ਵਿਜੇ ਵਿਵੇਕ ਅਤੇ ਜਸਵੰਤ ਜ਼ਫਰ ਨੂੰ ਕੀਤਾ ਗਿਆ ਸਿਰਜਣਧਾਰਾ ਵੱਲੋਂ ਸਨਮਾਨਿਤ

ਕਿਰਤ ਦਾ ਪ੍ਰਤੀਕ ਬਣੇ ਬਾਈ ਮੱਲ ਸਿੰਘ ਪੁਰਸਕਾਰ ਨਾਲ ਹੋਇਆ ਸਨਮਾਨ

ਲੁਧਿਆਣਾ: 28 ਜੂਨ 2915: (ਰੈਕਟਰ ਕਥੂਰੀਆ//ਪੰਜਾਬ ਸਕਰੀਨ//ਦਲਬੀਰ ਲੁਧਿਆਣਵੀ): 

ਗੰਭੀਰ ਅਤੇ ਸਿਧਾਂਤ ਨਾਲ ਜੁੜੀਆਂ ਸਾਹਿਤਿਕ ਸਰਗਰਮੀਆਂ ਨੂੰ ਉਤਸ਼ਾਹਿਤ ਕਰਨ ਵਾਲੀ ਸੰਸਥਾ ਸਿਰਜਣਧਾਰਾ ਵੱਲੋਂ ਅੱਜ ਪੰਜਾਬੀ ਭਵਨ ਵਿੱਚ ਇੱਕ ਸ਼ਾਨਦਾਰ ਆਯੋਜਨ ਕਰਾਇਆ ਗਿਆ। ਇਹ ਆਯੋਜਨ ਪ੍ਰਸਿਧ ਸ਼ਾਇਰ ਜਸਵੰਤ ਜ਼ਫਰ ਅਤੇ ਵਿਜੇ ਵਿਵੇਕ ਹੁਰਾਂ ਦੇ ਸਨਮਾਨ ਲਈ ਕਰਾਇਆ ਗਿਆ ਸੀ। ਇਸ ਮੌਕੇ ਕਰਾਏ ਗਏ ਕਵੀ ਦਰਬਾਰ ਨੇ ਇਸਨੂੰ ਹੋਰ ਵੀ ਯਾਦਗਾਰੀ ਬਣਾ ਦਿੱਤਾ। ਸ਼ੁਰੂਆਤ ਵਿੱਚ ਸਰੋਤੇ ਘੱਟ ਸਨ ਪਰ ਹੋਲੀ ਹੋਲੀ ਹਾਲ ਭਰਦਾ ਚਲਾ ਗਿਆ। ਮੰਚ /ਤੇ ਵਿੱਦਿਆ ਅਤੇ ਸਾਹਿਤ ਨਾਲ ਜੁੜੇ ਪ੍ਰਸਿਧ ਹਸਤਾਖਰ ਜਨਾਬ ਐਸ ਐਸ ਜੋਹਲ, ਪੱਤਰਕਾਰੀ ਵਿੱਚ ਇਤਿਹਾਸਿਕ ਭੂਮਿਕਾ ਨਿਭਾਉਣ ਵਾਲੇ ਹਰਭੀਰ ਸਿੰਘ ਭਂਵਰ, ਸਿੱਖ ਸਿਆਸਤ ਦੀਆਂ ਡੂੰਘੀਆਂ ਰਮਜ਼ਾਂ ਬਾਰੇ ਖਰੀਆਂ ਖਰੀਆਂ ਗੱਲਾਂ ਕਰਨ ਵਾਲੇ ਜਨਾਬ ਕਰਮਜੀਤ ਸਿੰਘ ਔਜਲਾ ਅਤੇ ਕਈ ਹੋਰ ਸ਼ਖਸੀਅਤਾਂ ਵੀ ਮੌਜੂਦ ਸਨ। ਮੰਚ ਸੰਚਾਲਨ ਡਾਕਟਰ ਗੁਰਚਰਨ ਕੌਰ ਕੋਚਰ ਨੇ ਬਾਖੂਬੀ ਨਿਭਾਇਆ। 

ਅੱਜ ਦੇ ਸਮਾਗਮ ਵਿੱਚ ਸਨਮਾਨਿਤ ਸ਼ਾਇਰ ਵਿਜੇ ਵਿਵੇਕ ਬਾਰੇ ਸਟੇਜ ਤੋਂ ਦਸਿਆ ਗਿਆ ਕਿ ਉਹਨਾਂ ਦੀ ਗਜ਼ਲ ਵਿੱਚ ਇੱਕ ਵੀ ਸ਼ਬਦ ਫਾਲਤੂ ਨਹੀਂ ਹੁੰਦਾ। ਵਿਜੇ ਵਿਵੇਕ ਦੀ ਸ਼ਾਇਰੀ ਨ ਘੜੀ ਗਈ ਹੁੰਦੀ ਹੈ, ਨਾ ਲਿਖੀ ਗਈ ਬਲਕਿ ਉਤਰੀ ਹੋਈ ਹੁੰਦੀ ਹੈ ਜਿਵੇਂ ਇਲਹਾਮ ਹੋਇਆ ਹੋਵੇ।

ਇਸੇ ਤਰਾਂ ਜਨਾਬ ਜਸਵੰਤ ਜ਼ਫਰ ਹੁਰਾਂ ਬਾਰੇ ਵੀ ਸਾਰੇ ਜਾਣਦੇ ਹੀ ਹਨ ਕਿ ਕਿਵੇਂ ਉਹ ਇੰਜੀਨੀਅਰ ਦੀਆਂ ਜ਼ਿੰਮੇਵਾਰੀਆਂ ਨਿਭਾਉਂਦੇ ਹੋਏ ਜ਼ਿੰਦਗੀ ਦੀ ਬਣਤਰ ਬਾਰੇ  ਵੀ ਗੰਭੀਰਤਾ ਨਾਲ ਸੋਚਣ ਲੱਗ ਪਾਏ ਅਤੇ ਇਸੇ ਸੋਚ ਵਿੱਚੋਂ ਹੀ ਨਿਕਲੀਆਂ ਓਹ ਕਵਿਤਾਵਾਂ ਜਿਹੜੀਆਂ ਪੜ੍ਹਨ ਸੁਣਨ  ਵਾਲਿਆ ਨੂੰ ਵੀ ਸੋਚਣ ਲਈ ਮਜਬੂਰ ਕਰਦੀਆਂ ਹਨ। 

ਚਾਰ ਘੰਟਿਆਂ ਤੋਂ ਵੀ ਜਿਆਦਾ ਸਮੇਂ ਤੱਕ ਚੱਲੇ ਇਸ ਸਮਾਗਮ ਵਿੱਚ ਕਈ ਹੋਰਾਂ ਨੂੰ ਵੀ ਉਤਸ਼ਾਹ ਵਧਾਓ ਇਨਾਮ ਦਿੱਤੇ ਗਏ। ਸ਼ਾਇਰੀ ਦੇ ਦੌਰ ਵਿੱਚ ਕੀਆਂ ਨੇ ਆਪਣਾ ਕਲਾਮ ਸੁਣਾਇਆ। ਰਵਿੰਦਰ ਦੀਵਾਨਾ ਨੇ ਆਪਣੀ ਲੰਮੀ ਹੇਕ ਵਾਲੀ ਆਵਾਜ਼ ਨਾਲ ਅੱਜ ਦੇ ਜੁਆਨਾਂ ਨੂੰ ਵੀ ਮਾਤਾ ਪਾਇਆ ਅਤੇ ਦੱਸਿਆ ਕਿ ਲੰਮੀ ਹੇਕ ਕੋਈ ਸੌਖੀ ਨਹੀਂ ਹੁੰਦੀ।

ਇਸੇ ਦੌਰਾਨ ਪੁੱਜੀ ਦਲਬੀਰ ਲੁਧਿੰਵੀ ਦੀ ਰਿਪੋਰਟ ਮੁਤਾਬਿਕ 'ਸਾਹਿਤਕਾਰਾਂ ਦਾ ਮਾਣ-ਸਨਮਾਨ ਕਰਨਾ ਬਹੁਤ ਉੱਤਮ ਕਾਰਜ ਹੈ, ਇਸ ਨਾਲ ਉਨ੍ਹਾਂ ਨੂੰ ਅਹਿਸਾਸ ਹੋ ਜਾਂਦਾ ਹੈ ਕਿ ਉਨ੍ਹਾਂ  ਦੀਆਂ ਰਚਨਾਵਾਂ ਸਮਾਜ ਵੱਲੋਂ ਪ੍ਰਵਾਨ ਕੀਤੀਆਂ ਗਈਆਂ ਹਨ। ਤੇ ਨਤੀਜੇ ਵਜੋਂ ਉਹ ਹੋਰ ਵੀ ਪਰਪੱਕ ਰਚਨਾਵਾਂ ਲਿਖ ਕੇ ਨਿੱਗਰ ਸਮਾਜ ਦੀ ਸਥਾਪਨਾ ਵਿਚ ਆਪੋ-ਆਪਣਾ ਬਹੁਮੁੱਲਾ ਯੋਗਦਾਨ ਪਾਉਂਦੇ ਨੇ', ਇਨ੍ਹਾਂ ਸ਼ਬਦਾਂ ਦਾ ਪ੍ਰਗਟਾਵਾ ਪਦਮ ਭੂਸ਼ਨ ਡਾ ਸਰਦਾਰਾ ਸਿੰਘ ਜੌਹਲ ਨੇ ਸਾਹਿਤਕ ਸੰਸਥਾ ਸਿਰਜਣਧਾਰਾ ਵੱਲੋਂ ਪੰਜਾਬੀ ਸਾਹਿਤ ਅਕਾਡਮੀ, ਲੁਧਿਆਣਾ ਦੇ ਸਹਿਯੋਗ ਨਾਲ ਕਰਵਾਏ ਗਏ '੧੬ਵਾਂ ਬਾਈ ਮੱਲ ਸਿੰਘ ਯਾਦਗਾਰੀ ਪੁਰਸਕਾਰ' ਸਮਾਗਮ ਦੌਰਾਨ ਕੀਤਾ।  ਜੌਹਲ ਸਾਹਿਬ ਦੇ ਇਲਾਵਾ ਪ੍ਰਧਾਨਗੀ ਮੰਡਲ ਵਿੱਚ ਸੰਸਥਾ ਦੇ ਪ੍ਰਧਾਨ ਸ. ਕਰਮਜੀਤ ਸਿੰਘ ਔਜਲਾ, ਡਾ. ਐਸ ਐਨ ਸੇਵਕ, ਸ. ਹਰਬੀਰ ਸਿੰਘ ਭੰਵਰ, ਕਰਨਲ ਰਘੁਬੀਰ ਸਿੰਘ ਕੰਗ, ਮੋਹਨ ਸਿੰਘ ਸਹਿਗਲ ਅਤੇ ਡਾ. ਗੁਰਚਰਨ ਕੌਰ ਕੋਚਰ ਨੇ ਸ਼ਿਰਕਤ ਕੀਤੀ। ਮੀਤ ਪ੍ਰਧਾਨ ਦਲਵੀਰ ਸਿੰਘ ਲੁਧਿਆਣਵੀ ਨੇ 'ਸਿਰਜਣਧਾਰਾ ਵੱਲੋਂ ਸਾਹਿਤਕਾਰਾਂ ਨੂੰ ਸਨਮਾਨਿਤ ਕਰਨਾ ਵਿਸ਼ੇ 'ਤੇ ਪਰਚਾ ਪੜ੍ਹਦਿਆਂ ਕਿਹਾ ਕਿ ਬਿਨਾਂ ਕਿਸੇ ਭੇਦ-ਭਾਵ ਦੇ, ਯੋਗ ਵਿਧੀ ਰਾਹੀਂ ਉਨ੍ਹਾਂ ਸਾਹਿਤਕਾਰਾਂ ਦੀ ਚੋਣ ਕਰਨੀ ਚਾਹੀਦੀ ਹੈ, ਜੋ ਸਹੀ ਹੱਕ ਰੱਖਦੇ ਹੋਣ। ਡਾ.ਕੋਚਰ ਨੇ ਸਟੇਜ ਸੰਚਾਲਨ ਕਰਦਿਆਂ ਸਨਮਾਨਿਤ ਕੀਤੀਆਂ ਜਾ ਰਹੀਆਂ ਸ਼ਖ਼ਸੀਅਤਾਂ ਬਾਰੇ ਸਾਹਿਤਕ ਚਾਨਣਾ ਪਾਇਆ। 
ਸ਼ਾਇਰ ਵਿਜੇ ਵਿਵੇਕ ਨੂੰ '੧੬ਵਾਂ ਬਾਈ ਮੱਲ ਸਿੰਘ ਯਾਦਗਾਰੀ ਪੁਰਸਕਾਰ' ਅਤੇ ਇੰਜ ਜਸਵੰਤ ਜ਼ਫ਼ਰ ਨੂੰ ਵਿਸ਼ੇਸ਼ ਸਨਮਾਨ ਦੇ ਇਲਾਵਾ ਪ੍ਰਿੰ: ਪਰਮਵੀਰ ਕੌਰ ਜ਼ੀਰਾ, ਅਮਰਜੀਤ ਸ਼ੇਰਪੁਰੀ ਅਤੇ ਰਘਬੀਰ ਸਿੰਘ ਸੰਧੂ ਨੂੰ ਵੀ ਸਨਮਾਨਿਤ ਕੀਤਾ ਗਿਆ। ਧਰਮਪਾਲ ਸਾਹਿਲ ਨੇ ਵਿਜੇ ਵਿਵੇਕ ਦਾ ਸਨਮਾਨ ਪੱਤਰ ਪੜ੍ਹਿਆ ਜਦਕਿ ਗੁਰਚਰਨ ਸਿੰਘ ਨਰੂਲਾ ਨੇ ਇੰਜ ਜਸਵੰਤ ਜ਼ਫ਼ਰ ਦਾ। 
ਸ. ਔਜਲਾ ਨੇ ਆਏ ਹੋਏ ਮਹਿਮਾਨਾਂ ਦਾ ਸਵਾਗਤ ਕਰਦਿਆਂ ਪ੍ਰਧਾਨਗੀ ਮੰਡਲ ਵਿੱਚ ਬੈਠੀਆਂ ਮਹਾਨ ਹਸਤੀਆਂ ਬਾਰੇ ਭਰਪੂਰ ਜਾਣਕਾਰੀ ਦਿੰਦਿਆਂ ਇਹ ਵੀ ਦੱਸਿਆ ਕਿ ਪਿਛਲੇ 27 ਸਾਲਾਂ ਤੋਂ ਸਿਰਜਣਧਾਰਾ ਸਾਹਿਤਕਾਰਾਂ ਨੂੰ ਸਨਮਾਨਿਤ ਕਰਦੀ ਆ ਰਹੀ ਹੈ। 
ਡਾ. ਐਸ ਐਨ ਸੇਵਕ ਨੇ ਕਿਹਾ ਕਿ ਲੇਖਕ ਦਾ ਫ਼ਰਜ਼ ਬਣਦਾ ਹੈ ਕਿ ਸਮਾਜ ਨੂੰ ਸਹੀ ਅਗਵਾਈ ਦੇਵੇ ਅਤੇ ਸੰਸਥਾਵਾਂ ਦਾ ਕੰਮ ਹੈ ਕਿ ਇਹੋ ਜਿਹੇ ਸਾਹਿਤਕਾਰਾਂ ਦੀ ਪਹਿਚਾਣ ਕਰਕੇ ਉਨ੍ਹਾਂ ਨੂੰ ਉਤਸ਼ਾਹਿਤ ਕਰੇ।  
ਸ. ਹਰਬੀਰ ਸਿੰਘ ਭੰਵਰ ਨੇ ਬਾਈ ਮੱਲ ਸਿੰਘ ਬਾਰੇ ਵਿਚਾਰ ਰੱਖਦਿਆਂ ਕਿਹਾ ਕਿ ਉਹ ਇੱਕ ਕਰਮਯੋਗੀ ਸਨ।
ਭਾਰੀ ਤਾਦਾਦ ਵਿਚ ਸਾਹਿਤਕਾਰ ਤੇ ਸਾਹਿਤ ਪ੍ਰੇਮੀ ਹਾਜ਼ਰੀ ਹੋਏ।  ਇਸ ਮੌਕੇ 'ਤੇ ਕਵੀ ਦਰਬਾਰ ਆਯੋਜਿਤ ਕੀਤਾ ਗਿਆ, ਜਿਸ ਵਿਚ ੨੭ ਕਵੀਆਂ ਨੇ ਹਾਜ਼ਰੀ ਭਰੀ । ਇਸ ਸਮਾਗਮ ਨੂੰ ਨੇਪੜੇ ਚਾੜ੍ਹਨ ਵਿਚ ਗਲਪਕਾਰ ਦਵਿੰਦਰ ਸੇਖਾ, ਮੀਤ ਪ੍ਰਧਾਨ ਰਵਿੰਦਰ ਦੀਵਾਨਾ, ਲਾਡਾ ਪ੍ਰਦੇਸੀ ਭੋਲੋਕੇ ਆਦਿ ਨੇ ਸਹਿਯੋਗ ਦਿੱਤਾ। ਸੀਨੀਅਰ ਮੀਤ ਪ੍ਰਧਾਨ ਨੇ ਆਏ ਹੋਏ ਵਿਦਵਾਨਾਂ ਤੇ ਸਾਹਿਤਕਾਰਾਂ ਦਾ ਧੰਨਵਾਦ ਕੀਤਾ।