ਬਸ ਸਫ਼ਰ ਦੌਰਾਨ ਮਿਲੀ ਕਹਾਣੀ ਦੂਸਰਾ ਸਨਮਾਣ

ਫੋਟੋ ਧੰਨਵਾਦ ਸਹਿਤ:ਦੇਸੀ ਕੋਮੈੰਟਸ 

~~ਤਾਂ ਧੀਆਂ ਮਰਦੀਆਂ ਨੇ~~

ਧਾਰਮਿਕ ਆਗੂਆਂ ਦੇ ਨਾਲ ਨਾਲ ਸਮਾਜਿਕ ਅਤੇ ਰਾਜਨੀਤਕ ਪਧਰ ਤੇ ਵੀ ਲਗਾਤਾਰ ਇਹ ਪ੍ਰਚਾਰ ਕੀਤਾ ਜਾਂਦਾ ਹੈ ਕਿ ਭਰੂਣ ਹੱਤਿਆ ਪਾਪ ਹੈ. ਧੀਆਂ ਅਤੇ ਪੁੱਤ ਬਰਾਬਰ ਹੁੰਦੇ ਹਨ. ਧੀਆਂ ਨਾਲ ਹੀ ਘਰ ਦੀ ਰੌਣਕ ਹੁੰਦੀ ਹੈ...ਪਰ ਫਿਰ ਵੀ ਧੀਆਂ ਮੁੱਕ ਰਹੀਆਂ ਹਨ. ਕਈ ਵਾਰ ਇੰਝ ਲਗਦੈ ਕਿ ਇਸ ਮਕ਼ਸਦ ਲਈ ਕੀਤਾ ਜਾ ਰਿਹਾ ਪ੍ਰਚਾਰ ਖੂਹ ਖਾਤੇ ਜਾ ਰਿਹਾ ਹੈ ਤੇ ਜਾਂ ਫਿਰ ਲੋਕਾਂ ਦੇ ਦਿਲ ਪੱਥਰ ਦੇ ਹੋ ਗਏ ਨੇ. ਇਸ ਬਾਰੇ ਕਾਫੀ ਕੁਝ ਕਿਹਾ ਜਾ ਚੁੱਕਿਆ ਹੈ. ਇਸ ਬਾਰੇ ਹੀ  ਇੰਦਰਜੀਤ ਸਿੰਘ ਕਾਲਾਸੰਘਿਆਂ ਨੇ ਇਕ ਕਹਾਣੀ ਭੇਜੀ ਹੈ ਜਿਸ ਵਿੱਚ ਬੜੀ ਹੀ ਸਾਦਗੀ ਨਾਲ ਉਹਨਾਂ ਕੁਝ ਕੁ ਕਾਰਨਾਂ ਤੋਂ ਪਰਦਾ ਚੁੱਕਿਆ ਗਿਆ ਹੈ ਜਿਹੜੇ ਅਜੇ ਵੀ ਧੀਆਂ ਦੇ ਕਤਲਾਂ ਜਾਂ ਭਰੂਣ ਹੱਤਿਆ ਵਰਗੇ ਕੁਕਰਮਾਂ ਨੂੰ ਰੁਕਣ ਨਹੀਂ ਦੇ ਰਹੇ. ਇਹਨਾਂ ਕਾਰਨਾਂ ਨੂੰ ਕੌਣ ਦੂਰ ਕਰੇਗਾ ਇਹ ਸੋਚਣਾ ਪੂਰੇ ਸਮਾਜ ਦਾ ਕੰਮ ਹੈ ਇੱਕਲੀ ਸਰਕਾਰ ਦਾ ਵੀ ਨਹੀਂ. ਲਓ ਤੁਸੀਂ ਵੀ ਪੜ੍ਹੋ ਕਹਾਣੀ ਦੂਸਰਾ ਸਨਮਾਣ  ਜਿਹੜੀ ਉਹਨਾਂ ਨੂੰ ਅਸਲ ਵਿੱਚ ਇੱਕ ਬਸ ਸਫ਼ਰ ਦੌਰਾਨ ਮਿਲੀ. ਲੇਖਕ ਦਾ ਕਹਿਣਾ ਹੈ ਕਿ ਇਸ ਕਹਾਣੀ ਦੇ ਪਾਤਰ "ਲੰਬੜਦਾਰ" ਨਾਲ ਮੈਂ ਪਠਾਨਕੋਟ ਤੋ ਜਲੰਧਰ ਤਕ ਦਾ ਸਫ਼ਰ ਕੀਤਾ ਸੀ ਬੱਸ ਵਿਚ ਤੇ ਇਹ ਓਸ ਦੀ ਆਪਣੀ ਹੱਡ ਬੀਤੀ ਹੈ. ਇਸ ਕਹਾਣੀ ਬਾਰੇ ਤੁਹਾਡੀ ਰਾਏ ਦੀ ਇੰਤਜ਼ਾਰ ਰਹੇਗੀ.--ਰੈਕਟਰ ਕਥੂਰੀਆ 

ਕਹਾਣੀ ਦੂਸਰਾ ਸਨਮਾਣ 

Mon, Jan 17, 2011 at 10:40 PM

ਲੰਬੜਦਾਰ ਦਾ ਪਿੰਡ ਪਠਾਨਕੋਟ ਦੇ ਨੇੜੇ ਹੈ ਵੈਸਾ ਤਾ ਓਸ ਦਾ ਅਸਲ ਨਾਮ ਮੁਖਤਿਆਰ ਸਿੰਘ ਹੈ,ਪਰ ਬਚਪਨ ਤੋ ਹੀ ਸਭ ਓਸ ਨੂੰ  ਲੰਬੜਦਾਰ ਹੀ ਕਹਿੰਦੇ ਸੀ ਤੇ ਹੁਣ ਲੋਕੀ ਓਸ ਨੂੰ ਇਸੇ ਨਾਮ ਨਾਲ ਹੀ ਜਾਣਦੇ ਨੇ,ਉਂਝ ਓਹਦੇ ਕੋਲ ਨਾ ਤਾ ਜ਼ਮੀਨ ਦੇ ਕਿਲ੍ਹੇ ਨੇ ਤੇ ਨਾ ਹੀ ਓਹ ਲੰਬੜਦਾਰ ਹੈ ਪਰ ਫਿਰ ਵੀ ਸਭ ਓਸ  ਨੂੰ ਲੰਬੜਦਾਰ ਦੇ ਨਾਮ ਨਾਲ ਹੀ ਜਾਣਦੇ ਨੇ | ਓਹ ਇਕ ਮੱਧ ਵਰਗੀ ਪਰਿਵਾਰ ਵਿਚੋ ਸੀ ਔਖੇ ਸੌਖੇ ਦਸਵੀਂ ਕਰ ਗਿਆਂ ਸੀ ਤੇ ਹੁਣ ਇਕ ਫੈਕਟਰੀ ਵਿਚ ਕੰਮ ਕਰਦਾ ਹੈ | ਓਸ ਦੇ ਘਰਵਾਲੀ ਘਰ ਵਿੱਚ ਹੀ ਕੱਪੜੇ ਸਿਉਣ ਦਾ ਕੰਮ ਕਰਦੀ ਹੈ| ਘਰ ਦਾ ਗੁਜਾਰਾ ਠੀਕ ਠਾਕ ਚਲ ਰਿਹਾ ਹੈ |ਲੰਬੜਦਾਰ ਦੀਆਂ ਤਿੰਨ ਕੁੜੀਆਂ ਹਨ| ਪਰ ਉਸ ਨੂੰ ਇਸ ਗੱਲ ਦਾ ਕਦੇ ਅਹਿਸਾਸ ਨਹੀ ਹੋਇਆ ਤੇ ਨਾ ਹੀ ਕਦੇ ਓਸ ਨੇ ਧੀਆਂ ਨੂੰ ਬੋਝ ਸਮਝਿਆ,ਸਗੋ ਓਹ ਤਾ ਲੋਕਾ ਨੂੰ ਸਮਝਉਦਾਂ ਕੀ ਧੀਆਂ ਤਾ ਮੁੰਡਿਆ ਨਾਲੋ ਚੰਗੀਆਂ ਹੁੰਦੀਆਂ ਨੇ,ਲੋਕਾ ਨੂੰ ਸਮਝਉਦਾ ਕੀ ਭਰੂਣ ਹੱਤਿਆਂ ਪਾਪ ਹੈ ਤੇ ਮੁੰਡੇ ਤੇ ਕੁੜੀ ਵਿਚ ਕੋਈ ਫ਼ਰਕ ਨਹੀ ਹੈ | 

ਨਹਿਰ ਵਿੱਚ ਸੁੱਟੀਆਂ ਤਿੰਨ ਮਾਸੂਮ ਧੀਆਂ 

ਇਕ ਦਿਨ ਓਸ ਦੇ ਪਿੰਡ ਭਰੂਣ ਹੱਤਿਆਂ ਦੇ ਖਿਲਾਫ ਪਰਚਾਰ ਕਰਨ ਲਈ ਇਕ ਸਰਕਾਰੀ ਸੰਸਥਾ ਦੇ ਕੁਝ ਲੋਕ ਆਏ ਤੇ ਨਾਲ ਓਸ ਦੇ ਜਿਲੇ ਦਾ ਐਮ.ਐਲ.ਏ ਵੀ ਸੀ |  ਲੰਬੜਦਾਰ ਨੇ ਓਸ ਦਿਨ ਵਿਸ਼ੇਸ਼ ਤੋਰ ਤੇ ਛੁੱਟੀ ਕਰਕੇ ਸਾਰਾ ਦਿਨ ਉਨ੍ਹਾ ਨਾਲ ਇਸ ਕੰਮ ਤੇ ਲਾਇਆ ਤੇ ਫਿਰ ਸ਼ਾਮੀ ਓਸ ਨੂੰ ਪਿੰਡ ਦੀ ਸੱਥ ਵਿਚ ਐਮ.ਐਲ.ਏ ਨੇ ਓਸ ਦੇ ਇਸ ਸ਼ਾਲਘਾਯੋਗ ਕੰਮ ਲਈ ਸਨਮਾਨਿਤ ਵੀ ਕੀਤਾ | ਵਕਤ ਆਪਣੀ ਚਾਲੇ ਤੁਰਦਾ ਗਿਆ ਇਕ ਦਿਨ ਅਚਾਨਕ  ਲੰਬੜਦਾਰ ਦੀ ਸਭ ਤੋ ਵੱਡੀ ਕੁੜੀ ਜੋ ਕਾਲਜ ਵਿਚ ਪੜਦੀ ਸੀ ਗਾਇਬ ਹੋ ਗਈ ,ਪਤਾ ਨਹੀ ਕੀ ਵਾਪਰਿਆ ਰੱਬ ਜਾਣੇ ਬਥੇਰਾ ਲੱਭਿਆ,ਪੁਲਿਸ ਸ਼ਟੇਸ਼ਨ ਰਿਪੋਰਟ ਵੀ ਕੀਤੀ ਬਥੇਰੀ ਭੱਜ ਨੱਠ ਕੀਤੀ ਪਰ ਓਸ ਦਾ ਕੋਈ ਪਤਾ ਨਾ ਲੱਗਾ| ਸ਼ਰੀਕ ਤਾਨੇ ਮਾਰਨ ਲੱਗ ਪਏ "ਨਿਕਲ ਗਈ ਹੋਣੀ ਹੈ ਕਿਸੇ ਨਾਲ " ਜਿਆਦਾਂ ਹੀ ਲਾਡਲੀ ਰੱਖੀ ਸੀ ,ਸਿਰ ਤੇ ਚੜਾਈਆ ਸੀ ਇਸ ਨੇ ਵੀ ਜਿਆਦਾਂ ਹੀ | ਲੰਬੜਦਾਰ ਸਭ ਕੁਝ ਚੁੱਪ ਕਰਕੇ ਸੁਣ ਕੇ ਲੰਘ ਜਾਂਦਾ ਪਰ ਹੁਣ ਓਸ ਨੂੰ ਮਹਿਸੂਸ ਹੁੰਦਾ ਕੀ ਸਮਾਜ ਵਿਚ ਇਹ ਵਰਤਾਰਾ ਕਿਓ ਹੈ ਕਿਓ ਲੋਕੀ ਧੀਆਂ ਜੰਮਣ ਤੋ ਡਰਦੇ ਨੇ 
ਲੰਬੜਦਾਰ ਦੀ ਦੂਜੀ ਕੁੜੀ ਵੀ ਕਾਫੀ ਲਾਇਕ ਸੀ ਓਸ ਨੇ C .E.T  ਦਾ ਟੈਸਟ ਚੰਗੇ ਰੈੰਕ ਵਿਚ ਪਾਸ ਕਰ ਲਿਆ ਸੀ ਪਰ ਲੰਬੜਦਾਰ ਕੋਲ ਨਾ ਤਾ ਇਨ੍ਹੇ ਪੈਸੇ ਸਨ ਕੀ ਓਹ ਓਸ ਨੂੰ ਕਿਸੇ ਕਾਲਜ ਵਿਚ ਦਾਖਲ ਕਰਵਾ ਸਕਦਾ ਤੇ ਕੁਝ ਓਹ ਵੱਡੀ ਕੁੜੀ ਦੇ ਕਾਰਨ ਹੁਣ ਕਾਲਜਾਂ ਤੋ ਵੀ ਡਰਦਾ ਹੀ ਸੀ | ਇਸ ਲਈ ਓਸ ਨੂੰ ਪੜਨੋ ਹੱਟਾ ਲਿਆ ਤੇ ਸੋਚਿਆ ਕੀ ਇਸ ਦਾ ਵਿਆਹ ਕਰ ਦੇਵਾਂ ਹੁਣ | ਫੰਡ ਦਾ ੭੦ ਕੁ ਹਜ਼ਾਰ ਰੁਪਈਆਂ ਜਮਾ ਸੀ ਤੇ ਕੁਝ ਓਸ ਨੇ ਫੜ ਲੈ ਇਧਰੋ ਉਧਰੋ ਤੇ ਮੁੰਡਾ ਵੀ ਲੱਭ ਲਿਆ ਤੇ ਵਿਆਹ  ਦੀ ਤਾਰੀਕ ਪੱਕੀ ਹੋ ਗਈ. 

ਲੰਬੜਦਾਰ ਨੇ ਮੁੰਡੇ ਵਾਲਿਆ ਨੂੰ ਪਹਿਲਾਂ ਦੱਸਿਆ ਸੀ ਕੀ ਓਹ ਸਾਦਾ ਵਿਆਹ ਕਰ ਸਕਦਾ ਤੇ ਓਹ ਵੀ ਘਰ ਜਾ ਗੁਰਦਵਾਰੇ ਪੈਲਸ ਕਰਨ ਦੀ ਓਸ ਵਿਚ ਹਿੰਮਤ ਨਹੀ ਹੈ |ਪਰ ਵਿਆਹ ਤੋ ਵੀਹ ਕੁ ਦਿਨ ਪਹਿਲਾ ਮੁੰਡੇ ਵਾਲਿਆ ਨੇ ਸੁਨੇਹਾ ਭੇਜ ਦਿੱਤਾ ਕੀ ਸਾਡੇ ਰਿਸ਼ਤੇਦਾਰ ਨਹੀ ਮੰਨਦੇ ਵਿਆਹ ਪੈਲਸ ਵਿਚ ਹੀ ਕਰੋ | ਹੁਣ ਕਰਦਾ ਵੀ ਕੀ ਲੰਬੜਦਾਰ ਨੇ ਔਖੇ ਸੋਖੇ ਇੰਤਜ਼ਾਮ ਕਰ ਲਿਆ ,ਇਕ ਹੋਰ ਸੁਨੇਹਾ ਆ ਗਿਆ ਦੋ ਕੁ ਦਿਨ ਬਾਅਦ ਕੀ ਬਰਾਤੀਆਂ ਨੂੰ ਮੁਰਗਾ ਤੇ ਸ਼ਰਾਬ ਵੀ ਚਾਹੀਦੀ ਹੈ |ਲੰਬੜਦਾਰ ਸੋਚੀ ਪੈ ਗਿਆ ਕੀ ਇਨ੍ਹੇ ਪੈਸੇ ਦਾ ਇੰਤਜ਼ਾਮ ਕਿਵੇ ਹੋਵੇਗਾ ਪਰ ਫਿਰ ਵੀ ਓਸ ਨੇ ਹਾਂ ਕਹਿ ਦਿੱਤੀ | ਵਿਆਹ ਤੋ ਦਸ ਕੁ ਦਿਨ ਪਹਿਲਾਂ ਇਕ ਸੁਨੇਹਾ ਹੋਰ ਆ ਗਿਆ ਕੀ ਪਿਉ,ਚਾਚੇ,ਮਾਮੇ ਤੇ ਫੁੱਫੜ ਨੂੰ ਮਿਲਣੀ  ਤੇ  ਮੁੰਦਰੀ ਤੇ ਮਾਂ ਨੂੰ ਵਾਲੀਆਂ ਵੀ ਚਾਹੀਦੀਆਂ ਨੇ ਨਹੀ ਤਾ ਸਾਡੇ ਰਿਸ਼ਤੇਦਾਰ ਨਾਰਜ਼ ਹੁੰਦੇ ਨੇ  | ਲੰਬੜਦਾਰ ਭਲਾ ਇਨ੍ਹਾ ਖਰਚ ਕਿਥੋ ਕਰਦਾ ਓਸ ਨੇ ਅੱਕ ਕੇ ਜਵਾਬ ਦੇ ਦਿੱਤਾ ਤੇ ਰਿਸ਼ਤਾ ਤੋੜ ਦਿੱਤਾ.

....ਤੇ ਅੱਜ ਜਦੋ ਓਹ ਪੈਲਸ ਵਾਲਿਆ ਨੂੰ ਜਵਾਬ ਦੇ ਕੇ ਪਿੰਡ ਵੱਲ ਨੂੰ ਆ ਰਿਹਾ ਸੀ ,ਅੱਜ ਘਰ ਵਿਚ ਬੈਠੀਆਂ ਧੀਆਂ ਓਸ ਨੂੰ  ਪ੍ਰੇਤ ਆਤਮਾਂਵਾ ਜਾਪ ਰਹੀਆਂ ਸਨ | ਰਾਸਤੇ ਵਿਚ ਠੇਕੇ ਤੋ ਅਧੀਆ ਲੈ ਕੇ ਇਕੋ ਵਾਰੀ ਸਾਰਾ ਪੀ ਸਿਖਰ ਦੁਪਿਹਰੇ ਮੁੜਕੋ ਮੁੜਕੀ ਹੋਇਆ ਪਿੰਡ ਪੁੰਹਚਿਆ ਤਾ ਪਿੰਡੋ ਬਾਹਰ ਪੰਡਾਲ ਲੱਗਾ ਹੋਇਆ ਸੀ ਜਿਥੇ ਅੱਜ ਫਿਰ ਓਹ ਭਰੂਣ ਹੱਤਿਆਂ ਦੇ ਖਿਲਾਫ ਪਰਚਾਰ ਕਰਨ ਵਾਲੇ ਆਏ ਹੋਏ ਸਨ ਤੇ ਕੋਈ ਮੰਤਰੀ ਵੀ ਆਇਆ ਹੋਇਆ ਸੀ | ਲੰਬੜਦਾਰ ਘਰ ਦੇ ਬਜਾਏ ਸਿੱਧਾ ਓਧਰ ਨੂੰ ਹੋ ਤੁਰਿਆ ਤੇ ਜਾਂਦੇ ਨੇ ਉਚੀ ਦੇਣੀ ਲਲਕਾਰਾ ਮਾਰਿਆ ਭਰੂਣ ਹੱਤਿਆਂ ਪਾਪ ਹੈ ਦਾ ਲੱਗਾ ਬੈਨਰ ਪਾੜ ਕੇ ਸੁੱਟ ਦਿੱਤਾ ਤੇ ਤਿੰਨ ਚਾਰ ਮੋਟੀਆਂ ਮੋਟੀਆਂ ਗਾਲਾ ਕੱਢ ਕੇ ਰੋਲਾ ਪੌਉਣ ਲੱਗਾ " ਇਹ ਸਾਲੇ ਕੰਜਰ ਝੂਠ ਬੋਲਦੇ ਨੇ,ਲੋਕੋ ਤਾਹਨੂੰ ਗਲਤ ਮੱਤਾ ਦਿੰਦੇ ਨੇ,ਤੁਰ ਪੇਂਦੇ ਨੇ ਮੂੰਹ ਚੁੱਕ ਕੇ ਧੀਆਂ ਬਚਾਉ ਦਾ ਰੋਲਾ ਪਉਣ, ਕੱਲ ਨੂੰ ਉਨ੍ਹਾ ਨੂੰ ਪੜਉਣਾ ਲਿਖਾਉਣ ਤੇ ਵਿਆਹਉਣੀਆਂ ਇਨ੍ਹਾ ਦੇ ਪਿਉ ਨੇ , ਮਾਹੌਲ ਵਿਗੜਦਾ ਦੇਖ ਮੰਤਰੀ ਸਾਬ ਦੇ ਗਾਰਡ ਤੇ ਪੁਲਿਸ ਵਾਲੇ  ਲੰਬੜਦਾਰ  ਨੂੰ ਧੂਹ ਕੇ ਸਟੇਜ ਦੇ ਪਿਛੇ ਲੈ ਗਏ,ਜਿਥੇ ਹੁਣ ਓਸ ਨੂੰ ਦੂਸਰਾ ਸਨ੍ਹਮਾਨ ਮਿਲ ਰਿਹਾ ਸੀ. --ਇੰਦਰਜੀਤ ਸਿੰਘ ਕਾਲਾ ਸੰਘਿਆਂ (98156-3909)