Monday, March 12, 2012

ਵਿਕਾਸ ਏਜੰਡੇ ਨੇ ਨਾਕਾਮ ਕੀਤੀਆਂ ਵਿਰੋਧ ਦੀਆਂ ਹਨੇਰੀਆਂ

ਸੁਖਬੀਰ ਬਾਦਲ:ਜਿੰਮੇਵਾਰੀਆਂ ਵੀ ਵਧੀਆਂ ਅਤੇ ਚੁਨੌਤੀਆਂ ਵੀ
ਜਗ ਬਾਣੀ ਚੋਂ ਧੰਨਵਾਦ ਸਹਿਤ
ਪੰਜਾਬ ਵਿੱਚ ਵੀ ਲੋਕ ਫਤਵਾ ਪੂਰੀ ਤਰ੍ਹਾਂ ਕਾਂਗਰਸ ਪਾਰਟੀ ਦੇ ਖਿਲਾਫ਼ ਗਿਆ ਹੈ. ਇਹ ਗੱਲ ਵੱਖਰੀ ਹੈ ਕੀ ਇਸ ਹਾਰ ਦੇ ਬਾਵਜੂਦ ਕਾਂਗਰਸ ਪਾਰਟੀ ਨੇ ਆਪਣੀਆਂ ਨੀਤੀਆਂ ਅਤੇ ਰਨ ਨੀਤੀਆਂ ਨੂੰ ਮੁੜ ਵਿਚਾਰਨ ਦੀ ਥਾਂ ਇਸ ਹਾਰ ਦੇ ਦੋਸ਼ ਹੋਰਨਾਂ ਵੱਲ ਲਾਉਣੇ ਸ਼ੁਰੂ ਕਰ੍ਦਿੱਤੇ ਹਨ. 6 ਮਾਰਚ 2012 ਨੂੰ ਆਏ ਚੋਣ ਨਤੀਜਿਆਂ ਨੇ ਇੱਕ ਵਾਰ ਫੇਰ ਇਹ ਸਾਬਿਤ ਕਰ ਦਿੱਤਾ ਹੈ ਕਿ ਜਿਹੜੀਆਂ ਹਨੇਰੀਆਂ ਨਜ਼ਰ ਆਉਂਦੀਆਂ ਹਨ ਓਹ ਹੋਰ ਹੁੰਦੀਆਂ ਹਨ ਅਤੇ ਜਿਹੜੇ ਤੁਫਾਨ ਲੋਕਾਂ ਦੇ ਦਿਲਾਂ ਅਤੇ ਦਿਮਾਗਾਂ ਵਿੱਚ ਚੱਲ ਰਹੇ ਹੁੰਦੇ ਹਨ ਓਹ ਬਿਲਕੁਲ ਹੀ ਹੋਰ ਹੁੰਦੇ ਹਨ. ਇਹਨਾਂ ਨਤੀਜਿਆਂ ਨੇ ਸਿੱਖ ਸਿਆਸਤ ਦੇ ਥੰਮ ਪ੍ਰਕਾਸ਼ ਸਿੰਘ ਬਾਦਲ ਦੇ  ਉਸ ਬਿਆਨ ਨੂੰ ਵੀ ਸਚ ਕਰ ਦਿਖਾਇਆ ਹੈ ਕਿ ਹੁਣ ਓਹ ਕਾਂਗਰਸ ਨੂੰ ਦੋਬਾਰਾ ਸੱਤਾ ਵਿੱਚ ਨਹੀਂ ਆਉਣ ਦੇਣਗੇ. ਇਹ ਬਿਆਨ ਉਹਨਾਂ ਪਿਛਲੀਆਂ ਵਿਧਾਨ ਸਭਾ ਚੋਣਾਂ ਦੇ ਨਤੀਜਿਆਂ ਮੌਕੇ ਮੀਡੀਆ ਨਾਲ ਗੱਲ ਕਰਦਿਆਂ ਦਿੱਤਾ ਸੀ. ਉਸ ਬਿਆਨ ਤੋਂ ਬਾਅਦ ਇੱਕ ਵਾਰ ਮੁੜ ਮਿਲੀ ਜਿੱਤ ਨੂੰ ਦੇਖ ਕੇ ਪੰਜਾਬ ਵਿੱਚ ਘਟੋਘੱਟ 25 ਸਾਲ ਤੱਕ ਅਕਾਲੀ ਦਲ ਨੂੰ ਸੱਤਾ ਵਿੱਚ ਰੱਖਣ ਦਾ ਸੁਪਨਾ ਹੁਣ ਸਚ ਮੁਚ ਸਾਕਾਰ ਹੁੰਦਾ ਨਜ਼ਰ ਆਉਂਦਾ ਹੈ. ਇਸ ਸੁਪਨੇ ਨੂੰ ਸਾਕਾਰ ਕਰਨ ਲਈ ਚੁੱਕੇ ਗਏ  ਕਦਮਾਂ ਨੂੰ ਮਿਲੀ ਸਫਲਤਾ ਵਿੱਚ ਪਾਰਟੀ ਦੇ ਹਾਈ ਟੈਕ ਆਗੂ ਸੁਖਬੀਰ ਸਿੰਘ ਬਾਦਲ ਨੇ ਅਹਿਮ ਭੂਮਿਕਾ ਨਿਭਾਈ ਹੈ. ਇਸ ਜਿੱਤ ਨਾਲ ਨੌਜਵਾਨ ਆਗੂ ਵੱਜੋਂ ਰਾਜਨੀਤੀ ਵਿੱਚ ਆਏ ਸੁਖਬੀਰ ਸਿੰਘ ਬਾਦਲ ਬਾਦਲ ਦਾ ਸਿਆਸੀ ਕੱਦ ਹੋਰ ਉੱਚਾ ਹੋ ਕੇ ਸਾਹਮਣੇ ਆਇਆ ਹੈ. 
ਜੋਸ਼ ਵਿੱਚ ਪ੍ਰੋੜਤਾ ਅਤੇ ਗੰਭੀਰਤਾ ਵਾਲੇ ਗੁਣ ਵੀ ਸ਼ਾਮਿਲ ਹੋ ਗਏ ਹਨ.  ਵਿਰੋਧੀਆਂ ਨੂੰ ਸਿਰਫ ਆਪਣੇ ਅਮਲਾਂ ਨਾਲ ਖਾਮੋਸ਼ ਕਰਨ ਵਾਲੇ ਸੁਖਬੀਰ ਸਿੰਘ ਬਾਦਲ ਦੀ ਇਸ ਪ੍ਰਾਪਤੀ ਬਾਰੇ ਰੋਜ਼ਾਨਾ ਜਗ ਬਾਣੀ ਨੇ ਵੀ ਇੱਕ ਅਹਿਮ ਰਿਪੋਰਟ ਪ੍ਰਕਾਸ਼ਿਤ ਕੀਤੀ ਹੈ. ਆਪਣੇ ਇੱਕ ਪੁਰਾਣੇ ਪੱਤਰਕਾਰ ਸਾਥੀ ਵੱਲੋਂ ਲਿਖੀ ਇਸ ਰਿਪੋਰਟ ਵਾਲੀ ਖਬਰ ਦੀ ਕਤਰਨ ਨੂੰ ਇਥੇ ਵੀ ਪ੍ਰਕਾਸ਼ਿਤ ਕੀਤਾ ਜਾ ਰਿਹਾ ਹੈ ਜਿਸਨੂੰ ਵੱਡਿਆਂ ਕਰ ਕੇ ਦੇਖਣ ਲਈ ਤੁਸੀਂ ਇਸ ਤਸਵੀਰ ਤੇ ਕਲਿੱਕ ਕਰ ਸਕਦੇ ਹੋ. ਇਸ ਖਬਰ ਦੇ ਨਾਲ ਹੀ ਇਥੇ ਇਹ ਯਾਦ ਕਰਾਉਣਾ  ਜਰੂਰੀ ਲੱਗ ਰਿਹਾ ਹੈ ਕਿ ਇਸ ਜਿੱਤ ਨਾਲ ਅਕਾਲੀ ਦਲ ਅਤੇ ਭਾਜਪਾ ਗਠਜੋੜ ਦੇ ਨਾਲ ਨਾਲ ਸੁਖਬੀਰ ਸਿੰਘ ਬਾਦਲ ਦੀਆਂ ਜ਼ਿੰਮੇਵਾਰੀਆਂ ਵੀ ਪਹਿਲਾਂ ਨਾਲੋਂ ਕਿਤੇ ਜਿਆਦਾ ਵਧ ਗਈਆਂ ਹਨ ਅਤੇ ਚੁਨੌਤੀਆਂ ਵੀ ਕਿਓਂਕਿ ਹੁਣ ਪੰਜਾਬ ਸਰਕਾਰ ਤੋਂ ਲੋਕਾਂ ਦੀਆਂ ਆਸਾਂ ਉਮੀਦਾਂ ਵਿੱਚ ਵੀ ਹੋਰ ਵਾਧਾ ਹੋਇਆ ਹੈ. ਜੇ ਲੋਕ ਪੱਖੀ ਨੀਤੀਆਂ ਨੂੰ ਸੁਹਿਰਦਤਾ ਨਾਲ ਲਾਗੂ ਕੀਤਾ ਗਿਆ ਤਾਂ ਨਿਸਚੇ ਹੀ ਪੰਜਾਬ ਵਿੱਚ ਅਕਾਲੀ ਸੱਤਾ ਦੀ ਪਕਿਆਈ ਹੋਰ ਮਜਬੂਤ ਅਤੇ ਸਥਾਈ ਹੋ ਜਾਵੇਗੀ.
ਇਸਦੇ ਨਾਲ ਹੀ ਆਮ ਲੋਕਾਂ ਨਾਲ ਲੰਮੇ ਸਮੇਂ ਤੋਂ ਜੁੜੇ ਹੋਏ ਮਿਹਨਤੀ ਅਤੇ ਇਮਾਨਦਾਰ ਸਾਖ ਵਾਲੇ ਆਗੂ ਮਾਸਟਰ ਮੋਹਨ ਲਾਲ ਹੁਰਾਂ ਵੱਲੋਂ ਲਿਖੇ ਲੇਖ ਦਾ ਜ਼ਿਕਰ ਵੀ ਜ਼ਰੂਰੀ ਹਾਈ. "ਸਭ ਅਟਕਲਾਂ 'ਤੇ ਪਾਣੀ ਫੇਰਿਆ ਅਕਾਲੀ-ਭਾਜਪਾ ਗਠਜੋੜ ਨੇ" ਵਾਲੇ ਸਿਰਲੇਖ ਹੇਠਲੇ ਇਸ ਲੇਖ ਨੂੰ ਜਗ ਬਾਣੀ ਨੇ ਆਪਣੇ ਸੰਪਾਦਕੀ ਸਫੇ 'ਤੇ ਪ੍ਰਕਾਸ਼ਿਤ ਕੀਤਾ ਹੈ.ਇਸ ਲੇਖ ਵਿੱਚ ਮਾਸਟਰ ਜੀ ਨੇ ਆਪਣੀ ਜਾਨੀ ਪ੍ਚਾਨੀ ਸ਼ੈਲੀ ਵਿੱਚ ਬੜੀ ਹੀ ਸਾਦਗੀ ਨਾਲ ਇਸ ਸਾਰੇ ਮਾਮਲੇ ਬਾਰੇ ਵਿਸਥਾਰ ਨਾਲ ਚਾਨਣਾ ਪਾਇਆ ਹੈ.ਇਸ ਲੇਖ ਨੂੰ ਪੜ੍ਹ ਕੇ ਇੱਕ ਵਾਰ ਫਿਰ ਪ੍ਰਿੰਟ ਮੀਡੀਆ ਦੇ ਨਾਲ ਨਾਲ ਇਲੈਕ੍ਟ੍ਰਾਨਿਕ ਮੀਡੀਆ ਦੀ ਨਿਰਪੱਖਤਾ ਅਤੇ ਸੁਹਿਰਦਤਾ ਬਾਰੇ ਕਈ ਸੁਆਲ ਪੈਦਾ ਹੁੰਦੇ ਹਨ. ਐਗਜ਼ਿਟ ਪੋਲਾਂ ਦੀ ਲੋੜ, ਇਹਨਾਂ ਦੇ ਲੁਕਵੇਂ ਮੰਤਵਾਂ ਅਤੇ ਇਹਨਾਂ ਦੀ ਹਕੀਕਤ ਬਾਰੇ ਵੀ ਇਸ਼ਾਰੇ ਮਿਲਦੇ ਹਨ ਇਸੇ ਲੇਖ ਵਿੱਚ ਜਿਹਨਾਂ ਨੂੰ ਸਮਝ ਕੇ ਮਹਿਸੂਸ ਹੁੰਦਾ ਹੈ ਕੀ ਕਿਸ ਤਰ੍ਹਾਂ ਲੋਕਰਾਜ ਦੀ ਹਵਾ ਨੂੰ  ਆਪੋ ਆਪਣੀਆਂ ਮਨਮਰਜ਼ੀਆਂ ਅਤੇ ਇਛਾਵਾਂ  ਮੁਤਾਬਿਕ ਨਵੇਂ ਨਵੇਂ ਰੁਖ ਦੇ ਕੇ ਮਨਚਾਹੇ ਰਾਹਾਂ 'ਤੇ ਚਲਾਉਣ ਦੇ "ਉਪਰਾਲੇ" ਕਿੰਨਾ "ਸੁਚੇਤ" ਹੋ ਕੇ "ਪੂਰੀ ਗੰਭੀਰਤਾ ਨਾਲ" ਕੀਤੇ ਜਾਂਦੇ ਹਨ. ਇਸ ਵਾਰ ਇਹਨਾਂ ਐਗਜ਼ਿਟ ਨਤੀਜਿਆਂ ਦਾ ਵੀ ਗਲਤ ਹੋਣਾ ਲੋਕ ਰਾਜ ਦੀ ਸਿਹਤ ਲਈ ਇੱਕ ਚੰਗੀ ਖਬਰ ਹੈ. ਉਮੀਦ ਹੈ ਕਿ ਭਵਿੱਖ ਵਿੱਚ ਇਹ ਹਥਿਆਰ ਵੀ ਪੂਰੀ ਤਰਾਂ ਲੋਕਾਂ ਦੀ ਮਰਜ਼ੀ ਸਾਹਮਣੇ ਵਿਅਰਥ ਹੋ ਜਾਵੇਗਾ. -ਰੈਕਟਰ ਕਥੂਰੀਆ    

No comments: