ਬਣਾਓ

   25th January 2022 at 5:02 PM

ਨੇਤਾ ਜੀ ਦਾ ਬੁੱਤ ਲਾਉਣ ਲਈ ਭਾਜਪਾ ਨੂੰ ਵਧਾਈ:ਸਤਿਗੁਰੂ ਦਲੀਪ ਸਿੰਘ ਜੀ

ਇਹ ਲਿਖਤ ਸਾਨੂੰ ਜਲੰਧਰ ਤੋਂ ਠਾਕੁਰ ਦਲੀਪ ਸਿੰਘ ਹੁਰਾਂ ਦੀ ਅਨਿੰਨ ਸ਼ਰਧਾਲੂ ਰਾਜਪਾਲ ਕੌਰ ਹੁਰਾਂ ਨੇ ਭੇਜੀ ਹੈ। ਇਸ ਵਿੱਚ ਭਾਰਤੀ ਜਨਤਾ ਪਾਰਟੀ ਦੀਆਂ ਨੀਤੀਆਂ ਨੂੰ ਰਾਸ਼ਟਰਵਾਦੀ ਦੱਸਦਿਆਂ ਪੂਰੀ ਹਮਾਇਤ ਵੀ ਜਤਾਈ ਗਈ ਹੈ। ਅਮਰ  ਜਵਾਨ ਜਿਓਤੀ ਨੂੰ ਬੁਝਾਉਣ ਵਾਲੇ ਵਿਵਾਦ ਵਿੱਚ ਇਹ ਨਾਮਧਾਰੀ ਭਾਜਪਾ ਨਾਲ ਖੜੇ ਹਨ। ਇਹ ਇੰਡੀਆ ਗੇਟ ਨੂੰ ਗੁਲਾਮੀ ਦਾ ਪ੍ਰਤੀਕ ਮੰਨਦੇ ਹੋਏ ਪਿਛਲੇ ਕਈ ਸਾਲਾਂ ਤੋਂ ਢਾਹੁਣ ਦੀ ਮੰਗ ਵੀ ਕਰ ਰਹੇ ਹਨ। ਜ਼ਿਕਰਯੋਗ ਹੈ ਕਿ ਇੰਡੀਆ ਗੇਟ ਦੀ ਸਥਾਪਨਾ 10 ਫਰਵਰੀ 1921 ਨੂੰ ਕੀਤੀ ਗਈ ਸੀ ਅਤੇ 12 ਫਰਵਰੀ 1921 ਨੂੰ ਇਸ ਤੋਂ ਪਰਦਾ ਉਠਾ ਕੇ ਇਸਨੂੰ ਆਮ ਜਨਤਾ ਦੇ ਦੇਖਣ ਲਈ ਆਮ ਕਰ ਦਿੱਤਾ ਗਿਆ ਸੀ। ਇਸ ਵਿੱਚ ਪਹਿਲੀ ਸੰਸਾਰ ਜੰਗ ਦੌਰਾਨ ਸ਼ਹੀਦ ਹੋਏ 90 ਹਜ਼ਾਰ ਫੌਜੀਆਂ ਨੂੰ ਸ਼ਰਧਾਂਜਲੀ ਦਿੱਤੀ ਗਈ ਹੈ। ਇਹਨਾਂ ਫੌਜੀਆਂ ਨੇ ਬ੍ਰਿਟਿਸ਼ ਰਾਜ ਦੇ ਹੱਕ ਵਿੱਚ ਸਨ 1914 ਤੋਂ ਲੈ ਕੇ ਸੰਨ 1921 ਤਕ ਦੇ ਯੁੱਧਕਾਲ ਦੌਰਾਨ ਸ਼ਹੀਦੀਆਂ ਪ੍ਰਾਪਤ ਕੀਤੀਆਂ ਸਨ। ਇਹ ਇੰਡੀਆ ਗੇਟ ਉਹਨਾਂ ਦੀ ਯਾਦਗਾਰ ਵੱਜੋ ਸੀ। ਦਿੱਲੀ ਵਿੱਚ 42 ਮੀਟਰ ਉੱਚਾ ਇਹ ਵਿਸ਼ਾਲ ਗੇਟ ਇੱਕ ਸੈਲਾਨੀ ਸਥਲ ਵੀ ਹੈ ਅਤੇ ਲੈਂਡ ਮਾਰਕ ਵੱਜੋਂ ਵੀ ਹੈ।ਪੂਰਾ ਵੇਰਵਾ ਤੁਸੀਂ ਪੜ੍ਹ ਸਕਦੇ ਹੋ ਇਸ ਲਿਖਤ ਵਿੱਚ। --ਸੰਪਾਦਕ 

ਜਲੰਧਰ: 25 ਜਨਵਰੀ 2022: (ਪੰਜਾਬ ਸਕਰੀਨ ਬਿਓਰੋ)::

ਭਾਜਪਾ ਸਰਕਾਰ ਨੇ ਮਹਾਨ ਆਜ਼ਾਦੀ ਘੁਲਾਟੀਏ ਨੇਤਾਜੀ ਸੁਭਾਸ਼ ਚੰਦਰ ਬੋਸ ਦਾ ਬੁੱਤ ਇੰਡੀਆ ਗੇਟ ਨੇੜੇ ਬਣੀ ਛੱਤਰੀ ਵਿੱਚ ਸਥਾਪਿਤ ਕਰਕੇ ਬਹੁਤ ਹੀ ਮਾਣਮੱਤਾ ਕੰਮ ਕੀਤਾ ਹੈ। ਸਤਿਗੁਰੂ ਦਲੀਪ ਸਿੰਘ ਜੀ (ਮੌਜੂਦਾ ਨਾਮਧਾਰੀ ਗੁਰੂ) ਅਤੇ ਉਹਨਾਂ ਦੀ ਨਾਮਧਾਰੀ ਸੰਗਤ ਭਾਜਪਾ ਸਰਕਾਰ ਅਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਜੀ ਦੇ ਇਸ ਫੈਸਲੇ ਦਾ ਸੁਆਗਤ ਕਰਦੀ ਹੈ ਅਤੇ ਉਹਨਾਂ ਨੂੰ ਵਧਾਈ ਦਿੰਦੀ ਹੈ ਕਿ ਉਹਨਾਂ ਨੇ ਇੰਨਾ ਵਧੀਆ ਫੈਸਲਾ ਲੈ ਕੇ ਭਾਰਤ ਦਾ ਮਾਣ ਵਧਾਇਆ ਹੈ। ਭਾਜਪਾ ਸਰਕਾਰ ਨੇ ਅਜਿਹੇ ਬਹੁਤ ਸਾਰੇ ਸ਼ਾਨਦਾਰ ਕੰਮ ਕਰਕੇ ਸਹੀ ਰੂਪ ਵਿੱਚ ਭਾਰਤ ਦਾ ਮਾਣ ਵਧਾਇਆ ਹੈ। ਜਿਵੇਂ: 3 ਤਲਾਕ ਨੂੰ ਖਤਮ ਕਰਨਾ, ਧਾਰਾ 370 ਨੂੰ ਹਟਾਉਣਾ, ਰੌਸ ਆਈਲੈਂਡ ਦਾ ਨਾਮ ਬਦਲ ਕੇ ਨੇਤਾਜੀ ਸੁਭਾਸ਼ ਚੰਦਰ ਬੋਸ ਦੀਪ ਰੱਖਣਾ, ਔਰੰਗਜ਼ੇਬ ਰੋਡ ਦਾ ਨਾਮ ਬਦਲਣਾ, ਆਦਿ। ਭਾਜਪਾ ਦੀਆਂ ਨੀਤੀਆਂ ਰਾਸ਼ਟਰਵਾਦੀ ਹਨ, ਇਸੇ ਕਰਕੇ ਨਾਮਧਾਰੀ ਸੰਗਤ ਉਨ੍ਹਾਂ ਦੀਆਂ ਰਾਸ਼ਟਰਵਾਦੀ ਨੀਤੀਆਂ ਦਾ ਸਮਰਥਨ ਕਰਦੀ ਹੈ।

ਅੱਜ ਜਿੱਥੇ ਸੁਭਾਸ਼ ਚੰਦਰ ਬੋਸ ਦਾ ਬੁੱਤ ਲਗਾਇਆ ਗਿਆ ਹੈ, ਉਸ ਜਗ੍ਹਾ 'ਤੇ ਕਦੇ ਇੰਗਲੈਂਡ ਦੇ ਰਾਜਾ ਜਾਰਜ ਪੰਜਵੇਂ ਦੀ ਮੂਰਤੀ ਲੱਗੀ ਹੋਈ ਸੀ। ਸੰਨ 1965 ਵਿਚ ਸੰਯੁਕਤ ਸਮਾਜਵਾਦੀ ਪਾਰਟੀ ਦੇ ਕੁਝ ਯੋਧਿਆਂ ਨੇ ਪੁਲਿਸ ਵਾਲਿਆਂ ਨੂੰ ਗ੍ਰਿਫਤਾਰ ਕਰਕੇ ਬੁੱਤ ਦਾ ਨੱਕ ਅਤੇ ਚਿਹਰਾ ਤੋੜ ਦਿੱਤਾ ਅਤੇ ਉਸ ਦੇ ਮੂੰਹ 'ਤੇ ਕਾਲਕ ਮੱਲ ਦਿੱਤੀ। ਲੋਕਾਂ ਦੇ ਅਜਿਹੇ ਸਖ਼ਤ ਵਿਰੋਧ ਕਾਰਨ 1968 ਵਿੱਚ ਭਾਰਤ ਸਰਕਾਰ ਵੱਲੋਂ ਉਸ ਬੁੱਤ ਨੂੰ ਉਥੋਂ ਹਟਾ ਕੇ ਦਿੱਲੀ ਦੇ ਕੋਰੋਨੇਸ਼ਨ ਪਾਰਕ ਵਿੱਚ ਲਾ ਦਿੱਤਾ। ਉਸ ਸਮੇਂ ਦੀ ਭਾਰਤ ਸਰਕਾਰ ਅੰਗਰੇਜ਼ਾਂ ਪ੍ਰਤੀ ਇੰਨੀ ਸਮਰਪਤ ਸੀ ਕਿ ਉਹਨਾਂ ਨੇ ਇਸ ਮੂਰਤੀ ਨੂੰ ਸੁੱਟਿਆ ਨਹੀਂ, ਸਗੋਂ ਸਤਿਕਾਰ ਸਹਿਤ ਕਿਸੇ ਹੋਰ ਥਾਂ 'ਤੇ ਸਥਾਪਿਤ ਕਰ ਦਿੱਤਾ।

ਇੰਡੀਆ ਗੇਟ ਅਤੇ ਗੇਟਵੇ ਆਫ ਇੰਡੀਆ (ਮੁੰਬਈ) ਸਾਡੇ ਸਾਰਿਆਂ ਦੇ ਮੱਥੇ ਉੱਤੇ 'ਤੇ ਇੱਕ ਕਲੰਕ ਦਾ ਨਿਸ਼ਾਨ

ਸਤਿਗੁਰੂ ਦਲੀਪ ਸਿੰਘ ਜੀ ਅਤੇ ਨਾਮਧਾਰੀ ਸੰਗਤ ਭਾਜਪਾ ਸਰਕਾਰ ਅਤੇ ਸਮੂਹ ਭਾਰਤ ਵਾਸੀਆਂ ਨੂੰ ਸੁਝਾਅ ਦਿੰਦੇ ਹਨ ਕਿ ਦਿੱਲੀ ਸਥਿਤ ਇੰਡੀਆ ਗੇਟ ਅਤੇ ਗੇਟਵੇ ਆਫ ਇੰਡੀਆ (ਮੁੰਬਈ) ਨੂੰ ਆਪਣੀ ਵਿਰਾਸਤ ਨਾ ਸਮਝੋ, ਇਹ ਸਾਡੇ ਸਾਰਿਆਂ ਦੇ ਮੱਥੇ ਉੱਤੇ 'ਤੇ ਇੱਕ ਕਲੰਕ ਦਾ ਨਿਸ਼ਾਨ ਹੈ।  ਕਿਉਂਕਿ, "ਇੰਡੀਆ ਗੇਟ" ਅੰਗਰੇਜ਼ਾਂ ਨੇ ਅੰਗਰੇਜ਼ ਭਗਤ ਭਾਰਤੀ ਗੱਦਾਰਾਂ ਦੀ ਯਾਦ ਅਤੇ ਸਨਮਾਨ ਵਿੱਚ ਬਣਵਾਇਆ ਸੀ। ਗੇਟਵੇ ਆਫ ਇੰਡੀਆ ਨੂੰ ਭਾਰਤ ਵਿੱਚ ਜਾਰਜ ਪੰਜਵੀਂ ਅਤੇ ਮਹਾਰਾਣੀ ਮੈਰੀ ਦੀ ਪਹਿਲੀ ਆਮਦ ਦੀ ਯਾਦ ਵਿੱਚ ਬਣਾਇਆ ਗਿਆ ਸੀ।

ਇੰਡੀਆ ਗੇਟ ਨੂੰ ਵੀ ਢਾਹੋ--ਨਵਾਂ ਬਣਿਆ "ਵਾਰ ਮੈਮੋਰੀਅਲ" ਕੋਈ ਆਜ਼ਾਦੀ ਯਾਦਗਾਰ ਨਹੀਂ

ਸਤਿਗੁਰੂ ਦਲੀਪ ਸਿੰਘ ਜੀ ਦਾ ਸੁਝਾਅ: ਹੁਣ ਅਗਲਾ ਮਹਾਨ ਕਾਰਜ, ਭਾਜਪਾ ਸਰਕਾਰ ਨੂੰ ਇੰਡੀਆ ਗੇਟ ਨੂੰ ਢਾਹ ਕੇ ਉਸੇ ਥਾਂ 'ਤੇ ਭਾਰਤ ਦੀ "ਵਿਲੱਖਣ ਆਜ਼ਾਦੀ ਯਾਦਗਾਰ" ਬਣਾਉਣੀ ਚਾਹੀਦੀ ਹੈ। ਨਵਾਂ ਬਣਿਆ "ਵਾਰ ਮੈਮੋਰੀਅਲ" ਕੋਈ ਆਜ਼ਾਦੀ ਯਾਦਗਾਰ ਨਹੀਂ ਹੈ। ਅਸੀਂ ਇਸ ਦਾ ਵਿਰੋਧ ਨਹੀਂ ਕਰਦੇ ਪਰ ਇਹ ਸਾਡੀ ਆਜ਼ਾਦੀ ਦਾ ਸਮਾਰਕ ਨਹੀਂ ਹੈ। ਸਤਿਗੁਰੂ ਦਲੀਪ ਸਿੰਘ ਜੀ ਅਤੇ ਉਨ੍ਹਾਂ ਦੀ ਨਾਮਧਾਰੀ ਸੰਗਤ ਪਿਛਲੇ ਛੇ ਸਾਲਾਂ ਤੋਂ ਮੰਗ ਕਰ ਰਹੀ ਹੈ ਕਿ ਇੰਡੀਆ ਗੇਟ ਨੂੰ ਢਾਹ ਕੇ ਉਸ ਥਾਂ 'ਤੇ ਭਾਰਤ ਦੀ "ਆਜ਼ਾਦੀ ਯਾਦਗਾਰ" ਬਣਾਈ ਜਾਵੇ। ਜਿਸ ਦੇ ਇੱਕ ਪਾਸੇ ਆਜ਼ਾਦੀ ਘੁਲਾਟੀਆਂ ਦੀਆਂ ਤਸਵੀਰਾਂ ਅਤੇ ਨਾਮ ਰੋਸ਼ਨ ਹੋਣ, ਦੂਜੇ ਪਾਸੇ ਦੇਸ਼ ਭਗਤਾਂ ਦੀ ਫਿਲਮਾਂ ਵੱਡੇ ਪਰਦੇ 'ਤੇ ਚੱਲਣ। 1947 ਤੋਂ ਪਹਿਲਾਂ ਦੇਸ਼ ਦੀ ਅਜ਼ਾਦੀ ਲਈ ਦੇਸ਼ ਭਗਤੀ ਦੇ ਜਜ਼ਬੇ ਨਾਲ ਕੁਰਬਾਨੀਆਂ ਕਰਨ ਵਾਲੇ। ਜਿਵੇਂ:- ਸ਼ਹੀਦ ਭਗਤ ਸਿੰਘ, ਸ਼ਹੀਦ ਕਰਤਾਰ ਸਿੰਘ ਸਰਾਭਾ, ਰਾਜਗੁਰੂ, ਸੁਭਾਸ਼ ਚੰਦਰ ਬੋਸ ਆਦਿ। ਭਾਰਤ ਦੇ ਸੁਤੰਤਰਤਾ ਸਮਾਰਕ 'ਤੇ ਉਨ੍ਹਾਂ ਦੇ ਨਾਮ ਦਾ ਪ੍ਰਕਾਸ਼ ਹੋਣਾ ਚਾਹੀਦਾ ਹੈ। ਕਿਉਂਕਿ ਉਨ੍ਹਾਂ ਦੀ ਬਦੌਲਤ ਹੀ ਅੱਜ ਅਸੀਂ ਆਜ਼ਾਦ ਹਾਂ।  

(25th January 2022 at 3:27 PM  manpreet rainu <manpreetrainu0007@gmail.com>)