Showing posts with label DD. Show all posts
Showing posts with label DD. Show all posts

Wednesday, June 17, 2015

ਯਾਦਾਂ ਵਿਛੜੇ ਸੱਜਣ ਪ੍ਰੋ ਕੰਵਲਜੀਤ ਦੀਆਂ

ਇੱਕ ਸਾਲ ਪਹਿਲਾਂ ਤੁਰ ਗਿਆ ਸੀ ਪ੍ਰੋ. ਕੰਵਲਜੀਤ ਸਿੰਘ ਢੁੱਡੀਕੇ
ਲੁਧਿਆਣਾ, 17 ਜੂਨ 2015: (ਪੰਜਾਬ ਸਕਰੀਨ ਬਿਊਰੋ):

ਜਲੰਧਰ ਦੂਰਦਰਸ਼ਨ ਦੇ ਨਿੳੂਜ਼ ਰੀਡਰ ਅਤੇ ਗੁਰੂ ਨਾਨਕ ਦੇਵ ਇੰਜੀਨੀਅਰਿੰਗ ਕਾਲਜ, ਲੁਧਿਆਣਾ ਦੇ ਇਲੈਕਟਰੋਨਿਕਸ ਵਿਭਾਗ ਦੇ ਸਾਬਕਾ ਮੁੱਖੀ ਸਵਰਗੀ ਪ੍ਰੋਫੈਸਰ ਕੰਵਲਜੀਤ ਸਿੰਘ ਢੁੱਡੀਕੇ, ਜੋ ਕਿ ਬੀਤੇ ਸਾਲ ਅਕਾਲ ਚਲਾਣਾ ਕਰ ਗਏ ਸਨ, ਦੀ ਪਹਿਲੀ ਬਰਸੀ ਮਿਤੀ 20 ਜੂਨ ਦਿਨ ਸ਼ਨਿੱਚਰਵਾਰ ਨੂੰ ਸਵੇਰੇ 8 ਵਜੇ ਤੋਂ 9 ਵਜੇ ਤੱਕ ਸਥਾਨਕ ਗੁਰੂ ਨਾਨਕ ਦੇਵ ਇੰਜੀਨੀਅਰਿੰਗ ਕਾਲਜ, ਲੁਧਿਆਣਾ ਦੇ ਗੁਰਦੁਆਰਾ ਸਾਹਿਬ ਵਿਖੇ ਮਨਾਈ ਜਾਵੇਗੀ। ਇਸ ਮੌਕੇ ਸੁਖਮਨੀ ਸਾਹਿਬ ਦੇ ਪਾਠ ਦਾ ਭੋਗ ਪੈਣ ਉਪਰੰਤ ਵੈਰਾਗਮਈ ਕੀਰਤਨ ਹੋਵੇਗਾ ਅਤੇ ਪ੍ਰੋਫੈਸਰ ਕੰਵਲਜੀਤ ਸਿੰਘ ਢੁੱਡੀਕੇ ਦੀਆਂ ਸਮਾਜ ਪ੍ਰਤੀ ਸੇਵਾਵਾਂ ਨੂੰ ਯਾਦ ਕੀਤਾ ਜਾਵੇਗਾ। 

ਦੱਸਣਯੋਗ ਹੈ ਕਿ ਪ੍ਰੋਫੈਸਰ ਕੰਵਲਜੀਤ ਸਿੰਘ ਢੁੱਡੀਕੇ ਬੀਤੇ ਸਾਲ 28 ਸਤੰਬਰ ਨੂੰ ਅਕਾਲ ਚਲਾਣਾ ਕਰ ਗਏ ਸਨ। ਉਹ ਬਹੁਪੱਖੀ ਸਖ਼ਸ਼ੀਅਤ ਦੇ ਮਾਲਕ ਸਨ। ਕੈਨੇਡਾ ਦੇ ਵੱਖ-ਵੱਖ ਰੇਡੀਓ ਚੈਨਲਾਂ ’ਤੇ ਉਨ੍ਹਾਂ ਦੀਆਂ ਖ਼ਬਰਾਂ ਪੰਜਾਬੀ ਭਾਈਚਾਰੇ ਵਿੱਚ ਬਹੁਤ ਹੀ ਮਕਬੂਲ ਹੁੰਦੀਆਂ ਸਨ। ਇਸ ਤੋਂ ਇਲਾਵਾ ਉਹ ਇੱਕ ਵਧੀਆ ਲੇਖਕ, ਪੱਤਰਕਾਰ, ਚਿੱਤਰਕਾਰ, ਫੋਟੋ ਕਲਾਕਾਰ, ਰੰਗਕਰਮੀ, ਖੇਡ ਪ੍ਰਮੋਟਰ ਅਤੇ ਸਮਾਜ ਸੇਵੀ ਸਨ। ਫੋਟੋ ਕਲਾਕਾਰੀ ਵਿੱਚ ਉਨ੍ਹਾਂ ਨੂੰ 130 ਦੇ ਕਰੀਬ ਅੰਤਰਰਾਸ਼ਟਰੀ ਪੁਰਸਕਾਰ ਮਿਲੇ। ਉਹ ਪਿਛਲੇ ਲੰਮੇ ਸਮੇਂ ਤੋਂ ਪ੍ਰਸਿੱਧ ਜਰਖ਼ੜ ਖੇਡਾਂ ਨਾਲ ਇੱਕ ਖੇਡ ਪ੍ਰਮੋਟਰ ਵਜੋਂ ਜੁੜੇ ਹੋਏ ਸਨ। ਇਸ ਤੋਂ ਇਲਾਵਾ ਗੁਰੂ ਨਾਨਕ ਦੇਵ ਇੰਜੀਨੀਅਰਿੰਗ ਕਾਲਜ, ਲੁਧਿਆਣਾ ਵਿੱਚ ਇਲੈਕਟਰੋਨਿਕਸ ਵਿਭਾਗ ਦੇ ਪ੍ਰੋਫੈਸਰ ਅਤੇ ਮੁੱਖੀ ਵਜੋਂ ਸੇਵਾਵਾਂ ਦੇ ਰਹੇ ਸਨ। ਉਨ੍ਹਾਂ ਦੀ ਬੇਵਕਤੀ ਮੌਤ ਨਾਲ ਢੁੱਡੀਕੇ ਪਰਿਵਾਰ ਅਤੇ ਸਮਾਜ ਸੇਵੀ ਸੰਸਥਾਵਾਂ ਨੂੰ ਨਾ ਪੂਰਾ ਹੋਣ ਵਾਲਾ ਘਾਟਾ ਪਿਆ। ਉਨ੍ਹਾਂ ਦੇ ਪਰਿਵਾਰ ਅਤੇ ਗੁਰੂ ਨਾਨਕ ਦੇਵ ਇੰਜੀਨੀਅਰਿੰਗ ਕਾਲਜ, ਲੁਧਿਆਣਾ ਦੇ ਸਮੂਹ ਸਟਾਫ਼ ਵੱਲੋਂ ਉਨ੍ਹਾਂ ਦੀ ਪਹਿਲੀ ਬਰਸੀ ਸ਼ਰਧਾ ਅਤੇ ਸਤਿਕਾਰ ਨਾਲ ਮਨਾਈ ਜਾ ਰਹੀ ਹੈ। 

Sunday, March 22, 2015

ਅੰਮ੍ਰਿਤਸਰ ਦੀ ਮਨਪ੍ਰੀਤ ਸੱਗੂ ਬਣੀ ਮਿਸ ਵਰਲਡ ਪੰਜਾਬਣ 2015


Sun, Mar 22, 2015 at 8:42 PM
ਨਿਊਜ਼ੀਲੈਂਡ ਦੀ ਗਗਨਦੀਪ ਰੰਧਾਵਾ “ਮਿਸ ਐਨ ਆਰ ਆਈ ਪੰਜਾਬਣ“ 
ਬਠਿੰਡਾ ਦੀ ਹਰਭਵਰੀਤ ਡਾਂਡੀਵਾਲ “ਮਿਸ ਇੰਡੀਆਂ ਪੰਜਾਬਣ“ ਚੁਣੀਆਂ ਗਈਆਂ
ਜਲੰਧਰ: 22 ਮਾਰਚ 2015:(ਪੰਜਾਬ ਸਕਰੀਨ ਬਿਊਰੋ):
ਅਮ੍ਰਿਤਸਰ ਦੀ 19 ਸਾਲਾ ਪੰਜ ਫੁਟ ਅੱਠ ਇੰਚ ਲੰਬੀ ਖੂਬਸੂਰਤ  ਮੁਟਿਆਰ ਮਨਪ੍ਰੀਤ ਸੱਗੂ ਨੇ ਹਜ਼ਾਰਾਂ ਦਰਸ਼ਕਾਂ, ਜਿਊਰੀ ਮੈਂਬਰਾਂ ਦੇ ਨਾਲ ਨਾਲ ਦੁਨੀਆਂ ਭਰ ਵਿਚ ਡੀ ਡੀ ਪੰਜਾਬੀ ਸਮੇਤ ਬਹੁਤ ਸਾਰੇ ਟੀ ਵੀ ਚੈਨਲਾਂ ਤੇ ਅਨਲਾਈਨ ਲਾਈਵ ਸ਼ੋਅ ਵੇਖ ਰਹੇ ਕਰੋੜਾ ਪੰਜਾਬੀਆਂ ਨੂੰ ਅਪਣੀ ਦਿਲਕਸ਼ ਤੇ ਮਨਮੋਹਕ ਅਦਾਕਾਰੀ ਨਾਲ ਮੋਹਿਤ ਕਰਕੇ ਬਾਰਵੇਂ ਅੰਤਰ ਰਾਸ਼ਟਰੀ ਵਿੱਲਖਣ ਸੁੰਦਰਤਾ ਮੁਕਾਬਲੇ “ਮਿਸ ਵਰਲਡ ਪੰਜਾਬਣ 2015 ਦਾ ਸਰਵ-ਉੱਚ ਖਿਤਾਬ ਅਪਣੇ ਨਾਮ ਕਰ ਲਿਆ। ਵਿਸ਼ਵ ਦੇ ਕੋਨੇ ਕੋਨੇ ਤੋਂ ਵੱਖ ਵੱਖ ਪੜਾਵਾਂ  ਵਿਚ ਪੰਜਾਬਣ ਮੁਕਾਬਲੇ ਜਿਤ ਕੇ ਫਾਈਨਲ ਵਿਚ ਪੁਜੀਆਂ ਸੋਲਾਂ ਕਲਾਂ ਸੰਪੂਰਨ 16 ਪੰਜਾਬਣਾਂ ਨੇ ਸਾਬਤ ਕਰ ਵਿਖਾਇਆ ਕਿ ਉਹ ਸਿਰਫ ੧੬ ਪੰਜਾਬੀ ਮਾਪਿਆਂ ਦੀਆਂ ਧੀਆਂ ਨਹੀ ਸਗੋ ਪੰਜਾਬੀ ਜਗਤ ਦੀਆਂ ਸਮੁਚੀਆਂ ਪੰਜਾਬਣਾ ਦੀ ਲਿਆਕਤ, ਹੁਸਨ ਤੇ ਚੜਦੀ ਕਲਾ ਦੀਆਂ ਅਲੰਬਰਦਾਰ ਹਨ। ਸ਼ੋਅ ਦੋਰਾਣ ਜਦੋਂ ਕੈਨੇਡਾ, ਆਸਟ੍ਰੇਲੀਆ, ਨਿਊਜ਼ੀਲੈਂਡ, ਇੰਗਲੈਂਡ ਤੇ ਦੁਬਈ ਦੀਆਂ ਮੁਟਿਆਰਾਂ ਅਪਣੀ ਕਲਾ ਦਾ ਲੋਹਾ ਮਨਵਾ ਰਹੀਆਂ ਸਨ ਤਾਂ ਦਰਸ਼ਕਾਂ ਵਿਚੋ ਸਮਰਥਕ ਅਪਣੇ ਅਪਣੇ ਦੇਸ਼ ਦੇ ਕੌਮੀ ਝੰਡੇ ਹਿਲਾ ਕਿ ਇਹਨਾਂ ਦੀ ਹੌਂਸਲਾ ਅਫਜਾਈ ਕਰਦੇ, ਗੁਰਦਾਸ ਮਾਨ ਦੀਆਂ ਸਤਰਾਂ“ ਜਿਹੜੇ ਦੇਸ਼  ਵਿਚ ਰਹੀਏ, ਉਸਦਾ ਬੁਰਾ ਨਹੀਂ ਮੰਗੀਦਾ“ ਨੂੰ ਸਚ ਕਰ ਵਿਖਾ ਰਹੇ ਸਨ । ਇਸ ਦੇ ਨਾਲ ਹੀ ਨਵੀਂ ਚੁਣੀ ਗਈ ਵਿਸ਼ਵ ਪੰਜਾਬਣ ਨੇ ਪੰਜਾਬੀ ਵਿਰਾਸਤ ਦੇ ਪ੍ਰੋੜ ਹੋਣ ਅਤੇ ਸ੍ਰ: ਜਸਮੇਰ ਸਿੰਘ ਢੱਟ ਦੁਆਰਾ1993 ਵਿਚ ਲਗਾਏ “ਪੰਜਾਬਣ“ ਰੂਪੀ ਬੂਟੇ ਦੇ ਬੋਹੜ ਹੋਣ ਦਾ ਸੁਨੇਹਾਂ ਵੀ ਘਰ ਘਰ ਪੁੰਹਚਾ ਦਿੱਤਾ।ਨਾਲ ਹੀ ਸਮੁੱਚੀ ਦੁਨੀਆਂ ਨੂੰ ਇਸ ਗੱਲ ਦਾ ਪਤਾ ਲਗ ਗਿਆ ਕਿ ਸੱਭਿਆਚਾਰ ਦੀ ਸੇਵਾ ਦੇ ਪਰਦੇ ਹੇਠ ਨੰਗੇਜ਼ਵਾਦ ਦਾ ਪ੍ਰਚਾਰ ਕਰਕੇ ਵਣਜ ਕਰਨ ਵਾਲੇ ਅਪਣੀ ਬੋਲੀ ਤੇ ਸੱਭਿਆਚਾਰ ਦੇ ਸ਼ੁਭਚਿੰਤਕ ਨਹੀਂ ਹਨ। ਮੁਕਾਬਲੇ ਵਿਚ ਦੂਜੇ ਨੰਬਰ ਤੇ ਰਹਿਣ ਵਾਲੀ ਬਠਿੰਡਾ ਦੀ ਰਹਿਣ ਵਾਲੀ ਪੰਜਾਬ ਹਾਈਕੋਰਟ ਵਿਚ ਵਕਾਲਤ ਕਰਦੀ ਹਰਭਵਰੀਤ ਦੰਡਵਾਲ ਨੂੰ “ਮਿਸ ਇੰਡੀਆਂ ਪੰਜਾਬਣ‘ ਤੇ ਤੀਸਰੇ ਨੰਬਰ ਤੇ ਰਹਿਣ ਵਾਲੀ ਨਿਊਜ਼ੀਲੈਂਡ ਦੀ ਗਗਨਦੀਪ ਰੰਧਾਵਾ ਨੂੰ ਐਨ ਆਰ ਆਈ ਪੰਜਾਬਣ ਅਲਾਨਿਆਂ ਗਿਆ।
ਪਹਿਲੇ “ਡੋਲੀ ਰਾਊਂਡ ਵਿਚ ਇਹ ਮੁਟਿਆਰਾਂ ਸਚਮੁਚ ਧਰਤੀ ਤੇ ਉਤਰੀਆਂ ਅਪਸਰਾਂ ਜਾਪ ਰਹੀਆਂ ਸਨ ਗੁਰਦੇਵ ਪੁਰਬਾ ਦੇ ਲਿਖੇ ਅਤੇ ਵਤਨਜੀਤ ਦੇ ਗਾਏ ਗੀਤ, ‘ ਧੀਆਂ ਦਾ ਦੂਰ ਟਿਕਾਣਾ“ ਨੇ ਸੋਨੇ ਤੇ ਸੁਹਾਗੇ ਦਾ ਕੰਮ ਕੀਤਾ ਜਿਸ ਕਰਕੇ ਬਹੁਤੇ ਦਰਸ਼ਕਾਂ ਦੀਆਂ ਅੱਖਾਂ ਨਮ ਹੋ ਗਈਆਂ ।ਸੋਲੋ ਡਾਂਸ ਰਾਂਊਡ ਵਿਚ ਇਹਨਾਂ ਮੁਟਿਆਰਾਂ ਨੇ ਖੂਬਸੂਰਤ ਅਦਾਵਾਂ ਅਤੇ ਨਖਰਿਆਂ ਨਾਲ ਨਾਮਵਰ ਗਾਇਕਾਂ ਦੇ ਗਾਏ ਗੀਆਂ ਤੇ ਡਾਂ ਕਰਕੇ ਅਪਣੀ ਕਲਾ ਦਾ ਲੋਹਾ ਮਨਵਾਇਆ । ਇਸ ਦੋਰ ਵਿਚ ਦੁਬਈ ਦੀ ਨਵਨੀਤ ਬੈਂਸ ਨੇ “ ਮਾਂ ਜੀ ਮਾਂ ਜੀ“, ਜਲੰਧਰ ਦੀ  ਜਸਨੀਤ ਮਠਾੜੂ ਨੇ, “ਮੇਰਾ ਲ਼ੌਂਗ ਗਵਾਚਾ“, ਇੰਗਲੈਂਡ ਤੋਂ ਜੀਵਨਜੋਤ ਸੰਧੂ ਨੇ “ਜਾਗੋ ਵਾਲੀਏ“, ਪਟਿਆਲਾ ਦੀ ਅਮਨਜੋਤ ਨੇ“ਮੇਰੀ ਨਚਦੀ ਦੀ ਝਾਂਜਰ“, ਗੁਰਦਾਸਪੁਰ ਦੀ ਜਤਿੰਦਰ ਮਾਨ ਨੇ ‘ਨਚਦੀ ਨੂੰ ਮੈਨੂੰ ਵੇਖ ਕੇ“, ਚੰਡੀਗੜ ਦੀ ਸੰਦੀਪ ਭੁਲਰ ਨੇ “ਇਕ ਮੇਰੇ ਬੋਲ ਉਤੇ“, ਮੋਹਾਲੀ ਦੀ ਹਰਹੇਮਨੀਲ ਨੇ “ਗਾਜਰ ਵਰਗੀ ਮੈੰ“, ਸੰਗਰੂਰ ਦੀ ਸੰਦੀਪ ਚੀਮਾਂ ਨੇ “ਪੰਜਾਬ“ ਹਰਿਆਣਾ ਤੋਂ ਆਈ ਗੁਰਪ੍ਰੀਤ ਕੌਰ ਨੇ “ਮੇਰੇ ਨਚਦੀ ਦੇ ਪੈਰਾਂ ਹੇਠ“ , ਸੱਤ ਸਮੁੰਦਰੋਂ ਪਾਰ ਨਿਊਜ਼ੀਲੈਂਡ ਤੋਂ ਆਈ ਮੁਟਿਆਰ ਗਗਨ ਰੰਧਾਵਾ ਨੇ “ਮੈਂ ਸਿਧੀ ਸਾਦੀ“ ਆਸਟ੍ਰੇਲੀਆਂ ਦੀ ਜੋਤੀ ਸ਼ਰਮਾਂ ਨੇ,“ਚਿੱਟੀ ਚਿੱਟੀ ਚਾਨਣੀ“, ਕੈਨੇਡਾ ਦੀ ਰਮਨਜੀਤ ਚੀਮਾਂ ਨੇ, “ ਸਾਨੂੰ ਤੇ ਐਸਾ ਮਾਹੀ“, ਇਸੇ ਤਰਾਂ ਲੁਧਿਆਣਾ ਦੀ ਤੇਘਵਿੰਦਰ ਮੁੰਡੀ ਨੇ, “ਦੋਸ਼ ਮੇਰੀ ਅੱਖ ਦਾ“ ਬਠਿੰਡਾਂ ਦੂ ਲੰਮ ਸਲਮੀ ਮੁਟਿਆਰ ਹਰਭਵਰੀਤ ਡਾਂਡੀਵਾਲ ਨੇ ਗੁਰਮੀਤ ਬਾਵਾ ਦੇ ਗੀਤ“ ਪਾਣੀਆਂ ਨੂੰ ਮੈਂ ਚਲੀ ਆਂ“ ਦਿੱਲੀ ਤੋਂ ਆਈ ਮੁਟਿਆਰ ਸ਼ਵਨਪ੍ਰੀਤ ਗਰੇਵਾਲ ਨੇ, “ਜੁਲਫਾਂ ਦੇ ਨਾਗ“ ਅਤੇ ਇਸ ਮੁਕਾਬਲੇ ਦੀ ਜੇਤੂ ਮੁਟਿਆਰ ਮਨਪ੍ਰੀਤ ਸੱਗੂ ਨੇ “ਸੋਨੇ ਦਾ ਗੜਵਾ“ ਗੀਤਾਂ ਉਪਰ ਡਾਂਸ ਕਰਕੇ ਦਰਸ਼ਕਾਂ ਤੇ ਜੱਜਾਂ ਨੂੰ ਮੰਤਰ ਮੁਗਧ ਕਰ ਦਿਤਾ।
ਮੁਕਾਬਲੇ ਵਿਚ ਜੋਤੀ ਸ਼ਰਮਾਂ ਆਸਟ੍ਰੇਲੀਆਂ ਨੇ “ਖੂਬਸੂਰਤ ਚੇਹਰਾ“, ਹਰਿਆਣਾ ਦੀ ਗੁਰਪ੍ਰੀਤ ਕੌਰ ਨੇ“ ਮਿਲਾਪੜੀ ਪੰਜਾਬਣ“, ਦਿਲੀ ਦੀ ਸ਼ਵਪਨਪ੍ਰੀਤ ਨੇ “ਖੁਬਸੂਰਤ ਮੁਸਕਾਨ“, ਕੈਨੇਡਾ ਦੀ ਰਮਨਜੀਤ ਚੀਮਾਂ ਨੇ “ਮ੍ਰਿਗ ਨੈਣੀ“ ਦੇ ਖਿਤਾਬ ਹਾਸਲ ਕੀਤੇ, ਜਦੋਂ ਕਿ ਦੁੱਬਈ ਦੀ ਨਵਨੀਤ ਬੈਂਸ ਨੂੰ “ਲੰਮ ਸੁਲਮੀ ਗੁੱਤ“,ਇੰਗਲੈਂਡ ਦੀ ਜੀਵਨਜੋਤ ਸੰਧੂ ਨੂੰ “ਸੁੰਦਰ ਤੱਵਚਾ“ ਪਟਿਆਲਾ ਦੀ ਅਮਨਜੋਤ ਸਿੱਧੂ ਬੁੱਧੀਮਾਨ ਪੰਜਾਬਣ“, ਮੋਹਾਲੀ ਦੀ ਹਰਹੇਮਨੀਲ “ਗੁਣਵੰਤੀ ਪੰਜਾਬਣ“ ਸੰਗਰੂਰ ਦੀ ਸੰਦੀਪ ਚੀਮਾਂ “ਨਿਪੁੰਨ ਪੰਜਾਬਣ“ , ਚੰਡੀਗੜ ਦੀ ਸੰਦੀਪ ਭੁੱਲਰ “ ਸੁੰਦਰ ਲਾੜੀ“ ਲੁਧਿਆਣਾ ਦੀ ਤੇਘਵਿੰਦਰ ਮੁੰਡੀ “ਖੂਬਸੂਰਤ ਲੋਕ ਨਾਚ“  ਤੇ ਜਲ਼ੰਧਰ ਦੀ ਜਸਨੀਤ ਮਠਾੜੂ “ਸੁੱਘੜ ਸਿਆਣੀ ਪੰਜਾਬਣ“ ਐਲਾਨੀਆਂ ਗਈਆਂ । ਗਿੱਧਿਆਂ ਦੀ ਰਾਣੀ“ ਦਾ ਖਿਤਾਬ ਗੁਰਦਾਸਪੁਰ ਦੀ ਜਤਿੰਦਰ ਮਾਨ ਦੀ ਝੋਲੀ ਪਿਆ।ਆਯੁਰ ਹਰਬਲ ਦੇ ਮਨਮਿੰਦਰ ਸਿੰਘ ਨਾਰੰਗ ਸਿੰਘ.ਲੁਧਿਆਣਾ ਦੇ ਨੀਲੀਬਾਲ ਤੋਂ ਸੋਨੂੰ ਨੀਲੀਬਾਲ, ਇਮਰਜਿੰਗ ਇੰਡੀਆ ਤੋ ਗੁਰਪ੍ਰੀਤ ਸੰਧੂ ਅਤੇ ਹਰਮਿੰਦਰ ਸਿੰਘ, ਉੱਘੇ ਫੋਟੋਗਰਾਫਰ ਰਿੱਕੀ ਸਿੰਘ, ਮਸ਼ਹੂਰ ਬਿਊਟੀਸ਼ਨ ਰਿਤੂ ਕੋਲਨਟਾਈਨ ਨੇ ਜੇਤੂ ਮਟਿਆਰਾਂ ਨੂੰ ਇਨਾਮ ਤਕਸੀਮ ਕੀਤੇ ।

ਉਘੇ ਰੰਗ ਕਰਮੀ ਡਾ: ਨਿਰਮਲ  ਜੌੜਾ ਤੇ ਬੀਬਾ ਪ੍ਰਿਆ ਲ਼ਖਨਪਾਲ ਨੇ ਖੂਬਸੂਰਤ ਸ਼ੇਅਰਾਂ, ਵਿਅੰਗਮਈ ਟਿਪਣੀਆਂ ਤੇ ਕਮੇਡੀ ਰਾਹੀਂ ਸ਼ੋਅ ਨੂੰ ਹੋਰ ਵੀ ਪ੍ਰਭਾਵਸ਼ਾਲੀ ਬਣਾ ਦਿਤਾ। ਵਿਰਸੇ ਤੇ ਸੱਭਿਆਚਾਰ ਨਾਲ ਸੰਬਧਤ ਸਵਾਲ-ਜਵਾਬ ਰਾਊਂਢ ਦਰਸ਼ਕਾਂ ਲਈ ਵੀ ਦਿਲਚਸਪੀ ਦਾ ਕਾਰਨ ਬਣ ਗਿਆ ਭਾਵੇਂ ਕੁੁਝ ਮੁਟਆਰਾਂ ਸੁਖਾਲੇ ਸੁਆਲਾ ਦਾ ਠੀਕ ਜੁਆਬ ਨਾ ਦੇ ਸਕੀਆਂ। ਮੁਕਾਬਲੇ ਦੇ ਆਖਰੀ ਗਿੱਧਾ ਦੋਰ ਵਿਚ ਇਹਨਾਂ ਮੁਟਿਆਰਾਂ ਨੇ ਅਜਿਹੀ ਧੱਮਚ ਪਟੀ ਕਿ ਹਜ਼ਾਰਾਂ ਮੀਲ ਦੂਰ ਟੀ ਵੀ ਤੇ ਲੁਤਫ ਲੈ ਰਹੇ ਪੰਜਾਬੀ ਵੀ ਨਚਣ ਲਈ ਕਜਬੂਰ ਹੋ ਗਏ। ਨਿਰਣਾਇਕਾਂ ਦੀ ਭੂਮਿਕਾ ਸਿਰਮੋਰ ਗਾਇਕਾ ਅਮਰ ਨੂਰੀ, ਪੰਜਾਬੀ ਫਿਲਮਾਂ ਦੀ ਹੀਰੋਇਨ ਗੁਰਲੀਨ ਚੌਪੜਾ, ਫਿਲਮ ਅਦਾਕਾਰ ਸੁਨੀਤਾ ਧੀਰ ਤੇ ਨਾਮਵਰ ਕਮੇਡੀਅਨ ਜਸਵਿੰਂਦਰ ਭੱਲਾ ਨੇ ਨਿਭਾਈ। ਸ਼ੋਅ ਦੋਰਾਨ ਚੋਟੀ ਦੇ ਗਾਇਕਾਂ ਪੰਮੀ ਬਾਈ, ਸੁਖਵਿੰਦਰ ਸੁੱਖੀ, ਰਣਜੀਤ ਬਾਵਾ, ਅਮਰ ਨੂਰੀ ਅਤੇ ਮੰਨਾ ਢਿਲੋਂ ਨੇ ਆਪਣੀ ਗਾਇਕੀ ਦਾ ਜਾਦੂ ਬਿਖੇਰ ਕੇ ਦਰਸ਼ਕਾਂ ਦੇ ਦਿਲ ਲੁਟ ਲਏ । ਜਸਵਿੰਦਰ ਭੱਲਾ ਤੇ ਬਾਲਮੁਕੰਦ ਸ਼ਰਮਾਂ ਨੇ ਕਮੇਡੀ ਰਾਹੀਂ ਦਰਸ਼ਕਾਂ ਦੀ ਢਿਡੀ ਪੀੜਾਂ ਪਾਈਆਂ । ਇਸ ਪ੍ਰੋਗਰਾਮ ਦਾ ਨਾਰਥ ਅਮਰੀਕਾ ਦੇ ਪਹਿਲੇ ਪੰਜਾਬੀ ਚੈਨਲ “ਜਸ ਪੰਜਾਬੀ“  ਤੋਂ ਇਲਾਵਾ ਈ ਵੀ ਆਈ ਚੈਨਲ, ਫਾਸਟ ਵੇ ਤੇ ਯੂ ਟਿਊਬ ਤੇ ਕੀਤਾ ਗਿਆ।
ਇਸ ਸਮੇਂ ਪ੍ਰੌ ਗੁਰਭਜਨ ਗਿਲ ਨੇ ਦਰਸ਼ਕਾਂ ਨੂੰ ਜੀ ਆਇਆਂ ਕਿਹਾ, ਜਦੋਂ ਕਿ  ਦੂਰਦਰਸ਼ਨ ਦੇ ਡਾਰੈਕਟਰ  ਡਾ. ਓੁਮ ਗੌਰੀ ਦੱਤ ਸ਼ਰਮਾ ਨੇ ਪ੍ਰਧਾਨਗੀ ਭਾਸ਼ਨ ਤੇ ਇਸ ਸ਼ੋਅ ਦੇ ਕਰਤਾ ਧਰਤਾ ਸਰਦਾਰ ਜਸਮੇਰ ਢੱਟ ਨੇ ਧੰਨਵਾਦੀ ਸ਼ਬਦ ਸ਼ਾਝੇਂ  ਕੀਤੇ ।ਦਰਸ਼ਕਾਂ ਵਿਚ ਹੋਰਨਾਂ ਤੋਂ ਇਲਾਵਾ ਕੈਨੇਡਾ ਤੋਂ ਉੱਘੇ ਜਰਨਲਿਸਟ ਸਰਦਾਰ ਅਮਰ ਸਿੰਘ ਭੁਲੱਰ, ਦਰਸ਼ਨ ਅੋਲ਼ਖ,ਸ਼ਮਸੇਰ ਸੰਧੂ,  ਜਗਜੀਤ ਸਿੰਘ ਯੂਕੋ, ਡਾ: ਬਿਕਰਮਜੀਤ ਸਿੰਘ, ਹਰਦਿਆਲ ਸਿੰਘ ਅਮਨ,ਬੀਬਾ ਜਸਗੀਤ ਸੋਫੀਆਂ ਢੱਟ, ਬੀਬਾ ਚੰਨਦੀਪ ਵਿਰਕ, ਕਿਰਨ ਬਾਲਾ, ਜਤਿਨ ਗੋਇਲ, ਗੁਰਦੇਵ ਪੁਰਬਾ, ਗੁਰਮੀਤ ਪੁਰਬਾ ਮੁਕਤਸਰੀ, ਵਤਨਜੀਤ ਤੇ  ਕਰਮਜੀਤ ਢੱਟ ਵਰਗੀਆਂ ਸ਼ਖਸੀਅਤਾਂ ਹਾਜ਼ਰ ਸਨ।

Tuesday, May 28, 2013

ਲੱਗਦੈ ਮੁੜ ਆਏਗਾ ਦੂਰਦਰਸ਼ਨ ਦਾ ਜ਼ਮਾਨਾ

ਡਿਜ਼ੀਟਲ ਟੀ. ਵੀ. ਲਈ ਵਾਜਬ ਕੀਮਤਾਂ 'ਤੇ ਸੈੱਟ ਟਾਪ ਬਾਕਸ 
ਕੋਈ ਜ਼ਮਾਨਾ ਸੀ ਜਦੋਂ ਹਰ ਮਧਵਰਗੀ ਪਰਿਵਾਰ ਕਿਸੇ ਨ ਕਿਸੇ ਤਰ੍ਹਾਂ ਟੀ ਵੀ ਸੈਟ ਘਰ ਲਿਆ ਕੇ ਬੜੀ ਵੱਡੀ ਪ੍ਰਾਪਤੀ ਸਮਝਦਾ ਸੀ ਕਿ ਚਲੋ ਸਿਨਮੇ ਜਾਣ ਦਾ ਖਰਚਾ ਬਚਿਆ। ਉਦੋਂ ਦੂਰਦਰਸ਼ਨ ਦਾ ਬੋਲਬਾਲਾ ਸੀ। ਗਿਆਨ-ਵਿਗਿਆਨ, ਗੀਤ-ਸੰਗੀਤ, ਅਤੇ ਖਬਰਾਂ ਤੋਂ ਲੈ ਕੇ ਫਿਲਮਾਂ ਤੱਕ ਸਭ ਕੁਝ ਬੜੇ ਚਾਵਾਂ ਨਾਲ ਦੇਖਿਆ ਜਾਂਦਾ ਸੀ। ਲੋਕ ਰੋਟੀ ਟੁੱਕ ਵੇਲੇ ਸਿਰ ਬਣਾ ਕੇ ਟੀ ਵੀ ਸਾਹਮਣੇ ਸਜ ਜਾਂਦੇ। ਜੇ ਆਂਢ ਗੁੰਧ ਕਿਸੇ ਘਰ ਟੀ ਵੀ ਨਹੀਂ ਹੁੰਦਾ ਸੀ ਤਾਂ ਉਸਨੂੰ ਵੀ ਸੱਦਾ ਪੱਤਰ ਦਿੱਤਾ ਜਾਂਦਾ ਕਿ    ਅੱਜ ਫਲਾਣੀ ਫਿਲਮ ਆਉਣੀ ਹੈ। ਫਿਰ ਆਇਆ ਜ਼ੀਟੀਵੀ ਦਾ ਜ਼ਮਾਨਾ। ਲੋਕ ਦੂਰਦਰਸ਼ਨ "ਨੁੱਕੜ" ਵੀ  ਭੁੱਲ ਗਏ "ਗੁਲ ਗੁਲਸ਼ਨ ਗੁਲਫਾਮ" ਵੀ, "ਬੁਨਿਆਦ" ਵੀ, "ਹਮ ਲੋਗ" ਵੀ, "ਤਮਸ", "ਉੜਾਨ", "ਰਜਨੀ", "ਸੁਰਭੀ", "ਤੇਨਾਲੀ ਰਾਮ", "ਵਿਕਰਮ ਔਰ ਬੇਤਾਲ", ਸਭ ਕੁਝ ਗਾਏ ਗੁਜ਼ਰੇ ਜਮਾਨੇ ਦੀਆ ਦਲ ਹੋ ਗਿਆ। "ਰਾਮਾਇਣ" ਦਾ ਰਿਕਾਰਡ ਤੋੜ ਜਾਦੂ ਵੀ ਉਤਰ ਗਿਆ। ਲੋਕ ਰੁਝ ਗਏ "ਕਹਾਣੀ ਘਰ ਘਰ ਕੀ ਦੇਖਣ ਵਿਚ"। 
ਓਧਰ ਸੀਰਿਅਲ ਬਣਾਉਣ ਵਾਲੇ ਨਿਰਮਾਤਾਵਾਂ ਨੂੰ ਕੱਕਾ ਅਜਿਹਾ ਰਾਸ ਆਇਆ ਕਿ ਬਸ ਇਸੇ ਅੱਖਰ ਤੇ ਸੀਰਿਅਲ ਬਣਾਉਣ ਲੱਗ ਪਏ। "ਕਿਊਂਕਿ ਸਾਸ ਭੀ ਕਭੀ ਬਹੂ ਥੀ", "ਕਸੌਟੀ ਜ਼ਿੰਦਗੀ ਕੀ", ਅਤੇ ਅਜਿਹੇ ਬਹੁਤ ਸਾਰੇ ਪ੍ਰੋਗਰਾਮ ਲੋਕਾਂ ਦੀ ਜ਼ਿੰਦਗੀ ਦਾ ਅਹਿਮ ਹਿੱਸਾ ਬਣ ਗਏ। ਘਰ ਪਰਿਵਾਰ ਭਾਵੇਂ ਭੁੱਖਾ ਬੈਠਾ ਰਹੇ ਪਰ ਜੇ ਸੀਰਿਅਲ ਵਾਲੇ ਪਾਤਰ ਨੂੰ ਕੁਝ ਹੁੰਦਾ ਤਾਂ ਅੱਖਾਂ 'ਚ ਗੰਗਾ ਯਮੁਨਾ ਵਹਿ ਤੁਰਦੀਆਂ। ਬਸ ਇਹੀ ਉਹ ਦੌਰ ਸੀ ਜਦੋਂ ਕੇਬਲ ਦੇ ਭਾਅ ਅਸਮਾਨ ਛੂਨ ਲੱਗ ਪਏ। ਭਾਵੇਂ ਵਿਦੇਸ਼ਾਂ ਅਤੇ ਵੱਡੀਆਂ ਸ਼ਹਿਰਾਂ ਦੇ ਮੁਕਾਬਲੇ ਇਹ ਰੇਟ ਕਾਫੀ ਘੱਟ ਸਨ ਪਰ ਸਥਾਨਕ ਅਰਥਚਾਰੇ ਅਤੇ ਆਮਦਨ ਨੂੰ ਮੁਖ ਰੱਖਦਿਆਂ ਕਾਫੀ ਵਜ਼ਨੀ ਸਨ। ਫਿਰ ਸੈਟ-ਟੋਪ ਬਾਕਸ ਨੇ ਆਪਣਾ ਰੰਗ ਦਿਖਾਇਆ। ਸੱਤ ਕੁ ਸੋ ਤੋਂ ਲੈ ਕੇ ਹਜ਼ਾਰ ਬਾਰਾਂ ਸੋ ਪਹਿਲੀ ਵਾਰ ਅਤੇ ਫਿਰ ਹਰ ਮਹੀਨੇ ਨਿਸਚਿਤ ਰਕਮ ਦੀ ਅਦਾਇਗੀ। ਬਹੁਤ ਸਾਰੇ ਲੋਕਾਂ ਨੇ ਦੂਰ ਦਰਸ਼ਨ ਵਾਲੀਆਂ ਦਿਸ਼ਾਂ ਲਗਵਾ ਲਈਆਂ। ਬਸ ਇੱਕੋ ਵਾਰ ਹਜ਼ਾਰ ਪੰਦਰਾਂ ਸੋ ਦਾ ਖਰਚਾ ਅਤੇ ਫਿਰ ਹਰ ਮਹੀਨੇ ਬਚਤ ਹੀ ਬਚਤ। ਜਿਹਨਾਂ ਪਰਿਵਾਰਾਂ ਦੇ ਬੱਚੇ ਇਸਤੋਂ ਸੰਤੁਸ਼ਟ ਨਹੀਂ ਸਨ ਉਹਨਾਂ ਲਈ ਖੁਸ਼ਖਬਰੀ ਆਈ ਹੈ। ਨਵੀਂ ਦਿੱਲੀ ਤੋਂ ਮਿਲੀਆਂ ਖਬਰਾਂ ਦਸਦੀਆਂ ਹਨ ਕਿ ਭਾਰਤੀ ਦੂਰਸੰਚਾਰ ਰੈਗੂਲੇਟਰੀ ਅਥਾਰਟੀ (ਟ੍ਰਾਈ) ਨੇ ਡਿਜ਼ੀਟਲ ਟੀ. ਵੀ. ਲਈ ਵਾਜਬ ਕੀਮਤਾਂ 'ਤੇ ਸੈੱਟ ਟਾਪ ਬਾਕਸ ਅਤੇ ਹੋਰ ਯੰਤਰ ਮੁਹੱਈਆ ਕਰਵਾਉਣ ਲਈ ਮੰਗਲਵਾਰ ਨੂੰ ਨਵੇਂ ਫੀਸ ਸੰਬੰਧੀ ਆਦੇਸ਼ ਜਾਰੀ ਕੀਤੇ। ਇਥੇ ਇਕ ਜਾਰੀ ਬਿਆਨ 'ਚ ਟ੍ਰਾਈ ਨੇ ਕਿਹਾ ਕਿ ਉਸ ਦੇ ਫੀਸ ਸੰਬੰਧੀ ਆਦੇਸ਼ ਦੇ ਤਹਿਤ ਕੇਬਲ ਸੇਵਾ ਮੁਹੱਈਆ ਕਰਵਾਉਣ ਵਾਲੇ ਖਪਤਕਾਰਾਂ ਤੋਂ 400 ਰੁਪਏ ਜਾਂ 800 ਰੁਪਏ ਜਮ੍ਹਾ ਕਰਵਾ ਕੇ ਕ੍ਰਮਵਾਰ 55.66 ਰੁਪਏ ਜਾਂ 50.66 ਰੁਪਏ ਦੇ ਮਾਸਿਕ ਕਿਰਾਏ 'ਤੇ ਸੈੱਟ ਟਾਪ ਬਾਕਸ ਮੁਹੱਈਆ ਕਰਵਾ ਸਕਦੇ ਹਨ। 

ਡੀ. ਟੀ. ਐੱਚ. ਸੇਵਾ ਮੁਹੱਈਆ ਕਰਵਾਉਣ ਵਾਲਿਆਂ ਦੇ ਮਾਮਲੇ 'ਚ ਜੇਕਰ ਪੇਸ਼ਗੀ ਰਕਮ 500 ਹੈ ਤਾਂ 71.75 ਰੁਪਏ ਪ੍ਰਤੀ ਮਹੀਨੇ 'ਤੇ ਅਤੇ ਜੇਕਰ ਪੇਸ਼ਗੀ 1000 ਰੁਪਏ ਹੈ ਤਾਂ 65.50 ਰੁਪਏ ਦੇ ਮਾਸਿਕ ਕਿਰਾਏ 'ਤੇ ਖਪਤਕਾਰਾਂ ਨੂੰ ਸੀ. ਪੀ. ਈ. ਮੁਹੱਈਆ ਕਰਵਾਇਆ ਜਾ ਸਕਦਾ ਹੈ। ਤਿੰਨ ਸਾਲ ਦੀ ਮਿਆਦ ਖਤਮ ਹੋਣ 'ਤੇ ਪੇਸ਼ਗੀ ਰਕਮ ਗਾਹਕਾਂ ਨੂੰ ਪਰਤਾ ਦਿੱਤੀ ਜਾਵੇਗੀ ਅਤੇ ਗਾਹਕ ਸੈੱਟ ਟਾਪ ਬਾਕਸ ਜਾਂ  ਸੀ. ਪੀ. ਈ. ਦਾ ਮਾਲਕ ਬਣ ਜਾਵੇਗਾ। ਕਿਓਂ ਹੁਣ ਹੈ ਨਾ ਖੁਸ਼ਖਬਰੀ? ਸਾਰੇ ਚੈਨਲ ਦੇਖੋ-ਪੇਡ ਵੀ ਅਤੇ ਫਰੀ ਵਾਲੇ ਵੀ। ਕਿਸਤਾਂ ਕਰਨ ਨਾਲ ਜਨਤਾ ਨੂੰ ਵੀ ਕਾਫੀ ਸੁਖ ਹੋਵੇਗੀ ਅਤੇ ਸਰਕਾਰ  ਨੂੰ ਵੀ ਫਾਇਦਾ ਕਿਓਂਕਿ ਹੁਣ ਹਰ ਘਰ ਪੁੱਜ ਸਕੇਗਾ ਸਰਕਾਰ ਦਾ ਪ੍ਰਚਾਰ। -ਰੈਕਟਰ ਕਥੂਰੀਆ 

Thursday, December 13, 2012

ਦਸਤਾਵੇਜ਼ੀ ਫ਼ਿਲਮਾਂ ਦਾ ਨਿਰਮਾਤਾ

ਆਗਿਆਪਾਲ ਸਿੰਘ ਰੰਧਾਵਾ ਦੀ ਦੇਣ ਨਿਰਸੰਦੇਹ ਕਾਬਲ-ਏ-ਜ਼ਿਕਰ 
Posted On December - 8 - 2012
ਏ.ਪੀ.ਐਸ. ਰੰਧਾਵਾ
ਦੂਰਦਰਸ਼ਨ ਕੇਂਦਰ ਜਲੰਧਰ ਦੇ ਤਜਰਬੇਕਾਰ ਨਿਰਮਾਤਾ ਤੇ ਡੀ.ਡੀ. ਪੰਜਾਬੀ ਦੇ ਇੰਚਾਰਜ, ਆਗਿਆਪਾਲ ਸਿੰਘ ਰੰਧਾਵਾ ਨੇ ਅਣਗਿਣਤ ਯਾਦਗਾਰੀ ਅਤੇ ਮਿਆਰੀ ਦਸਤਾਵੇਜ਼ੀ ਫ਼ਿਲਮਾਂ ਦਾ ਨਿਰਮਾਣ ਕਰਕੇ, ਕੌਮੀ ਪੱਧਰ ’ਤੇ ਨਾਂ ਪੈਦਾ ਕੀਤਾ ਹੈ। ਇਨ੍ਹਾਂ ਦਸਤਾਵੇਜ਼ੀ ਫ਼ਿਲਮਾਂ ਵਿੱਚੋਂ ਕਈਆਂ ਨੂੰ ਰਾਸ਼ਟਰੀ ਐਵਾਰਡ ਵੀ ਮਿਲੇ। ਮਾਣਮੱਤੀਆਂ ਸ਼ਖ਼ਸੀਅਤਾਂ ਬਾਰੇ ਦਸਤਾਵੇਜ਼ੀ ਫ਼ਿਲਮਾਂ ਤਿਆਰ ਕਰਨ ਵਿੱਚ ਰੰਧਾਵਾ ਨੂੰ ਖਾਸ ਮੁਹਾਰਤ ਹਾਸਲ ਹੈ। ਦੂਰਦਰਸ਼ਨ, ਜਨ ਪ੍ਰਸਾਰਨ ਸੇਵਾ ਦਾ ਮਾਧਿਅਮ, ਧਰਤੀ ਦਾ ਲਾਲ, ਗਿਆਨੀ ਜ਼ੈਲ ਸਿੰਘ, ਛੱਤਬੀਡ਼ ਜੰਗਲੀ ਜੀਵਾਂ ਦੀ ਰੱਖ ਤੇ ਪੰਜਾਬ ਦੀ ਕੋਇਲ ਮਰਹੂਮ ਸੁਰਿੰਦਰ ਕੌਰ ਬਾਰੇ ਉਸ ਵੱਲੋਂ ਬਣਾਈਆਂ ਦਸਤਾਵੇਜ਼ੀ ਫ਼ਿਲਮਾਂ ਨੇ ਕੌਮੀ ਪੱਧਰ ’ਤੇ ਨਾਮਣਾ ਖੱਟਿਆ।
ਤਾਜ਼ਾ ਪਹਿਲਕਦਮੀ ਕਰਦਿਆਂ ਉਸ ਵੱਲੋਂ ਪਹਿਲਵਾਨ ਅਦਾਕਾਰ ਦਾਰਾ ਸਿੰਘ ਬਾਰੇ ਬਡ਼ੀ ਮਿਹਨਤ ਨਾਲ ਤਿਆਰ ਕੀਤੀ ਅਤੇ ਪਿਛਲੇ ਦਿਨੀਂ ਪ੍ਰਸਾਰਤ ਹੋਈ ਦਸਤਾਵੇਜ਼ੀ ਫ਼ਿਲਮ ‘ਦਾਰਾ ਸਿੰਘ ਨਹੀਂ ਕਿਸੇ ਨੇ ਬਣ ਜਾਣਾ, ਘਰ-ਘਰ ਪੁੱਤ ਜੰਮਦੇ’, ਨੇ ਦਾਰਾ ਸਿੰਘ ਦੀ ਜ਼ਿੰਦਗੀ, ਪ੍ਰਾਪਤੀਆਂ ਅਤੇ ਦੇਣ ਨੂੰ ਇੱਕ ਅਸਲੋਂ ਨਵੇਂ ਜ਼ਾਵੀਏ ਤੋਂ ਪ੍ਰਸਤੁਤ ਕੀਤਾ ਹੈ। ਦਾਰਾ ਸਿੰਘ ਦੇ ਮੂੰਹੋਂ ਕਢਵਾਈ ਜਾਣਕਾਰੀ ਸੋਨੇ ’ਤੇ ਸੁਹਾਗਾ ਹੋ ਨਿੱਬਡ਼ੀ ਹੈ। ਉਹ ਦੱਸਦਾ ਹੈ, ‘ਧਰਮੂਚੱਕ ਹੈ ਪਿੰਡ ਮੇਰਾ, ਰੰਧਾਵੇ ਜੱਟਾਂ ਦੇ ਗੋਤ ਵਾਲਾ ਮਾਝੇ ਦਾ ਪਿੰਡ, ਜਿੱਥੇ ਬਚਪਨ ਬੀਤਿਆ, ਜਵਾਨ ਹੋਇਆ, ਖੇਤੀ ਕੀਤੀ ਅਤੇ ਏਥੋਂ ਹੀ ਤਾਏ ਦੇ ਸੱਦਣ ’ਤੇ ਸਿੰਗਾਪੁਰ ਚਲਾ ਗਿਆ। ਉੱਥੇ ਕੁਸ਼ਤੀ ਲਡ਼ਨ ਲੱਗਿਆ। ਪੈਰ ਜੰਮਦੇ ਗਏ। ਓਡ਼ਕ ਉਦੋਂ ਕੁੱਲ ਆਲਮ ਵਿੱਚ, ਦਾਰੇ ਦੇ ਨਾਂ ਦੇ ਡੰਕੇ ਵੱਜ ਗਏ ਜਦੋਂ ਉਹਨੇ ਵਿਸ਼ਵ ਜੇਤੂ ਕਿੰਗਕਾਂਗ ਨੂੰ ਢਾਹ ਲਿਆ ਅਤੇ ਵਿਸ਼ਵ ਚੈਂਪੀਅਨ ਬਣ ਗਿਆ।
ਦਸਤਾਵੇਜ਼ੀ ਦਾ ਉਹ ਹਿੱਸਾ ਬਡ਼ਾ ਦਿਲਚਸਪ ਹੈ, ਜਿਸ ਵਿੱਚ ਉਸ ਨੇ ਹਿੰਦੀ ਫ਼ਿਲਮਾਂ ’ਚ ਆਉਣ ਦੀ ਕਹਾਣੀ ਬਿਆਨ ਕੀਤੀ ਹੈ। ਆਪਣੇ ਪਿੰਡ ਧਰਮੂਚੱਕ ਨਾਲ ਉਹਨੂੰ ਅੰਤਾਂ ਦਾ ਮੋਹ ਸੀ। ਜਦੋਂ ਵੀ ਵਿਹਲ ਮਿਲਦੀ, ਪਿੰਡ ਚੱਕਰ ਮਾਰਦਾ ਤੇ ਪੁਰਾਣੇ ਬੇਲੀਆਂ ਨੂੰ ਮਿਲਦਾ। ਉਸ ਦੇ ਜੱਦੀ ਪਿੰਡ ਦੇ ਹਾਣੀਆਂ ਨੇ ਉਸ ਬਾਰੇ ਰੌਚਕ ਜਾਣਕਾਰੀ ਦਿੱਤੀ ਹੈ। ਇੱਕ ਹਾਣੀ ਦੱਸਦੈ ਕਿ ਕੇਰਾਂ ਕਣਕ ਦੀ ਵਾਢੀ ਵੇਲੇ ਇੱਕੋ ਟੱਕ ਪੂਰਾ ਕਿੱਲਾ ਵਾਢੀ ਕਰਕੇ ਸਾਹ ਲਿਆ। ਉਸ ਦੀ ਮਾਣਮੱਤੀ ਪ੍ਰਾਪਤੀ ਹੈ, ਦਸਤਾਵੇਜ਼ੀ ਫ਼ਿਲਮ ‘ਜਗਤ ਤਪੰਦਾ’, ਜਿਹਡ਼ੀ ਵਿਸ਼ਵ ਟੈਲੀਵਿਜ਼ਨ ਐਵਾਰਡ ਲਈ ਭੇਜੀ ਗਈ ਹੈ। ਰੰਧਾਵੇ ਵੱਲੋਂ ਬਣਾਏ ਪ੍ਰੋਗਰਾਮ ‘ਇੰਡੀਆ ਐਟ ਮੈਲਬਰਨ’ ਨੂੰ ਵੀ 2006 ਵਿੱਚ ਕੌਮੀ ਐਵਾਰਡ ਮਿਲਿਆ। ਉਸ ਦੇ ਤਿਆਰ ਕੀਤੇ ਪ੍ਰੋਗਰਾਮਾਂ ‘ਪੁਸ਼ਪਾ ਗੁਜਰਾਲ ਸਾਇੰਸ ਸਿਟੀ’, ‘ਹਾਕੀ ਕਾ ਕਲਾਕਾਰ’, ‘ਡੀ.ਡੀ. ਪੰਜਾਬੀ ਇਨਾਗੂਰੇਸ਼ਨ’ ਵੀ ਇਨਾਮਾਂ ਲਈ ਨਾਮਜ਼ਦ ਹੋਈਆਂ। ਉਹਨੇ ‘ਮਨੋਰੰਜਨ ਗਿਆਨ ਵਿਗਿਆਨ’, ‘ਇੱਕ ਵਿਜੇ ਯਾਤਰੀ’, ‘ਅਪਰੇਸ਼ਨ ਅਲਰਟ’, ‘ਕੁਦਰਤ ਦੀ ਗੋਦ’, ‘ਪੰਜਾਬ ਸ਼ਾਂਤੀ ਕੀ ਓਰ’, ‘ਪੰਜਾਬ ਪ੍ਰਗਤੀ ਕੇ ਪਥ ਪਰ’ ਅਤੇ ‘ਕਲਾ ਮੇਲਾ’ ਵਰਗੇ ਤਾਰੀਖੀ ਪ੍ਰੋਗਰਾਮ ਤਿਆਰ ਕੀਤੇ। ਡੈਨਮਾਰਕ ਦੀ ਪੰਜਾਬੀ ਗਾਇਕਾ ਲਿਆ ਕੇ ਉਸ ਬਾਰੇ ਤਿਆਰ ਕੀਤੇ ਪ੍ਰੋਗਰਾਮ ਦੀ ਬਹੁਤ ਪ੍ਰਸ਼ੰਸਾ ਹੋਈ। ਯਸ਼ ਚੋਪਡ਼ਾ ਤੇ ਰਵੀ ਚੋਪਡ਼ਾ ਬਾਰੇ ਪ੍ਰੋਗਰਾਮ ਵੀ ਮਿਆਰੀ ਦਸਤਾਵੇਜ਼ੀ ਫ਼ਿਲਮਾਂ ਦੇ ਸਫ਼ਲ ਨਿਰਮਾਣ ਵਿੱਚ ਆਗਿਆਪਾਲ ਸਿੰਘ ਰੰਧਾਵਾ ਦੀ ਦੇਣ ਨਿਰਸੰਦੇਹ ਕਾਬਲ-ਏ-ਜ਼ਿਕਰ ਹੈ।-ਤੀਰਥ ਸਿੰਘ ਢਿੱਲੋਂ   (
ਰੋਜ਼ਾਨਾ ਪੰਜਾਬੀ ਟ੍ਰਿਬਿਊਨ ਚੋਂ ਧੰਨਵਾਦ ਸਹਿਤ )