ਸਤਿਗੁਰੂ ਰਾਮ ਸਿੰਘ ਜੀ ਦੇ ਜਨਮ ਉਤਸਵ ਮਨਾਉਣ ਲਈ ਖਿੱਚੀ ਗਈ ਲਕੀਰ

Oct 31, 2018, 5:28 PM

ਜਨਮ ਉਤਸਵ ਸਮਾਗਮ ਨਿਰਪੱਖ ਹੋ ਕੇ ਮਨਾਉਣ ਦੀ ਅਪੀਲ

ਨਵੀ ਦਿੱਲੀ: 31 ਅਕਤੂਬਰ 2018: (ਪੰਜਾਬ ਸਕਰੀਨ ਬਿਊਰੋ)::

ਨਾਮਧਾਰੀਆਂ ਦੇ ਦੋ ਪ੍ਰਮੁੱਖ ਗੁਟਾਂ ਵਾਂਗ ਸੱਤਾ ਵੀ ਦੋ ਧੜਿਆਂ ਵਿੱਚ ਵੰਡੀ ਹੋਈ ਲੱਗਦੀ ਹੈ। ਇਸ ਨਾਜ਼ੁਕ ਸਥਿਤੀ ਨੂੰ ਦੇਖਦਿਆਂ ਨਾਮਧਾਰੀਆਂ ਦਾ ਇੱਕ ਪ੍ਰਮੁਖ ਧੜਾ ਅੱਜ ਪ੍ਰਧਾਨਮੰਤਰੀ ਦਫਤਰ ਵਿਖੇ ਪਹੁੰਚਿਆ। ਜ਼ਿਕਰਯੋਗ ਹੈ ਕਿ ਨਾਮਧਾਰੀਆਂ ਦਾ ਇੱਕ ਧੜਾ ਸ੍ਰੀ ਭੈਣੀ ਸਾਹਿਬ ਵਿਖੇ ਸਥਿਤ ਹੈ ਜਿਸਦੀ ਅਗਵਾਈ ਠਾਕੁਰ ਉਦੈ ਸਿੰਘ ਕਰਦੇ ਹਨ।  ਦੂਸਰਾ ਧੜਾ ਸ੍ਰੀ ਜੀਵਨ ਨਗਰ ਸਿਰਸਾ ਤੋਂ ਆਪਣੀਆਂ ਸਰਗਰਮੀਆਂ ਚਲਾਉਂਦਾ ਹੈ ਅਤੇ ਇਸਦੀ ਅਗਵਾਈ ਠਾਕੁਰ ਦਲੀਪ  ਸਿੰਘ ਕਰਦੇ ਹਨ। ਪਣੀਆਂ ਸਰਗਰਮੀਆਂ ਚਲਾਉਂਦਾ ਹੈ ਜਿਸਦੀ ਅਗਵਾਈ ਠਾਕੁਰ ਦਲੀਪ ਸਿੰਘ ਕਰਦੇ ਹਨ ਜੋ ਕਿ ਠਾਕੁਰ ਉਦੈ ਸਿੰਘ ਦੇ ਵੱਡੇ ਭਰਾ ਵੀ ਹਨ। ਨਾਮਧਾਰੀ ਕੂਕਾ ਅੰਦੋਲਨ ਦੇ ਮੁਖੀ ਸਤਿਗੁਰੂ ਰਾਮ ਸਿੰਘ ਜੀ ਦੇ 200ਵੇਂ ਜਨਮ ਉਤਸਵ ਸਬੰਧੀ ਸਰਕਾਰ ਨੇ ਵਿਸ਼ੇਸ਼ ਆਯੋਜਨ ਕਰਾਉਣ ਦਾ ਐਲਾਨ ਕੀਤਾ ਹੈ। ਇਸ ਐਲਾਨ ਮਗਰੋਂ ਠਾਕੁਰ ਦਲੀਪ ਸਿੰਘ ਦੀ ਅਗਵਾਈ ਵਾਲੇ ਧੜੇ ਨੇ ਅੱਜ ਪਰਧਾਨ ਮੰਤਰੀ ਦਫਤਰ ਜਾ ਕੇ ਉਚੇਚਾ ਧੰਨਵਾਦ ਵੀ ਕੀਤਾ। ਇਸਦੇ ਨਾਲ ਹੀ ਬੇਨਤੀ ਵੀ ਕੀਤੀ ਕਿ ਨਾਮਧਾਰੀਆਂ ਦੇ ਵੱਡੇ ਅਤੇ ਸਹੀ ਧੜੇ ਨੂੰ ਨਾਲ ਲੈ ਕੇ ਹੀ ਇਹ ਪੁਰਬ ਮਨਾਇਆ ਜਾਵੇ ਨਾ ਕਿ ਦੂਜੇ ਧੜੇ ਨਾਲ। ਜ਼ਿਕਰਯੋਗ ਹੈ ਕਿ ਮਾਤਾ ਚੰਦ ਕੌਰ ਦੇ ਵਹਿਸ਼ੀਆਨਾ ਕਤਲ ਤੋਂ ਬਾਅਦ ਦੋਹਾਂ ਧੜਿਆਂ ਵਿਚਲੀ ਇਹ ਲਕੀਰ ਹੋਰ ਗੂਹੜੀ ਹੋ ਗਈ ਹੈ। ਅਜੇ ਤੱਕ ਇਸ ਕਤਲ ਲਈ ਜ਼ਿੰਮੇਵਾਰ ਅਨਸਰਾਂ ਨੂੰ ਬੇਨਕਾਬ ਨਹੀਂ ਕੀਤਾ ਜਾ ਸਕਿਆ। 

ਪਰਧਾਨਮੰਤਰੀ ਮੋਦੀ ਦੇ ਦਫਤਰ ਤੋਂ ਬਾਹਰ ਆਉਂਦਿਆਂ ਨਾਮਧਾਰੀ ਵਫਦ 

ਨਾਮਧਾਰੀ ਗੁਰਦੁਆਰਾ ਸਮਿਤੀ ਸ਼੍ਰੀ ਜੀਵਨ ਨਗਰ ਸਿਰਸਾ ਦਾ ਇੱਕ ਵਫਦ ਮੰਗਲਵਾਰ 31 ਅਕਤੂਬਰ ਨੂੰ ਮਾਨਯੋਗ ਪ੍ਰਧਾਨ ਮੰਤਰੀ ਸ਼੍ਰੀ ਨਰਿੰਦਰ ਮੋਦੀ ਨੂੰ ਮਿਲ ਕੇ ਕੇਂਦਰ ਸਰਕਾਰ ਵੱਲੋਂ ਨਾਮਧਾਰੀ ਕੂਕਾ ਅੰਦੋਲਨ ਦੇ ਮੁਖੀ ਸਤਿਗੁਰੂ ਰਾਮ ਸਿੰਘ ਜੀ ਦੇ 200ਵੇਂ ਜਨਮ ਉਤਸਵ ਸਬੰਧੀ ਕਰਵਾਏ ਜਾ ਰਹੇ ਸਮਾਗਮ ਦੇ ਆਯੋਜਨ ਲਈ ਉਨ੍ਹਾਂ ਦਾ ਧੰਨਵਾਦ ਕੀਤਾ। ਨਾਲ ਹੀ ਇਹ ਵਫਦ ਪ੍ਰਧਾਨ ਮੰਤਰੀ ਜੀ ਨੂੰ ਨਾਮਧਾਰੀ ਪੰਥ ਸਬੰਧੀ ਸਪੱਸ਼ਟ ਕਰਦੇ ਹੋਏ ਇੱਕ ਮੈਮੋਰੈਂਡਮ ਦੇ ਕੇ ਨਾਮਧਾਰੀ ਸੰਪਰਦਾ ਦੀ ਸਹੀ ਧਿਰ ਨੂੰ ਹੀ ਨਾਲ ਲੈ ਕੇ ਇਹ ਆਯੋਜਨ ਕਰਨ ਦੀ ਬੇਨਤੀ ਕੀਤੀ। ਵਫਦ ਦੇ ਆਗੂ ਨਰਿੰਦਰ ਸਿੰਘ ਵਕੀਲ ਨੇ ਅੱਜ ਇਥੇ ਇਹ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਮਾਨਯੋਗ ਪ੍ਰਧਾਨ ਮੰਤਰੀ ਸ਼੍ਰੀ ਨਰਿੰਦਰ ਮੋਦੀ ਜੀ ਨੂੰ ਦਿੱਤੇ ਜਾਣ ਵਾਲੇ ਯਾਦ ਪੱਤਰ ਵਿੱਚ ਬੇਨਤੀ ਕੀਤੀ ਗਈ ਹੈ ਕਿ ਇਹ ਸਮਾਗਮ ਕਿੱਥੇ ਅਤੇ ਕਿਵੇਂ ਮਨਾਇਆ ਜਾਵੇ, ਇਸ ਬਾਰੇ ਫੈਸਲਾ ਕਰਨ ਤੋਂ ਪਹਿਲਾਂ ਇਹ ਫੈਸਲਾ ਕਰਨਾ ਜ਼ਰੂਰੀ ਹੈ ਕਿ ਇਹ ਸਮਾਗਮ ਆਰ.ਐਸ.ਐਸ ਅਤੇ ਭਾਰਤੀ ਜਨਤਾ ਪਾਰਟੀ ਦੇ ਸਮਰਥਕ ਸਤਿਗੁਰੂ ਦਲੀਪ ਸਿੰਘ ਨੂੰ ਮੰਨਣ ਵਾਲੇ ਨਾਮਧਾਰੀ ਪੰਥ ਨਾਲ ਮਿਲ ਕੇ ਮਨਾਇਆ ਜਾਣਾ ਹੈ ਜਾਂ ਫਿਰ ਕਾਂਗਰਸ ਸਮਰਥਕ ਅਤੇ ਮਾਤਾ-ਪਿਤਾ ਨੂੰ ਪੰਥ ਵਿੱਚੋਂ ਛੇਕਣ (ਕੱਢਣ) ਵਾਲੇ ਠਾਕੁਰ ਉਦੈ ਸਿੰਘ ਨੂੰ ਮੰਨਣ ਵਾਲੇ ਨਾਮਧਾਰੀ ਪੰਥ ਦੇ ਨਾਲ? ਕਿਉਂਕਿ 70 ਪ੍ਰਤੀਸ਼ਤ ਨਾਮਧਾਰੀ ਸੰਗਤ ਭੈਣੀ ਸਾਹਿਬ ਵਿਖੇ ਸਮਾਜ ਵਿਰੋਧੀ ਕਾਰਜ ਹੋਣ ਕਰਕੇ ਉੱਥੇ ਨਹੀਂ ਜਾਂਦੀ ਅਤੇ ਅਸੀਂ ਨਹੀਂ ਚਾਹੁੰਦੇ ਕਿ ਉਨ੍ਹਾਂ ਨਾਲ ਮਿਲਕੇ ਕੀਤੇ ਜਾਣ ਵਾਲੇ ਆਯੋਜਨ ਸਦਕਾ ਭਾਜਪਾ ਸਰਕਾਰ ਜਨ ਅਲੋਚਨਾ ਦਾ ਕੇਂਦਰ ਬਿੰਦੂ ਬਣੇ। ਵਫਦ ਨੇ ਕਿਹਾ ਕਿ ਪ੍ਰਧਾਨ ਮੰਤਰੀ ਜੀ ਨੂੰ ਇਹ ਬੇਨਤੀ ਕੀਤੀ  ਕਿ ਸਤਿਗੁਰੂ ਰਾਮ ਸਿੰਘ ਜੀ ਦੇ 200ਵੇਂ ਜਨਮ ਉਤਸਵ ਦੇ ਸਮਾਗਮ ਭਾਜਪਾ ਦੀ ਕੇਂਦਰ ਸਰਕਾਰ ਅਧਰਮੀਆਂ ਨਾਲ ਨਹੀਂ ਧਰਮੀਆਂ ਨਾਲ ਮਿਲਕੇ ਮਨਾਵੇ ਤਾਂ ਜੋ ਸਮੁੱਚੀ ਨਾਮਧਾਰੀ ਸੰਗਤ ਇਸ ਸਮਾਗਮ ਵਿੱਚ ਭਾਗ ਲੈ ਸਕੇ। ਵਫਦ ਵਿੱਚ ਹੋਰਨਾਂ ਤੋਂ ਇਲਾਵਾ ਸੂਬਾ ਭਗਤ ਸਿੰਘ, ਸੁੱਲਖਣ ਸਿੰਘ, ਸੁਖਦੇਵ ਸਿੰਘ, ਚਰਣਜੀਤ ਸਿੰਘ, ਅਰਵਿੰਦਰ ਸਿੰਘ (ਦਿਲ਼ੀ) ਗੁਰਮੀਤ ਸੱਗੂੁ ਵੀ ਸ਼ਾਮਿਲ ਸਨ।