ਮਗੂਰ ਮੱਛੀ 'ਤੇ ਪੁਲਿਸ ਵੱਲੋਂ ਪਾਬੰਦੀ ਦਾ ਐਲਾਨ

Tue, Sep 1, 2015 at 7:54 PM
ਬੜੀ ਖਤਰਨਾਕ ਅਤੇ ਹਿੰਸਕ ਹੁੰਦੀ ਹੈ ਇਹ ਮੱਛੀ 

ਲੁਧਿਆਣਾ: 1 ਸਤੰਬਰ 2015: (ਪੰਜਾਬ ਸਕਰੀਨ ਬਿਊਰੋ):

ਲੁਧਿਆਣਾ ਵਿੱਚ ਮਗੂਰ ਮੱਛੀ 'ਤੇ ਪਾਬੰਦੀ ਲਗਾ ਦਿੱਤੀ ਗਈ ਹੈ। :ਪੁਲਿਸ ਕਮਿਸ਼ਨਰ ਪਰਮਰਾਜ ਸਿੰਘ ਉਮਰਾਨੰਗਲ ਵੱਲੋਂ ਇਹ ਕਦਮ ਉਹਨਾਂ ਅਨਸਰਾਂ 'ਤੇ ਨਥ ਪਾਉਣ ਲਈ ਚੁੱਕਿਆ ਗਿਆ ਹੈ ਜਿਹੜੇ ਚੋਰੀ ਛਿਪੇ ਮਗੂਰ ਮੱਛੀ ਨੂੰਨ ਲੁਧਿਆਣਾ ਲਿਆ ਕੇ ਵੇਚਦੇ ਹਨ ਅਤੇ ਇਸਨੂੰ ਲੁਧਿਆਣਾ ਦੇ ਪਾਣੀਆਂ ਵਿੱਚ ਪਾਲਣ ਦੀ ਕੋਸ਼ਿਸ਼ ਵੀ ਕਰਦੇ ਹਨ।  ਜਿਕਰਯੋਗ ਹੈ ਕਿ ਇਹ ਇੱਕ ਖਤਰਨਾਕ ਮੱਛੀ ਹੈ ਜਿਹੜੀ ਬੜੀ ਖੁਖਰ ਗਿਨੀ ਜਾਂਦੀ ਹੈ।  ਇਹ ਆਪਣੇ ਵਰਗ ਦੀਆਂ ਮਗੂਰ ਮੱਛੀਆਂ ਨੂੰ ਵੀ ਖਾਨ ਤੋਂ ਗੁਰੇਜ਼ ਨਹੀਂ ਕਰਦੀ।  ਜੇ ਇਹਨਾਂ ਨੂੰ ਪਾਲਣ ਵਾਲਾ ਇਹਨਾਂ ਦੇ ਅੜਿੱਕੇ ਆ ਜਾਵੇ ਤਾ ਇਹ ਉਸਨੂੰ ਵੀ ਖਾਣ ਦੀ ਕੋਸ਼ਿਸ਼ ਕਰਦਿਆਂ ਹਨ। ਇਸ ਮਕਸਦ ਲਈ ਇਹ ਹਮਲਾਵਰ ਵੀ ਹੋ ਜਾਂਦੀਆਂ ਹਨ। ਕਈ ਵਾਰ ਇਹ ਖੁਦ ਵੀ ਬਾਹਰਲੇ ਪਨਿਆਂ ਨਾਲ ਤਾਲਾਬੰ ਵਿੱਚ ਦਾਖਿਲ ਹੋ ਜਾਂਦੀਆਂ ਹਨ ਪਰ ਕਈ ਵਾਰ ਇਹਨਾਂ ਨੂੰ ਮੱਛੀ ਪਾਲਣ ਵਾਲੇ ਆਪਣੇ ਲਾਲਚ ਵੱਸ ਵੀ ਲਿਆ ਕੇ ਵੇਚਦੇ ਹਨ। ਇਹ ਸਮੱਸਿਆ ਸਿਰਫ ਲੁਧਿਆਣਾ ਵਿੱਚ ਨਹੀਂ ਕਈ ਹੋਰ ਥਾਵਾਂ ਤੇ ਵੀ ਹੈ।  ਗੁਰਦਾਸਪੁਰ ਵਿੱਚ ਇਹ ਮੱਛੀ ਕਈ ਸਾਲ ਪਹਿਲਾਂ ਵੀ ਪਾਬੰਦੀ ਦੇ ਬਾਵਜੂਦ ਦੇਖੀ ਗਈ ਸੀ। ਹਿੰਸਕ ਸੁਭਾਅ ਵਾਲੀ ਇਹ ਮੱਛੀ ਸ਼ਕਲੋਂ ਵੀ ਕਈ ਵਾਰ ਬੜੀ ਡਰਾਵਨੀ ਜਿਹੀ ਮਹਿਸੂਸ ਹੁੰਦੀ ਹੈ। 

ਸਹੀ ਮੁਨਾਫ਼ਾ ਲੈਣ ਲਈ ਮੱਛੀਆਂ ਦੀ ਸੰਭਾਲ ਬਹੁਤ ਮਹਤੱਵਪੂਰਨ

Wed, May 28, 2014 at 2:59 PM

ਮਛੀਆਂ ਦੀ ਸਿਹਤ ਲਈ ਪਾਣੀ ਨੂੰ ਹਿਲਾਉਂਦੇ ਰਹਿਣਾ ਜ਼ਰੂਰੀ ਹੈ

ਲੁਧਿਆਣਾ: 28-ਮਈ-2014: (ਰੈਕਟਰ ਕਥੂਰੀਆ//ਪੰਜਾਬ ਸਕਰੀਨ): 

ਗਰਮੀਆਂ ਦੇ ਮੌਸਮ ਵਿੱਚ ਮੱਛੀ ਪਾਲਣ ਤੋਂ ਚੰਗੀ ਕਮਾਈ ਲੈਣ ਲਈ ਉਨ੍ਹਾਂ  ਦੀ ਸੁਚੱਜੀ ਸਾਂਭ ਸੰਭਾਲ ਦੀ ਲੋੜ ਬਣੀ ਰਹਿੰਦੀ ਹੈ। ਇਹ ਵਿਚਾਰ ਗੁਰੂ ਅੰਗਦ ਦੇਵ ਵੈਟਨਰੀ ਅਤੇ ਐਨੀਮਲ ਸਾਇੰਸਜ਼ ਯੂਨੀਵਰਸਿਟੀ ਦੇ ਫ਼ਿਸ਼ਰੀਜ਼ ਕਾਲਜ ਦੇ ਡਾ. ਮੀਰਾ ਆਂਸਲ ਨੇ ਪ੍ਰਗਟਾਏ। ਉਨ੍ਹਾਂ ਕਿਹਾ ਕਿ ਮੱਛੀ ਦੇ ਤਲਾਬਾਂ ਵਿੱਚ ਪਾਣੀ ਦਾ ਪੱਧਰ 6 ਫੁੱਟ ਦੇ ਕਰੀਬ ਜਰੂਰ ਰੱਖਣਾ ਚਾਹੀਦਾ ਹੈ ਇਸ ਨਾਲ ਪਾਣੀ ਦਾ ਤਾਪਮਾਨ ਥੱਲੇ ਵਾਲੇ ਹਿੱਸੇ ਵਿੱਚ ਠੀਕ ਰਹਿੰਦਾ ਹੈ। ਛੱਪੜਾਂ ਦੇ ਆਲੇ ਦੁਆਲੇ ਰੁੱਖ ਲਗਾਉਣੇ ਵੀ ਇਕ ਕਾਰਗਰ ਤਰੀਕਾ ਹੈ। ਛੱਪੜਾਂ ਵਿੱਚ ਆਕਸੀਜਨ ਦੀ ਮਾਤਰਾ ਘੱਟਣੀ ਨਹੀਂ ਚਾਹੀਦੀ ਜੋ ਕਿ ਗਰਮੀਆਂ ਦੇ ਮੌਸਮ ਵਿੱਚ ਆਮ ਤੌਰ ਤੇ ਸਵੇਰੇ ਦੇ ਵੇਲੇ ਘੱਟ ਹੁੰਦੀ ਹੈ। ਆਕਸੀਜਨ ਦਾ ਪੱਧਰ ਦਰੁੱਸਤ ਰੱਖਣ ਲਈ ਤਲਾਬਾਂ ਵਿੱਚ ਜਾਂ ਤਾਂ ਏਰੀਏਟਰ (ਪਾਣੀ ਹਿਲਾਉਣ ਵਾਲੀ ਮਸ਼ੀਨ) ਚਲਾਉਣਾ ਚਾਹੀਦਾ ਹੈ ਜਾਂ ਪਸ਼ੂਆਂ ਜਾਂ ਮਨੁੱਖਾਂ ਨੂੰ ਵਿੱਚ ਜਾ ਕੇ ਪਾਣੀ ਹਿਲਾਉਣਾ ਚਾਹੀਦਾ ਹੈ। ਮੱਛੀ ਦੇ ਤਲਾਬ ਦਾ ਪਾਣੀ ਖੇਤਾਂ ਨੂੰ ਲਾ ਦੇਣਾ ਚਾਹੀਦਾ ਹੈ ਜੋਕਿ ਫਸਲਾਂ ਲਈ ਬੜਾ ਫਾਇਦੇ ਵਾਲਾ ਰਹਿੰਦਾ ਹੈ। ਇਸ ਦੀ ਥਾਂ ਛੱਪੜਾਂ ਵਿੱਚ ਨਵਾਂ ਪਾਣੀ ਪਾਉਂਦੇ ਰਹਿਣਾ ਚਾਹੀਦਾ ਹੈ।
ਇਹ ਵੀ ਖਿਆਲ ਰੱਖਣ ਦੀ ਲੋੜ ਹੈ ਕਿ ਪਾਣੀ ਵਿੱਚ ਤੇਜ਼ਾਬੀਪਨ ਜਾਂ ਖਾਰੇਪਨ ਦੀ ਮਾਤਰਾ ਸੰਤੁਲਿਤ ਰਹੇ।ਇਸ ਪੱਧਰ ਨੂੰ ਜਾਂਚਦੇ ਰਹਿਣਾ ਚਾਹੀਦਾ ਹੈ।ਇਸ ਮੌਸਮ ਵਿੱਚ ਕਈ ਤਰ੍ਹਾਂ ਦੀਆਂ ਘਾਹ, ਬੂਟੀਆਂ ਪਾਣੀ ਵਿੱਚ ਉੱਗ ਆਉਂਦੇ ਹਨ ਜਾਂ ਪਾਣੀ ਦੇ ਵਿੱਚ ਕਾਈ ਜੰਮ ਜਾਂਦੀ ਹੈ।ਅਜਿਹੀ ਕਾਈ ਨੂੰ ਲਗਾਤਾਰ ਸਾਫ ਕਰਦੇ ਰਹਿਣਾ ਬਹੁਤ ਜਰੂਰੀ ਹੈ। ਇਨ੍ਹਾਂ ਚੀਜਾਂ ਕਰਕੇ ਪਾਣੀ ਵਿੱਚ ਅਮੋਨੀਆ ਅਤੇ ਕਾਰਬਨਡਾਈਆਕਸੀਡ ਵੱਧ ਜਾਂਦੀਆਂ ਹਨ ਜੋ ਕਿ ਮੱਛੀਆਂ ਦੀ ਸਿਹਤ ਲਈ ਨੁਕਸਾਨਦੇਹ ਹੁੰਦੀਆਂ ਹਨ।ਇਹ ਵੀ ਖਿਆਲ ਰੱਖਣ ਦੀ ਲੋੜ ਹੈ ਕਿ ਮੱਛੀਆਂ ਨੂੰ ਉਨ੍ਹੀਂ ਖੁਰਾਕ ਹੀ ਦਿੱਤੀ ਜਾਏ ਜਿੰਨੀ ਉਹ ਖਾ ਸਕਦੀਆਂ ਹੋਣ। ਵਾਧੂ ਖੁਰਾਕ ਛੱਪੜ ਦੇ ਤਲ ਵਿੱਚ ਬੈਠ ਜਾਂਦੀ ਹੈ ਜਿਸ ਨਾਲ ਪਾਣੀ ਵਿੱਚ ਜ਼ਹਿਰੀਲਾ ਮਾਦਾ ਵੱਧਦਾ ਹੈ।
ਡਾ. ਮੀਰਾ ਨੇ ਕਿਹਾ ਕਿ ਬਿਮਾਰੀਆਂ ਤੋਂ ਬਚਾਅ ਵਾਸਤੇ ਸੰਭਲ ਕੇ ਚਲਣ ਅਤੇ ਪ੍ਰਹੇਜ਼ ਰੱਖਣ ਦੀ ਨੀਤੀ ਹੀ ਸਭ ਤੋਂ ਚੰਗੀ ਹੈ।ਪਾਣੀ ਨੂੰ ਸਾਫ ਰੱਖਣ ਲਈ ਚੂਨਾ, ਲਾਲ ਦਵਾਈ ਜਾਂ ਸੀਫੈਕਸ ਦੀ ਵਰਤੋਂ ਮਾਹਿਰਾਂ ਦੀ ਰਾਏ ਮੁਤਾਬਿਕ ਕਰਨੀ ਚਾਹੀਦੀ ਹੈ। ਜੇਕਰ ਕੋਈ ਸਿਹਤ ਸਬੰਧੀ ਸਮੱਸਿਆ ਆਉਂਦੀ ਹੈ ਤਾਂ ਮਾਹਿਰ ਡਾਕਟਰ ਨੂੰ ਇਲਾਜ ਸਬੰਧੀ ਸੰਪਰਕ ਕਰਨਾ ਚਾਹੀਦਾ ਹੈ।

GADVASU ਵੱਲੋਂ ਪਸ਼ੂ ਪਾਲਣ ਮੇਲੇ ਵਿੱਚ ਦਿੱਤੇ ਗਏ ਮੁੱਖ ਮੰਤਰੀ ਪੁਰਸਕਾਰ

Fri, Mar 14, 2014 at 4:54 PM
ਪਸ਼ੂਆਂ ਦੇ ਰਿਕਾਰਡ ਲਈ ਇਜ਼ਰਾਈਲੀ ਕੰਪਨੀ ਦਾ ਕੰਪਿਊਟਰ ਸਾਫਟਵੇਅਰ

ਲੁਧਿਆਣਾ: 14 ਮਾਰਚ 2014: (ਰੈਕਟਰ ਕਥੂਰੀਆ//ਪੰਜਾਬ ਸਕਰੀਨ):

ਗੁਰੂ ਅੰਗਦ ਦੇਵ ਵੈਟਨਰੀ ਅਤੇ ਐਨੀਮਲ ਸਾਇੰਸਜ਼ ਯੂਨੀਵਰਸਿਟੀ, ਲੁਧਿਆਣਾ ਵੱਲੋਂ ਪਸ਼ੂ ਪਾਲਣ ਕਿੱਤਿਆਂ ਵਿੱਚ ਨਿਵੇਕਲੀ ਕਾਰਗੁਜ਼ਾਰੀ ਵਿਖਾਉਣ ਵਾਲੇ ਕਿਸਾਨਾਂ ਨੂੰ ਇਸ ਵਰ੍ਹੇ ਦੇ ਮੁੱਖ ਮੰਤਰੀ ਪੁਰਸਕਾਰ ਯੂਨੀਵਰਸਿਟੀ ਦੇ ਪਸ਼ੂ ਪਾਲਣ ਮੇਲੇ ਵਿੱਚ ਡਾ. ਵਿਜੇ ਕੁਮਾਰ ਤਨੇਜਾ, ਉਪ-ਕੁਲਪਤੀ, ਵੈਟਨਰੀ ਯੂਨੀਵਰਸਿਟੀ ਨੇ ਭੇਟ ਕੀਤੇ।
ਡਾ. ਰਣਜੋਧਨ ਸਿੰਘ ਸਹੋਤਾ, ਨਿਰਦੇਸ਼ਕ ਪਸਾਰ ਸਿੱਖਿਆ, ਨੇ ਮੁੱਖ ਮੰਤਰੀ ਪੁਰਸਕਾਰਾਂ ਬਾਰੇ ਦੱਸਦਿਆਂ ਕਿਹਾ ਕਿ ਪਸ਼ੂ ਪਾਲਣ ਕਿੱਤਿਆਂ ਨੂੰ ਉਤਸਾਹਿਤ ਕਰਨ ਲਈ ਯੂਨੀਵਰਸਿਟੀ ਵੱਲੋਂ ਵੱਖ-ਵੱਖ ਪਸ਼ੂ ਪਾਲਣ ਕਿੱਤਿਆਂ ਦੇ ਪਸ਼ੂ ਪਾਲਕਾਂ ਦੀਆਂ ਜਥੇਬੰਦੀਆਂ ਬਣਾਈਆਂ ਹੋਈਆਂ ਹਨ। ਇਨ੍ਹਾਂ ਕਿੱਤਿਆਂ ਵਿੱਚ ਕੰਮ ਕਰਨ ਵਾਲੇ ਕਿਸਾਨਾਂ ਨੂੰ ਹੋਰ ਹੱਲਾਸ਼ੇਰੀ ਦੇਣ ਲਈ ਯੂਨੀਵਰਸਿਟੀ ਵੱਲੋਂ ਮੁੱਖ ਮੰਤਰੀ ਪੁਰਸਕਾਰ ਦਿੱਤੇ ਜਾਂਦੇ ਹਨ। ਇਸ ਸਬੰਧੀ ਪੰਜਾਬ ਦੇ ਸਮੂਹ ਕਿਸਾਨਾਂ ਕੋਲੋਂ ਅਰਜ਼ੀਆਂ ਦੀ ਮੰਗ ਕੀਤੀ ਜਾਂਦੀ ਹੈ। ਪ੍ਰਾਪਤ ਹੋਈਆਂ ਅਰਜ਼ੀਆਂ ਦੀ ਮੁਢਲੀ ਜਾਂਚ ਪੜਤਾਲ ਤੋਂ ਬਾਅਦ ਯੂਨੀਵਰਸਿਟੀ ਦੇ ਮਾਹਿਰਾਂ ਦੀ ਟੀਮ ਨੇ ਵੱਖ ਵੱਖ ਫਾਰਮਾਂ ਦਾ ਦੌਰਾ ਕੀਤਾ ਅਤੇ ਪਸ਼ੂ ਪਾਲਕਾਂ ਵੱਲੋਂ ਅਪਣਾਈਆਂ ਜਾਣ ਵਾਲੀਆਂ ਨਵੀਨਤਮ ਤੇ ਆਪਣੇ ਤੌਰ ਤੇ ਵਿਕਸਿਤ ਤਕਨੀਕਾਂ ਦਾ ਬਾਰੀਕੀ ਨਾਲ ਮੁਆਇਨਾ ਕਰਨ ਉਪਰੰਤ ਸ. ਹਰਪ੍ਰੀਤ ਸਿੰਘ, ਪੁੱਤਰ ਸ. ਬਲਵਿੰਦਰ ਸਿੰਘ, ਪਿੰਡ ਨੂਰਪੁਰ ਹਕੀਮਾਂ ਜ਼ਿਲਾ ਮੋਗਾ ਨੂੰ ਗਾਂਵਾਂ ਦੀ ਡੇਅਰੀ ਫਾਰਮਿੰਗ ਸ਼੍ਰੇਣੀ ਵਿੱਚ ਇਨਾਮ ਦਿੱਤਾ ਗਿਆ ਹੈ।ਸੰਨ 2006 ਵਿੱਚ ਇਨ੍ਹਾਂ ਨੇ 25 ਗਾਵਾਂ ਨਾਲ ਕੰਮ ਸ਼ੂਰੂ ਕੀਤਾ ਸੀ।ਉਸਾਰੂ ਅਤੇ ਵਿਗਿਆਨਕ ਤਕਨੀਕਾਂ ਅਪਣਾ ਕੇ ਹੁਣ ਇਨ੍ਹਾਂ ਕੋਲ 133 ਪਸ਼ੂ ਹਨ। ਜਿਨ੍ਹਾਂ ਵਿੱਚ 45 ਗਾਂਵਾਂ ਲਗਭਗ 14 ਕਵਿੰਟਲ ਰੋਜ਼ਾਨਾ ਦੁੱਧ ਪੈਦਾ ਕਰ ਰਹੀਆਂ ਹਨ। ਦੁੱਧ ਦੀ ਚੁਆਈ ਵਾਸਤੇ ਆਧੁਨਿਕ ਮਿਲਕਿੰਗ ਪਾਰਲਰ ਹੈ। ਪਸ਼ੂਆਂ ਦਾ ਪੂਰਨ ਰਿਕਾਰਡ ਰੱਖਣ ਲਈ ਇਨ੍ਹਾਂ ਨੇ ਇਜ਼ਰਾਈਲ ਦੀ ਕੰਪਨੀ ਦਾ ਕੰਪਿਊਟਰ ਸਾਫਟਵੇਅਰ ਲਗਾਇਆ ਹੋਇਆ ਹੈ।
ਸ. ਗੁਰਜਤਿੰਦਰ ਸਿੰਘ ਵਿਰਕ, ਪੁੱਤਰ ਸ. ਆਤਮਾਇੰਦਰ ਸਿੰਘ, ਪਿੰਡ ਕੰਧੋਲਾ, ਜ਼ਿਲਾ ਰੂਪਨਗਰ ਨੇ ਸੰਨ 1985 ਵਿੱਚ 5 ਏਕੜ ਰਕਬੇ ਵਿੱਚ ਮੱਛੀ ਪਾਲਣ ਦਾ ਕਿੱਤਾ ਸ਼ੁਰੂ ਕੀਤਾ। ਇਸ ਵੇਲੇ ਉਹ 30 ਏਕੜ ਰਕਬੇ ਵਿੱਚ ਮੱਛੀ ਪਾਲਣ ਕਰ ਰਹੇ ਹਨ। ਉਨ੍ਹਾਂ ਨੇ ਮੱਛੀ ਪਾਲਣ ਲਈ 5 ਤਲਾਬ ਬਣਾਏ ਹੋਏ ਹਨ ਅਤੇ 2 ਨਰਸਰੀ ਤਲਾਬ ਤਿਆਰ ਕੀਤੇ ਹੋਏ ਹਨ। ਸ. ਵਿਰਕ ਨੇ ਸੇਮ ਵਾਲੇ ਇਲਾਕੇ ਦੀ ਖੇਤੀਬਾੜੀ ਵਿੱਚ ਕੰਮ ਨਾ ਆਉਣ ਵਾਲੀ ਜ਼ਮੀਨ ਨੂੰ ਇਸ ਕਾਰਜ ਲਈ ਵਰਤਿਆ ਹੈ।ਆਪਣੇ ਕਿੱਤੇ ਨੂੰ ਹੋਰ ਪ੍ਰਫੁੱਲਿਤ ਕਰਨ ਲਈ ਉਹ ਫਾਰਮ ਟੂਰਿਜ਼ਮ ਦਾ ਕੰਮ ਵੀ ਆਪਣੇ ਫਾਰਮ ਤੇ ਕਰ ਰਹੇ ਹਨ।
ਸੂਰ ਪਾਲਣ ਦੇ ਖੇਤਰ ਵਿੱਚ ਪਿੰਡ ਕਿਸ਼ਨਪੁਰਾ, ਜ਼ਿਲਾ ਰੂਪਨਗਰ ਦੇ ਸ. ਦਲਵਿੰਦਰ ਸਿੰਘ ਨੂੰ ਸਨਮਾਨਿਤ ਕੀਤਾ ਗਿਆ। ਸੰਨ 2008 ਵਿੱਚ 10 ਸੂਰਾਂ ਨਾਲ ਕਿੱਤਾ ਸ਼ੁਰੂ ਕਰਕੇ ਇਸ ਵੇਲੇ ਉਨ੍ਹਾਂ  ਨੇ 128 ਸੂਰ ਰੱਖੇ ਹੋਏ ਹਨ।ਸੂਰਾਂ ਨੂੰ ਬੜੇ ਖੁੱਲੇ ਤੇ ਹਵਾਦਾਰ ਸ਼ੈੱਡਾਂ ਵਿੱਚ ਰੱਖਦੇ ਹਨ ਅਤੇ ਹਰ ਸਾਲ 15-16 ਲੱਖ ਮੁਨਾਫਾ ਕਮਾ ਲੈਂਦੇ ਹਨ।ਪੂਰਾ ਹਿਸਾਬ ਕਿਤਾਬ ਰੱਖ ਕੇ ਕੰਮ ਕਰਨ ਵਾਲੇ ਇਸ ਕਿਸਾਨ ਨੇ ਸੂਰ ਪਾਲਣ ਵਿੱਚ ਚੰਗਾ ਨਾਮਣਾ ਖੱਟਿਆ ਹੈ। ਮੁੱਖ ਮੰਤਰੀ ਪੁਰਸਕਾਰ ਵਿੱਚ ਗਾਂਵਾਂ ਦਾ ਸਨਮਾਨ ਪ੍ਰਾਪਤ ਕਰਨ ਵਾਲੇ ਪਸ਼ੂ ਪਾਲਕਾਂ ਨੁੰ 21 ਹਜ਼ਾਰ, ਮੱਛੀ ਪਾਲਣ ਵਾਲੇ ਨੂੰ 11 ਹਜ਼ਾਰ ਅਤੇ ਸੂਰ ਪਾਲਕ ਨੰ 5100 ਰੁਪਏ ਦੇ ਨਗਦ ਇਨਾਮ ਤੋਂ ਇਲਾਵਾ ਸਨਮਾਨ ਪੱਤਰ, ਸ਼ਾਲ ਅਤੇ ਸਜਾਵਟੀ ਤਖਤੀ ਦੇ ਕੇ ਸਨਮਾਨਿਆ ਗਿਆ।
ਡਾ. ਤਨੇਜਾ ਨੇ ਇਨ੍ਹਾਂ ਪਸ਼ੂ ਪਾਲਕਾਂ ਨੂੰ ਸਨਮਾਨਿਤ ਕਰਦਿਆਂ ਇਹ ਉਮੀਦ ਵੀ ਜ਼ਾਹਿਰ ਕੀਤੀ ਕਿ ਅਜਿਹੇ ਪੁਰਸਕਾਰ ਪਸ਼ੂ ਪਾਲਣ ਨਾਲ ਸਬੰਧਿਤ ਕਿੱਤਿਆਂ ਨੂੰ ਅਪਣਾਉਣ ਲਈ ਪੇਂਡੂ ਵੀਰਾਂ ਨੂੰ ਪ੍ਰਰਿਤ ਕਰਨਗੇ ਜਿਸ ਨਾਲ ਬੇਰੁਜ਼ਗਾਰ ਨੋਜਵਾਨਾਂ ਨੂੰ ਰੋਜ਼ੀ ਰੋਟੀ ਮਿਲਣ ਤੋਂ ਇਲਾਵਾ ਰਵਾਇਤੀ ਖੇਤੀ ਵਿੱਚ ਵੰਨ-ਸੁਵੰਨਤਾ ਆਵੇਗੀ ਅਤੇ ਪੇਂਡੂ ਲੋਕਾਂ ਦਾ ਸਮਾਜਿਕ ਅਤੇ ਆਰਥਿਕ ਜੀਵਨ ਨਿਰਬਾਹ ਹੋਰ ਸੁਚੱਜਾ ਹੋਵੇਗਾ।

ਸੋਚਣ ਲਈ ਮਜਬੂਰ ਕਰਦੀ ਇੱਕ ਹੋਰ ਲਿਖਤ

ਮੱਛੀ ਖਾਣੀ ਹੈ ਜਾਂ ਨਹੀਂ--ਇਹ ਫੈਸਲਾ ਤੁਹਾਡੇ ਹੱਥ 
ਮੇਨਕਾ ਗਾਂਧੀ  ਨੇ ਲਗਾਤਾਰ ਕਈ ਅਹੁਦਿਆਂ ਤੇ ਬਹੁਤ ਹੀ ਸਫਲਤਾ ਨਾਲ ਕੰਮ ਕਰਕੇ ਹਰ ਵਾਰ ਆਪਣੀ ਕਾਬਲੀਅਤ, ਜ਼ਿੰਮੇਦਾਰੀ ਅਤੇ ਪ੍ਰਤਿਬਧਤਾ ਦਾ ਨੂੰ ਬਾਰ ਬਾਰ ਸਾਬਿਤ ਕੀਤਾ ਹੈ। ਪੇਕਿਆਂ ਤੋਂ ਸਹੁਰਿਆਂ ਤੱਕ, ਸਹੁਰਿਆਂ ਤੋਂ ਜਨਤਾ ਤੱਕ, ਮਾਡਲਿੰਗ ਤੋਂ ਮੀਡੀਆ ਤੱਕ, ਮੀਡੀਆ ਤੋਂ ਮੰਤਰਾਲਿਆਂ ਤੱਕ ਅਤੇ ਅੰਦੋਲਨਾਂ ਤੋਂ ਜੀਵ ਸੁਰੱਖਿਆ ਤੱਕ ਬਹੁਤ ਸਾਰੇ ਦੌਰ ਆਏ---ਬਹੁਤ ਸਾਰੇ ਚੰਗੇ ਮੰਦੇ ਸਮੇਂ ਵੀ ਆਏ----ਪਤੀ ਦੀ ਮੌਤ, ਹਰ ਪਾਸਿਓਂ ਵਿਰੋਧ, ਹਰ ਪਾਸੇ ਨਿਰਾਸ਼ਾ, ਹਰ ਪਾਸੇ ਹਨੇਰਾ---ਪਰ ਮੇਨਕਾ ਨੇ ਕਦੇ ਵੀ ਸੰਘਰਸ਼ ਦੀ ਮਿਸ਼ਾਲ ਬੁਝਣ ਨਹੀਂ ਦਿੱਤੀ। ਇਹ ਸਭ ਕੁਝ ਅੱਜ ਫਿਰ ਯਾਦ ਆਇਆ ਇੱਕ ਹਾਰਨ ਪਿਆਰੇ ਅਖਬਾਰ ਜਗ ਬਾਣੀ ਵਿੱਚ ਮੇਨਕਾ ਗਾਂਧੀ ਦੀ ਇੱਕ ਲਿਖਤ ਪੜ੍ਹਕੇ। ਇਹ ਲਿਖਤ ਮਛੀਆਂ ਵਿੱਚ ਪਾਏ ਜਾਂਦੇ ਕੀੜਿਆਂ ਬਾਰੇ ਹੈ। ਉਹਨਾਂ ਕੀੜਿਆਂ  ਬਾਰੇ ਜਿਹਨਾਂ ਨੂੰ ਅਕਸਰ ਮੱਛੀਆਂ ਖਾਣ ਵਾਲੇ ਨਾਲੋ ਨਾਲ ਨਿਗਲ ਲੈਂਦੇ ਹਨ।  ਹਮੇਸ਼ਾਂ ਦੀ ਤਰ੍ਹਾਂ ਇਸ ਵਾਰ ਵੀ ਮੇਨਕਾ ਗਾਂਧੀ ਨੇ ਆਪਣੇ ਪਾਠਕਾਂ 'ਤੇ ਕੁਝ ਨਹੀਂ ਠੋਸਿਆ।  ਇਹ ਲਿਖਤ ਵੀ ਮਿਆਰੀ ਪੱਤਰਕਾਰੀ ਦੇ ਉੱਚੇ ਸੁੱਚੇ ਅਸੂਲਾਂ ਦੀ ਪਾਲਣਾ ਕਰਦਿਆਂ ਤੁਹਾਡੇ ਸਾਹਮਣੇ ਸਿਰਫ ਤਥਾਂ ਅਤੇ ਅੰਕੜਿਆਂ ਨੂੰ ਬਹੁਤ ਹੀ ਰੌਚਕ ਢੰਗ ਨਾਲ ਪੇਸ਼ ਕਰਦੀ ਹੈ। ਤੁਸੀਂ ਹਰ ਵਾਰ ਦੀ ਤਰ੍ਹਾਂ ਇਸ ਵਾਰ ਵੀ ਮੇਨਕਾ ਗਾਂਧੀ ਦੀ ਇਸ ਲਿਖਤ ਨੂੰ ਸਾਹ ਰੋਕ ਕੇ ਪੜ੍ਹਦੇ ਹੋ ਅਤੇ ਏਨੇ ਵਿੱਚ ਹੀ ਲਿਖਤ ਕਦੋਂ ਖਤਮ ਹੋ ਜਾਂਦੀ ਇਸਦਾ ਪਤਾ ਈ ਨਹੀਂ ਲੱਗਦਾ ---ਮੱਛੀ ਖਾਣੀ ਹੈ ਜਾਂ ਨਹੀਂ---ਇਸਦਾ ਫੈਸਲਾ ਤੁਹਾਡੇ ਆਪਣੇ ਵਿਵੇਕ ਤੇ ਛੱਡਦੀ ਹੋਈ ਇਹ ਲਿਖਤ ਵੀ ਤੁਹਾਨੂੰ ਜ਼ਿੰਦਗੀ, ਬਾਰੇ ਲਾਈਫ਼ ਸਟਾਈਲ ਬਾਰੇ ਅਤੇ ਜ਼ਿੰਦਗੀ ਨਾਲ ਜੁੜੇ  ਨਾਜ਼ੁਕ ਫੈਸਲਿਆਂ ਬਾਰੇ ਕੁਝ ਸੋਚਣ ਲਈ ਮਜਬੂਰ ਵੀ ਕਰਦੀ ਹੈ।  --ਰੈਕਟਰ ਕਥੂਰੀਆ 

                                                                                      ਰੋਜ਼ਾਨਾ ਜਗ ਬਾਣੀ ਚੋਂ ਧੰਨਵਾਦ ਸਹਿਤ