ਗ੍ਰਿਫ਼ਤਾਰ ਵਿਦਿਆਰਥਣ ਨੂੰ ਅੱਧੀ ਰਾਤ ਪੁਲਸ ਨੇ ਜਿਪਸੀਆਂ 'ਚ ਘੁੰਮਾਇਆ

6ਵੀਂ ਜਮਾਤ ਦੇ ਵਿਦਿਆਰਥੀ ਨਾਲ ਵੀ ਕੀਤੀ ਕੁੱਟਮਾਰ 

ਬਠਿੰਡਾ ਤੋਂ ਬਲਜਿੰਦਰ ਕੋਟਭਾਰਾ ਦੀ ਰਿਪੋਰਟ:

ਬਾਦਲ ਪਰਵਾਰ ਦੀ ਆਰਬਿਟ ਟਰਾਂਸਪੋਰਟ ਦੇ ਗੁੰਡਾ ਸਟਾਫ਼ ਵੱਲੋਂ ਦਲਿਤ ਨਾਬਾਲਗ ਲੜਕੀ ਨਾਲ ਛੇੜਛਾੜ ਕਰਨ ਮਗਰੋਂ ਕਤਲ ਕਰਨ ਦੇ ਵਿਰੋਧ ਵਿੱਚ ਪੰਜਾਬ ਸਟੂਡੈਂਟਸ ਯੂਨੀਅਨ ਤੇ ਨੌਜਵਾਨ ਭਾਰਤ ਸਭਾ ਵੱਲੋਂ ਵਿੱਢੇ ਅੰਦੋਲਨ ਤਹਿਤ ਫ਼ਰੀਦਕੋਟ ਵਿੱਚ ਬਾਦਲਾਂ ਦੀ ਹਿੱਸੇਦਾਰੀ ਤੇ ਰਿਸ਼ਤੇਦਾਰ ਡਿੰਪੀ ਢਿੱਲੋਂ ਦੀ 'ਨਿਊ ਦੀਪ' ਟਰਾਂਸਪੋਰਟ ਕੰਪਨੀ ਦੀ ਇਕ ਬੱਸ ਦੇ ਸ਼ੀਸ਼ੇ ਉਸ ਵੇਲੇ ਭੰਨ ਦਿੱਤੇ ਸਨ, ਜਦ ਪੁਲਸ ਦੇ ਰੋਕਣ ਦੇ ਬਾਵਜੂਦ ਬੱਸ ਦੇ ਕਰਿੰਦੇ ਬੱਸ ਨੂੰ ਨਾ ਸਿਰਫ ਸ਼ਹਿਰ ਵਿੱਚ ਲੈ ਆਏ, ਬਲਕਿ ਰੋਸ ਵਿਖਾਵਾ ਕਰ ਰਹੇ ਨੌਜਵਾਨਾਂ 'ਤੇ ਬੱਸ ਚਾੜ੍ਹਨ ਦੀ ਕੋਸ਼ਿਸ਼ ਵੀ ਕੀਤੀ।

ਇਸ ਮਗਰੋਂ ਦਾ ਘਟਨਾਕ੍ਰਮ ਪੂਰੀ ਦੁਨੀਆ ਦੇ ਪੰਜਾਬੀਆਂ ਵਿੱਚ ਚਰਚਾ ਵਿੱਚ ਹੈ ਕਿ ਬੱਸ ਦੇ ਸ਼ੀਸ਼ੇ ਭੰਨੇ ਜਾਣ 'ਤੇ ਪੁਲਸ ਨੇ ਹੁਕਮਰਾਨਾਂ ਦੇ ਆਦੇਸ਼ 'ਤੇ ਨੌਜਵਾਨਾਂ ਖਿਲਾਫ ਇਰਾਦਾ ਏ ਕਤਲ ਦੀ ਧਾਰਾ 307 ਲਾਈ ਤੇ ਝੰਡਿਆਂ ਵਾਲੇ ਡੰਡਿਆਂ ਨੂੰ ਤੇਜ਼ਧਾਰ ਹਥਿਆਰ ਬਣਾ ਦਿੱਤਾ। ਨਿਊ ਦੀਪ ਬੱਸ ਦੇ ਮਾਲਕਾਂ ਦੇ ਕਰਿੰਦਿਆਂ ਦੀ ਹਾਜ਼ਰੀ ਵਿੱਚ ਨਾ ਸਿਰਫ ਹਿਰਾਸਤ ਵਿੱਚ ਲਏ ਨੌਜਵਾਨਾਂ ਨੂੰ ਕੁੱਟਿਆ, ਬਲਕਿ ਗਾਲਾਂ ਵੀ ਕੱਢੀਆਂ। ਹੁਣ ਇਸ ਮਾਮਲੇ ਨੂੰ ਜਿਸ ਪਾਸੇ ਲਿਜਾਇਆ ਜਾ ਰਿਹਾ ਹੈ, ਉਹ ਜਾਗਦੀਆਂ ਜ਼ਮੀਰਾਂ ਵਾਲਿਆਂ ਬੇਹੱਦ ਬੇਚੈਨ ਕਰ ਰਿਹਾ ਹੈ।

ਇਸ ਅੰਦੋਲਨ ਵਿੱਚ ਸ਼ਾਮਲ 6ਵੀਂ ਜਮਾਤ ਦੇ ਵਿਦਿਆਰਥੀ 14 ਸਾਲ ਦੇ ਹਰਪ੍ਰੀਤ ਸਿੰਘ ਪੁੱਤਰ ਘੁੱਕਰ ਸਿੰਘ ਦੀ ਪੁਲਸ ਦੇ ਉੱਚ ਅਧਿਕਾਰੀਆਂ ਨੇ ਖੁਦ ਬੇਰਹਿਮੀ ਨਾਲ ਕੁੱਟਮਾਰ ਕੀਤੀ। ਫ਼ਰੀਦਕੋਟ ਜੇਲ੍ਹ ਵਿੱਚ ਇਰਾਦਾ ਕਤਲ ਕੇਸ ਧਾਰਾ 307 ਤਹਿਤ ਬੰਦ ਇਹਨਾਂ ਵਿਦਿਆਰਥੀਆਂ ਵਿੱਚੋਂ ਕੁਝ ਕੁ ਨਾਲ ਜਦੋਂ ਮੁਲਾਕਾਤ ਕੀਤੀ ਤਾਂ ਲੂ ਕੰਡੇ ਖੜੇ ਹੋਣ ਵਾਲੇ ਤੱਥ ਸਾਹਮਣੇ ਆਏ। ਪੰਜਾਬ ਦੀ ਦਲੇਰ ਧੀ, ਜਿਸ ਨੂੰ ਬੈਂਸ ਭਰਾ ਵੀ ਮੁਲਾਕਾਤ ਕਰਕੇ ਦਲੇਰ ਬੇਟੀ ਦਾ ਖਿਤਾਬ ਦੇ ਕੇ ਗਏ, ਹਰਦੀਪ ਕੌਰ ਕੋਟਲਾ ਬੀ ਏ ਜਮਾਤ ਦੀ ਵਿਦਿਆਰਥਣ ਦੀ ਅੱਧੀ ਰਾਤ ਤੱਕ ਜੇਲ੍ਹ ਵਿੱਚ ਕੁੱਟਮਾਰ ਹੁੰਦੀ ਰਹੀ, ਕੁੱਟਮਾਰ ਕਾਰਨ ਉਸ ਦਾ ਮੂੰਹ ਸੁੱਜਿਆ ਹੋਇਆ ਹੈ, ਬੇਤਹਾਸ਼ਾ ਤਸ਼ੱਦਦ ਕਾਰਨ ਉਸ ਨੂੰ ਕੰਨਾਂ ਤੋਂ ਪੂਰਾ ਨਹੀਂ ਸੁਣ ਰਿਹਾ। ਵਾਰ-ਵਾਰ ਕੁੱਟ ਨਾਲ ਕਮਰ ਦਰਦ ਦੀ ਪੀੜਤ ਹਰਦੀਪ ਕੌਰ ਨੇ ਦੱਸਿਆ ਕਿ ਉਸ ਦੀ ਐਨੀ ਬੇਰਹਿਮੀ ਨਾਲ ਕੁੱਟਮਾਰ ਕਰਨ ਵੇਲੇ ਇਹ ਪੁੱਛਿਆ ਜਾਂਦਾ ਹੈ ਕਿ ਹੁਣ ਤਾਂ ਤੂੰ ਸੁਧਰ ਜਾਵੇਂਗੀ ਕਿ ਅਜੇ ਹੋਰ ਕਸਰ ਬਾਕੀ ਹੈ। ਤਸ਼ੱਦਦ ਦੇ ਇਸ ਦੌਰ ਵੇਲੇ ਹਰਦੀਪ ਕੌਰ ਦੇ ਪਿੰਡ ਕੋਟਲਾ ਮੇਹਰ ਸਿੰਘ ਵਾਲਾ 'ਚ ਸਥਿਤ ਉਸ ਦੇ ਘਰ ਪੁਲਸ ਗਈ, ਪਰ ਪਰਵਾਰ ਵੱਲੋਂ ਖੌਫ ਵਿੱਚ ਇਹ ਕਹਿਣ 'ਤੇ ਕਿ ਅਸੀਂ ਤਾਂ ਆਪਣੀ ਧੀ ਬੇਦਖ਼ਲ ਕੀਤੀ ਹੋਈ ਹੈ, ਜਦ ਇਹ ਸੁਨੇਹਾ ਫ਼ਰੀਦਕੋਟ ਦੀ ਸੀ ਆਈ ਏ ਸਟਾਫ ਨੂੰ ਮਿਲਿਆ ਤਾਂ ਫੇਰ ਹਰਦੀਪ ਕੌਰ ਨੂੰ ਕੁੱਟਦਿਆਂ ਅਤਿ ਭੱਦੀ ਸ਼ਬਦਾਵਲੀ ਵਿੱਚ ਪੁੱਛਿਆ ਕਿ ਤੂੰ ਕਿਹੜੇ ਖ਼ਸਮਾਂ ਕੋਲ ਤੇ ਕਿੱਥੇ ਰਹਿੰਦੀ ਐਂ? ਤੇ ਬੇਹੱਦ ਭੱਦੀਆਂ ਗਾਲ੍ਹਾਂ ਤੇ ਅਸ਼ਲੀਲ ਗੱਲਾਂ ਕੀਤੀਆਂ ਗਈਆਂ।

ਹਰਦੀਪ ਕੌਰ ਕੋਟਲਾ ਨੇ ਕਥਿਤ ਤੌਰ 'ਤੇ ਦੋਸ਼ ਲਾਇਆ ਕਿ ਪਹਿਲਾਂ ਜੇਲ੍ਹ ਵਿੱਚ ਉਸ ਨੂੰ ਬੁਰੀ ਤਰਾਂ ਕੁੱਟਿਆ ਗਿਆ, ਫੇਰ ਰਾਤ ਨੂੰ 11 ਵਜੇ ਦੇ ਕਰੀਬ ਪੁਲਿਸ ਅਫ਼ਸਰਾਂ ਦੀਆਂ ਜਿਪਸੀਆਂ ਅੱਗੇ ਪਿੱਛੇ ਲਿਜਾ ਕੇ ਬਾਹਰ ਸੜਕਾਂ ਤੇ ਨਹਿਰਾਂ ਦੇ ਕਿਨਾਰੇ 'ਤੇ ਲਿਜਾਇਆ ਗਿਆ ਤੇ ਉਸ ਨੂੰ ਕਿਹਾ ਗਿਆ ਕਿ ਉਸ ਨੂੰ ਘਰੇ ਛੱਡਣ ਜਾ ਰਹੇ ਹਾਂ, ਅੱਧੀ ਰਾਤ ਨੂੰ ਜ਼ਲੀਲ ਕਰਨ ਮੌਕੇ ਹਰਦੀਪ ਕੌਰ ਕੋਟਲਾ ਨੇ ਨਸ਼ੇ ਨਾਲ ਡੱਕੇ ਪੁਲਸੀਆਂ ਤੇ ਨਾਲ ਗਈਆਂ ਸਿਪੈਹਣਾਂ ਨੂੰ ਧਮਕੀ ਦਿੱਤੀ ਕਿ ਜੇ ਉਸ ਨੂੰ ਕੁਝ ਵੀ ਹੋ ਜਾਂਦਾ ਹੈ ਤਾਂ ਇਸ ਦਾ ਹਸ਼ਰ ਬਹੁਤ ਬੁਰਾ ਹੋਵੇਗਾ ਤੇ ਮੇਰੇ ਪੰਜਾਬੀ ਵੀਰ ਤੁਹਾਨੂੰ ਸੁੱਖ ਦੀ ਨੀਂਦ ਨਹੀਂ ਸੌਣ ਦੇਣਗੇ ਤਾਂ ਉਸ ਨੂੰ ਵਾਪਸ ਸੀ ਆਈ ਏ ਸਟਾਫ਼ ਲਿਆ ਕੇ ਰਾਤ ਨੂੰ 12 ਵਜੇ ਦੇ ਕਰੀਬ ਇਰਾਦਾ ਕਤਲ ਕੇਸ ਧਾਰਾ 307 ਵਿੱਚ ਮੜ੍ਹ ਦਿੱਤਾ।

ਇਸ ਮਾਮਲੇ ਵਿੱਚ ਫੜੇ ਗਏ ਮੁੰਡਿਆਂ ਨੂੰ ਰਾਤ ਨੂੰ 11 ਵਜੇ ਤੱਕ ਭਜਾ-ਭਜਾ ਕੇ ਕੁੱਟਿਆ। ਇਸ ਮਾਮਲੇ ਵਿੱਚ ਗ੍ਰਿਫ਼ਤਾਰ ਬਠਿੰਡਾ ਤੋਂ ਕੇਸ਼ਵ ਅਜ਼ਾਦ ਨੇ ਸਾਰੇ ਤਸ਼ੱਦਦ ਬਾਰੇ ਦੱਸਦਿਆਂ ਕਿਹਾ ਕਿ ਇਸ ਅਖੌਤੀ ਪੰਥ ਰਤਨ ਦੇ ਦਲਾਲ ਖਾਕੀਵਰਦੀ ਧਾਰੀਆਂ ਨੂੰ ਅਸੀਂ ਦੱਸ ਦਿੱਤਾ ਕਿ ਅਸੀਂ ਉਸ ਮਿੱਟੀ ਦੇ ਪੁੱਤ ਹਾਂ, ਜੋ ਮਰ ਸਕਦੇ ਹਾਂ, ਪਰ ਝੁਕ ਨਹੀਂ ਸਕਦੇ। ਜਦੋਂ ਕੇਸ਼ਵ ਅਜ਼ਾਦ ਨੂੰ ਉਸ ਦੀ ਮਾਤਾ, ਮਾਸੀ ਤੇ ਨਾਨੀ ਨਾਲ ਮਿਲਾਇਆ ਤਾਂ ਉਹ ਬੇਤਸ਼ਾਹਾ ਤਸ਼ੱਦਦ ਤੋਂ ਪੀੜਤ ਹੋਣ ਦੇ ਬਾਵਜੂਦ ਹਰ ਗੱਲ ਨੂੰ ਮਖੌਲ ਨਾਲ ਦੱਸ ਰਿਹਾ ਸੀ।

ਇਸ 'ਵਾਰਦਾਤ' ਵਿੱਚ ਫ਼ਰੀਦਕੋਟ ਜ਼ਿਲ੍ਹੇ ਦੇ ਪਿੰਡ ਘੁੱਦੂਵਾਲਾ ਦੇ ਕਈ ਨੌਜਵਾਨ, ਔਰਤਾਂ, ਮੁੰਡੇ ਇਰਾਦਾ ਕਤਲ ਕੇਸ ਵਿੱਚ ਸ਼ਾਮਲ ਕੀਤੇ ਗਏ ਹਨ, ਜੋ ਕਿ ਸਾਰੇ ਦੇ ਸਾਰੇ ਰੰਘਰੇਟੇ ਗੁਰੂ ਕੇ ਬੇਟੇ ਹਨ। ਹਰਪ੍ਰੀਤ ਸਿੰਘ ਨਾਬਾਲਗ ਲੜਕਾ ਉਮਰ 14 ਸਾਲ ਦੇ ਨਾਲ ਉਸ ਦੀ 75 ਸਾਲਾ ਨਾਨੀ ਬਲਵੀਰ ਕੌਰ ਪਤਨੀ ਮਿਲਖਾ ਸਿੰਘ ਕੌਮ ਮਜ਼੍ਹਬੀ ਸਿੱਖ, ਇਸੇ ਪਰਵਾਰ ਵਿੱਚੋਂ ਨਿਰਮਲ ਸਿੰਘ ਤੇ ਰਾਜਿੰਦਰ ਸਿੰਘ ਚਚੇਰੇ ਭਰਾ, ਇਸੇ ਪਰਵਾਰ ਵਿੱਚੋਂ ਹੀ ਬੀ ਏ ਪਹਿਲਾ ਸਾਲ ਦਾ ਵਿਦਿਆਰਥੀ ਸਤਨਾਮ ਸਿੰਘ ਵੀ ਸਾਰੇ ਇਸ 'ਪੰਥਕ ਸਰਕਾਰ' ਦਾ ਤਸ਼ੱਦਦ ਸਹਿ ਰਹੇ ਹਨ। ਨਿਰਮਲ ਸਿੰਘ ਤੇ ਰਾਜਿੰਦਰ ਸਿੰਘ ਦੀ ਭੈਣ ਸਿਮਰਨਜੀਤ ਕੌਰ ਵੀ ਇਰਾਦਾ ਕਤਲ ਕੇਸ ਵਿੱਚ ਮੜੀ ਹੋਈ ਹੈ। ਇਸ ਤੋਂ ਇਲਾਵਾ ਇਸ ਪਿੰਡ ਦੀਆਂ ਗੁਰਦੇਵ ਕੌਰ ਤੇ ਪ੍ਰਕਾਸ਼ ਕੌਰ ਵੀ ਇਸ ਕੇਸ ਵਿੱਚ ਸ਼ਾਮਲ ਕੀਤੀਆਂ ਗਈਆਂ ਹਨ। 

ਨਾਬਾਲਗ ਬੱਚੇ ਦੀ 75 ਸਾਲਾ ਨਾਨੀ ਬਲਵੀਰ ਕੌਰ, ਜਿਸ 'ਤੇ ਵੀ ਇਸ ਧਾਰਾ 307 ਤਹਿਤ ਮੁਕੱਦਮਾ ਦਰਜ ਹੈ, ਨਾਲ ਜਦੋਂ ਉਹਨਾਂ ਦੇ ਘਰ ਜਾ ਕੇ ਗੱਲ ਕੀਤੀ ਕਿ ਉਹਨਾਂ ਦੇ ਦੋਹਤੇ ਨੂੰ ਤਾਂ ਸਰਕਾਰ ਜ਼ਮਾਨਤ ਦੇਣੀ ਚਾਹੁੰਦੀ ਹੈ ਤਾਂ ਉਸ ਅੱਖ਼ਰਾਂ ਤੋਂ ਕੋਰੀ ਮਾਤਾ ਨੇ ਜੋ ਜਵਾਬ ਦਿੱਤਾ, ਪੜ੍ਹੇ-ਲਿਖੇ ਵੀ ਲਾਜਵਾਬ ਕਰ ਦਿੱਤੇ। ਮਾਤਾ ਬਲਵੀਰ ਕੌਰ ਨੇ ਕਿਹਾ ਕਿ ਹੁਣ ਤਾਂ ਸਾਰੇ ਹੀ ਮੇਰੇ ਪੁੱਤਰ ਨੇ, ਜੇ ਸਰਕਾਰ ਸਾਰਿਆਂ ਨੂੰ ਛੱਡੂ ਤਾਂ ਹੀ ਮੈਂ ਆਪਣੇ ਦੋਹਤੇ ਨੂੰ ਛੁਡਾਊਂ, ਨਹੀਂ ਤਾਂ ਜਿੱਥੇ ਉਹ ਸਾਰੇ ਬੈਠੇ ਨੇ ਉਹ ਵੀ ਬੈਠਾ ਰਹੂ, ਚਾਹੇ ਫ਼ਾਂਸੀ ਹੋਵੇ ਜਾਂ ਕੁਝ ਹੋਰ। ਮਾਤਾ ਨੇ ਦੱਸਿਆ ਕਿ ਪੁਲਸ ਨੇ ਉਸ ਨੂੰ ਵੀ ਧਮਕੀ ਦਿੱਤੀ ਕਿ ਤੁਹਾਡੇ ਸਾਰੇ ਪਰਵਾਰ ਦੇ ਸਣੇ ਤੇਰੇ 'ਤੇ ਵੀ 307 ਦਾ ਪਰਚਾ ਦਰਜ ਹੈ, ਹੁਣ ਧਰਨੇ ਵਿੱਚ ਆਵੀਂ, ਤੈਨੂੰ ਸਣੇ ਟੱਬਰ ਅੰਦਰ ਕਰਾਂਗੇ। ਤਾਂ ਮਾਤਾ ਨੇ ਜਵਾਬ ਦਿੱਤਾ ਕਿ ਧਰਨੇ ਵਿੱਚ ਤਾਂ ਮੈਂ ਲਾਜ਼ਮੀ ਆਊਂ, ਭਾਵੇਂ 307 ਛੱਡ 350 ਦਾ ਮੁਕੱਦਮਾ ਦਰਜ ਹੋ ਜਾਵੇ। ਜਦੋਂ ਉਸ ਨੂੰ ਇਹ ਪੁੱਛਿਆ ਗਿਆ ਕਿ ਕੀ ਤੁਸੀਂ 307 ਤਹਿਤ ਲੋੜੀਂਦੇ ਮੁਜਰਮ ਹੋਣ ਕਰਕੇ ਲੁਕ ਨਹੀਂ ਰਹੇ ਤਾਂ ਉਹ ਦਾ ਜਵਾਬ ਕਮਾਲ ਸੀ, ਉਹ ਬੋਲੀ 'ਪੁੱਤਰ ਮੈਂ ਜੇ ਜੇਲ੍ਹ ਵਿੱਚ ਸੁੱਟ ਦਿੱਤੀ ਤਾਂ ਵੀ ਕੋਈ ਪਰਵਾਹ ਨਹੀਂ।'

ਇਸ ਕੇਸ ਵਿੱਚ ਫੜੇ ਗਏ ਕੇਸ਼ਵ ਅਜ਼ਾਦ ਦਾ ਪਰਵਾਰ ਪੁਲਸ ਦੀਆਂ ਧਾੜਾਂ ਦੇ ਕਿਸੇ ਵੀ ਵੇਲੇ ਘਰ ਆ ਧਮਕਣ ਤੋਂ ਦੁਖੀ ਹੋ ਕੇ ਪੰਜਾਬ ਛੱਡ ਗਿਆ ਹੈ।

ਪੰਜਾਬ ਨੂੰ ਅਲਵਿਦਾ ਕਹਿ ਗਏ ਬਠਿੰਡਾ ਤੋਂ ਕੇਸ਼ਵ ਅਜ਼ਾਦ ਦੇ ਮਾਪਿਆਂ ਵਿੱਚੋਂ ਉਸ ਦੇ 9ਵੀਂ ਕਲਾਸ ਵਿੱਚ ਪੜ੍ਹਦੇ 14 ਸਾਲਾਂ ਵਰਿੰਦਰ ਕੁਮਾਰ ਨੇ ਫ਼ਰੀਦਕੋਟ ਦੇ ਐੱਸ ਐੱਚ ਓ ਤੇ ਇੱਕ ਹੋਰ ਪੁਲਸ ਅਫ਼ਸਰ 'ਤੇ ਧਮਕੀਆਂ ਦੇਣ ਦੇ ਕਥਿਤ ਦੋਸ਼ ਲਾਉਂਦਿਆਂ ਕਿਹਾ ਕਿ ਇਹਨਾਂ ਪੁਲਸ ਅਫ਼ਸਰਾਂ ਨੇ ਕੇਸ਼ਵ ਅਜ਼ਾਦ ਦੀ ਗ੍ਰਿਫ਼ਤਾਰੀ ਮਗਰੋਂ ਉਹਨਾਂ ਨੂੰ ਡਰਾਉਣ ਲਈ ਕਿਹਾ ਗਿਆ ਕਿ ਜੇ ਤੁਸੀਂ ਇਸ ਨੂੰ ਸਿੱਧੇ ਰਾਹ ਨਾ ਪਾਇਆ ਤਾਂ ਤੁਹਾਡੇ ਨਾਲ ਐਨੀ ਭੈੜੀ ਕਰਾਂਗੇ ਕਿ ਤੁਹਾਡੀਆਂ ਆਉਣ ਵਾਲੀਆਂ ਪੀੜ੍ਹੀਆਂ ਯਾਦ ਰੱਖਣਗੀਆਂ। ਵਰਿੰਦਰ ਕੁਮਾਰ ਨੇ ਦੋਸ਼ ਲਾਇਆ ਕਿ ਪੁਲਸ ਅਫ਼ਸਰ ਨੇ ਕੇਸ਼ਵ ਨੂੰ ਅੱਤਵਾਦੀ ਕਰਾਰ ਦੇਣ ਦੀਆਂ ਧਮਕੀਆਂ ਵੀ ਦਿੱਤੀਆਂ। ਉਸ ਨੇ ਕੇਸ਼ਵ ਦੀ ਬੇਰਹਿਮੀ ਨਾਲ ਕੁੱਟਮਾਰ ਦੀ ਪੁਸ਼ਟੀ ਵੀ ਕੀਤੀ, ਪਰ ਨਾਲ ਹੀ ਉਸ ਨੇ ਕਿਹਾ ਕਿ ਉਹਨਾਂ ਦੇ ਹੌਸਲੇ ਬੁਲੰਦ ਹਨ। 14 ਸਾਲਾ ਬੱਚਾ ਬੇਸ਼ੱਕ ਆਪਣੀ ਮਾਂ ਤੇ ਪਿਤਾ ਨਾਲ ਪੰਜਾਬ ਛੱਡ ਕੇ ਜਾ ਰਿਹਾ ਸੀ, ਪਰ ਉਸ ਦੀ ਇੱਛਾ ਸੀ ਕਿ ਪੰਜਾਬ ਭਰ ਵਿੱਚ ਲੱਗਣ ਵਾਲੇ ਧਰਨਿਆਂ 'ਤੇ ਜ਼ਰੂਰ ਜਾਂਦਾ।

ਜੇਲ੍ਹ ਵਿੱਚ ਵੀ ਇਹਨਾਂ ਵਿਦਿਆਰਥੀਆਂ ਦੇ ਸਬੰਧ ਵਿੱਚ ਮਨੁੱਖੀ ਅਧਿਕਾਰਾਂ ਦੀ ਉਲੰਘਣਾ ਕੀਤੀ ਜਾ ਰਹੀ ਹੈ, ਤਿੰਨ ਦਲਿਤ ਵਿਦਿਆਰਥੀਆਂ, ਜਿਹਨਾਂ ਵਿੱਚ ਇੱਕ ਐੱਮ ਏ ਪਹਿਲਾ ਸਾਲ, ਦੂਜੇ ਦੋ ਬੀ ਏ ਦੇ ਵਿਦਿਆਰਥੀਆਂ ਹਨ, ਉਹਨਾਂ ਦੇ ਪੇਪਰ ਨਾ ਦਿਵਾ ਕੇ ਉਹਨਾਂ ਦਾ ਕੈਰੀਅਰ ਬਰਬਾਦ ਕੀਤਾ ਜਾ ਰਿਹਾ ਹੈ। ਵਿਦਿਆਰਥੀਆਂ ਨੂੰ ਖਾਣਾ ਖਾਣ ਲਈ ਬਰਤਨ ਆਦਿ ਵੀ ਨਹੀਂ ਦਿੱਤੇ ਜਾ ਰਹੇ। ਬੀ. ਕਲਾਸ ਲਈ ਸ਼ਰਤਾਂ ਪੂਰੀਆਂ ਕਰਦੀ ਐੱਮ ਏ. ਦੀ ਵਿਦਿਆਰਥਣ ਹਰਦੀਪ ਕੌਰ ਨੂੰ ਅਖ਼ਬਾਰ ਵੀ ਪੜ੍ਹਨ ਲਈ ਨਹੀਂ ਦਿੱਤਾ ਜਾ ਰਿਹਾ ਹੈ। ਐਮੈਨਸਟੀ ਇੰਟਰਨੈਸ਼ਨਲ ਦੇ ਮੈਂਬਰ ਵੇਦ ਪ੍ਰਕਾਸ਼ ਗੁਪਤਾ ਨੇ ਵਿਦਿਆਰਥੀਆਂ ਨਾਲ ਕੀਤੇ ਗਏ ਜ਼ਾਲਮਾਨਾ ਵਿਹਾਰ 'ਤੇ ਉਹਨਾਂ ਨਾਲ ਹੁਣ ਅੱਤਵਾਦੀਆਂ ਵਾਂਗ ਪੇਸ਼ ਆਉਣ ਦੀ ਘਟਨਾ ਦੀ ਸਖ਼ਤ ਨਿੰਦਿਆ ਕਰਦਿਆਂ ਜਾਗਦੀਆਂ ਜ਼ਮੀਰਾਂ ਵਾਲਿਆਂ ਨੂੰ ਆਵਾਜ਼ ਬੁਲੰਦ ਕਰਨ ਲਈ ਕਿਹਾ ਹੈ।

ਦੂਜੇ ਪਾਸੇ ਕੁਝ ਸਮਾਂ ਪਹਿਲਾਂ ਇੱਕ ਬੱਸ ਦੇ ਡਰਾਇਵਰ, ਕੰਡਕਟਰ ਵੱਲੋਂ ਵਿਦਿਆਰਥਣਾਂ ਨਾਲ ਬਦਤਮੀਜ਼ੀ ਦੇ ਮਾਮਲੇ ਵਿੱਚ ਜੂਝੇ ਪੀ ਐੱਸ ਯੂ ਦੇ ਆਗੂ ਰਾਜਿੰਦਰ ਸਿੰਘ ਨੂੰ ਅਦਾਲਤ ਵੱਲੋਂ ਭਗੌੜੇ ਕਰਾਰ ਦੇਣ ਤੋਂ ਬਾਅਦ ਉਸ ਦੇ ਪਿੰਡ ਦੀਪ ਸਿੰਘ ਵਾਲਾ ਸਥਿਤ ਉਹਨਾਂ ਦੇ ਵੱਡੀ ਗਿਣਤੀ ਪੁਲਸ ਵੱਲੋਂ ਛਾਪੇਮਾਰੀ ਕਰਕੇ ਉਸ ਦੀ ਪਤਨੀ ਜਗਰੂਪ ਕੌਰ ਤੇ ਨਿੱਕੇ ਜਿਹੇ ਬੱਚੇ ਜਰਨੈਲ ਸਿੰਘ ਨੂੰ ਗ੍ਰਿਫ਼ਤਾਰ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ, ਪਰ ਪਿੰਡ ਵਾਲਿਆਂ ਦੇ ਇਕੱਠ ਨੇ ਪੁਲਸ ਦੀ ਕੋਸ਼ਿਸ਼ ਨੂੰ ਨਾਕਾਮ ਬਣਾ ਦਿੱਤਾ। ਜਗਰੂਪ ਕੌਰ ਨੇ ਦੱਸਿਆ ਕਿ ਮੋਗਾ ਕਾਂਡ ਸਬੰਧੀ ਦਿੱਤੇ ਤੇ ਹਾਕਮਾਂ ਦੀਆਂ ਬੱਸਾਂ ਦੇ ਕਰਿੰਦਿਆਂ ਦੇ ਧਾਕੜ ਰਵੱਈਏ ਖਿਲਾਫ ਦਿੱਤੇ ਜਾ ਰਹੇ ਧਰਨਿਆਂ ਲਈ ਉਹ ਦਿਨ-ਰਾਤ ਇੱਕ ਕਰਕੇ ਤਿਆਰੀਆਂ ਕਰ ਰਹੇ ਹਨ। ਬੇਤਹਾਸ਼ਾ ਤਸ਼ੱਦਦ ਦੇ ਬਾਵਜੂਦ ਸਲਾਖ਼ਾਂ ਪਿੱਛੇ ਸੁੱਟੇ ਵਿਦਿਆਰਥੀਆਂ ਤੇ ਉਹਨਾਂ ਦੇ ਮਾਪਿਆਂ ਤੇ ਪਿੰਡ ਵਾਲਿਆਂ ਦੇ ਹੌਸਲੇ ਬੁਲੰਦ ਹਨ ਤੇ ਅੰਦੋਲਨ ਵਿਚ ਡਟੇ ਹੋਏ ਹਨ। ਓਧਰ ਪੁਲਸ ਵੀ ਹਾਕਮਾਂ ਦੇ ਨਿਰਦੇਸ਼ 'ਤੇ ਹਰ ਹੀਲੇ ਹਰ ਅੰਦੋਲਨ ਨੂੰ ਕੁਚਲਣ ਦੀ ਕੋਸ਼ਿਸ਼ ਵਿੱਚ ਹੈ।