Showing posts with label Voters. Show all posts
Showing posts with label Voters. Show all posts

Saturday, January 28, 2017

ਵੋਟ ਤੰਤਰ: ਲੁਧਿਆਣਾ ਵਾਸੀ ਦੋ ਰਿਕਾਰਡ ਬਣਾਉਣ ਦੀ ਤਿਆਰੀ ਵਿੱਚ

'ਲਿਮਕਾ ਬੁੱਕ' ਅਤੇ 'ਇੰਡੀਆ ਬੁੱਕ ਆਫ਼ ਰਿਕਾਰਡਜ਼' ਵਿੱਚ ਹੋਵੇਗਾ ਦਰਜ
*30 ਜਨਵਰੀ ਨੂੰ 2500 ਤੋਂ ਵਧੇਰੇ ਵੋਟਰ ਲੈਣਗੇ ਇਕੱਠਿਆਂ 'ਸੈਲਫੀ'
*31 ਜਨਵਰੀ ਨੂੰ 150 ਕਿਲੋਮੀਟਰ ਲੰਬਾਈ ਤੋਂ ਵਧੇਰੇ ਦੀ ਬਣੇਗੀ 'ਮਨੁੱਖੀ ਕੜੀ' 
*ਵਿਧਾਨ ਸਭਾ ਚੋਣਾਂ ਲਈ ਵੋਟਰਾਂ ਨੂੰ ਜਾਗਰੂਕ ਕਰਨ ਦਾ ਉਪਰਾਲਾ-ਜ਼ਿਲਾ ਚੋਣ ਅਫ਼ਸਰ
ਲੁਧਿਆਣਾ: 27 ਜਨਵਰੀ 2017: (ਪੰਜਾਬ ਸਕਰੀਨ ਬਿਊਰੋ):  
ਆਗਾਮੀ ਪੰਜਾਬ ਵਿਧਾਨ ਸਭਾ ਚੋਣਾਂ-2017 ਦੌਰਾਨ ਹਰੇਕ ਵੋਟਰ ਦੇ ਵੋਟ ਦਾ ਜ਼ਰੂਰੀ ਅਤੇ ਸਹੀ ਇਸਤੇਮਾਲ ਯਕੀਨੀ ਬਣਾਉਣ ਲਈ ਜ਼ਿਲਾ ਪ੍ਰਸਾਸ਼ਨ ਵੱਲੋਂ ਜੀਅ ਤੋੜ ਉਪਰਾਲੇ ਕੀਤੇ ਜਾ ਰਹੇ ਹਨ। ਜਿਸ ਤਹਿਤ ਜ਼ਿਲਾ ਲੁਧਿਆਣਾ ਵਾਸੀ ਹੁਣ 'ਸਵੀਪ ਗਤੀਵਿਧੀਆਂ' ਅਧੀਨ ਦੋ ਰਿਕਾਰਡ ਕਾਇਮ ਕਰਨ ਦੀ ਤਿਆਰੀ ਵਿੱਚ ਹਨ। ਪਿਛਲੇ ਸਮੇਂ ਦੌਰਾਨ ਵੋਟਰ ਜਾਗਰੂਕਤਾ ਸੰਬੰਧੀ ਜਿਵੇਂ ਕਈ ਪ੍ਰੋਗਰਾਮ ਕੀਤੇ ਗਏ ਹਨ, ਇਸੇ ਕੜੀ ਨੂੰ ਅੱਗੇ ਤੋਰਦਿਆਂ ਹੁਣ 2500 ਤੋਂ ਵਧੇਰੇ ਵੋਟਰ ਆਪਣੇ ਵੋਟਰ ਸ਼ਨਾਖ਼ਤੀ ਕਾਰਡ ਨਾਲ ਸੈਲਫੀ ਲੈਣਗੇ, ਉਥੇ ਹੀ 150 ਕਿਲੋਮੀਟਰ ਲੰਮੀ 'ਮਨੁੱਖੀ ਕੜੀ' ਬਣਾ ਕੇ ਵੋਟ ਦੇ ਇਸਤੇਮਾਲ ਦਾ ਸੁਨੇਹਾ ਵੀ ਦੇਣਗੇ।
ਜਾਣਕਾਰੀ ਦਿੰਦਿਆਂ ਡਿਪਟੀ ਕਮਿਸ਼ਨਰ ਸ੍ਰੀ ਰਵੀ ਭਗਤ ਨੇ ਦੱਸਿਆ ਕਿ ਮਿਤੀ 30 ਜਨਵਰੀ ਨੂੰ ਸ਼ਹਿਰ ਲੁਧਿਆਣਾ ਦੇ ਪੱਖੋਵਾਲ ਸੜਕ ਸਥਿਤ ਇੰਡੋਰ ਸਟੇਡੀਅਮ ਵਿਖੇ 2500 ਤੋਂ ਵਧੇਰੇ ਵੋਟਰ (ਜਿਆਦਾਤਰ ਨਵੇਂ ਬਣੇ ਵੋਟਰ) ਇਕੱਠੇ ਹੋਣਗੇ ਅਤੇ ਆਪਣੇ ਵੋਟਰ ਸ਼ਨਾਖ਼ਤੀ ਕਾਰਡ ਨਾਲ ਸੈਲਫੀ ਲੈਣਗੇ। ਇਸ ਮੌਕੇ ਸਰੀਰਕ ਤੌਰ 'ਤੇ ਅਪੰਗ ਕਲਾਕਾਰਾਂ ਵੱਲੋਂ 'ਮਿਰੈਕਲ ਆਨ ਵ•ੀਲਜ਼' ਸੱਭਿਆਚਾਰਕ ਪ੍ਰੋਗਰਾਮ ਅਤੇ ਗੱਤਕਾ ਟੀਮ ਵੱਲੋਂ 'ਗੱਤਕਾ' ਵੀ ਪੇਸ਼ ਕੀਤਾ ਜਾਵੇਗਾ। ਇਸ ਸਮਾਗਮ ਵਿੱਚ ਪ੍ਰਤੀਯੋਗੀਆਂ ਨੂੰ ਉਤਸ਼ਾਹਿਤ ਕਰਨ ਲਈ ਮੁੱਖ ਚੋਣ ਅਫ਼ਸਰ ਪੰਜਾਬ ਸ੍ਰੀ ਵੀ. ਕੇ. ਸਿੰਘ ਵਿਸ਼ੇਸ਼ ਤੌਰ 'ਤੇ ਪੁੱਜ ਰਹੇ ਹਨ। ਸ੍ਰੀ ਭਗਤ ਨੇ ਦੱਸਿਆ ਕਿ ਇਸ ਸਮਾਗਮ ਵਿੱਚ ਆਪਣੇ ਵੋਟਰ ਸਨਾਖ਼ਤੀ ਕਾਰਡ ਨਾਲ ਸ਼ਿਰਕਤ ਕਰਨ ਅਤੇ ਸੈਲਫੀ ਖਿੱਚਣ ਵਾਲੇ ਹਰੇਕ ਪ੍ਰਤੀਯੋਗੀ ਨੂੰ ਜ਼ਿਲਾ ਪ੍ਰਸਾਸ਼ਨ ਵੱਲੋਂ ਪ੍ਰਸ਼ੰਸ਼ਾ ਪੱਤਰ ਨਾਲ ਸਨਮਾਨਿਤ ਕੀਤਾ ਜਾਵੇਗਾ। 
ਉਨ੍ਹਾਂ ਅੱਗੇ ਦੱਸਿਆ ਕਿ ਇਸੇ ਤਰ੍ਹਾਂ ਮਿਤੀ 31 ਜਨਵਰੀ ਨੂੰ 150 ਕਿਲੋਮੀਟਰ ਲੰਮੀ 'ਮਨੁੱਖੀ ਕੜੀ' ਬਣਾਈ ਜਾਵੇਗੀ, ਜੋ ਕਿ ਚਾਰ ਜ਼ਿਲਿਆਂ ਕਪੂਰਥਲਾ, ਜਲੰਧਰ, ਲੁਧਿਆਣਾ ਅਤੇ ਸ੍ਰੀ ਫਤਹਿਗੜ ਸਾਹਿਬ ਨੂੰ ਕਵਰ ਕਰੇਗੀ। ਇੱਕ ਹਿੰਦੀ ਅਖ਼ਬਾਰ ਸਮੂਹ ਦੇ ਸਹਿਯੋਗ ਨਾਲ ਬਣਾਈ ਜਾ ਰਹੀ ਮਨੁੱਖੀ ਲੜੀ ਜ਼ਿਲਾ ਕਪੂਰਥਲਾ ਦੇ ਕਸਬਾ ਕਰਤਾਰਪੁਰ ਤੋਂ ਸ਼ੁਰੂ ਹੋਵੇਗੀ, ਜਿਸ ਤਹਿਤ ਵੱਡੀ ਗਿਣਤੀ ਵਿੱਚ ਹਿੱਸਾ ਲੈਣ ਵਾਲੇ ਲੋਕ ਹੱਥਾਂ ਨਾਲ ਹੱਥ ਜੋੜ ਕੇ ਜਲੰਧਰ, ਫਗਵਾੜਾ, ਗੁਰਾਇਆ, ਫ਼ਿਲੌਰ, ਲਾਡੋਵਾਲ ਬਾਈਪਾਸ, ਜਲੰਧਰ ਬਾਈਪਾਸ, ਲੁਧਿਆਣਾ ਸ਼ਹਿਰ, ਸਾਹਨੇਵਾਲ, ਦੋਰਾਹਾ, ਬੀਜਾ, ਖੰਨਾ, ਮੰਡੀ ਗੋਬਿੰਦਗੜ, ਸਰਹਿੰਦ ਅਤੇ ਫਤਹਿਗੜ ਸਾਹਿਬ ਦੇ ਸਾਰੇ ਰਸਤੇ ਨੂੰ ਕਵਰ ਕਰਨਗੇ। ਸ੍ਰੀ ਭਗਤ ਨੇ ਕਿਹਾ ਕਿ ਇਸ ਪੂਰੀ ਮਨੁੱਖੀ ਕੜੀ ਵਿੱਚ ਜਿੱਥੇ ਡੇਢ ਲੱਖ ਤੋਂ ਵਧੇਰੇ ਲੋਕ ਹਿੱਸਾ ਲੈ ਰਹੇ ਹਨ, ਉਥੇ ਜ਼ਿਲਾ ਲੁਧਿਆਣਾ ਦੇ 70 ਹਜ਼ਾਰ (ਸਭ ਤੋਂ ਵਧੇਰੇ) ਲੋਕ ਜ਼ਿਲਾ ਲੁਧਿਆਣਾ ਅਧੀਨ ਆਉਂਦੀ ਸੜਕ ਨੂੰ ਕਵਰ ਕਰਨਗੇ। ਇਸ ਸਮਾਗਮ ਵਿੱਚ ਕੋਈ ਵੀ ਵਿਅਕਤੀ ਹਿੱਸਾ ਲੈ ਸਕਦਾ ਹੈ, ਜਿਨ੍ਹਾਂ ਨੂੰ ਵੀ ਜ਼ਿਲਾ ਪ੍ਰਸਾਸ਼ਨ ਵੱਲੋਂ ਪ੍ਰਸ਼ੰਸ਼ਾ ਪੱਤਰ ਦਿੱਤੇ ਜਾਣਗੇ। ਦੱਸਣਯੋਗ ਹੈ ਕਿ ਇਸ ਤੋਂ ਪਹਿਲਾਂ ਉੱਤਰ ਪ੍ਰਦੇਸ਼ ਦੇ ਇੱਕ ਖੇਤਰ ਵਿੱਚ 122 ਕਿਲੋਮੀਟਰ ਲੰਮੀ ਬਣਾਈ 'ਮਨੁੱਖੀ ਕੜੀ' ਰਿਕਾਰਡ ਵਜੋਂ ਦਰਜ ਹੈ।
ਸ੍ਰੀ ਭਗਤ ਨੇ ਅੱਗੇ ਕਿਹਾ ਕਿ ਇਨ੍ਹਾਂ ਦੋਵਾਂ ਵੋਟਰ ਜਾਗਰੂਕਤਾ ਸਮਾਗਮਾਂ ਨੂੰ 'ਲਿਮਕਾ ਬੁੱਕ ਆਫ਼ ਰਿਕਾਰਡਜ਼' ਅਤੇ 'ਇੰਡੀਆ ਬੁੱਕ ਆਫ਼ ਰਿਕਾਰਡਜ਼' ਵਿੱਚ ਦਰਜ ਕਰਾਉਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ। ਇਨ੍ਹਾਂ ਦੋਵਾਂ ਸਮਾਗਮਾਂ ਦੌਰਾਨ ਉਕਤ ਕੰਪਨੀਆਂ ਦੇ ਨੁਮਾਇੰਦੇ ਵੀ ਹਾਜ਼ਰ ਰਹਿਣਗੇ। ਸ੍ਰੀ ਭਗਤ ਨੇ ਜ਼ਿਲਾ ਵਾਸੀਆਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਉਕਤ ਦੋਵੇਂ ਸਮਾਗਮਾਂ ਵਿੱਚ ਸ਼ਿਰਕਤ ਕਰਕੇ ਜਿੱੱਥੇ ਜ਼ਿਲਾ ਲੁਧਿਆਣਾ ਦੇ ਨਾਮ ਇਹ ਰਿਕਾਰਡ ਦਰਜ ਕਰਾਉਣ ਵਿੱਚ ਸਹਿਯੋਗ ਕਰਨ, ਉਥੇ 4 ਫਰਵਰੀ ਨੂੰ ਵੋਟ ਦੇ ਜ਼ਰੂਰੀ ਅਤੇ ਸਹੀ ਇਸਤੇਮਾਲ ਬਾਰੇ ਵੀ ਵੋਟਰਾਂ ਨੂੰ ਜਾਗਰੂਕ ਕਰਨ।

Friday, September 11, 2015

ਵੋਟਰ ਸੂਚੀਆਂ ਦੀ ਸੁਧਾਈ ਸਬੰਧੀ ਬੀ.ਐਲ.ਓਜ. ਨੂੰ ਦਿੱਤੀ ਸਿਖਲਾਈ

Fri, Sep 11, 2015 at 3:53 PM
ਕੋਈ ਵੀ ਯੋਗ ਨਾਗਰਿਕ ਵੋਟ ਦੇ ਅਧਿਕਾਰ ਤੋਂ ਵਾਂਝਾ ਨਾ ਰਹੇ
ਸ੍ਰੀ ਮੁਕਤਸਰ ਸਾਹਿਬ: 11 ਸਤੰਬਰ 2015: (ਅਨਿਲ ਪਨਸੇਜਾ//ਪੰਜਾਬ ਸਕਰੀਨ):
ਭਾਰਤ ਭਾਰਤੀ ਚੋਣ ਕਮਿਸ਼ਨ ਵਲੋਂ ਵੋਟਰ ਸੂਚੀਆਂ ਦੀ ਸਰਸਰੀ ਸੁਧਾਈ ਸਬੰਧੀ ਸਮਾਂ ਸਾਰਣੀ ਜਾਰੀ ਕਰ ਦਿੱਤੀ ਗਈ ਹੈ। ਇਸ ਸਬੰਧੀ ਅੱਜ ਵਿਧਾਨ ਸਭਾ ਹਲਕਾ ਸ੍ਰੀ ਮੁਕਤਸਰ ਸਾਹਿਬ ਨਾਲ ਸਬੰਧਤ ਬੂਥ ਲੈਵਲ ਅਫ਼ਸਰਾਂ ਲਈ ਇਕ ਦਿਨਾਂ ਸਿਖਲਾਈ ਦਾ ਆਯੋਜਨ ਰੈਡਕਰਾਸ ਭਵਨ ਵਿਖੇ ਕੀਤਾ ਗਿਆ। 
ਇਸ ਮੌਕੇ ਚੋਣਕਾਰ ਰਜਿਸਟ੍ਰੇਸ਼ਨ ਅਫ਼ਸਰ ਕਮ ਐਸ.ਡੀ.ਐਮ. ਸ੍ਰੀ ਰਾਮ ਸਿੰਘ ਨੇ ਕਿਹਾ ਕਿ ਸੁਧਾਈ ਲਈ ਯੋਗਤਾ ਮਿਤੀ ਇਕ ਜਨਵਰੀ 2016 ਰੱਖੀ ਗਈ ਹੈ। ਉਨਾਂ ਕਿਹਾ ਕਿ ਵੋਟਰ ਸੂਚੀਆਂ ਦੀ ਖਰੜਾ ਪ੍ਰਕਾਸ਼ਨਾ 15 ਸਤੰਬਰ ਨੂੰ ਹੋਵੇਗੀ ਜਦਕਿ ਦਾਅਵੇ ਤੇ ਇਤਰਾਜ਼ ਦਾਇਰ ਕਰਨ ਲਈ ਸਮਾਂ ਹੱਦ 15 ਸਤੰਬਰ ਤੋਂ 14 ਅਕਤੂਬਰ ਤੱਕ ਰੱਖੀ ਗਈ ਹੈ। ਇਸ ਤੋਂ ਇਲਾਵਾ ਦਾਅਵਿਆਂ ਤੇ ਇਤਰਾਜ਼ਾਂ ਦੀ ਜਾਂਚ ਪੜਤਾਲ 16 ਸਤੰਬਰ ਤੇ 30 ਸਤੰਬਰ ਨੂੰ ਹੋਵੇਗੀ। ਉਨਾਂ ਬੀ.ਐਲ.ਓ. ਨੂੰ ਕਿਹਾ ਕਿ ਇਸ ਮੁਹਿੰਮ ਦੌਰਾਨ ਇਹ ਯਕੀਨੀ ਬਣਾਇਆ ਜਾਵੇ ਕਿ ਕੋਈ ਵੀ ਯੋਗ ਨਾਗਰਿਕ ਵੋਟ ਬਣਾਏ ਜਾਣ ਦੇ ਅਧਿਕਾਰ ਤੋਂ ਵਾਂਝਾ ਨਾ ਰਹੇ। ਉਨਾਂ ਨੇ ਕਿਹਾ ਕਿ ਇਸ ਮੁਹਿੰਮ ਤੋਂ ਬਾਅਦ ਫਾਈਨਲ ਵੋਟਰ ਸੂਚੀ ਪ੍ਰਕਾਸ਼ਤ ਕੀਤੀ ਜਾਵੇਗੀ। ਇਸ ਮੌਕੇ ਤਹਸੀਲਦਾਰ ਸ: ਦਰਸ਼ਨ ਸਿੰਘ ਵੀ ਹਾਜਰ ਸਨ। ਉਨਾਂ ਨੇ ਲੋਕਾਂ ਨੂੰ ਵੀ ਅਪੀਲ ਕੀਤੀ ਕਿ ਇਸ ਮੁਹਿੰਮ ਦੌਰਾਨ ਜੇਕਰ ਕਿਸੇ ਦੀ ਵੋਟ ਨਹੀਂ ਬਣੀ ਤਾਂ ਜਰੂਰ ਬਣਵਾ ਲੈਣ।

Sunday, September 29, 2013

ਨਵੇਂ ਵੋਟਰਾਂ ਵਿੱਚ ਉਤਸ਼ਾਹ:ਵੋਟਰ ਸੂਚੀਆਂ ਦੀ ਸੁਧਾਈ ਦੇ ਕੰਮ ਦਾ ਨਰੀਖਣ

Sun, Sep 29, 2013 at 4:00 PM
ਡਵੀਜ਼ਨਲ ਕਮਿਸ਼ਨਰ ਪਟਿਆਲਾ ਮੰਡਲ-ਕਮ-ਰੋਲ ਆਬਜ਼ਰਵਰ ਸ. ਅਜੀਤ ਸਿੰਘ ਪੰਨੂ ਨੇ ਕੀਤੀ ਮੀਟਿੰਗ ਦੀ ਪ੍ਰਧਾਨਗੀ 
24 ਹਜ਼ਾਰ, 400 ਨਵੇ ਵੋਟਰਾਂ ਨੇ ਭਰੇ ਵੋਟਾਂ ਬਨਾਉਣ ਲਈ ਫਾਰਮ
 ਡਵੀਜ਼ਨਲ ਕਮਿਸ਼ਨਰ ਪਟਿਆਲਾ ਮੰਡਲ-ਕਮ-ਰੋਲ ਆਬਜ਼ਰਵਰ ਸ. ਅਜੀਤ ਸਿੰਘ ਪੰਨੂ, ਬੱਚਤ ਭਵਨ ਲੁਧਿਆਣਾ ਵਿਖੇ ਵੋਟਰ ਸੂਚੀਆਂ ਦੀ ਸਰਸਰੀ ਸੁਧਾਈ ਦਾ ਨਰੀਖਣ ਕਰਨ ਸਬੰਧੀ ਰਾਜਨੀਤਿਕ ਪਾਰਟੀਆਂ ਅਤੇ ਅਧਿਕਾਰੀਆਂ ਨਾਲ ਮੀਟਿੰਗ ਕਰਦੇ ਹੋਏ।
ਲੁਧਿਆਣਾ, 29 ਸਤੰਬਰ 2013 (ਵਿਸ਼ਾਲ//ਪੰਜਾਬ ਸਕਰੀਨ): ਡਵੀਜ਼ਨਲ ਕਮਿਸ਼ਨਰ ਪਟਿਆਲਾ ਮੰਡਲ-ਕਮ-ਰੋਲ ਆਬਜ਼ਰਵਰ ਸ. ਅਜੀਤ ਸਿੰਘ ਪੰਨੂ ਨੇ ਅੱਜ ਇੱਥੇ ਬੱਚਤ ਭਵਨ ਵਿਖੇ 1 ਜਨਵਰੀ 2014 ਦੀ ਯੋਗਤਾ ਨੂੰ ਮੁੱਖ ਰੱਖਦਿਆ ਵੋਟਰ ਸੂਚੀਆਂ ਦੀ ਚੱਲ ਰਹੀ ਸਰਸਰੀ ਸੁਧਾਈ ਦਾ ਨਰੀਖਣ ਕਰਨ ਸਬੰਧੀ ਵੱਖ-ਵੱਖ ਰਾਜਨੀਤਿਕ ਪਾਰਟੀਆਂ ਦੇ ਪ੍ਰਤੀਨਿਧਾਂ, ਜਿਲਾ ਚੋਣ ਅਫਸਰ, ਸਹਾਇਕ ਚੋਣਕਾਰ ਰਜਿਸਟਰੇਸ਼ਨ ਅਫਸਰ, ਸੈਕਟਰ ਅਫਸਰ ਅਤੇ ਹੋਰ ਸਬੰਧਤ ਅਧਿਕਾਰੀਆਂ ਦੀ ਮੀਟਿੰਗ ਦੀ ਪ੍ਰਧਾਨਗੀ ਕੀਤੀ। ਸ. ਪੰਨੂ ਨੇ ਲੁਧਿਆਣਾ ਜਿਲੇ ਵਿੱਚ ਚੱਲ ਰਹੇ ਵੋਟਰ ਸੂਚੀਆਂ ਦੀ ਸਰਸਰੀ ਸੁਧਾਈ ਦੇ ਕੰਮ ਤੇ ਤਸੱਲੀ ਦਾ ਪ੍ਰਗਟਾਵਾਂ ਕੀਤਾ ਅਤੇ ਇਸ ਕੰਮ ਲਈ ਜਿਲੇ ਦੀਆਂ ਰਾਜਨੀਤਿਕ ਪਾਰਟੀਆਂ ਵੱਲੋਂ ਦਿੱਤੇ ਜਾ ਰਹੇ ਸਹਿਯੋਗ ਲਈ ਉਹਨਾਂ ਦਾ ਵਿਸ਼ੇਸ਼ ਤੌਰ ਤੇ ਧੰਨਵਾਦ ਕੀਤਾ। ਉਹਨਾਂ ਸਮੂਹ ਰਾਜਨੀਤਿਕ ਪਾਰਟੀਆਂ ਦੇ ਨੁਮਾਇੰਦਿਆਂ ਨੂੰ ਅਪੀਲ ਕੀਤੀ ਕਿ ਉਹ 18 ਤੇ 19 ਸਾਲ ਦੇ ਨੌਜਵਾਨ ਵਰਗ ਦੀਆ ਵੱਧ ਤੋਂ ਵੱਧ ਵੋਟਾਂ ਬਨਾਉਣ ਲਈ ਉਹਨਾਂ ਨੂੰ ਪ੍ਰੇਰਿਤ ਕਰਨ। ਉਹਨਾਂ ਇਸ ਮੌਕੇ ਵੱਖ-ਵੱਖ ਰਾਜਨੀਤਿਕ ਪਾਰਟੀ ਦੇ ਨੁਮਾਇੰਦਿਆਂ ਦੀਆ ਸ਼ਿਕਾਇਤਾਂ ਵੀ ਸੁਣੀਆ। ਕੁਝ ਰਾਜਨੀਤਿਕ ਨੁਮਾਇੰਦਿਆ ਨੇ ਵੋਟਰ ਸੂਚੀਆਂ ਤੇ ਵਾਰਡਾਂ ਦੇ ਨਾਮ ਗਲਤ ਅੰਕਤ ਹੋਣ ਬਾਰੇ ਧਿਆਨ ਵਿੱਚ ਲਿਆਦਾ ਜਿਸ ਸਬੰਧੀ ਕਮਿਸ਼ਨਰ ਨੇ ਡਿਪਟੀ ਕਮਿਸ਼ਨਰ ਨੂੰ ਇਹ ਮਾਮਲਾ ਚੋਣ ਕਮਿਸ਼ਨ ਦੇ ਧਿਆਨ ਵਿੱਚ ਲਿਆ ਕੇ ਹੱਲ ਕਰਵਾਉਣ ਲਈ ਕਿਹਾ। 

 ਸ. ਪੰਨੂ ਨੇ ਜਿਲੇ ਦੇ ਸਮੂਹ ਅਧਿਕਾਰੀਆਂ ਨੂੰ ਨਿਰਦੇਸ਼ ਦਿੱਤੇ ਕਿ ਵੋਟਰ ਸੂਚੀਆਂ ਦੀ ਸੁਧਾਈ ਦੇ ਕੰਮ ਵਿੱਚ ਹੋਰ ਤੇਜ਼ੀ ਲਿਆਦੀ ਜਾਵੇ ਤਾਂ ਜੋ ਕੋਈ ਵੀ ਯੋਗ ਵੋਟਰ ਵੋਟਰ ਸੂਚੀ ਵਿੱਚ ਆਪਣਾ ਨਾਮ ਦਰਜ਼ ਕਰਵਾਉਣ ਤੋਂ ਵਾਂਝਾ ਨਾ ਰਹੇ। ਇਸ ਉਪਰੰਤ ਰੋਲ ਆਬਜ਼ਰਵਰ ਨੇ ਵੱਖ-ਵੱਖ ਬੂਥਾਂ ਤੇ ਬੂਥ ਲੈਵਲ ਅਫਸਰਾਂ ਵੱਲੋਂ ਵੋਟਰਾਂ ਤੋਂ ਲਏ ਜਾ ਰਹੇ ਦਾਅਵੇ ਅਤੇ ਇਤਰਾਜ਼ ਅਤੇ ਨਵੀਂ ਵੋਟ ਬਨਾਉਣ ਵਾਲੇ ਵੋਟਰਾਂ ਦੇ ਫਾਰਮ ਲੈਣ ਦੇ ਕੰਮ ਦਾ ਵੀ ਜ਼ਾਇਜ਼ਾ ਲਿਆ। 
 ਡਿਪਟੀ ਕਮਿਸ਼ਨਰ-ਕਮ-ਜਿਲਾ ਚੋਣ ਅਫਸਰ ਸ੍ਰੀ ਰਜਤ ਅਗਰਵਾਲ ਨੇ ਦੱਸਿਆ ਕਿ 5 ਸਤੰਬਰ ਤੋਂ ਲੈ ਕੇ 27 ਸਤੰਬਰ ਤੱਕ ਜਿਲੇ ਦੇ 24 ਹਜ਼ਾਰ, 400 ਨਵੇ ਵੋਟਰਾਂ ਨੇ ਵੋਟਾਂ ਬਨਾਉਣ ਲਈ ਫਾਰਮ ਭਰੇ ਹਨ। ਉਹਨਾਂ ਦੱਸਿਆ ਕਿ ਵੋਟਰ ਸੂਚੀਆਂ ਦੀ ਸੁਧਾਈ ਸਬੰਧੀ ਜਿਲੇ ਵਿੱਚ ਸਥਾਪਤ ਕੀਤੇ ਗਏ 2623 ਪੋਲਿੰਗ ਬੂਥਾਂ ਤੇ ਬੂਥ ਲੈਵਲ ਅਫਸਰ ਤਾਇਨਾਤ ਕੀਤੇ ਗਏ ਹਨ। ਉਹਨਾਂ ਇਹਨਾਂ ਅਫਸਰਾਂ ਨੁੰ ਨਿਰਦੇਸ਼ ਦਿੱਤੇ ਕਿ ਕਿਸੇ ਵੀ ਵਿਅਕਤੀ ਦੀ ਵੋਟ ਕੱਟਣ ਤੋਂ ਪਹਿਲਾ ਉਸ ਨੂੰ ਨੋਟਿਸ ਜ਼ਾਰੀ ਕਰਕੇ ਪੂਰੀ ਕਾਨੂੰਨੀ ਪ੍ਰਕ੍ਰਿਆ ਤੋਂ ਬਾਅਦ ਹੀ ਕੱਟੀ ਜਾਵੇ। ਉਹਨਾਂ ਅਧਿਕਾਰੀਆਂ ਨੂੰ ਇਹ ਵੀ ਨਿਰਦੇਸ਼ ਦਿੱਤੇ ਕਿ ਨਵੀਂ ਵੋਟ ਬਨਾਉਣ ਲਈ ਪਹਿਚਾਣ ਵੱਜੋਂ ਜੇਕਰ ਕਿਸੇ ਵਿਅਕਤੀ ਕੋਲ ਅਧਾਰ ਕਾਰਡ ਨਹੀ ਹੈ ਅਤੇ ਉਸ ਨੇ ਅਧਾਰ ਕਾਰਡ ਬਨਾਉਣ ਲਈ ਅਰਜ਼ੀ ਦਿੱਤੀ ਹੋਈ ਹੈ ਤਾਂ ਉਸ ਦਾ ਈ.ਆਈ.ਡੀ ਨੰਬਰ ਨੂੰ ਹੀ ਸਬੂਤ ਵੱਜੋ ਲਿਆ ਜਾਵੇ। ਉਹਨਾਂ ਰੋਲ ਆਬਜ਼ਰਬਰ ਨੂੰ ਭਰੋਸਾ ਦਿਵਾਇਆ ਕਿ ਵੋਟਰ ਸੂਚੀਆਂ ਦੀ ਸੁਧਾਈ ਦੇ ਕੰਮ ਵਿੱਚ ਕਿਸੇ ਵੀ ਤਰ•ਾਂ ਦੀ ਢਿੱਲ-ਮਿੱਠ ਬਰਦਾਸ਼ਤ ਨਹੀ ਕੀਤੀ ਜਾਵੇਗੀ।ਉਹਨਾਂ ਸਾਰੇ ਯੋਗ ਵੋਟਰਾਂ ਨੂੰ ਅਪੀਲ ਕੀਤੀ ਕਿ ਉਹ 4 ਅਕਤੂਬਰ ਤੱਕ ਅਪਣੇ ਨੇੜੇ ਦੇ ਬੂਥ ਤੇ ਜਾ ਕੇ ਆਪਣੀ ਵੋਟ ਬਨਾਉਣ ਲਈ ਫਾਰਮ ਭਰ ਕੇ ਦੇਣ। ਉਹਨਾਂ ਸਕੂਲਾਂ ਅਤੇ ਕਾਲਜ਼ਾਂ ਦੇ ਮੁੱਖੀਆਂ ਅਤੇ ਅਧਿਆਪਕਾਂ ਨੂੰ ਕਿਹਾ ਕਿ ਉਹ 18 ਤੇ 19 ਸਾਲ ਦੇ ਨੌਜਵਾਨਾਂ ਨੂੰ ਵੋਟ ਬਨਾਉਣ ਵਾਸਤੇ ਉਹਨਾਂ ਨੂੰ ਵਿਸ਼ੇਤੌਰ ਤੇ ਪ੍ਰੇਰਿਤ ਕਰਨ। 
 ਇਸ ਮੀਟਿੰਗ ਵਿੱਚ ਸ਼੍ਰੋਮਣੀ ਅਕਾਲੀ ਦਲ ਦੇ ਸ. ਜਗਦੇਵ ਸਿੰਘ ਗੋਹਲਵੜੀਆ, ਸੀ.ਪੀ.ਆਈ.ਐਮ ਦੇ ਸ. ਅਮਰਜੀਤ ਸਿੰਘ ਮੱਠੀ, ਸ੍ਰੀ ਦੇਵ ਰਾਜ, ਭਾਰਤੀ ਜਨਤਾ ਪਾਰਟੀ ਦੇ ਸ੍ਰੀ ਸੰਦੀਪ ਕਪੂਰ ਐਡਵੋਕੇਟ, ਸੀ.ਪੀ.ਆਈ ਦੇ ਸ੍ਰੀ ਰਮੇਸ਼ ਰਤਨ, ਐਨ.ਸੀ.ਪੀ ਦੇ ਸ੍ਰੀ ਪਿਊਸ਼ ਚੱਡਾ, ਇੰਡੀਅਨ ਨੈਸ਼ਨਲ ਕਾਗਰਸ ਦੇ ਸ੍ਰੀ ਅਨਿਲ ਕਸ਼ਯਪ ਅਤੇ ਬੀ.ਐਸ.ਪੀ ਦੇ ਸ੍ਰੀ ਰਾਮ ਨਰਾਇਣ ਤੋਂ ਇਲਾਵਾ ਹੋਰ ਨੁਮਾਇੰਦੇ ਵੀ ਸ਼ਾਮਲ ਹੋਏ। ਇਸ ਤੋਂ ਇਲਾਵਾ  ਵਧੀਕ ਡਿਪਟੀ ਕਮਿਸ਼ਨਰ (ਵਿਕਾਸ) ਸ. ਬਲਦੇਵ ਸਿੰਘ, ਜਿਲਾ ਮਾਲ ਅਫਸਰ ਸ੍ਰੀ ਮੁਕੇਸ਼ ਕੁਮਾਰ,  ਤਹਿਸੀਲਦਾਰ ਸ੍ਰੀ ਪ੍ਰਦੀਪ ਬੈਸ, ਤਹਿਸੀਲਦਾਰ (ਚੋਣਾ) ਸ੍ਰੀ ਕਪੂਰ ਸਿੰਘ ਗਿੱਲ ਤੋਂ ਇਲਾਵਾ ਹੋਰ ਅਧਿਕਾਰੀ ਵੀ ਸ਼ਾਮਲ ਹੋਏ।  
    -------------------

Sunday, October 14, 2012

ਮਾਂ-ਬਾਪ ਦੇ ਵੋਟਰ ਕਾਰਡ ਦੀ ਕਾਪੀ ਲਾਉਣਾ ਹੁਣ ਜਰੂਰੀ ਸ਼ਰਤ ?

ਮਜ਼ਦੂਰਾਂ ਨੂੰ ਵੋਟਰ ਸੂਚੀਆਂ ਚੋਂ ਬਾਹਰ ਰੱਖਣ ਦੀ ਸਾਜਿਸ਼ ਦਾ ਪਰਦਾਫਾਸ਼ ?
ਲੁਧਿਆਣਾ: 14 ਅਕਤੂਬਰ 2012 (ਲਖਵਿੰਦਰ) ਪੰਜਾਬ ਵਿੱਚ ਵੋਟਰ ਕਾਰਡ ਬਣਾਏ ਜਾ ਰਹੇ ਹਨ। ਇਸ ਬਾਰੇ ਥਾਂ-ਥਾਂ 'ਤੇ ਚੋਣ ਕਮਿਸ਼ਨ ਵੱਲੋਂ ਪੋਸਟਰ ਵੀ ਚਿਪਕਾਏ ਗਏ ਹਨ। ਲੋਕਾਂ ਨੂੰ ਦੁਨੀਆਂ ਦੇ ਸਭ ਤੋਂ ਵੱਡੇ ਲੋਕਤੰਤਰ ਦਾ ਹਿੱਸਾ ਬਣਨ ਲਈ ਅਪੀਲ ਕੀਤੀ ਜਾ ਰਹੀ ਹੈ। ਪਰ ਜ਼ਮੀਨੀ ਸੱਚਾਈ ਕੁਝ ਹੋਰ ਹੀ ਹੈ। ਲੁਧਿਆਣੇ ਦੇ ਫੋਕਲ ਪੁਆਇੰਟ ਦੇ ਗਰੀਬ ਲੋਕ ਜੋ ਆਪਣੇ ਵੋਟਰ ਕਾਰਡ ਬਣਵਾਉਣਾ ਚਾਹੁੰਦੇ ਹਨ ਉਹਨਾਂ ਨੂੰ ਬੁਰੀ ਤਰ੍ਹਾਂ ਖੱਜਲ ਖੁਆਰ ਕੀਤਾ ਜਾ ਰਿਹਾ ਹੈ। ਰਾਜੀਵ ਗਾਂਧੀ ਕਲੋਨੀ ਦੇ ਸਾਡੇ ਦਫਤਰ ਵਿੱਚ ਅੱਜ ਕੁਝ ਮਜ਼ਦੂਰ ਆਏ ਅਤੇ ਉਹਨਾਂ ਦੱਸਿਆ ਕਿ ਬਿਜਲੀ/ਪਾਵਰਕੋਮ ਦਫਤਰ ਵਿੱਚ ਲੋਕਾਂ ਦੇ ਫਾਰਮਾਂ ਵਿੱਚ ਨਾਜਾਇਜ ਤੌਰ 'ਤੇ ਗਲਤੀਆਂ ਕੱਢ ਕੱਢ ਵਾਪਸ ਭੇਜਿਆ ਜਾ ਰਿਹਾ ਹੈ ਅਤੇ ਬਹੁਤ ਹੀ ਘੱਟ ਲੋਕਾਂ ਦੇ ਫਾਰਮ ਸਵੀਕਾਰ ਕੀਤੇ ਜਾ ਰਹੇ ਹਨ। ਉਹਨਾਂ ਅੱਗੇ ਸ਼ਰਤ ਰੱਖੀ ਜਾ ਰਹੀ ਹੈ ਕਿ ਜੋ ਕੋਈ ਵੀ ਵੋਟਰ ਕਾਰਡ ਬਣਵਾਉਣਾ ਚਾਹੁੰਦਾ ਹੈ ਉਹ ਆਪਣੇ ਮਾਤਾ ਜਾਂ ਪਿਤਾ ਦੇ ਵੋਟਰ ਕਾਰਡ ਦੀ ਕਾਪੀ ਵੀ ਫਾਰਮਾਂ ਦੇ ਨਾਲ ਜਮਾ ਕਰਵਾਵੇ। ਇਹ ਪੂਰੀ ਤਰ੍ਹਾਂ ਗੈਰਸਵਿੰਧਾਨਕ ਹੈ। ਹਕੀਕਤ ਵਿੱਚ18 ਸਾਲ ਜਾਂ ਇਸ ਤੋਂ ਵੱਧ ਉਮਰ ਦਾ ਕੋਈ ਵੀ ਵਿਅਕਤੀ ਜੋ ਇਸ ਦੇਸ਼ ਦਾ ਨਾਗਰਿਕ ਹੈ ਵੋਟਰ ਕਾਰਡ ਬਣਵਾਉਣ ਦਾ ਹੱਕਦਾਰ ਹੈ। ਸੰਵਿਧਾਨਕ ਤੌਰ 'ਤੇ ਅਜਿਹੀ ਕੋਈ ਸ਼ਰਤ ਨਹੀਂ ਹੈ ਕਿ ਉਸਦੇ ਮਾਂ-ਬਾਪ ਜਾਂ ਗਾਰਡੀਅਨ ਦਾ ਵੋਟਰ ਕਾਰਡ ਪਹਿਲਾਂ ਬਣਿਆ ਹੋਣਾ ਚਾਹੀਦਾ ਹੈ। ਕਾਰਖਾਨਾ ਮਜ਼ਦੂਰ ਯੂਨੀਅਨ ਵੱਲੋਂ ਮੌਕੇ 'ਤੇ ਪਹੁੰਚ ਕੇ ਜਾਂਚ ਪੜਤਾਲ ਕੀਤੀ ਗਈ। ਉੱਥੇ ਜਾ ਕੇ ਦੇਖਿਆ ਕਿ ਜੋ ਚਾਰ ਜਣੇ ਫਾਰਮ ਰਿਸੀਵ ਕਰਨ ਲਈ ਬੈਠੇ ਹਨ ਉਹ ਮਜ਼ਦੂਰਾਂ ਨਾਲ਼ ਠੀਕ ਢੰਗ ਨਾਲ਼ ਗੱਲ ਨਹੀਂ ਕਰ ਰਹੇ। ਮਜ਼ਦੂਰਾਂ ਨਾਲ਼ ਇਸ ਢੰਗ ਨਾਲ਼ ਗੱਲ ਕੀਤੀ ਜਾ ਰਹੀ ਸੀ ਜਿਵੇਂ ਕਿ ਮਜ਼ਦੂਰ ਕੋਈ ਮੁਜਰਮ ਹੋਣ। ਉਹਨਾਂ ਨੂੰ ਬੇਲੋੜੀਆਂ ਗਲਤੀਆਂ ਕੱਢ ਕੇ ਵਾਪਸ ਭੇਜਿਆ ਜਾ ਰਿਹਾ ਸੀ। ਇਸ ਸਾਰੀ ਹਾਲਤ ਵੇਖ ਕੇ ਕਾਰਖਾਨਾ ਮਜ਼ਦੂਰ ਯੂਨੀਅਨ ਦੇ ਸਾਥੀਆਂ ਨੇ ਉੱਥੇ ਮੌਜੂਦ ਲੋਕਾਂ ਵਿਰੋਧ ਕਰਨ ਦਾ ਸੱਦਾ ਦਿੱਤਾ ਅਤੇ ਸਾਰਿਆਂ ਨੇ ਮਿਲ ਕੇ ਨਾਅਰੇਬਾਜ਼ੀ ਕੀਤੀ। ਅਸੀਂ ਮੰਗ ਕੀਤੀ ਕਿ ਸਾਨੂੰ ਸ਼ਰਤਾਂ ਦੇ ਵੇਰਵੇ ਦਿੱਤੇ ਜਾਣ ਜਿਨਾਂ ਦੇ ਅਧਾਰ 'ਤੇ ਕਿ ਵੋਟਰ ਕਾਰਡ ਬਣਾਉਣ ਲਈ ਫਾਰਮ ਸਵੀਕਾਰ ਕੀਤੇ ਜਾ ਰਹੇ ਹਨ। ਉਹਨਾਂ ਨੇ ਇੱਕ ਕਾਗਜ ਦਿੱਤਾ ਜਿਸ 'ਤੇ ਕਿ ਸਾਰੀਆਂ ਸਰਤਾਂ ਲਿਖੀਆਂ ਗਈਆਂ ਸਨ। ਇਸ ਫਾਰਮ ਵਿੱਚ ਮਾਂ-ਬਾਪ ਦੇ ਵੋਟਰ ਕਾਰਡ ਦੀ ਕਾਪੀ ਲਾਉਣ ਦੀ ਕੋਈ ਸ਼ਰਤ ਨਹੀਂ ਸੀ। ਇਸ 'ਤੇ ਉਹਨਾਂ ਅਧਿਕਾਰੀਆਂ ਨੇ ਚੋਣ ਕਮਿਸ਼ਨ ਵੱਲੋਂ ਜਾਰੀ ਇੱਕ ਸਰਕੂਲਰ ਚੋਂ ਇਹ ਸ਼ਰਤ ਪੜ੍ਹ ਕੇ ਸੁਣਾਈ ਗਈ। ਇਸ ਦੀ ਕਾਪੀ ਪਹਿਲਾਂ ਤਾਂ ਉਹਨਾਂ ਦਿੱਤੀ ਨਹੀਂ (ਕਿਹਾ ਗਿਆ ਕਿ ਇਹ ਅੰਦਰੂਨੀ ਸਰਕੂਲਰ ਹੈ) ਪਰ ਲੋਕਾਂ ਦੇ ਜ਼ੋਰਦਾਰ ਵਿਰੋਧ ਕਰਨ 'ਤੇ ਇਹ ਕਾਪੀ ਹਾਸਲ ਕਰ ਲਈ ਗਈ। 

ਕਾਰਖਾਨਾ ਮਜ਼ਦੂਰ ਯੂਨੀਅਨ ਦਾ ਮੰਨਣਾ ਹੈ ਕਿ ਚੋਣ ਕਮਿਸ਼ਨ ਵੱਲੋਂ ਜਾਰੀ ਕੀਤਾ ਗਿਆ ਇਹ ਸਰਕੂਲਰ, ਲੋਕਾਂ ਦੇ ਫਾਰਮਾਂ ਵਿੱਚ ਬੇਲੋੜੀਆਂ ਗਲਤੀਆਂ ਕੱਢ ਕੇ ਵਾਪਸ ਭੇਜਿਆ ਜਾਣਾ, ਲੋਕਾਂ ਨਾਲ਼ ਸਿੱਧੇ ਮੂੰਹ ਗੱਲ ਨਾਲ਼ ਕੀਤੇ ਜਾਣਾ ਆਦਿ ਸਭ ਇੱਕ ਸਾਜਿਸ਼ ਦੇ ਤਹਿਤ ਹੋ ਰਿਹਾ ਹੈ। ਇਸ ਸਾਜਿਸ਼ ਤਹਿਤ ਮਨਸ਼ਾ ਇਹ ਹੈ ਕਿ ਘੱਟ ਤੋਂ ਘੱਟ ਮਜ਼ਦੂਰਾਂ ਦੇ ਹੀ ਵੋਟਰ ਕਾਰਡ ਬਣਨ। ਇਸ ਦਾ ਸਬੂਤ ਇਹ ਵੀ ਹੈ ਕਿ ਵੈਸੇ ਤਾਂ ਚੋਣ ਕਮਿਸ਼ਨ ਵੱਲੋਂ ਫਾਰਮ ਜਮਾਂ ਕਰਾਉਣ ਦਾ ਸਮਾਂ 1 ਅਕਤੂਬਰ 2012 ਤੋਂ ਲੈ ਕੇ 31 ਅਕਤੂਬਰ 2012 ਤੱਕ ਦਾ ਪੂਰੇ 31 ਦਿਨ ਦਾ ਸਮਾਂ ਰੱਖਿਆ ਗਿਆ ਹੈ ਪਰ ਇਸ ਥਾਂ 'ਤੇ ਇਸ ਸਮੇਂ ਦੌਰਾਨ ਸਿਰਫ ਐਤਵਾਰ ਨੂੰ ਹੀ ਫਾਰਮ ਲਏ ਜਾ ਰਹੇ ਹਨ ਯਾਨੀ ਸਿਰਫ ਚਾਰ ਦਿਨ! ਹਜ਼ਾਰਾਂ ਮਜ਼ਦੂਰਾਂ, ਜਿਹਨਾਂ ਸਾਰਿਆਂ ਦੀ ਛੁੱਟੀ ਵੀ ਐਤਵਾਰ ਨੂੰ ਨਹੀਂ ਹੁੰਦੀ ਸਗੋਂ ਹਫਤੇ ਵਿੱਚ ਵੱਖ ਵੱਖ ਦਿਨ ਦੀ ਛੁੱਟੀ ਹੁੰਦੀ ਹੈ, ਲਈ ਚਾਰ ਐਤਵਾਰਾਂ ਦਾ ਸਮਾਂ ਰੱਖਿਆ ਜਾਣਾ ਇਹ ਦਰਸਾਉਂਦਾ ਹੈ ਕਿ ਮਜ਼ਦੂਰਾਂ ਦੇ ਵੋਟਰ ਕਾਰਡ ਬਣਾਉਣ ਦੀ ਅਸਲ 'ਚ ਮਨਸ਼ਾ ਹੀ ਨਹੀਂ ਹੈ। ਇਸ ਸਾਜਿਸ਼ ਪਿੱਛੇ ਕੋਣ ਹੈ ਇਹ ਜਰੂਰ ਸਾਹਮਣੇ ਆਉਣਾ ਚਾਹੀਦਾ ਹੈ।
ਅਸੀਂ ਇਹ ਮੁੱਦਾ ਕੱਲ ਨੂੰ ਡੀ.ਸੀ. ਦਫਤਰ ਵਿੱਖੇ ਲਗਾਏ ਜਾ ਰਹੇ ਧਰਨੇ ਦੌਰਾਨ ਜ਼ੋਰਦਾਰ ਢੰਗ ਨਾਲ਼ ਉਠਾਵਾਂਗੇ। ਸਾਡੀ ਮੰਗ ਹੈ ਕਿ ਮਾਂ-ਬਾਪ ਦੇ ਵੋਟਰ ਕਾਰਡ ਦੀ ਕਾਪੀ ਨਾਲ਼ ਨੱਥੀ ਕਰਨ ਦੀ ਸ਼ਰਤ ਹਟਾਈ ਜਾਵੇ, ਜੋ ਵੀ ਵਿਅਕਤੀ ਉਮਰ ਅਤੇ ਸਥਾਨ ਸਬੰਧੀ ਲੋੜੀਂਦੇ ਦਸਤਾਵੇਜ ਜਮਾਂ ਕਰਵਾਉਂਦਾ ਹੈ ਉਸ ਦਾ ਵੋਟਰ ਕਾਰਡ ਬਣਾਇਆ ਜਾਵੇ, ਲੋਕਾਂ ਨੂੰ ਬੇਲੋੜਾ ਪ੍ਰੇਸ਼ਾਨ ਕਰਨਾ ਬੰਦ ਕੀਤਾ ਜਾਵੇ, ਫਾਰਮ ਜਮਾਂ ਕਰਾਉਣ ਦੀ ਸਮਾਂ-ਸੀਮਾਂ ਇੱਕ ਮਹੀਨਾ ਵਧਾਈ ਜਾਵੇ ਅਤੇ ਰੋਜਾਨਾ ਸਵੇਰੇ 9 ਤੋਂ ਪੰਜ ਵਜੇ ਤੱਕ ਫਾਰਮ ਸਵੀਕਾਰ ਕੀਤੇ ਜਾਣ। ਗੈਰਕਾਨੂੰਨੀ ਸਰਕੂਲਰ ਲਈ ਜਿੰਮੇਵਾਰੀ ਅਧਿਕਾਰੀਆਂ ਨੂੰ ਸਸਪੈਂਡ ਕੀਤਾ ਜਾਵੇ। 

ਲਖਵਿੰਦਰ ਇੱਕ ਮਜਦੂਰ ਆਗੂ ਹੈ ਅਤੇ ਅੱਜਕਲ ਕਾਰਖਾਨਾ ਮਜ਼ਦੂਰ ਯੂਨੀਅਨ ਦੇ ਸੰਚਾਲਕ ਵਜੋਂ ਸਰਗਰਮ ਹੈ