ਨਹੀਂ ਰਹੇ ਕਾਮਰੇਡ ਜਗਜੀਤ ਸਿੰਘ ਆਨੰਦ

ਸਿਧਾਂਤ ਅਤੇ ਸੰਘਰਸ਼ਾਂ ਵਾਲੇ ਯੁਗ ਦਾ ਇੱਕ ਹੋਰ ਯੋਧਾ ਤੁਰ ਗਿਆ 

ਆਪਣੀ ਜੀਵਨ ਸਾਥਣ ਉਰਮਿਲਾ ਆਨੰਦ ਨੂੰ ਵਿਦਾ ਕਰਨ ਤੋਂ ਬਾਅਦ ਸਦਮੇ ਦੇ ਬਾਵਜੂਦ ਹਿੰਮਤ ਵਿੱਚ ਕਾਮਰੇਡ ਆਨੰਦ
ਪੰਜਾਬ ਭਾਜਪਾ ਦੇ ਪ੍ਰਧਾਨ ਕਮਲ ਸ਼ਰਮਾ ਅਤੇ ਹੋਰਾਂ ਨੂੰ ਜੀ ਆਇਆਂ  ਆਖਦਿਆਂ 

ਲੁਧਿਆਣਾ: 20 ਜੂਨ 2015: (ਰੈਕਟਰ ਕਥੂਰੀਆ//ਪੰਜਾਬ ਸਕਰੀਨ): 

ਪੰਜਾਬੀ ਪੱਤਰਕਾਰੀ ਨੂੰ ਪੰਜਾਬੀ ਦਾ ਰੰਗ ਚਾੜ੍ਹਨ ਅਤੇ ਅਖਬਾਰੀ ਸਮਗਰੀ ਨੂੰ ਮੁਹਾਵਰੇਦਾਰ ਅੰਦਾਜ਼ ਨਾਲ ਦਿਲਚਸਪ ਬਣਾਉਣ ਵਿੱਚ ਅਹਿਮ ਯੋਗਦਾਨ ਪਾਉਣ ਵਾਲੇ ਕਾਮਰੇਡ ਜਗਜੀਤ ਸਿੰਘ ਆਨੰਦ ਹੁਣ ਸਾਡੇ ਦਰਮਿਆਨ ਨਹੀਂ ਰਹੇ। ਕਮਿਊਨਿਸਟ ਪਾਰਟੀ ਦੇ ਉਤਰਾਵਾਂ ਚੜ੍ਹਾਵਾਂ,  ਪੰਜਾਬ ਦੇ ਗੋਲੀਆਂ-ਬੰਬਾਂ ਵਾਲੇ ਸਮਿਆਂ ਅਤੇ ਪੱਤਰਕਾਰੀ ਦੇ ਖੇਤਰ ਵਿੱਚ ਨਵਾਂ ਜਮਾਨਾ ਨੂੰ ਦਰਪੇਸ਼ ਹੁੰਦੇ ਰਹੇ ਬਹੁ ਪੱਖੀ ਸੰਕਟਾਂ ਨੂੰ ਆਪਣੀ ਪੂਰੀ ਵਾਹ ਲਾ ਕੇ ਹੱਲ ਕਰਨ ਵਾਲੇ ਕਾਮਰੇਡ ਆਨੰਦ ਲਗਾਤਾਰ ਸੰਘਰਸ਼ਾਂ ਦੇ ਰੂਪ ਵੱਜੋਂ ਜਾਣੇ ਜਾਂਦੇ ਰਹੇ। 

ਉਹਨਾਂ ਦੇ ਤੁਰ ਜਾਨ ਨਾਲ ਪੰਜਾਬੀ ਪੱਤਰਕਾਰੀ ਦੇ ਇੱਕ ਯੁੱਗ ਦਾ ਉਸ ਸਮੇਂ ਅੰਤ ਹੋ ਗਿਆ ਜਿਸ ਯੁਗ ਵਿੱਚ "ਨਵਾਂ ਜ਼ਮਾਨਾ" ਇੱਕ ਮੀਡੀਆ ਟਰੇਨਿੰਗ ਇੰਸੀਚਿਊਟ ਵੱਜੋਂ ਸਥਾਪਿਤ ਹੋਇਆ। ਇਸ ਅਖਬਾਰ ਚ ਕੰਮ ਕਰਦਿਆਂ ਡੂੰਘੇ ਤਜਰਬੇ ਹਾਸਿਲ ਕਰਨ ਵਾਲੇ ਤਕਰੀਬਨ ਸਾਰੀਆਂ ਅਖਬਾਰਾਂ ਵਿੱਚ ਪੁੱਜੇ। ਪੱਤਰਕਾਰੀ ਵਿੱਚ ਨਵੀਆਂ ਪਿਰਤਾਂ ਪਾਉਣ ਵਾਲੇ 'ਨਵਾਂ ਜ਼ਮਾਨਾ' ਦੇ ਮੁੱਖ ਸੰਪਾਦਕ ਕਾਮਰੇਡ ਜਗਜੀਤ ਸਿੰਘ ਆਨੰਦ ਦਾ ਸ਼ੁੱਕਰਵਾਰ ਰਾਤ 9.45 ਵਜੇ ਦੇਹਾਂਤ ਹੋ ਗਿਆ। ਨਵਾਂ ਜਮਾਨਾ ਪਰਿਵਾਰ ਦੇ ਸੂਤਰਾਂ ਨੇ ਦੱਸਿਆ ਕਿ ਕਾਮਰੇਡ ਆਨੰਦ ਲੰਮੇ ਸਮੇਂ ਤੋਂ ਬਿਮਾਰ ਚਲੇ ਆ ਰਹੇ ਸਨ। ਦੋ ਦਿਨ ਪਹਿਲਾਂ ਉਨ੍ਹਾਂ ਨੂੰ ਬ੍ਰੇਨ ਸਟਰੋਕ ਕਾਰਨ ਜਲੰਧਰ ਦੇ ਗਲੋਬਲ ਹਸਪਤਾਲ 'ਚ ਦਾਖਲ ਕਰਵਾਇਆ ਗਿਆ ਸੀ। ਉਨ੍ਹਾ ਦਾ ਅੰਤਮ ਸੰਸਕਾਰ ਬਾਅਦ ਦੁਪਹਿਰ 2 ਵਜੇ ਮਾਡਲ ਟਾਊਨ ਜਲੰਧਰ ਦੇ ਸਮਸ਼ਾਨਘਾਟ ਵਿੱਚ ਕੀਤਾ ਜਾਵੇਗਾ। ਕਾਮਰੇਡ ਆਨੰਦ ਦੇ ਦੇਹਾਂਤ 'ਤੇ ਸੀ ਪੀ ਆਈ ਦੇ ਸੂਬਾ ਸਕੱਤਰ ਕਾਮਰੇਡ ਹਰਦੇਵ ਅਰਸ਼ੀ ਤੇ ਹੋਰ ਪਾਰਟੀ ਸਾਥੀਆਂ ਨੇ ਡੂੰਘੇ ਦੁੱਖ ਦਾ ਪ੍ਰਗਟਾਵਾ ਕੀਤਾ ਹੈ। ਲੁਧਿਆਣਾ ਵਿੱਚ ਵੀ ਕਈ ਸੰਗਠਨਾਂ ਨੇ ਇਸ ਮੌਕੇ ਸੋਗ ਦਾ ਪ੍ਰਗਟਾਵਾ ਕੀਤਾ।