ਏਡਸ ਅਤੇ ਨਸ਼ਿਆਂ ਦੇ ਖਿਲਾਫ਼ ਸਰਗਰਮ ਇੱਕ ਹੋਰ ਕਾਫ਼ਿਲਾ

ਫਿਲਮੀ ਹੀਰੋ ਸਤੀਸ਼ ਕੌਲ ਨੇ ਵੀ ਕੀਤਾ ਹਰ ਕਦਮ ਨਾਲ ਤੁਰਨ ਦਾ ਐਲਾਨ

ਜ਼ਿੰਦਗੀ ਫਿਲਮੀ ਦੁਨੀਆ ਦੇ ਰੰਗੀਨ ਮਾਹੌਲ ਵਿੱਚ ਗੁਜ਼ਰੀ ਹੋਵੇ ਤਾਂ ਬੁਢਾਪੇ ਦੀਆਂ ਕੌੜੀਆਂ ਹਕੀਕਤਾਂ ਦਾ ਸਾਹਮਣਾ ਕਰਨਾ ਆਸਾਨ ਨਹੀਂ ਹੁੰਦਾ। ਪਰ ਕੁਝ ਲੋਕ ਇੱਕ ਵਾਰ ਫੇਰ ਨਿੱਤਰੇ ਨੇ  ਤੁਫਾਨਾਂ ਦੇ ਬਾਵਜੂਦ ਹਨੇਰੀਆਂ ਰਾਤਾਂ ਵਿੱਚ ਚਿਰਾਗ ਜਗਾਉਣ। ਦਿਲਚਸਪ ਗੱਲ ਹੈ ਕਿ ਇਹ ਹੁਣ ਪੂਰਾ ਕਾਫ਼ਿਲਾ ਬਣ ਗਿਆ ਹੈ ਜਿਸਦਾ ਨਿਸ਼ਾਨਾ ਹੈ ਪੰਜਾਬ ਵਿੱਚੋਂ ਨਸ਼ਿਆਂ ਦਾ ਕੋਹੜ ਵਢਣਾ  ਅਤੇ ਪੰਜਾਬ ਦੀ ਪਾਵਨ ਧਰਤੀ ਨੂੰ ਪੂਰੀ ਤਰ੍ਹਾਂ ਏਡਸ ਤੋਂ ਰਹਿਤ ਕਰਨਾ।  ਕਾਫ਼ਿਲੇ ਦੀ ਅਗਵਾਈ ਕਰ ਰਹੇ ਹਨ ਲੁਧਿਆਣਾ ਵਿਚਲੇ ਕੋਟਨਿਸ ਹਸਪਤਾਲ ਦੇ ਮੁਖੀ ਡਾਕਟਰ ਇੰਦਰਜੀਤ ਸਿੰਘ ਢੀੰਗਰਾ, ਪੰਜਾਬੀ ਫਿਲਮੀ ਦੁਨੀਆ ਦੀ ਮੰਨੇ ਪ੍ਰਮੰਨੇ ਹੀਰੋ ਸਤੀਸ਼ ਕੌਲ ਅਤੇ ਕੈੰਸਰ ਵਰਗੀ ਬਿਮਾਰੀ ਨੂੰ ਵੀ ਹਰਾ ਦੇਣ ਵਾਲੀ ਡਾਕਟਰ ਮੈਡਮ ਐਸ ਕੇ ਬਲ।

ਇਸ ਕਾਫ਼ਿਲੇ ਨੇ ਅੱਜ ਲੁਧਿਆਣਾ ਦੇ ਸਿਵਲ ਹਸਪਤਾਲ ਵਿੱਚ  ਕੁਝ ਉਹਨਾਂ ਲੋਕਾਂ ਨੂੰ ਵੀ ਮੀਡੀਆ ਸਾਹਮਣੇ ਪੇਸ਼ ਕੀਤਾ ਜਿਹਨਾਂ ਨੇ ਇਸ ਕਾਫ਼ਿਲੇ ਆਸਰੇ ਨਸ਼ਿਆਂ ਦੀਆਂ ਜੰਜੀਰਾਂ ਨੂੰ ਤੋੜ ਕੇ ਇਕ ਨਵੀਂ ਜਿੰਦਗੀ ਸ਼ੁਰੂ ਕੀਤੀ ਹੈ। ਨਸ਼ਾ ਮੁਕਤ ਸਿਹਤਮੰਦ ਜਿੰਦਗੀ। ਸਮਾਗਮ ਵਿੱਚ ਫਿਲਮੀ ਹੀਰੋ ਸਤੀਸ਼ ਕੌਲ ਨੇ ਸਾਰੀਆਂ ਦੇ ਸਾਹਮਣੇ ਵਾਅਦਾ ਕੀਤਾ ਕਿ ਉਹ ਇਸ ਕਾਫ਼ਿਲੇ ਦੇ ਨਾਲ ਪੰਜਾਬ ਦੀ ਹਰ ਨੁੱਕਰ, ਹਰ ਗਾਲੀ ਵਿੱਚ ਜਾਣਗੇ ਭਾਵੇਂ ਉਹਨਾਂ ਨੂੰ ਪੈਦਲ ਹੀ ਕਿਓਂ ਨਾ ਤੁਰਨਾ ਪਵੇ। ਉਹਨਾਂ ਸਟੇਜ ਤੋਂ ਇਹ ਐਲਾਨ ਵੀ ਕੀਤਾ ਕਿ ਜੇ ਉਹਨਾਂ ਨੂੰ ਪਿਤਾ ਦੇ ਰੋਲ ਵਾਲੀਆਂ ਕੁਝ ਫਿਲਮਾਂ ਮਿਲੀਆਂ ਤਾਂ ਉਸ ਆਮਦਨ ਵਿੱਚੋਂ ਵੀ ਉਹ ਘਟੋਘੱਟ ਦਸ ਫੀਸਦੀ ਰਕਮ ਇਸ ਨੇਕ ਮਕਸਦ ਲਈ ਵੀ ਜਰੂਰ ਦੀਆ ਕਰਨਗੇ।

ਸਮਾਗਮ ਵਿੱਚ ਡਿਊਟੀ ਨੂੰ ਇਬਾਦਤ ਸਮਝਣ ਵਾਲੇ ਸਿਵਲ ਹਸਪਤਾਲ ਲੁਧਿਆਣਾ ਦੇ ਡਾਕਟਰ ਸੂਚ ਵੀ ਮੌਜੂਦ ਸਨ ਅਤੇ ਕਈ ਹੋਰ ਸ਼ਖਸੀਅਤਾਂ ਵੀ। --ਰੈਕਟਰ ਕਥੂਰੀਆ //ਐਸ ਕੇ ਗੋਗਨਾ 

ਕੁਝ ਹੋਰ ਵੇਰਵਾ ਅਗਲੀ ਪੋਸਟ ਵਿੱਚ