ਬਲਾਤਕਾਰ: ਪੁਲਿਸ ਦੀ ਨਾਕਾਮੀ ਦੇ ਵਿਰੁੱਧ ਥਾਣਾ ਪੀ ਏ ਯੂ ਸਾਹਮਣੇ ਧਰਨਾ

ਪੰਜਪੀਰ ਇਲਾਕਾ ਨਿਵਾਸੀਆਂ ਤੇ CPI ਵੱਲੋਂ SHO ਦੇ ਸਸਪੈਨਸ਼ਨ ਦੀ ਮੰਗ 

ਲੁਧਿਆਣਾ: 16 ਦਸੰਬਰ 2018: (ਪੰਜਾਬ ਸਕਰੀਨ ਟੀਮ)::

ਬਲਾਤਕਾਰੀਆਂ ਨੂੰ ਫੜਨ ਵਿੱਚ ਪੁਲਿਸ ਦੀ ਨਾਕਾਮੀ ਦੇ ਵਿਰੁੱਧ ਅੱਜ ਪੁਲਿਸ ਥਾਣਾ ਪੀ ਏ ਯੂ ਦੇ ਸਾਹਮਣੇ ਪੰਜਪੀਰ ਰੋਡ, ਹੈਬੋਵਾਲ ਖੁਰਦ ਦੇ ਇਲਾਕਾ ਨਿਵਾਸੀਆਂ ਅਤੇ ਭਾਰਤੀ ਕਮਿਉਨਿਸਟ ਪਾਰਟੀ ਵਲੋਂ ਥਾਣਾ ਪੀ ਏ ਯੂ ਦੇ ਐਸ ਐਚ ਓ ਦੀ ਸਸਪੈਨਸ਼ਨ ਦੀ ਮੰਗ  ਨੂੰ ਲੈਕੇ ਇੱਕ ਰੋਸ ਧਰਨਾ ਦਿੱਤਾ ਗਿਆ ਜਿਸ ਵਿੱਚ ਇਸਤਰੀਆਂ  ਤੇ ਨੌਜਵਾਨਾ ਸਮੇਤ ਸੈਂਕੜਿਆਂ ਦੀ ਗਿਨਤੀ ਵਿੱਚ ਲੋਕ ਸ਼ਾਮਿਲ ਹੋਏ। ਇਸ ਮੌਕੇ ਤੇ ਬੁਲਾਰਿਆਂ  ਨੇ ਦੱਸਿਆ ਕਿ ਐਫ਼ ਆਈ ਆਰ ਨੰ 191 ਥਾਣਾ ਪੀ ਏ ਯੂ ਮਿਤੀ 26 ਅਕਤੂਬਰ 2018 ਨੂੰ  ਧਾਰਾਵਾਂ 376, 365, 384, 120 ਬੀ, 506 ਆਈ ਪੀ ਸੀ ਦੇ ਅੰਤਰਗਤ ਕੇਸ ਦਰਜ ਹੋਇਆ ਸੀ ਪਰ ਡੇਢ ਮਹੀਨਾ ਹੋਣ ਦੇ ਬਾਅਦ ਵੀ ਮੁੱਖ ਦੋਸ਼ੀ ਫੜਿਆ ਨਹੀਂ ਗਿਆ। ਦੋਸ਼ ਲਾਉਦਿਆਂ ਪਾਰਟੀ ਦੇ ਜਿਲ੍ਹਾ ਸਕੱਤਰ ਕਾਮਰੇਡ ਡੀ ਪੀ ਮੌੜ ਨੇ ਕਿਹਾ ਕਿ ਇਹ ਸਭ ਜਾਣ ਬੁੱਝ ਕੇ ਹੋ ਰਿਹਾ ਹੈ ਤੇ ਇਸ ਗਲ ਦਾ ਪੂਰਾ ਅੰਦੇਸ਼ਾ ਹੈ ਕਿ ਥਾਣੇ ਦਾ ਐਸ ਐਚ ਓ ਦੋਸ਼ੀਆਂ ਦੇ ਨਾਲ ਰਲਿਆ ਹੋਇਆ ਹੈ। ਮਿਤੀ 28 ਨਵੰਬਰ 2018 ਨੂੰ ਪਾਰਟੀ ਵਲੋਂ ਪੁਲਿਸ ਕਮਿਸ਼ਨਰ ਨੂੰ ਇੱਕ ਮੈਮੋਰੈਂਡਮ ਦਿੱਤਾ ਸੀ ਤੇ ਉਹਨਾਂ ਨੇ 7 ਦਿਨਾਂ ਦੇ ਅੰਦਰ ਐਕਸ਼ਨ ਦਾ ਭਰੋਸਾ ਦਿਵਾਇਆ ਸੀ। ਪਰ ਹੁਣ ਤੱਕ 17 ਦਿਨ  ਬਾਅਦ ਵੀ ਕੁਝ ਨਹੀਂ ਹੋਇਆ। ਪੁਲਿਸ ਟਾਲ ਮਟੋਲ ਤੇ ਹੇਰਫੇਰ ਦੀਆਂ ਗੱਲਾਂ ਕਰ ਰਹੀ ਹੈ ਜਿਸ ਕਰਕੇ ਪੀੜਿਤਾ ਲਗਾਤਾਰ ਮਾਨਸਿਕ ਤਣਾਅ ਵਿੱਚ ਰਹਿ ਰਹੀ ਹੈ ਜਿਸਦੇ ਕਿ ਨਤੀਜੇ ਭਿਆਨਕ ਹੋ ਸਕਦੇ ਹਨ। ਬੁਲਾਰਿਆਂ ਨੇ ਫ਼ੌਰੀ ਤੌਰ ਤੇ ਮੁੱਖ ਦੋਸ਼ੀ ਨੂੰ ਫੜਨ ਦੀ ਮੰਗ ਕੀਤੀ। ਸੀ ਪੀ ਆਈ ਦੇ ਜ਼ਿਲ੍ਹਾ ਸਹਾਇਕ ਸਕੱਤਰ ਡਾ: ਅਰੁਣ ਮਿੱਤਰਾ ਨੇ ਕਿਹਾ ਕਿ ਪੁਲਿਸ ਦੇ ਇਸ ਕਿਸਮ ਦੇ ਰਵੱਈਏ ਦੇੇ ਕਾਰਨ ਅਪਰਾਧ ਲਗਾਤਾਰ ਵੱਧ ਰਹੇ ਹਨ। ਖਾਸ ਤੌਰ ਤੇ ਥਾਣਾ ਪੀ ਏ ਯੂ ਦੇ ਐਸ ਐਚ  ਓ ਅਮਿਤ ਸੂਦ ਦੇ ਅਧੀਨ ਤਾਂ ਕਿਸੇ ਵੀ ਗਰੀਬ ਪੀੜਿਤ ਦੀ ਕੋਈ ਸੁਣਵਾਈ ਨਹੀਂ ਹੁੰਦੀ। ਪਾਰਟੀ ਦੇ ਸ਼ਹਿਰੀ ਸਹਾਇਥ ਸਕੱਤਰ ਕਾਮਰੇਡ ਗੁਰਨਾਮ ਸਿੱਧੂ ਨੇ ਕਿਹਾ ਕਿ ਇੱਥੋਂ ਤੱਕ ਕਿ ਪਰਮੋਦ ਨਾਮ ਦੇ ਵਿਅਕਤੀ ਨੂੰ ਪੁਲਿਸ ਨੇ ਬੇਰਹਿਮੀ ਦੇ ਨਾਲ ਕੁੱਟਿਆ ਤੇ ਮੈਡੀਕਲ ਦੇ ਬਾਵਜੂਦ ਵੀ ਕੋਈ ਕਾਰਵਾਈ ਨਹੀਂ ਹੋਈ। ਐਫ ਆਈ ਆਰ ਨੰ 156 ਵਿੱਚ ਕੋਈ ਕਾਰਵਾਈ ਨਹੀਂ ਹੋਈ ਤੇ ਸ਼ਿਕਾਇਤ ਕਰਤਾ ਨੂੰ ਬਾਰਬਾਰ ਤੰਗ ਕੀਤਾ ਜਾ ਰਿਹਾ ਹੈ। ਜਵਾਹਰ ਨਾਮ ਦੇ ਆਦਮੀ ਨੂੰ ਰਾਤ ਨੂੰ ਕੁੱਟਿਆ ਤੇ ਲੁਟੇਰਿਆਂ ਨੇ 25000 ਰੁਪਏ ਖੋਹ ਲਏ ਪਰ ਕੋਈ ਕਾਰਵਾਈ ਨਹੀਂ। ਇਹੋ ਹਾਲ ਅਜੀਤ ਨਾਇਕ ਤੇ ਸਹਿਦੇਵ ਦੇ ਨਾਲ ਹੋਇਆ ਹੈ। ਜਿਲ੍ਹਾ ਵਿੱਤ ਸਕੱਤਰ ਕਾਮਰੇਡ ਐਮ ਐਸ ਭਾਟੀਆ ਨੇ ਕਿਹਾ ਕਿ ਅਨੇਕਾਂ ਕੇਸਾਂ ਵਿੱਚ ਪਰਚਾ ਦਰਜ ਕਰਨ ਤੇ ਚਲਾਨ ਹੀ ਪੇਸ਼ ਨਹੀਂ ਕੀਤਾ ਗਿਆ। ਇਹਨਾ ਕਾਰਨਾ ਕਰਕੇ ਅੱਜ ਲੋਕਾਂ ਨੂੰ ਕੰਮਕਾਰ ਛੱਡ ਕੇ ਇਸ ਕਿਸਮ ਦੇ ਗੰਭੀਰ ਮਸਲੇ ਲਈ ਜੋ ਕਿ ਪ੍ਰਸ਼ਾਸਨ ਦਾ ਫਰਜ ਹੈ ਇੱਥੇ ਆਉਣਾ ਪਿਆ। ਇੱਸਤ੍ਰੀ ਸਭਾ ਦੀ ਆਗੂ ਕਾਮਰੇਡ ਕੁਲਵੰਤਕੌਰ ਨੇ ਦੋਸ਼ ਲਾਇਆ ਕਿ ਇਸ ਇਲਾਕੇ ਵਿੱਚ ਔਰਤਾਂ ਬਿਲਕੁਲ ਸੁਰਖਿੱਅਤ ਨਹੀ ਕਿੳਕਿ ਅਪਰਾਧੀ ਅਨਸਰਾਂ ਨੂੰ ਪੁਲਿਸ ਦੀ ਸ਼ਹਿ  ਪ੍ਰਾਪਤ ਹੈ।  ਹਰੀ ਸਾਹਨੀ ਸਾਹਨੀ ਨੇ ਕਿਹਾ ਕਿ ਪੁਲਿਸ ਹਰ ਕੇਸ ਨੂੰ ਨਜਰ ਅੰਦਾਜ ਕਰ ਰਹੀ ਹੈ ਤੇ ਉਲਟ ਪੀੜਿਤਾਂ ਤੇ ਹੀ ਕੇਸ ਬਣਾ ਰਹੀ ਹੈ। ਕਾਮਰੇਡ ਰਣਧੀਰ ਸਿੰਘ ਧੀਰਾ ਨੇ ਕਿਹਾ ਕਿ ਇਸ ਇਲਾਕੇ ਵਿੱਚ ਇੱਨੀਂ ਧੱਕੇਸਾਹੀ ਕਦੇ ਵੀ ਨਹੀ ਹੋਈ ਕਿ ਬਲਾਤਕਾਰ ਵਰਗੇ ਕੇਸ ਤੇ ਵੀ ਪੁਲਿਸ ਮੋਕ ਮਾਰੀ ਬੈਠੀ ਹੋਵੇ।

ਇਸ ਰੈਲੀ ਨੂੰ ਸੰਬੋਧਨ ਕਰਨ ਵਾਲਿਆਂ ਵਿੱਚ ਸ਼ਾਮਿਲ ਹੋਰ ਹਨ ਕਾਮਰੇਡ ਕਾਮੇਸ਼ਵਰ, ਮੋਹਮਦ ਸ਼ਫੀਕ ਅਤੇ ਸ਼ਹਿਨਾਜ ਆਦਿ।

ਪੁਲਿਸ ਪਰਸ਼ਾਸਨ ਨੇ ਦੋਸ਼ੀਆਂ ਨੂੰ ਫੜਨ ਦੇ ਲਈ ਇੱਕ ਹਫਤੇ ਦਾ ਸਮਾਂ ਮੰਗਿਆ। ਧਰਨਾ ਦੇਣ ਵਾਲਿਆਂ ਨੇ ਕਿਹਾ ਕਿ ਜੇਕਰ ਇੱਕ ਹਫਤੇ ਵਿੱਚ ਦੋਸ਼ੀ ਨਾ ਫੜੇ ਗਏ ਤਾਂ ਵੱਡੇ ਐਕਸ਼ਨ ਕੀਤੇ ਜਾਣਗੇ।