Showing posts with label ਮਈ ਦਿਵਸ. Show all posts
Showing posts with label ਮਈ ਦਿਵਸ. Show all posts

Wednesday, May 01, 2013

ਮਈ ਦਿਵਸ ਤੇ ਹੋਏ ਕਈ ਥਾਈਂ ਸਮਾਗਮ

ਕਾਮਿਆਂ ਨੇ ਇੱਕ ਜੁੱਟ ਹੋ ਕੇ ਆਪਣੇ ਅਧਿਕਾਰਾਂ ਦੀ ਰਾਖੀ ਲਈ ਪ੍ਰਣ ਦੁਹਰਾਇਆ
ਲੁਧਿਆਣਾ ਬੱਸ ਅੱਡਾ ਤੇ ਸਮਾਗਮ
ਲੁਧਿਆਣਾ 1 ਮਈ (ਪੰਜਾਬ ਸਕਰੀਨ/ਰੈਕਟਰ ਕਥੂਰੀਆ): 1886 ਦੇ 1 ਮਈ ਦੇ ਉਹਨਾ ਸ਼ਹੀਦਾਂ,  ਜਿਹਨਾ ਨੇ ਮਜ਼ਦੂਰਾਂ ਦੇ ਕੰਮ ਦੇ ਲਈ 8 ਘੰਟੇ ਦੇ ਲਈ ਸ਼ਹੀਦਿਆਂ ਦਿੱਤੀਆਂ ਨੂੰ ਸ਼ਰਧਾਂਜਲੀ ਭੇਂਟ ਕਰਨ ਅਤੇ ਅਜੋਕੇ ਯੁਗ ਵਿੱਚ ਕਾਮਿਆਂ ਦੀਆਂ ਸਮੱਸਿਆਵਾਂ ਨੂੰ ਉਜਾਗਰ ਕਰਨ ਦੇ ਲਈ ਆਲ ਇੰਡੀਆ ਟ੍ਰੇਡ ਯੂਨੀਅਨ ਕਾਂਗ੍ਰਸ (ਏਟਕ) ਵਲੋਂ ਬੱਸ ਅੱਡਾ ਅਤੇ ਬਹਾਦਰਕੇ ਰੋਡ ਵਿਖੇ ਵਿਸ਼ਾਲ ਰੈਲੀਆਂ ਕੀਤੀਆਂ ਗਈਆਂ। ਰੈਲੀਆਂ ਨੂੰ ਸੰਬੋਧਨ ਕਰਦਿਆਂ ਵੱਖ ਵੱਖ ਬੁਲਾਰਿਆਂ ਨੇ ਯਾਦ ਕਰਾਇਆ ਕੇ ਦੇਸ਼ ਦੇ ਅਜ਼ਾਦੀ ਸੰਗਰਾਮ ਵਿੱਚ ਮਜ਼ਦੂਰਾਂ ਨੇ ਅਥਾਹ ਕੁਰਬਾਨੀਆਂ ਦਿੱਤੀਆਂ ਅਤੇ ਬਾਦ ਵਿੱਚ ਦੇਸ਼ ਦੇ ਨਿਰਮਾਣ ਵਿੱਚ ਭਰਪੂਰ ਯੋਗਦਾਨ ਪਾਇਆ। ਇਸਦੇ ਨਾਲ ਹੀ ਉਹਨਾ ਨੇ ਆਪਣੇ ਜਾਇਜ਼ ਹੱਕਾਂ ਜਿਵੇਂ ਕਿ ੮ ਘੰਟੇ ਦਾ ਕੰਮ, ਨੌਕਰੀ ਦੀ ਸੁਰੱਖਿਆ, ਪ੍ਰਾਵੀਡੈਂਟ ਫ਼ੰਡ, ਮੈਡੀਕਲ ਸਹੂਲਤਾਂ, ਘੱਟੋ ਘੱਟ ਵੇਤਨ, ਯੂਨੀਅਨ ਬਨਾਉਣ ਦਾ ਅਧਿਕਾਰ, ਮਹਿੰਗਾਈ ਦੇ ਨਾਲ ਉਜਰਤ ਵਿੱਚ ਵਾਧਾ ਆਦਿ ਦੇ ਲਈ ਸੰਘਬਸ਼ ਕੀਤੇ ਅਤੇ ਜਿੱਤਾਂ ਪ੍ਰਾਪਤ ਕੀਤੀਆਂ। ਨਾਲ ਹੀ ਸਮਾਜ ਦੇ ਲੋਕਾਂ ਦੇ ਸਮੁੱਚੇ ਵਿਕਾਸ ਨੂੰ ਵਿਸ਼ੇਸ਼ ਕਰ ਮਜ਼ਦੂਰਾਂ ਤੇ ਮੱਧਮ ਵਰਗ ਦੇ ਲਈ ਦੇਸ਼ ਦੀ ਧਰੋਹਰ ਜਿਵੇਂ ਕਿ ਰੇਲਵੇ, ਬੈਂਕਾਂ, ਕੋਇਲਾ ਤੇ ਲੋਹੇ ਦੀਆਂ ਖਾਨਾ, ਬੀਮਾ  ਖੇਤਰ, ਟਰਾਂਸਪੋਰਟ, ਟੈਲੀਕਾਮ ਖੇਤਰ ਆਦਿ ਦੇ ਰਾਸ਼ਟਰੀਕਰਨ ਦੇ ਲਈ ਸਿਰਤੋੜ ਜੱਦੋ ਜਹਿਦ ਕੀਤੀ। ਪਰ ਪਿਛਲੇ ਕੁਝ ਸਾਲਾਂ ਤੋਂ ਵਿਸ਼ਵ ਵਪਾਰ ਸੰਗਠਨ (ਡਬਲਯੂ ਟੀ ਓ) ਦੀਆਂ ਹਦਾਇਤਾਂ ਹੇਠ ਦੇਸ਼ ਵਿੱਚ ਨਵੀਂ ਆਰਥਿਕ ਨੀਤੀ ਅਪਣਾਏ ਜਾਣ ਤੋਂ ਬਾਦ ਇੱਕ ਇੱਕ ਕਰ ਕੇ ਇਹ ਸਾਰੇ ਹੱਕ ਖੋਹੇ ਜਾ ਰਹੇ ਹਨ। ਕਿਰਤ ਕਾਨੂੰਨਾਂ ਵਿੱਚ ਅਖੌਤੀ ਸੁਧਾਰ, ਜਿਹੜੇ ਕੇ ਅਸਲ ਵਿੱਚ ਉੱਚ ਧਨੀ ਵਰਗ ਦੇ ਹੱਕ ਵਿੱਚ ਹਨ, ਇਸਦੀ ਜੀੳਂਦੀ ਜਾਗਦੀ ਮਿਸਾਲ ਹਨ। ਸਰਕਾਰੀ ਖੇਤਰ ਨੂੰ ਬੜੇ ਗਿਣੇ ਮਿੱਥੇ ਢੰਗ ਦੇ ਨਾਲ ਸਮਾਪਤ ਕੀਤਾ ਜਾ ਰਿਹਾ ਹੈ ਅਤੇ ਸਰਕਾਰੀ ਖੇਤਰ ਵਿੱਚ ਵੀ ਮਜ਼ਦੂਰਾਂ ਦੇ ਨਾਲ ਸਬੰਧਤ ਕਾਨੂੰਨਾਂ ਦੀਆਂ ਧੱਜੀਆਂ ਉਡਾਈਆਂ ਜਾ ਰਹੀਆਂ ਹਨ। ਹਰ ਕੰਮ ਨੂੰ ਆਊਟ ਸੋਰਸ ਕਰ ਕੇ ਮਜ਼ਦੂਰਾਂ ਨੂੰ  ਠੇਕੇ ਤੇ ਕੱਚੀਆਂ ਨੌਕਰੀਆਂ ਦਿੱਤੀਆਂ ਜਾ ਰਹੀਆਂ ਹਨ ਅਤੇ ਉੱਥੇ ਉਹਨਾਂ ਨੂੰ ਬਣਦੇ ਹੱਕ ਨਹੀਂ ਦਿੱਤੇ ਜਾ ਰਹੇ। ਨਿਰਯਾਤ ਦੇ ਲਈ ਵਿਸ਼ੇਸ਼ ਆਰਥਿਕ ਖੇਤਰ ਉਸਾਰਨ ਦੇ ਨਾਂ ਹੇਠ ਮਜ਼ਦੁਰਾਂ ਤੋਂ ਯੂਨੀਅਨ ਬਨਾਉਣ ਦੇ ਹੱਕ ਵੀ ਖੋਏ ਜਾ ਰਹੇ ਹਨ। ਛੋਟੇ ੳਦਯੋਗਪਤੀਆਂ ਤੋਂ ਵੀ ਸਹੂਲਤਾਂ ਖੋਹੀਆਂ ਜਾ ਰਹੀਆਂ ਹਨ ਤੇ ਸਾਰੇ ਕਾਨੂੰਨ ਇਜਾਰੇਦਾਰਾਂ ਅਤੇ ਵਿਦੇਸ਼ੀ ਬਹੁਕੌਮੀ  ਕੰਪਨੀਆਂ ਦੇ ਹੱਕ ਵਿੱਚ ਬਣਾਏ ਜਾ ਰਹੇ ਹਨ। ਜਨਤਕ ਵੰਡ ਪ੍ਰਣਾਲੀ ਨੂੰ ਤਹਿਸ ਨਹਿਸ ਕਰ ਦਿੱਤਾ ਗਿਆ ਹੈ। ਇਸ ਕਰ ਕੇ ਗਰੀਬ ਲੋਕਾਂ ਵਿੱਚ ਕੁਪੋਸ਼ਣ ਵੱਧ ਰਿਹਾ ਹੈ। ਬੁਲਾਰਿਆਂ ਨੇ ਸੱਦਾ ਦਿੱਤਾ ਕਿ ਅੱਜ ਫ਼ਿਰ ਕੁਰਬਾਨੀਆਂ ਭਰੇ ਸੰਘਰਸ਼ ਕਰਨ ਦੀ ਲੋੜ ਹੈ। ਉਹਨਾਂ ਮੰਗ ਕੀਤੀ ਕਿ ਠੇਕੇਦਾਰੀ ਪ੍ਰਬੰਧ ਖਤਮ ਕਰ ਕੇ ਰੈਗੂਲਰ ਭਰਤੀ ਕੀਤੀ ਜਾਣੀ ਚਾਹੀਦੀ ਹੈ, ਮਜ਼ਦੂਰਾਂ ਨੂੰ ਹੱਕ ਦਿਵਾੳਣ ਦੇ ਲਈ ਲੇਬਰ ਮਹਿਕਮੇ ਨੂੰ ਸਹੀ ਢੰਗ ਦੇ ਨਾਲ ਕੰਮ ਕਰਨਾ ਚਾਹੀਦਾ ਹੈ। ਨਵੀਂ ਪੈਨਸ਼ਨ ਨੀਤੀ ਖਤਮ ਕਰ ਕੇ ਪੁਰਾਣੀ ਲਾਗੂ ਕਰਨੀ ਚਾਹੀਦੀ ਹੈ। ਰੈਲੀ ਨੂੰ ਏਟਕ ਦੇ ਸ਼ਹਿਰੀ ਸਕੱਤਰ ਕਾ ਓ ਪੀ ਮਹਿਤਾ, ਕਾ ਡੀ ਪੀ ਮੌੜ, ਕਾ ਕਰਤਾਰ ਸਿੰਘ ਬੁਆਣੀ, ਡਾ ਅਰੁਣ ਮਿੱਤਰਾ, ਬਿਜਲੀ ਬੋਰਡ ਆਗੂ ਕਾ ਕੇਵਲ ਸਿੰਘ ਬਨਵੈਤ, ਕਾ ਪਰਦੀਪ ਸਿੰਘ, ਕਾ ਮਨਜੀਤ ਸਿੰਘ ਗਿੱਲ-ਰੋਡਵੇਜ਼ ਤੋਂ, ਕਾ ਵਿਜੈ ਕੁਮਾਰ-ਸਫ਼ਾਈ ਲੇਬਰ ਯੂਨੀਅਨ ਨਗਰ ਨਿਗਮ, ਕਾ ਰਮੇਸ਼ ਰਤਨ, ਪੰਖਾਬ ਬੈਂਕ ਇੰਮਪਲਾਈਜ਼ ਫ਼ੈਡਰੇਸ਼ਨ ਦੇ ਸਕੱਤਰ ਕਾ ਨਰੇਸ਼ ਗੌੜ,  ਕਾ ਗੁਰਨਾਮ ਸਿੰਘ ਸਿਧੂ, ਪੀ ਏ ਯੂ ਇੰਮਪਲਾਈਜ਼ ਯੂਨੀਅਨ ਵਲੋਂ ਕਾ ਪਰਮਜੀਤ ਸਿੰਘ ਗਿੱਲ ਅਤੇ ਡਾ ਗੁਲਜ਼ਾਰ ਗੋਰੀਆ, ਮਿਸਤ੍ਰੀ ਮਜ਼ਦੂਰ ਯੂਨੀਅਨ ਵਲੋਂ ਕਾ ਕਾਮੇਸ਼ਵਰ, ਕਾ ਰਾਮ ਸਿੰਘ, ਕਾ ਟੁਨ ਟੁਨ ਯਾਦਵ, ਕਾ ਲੱਡੂ ਸ਼ਾਹ, ਕਾ ਚਰਨ ਸਰਾਭਾ, ਕਾ ਮਨਜੀਤ ਸਿੰਘ ਬੂਟਾ ਅਤੇ ਕਾ ਫ਼ਰੈਡਰਿਕਨੇ ਸੰਬੋਧਨ ਕੀਤਾ। 
 ਬਹਾਦਰਕੇ ਰੋਡ ਤੇ ਸਮਾਗਮ
ਬਹਾਦੁਰਕੇ ਰੋਡ ਤੇ ਹੋਜ਼ਰੀ ਵਰਕਰਜ਼ ਯੂਨੀਅਨ ਵਲੋਂ ਵਿਸ਼ਾਲ ਰੈਲੀ ਕੀਤੀ ਗਈ ਜਿਸ ਵਿੱਚ ਸੈਂਕੜੇ ਕਾਮੇ ਸ਼ਾਮਿਲ ਹੋਏ। ਇੲਨਾ ਨੂੰ ਕਾ ਫ਼ਿਰੋਜ਼ ਮਾਸਟਰ, ਕਾ ਉਪੀ ਮਹਿਤਾ, ਕਾ ਡੀ ਪੀ ਮੌੜ, ਕਾ ਰਮੇਸ਼ ਰਤਨ, ਡਾ ਅਰੁਣ ਮਿੱਤਰਾ, ਕਾ ਮਨਜੀਤ ਸਿੰਘ ਬੂਟਾ, ਕਾ ਉਮ ਪਰਕਾਸ਼ ਸ਼ਰਮਾ, ਕਾ ਨਗੀਨਾ ਰਾਮ ਨੇ ਸੰਬੋਧਨ ਕੀਤਾ। ਕਾ ਫ਼ਿਰੋਜ਼ ਮਾਸਟਰ ਨੇ ਕਿਾਹਾ ਕਿ ਜਲਦੀ ਹੀ ਇਸ ਖੇਤਰ ਵਿੱਚ ਏਟਕ ਦਾ ਦਫ਼ਤਰ ਖੋਲਿਆ ਜਾਏਗਾ ਤਾਂ ਂਜੋ ਕਾਮਿਆਂ ਦੇ ਮਸਲਿਆਂ ਨੂੰ ਹਲ ਕੀਤਾ ਜਾ ਸਕੇ। ਉਹਨਾ ਮੰਗ ਕੀਤੀ ਕਿ ਹੋਜ਼ਰੀ ਕਾਮਿਆਂ ਦੀ ਉਜਰਤ ਅਤੇ ਪੀਸ ਰੇਟਾਂ ਨੂੰ ਕੀਮਤਾਂ ਦੇ ਨਾਲ ਂਜੋੜਿਆ ਜਾਏ।  ਨਾਲ ਹੀ ਸਾਰੇ ਕਾਮਿਆਂ ਦੇ ਲਈ ਮੈਡੀਕਲ ਸਹੂਲਤਾਂ ਈ ਐਸ ਆਈ ਦੇ ਤਹਿਤ ਦਿੱਤੀਆਂ ਜਾਣ ਤੇ ਪੈਨਸ਼ਨ ਤੇ ਪ੍ਰਾਵੀਡੈਂਟ ਫ਼ੰਡ ਦੀ ਸਹੂਲਤ ਦਿੱਤੀ ਜਾਏ।
 ਨਗਰ ਨਿਗਮ ਲੁਧਿਆਣਾ ਵਿਖੇ ਰੈਲੀ ਨੂੰ ਕਾ ਵਿਜੈ ਥੁਮਾਰ, ਕਾ ਰਮੇਸ਼ ਰਤਨ, ਕਾ  ਕਰਤਾਰ ਬੁਆਣੀ, ਕਾ ਸ਼ਾਮ ਲਾਲ, ਕਾ ਅਸ਼ੋਕ ਕੁਮਾਰ ਨੇ ਸੰਬੋਧਨ ਕੀਤਾ।  
ਡੀ ਪੀ ਮੌੜ
ਜਨਰਲ ਸਕੱਤਰ
ਜਾਇੰਟ ਕੌਂਸਲ ਆਫ਼ ਟੇ੍ਰਡ ਯੂਨੀਅਨਜ਼, ਲੁਧਿਆਣਾ
ਮੋਬਾਈਲ: ੯੪੧੭੬੦੨੩੩੩

Tuesday, April 30, 2013

ਲੁਧਿਆਣੇ ਦੇ ਪੁੱਡਾ ਮੈਦਾਨ ਵਿੱਚ ਮਈ ਦਿਵਸ ਕਾਨਫਰੰਸ

ਕੌਮਾਂਤਰੀ ਮਜ਼ਦੂਰ ਦਿਵਸ 'ਤੇ ਵਿਸ਼ੇਸ਼: 
ਮੌਜੂਦਾ ਹਾਲਾਤਾਂ ਨੂੰ ਬਦਲਣ ਲਈ ਅੱਗੇ ਦਾ ਰਾਹ ਤਿਆਰ ਕਰਨਾ ਹੀ ਮਈ ਦਿਵਸ ਮਨਾਉਣ ਦਾ ਇੱਕ ਸਹੀ ਤਰੀਕਾ
ਸਭਨਾਂ ਕਿਰਤੀਆਂ-ਨੌਜਵਾਨਾਂ ਨੂੰ ਕਾਨਫਰੰਸ ਵਿੱਚ ਸ਼ਾਮਲ ਹੋਣ ਦੀ ਅਪੀਲ
ਲੁਧਿਆਣਾ: 30 ਅਪ੍ਰੈਲ 2013:ਕਾਰਖਾਨਾ ਮਜ਼ਦੂਰ ਯੂਨੀਅਨ, ਪੰਜਾਬ ਦੇ ਪ੍ਰਧਾਨ ਲਖਵਿੰਦਰ ਨੇ ਮਈ ਦਿਵਸ ਦੀ ਪੂਰਵ ਸੰਧਿਆ ਤੇ ਇੱਕ ਵਾਰ ਫੇਰ ਇੰਨਕ਼ਲਾਬੀ ਵਿਰਸੇ ਨੂੰ ਯਾਦ ਕੀਤਾ ਹੈ ਅਤੇ ਕੁਰਬਾਨੀਆਂ ਭਰੇ ਜੇਤੂ ਇਤਿਹਾਸ ਦਾ ਜ਼ਿਕਰ ਬੜੇ ਹੀ ਮਾਣ ਨਾਲ ਕੀਤਾ ਹੈ। ਮਈ ਦਿਵਸ ਮਨਾਉਣ ਦੇ ਐਲਾਨ ਦਾ ਬਿਆਨ ਜਾਰੀ ਕਰਦਿਆਂ ਉਹਨਾਂ ਕਿਹਾ ਕਿ ਸੰਸਾਰ ਭਰ ਦੇ ਮਜ਼ਦੂਰਾਂ-ਕਿਰਤੀਆਂ ਨੂੰ ਹਰ ਤਰ੍ਹਾਂ ਲੁੱਟ-ਖੋਹ ਦੇ ਖਿਲਾਫ਼ ਇੱਟਜੁਟ ਲੜਾਈ ਵਿੱਢਣ ਦਾ ਸੱਦਾ ਦਿੰਦਾ ਕੌਮਾਂਤਰੀ ਮਜ਼ਦੂਰ ਦਿਵਸ ਕੱਲ ਪੂਰੇ ਸੰਸਾਰ ਵਿੱਚ ਮਨਾਇਆ ਜਾਣਾ ਹੈ। 128ਵੇਂ ਕੌਮਾਂਤਰੀ ਮਜ਼ਦੂਰ ਦਿਵਸ ਦੇ ਮੌਕੇ 'ਤੇ, ਭਲਕੇ, ਸਵੇਰੇ 10 ਵਜੇ, ਕਾਰਖਾਨਾ ਮਜ਼ਦੂਰ ਯੂਨੀਅਨ, ਪੰਜਾਬ ਅਤੇ ਟੈਕਸਟਾਈਲ ਹੌਜ਼ਰੀ ਕਾਮਗਾਰ ਯੂਨੀਅਨ, ਪੰਜਾਬ ਦੁਆਰਾ ਲੁਧਿਆਣੇ ਦੇ ਚੰਡੀਗੜ੍ਹ ਸੜਕ 'ਤੇ ਸਥਿਤ ਪੁੱਡਾ (ਗਲਾਡਾ) ਮੈਦਾਨ ਵਿੱਚ ਮਈ ਦਿਵਸ ਕਾਨਫਰੰਸ ਦਾ ਆਯੋਜਨ ਕੀਤਾ ਜਾ ਰਿਹਾ ਹੈ। ਟੈਕਸਟਾਈਲ ਹੌਜ਼ਰੀ ਕਾਮਗਾਰ ਯੂਨੀਅਨ ਦੇ ਪ੍ਰਧਾਨ ਸਾਥੀ ਰਾਜਵਿੰਦਰ ਨੇ ਦੱਸਿਆ ਕਿ ਮਈ ਦਿਵਸ ਕਾਨਫਰੰਸ ਵਿੱਚ ਵੱਡੀ ਸੰਖਿਆਂ ਵਿੱਚ ਮਜ਼ਦੂਰਾਂ-ਕਿਰਤੀਆਂ-ਨੌਜਵਾਨਾਂ ਨੇ ਸ਼ਾਮਲ ਹੋਣਾ ਹੈ। ਉਹਨਾਂ ਕਿਹਾ ਕਿ ਮਈ ਦਿਵਸ ਕਾਨਫਰੰਸ ਦਾ ਆਯੋਜਨ ਰਸਮ ਪੂਰਤੀ ਲਈ ਨਹੀਂ ਕੀਤਾ ਜਾ ਰਿਹਾ ਸਗੋਂ ਇਸ ਪਿੱਛੇ ਉਹਨਾਂ ਦਾ ਇੱਕ ਅਹਿਮ ਮਕਸਦ ਹੈ। ਅੱਜ ਕਿਰਤ ਕਰਨ ਵਾਲ਼ੇ ਲੋਕਾਂ ਨੂੰ ਚਾਰੇ ਪਾਸਿਓਂ ਭਿਅੰਕਰ ਰੂਪ ਵਿੱਚ ਲੁੱਟਿਆ-ਦਬਾਇਆ ਜਾ ਰਿਹਾ ਹੈ। ਇਸ ਖਿਲਾਫ ਲੋਕਾਂ ਦੀ ਕੋਈ ਵੱਡੀ ਇਮਾਨਦਾਰ ਲਹਿਰ ਵੀ ਨਹੀਂ ਹੈ। ਅਜਿਹੇ ਸਮੇਂ ਵਿੱਚ ਆਪਣੇ ਇਨਕਲਾਬੀ ਵਿਰਸੇ ਨੂੰ ਯਾਦ ਕਰਨਾ, ਉਸਤੋਂ ਪ੍ਰੇਰਣਾ, ਊਰਜਾ ਅਤੇ ਸਬਕ ਲੈ ਕੇ ਮੌਜੂਦਾ ਹਾਲਾਤਾਂ ਨੂੰ ਬਦਲਣ ਲਈ ਅੱਗੇ ਦਾ ਰਾਹ ਤਿਆਰ ਕਰਨਾ ਹੀ ਮਈ ਦਿਵਸ ਮਨਾਉਣ ਦਾ ਇੱਕ ਸਹੀ ਤਰੀਕਾ ਹੋ ਸਕਦਾ ਹੈ। ਉਹਨਾਂ ਕਿਹਾ ਕਿ ਮਈ ਦਿਵਸ ਕਾਨਫਰੰਸ ਇਸੇ ਰੂਪ ਵਿੱਚ ਮਨਾਇਆ ਜਾਵੇਗਾ।
 ਮਈ ਦਿਵਸ ਕਾਨਫਰੰਸ ਵਿੱਚ ਮਜ਼ਦੂਰ ਜੱਥੇਬੰਦੀਆਂ ਦੇ ਆਗੂ ਸਾਥੀ ਮਈ ਦਿਵਸ ਲਹਿਰ ਦੇ ਇਤਿਹਾਸ ਅਤੇ ਇਸ ਲਹਿਰ ਦੀ ਵਰਤਮਾਨ ਸਮੇਂ ਵਿੱਚ ਪ੍ਰਸੰਗਿਕਤਾ ਬਾਰੇ ਗੱਲ ਰੱਖਣਗੇ। ਕਾਨਫਰੰਸ ਵਿੱਚ ਦੇਸ਼ ਅਤੇ ਸੰਸਾਰ ਦੇ ਆਰਥਿਕ-ਸਿਆਸੀ-ਸਮਾਜਿਕ ਹਾਲਾਤਾਂ 'ਤੇ ਵਿਚਾਰ ਕੀਤੀ ਜਾਵੇਗੀ। ਅੱਜ ਜਦੋਂ ਸਾਰਾ ਪ੍ਰਬੰਧ ਸਿਰ ਤੋਂ ਪੈਰ ਤੱਕ ਗਲ-ਸੜ ਚੁੱਕਾ ਹੈ ਉਸ ਸਮੇਂ ਲੁੱਟੀਂਦੇ ਲੋਕਾਂ ਨੂੰ ਅੱਜ ਕਿਹੜਾ ਰਾਹ ਚੁਨਣਾ ਚਾਹੀਦਾ ਹੈ ਇਸ ਬਾਰੇ ਬੁਲਾਰੇ ਵਿਸਥਾਰ ਵਿੱਚ ਗੱਲ ਰੱਖਣਗੇ। 
ਸਾਥੀ ਰਾਜਵਿੰਦਰ ਨੇ ਦੱਸਿਆ ਕਿ ਮਈ ਦਿਵਸ 'ਤੇ ਵੋਟ-ਬਟੋਰੂ ਪਾਰਟੀਆਂ ਨਾਲ਼ ਜੁੜੀਆਂ ਬਹੁਤ ਸਾਰੀਆਂ ਜੱਥੇਬੰਦੀਆਂ ਨਚਾਰਾਂ ਅਤੇ ਘਟੀਆ ਗਾਇਕਾਂ ਰਾਹੀਂ ਭੀੜ ਇਕੱਠੀ ਕਰਕੇ ਮਈ ਦਿਵਸ ''ਮਨਾਉਣ'' ਦਾ ਢੋਂਗ ਕਰਦੀਆਂ ਹਨ ਅਤੇ ਮਈ ਦਿਵਸ ਦੀ ਸ਼ਾਨ ਘੱਟ ਕਰਨ ਦੀ ਕੋਸ਼ਿਸ਼ ਕਰਦੀਆਂ ਹਨ। ਉਹਨਾਂ ਕਿਹਾ ਕਿ ਮਈ ਦਿਵਸ ਕਾਨਫਰੰਸ ਇਸਦਾ ਵਿਰੋਧ ਕਰਦੇ ਹੋਏ ਇਨਕਲਾਬੀ ਪਰੰਪਰਾਵਾਂ ਨੂੰ ਅੱਗੇ ਵਧਾਏਗੀ। ਕਾਨਫਰੰਸ ਵਿੱਚ ਇਨਕਲਾਬੀ-ਅਗਾਂਹਵਧੂ ਨਾਟਕਾਂ-ਗੀਤਾਂ ਦਾ ਸੱਭਿਆਚਾਰਕ ਪ੍ਰੋਗਰਾਮ ਵੀ ਹੋਵੇਗਾ। ਉਹਨਾਂ ਕਿਹਾ ਕਿ ਲੋਕਾਂ ਨੂੰ ਪਰੋਸੇ ਜਾ ਰਹੇ ਗੰਦੇ-ਭੈੜੇ-ਉਪਭੋਗਤਾਵਾਦੀ ਸੱਭਿਆਚਾਰ ਦਾ ਬਦਲ ਪੇਸ਼ ਕੀਤਾ ਜਾਣਾ ਬੇਹੱਦ ਜ਼ਰੂਰੀ ਹੈ। 
ਕਾਰਖਾਨਾ ਮਜ਼ਦੂਰ ਯੂਨੀਅਨ ਅਤੇ ਟੈਕਸਟਾਈਲ ਹੌਜ਼ਰੀ ਕਾਮਗਾਰ ਯੂਨੀਅਨ ਨੇ ਸਾਰੇ ਤਬਦੀਲੀ ਪਸੰਦ ਮਜ਼ਦੂਰਾਂ-ਕਿਰਤੀਆਂ-ਨੌਜਵਾਨਾਂ ਨੂੰ ਮਈ ਦਿਵਸ ਕਾਨਫਰੰਸ ਵਿੱਚ ਵੱਧ-ਚੜ੍ਹ ਕੇ ਸ਼ਾਮਲ ਹੋਣ ਦੀ ਅਪੀਲ ਕੀਤੀ ਹੈ।
ਲਖਵਿੰਦਰ ਨਾਲ ਸੰਪਰਕ ਲਈ ਮੋਬਾਈਲ ਨੰਬਰ ਹੈ-- 9646150249 

Wednesday, May 04, 2011

ਹੁਣ ਗਦਰੀ ਬਾਬਿਆਂ ਦੇ ਮੇਲੇ ਤੇ ਮਿਲਾਂਗੇ ਭਾਈਚਾਰੇ ਨੂੰ.....

ਇਸ ਵਾਰ ਮਈ ਦਿਵਸ ਮੌਕੇ ਪੰਜਾਬੀ ਭਵਨ ਵਿਚ ਪਲੱਸ ਮੰਚ ਵੱਲੋਂ ਕਰਵਾਏ ਸਮਾਗਮ ਵਿਚ ਪਤਾ ਨਹੀ ਕਿਉਂ ਗਰਮਜੋਸ਼ੀ ਨਹੀ ਸੀ। ਪਰੇਮ ਗੋਰਖੀ ਦੀ ਕਹਾਣੀ ਦੇ ਆਧਾਂਰ ਤੇ ਰਾਜਿਦਰ ਰੋਜੀ ਦੀ ਨਿਰਦੇਸ਼ਨਾ ਹੇਠ ਖੇਡਿਆ ਨਾਟਕ"ਵਿੱਥਾਂ" ਬੜਾ ਜ਼ਬਰਦਸਤ ਸੁਨੇਹਾ ਦੇ ਗਿਆਂ। ਜੱਟਾਂ ਦੀ ਧੀ ਵਲੋਂ ਚਮਾਰਾਂ ਦੇ ਮੁੰਡੇ ਨਾਲ਼ ਵਿਆਹ ਕਰਵਾਉਣ ਨੂੰ ਆਧਾਂਰ ਬਣਾਕੇ ਘੜੀ ਗਈ ਕਹਾਣੀ ਨੇ ਬੜੇ ਤਿੱਖੇ ਮੋੜ ਕੱਟੇ ਤੇ ਜੱਟਵਾਦੀ ਫਿਤਰਤ ਨੂੰ ਕਰਾਰੀਆਂ ਸੱਟਾਂ ਮਾਰੀਆਂ।ਹਰਵਿੰਦਰ ਦੀਵਾਨਾਂ ਦੇ ਨਾਟਕ "ਵੰਗਾਰ" ਵਿਚ ਲਮਕਾਅ ਬਹੁਤ ਸੀ,ਵਾਰ ਵਾਰ ਲੱਗਦਾ2 ਸੀ ਕਿ ਨਾਟਕ ਮੁਕ ਗਿਆਂ,ਇਸ ਨੱਟਕ ਦਾ ਸਿਖਰ ਸੀ ਉਡਵਾਇਰ ਨੂੰ ਜਲਿਆਂਵਾਲਾ ਗੋਲ਼ੀ ਕਾਂਡ ਮਗਰੋਂ ਅਕਾਲ ਤਖਤ ਸਾਹਿਬ ਤੋਂ ਸਿਰੋਪਾ ਦੇਣ ਮੌਕੇ ਅਮ੍ਰਿਤਧਾਰੀ ਸਿੰਘ ਵਲੋਂ ਕੀਤਾ ਵਿਰੋਧ..ਤੇ ਨਾਟਕ,"ਇਨਾਂ ਜਖਮਾਂ ਦਾ ਕੀ ਕਰੀਏ"ਤੇ ਰਾਹਤ ਵੀ ਵੰਗੇ ਨਿਭੇ ਪਰ "ਵਿਥਾਂ" ਕਮਾਲ ਸੀ।ਐਤਕੀ ਕਈ ਕਿਤਾਬਾਂ ਮਿਲੀਆਂ ਹੀ ਨਹੀ..ਇਤਿਹਾਸ ਮੈਨੂੰ ਸਹੀ ਸਾਬਿਤ ਕਰੇਗਾ"ਲੱਭੀ,ਨ ਹੀ ਮਿਲੀ। ਲਾਲ ਕਿਤਾਬ ਮਿਲ ਗਈ,ਅਜਮੇਰ ਸਿੱਧੂ ਵਾਲ਼ੀ ਬਾਬਾ ਬੂਝਾ ਸਿੰਘ ,ਮਿਲ ਵੀ ਗਈ ਤੇ ਪੜ੍ਹ ਵੀ ਦਿਤੀ। ਪਤਾ ਲੱਗਾ ਕਿ ਬਾਬਾ ਤਾਂ ਬਾਣੀ ਦਾ ਬੜਾ ਰਸੀਆਂ ਰਿਹਾ।ਪਾਸ਼ ਦੀਆਂ ਚਿੱਠੀਆਂ"ਕਿਤਾਬ ਵੀ ਮਿਲ ਗਈ। ਇਕ ਦਹਿਸ਼ਤਪਸੰਦ ਦੀ ਡਾਇਰੀ ਵੀ ਮਿਲ ਗਈ। ਅਰੁੰਧਤੀ ਰਾਏ ਦੇ ਲੇਖਾਂ ਦੀ ਕਿਤਾਬ,"ਕਾਰਪੋਰੇਟ ਸੈਕਟਰ ਦਾ ਵਿਕਾਸ ,ਲੋਕਾਂ ਦਾ ਵਿਨਾਂਸ਼" ਵੀ ਘੈਂਟ ਆ ਬਈ।ਇਨਕਲਾਬੀ ਕੇਂਦਰ ਦੇ ਕਾਲੇ ਕਾਨੂੰਨਾਂ ਕਖਲਾਫ ਛਾਪੇ ਕਿਾਬਚੇ ਵੀ ਵਧੀਆਂ ਨੇ।ਸਤਨਾਮ ਸਿੰਘ ਦੀ ਹਿੰਦੀ ਵਿਚ ਲਿਖੀ ਕਿਤਾਬ,"ਚਮਾਰ ਜਾਤੀ ਕਾ ਗੌਰਵਸ਼ਾਂਲੀ ਇਤਿਹਾਸ" ਤਾਂ ਮੈਂ ਲੈ ਲਈ ਪਰ ਡਵਲਿਊ ਬ੍ਰਿਗਸ ਵਾਲੀ,"ਦਾ ਚਮਾਰ"ਨਹੀ ਲਈ,ਕਦੇ ਫੇਰ ਸਹੀ..ਵੋਲਗਾ ਤੋਂ ਗੰਗਾ ਤੱਕ ਕੋਈ ਮਿਤਰ ਲੈ ਗਿਆਂ ਸੀ,ਉਹ ਵੀ ਲੈ ਲਈ,,ਪਤਾ ਨਹੀ ਰਾਹੁਲ ਸੰਕਤਰਾਇਣ ਦੀਆਂ ਸਾਰੀਆਂ ਕਿਤਾਬਾਂ ਪੰਜਾਬੀ ਵਿਚ ਕਿਉਂ ਨਹੀ ਛਾਪਦੇ,,ਮੇਰਾ ਦੋਸਤ ਤਾਂ ਹਾਕਮ ਸਿੰਘ ਸਮਾਅਂ ਵਾਲੀ ਕਿਤਾਬ ਹੀ ਲੈਣ ਆਇਆਂ ਸੀ,ਲੈਗਿਆ। ਚਲੋ ,ਖੈਰ,ਹੁਣ ਗਦਰੀ ਬਾਬਿਆਂ ਦੇ ਮੇਲੇ ਤੇ ਮਿਲਾਂਗੇ ਭਾਈਚਾਰੇ ਨੂੰ.....ਸਰਬਜੀਤ ਸਿੰਘ ਘੁਮਾਣ.

Sunday, May 01, 2011

" ਚਲੇ ਚਲੋ ਕਿ ਵੋ ਮੰਜ਼ਿਲ ਅਭੀ ਨਹੀਂ ਆਈ...."

ਮਈ ਦਿਵਸ ਅਤੇ ਇਸ ਮਹਾਨ ਦਿਨ ਦੇ ਮਕਸਦ ਨੂੰ ਯਾਦ ਕਰਨ ਵਾਲਿਆਂ ਵਿੱਚ ਇਸ ਵਾਰ ਫੇਰ ਜੋਸ਼ ਕਾਇਮ ਰਿਹਾ. ਮਜਦੂਰਾਂ ਅਤੇ ਮਜਦੂਰ ਆਗੂਆਂ ਦੇ ਨਾਲ ਨਾਲ ਕਲਮੀ ਸਿਪਾਹੀਆਂ ਨੇ ਵੀ ਇਸ ਦਿਨ ਮੌਕੇ ਆਮ ਇਨਸਾਨ ਨੂੰ ਯਾਦ ਕਰਾਇਆ, " ਚਲੇ ਚਲੋ ਕਿ  ਵੋ ਮੰਜ਼ਿਲ ਅਭੀ ਨਹੀਂ ਆਈ...." ਹਰਮਨ ਪਿਆਰੇ ਸ਼ਾਇਰ ਡਾਕਟਰ ਲੋਕ ਰਾਜ ਹੁਰਾਂ ਆਪਣੇ ਨਿਵੇਕਲੇ ਅੰਦਾਜ਼ ਨਾਲ ਕਿਹਾ:
ਗਾਮੇ 
ਇੱਕ ਦਿਨ ਇੱਕ ਹੋਣਗੇ
ਸਾਰੀ ਦੁਨਿਯਾ ਦੇ  ਕਾਮੇ
 
ਇਸੇ ਤਰਾਂ ਜਤਿੰਦਰ ਲਸਾੜਾ ਹੁਰਾਂ ਨੇ  ਵੀ ਦਿਲ ਨੂੰ ਧੂਹ ਪਾਉਣ ਵਾਲੀਆਂ ਲਾਈਨਾਂ ਲਿਖੀਆਂ ਹਨ.

ਅੱਗ ਵੀ ਹਿੰਮਤੋਂ ਬਹੁੱਤੀ ਦਿੱਤੀ, ਫੇਰ ਵੀ ਭਾਂਡੇ ਪਿੱਲੇ ਰਹੇ ॥ 
ਭਾਂਬੜ ਵਰਗੀਆਂ ਰੁੱਤਾਂ ਵਿੱਚ ਵੀ, ਮੇਰੇ ਲੀੜੇ ਗਿੱਲੇ ਰਹੇ ॥
.
ਕਾਹਦਾ ਦੋਸ਼ ਤੂਫਾਨਾਂ 'ਤੇ ਇਹ ਸਿਰ ਤੋਂ ਉੱਡੇ ਤੰਬੂਆਂ ਦਾ,
ਕਿੱਲ੍ਹੇ ਠੀਕ ਨਾ ਠੋਕੇ, ਖਬਰੇ, ਸਾਥੋਂ ਰੱਸੇ ਢਿੱਲੇ ਰਹੇ ॥ 
.
ਏਧਰ ਗਭਰੂ ਲਾਸ਼ਾ ਡਿੱਗੀਆਂ, ਸੀਨੇ ਪਾਟੇ ਮਾਂਵਾਂ ਦੇ,
ਓਧਰ ਠੀਕ ਨਿਸ਼ਾਨੇ ਬਦਲੇ, ਲਗਦੇ ਤਮਗੇ ਬਿੱਲੇ ਰਹੇ ॥...ਬਾਬਾ ਨਜਮੀ
.
ਏਸ ਫ਼ਸਲ 'ਤੇ ਗਹਿਣੇ ਲੈਣੇ ਜ਼ਿੱਦ ਸੀ ਮੇਰੀ ਬੇਗ਼ਮ ਦੀ,
ਹਰ ਫ਼ਸਲ 'ਤੇ ਮਾੜੀ ਕਿਸਮਤ ਗਹਿਣੇ ਪੈਂਦੇ ਕਿੱਲੇ ਰਹੇ ॥...ਜਤਿੰਦਰ ਲਸਾੜਾ   

ਮੈਂ ਵੀ ਧੀ ਸੀ ਡੋਲੀ ਪਾਉਣੀ, ਸੂਹਾ ਜੋੜਾ ਲੈਣ ਗਿਆ,
ਹਾਲਤ ਮੇਰੀ ਦੇਖ ਦੇਖ ਕੇ, ਹੱਸਦੇ ਗੋਟੇ ਤਿੱਲੇ ਰਹੇ ॥ ..........
ਬਾਬਾ ਨਜਮੀ

ਆਸ ਕਰਨੀ ਚਾਹੀਦੀ ਹੈ ਕਿ ਇੰਨਕ਼ਲਾਬ ਆਉਣ ਤੱਕ ਇਹ ਜਜਬਾ ਬਰਕਰਾਰ ਰਹੇਗਾ. ਸਾਡੇ ਸ਼ੀਰੇ, ਸਾਡੇ ਲੇਖਕ ਆਪਣੇ ਇਸ ਫਰਜ਼ ਨੂੰ ਹਮੇਸ਼ਾਂ ਯਾਦ ਰੱਖਣਗੇ.  ਰੈਕਟਰ ਕਥੂਰੀਆ